Return   Facebook   Zip File

Obligatory

(Mesti disebut sekali sehari antara tengah hari enggau matapanas padam. Orang ti nyebut sambiang tu patut bediri sereta nungaka mua nuju Qiblih.)

Aku nyadi saksi, O Petara aku, Nuan udah nempa aku ngambika aku nemu Nuan lalu nyembah Nuan. Aku besaksi, ke diatu, ke pengurang kuasa aku ngagai pengering Nuan, sereta ke penyeranta aku ngagai pengeraja Nuan.

Nadai Petara bukai tang Nuan, Penulung lebuh Tusah, Pengibun-Diri.

#10537
- Bahá'u'lláh

 

(Patut disebut sekali dalam kandang duapuluh empat jam).

Barang sapa ti deka nyebut sambiang tu! Uji iya bediri lalu nunga ngadap Petara, lalu lebuh iya ti bediri ba endur diri, uji iya merening ke kanan enggau ke kiba, baka ti nganti penatai pengasih Tuhan iya, ti Pemadu Bepengasih, ti Penyinu. Udah nya uji iya nyebut:

O Nuan Tuhan ke semua nama lalu Pengaga semua Serega! Aku minta enggau pemaruh ati ari Nuan nengah sida ti Endang Entigis-Hari Kah Nuan ti enda dipeda, ti Pemadu Tinggi, ti Pemadu Tampak, awakka sambiang aku nyadi api ti nunu tirai ti udah nutup aku ari pemajik Nuan, lalu nyadi panchar ti ngiring aku ngagai tasik penatai Nuan.

Udah nya uji iya ngangkatka jari iya minta ngadap Petara - berekat sereta tinggi meh Iya - lalu nyebut:

O Nuan ti Dikinginka dunya sereta ti Dikerinduka semua menua! Nuan meda aku nunga ngadap Nuan, Ialu nadai ditanggam sebarang orang bukai kelimpah ari Nuan, lalu bepegai ba rambu Nuan, ti endur riak Iya seluruh utai tempa udah begetar. Aku tu nembiak Nuan, O Tuhan aku, sereta anak nembiak Nuan. Peda aku bediri sedia deka ngereja peneka Nuan enggau pengingin Nuan, minta nadai utai bukai kelimpah ari penyamai peneka Nuan. Aku bebendar minta Nuan ari Tasik pengasih Nuan sereta ari Bintang-Siang Hari berekat Nuan ngintu nembiak Nuan nitihka peneka enggau pengelantang Nuan. Ngena penegap Nuan ti jauh ngelui ari semua tela enggau puji! Sebarang utai ti dipegari Nuan endang buah ati aku lalu dikerinduka semengat aku. O Petara, Petara aku! Anang meda pengandal aku enggau kereja aku, tang semina peda peneka Nuan ti udah nyerangkap semua serega enggau dunya. Ngena Nama Nuan ti Pemadu Besai, O Nuan Tuhan ke semua menua! Aku semina inginka utai ti dikingin Nuan, lalu semina rinduka utai ti dikerindu Nuan.

Udah nya uji iya nyerugang, lalu kening iya meremi ngagai lantai (tanah), lalu nyebut:

Tinggi meh Nuan ngelui ari ading semua orang bukai kelimpah ari Nuan-Empu, lalu ari pemereti utai bukai kelimpah ari Nuan.

Udah nya uji iya bediri lalu nyebut:

Gaga sambiang aku, O Tuhan aku, nyadika panchur ai pengidup ke alai aku tau idup meruan se-agi-agi Perintah Nuan bisi, lalu tau nyebut Nuan di tiap-tiap dunya ba semua dunya Nuan.

Udah nya uji iya sekali agi nengkadahka jari iya minta, lalu nyebut:

O Nuan ke alai lebuh beserara ari Nuan udah ngasuh ati enggau semengat anchur, lalu nengah api pengerindu Nuan seluruh dunya udah ditungkun! Aku bebendar minta ari Nuan ngena Nama Nuan ke alai Nuan udah ngalahka semua utai tempa, anang matak ari aku utai ti bisi ba Nuan, O Nuan Siku ti nguasa semua mensia! Nuan meda O Tuhan aku, temuai tu berumban ngagai rumah iya ti tinggi di baruh ayung pegai-perintah Nuan sereta dikelingi kandang pengasih Nuan; lalu iya ti bedosa tu ngiga tasik pengampun Nuan; lalu siku ti beli tu ngiga panggau penampak Nuan; lalu utai tempa ti seranta tu ngiga dijir pengaya Nuan. Nuan meh bekuasa merintah sebarang utai ti dikedeka Nuan. Aku bempu saksi ianya Nuan meh patut dipuji ba kereja Nuan, sereta patut dititih meh tangkan atur Nuan, lalu meruan nadai sekat ba peminta Nuan.

Udah nya uji iya ngangkatka jari iya, lalu nyebut tiga kali “Alláh-u-Abhá”. Udah nya uji iya meremika diri lalu jari iya diengkah ba palapatung ngadap Petara— beberekat sereta tinggi meh Iya— lalu nyebut:

Nuan meda, O Petara aku, bakani roh aku udah begetar ba kaki jari aku enggau perengka tubuh aku, dalam pengelengau iya deka nyembah Nuan, lalu dalam pengingin iya deka ngingatka Nuan sereta muji Nuan; baka ni iya besaksika utai ti endur Dilah Tangkan-ajar Nuan udah nyadika saksi dalam perintah lekajaku Nuan sereta dalam serega penemu Nuan. Aku rindu, dalam gaya tu, O Tuhan aku, minta enggau pemaruh ati ari Nuan semua utai ti dikimisi Nuan, awakka aku tau nunjukka penyeranta aku, lalu ngemesaika pementas Nuan enggau pengaya Nuan, lalu tau ngaku pengurang kuasa aku Ialu ngayanka kuasa Nuan enggau penegap Nuan.

Udah nya uji iya bediri lalu ngangkatka jari iya dua kali minta, Ialu nyebut:

Nadai Petara bukai tang Nuan, ti Pemadu Tegap, ti Pemadu-Mentas. Nadai Petara bukai tang Nuan, ti Merintah, kenyau ari pun lalu ba pengujung. O Petara, Petara aku! Pengampun Nuan udah ngasuh aku berani, lalu pengasih Nuan udah ngeringka aku, Ialu kangau Nuan udah ngenanika aku, lalu berekat Nuan udah ngangkatka aku sereta ngiring aku nuju Nuan. Sapa meh aku, enti enda tegal nya, berani bediri ba pintu penama nuju nengeri penyemak Nuan, tauka nungaka mua aku ngadap penampak ti manchar ari serega peneka Nuan? Nuan meda, O Tuhan aku, utai idup ti papa tu nekung pintu berekat Nuan, lalu semengat ti tau lela tu ngiga sungai pengidup ti meruan ari jari pementas Nuan. Enggi Nuan nya meh perintah ba sebarang maya, O Nuan Tuhan ke semua nama; lalu enggi aku nya meh nyerahka diri sereta nerima enggau pengaga peneka Nuan, O Penempa serega!

Udah nya uji iya ngangkatka jari iya tiga kali, lalu nyebut:

Lebih Bekuasa meh Petara ari atas genap iku ti bekuasa!

Udah nya uji iya nyerugang, lalu kening iya meremi ngagai lantai (tanah), lalu nyebut:

Kelalu tinggi meh Nuan ke dipuji sida ti semak enggau Nuan niki ngagai serega besemak enggau Nuan, tauka burung ati sida ti angkunka Nuan datai ba pintu penama Nuan. Aku besaksi ianya Nuan meh suchi ngelui semua pemanah-ulah sereta kudus ngelui semua nama. Nadai Petara bukai tang Nuan ti Pemadu Tinggi ti Pemadu Mulia.

Udah nya uji iya nuduk kediri lalu nyebut:

Aku besaksi ba utai ti udah disaksika semua utai tempa, enggau Raban Malikat di atas, enggau bala ti diau ba Serega ti pemadu-tinggi, Ialu ngelui ari atas sida nya, Dilah Pemesai nyaempu ari Bingkai-Langit ti pemadu mulia, ianya Nuan meh Petara, lalu nadai Petara bukai kelimpah ari Nuan lalu Iya Siku ti udah dipegari ianya Penyelai ti Dipelalai, Lambang Pesaka, ke nengah Iya urup B enggau E (Be!) udah disambung sereta bejantil. Aku besaksi ianya Iya meh ti Ngempu nama ti udah ditulis ngena Pen ti Pemadu Tinggi, lalu Siku ti udah dikenang dalam semua Kitab Petara, Tuhan ba Kerusi-Raja ti di atas enggau ba tanah di baruh.

Udah nya uji iya bediri lurus lalu nyebut:

O Tuhan ke semua pengidup sereta Ngempu semua utai ti dipeda enggau ti enda dipeda! Nuan udah beratika ai mata aku enggau sera nyawa aku, sereta ninga demuh dada aku, enggau sedan sabak aku, lalu nemu penyinu ati aku. ngena penegap Nuan! Penyalah aku udah nagang aku ari ke tebatak semak ngagai Nuan; lalu dosa aku udah ngerindang aku jauh ari panggau pengudus Nuan. Pengerindu Nuan, O Tuhan aku, udah ngaya ka aku, lalu beserara ari Nuan udah ngerusak aku, lalu jauh ari Nuan udah nganguska aku. Aku minta kasih Nuan ngena kelai tapa-kaki Nuan ba kampung-jerung tu, lalu ngena lekajaku "Ditu meh aku. Ditu meh aku," ti udah disebut Bala ti dipilih Nuan dalam pengeluas-rampa dunya tu, lalu ngena seput Pegari Penemu Nuan sereta tiup ribut ti begadai-gadai ba Dini-hari Pengayan Nuan, kemendarka aku merening pemajik Nuan lalu ngasika semua utai dalam Kitab Nuan.

Udah nya uji iya nyebut “Alláh-u-Abhá” tiga kali, lalu meremi sereta jari iya diengkah ba pala patung, lalu nyebut:

Puji meh ke Nuan, O Petara aku, laban Nuan udah mantu aku ngingatka Nuan lalu muji Nuan, lalu udah ngasuh aku ngelala Iya Siku ti nyadi Entigis-Hari tanda-tanda Nuan, Ialu udah ngasuh aku meremika baruh lebuh betunga enggau Kuasa-Tuhan Nuan, lalu ngemaruhka diriempu ba mua Tuchung-Petara Nuan, lalu nerima utai ti udah disebut Dilah pemesai-kuasa Nuan.

Udah nya uji iya bediri lalu nyebut:

O Petara Petara aku! Belakang aku nyau bungkuk laban tating dosa aku lalu pengelali aku udah ngerusakka aku. Lebuh aku ngenang penyalah kereja aku sereta pementas Nuan, ati aku anchur di dalam aku, lalu darah aku gesak dalam uratdarah aku. Ngena Pemajik Nuan, O Nuan ti dikingin Dunya! Aku malu deka ngangkatka mua aku ngadap Nuan, lalu pengandal jari aku berasai malu deka diunjur ngagai serega pementas Nuan. Nuan meda, 0 Petara aku, bakani ai mata aku nagang aku ari ti ngingatka Nuan enggau muji pemanah Nuan, O Nuan Tuhan Kerusi-Raja di atas enggau ba tanah di baruh! Aku minta Nuan ngena tanda Perintah Nuan enggau penyelai Pegai-Kuasa Nuan ngintu bala ti dikerindu Nuan ngena pementas Nuan, O Tuhan ke semua pengidup, lalu patut nerima berekat Nuan, O Raja ke utai ti dipeda enggau ti enda dipeda!

Udah nya uji iya nyebut “Alláh-u-Abhá” tiga kali, lalu nyerugang sereta kening iya meremi ngagai tanah, lalu nyebut:

Puji meh ngagai Nuan, O Petara kami, laban Nuan udah ngirum ke baruh ngagai kami utai ti matak kami semak ngagai Nuan, lalu mekal kami enggau genap utai ti manah ti dikirum Nuan ke baruh dalam Kitab Nuan enggau Surat Nuan. Jaga kami, kami minta Nuan, O Tuhan aku, ari tugung runding mamau enggau igau ngapa. Nuan, amat bendar, ti Tegap, ti Pemadu-Nemu.

Udah nya uji iya ngangkatka pala diri, sereta nudukka diri, lalu nyebut:

Aku besaksi, O Petara aku, ke utai ti udah disaksika bala ti dipilih Nuan, lalu ngaku utai ti udah diaku raban ti diau ba Serega ti pemadu-tinggi enggau sida ti udah ngelingi Kerusi-Raja Nuan ti tegap. Perintah di dunya enggau di serega enggi Nuan, O Tuhan ke semua dunya!

#10538
- Bahá'u'lláh

 

General

Anakmit

O Petara! Tupi anakmit tu ba ruang-ati pengerindu Nuan, lalu beri iya tusu ari dada Penginang Nuan. Kemansangka anak kayu ti tuchi tu dalam kebun bungai ros pengerindu Nuan lalu intu iya ngena panjah ujan penyayau Nuan. Gaga iya nyadi siku anakmit ba Perintah-Petara sereta uluka iya ngagai dunya Petara. Nuan ti kering sereta mentas, Nuan meh ti Penyikap, ti Nelap, Tuhan ke Berekat Pengasih ti Melumpa.

#10549
- `Abdu'l-Bahá

 

O Nuan Tuhan ti nadai banding! Asuh anakmit tu nusu ba dada pengerindu-penelap Nuan, lalu ibun iya dalam wa pengelikun enggau jaga Nuan lalu asuh iya diibun dalam kerengkun-lengan pengerindu Nuan.

#10550
- `Abdu'l-Bahá

 

O Petara, iring aku, jaga aku, gaga aku nyadi lampu ti terang sereta nyadi bintang ti tampak. Nuan endang Pemadu Kering sereta Bekuasa.

#10551
- `Abdu'l-Bahá

 

O Nuan Tuhan ti Nelap! Bala anakmit ti manah tu endang asil pengawa tunjuk pengering Nuan enggau kelai pemadas Nuan ti besai. O Petara! Jaga bala anakmit tu, enggau penelap bantu sida awakka pandai lalu asuh sida gawaka dunya mensia. O Petara! bala anakmit tu endang mutiara, asuh sida ditupi dalam serayung pengerindu-penelap Nuan.

Nuan endang ti Pemadu Mentas, ti Penuh Pengerindu.

#10552
- `Abdu'l-Bahá

 

O Petara! Pelajarka sida anakmit tu. Sida anakmit tu utai tanam ba kebun buah Nuan, bungai ba padang Nuan, bungai ros ba kebun Nuan. Asuh ujan Nuan labuh ba sida; asuh Matahari Pengamat manchar ba sida enggau pengerindu Nuan. Awakka ribut Nuan ti muput begadai-gadai ngidupka sida ngambika sida tau dipatih, mansang sereta besai, lalu ayan enggau naka pemanah. Nuan endang Iya ti Pemeri! Nuan endang Iya ti Penyinu.

#10553
- `Abdu'l-Bahá

 

O Tuhan aku, O Tuhan aku! Aku tu anakmit ti agi biak. Tupi aku ari dada pengasih Nuan, latih aku dalam ruang-dada pengerindu Nuan, asuh aku belajar dalam sekula iring Nuan lalu kemansangka aku di baruh kelamayang pemeri Nuan. Keluarka aku ari pemetang, gaga aku nyadi panchar ti terang; lepaska aku ari penusah, gaga aku nyadi bungai ba kebun ros, asuh aku nyadi kuli ba Pemetung Nuan lalu beri ke aku pendiau enggau gaya ulah ti betul; gaga aku nyadika pemansut pementas ngagai dunya mensia lalu iyas pala aku ngena intan pengidup ti meruan!

Amat bendar Nuan ti Kering, ti Tegap, ti Meda, ti Ninga!

#10554
- `Abdu'l-Bahá

 

O Nuan Tuhan ti pemadu tampak! Asuh anak kuli indu Nuan tu beberekat sereta lantang; asuh iya dikesayau ba pemetung penyerakup Nuan lalu asuh iya ngirup bebendar ari changkir pengerindu Nuan awakka iya tau senang sereta tepantup-ati lalu ngerekaika bau rengut. Nuan ti Tegap sereta Bekuasa, lalu Nuan ti Nemu-Semua, ti Meda-Semua.

#10555
- `Abdu'l-Bahá

 

Apai indai

Nuan meda, O Tuhan, jari kami diangkat enggau pemaruh ati minta pengasih enggau pementas Nuan. Kemendarka sida awakka tau diisi ngena pesaka bantu Nuan ti pemadu nelap sereta pementas ti chukup mayuh. Ampun kami, enggau apai kami sereta indai kami, lalu kemendarka sebarang utai ti dikedeka kami ari tasik penelap Nuan enggau pementas Petara. Terima, O Siku dikerindu ati kami, semua kereja kami dalam jalai Nuan. Nuan amat bendar, ti Pemadu Bekuasa, Pemadu Tinggi, Nadai Banding, Siku ti Pengampun, Pemeri Berekat Pengasih.

#10604
- Bahá'u'lláh

 

Berekat meh iya ti ingatka apai-indai iya lebuh berandau enggau Petara.

#10603
- The Báb

 

Tuhan! Dalam Pemeruan-Rambau ti Pemadu Besai tu Nuan ngemendar peminta ari bala anak ngarika apai-indai sida. Tu siti ari pemanah penyikap Nuan ti nadai sekat ba Pemeruan Rambau tu. Nya alai, O Nuan Tuhan ti nelap, terima peminta pengasuh Nuan tu ba pemetung penyerakup Nuan lalu selamka apai iya dalam tasik Berekat Pengasih Nuan, laban anak tu udah ngereja pengawa Nuan lalu numpuka penguat pengawa ba semua maya dalam arus jalai pengerindu Nuan. Amat bendar, Nuan ti Pemeri, ti Pengampun, sereta Nelap!

#10605
- `Abdu'l-Bahá

 

Aum raban gelumu

Tiap kali masuk ngagai bilik aum, besampi ngena sambiang tu enggau ati ti berentak ketegal pengerindu Petara sereta dilah ti dituchi ari semua utai kelimpah ari pengingat Iya, awakka Siku Ti Nguasa Semua ngena penelap tau mantu kita ngulihka pemenang ti pemadu tinggi.

O Petara! Petara aku! Kami tu pengasuh Nuan ti udah nunga enggau pengangkun ngagai Mua Pengudus Nuan, ngingkas diri empu ari semua utai kelimpah ari Nuan ba Hari tu. Kami udah begempuru ba Raban Gelumu Sambiang tu, beserakup dalam penemu enggau runding kami, lalu tuju ati kami segempung deka ngangkatka Jaku Nuan ba bansa mensia. O Tuhan, Petara kami! Gaga kami nyadi tanda Iring Pengudus Nuan, nyadi Tingkat peninggi Pengarap Nuan ba mensia, nyadi pengasuh ngagai Sempekat Nuan ti tegap, O Nuan Tuhan kami ti Pemadu Tinggi, nyadi pengayan Penyerakup Pengudus Nuan ba Perintah Abha' Nuan, lalu nyadi bintang ti beperenching manchar ba semua bengkah menua.

Tuhan! Bantu kami nyadi tasik ti ngalun umbak pemanah Penelap Nuan, nyadi sungai ti anyut ari Tuchung Semua Penampak Nuan, nyadi buah pemanah ba Kayu Pengawa serega Nuan, nyadi kayu ti leliuk dipuput ribut Pementas Nuan dalam Kebun-anggur serega Nuan. O Petara, asuh semengat bepanggai ba Genteran Pengudus Penyerakup Nuan, ati kami gaga laban tengkujuh Penelap Nuan, awakka kami tau berakup baka gelumbang ba siti tasik lalu nyadi sejantil begulai baka panchar Penerang Api Nuan; awakka runding kami, penemu kami, perasai ati kami tau nyadi siti pemendar, ngayanka semengat penyerakup di serata dunya. Nuan ti Nelap, ti Mentas, ti Penyikap, ti Chukup-Tegap, ti Pengasih, ti Penyinu.

#10597
- `Abdu'l-Bahá

 

(Sambiang disebut ba penutup aum Raban Gelumu)

O Petara! O Petara! Ari perintah penyerakup Nuan ti enda dipeda kemata kami ti begelumu dalam aum semengat tu, arap ba Nuan, andal ba tanda Nuan, tegap ba Sempekat enggau Penyanggup Nuan, tetarit ngagai Nuan, ditungkun ngena api pengerindu Nuan sereta mutus ati dalam Pengawa Nuan. Kami tu pengasuh dalam kebun-anggur Nuan, ngerembaika Agama Nuan, angkun nyembah penampak mua Nuan, baruh ati ngagai bala ti dikerindu Nuan, nyerah diri ba pintu Nuan, lalu minta kasih Nuan netapka kami gawaka bala dipilih Nuan, nyukung kami enggau raban malikat Nuan ti enda dipeda, ngambi ngeringka punggung kami dalam gawaka Nuan lalu asuh kami nyadi nembiak ti nyerah diri sereta angkun berandau enggau Nuan.

O Tuhan kami! Kami tu lembut, lalu Nuan meh ti Tegap, ti Kering. Kami tu nadai pengidup, lalu Nuan meh Roh ti meri-pengidup ti besai. Kami tu seranta, lalu Nuan meh ti Ngibun, ti Kering.

O Tuhan kami! Kuingka mua kami nunga rampa-mua pengasih Nuan, tupi kami ari meja serega Nuan enggau tugung penelap Nuan, bantu kami enggau raban malikat Nuan ti pemadu tinggi lalu tetapka kamienggau bala ti kudus ba Perintah Abha. Amat bendar, Nuan ti Nelap, ti Pengasih, Nuan meh Ngembuan pementas ti besai, lalu, amat bendar, Nuan meh Bepengampun sereta Bepenyinu.

#10598
- `Abdu'l-Bahá

 

Baum

O Petara! O Petara! Tu siku burung ti patah sayap lalu penerebai iya kelalu lubah—tulung iya awakka iya ulih terebai ngagai tuchung pemansang enggau penyelamat, terebaika iya enggau naka pengelantang ti nadai ulih sukat, gaga nyariska munyi nyawa iya dalam Nama Nuan ti Pemadu Tinggi ba semua menua, kelantangka pending enggau kangau tu lalu terangka mata awakka merening tanda pengiring.

O Tuhan, aku siku aja, kediri sereta baruh. Aku nadai penyukung semina Nuan, nadai penulung kelimpah ari Nuan lalu nadai pengenan lebih ari Nuan. Tetapka aku dalam pengawa Nuan, tulung aku enggau raban malikat Nuan, asuh aku menang dalam pengawa ngerembaika Jaku Nuan lalu guna aku bejakuka pengelandik Nuan ngagai bala nembiak Nuan. Amat bendar, Nuan endang penulung orang ti seranta enggau penyagaka sida ti biak, lalu amat bendar, Nuan ti Tegap, ti Kering, ti Nadai-Penekul.

#10594
- `Abdu'l-Bahá

 

O Petara aku! O Petara Aku! Nuan meda aku dalam pemaruh enggau pengurang aku, kiruh ngereja pengawa ti pemadu besai, mutus ati deka ngemesaika lekajaku Nuan ngagai mensia mayuh sereta ngerembaika ajar Nuan ngagai mensia Nuan. Bakani aku ulih mujur enti enda ketegal Nuan ti mantu aku ngena seput Roh Kudus lalu nulung aku ngulihka pemenang ngena raban soldadu perintah Nuan ti tau nukar indu sampuk nyadi menaul, ai setitik nyadi sungai enggau tasik, lalu leka nyadi penerang enggau matahari? O Tuhan aku! Bantu aku ngena penguat Nuan ti mai pemenang sereta pengasi, ngambika dilah aku tau nyebut puji enggau pemanah Nuan ba semua mensia lalu semengat aku melumpa laban ai-anggur pengerindu enggau penemu Nuan.

Nuan meh ti Pemadu Bekuasa lalu Ngereja utai ti dikedeka Nuan!

#10595
- `Abdu'l-Bahá

 

O Nuan Petara ti nadai banding! O Nuan Tuhan ke Perintah-Petara! Bala semengat tu soldadu serega Nuan. Bantu sida ngena raban Malikat ti Pemadu Tinggi, asuh sida menang, ngambika tiap iku sida tau nyadi baka seraban bala soldadu lalu ngalahka semua menua tu ngena pengerindu Petara enggau panchar ajar Petara.

O Petara! Uji Nuan nyadi penyukung sida enggau penulung sida, lalu ba menua puang, ba bukit, ba lebak, ba kampung, ba emperan enggau ba tasik, awakka Nuan nyadika pengandal sida ngambika tau manjung ngena kuasa Perintah Petara sereta ngena seput Roh Kudus!

Amat bendar, Nuan ti Kering, ti Tegap sereta Penuh Kuasa, lalu Nuan ti Pintar, ti Ninga sereta Meda.

#10596
- `Abdu'l-Bahá

 

Bekejang

Aku udah angkat pagi tu ngena basa Nuan, O Petara aku, sereta ninggalka rumah aku lalu bepanggai penuh ba Nuan, sereta nyerahka diri ngagai ibun Nuan. Kirum ke baruh ngagai aku, berekat ari alai Nuan, ari serega pengasih Nuan, lalu asuh aku ulih pulai ke rumah enggau selamat baka Nuan ti udah ngemendarka aku bekejang di baruh jaga Nuan enggau pengingat aku ditanggam teguh ba Nuan.

Nadai Petara bukai tang Nuan, Siku aja, ti Nadai-Banding ari semua utai, ti Nemu Semua, ti Pemadu Pintar.

#10547
- Bahá'u'lláh

 

O Petara, Petara aku! Aku udah bekejang ari rumah aku, betanggam teguh ba tali pengerindu Nuan, lalu aku udah nyerahka diriempu enggau penuh ngagai intu Nuan sereta jaga Nuan. Aku minta kasih ngagai Nuan ngena kuasa Nuan ke alai Nuan endang nyaga bala ti dikerindu Nuan ari sida ti tesat enggau limpang, lalu ari semua orang ti ingkar ngelaban, enggau ari semua ti ngereja penyai ti udah jauh nyepar ari Nuan, ngambika aku diibun ngena Berekat Pengasih Nuan enggau penelap Nuan. Nya alai, asuh aku, pulai ke rumah aku ngena kuasa Nuan enggau pengering Nuan. Nuan endang amat, ti Chukup Tegap, Penulung lebuh Tusah, Pengibun-Diri.

#10548
- Bahá'u'lláh

 

Betubuh bisi

O Tuhan aku, Tuhan aku! Aku muji Nuan sereta meri terima kasih ngagai Nuan laban Nuan udah meri pengasih ngagai pengasuh-indu Nuan ti baruh ati, ulun Nuan minta enggau pengabis ati sereta besampi enggau pemaruh ati ngagai Nuan, laban Nuan amat bendar udah ngiring iya nuju Perintah Nuan ti nyata sereta ngasuh iya ninga Kangau Nuan ti tinggi ba dunya injau tu lalu meda tanda Nuan ti nunjukka pengayan pemenang kuasa Nuan atas semua utai.

O Tuhan aku, aku nyerahka iya ti di dalam kandung aku ngagai Nuan. Lalu asuh iya nyadi anak ti patut dipuji dalam Perintah Nuan sereta siku ti benasip ketegal pengasih Nuan enggau penelap Nuan, mansang sereta besai di baruh ibun ajar Nuan. Amat bendar, Nuan meh ti Mentas! Amat bendar, Nuan meh Tuhan Besai Pengasih.

#10607
- `Abdu'l-Bahá

 

Dinihari

O Petara aku enggau Tuan aku! Aku tu pengasuh Nuan lalu anak pengasuh Nuan. Aku udah angkat ari padung-peninduk aku pagi tu lebuh maya Bintang-Siang-Hari penyerakup Nuan manchar ari Entigis-Hari peneka Nuan, lalu udah mancharka penampak ia di serata dunya tu, nitihka udah diatur dalam Bup Tangkan Nuan.

Puji meh Nuan, O Petara aku, laban kami udah angkat ngagai penampak panchar penemu Nuan. Nya alai, turun ngagai kami, O Tuhan aku, utai ti tau dikena kami ngelengka diri ari sebarang orang kelimpah ari Nuan, lalu ngelepaska kami ari semua tanggam tang semina Nuan. Nambahka nya, tuliska ba aku, enggau ba sida ti dikerindu aku, sereta ba kaban-belayan aku, bela sebaka ba indu enggau lelaki, pemanah ba dunya tu enggau dunya ti deka datai. Nangkanka nya, enggau likun ibun kami, ngena jaga Nuan ti meruan, O Nuan ti Dikerinduka semua utai tempa enggau ti Dikinginka serata dunya, ari sida ti udah diasuh Nuan ngayanka Telai Sitan ke betelai ngagai ati mensia. Bekuasa meh Nuan ngereja peneka Nuan. Nuan amat bendar ti Chukup Tegap, Penulung lebuh Tusah, Pengibun-Diri.

Berekat ulih Nuan, O Tuhan Petara aku, Iya Ti udah ditaga Nuan mangku gelar Nuan ti pemadu manah, lalu nengah Iya Nuan udah nyerara antara pengudus enggau penyai, lalu enggau pengasih bantu kami ngereja utai ti dikerindu, sereta dikedeka Nuan. Nambahka nya, berekat ulih Nuan, O Petara aku, sida ke nyadi Jaku Nuan enggau Urup Nuan, enggau sida ti udah nungaka mua sida ngadap Nuan, lalu ningaka kangau Nuan.

Nuan, amat bendar, Tuhan enggau Raja ke semua mensia, sereta bekuasa atas semua utai.

#10539
- Bahá'u'lláh

 

Iring

Kami besambiang ngagai Petara awakka enggau pengasih mantu bala ti udah tesat ngambika ngembuan penemu ti rurus sereta enda besiping, lalu ngasuh sida nemu nama kebuah diri ti enggai ibuh. Iya, amat bendar, ti Mentas ari Semua, ti Pemadu Nelap. Anang nagang kuli Nuan, O Tuhan Aku, masuk pintu berekat Nuan, lalu anang muru sida ari maligai pengayan Nuan. Bantu sida munaska kerabur runding ngapa, lalu nguyaska tirai runding enggau pengandal ti ngigau.

Nuan, amat bendar, Bempu-Semua, Pemadu Tinggi. Nadai Petara bukai tang semina Nuan, ti Pemadu Tegap, ti Pengasih.

#10563
- Bahá'u'lláh

 

Laki diri

O Petara, Petara aku! Tu pengasuh-indu Nuan, ngangau Nuan, arap ba Nuan, nungaka mua iya ngadap Nuan, minta enggau pemaruh ati ngagai Nuan ngambika manjah pemanah pementas Nuan ba iya, lalu buka ngagai iya penyelai pengudus Nuan, lalu tenggau ba iya panchar kuasa Petara ti ba Nuan.

O Tuhan aku! asuh mata laki aku meda. Kelantangka ati iya ulih Nuan ngena panchar penemu Nuan, batak ulih Nuan runding iya ngagai pemajik Nuan ti bendang-bendang, asuh gaga Roh iya ulih Nuan ari ti ngayanka penerang Nuan ngagai iya.

O Tuhan aku! Buka ulih Nuan tirai ti ngelindung perening iya. Panjah ke baruh pemayuh pementas Nuan ba iya, asuh iya dikuasa ai-anggur pengerindu ke Nuan, asuh iya nyadi siku ari bala malikat Nuan ti ngembuan kaki ti bejalai ba tanah tu tang semengat sida terebai nengah serega ti tinggi. Gaga iya nyadi lampu ti terang, manchar keluar ngena penerang pemintar Nuan ba orang ti arap.

Amat bendar, Nuan ti Pemadu Berega, ti Sedia-Nyikap, ti Tebuka Jari.

#10606
- `Abdu'l-Bahá

 

Malam

Bakani ku aku deka tinduk, O Petara, Petara aku, lebuh mata sida ti lelengauka Nuan mengkang dani laban sida beserara ari Nuan, lalu bakani ku aku ngalika diri belelak lebuh semengat bala ti rinduka Nuan merampau laban ti jauh ari Nuan?

Aku udah nyerah, O Tuhan aku, semengat aku, semua pengidup aku ngagai jari kanan pengering Nuan enggau jaga Nuan, lalu aku ngalika pala aku atas panggal aku ngena kuasa Nuan, lalu ngangkatka ia nitihka peneka Nuan enggau pengelantang Nuan. Nuan endang amat, ti Pengenan, ti Pengintu, ti Penuh Bekuasa, ti Pemadu Kering.

Nengah pengering Nuan! Aku enda minta utai bukai, lebuh tinduk tauka dani, tang semina utai ti dikedeka Nuan. Aku tu pengasuh Nuan lalu dalam genggam jari Nuan. Tulung meh aku ngena berekat Nuan awakka ngereja utai ti tau mancharka rengut Nuan. Endang bendar, tu meh pengandal aku enggau pengandal sida ti semak enggau Nuan. Puji meh Nuan, O Tuhan ke semua dunya!

#10579
- Bahá'u'lláh

 

O Petara aku, Tuan aku, Juluk ati pengerindu aku. Tu, nembiak Nuan, ngiga peninduk ba pengelindung penyayau Nuan lalu deka gali dibaruh ayung pengasih Nuan, besampi minta ibun enggau jaga Nuan.

Aku minta ari Nuan, O Tuhan aku, ngena mata Nuan ti nadai tinduk, nyaga mata aku awakka nadai merening ke bukai semina Nuan. Keringka perening iya ngambika iya ulih ngelala tanda Nuan, lalu meda Bingkai-Langit Pegari Penemu Nuan. Nuan meh Iya ti endur kuasa ti pemadu tuchi udah begegar pegari. Nadai Petara bukai tang Nuan, ti Pemadu Bekuasa, ti Ngalahka Semua, ti Nadai Diperintah.

#10580
- Bahá'u'lláh

 

Mensia

O Nuan Tuhan ti nelap! Nuan udah ngaga semua mensia ari apai-indai ti sama asal. Nuan udah ngatur semua bempu sebuah rumah. Ba alai Kudus Nuan sida iya pengasuh Nuan lalu semua mensia dilindung di baruh Panggau Nuan. Semua begempuru ba Mija Pementas Nuan lalu diperenching penampak Ibun Nuan. O Petara! Nuan endang nelap ngagai semua, Nuan udah ngagih ke semua. Nuan udah ngelindung semua, Nuan meri pengidup ke semua. Nuan udah nyikap genap iku mensia ngena penau enggau pemandai, lalu semua disungga dalam Tasik Pengasih Nuan.

O Nuan Tuhan ti Nelap! Gempung semua, asuh semua agama besetuju, asuh semua menua nyadi siti, awakka sida baka diri-sebilik, lalu serata dunya nyadi siti rumah. Awakka sida begulai sejalai enggau penuh seati. O Petara! Dirika tinggi menira penyerakup bansa mensia. O Petara! Dudukka Pemaik ti Pemadu Besai. Tanggam segempung ulih Nuan, O Petara! semua ati. O Nuan Apai ti nelap, Petara! Kelantangka ati enggau rengut pengerindu Nuan. Terangka mata ngena Penampak Iring Nuan, asuh gaga ke pending ngena munyi lagu Jaku Nuan, lalu lindung kami dalam Kuta Ibun Nuan. Nuan ti Tegap sereta Bekuasa! Nuan endang ti Pengampun lalu Nuan meh Iya ti ngelamun penimpang bansa mensia.

#10582
- `Abdu'l-Bahá

 

Meri ngagai duit pan

Semua pangan Petara… patut meri naka ia ti ulih, enda milih pemimit penyampau. Petara enda ngasuh siku-siku ngereja ti enda ulih iya. Pemeri ti bakanya patut datai ari semua palan enggau ari semua orang ti arap... O pangan Petara! Pechaya bendar meh kita, dikena nipakka pemeri tu, dia kebun kita, gudang kita enggau dagang kita deka diberekat ngena belipat pemansang, ngena pemeri ti manah. Iya ti ngereja siti pemanah deka nerima upah sepuluh kali lipat. Nyata bendar Tuhan ti idup tetap deka meri ngagai sida ti nguna pengeraja sida dalam jalai Iya.

O Petara, Petara aku! Terangka kening bala ambai Nuan ti bendar, lalu tulung sida tetap menang ngena raban malikat. Tegapka kaki sida ba jalai Nuan ti lurus, lalu ari pemeri Nuan ti jeman telengaka ngagai sida pintu berekat Nuan; laban sida ngena sebarang pemisi ti diberi Nuan ke sida ba jalai Nuan, nyaga Pengarap Nuan, manggaika pengarap-ati sida ba pengingat sida ke Nuan, nyerahka ati sida ketegal pengerindu ke Nuan, lalu anang nanka pemisi sida dikena sida muji Pemajik Nuan enggau dikena sida ngiga jalai ngelantangka Nuan.

O Tuhan aku! Beri ke sida ungkup ti mayuh, bayar ti udah disedia enggau upah ti tetap.

Amat bendar, Nuan ti Pengenan, ti Penulung, ti Mentas, ti Pemeri, Penyikap ti Meruan.

#10611
- `Abdu'l-Bahá

 

Nembiak

O Tuhan! Asuh nembiak tu terang lalu beri pementas Nuan ba utai tempa ti seranta tu. Sikap iya ngena penemu, lalu kemendarka ngagai iya pengering ti betambah tiap terebak tawas lalu ibun iya dalam lindung penyaga Nuan ngambika iya nadai ngereja penyalah, tau angkun ngereja Pengawa Nuan, tau ngiring sida ti udah limpang, nguluka sida ti nadai daya, ngelepaska sida ti dalam kurung lalu ngerak sida ti enda ibuh, awakka semua tau diberekat enggau pengingat sereta puji Nuan. Nuan endang Tegap sereta Bekuasa.

#10556
- `Abdu'l-Bahá

 

Ngajar

Semua puji, O Petara aku, enggi Nuan ti Pugu Penatai semua penampak enggau kuasa raja, ke pemesai enggau pangkat, ke pemerintah enggau kuasa, ke peninggi enggau berekat pengasih, ke pengerawan enggau pengering. Sebarang sapa ti dikedeka Nuan, Nuan ngasuh iya tebatak semak ngagai Tasik ti Pemadu Besai, lalu sebarang sapa ti dikinginka Nuan, Nuan meri pangkat ngelala Nama Nuan ti Pemadu Jeman. Ari semua ti di serega enggau ba tanah, nadai siku ulih nagang pejalai Peneka perintah Nuan. Ari semua jeman Nuan merintah seluruh utai tempa, lalu Nuan deka meruan belama bejalaika pegai-kuasa Nuan atas semua utai tempa. Nadai Petara bukai tang Nuan, ti Chukup-Tegap, ti Pemadu -Tinggi, ti Pemadu-Kering, ti Pemadu-Pintar.

Terangka, O Tuhan, mua bala nembiak Nuan, awakka sida tau meda Nuan; lalu meresi ati sida awakka sida tau mansang ngadap ngagai panggau bantu-pengasih serega Nuan, sereta ngelala Iya ti Pengayan ke Nuan Empu enggau Entigis-Hari ke Nuan. Amat bendar, Nuan meh Tuhan ke semua dunya. Nadai Petara bukai tang Nuan, ti Nadai Pengiruh, ti Nguasa-Semua.

#10592
- Bahá'u'lláh

 

Puji meh nama Nuan, O Tuhan Petara aku! Nuan meda bakani perening aku ditumpuka ngagai pengalus pengasih Nuan, bakani mata aku ninjau bingkai-langit Berekat Pengasih Nuan, enggau pengerindu pementas Nuan, lalu bakani jari aku ditadahka ngagai serega penyikap Nuan. Penegap Nuan nyadika saksi ba aku! Tiap perengka tubuh aku manjung ngagai Nuan lalu nyebut; "O Nuan ti Chukup Dikerinduka semua dunya, enggau Tuhan ke semua ti di serega sereta di dunya, lalu siku ti Diniat semua ati ti angkunka Nuan! Aku minta enggau pemaruh ati ari Nuan, ari Tasik Nuan ti alai Nuan udah nyapa semua ti idup dalam serega enggau semua ti diau ba dunya tu, ngambika nulung bala nembiak Nuan ti udah di tinggal nunga ngagai ia sereta sangkai ba tebing ia. Lalu, asuh sida, O Petara aku, ngingkaska diri ari semua utai bukai tang Nuan, lalu asuh sida bejakuka puji Nuan sereta ngangkatka pemanah Nuan. Nambahka nya, bekal sida, O Petara aku, ngena Ai-anggur pengasih Nuan ti chulin, awakka tau ngasuh sida enda ingatka orang bukai kelimpah ari Nuan, lalu angkat ngereja Pengawa Nuan, lalu nyadi tegap dalam pengerindu sida ke Nuan. Nuan meh, amat bendar Tuhan ke pengidup sida sereta Pugu ti dikerindu sida.

Enti sida diburu Nuan, sapa meh deka ngemataka sida: lalu enti sida jauh beserara ari Nuan, sapa meh ti tau nulung sida ngelawa Pemisi Nuan? Aku besumpah ngena penegap Nuan! Nadai alai-penyelamat ti ulih endur rari kelimpah ari Nuan, lalu nadai pengelindung ti digiga kelimpah ari pengelindung Nuan, lalu nadai jaga kelimpah ari jaga Nuan. Penyai ngalun iya ti ngaku orang bukai nyadi Tuhan kelimpah ari Nuan, lalu beberekat meh sida ti udah ngelengkaka diriempu ari semua tanggam ba semua bala ti diau ba tanah Nuan, lalu bepagut ba rambu pengeluas penyayau Nuan. Tu! bala orang Baha, ba mua semua ti diserega enggau semua ti ba dunya. Nadai Petara bukai tang Nuan, ti Penuh Penemu, ti Semua Pintar. Pujika Petara, Tuhan ke semua dunya".

#10593
- Bahá'u'lláh

 

Ngingkas diri

O Tuhan! Ngagai Nuan aku ngiga pengenduh lalu ngagai semua tanda Nuan aku nungaka ati aku.

O Tuhan! Sekalika benung bejalai tauka di rumah, baika dalam pengawa aku tauka dalam kereja aku, aku nyerahka semua pengandal ati aku ba Nuan.

Beri aku bantu Nuan ti chukup awakka tau ngati kediri, ari semua utai. O Nuan ti bepengasih ngelui ari semua!

Sikap ba aku ungkup aku, O Tuhan, nitihka peneka Nuan, lalu asuh aku tepantup ati ba utai ti udah ditaga Nuan ke aku.

Nuan ti bekuasa penuh meri tangkan.

#10586
- The Báb

 

O Petara aku, Tuhan aku enggau Tuan aku! Aku udah ngingkas diri ari kaban aku lalu ngigaari Nuan awakka ulih ngati ke diri ari semua ti nguan dunya lalu meruan besedia deka nerima utai ti dipuji ba mua Nuan. Sikap ba aku pemanah awakka ngasuh aku ngati ke diri ari semua utai bukai kelimpah ari Nuan, lalu beri aku ungkup ti chukup ari bantu-pengasih Nuan ti nadai sekat. Amat bendar, Nuan meh Tuhan ti ngembuan penelap ti chukup mayuh.

#10587
- The Báb

 

Pagi

Aku udah dani ari ibun Nuan, O Petara aku, lalu nyadi iya ti ngiga Pengelindung deka diau dalam pengibun Nuan, sereta Penegap penyaga Nuan. Beri penampak ke tubuh dalam aku, O Tuhan aku, enggau pemanah penerang Entigis Hari Jaku Pegari Nuan, baka Nuan ti udah meri penampak ke tubuh luar aku enggau panchar pagi ari penulung Nuan.

#10546
- Bahá'u'lláh

 

Pemansang semengat

O Petara, idup sereta kelantangka semengat aku. Tuchi ati aku. Beri penampak ke kuasa aku. Aku nyuaka semua pekara aku ba jari Nuan. Nuan endang Pengiring aku enggau Pengibun aku. Aku nadai agi tusah sereta sinu, aku deka diau lantang sereta gaga.

O Petara, aku nadai agi deka ngembuan pengakang ati, nadai mega aku ngasuh penusah merinsa aku. Aku enggai diau ba utai ti enda manah dalam pengidup.

O Petara, Nuan endang lebih bepangan enggau aku ari aku enggau diriempu. Aku nyerahka diri ngagai Nuan, O Tuhan.

#10557
- `Abdu'l-Bahá

 

O Tuhan aku! O Tuhan aku! Tu siti lampu ti ditungkun ngena api pengerindu Nuan lalu daun-api ti nyeru ti dituchul ba kayu pengasih Nuan, O Tuhan aku! Tambahka pemau enggau pengangat daun-api ia, ngena api ti diidupka ba Sinai Pengayan Nuan. Amat bendar Nuan ti Penetap, ti Penulung, ti Kering, ti Nelap, ti Rindu.

#10558
- `Abdu'l-Bahá

 

O Tuhan! Kami tu lembut; keringka kami. O Petara! Kami tu lansang; asuh kami nemu. O Tuhan! Kami tu seranta; asuh kami kaya. O Petara! Kami tu mati; idupka kami. O Tuhan! Kami endang dikemaruh; tampakka kami dalam perintah Nuan. Enti Nuan nulung kami, O Tuhan, kami deka nyadi baka bintang ti bekebelik. Enti Nuan enda nulung kami, kami deka nyadi baruh ari tanah. O Tuhan! Keringka kami. O Petara! Tetapka pemenang ba kami. O Petara! Asuh kami nyerang diri sereta ngalahka pengingin.

O Tuhan! Lepaska kami ari tanggam reta dunya tu. O Tuhan! Idupka kami ngena seput Roh Kudus ngambika kami tau angkat gawaka Nuan, angkun nyembah Nuan, lalu nganjakka diriempu dalam perintah Nuan enggau pengabis penunggang-ati. O Tuhan, Nuan ti Bekuasa! O Petara, Nuan ti Pengampun! O Tuhan! Nuan ti Penyinu!

#10559
- `Abdu'l-Bahá

 

O Petara, Petara aku! Nuan meh Pengandal aku enggau Dikerindu aku, Juluk ati aku enggau Niat aku! Enggau pemadu pemaruh ati sereta pengabis pengangkun aku besampi ngagai Nuan awakka ngaga aku nyadi perabung pengudus pengerindu Nuan ba kandang-kuasa Nuan, lampu penemu Nuan ba semua utai tempa Nuan, enggau menira pemeri Nuan dalam Perintah Nuan.

Asuh aku nyadi siku ari bala ti nyembah Nuan ti ngetas diriempu ari semua utai kelimpah ari Nuan, ti nuchi diriempu ari semua utai ti bekaul enggau dunya, lalu iya ti ngelepaska diri-empu ari kachau igau sangka.

Awakka ati aku penuh laban pengaga ketegal penetap ari Perintah Nuan, lalu terangka mata aku ari ke meda pemayuh bantu pengudus ke nurun betunda-udi ngagai aku ari perintah Nuan ti Pemadu Bekuasa.

Nuan meh ti Chukup-Tegap, ti Pemadu Penampak, ti Pemadu Bekuasa.

#10560
- `Abdu'l-Bahá

 

Pengampun

Madahka dosa enggau penyalah ngagai mensia endang enda dikemendar. Orang ti bedosa, antara iyaempu enggau Petara, minta enggau pemaruh ati pengasih ari Tasik pengasih, minta ampun ari Serega penelap lalu nyebut:

O Petara, Petara aku! Aku minta enggau pemaruh ati ngagai Nuan ngena darah bala ti amat rinduka Nuan ti chukup tetarit ulih pemanis nyawa Nuan ke alai sida beguai ngagai Tuchung Penampak, tempat genselan ti pemadu tampak, lalu aku minta ngagai Nuan penyelai ti nyelikap dalam penemu Nuan lalu ngena gemala ti dipesaka dalam tasik bantu-pengasih Nuan ngambika ngampun aku lalu pia mega apai aku enggau indai aku. Ari semua sida ti mansutka pengasih, Nuan meh amat bendar ti Pemadu Bepengasih. Nadai Petara bukai tang Nuan, ti Meruan-Pengampun, ti Semua-Pementas.

O Tuhan! Nuan meda kah ti bedosa tu nunga ngadap tasik pengasih Nuan lalu iya ti lemi tu ngiga perintah ba kuasa pengudus Nuan lalu utai idup ti miskin tu nguingka diriempu nuju bintang-siang hari pengaya Nuan.

Nengah pengasih enggau penelap Nuan, anang meh ngasa iya, O Tuhan, lalu anang mega nyekat iya ari pegari bantu-pementas Nuan lebuh maya hari Nuan, lalu anang mega ngiar iya ari pintu Nuan ti udah besai dibuka Nuan ke semua ti diau dalam serega Nuan enggau ba tanah Nuan.

Akai! Rai! Dosa aku udah nagang aku mansang ngagai Panggau pengudus Nuan lalu penyalah aku udah mai aku tesat jauh ari Kubu pengeraja Nuan. Aku udah ngereja utai ti ditagang Nuan kereja aku lalu ngelengkaka tangkan ti diasuh Nuan titih aku.

Aku besambiang ngagai Nuan nengah Siku Tuhan ke Nama ti Tinggi awakka nuliska aku ngena Pen pementas Nuan ti tau ngasuh aku tebatak semak ngagai Nuan lalu nuchi aku ari penyalah aku ti udah nyelapat aku ari pengampun Nuan sereta pengasih Nuan.

Amat bendar, Nuan meh Bekuasa, ti Mentas. Nadai Petara bukai tang Nuan, ti Kering, ti Penyinu.

#10571
- Bahá'u'lláh

 

Pujika, O Tuhan! Ampun dosa kami, kasihka kami lalu asuh kami mulaika diri ngagai Nuan. Anang ngasuh kami bepanggai ba utai bukai kelimpah ari Nuan, lalu beri kami, enggau pementas Nuan, utai ti dikerindu enggau dikingin Nuan sereta pemanah ti patut ba Nuan. Tinggika pangkat sida ti amat arap sereta ampun sida ngena penyinu pengampun Nuan.

Amat bendar Nuan meh Penulung lebuh Tusah, Pengibun-Diri.

#10572
- The Báb

 

O Petara aku, O Tuhan aku, O Tuan aku! Aku minta Nuan ngampun aku laban ngiga pengelantang bukai kelimpah ari pengerindu Nuan, enggau penyenang bukai kelimpah ari penyemak Nuan, enggau pengaga bukai kelimpah ari pemanah-pengelantang Nuan, enggau pengidup bukai kelimpah ari berandau enggau Nuan.

#10573
- The Báb

 

O Nuan Tuhan ti Pengampun! Nuan meh pengelindung ke semua anembiak Nuan tu. Nuan nemu semua entelah sereta ngelala semua utai. Kami tu lembut, lalu Nuan meh kering, sereta Penuh Kuasa. Kami tu semua bedosa, lalu Nuan meh Pengampun dosa, ti Pengasih, ti Penyinu. O Tuhan! Anang meda pengurang kami. Intu kami nitihka penelap enggau pengasih Nuan. Kami endang mayuh pengurang, tang tasik pengampun Nuan nadai sekat. Penyuntuk kami berat, tang tanda saup enggau bantu Nuan endang nyengala. Nya-alai, tetap sereta keringka kami. Asuh kami ulih ngereja utai ti ngakun ba Pemetung Nuan ti kudus. Terangka ati kami, beri kami mata ti lansik enggau pending ti silik. Idupka iya ti mati lalu sumanka iya ti sakit. Sikap pengaya ba iya ti seranta lalu beri pemaik enggau pengelikun ngagai iya ti takut. Terima kami dalam perintah Nuan lalu terangka kami ngena panchar pengering. Nuan meh Kering sereta Penuh Kuasa. Nuan meh ti Nelap. Nuan meh ti Penyinu. Nuan meh ti mentas.

#10574
- `Abdu'l-Bahá

 

Pengerai

O Petara, Petara aku! Aku minta ari Nuan ngena tasik pengerai Nuan, lalu ari penampak Bintang-Siang-Hari Berekat Pengasih Nuan, lalu ari Nama Nuan ke alai Nuan udah nguasa bala nembiak Nuan, lalu ari kuasa ti tau ngerekaika Jaku Nuan ti pemadu tinggi enggau penguat Pen Nuan ti pemadu dipebasa, lalu ari pengasih Nuan ti udah ngelui semua utai tempa ti dalam serega enggau ba tanah, awakka nuchi aku ngena ai penyayau Nuan ari tiap pemedis enggau penyakit, lalu ari semua pengelemi enggau pengelembut.

Nuan meda, O Tuhan aku, iya ti nyembah Nuan nganti ba pintu penyayau Nuan, enggau iya ti udah nanam pengandal ati iya ba Nuan, betanggam ba tali penelap Nuan. Anang ngelebuka iya, aku minta enggau pengabis-ati ari Nuan, utai ti digiga iya ari tasik Berekat Pengasih Nuan enggau Bintang-Siang-Hari ke pengerindu pementas Nuan.

Kering meh Nuan ngereja utai ti ngasuh Nuan lantang. Nadai Petara bukai semina Nuan, ti Meruan Pengampun, ti Pemadu Nelap.

#10576
- Bahá'u'lláh

 

Nuan endang Iya, O Petara aku, ti bempu Nama ke ulih nyuman sereta mulaika pengerai iya ti sakit, lalu iya ti aus diberi ngirup, lalu iya ti merampau nyadi lantang; lalu iya ti limpang diiring, lalu iya ti dikemaruh nyadi tinggi, lalu iya ti seranta diberi pengaya, lalu iya ti lansang bulih pemandai, lalu iya ti lindung nyadi terang, lalu iya ti tusah bulih pengaga, lalu iya ti chelap diberi pengangat, lalu iya ti diindik diangkat. Ngena nama Nuan, O Petara aku, semua utai tempa nyadi regas, lalu serega dikerembai, lalu dunya didudukka lalu mua-hari niki sereta ujan diasuh labuh ngagai tanah. Tu, amat bendar, nyadika tanda penelap Nuan ngagai semua utai tempa Nuan.

Nya alai, aku minta enggau pemaruh ati ngagai Nuan, ngena nama Nuan ke alai Nuan udah ngayanka kuasa-Petara ba Nuan, lalu udah nyungkakka Pengawa Nuan ti tinggi ari semua utai tempa, lalu ngena genap iti gelar Nuan ti pemadu manah sereta lambang ti pemadu tinggi, lalu ngena semua pemanah-perangai ke alai Pengidup Nuanempu ti tinggi sereta pemadu dipuji, ngambika ngirum ke baruh malam tu ujan pengerai Nuan ari mua-hari pengasih Nuan ngagai anakmit tu, ke udah dikaul Nuan enggau Nuanempu ti penuh-penampak dalam perintah utai tempa Nuan. Udah nya, ngepan iya, O Petara aku, nengah penyinu Nuan, ngena kelambi pengelantang-pengidup enggau pengerai, lalu jaga iya, O Iya ti dikerindu aku, ari semua penyakit enggau pemedis, lalu ari semua utai ti enda dikerindu Nuan. Pengering Nuan, amat bendar, setipak enggau semua utai. Nuan, amat bendar, meh Pemadu Bekuasa, Penulung-Diri. Nambah ke nya, kirum ke baruh ngagai aku, O Petara aku, pemanah dunya tu enggau dunya ti deka datai, sereta pemanah peturun ti dulu enggau peturun jemah ila. Pengering Nuan enggau pemintar Nuan, amat bendar, setipak enggau tu.

#10577
- Bahá'u'lláh

 

Nama Nuan nyadika pengerai aku, O Petara aku, lalu pengingatka Nuan nyadika ubat aku. Semak ngagai Nuan nyadika niat aku sereta rinduka Nuan nyadika pangan aku. Pengasih Nuan ngagai aku nyadika pengerai aku enggau ke penulung aku dalam kedua-dua dunya tu enggau dunya ti deka datai. Nuan amat bendar ti Meri Semua, Nemu Semua sereta Pemadu Landik.

#10578
- Bahá'u'lláh

 

Penguji enggau penusah

O Nuan ke alai penguji Iya nyadi ubat penyuman ke sida ti semak ngagai Nuan, ke alai pedang Iya nyadika niat ti tinggi ke semua sida ti rinduka Nuan, ke alai laja Iya nyadika pengingin ti bendar, ke ati sida ti lelengauka Nuan, ke alai tangkan atur Iya nyadika pugu pengandal ke sida ti udah ngelala pengamat Nuan.

Aku minta kasih Nuan, ari pengudus pemanis Nuan lalu ari perenching penampak mua Nuan, awakka ngirum ke baruh ngagai kami ari alai pengetu Nuan ti tinggi utai ti tau ngasuh kami tebatak semak ngagai Nuan. Lalu tanam teguh kaki kami, O Petara aku, dalam pengawa Nuan lalu terangka ati kami ngena panchar penemu Nuan, lalu tampakka dada kami ngena penerang nama Nuan.

#10566
- Bahá'u'lláh

 

Buai penusah ati aku ngena penyayau Nuan enggau penelap Nuan, O Petara, Petara aku, lalu punaska pemedis aku ngena kuasa-raja Nuan enggau pengering Nuan. Nuan meda aku, O Petara aku, lebuh mua aku nunga ngadap Nuan maya penusah nyerangkap aku ari tiap piak. Aku minta kasih Nuan, O Nuan ti Tuhan ke semua utai idup, lalu ngayung semua utai ti dipeda enggau ti enda dipeda, ngena Nama Nuan ke alai Nuan udah nguasa semua ati enggau semengat mensia, lalu ngena umbak Tasik Pengasih Nuan sereta enggau perenching Bintang-Siang-Hari penyayau Nuan, sengkaum aku enggau sida ti nadai utai tau nekul sida ari ke nunga mua sida ngadap Nuan, O Nuan Tuhan ke semua nama lalu Penempa ke semua serega.

Nuan merati, O Tuhan aku, ke utai ti udah nuntung aku dalam maya hari Nuan, aku minta ngena pengabis ati ngagai Nuan, ari Iya ti Entigis Hari ke nama Nuan enggau Alai-Penumbuh pemanah Nuan, ngagihka aku utai ti tau ngasuh aku angkat gawaka Nuan sereta ngeninggika pemanah-pengawa Nuan. Nuan, amat bendar, ti Chukup Tegap, ti Pemadu Kering, ti endang nyaut sambiang semua mensia.

Lalu, penudi ia, aku minta tulung Nuan ari panchar rampa-mua Nuan merekat semua pengawa aku, enggau nebus semua utang aku, sereta ngemuaska utai ti diguna aku. Nuan meh Iya ti bempu pengering enggau pegai-kuasa ti udah disaksika tiap dilah, lalu bempu kuasa-raja enggau kuasa-perintah ti udah diaku tiap ati ti mereti. Nadai Petara bukai tang Nuan, Iya ti ninga lalu besedia nyaut.

#10567
- Bahá'u'lláh

 

Enggau pengabis ati aku minta Nuan ngena pengering Nuan, O Petara aku! Anang ngasuh penusah ngalun aku lebuh maya penguji, lalu lebuh maya ilap, iring singkang aku ngena peransang Nuan nuju jalai ti betul. Nuan meh Petara, bekuasa meh Nuan ngereja utai kedeka Nuan. Nadai siku ulih ngelaban Peneka Nuan tauka ngubah Tuju Nuan.

#10568
- The Báb

 

O Tuhan aku! Nuan nemu mensia benung dikeliling pemedis enggau rabat-besai lalu dibalut penusah enggau pengachau. Tiap penguji nyerang mensia lalu tiap penyarut ti balat nyambar iya baka serang naga. Nadai pengelindung enggau pengimpun bukai ke iya kelimpah ari di baruh sayap penyaga, pengenan, pengibun sereta alai-penyelamat Nuan.

O Nuan, Siku ti Pengasih! O Tuhan aku! Asuh penyaga Nuan nyadi gagung-kebal aku, pengenan Nuan nyadi terabai aku, pemaruh ati ba mua pintu penyerakup Nuan nyadi pengibun aku, lalu alai penyelamat enggau pengetan Nuan nyadi kuta aku enggau alai-pendiau aku. Nanka aku ari runding diri enggau pengingin ati, lalu ibun aku ari semua penyakit, penguji, pengemar enggau pemerinsa.

Amat bendar, Nuan meh ti Penyaga, ti Pengibun, ti Pengenan, ti Penyukup, lalu amat bendar, Nuan meh ti Pengasih ke Pemadu Kasih!

#10569
- `Abdu'l-Bahá

 

O Tuhan, Petara aku enggau Pengenduh aku lebuh maya penusah aku! Terabai aku enggau Pengelindung aku lebuh maya aku kena penusah! Tempat-Pengelindung enggau Pengintu aku lebuh maya suntuk lalu lebuh maya aku lelengau Nuan nyadika Pangan aku! Lebuh maya aku merampau Nuan ngelantangka aku, lalu lebuh maya aku silu-ilu Nuan nyadika Pangan ti kasih! Nuan nyadika Penawar ipuh penusah ati aku sereta Pengampun dosa aku!

Enggau pengabis ati aku ngadap Nuan, enggau naka pemaruh aku ngena pengabis penunggang ati aku, runding aku, enggau dilah aku, minta Nuan nerabai aku ari semua orang ti nyakal Peneka Nuan, ba maya tu, rambau penyerakup Kudus Nuan, lalu nuchi aku ari semua penyalah ke deka nekul aku ari tulihka ayung kayu penelap Nuan ti tuchi sereta tulin.

Kasihka, O Tuhan, sida ti lembut, sumanka sida ti sakit, lalu kemuaska sida ti balat aus.

Kelantangka ruang-dada ke alai api pengerindu Nuan bebara lalu asuh ia mancharka daun api pengerindu semengat serega Nuan.

Kelambika panggau penyerakup kudus ngena gagung pengudus lalu rasuk ba pala aku maskuta berekat Nuan.

Terangka mua aku ngena penampak Bingkai pementas Nuan lalu enggau penelap saup aku mutarka pengawa ba Pemetung Kudus Nuan.

Asuh ati aku melumpa laban pengerindu ke utai tempa Nuan lalu kemendarka aku awakka nyadi tanda pengasih Nuan, nyadika pesindang penelap Nuan, ke pemansang penyerakup ati ba bala ti dikerindu Nuan, angkun ngagai Nuan, menyanyi muji Nuan sereta enda ingatka diri tang meruan ingatka pekara Nuan.

O Petara! Petara aku! Anang ngelaung ari aku puput angin pengampun enggau penelap Nuan, lalu anang ngemeluka aku ari lubang-pemansut bantu enggau pengasih Nuan.

Di baruh ayung sayap penyaga Nuan, asuh aku ngenduh, lalu kuing nuju aku perening mata Nuan ti nyaga semua.

Kelembungka dilah aku muji Nama Nuan ba bala mensia Nuan, awakka nyawa aku di dinga ba gempuru ti besai, lalu ari mulut aku mansutka panjah puji Nuan.

Nuan, amat bendar, ti Penelap, ti Bemulia, ti Tegap, ti Pemadu Bekuasa.

#10570
- `Abdu'l-Bahá

 

Penyaga

Iya meh ti Penyinu, ti Pemadu Nelap! O Petara, Petara aku! Nuan meda aku, Nuan nemu aku; Nuan meh Pengenduh aku enggau Penyelamat aku. Nadai siku ti udah digiga aku lalu nadai mega aku deka ngiga kelimpah ari Nuan, nadai menasan ti udah aku tengah lalu nadai mega menasan bukai deka ditengah aku tang menasan pengerindu Nuan. Ba pemetang malam penesat, mata aku nunga enggau sadang sereta naka meh pengandal ngagai pagi bantu-pengasih Nuan ti nadai sekat lalu lebuh jam teberingkas tawas semengat aku ti ikak diidup sereta dikering dalam pengingatka pemajik enggau penulin Nuan. Iya ti dibantu ulih pemanah Berekat Pengasih Nuan, taja pen iya semina setitik, deka nyadi tasik ti dalam, lalu leka ti pengabis mit ketegal saup tengkujuh pengerindu-pementas Nuan, deka perenching indah enda baka bintang ti terang.

Lindung di baruh jaga Nuan, O Nuan Roh ti tuchi, Nuan Pemeri ti Pemadu Nelap, kuli Nuan ti udah tetarit sereta dikemau tu. Tulung iya dalam dunya pengidup tu ngambika mengkang tegap sereta teguh dalam pengerindu Nuan lalu kemendarka burung ti patah sayap bulih penyelamat enggau pengenduh dalam tansang pengudus Nuan, ti idup ba kayu serega.

#10564
- `Abdu'l-Bahá

 

O Petara! O Petara aku! Terabai bala nembiak ti dikarapka Nuan ari penyai diri enggau pengingin, jaga sida ngena mata ti lansik ke pengerindu-pementas ari semua pengeringat, dengki enggau kepapas, lindung sida dalam kuta Pengawa Nuan ti kebal lalu selamatka ari laja pengakang, asuh sida nyadi pengayan tanda penampak Nuan. Terangka mua sida ngena perenching panchar ti nurun ari Entigis-Hari Penyerakup pengudus Nuan, kelantangka ati sida ngena genteran ti dipegarika ari Perintah Nuan ti kudus, keringka punggung sida ngena kuasa perintah Nuan it datai ari dunya penampak Nuan. Nuan meh ti Pemadu Sayau, ti Penyaga, ti Chukup-Tegap, ti Nelap!

#10565
- `Abdu'l-Bahá

 

Penyaup

O Petara aku! Aku minta Nuan, ari Nama Nuan ti pemadu tampak mantu aku ba utai ti tau ngasuh pekara nembiak Nuan mujur, lalu nengeri Nuan maju. Nuan, endang, ngembuan kuasa atas semua utai!

#10540
- Bahá'u'lláh

 

Petara aku, Sulu aku, Raja aku, Dikingin aku!. Nama dilah ti ulih kena aku nyebut puji aku ngagai Nuan ? Aku udah enda peduli, tang Nuan udah ngangkatka aku. Aku udah lari ari Nuan, tang Nuan udah enggau naka penelap mantu aku nguing ngadap Nuan. Aku udah baka orang ti mati, tang Nuan udah manjah aku ngena ai pengidup. Aku udah lay9u, tang nuan udah ngidupka aku ngena ai sungai serega sampi Nuan ti udah nurun ari Pen ti Ngampun Semua.

O Penginang ti kudus! Semua pengidup nyadi ketegal berekat Nuan; anang ngemeluka iya ari penelap Nuan, anang mega Nuan nagang iya ari tasik pengampun Nuan. Aku minta nuan nulung sereta mandung aku ba sebarang maya enggau sebarang gaya, lalu ngiga ari serega pengasih bantu asal Nuan. Nuan endang amat bendar, Tuhan pemai berekat, sereta Raja ke perintah ti meruan.

#10541
- Bahá'u'lláh

 

Kati bisi pemuai pemerinsa bukai kelimpah ari Petara? Sebut: Puji Petara! Iya ti Petara! Semua nembiak Iya, lalu semua idup dalam ibun Iya.

#10542
- The Báb

 

Sebut: Petara chukup ke semua utai ngelui semua utai, lalu nadai utai dalam semua serega tauka dalam dunya tang Petara meh ti chukup. Amat bendar, Iya ba Iya-empu, ti Nemu, ti Ngenan, ti Pemadu Bekuasa.

#10543
- The Báb

 

Tuhan! Merinsa meh kami tu, kemendarka bantu Nuan ke kami; seranta, sikap ba kami sebagi ari tasik pengaya Nuan; umang, uji Nuan ngemuaska kami; dikemaruhka, beri kami penampak Nuan.

Burung di langit enggau jelu di tanah nerima pemakai sida tiap hari ari Nuan lalu semua utai idup bulih intu enggau pementas-pengerindu Nuan.

Anang ngelebuka iya ti lembut tu ari ti ngasaika penelap Nuan lalu tetapka Berekat Pengasih Nuan enggau pengering Nuan ngagai semengat ti merinsa tu.

Beri kami roti kami ninting hari lalu kemendarka tambah pemisi Nuan dalam utai ti dipeguna ba pengidup kami; ngambika kami tau bepanggai enda ba utai bukai tang Nuan, tau besambiang penuh ngagai Nuan, tau bejalai nengah arus Nuan lalu madahka penyelai Nuan.

Nuan ti Chukup-Tegap enggau Mentas sereta Pemeri ngagai semua mensia.

#10544
- `Abdu'l-Bahá

 

O Tuhan, Petara aku! Tulung bala ti dikerinduka Nuan nyadi teguh dalam Pengarap Nuan, bejalai nengah arus Nuan, nyadi tegap ba Pengawa Nuan. Beri sida penelap Nuan awakka tan diserang diriempu enggau pengingin, awakka nitih lampu Iring Petara. Nuan ti Kering, ti Nelap, ti Pengibun-Diri, ti Penyikap, ti Penyinu, ti Chukup-Tegap, ti Pemadu Sayau.

#10545
- `Abdu'l-Bahá

 

Puji enggau terima kasih

O Petara ti Penyinu! Terima kasih ke Nuan laban Nuan udah ngenani lalu ngasuh aku ngeleda. Nuan udah meri aku mata ti lansik sereta nyikap aku enggau pending ti ninga; udah nguluka aku ngagai Perintah Nuan sereta ngiring aku ngagai jalai Nuan. Nuan udah nunjukka aku arus ti betul lalu ngasuh aku nepan ba Bandung Pengelepas. O Petara! Wan aku awakka tegap lalu gaga aku teguh sereta ganggam. Jaga aku ari penguji ti balat lalu ibun aku sereta lindung aku dalam kota Penyanggup enggau Sempekat Nuan ti teguh. Nuan ti Bekuasa! Nuan ti Ngemata! Nuan ti Ninga!

O Nuan Petara ti Penyinu! Sikap ba aku ati ti baka cheremin, ngambika diterangka ngena panchar pengerindu Nuan, lalu beri aku penemu ti tau nukar dunya tu nyadi kebun bungai ros ngena panjah penyayau kudus.

Nuan ti Penyinu, ti Pengasih ! Nuan meh Petara Pemadu sayau!

#10575
- `Abdu'l-Bahá

 

Sambiang ka orang ti udah mati

Sambiang tu dikena besambiangka Bahá'í ti beumur 15 taun enggau tuai agi. "Semina tu meh sambiang ansak Baha'i ti disebut bebala maich; ia dibacha Bahá'í siku aja lalu semua ti bisi bela bediri magang. Lebuh nyebut sambiang tu enda ibuh nungaka Qiblih (Tanah Kudus)."

-Kitab-i-Aqdas

O Petara aku! Tu pengasuh Nuan sereta anak lelaki pengasuh Nuan ti udah arapka Nuan enggau tanda Nuan, lalu nungaka mua iya ngadap Nuan, ngetas diri ari semua kelimpah ari Nuan. Nuan, amat bendar, ari sida ti mandangka pengasih Nuan meh ti pemadu pengasih!

Intu iya, O Nuan ti ngampun dosa mensia sereta ngelamun penyalah sida, nitihka serega pementas Nuan enggau tasik penelap Nuan. Kemendarka iya masuk ke dalam kandang peninggi pengasih Nuan ti dulu ari penyadi dunya enggau serega. Nadai Petara bukai tang Nuan, ti Meruan Pengampun, ti pemadu Nelap.

(Diatu sebut "AIIah-u-Abha" enam kali, udah nya sebut siti-siti genteran di baruh tu sembilanbelas kali:)

Kami semua, amat bendar, nyembah Petara.

Kami semua, amat bendar, meremi ba mua Petara.

Kami semua, amat bendar, angkunka Petara.

Kami semua, amat bendar, meri puji ngagai Petara.

Kami semua, amat bendar, meri terima kasih ngagai Petara.

Kami semua, amat bendar, ngembuan pengeliat ati ba Petara.

(Enti iya ke mati nya indu, sebut tu: Tu pengasuh Nuan sereta anak indu pengasuh Nuan...)

#10583
- Bahá'u'lláh

 

Mulia meh Nuan, O Tuhan Petara aku! Anang ngemaruh iya ti udah dipuji Nuan ngena penguat pegai-kuasa Nuan ti meruan, lalu anang ngiar ari Nuan iya ti diasuh Nuan masuk ngagai panggau pemeruan Nuan. Kati deka Nuan muai, O Petara aku, iya ti udah dilindung Nuan ngena Pegai-Perintah Nuan, sereta deka Nuan ngasuh melakangka Nuan, O Niat-ati aku, iya ke udah ngenduh ba Nuan? Ulih Nuan ngenyaika iya ti udah diangkatka Nuan, tauka enda ingat ke iya ti diasuh Nuan ngingatka Nuan?

Mulia, chukup mulia meh Nuan! Nuan meh Iya ke ari jeman kelia udah nyadi Raja seluruh utai tempa enggau Pugu Pemun ia, lalu Nuan deka mengkang meruan nyadi Tuhan ke semua utai tempa sereta Pemerintah sida. Mulia meh Nuan, O Petara aku! Enti Nuan enda kasih ngagai bala pengasuh Nuan, sapa, meh, deka mandangka pengasih ngagai sida; lalu enti Nuan enggai nulung bala ti dikerindu Nuan sapa meh ulih nulung sida?

Mulia, nadai sekat meh mulia Nuan! Nuan dipebasa dalam pengamat Nuan, lalu Nuan meh, amat bendar, ti disembah semua kami; lalu Nuan meh pegari dalam pengelurus Nuan, lalu ba Nuan kami semua, amat bendar, besaksi. Nuan meh, ti bendar, dikerindu dalam penelap Nuan. Nadai Petara bukai tang Nuan, Penulung lebuh Tusah, Pengibun-Diri.

#10584
- Bahá'u'lláh

 

O Petara aku! O Nuan pengampun dosa, ti ngenataika pemeri, pemuai semua pemedis!

Amat bendar, aku minta Nuan ngampun dosa sida ti udah ninggalka gari dunya tu lalu udah niki ngagai dunya semengat.

O Tuhan aku! Tuchi sida ari semua penyalah, buai penusah ati sida, lalu tukar pemetang sida ngena penampak. Asuh sida masuk ngagai kebun pengaga, beresi sida ngena ai ti pemadu tulin, lalu kemendarka sida merening nunga tuchung penampak Nuan.

#10585
- `Abdu'l-Bahá

 

Serakup

O Petara aku! O Petara aku! Gempung ati semua nembiak Nuan, lalu pegarika ngagai sida tuju Nuan ti pemadu besai. Asuh sida nitihka jaku tangkan Nuan sereta ngasika adat Nuan. Tulung sida, O Petara, dalam kereja sida lalu beri sida pengering gawaka Nuan. O Petara! Anang neju sida kediri, tang iring singkang sida ngena tenggau penemu Nuan lalu kelantangka ati sida ngena pengerindu Nuan.

Amat bendar, Nuan endang Penulung sida enggau Tuhan sida.

#10588
- Bahá'u'lláh

 

Petara kemendarka panchar penyerakup ti tau mungkur serata dunya, lalu chap nya, Perintah enggi Petara, tau dilekat ba kening semua mensia.

#10589
- Bahá'u'lláh

 

Mulia meh Nuan, O Petara, laban pengayan pengerindu Nuan ke mensia! O Nuan ti Pengidup enggau Penerang kami, iring bala nembiak Nuan dalam jalai Nuan, lalu asuh kami kaya dalam Nuan sereta lepas ari semua kelimpah ari Nuan.

O Petara, ajar kami puasal Nuan Ti Siku lalu asuh kami ngelala Penyerakup Nuan, awakka kami nadai meda orang bukai kelimpah ari Nuan. Nuan meh ti Pengasih enggau Pemeri Pementas!

O Petara, tungkun dalam ati bala ti dikerindu Nuan, api pengerindu Nuan, awakka ia nunu semua runding bukai kelimpah ari Nuan.

Pegarika kami, O Petara, pemeruan Nuan ti tinggi ke alai Nuan udah bisi ari kelia lalu deka meruan belama, lalu nadai Petara bukai semina Nuan. Amat bendar, kami deka bulih pengelantang enggau pengering ba Nuan.

#10590
- Bahá'u'lláh

 

O Petara aku! O Petara aku! Amat bendar aku ngangauka Nuan lalu nyembah enggau pemaruh ati ba mua pemetung Nuan, minta ari Nuan awakka semua pengasih Nuan nurun ngagai bala semengat tu. Telebaka sida ke bantu-pengasih Nuan sereta pengamat Nuan.

O Tuhan! Gempung sereta tanggam begulai semua ati, tampung sejalai semua semengat lalu ransingka bala roh ngena tanda suchi enggau penyerakup Nuan. O Tuhan! Asuh semua mua tu tampak laban panchar penyerakup Nuan. Keringka punggung bala pengasuh Nuan gawa dalam perintah Nuan.

O Tuhan! Nuan ti ngembuan pengasih ti nadai sekat! O Tuhan ti pengampun enggau ti enda ngingat! Ampun dosa kami, anang ngingatka pengurang kami lalu asuh kami nunga ngagai perintah penyayau Nuan, ngangauka perintah ti tegap sereta bekuasa, nunduk ba sungkup Nuan lalu nyerahka diri ba mua penampak tanda-pengamat Nuan.

O Tuhan Petara! Asuh kami baka gelumbang ba tasik, baka bungai ba kebun, begempung besetuju ari pementas pengerindu Nuan. O Tuhan! Kerembaika dada ngena tanda penyerakup Nuan lalu gaga semua bansa mensia baka bintang ti manchar ari tikas penampak ti sama, baka buah pemetul ti tumbuh ba Kayu Pengidup Nuan.

Amat bendar, Nuan meh ti Chukup-Tegap, Pengibun-Diri, ti Pemeri, ti Pengampun, ti Penuh Penemu, Siku ti Nempa!

#10591
- `Abdu'l-Bahá

 

Teguh dalam penyanggup

O Tuhan aku enggau Pengandal aku! Tulung bala ti dikerindu Nuan nyadi teguh dalam Sempekat Nuan ti tegap, mengkang taluk ngagai Pengawa Nuan ti pegari, lalu ngereja semua jaku tangkan Nuan ti endang ditaga Nuan ke sida dalam Bup Penampak Nuan; awakka sida tau nyadi menira pengiring enggau lampu Raban di atas, telaga ai pemintar Nuan ti nadai sekat, lalu nyadi bintang ti ngemalin nuju pemetul, lebuh maya sida manchar ari langit kudus.

Amat bendar Nuan ti Nadai Ulih Laban, ti Pemadu Tegap, ti Pemadu Bekuasa.

#10561
- `Abdu'l-Bahá

 

Gaga teguh ke singkang kami, O Tuhan dalam jalai Nuan lalu keringka ati kami ulih Nuan dalam ngasika Nuan. Kuingka mua kami ngadap pemajik penyerakup Nuan lalu kelantangka ruang-ati kami ngena tanda serakup pengudus Nuan. Iyas tubuh kami ngena kelambi penyayau Nuan lalu kesaika ari mata kami tirai pemai-dosa lalu beri kami jalung Berekat Pengasih Nuan, awakka isi semua pengidup tau menyanyika puji Nuan ba mua perening Pemesai-Pangkat Nuan. Lalu pegarika Nuan Empu, O Tuhan enggau jaku pengasih Nuan sereta penyelai pengidup tuchi Nuan, awakka pengelantang sambiang ti kudus tau ngemenuh ka semengat kami - sambiang ti deka angkat ari atas genteran enggau lekajaku lalu ngelui munyi tusun jaku enggau rentak penginggar - awakka semua utai tau betampil nyadi balang ba mua pegari-penemu penampak Nuan.

Tuhan! Tu bala nembiak ti mengkang tegap sereta teguh ba Penyanggup Nuan enggau Sempekat Nuan, ti udah bepegai rat ba tali penetap dalam Pengawa Nuan lalu betanggam ba rambu Kelambi pemesai-pangkat Nuan. Saup sida, O Tuhan! ngena Berekat Pengasih Nuan, kemendarka ngena kuasa Nuan lalu keringka punggung sida dalam ngasi ka Nuan.

Nuan ti Pengampun, ti Sinu.

#10562
- `Abdu'l-Bahá

 

Tengah malam

(O iya ti ngiga Pengamat! Enti nuan beniatka Petara tau muka mata nuan, nuan mesti besampi ngagai Petara, besambiang sereta berandau enggau lya lebuh tengah malam, lalu nyebut:

O Tuhan, aku udah nungaka mua aku ngadap perintah penyerakup Nuan lalu nyelamka diriempu dalam tasik pengasih Nuan! O Tuhan, terangka perening aku ari ke meda panchar Nuan ba malam ti petang tu, lalu asuh aku lantang laban ai anggur pengerindu Nuan ba rambau ti chukup manah tu! O Tuhan, asuh aku ningaka kangau Nuan, lalu buka ba mua aku pintu serega Nuan, ngambika aku tau meda panchar penampak Nuan lalu tau tetarit ngagai pemajik Nuan!

Amat bendar, Nuan meh ti Pemeri, ti Nelap, ti Pengasih, ti Pengampun!

#10581
- `Abdu'l-Bahá

 

Tikah

"... Lebuh orang Bahá deka bebini-belaki, kaul seduai mesti penyerakup ti bendar, penyerakup dalam semengat lalu pia mega penyerakup ba tubuh, awakka ba tiap renggat pengidup pia mega dalam semua dunya Petara, penyerakup seduai deka meruan laban penyerakup ti bendar nya panchar ari pengerindu Petara".

‘Abdu’l-Bahá

Sumpah tikah, genteran ti disebut siku-siku ari seduai ti deka jadi melaki-bini ba mua enda kurang ari dua iku saksi ti dikemendarka Raban Gelumu Sambiang Menua, baka ti dipadah dalam Kitab-i-Aqdas:

"Semua kami deka, amat bendar nitihka Peneka Petara"

Tampak meh ke Nuan, O Petara aku! Amat bendar, nembiak Nuan tu enggau nembiak indu Nuan tu udah begempuru di baruh kelemayang pengasih Nuan lalu seduai iya beserakup ngena bantu enggau penelap Nuan. O Tuhan! Saup seduai dalam dunya Nuan tu enggau ba Perintah Nuan lalu ungkupka seduai iya semua pemanah ngena pementas enggau berekat pengasih Nuan. O Tuhan! tetapka seduai iya nyadi pengasuh Nuan lalu saup seduai iya dalam kereja Nuan. Asuh seduai iya nyadi tanda nama dalam dunya Nuan sereta jaga seduai ngena penyikap ti enda nemu abis dalam dunya tu enggau dunya ti deka datai. O Tuhan! Seduai besampi enggau pemaruh ati ngadap perintah pengasih Nuan lalu minta kasih ngadap maligai penyerakup Nuan. Amat bendar, seduai iya jadi laban ngasika jaku tangkan Nuan. Gaga seduai iya nyadi tanda penyerakup ati lalu segulai nyentukka pengujung maya.

Amat bendar, Nuan ti Penuh Kuasa, ti Penuh Pemisi sereta Chukup Tegap!

#10602
- `Abdu'l-Bahá

 

Occasional

Hari penyatup

(Hari Penyatup 26hb Dua ngagai lhb Tiga, patut nyadi maya endur nyendia diri ngintu Puasa, maya endur nyamu orang, beberi sereta bebagika pemeri.)

Petara aku, Api aku enggau Penampak aku! Hari ti digelar Nuan Ayyam-i-Ha dalam Kitab Nuan udah berengkah, O Nuan Siku Raja ke semua nama, lalu puasa ti udah ditetapka Pen Nuan ti pemadu tinggi ngagai semua ti dalam perintah tempa Nuan diasuh intu nyau semak. Aku minta enggau pemaruh ati ngagai Nuan, O Tuhan aku, ke hari tu enggau sida ke ngelamatu udah betanggam teguh ngagai rambu tangkan Nuan, lalu bepegai ba ulu lalau Nuan, awakka ngemendar ngagai tiap iku semengat tau diagihka siti tempat dalam kandang panggau Nuan, enggau siti penuduk ba pemansut penerang rampa-mua Nuan.

Tu, O Tuhan aku, bala nembiak Nuan ti nadai ditekul runding jai ari utai ti udah diturunka Nuan dalam Kitab Nuan. Sida udah ngundukka diri ba Pengawa Nuan, sereta nerima Kitab Nuan enggau pemutus ati baka ke pegari ari Nuan, lalu ngasika semua ti udah ditaga Nuan ngagai sida, lalu udah milih deka nitihka utai ti udah diturunka Nuan.

Nuan meda, O Tuhan aku, baka ni sida udah ngelala sereta nyanggup semua utai ti udah dipegari dalam Tulis Nuan. Beri sida ngirup, O Tuhan aku, ai pemeruan Nuan ari jari berekat pengasih Nuan. Lalu, tuliska sida upah ti udah ditagaka iya ti udah nyelamka diri dalam tasik penatai Nuan, lalu tulihka ai anggur ti chulin betunga enggau Nuan.

Aku minta ari Nuan, O Nuan Raja ke semua raja, sereta Siku ti siruka bala ti dikemaruh, tagaka sida pemanah dunya tu enggau dunya ti deka datai. Nambahka nya, tuliska sida, utai ti nadai kala ditemu bala ti ditempa Nuan lalu sengkaum sida enggau bala ti udah ngelingi Nuan, enggau sida ti mindah ba panggau Nuan dalam tiap-tiap dunya ba semua dunya Nuan.

Nuan, endang amat, ti Chukup Tegap, ti Nemu Semua, ti Ngelala Semua.

#10599
- Bahá'u'lláh

 

Naw-Rúz

(Naw-Rúz, 21 haribulan Tiga, hari keterubah ba taun Bahá’í)

Pujika Nuan, O Petara aku, laban Nuan udah ngagih Naw-Rúz nyadi pengrami ke sida ti udah ngintu puasa ketegal pengerindu sida ke Nuan lalu nagang diri ari semua utai ti kamah ku Nuan. Beri pemendar, O Tuhan aku, awakka api pengerindu Nuan sereta pengangat ti dikeluar ari puasa ti ditetapka Nuan tau ngemauka sida dalam Pengawa Nuan, lalu ngasuh sida kiruh muji Nuan enggau ngingatka Nuan.

Laban Nuan udah ngiyas sida, O Tuhan aku, ngena ngepan pasa ti udah diungkup Nuan ke sida, nyaalai, iyas sida mega ngena ngepan penerima Nuan, ngena penelap enggau bantu pengasih Nuan. Laban kereja mensia

endang semua bepanggai ba pemanah-penyamai Nuan, lalu nitihka tangkan-atur Nuan. Semaka Nuan ngaku iya ti udah ngelanggar puasa baka sida ti udah ngintu nya, mensia ti baka nya deka diterima baka sida ti ari jeman-kelia ti mengkang ngintu puasa.

Lalu semaka Nuan merintah iya ti udah ngintu puasa lalu ngelanggar nya, orang nya deka disengkaum enggau sida ti udah ngasuh Kelambi Pegari Penemu Nuan dipechik abu, lalu udah jauh mepar ari Tengkeching ai chiru pengidup tu.

Nuan meh Iya ti alai menira "Pemadu dipuji meh Nuan dalam kereja Nuan" udah ditambaika, lalu pangkat "Dititih meh Nuan dalam jaku tangkan Nuan" udah dikerembaika. Asuh temu pangkat Nuan tu, O Petara aku, ngagai nembiak Nuan, ngambika sida tau diasuh nemu pemanah semua utai bepanggai ba asuh Nuan enggau jaku Nuan, lalu pemadas semua pengawa nitihka pemendar Nuan enggau pemanah-penyamai peneka Nuan, sereta tau ngelala penentu pengawa mensia endang dalam genggam penerima Nuan enggau tangkan-ajar Nuan. Asuh tu temu sida, awakka nadai utai tau nutup sida ari Pemajik Nuan, hari tu ke alai Christ ngerah: "Semua endang dipegai kuasa Nuan, O Nuan Pemansut Roh (Jesus)"; enggau Pangan Nuan (Muhammad) nyada: "Tampak meh Nuan, O Nuan ti Pemadu di-Kerindu, laban Nuan udah mandangka Pemajik Nuan, lalu nuliska bala ti dipilih Nuan utai ti deka ngasuh sida tulihka penuduk pegari penemu Nama Nuan ti Pemadu Besai, lalu ari nya semua mensia udah merampau kelimpah ari sida ti ngingkas diri empu ari semua utai kelimpah ari Nuan; lalu nungaka diri empu ngadap Iya Siku ti ngasuh Pegari Nuan empu enggau Pengayan ke pemanah Nuan".

Iya ti Dan Nuan enggau semua raban Nuan, O Tuhan aku, udah nembuka puasa sida ba hari tu, udah ke ngintu ia dalam kandang panggau Nuan, sereta dalam pengeransing sida deka ngenyamaika ati Nuan. Uji Nuan ngagihka Iya, enggau ke sida, sereta ke semua sida ti udah betunga enggau Nuan ba hari tu semua pemanah ti udah ditaga Nuan dalam Kitab Nuan. Lalu bekal sida, ngena utai ti deka nguntungka sida, dalam kedua-dua pengidup tu enggau pengidup ti dudi.

Nuan, endang amat, ti Nemu-Semua, ti Semua-Pintar.

#10601
- Bahá'u'lláh

 

Puasa

Dalam Kitab-i-Aqdas bisi disebut: Kami udah nangkan kita besambiang enggau bepuasa berengkah ari maya ngangkatka diri bujang tauka dara (15 taun): tu adat Petara, Tuhan nuan enggau Tuhan aki-ini nuan …. Orang ke bejalai jauh, ke sakit, indu ke ngandung enggau nusuka anak, dikelaung ari bepuasa…. Anang makai tauka ngirup, berengkah ari matahari tumbuh nyentuk ngagai maya matahari padam, lalu bejaga enggaika pengingin nagang kita ari ke ditetap dalam Kitab.

Kandang maya bepuasa ianya berengkah kena 2hb Tiga nyentuk ngagai 20hb Tiga.

Pujika Nuan, O Tuhan Petara aku! Aku minta enggau naka pemaruh ati ngagai Nuan ari Pegari Penemu Petara tu ke alai pemetang udah ditukar enggau penampak, ke alai Kaaba Penyuah udah didirika, lalu Papan Tulis udah dipegarika, lalu Gulung Pengerembai udah dibuka, kirum ke baruh ngagai aku enggau ngagai sida ti dalam raban aku, utai ti tau ngasuh kami terebai ngagai tuchung serega penampak Nuan, lalu meresi kami ari pechik pengakang ti nekul orang ti sangka ari ti masuk ngagai panggau penyerakup Nuan.

Aku tu meh iya, O Tuhan aku, ti udah ngenggam rat tali pengerindu pementas Nuan, lalu betanggam ba rambu pengasih enggau bantu penelap Nuan. Uji Nuan ngagihka aku enggau bala ti dikerindu aku, pemanah dunya tu enggau dunya ti deka datai. Lalu, bekal sida, enggau Pemeri ti Dipelalai Nuan ti diagihka bala ti pemadu manah ari semua utai tempa Nuan.

Tu meh, O Tuhan aku, maya hari ti alai Nuan merintah bala nembiak Nuan ngintu Puasa. Berekat meh iya ti ngintu puasa ketegal Nuan lalu ngingkaska diri ari semua utai bukai kelimpah ari Nuan. Saup aku lalu saup sida, O Tuhan aku, ngasika Nuan lalu nitihka ajar Nuan. Nuan, amat bendar, ngembuan kuasa ngereja utai ti dipilih Nuan.

Nadai Petara bukai tang Nuan, ti Nemu Semua, ti Pemadu Pintar. Semua puji ke Petara, Tuhan ke semua dunya.

#10600
- Bahá'u'lláh

 

Tablets

Papantulis Ahmad

"Semua sambiang ansak, begulai enggau sekeda sambiang bukai, baka Sambiang Pengerai, Papantulis Ahmad, udah disikap Baha'u'lláh enggau penguat enggau pemesai guna ti tinggi, Ialu patut diterima baka nya lalu patut disebut bala ti arap enggau pengarap sereta pengandal ati ti tunggang, awakka nengah nya sida tau masuk lebih semak ngagai randau enggau Petara, lalu ngasuh sida lebih agi dikelala ketegal nitihka adat enggau ajar Iya."

Ari siti surat ditulis ngarika Shoghi Effendi.

Iya meh Raja, ti Nemu-Semua, ti Pintar! Peda, Burung Bul-Bul ari Serega belagu di atas pating Kayu ti Meruan, ngena nyawa ti kudus sereta manis, madah ngagai bala ti amat-rurus tentang berita pengaga penyemak Petara, nesau bala ti arap dalam Penyerakup Petara ngagai panggau Penuduk Iya ti Penelap, nerang ngagai bala ti udah ngingkaska diri tentang pesan ti udah di pegarika Petara, ti Raja, ti Bepenampak, ti nadai ulih Banding, ngiring bala ti dikerindu ngagai penuduk ti tuchi sereta ngagai Pemajik ti pemadu tampak tu.

Amat bendar tu meh Pemajik ti Pemadu Besai, di padah dalam Kitab bala Seruan,ari Sida semua pengamat deka dikelala ari penyalah lalu pemintar tiap jaku-tangkan deka di uji. Amat endar Iya meh Kayu Pengidup ti mansutka buah Petara, ti Tinggi, ti Bekuasa, ti Gagah.

O Ahmad! Nuan meh nyadika saksi ianya amat bendar Iya meh Petara lalu nadai Petara kelimpah ari Iya, ti Raja, ti Penyaga, ti Nadai Banding, ti Penuh Kuasa. Lalu Siku ti dikirum Iya ti benama Ali* endang Siku ti ari Petara, ti alai jaku tangkan Iya diturut semua kitai.

Sebut: O mensia ngasika undang-undang Petara, ti udah ditetapka dalam Bayan ulih Iya ti Mulia, ti Pintar. Amat bendar Iya nya Raja ke semua Seruan lalu Kitab Iya meh Indu Kitab nya alai kelala ulih kita.

Baka nya meh Burung Bul-Bul mansutka kangau Iya ngagai nuan ari rumah tutup tu. Iya mesti ngenataika pesan ti nyemetak tu. Sebarang sapa ti deka, awakka iya limpang ari lalau tu lalu barang sapa ti deka awakka iya milih jalai ti nuju Tuhan iya.

O mensia, enti kita nyangkal genteran tu, ni penerang kita arapka Petara? Bantaika ia, O raban kita ti salah.

Ukai semina nya, ari Siku ti ngembuan semengat Aku, sida enda ulih, lalu tetap enda ulih ngereja tu, taja pen sida beripih nyaup pangan diri. O Ahmad! Anang enda ingat ke Berekat Pengasih Aku lebuh Aku ti nadai. Kingatka hari Aku lebuh maya hari nuan sereta pemerinsa Aku enggau Aku ti diburu ngagai rumah tutup ti jauh tu. Lalu chukup tegap meh nuan dalam pengerindu Aku awakka ati nuan enda rawan, taja pen pedang munsuh berujan mepat nuan lalu semua serega enggau dunya angkat ngelaban nuan.

Awakka nuan nyadi daun api ngagai munsuh Aku lalu nyadi sungai pengidup ti meruan ngagai bala ti dikerinduka Aku, lalu anang nyadi sida ti kakang.

Lalu enti nuan tejanggal laban pemedis nengah jalai Aku, tauka dikemalu ketegal Aku, anang meh nuan irau ketegal nya.

Bepanggai ba Petara, Petara nuan sereta Tuhan ke apai-indai nuan. Laban mensia tesat ngagai jalai ti arap ka utai ngapa, nadai ngembuan pengelandik meda Petara ngena mata sida empu, tauka ninga Nyawa Iya ngena pending sida empu. Baka nya meh Kami udah nemu sida, baka ti dipeda Nuan.

Baka nya meh pengarap ngapa sida nyadika tirai ti nyelapat sida enggau ati sida lalu ngelimpang sida ari jalai Petara, ti Tinggi, ti Gagah.

Awakka nuan andal ba diri empu ianya amat bendar, iya ti ngerarika diri ari Pemajik tu udah mega ngerarika diri ari bala Seruan ti dulu lalu mandangka penyumbung ngagai Petara ari jeman kelia nyentuk ke jemah ila.

Pelajar bebendar Papan tulis tu, O Ahmad. Besampi ngena ia lebuh maya hari nuan lalu anang matak diri ari nya. Laban amat bendar, Petara udah netapka upah, seratus iku genselan-pengarap enggau pengawa dalam kedua-dua dunya tu, ngagai iya ti besampi ngena nya. Bantu-pengasih tu udah diungkup Kami ke nuan nyadika Berekat Pengasih ari Kami sereta penelap ari pemisi Kami, awakka nuan nyadi sida ti meruan beterima kasih.

Ari Petara! Semaka siku dituntung pemedis tauka penusah macha Papan Tulis tu enggau naka ia pengerurus ati, Petara deka muai penusah iya, mutarka penanggul iya lalu munaska pemerinsa iya.

Amat bendar, Iya ti Pengasih, ti Penyinu. Pujika Petara, Tuhan ke semua dunya.

#10610
- Bahá'u'lláh

 

Papantulis pengabas 'Abdu'l-Bahá

(Sambiang tu, dipegari ulih 'Abdu'l-Bahá, dibacha ba Sungkup Iya. Ia tau diguna maya sambiang kediri)

"Barang sapa nyebut sambiang tu enggau pemaruh ati sereta enggau ati ti nunduk ka diri ia deka mai pengaga enggau pengelantang ngagai Nembiak tu: ianya asai ka betemu betungga mua enggau Iya."

Iya meh Semua Penampak! O Petara, Petara aku! Enggau naka pemaruh ati sereta enggau sabak aku ngangkatka jari aku minta ngagai Nuan lalu nutup mua aku dalam abus Pemetung Nuan, tinggi ngelui ari penemu orang ti bepelajar, lalu ari semua puji ngenampakka Nuan. Enggau penelap kemata nembiak Nuan, ti nunduk sereta ngemaruh ka diri ba pintu Nuan, ngena lansa perening mata pengasih Nuan, lalu selamka iya dalam Tasik penelap Nuan ti meruan.

Tuhan! Iya tu nembiak Nuan ti seranta sereta baruh, tekuing ngagai Nuan sereta minta diri digenggam dalam jari Nuan, besampi enggau naka pengangkun ngagai Nuan, bepengarap ba Nuan, enggau nyabak nunga mua Nuan, ngangauka Nuan sereta minta enggau pengabis ati ngagai Nuan lalu nyebut:

O Tuhan, Petara aku! Beri aku penelap Nuan ngambika gawaka bala ti dikerindu Nuan, keringka aku dalam pengawa aku ba Nuan, tampakka kening aku ngena panchar penyayau ba panggau Nuan ti Kudus, lalu nyadika sambiang ngagai Perintah Nuan ti tinggi-kuasa. Tulung aku awakka enda ngingatka diri ba mua pintu-serega Nuan ti tuchi, lalu saup aku awakka ngetas diri ari semua utai dalam kandang tempat Nuan ti kudus. Tuhan! Asuh aku ngirup ari jalung enda ngira diri, ngena kelambi ia gari aku, lalu dalam tasik ia selamka aku. Gaga aku baka abu ba jalai tujah bala ti dikerindu Nuan, lalu kemendar aku ngambika aku nyerahka semengat aku ba tanah ti dimuliaka ketegal diindik bala ti dipilih Nuan dalam jalai Nuan. O Tuhan Penampak ti Pemadu-Tinggi.

Ngena sambiang tu nembiak Nuan ngangauka Nuan, lebuh dini-hari enggau lebuh maya malam. Penyadika niat ati iya, O Tuhan! Terangka ati iya, kelantangka ruang-dada iya, tungkun api iya, awakka iya tau gawaka Pengawa Nuan enggau nembiak Nuan.

Nuan meh Iya ti Penyikap, ti Penyiru, ti Pemadu Pementas, ti Nelap, ti Bepengasih, ti Penyinu!

#10609
- `Abdu'l-Bahá

 

Papantulis pengabas Bahá'u'lláh

(Papantulis tu disebut ba sungkup Bahá'u'lláh enggau Nabi Báb.. Ia suah mega dibacha kena ngintu pengrami ngingatka Seduai Iya)

Puji ti pegari ari Diri Nuanempu ti pemadu dipebasa, lalu penampak ti udah manchar ari Pemajik Nuan ti pemadu beperenching, dipanggai ba Nuan, O Nuan Siku Pengayan Peninggi Kuasa, sereta Raja Pemeruan, sereta Tuhan ke semua ti di serega enggau di dunya! Aku besaksi ari Nuan pegai-kuasa Petara enggau perintah-kuasa Iya, sereta kuasa-raja Petara enggau peninggi-kuasa Iya, dipegari, lalu Bintang-Siang-Hari ti bendang-bendang ari kelia udah mancharka penerang sida dalam serega jaku-perintah Nuan ti enda ulih diubah, lalu Pemajik ti Enda Dipeda udah manchar ari atas bingkai langit utai tempa. Aku besaksi, kelebih agi, ianya ngena, tang semina sekali kinsit Pen Nuan, dia peminta Nuan "Nyadi meh Nuan" udah dipejalaika, lalu Penyelai dilalai Petara udah dibungkar, lalu semua utai tempa udah diberi pengidup, lalu semua Penemu Petara udah diturun.

Aku bempu saksi, nambahka nya,ngena pemajik Nuan, pemajik siku ti Dikesayau udah dipandang, lalungena mua Nuan Siku, ti di Niat udah manchar, lalungena seleka jaku Nuan, Nuan udah mida semua utai tempa, ngasuh sida ti angkunka Nuan niki ngagai tuchung penampak, Ialu sida ti enda pechaya labuh ngagai buntut penyai.

Aku bempu saksi ianya iya ti udah nemu Nuan udah nemu Petara, lalu iya ti udah betunga enggau Nuan udah betunga enggau Petara. Nya alai, besai meh berekat iya ti udah arapka Nuan, sereta arapka tanda Nuan, lalu udah ngemaruh diri empu ba mua pegai-kuasa Nuan, lalu udah diberi basa betemu enggau Nuan, lalu udah tulihka pemanah pengelantang peneka Nuan, lalu udah ngelingi meling Nuan, lalu udah bediri nunga panggau-raja Nuan. Penusah ngalun iya ti udah ningkah ngelaban Nuan, lalu udah nyangkal Nuan, lalu udah ngenggaika tanda Nuan, lalu udah mantah pegai-kuasa Nuan, lalu udah angkat ngelaban Nuan, lalu mandangka pengelawa ba mua Nuan, lalu ngenggaika penerang Nuan, lalu udah limpang ari adat Nuan, enggau perintah-kuasa Nuan, lalu udah disengkaum enggau sida ti enda pechaya ke alai nama sida udah diukir ulih tunjuk perintah Nuan ba Papantulis Kudus Nuan.

Nangkanka nya tiup ba aku, O Petara aku, enggau Siku ti Dikerindu, ari jari kanan pengasih Nuan enggau pengerindu-pementas Nuan, seput Kudus bantu-pengasih Nuan, awakka sida narit aku ari diri empu enggau ari dunya tu nuju ngagai kubu penyemak enggau pemisi Nuan. Bekuasa meh Nuan ngereja utai ti ngelantangka Nuan. Nuan, endang amat, tinggi ngelui semua utai.

Pengingatka Petara enggau puji Iya, sereta penampak Petara enggau perenching Iya, dipanggai ba Nuan, O Nuan Ti Pemajik Iya! Aku bempu saksi ianya mata utai tempa nadai kala merening siku diperinsa baka Nuan. Nuan udah diselam ba semua hari pengidup Nuan di dalam tasik pemerinsa. Sekali Nuan dikungkung sereta dirantai; sekali agi dikeremba ngena pedang bala munsuh Nuan. Tang, taja ngasaika semua tu, Nuan udah ngasuh semua mensia ngasi ka utai ti ditaga Nuan ari Iya Siku ti Nemu Semua, Pemadu Pintar.

Arapka Roh aku tau nyadika genselan ke pemedis ti disepi Nuan, lalu semengat aku nyadika tebus penusah ti udah ditapi Nuan. Aku minta enggau pemaruh ati ngagai Petara,ari Nuan enggauari sida ti udah beperenching mua ketegal pandang panchar rampa-mua Nuan, lalu ketegal pengerindu sida ke Nuan udah ngasika semua ti diasuh kereja sida, ngambika ngesaika tirai ti nyelapat Nuan enggau utai tempa Nuan, lalu mekal aku ngena utai ti manah ba dunya tu enggau dunya ti deka datai. Nuan, endang amat, ti pemadu Tegap, ti Pemadu Tinggi, ti Pemadu Mulia, Seruran-Ngampun, ti Pemadu Penyinu.

Berekat ulih Nuan, O Tuhan Petara aku, Kayu-Buah Petara enggau daun ia, enggau gumpung dan ia, enggau pating ia, enggau sumbuk ia, seagi agi gelar Nuan ti pemadu manah meruan bisi sereta pemanah pemeri Nuan ti pemadu dipebasa meruan bekuasa. Lalu jaga ia ari kachau orang ti jai enggau raban orang ti mangah merintah. Nuan, endang amat, ti Pemadu Tegap, ti Pemadu Bekuasa. Berekat ulih Nuan, mega, O Tuhan Petara aku bala pengasuh Nuan sereta pengasuh indu Nuan ti udah datai ba Nuan. Nuan, endang amat, ti Semua-Mentas, ngembuan pengasih ti nadai sekat. Nadai Petara bukai kelimpah ari Nuan, ti Meruan-Ngampun, ti Pemadu Nelap.

#10608
- Bahá'u'lláh