Return   Facebook   Zip File

Arabic

1

ANERSAAP ERNERA–AA!

Siunnersuutima siullersaa unaavoq: minguitsumik, ikinngutinnersumik qaammarissumillu uummateqarit, naalagaaffimmik qangarnisaangaartumik piujuartussamik naassaanngitsumillu piginnaaneqarfeqarniassagavit.

2

ANERSAAP ERNERA–AA!

Isinni sunik tamanit pingaarnerutippara: naapertuilluarneq, tunoqinagu Uannik ujarleruit, atornerlunnagulu tatiginiassagakkit, taannalu ikiortigalugu nammineq isinnik isigissaatit allat isaatiguunngitsoq, namminerlu ilisimassutsinnik ilisimassaatit tullivit ilisimassusaatiguunngitsoq. Uummatinni manna eqqarsaatigeqqissaaruk: qanoq ittuunissamut pisussaaffeqarlutit. Ilumut naapertuilluarneq ilinnut tunissutigaara asannittumillu paarsisuuninnut ilisarnaataalluni. Taamaammat tamanna isiginiaruk.

3

INUUP ERNERA–AA!

Suussutsima qangarnisaangaartup ulissimanerani naassaanngissutsimalu isserani qangarnisaangaartumi ilinnut asanninnera nalusimanngilara, taamaattumillu pinngortippakkit ilinnut assera ersersissimallugu kusanassuseralu ilinnut saqqummersissimallugu.

4

INUUP ERNERA–AA!

Pinngortitaanerit asasimavara, taamaammat pinngortissimavakkit. Taavami asannga aqqit taaniassagakku tarnerillu inuunerup anersaavanik immerlugu.

5

INUUNERUP ERNERA–AA!

Asannga asaniassagakkit. Asanngikkumma asanninnerma sukkulluunniit angusinnaangilaatit. Tamanna ilisimajuk, kiffaq–aa.

6

INUUNERUP ERNERA–AA!

Paradiisit tassaavoq Uanga asanninnera; qilammi angerlarsimaffiit Uannik kattuteqqinneq. Taqqamunga iserit nangaanallu. Tassaavoq Naalagaaffitsinni qulaaniittumi Kisittalu Oqartussaaffitsinni ilinnut aalajangiunneqarsimasut.

7

INUUP ERNERA–AA!

Asagumma ilinnut tunugit; iluarinninneralu ujarukku, illit iluarinninnerit pingaarnerutinnagu, Uanni toqusinnaaniassagavit Uangalu ilinni naassangitsumik inuusinnaaniassagama.

8

ANERSAAP ERNERA–AA!

Sukkulluunniit eqqisivissaqanngilatit, Uannut saallutit ilinnut tunniutinngikkuit; pisussaaffigaammi Atikkut ataqqineqassallutit, nammineq atikkuunngitsoq; tatiginninnerit Uannut saatsissagit ilinnuunngitsoq, kissaatigigakkumi Kisima suulluunniillu qulaagut asaneqarnissara.

9

INUUNERUP ERNERA–AA!

Asanninnera tassaavoq Pallittaalisara: tassunga isertoq isumannaranilu eqqissisimalluinnarpoq, tunutsisorli qularnanngitsumik tammassaaq suujunnaassallunilu.

10

OQALUNNERUP ERNERA–AA!

Tassaavutit pallittaalisara, taqqamunga iserit isumannanngilluinnarnermiinniassagavit. Asanninnera ilinniippoq, tamanna paasiuk eqqanniittunga nassaariniassagamma.

11

INUUNERUP ERNERA–AA!

Tassaavutit Qullera, Qaamaneralu ilinniippoq. Taassumallu iluani qinngornerit aajuk allamillu Uangaanngitsumik ujarlernak. Uangami pisuutut pinngortippakkit tunissutikkalu tukkusumik ilinnut kuiorarsimallugit.

12

INUUNERUP ERNERA–AA!

Nukittussutsip assaannik ilusilersimavakkit, pissaanerullu inuaannik pinngortillutit, ilunnilu Qaamanerma issera inississimavara. Tamanna naammaginiaruk allamillu ujarlernak, tassami Suliara naammalluinnarpoq, Peqqussutigalu pisussanngortitsisuuvoq. Tamanna qulariniaqinagu, aammattaaq nangaassutiginiaqinagu.

13

ANERSAAP ERNERA–AA!

Pisuutut pinngortippakkit, sooq–una imminut piitsuussutsimut pisippit? Ileqqorissunngortippakkit, sumimmiuna imminut nikanarsartippit? Ilisimassutsip isseranik pissutsimik tunivakkit, sooq–una paasissutissamik allaniit Uangaangitsup saniatigut ujarlerpit? Asanninnerup marraanik ilusilerpakkit, qanoq ilillutit taava allamik sammisaqarsinnaavit? Isiginerit ilinnut saatiguk taamaalillutit ilunni Uanga nassaarisinnaaniassagamma, pissaaneqartoq, nukittooq imminullu napatittoq.

14

INUUP ERNERA–AA!

Tassaavutit Naalagaaffiga, Naalagaaffigalu aserortussaanngilaq, soormiuna aserorneqarnissat ersigaajuk? Tassaavutit Qaamanera, Qaamaneralu qaminneqanngisaannassaaq, soormiuna qaminneqarnissat ersigaajuk? Tassaavutit Tulluusimaarutiga, Tulluusimaarutigalu asinngassanngilaq; tassaavutit Atisara, Atisaralu nungullanngisaannassaaq. Taamaammat Uannut asanninnernut atajuarit, taamaalillutit alutornassutsip naalagaaffiani nassaarisinnaaniassagamma.

15

OQALUNNERUP ERNERA–AA!

Kiinnat Kiinnannut saatiguk, sunalu tamaat Uangaanngitsoq taamaatiguk, tassami Naalagaaffiga piujuarpoq, Pissaaneralu aserunngisaannarpoq. Allamik Uangaanngitsumik ujarleraluaruit, aap, silarsuaq naassaanngitsumik ujarlerfigigaluarukku, ujaasinerit asuliinnassaaq.

16

QAAMANERUP ERNERA–AA!

Suna tamaat Uangaanngitsoq puigoruk Anersaannilu peqataagit. Tassaavoq peqqussutsima isseraneersoq, taamaammat tassunga saagit.

17

INUUP ERNERA–AA!

Uanga naammaginiannga allamillu ikiortissarsiornak. Uangaanngitsumimmi allamik naammattoqanngisaannassaaq.

18

ANERSAAP ERNERA–AA!

Ilinnut Kissaatiginngisannik qinnuiginanga, illit pillutit aalajangersimasagut naammaginiakkit, tassaammammi ilinnut iluaqutaasoq, tamanna naammagigukku.

19

ISIGINNINNERUP QAAMMARISSUP ERNERA–AA!

Ilinni Nammineq Anersaama supuneranik anersaarfigisimavakkit, Uannut pallorfiginnittunngoqqullutit. Sooq–una qimakkimma, allamillu Uangaanngitsumik asanninniarlutit?

20

ANERSAAP ERNERA–AA!

Ilinnit Piumasara annertoqaaq, tamanna puigorneqarsinnaanngilaq. Ilinnut Saammaanera naammangaarpoq, ulinneqarsinnaananilu. Asanninnera ilinni illusimmavilerneqarsimavoq, isertuunneqarsinnaanngilaq. Qaamanera ilinnut saqqumilluarpoq, toqqorneqarsinnaanngilaq.

21

INUUP ERNERA–AA!

Alutornassutsip qaammarissup orpianut paarnat pitsaalluarnerpaat Ilinnut nivinngarsimavakka, soormiuna tunuttutit, pitsaannginnerusumillu imminut naammagisaqartillutit? Taamaammat ilinnut pitsaanerusumut naalagaaffimmut qutsissumut uterit.

22

ANERSAAP ERNERA–AA!

Ileqqorissutut pinngortippakkit, taamaattorli imminut nikanarsarsimavutit. Taamaammat pinngortitaaffinnut imminut qaffartigit.

23

QUTSINNERPAAMIT ERNEQ–AA!

Naassanngitsumut qaaqquakkit taamaattorli suujunnaartussaq ujarpat. Suumuna Kissaatigisatsinnik tunutsikkaatit namminerlu kissaatigisat malitsillugu?

24

INUUP ERNERA–AA!

Killeqarfigisatit akimornagit, piumanaguttaaq ilinnut pisassarinngisaq Guutivit eqqaaniinnerni sikigit, tassaasoq nakuussutsip pissaanerullu Naalagaa.

25

ANERSAAP ERNERA–AA!

Piitsoq anneruniapiluffiginagu, Uangami aqqutaani siulersorpara, ajoqutaassutsillu isigalugu kanngusuutissanngortillutillu naassaanngitsumik.

26

INUUNERUP ERNERA–AA!

Qanoq ilillutit kukkunitit puigorsinnaavigit, allallu kukkussutaat ulapputigalugit. Kinaluunniit taama iliortoq Uannit perloqqusaassaaq.

27

INUUP ERNERA–AA!

Nammineq kukkussuteqartillutit allat kukkussutaat killuutiginagit. Peqqussut tamanna uniussagaluarukku perloqquneqassaatit, tamannalu Uanga uppernarsarpara.

28

ANERSAAP ERNERA–AA!

Manna qulariniaqinagu, kinaluunniit allanit naapertuilluarnermik kissaatigisaqartoq, namminerlu naapertuilluanngitsumik iliortoq, Uannut ilaanngilaq, Ateraluunniit atoraluaruniuk.

29

INUUNERUP ERNERA–AA!

Tarneq kinaluunniit pisuutinniaqinagu imminut pisuussutigitissinnaanngisarnik. Iliuuserinngisatillu eqqartornagit. Tamannaavoq ilinnut peqqussutiga, taamaammat maliguk.

30

INUUP ERNERA–AA!

Kiffara sumiluunniit ilinnit piumasaqassagaluarpat nangartarnagu, kiinaami tassaavoq Uanga kiinara; taamaammat Uanga eqqanniitillutit ittoortuuniarit.

31

INUUNERUP ERNERA–AA!

Ullut tamaasa ilinnut nassuerutigiit, nassuerutigeqquneqannginninni, toqummi kalerreeqqaarani ornikkumaarmatit, taavalu suliarisimasannut nassueqqusaajumaaravit.

32

QUTSINNERPAAMIT ERNEQ–AA!

Toqu nuannaarnerup nalunaajaasuatut ilinnut ilersissimavara. Soormi aliasuppit? Qaamaneq pinngortippara qaamanerata qinngorfiginiassammatit. Soormi-una taassuminnga tunuppit?

33

ANERSAAP ERNERA–AA!

Qaamarngup nalunaarutaanik nuannersunik ilassivagit: nuannaarniarit! Illernassutsip issiavianukaqquvakkit; tassaniittuarit naassaanngitsumut eqqissillutit inuusinnaaniassagavit.

34

ANERSAAP ERNERA–AA!

Illernassutsip anersaavata kattuteqqinnerup nalunaarutaannik nuannersunik pajuppaatit; soormi-una aliasuppit? Pissaanerup anersaavata Siunertamini

nakussatteqqippaatit; soormi-una taassuminnga tunuterpit? Kiinaata qaamanerata siulersorpaatit: qanoq ilillutit tammarsinnaavit?

35

INUUP ERNERA–AA!

Uagutsinnit ungasittuunngikkuvit aliasunnak. Nuannaarnallu Uagutsinnut qanilliartorlutillu uteqqitsinnak.

36

INUUP ERNERA–AA!

Uummativit nuannaarneranik tipaatsugit Uannut naapitsinissamut naleqquttunngorniassagavit Kusanassuseralu tarranitsinniassagakku.

37

INUUP ERNERA–AA!

Atisara kusanartoq ilinnut arsaarutinagu Puilasumalu tupinnartup agguagassiaa annaanagu, naassaanngitsumut qilakkusunngikkuvit.

38

INUUNERUP ERNERA–AA!

Inatsisikka Uannut asannillutit iperarnaveersaakkit, pilerisallu nangartaruk, Naammaginninnera ujarukku.

39

INUUP ERNERA–AA!

Kusanassusera asagukku inatsisikka tusaanngitsuusaarnagit, Piumasaralu anguniarukku Siunnersuutikka puigornagit.

40

INUUP ERNERA–AA!

Silarsuassaarsuup naassaanngitsup isorartussusiagut ingerlanasuaraluaruit, qilaallu isorartussusia tamaat angallavigigaluarukku eqqissivimmik allamik nassaarfissaqanngilatit taamaallat Peqqussutitta naalannerini, Kiinnattalu saavani maniguunnermi.

41

INUUP ERNERA–AA!

Siunertara unnersiutigiuk, Angissutsima eqqumiingaassusii uleerniassagakkit naassaanngissutsillu qaamarnganik qinngorfiginiassagakkit.

42

INUUP ERNERA–AA!

Eqqanniitillutit anneruniajuitsuugit, Saammaallunga pulaarniassagakkit. Siunertama ajugaanissaa siunertaralugu nikuigit, suli Nunamiitillutit ajugaaneq angusinnaaniassagakku.

43

INUUNERUP ERNERA–AA!

Nunanni Oqaatiginnga, Qilanni eqqaamaniassagakkit, taamaalillutik Isikka illillu isitit atoruminarsissammata.

44

ISSIAVISSAARSUUP ERNERA–AA!

Tusarsinnaasutsit tassaavoq Tusarsinnaassusera, tamatuminnga tusaagit, Isigisinnaassutsit tassaavoq Isigisinnaassusera, tamatuminnga isigiit, taamaalillutit tarninni ilorlerpaami Inniminassutsima qutsissusia uppernarsarniassagakku, Uangattaaq, Uanni angusaqarfigisat qutsissoq uppernarsarniassagakku.

45

INUUNERUP ERNERA–AA!

Uanga Aqqutinni Upperisat pillugu toqu ujaruk, Piumasara naammagalugu, Peqqussutigisannut qujamasullutit, taamaalillutit Uanni angissutsip erlinnartitaata tunuani qasuerserniassagavit.

46

INUUP ERNERA–AA!

Isumaliuutiguuk eqqarsaatigeqqissaarlugulu: Piumasaraajuk siniffinni toqunissaq imaluunniit inuunerpit aava pujoralammi kuutsissallugu Uanga Aqqutinni Upperisat pillugu toqutaasutut, taamaalillutillu Peqqussutinnik saqqummiisuullutit aammalu Paradisima qutsinnerpaap qaamarnganik takutitsisuullutit? Eqqortumik isummerit, kiffaq–aa!

47

INUUP ERNERA–AA!

Kusanassusera pillugu! Nutsatit illit aannik qalipannissaat Uannut silaannarsuarmi silarsuarnilu marluusuni qaamanerup pinngortinneranit pingaarneruvoq. Taamaammat tamassuma piviusunngornissaa anguniarniaruk, kiffaq–aa!

48

INUUP ERNERA–AA!

Sunaluunniit nalunaaqquteqartarpoq. Asanninnerup nalunaaqqutaa tassaavoq Inatsisima ataani sapiissuseq Misiliinermalu nalaani naammagittarneq.

49

INUUP ERNERA–AA!

Asannittoq ilumoortoq atugarliornissamut kipisattuuvoq, soorlumi pikitsitsisoq isumakkeerfigitinnissamut ajortuliortorlu naakkigineqarnissamut kipisattuusoq.

50

INUUP ERNERA–AA!

Atugarliornerup Aqqutinni eqqunngikkaluarpatit, qanoq ilillutit Piumasanni naammaginnillutik ingerlasut aqqutaatigoorsinnaagavit? Misilitsinnerit Uannut naapitsinissavit kipisanneratigut atugaqartinngikkaluarpatsit, qanoq ilillutit taava Kusanassutsinnut asanninnerpit qaamarnga anguniarpiuk?

51

INUUP ERNERA–AA!

Ajunaarnera tassaavoq piumaartussamik takunnissinnaanera, qaavatigut innerullunilu akiniaaneruvoq, kisianni ilumigut qaamanerullunilu naakkinninneruvoq. Nukingerlutit orniguk, naassaanngitsutut qaamaninngorniassagavit anersaanngorlutillu toqujuitsuusoq. Tamannaavoq ilinnut Peqqussutiga, malinniaruk taava.

52

INUUP ERNERA–AA!

Siumukarnerup nalerussagaluarpatit, nuannaarutiginagu, nikanarsagaanerullu nallissagaluarpatit, aliasunnak, tamarmimmi nungukkumaarput suujunnaassallutillu.

53

INUUNERUP ERNERA–AA!

Piitsuunerup artorsartissagaluarpatit, aliasunnak, piffissarmi takkuppat pisuussutsip Naalagaata pulaarumaarmatit. Nikanarsagaaneq ersiginagu ataqqinassutsimmi arlaanni ilagilerumaarmatit.

54

INUUNERUP ERNERA–AA!

Uummatit matumunnga Naalagaaffimmut naassaanngitsumut atajuartussamut, matumunngalu inuunermut qangarnisaangaartumut naassaanngitsumullu pilerisuppat, nunarsuaq manna naalagaaffik qarsupittoq qimaguk.

55

INUUNERUP ERNERA–AA!

Nunarsuarmit massuminnga tiguartisimanak innermimmi kuulti misilittarparput, kuultimillu Kiffavut misilittarlugit.

56

INUUP ERNERA–AA!

Kuulti kissaatigaat, taassuminngali kiffaanngitsuunissat Uanga kissaatigaara. Tamatuminnga pigisaqarnikkut pisuujusutut ilinnut naatsorsuupputit Uangali tamatuminnga peqartinnak pisuujunerit ilisaraara. Inuunera pillugu! Tassaavoq Uanga ilisimasara, tassaallunilu illit isumaliorsuusorisat; qanoq ililluni Aqqutiga illit aqqutivit isumaqatigisinnaavaa?

57

INUUP ERNERA–AA!

Pisuujussusera Piitsuutinnut tunniuguk taamaalillutit qilammi alutornassutsinik toqujuitsunik nungujuitsunik, naalannassutsillu piujuartussap erlinnartuinik qalooraasinnaaniassagavit. Inuunerali pillugu! Tarnit pilliutigigukku suli alutornarneruvoq, Isinniittoq isigisinnaagaluaruit.

58

INUUNERUP ERNERA–AA!

Inuunerup naalaffissua tassaavoq Issiavissuara; sunit tamanit minguiaruk, taamaalillunga tassani Najugaqalersinnaaniassagama tassaniittuaannalerniassagamalu.

59

INUUNERUP ERNERA–AA!

Uummatit tassaavoq angerlarsimaffiga, Aqqarnissannut illernartunngortiguk. Anersaat tassaavoq Saqqummernerma najugaa, Takkunnissannut minguiaruk.

60

INUUP ERNERA–AA!

Assat Uanga Sakiannut iliuk taamaalillunga nikuiffiginiassagakkit qaammarillunga alutornangaarlungalu.

61

INUUP ERNERA–AA!

Uanga qilannut qullarit kattuteqqinnerup nuannaarnera anguniassagakku naalannassutsillu piujuartussap ermusaanik viinni erlinnangaartoq imaarniassagakku.

62

INUUP ERNERA–AA!

Ullorpassuit sanioqqutereerpaatsit suli isummatit allanngoqattaartut isummallu imaqanngitsut ulapputigigitit. Qanoq sivisutigisumik nallavinni sininniaravit? Niaqqut sinimmit massiguk seqerngummi qullarluarfini tikereerpaa, immaqa kusanassutsip qaamarnganik qinngorfigiumaarpaatit.

63

INUUP ERNERA–AA!

Qaamarngup Qaqqap illernartup killingiusaanit qinngorfigereerpaatit, qaammarsaanerullu anersaavata uummativit Sinaia anersaarfigereerpaa. Taamaammat, takorluukkat imaqanngitsut saaguanit ilinnut aniguisigit Ungalussamalu silarlianut iserit, inuunermut naassaanngitsumut piukkunnarsiniassagavit Uannillu naapitsinissamut naleqquttuuniassagavit. Tamanna pillugu toqup, qasunerup, ernumanerulluunniit tikissinnaassanngilaatit.

64

INUUP ERNERA–AA!

Naassaanngissusera tassaavoq Pinngortitara, ilinnut pinngortissimavara. Illit naalaffinnut atisanngortiguk. Ataasiussusera tassaavoq Suliara, ilinnut sanaarisimavara, assuminnga atisalerit, taamaalillutit naassaanngitsussamut Suussutsima naassaanngitsup saqqummersitariniassammatit.

65

INUUP ERNERA–AA!

Angissusera tassaavoq ilinnut tunissutiga Akitsisitaassuseralu ilinnut Naakkinninninnut ilisisarnaataavoq. Uannut naleqqulluartoq kialluunniit paasisinnaanngilaa, kikkulluunniillu tamanna pillugu oqaluttuarsinnaanngillat. Ilumummi tamanna Toqqorsivinni toqqortani, Naalagaaffimmalu erlinnartuusiviani paarisimavara Kiffannut Asanninnerma, Innuttannullu Naakkinninnerma ilisarnaataatut.

66

ILA ILLERNARTUP ERSINNGITSULLU ISSERATA QITORNAI!

Uannut asanninnissasinnut akornuserneqarumaarpusi, tarningillu Uannik eqqartuigaangamik eqqissiviilliorumaarput. Ilumummi silaqarsutsip paasisinnaanngilaanga uummatillu inissaqartinnanga.

67

KUSANASSUTSIP ERNER–AA!

Anersaara Iluarinninneralu pillugu! Naakkinninnera Kusanassuseralu pillugit! Sunaluunniit ilinnut nakuussutsip oqaa aqqutigalugu Saqqummersitarisimasara, Pissaanerullu allaataanik allassimasara, paasinnissinnaanerit pisinnaanerillu naapertorlugu pisimavoq, qanorlu Issusera Nipimaluunniit erinaa najoqqutarisimanngilara.

68

INUIT QITORNAI-AA!

Nalunngilisiuk sooq tamassi pujoralammit assigiimmit Pinngortinneritsigit? Tassa kinaluunniit imminut allanit qalliutinniassanngimmat. Sukkulluunniit uummatissigut eqqarsaatigeqqissaartarisiuk qanoq pinngortinneqarsimanersi. Tassami tamassi issutsimik ataatsimik Pinngortissimagassi, pisussaaffigaarsi tarnitut ataatsitut issallusi, isikkat ataatsit atorlugit pisussallusi, qaneq ataaseq atorlugu nerissallusi nunamilu ataatsimi najugaqassallusi, taamaalillusi issutsissi ilorpiaanit, ileqqorissutsisi iliuusisilu aqqutigalugit ataasiussutsip attaveqanngissutsillu isseri ersittunngorsinnaaniassammata. Ilissinnut Siunnersuutiga taamaappoq, qaamanerup katersaavi–aa! Siunnersuut tamanna alapernaarsorsiuk, illernassutsip paarnaa alutornassutsip orpianit tupinnartumit pisoq piniassagassiuk.

69

ILISSI-AA ANERSAAP ERNERI!

Ilissi erlinnartuusivigaassi, tassami ilussinni Paasissaalluanngitsuutima sapangai Ilisimassutsimalu ujarai erlinnartut Ilisimavakka. Kiffamma akornanniittunut takornartanut Innuttannullu guutiitsunut illersorsigit.

70

TAMARMIUSSUTSIMI EQQAANI, IMMINERULLU NAALAGAAFFIANI, NIKORFASIMASUP ERNERA–AA!

Ilisimassavat illernassutsip tipigissusii qulinniit Aalatersimagakkit, Oqaasera ilinnut saqqummersilluinnarsimagakku, illit aqqutigalutit Tukkussusera naammassisimagakku ilinnullu kissaatigisimallugu Uannut kissaatigisimasara. Taamaammat piumassusera naammagiuk Uannullu qujamasuttuugit.

71

INUUP ERNERA–AA!

Ilinnut Saqqummiussimasagut tamaasa qaamanerup pilikkianik anersaappit allattarfianut allakkit. Tamannali sapissagukku uummativit kimia pilikkeriuk. Tamanna pisinnaanngikkukku taava pilikkimik aappillarissumik Aqqutinni siammarneqarsimasumik allagit. Ilumummi qaamanerata naassaanngitsumik piunissaa sumiluunniit Uannut tungusunninnersaavoq.

Persian

1

ILISSI–AA INUIT SILAQASSUTSIMIK PAASISINNAASSUSILLIT TUSAASINNAASUNILLU SIUTEQARTUSI!

Asasamit peqqussut siulleq unaavoq: unnuariannguaraa paasissaalluanngitsutit! Anersaap naatsiivianiittuarit. Illit–aa asanninnerup Saalumuuata oqariartortua! Asanerpaasap Saba-ni taamaallaat oqquiffissarsiorit, illillu Naassaanngitsup Timmiaa Føniks! Unneqqarissutsip qaqqaani taamaallaat mitsimagit. Tassaniipormi inissat, tarnivit suluisigut naalagaaffimmut killeqanngitsumut anguniakkat ujassagaluarukku.

2

ANERSAAP ERNERA–AA!

Timmissap ulluni ujartarpaa: unnuariannguullu ruusap kusunassusia ujartarpaa; kisiannili timmissat tassaasut inuit uummataat pujoralak nungujasoq naammagalugu, ullortik naassanngitsoq qimallugu ungasissumut ingerlasimapput, isitillu soqutigisaqanngissutsip maralluanut saatissimallugit, qanissutsip illernartup kusanassusianik piiaaffigineqarsimallutik. Ila! Tupinnaqaaq alianarlunilu; tiitorfiup imaatut atsigisoq piinnarlugu Qutsinnerpaap imaanit maligaasartunit tunussimapput killingiusaamillu qaammarinnersaasumit ungasittuarsimallutik.

3

IKINNGUT–AA!

Uummativit naatsiiviani asanninnerup ruusaa kisiat naatiguk, tunniusimanerup kipisannerullu unnuariaa sapanginnagu. Naapertuilluartumik ikinnguteqarneq pingaartuutiguk, guutiitsumillu peqateqanngisaannarit.

4

NAAPERTUILLUARNERUP ERNERA–AA!

Asannitttoq sumut allamut asasami nunaanngitsumut ingerlasinnaava? Ujarlertorlu kina eqqissinermik nassaassava uummammi kipisaffia ungasikkuniuk? Ilumoorluni asannittumut kattuteqqinneq tassaavoq inuuneq, avissaarsimanerlu tassaalluni toqu. Sakiaa naammagittarneqanngilaq, uummataalu eqqissiveqanngitsuulluni. Inuunerpassuit soraarutigissavai asasami najugaanut nukingerniarluni.

5

PUJORALAAP ERNERA–AA!

Ilumut oqarfigaakkit: inunnut tamanit eqiattarnersaasoq tassaavoq iluaqutaanngitsumik akerliuniartoq, tulliminiillu qalliuniartuunermik anguniagaqartoq. Oqarit, qatanngutit–aa! Ileqqorissutsit, oqaasiunngitsut pinnersaatiginiarsigit.

6

NUNAP ERNERA–AA!

Qulariniaqinagu uummat sinngaginninnermik qanorluunnit mikitigisumik pilik, naalagaaffiga naassanngitsoq angunngisaannassammagu, illernassutsilluunniit tikki tipigissut Minguissutsima Naalagaaffianit aallaaveqartut najuutissanngimmagit.

7

ASANNINNERUP ERNERA–AA!

Qutsissunit qaammarissunit qulinniittunit, asanninerullu orpianit qilammiusumit alloriarnermik ataatsimik ungasitsigaatit. Ataatsimik alloriarit, tullianillu naalagaaffimmut toqusussaanngitsumut qullarit naassaanngitsullu tupianut iserlutit. Taamaammat naalannassutsip allaataanit saqqummiunneqarsimasut tusarnaakkit.

8

NAALANNASSUTSIP ERNERA–AA!

Illernassutsip aqqutaani aalassarissuugit kattuteqqinnerullu qilaanut Uanga ilagalunga iserit. Uummatit anersaap akisunneranik saliguk Qutsinnerpaallu paarlianut tuaviorit.

9

TARRAQ QARSUPITTOQ–AA!

Qularnerup atsinnerusortai ungavartikkit, qularunnaarnerullu qutsissuinut ataqqinangaartunut qullarlutit. Ilumuussutsip isaa ammaruk, taamaalillutit Kusanassuseq ulissimanngitsoq takusinnaaniassagakku torlulalutillu: Naalagaq illernarsili, pinngortsitsisunit tamanit akimanersaasoq!

10

PIUMATUSSUTSIP ERNERA–AA!

Manna tusarnaaruk: isip toqusussaasup kusanassuseq naassaanngitsoq ilisarinngilluinnassavaa, uummatillu uumassuseqanngitsup naasoq toquliornikoq kisiat nuannaarutigissavaa. Naleqataasummi naleqanni ujartarpaa, nalinilu ilagerusunnerusarlugit.

11

PUJORALAAP ERNERA–AA!

Isitit tappingersikkit, Kusanassuera takusinnaaniassagakku; siutitit matukkit, Nipimma erinaa tusarnersoq tusaasinnaaniassagakku, ilisimassutsimit imaajarit, Ilisimasannik ilisimasaqalerniassagavit, pisuujussutsinniillu ilinnut saligit, Pisuujussutsima naassaanngitsup imaanik pissaqartuarniassagavit. Isitit tappingersikkit, imaappoq, sunut tamanut Kusanassusera kisiat pinnagu; Siutitit matukkit sunut tamanut Oqaatsinnuunngitsoq; ilikkakkanit tamanit imaajarit Uannut paasisimasatit kisiisa pinnagit; taamaalillutit isigisinnaassutsimik erseqqissumik, uummammillu minguitsumik, siummillu naalaarluartumik Illernassutsima paarlianut isersinnaaniassagavit.

12

MARLUNNIK ISIGISINNAASSUSILIK–AA!

Isip illua matujuk, aappalu ammarlugu.Nunarsuarmut imaanullu tamanut aappaa matujuk, aappaalu Asasap kusanassusianut minguitsumut ammaruk.

13

ILA QITORNAKKA!

Annilaangatigaara Ilissi, qilaap timmiaata erinaanik arsaartissimallusi, annaasaqarnerup tarraannut appariartoqqissasusi, ruusallu kusanassusia qiviarsimanaguluunniit, imermut marrarmullu uteqqissasusi.

14

IKINNGUTIT–AA!

Kusanassuseq naassaanngitsoq, kusanassutsimik toqusussamik taarserlugu qimannagu, asanninnersilu pujoralaap nunaanut nungujasumut massumunnga saatseqinagu.

15

ANERSAAP ERNERA–AA!

Piffissaq takkukkumaarpoq illernassutsip unnuariaata paasissaalluanngitsut ilorliusut nalunaarutigineqarnerisa saqqummerunnaassammagit, Ilissilu tamassi erinnamik qilammiorpaluttumik qutsissullu nipaanik piiaaffigineqarumaarpusi.

16

SOQUTIGISAQANNGISSUTSIP ISSERA–AA!

Oqarpassuit paasissaalluanngitsut oqaatsimi ataatsimi oqalupput, paasissaalluanngitsullu toqqortat amerlaqisut erinnami ataatsimi uleerneqarsimapput; taamaattorli siummik tusarnaartoqanngilaq, uummammillu paasinnittoqarani.

17

ILA PEQATIT!

Isaaffiit Sumiiffeqanngitsumukartut ammapput, asasallu inaa asannittup aavanik pinnersarneqarsimavoq; taamaattorli tamarmik, ikitsunnguit kisimik pinnatik, illoqarfimmik matuminnga qilammiorpaluttumik piiaaffigineqarsimapput, taakkulu ikitsunnguit akornini suli ikinnerusut minguitsumik uummatillit illernatumillu anersaallit nassaarineqarsimapput.

18

ILA PARADISIMI QUTSINNERPAAMI INNUTTAASUSI!

Qularnaassutsip qitornaannut nalunaarutigisiuk, illernassutsit naalagaaffiisa iluanni, paradisip qilammiorpaluttup eqqaani, naatsiivik nutaaq saqqummersimammat, tamannalu kaajallallugu naalagaaffiup qutsissup innuttai paradisillu akitsisitaasup innuttai toqujuitsut kaavimmata. Taamaammat ilungersoritsi, inissisimaffik tamanna angusinnaaqqullugu asanninnerullu paasissaalluanngitsortai upernaap naasuiniittut uleerniassagassigit, paarnanillu naassaanngitsunik ilisimassutsip guuterpaluttup tammarmiulluinnassusiata isertugaa ilinniarfiginiassagassiuk. Taqqamunga isertut taqqamaniiginnartullu isaat tuppallersagaassapput!

19

IKINNGUTIKKA–AA!

Puiorpisiuk ullaaq ilumoortoq qaammarissorlu, avatangiisinik illernartuni pilluaqqusaasunilu, inuunerup orpiata paradisimi qaammarinnersaasumi naasussanngorlugu ikkussukkami, taassumap alanngorsimanerani Eqqanni katersuussimagassi? Ataqqinningaarlusi tusarnaarpusi, oqaatsit uku illernarnersaasut pingasut Uanga Oqaatigigakkit: Ikinngutit–aa! Piumasarsi Uanga piumasannit salliutinnasiuk, ilissinnut Kissaatiginngisara kissaatiginngisaannarsiuk, Uangalu qanilliartornasinga uumassuseqanngitsunik uummateqarlusi, nunap piinnaanut kissaatinik pilerissutinillu aattorneqarnikunik. Tarnisi illernartuutissinnaagaluarussigit, maannakkorpiaq sumiissuseq taanna avatangiitsillu taakku eqqaassagaluarpasi, Oqaatsimalu ilumuussusaa tamassinnut ersarississagaluarpoq.

Titarnerit illernarnerpaat arfineq pingajuanni, Paradisip allaffiata tallimaanni, Oqarpoq:

20

ILISSI–AA SOQUTIGISAQANNGISSUTSIP NALLAVIANI TOQUNGASUTUT ISSIASUSI!

Piffissat annertuut qaangiutereerput inuunersilu erlinnartoq naalerpoq, taamaattorli ilissinnit minguissutsip supuninnguanilluunniit Illernassusitta isaaffianut annguttoqarsimanngilaq.

Naak qularnerup imaanut kivisimagaluarlusi, siggussinnit Guutimut ilumoortumik uppernersi nassuerutigaarsi. Maajugisara asasimavarsi, akeraralu ikinngutigilersimavarsi. Taamaattorli Nunanni pisuppusi imminut angisuutillusi, imminullu naammagilluarlusi, massa Nunama ajornartorsiutigigaasi, taassumallu iluaniittup suulluunniit ningorteraasi. Isisitoq ammarsinnaagaluarussigit, ilumut nuannaarnermit tamatuminnga aliasunnerit kisitassaanngitsut piumanerussagaluarpasi, toqulu inuunermit tamatuminnga iluarnerusutut isigilissagaluarparsi.

21

PUJORALAAP ILUSIA AALASOQ–AA!

Ilinnik peqateqarnissaq kissaatigaara, illilli Uanga tatigerusunngilarma. Pikitsitsinerpit panaata neriunnerpit orpia uppitissimavaa. Sukkulluunniit ilinnut qanittuujuarpunga, illilli Uannit ungasittuarputit. Alutornassuseq piujuartussaq ilinnut toqqarsimavara, taamaattorli kanngusunneq killeqanngitsoq ilinnut toqqarpat. Suli piffissaqartillugu uterit, periarfissallu sapanginnagu.

22

PILERISSUTSIP ERNERA–AA!

Ilisimatuup ilisimasullu ukiorpassuit Illernarnerpaap qanillinissaa anguniarsimavaat sapersimalluguli: inuunertik taassuminnga ujaasillutik atorsimavaat, taamaattorli Kiinaata kusanassusia takunagu. Illit ilungersuanimininnguarluunniit atornagu anguniakkat angusimavat, ujarlernallu ujakkat nassaarisimallugu. Taamaattorli imminiussutsip saaguanik poorneqarsimaruttoravit isivilluunniit Asasap kusanassusia takunngilaa, assavilluunniimmi Atisaata kilua attorsimanngilaa. Ilissi iseqartusi, isigigitsi tupigusullusilu.

23

ASANNINNERUP ILLOQARFIANI NAJUGAQARTUT–AA!

Anoraasuanerit toqunartut naassaanngitsup naneruutaa ungusimavaat. Inuusuttullu qilammiorpaluttup kusanassusia pujoralaap taarneranik ulinneqarsimavoq. Asanninnerullu naalagaasa siulersuisuat naqisimanninnerup innuttaanik iluaatsuliorfigineqarpoq, illernassutsillu timmiaa uppissuit kukiinik tigusarineqarsimalluni nalavoq. Alutornassutsip ineqarfiani najugallit katersaarsuillu qilammiorpaluttut qiapput nimaarlutillu, ilissi ilaginnaanerup naalagaaffiani ilorrisimaarnissinni, ikinngutillu ilumoortut akornanniittutut naatsorsuunnissinni. Isumarisorisasi piviusuunngeruttoramik!

24

ILISSI–AA ISUMAATSUT, ILISIMASSUSEQARTUTUT TUSAAMASAASUSI!

Sooq–una savanik paarsisut atisaat atorpisigit, uffa ilussinni amarunngorsimallusi, Katersaajutinnullu pilerissutsimik ulikkaaqqallusi? Ullorissatut suli qaanngitsumi nuisutut ippusi, naak qaammarillunilu erseqqissutut isikkoqarpasikkaluarluni, Illoqarfiutinnit aserorterinerup aqqusinnersimaneranut tammartitsillutik siunnersuisutut.

25

ILISSI-AA NAAPERTUILLUARTUTUT PISSUSILLIT, ILUSSIGULLI PEQQUSERLUTTUUSUSI!

Imertut qaallorissutut sungarnitsutulli ippusi, qaamigut qillarilluinnarsorinartut, Ooqattaarisumilli Guutimit pisumit misilinneqaruni kuserninnguarluunniit akuerineqanngitsoq. Aap, seqernup qinngorneri assigiimmik pujoralammut tarrarsuummullu tuttarput, kisiannili tarranitsinneqaraangamik akisunneri assigiinngitsuupput, soorlumi ulloriaq nunarsuarmit taamaattoq; aap, assigiinngissutaat annertoorujussuuvoq!

26

OQAATSINI IKINNGUTIGA–AA!

Isumaliutigilluartsiaruk. Sukkulluunniit tusarsimaviuk, ikinngut akerarlu uummammi ataatsimi atasinnaasut? Taamaammat takornartaq anisinniaruk Ikinngut angerlarsimaffimminut Isersinnaaniassammat.

27

PUJORALAAP ERNERA–AA!

Sunaluunniit qilammiittoq nunamiittorlu ilinnut peqqusimavara inuup uummataa kisiat pinnagu, taannami Kusanassutsinnut Alutornangaassutsinnullu inissanngortissimavara; taamaattorli Angerlarsimaffiga Inisimavigalu allamut Uannuunngitsumut tunniussimavat, sukkulluunniillu Illernassutsima saqqummiisua Angerlarsimaffini ujaraluaramiuk takornartaq tassani siumortarsimavaa, angerlarsimaffeqaranilu nukingerluni Asasap qimarnguianut utertarsimavoq. Taamaattorli isertugaatit toqqorsimavara kanngusunnissallu kissaatigisimanagu.

28

PIUMATUSSUTSIP ISSERA–AA!

Ullaakkut qaalernerpassuit qassiit Sumiiffeqanngitsup naalagaaffiannit angerlarsimaffinnukartarsimavunga ilorrisimaarnerullu nallaviani allamik Uangaanngitsumik sammisaqartutit siumortarsimallutit. Taavalu anersaap qaammaallanneratut alutornassutsit naalagaaffiannut qilammiorpaluttunut utersimallunga, Qimarngusimaffinnilu illernassutsip katersaavisa qulaaniittuni tamanna nalunaarutigisimanagu.

29

TUKKUSSUTSIP ERNERA–AA!

Soqanngissutsip suunngissusianit, Naalakkiinerma marraanik ersitsunngortissimavakkit, perorsarneqarnissallu siunertaralugu atomi sunaluunniit piusoq, pinngortinneqarsimasullu issera sunaluunniit maligassanngortissimavara. Taamalu, anaanavit iluanit anillanngikkallaravit ilinnut tunniussimavakka puilasut marluk qaallorissumik immuttallit, isit ilinnut piggassisussat uummatillu ilinnut asannittussat. Asanninnikkut, Naakkinnissutsima alanngorsimanerani, ineriartortissimavakkit paarisimallutillu Naakkinninnerma Isumassuinermalu isseranik. Tamakkulu tamaasa pillugit Siunertarisimavara Naalagaaffimmi naassaanngitsup ilinnit anguneqarnissaa Tunissutimalu ersinngitsut ilinnut tulluuttuuniassammata. Taamaattorli soqutiginngisaqartuaannarsimavutit, inerilluarsimaleravillu Tunniussakka tamaasa nikagisimavatit isummallu iluaqutanngitsut sammisimallugit, soqutigisaqanngittuaannalernernik kinguneqartitsisumik, Ikinngutillu isaariai tunullugit Akeqqama qarmaasa tunuanniiginnalerlutit.

30

NUNARSUUP INUSSIAATAA–AA!

Ullaakkut qaalernerit qassiit Paarsinimma asannittup anoraasuanerisa qulangersimavaatsit soqutigisaqanngissutsillu nallaviani itisuumik sinittutit siumorsimallutit. Taammaannerillu qissatigalugu aallaavimminut utersimalluni.

31

NUNAP ERNERA–AA!

Kissaatigigumma allamik Uangaanngitsumik ujarlernak, Kusanassuseralu isigerusukkukku isitit nunamut imarisaanullu tamanut ammatinnagit; Piumasarami allallu Uangaanngitsup piumasaa, soorlu innertut imertullu, uummammi ataatsikkut inooqatigiissinnaanngillat.

32

TAKORNARTAQ IKIORNEQARSIMASUTIT–AA!

Uummappit naneruutaa Pissaanerma assaanit ikinneqarsimavoq: Imminiussutsip pileritsannerullu anoraanik akiuuttunik qaminnagu. Naalliunnerpit tamarmik Nakorsaataat tassaavoq Uannik eqqaamanninneq, tamanna puigornagu. Asanninnera erlinnartuutigileruk, sernissorullu soorluli tassaasoq nammineq isigisinnaassutsit inuunerillu.

33

QATANNGUTIGA–AA!

Oqaatsit ilunngunartut Qaninnit tungusunnitsumeersut tusarnaakkit, minguissutsillu kuua isertugaqarpaluttoq Qarlunneersoq imerfiguuk. Ilisimassutsimalu Guuterpaluttup naatsiiassai uummappit issortaanut minguitsumut ikkussukkit ilisimassutsillu ernganik imerterlugit, Ilisimanninnerma Paasinninnermalu naasui uummativit illoqarfiani illernartumi naaniassammata, nutaajullutik qorsooqqillutillu.

34

PARADISIMA INNUTAI–AA!

Paradisima illernartup naatsiiviani asanninnissi ikinngutinnernissilu orpia nutaaq asanninnerup assai atorlugit ikkussimavara, Naakkinninnermalu isumassuinerata ajunngitsup sialuinik imertersimallugit maannakkullu inerititaqarfissaa nalliummat, sernissornissaa anguniaruk piumatussutsip pilerisupilunnerullu ikumaneranik nungutinneqaqqunagu.

35

IKINNGUTIKKA–AA!

Kukkusup qullia qamissiuk uummatissinnilu siunnersortinnerup guuterpaluttup naneruaa naassaanngitsoq ikillugu. Ungasinngitsukkummi inuiassuit misiliisuisa, Qinnuiusup qanittuani illernartumi, allamik akuerisaqassanngillat taamaallaat ileqqorissutsinik minguilluinnartunik, iliuutsinillu illernartunik isornaateqanngitsunik.

36

PUJORALAAP ERNERA–AA!

Ilisimassutsimik piginnittut tassaapput tusarnaarteqaratik oqalunngitsut, soorlu imertartortoq imerfimminik nittaassinngitsoq ujaasisumik nassaartinnani, asannittorlu uummammi ilorpiaanit tipaatsungaalerneq ajortoq asasami kusanassusianik takunnitsinnani. Taamaammat ilisimassutsip paasinnissimassutsillu naatsiiassai uummatip issortaani minguitsumi ikkussukkit toqqorsimatillugillu, ilisimassutsip guuterpaluttup naasui uummammit naalernissaata tungaannut, marullummit marrarminngaanniiunngitsumillu.

Allassimaffiup titarnerani siullermi atatinneqarlunilu allassimavoq, Guutillu illernartoqarfiata qimarnguffiani toqqorsimavoq:

37

KIFFARA–AA!

Naalagaaffik naassaanngitsoq nungujasoq piinnarlugu soraarunnagu, pissaanerlu qilammiorpaluttoq nunamiussutsimut pilerisunneq pillugu taamaatinnagu. Manna tassaavoq inuunerup naassaanngitsup kuussua, naakkinnittup allaataata puilaffianit qorlorsimasoq; tamassuminnga imertunut ajunngitsuuvoq!

38

ANERSAAP ERNERA–AA!

Inigisat ungaluugalik aserorlugu qartoraruk, asanninnerullu timmiaatut Føniks-itut, illernassutsip qilassuanut aarsaarit. Ilinnut soraarutigiit, naakkinnissutsillu anersaavanik ulikkaarlutit, inniminassutsip qilammiorpaluttup naalagaaffianiittuarit.

39

PUJORALAMMIT KINGUAAJUSOQ–AA!

Ullumi nalaatsortumi ilorrisimaarneq nalerisimaarutiginagu, ilinnullu qasuersimaarneq naassaanngitsoq pinngitsoortinnagu. Qiimasunnerullu naatsiivia naassanngitsoq nunarsuup toqusussap pujoralaannut taarsiunnagu. Illit paarnaarussivinniit narsanut qaammarissunut pikaniittunut qullarit, inigisarniillu ungaluugalimmit toqujasumit Sumiiffeqanngitsup paradisianut aarsaarlutit ingerlagit.

40

KIFFARA–AA!

Nunarsuup massuma qilersuinerinit ilinnut aniguisigit tarnerillu imminiussutsip paarnaarussivianit avissaartiguk. Periarfissat maanna tigujuk, ilinnummi takkuteqqikkunnanngimmat.

41

KIFFAMA ARNAP ERNERA–AA!

Naalagaaffimmik toqujuitsumik qimerluuisinnaagaluaruit, nunamit matuminnga qarsupittumit qimatsinissat ujassagaluarpat. Aappaanilli ilinnit toqquussineq, aappaanillu saqqummiussineq tassaavoq paasissaalluanngitsoq taamaallaat minguitsunik uummatillit kisimik paasisinnaasaat.

42

KIFFARA–AA!

Uummatit qinngarsuinermiit saliguk, sinnganermiillu kiffaanngitsulluinnarlutit, illernassutsip guuterpaluttup najugaanut iserit.

43

IKINNGUTIKKA–AA!

Aqqutit atuarsigit Ikinngutip iluarinninneratigoortut, ilisimasiullu Taassumap iluarinninnera Pinngortitaasa iluarinninneraniimmat. Tamanna ima isumaqarpoq: Kinaluunniit ikinngummi najugaanut isissanngilaq ikinngummi iluarinninnera peqqaarnagu, erlinnartuutaaluunniit attussanngilai, piumasanilu ikinngummi piumasaanit pitsaanerutissanngilaa, sukkulluunniillu nuimaneruniarfigissanngilaa. Tamanna eqqarsaatigeqqissaarsiuk, ilissi paasisimasaqassutsumik piginnittusi!

44

ISSIAVISSAARSUAMMA INGIAQATAI–AA!

Ajortumik tusaanak, ajortumik isiginak, ilinnut nikanarsarnak, nimaarlutillu qianak. Ajortumik oqalunnak, ilinnut taamatut oqaluffigitinneq tusaannginniassagakku, allat kukkussutaat ingasaannagit, illit nammineq kukkussutitit annertuutut isiginarsiinnginniassammata; allallu nikanarsagaanissaa kissaatiginagu, nammineq nikanarsagaanerit ersersinneqassanngimmat. Taamaammat inuunerpit ullui tassuuguinnartut qarsupittumit minnerusut ingerlatikkit, silaqassutit simerneqartinnagu, uummatit mingoqartinnagu, eqqarsaatitit ipiitsuutillugit suussutsillu illernartuutillugu, taamaalillutit kiffaanngitsuullutit nalerisimaarlutillu iluseq manna nunamiorpaluttoq qimanniassagakku paradisimullu paasissaalluanngitsumut aallarniassagavit qaqugumulluunniillu naalagaaffimmi naassaanngitsumiittuarniassagavit.

45

ILA! ILA! NUNAMUT PIUMATUSSUTSIP QINNUVIGINNITTUI!

Soorluli innaallannerup sukkassusiatut sukkatigalusi Asasaq saneqqussimavarsi uummatisilu isumapalaanut perloqqunartunut sangutissimallusigit. Takorluukkasilu piunngitsut pallorfigaasi eqqortuusutullu taagorlugit. Isisi kapinartulimmut saatippasi, naasumillu taagorlugu. Anersaarneq minguitsoq ataaserluunniit anersaarsimanngilarsi, sunnertinnissamit avinngarusimatinnerup anorsaarnera uummatissi narsartaannit ingerlatinneqarsimanngilaq. Asasap asannilluni siunnersuuttai anorinut igeriussimavasi, uummatissilu allattarfianit nungusavissorsimallusigit, soorlumi narsaatip nersutaasut ingerlaarpusi suussusersilu piumatussutsip illigussuseqarnerullu mangiarfianiisillugu.

46

AQQUSINERMI QATANNGUTIKKA–AA!

Sooq–una Asasaq eqqartunngitsoorpisiuk, Qanissusianiillu ungasittuarsimallusi? Kusanassutsip issera illup asseqanngitsup iluaniippoq, naalannassutsip issiavissaarsuani napparneqarsimalluni, ilissi assortuunnernik iluaqutaanngitsunik sulissuteqarnissinni. Illernassutsip tikki tungusunnitsut anersaartorput, tukkussutsillu anorsaarnera qulangiutereersimavoq, taamaattorli tamassi naalliunnartumik anniaateqarpusi tamassuminngalu arsaagaasimallusi. Ilissinnut ajoraluartumik, aammalu aqqutissinnut tumissinnullu atuaallutik malinnittunut!

47

PIUMATUSSUTSIP QITORNAI-AA!

Nersoqqutussutsip qaatiguua igissiuk anneruniarnerullu atisaanit kiffaanngitsunngorsaritsi.

Titarnerit illernarnerpaat pingajuanni, takuneqarsimanngitsup allaataanit allattarfimmi aligortut aappalutsigisumi allanneqarsimavoq atatinneqarsimallunilu, manna saqqumersinneqarsimavoq:

48

ILA QATANNGUTIKKA!

Immissinnut qajassuuteqatigiigitsi, asanninnersilu naleqqutinngitsunut saassimatinnasiuk. Pingaartorsuunissinni tulluusimaarnasi, nikanarsagaanerlu pillugu kanngusunnasi. Kusanassusera pillugu! Suut tamaasa pujoralammit Pinngortippakka, pujorlammullu Uterteqqikkumaarpakka.

49

PUJORALAAP QITORNAI-AA!

Pisuut unnuap qeqqani piitsup nimaarnerinik oqaluttuutikkit, soqutigisaqanngissutsip aserorterinerup aqqutaanut saateqinammagit, Pisuujussutsillu Orpianik arsaarlugit. Tunisineq tukkussuserlu tassaapput Piginnaassutsima ilaat; Ileqqorissutsinnik pinnersartoq iluanaartuuvoq.

50

PIUMATUSSUTSIMIK KIMEQARTUTIT!

Pilerissuseq sunaluunniit qimaguk, naammaginninnerlu ujaruk; pilerisuttormi ujariatsiuarsimavoq, naammaginnittorlu asaneqartuarsimavoq nersorneqartuarsimallunilu.

51

KIFFAMMA ARNAP ERNERA–AA!

Piitsuunerup nalaani isumakulunnak pisuujunerullu nalaani ernumagisaqanngitsuunak, piitsuunermi pisuujussutsimik malinneqartarmat, pisuujussutsillu piitsuunermik malinneqartarlutik. Taamaattorli sunit tamanit Guutiunngitsumik piitsuuneq tassaavoq tunissut tupinnartoq, tamassuma nalinga nikaginagu, naggataatigummi Guutimik pisuunngortissavaatit, taamatullu oqaaserisap matuma isumaa paasilerumaarpat, “Ilumut tassaavusi piitsut”, oqaatsillu illernartut ukuusut, “Guuti tassaavoq sunik tamanik piginnittoq” asannittup uummataata killingiusaani, ullaatulli ilumoortutut, alutornartumik qaammarillutik nuilerumaarput, pisuujussutsillu issiavissaarsuani isumannanngitsumiittuaannassallutik.

52

ILAGINNAANERUP PIUMASUTUSSUTSILLU QITORNAI–AA!

Akeqqama Uanga angerlarsimaffinnut isernissaa akuerisimavarsi Ikinngutigalu ilaginnarsimallugu, allamummi Uangaanngitsumut uummatissinni asanninneq pingaartuutissimavarsi. Ikinngutip oqaasii tusarnaarsigit Paradisianullu saagitsi. Ikinngutimmi nunamiorpaluttut, imminuinnaq ajunngitsussamik ujarlertut, asaqatigiittutut ipput, tamatumalli akerlianik Ikinngutip ilumoortup asasimavaasi asallusilu ilissi kisissi pillusi; ilumummi, siunnersorniarlusi naalliunnerit kisitassaanngitsut Aqqutigisimavai. Ikinngummut taamaattumut unneqqaserluttuunasi, naamik tuaviorlusi Taanna ornissiuk. Eqqortup unneqqarissutsillu ulluata ulloriaa aqqit tamarmik Naalagaata allaataata killingiusaanit nuisimasoq taamaappoq. Siutisi ammarniarsigit Guutip, ulorianartumi Ikiortaasup, Imminut napatittup, oqaasianut tusarnaarniassagassi.

53

ILISSI–AA NUNAP PIINIK PISUUSSUTSINIK TULLUUSIMAARAJUTTUSI!

Ilumut paasisiuk pisuujussuseq tassaasoq, ujarlersup taassumallu kipisaffiata, asannittup asaneqartullu akornanni akornutaasoq annertooq. Pisuujusut, ikittunnguit kisimik pinnatik, sukkulluunniit Qanissusiata silarlianut anngutissanngillat, naammaginninnerulluunniit imminullu tunniusimanerup illoqarfianut isissanngillat. Taamaammat kimulluunniit ajunngitsuuvoq, naak pisuujugaluarluni, pisuujussutsiminik naalagaaffimmut naassaanngitsumut avissaartitaasimanngikkaanni, taakkulu pissutigalugit Naalagaaffimmit suujunnaartussaanngitsumit arsaarneqarsimanngikkaanni. Aqqinit Sunit tamanit Anginersaasoq pillugu! Inuup taamatut pisuujutigisup akisunnerata qilaap innuttai qinngorfigissavai, soorluli seqerngup qaamanerminik nunap innuttai qinngorfigigai!

54

ILISSI–AA NUNAMI PISUUJUSUSI!

Piitsut akornassinniittut tassaapput Uanga paareqqusakka; Paareqqusakka taava sernissorniarsigit namminerlu ilorrisimaarnissaq kisiat pileritsaassimaarutigiinnaqinasiuk.

55

PILERITSANNERUP ERNERA–AA!

Pisuujussutsip mingutsitaaneranik imminut saligit eqqissisimalluinnarlutillu piitsuunerup naalagaaffiata tungaanut ingerlagit, sunnertianani avinngarusimatinnerup puilasuanit inuunerup naassaanngitsup viinnianik imerniassagavit.

56

ERNERA–AA!

Guutiitsumik peqateqarnerup aliasunneq annertusiartortittarpaa, naapertuilluartumilli ikinnguteqarnerup uummammiittoq manngertorneq salittarpaa. Guutimik peqateqarnissamik ujarlersoq, Asasaasa ataqatigiinnerannukarniarli, Guutillu oqaasianut tusarnaarnissaminut kissaateqartoq, Toqqagaasa oqaasiinut tusarnaarniarli.

57

PUJORALAAP ERNERA–AA!

Mianersoritsi! Guutiitsoq pisoqatiginasiuk taamaattorlu ikinngutiginiarnasiuk ataqatigiinnerup taamaattup uummatip akisunnera innertut ajungaartutut ilersittarpaa.

58

KIFFANNIK ARNAMIK ERNIUSOQ–AA!

Anersaap Illernartup naakkinninnera ujassagaluarukku, naapertuilluartumik peqateqartuugit, taannami inuunerup naassaanngitsup ermusaanik Imertartortup assaanik imersimammat aammalu, ullaaq ilumoortoq assigalugu, inuunermik tunisisuummat toqungasullu uummataannik qaammarsaasuulluni.

59

ILISSI ISUMAATSUT–AA!

Isumaqarniaqinasi uummatit isertugaat toqqortaasut, naamik, qulariniaqinasiuk naqinnernik erseqqissunik qiperoreqarsimammata ammasumillu saqqumimmata Najuisumi illernartumi.

60

IKINNGUTIT–AA!

Ilumut Oqarpunga; sunaluunniit uummatissi iluani toqqorsimagaluarussiuk Uatsinnut ammasuuvoq ullortullu saqqumitigaluni; kisiannili isertortinneqarnerat Saammaassinitsinnit Tukkussutsitsinnillu pipput; ilissinnut iluanaarutaasussatut pinnatik.

61

INUUP ERNERA–AA!

Saammaannerma imaanit naqqitsumit isugutap kusernera nunarsuup inuinut tunniussimavara, taamaattorli tassunga saassimasunik nassaarnanga, pissutigalugu tamarmik ataasiussutsip viinnia qilammiorpaluttoq tunussimammassuk, minguillu kinnganikuinut aasimasumut saassimallutik, inuunerullu tiitorfia naammagalugu, kusanassutsip naassaanngitsup ermusaa toqqorsimavaat. Nalerisimaarutigisaa kanngunaannarpoq.

62

PUJORALAAP ERNERA–AA!

Isitit Asasap toqujuitsup viinniutaanit nalissaqanngitsumit alartinnagit, kinnganikumullu aasimallunilu toqujasumut isitit ammarteqinagit. Imertartortup guuterpaluttup assaanik inuunerup toqujuitsup ermusaa tigujuk, ilisimassuseq sunaluunniit ilinnut pigineqalersinnaassammat, nipimut tupinnartumut, naalagaaffimmit ersinngitsumit qaaqqusisumit tusarnaarniassagavit: Nipituumik kappialagitsi, ilissi atsissumik siunertaqartusi! Sooruna viinninnit illernartumit toqujuitsumillu tunuppisi imeq qarsupittoq pissutigalugu?

63

ILISSI–AA NUNARSUUP INNUTTAI!

Qularutiginiaqinasiuk ajunaarnerup siumut ilisimareerneq nalunartup malikkaasi akiniaanerullu ilungersunartup nallilermasi. Isumaqarnasi iliuuserisimasasi Isinnit piiarneqarsimasut. Kusanassusera pillugu! Suliasi tamaasa Allaatima naqinnernik ammasunik kigartorsimavai allattarfinni krysolitsiusuni.

64

ILISSI-AA NUNARSUUP NAQISIMANNITTUI!

Assasi naalliutsitsinermit peersigit, Uannummi Neriorsorsimavunga inuup kialuunniit naapertuilluanngitsuliorneri isumakkeerfiginiarnagit. Tamanna tassaavoq Angerusera, allanngortinneqarsinnaanngitsumik allassimaffimmi atajuartussami inassutigisimasara, Naalannassutsimalu naqitsisaanik naqissusersimasara.

65

PIKITSITSISUT–AA!

Qajassuussinerma qunusuitsunngortissimavaasi, Naammagittarnermalu eqiattartunngortissimavaasi imatut ilersimallusi allaat piumatussutsip qimuttarissua aqqutinut ulorianartunut aserorterinermut ingerlatitsisunut saqitissimallusiuk. Isumaqarpisi Misissuaatsusimasunga, imaluunniit Piareersarsimanngitsunga?

66

NUNASIARTORTUSIA–AA!

Oqaq Uannik eqqartuisussatut aalajangersimavara, mamarliinermik mingutsernagu. Imminiussutsip innerata artorsartippatit, nammineq kukkussutitit eqqaamakkit Pinngortitammalu kukkussutaat pinnagit, kinaagaluartulluunniimmi namminiussutsi allat kinaassusaannik nalunnginneruaa.

67

ISUMAANNAAP QITORNAI–AA!

Ilumut paasisiuk illernassutsip naassaanngitsup qulaatigut ullaanngulernerup qaammalernera ilutigalugu, isertukkat suliallu ajungaartut unnuap taarnerani iliuuserineqarsimasut nunarsuup inuisa saavinut uleerneqarlutillu ammasumik sassaanneqarumaarmata.

68

NAASUPILUIT–AA PUJORALAMMIT PUTTUTTUSI!

Sooq–una assavit uku mingutsernikut nammineq atisat attoqqaarsimanngikkaat, aammalu sooq pileritsapilunnermik uummateqarlutit Uannut qanillinissaq ujarpiuk Naalagaaffinnullu inniminartumut iserniarlutit? Ungasingaarputit, ilumut pileritsavinnut ungasingaarputit.

69

ADAM–IP MEERAI–AA!

Oqaatsit illernartut iliuutsillu minguitsut ajunngitsullu alutornassutsip naalagaaffianut qilammiorpaluttumut qaffariartortarput. Iliuutsissi imminiussutsip ilumoortuusaarniarnerullu pujoralaanit salinneqarnissaat, naalannassutsillu silarliani saammaanneqarnissaq anguniarniarsiuk, ungasinngitsukkummi inuiassuit misiliisuisa, Qinnuigineqartup illernartup eqqaaniillutik, allamik akuerisaqassanngillat taamaallaat ileqqorilluinnassusermik iliuutsillu simerneqanngitsumik minguitsumeersunik. Manna tassaavoq ilisimassutsip paasissaalluanngitsullu guuterpaluttup ulluata ulloriaa, piumassustip guuterpaluttup killingiusaata qulaatigut qinngorsimasoq. Tassunga saassimasut pilluaqquneqarput.

70

NUNAMIORPALUSSUTSIMIK ERNIUSOQ–AA!

Inuunerup naalagaaffia atoruminartuuvoq, taassumunnga anngutissagaluaruit; naassaanngitsup sumiiffia alutornangaarpoq, nunarsuup soraajasup ungataanut pissagaluaruit; qiimmatsangaarneq allamut pisitsisoq illernartoq tungusunnippoq, Inuusuttup qilammiorpaluttup assaanit ermuseq paasissaalluangitsoq imeraluarukku. Piffik tamanna angussagaluarukku, aserorternermit toqumillu avissaassagaluarputit, naalliuutinniillumi ajortulianniillu.

71

IKINNGUTIKKA–AA!

Paran-ip Qaqqaani, Zaman-ip killingini illernartitaasut iluini Uannik isumaqatigiissutigisarsi eqqaasiuk. Qutsissumi katersaarsuit naassaanngitsullu illoqarfiani najugaqartut uppernarsaasorisimavakka, taamaattorli isumaqatigiissutsimut maanna unneqqarissunik nassaanngilanga. Qularnanngitsumik pingaakujunnerup pikitsitsinerullu uummatinit

nungusarsimavaa allaat malunnaataarutivissimallugu. Taamaattorli tamanna nalunngikkaluarlugu Utaqqisimavunga killuutigisimanagulu.

72

KIFFARA–AA!

Panartut sisalluagaasutut ipputit puumi tarrup ataani toqqortatut, nalinganillu assassugassamik sulisartup ilisimanninneranik toqquussaasutut. Taamaammat imminersiussutsip pileritussutsillu puuanit saqqummerit nalingit nunarsuarmut tamarmut qaammarissunngortinneqarlunilu saqqummersinneqarniassammat.

73

IKINNGUTIGA–AA!

Tassaavutit Illernassutsima qilaasa ulluata ulloriaa; nunarsuup minguanit takoranningaassutsit taarsisinnagu. Soqutigisaqanngissutsip assiaqutai alittukkit, nuissat tunuannit qaammarillutit nuiniassagavit inuunerullu atisaanik suut tamaasa atisalerniassagakkit.

74

NERSOQQUTUSSUTSIP QITORNAI–AA!

Naalagaaffik qarsupittoq pillugu Naalagaaffiga piujuartussaq qimassimavarsi nunarsuullu qaatiguuanik tamalaartumik pinnersarsimallusi tulluusimaarpalaarusiussimallusiullu. Kusanassusera pillugu! Kikkut tamaasa pujoralaap uliata allaqanngitsup ataanut katersussavakka, qalipaatillu makkua assigiingitsut tamaasa nungusassallugit, taamaallaat Nammineq qalipaatinnik toqqaasut kisiisa pinnagit, qalipaammillu sumilluunniit salinneqartut.

75

SOQUTIGISAQANNGISSUTSIP QITORNAI–AA!

Misigissutsisi inuunerup pissaaneranut tunniunnasigit, tamannalu pillugu nuannaarasi. Timmissatut mianersuaatsutut ippusi, avaleqummi tatiginnilluarluni qarlortutut, timmiarniap Toqup tassanngaannaq pujoralammut milorujussinissaata tungaanut, erinaq, iluseq, qalipaallu tammartillugit, ilisarnartuerutivillugu. Taamaammat sianiginiaritsi, pileritussutsip inussiaatai–aa!

76

KIFFANNIT ARNAMIK ERNIUSOQ–AA!

Siunnersuineq oqaatsit atorlugit tunniunneqartuarsimavoq, maannali iliuutsit atorlugit tunniunneqarpoq. Kinaluunniit iliuutsinik minguitsunik illernartunillu takutitsisariaqarpoq, oqaatsimmi kikkut tamarmik pigaat, kisiannili iliuutsit taamatut ittut Asasatta kisimik pigaat. Taamaattoq ilungersoritsi, uummassi tarnersilu atorlugu, iliuutsisilu atorlugit malunniunniarlusi. Taamatut allakkami uani illernartumi qaammarissumilu Oqaaqqissaarpatsigit.

77

NAAPERTUILLUARNERUP ERNERA–AA!

Unnuap qeqqani Suussutsip toqusuitsup kusannassusia ilumoorsutsip qattuneranit aligortut qorsooqqissumit Sadratu’l–Muntaha–mut* aallarsimavoq imatullu qissasersimatigaluni allaat qutsissumi katersaarsuit qulaanilu naalagaaffiit innuttaat Aliasunnera pillugu nimaarsimallutik. Tamannalu pillugu aperisoqarsimalluni, sooq–una nimaartoqarlunilu qiasoqartoq? Akisimavorlu: Soorlu piumasarineqartoq malilllugu unneqqarissutsip qaqqaani ilimasulluarlunga utaqqisimavunga, taamaattorli ilumuussutsip tipigissusia nunamiunit naasimanagu. Taavalu uteqquneqarama takulerpakka takusiullu! Timmissat illernartut ilaat naalliunnangaartumik nunap qimmiisa kukiinik erloqisinneqartut. Kingornalu qilaap Niviarsiaa ulissimanani qaammarillunilu Illussaarsuarminit paasissaanngitsumit nukingerluni anisimavoq, aqqilu apeqqutigalugit, tamarmillu oqaatigineqarsimapput ataaseq kisiat pinnagu. Kajumissaarutigineqarmallu oqaatigeqqullugu naqinnera siulleq oqaatigineqarpoq, taavalu init qilammiorpaluttut innuttaat najukkaminnit alutornangaartumit tuaviorlutik anigasuarsimapput. Naqinnerullu tullia oqaatigineqarmat tamavimmik pujoralammut nakkarsimapput. Tassuugunnguaq nipi illernartuutitap ilorpiaanit tusarneqarpoq: “Tassunga taannalu qaangernagu.” Ilumut, iliuuserisimasaat maannalu iliuuserisaat, ilisimavagut.

*Sadratu’l–Muntaha: Orpiup aqqa, araberit qangarsuarniilli orpik aqquserngup naaffiani ikkussimasaat, siunnersuisussatut atortussaq. Assersuutitut imatut atorneqarpoq tassaasoq Guutip Piffissamini Saqqumersitaa. (Nalunaajaasoq – Profet-i) (Kitáb–I–Iqan-imit tigusaq)

78

KIFFANNIK ARNAMIK ERNIUSOQ–AA!

Naakkinnittup oqaasiinik paasissaalluanngitsup guuterpaluttup kuuaanit imerit, oqalunnerullu guuterpaluttup qaalerneranit ilisimassutsip ulluata ulloriaa alutornartoq ulissimanngitsoq qimerlooruk. Ilisimassutsinnit guuterpaluttumit naatsiiassat uummatip issortaanut minguitsumut ikkutikkit ilisimassutsillu ernganik imertikkit ilikkagaqarnerup ilisimassutsillu naasui puttunniassammata uummatip illoqarfianit illernartumit nutaajullutik qorsooqqillutillu.

79

PILERITUSSUTSIP ERNERA–AA!

Qanoq sivisutigisumik pileritussutsip naalagaaffiini aarsaarniaravit. Sulunnik tunisimavakkit illernassutsip naalagaaffiinut nalunartunut timmisinnaaniassagavit, isumaasorisat ajungaartut nunaanuunngitsoq. Illaagullu aamma ilinnut tunniussimavara, nutsakka ilingasut qernariit iluarsaanniassagakkit, Toqqusaaralu taakkuninnga alittusannginnakku.

80

KIFFAKKA–AA!

Tassaavusi Naatsiivimma orpii; eriaginartunik tupinnartunillu naatitaqassaasi, nammineq allallu iluaqutigisinnaasaannik. Taamaalilluni kinaluunniit pisussaavoq assassortarissamik suliamilluunniit ilinniarsimasamik sammisaqassalluni pisuujussutsip isertuutaa tassani immat, inuit–aa paasinnissinnnaasusi! Angusaqarneq atortoqarnermut aalajangiisuuvoq, Guutillu saammaannera ilinnut naammalluinnassaaq. Orpiit inerititaqanngitsut innermut atortuujuarsimapput atortuujuaannassallutillu.

81

KIFFARA–AA!

Inuit nikanarnerpaat tassaapput nunami inerititaqanngitsut. Inuit taamaattut ilumut toqungasunut naatsorsuunneqarput, aap Guutip isaani toqungasut taakkunanit tarninit imaqaratillu naleqanngitsunit iluarnerupput.

82

KIFFARA–AA!

Inuit pitsaanersaat tassaapput inuussutissaqarlutik atorfeqartut imminnut ilaquttaminnullu, Guutimut silarsuit tamarmik Naalagaannut, asannillutik pilersortut.

Arnaq katernaaq paasissaalluanngitsoq tupinnartorlu, matuma siornagut oqalunnerup ulianik toqqoqqasoq, maanna Guutip saammaanneratigut Tunissutaatigullu guuterpaluttukkut ersittunngortinneqarsimavoq, soorluli qaamanertut qaammarissutut Asasap kusanassusianik aallartinneqarsimasumit Nalunaajaassutigaara, ikinngutit–aa, tunissut naammalluinnartuusoq, nalunaajaat naammassisimasoq, uppernarsaat saqqumisoq ilisarnaqullu napparneqarsimasoq. Maannalu takuneqarallarli avissaarsimanerup aqqutaani ilungersuutigisasi sunik ersersitsissanersut. Taamatut tunissut guuterpaluttoq ilissinnut tamarmiulluni tunniunneqarsimavoq, qilammiittunuttaaq nunamiittunullu. Guuti tamanit unnersiutaagili, Silarsuit tamarmik Naalagaat.

Bahá'u'lláh

Windows / Mac