Return   Facebook   Zip File

Arabic

1

LE ATALII E, O LE AGAGA!

O La’u lapata’iga mua lenei: Ia maua le loto mama, alofa ma le pupula, ina ia avea ai lou loto ma mamalu mai anamua, e le mafai ona faaumatia ae faavavau.

2

LE ATALII E, O LE AGAGA!

O le mea sililsii ona taua i mea uma lava i La’u silafaga o le Faamasinogatonu; ia lē liliu ese mai ai pe afai e te mana’o i a te A’u, ma ia lē faatamala i ai ina ia mafai ona Ou faamatalaloto ia te oe. Ona o lona fesoasoani o le a mafai ai ona ē vaai i ou lava mata ae lē o mata o isi, ma o le a iloa ai e oe i lou lava poto , ae lē o le malamalama o lou tuaoi. Mafaufau i lenei mea i lou loto; e pei ona tuuina atu ia te oe ia faapea ona faia.E moni o le faamasinogatatonu o La’u meaalofa ia te oe, ma o le faailoga o Lo’u alofa agalelei. Ia tuuina lenei mea i luma o ou mata.

3

LE ATALI’I E, O LE TAGATA!

Sa ufitia i Lo’u tagata e le mafai ona manatua atoa ma le faavavau anamua o Lo’u uiga, Lo’u iloaina o Lo’u alofa ia te oe; o le mea lea na Ou faia ai oe, ma faia ai oe i Lo’u faatusa, ma faaalia ia te oe Lo’u matagofie.

4

LE ATALII E, O LE TAGATA!

Ou te alofa i lou foafoaina e pei ona Ou faia oe. O lea, ia e alofa mai ia te A’u, ina ia Ou faaigoaina oe, ma faatumuina lou loto i le agaga o le olataga.

5

LE ATALII E, O LE TAGATA!

Alofa ia te A’u ina ia Ou alofa atu ia te oe. Afai e te le alofa mai ia te A’u, o le a lē mafai lava ona oo atu Lo’u alofa ia te oe. Le auauna e, ia e iloa lenei mea.

6

LE ATALII E, O LE TAGATA!

O lou Parataiso Lo’u alofa; o lou aiga faale lagi le faatasia ma A’u. Ulufale loa i ai ma ‘aua le faatuai. O le mea lenei sa faatatauina mo oe i le Matou Malo i lugā ma le Matou pulega fa´aeaina.

7

LE ATALII E, O LE TAGATA!

Afai e te alofa ia te A’u, ia liliu ese ia te oe lava; ma afai e te saili mai i Lo’u finagalo malie, ‘aua e te usita’i i lou lava loto; ina ia e oti i totonu ia te A’u ma mafai ai ona Ou ola e faavavau i totonu ia te oe.

8

LE ATALII E, O LE TAGATA!

E leai lava se filemu mo oe vagana ua lafoa’ia oe lava ma liliu mai ia te A’u; aua ua tuuina atu ia te oe ina ia mamalu ona o Lo’u suafa ae le o lou lava; ina ia tuuina mai lou talitonuga ia te A’u ae le o oe lava, ona Ou te mana’o ina ia alofaina tau o A’u ma faasilisilia i mea uma lava.

9

LE ATALII E, O LE TAGATA!

O Lo’u alofa o Lo’u olomalosi; o le tagata e ulufale i ai e saogalemu ma malutia, ae o le tagata e liliu ese ai e faasevasevaloaina ma malaia.

10

LE ATALII E, O LE FOLAFOLAGA!

O oe lava o Lo’u olomalosi; ulufale ia i ai ina ia e mafuta ai i le saogalemu. O Lo’u alofa o i totonu ia te oe, ia e iloaina ina ia mafai ona e mauaina A’u o latalata atu ia te oe.

11

LE ATALII E, O LE TAGATA!

O oe lava o La’u lamepa ma o Lo’u malamalama o lo o i totonu ia te, oe. Ia e aumaia ai lou pupula ma ia le saili atu ai i se tasi e ese i lo A’u. Aua sa Ou faia oe ia tamaoaiga ma faamaligiina fua atu i ou luga Lo’u finagalo alofa.

12

LE ATALII E, O LE TAGATA!

O aao o le mana sa Ou faia ai oe, ma o tamatama’ilima o le malosi sa Ou faia ai oe; ma na Ou tuuina i totonu ia te oe le aano o Lo’u malamalama. Ia faamalieina ai oe ma ia e le toe saili atu ai i se tasi, aua o La’u galuega ua atoatoa ma La’u tulafono ua fusifusia. Ia le siligia pe toe tau masalomia.

13

LE ATALII E, O LE AGAGA!

Sa Ou faia oe ia tamaoaiga, aisea ua e faia ai oe ina ia e mativa? Sa Ou faia oe i le mamalu, ae mai fea lou faamaualaoina o oe? Sa Ou avatua ia te oe le ola mai le aano o le malamalama, aisea la ua e sailia ai le faamalamalamaina mai so o se tasi e ese mai ia te A’u? O le efuefu o le alofa sa Ou faia ai oe ua faapefea ona e vevesi ma le isi. Liliu ifo lau vaai ia te oe lava, e mafai ai ona e iloaina A'u’o lo o tu i totonu ia te oe, o le malosi, mamana, male puna-ole-ola.

14

LE ATALII E, O LE TAGATA!

O oe lava o Lo’u malo ma o Lo’u malo e le ‘ana-gofieina, aisea e te fefe ai i lou ‘augavale? O oe o Lo’u malamalama, ma o Lo’u malamlama e le mafai ona tineia, ae aisea ua e tineia ai? O oe o Lo’u mamalu, ma o Lo’u mamalu e le mafai ona mavae; o oe o Lo’u ofutalaloa, ma o Lo’u ofutalaloa e le mafai ona masaesae. Mafuta ia i ai ona o lou alofa ia te A’u, ina ia mafai ai ona e mauaina A’u i le malo o le mamalu.

15

LE ATALII E, O LE FOLAFOLAGA!

Liliu mai ou mata i O’u, ma lafoa’i mea uma tau lava o A’u; aua o Lo’u mamalu e tumau ma Lo’u malo e le mavae. Afai e te sailia pea lava le atulaulau, o le a le aoga lava au sailiga.

16

LE ATALII E, O LE MALAMALAMA!

Faagalo mea uma vagana A’u ma mafuta faatasi ma Lo’u agaga. O le aano lava lenei o La’u tulafono, o le mea lea, liliu i ai.

17

LE ATALII E, O LE TAGATA!

Ia faamalieina oe ia te A’u ma ia le toe saili atu ai i se tasi fesoasoani. Aua e leai lava se tasi na o A’u e faamalieina ai oe.

18

LE ATALII E, O LE AGAGA!

‘Aua le molimana’o mai ia te A’u i le mea Matou te le manaomia mo oe. O lea ia faamalieina ai i se mea ua Matou foa’i atu mo lou lelei, aua o lenei lava le mea e aoga ia te oe, pe afai o le a faamalieina ai oe.

19

LE ATALII E, O LE FAAALIGA MATAGOFIE !

Sa Ou manavaina i totonu ia te oe le manavaga o Lo’u lava Agaga, ia avea ai oe ma A’u pele. Aisea ua e lafoa’ia ai A’u ma saili atu i se pele e ese mai lo A’u.

20

LE ATALII E, O LE AGAGA!

O La’u tautinoga ia te oe e taua tele e le mafai ona faagaloina. E fau ma soloi Lo’u alofa tunoa ia te oe, e le mafai ona ufitia. Ua faia i totonu ia te oe e Lo’u alofa lona aiga, e le mafai ona faaliloina, o lo o faaalia ia te oe Lo’u malamalama, e le mafai ona faapouliuligia.

21

LE ATALII E, O LE TAGATA!

I luga o le laau o le mamalu pupula sa Ou tautauina ai mo oe fualaau filifilia, ae aisea ua e liliu ese ai ma faamalieina oe i lena mea e faale- lelei? Fo’i mai ia i le mea lena e sili atu mo oe o lo o i le malo i luga.

22

LE ATALII E, O LE AGATA!

Sa Ou faia oe i le mamalu, ui lea o oe lava sa faamaualaloina oe. Tula’i atu ia i le mea lena sa faia ai oe.

23

LE ATALII E, O LE SILISILIESE!

Na Ou valaauina oe mo le faavavau, ui lea ua e sailia le mea lena e faaumatia. O le a le mea ua na faaliliu ese oe mai lo Matou mana'o ma saili ai i lou lava mana'o ?

24

LE ATALII E, O LE TAGATA!

Ia le sopoia ou tua’oi, po o le faaaogaina foi o le mea e le tatau ia te oe. Folasia oe i luma o le silafaga a le Atua, le Alii o le malosi ma le mana.

25

LE ATALII E, O LE TAGATA!

Ia le faasili a’e oe i luga o le tagata mativa, aua Ou te ta’ita’ia o ia i lona ala ma vaaia oe i lou i’uga leaga, ma saga faalumaina ai lava oe.

26

LE ATALII E, O LE TAGATA!

Ua faapefea ona galo ia te oe ou lava sese ma ua e vavasi ai i sese o isi? O le tagata e faia lenei mea e fetuuina e A’u.

27

LE ATALII E, O LE TAGATA!

‘Aua le manava atu i agasala a isi aua o oe foi o le tagata agasala. Afai e te solia lenei poloaiga, o le a faasalaina oe, ma o A’u lava e molimau i lenai mea.

28

LE ATALII E, O LE AGATA!

Ia e iloa lenei upu moni: O le tagata e faatonuina tagata ia amiotonu ae faia e ia le amioleaga e le o se tasi mai ia te A’u, tusa lava pe na te tauaveina Lo’u igoa.

29

LE ATALII E, O LE TAGATA!

“Aua le ta’uina atu i se tagata le mea e le mafai ona e ta’uina ifo ia te oe, ma ia le fai atu foi i le mea e te le mafaia. O La’u poloaiga lenei ia te oe, ia e anaana i ai.

30

LE ATALII E, O LE TAGATA!

Ia le teena La’u auauna pe afai e tagi atu i se mea mai ia te oe, aua o ona mata o O’u fofoga foi ia; o lea tulaga e matavale i O’u luma.

31

LE ATALII E, O LE TAGATA!

Ia faamauina au gaoioiga i aso taitasi a o le i valaauina oe i le su’esu’ega ,o le oti e faafuase’i ona oo atu ia te oe, ona valaauina lea o oe e fai le tala o au gaoioiga.

32

LE ATALII E, O LE SILISILIESE!

Ua Ou faia le oti ma avefeau o le olioli ia te oe, Aisea la e te faanoanoa ai? Ua Ou faia le malamalama ina ia susulu ifo i ou luga lona pupula. Aisea ua e ufitia ai oe mai lona pupula?

33

LE ATALII E, O LE AGAGA!

Sa Ou alagaina oe i tala lelei o le malamalama; olioli ia! Sa Ou valaauina oe i le lotoa o le faapaiaina; ulufale i ai ina ia e ola ai i le filemu e faavavau.

34

LE ATALII E, O LE AGAGA!

O le agaga o le faapaiaina na faaalia ia te oe tala lelei o le toe faatasi; aisea la e te faanoanoa ai? O le agaga o le mana na faamautuina oe i Lana fuataiga; aisea la ua e faalafi ai oe? O le malamalama o Ona fofoga e ta’ita’ia ai oe; e faapefea la ona e fesea’i?

35

LE ATALII E, O LE TAGATA!

Ia le faanoanoa vagana ua mamao oe ma i Matou. Ia le fiafia foi vagana ua latalata ma toe foi mai ia te i Matou.

36

LE ATALII E, O LE AGAGA!

Olioli i fiafiaga o lou loto, ia mafai ai ona ta’uaogaina oe e feiloa’i ma A’u ma toe faaatagia atu Lo’u matagofie.

37

LE ATALII E, O LE TAGATA!

‘Aua e te alu ese mai Lo’u ofutalaloa matagofie, ma ia le lafoa’ia lou vaega mai Lo’u vaipuna ofoofogia, ina ne i e galala ai e faavavau.

38

LE ATALII E, O LE TAGATA!

Savali i A’u tulafono ona o le alofa ia te A’u, ma ia e faafitia mea e te mana’o i ai pe afai e te sailia mai Lo’u finagalo malie.

39

LE ATALII E, O LE TAGATA!

Ia le faatamala i A’u tulafono pe afai e te alofa i Lo’u matagofie, ma ia le faagaloina A’u lapata’iga pe afai e te fia maua Lo’u finagalo malie lelei.

40

LE ATALII E, O LE TAGATA!

Afai e te taamilo i le tele o le vateatea ma faimalaga i le lautele o le vanimonimo, e le mafai lava ona e maua se mapusaga vagana le usiusita’i i la Matou tulafono, ma le faamaualalo i luma o Matou Fofoga.

41

LE ATALII E, O LE TAGATA!

Folafola atu La’u fuataiga ina ia Ou faalia ia te oe mealilo o Lo’u mata’utia ma faasusuluina i ou luga le malamalama o le faavavau.

42

LE ATALII E, O LE TAGATA!

Ia e faamaualalo i O’u luma ina ia Ou asiasi alofa atu ia te oe. Tula’i ia mo le manumalo o La’u fuataiga, aua a o i ai oe i le lalolagi, o le a mafai ona e maua le manumalo.

43

LE ATALII E, O LE TAGATA!

Ia ta’uta’uina A’u i Lo’u lalolagi ina ia mafai ona Ou manatua oe i Lo’u lagi, o le ala lea e faamatalaloto ai O’u fofoga ma ou mata.

44

LE ATALII E, O LE TAGATA!

O lau faalogo o La’u faafofoga foi lea, ia e faalogo ai. O lau vaai o La’u silafaga foi lea, ia e vaai ai, ina ia mafai e lou agaga loloto ona molimau atu i Lo’u paia faaeaina, ma o A’u lava ia te A’u e molimau i le tulaga faaeaina mo oe.

45

LE ATALII E, O LE TAGATA!

Saili se oti maturo i Lo’u ala, faamalieina i Lo’u finagalo ma loto faafetai i mea ua Ou totofiina, ina ia mafai ona mapu , toe faatasi ma A’u i lalo o le paolo o le mamalu i tua o le tapeneko o le pupula.

46

LE ATALII E, O LE TAGATA!

Mafaufau ma manatunatu. O lou manao ea le oti i luga o lou moega, po o le faamaligia o lou toto-ola i luga o le eleele o se maturo i Lo’u ala, ma avea ai ma faifaaaliga o La’u tulafono ma sapenapaenea o Lo’u malamalama i le parataiso silisili? Le auauna e, ia tonu lau faamasinoga!

47

LE ATALII E, O LE TAGATA!

Ona o La’u matagofie! O le valia o lou lauulu i lou lava toto, e sili atu lea i La;u silafaga, i lo le foafoaga o le atulaulau ma le malamalama o lalolagi e lua. Le aunauna e, finau ia maua lenei mea!

48

LE ATALII E, O LE TAGATA!

O lo o i ai se faailoga i mea taitasi uma. O le faailoga o le alofa o le faapalepale i lalo o La’u poloaiga, ma le onosa’i i lalo o A’u tofotofoga.

49

LE ATALII E, O LE TAGATA!

O le pele moni e moomoo ia puapuaagatia e pei o le tagata fouvale i le faamagaloga ma le tagata agasala i le alofa.

50

LE ATALII E, O LE TAGATA!

Afai e le oo ia te oe le puapuagatia i Lo’u ala, e faapefea ona mafai ona e savali i ala o i latou o lo o fiafia i Lo’u finagalo malie? Afai e le faamafatiaina oe e tofotofoga i lau taumafaiga e fia feiloa’i ia te A’u, e faapefea la ona e maua le malamalama o lou alofa i Lo’u matagofie?

51

LE ATALII E, O LE TAGATA!

O Lo’u malaia o La’u lava pulunaunau, o le itu va’aia o le afi ma le taui ma sui, ae o le itu lilo o le malamalama ma le alofa mutimutivale . Faavave atu ia i ai, ina ia avea oe ma malamalama faavavau ma agaga tumau. O La’u poloaiga lenei ia te oe, ia anaana i ai.

52

LE ATALII E, O LE TAGATA!

‘Aua le mitamita pe a oo atu ia te oe le faamanuiaga, ia le faanoanoa foi pe oo atu ia te oe le faalumaina, aua o ia mea e mavae ma e le toe aliali mai.

53

LE ATALII E, O LE TAGATA!

Ia le faanoanoa pe afai e te mativa; aua o le a asiasi atu ia te oe le Alii o le tamaoaiga. Ia le fefe i le faatoilaloina, aua o le oo atu le mamalu ia te oe i se aso.

54

LE ATALII E, O LE TAGATA!

Afai e faamautuina lou loto i lenei malo faavavau ma le le mavae, lenei ola mai le vavau ma le faavavaau, lafoa’i loa le mamalu e mavae ma le le tumau.

55

LE ATALII E, O LE TAGATA!

Soia e te vavesi i lenei lalolagi, aua o le afi Matou te iloiloina ai le auro, a o le auro Matou te tofotofoina ai a Matou auauna.

56

LE ATALII E, O LE TAGATA!

E te mana’o i le auro ae Ou te mana’o ia e saoloto mai ai. E te manatu ua e tamaoaiga pe a e maua, ae e te iloa lou tamaoaiga pe afai e te faapaiaina mai ai. Ona o Lo’u ola! O Lo’u poto lenei a o lou taofi lena; e faapefea la ona tutusa O’u ala ma ou ala?

57

LE ATALII E, O LE TAGATA!

Foa’i atu Lo’u tamaoaiga i O’u tagata matitiva, ina ia mafai ai i le lagi ona faatamaoaigaina oe mai faleteu’oa o le pupula lê ‘auaoa, ma oloataua o le mamalu e le faaumatia. Ona o Lo’u ola! O le ofoina atu o lou agaga o se mea aupito viia lea pe a na mafai ona e vaai i O’u fofoga.

58

LE ATALII E, O LE TAGATA!

O le malumalu o le tagata o Lo’u nofoalii; ia faamamaina mai mea uma, ina ia mafai ona Ou faamautu i ai ma Ou afio tumau ai iina.

59

LE ATALII E, O LE TAGATA!

O lou loto o Lo’u aiga; ia faapaiaina mo Lo;u afio ifo. O lou agaga o’u nofoaga o faaaliga; ia faamamaina mo La’u faifaaaliga.

60

LE ATALII E, O LE TAGATA!

Tuu mai lou lima i Lo’u fatafata, ina ia mafai ona Ou faaosoina a’e i ou luga le malamalama ma le pupula.

61

LE ATALII E, O LE TAGATA!

Alu a’e i Lo’u lagi, ina ia e maua le olioli o le toe faatasia, ma ia e inu mai le ipu o le mamalu e le faaumatia i le uaina e le faatusalia.

62

LE ATALII E, O LE TAGATA!

Ua tele aso a lou olaga ua mavae a o lo o vevesi pea oe i au fuafuaga ma manatu valea. O le a le umi o lou moegase i luga o lou moega? Ala a’e ia mai lou moegase, aua ua oso a’e le La i le tafatafa’ilagi, atonu e susulu mai ai i ou luga i le pupula o le matagofie.

63

LE ATALII E, O LE TAGATA!

Sa sulusulu atu i ou luga le malamalama mai le tafatafa’ilagi o le Mauga paia, ma sa manava ai i totonu o le Sinai o lou loto le agaga o le faamalamalamaina. O lea, faasa’oloto oe mai iepuipui o manatu valea ae ulufale mai i Lo’u lotoa, ina ia mafai ona tatau lelei oe mo le ola faavavau, ma ta’uaogaina e feiloa’i ma A’u. Atonu o le tulaga lea e le oo atu ai le oti ia te oe, e le toe vaivai pe toe faalavelavea.

64

LE ATALII E, O LE TAGATA!

O Lo’u faavavau La’u foafoaga, ma sa Ou faia lava ma oe. Ia avea ma ofu o lou malumalu. O La’u aufaatasiga La’u galuega taulima; sa Ou aumaia ma oe; ia e ofu ai, ina ia mafai ai e oe e oo i le vavau ona avea ma faaaliga o Lo’u tagata faavavau.

65

LE ATALII E, O LE TAGATA!

O Lo’u mamalu o La’u meaalofa ia te oe, ma o Lo’u silisiliese o le fua o Lo’u alofa mutimutivale ia te oe. O le mea e tatau ia te A’u e leai se tasi e malamalama i ai, po o le talatalaina foi e so o se tasi. E moni, o lo o O’u faasaoina lea i O’u faleteu’oa lafita’i ma tuuga’oa o La’u tulafono, e avea ma faailoga o Lo’u alofa-agalelei i A’u auauna, ma Lo’u alofa mutimutivale i O’u tagata.

66

LE FANAU E, A LE AANO FAALEAGAGA MA LE LEVAAIA!

E mafai ona faafelaveia outou mai le alofa ia te A’u, e mafai foi ona faaatuatuvaleina tagata a o latou ta’uta’uina A’u po loto foi ona aofia ai A’u.

67

LE ATALII E, O LE MATAGOFIE!

Ona o Lo’u agaga ma Lo’u finagalo malie! Ona o Lo’u alofa mutimutivale ma Lo’u matagofie! O mea uma lava sa Ou faaali atu ia te oe i le fofoga o le mana, ma sa tusia mo oe i le peni o le malosi, ma sa feagai lelei ma lou agavaa ma le malamalama, ae le o Lo’u tulaga ma le leomalie o Lo’u siufofoga.

68

LE FANAU, A TAGATA!

Tou te le iloa ea le ala na Matou faia ai outou mai le efuefu e tasi? Ina ia le faasili a’e e se tasi o ia mai le isi. Manatunatu i taimi uma lava i outou loto pe na faapefea ona faia outou. Talu ai ona sa Matou faia outou uma mai le aano e tasi, ua tuuina atu ai ia te outou ina ia tutusa e pei o se tagata e tasi, tutusa vae e savavali ai, aai i le gutu e tasi ma nonofo i le laueleele e tasi, ina ia maua mai i o outou tagata moni i totonu, i a outou gaoioiga ma faiga faailoga o le tafatasi, ma faaalia ai le aano moni o le faatoina. Le faapotoptotga e, o le malamalama, o La’u lapataiga lea ia te outou! Ia outou faalogo i lenei lapataiga, ina ia outou maua ai le fua o le faapaiaina mai le laau o le mamalu matagofie.

69

OUTOU E, ATALII O LE TAGATA!

O outou o O’u faletupe, aua ua Ou teuina i totonu o outou penina o A’u mealilo ma maataua o Lo’u poto. Ia leoleoina i latou mai tagata ese o lo o i totonu o A’u auauna, ma tagata e le talitonu i le Atua o lo o i totonu o O’u tagata.

70

LE ATALII E, O IA O LO O TU I LONA LAVA TAGATA, I LE MALO O LONA LAVA FAAPITO!

Ia e iloa, sa Ou faasasalaina atu ia te oe manogi uma lava o le faapaiaina, faaalia atoatoa foi ia te oe La’u afioga, faaatoatoaina ona o oe La’u foaialofa, ma fuafuaina ai mo oe le mea sa Ou mana’omia mo Lo’u lava Tagata. Ia faamalieina i Lo’u finagalo malie ma ia loto faafetai mai ia te A’u.

71

LE ATALII E, O LE TAGATA!

Ia tusia mea uma sa Matou faaali atu ia te oe i le vaitusi o le malamalama i le tapeleti o lou agaga. Afai e le mafai lenei mea e lou malosi, ona faia lea o lau vaitusi i le aano moni o lou loto. Afai e te le mafaia lenei mea, ona tusia lea i le vaitusi ‘ula’ula lea sa faamaligiina i Lo’u ala. E sili atu ona suamalie ia te A’u lenei mea i lo mea uma lava, atonu o le a mafai ai ona tumau lona malamalama e faavae lava.

Persian

1

OUTOU E, TAGATA O I AI MAFAUFAU E ILOA AI

O le ulua’i valaau lenei a le Pele: Le naitinikale lafita’i e! Ia le nofo lava i se tasi mea vagana le faatoaga-rosa a le agaga. Le avefeau e, a le Solomona o le alofa! Ia e le saili atu i se lafitaga vagana le Seepa a le pele-sili, ma le foinisi faavavau e! Ia le nofo lava vagana o luga o le mauga o le faamaoni. O i ai iina lou nofoaga, ma afai o i ai i apaau o lou agaga o le a e lele a’e i le malo o le le gata mai, ma saili ai ina ia taunuu atu i lou sini.

2

LE ATALII E, O LE AGAGA!

E sailia e le manulele lona ofaga; a o le naitinikale le manamea a le rosa; a o manulael na o loto o tagata, ua faamalilieina i le efuefu e mavae, ua sese mamao ese mai o latou afaga faavavau, ma mata ua liliu atu i le lua palapala o le faale anaana, ma ua vavaeesea ai mai le mamalu o le faatasi mai faaleagaga. Oi faauta! O se mea uiga ese ma le gaualofa ao; ona e ui lava o se ipuvai faatauvaa, ae ua latou liliu ese mai ai i sami fafati a le Silisili Ese, ma nonofo mamao ai mai le tafatafa’ilagi pupula silisili.

3

LE UO E!

Ia le totoina se tasi lava mea i le faatoaga o lou loto tau lava o le rosa o le alofa, ma ia mausali lau ‘u’u mai le naitinikale o le alofa ma le mana’oga. Taofi mau le mafutaga amiotonu ma aloese i fefaauoa’iga uma ma tagata e le anaana i le Atua.

4

LE ATALII E, O LE FAAMASINOGATONU!

Ofea e toe fia alu i ai le tagata alofa na i lo le laueleele o lana pele? O ai foi le tagata saili e mafai ona mapu pe afai e le o maua le mana’oga o lona loto? I le tagata alofa moni, o le oti lea. Ua leai se onosa’i i lona ma ua leai foi se filemu o lona fatu. E lafoa’ia e ia ni ola e manomano ae faataalise atu i le nofoaga o lana pele.

5

LE ATALII E, O LE EFUEFU!

E moni Ou te fai atu ia te oe: O le tagata e aupito sili ona leaga i tagata uma lava, o ia lava lea e finau valea ma taumafai e faasili a’e o ia i luga o ona uso. Fai atu, le ‘auuso e! Avea galuega ae le o upu ma outou pale.

6

LE ATALII E, O LE ALEELE!

Ia iloa, e moni, o le loto o i ai sina manogi itiiti lava o le matau’a e le mafai lava ona taunuu atu L’ou malo faavavau, po o le manavaina foi i totonu manogi lelei o le faapaiana, o lo o manavaina mai Lo’u malo paia.

7

LE ATALII E, O LE ALOFA!

Ooe ua tasi nei le laasaga ua alu ese ai mai tumutumu mamalu iluga, atoa foi ma le laau faale lagi o le alofa, Ia e faia se laasaga muamua ma o le tasi e sosoo i e oo atu ai i le malo tumau ma ulufale atu i le maota faavavau. Faalogo mai ia i le mea sa faaalia mai e le peni mamalu.

8

LE ATALII E, O LE MAMALU!

Ia faataalise i le ala o le faaoaiaina, ma ulufale atu i le lagi o le mafutaga ma A’u. Faamamaina lou loto i le aasa o le agaga, ma faataalise atu i le lotoa o le Silisili Ese.

9

LE ATA MAVAE E !

Sopo atu ia tala atu o tulaga faaae o le masalosalo ma alu a’e i tumutumu faaeaina o le mautinoa. Pupula ia le mata o le faamaoni, ina ia e vaaia ai le Matagofie e le ‘auaoa ma alaga atu: Ia paia le Alii, le mataisau aupito silisili i mataisau uma!

10

LE ATALII E, O LE MANA’O!

Faalogo mai ia i lenei mea: “E le mafai lava ona iloa e mata faaletino le matagofie faavavau, po o le loto foi e leai se ola e le fiafia lava i se tasi mea vagana le fuga mamae. E pei lava o le uiga e masani ai le sailiga, faato’a faamalieina lava ina ua i ai i le faatasiga a lona ituaiga.

11

LE ATALII E, O LE EFUEFU!

Faatauaso ou mata e te vaaia ai Lo’u matagofia; pupuni ou taliga e mafai ai ona e lagonaina leo malie o Lo’u siufofoga; faagaogaoina oe mai le poto a’oa’oina uma e mafai ai ona e mauvaega i Lo’u poto; ma ia faapaiaina oe mai ‘oa o le lalolagi, e mafai ai ona maua sou vaega tumau mai Lo’u tamaoaiga faavavau. O le faatauasoina o ou mata, o lona uiga, o mea uma sou vaega tumau mai Lo’u tamaoaiga faavavau. O le faatauasoina o ou mata, o lona uiga, o mea uma lava vagana ai Lo’u matagofie; pupuni ou taliga i mea uma vagana La’u afioga; faagaogaoina oe mai a’oa’oga uma lava tau lava o le malamalama mai ia te A’u; ina ia mafai ai i se vaaiga manino, se loto mama ma taliga faalogo ona e ulufale atu i le lotoa o Lo’u paia.

12

LE ATALII E, O VAAIGA E LUA!

Moe le mata e tasi ae pupula le isi. Moe le mata aga’i i le lalolagi ma mea uma o lo o i ai, ae pupula le tasi i le matagofie paia o le Pele.

13

LA’U FANAU E!

Ua Ou popole ina ne i avea le aveesea o le olo a le lupe o le lagi ma mea tou te goto ai i ata o le matua leiloa atoatoa, ma e le toe mafai ai ona vaai i le matagofie o le rosa, ae toe foi atu lava i le vai ma le afuefu.

14

UO E!

Ia le lafoa’ia le matagofie favavau i se matagofie e mafai ona mavae, ma ia le tuuina atu lo outou alofa i lenei lalolagi mavae o le efuefu.

15

LE ATALII E, O LE AGAGA!

E oo mai le taimi e le toe folafolaina ai e le naitinikale paia mealilo loloto, ma aveesea ai mai ia te outou le leomalie faalelagi ma le si’ufofoga mai luga.

16

LE AANO E! O LE FAATAMALA!

E manomano gagana lafita’i sa faia se folafolaga i se lauga e tasi, e manomano foi mealilo lafita’i sa faaalia i se leomalie e tasi! Ae faauta, e leai lava se taliga sa faalogo po o se loto na malamalama.

17

‘AU MEAMAMAE E!

O lo o matala nei faitotoa e ui atu ai i le Nofoagavalevalenoa, ma ua teuteuina foi le nofoaga o le pele i le toto o tagata alolofa, ui i lea, o lenei toatele e toaitiiti lava o lo o vavaeesea pea mai lenai aai faalelagi, ma e ui foi i lenei toaitiiti, ae toetoe lava leai se tasi na maua o i se loto mama ma se agaga faapaiaina.

18

OUTOU E, TAGATAE, NONOFO I LE PARATAISO SILISILI!

Folafola atu i le fanau o le mautinoa o lo o i ai i totonu o malo o le faapaiaina, e latalata atu i le parataiso faalelagi, ua faaalia mai ai se faatoaga fou, o lo o si’omia faataamilo ai tagatanuu o le malo i luga, ma tagatanuu tumau o le parataiso faaeaina. Finafinau ia ina ia outou taunuu atu i lena tulaga, ina ia mafai ai ona outou maua mealilo o le alofa mai ona fugalaau-matagi ma iloa ai le mealilio o le poto faaleagaga ma le atoatoa mai ona fua faavavau. E faamalamalamaina mata o i latou ua ulufale i ai ma nonofo ai i totonu.

19

A’U UO E!

Po ua galo ia te outou le taeao moni ma le pupula lena, i taimi paia ma le faamanuiaina na sa outou faapotopoto faatasi ane ai i O’u luma i lalo o le ata o le laau o le ola, o lo o totoina i le parataiso o faaneetaga-uma? Sa faate’ia ai la outou faalogo a o O’u ta’uina atu le folafolaga o nei upu silisili ona paia e tolu: Uo e! Ia le faasili a’e o outou manatu i Lo’u, ‘aua lava le manana’o i le mea Ou te le mana’omia mo outou, ma ia ‘aua tou te faalatalata mai ia te A’u ma loto e leai ni ola, ua faaleagaina i mana’oga ma tu’inanau faale lalolagi. A na fai tou te faapaiaina outou loto, semanu ua outou toe manatuaina i le itula lenei le nofoaga lena ma na taimi paia, atoa foi ma le matua faamaninoina ia te outou le faamaoni o La’u folafolaga.

O lona valu o laina aupito silisili ona paia, i le Tapeleti lona lima o le Parataiso, o lo o Ia fetalai mai ai:

20

OUTOU E, O LO O TAOOTO I LUGA O LE MOEGA O LE LE ANAANA E PEI UA OTI!

Ua tele tausaga ua mavae atu ma ua latalata mai foi le iuga o outou olaga taua, ae leai lava sina manavaga e tasi o le le gaoia mai ia te outou ua oo mai i lo Matou lotoa o le faapaiaina. E ui lava ina gogoto ifo i le vasa o le talitonu sese, ae o lo o outou ta’uta’uina pea lava i outou laugutu le faatuaga moni e tasi a le Atua. O ia lea Ou te inosia ua outou alolofa i ai, ,a o Lo’u fili foi ua outou faia ma uo. Ae le gata i lea, o lo o outou savavali i Lo’u lalolagi i le faamalilieina ma le nenee-faapito, au galo ai le fiu o Lo’u lalolagi ia te outou ma o mea foi o lo o i ai ua inoino ia te outou. A na fai e mafai ona pupula outou mata, semanu o le mea moni e sili ona outou mana’omia faanoanoaga e manomano i lo lenei olioli, ma faitauina ai le sili atu o le oti i lo lenei ola.

21

LE FAATUSA GAOIOI E, O LE EFUEFU!

Ou te mana’o i le mafutaga ma oe, ae peitai e leai sou talitonuga ia te A’u. Ua lafoina i lalo palu o lou fouvale le laau o lou faamoemoega. O taimi uma lava Ou te latalata atu ai ia te oe, ae ua atili ai ona e mamao ese atu ma A’u. O le mamalu e le faaumatia sa Ou filifilia mo oe, peitai ua e filifilia lava mo oe le faalumaina e le faatua’oia. Foi mai ia, a o lo o i ai pea le taimi, ma ia le maumauina lou avanoa.

22

LE ATALII E, O LE MANA’O

23

! Sa finafinau i tausaga e tele tagata a’oa’oina male popoto, ae le i mafai lava ona latou taunuu atu i le faatasi mai o le Faaneetaga-Uma; sa latou tuuina atu o latou ola atoatoa I le sailiga o ia, peitai e le i vaai lava i le matagofie o Ona fofoga. A o oe e aunoa ma sina taumafaiga itiiti lava ae ua maua lou sini., ma e leai se sailiga ae ua maua le taunuuga o lau sailiga. Peitai, ui lava i lea, o lo o e tumau lava i le afifia i le puao o le manatu faapito, ua le mafai ai e ou mata ona vaai i le matagofie o le Pele, po o Lona ofutalaloa. A o outou e i ai mata, vaai ia ma ofo.

24

TAGATANUU E, I LE A’AI O LE ALOFA!

Ua tape e taalili e mavae le lamepa faavavau, ma ua ‘auaoa le metagofie o le Taulealea faalelagi i le pouliuli o le pefu. Ua ta’useseina le faauluuluga o tupu o le alofa e tagata saua, ma ua faafalepuipuia le lupe o le faapaiaina e mai’u’u o lulu. Ua faavavau ma oi ai tagata o nonofo i le maota o le mamalu ma ‘au a le lagi, a o lo o malolo pea outou i le malo o le faatamala, ma manatu ai o lo o lelei lava outou e pei o uo moni. E uiga ese le le aoga o a outou fuafuaga!

25

OUTOU E, E VALEA, A UA FAI SE IGOA IA POPOTO AI!

Aisea ua outou oofu ai i teuga a leoleomamoe, a o totonu o outou o luko fe’ai, ma ua outou foufoua ai La’u lafu? E pei lava outou o se fetu, e oso a’e a o le i tafa ata, e ui lava ina pupula ma susulu, ae ta’ita’i sese ai lava tagata malaga o Lo’u aai i ala o le malaia.

26

OUTOU E, E FOLIGA LELEI MAI A O TOTONU E LEAGA!

O outou e pei o le suavai manino ae oona, e matua manino pupula lona tino mai, peitai afai e tofotofoina e le Tautu-uaina faaleagaga, e leai lava se mataua e tasi e taliaina. Ioe, o le ave o le la e susulu tutusa i luga o le efuefu ma le faata, ui lea, e eseese i la’ua i le toe atagia atu, e pei lava o le eseese o le fetu mai le lalolagi: E leai, e le mafai ona fuatia le eseesega!

27

LA’U UO E, LO’U LALAOLAGI!

Manatunatu teisi! Ua e faalogo ea e mafai e le uo ma se fili ona nonofo faatasi I se loto e tasi? Tuli ese le tagata ese, ae se I ulu atu le Uo I Lona aiga.

28

LE ATALII E, O LE EFUEFU!

Sa Ou foa’i atu mo oe mea uma lava o lo o i le lagi ma le lalolagi, ae vagana ai le loto o le tagata, lea se Ou faia ma nofoaga o Lo’u matagofie ma le mamalu; peiti, ua e foa’ia Lo’u aiga i se tasi e ese i lo A’u, ma o taimi uma lava e sailia ai e le faifaaaliga o Lo’u faapaiaina Lona lava nofoaga moni, e maua atu lava i ai e Ia le tagata ese, ma ona o le leai o se aiga, ua faataalise atu loa o Ia i le lafitaga o le Pele. Ui lava i lea, ua Ou natia lau mealilo ma ua le mana’o ai ia faalumaina oe.

29

LE AANO E, O LE MANA’O!

E tele tafa o ata sa Ou liliu mai ai mai malo o le Nofoaga-valevalenoa i lou nofoaga, ma maua atu ai oe I luga o le moega o le faafifilemu o lo o vevesi ai ma isi tagata e ese mai i lo A’u. O lea, na pei ai o le emo o le agaga Lo’u toe foi atu i malo o le mamalu faalelagi, ma ua le ta’uta’uina ai lava lea mea i O’u nafoaga i luga i ‘au o le faapaiaina.

30

LE ATALII E, O LE FOA’IALOFA!

Sa Ou faia oe ia tino mai i mea le aoga o le valevalenoa faatasi ma le efuefu o La’u faatonuga, ma foa’iina atu mo lou a’oa’oina iota uma o le ola ma le aano o mea uma lava na faia. O le ala lea e te oe ni puna se lua o le suasusu mama, mata e vaavaaia oe, ma ni loto e alolofa ia te oe. Sa Ou faafaileina oe i lalo ifo o le ata o Lo’u alofa mutimutivale mai Lo’u alofa-agalelei, ma leoleoina oe e le aano o Lo’u alofa tunoa ma le finagalo lelei.

Ma o La’u fuafuaga i nei mea uma, ia mafai ai ona e taunuu atu i Lo’u malo faavavau, ma mafai ai ona ta’uaogaina mo A’u faavavau, ma mafai ai ona ta’uaogaina mo A’u faamanuiaga e le vaaia. Ui lea, o lo o tumau lava oe i le faatalatu, ma ina ua avea ma tagata matua, ua e faatamala loa i A’u foa’ialofa uma, ma ua e vevesi ai i ou lava mafaufauga vale, o le tulaga lea o le a e le toe manatunatu ai ma liliu ese ai mai faitotoa o le Uo, ae mafuta atu i totonu o lotoa o Lo’u fili.

31

LE POLOGA NOANOATIA E, O LE LALALAGI!

E tele lava tafa o ata na agi atu ai i ou luga le matagi malu o Lo’u alofa-agalelei, ma maua atu oe o moegase i luga o le moega o le faapalapala, faavauvau ia i lou iuga e toe foi mai pe afai e oo mai.

32

LE ATALII E, O LE LALOLAGI!

Afai o i ai A’u ia te oe, ia le toe sailia se tasi e ese mai i lo A’u; ma afai e te vaai mai i Lo’u matagofie, ona moe lea o ou mata aga’i i le lalalagi ma mea uma lava o i ai; aua o Lo’u finagalo ma le loto o le tasi e ese i lo A’u, e pei lava o le afi ma le vai, e le mafai ona nonofo faatasi i se loto e tasi.

33

LE TAGATA ESE FIA FAAUO E!

Sa tutuina le lamepa o lou loto e le aao a Lo’u mana, ia le tapeina e matagi ese o le manatu faa pito ma le tu’inanau. O le faamalologa o ou ma’i uma o le manatuaina lea o A’u, ia ‘aua lava nei galo. Ia faia Lo’u alofa ma au oloataua, ma ia faapelepeleina e pei o pei o lau lava vaaiga ma le ola.

34

LO’O USO E!

Faalogo mai ia i upu fiafia a Lo’u fofoga e pei o le mali, ma inu i le vaitafe o le faapaiaina faalelagi mai O’u laufofoga faaoloaina i le suka. Luluina fatu o le poto faaleagaga i le eleele mama o lou loto, ma faasusuina i latou i vai i le mautinoa, ina ia mafai e fuafetiitii o Lo’u malamalama ma le poto ona totogo a’e ma lauusiusi i le aai paia o lou loto.

35

TAGATANUU E, O LO’U PARATAISO!

O lima lava o le alofa-agalelei sa totoina ai I le faatoaga paia o le parataiso le laau mu’amu’a o lou alofa ma le fefaauoa’I, ma faasusuina ai I uaga lelei o Lo’u alofa tunoa agamalu; ua oo nei la I le itula e fua mai ai, finafinau ina ia mafai ona puipuia, ma ia le faaumatia foi o le mumu o le manao ma le tuianau.

36

A’U UO E!

Ia outou tapeina le lamepa o le sese, ae tutuina I totonu o outou loto le sulu faavavau o le ta’ita’iga faaleagaga. Aua e le o toe mamao ona leai lava lea o se tasi mea e taliaina e tagata faaali mealilo o tagata ola o luma o fofoga paia o le Tagata Viia, vagana ai le amio mama ma gaoioga e le ila o le faapaiaina.

37

LE ATALII E, O LE EFUEFU!

O tagata popoto o i latou ia e le tautala atu vagana ua latou faalogo muamua, e pei o le tautuuaina, e le mafai ona ofoina lana ipu seia vagana ua ia mauaina le tagata saili, ma le tagata alofa foi e le mafai lava ona alaga a’e mai le ta’ele o lona loto seia vagana ua ia vaai i le matagofie o lana pele. O lea ia luluina fatu o le poto ma le malamalama i le eleele mama o le loto, ma tausia faaliloina ai i latou, seia oo ina totogo a’e fugalaau fetiitii o le poto faaleagaga mai le loto ae le o le palapala ma le eleele.

O le ulua’i laina o le Tapeleti o lo o faamauina ma tusia ai, ma o lo o natia i totonu o le malumalu o le tapeneko o le Atua:

38

LA’U AUAUNA E!

Ia le lafoa’ia mo le mea e mavae le malo faavavau, ma ia le aveesea le mamalu faalelagi ona o le manaoga faale lalolagi. O le vaitafe o le ola faavavau lenei se tafe mai le vaipuna-eli o le peni a le alofa mutimutivale; amuia latou e feinu i ai!

39

LE ATALII E, O LE AGAGA!

Lepeti ia lou ofaga, ma ia avea e pei o le foenisi o le alofa ua lele a’e i le vanimonimo o le faapaiaina. Lafoa’i ia oe lava ma ia faatumuina i le agaga o le alofa mutimutivale, ia nofo mau ai i le malo o le faapaiaina faalelagi.

40

LE ATALII E, O LE EFUEFU!

Ia le faamalieina i le faigofie o le aso ua mavae atu, ma ia le vavaeesea oe mai le malologo faavavau. Ia le faatauina atu le faatoaga o le oliolo faavavau i le faaputuga-efuefu o se lalolagi mavae. Ea a’e mai lou falepuipui ma lele a’e i laufanua pupula i luga, ma ia e lele a’e i lau malaga i le parataiso o le Valevalenoa mai lou ofaga mavae.

41

LA’U AUAUNA E!

Faasa’oloto oe mai moanoataga o lenai lalolagi, ma tatalaina lou agaga mai le falepuipui o le manatu faapito. Taofi mau i lou avanoa, aua e le toe oo atu ia te oe.

42

LE ATALII E, O LA’U AUAUNA-FAFINE!

A na e vaai i le mamalu faavavau, semanu ua e taumafai e sopo atu mai lenei lalolagi e le tumau. Peita’i o le tau faalafia o le tagata mai ia te oe ae tau faaalia le isi, o se mealili lava e le mafai ona iloa e se tasi vagana le tagata e mama le loto.

43

LA’U AUAUNA E!

Faamamaina lou loto mai le lotoleaga, ma ia ‘alo’ese i le losilosi, ia ulufale atu i le lotoa faaleagaga o le faapaiaina.

44

A’U UO E!

Ia outou savavali i ala o le lotomalie lelei o le Uo, ma ia iloa o Lona lotomalie o lo o i totonu o le faamalieina o Ona tagata. O lona uiga: E leai se tagata e ulufale atu i le fale o lana uoseia vagana ua malie i ai lana uo,po o le tago atu foi ona lima i oloataua po o le faasili a’e foi lona manatu i lo lana uo, po o le taumafai foi ina ia faasili a’e o ia te ia. Manatunatu i lenei mea, outou e mafai ona manatunatu loloto!

45

LE UO E, LO’U NOFOALII!

Ia le faalogo i se leaga, ma ia le vaai foi i se leaga, ia le faatoilaloina oe, po o le oi foi ma tagiaue. Ia le tautala atu i se leaga ina ia e le faalogoina o tautalaina mai ia te oe, ma ia le faalaua’iteleina sese o isi ina ia le faatinoina ai le leaga tele o ou lava sese; ia e le manao e faatoilaloina se tasi ina ia le faalia ai lou lava faatoiloina. Ola lelei i aso o lou olaga, ona e sili atu ona itiiti i lo se taimi puupuu lava, ae i lou mafaufau e le faanenefu, lou loto e le eleelea, ou manatu mama, ma lou uiga faapaiaina, ina ia mafai ai ona e tuueseina i le sa’oloto ma le malie lelei lenei tino mavae, ae faafouina i le parataiso lilo ma nofo mau ai i le malo tumau e faavavau.

46

OI TALOFA! OI TALOFA! I TAGATA E MANAMEA I LE MANA’O O LE LALOLAGI!

Pei lava o le emo o le uila lo outou pasia o le Tagata Peleina, a o tuuina atu outou loto i faiga faasatani. Ua tootuli outou tulivae i outou mafaufauga le aoga, ma ta’ua o le mea moni. Ua outou liliu atu outou mata i le laau talatala ma faaigoaina o se fugalaau. E leai lava se manavaga mama ua outou manavaina, po o se matagi foi o le matua vavaeesea ua agi mai fanau laugatasi o outou loto. Ua outou lafoa’ia i matagi lapataiga alofa a le Peli, ma matua solia atoatoa i latou mai le tapeleti o outou loto, ma ua pei ai lava o manu vaefa o le fanua, ua outou o ese ae tuua outou ola i totonu o laufanua o le moomoo ma le tu’inanau.

47

LE’AU USO E, I LE ALA!

O gafea lava ua outou faatamala ai i le ta’uta’uina o le Tagata Peleina, ma taofia mamao ai mai Lona faatasi mai paia? O le aano o le matagofie o lo o i totonu o le fale’ie e leai sona tusa, o lo o tu i luga o le nofoalii o le mamalu, a o lo o vevesi lava outou i faamaliega le aoga. O lo o manavaina manogi lelei o le faapaiaina, ma o lo o agi mai foi le manavaga o le foaialofa, peta’i o lo o outou matua puapuagatia lava ma ua vavaeese mai ai. Oi talofa ia te outou ma i latou o lo o savavali i outou lava ala ma mulimuli atu i outou lava tulagavae.

48

LE FANAU E, A LE MANA’O!

Ia tuu ese le ofu o viiga le aoga, ma ia outou o ese mai le ofu o le faasausili.

I lona tolu o laina aupito silisili ona paia sa tusia ma faamauina I le Tapeleti o le Maa Soama e le peni a le lemavaaia, o lo o faaalia ai le mea lenei:

49

LE’AU USO E!

Ia faapalepale le tasi i le isi ma ia le tuuina atu lo outou alofa i lalo nei. Ia le faafefeteina outou i lo outou mamalu, ma ia le faalumaina i le faato’ilaloina. Ona o Lo’u matagofie! Sa Ou faia mea uma lava mai le efuefu, ma o le efuefu Ou te toe faafoisia i ai i latou uma lava.

50

LWE FANAU E, O LE EFUEFU!

Ta’u atu i tagata mau’oa le oi i le vaeluaga o le po o tagata matitiva, ina ne i ta’ita’ia i latou e le loto-ma’a’a i le ala o le faafanoina, ma vavaeesea ai i latou mai le Laau o le Tamaoaiga. O le foa’i atu ma le matamau o ta’u ia o A’u; amuia le tagata e faapaleina ia i A’u amiolelei.

51

LE AANO MONI E, O LE TU’INANAU!

Tuu ese le matape’ape’a uma ae saili atu le faa malieina; aua o le matape’ape’a sa faatoina mai le vavau, a o le faamelieina sa pele ma viia e faavavau.

52

LE TAMA E, A LA’U AUAUNA-FAFINE!

Ia le popole i le mativa po o le faamalieina foi i le tamaoaiga, aua o le mativa e tua i le tamaoaiga a o le tamaoaiga e tua i le mativa. Ui lea, o le mativa i mea uma vagana ai le Atua o se meaalofa matagofie, ia le faaitiitia lona taua o i ai, aua e oo lava ina faatamaoaigaina ai oe i Atua i le iuga, ona mafai loa lea ona e iloa le uiga o le folafolaga, “ O le mea moni o outou e matitiva,” ma upu paia, ” O le Atua o le puleaoao-uma, “ e avea ai e pei o le taeao moni ua malama a’e i le pupula mamalu i luga o le tafatafa’ilagi o le loto o le pele, ma nofo mau ai i le saogalemu i luga o le nofoalii o le tamaoaiga.

53

FANAU E, A LE FAATAMALA MA LE TU’INANU!

Ua outou faatagaina Lo’u fili e ulufale atu i Lo’u fale ae tuliesea La’u uo, ona ua outou ofaofata’ia le alofa i le isi- na i lo A’u i o outou loto. Faalogo mai ia i upu a le Uo ma liliu atu i Lona parataiso. O ou faale lalolagi, o lo o saili i lo latou lava lelei, e tino mai e alofa fia fai mea, ae o le Uo moni o lo o alofa ma o le a alofa pea lava ia te outou mo lo outou lava lelei; o le ala lea o le puapuaagatia o Ia i le ta’ita’iga o outou mai puapuaga e le faitaulia. Ia le agaleaga i se Uo faapena, ae sili ona faataalise atu ia te Ia. O le fetu-ao lena o le upu faamaoni ma le anaana moni, sa tafa a’e i luga o le tafatafa’ilagi o le peni a le Alii o suafa uma lava. Faalogo mai ia outou taliga ina ia mafai ona outou lagona le afioga a le Atua, le Fesoasoani i puapuaga, o le Soifua-Ia lava.

54

OUTOU E, UA OUTOU MITAMITA I ‘OA MAVAE!

Ia outou iloa ma le mautinoa o le tamaoaiga o se to’atuga tele lea i le va o le tagata saili ma lona manao, le tagata alofa ma lana pele. O tagata tamaoaiga vagana lava sina toaitiiti, ae le mafai lava ona taunuu atu i le lotoa o Lona faatasi mai po o le ulufale atu foi i le aai o le faamalieina ma le toefuata’i. Amuia lava le tagata o lo o tamaoaiga ae le o taofia ai o ia e ana ‘oa mai le malo faavavau, po o le vavaeesea foi e nei ‘oa mai le malo e le faaumatia.Ona o le Suafa Aupito Sili! O le pupula o se tagata tamaoaiga faapea o le a faapupulaina ai tagata o lo o nonofo i le lagi, e pei lava ona faapupulaina e le la tagata o le lalolagi!

55

OUTOU E! TAGATA MAU’OA O LE LALALAGI!

O tagata matitiva o lo o i ai ia te outou o La’u tausiga; ia outou leoleoina La’u tausiga, a

ia le fuafuaina na o mea e maua ai lo outou solosolo lelei.

56

LE ATALII E, O LE TU’INANAU!

Ia faamamaina oe mai le faaleagaina e le tamaoaiga ma ia sopo atu i le malo o le mativa i le filemu atoatoa; ina ia mafia ai ona e ina i le uaina o le ola faavavau mai le vaipuna-eli o le matua faatoina.

57

LO’U ATALII E!

O le mafuta i le tagata amioleaga e faateleina ai le faanoanoa, a o le mafuta ma le tagata amiotonu e faamamaina ai le ‘elea mai le loto. O le tagata e saili atu ia mafuta ma le Atua, e tatau ia te ia ona tuuina atu o ia lava i le mafutaga a Ona tagata peleina; ma o le tagata foi e manao e faalogo atu i le afioga a le Atua, ua tatau ia te ia ona ua’i atu le faalogo o upu a Ona tagata filifilia.

58

LE ATALII E, O LE EFUEFU!

Ia oe! Ia le savavali ma le tagata amioleaga ma ia le saili atu e faaua ma ia, aua o le mafutaga faapena e liliuina ai le pupula o le loto i se afi mata’utia.

59

LA TAMA E, A AL’U AUAUNA-FANINE!

Afai e te saili atu i le alofa tunoa o le Agaga Paia, ulufale atu i le mafutaga ma le tagata amoitonu, aua o ia lena sa inu i le ipu o le ola faavavau mai lima o le Tautu-uaina tumau, ma ua pie ai o se taeao moni e faaolaina ma faapupulaina ai loto o tagata ua oti.

60

TAGATA FAATAMALA E!

Ia le manatu e mafai ona natia mealilo o lo o i loto, e leai lava, ia outou iloa i le mautinoa lelei, o lo o tusia ma faaalia manino mai i latou i mata’itusi matamata tetele i le Faatasi Mai paia.

61

Uo e!

E moni Ou te fai atu, so e se mae lava tou te faaliloina i totonu o outou loto, o lo o tatalaina ma faaalia manino ia te Matou e pei o le aoteatea; ae o le mea o lo o natia o le Matou alofa tunoa ma le foa’i ae ua le tatau ona outou mauaina.

62

LE ATALII E, O LE TAGATA!

O se mataua mai le vasa e le gafatia o Lo’u alofa mutimutivale sa Ou faamaligi atu i luga o tagata o le lalolagi, peita’i e leai lava se tasi na maua o liliu atu i ai , e pei lava o le liliu ese o tagata uma mai le uaina faalelagi o le aufaatasiga, aga’i atu i ‘alu leaga o le amioelelea, ma faamalieina i le ipu e mavae, ae tuu ese le ipu o le matagofie tumau. E faatauvaa lava le mea ua faamalieina ai o ia.

63

LE ATALII E, O LE EFUEFE!

Ia le liliu ese ou mata mai le uaina e le faatusalia a le Pele faavavau, ma ia le tatalaina atu foi i ‘alu leaga ma le mavae. Tago atu e aumai mai lima o le Tautu-uaina faaleagaga le ipu o le, ola tumau, ia avea ai le poto uma lava ma oe, ma mafai ai ona e faalogo atu i le leo lilo o lo o valaau mai i le malo o le le vaaia. Alaga leotele ia, outou e o lo o faatauvaa fuafuaga! O gafea ea ua outou liliu ese ai mai La’u uaina paia ma le tumau i le vai e mavae?

64

OUTOU E, TAGATA O LE LALOLAGI!

Ia iloa lelei o lo o mulimuli atu ia te outou se mala ‘ailililo ma o lo o faatalitali mai foi mo outou se siifua mata’utia. Ia le manatu foi e mafai ona faaliloina gaoioga sa outou faia i La’u silafaga. Ona o Lo’u matagofie! O a outou gaoioiga uma o lo o tusia i La’u peni i mataiitusi manino i luga o tapeleti o le maa soama.

65

TAGATA FAASAUA E, I LE LALOLAGI!

Ia aveese outou lime mai sauga, aua ua Ou tauto A’u lava e le faamagaloina so o se amioletonu a se tagata. O La’u feagaiga lenei sa Ou toe faatulafonoina maumaututu i le tapeleti faasaoina ma faamaufaailogaina au i La’u faamaufaailoga o le mamalu.

66

TAGATA FOUVALE E!

O Lo’u faapalepale ua faama’a’aina ai outou ma Lo’u puapuaga-faaumiumi ua outou faatamala ai, o le tulaga lena ua outou faaoso ai i se osofaiga mata’utia o le tu’inanau i ni auala leaga e tau atu i le malaia. Ua outou fuatia ea o A’u e le manatunatu po o A’u e le malamalama?

67

TAGATA AUMAU E!

Sa Ou faia le laulaufaiva mo le ta’uta’uina o A’u, ia le faaleagaina i le taufaaleaga. Afai ua faatoilaloina outou i le afi o le manatu faapito, ia manatua outou lava sese, ae le o sese o O’u tagata, e pei lava ona iloa lelei e outou taitoatasi uma lona lava tagata e sili atu ai i lo le iloa e ia o isi.

68

LE FANAU E, O MANATU FAAULAULA!

Ia loa lelei, a o gafoa a’e le tafaoata pupula i luga o le tafatafa’ilagi o le faapaiaina faavavau, o mealilo faasatani ma gaoioiga sa faia i le pouliuli o le po o le a faailoaina ma faaalia i luma o tagata o le lalolagi.

69

LE VAO E, NA TOTOGO A;E I LE EFUEFU!

Aisea na le ulua’i tago ai ou lima eleeleanei i lou Lava ofu, ma aisea ua e saili mai ai i lou loto ua Faaleagaina i le manao ma le tu’inanau e fia mafuta Ma A’u, ma fia ulufale mai I Lo’u malo paia? E Mamao, mamao lava outou ma le mea o lo o outou Mananao i ai.

70

LE FANAU E, A ATAMAU!

O upu Paia ma gaoioiga mama ma le lelei e alu a’e ai i le lagi o le mamalu faalelagi. Finafinau ina ia mafai ona faamamaina a outou gaoioiga mai le pafu o le manatu faapito ma le pepelo, ae maua le finagalo alofa ile lotoa o le mamalu; aua e le o toe mamao ona leai lava lea o se tasi mea e taliaina e tagata faaali mealio o tagata ola iluma o fofoga paia o le Tagata Viia, vagana ai le amiolelei atoatoa ma gaoioga o le le gaoia e le ila. O le fetu-ao lava lenei o le poto ma le mealilo faaleagaga sa susulu mai i le tafatafa’ilagi o le finagalo faaleagaga. Amuia i latou ua liliu atu iai.

71

LE ATALII E, O LE FAALE LALOLAGI!

E manaia le malo o le ola, pe afai e te taunuu atu i ai e mamalu le malo faavavau, pe afai e mafai ona e sopo atu i tala atu o le lalolagi mavae; e suamalie le ootia paia pe afai e te inu i le ipu lilo mai lima o le Taulealea faalelagi. Afai e te taunuu atu i lenei tulaga, o le a e sa’oloto mai le malia ma le oti, mafatia ma le agasala.

72

A’U UO E!

Ia outou toe manatunatu lava i le feagaiga sa outou Osia ma A’u i luga o le Mauga o Parana, o lo o tu tonu i laufanua paia o Samana. Sa Ou avea ai ma molimau le ‘au paia i luga ma tagata o lo o nonofo i le aai faavavau, ui lea e leai lava se tasi ua Ou mauaina o faamaoni i le feagaiga. O se faasausili Lava ma le fouvale sa tineia ai le feagaiga mai lot, i Se tulaga e leai ai lava se faailoga o toe totoe ai. Ui Lava ina iloa lenei mea, Ou te faatalitali pea ma o le A le faaumaina lava.

73

LA’U AUAUNA E!

E pei oe o se pelu ma’ai pupula o lo o lafita’i i totonu o le pogisa o lona faamoega, ma o lo o lili ai lona aoga i le poto o le tagata na faia. Aisea ua le sau ai fafo mai le faamoega o le manatu faapito ma le mana’o, ina ia mafai ai ona faapupulaina ma faaalia lou aoga i le lalolagi.

74

LA’U UO E!

O oe o le fetu-ao o lagi o Lo’u faapaiaina, ia le Faagasetotoina lou pupula e le leaga o le lalolagi. Saeula i lalo le iepuipui o le lotoma’a’a, ina ia mafai ona e manu a’e mai tua o ao ua faapupulaina ma faaofuina mea uma lava i le ofu o le ola.

75

LE FANAU E, A LE MAMALU- VALEVALENOA!

Ua outou lafoa’ia Lo’u malo e le faaumatia i se mamalu e mavae, ma ua teuteuina outou i le togiga matagofie o le lalolagi, ma avea lea ma mitamitaga ia te outou. Ona o Lo’u matagofie! O le a Ou aofa’ia lanu uma i lalo ifo o le lauluga lana-tasi o le efuefu, ma solia ai lanu eseesa vagana ai i latou e filifilia La’u lanu, ma o le lena lanu ua faamamaina mai lanu uma lava.

76

LE FANAU E, A LE FAATAMALA!

Ia le tuuina atu lo outou alofa i le mamalu e mavae ma ia le mitamita ai. O outou e pei lava o le manulele e le faautauta, i le mautinoa atoatoa o lo o pese ai i luga o le lala; seia oo lava ina faafuase’i ona mate i le fanamanu o le Oti ma taatia ai i luga o le efuefu, ona mou atu lea o le leomalie, tino ma le lanu, e leai se mea e toe totoe. O le mea lea ia utagia ai, pologa-noanoa-tia e, o le mana’o.

77

LE TAMA E, A LA’U AUAUNA-FAFINE!

O le taitaiga sa avatua pea lava i upu, a o nei ua avatua i gaoioiga. E tatau i tagata taitoatasi uma lava ona faaalia gaoioiga mama ma le paia, aua o upu o le meatotino e tutusa ai tagata uma, ae o gaoioiga ia e pei o nei e faasino tonu lava i tagata peleina a i Matou. Taumafai ia i le loto ma le agaga ina ia faailogaina outou ona o a outou gaoioiga. O le uiga lenei ua Matou fautuaina ai outou i lenei tapeleti paia ma le pupula.

78

LE ATALII E, O LE FAAMASINOGATONU!

Ua toe faafou i le tau o le matagofie o le Tagata faavavau mai le tumutumu lanulau’ava o le faamaoni i le Faifaaaliga o le Taitaiga ( Sadratu’l- Muntaha ), ma sa tagi ai i se auega tele na mafua ai Ona fetagisi le ‘au paia i luga ma tagata o lo o nonofo i malo i luga ona o Lana auega. O lea na oo ina fesiligia, ai, O le a lenei auega ma le tagisaga? O Ia lava sa tali: E pei ona faatonuina sa Ou faatalitali mai lava ma le mautinoa i luga o le maupu’epe’e o le faamaoni, ae leai lava se manogi o le faamaoni sa manavaina mai ia te i latou o lo o nonofo i luga o le lalolagi. Ona valaauina lea e toe foi mai ma sa Ou vaaia ai, faauta! O nisi lupe o le faapaiaina sa taumafai ma le tiga i mai’u’u o ta’ifau o le lalolagi. O lea na faataalise atu ai i le faaalia ma le pupula la Taupou o le lagi mai Lona maota lea i ai vagana ai le toatasi. Ina ua tauanauina, ona ta’u mai ai lea o le ulua’I mata’ituai, lea na mafua ai ona faataalisa atu I fafo mai o latou nofoaga mamalu tagata o lo o nonofo i afeafe faalelagi. Ina ua ta’uina atu le mata’itusi lona lua ona latou pa’u’u lea i lalo i luga o le efuefu, i latou uma lava taitoatasi. O le taimi lava lena sa faalogoina ai se leo mai le loa tuloto lava: “ O le mamao lena ma e le toe sili atu.” E moni Matou te molimau atu i le mea lena s alatou faia ma o lo o faia nei lava.

79

LE TAMA E, A LA’U AUAUNA- FAFINE!

Ina ia mai le laulaufaiva o le alofa muti,utivale le vaitafe o le mealilo faaleagaga, ma ia iloa mai le puna-aso o le folafolaga faaleagaga le pupula le’auaoa o le fetu-ao o le poto. Luluina fatu o lo’u poto faaleagaga i le eleele mama o le loto, ma ia faasusuina i latou i vai o le mautinoa, ina ia mafai ai e fugalaau fetiitii o le poto ma le atamai ona totogo lauolaola a’e ma lauusiusi mai le aai paia o le loto.

80

LE ATALII E, O LE MANA’O!

O le a le umi o lau lele a’e i malo o le mana’o? O apaau sa Ou tuuina atu ia te oe, ina ia mafai ai ona e lele atu i malo o le faapaiaina lilo ae le o itumalo o faiga faasatani. O le selu foi sa Ou tuuina atu ia te oe ina ia mafai ai ona teuina o O’u lauulu leveleve, ae le o le faatauma’oia ai o La’u faa’i

81

A’U AUAUNA E!

O outou o laau o La’u faatoaga; e ao ona outou fua mai i fua lelei ma le matagofie, ina ia outou manuia ai lava outou atoa foi ma nisi. Tagata ea o le malamalama, ua tuuina atu nei i tagata taitoatasi uma ina ia faia galuega tau lima ma faiva uma, aua o lo o i ai iina le aano moni o le tamaoaiga. Aua o le totogi e faalagolago i galuega, ma o le alofa tunoa o le Atua e aoao-uma mo outou. O laau e le fua mai sa tatau ma o le a tatau pea lava mo le afi.

82

LA’U AUAUNA E!

O tagata aupito maualalalo o i layou lava ia e le fua mai ni fua i le lalolagi. O tagata ia ua faitauina e pei lava o tagata oti, ae le gata i lea, e sili atu tagata oti i le silafaga a le Atua i lo tagata valelea ma le le aoga.

Bahá'u'lláh

Windows / Mac