Return   Facebook

The Universal House of Justice

Ridván 2002

To the Bahá’ís of the World

Dearly loved Friends,

Ukiut ilusilersorfiusut ataqatigiiffiisa tallimassaata aallartinnerani Upperisap iluani avataanilu pisut pitoraatiinnavissut takusassaapput uissuumminanngitsuunngitsut. Siunertap iluani, majimi kingullermi Karmelip Qaqqaani sanaartukkat oqaluttuarisaanermut pingaatuteqaqalutik naammassineqarnerisa Bahá’í-tut sammisaqartarnermi aatsaat taama tusagassiutitigut samminnittoqartigaaq alutornarluinnarnerilu tamanut takusassianngorlugit pilertoqisumik satellitsikkut aqqutit aqqutigalugit nunarsuaq tamakkerlugu siammartiterneqarput. Uissuumminaannartumik kusanarluinnassuseqarlutik nunarsuarmiut isaannut

Karmelimut Allakkami allanneqarsimasuni takussutissatut saqqummernerini, Bahá’u’lláh-p Siunertaa malunnaatsuuffimmiit tamanut sassariartuinnarnera pisserujussuarporlusooq. Upperisap oqaluttuassartaanut pisoq tamanna imungarsuaq asinngartussaanngitsoq malunnarpoq.

Upperisatta saneqqutiinnarneqarsinnaanngitsup uumassuseqarluassusiata qallikkut taamatut takussutissaqartitsivigineqarnera aamma ingiorteqarpoq siorna Ridvánimi Ukiunut Tallimanut Pilersaarusiap aallartinneqarneraniilli Upperisap iluani pisorpassuarnik. Taamaammat kiminneqarpugut Nuna Tamakkerlugu

Ataatsimeersuarnernut aallartitat aammalu Bahá’u’lláh-p malinnittai nunarsuarmi sumiikkaluartut tamaasa kaammattussallugit Pilersaarutip atuutileramili ukiuani siullermi pisimasut pingaarnerit kimittunerusut isumaliutiginerini peqatigeqqulluta - - pisut pingaarnerit tamakku uummammik

iimmatsitsinngitsoorsimanngillat Pilersaarutillu ingerlaarfianut annertuumik ilimanaateqarluartumut tatiginninnermik annertuumik pilersitsinngitssoorsimanatik.

Ridván sioqqullugu kingornagullumi Nunat Tamakkerlugit Anersaakkut Isumasioqatigiiffiit Siunnersortillu piumasaqaatinut qisuariarnissamut kajumissuseqarluarlutik pilersaarusioqatigiittarlutik ataatsimiittarsimapput. Ataatsimiinnerit taakku Pilersaarutip uummaarissumik aallartilluarneranut sunniuteqarsimapput amerlasoorsuakkuutaarlutillu isaalersussat piareersarneranni nutaamik tamatumuunakkut ingerlaffissaqalersimavoq. Nunat immikkoortut tamarmik Bahá’í-tut aqutsisoqarfiit nunagisartik immikkoortukkuutaanut aaqqissuuteqqissaakkamik avititerlugu aallartissimavaat, taakkulu immikkoortukkuutaat piviusorpalaartumik ineriartortitsivigalugu suliffigineqarsinnaanissaat aaqqissuunneqarluni. Nunat maanna taamatut aaqqissuisimasullutik nalunaartut 150-it pallereerpaat, tassalu taamatut sulineq aqqutigalugu aaqqissuussaalluakkamik nunap iluani Upperisamik siammartiterineq tunngavilersuinerlu periarfissanngorpoq. Maannalu takorlooruminarsivoq nuna tamakkerlugu immikkoortukkuutaartumik ineriartortitsineq qanoq ingerlassanersoq. Tamannalu aqqutigalugu nunap immikkoortui suli iserfigineqanngitsut siusinnerusukkut iserfigissallugit pilersaartarsimanertulli pioner-iuffigissallugit anguniagaqarfinngorsimapput. Nunap immikkoortui iserfigineqareersimasuniittut iluminni ineriartornissaq aallutissavaat Pilersaarutip tunngaviusumik toqqammavigisai imminnut nukittorsartartussat pingasuusut tunaartaralugit, tassa; inuk, aqutsiviit nunaqqatigiillu.

Neriuuteqarluarnarpoq takullugu suliaq tamanna nukissamik tuniorarneqartoq institutsit sungiusarfiit ingerlannerat aqqutigalugu, tamanna siorna malunnartumik nukittortinneqarpoq nunat arlallit sungiusaasussanik amerlisaaniarlutik ilungersuuteqareermata.Insitutsit sungiusarfiit tunngavilerluarneqarsimagaangata ingerlaavartuartuuppatalu, sammisat qiteraliusutut taaneqarsinnaasut pingasut ukuusut; ilinniaqatigiittarnerit, qinoqatigiittarnerit meeqallu klassii,

ajornannginnerusumik amerliartulertortarput. Ilumummi sammisanut taakkununnga suli uppertunngorsimanngitsut ikinngutiminnit Bahá’í-nit kaammattorneqartarlutik paassiniaaniarlutik peqataasartut amerliartorneri, suliaq taanna nutaamik siunertaqalersissimavaa, uppertunngortartullu taamaalillutik amerlisarlutik. Tassani ippoq ilinniartitsilluni sulinermi aqqut ilimanaateqarluartorujussuaq. Qitiusutut sammisaqarfiit taakku aallaqqaataani uppertunut iluaqutissatut pilersinneqaqqaaraluarsimasut, maanna amerlasoorsuakkuutaarlutik isaalersussanut isaaffissuartutullusooq ilersimapput. Ilinniaqatigiittarnerit, qinoqatigiittarnerit meeqqanullu klassit taakku nunap immikkoortitersimanerinut anguniaavissanut ikkukkaanni taava iliuuseqarnissamut aqqutissaq ataqatigiissoq pilersinneqassaaq maannakkullumi amma tikiluaqqunaqisunik inerneqartitilereerluni. Periuseq taamaattoq nunarsuaq tamakkerlugu atuutsilerneqarpat, qularinngilarput Siunertap ukiuni aggersuni ineriartornissaanut periarfissarpassuarnik pilersitsissasoq.

Pisut ilimanaateqarluartut tamakkua suli kimittortinneqarsimapput Nunarsuaq Tamakkerlugu Ilinniartitsinissamut Qitiusoqarfiup nukiit annertuut atorlugit nunani tamalaani aaqqissuussaasumik ineriartortitsinerup suussusianik

paasisitsiniaareerneratigut. Siunnersortit Ikiortaasa nutaat qanittumi toqqarneqarneri iluatsillugit Ilinniartitsinissamut Qitiusoqarfik nunat immikkoortuini paasisitsiniaalluni ataatsimeersuartitsinerit 16-it aaqqissuussimavaat. Taakkununngalu tamanut najuukkiartortarsimapput Qitiusoqarfiup ilaasortai marluk. Qulequtaq ”institutsit sungiusarfiit aaqqissuussaasumillu ineiartorneq” tunngavigalugu ataatsimeersuarnerit, nunarsuaq tamakkerlugu Siunnersortit Ikiortaanik tamangajalluinnarnik peqataaffigineqartut, paasissutissarpassuarnik tunioraaviusimapput, Siunnersortillu Ikiortaasa qasusuillutik sulisarnermikkut Bahá’í-eqatigiit tamakkerlugit pitarlugillusooq siammaavigiumaarpaat.

Bahá’í-eqatigiit taama peqareeqisut, misilittagaqarluartut, iliuuseqarfigissallugulu pilersaarusiamik Guutimit kiminneqarsimasumik aallussittuinnartut nunarsuarmik avatangiiseqarput majilli 2001-ip kingorna Nunami Iluartuutitami pisoqareernerata kingorna suli paatsiveerunnerpassuit marulluannut kiviartuinnartumik. Taamaattoq tassa atukkat taakkua kajungernanngikkaluaqisut qeqqanni Siunertaq siuariartussasoq sikkeralissasorlu ilimasaarutigineqareersimavoq. Katersaarsuit Naalagaata qaaqqusinera, Bahá’u’lláh-p nunarsuarmi kunnginut naalakkersuisunullu allagaasa tulutuunngorlugit tamakkerlugit nutserneqarsimalernera, piffissamut matumunnga tulluuppoq eqqaassusiillunilu qanoq naapertuilluanngitsumik iliorneq, naakkittaatsuliorneq ileqqorlunnerlu pillugit Mianersoqqussutai tusarneqanngippata kingunerlutitsisoqarsinnaatiginerinik. Inuit sumiikkaluartulluunniit isumaannut amiilaartitsisarnersuit maanna atuuttut erseqqissaannarpaat katsorsaat Taassuma atoqqusaa qanoq pisariaqarluinnartigilersimasoq. Uagut inooqatigiinnguakkuutaarluta Tassunga aalajaalluta kiffartortuusugut maanna ullunut akiorneqarsinnaanngitsumik periarfissiilluartunut apuussimalerpugut – ilinniartitsinissamut periarfissinneqarluta, Aaqqissuussaa tupinnartoq ilusilersussallugu, timikkullu pisariaqartitat pisariaqarluinnartut, anersaakkut iliuuserisassat ineriartortitassallu pinngitsoorsinnaanngisaat, pilliuteqarluta tunissuteqarfigalugit.

Pisussaaffik qimarratigisinnaanngisarput tassaavoq maannakkut uivernersuaq, ersissuteqarata nangaassuteqaratalu, atorluassagipput, Nalunaarutip nunarsuarmik eqqissisitsisinnaasutuap nutaanngortitsisinnaasullu, tamanut tamaanga siammarterneranut takutitsissutigineranullu. Kusanassutsip Pilluaqqusaasup oqaatsinik kimittuunik pisuttorsarlutalu qulakkeerusersimannginnerpaatigut? ”Nunarsuarmi pisut aliattaatigeqinasigit” Asannilluni siunnersuivoq ”Guuti pillugu uppernarsaavunga” nangillunilu ”Nuannaarnerup imarsuata ornillusi ilissinnut najuunnissaminut kipisangaarpoq, sunami ajunngitsoq tamarmi ilissinnut pinngortitaavoq, aammalu piffissat pisariaqartitsinerat naapertorlugu ilissinnut saqqummiunneqartarumaarpoq.”

Qularnernit akornuserteqarasi, persaqutinik assersorneqarasi siumut qerlortoruugitsi, Pilersaarut assassinniitillugu.

 

Windows / Mac