The Universal House of Justice
Ridván 2009
To the Bahá’ís of the World
Dearly loved Friends,
Ukiut pingasuinnaat matuma siorna Nunarsuaq Tamakkerlugu Pilersaarusiap kingulliup naanerani iliuuseqarnissamut sinaakkutissiaq ersarilluinnarluni saqqummertoq atorluaqqullugu Bahá’í-t silarsuaannut kaammattuutigaarput. Qisuariarneq neriuutigisatsituut ingerlaannaq taamani malunniuppoq. Ikinngutit sumiikkaluartulluunniit kajumeqalutik ineriartornissaq anguniarlugu sukumiisumik aallussivissat nunarsuaq tamakkerlugu eqimattakkuutaat 1.500-jut pilersippaat, amerliartuinnartuarsinnarsimallutillu. Taamaattoq arlaannaataluunniit taamani takorloorsimagunanngilaa Katersaarsuit Naalagaata Ilisimassutsini killissaanngitsoq aqqutigalugu piffissap taamak sivikitsigisup ingerlanerani inooqatigiit Malinnitsini qanoq allanngortinniartigalugit pilersaarutigisimanerai. Sunaaffa inooqatigiit siunertaqarluartut imminnullu tatigilluartut Pilersaarusiaq qiterpaartorlu nalliuttorsiornialermata, nunarsuaq tamakkerlugu nunat immikkoortukkuutaavini 41- uusuni ataatsimeersuarlutik! Nukik ataqatigiiaassuserlu taamatut takutinneqartoq tupinnaannartumik nunarsuarmut uiverfiulluni ajornartuuleruttorluni paatsiveerusimaarlunilu paatsuungaleruttortumut illuatungiliulluinnartuuvoq! Ilumummi taakku tassaapput Sernissuisup oqaatigisimasai tipaatsunnerup inooqatigiivi. Inooqatigiit taakku piginnaanermik isorartoorsuarmik tunineqarsimanerminnik ilisimannittuupput, nunarsuarmut sequmissimasumut nappaqqiinissamut pinngitsoortussaanngitsumik iliuuseqartuunissaminnik ilisimannilluartut. Inooqatigiit taakku qummut ingerlaartuupput, naak nunarsuatta ilaani sakkortoqisumik naqisimaneqaraluarlutik, tunniutiinnaratik annilaarsimassuseqaratillu ataatsimut kattusimallutik piginnaasatik annertusartuarpaat Bahá’u’lláhp siunertaa inuiassuarnik naqisimaneqarnerup naalliunnarnerpaap tiguaasimaneranit aniguisitsisussaq sulissuttuarlugu. Ataatsimeersuarnernut najuukkiartortut 80.000-it missaanniittut tamarmik akornanni takuarput oqaluttuarisaanermi pisussanut qaqugumut eqqaamaneqartussat saavanni uppertoq saqqummeriartulersoq, Pilersaarusiap sakkussaasa periusiisalu kinguneqarluarluni kimeqassusiinik upperinnilluinnartuusoq taakkulu piviusunngortinnissaannut piginnaassuseqarluinnartuusoq. Najuuttut tamakku imarsuartut illutik amerlassuseqartut akornanni tarneq kinaagaluartorluunniit Upperisap nukinganut allannguisinnaasumut uppernarsaasutut qeqarpoq. Tamarmik minitaqaratik uppernarsaataapput Bahá’u’lláhp neriorsuutaanut, kinaluunniit qilersorsimassuseqarani ilumoortuulluni nikuissappat Nammineq ikiorumaaramigit. Tamarmittaaq minitaqaratik qarsupikkaluamilluunniit takussutissaapput pinngortitanut tunniusimasunut sapiitsunullu, minguitsuusunut iluartuusunullu, kinguaariiaat taarseraattuarneranni Bahá’u’lláhp Saqqummernerata toqqaannartumik sunniineranut ineriartortuartussatut aalajangikkanut.
Taakkunanittaaq takugujarput Pilersaarusiap aallartilernerani Upperisap pilersitsisinnaassusermik sunniinera aqqutigalugu inunnut hunnorujutuusintilikkaanut institut-inik ingerlatseriaaseq aqqutigalugu siammaajumaartussatut neriuutiginnilluta unnernitta piviusunngorfissaattut nalunaaqutaasut siulliusut. Tamakku tunngavigalugit takussutissaalluartutut isigaarput Ridvánip naanerani nunarsuaq tamakkerlugu ineriartornissaq anguniarlugu sukumiisumik aallussivissat 1.000-issaat pilersinneqarumaartoq. Nalliuttorsiornerup matuma nuannaarnarnerpaap aallarnisarneqarnerani allamik iliorsinnaasorinngilagut taamaallaat maniguulluta Guutip saavani sikissalluta, Aqqillu Annersaannik malinnittunut killeqanngitsumik tukkungaassusianut qutsavigingaarlutigu.
- The Universal House of Justice