The Universal House of Justice
Ridván 2020
To the Bahá’ís of the World
Dearly loved Friends,
Pissutsit piviusut appakaakkiartortut marlussuit pissutigalugit oqaatsit makku ilissinnut tusarliutissallugit kiminneqarsimavugut. Piviusoq siulleq tassaavoq coronavirusimik tunillaassuunnerup nassatarisai aarlerinartut amiilaarnartullu nunarsuaq tamakkerlugu paasineqariartuinnalersut. Nunani amerlasuuni, naak ajunaarnersuaq pinngitsoortinniarlugu sapiitsoqaluni aalajangiusimaqalunilu peqatigiissumik iliuuseqartoqarniartaraluartoq, pissutsit maannakkut pisut ilungersunarsereerput, ilaqutariinnut inunnullu ataasiakkaanut alianaqisunik kinguneqartartumik inuiaqatigiiusullu tamakkertaarlugit allaat ajornartoornermut naloriunneqartarlutik. Naalliuutit aliasuutillu immap maliisullusooq sumiiffinniit sumiiffinnut qaartarput, nunallu assigiinngitsut sanngiillisissallugit, piffissani assigiinngitsuni, pissutsini assigiinngitsuni.
Piviusut aappaat, ullullu tamaasa malunniukkiartuinnartoq, tassaavoq Bahá’ít silarsuaat pinertoqisoq annikillisimanngeqisorlu uummaarissuseqarluni oqaluttuarisaanermi eqqaamaneqartuni unammillernartup aatsaat taama annertutigisup saavaniilersimasoq. Qisuariarsimanersi immikkuullarilluinnarsimavoq. Qaammat kingulleq Naw-Rúzip nalaani allaffigigatsigit, piukkusseqaluta taakkartorparput inooqatigiiusutut naak nalinginnarmik sammisarisartakkassinni akorngusersorneqarsimagaluarlusi ajasoornaqisumik piginnaaneqartuususi. Sapaatit akunnerisa taakku akornanni pisimasut, ikinngutinut amerlasuunut sakkortunerujartuinnartumik killilersugaanermik misigisaqarfiusimasut, suli ilissinnik nuannaartorinninnitsinnik annertusisitsiinnarsimapput.
Nunarsuarmi sumiiffinni allani misilittakkanit ilikkarsimasatik naapertorlugit, inooqatigiit ilaasa innuttaasut akornanni peqqinnissaq eqqarsaatigalugu piumasaqaatit pillugit isumannaatsumik nutaaliortumillu periuseqarlutik qaammarsaassuteqarfigisarsimavaat. Immikkut sammineqarsimapput virusimit tunillatsinneqarnissamut ulorianartorsiornerpaajusut, tamatumalu siammarnerata nassatarisaanik aningaasarsiornikkut ajornartorsiulertussat; suliniutit tassunga tunngassutillit nutaarsiassaleriffimmi Bahá’í World News Servicemi sammineqarsimasut piffissami aggersumi amerlaneroqalutik takkuttussanut assersuutissaapput ikittuinnannguit. Taakkununnga aamma tapertaliunneqarput anersaakkut piginnaatsit nalitsinnut naapertuuttut sorliit nukittorsarneqarlutillu siuarsarneqarnissaannut misissuinermut tunngassuteqartut. Suliniutit taamaattut amerlasuut allatut ajornartumik ilaqutariit ataasiakkaat iluanni inuttulluunniit kisimiilluni ingerlanneqartuupput, taamaattoq pissutsit attaveqaatillu periarfissaqartitsigaangata, ersoqatigiittutut misigineq immikkooruteqarluinnartoq pimoorullugu ujartorneqartarpoq tarningit assingusumik atugaqartutut misigisut akornanni. Inooqatigiittut inuunerup uummaarissusia, ataatsimoorluni ineriartornissamut qitiulluinnartoq, ajorsartinneqarsinnaanngilaq.
Anersaakkut qiimmatsaatigisimaqaarput Nuna Tamakkerlugu Anersaakkut Isumasioqatigiiffiit, Qaamarngup Sakkutuuisa naalagaasa nikallortussaanngitsut, qanoq pikkoritsigalutik inooqatigiit siuttuuffigisatik siulersorneraat takugatsigu, qanorlu ajornartoornermut maanna atuuttumut qisuariarnertik takutimmassuk. Siunnersortinit taakkulu Ikiortaannit annertuumik tapersersorneqarsimapput, taakkumi, pisarnermissut, sapiitsoqalutik asannittumik kiffartuussinerup erfalasua pavunga kingumut qullarsimavaat. Nunagisaminni pissutsinut ilaanni pilertoqisumik allanngupallattartunut malinnaalluartuunermik saniatigut, Isumasioqatigiiffiit suliassat Siunertamut attuumassutillit pisariaqartut ingerlattarsimavaat, ingammik qinersinermut tunngassuteqartut, taakku ajornanngitsumik ingerlanneqarsinnaasimagaangata. Akulikitsumik attaveqaatit aqqutigalugit attaveqartarnikkut, aqutsiviit aalajangiisussallu silatusaartumik siunnersuisarsimapput, eqqissiallannartumik tuppallersaasarlutik, kipisuitsumillu kaammattuiuartarsimallutik. Arlaleriaqalutik inuiaqatigiit najukkamik akornanni qulequttat oqallisaasartut pillugit akissutissanik kinguneqarluartussanik nutaanik unnersuussisalersimaput. Naw-Rúzimi nalunaarutitsinni ilimagisatsitut eqqaasarput inuiassuit pinertussutsimikkut misilinneqaatissaat manna itinerusumik isiginnittaaseqalernissamik nassataqarumaartoq, maanna piviusunngoriartulereerpoq. Siuttut, isumaliorumatuullu nuimasut oqaaseqartartullu allat tunngaviusumik isummat siunissamilu angorusutat sapiisertumik toqqammaveqartartut qanittoq tikillugu eqqartorneqarneq ajoraluartut, maanna eqqartorniartalerpaat. Tamakku maannakkut qaammaallannerinnaagallarput siusissut, taamaattoq nunarsuarmioqatigiittut ataasioqatigiissutut misiginissap takkukkumaarnissaata ilimanaateqarneranut periarfissiisuupput.
Bahá’ít silarsuaanni pinertussuseq manna iliuutsit aqqutigalugit takutinneqartoq isigisarput tuppallersaatiginiassaqqaarlutigu nunarsuaq tamakkerlugu nappaatip tunillaassuuttup inuiassuarnut kingunissaa aliasuutigalugu nikalluallaatiginngitsuunngilarput. Alianaq, arajutsisimanngilarput uppertut ilagisaallu naalliuummut tamatumunnga aamma akuutinneqarmata. Ikinngutinut ilaquttanullu avissaarsimaneq pisortatigoortumik isumannaatsuunissaq pissutigalugu piumasaqaataasoq maanna nunarsuatsinni inuppassuarnit malinniarneqartoq, inuit ilaannut avissaarsimanermik ataavartumik kinguneqartussaavoq. Ullaakkut qaalernerit tamaasa qularnanngilaq naalliuutit arlaqartussat aqqusaarneqartarumaartut seqineq tarritserlugu. Qanortoq silarsuarni naassaanngitsuni naapeqqikkumaarnissamik neriorsuutip asasaminnik annaasaqartut tuppallersaammik tunigiligit. Uummataat oqilisaqqullugit qinuvugut, Guutillu saammaannerata ungugiligit ilinniarnermikkut, inuutissarsiornermikkut, angerlarsimaffeqarnermikkut, allaat nerisassaqarnermikkut navianartorsiortinneqartut. Ilissinnut, aammalu asasassinnut nunaqqatissinnullu tamanut, Bahá’u’lláh iluunngarluta ilungersortumik qinnuigaarput pilluaqqoqqullusi ikioqqullusilu.
Aqqutissaq qanoq takitigigaluarlunilu naalliunnartigigaluarpat, qularinngilluinnarparput aqqutiginissaanut nukissaqarlusilu aalajangiusimallusi piumassuseqartusi. Neriunnerup, uppernerup, isumassiuimatussutsillu toqqorsiviinit tigooraavusi, allat pisariaqartitaat ilissi pisariaqartitassinnit salliutillugit, arsaagaasimasut anersaakkut inuussuteqarnissaannik pissaqartillugit, akissutissallu pillugit qilalersut nalerisimaalersillugit, nunarsuullu pitsanngorsarneqarnissaanut sullissiniarlutik kipisattunut atortussaannik tunioraallusi. Kusanassutsip Kukkusussaanngitsup tunniusimallutik malinnittuinit qanoq ililluta minnerusumik ilimasuuteqassagatta?
- The Universal House of Justice