Return   Facebook

The Universal House of Justice

Ridván 2014

To the Bahá’ís of the World

Dearly loved Friends,

Penuh tiga taun udah ngejang kenyau ari pun rengat kediatu dalam pengerembai Lumpar Petara, siti pengawa ti ngempung bala penitih Baha'u'llah ngintu pengawa pemansang semengat. Semina dua taun aja nyerara bala pangan ba Petara enggau pengujung ia ti udah ditetap. Dua iti pejalai ti chukup beguna mengkang nganjakka proses pemansang—pejalai tetap bala ti enggau dalam ripih kos institute pengelatih enggau pejalai kluster nengah rintai pemansang—udah balat bendar dikuatka ari panjah tenaga ti datai ari aum nembiak ti diatur taun nyin kemari. Pengulih ti nyegang ba dunya Baha'i ti udah ulih ngerak mayuh bala nembiak angkat ngerja pengawa diatu nyau mansutka buah. Ba maia ti agi bisi, pengawa ti chukup beguna dalam ngeringka program pemansang ti bisi enggau ia ti baru balat diperumban. Raban Nama ti Pemadu Tebangkar udah ngentap kediri, empai rengat tu abis, deka nambahka kluster alai program udah ayan lalu dua ribu agi juluk ati ti empai ulih.

Naka meh pengaga ati kami meda pengawa tu dikerja enggau terit di serata dunya, lalu dalam mayuh bengkah keadaan enggau endur, ba kluster ti udah mangai ba penyampau tiga ribu iti. Mayuh kluster datai ba endur alai pejalai ia dikemansang ari ti ngerja garis pengawa ti mimit serta mudah. Ba kluster bukai, udah ti ngerja putar aktiviti ti betangkan-tangkan, makin mayuh orang siku-siku ngepun ngerja pengawa ti nitihka rangkar Lumpar lalu peneras aktiviti mega makin terit; lebuh kualiti proses pelajar pemansang semengat betambah nengah peneleba, mayuh semengat mega tetarit deka enggau ngerja pengawa. Ari maia siti ngagai maia siti, nyangka bisi mega tendur ngerja aktiviti tauka bisi penekul dalam mansang ke mua; bejurai ngiga nama kebuah penangul baka nya nyadi, dipegulai enggau pengeliat ati, pemerani, serta puoh, udah tulihka peneras pejalai baru. Ba makin mayuh kluster, program pemansang nyadi betambah besai ba skop enggau kompleksiti, setipak enggau pengulih ti betambah ba tiga protagonist Lumpar— siku-siku, raban, enggaue institution Pengarap—nempa suasana ti nyukung. Lalu kami mega gaga, baka ti disadang, makin mayuh kluster alai beratus-ratus iku orang siku-siku ngemudahka beribu-ribu orang bukai enggau dalam nganyam rangkar pengidup, pemansang semengat, dinamik, berubah. Ba pelasar proses kenyau ari pun, endang bisi, pejalai ti begempung nuju timpai pengaya reta dunya enggau pemansang semengat baka ti ditetap Iya ti Pun-Pengidup ke Dunya. Tang lebuh makin mayuh orang enggau gawa, pejalai seluruh mensia makin deka dipeda.

Pejalai tu makin nyata ba kluster alai Mashriqu'l-Adhkar menua diduduk. Siti ari nya, baka ti ditunujuk, ianya di Vanuatu. Bala pangan ti diau ba pulau Tanna udah bebendar meri orang mayuh nemu pasal Rumah Sembah ti dilanggur, lalu becherita enggau enda kurang satu petiga ari 30,000 orang ti diau ba pulau nya tentang pemesai reti ia ngena mayuh chara. Pengulih dalam ngenanka randau enggau mayuh mensia baka nya udah dialus ketegal peneleba ti udah ulih ari ti bekunsika ajar Baha'u'llah lalu ngenataika paut institute pengelatih ti galak. Raban nembiak lanjau ba pulau nya mansang amat, teperansang laban sukong tuai kampong ti meda bala ti ngulu pengawa endang dikeringka enggau pemansang semengat. Diperansang laban penyerakup enggau pengeran ti bisi ba bala nembiak tu, sida ukai semina udah muai pengelembau enda ibuh ba diri-empu, tang mega nengah mayuh bengkah projek ti dikerja, udah tetemuka chara dikena ngemanahka pengidup raban dia,lalu asil ari nya, orang ari mayuh bengkah tikas umur, ti nyengkaum bala apai-indai sida, udah dichelup ngerja pengawa ti pulai ke penguntung. Ba bala ti arap enggau mensia mayuh, berekat ari ti ulih nunga ngagai Raban Gelumu Sambiang Menua ngambi bulih lalau lalu dalam mutar penanggul maya kena penusah nyau dikelala, lalu ari nya, pemutus penemu Raban Gelumu Sambiang Menua makin ditemu ketegal pemintar enggau sensitiviti. Mayuh bendar pekara ti nunjuk ke, lebuh elemen rangkar Lumpar pengawa dipegulai nyadi segala ti bejantil, empas ia ba mensia mayuh chukup besai. Lalu nyandih ba pengawa ngerembai enggau ngenegap—putar ti ketiga puluh ba program pemansang dedat ti baru udah abis—bala pangan regas nyidi, sama enggau orang bukai ba pulau nya, reti Mashriqu'l-Adhkar, siti "pusat gelumu ke semengat mensia’’, ti deka didiri dia. Ari sukong ti terit ari bala tuai asal sida, bala ti diau ba pulau Tanna udah meri seratus iti penemu tentang ukir Rumah Sembah nya, nunjukka Rumah Sembah nya udah masuk ba runding sida, lalu muka prospek ti manah dalam empas ia ba pengidup sida ti diau di baruh ayung ia.

Cherita ti ngerindu ati tu begulai enggau mayuh ti bukai ba kluster ti udah nyulut alai implikasi ajar Baha'u'llah ti mai asil ba gaya pengidup orang ti diau besemak enggau ba kampung-kampung. Ba siti-siti endur, mensia, makin nemu Siku ti benama Baha'u'llah, belajar, nengah ninjau peneleba, jurai, lalu belajar, baka ni ngintu pengamat ti dikembuan Pegari-Penemu Iya, alai sengkilung ti makin besai ba kaban pemansang semengat diatu makin lebih teguh ditanggam ulih berakup gawa serta nyembah Petara.

Ngena mayuh chara, raban ti udah nyulut mansang nyendiaka jalai ti ngelalu orang bukai nitih sida. Nadai ngira ni tikas aktiviti ba kluster, pengulih bala pangan dia belajar, dalam rangkar ti sama, nya ti nentuka pejalai ba nenasan pemansang. Genap iku endang bisi ungkup ba enterprise tu; pemeri ari siku-siku tetap deka ngayaka semua. Kluster ti pemadu dinamik ianya ti, enda ngira sumber ti dikembuan raban tauka pemayuh aktiviti ti dikerja, bala pangan ngelala kerja sida dalam nentuka nama ti diguna ngambi ke pemansang tau nyadi—pengulih ti biak mesti di-inang, pengelandik ti baru mesti di-ulih, orang ti ngepun pengiruh ti agi lemi mesti disempulang, peluang endur ninjau mesti ditanam, kerja begempung mesti ditusun—serta udah nya ngiga jalai ti kreatif ngulih ke maia enggau sumber dikena ngulihka ia. Cabaran ti bisi ba siti-siti keadaan endang meri penguat ngagai siti-siti raban ukai semina bulih penguntung belajar ari utai ti ditemu ba endur bukai dalam dunya Baha'i tang mega nambah ke tibang penemu. Ngelala realiti tu ngelepaska siku-siku ari kerja puntan ngiga formula ti enda ulih diubah (rigid) lalu dalam maya ti sama bulih seling ti dipeda dalam mayuh bengkah keadaan ti madah ke proses pemansang lebuh ia nunjuk ke bentuk ba endur tempat diri-empu. Pendekatan tu chukup enda senutuk enggau penemu ti sempit ngenang “pemujur” enggau “enda mujur” ti deka mansutka penakut runding tauka madamka pengeran. Ngelepaska diri diguna. Lebuh pengiruh dibantai penuh ketegal Petara dia namanama utai ti nyadi di-empu Iya lalu tiap pemenang atas Nama Iya nyadi ke peluang endur ngerami puji Iya.

Baka nya Tulis Pengarap kitai ngenang pasal pengiruh ti diayan enggau bantu serega ti nyaut nya: "Enti kita bendar mansutka pengiruh," ku penetap ari Tuai dalam siti Papantulis Iya, "sigi tetap perenching ia deka manchar, moahari pengasih deka nurunka ujan ia, ribut ti mai-pengidup deka angkat lalu betiup, bau rengut tu deka dikerembai jauh serta luas." Suah dalam penemuai kami ngagai Sungkup Kudus, kami ngarika kita minta Petara nan serta nguatka kita, ngambika pengiruh kita datai ba orang ti empai teleba enggau ajar suchi lalu ngentapka sida dalam Pengawa Iya tau kaya diberkat, ngambika kita ti bepangai ba pengasih Iya ti nadai sekat tau enda beguyang. Kita nadai kala pungkang dalam sambiang kami, seruran dikenang dalam pinta kami ke pengiruh pengawa kita ti angkun. Lebuh kami ngenang utai ti bebaris ba mua penitih Pemajik Beberekat dalam kandang dua taun t i deka datai, terantang kangau Tuai minta gawa patut meransang semengat: "Kuyaska tirai, buai penekul, beri ai ti meri pengidup, lalu tunjuk nenasan penyelamat."

 

Windows / Mac