Return   Facebook

The Universal House of Justice

Ridván 2004

To the Bahá’ís of the World

Dearly loved Friends,

Tiga taun ba Lumpar Pengawa Lima Taun udah ngelebus. Pruses ti berengkah nginsit ba Lumpar Pengawa Empat Taun, dikering nengah perati ti ditumpu ngagai pelajar Baha’i ke bala anakmit dalam kandang Lumpar Pengawa Duabelas Bulan, lalu terus ditegap kandang beberapa taun ti udah lalu, diatu ngamatka tuju pengandal lebuh ia dilanchar. Di setiap sukut dunya alai tiga sekaban ti enggau dalam Lumpar – siku-siku, raban enggau pugu pengatur pengawa – genap iku ngembuan ungkup pengawa ti nyemetak, endang nyukung kereja kaban ti bukai. Pugu aktiviti ianya begulai belajar, kelas anakmit enggau serumpu sambiang udah nyadika batang pemujur sereta ngeringka siti-siti pengulih lalu mai penguat enggau pemujur ngagai semua pengawa bukai (elements) ba pengidup raban Baha’i. Sumber mensia nyau betambah, lalu Raban Gelumu Sambiang Menua nyau tetangkupka guna pengering ti betambah tu.

Pengulih ti didirika ba pelajar Baha’i ke bala anakmit di serata dunya udah nunjukka pemujur ti chukup manah. Pengiruh ngepun meri kuasa pemansang semengat ke bala nembiak ti agi mit udah bulih pemujur. Kinsit genturung ari siti tikas aktiviti niki ngagai tikas ti tinggi agi udah dalam genggam, lebuh majak mansang, puak bala ti arap ti angkun nyau ditambah ulih mayuh agi raban mensia bukai, ti agi empai Baha’i tang keran deka enggau ngereja aktiviti pugu pengawa ba Lumpar. Tusun dikena ngatur pemansang ti terit udah ayan ba sekeda genturung ti maju. Raban Gelumu Sambiang Bansa, lebuh ngemataka utai ti diguna semua genturung ba menua sida, udah ngelala pemesai guna numpuka perati ngagai sekeda genturung ti diperumban ti nunjukka asil ti tinggi, meransang sereta ngeringka sida dataika sumber mensia ti didiri sida nengah institut pengelatih mai sida nyadi pusat pemansang ti deras sereta teguh.

Baka ti disadang, institiut pengelatih udah nunjukka ia ulih nyadi enjin pemansang. Lebuh nyidi peluang enggau guna raban sida, tebal agi Raban Gelumu sambaing Bansa udah nguna perengka kus ti disedia ulih Institiut Ruhi, ngasaika perengka nya tetangkupka guna Lumpar. Tu mai penguntung ti begembar laban perengka ti sama udah disalin ngagai mayuh bengkah jaku, alai dini-dini bala Baha’i bejalai,sida betemu enggau bala pangan ti niti menasan ti sama sereta teleba nguna bup enggau chara ti sama.

Raban antarabansa ti bepenyarut, belaya ketegal peneka enggau penemu ti nyakal pangan diri, diserang ulih pengawa pengganas, nadai beradat sereta makai suap ti makin nyadi, lalu rarat laban penusah penatai pemisi, penyeranta enggau penyakit. Ba tengah-tengah nya dia raban Baha’i nyau makin nyata dipeda, diperansang ngena wawasan kudus ti pegari, didiri atas pugu ti teguh, makin betambah kering ngena proses ti nyadi ba maya diatu, lalu enda tejanggal laban tekul ti ngempang. Siti teladan ti nunjukka pengulih dunya Baha’i nangkup pekara ti nyadi ti enda disadang nyadi ba taun nyin kemari, alai mayuh bengkah penyarut bisi nyadi ti ngasuh Kunvensen Baha’i Antarabansa enda dipenyadi; milih kaban Rumah Pengelurus Serata Dunya tetap di atur lalu Lumpar tetap dipejalai enda ninggalka sebarang singkang . Jam kediatu, taja ga pengachau enggau penyarut pengidup nyadi di Iraq, bala Baha’i di menua nya ulih dikangau sereta ulih nudukka Raban Gelumu Sambiang Menua sida. Diatu kami meri jaku gerah madahka enggau ati ti gaga ianya ba Ridvan tu, Raban Gelumu Sambiang Bansa ke Baha’i di Iraq ulih dipilih, didirika baru udah pengelama lebih tiga puluh taun dituntung tagang ti terit, bulih penuduk ia ba raban Baha’i antarabansa.

Utai ti diguna Lumpar Pengawa Petara ba tikas tu ianya kitai seruran bisi pengandal sereta terit mansang ba tuju kediatu, anang tejanggal laban kudi ti nuntung dunya mensia. Kembuan penetap ati ianya Pemajik ti Beberekat deka ngiring singkang kita lalu Raban Malikat ti Tinggi deka ngeringka genap pengiruh dalam ngemansangka Pengarap Iya.

 

Windows / Mac