Return   Facebook

The Universal House of Justice

Ridván 1996

To the Bahá’ís of the World

Dearly loved Friends,

1. Ati kami melumpa laban pengaga ke Pemajik Beberekat, kami ngako pemaioh banto pengasih Iya di-ayan dalam kandang Lumpar Pengawa Tiga Taun, ti udah ngapus ka pejalai ia ba Gawai Ridvan tu. Semengat ati ti dikesuh Taun Kudus, ti meri peransang ngagai pengelanchar ka Lumpar ba Ridvan 1993, ngalun kandang maia tu ngena pengeras gawa ti terit, ti meri raban kitai di dunya lebih begempong, lebih tegap, lebih tuai runding, serta lebih bepengandal ari ti udah. Ba maia ti sama, penuduk raban udah manggai ba tingkat ti tinggi agi. Taja ga Lumpar tu tembo, enggau enda bangat nyemetak pemujur, pengerembai ba maioh tubuh, taja ga tambah orang ti arap nyengala bendar, ia udah nunjuk ka raban ti lebih tinggi kualiti – raban ti besedia nguna peluang ti bisi dikena ngemansang ka Pengarap.

2. Pemujur ti beperenching ba Projek Bukit Carmel nya siti penerang ti tebilang bendar ba kandang maia tu. Taja ga dituntong maioh macham penanggol, tingkat pemansang ti disadang dalam pesan kami leboh ngerah Lumpar Pengawa Tiga Taun diatu nyata bendar. Semua tingkat kerja niri ka ia udah berengkah, rangkar luar ka Pusat alai Belajar ka Tulis Kudus serta kerja Nyambung Arkib Antarabansa udah ditambah lalu kerja ba dua iti rumah tu maju bendar alai deka ngepun ka kerja nembo ka dalam enggau luar ia. Niri ka penuduk tetap ka Pusat Ngajar Antarabansa, rumah ti ketiga ti benong digaga ba Arc, diatu mansang enggau jampat. Tujuh iti panti ari baroh Sungkup Nabi Bab diatu udah tembo, ngayan ka pemanah pengerembai ari kaki ngagai rusuk Bukit Kudus Petara. orang ti berate alit ati meda pemanah anyam ti dikerembai ba bukit nya.

3. Pemujur ti dipeda mata ka pemansang naka ke diatu chukup pemanah nunjuk ka pemenang ti deka di-olih ti besai reti, ianya, segempong tuju dipejalai di serata dunya olih raban kitai dalam bejalai ka pengawa ti besai, ti begempong tu. Penerit pengeras ati serta sukong ti dipansut ka ia udah ngayan Kediri dalam tengkujoh pemeri ti ngelui sadang, manchar ka tikas berantu ti nunjuk ka pengarap ati serta penelap ati bala sulu Baha'u'llah di serata dunya tu. Pemeri ngagai Projek Bukit Carmel udah tetangkup ka pinta julok ati tiga taun ti bepenyampau tujuh puluh empat juta nanda siti pemujur ti olih disukat serta chukup manah, meri peransang alai sukong penatai duit ka projek tu deka terus sampai ka ia tembo ba ujong abad tu.

4. Tanda pemansang kandang tiga taun ti udah lalu nyata bendar dalam maioh bengkah bidang. Pengiroh ti nyengala dalam ngerembai enggau ngenegap ka raban, kerja ti betambah dalam pemansang penatai pemisi enggau pengawa rama, serta sungkak ti ngelui ari sadang ba kaul enggau orang luar dipegulai sekali nunjuk ka raban ti disikap pengulih ti baru.

5. Ba kelang ngajar, kerja bisi betambah baka ti dipandang enggau numbuh ka duabelas iti Raban Gelumu sambaing Bansa ti baru dalam kandang Lumpar serta segang pengajar ti pindah pendiau enggau ti bejalai ngajar. Bala ti arap di maioh bengkah menoa dikering ka ngena chara ti baru ti dilanggor dalam kanggau ka bala pengajar pindah pendiau ti dikeluar kandang maia Lumpar. Penyampau bala pengajar pindah pendiau ti bejalai di menoa diri enggau ka menoa bukai nyata bendar. Chara ti betusun dalam pengawa ngajar begempong serta projek ngajar renggat panjai ti betumpu mansut ka asil lebih nyata ari ti udah dipejalai ba maioh bengkah menoa.

6. Penguat enggau pengelandik ti nyempulang maioh bengkah pemansang ngerembai enggau ngenegap bepanggai bendar ba ati ti pintar ti dipandang Pusat Ngajar Antarabansa. Lalau enggau peransang ti bejarit datai ari ia nuju Raban Bala Pengelalau, langgor penemu ti madah ka chara baru dikena nganjong bala pengajar pindah pendiau, baka ti dikemendar Rumah Pengelurus Serata Dunya dalam tesau minta bala pengajar pindah pendiau ba pun Lumpar, serta banto ia ti bejarit ngagai Komiti Pengajar Pindah Pendiau Bengkah Menoa ti dipegai ia, tumpu ia ti enda ngetu ngagai guna pelajar ka raban baka ti ditunjuk dalam kaul ia enggau bala Pengelalau ti nyerangkong program ngenalam ka penemu bala ti baru arap dalam projek ngajar, ngaga ator ka kos enggau bengkel dikena ngelatih dalam maioh bengkah pengulih, ngelatih pengajar kelas anakmit, lalu nambah ka pemaioh kelas anakmit, peransang ia dikena numbuh ka institute ngelatih ba maioh bengkah tempat di dunya –semua udah mansut ka asil ti nyemetak. Puji ti besai mesti mega diberi ngagai Pusat Ngajar Antarabansa ketegal kuasa penarit ti dipansut ia nengah Bala Pengelalau dalam nguna program batang perengka bacha dalam maioh bengkah menoa ti betambah. Nengah program ti baka nya sekeda bup ti dipeguna dalam ngerembai ka Pengarap enggau ngenalam ka penemu bala ti arap dipilih, dichelak enggau maioh serta diedar lalu dijual enggau rega ti baroh. Pemansang ti nyengala dalam singkang ubah pugu pengator pengawa tu ti gawa ba Pusat Dunya nyata bendar dalam penyendia enggau ator ia ka Aum Bala Pengelalau dalam bulan Duabelas ti udah lalu ti ngerintis ka tusun pengawa bala pemesai ti tinggi pangkat tub a Pengarapmkandang beberapa taun ti semak ti deka datai.

7. Pemansang ti besai reti ianya makin betambah orang bansa asal mangko tapi-pengawa ngajar enggau ngenegap ba menoa sida empu. Ba maioh bengkah menoa ti dituntong penusah, baka di Angola, Cambodia, Liberia, Sierra Leone, bala pangan bulih pemenang ti beguna, sekali ka dalam ngemansang ka pengawa ngajar ti ngujong ka maioh orang baru masuk, tauka dalam numbuh serta ngering ka baru Raban Gelumu Baha'i tauka dalam ngepun serta ngenan ka pemansang projek. Ba tempat alai Raban Gelumu Sambiang Bansa baru ditumbuh, baka di menoa Blok Timur ti dulu suba, bala pangan udah nunjuk ka pengulih ti tinggi dalam ngator pekara Pengarap. Tuchong pemujur ka kandang maia tu ianya alun ti regas, berani serta bepengelandik ti nyadi ba raban Baha'i di beberapa pulau di serata dunya. Bagi pengawa ti bisi dikerja maioh bengkah, nyengkaum ngangkat ka maioh bala pengajar di menoa diri, ngelatih serta nganjong bala pengajar ti bejalai ngagai pulau-pulau ti besemak, ngepun ka sekula primary, pengerami ti maioh dikena nerang ka Pengarap, meri belanja dikena ngator pengerami ti digulu bala pemesai perintah enggau orang ti bekuasa. Dalam beberapa taun ti baru lalu beberapa iko pemesai-pemesai perintah ba menoa-menoa pulau udah nemuai ngagai Pusat Dunya Baha'i nunjuk ka pengeregas kerja ti di-intu bala ti arap ba pulau-pulau ti mit ti betabur ba serata tujuh tasik. Disimpul sekali, semua teladan runding enggau pengiroh bala pangan dalam maioh bengkah penyadi nunjuk ka pengeran ti tinggi ba kerja ngajar serta penuai runding ti mansang enggau penegap ti manchar ka penalam pengarap ati ti meransang bala Baha'i ari maioh bengkah bansa.

8. Segembar enggau perati tu ianya sukong ti manah ari bala nembiak dalam ngerembai enggau ngenegap. Kerja sida betambah luas kandang maia tiga taun ti lalu. Diperansang olih aum nembiak enggau gelumu ti bukai ti senutuk enggau pengerindu sida, bala nembiak di serata dunya meri maioh jam, penguat enggau pengeransing sida ngagai kerja ngajar baka nyadi pengajar ti bejalai di menoa diri tauka ke luar menoa diri lalu pia mega beraban ngerja projek begempong lalu leboh ti gawa baka nya, sida narit berates iko orang ti masuk baru serta nuduk ka maioh Raban Gelumu Sambiang Menoa; bala nembiak enggau dalam bidang muzik enggau seni dikena nerang serta ngajar Pengarap nyemetak mujur ba maioh tempat, ngerembai ka tandak enggau bengkel drama mega ngasi bendar, bala nembiak enggau dalam kaul enggau orang luar muka pengulih ti baru ka Pengarap dalam bidang tu; sida ti tunggang enggau ba taun gawa ka Pengarap udah mega betambah luas, lalu pia mega penyampau bala nembiak bulih latih serta pengelandik dalam bidang akademik, professional enggau vokasional udah betambah—semua nya nunjuk ka bala nembiak ending maioh gawa terus ka Pengarap serta ba maia ti sama bisi manto dalam ngemansang ka pengidup raban mensia.

9. Tanda ngenegap ka raban majak ayan alai bala pangan makin enggau dalam pemansang pengidup rama enggau penatai pemisi lebih agi dalam bidang meri pelajar. Siti teladan ti tebilang, ianya siti perintah minta bala Baha'i nangkup kerja ngurus tujuh iti sekula perintah, lalu sida ngerja tu enggau sukong Opis ka Pemansang Rama enggau Penatai Pemisi ba Pusat Dunya. Patut dikenang mega ianya di Afrika raban BahaiI ti ngintu diri Kediri-diri ketegal penyarut politik ba menoa sida empu mengkang ngemansang ka projek bumai enggau projek bukai ti beguna bendar dalam nentu ka sida olih ngidup Kediri. Pengiruh dalam nyungkak ka pangkat bala orang indu betambah deras alai ba maioh bengkah menoa, kelimpah ari ti enggau ba projek Baha'i ti dipelanja gerempong bukai, pugu pengator pengawa Baha'i numbuh ka komiti enggau opis ti ngintu peneka bala orang indu. Raban Baha'i Antarabansa ka Pemansang Orang Indu ayan nyadi ka tanda sungkak tu.

10. Ba beberapa iti menoa mega, bala Baha'i betambah enggau dalam program ti dipelanja perintah endor ngangkat ka pemanah pengerai; lalu ba siti endor raban Baha'i ngepun serta bejalai ka program nya. Pengawa ngemansang ka pengidup rama enggau penatai pemisi udah nyengala duduk teguh serta tegap ba maioh projek enggau gerempong. Tiga iti projek pengerintis literasi udah berengkah nyadi ka pun kempen literasi ti deka dipejalai di serata dunya olih Opis Pemansang Pengidup Rama enggau penatai Pemisi. Baha'i ti ngepun serta enggau dalam projek pemansang udah mega Nampak ka Pengarap lalu sida narit mensia maioh serta perengka penibar berita [mass media] enggau dalam projek nya.

11. Sungkak dalam kerja kaul enggau orang luar ngelui ari ti udah olih ngelama tu udah nambah ka penerang Pengarap. Penguat pengiroh di semua bengkah endor di dunya mansut ka pengayan Pengarap ti lebih nyata ari ti udah ngelama tu lalu ngangkat ka penuduk raban Baha'i antarabansa. Suran pemansang ti besai nyata bendar ba raban Baha'i, ti besai enggau ti mit, meri belanja tauka enggau dalam pengerami ti tebuka ka orang maioh: pengayan Baha'i nyadi ka penguat dalam pengidup raban bansa mensia dikelala olih perintah enggau gerempong ukai perintah serta maioh orang ti tebilang, lalu mudah ditemu raban penibar berita. Ke bendar, leboh pengerami Baha'i ditibar enggau luas dia pengerindu ti ditunjuk ka perengka penibar berita ti bechelak enggau elektronik ending ngelui ari ti disadang.

12. Dalam peneras pengawa di serata dunya, sekeda pemansang nyata nyulut: penyuah bala pemesai perintah nganggau ka Baha'i enggau tauka nyukong sekeda pengerami tauka projek; pemujur Baha'i dalam mai ubah dalam kerja perintah; nudok ka program pelajar Baha'i serta kursus di maktab enggau university serta perengka kurikulum ia diguna ba sekeda sekula perintah; beguna ka seni olih pugu pengator pengawa Baha'i dalam pengerami meri penerang ti diator beraban enggau siko-siko.

13. Kandang taun 1995, dua iti pengerami besai diator Gerempong Bansa nanda peneras ti mupuk ngayan ka penyerakup runding dalam pengawa dunya, lalu tu beguna ka perati ti silik raban Baha'i serta ia enggau bejalai ka nya. Ketrubah, Punchak Aum Dunya pasal Pemansang Rama di Copenhagen dalam bulan Tiga ka 250 iko bala pangan ari lebih 40 iti menoa endang mantai ka pengiroh peneleba ka orang ti ngulu Punchak Aum enggau Forum ti diator gerempong ukai perintah enggau Ajar Pengarap. Ba pengerami tu meh penerang pasal “Pengeraja ka bansa Mensia” disedia olih Opis Pemadah Mensia maioh ba Raban Baha'i Antarabansa ketrubah ia disadong serta dipejurai, kerja nangkan ka nya diator ba maioh endor di dunya nyengkaum ngator aum enggau seminar, lalu nyadong penerang nya. Kedua, Aum Dunya ti ke Empat pasal orang Indu enggau Forum Gerempong ukai perintah ti nyerumba nya diator di Beijing dalam bulan Sembilan digulu lebih 500 iko bala Baha'i ari serata dunya, nambah ka batang pengari ka Raban Baha'i Antarabansa. Ba taun ti sama, pengerami ti ketiga, pengerami ngingat ka limapuluh taun penumbuh Gerempong Bansa meri Raban Baha'i Antarabansa ianya siti ari Opis Gerempong Bansa peluang ngeluar serta nyadong penerang ti dikumbai “Titik Pemutar Ka Semua Menoa” ti ngundan langgor dikena ngemansang ka gerempong dunya tu.

14. Patut dikenang mega ba pengawa kaul enggau orang luar ianya ba dua iti pengerami nyata beguna ka Amatu’l-Baha Ruhiyyih Khanum enggau ba pengerami nya: Maia musim bungai ti lalu, iya ngulu ka pengari empat iko pemesai Baha'i ngagai Punchak Aum Tanggam antara Pengarap enggau Pengetan [Conservation] ti betuai ka Iya ti di Pebasa Prince Philip ti diator ba Windsor Castle. Dalam bulan Sepuluh Ruhiyyih Khanum nyadi orang ti batang meri jako licha ba Randau Antarabansa ti ke Empat ngenang Ubah nuju Raban Pengidup Serata Dunya diketuai ka Unnited Nations Educational, Scientific, and Cultural Organization [UNESCO] ti diator Baha'i Chair ka Pemaik Dunya serta Department of History ba University of Maryland.

15. Enda mega kami patut ngelaung nyebut sekeda tanda ti besai reti ti bisi ba kandang maia ti diperati tu. Kitab-i-Aqdas dichelak ketrubah ia dalam jako asal Arab serta disempulang penerang dalam jako Persia, nyadi ka tambah ia ti dichelak dalam jako English. Adat Huququ'llah makin betanggam rat ba ati bala orang ti arap serata dunya, lalu ba taun penudi ka Lumpar Pengawa Tiga Taun, Penyaga Huququ'llah, Jari Pengawa Petara `Ali-Muhammad Varqa, mindah diau ka Tanah Kudus. Singkang ti besai reti tu mai semua ketiga-tiga Jari Pengawa Petara-Amatu'l-Baha Ruhiyyih Khanum, Mr. `Ali-Akbar Furutan, enggau Dr. Varqa— diatu diau di Pusat Dunya, meri peransang ngagai bala pilgrim enggau temuai, enggau bala pangan ti gawa di Pusat Dunya.

16. Besandar ba penyandih ti meri pemansang ti ngelantang ka ati kami ngepun ka Ridvan tu enggau Lumpar Pengawa Empat Taun ti mai kitai terus ngagai Ridvan 2000. Kami enggau pengeran serta pengerindu nganggau ka semua bala menyadi kami lelaki enggau indu ba tiap menoa bela enggau kami kiroh gawa nentu ka abad kedua-puluh satu ti jampat datai dikumpa enggau pengaya reta ti meruan belama.

17. Lumpar Pengawa Empat Taun ngembuan siti julok ati ianya bulih siti pemujur ti besai; singkang pemansang ti besai dalam ripih pengawa masuk beraban maioh. Baka ti dipadah kami dulu ari tu, singkang ti baka nya deka di-olih nengah pemujur ti nyata dalam kerja enggau pemansang ba siko-siko bala ti arap, pugu pengatur pegawa enggau tumpok raban.

18. Genteran “singkang pemansang dalam ripih pengawa masuk beraban maioh” ngundan reti ianya gaya utai ti nyadi diatu beguna ka penumbuh ti meruan mansang ba raban dunya Baha'i ngagai tikas ti besai; alai alun tu beguna bendar dikena napi utai ti nyadi di dunya; alai tiga pekara ti nyadi ka kaban dalam negi ka Ator Baha'u'llah ianya siko-siko, pugu pengator pengawa enggau raban—olih nyungkak ka pemansang nya ari ti ketrubah nerima pengulih tub a semengat enggau ba runding, lalu udah nya gawa nyerangkap raban orang ti baru arap, bejalai ka ator dikena meri latih serta ngering ka pemansang semengat enggau pengelandik sida ngintu ator pengawa, ari nya nambah ka pemaioh bala pengajar enggau orang ti mangku pengawa ti landik, ti regas alai sida ti enggau ngintu pengawa Pengarap deka nentu ka peneras orang ti masuk baru meruan nyadi, pemansang Raban Gelumu Baha'i nadai tejanggal, lalu majak ngenegap ka raban.

19. Nambah ka nya ngemansang ka singkang ngembuan reti ianya ripih pengawa udah berengkah alai raban ba tumpok enggau menoa endang mansang ba tingkat ti enda sebaka. Semua raban diatu mesti nangkup kerja ngepun ka singkang serta nan ka pengiroh dikena ngulih ka tikas ngerembai enggau ngenegap ti tetipak enggau pengulih ti deka nyadi. Siko-siko enggau pugu pengator pengawa, taja ga gawa ba tikas ti enda sama, ditesau angkat napi guna jam tu ti genting ba pengidup raban kitai enggau nasib semua bansa mensia.

20. Ungkup kerja siko-siko chukup beguna ba pengawa Pengarap. Pemujur kerja ngajar enggau ngemansang ka raban bepanggai ba siko-siko ti ngayan ka penguat pengarap ati. Jako-tangkan Baha'u'llah nuju tiap iko orang ti arap ngasoh ngajar Pengarap Iya meri tangkup-pengawa ti enda olih diseliah ti enda olih dipindah, tauka diserah, ngagai ni-ni pugu pengator pengawa Pengarap. Semina siko-siko aja ti olih bejalai ka pengulih nya ti nyengkaum olih ngepun Kediri, nguna peluang, bekaban enggau orang bukai, bekaul enggau orang bukai, nanggam kaul, tulih ka sukong orang bukai dalam gawa ka Pengarap enggau raban mensia, lalu bejalai ka pemutus penemu ti datai nengah jurai raban. Nya endang tapi-kerja siko-siko “ngiga semua chara ti tau diguna iya dalam narit perati, nan ka pengerindu, serta ngenalam ka pengarap ati orang ti dibai iya masuk Pengarap iya”.

21. Ngambi ka nguna pengulih tu enggau penuh, siko-siko patut narit pengerindu iya ka Baha'u'llah, kuasa sempekat, pengering sambaing, peransang enggau pelajar ti oloh ari ti bejarit macha serta belajar ka Tulis Kudus, serta penguat ubah ti bejalai ba semengat iya leboh iya nguji ngembuan perangai nitih ka adat enggau batang ajar Petara. Nambah ka tu, siko-siko, laban ti diberi tapi-kerja ngajar Pengarap, bisi disikap enggau pengulih narit berekat ti disemaia Baha'u'llah. “Barang sapa ti muka mulut iya ba Hari tu,” ko Pemajik Beberekat, “serta nyebut nama Tuhan iya, raban peransang Petara deka nurun ngagai iya ari serega nama Aku, ti Semua-Nemu, ti Semua-Pintar. Ba iya deka nurun bala Malikat di atas, genap iko megai chawan penerang tulin.”

22. Shoghi Effendi terang madah ka pemesai guna pengeran diri enggau gawa ba siko-siko. Iya madah enti nadai sukong ari siko-siko, “ti enda belampong, ti seruran bisi serta maioh,” tiap jalai kerja enggau lumpar pengawa Raban Gelumu Sambiang Bansa iya endang “tetap enda mujur,” tuju Lumpar Pengawa Petara ti dikeluar Tuai deka “tejanggal”; nambah ka nya, pengering ti ngenan ari Baha'u'llah Empu “deka dikelaung ka ari genap iko enggau semua orang ti enda angkat ngerja ungkup diri ba pengelama ti panjai.” Nya-alai, sebarang macham pemujur ti olih endang bepugu ba siko-siko, ke ngembuan penguat dikena ngulih ka ia ti dikeluar ka semina nengah pengeran diri serta kerja ti seruran tan. Ngenang ngasai ka pengurang ba diri-empu ti kadang-kadang nekol pengeran diri, surat ti ditulis ngari ka Pengibun meri lalau baka tu:- “Batang pekara, ti disebut nuan ianya kurang pemerani enggau pengurang pengeran diri ba bala orang ti arap, lalu sida ngasai Kediri baroh nya ti nagang sida betungga enggau orang maioh. Iya minta bala pangan ngalah ka pengurang tu, laban pekara baka tu ukai semina deka menat ka pengiroh sida tang ke bendar deka madam ka api pengarap ati dalam ati sida. Semadi meh semua bala pangan ngasai ka genap iko sida endang olih, nitik ka penguat diri, ngenatai ka Pesan, nya baru, sida tau andal tulih ka julok ati ti udah ditaga ka sida olih Tuai ti bepengerindu serta pintar—Genap iko endang bisi pengulih nyadi pengajar. Iya semina patut nguna utai ti diberi Petara ngagai Iya lalu ari nya nunjuk Kediri ianya iya talok ka pengarap ati iya.”

23. Ngenang pugu pengator pengawa, masuk beraban maioh deka datai ba sida ngipak ka tikas sida gawa ngulih ka ia. Ubah pemansang Raban Gelumu sambaing Menoa enggau Raban Gelumu Sambiang Bansa ba jam kediatu beguna ka runding ti baru ba kaban ia serta ba orang ti milih ia, laban raban Baha'i ngerja ripih pengawa ti besai reti ba cherita pengidup diatu udah masuk ngagai tingkat ti genting. Baha'u'llah udah meri ngagai dunya pugu pengator pengawa ti gawa dalam Ator ti ditaga olih ngempong betumpu bulih tusun pengidup ti baru. Pemujur nuju pemendar ti tampak tu beguna ka pengerembai ti besai serta bejarit ka raban Baha'i, ngambi ka bidang ti chukup pengeluas tau bisi endor ngenuai ka penemu pugu pengator pengawa tu. Tu pekara ti dipeguna enggau berumban ba bala penyukong Baha'u'llah ti nyengala ba semua menoa.

24. Ngambi ka pemansang baka nya diperansang serta diterima, Raban Gelumu Sambiang Bansa mesti niki ngagai tingkat ti baru dalam bejalai ka tanggongpengawa sida nyadi ka arus ngenatai ka lalau, ngaga perambu ka pengawa ngajar, ngemansang ka pun pengelandik mensia, niri ka raban, serta nyadi pemalin ti sinu ka mensia maioh. Sida tau tulih ka pekara tu ari ti nambah ka pengulih bala kaban ia bejurai begulai nitih ka batang ajar Pengarap serta bejurai enggau bala pangan ti dipegai sida, ari ti nanggam ati ti deka gawa, ari ti bekaul terit enggau Raban Bala Pengelalau serta penyanding sida, serta ari ti numbuh ka kaul enggau orang luar. Lebih agi pemujur dalam ubah pemansang ka pugu pengator pengawa mesti diayan nengah penyampau tumpok ti bisi Raban Gelumu ti ngintu pengawa ti olih nyungkak ka pengulih siko-siko orang ti arap gawa ka Pengarap serta nanggam begempong kerja. Simpul sekali, penuai runding Raban Gelumu disukat ukai semina nengah penyuah ia bejarit miting tauka penyikar ia gawa, tang mega tambah ti bejarit ka orang ti masuk nyadi Baha'i, penyikar ia bekaul antara Raban Gelumu serta kaban ba raban ia, kualiti pengidup pemansang semengat enggau pemansang pengidup rama ba raban, enggau perasai ati bala maioh ti ngasai ka pengering raban dalam ripih-pengawa pemansang ti regas, ti meruan mansang.

25. Raban, laban ti bebida ari siko-siko enggau pugu pengator pengawa, patut ngembuan rangkar diri enggau identity diri leboh ia mansang besai. Tu meh pemansang ti dipeguna alai perati patut ditumpu ba tempat alai orang masuk maioh udah nyadi serta ba maioh endor bukai alai nyendia Kediri nerima orang ti masuk beraban maioh. Raban laban ti lebih ari penyampau kaban ia dichampur sekali: ianya siti unit tusun pengidup ti penuh ti ngundan orang siko-siko, orang dirisebilik serta pugu pengator pengawa ti ngemun serta ngemansang ka system, agensi serta gerempong gawa begulai ti ngembuan tuju ti sama deka ngemanah ka pengidup mensia di dalam enggau di luar enggau pengidup sempadan ia empu; ianya champur kaban ti maioh bengkah bansa, ti bekaul enggau pangan diri ti ngulih ka penyerakup dalam pengiruh ti enda ngetu deka ngulih ka pemansang semengat enggau pengidup rama. Laban Baha’i ba dini-dini endor diatu benong ba pun ripih pengawa niri ka raban, pengiruh ti besai mesti ditumpu ngagai kerja ti ba jari.

26. Munyi ti dipadah kami dalam pesan ti dulu ari tu, pengerinda komuniti, lebih agi ba tikas menua, begunaka sungkak ti besai dalam turai perangai; turai ti ditunjuk dipegulai pemanah olah siko-siko kaban serta Raban Gelumu ngintu pengawa ti ayan dalam penyerakup enggau pemanah kaul raban serta pengeregas kerja enggau pemansang ia. Tu beguna ka tanggam ba raban ti dikembuan ia— orang besai tuai, bala nembiak enggau anakmit—dalam pengawa pemansang semengat, pengawa rama, pengawa pelajar enggau ator pengawa; serta sida ngerja lumpar pengawa ngajar enggau pemansang ba tumpuk. Ia mai reti ianya peneka begempung serta ngembuan tuju dalam ngemansang ka Raban Gelumu nengah undi ninting taun. Ia nyengkaum pengawa beserumpu nyembah Petara. Nya-alai, beguna bendar dalam ngemansangka pengidup semengat komuniti bala pangan bejarit ngatur serumpu sambiang ba pusat Bahá’í menua, enti bisi, tauka ba tempat bukai, nyengkaum ba rumah orang ti arap.

27. Ngambi tulih ka pengulih ngerembai enggau ngenegap baka dalam reti masuk beraban maioh, pengiroh ti terit di serata dunya mesti diator kena ngemansang ka pun pengelandik mensia. Pengiroh bala siko-siko ngator kelas endor belajar ba rumah diri, pugu pengator pengawa meri belanja kena ngator kos ngelatih, serta kerja ti di-intu raban, taja beguna, enda chukup dikena napi meri pelajar enggau latih ngagai raban ti jampat ngerembai. Nya-alai beguna bendar chara ti betusun dikena meri pelajar ngagai maioh orang ti arap pasal batang ajar Pengarap lalu meri latih serta manto sida ngambi ka olih gawa ka Pengarap nguna pengelandik sida ti diberi Petara. Nuduk ka institute tetap ti dikena ngator program ti betusun manah endor meri latih nitih ka letak maia ti bejarit enda patut ditangguh agi. Enti bisi rumah endor institute endang manah, tang ukai reti ia mesti bisi rumah kediri.

28. Pekara tu beguna ka kaul ti terit antara Raban Bala Pengelalau enggau Raban Gelumu Sambiang Bansa. Pemujur institute ngelatih bepanggai bendar ban aka ni penerit Bala Pengelalau serta kaban Bala penyanding enggau dalam bejalai ka ia. Lebih beguna agi ianya Kaban Bala Penyanding patut bekaul rapit gawa enggau institute, serta mega Raban Gelumu Sambiang Menoa alai raban bulih penguntong ari program institute. Laban institute nya di-ako nyadi ka pusat belajar, lalu rangkar ia segembar enggau tapi-pengawa kaban Bala Penyanding meri pelajar ia meri peluang ngagai kaban Bala Penyanding ngerja tapi-pengawa tu, serta kaul ti rapit dalam pejalai institute patut di-ako nyadi sebagi ari ubah pemansang kerja bala pemesai tu ba Pengarap. Narit pengelandik enggau pengulih makin maioh bala orang ti arap chukup beguna dalam ngemansang serta bejalai ka program institute.

29. Laban lekajako “institute” ngundan maioh reti ba raban Baha’i, nerang ka reti jako tu di pikir beguna. Empat taun ti deka datai ngari ka kandang maia ti chukup penyelai dalam cherita Pengarap kitai, titik pemutar pemesai jeman. Utai ti di-asoh kerja bala pangan di serata dunya ianya meri diri-empu, pemisi reta diri, pengulih diri enggau jam diri dalam ngemansang ka lalin institute ngelatih manggai ngagai tingkat ti nadai kala udah diuji. Pusat pelajar Baha’i tu ngembuan siti julok ati ti meri asil ti olih dipeda, ianya, nambah ka pemaioh orang ti arap ti dilatih nyungkak serta ngelichin ka pejalai ripih pengawa masuk beraban maioh enggau penyikar serta pengerindu.

30. “Tumpu ka penguat nuan ngagai ngerembai ka Pengarap Petara,” nya meh munyi lalau Baha'u'llah ngagai bala nembiak Iya, nambah nya Iya nyebut, “Barang sapa ti patut bulih kanggau tu, uji iya angkat serta ngemansang ka nya. Barang sapa ti enda olih, ungkup-kerja iya nya madu orang bukai, ngari ka iya, nerang ka Pegari Penemu Petara tu. “Sebaka enggau ngiga orang ti ngari ka iya ngajar baka meri belanja ngagai pengajar ti pindah pendiau tauka pengajar ti bejalai, siko-siko olih mega ngiga orang ngari ka iya nyadi pengajar ti gawa ba institute, ke nyadi pengajar ka bala pengajar. Ngambi tu dikerja, iya tau nyurong ka pemeri iya ngagai Continental Baha’i Fund, tauka ngagai pan Tumpok, Menoa enggau Antarabansa, ti diagih ka tuju tu.

31. Dalam semua pengiroh sida deka ngulih ka julok ati Lumpar Pengawa Empat Taun, bala pangan dipinta meri tumpu ti tinggi ngagai nguna seni, ukai semina diguna dalam pengawa meri penerang, tang mega ba pengawa ngerembai enggau ngenegap. Seni graphic enggau performing arts serta mega kesusasteraan, lalu olih, nangkup ungkup ti besai dalam ngerembai ka kuasa penarit ti bisi ba Pengarap. Ba tingkat seni bala maioh, ia olih dipajak ka ba genap tempat di dunya, sekali ka nya ba tempat pendiau di pesisir, di pasar tauka di nengeri. Shoghi Effendi ngemuan pengandal ti tinggi ba seni dalam narit perati orang ngagai Ajar Pengarap. Surat ti ditulis ngari ka iya nuju siko orang ti arap ngenatai ka penemu Pengibun: “Maia deka datai alai Pengarap deka ngerembai baka api ti makai babas leboh batang tuju enggau ajar ia dipandang ka ba panggau tauka dalam seni enggau kesusasteraan. Seni olih ngenani ka runding ti tinggi enti disbanding enggau bekelikoh penemu ti chelap, lebih agi ngagai raban mensia maioh.”

32. Leboh bala pangan enggau pugu pengator pengawa di semua endor numpu ka penguat sida bejalai ka utai ti diguna Lumpar, kerja ba projek besai di Bukit Carmel deka mengkang dipejalai nuju penembo ti dijangka ba ujong abad tu. Ba pengujong Lumpar ba Ridvan 2000, rumah ka Pusat endor Belajar ka Tulis Kudus serta Sambung ka Rumah Arkib deka dikena, rumah ka Pusat Ngajar Antarabansa tideka terus mansang ngagai tingkat ti penudi. Piak jalai mensia maioh ti diatu ngerasuk jalai panti ari atas Sungkup Nabi Bab deka ensuruk ari baroh lalu jambatan penyambung ti besai ti bisi kebun bungai Kediri empu deka tembo maia nya, lalu lima iti panti ngalih ke atas pen tembo maia nya. Empat iti panti ngalih ke atas ti agi tinggal serta dua iti ba kaki bukit deka datai ba pemansang ti nyampau maia nya. Pengiroh bukai deka mega dipajak di Pusat Dunya. Perati deka ditumpu ngagai pekara baka bejalai ka di serata dunya tambah adat dalam Kitab-i-Aqdas, nyendia siti volumne Tulis Baha'u'llah dalam jako English, nambah ka pemansang kerja Pusat Ngajar Antarabansa, lalu ngaga singkang ator dikena nambah ka pilgrim enggau temuai ngagai Pusat Dunya.

33. Raban Baha’i di dunya mengkang ngerembai ka pengiroh ia dalam ngemansang ka pengawa rama enggau penatai pemisi serta mega kaul enggau orang luar, lalu ari nya mengkang bekaul terus enggau kuasa ti nuju ngagai penumbuh ator di dunya. Ari ti ningkat ka pengulih ia ngator, Opis ka Pemansang Rama enggau Penatai Pemisi deka manto dalam niri ka pemansang ti udah bisi ba berates iti projek pemansang di dunya, nitih ka pengulih pemisi enggau peluang. Dalam kelang kaul enggau orang luar, pengiroh deka ditumpu ngagai narit kuasa nuju ripih pengawa pemaik dunya, lebih agi nengah raban masuk dalam nyungkak ka hak siko-siko, penuduk orang indu, pengaya serata dunya, enggau pemansang olah perangai. Dalam ngulih ka batang penemu tu, Raban Baha’i Antarabansa siti ari Opis Gerempong Bansa deka ngiga jalai dikena ngering ka agi kaul Baha’i enggau Gerempong Bansa. Pia mega, Opis Pemadah Mensia Maioh deka mantu pugu pengator pengawa Baha’i nguna batang penemu tu dikena meri penerang ti luas agi ka Pengarap. Nyaga hak bala Baha’i di Iran serta pengiroh ti betambah dalam ngelepas ka Pengarap di menoa nya serta di menua bukai alai ia disekat deka nyadi sebagi ari kerja ti beguna dalam kaul kami enggau perintah serta gerempong ukai perintah. Dalam semua pekara baka tu bala pangan serta pugu pengator pengawa dipinta bejaga-jaga ngemata ka pemesai guna kerja bekaul enggau orang luar lalu meri perati ti baru ngagai ia.

34. Ba Ridvan tu dua iti Raban Gelumu Sambiang Bansa deka ditumbuh ti meri pun ti manah ngagai Lumpar Pengawa Empat taun. Enggau pengaga ati kami ngerah ianya dua iko pengari kami ngagai Konvensen Bansa ti ketrubah tu ianya Jari Pengawa Petara Amatu'l-Baha Ruhiyyih Khanum, ka Moldova; serta Mr. Fred

Schechter, kaban Pengelalau ba Pusat Ngajar Antarabansa, ka Sao Tome enggau

Principe. Enggau penesal ati, ketegal pekara ti luar jaga kitai, Raban Gelumu Sambiang Bansa ka Burundi enggau Rwanda enda olih dipilih taun tu. Penyampau pugu pengator pengawa tu di serata dunya agi mengkang 174 iti.

35. Ridvan 2000, titik alai Lumpar Pengawa Empat taun deka tutup, deka datai beberapa bulai empai pengujong abad kedua-puluh. Ba simpang maia tu, dunya Baha’i deka ninjau ke belakang enggau pengaga meda pemansang ti chukup manah serta pemujur ti beperenching ti nanda cherita Pengawa Baha'u'llah dalam kandang maia ti maioh penyadi---kandang maia ti dikumbai `Abdu'l-Baha “abad penampak”. Pemujur tu ukai mit reti ti dipeda maia nya ianya penembo projek Bukit Carmel ti benong dikerja diatu, begulai enggau rumah-rumah bukai ba bukit kudus, deka bediri nyadi tanda pengingat ka pemansang ti udah olih TusunAtor Pengawa maia nya dalam kandang Renggat Penumbuh. Tuchong ka pengaga nya, enti Petara ngemendar, ianya ngator siti pengerami besai di Pusat Dunya nanda penembo rumah-rumah ba Arc serta bejadi Panti nuju Sungkup Nabi Bab ti dibuka ka mensia maioh.

36. Bala Pangan ti dikerindu, kitai masuk Lumpar tu ba tengah-tengah maya ti tusut ti jampat berubah. Dua proses besapit ti diansak ulih teruju Revelasyen Bahá’u’lláh diatu jampat nyadi, betambah laju, alai nitih jaku Shoghi Effendi, “deka mai ngagai tuchung penguat ti deka ngubah mua dunya kitai tu.” Siti proses nya ngempung; siti agi ngeruntuh. Pansut ari “serampur bari” ti ditempa proses tu, pemaik deka ayan berengat-rengat, nengah empas kuasa ti nyerakup laban mensia majak ngeleda ngelala mensia endang rayat siti dunya makin ayan.

37. Dalam ngulihka tuju tu, pekara ti nyadi di dunya empai bangat lama, betentang, bisi nengenyitka ati serta ngandalka ati. Ba sepiak, penusut ti nuntung pekara mensia nyadika pemakai ti ngenakut tiap hari ti nyau menatka asai tubuh; lalu ba sepiak, bala ketuai di dunya suah besaup ngerja pengawa, ngagai Bahá’í ti merati, nanda siti chara menua-menua mutarka penanggul ti nuntung dunya. Uji perati, ambika banding, penyuah aum dunya ti digulu bala ketuai menua ti diatur sekumbang pengudah Taun Kudus empat taun ti lalu, siti ari nya ianya pengerami Lima Taun Penumbuh Gerempung Bansa, alai bala ketuai menua enggau kepala perintah numpuka pengeran sida deka ngulihka pemaik dunya. Nyadika pengaga mega, penyampat enggau pengelengkas bala kepala perintah tu begempung gawa dalam nyatup mayuh bengkah penyarut ti nuntung mayuh bengkah tempat di dunya. Penyadi ti baka tu segembar enggau kangau ti makin kuat ari raban ti bepengelandik ti minta numpuka perati ngagai pengulih sekeda atur dikena merintah serata dunya. Enda ke kitai meda pemansang ti jampat nyadi tu kerja Jari Penelap, kebendar pengerandangka pekara ti besai ti disadang dalam Tulis Kudus kitai?

38. Taja ga numbuhka Pemaik ti Mit enda bepangai ba sebarang pelen tauka kerja Bahá’í, lalu taja ia ukai ngarika batang tuju ti ditaga ngagai bansa mensia lebuh nuntung Rambau Emas, raban kitai bisi tangkup pengawa meri pengering pemansang semengat ti ngiring proses nuju pemaik nya. Guna ba jam tu diatu ianya nambahka pengiruh kitai dalam nirika Sistem Bahá’í ti deka narit penetap ari Bahá’u’lláh ari nya mansutka pemansang semengat ti ngenyampatka proses tu. Dua tapi pengawa besatup enggau kitai: siti ianya ngatur pengawa ngajar alai pemayuh tubuh raban kitai ransing dikerja, betusun serta siku-siku bela enggau, lalu dalam ngeregaska program ngelatih ti luas ti nentuka pemansang sumber mensia ti mayuh; lalu siti agi ianya nembuka kerja ba projek Bukit Carmel ke alai mesti berantu meri awak mansutka penatai pemisi ti chukup dikena. Dua tumpu tu, enti keras dikemansang, deka nyendiaka gaya ti ulih ngelepaska penguat kuasa ti deka ngubah tuju penunga bansa mensia di serata dunya.

39. Taja pen menasan nuju pemaik nyangka pandak, mayuh pemedis deka dipansa; taja pen pekara ti disadang deka datai chukup manah, ia mesti datai ba penuai ia nengah ubah pemansang ti lama, ensepi penguji, penanggul enggau penyarut ti nyempulang ia, nuju maya ia deka ayan, nitihka tarit kuasa Pengarap Petara, ti dikumbai Pemaik ti Pemadu Besai. Ba kandang maya kediatu, mensia di serata endur suah betunga engau utai ti ngasuh ati merampau sereta asa sebedau sangkai ba ngelala pemanah saka ti benung nyadi. Kitai ke udah diterang ulih Revelasyen ti baru ngembuan Leka jaku suchi nyadika pengentap kitai, Pelen Petara ngiring kitai, cherita lama ti ngembuan pemerani nyadika peransang kitai. Nya alai kitai anang semina gaga ketegal Leka jaku ti dikesayau kitai, tang mega teperansang laban pengawa ti nunjukka pemerani enggau beberantu sampai ke saritu pen agi manchar terang ba menua alai Pengawa Petara tu ada.

40. Kandang tujuh belas taun bala menyadi kitai ti diperinsa di Iran udah nunjukka pengarap enggau pemerani ati ti teguh udah mansutka terantang ti luas ke Pengarap, ngansak ia pansut ari dilindung. Ditu mih tanda ti idup ba maya kitai kediatu nunjukka pengulih dalam krisis enggau pemenang. Minta kasih Petara, ngichaka bala menyadi kitai orang Iran dilepas ari tanchang pemedis ti nuntung sida lalu dianjung ngagai penampak enggau pemanah pemenang ti semina Pemajik Beberekat aja ulih meri. Peneleba ti diasai sida nyadika tangkan enggau teladan ngagai kitai semua enda milih dini endur kitai diau; laban tentu, sakal, baka ti dipadah Tuai ngagai kitai, tetap deka ngayanka pala diri ba semua genturung menua. Taja ia nyangka ngembuan rangkar ti enda sebaka ba tempat siti enggau tempat siti, nadai kakang ia tetap terit. Tang, terima kasih ngagai pengering penelap Bahá’u’lláh sereta penegap ti ditunjuk bala pangan ti mulia, kitai nemu chara baka ni nyatup pedang munsuh enggau nadai penakut. Amat bendar, Tuhan ke Bala Malikat udah besemaya ngagai rayat Iya pemenang ti besai sereta nyemetak.

41. Lebuh bansa mensia dibalut sereta diperinsa pemedis ti nuntung ia ke datai ari temadun ti enda ulih diatur agi, uji kitai nentuka pala enggau ati kitai difokas ngagai kereja kudus ti diengkah ba mua kitai. Laban ba tengah tengah penyarut tu mayuh peluang mesti diguna “ke tuju ngerembai jauh sereta luas penemu kuasa ti ulih nyelamat ke dikembuan Pengarap Bahá’u’lláh sereta ngemasukka orang ti baru nyadi soldadu penitih Iya ti makin ngerembai.” Pelen tu alai diatu kitai keran deka ngereja ia nya siti ba maya ti pemadu kritikal ba pengidup dunya. Ia ngembuan tuju deka nyendiaka komuniti napi ubah ti deras ke nyadi ba dunya lalu ngengkah komuniti kitai ba endur ti ulih ngetanka pemerat penguji enggau teruju ti nyempulang ia sereta nirika rangkar ti lebih nyata gawa alai dunya ulih nunga minta bantu enggau teladan ba tengah tengah saka maya ti charut. Nya alai, Pelen tu duduk ba tempat ti spesial dalam pengawa Bahá’í enggau cherita lama dunya. Ngagai kitai ti meda visyen Pengarap chukup benasit laban bepeluang enggau gawa dalam meransang sereta nyungkka proses nya

.

42. Arapka semua kita angkat nangkup kereja ba maya ti genting tu. Arapka genap iku ulih ngukir kelai diri ba maya ti pandak tu ke dichas enggau pengulih sereta pengandal ke semua bansa mensia. Anang kita limpang tauka kiruh enggau utai ti deras nyadi ba rambau saka tu, selalu ingatka lalau enggau iring ti enda nemu salah, Shoghi Effendi: “Ukai kitai, kitai tu utai idup ti mit, deka nguji, ba rengat ti chukup kritikal dalam cherita lama pengidup mensia ti panjai sereta berubah rubah nasit, sangkai ba pemereti ti betul sereta ngemuaska ati ba singkang ti mesti mujur betangkan tangkan mai raban mensia ti bedarah, merinsa enda ibuhka Petara, lalu enda bedulika Bahá’u’lláh, ari tempat pemedis ia ngagai tempat ia idup baru.… Ungkup kereja kitai, enda kira penyarut ti nyadi, enda kira pengasa gaya kediatu, enda kira penyuntuk penatai pemisi kitai, ianya gawa enggau ati ti lantang, andal, sereta enda ngetu meri bantu kitai, nitihka pengulih diri, ngambi bejalaika kuasa, ti dipasang sereta diiring Bahá’u’lláh, mai bansa mensia keluar ari lebak pemerinsa enggau pemalu nuju tuchung pemadu tinggi kuasa enggau penampak.”

 

Windows / Mac