O tù lu mio Diu, testimunieghju chè tù m’hai creatu per cunnòsceti è aduratti. Affermu in quest’istante a mio imputenza è u to putere, a mio puvertà è a to ricchezza. Ùn ci hè altru Diu chè tè, u Succorsu, l’Assolutu.
Quale, for chè Diu, face sparisce e difficultà ? Dì: ludatu sia Diu ! Hè solu ellu Diu ! Tutti sò i so servitori è tutti si sottumèttenu à u so cumandamentu.
Dì : Diu basta in tuttu, più chè tuttu è nunda, nè in celu nè in terra, for chè Diu, po’ bastà. In verità hè in sè stessu Quellu chì sà, u Sustegnu, l’Onniputente.
O Diu ! o Diu ! Eccu un acellu cun l’ale ferite è chì vola piu pianu. Assistilu per ch’ellu pigliesi u so volu versu e cime di a prusperità è di a salvezza, per ch’ellu voli fermu in a gioia più perfetta è a più grande felicità ind’e u spaziu infinitu per chè in u to altissimu Nome, ellu fessi sente dapertuttu a so meludìa, ch’ellu incanti cù a so chjama quelli chì stanuà sente è ch’ellu schjarisca cun segni d’inspirazione quelli chi guardanu. O Signore ! Sò solu è ùmile. Ùn aghju altru appoghju chè toiu, altru aiutu chè toiu, altru sustegnu chè toiu. Rinfòrzami ind’u to serviziu. Assistimi cù e coorte di i to ànghjuli, accordami a vittoria in a diffusione di a to parolla è permetti ch’eo faccia cunnosce a to saviezza à mezu à e to creature. In verità, sì pruttetore di i pòveri è u difensore di i debùli, è, in verità, sì u Putente, u Forte, l’Indipendente !
Benedettu hè u locu, a casa è a piazza, a cità è u core, a muntagna è u riparu, a spilunca è a valle, u paese è u mare, l’ìsula è u pratu, induve Diu hè chjamatu è a so loda glurificata.
U to nome mi guarisce, o tù chì sì lu mio Diu, è u to ricordu quellu chì mi cura. A to presenza è a mio speranza è u mio amore per tè, tù chì sì u mio Cumpagnu. A to misericordia hè quella chì mi cura è u mio succorsu in stu mondu è in quill’altru. In verità, tù sì u Generusìssimu, u Sapientìssimu, u Savìissimu.
O Diu, tù chì sì lu mio Diu, per mezu di u to mare di guarigione, per mezu di i splendori di u sole di a to grazia, per mezu di u to nome chì hà sottumessu i to servitori, per mezu di a forza di persuasione di a to parolla esaltante, per mezu di a to putenza di a to penna riveritìssima è per mezu di a to misericordia antivista à a creazione di tutti quelli chì sò in celu è nant’à a terra, ti dumandu di purificammi cù l’acque di a to liberalità da ogni afflizzione è da ogni turbamentu, da ogni debulezza è da ogni mancanza. O tù chì sì lu mio Signore, vedi u to servitore chì pichja à a porta di a to liberalità è vedi quellu chì mette a so speranza in tè, attaccatu à a funa di a to generosità. Ùn li rifusà, m’arricumandu, ciò ch’ellu ti chere da u mare di a to grazia è da u sole di a to tènera buntà. Hai u putere d’agisce cum’ella ti piace. Ùn ci hè altru Diu chè tè, l’eternu Magnanìssimu, u Generusìssimu.
Mi sò svegliatu ind’u to riparu, o tù chì sì lu mio Diu, è cunvene à chì cerca stu riparu à stà ind’u santuariu di a to prutezzione è ind’a furtezza di a to difesa. O tù chì sì lu mio Diu, allumina u mio esse internu cù i splendori di l’alba di a to revelazione, cum’è tù hai alluminatu u mio esse materiale cù a luce matuttina di i to favori.
O tù chì sì u mio Signore, fà sì chì quelli chì còllanu ver di tè tròvinu riparu in tè chì sì u Cumpagnu altìssimu. Accòrdali di stàssine à l’ombra di u tabernàculu di a to maestà è di u santuariu di a to Gloria. O tù chì sì u mio Signore, da u mare di a to clemenza sparghji sopra à elli ciò chì i renderà degni di stà, fintantu ch’ella durerà a to suvranità, ind’u regnu di quassù, ind’è u to imperu celeste. Tù hai u putere di fà ciò chì ti piace.
O tù chì sì lu mio Diu, tù chì perdoni i peccati, sparghji i favori è cancelli l’afflizzione ! In verità, m’arricumandu per chè tù perdoni i peccati di quelli chì hanu lasciatu a so forma murtale è si sò innalzati ver di u mondu spirituale. O tù chì sì u mio Signore, cancella e so colpe, disciogli e so pene è cambia i so bughjori in luce. Àprili u giardinu di a felicità ; purifichèghjali cun l’acqua più chjara è accòrdali di cuntemplà i splendori di a più alta muntagna.
Metti in mè un core puru, o tù lu mio Diu è raccendi in mè una cuscenza appaciata, o Speranza mea ! Chì u spìritu di putenza mi rinforzi in a to causa, o Amatu meu, è chì u lume di a to gloria mi palesi a to via, o tù l’ùnicu chì bramu ! Per a forza di u to putere supranu, innàlzami fin’à u celu di a to santità, o Surgente di u mio esse è chì i ventulelli di a to eternità mi ralègrinu, o tù chì sì u mio Diu ! Chì u soffiu di e to meludìe eterne m’arrechi a serenità, o tù lu mio Cumpagnu ! Chì e ricchezze di a to presenza immèmure mi frànchinu di tuttu ciò chì ùn sì tù, o tù lu mio Maestru, è chì tutti l’annunzii di a revelazione di a to essezza immutàbile mi còlminu di gioia, o tù, l’altìssima evidenza, o tù, u più secretu di i misteri !
O tù lu mio Diu, o tù lu mio Diu, unisci i cori di i to servitori è impàrali u to grande prugettu. Ch’elli pòssanu seguità i to cumandamenti è rispettà a to lege. Aiùtali, o Diu, ind’i so sforzi è accòrdali a forza di sèrveti. O Diu, ùn l’abbandunà micca à sé stessi, ma cù u lume di a to cunniscenza, accumpàgnali è ralegra i so cori cù u to amore. In verità, sì u so Sustegnu è u so Signore.
O tù, Signore di buntà, hai creatu tutta l’umanità da u solu è stessu ceppu. Hai decisu chì tutti l’omi sarìanu di una stessa famiglia. Ind’a to santa presenza sò i to servitori, è tutta l’umanità s’aggrotta sottu à u to tabernàculu ; sò tutti aduniti in giru à a tàvula di a to generosità, alluminati da a luce di a to pruvidenza. O Diu, sì misericurdiosu cun tutti, è colmi di i to bè à tutti, i prutegi à tutti, li dai a vita. Hai datu à tutti e facultà è i talenti è sò ciuttati ind’è u mare di a to misericordia. O tù, Signore di buntà, unìscili tutti. Fà sì chì e religione s’accòrdinu è chì e nazione sìanu unite per ch’elle si ricunnòscanu cum’è una famiglia sola è ch’elle guàrdinu a terra cum’è una sola casa. Ch’elli pòssanu campà tutti inseme in una armunìa perfetta ! O Diu, alza a bandera di l’unità di u gèneru umanu. O Diu, stabilisci a to grandìssima Pace. O Diu, lega i cori. O tù, Babbu benefattore, Diu, ralegra i nostri cori cù u muscu di u to amore. Allumina i nostri ochji cù u lume di a to pruvidenza. Sàziaci l’arechje cù a meludìa di a to parolla è aggròttaci ind’a furtezza di a to sullicitùtine. Sì u Forte, u Putente, sì u Clemente, u Mansuetu chì perdona e debulezze di l’omi.
O tù chì sì lu mio Diu, cundùcimi, prutègimi, allumina a làmpana di u mio core è fammi diventà una stella luccicante. Tù sì u Forte, u Putente.
O Diu, alleva issu bambinu in grembiu à tu to amore è nutrìscilu cù u latte di a to sullecitùtine. Cura issu tallu ind’u rusulaghju di u to amore è annàcqualu cù l’acqua di a to buntà. Fà ch’ellu sia figliolu di u regnu è cundùcilu ver di a to dimora celeste. Tù sì putente è mansuetu. Tù sì u Dispensatore, u Generosu, u Signore d’infinita misericordia.
O Diu, insegna sti zitelli. Sò e piante di u to ortu, i fiori di u to pratu, e ròsule di u to giardinu. Fà piove nant’à elli a to acqua, falli luccicà cù u sole di realità, di tuttu u to amore ! Chì u to ventulellu i rinfreschi per ch’elli sìanu ben allevati, ch’elli crèscanu, si svilùppinu è sbòccinu in tuttu u splendore di a so bellezza ! Tù sì u Dispensatore, tu sì a Cumpassione.
O Diu, fa splende issu giòvanu è sia generosu ver di sta criaturella Accòrdali a cunniscenza. Ogni matina, dalli una forza più soda è prutègilu per ch’ ellu si franchi ogni errore, ch’ellu si dia di rimenu per a to càusa, cunduci i ribelli è i sfurtunati, sprigiuneghja l’incarcerati, disceta i spenserati, è chì tutti apprufìttinu di u to ricordu è di a to loda. Tù sì u Putente, u Forte.