U’ura ma marek iyanupe wainapen. Marek iyanupe aeni usu marek ae visen. Iwa Maman iup megawa. Namu pusin nanin ge ginan namun bigi warat amba toentanet tanam arige gambenaen yonat wat.
Ne ipiri wakakayatsiagin, O Ayop negawa Ge tavenat nimanegeyan menan, Ge ne imuwasuat negawa inagap amba Genan aeamat taigain.
Ne ipiri wakakayatsiagin endi mari, ne aroyan uon amba Ge amun gega gapan. Ne vidi gorowa orup da amba Ge enpuraput iapanewa. Ayop raren siga uon ap Ge Gegenat ri, koewa wamewa nenan Aeamat amba Ge Yaibobot.
Wat aimagam irani Maman Ge inagap. Iwa Ge dun ganat, koa mentarin, Ge yaibobot sunanon, nonup baigan, ge uwae yamanok, Ge gawo bonabon, ge amun ge koa kapisi ibariwa. Maman Ge gegenat anut gega gapan ra menan anuianawa, asik gega toentane Puiman Kanama anegawa mine en wana onep. Den siga da apan imuga wareniwa. Ge amun gega wana Yauga Namu irena ge yaibobot paua mega ire yavep. Irani amena kwiman gapan ge mapa piupa, da Ge om gega mine uon nagaet. Ge Ayop wande iram, Ge piup kwiman eve use ine bukwa darat wani dawap waran mum ge waup aeamat taianawa ge yavianawa. Ayop da den sia uon. Ge gegenataet di Ge dun epara, aro amun, anut ge asik iragi ibariwa. Wat ganatam O Maman! nao gega nagire gine namup. Mu den yawagep, den imuberi bigi wara Mu toentane imaetararin nambae gan dotauvep. Apa amba Ge iraga yave kakayasep, iwa Ge gek ingane matauan dima opata gega magatam taiagi amba Ge dun ganat gega veraut en tomagen. Ipiri Ge irani piup ge kwiman Ayopewa dawap.
Maman! Maman! Nao gega taine nagire tobot ta amba Ge nao Gega kanamawa pauwa mega to ewam. Kakae Ge iup gega ae amat ta kakayasep amba ewap amop. Wat ago tamo, Maman! Wat bemak mun amba aro muna Ge nao Gega tap. Maman! Mugenat ae eya vemo, go mu ap muga Ge dun ganat Ge asik gega gapan wat aipagam mum. Ipiri, Ge gegenat mu Ago mugawa amba Ayop mugawa.
Bop U’uraewa ma orup bodu muga aonagaet nani yambun uon tan (15) mugenat den wain amba wa munain. U’ura ma megenat Bahá’í uruga iyam iyam ta wain. Ma orup daiton megenat wapi amba uruga ao paina yonain. At bowarewa gambena eya toenta nain. (Kitáb-i-Aqdas)
Maman! Ma Ge nao gega apanewa osuwa, Ge anusumat tageni amba Ge pauwa gega den, amba gine namu genan toentanen dim dim uruga imuwarat tan Ge gegenat anusumat taiga. Ge gegenat ipiri, bagusisi nunan anuianawa. Irewa yao, Ge Da bigip muga imu warat taianawa amba ta bambam nuga wat wagianawa, Ge gese upuru Gega pae pose gapan dotauvep. Me yaibobot wandep. Maman da siya uon, Ge gegenat, koewa imuwarat taiyanawa, wamwam nunianawa puiman mine inap ta, amba piup ge kiman eya venaseni Ge bagusisi gega kanama apa wanden. Maman ra den siga uon Ge gegenat taedi wamwam koewa nuga Imuwarat taianawa, Uruga Nunianawa.
Ma den wapen pauwa nani yamben daiton (6) gaun Alláh-u-Abhá wata amba den pauwa (19) mugenat nop ma daiton daiton wa vitait.
Alláh-u-Abhá!
Nu uruga ipiri kaut maman inap enuinit. (19)
Alláh-u-Abhá!
Nu uruga ipiri omaninu Maman inap poponagianit. (19)
Alláh-u-Abhá!
Nu uruga ipiri bumaganu Maman wanianit.(19)
Alláh-u-Abhá !
Nu uruga ipiri wat taragat Maman wat taragasinit. (19)
Alláh-u-Abhá!
Nu uruga ipiri gaun Maman inap waiyanit. (19)
Alláh-u-Abhá!
Nu uruga ipiri Kwataem momon Maman inap taiyanit. (19)
Maman! Ge koewa imuwarat apanewa. Puraput nunianawa. Wat tondak apanewa. Ipiri ne sitatao genan waiangin, Ge me bigip mega bigi wat, me esuwa piup ma mega gase bare Ge piup gega dotauven. Ayop negawa! Mu bigimu wat, kayawan mega ise wat mut, amba sisip to entane ganat tauvep. Dimat mum, mu Ge aton gega gam tauvep kaum gega irena gapan ugumu bigi wat, amba mu sururugaet entodage Ge bonam gega dotauvep.
Ne mumaget ao yon waingen Ge aeamat gega gapan. Mamanawa! Amba at pa nega aeveyan anusumat nega uruga Ge inagap, amba ne inat yonat nega Ge ae amat kwayup gega gwanap. Amena kwiman gapan dom bain gega kakaewa wasuen nen, amba amat tanege siya pa nega tauwap, den siga ne Ge gogon gega gapan amat tanege imuna Ge gegenat anu sumat kaimaket inagap anu dawagep. Maman da siga uon go Ge gegenataet di, Ge daiton, Ge om gega da uon, Uruga anuianawa, Uruga amat taianawa.
Endi koewa toborapen apane Maman? Wata ge: Maman wat taragasepen. Me Maman di. Uruga Me nao mega nagirewa amba uruga aeamat Me wani gapan tapen.
Nop ma nainit wamewa gapan waen ge apan mu dere, waenapan dere den wagup namumup yona wain, ma yogup kanamawa gwanap wan. (Kitáb-i-Aqdas)
Wat Ganatam Iragi, Maman! Ipiri ma ge nao gega apanewa amba Ge nao gega waenewa iyam iyam taiyamun, Ge iyan tantan ge, Ge bagusisi gega gam amba mu baigan Ge anumunana gapan wanumop. Ayop! Wat ago mun piup ma gapan amba yaibobot Gega arewa gam mu wat aimagam mum Ge gese upuru gega gapan. Ayop! Gindak mun amba wat ago mumigan ae nao gega tap. Tamanam mum mu ge nao gega wat matagamep, Ge piup gega gapan amba kwayup Gega gan naumo ak, yon sum eya tap piup ma gapan amba namumupe. Ayop! Mu sitatao kayawan. Ge gegenat inagap waiamun. Ipiri mu nainit Ge Iup gega wana gapan ae amat tain. Amat tamo amba mu baigan wae uon ta amoinuman wam muga uwewa pauwa gapan. Ipiri Ge gegenat yonbot apanewa, Wandebobot apanewa amba Aro apanewa.
Maman! Tamanam nimanek, kwayup tanek, dun mine wat ganatam nimanek amba buwanae ganase mine tap. Ge aro amba Ge amun.
Maman! Otasin gega ma asik mun, mu irani Ge naewa gegawa. guwa, Ge dinip rarema ere bobon ge nao gega potap yanine mine. Ge gese upuru gega aigamup wat ganatamep, moe ginayam den. Ge irot gwarot gega aimagewa ugumu nauvisigan, den negin tamanawa gapan tauvep. Mu kakaevet yane darat wap, amba wae uwon yane dorep. Ge nuniana apanewa. Ge aigap iragena apanewa.
Ayop negawa! Ayop negawa!. Ne orup osu bodu nega arita uon. Ne ge am gega kakaewa gan wasunek, bagusisi den, negin tamanawa gapan tamanam nimanek, baigan den. Asik ge negin kakaewa nen, Ge imuga ganase irenawa me gogon mega gauwarap, sisip arige gapan ma wat tananek, tanege ne merao me yagwan mine ganasin wap. Bagusisi ra inanap eya tauvep. Tanege ne rarema suwa aimage ra nao gega potap yanini mine tap.
Ge yauga ne dom gigit negawa, Maman! amba genan anuinawa ap ne inak neniwan. Mainegap iren ne tauwat anuivin, amba aton Ge genan anuinawa ap ne wat ago negawa. Ge bagusisi ne inanap taiyanawa ap ne inak neniwan amba wat ago dawap piup ma gapan amba piup namunupe den. Ge ipiri dim dim irani-nunianawa, Irani-Anuianawa, Irani-Kwayup taianawa.
Maman! Ge om gega da uon! Ge Ayop wande iram! Iyan ma Ge kwiman ita dun gegawa. Dom pasukat tamo amba aneya gega amena den mu wat nagat mum, ap gapan mu Ge ita anan gega apane venasep piup ma uruga Ge aton gega gan amba nop wait gega wat senamep. Maman Ge mu den pasukat mugawa amba garagat gapan, sunup gapan, at bumak gapan, oma pose gapan, pon gapan, dawara gapan, Ge gindak mum, ap gapan mu Ge amun sitatao gega menan ao waiyamun amba gaup amun gega gapan. Ipiri Ge gegenat Amun, Ap amba Aro aigap iren, amba Ge gegenat amat, Anuiyanawa amba yavianawa.
Wat aimagam uruga at outu koewa, at pa, amba pa sewa, amba at bumaggewa, amba sunup, amba at darak, amba at dagup, amba at bumak, amba at piup, amba puiman, amba at guguwa, amba pon ap gapan Maman yauwa wane, amba Me ganaseden wat taragasen.
Wat taragat iragi kwiman Ayop ge inagap. Iwa Ge wam sisip ma potap ganat wat magatam baran. Ap menan den nop gega ase wat aroga baran menan amba da ne den wat ago tanek.
Wat taragat irani kwiman Ayop ge inagap. Ne ao bariangin Ge inagap aroe gan sisip iniram toentane ganat venasen Dima opata yaunewa ge ibari ap gapan amnata yonana amba ise magatam tan amba den ase wat arogamean. Ap menan oyama wasuena vise ne aiganap amba mu aigamup den waenapan ansena tobot taton negin daiton anitoniwa nagirewa. Ao yone nu ago nune ainagat nimanep magunu mine venasep ao kwiman pae pose dune ganase potap unun anet. Ap mepe nu bigip madoga nuga iragi ise bigiwaranep, baigan yaunewa tamanam nun. Ne Ayop negawa! Ne orup ap di nonup baigan gega taniwa ginap watnatan amba Ge bagusisi ge aton gega den inamup. Maman Ge dimat tamanam tane amba den ne imuna potana wareni nagire dere piup ma kakaewa megawa amba piup namunupe tau wepi den.
Ewat virip tapen siragam `Alá (Aigap) wam derewa (2) gapan aepi wam apane daiton (20) gapan uon tata. Yaumak ap gapan ewat go kaum da marek eya dotauvepi gapan nata aepi wam geyarepi pauwa. Yaumak ma guwanu aro wanapen, ao wasupen wamewa. Orup en muga (15) gauwarap virip eya tain, waen bagurenawa, orup am nainiwa vek denawa, amba waenapan tanewa den.
Ne esuna ewat mega virip taiyangin taba ge kaum den virip taiyangin. Ap menan bumagana bigi wat, wat aimagam ona da ugupe men eya anup mek Gegenat taet di, anut koewa tantanewa okom taunek, ae amat tanek Ge gaup gega kakaewa ne guwana kwayup tap, amba ap Ge iwa Gegenat genan ae amat Gega tain.
Nop ma nainit wamewa gapan waen ge apan mu dere, waenapan dere den wagup namumup yona wain, ma yogup kanamawa gwanap wan. (Kitáb-i-Aqdas)
“Nu uruga, Ipiwa gapan Maman iup mega ae amat tait.”