Obligatory

Tatalo Faaleogalua Faapoloa’iga

E faa-tolu ona faia i aso taitasi i le taeao aoauli ma le afiafi

O se tasi e fia tatalo ia fafano ona lima ma faapea atu:

Lo’u Atua e, faamalosia lo’u lima ia mafai ai ona taofia Lau tusi i le mausali o le a le mafai ai e ‘au a le lalolagi ona malo i ai. Leoleoina mai le soona fetagofi iai o soo se tasi lava e le auai. E moni, o Oe O le Malosiuma, o le Mamana Silisili.

A o mulumulu mata ia faapea atu o ia:

Lo’u Alii e, ua liliu atu o’u mata ia te Oe! Faapupulaina i le malamalama o Ou fofoga. Puipui mai le soona liliu atu i so o se tasi vagana ai Lau Afio.

Tu i luga, ma faasaga i Qiblih (Bahjk po o ‘Akka’) ma faapea atu:

Ua molimau le Atua e leai lava se tasi Atua na o Ia.

O malo o Fa’aaliga ma le foafoaga o Ana ia. E moni, na faaalia e Ia o Ia o Le o le Punaaso o le Fa’aaliga, o Le sa fetalai mai Sinai, o Le na mafai ai ona susulu le Tafailagi Silisili, ma gagana mai ai le Laau Lote i tala atu o le mea e le i uia e se tasi, ma o Le na mafai ai ona folafolaina mai le valaau i tagata uma o loo i le lagi ma luga o le lalolagi: “Faauta ua afio mai le Puleaoao Uma. O le lalolagi ma le lagi, mamalu ma le pule e o le Atua ia, le Alii o tagata uma, ma o le Puleaoao o le Nofoalii i Luga ma le lalolagi i lalo nei.”

Ona punou lea ma lima i tulivae ma faapea atu:

E silisili a’e Oe i luga o a’u viiga ma viiga a so o se tasi e ese mai ia te a’u, i luga a’e o a’u ma faamatalaga a i latou uma o loo i le lagi ma i latou uma o loo i le lalolagi!

Ona tu lea i luga ma lima e faamafola mai i mata ma faapea atu:

Lo’u Atua e, ia le faapologaina o ia o loo pipii atu i le tuupao o Lou alofa mutimutivale ma Lou alofa tunoa ma tamatamailima faatoaga, o Oe o Le o so i latou o e fa’aalia le alofa mutimutivale o le Alofa Mutimutivale Silisili.

Ona nofo lea i lalo ma fa’apea atu:

Ou te molimau atu i Lau aufaatasiga ma Lou tafatasi, ma o Oe lava o le Atua, ma e leai se tasi Atua i tala atu o Oe. E moni sa faaalia e Oe Lau Fuataiga faataunuuina Lau Feagaiga, ma tatalaina faalautele le faitotoa o Lou alofa tunoa i tagata uma o nonofo i le Lagi ma luga o le lalolagi. O le faamanuiaga ma le filemu, le faaneetaga ma le mamalu o loo i luga lea o Au pele, o i latou ia e le i mafai ona taofia mai fesuiaiga ma avanoa o le lalolagi mai le liliu atu ia te Oe, ma o se sa tuuina atu a latou mea uma i le faamoemoe e maua mai ai le mea o loo ia te Oe. E moni, o Oe o le Faamagalo Faavavau, o le Foaialofa Uma.

 

Tatalo Puupuu Faapoloa’iga

E faa-tasi ona faia i le 24 itula i le aoauli.

Fufulu ou lima ma ou mata ma faasaga i le Qiblih

Lo’u Atua e, ou te molimau atu, na faia e Lau Afio a’u ina ia iloa Oe ma tapua’i atu ia te Oe. Ou te tautino atu i lenei itula, lo’u augavale ma Lou malosi, o lo’u mativa i le ma Lou tamaoaiga.

E leai lava se tasi Atua na o Oe, o le Fesoasoani i Puapuga, o le Puna o le Ola.

 

Tatalo Umi Faapoloa’iga

E faa-tasi ona faia i totonu o le 24 itula

O se tasi e fia tatalo i lenei tatalo, ia tu luga ma liliu atu i le Atua, a o tu o ia, vaai i le itu taumatau ma le itu tauagavale, e pei o faatalitali i le alofa mutimutivale o Lona Alii, le Alofa Mutimutivale Silisili, le Muti mutialofa, ma faapea atu:

O oe le Alii o Suafa uma ma o le Mataisau o lagi! Ou te ole atu i Lau Afio e ala ia i latou o Punaaso o Lou Uiga lilo, le Faaneetaga Silisili, le Mamalu Uma, ina ia faia la’u tatalo o se afi o le a susunuina ai puao sa taofia ai a’u mai Lou matagofie, ma o se malamalama o le a taitaina atu ai a’u i le vasa o Lou Faatasi mai.

Ona sisii lea i luga ona lima i le faamaualalo i le Atua ia viia ma faaneeneeina pea o Ia ma fai atu:

O Lau Afio o le Manaoga o le lalolagi ma o le Pele a malo! Ua silafia e Lau Afio ua ou liliu atu ia te Oe, ma faamuataina sootaga uma ma so se tasi vagana Oe, ma pipii atu i Le Sootaga ma Oe, e ona le gaoioiga na lagaina a’e ai le foafoaga atoa. Lo’u Alii e, o a’u o Lau auauna, ma o le atalii o Lau auauna. Siliasila mai ia te a’u ua tu sauni atu e faia Lou Finagalo ma Lou manaoga, ma ua le manao i se tasi lava mea vagana Lou finagalo malie lelei. Ou te ole atu ia te Oe i le Vasa o Lou alofa mutimutivale ma le Fetu Ao o Lou alofa tunoa ina ia faia i Lau auauna e pei ona finagalo ma malie i ai Lau Afio. Ona o Lou malosi e matua sili a’e i luga ta’uta’uga ma viiga uma! So o se mea lava sa faaalia e Oe o le mana’oga lea i lo’u ma o le pele i lo’u agaga. Le Atua e, lo’u Atua! Ia le silasila i o’u faamoemoega ma a’u faiga, ae sili ona silasila i luga mo Lou finagalo sa siomia ai lagi ma lalolagi. Ona o Lou Suafa Aupito Silisili, Oe na le Alii o atunuu uma! Ua ou manao tau lava o mea e finagalo i ai Lau Afio, ma alofa tasi i le mea e pele ia te Oe.

Ia tootuli ma ifo toele ma faapea atu:

E silisili ese oe i luga o faamatalaga a so o se tasi vagana Oe lava, atoa foi ma le iloa o so o se tasi vagana Lau Afio.

Ona tu lea i luga ma faapea atu:

Lo’u Alii e, faia la’u tatalo o se vaipuna o vai ola o le a mafai ona ou ola umi ai e pei o le umi o le a tumau ai Lau pule, ma faia ai le ta’uta’uina o Oe i lalolagi uma o Ou lalolagi.

Ona sisii lea luga lima i le aioi atu ma fai atu:

O oe o Le ua liu suavai ai loto ma agaga ua vavaeesea mai ai, ma e Ona le afi o le alofa na faamuina ai le lalolagi atoa! Ou te ole atu ia te Oe ona o Lou Suafa lea na na faatoilaloina ai e Oe le foafoaga atoa, ina ia le taofia mai ia te a’u le mea o loo ia te Oe, o lau Afio o Le pule i tagata uma lava! Lou Alii e, ua silafia e oe lenei tagata ese o loo faataalise atu i lona aiga aupito sili i lalo ifo o le paolo o Lou mamalu, ma o loo i totonu o lotoa o Lou alofa mutimutivale; ma le tagata agasala lenei o loo saili atu i le vasa o Lau faamagaloga; ma lenei tagata faatauvaa i le lotoa o Lou mamalu;ma lenei tagata mativa i le pogai o Lou tamaoaiga. O ia te Oe le pule e poloaiina ai so o se mea lava e finagalo i ai Lau Afio. Ou te molimau atu e tatau ona viia Oe ona o Au galuega, ma ia anaanaina i Au tulafono, ma ia tumau i le leuuina’ia i Au poloaiga.

Ona sisii lea i luga lima ta’u faatolu le Suafa Silisili Allah’u’Abha. Punou i lalo ma lima i tulivae i luma o le Atua - vivii ma faaneeneeina o Ia - ma fai atu:

Lo’u Atua e, ua silafia e Oe le faageetia o lo’u agaga i totonu o O’u itutino ma totoga, i ana moomooga e tapuai atu ia te Oe, ma ona naunautaiga e manatua Oe ma vivii i Lau Afio, le ala na ia molimau ai i le mea na molimauina e le Fofoga o Lau Poloaiga i le malo o Lau folafolaga ma le lagi o Lou poto. Lo’u Alii e, i lenei tulaga ua ou naunau ai e ole atu ia te Oe i mea uma o loo faatasi ma Lau Afio, ina ia ou faaalia ai lo’u mativa, ma faailoa ai Lau foaialofa ma Lou tamaoaioga, ma mafai ai ona tautino atu lo’u augavale, faaalia ai Lou mana ma Lou malosi.

Ona tu lea i luga ma sisi’i faalua on lima faatoga ma faapea atu:

E leai se tasi Atua na o Oe, o le Malosiuma, o le Foaialofa Uma. E leai se tasi Atua na o Oe, o le Faitofiga, mai le amataga ma e oo i le i’uga. Le Atua e, lo’u Atua! O Lau faamagaloga ua fanaufouina ai a’u, ma o Lou alofa mautimutivale ua faamalosia ai a’u, ma o Lau valaau ua fafaguina ai a’u, ma o Lou alofa tunoa ua faatuina a’e ai a’u ma ta’ita’i ai a’u i Lau Afio. O ai a’u nei ou te mafai ai ona ou tu i le faitotoa o le aai o Lou latalata mai, po o le taulai atu o o’u mata agai atu i pupula o loo susulu mai le lagi o Lou finagalo? Lo’u Alii e, ua silafia e oe lenei tagata inosia o loo tu’itu’i atu i le faitotoa o Lou alofa tunoa, ma lenei tagata valevalenoa o loo saili atu i le vaitafae o le ola faavavau mai aso o Lau foaialofa. O Lau Afio o le Alii o suafa uma, o Lau Afioga o le poloaiga i taimi uma, a o a’u o le gaua’i ma usiusitai ma le loto atoatoa i Lou finagalo, le Mataisau e, o lagi.

Ona sisii faatolu lea o ona lima ma fai atu:

E silisili ese le Atua i so o se tagata sili lava!

Ona tootuli lea ma ifo toele ma fai atu:

E maualuga tele Lau Afio mo viiga a i latou o e ua latalata atu ia te Oe, ina ia o a’e i le lagi o Lou latalata mai, po o manulele o loto o i latou o e ua matua faamaoni ia te Oe, ina ia taunuu atu i le faitoto o Lou lotoa. Ou te molimau atu e matua sili atu ona fapaiaina Oe i luga a’e o ta’u uma ma e matua paia tele i luga a’e o igoa uma lava. E leai se Atua iina na o Oe, o le Faaeaina Silisili, o le Mamalu Uma.

Ona nofo lea i lalo ma fai atu:

Ou te molimau atu i le mea o loo molimau i ai mea uma na faia, ma le Au Paia i luga, ma tagata o le Parataiso Silisili uma, ma e ese mai ia i latou o le Fofoga o le Agalelei lava ia mai le Tafailagi o le mamalu uma, o Oe lava o le Atua, e leai se tasi Atua na o Oe, ma o Ia o Le sa fa’aalia o le Mealilo Lafita’i lava, o le Tagavai sa suafa, o Le na mafai ai ona sosoo fa’atasi mataitusi o le B ma le E (BE). Ou te molimau atu o Ia e Ona le suafa na tuuina mai e le Peni a le Silisili Ese, ma o Le na ta’ua i Tusi a le Atua, o le Alii o le Nofoalii i luga ma le lalolagi i lalo nei.

Ona tu lea i luga ma fai atu:

Le Alii e, o tagata uma ma le Puleaoao o mea uma e vaaia ma mea e le vaaia! Ua silafia e Lau Afio o’u loimata ma auega ou te faia, ma faafofogaina lo’u oi ma lo’u mapuitiga, aemaise auega a lo’u loto. Ona o Lou malosi, ua fai a’u solitulafono ma mea e taofia ai a’u mai le faalatalata atu ia te Oe; ma o a’u agasala ua taofia mamao ai a’u mai le lotoa o Lou faapaiaina. Lo’u Alii e, o Lou alofa ua faatamaoaigaina ai a’u, ma o le vavae’ese mai ia te Oe ua faaleagaina ai a’u, ma o le taumamao ma Oe ua fa’aumatia ai a’u. Ou te ole atu i Lau Afio i Au laasaga i lenei vaomatua, aemaise upu “O a’u lenei, o a’u lenei”, e pei ona sa folafoalaina e Ou Tagata filifilia i lenei atulaulau, atoa foi ma manavaga o Lau Fa’aaliga, ma matagi malu o le tafaoata o Lau Faaaliga, ina ia foai mai e mafai ai ona ou vaai i Lou matagofie ma anaana i so o se mea lava i totonu o Lau Tusi.

Ona toe ta’u faatolu lea o le Suafa Silisili, ma punou i lalo ma lima i tulivae, ma fai atu:

Lo’u Atua e, ia viia pea Oe, ona o Oe na lagolagoina a’u e manatuaina Lau Afio ma viia Oe, ma sa faailoaina mai ia te a’u o Ia o Le o le Punaaso o Au Faailoga, ma faia a’u ina ia ou ifo atu i luma o Lou Aoalii, ma faia a’u ia fa’amaualalo i lima o Lou Aoatua, ma ia taliaina ai le mea na folafolaina mai e le Fofoga o Lou agalelei.

Ona tu lea i luga ma fai atu:

Le Atua e, lo’u Atua, ua no’u lo’u tua i le avega o a’u agasala, ma o lo’u loto maa’a ua faaleagaina ai a’u. Afai ou te manatunatu i a’u amioleaga ma Lou agalelei, ona liu suavai lea o lo’u loto i totonu ia te a’u, ma ua pupuna ai lo’u toto i o’u alatoto. Ona o Lou Matagofie, Oe na le Manaoga o le lalolagi, ua ou sauni e faasaga e faaloloa atu aga’i i le lagi o Lau foaialofa. Lo’u Auta e, ua silafia e Lau Afio le taofia o a’u e o’u loimata mai le manatuaina o Oe, aemaise le faaneeneeina o Ou uiga lelei, o Oe o le Alii o le Nofoalii i luga, ma lalolagi i lalo nei! Ou te ole atu i Lau Afio ona o faailoga o Lou Malo ma mealilo o Lau Pule ina ia faia i Au pele e tusa ma Lau foaialofa, le Alii e, o tagata uma, ma ua tusa ma Lou alofa tunoa, le Tupu e, o mea e vaaia ma mea e le vaaia!

Ona toe ta’u fa’atolu lea o le Suafa Silisili, tootuli ma ifo toele ma fai atu:

Lo matou Atua e, ia viia pea Oe, ona ua auina mai e Lau Afio ia te i matou le mea ua avatua faalatatalata ai i matou i Lau Afio, ma faaoloaina i matou i mea lelei uma sa auina mai e Oe i Au Tusitusiga Paia. Lo’u Alii e, ua matou ole atu ia te Oe ina ia puipuia i matou mai faiga valea ma mafaufauga le aoga. E moni, o Oe o le Malosi, o le Silafia Uma.

Ona ea lea i luga, nofo lelei ma fai atu:

Lo’u Atua e, ou te molimau atu i le mea na molimau mai ai Ou Tagata filifilia, ma fa’ailoa atu le mea sa faailoaina mai e tagata o le Parataiso silisili uma, ma i latou o e o loo faata’amilo faataali’o i Lou Nofoalii matautia. Le Alii e, o lalolagi uma, e Ou malo o le lagi ma le lalolagi!

 

General

Afiafi

Le Atua e, lo’u Atua, pe faapefea ona ou moe a o loo ala pea mata o i latou o loo naunau ia te Oe ona o le vavaeeseina o i latou mai ia te oe; pe faapefea ona ou taoto e malolo a o mapuitiga loto o Au pele ona o lo latou taumamao mai Lou faatasi mai?

Lo’u Alii e, ou te tuuina atu lo’u agaga ma lo’u tagata atoa i le aao taumatau o Lou malosi ma Lau puipuiga, ma e taoto lo’u ulu i luga o lo’u aluga ona o Lou mana, ma toe nofo a’e e tusa o Lou finagalo ma Lou maliega. E moni, o Lau Afio o le Malu, o le leoleo, le Malosi Uma, o le Mamana Silsili.

Ona o Lou malosi, pe ou te moe pe ala ou te le siligia Oe ae faia le mea e finagalo i ai Lau Afio. O a’u o Lau auauna i Ou aao. Fesoasoani alofa mai Oe ia te a’u e faia ai le mea e faasalaina atu ai le manogi o Lou finagalo lelei. E moni, o lo’u faamoemoega tonu lenei atoa ma i latou o loo fiafia ina ua latalata atu i Lau Afio. Ia viia Oe, le Alii o Lalolagi!

 

Lo’u Atua e lo’u Matai, le Sini o lo’u mana’o! O lau auauna lenei e saili atu ina ia moe i le malu o Lou alofa mutimutivale, ma mapu i lalo ifo o le fa’apaolga o Lou alofa tunoa, o loo ole atu i Lau tausiga ma Lau puipuiga.

Lo’u Alii e, ou te ole atu ia te Oe i Ou fofoga e le moe, e leoleoina o’u mata mai le vaai atu i se tasi mea vagana Lau Afio. Faamalosia le la vaaiga ina ia la iloa lelei ai Au faailoga, ma vaai atu ai i le Tafailagi o Lau Fa’aaliga. O oe lava o Ia e Ona fa’aaliga o le malosi uma na gatete ai le aano moni o le malosi.

E leai se tasi Atua na o Lau Afio, o le Malosi Uma, o le Manumalo Uma, o le Leliliu.

 

Tagata saili e, o le Upu Moni! Afai e te manao e faapupulaina e le Atua ou mata, e ao ona eaioi atu i le Atua, tatalo ma mafuta atu ia te Ia i le vaeluaga o le po, i le faapea atu:

Lo’u Alii e, ua liliu atu ou mata i Lou malo o le tafatasi, ma ua ou malemo i le sami o Lou alofa mutimutivale. Le Alii e, faapupulaina la’u vaaiga i l e vaai atu i Au malamalama i lenei po pogisa, ma faia ia ou fiafia i le uaina o Lou alofa i lenei toefuataiga matagofie. Le Alii e, faia ia ou faalogo i Lau valaau, ma tatalaina faitotoa o Lou lagi i luma o o’u mata, ina ia ou vaai ai i le malamalama o Lou pupula(Bahá), ma tosina atu ai i Lou matagofie.

E moni o Lau Afio o le Foa’i, o le Agalelei, o le Alofa Muti-mutivale, o le Faamagalo.

 

Aiga

Le Alii e, Ua silafia e Lau Afio o matou lima augani o loo sisii atu aga’i i le lagi o Lou finagalo malie ma le foa’ialofa. Foa’i mai ina ia mafai ai ona faatumuina i latou i oloa o Lou finagalo malie matamau ma le foa’ialofa. Faamagalo mai i o matou tama ma o matou tina, ma ia faataunuuina soo se mea lava sa matou manana’o i ai ma le vasa o Lou alofa tunoa ma le agalelei Faaleagaga. Le Pele e, a o matou agaga, talia mai a matou galuega uma lava i Lou ala. O Lau Afio lava i le mea moni, o le Mamana Silisili, le Faaeaina Silisili, le Lefaatusalia, le Tasi, le Faamagalo, le Alofa Tunoa.

 

Le Alii e, i lenei vaitaimi sili ona tele mai ai o faaaliga o poloaiga a Lau Afio sa taliaina talotaloga ma talosaga a le fanau laiti ma o latou matua. O le tasi lenei o meaalofa faapitoa o faamanuiaga e le gata mai o lenei vaitaimi o le faaalia mai o poloaiga atoa ma folafolaga sa tuuina mai e ta’ita’ia ai mataupu a tagata.

O le mea lea, o Lau Afio o le Alii agalelei, talia mai le olega a Lau auauna i le faitoto’a o Lou toatasi lava ma faatofuina lona tama i le vasa o Lou alofa tunoa, aua o lenei atalii ua tutula’i atu e tuuina atu lana auaunaga i Lau Afio ma ua tuuina atu lona malosi atoa i ana taumafaiga i taimi uma lava i totonu o le auala o Lou alofa. E moni, o Lau Afio o le Foa’i, o le Faamagalo atoa ma le agalelei.

 

Lo’u Alii e! Lo’u Alii e! Ou te vivii atu ma faafetai i Lau Afio e faapei ona faamanuiaina e Lau Afioga Lau auauna fafine faatauvaa, o Lau pologa o loo augani ma aioi faatauanau i Lau Afio, aua e moni o Lau Afio lava sa ta’ita’iina o ia i le Malo iloga ma le manino ma mafua ai ona ia lagonaina le Faaeaiina o Lau Valaau i totonu o nisi o vaega o lalolagi ma taga’i taula’i atu i Au faailoga e pei ona faamaonia ai le fotua’i mai o Lou manumalo aoao i luga o mea uma lava.

Lo’u Alii e! ou te tuuina atu lē o lo’o i totonu o lo’u manava i Lau Afio. Avea ma afuaga o viiga tatau ma aoga lea tamaitiiti i totonu o Lou Malo, ma o se ta’i o manuia tasi lea mai Lau faamanuiaga atoa ma Lou agaalofa; ia atiina a’e ma ia totogo a’e i lalo o le tausiga o Lau aoaoga. E moni o Lau Afio lava o le Mamalu! E moni, o Lau Afio o le Alii o le Faataunuuga o o matou Manaoga e tele.

 

O Ia o le Atua

Le Atua e, lo’u Atua! I le matua faamaulalo ma faanaunau, agamaulalo ma le faatoina, ou te ole atu i Lau Afio i lo’u laulaufaiva ma lo’u fatu, o lo’u agaga ma lo’u loto, ma lo’u mafaufau ma lo’u malamalama, ina ia foa’i le mana’oga sili i mana’oga uma, tofia le gaioiga e sili i auaunaga uma lava, ma faauuina mamalu uma ma faaatoatoaga, faamanuiaga ma matagofie, faatamaoaiga ma le lafitaga mo lenei aiga ua faataalise atu i le faapaologa o Lou ataata malutia i le tafa mai o Lou taeao pupula ma saili lafitaga i Lou sulufa’iga saogalemū, ma Lou ‘olo malu malosi. E moni, o nei agaga sa faalogo atu i Lau valaau, faalatalata atu i Lou faitoto’a pa’ia, ma faamūina i le afi o Lou alofa, ma ua faaolioliina i le manavaga a Lou faapaiaina. O i latou e auauna faifaipea i Lau Fuataiga, faamaulalo i luma o Ou Fofoga ma faamanuiaina i lalo o Lou ataata malutia. Ua lauiloa i latou o ē e tauaveina Lou Suafa i Ou tagata ma ta’uta’uina Lau Afio i luma o Au auauna.

Le Atua e lo’u Atua! Ia faaneeneeina i latou e Lou mamalu anamua, faaeaina i latou i Lou Malo o le mamalu silisili’ese, ma fesoasoani ia i latou e ala i ‘au o Au faamanuiaga i lenei Aso Silisili. Le Ali’i e lo’u Atua! Sisi agiagia a’e lo latou tagāvai, foa’i atu mo i latou Lau puipuiga talafeagai, faasalalau lautele atu o latou faailoga, ma faapupulaina atili i latou, ina ia avea ai i latou e faapei o ni tioata malamalama o le lamepa o Au faamanuiaga e tele, ma e tala’i atu Lou alofa-agalelei ma le foa’ialofa.

Le Ali’i e, lo’u Atua! Ia avea Lau Afio ma o latou soātau i lō latou tu’ulafoaina, ma fusia i latou i Lau fesoasoani i taimi o latou faanoanoaga. Foai mo i latou Lau Tusi ma faamautū mo i latou le tuufaatasiga o Au meaalofa ma Au faamanuiaga. O Lau Afio, i le upu moni, o le Malosiuma, o le Mamana uma, o le Alofa Tunoa, o le Foa’ialofa uma, ma e moni, o Lau Afio o le Agaalofa,

o le Mutimutialofa.

 

Aufaatasiga

Lo’u Atua e, lo’u Atua e! Faatasia loto o Au auauna ma fa’aalia ia te i latou Lau fuafuaga sili. Ia latou mulimuli atu ai i Au poloaiga ma tausiusi i Lau tulafono. Le Atua e, fesoasoani ia te i latou i lo latou taumafai, ma foaina ia i latou i lo latou taumafai, ma foa’iina ia i latou le malosi e auauna atu ai ia te Oe. Le Atua e, ia le tuulafoa’iina i latou ia i latou lava, ae ta’ita’iina o latou laasaga e le malamalama o le poto, ma faaolioli’ina o Lou alofa. E moni, o Oe o lo latou Fesoasoani ma lo latou Ali’i.

 

Le Alii e! E ma’eu le tele naua o nei foa’ialofa ua tu’uina mai e Lau Afio, ma e ma’eu le tetele o tāfega o Lou alofa tunoa ua E foa’i mai! Sa faia e Lau Afio loto uma ina avea o se loto e tasi, ma ua tu’ufa’atasia e Lau Afio agaga uma ina ia avea o se agaga e tasi. Sa tuuina e Lau Afio le ola ma faalogona i tino sa lē gaoiā, ma sa foa’ia i nei tino e leai ni ola le malamalama o le agaga. E ala mai i ‘ave pupula ‘o lo’o susulu mai i le Fetūao o le Alofa Mutimutivale Uma, sa faia e Lau Afio nei ainini’i o le efuefu e avea ma tino vaaia, ma e mai i galu fafati o le vasa o le aufa’atasiga, sa faia ai e Lau Afio ina ia mafai e nei mātāua ua mou ‘ese vave ona avea ma peau fetafea’i fafati ma le leoleoā.

O Lau Afio o le Malosi uma, o Le na foa’ia i le lā’au o le vaomago le malosi o se mauga, ma faia le ainini’i o le pefu e fa’aata atu ai le mamalu uma o le lā pupula! Foa’i mai Lou alofa tunoa ma faamanuiaga, ina ia matou tula’i a’e ai e auauna i Lau Fuataiga, ma ia lē lagona le faatauvaaina i luma o tagata o le lalolagi.

 

Faamagaloga

Lo’u Alii e, ua silafia e Lau Afio a’u ma o’u mata ua liliu atu agai i le lagi o Lau foaialofa ma le vasa o Lou finagalo lelei, ua liliu ese mai mea uma vagana Oe. Ou te ole atu i Lau Afio, ona o pupula o le La o Lau fa’aaliga i luga o Sinai, ma ave o le Li’o o Lou alofa tunoa o lo’o susulu mai i le tafailagi o Lou Suafa, le Faamagalo Faavavau, ina ia foai mai ia te a’u Lau faamagaloga ma ia i ai le alofa mutimutivale i luga o a’u. Ia tusia mo a’u i Lau peni o le mamalu le mea o le a faaeaina ai a’u ona o Lou Suafa i le lalolagi o le foafoaga. Lo’u Alii e, lagolaogina a’u ina ia faamautuina atoatoa ia te Oe, ma ia faalogo atu i le leo o Au pele, o e ua matua toilalo ai malosi o le lalolagi e faavaivaia, ma le pule a malo ua matua leai se malosi e taofia mai ai i lau Afio, ma o i latou ia sa faapea mai a o aga’i atu ia te Oe: “O le Atua lo matou Alii, le Alii o tagata uma i le lagi ma e o loo i le lalolagi.”

 

Ia viia Lou Suafa lo’u Atua e, ma le Atua o mea uma, i lo’u Pupula ma le Pupula o mea uma, o lo’u Manaoga ma le Manaoga o mea uma, o lo’u Malosi ma le Malosi o mea uma, o lo’u Tupu ma e Tupu o mea uma, o lo’u Faalagolago ma le Faalagolago o mea uma, o lo’u Sini ma le Sini o mea uma, o lo’u Faagaoioiga ma le faagaoioiga o mea uma lava! Ou te ole atu ia te Oe ina ia le faapologaina a’u i le taofia mai le vasa o Ou finagalo alofa malu, po o le aveesea mamao foi mai talafatai o le faalatalata atu ia te Oe.

Lo’u Alii e, e leai se tasi mea vagana Oe e aoga ia te a’u, ma o le fia faalatalata i so o se tasi vagana oe e leai se mea ou te maua ai. Ou te ole atu i Lau Afio i le faula’i o Lou tamaoaiga, lea na foaiina atu ai e Oe mea uma lava vagana Oe lava, ina ia faitauina a’u faatasi mai i latou ua taula’i atu o latou mata ia te Oe, ma tula’i a’e e auauna atu i Lau Afio.

Lo’u Alii e, faamagaloina Au auauna tane ma Au auauna fafine. E moni, o Lau Afio o le Faamagalo Faavavau, o le Mutimutialofa Silisili.

 

O Lau Afio o le Alii faamagalo! O Lau Afio o le malu o Au auauna uma nei. E silafia e Lau Afio mealilo atoa ma mea uma o loo natia. O i matou uma o tagata vaivai, ao Lau Afio e ona le Malosi, o le pule aoao. O i matou o tagata agasala, ao Lau Afio o le Faamagalo o agasala, o le alofa Mutimutivale Uma, o le Mutimutialofa. Le Alii e! Aua e te silasila i o matou tu’inanau. Faia ia i matou e tusa ai ma Lou alofa tunoa ma le foa’i fua. E tele o matou tu’inanau, a’o le vasa o Lau faamagalo e le faatuaoia. O matou vaivaiga o se faanoanoaga, a’o faamaoniga o Lau lagolago mai ma le fesoasoani o loo manino. O le mea lea, faamautu ma faamalosia i matou. Faia i matou ina ia matou faia le mea e tatau ma aoga o Lou Faitotoa paia. Faapupulaina o matou loto, tuuina mai ia i matou ni mata e mafai ona va’ai atoa mani taliga fia faalogo. Toe faaolaina e ua oti ma faamaloloina e ua mama’i. Avatu le tamaoaiga i e matititva ma auina mai le filemu ma le saogalemu i e matata’u. Talia mai i matou i Lou malo ma faapupulaina i matou mai i le malamalama o le ta’ita’iga. O Lau lava Afio o le Mamana Uma ma o le Pule Aoao. O Lau lava Afio o le Agaalofa. O Lau Afio o le Agamalu. O Lau Afio o le Agalelei.

 

Faamalologa

Le Atua e, lo’u Atua! Ou te ole atu ia te Oe ona o le vasa o Lau Faamalologa, ma pupula o le Fetu Ao o Lou Alofa tunoa; ma, ona o Lou Suafa na pulea ai e Oe Auauna, ma le mana malosi o Lau Afioga aupito silisili atoa ma le mata’utia o Lau Peni mamalu faasilisiliina, ae maise Lou alofa mutimutivale sa faamuamuaina i le foafoaga o mea uma o loo i le lagi ma luga o le lalolagi, e faamamaina a’u i vai o Lau foaialofa mai so o se puapuaga ma faaletonu, atoa foi ma vaivaiga uma ma le lelava.

Lo’u Alii e, ua silafia e Lau Afio Lau auauna o loo faatali faanaunau atu i le faitotoa o Lau foaialofa, ma ia saga tuuina atu ona faamoemoega ia te Oe i le pipii atu i le manaoa o Lou agalelei. Oute ole atu ia te Oe, a le faafitia o Ia i mea o loo ia saili atu ai i le vasa o Lou alofa tunoa ma le Fetu ao o Lou alofa agalelei.

E matautia Oe e faia ai le mea e finagalo i ai Lau Afio. E leai se tasi Atua na o Oe lava. o le Faamagalo Faavavau, o le Agalelei Silisili.

 

Lo’u Atua e, Lou Suafa o lo’u faamaloloina lea, ma le manatua o Lau Afio o la’u vaifofo lea. O le faalatalata atu ia te Oe o lo’u faamoemoega lea, ma le alofa ia te Oe o lo’u soatau lea. O le alofa mutimutivale o Lau Afio ia te a’u o lo’u faamalologa lea ma lo’u fesoasoani i lenei lalolagi ma le olaga atali.

E moni, o Lau Afio o le Foaialofa Uma, o le Silfia Uma, o le Poto Uma.

 

Outou e, o e o loo liliu atu o outou mata i le Atua! Moeiini o outou mata mai i mea uma lava, ae faapupulaina i latou tau lava o le malo le Mamalu uma lava. Fesili atu i soo se mea tou te manana’o i ai ia tau lava o Ia; Saili atu i soo se mea o loo o outou sailia mai e tau lava o Ia. I le ua na’o se vaaiga, sa Ia faamaligiina mai ai le selau afe o faamoemoega, o se tepa tasi atu sa Ia faamaloloina mai ai le selau afe o tagata mama’i, o se pupula faafuase’i sa Ia tu’uina atu ai se vai fofo i luga o manu’a uma, ma e pei o le geno o le ulu sa Ia faasa’olotoina mai ai loto uma mai i filifili o le faanoanoa ma le faavavau. E faia lava e Ia e pei ona Ia faia, ma o le a ‘ea fesoasoani o loo ia te’i tatou? O loo Ia tauaveina atu Lona lava Finagalo, e faatonu fo’i e Ia le mea e finagalo malie i ai o Ia. Ua tatau ai loa ia te’i tatou ona punonou na ifo to’ele o tatou ulu i le gaua’i atu ia te Ia, ma tuuina atu lo tataou talitonuga ia te ia le Alii alofa Mutimutivale uma.

 

O Ia o le Atua

Le Atua e, Lou Atua! Ua faasaga atu nei o’u mata i Lau Afio ma le ‘ai’oi faatauanau ia faamaligiina mai le vasa o Lau faamalologa. Le Alii e, i Lou alofa tunoa fesoasoani mai ia te a’u, ina ia ‘ou auauna atu ai i Ou tagata ma faamaloloina Au auauna. Afai e fesoasoani mai Lau Afio ia te a’u, o le a ‘ou ofoina se vaifofo e avea ma vailaau faamalolo mo gasegase uma, o se inumaga o le vaifaaola ia i latou uma ua mu galala i le fia feinu, ma o se faamafanafanaga i agaga faavauvau uma. Afai o le a lē fesoasoani mai Lau Afio ia te a’u, o le a lē avea o se isi lava mea ae o se mafatiaga, ma o le a ‘uti’uti ai lava ona maua e so’o se agaga le faamalologa.

Le Atua e lo’u Atua! Faamalosia ma fesoasoani mai ia te a’u i Lou mana e faamaloloina ai ē mama’i. E moni, o Lau Afio o le Faamalologa, o le Faaatoatoaga, o Ia o Le o le puluvaga o tiga ma gasegase uma, o Ia o Le e iai le Pule i luga o mea uma lava.

 

Faamasinogatonu

Fai atu: Le Atua e, lo'u Atua! Faapaleina lo'u ulu i le paleali’i o le faamasinogatonu, ma lo'u malumalu i teuga o le tonu atoatoa. E moni, o Lau Afio o le Pule o meaalofa ma foaialofa uma.

 

Faamaturo

O IA O LE ATUA

Le Alii e, lo’u Atua! O oe o le Fesoasoani o e augavale, o le Faaolataga o e matitiva, ma o le Sulufaiga o e ua leai se faamoemoe ma ua liliu atu ia te Oe.

I le faamaualalo lava ou te sisii a’e ai o’u lima i Lo’u Malo o le matagofie, ma valaau atu ia te oe i lo’u laulaufaiva i totonu i le faapea atu: Le Atua, Lo’u Atua e, fesoasoani mai ia te a’u ia ou naunau atu ia te Oe, faamalosia o’u vae e tautua ai Oe, lagolagoina au e Lou Alofa foai i la’u tautua atu ia te Oe; Faapologaina au ina ia ou tumau ma le le faageetia i lo’u usiusitai atu ia te Oe; Liligi ifo i o’u luga le puna sa’oloto o Lau Foa’i, ia silasila mai ou Fofoga Alofa Agalelei ma faatofuina au i le vasa o Lau Faamagaloga. Aumaia ia te au ina ia faamautuina i Lau Faatuatuaga, ma tu’uina mai i o’u luga le faamaoni e vavae’esea atoatoa ai mai le lalolagi, ae liliu atu o’u mata ma faatoina atoatoa i Ou fofoga, ma ia faamalosia i faamaoniga ma tautinoga mamana, ua i ai le mamalu ma le mana ma ia faapea ona sopo atu i itu uma o le lagi ma le lalolagi. E moni o Lau Afio le Mutimutialofa, le Mamalu Uma, le Agalelei, le Alofa mutimutivale.

Le Alii e! O i latou nei o e na sao mai e na faiotia faamaturo, agaga ia ua faamanuiaina. Sa latou faafeagai ma soo se puapuaga faigata, ma latou fa’aalia le onosa’i i luma o mata o e ua matua leai se faamasinogatonu ua tuua e i latou nei le mapuga malie ma le tamaoaiga ae tuuina atu i latou ma le loto malie ina ia faatigainaina ma faapuapuagatiaina i le ala o Lou Alofa, ma o loo saisaitia pea mai le taofi mau a o latou fili, o e o loo faaauau pea a latou faiga saua ma le ‘ogo’ogo, ma olopalaina ai i latou ona o lo latou savavali ma le le faageetia i Lona ala sa’o. Ua leai seisi e fesoasoani mo i latou, pe faauoina i latou ua matua leai lava seisi e mafai ona latou faamasani pe talatalanoa fetufa’ai ma i latou vagana ai e valelea ma e fai amio pi’opi’o.

Le Alii e! O nei agaga ua latou tofoina le o’ona o le tiga o lenei olaga, ma ua avea e pei o se faailoga o lo latou alofa pupula matagofie o Ou Fofoga, ma Lo tatou faanaunau ia maua e i latou Lou Malo faalelagi, le taliaina o faiga le taualoa a nei tagata saua o loo fai mai ia te i latou.

Le Alii e! Ia faatutumuina o latou taliga i fuaitau a le fesoasoani paia ma ia faataalise i le manumalo, ma saoloto mai i latou mai i nei faiga faapologa matautia faapea. Taofiina lima o e fai mea piopio ma ia le tuuina atu nei agaga ina ia saeia e maiuu ma nifo o manu feai, aua o i latou ia ua faatagata o tauaina ona o lo latou alofa ia te Oe, ma ua tuuina atu i ai mea lilo o Lou Paia, o tutu atu ma le faamaulalo i Lou faitotoa ma taunuu atu i Lou Lotoa.

Le Alii e! Ia Alofa ma faamalosia i latou i se agaga fou: faapupulaina o latou mata ina ia mafai ai ona latou vaaia Lou ofo’ofogia i le pouliuli o le po, aveina atu i latou ia taunuu atu i lelei uma o i Lou Malo o mea lilo faavavau: faia i latou ma fetu pupula e sulugia ai itu uma ma laau ua fua tele ma agiagia o latou lala i le savaili o le tafaoata.

E moni o Lau Afio o le Foai, le Malosi le Mamana Faavavau, O le le Faatusalia. E leai se tasi Atua ua na o Oe, o le Atua Alofa, o le Alofa Mutimutivale Agamalu, le Mamalu Uma, o le Faamagalo Faavavau.

 

Fesoasoani

Ou te augani faatauanau atu i Lau Afio, e ala i Lou malosi, Lo’u Atua e! Ia faasaogalemuina a’u i taimi e o’o mai ai tofotofoga, ma taimi o lo’u tuulafoaina o a’u, ta’ita’i mai i o’u laasaga ia faasagatonu atu i le faalaeiauina a Lau Afioga. O Lau Afio lava o le Atua, o loo i Lau Afio lava le mana malosi e faia ai le mea e finagalo malie i ai Lau Afio. E leai lava se tasi e mafai ona te’eva i Lou Finagalo pe faaluafesasiina Au Fuafuaga.

 

Lo’u Atua e! Ou te ole atu i Lau Afio e ala i Lou Suafa aupito silisili ona mamalu, ia faaa’upegaina a’u e mafai ai ona fesoasoani i mataupu a Au auauna, faapea ai foi ona tupu uluuluola i totonu o Ou aai. O Lau Afio lava, e moni e i ai le mana i luga o mea uma lava.

 

Ou te tatalo atu i Lau Afio lo’u Alii e, ona o Lou Suafa lafita’i ma Lou Suafa faapelepeleina, o loo valaauina i le leotele i le malo o le foafoaga, ma faapotopotoina ai tagata uma i le Laau o loo i tala atu i le mea e le i oo atu lava i ai se tasi, le nofoa o le mamalu pupula, ina ia faatotoina ifo i o matou luga ma luga o Au auauna uaga mamafa o Lou alofa mutimutivale, ina ia mafai ona faamamaina ai o i matou mai le manatuaina o isi mea uma lava vagana ai Lau Afio, ma avatua ai faalatalata i matou i talafatai o le vasa o Lou Alofa tunoa. Le Alii e, totofi mai ia ona o Lau Peni aupito silisili ona faaeaina, le mea o le a faatumauina ai e faavavau o matou agaga i le Malo o le mamalu, ma o le faatumauina ai o matou igoa i Lou Malo, ma leoleomaluina ai o matou ola i fale teu’oa o Lau puipuiga ma o matou tino i le olomalosi o Lou tumau e le mafai ona solia. E matua silisili ese Oe i luga o mea uma lava, tusa lava pe o aso anamua po le lumana’i foi. E leai lava se Atua o i ai iina vagana ai Lau Afio, o le Malu, o le Malosi Uma Lava, o le Puna o le Ola.

 

O Lau Afio o le Alii agalelei! O nei agaga o Au uō ua faapotopoto faatasi ma ua faatumulia i Lou alofa. Ua fe’avea’i e ‘ave o Lou matagofie ma ua maofa i le manogi sasala o Lou foga. Ua ofoina atu o latou loto i Lau Afio, ma ua feoa’i solo i Lou ala o ni tagata faatauvaa o fia maua se fesoasoani. Ua latou lafoa’i a latou uo faapea foi ma tagata ‘ese, ae ua taofi mau i Lau aufaatasiga, ma ifo atu ma le faamemelo i Ou luma.

O i latou e nofoia lenei lalolagi maualalo: ae sa taliaina e Lau Afio i latou i Lou Malo. O latou o ni lā’au mamae i le toafa ua matelaina ma ausage; ae sa faia e Lau Afio i latou o ni lā’au totogo i le togalā’au o le poto ma le malamalama. Sa lē toe faalogoina o latou leo; ae sa faatautalaina atu i latou e Lau Afio. Sa loto vaivai i latou; ae sa faasusulu atu e Lau Afio le malamalama i o latou luga. Sa faapei i latou o se ‘ele’ele matūtū ma e lē ola ai se mea; ae sa liliuina e Lau Afio i latou o se togārosa o uiga loloto. Sa pei i latou o ni tamaiti i le lalolagi o tagata soifua; ae sa faia e Lau Afio i latou ia ausia le faamatuaina faalelagi.

O Lau Afio o le Agalelei! Foa’i mo i latou se mapusaga ma se lafitaga i le faamalumaluga o Lau puipuiga, ma puipui i latou mai tofotofoga ma lu’itau. Foa’i atu mo i latou Lau fesoasoani lēvaaia, ma tuuina atu ia i latou Lou Alofa Tunoa atoatoa.

O Lau Afio o le agalelei ma o le Ali’i faapelepeleina! O i latou ua o ni tino, ma o Lau Afio o le Agaga o le Ola. O le tino e faalagolago mo lona faafouina ma lona matagofie i le alofa tūnoa o le agaga. O le ala lea, e latou te moomia ai Lau faamautūuga ma latou te faanaunauta’i i le mana faaauau o le Agaga Paia i lenei Fa’aaliga fou. O Lau Afio o le Malosi, o le Foa’i, o le Faasoa Talimana’o, ma o le Faamagalo. O Lau Afio, o Ia lea ‘o lo’o pupula malamalama mai i le Malo lē vaaia.

O Oe e Ona fofoga o le sini o la’u tapuaiga, E Ona le matagofie o lo’u sulufaiga, E ona le afioaga o lo’u sini, E Ona le viiga o lo’u faamoemoega, E Ona le tausiga o lo’u soatau, E ona le alofa o le mafua’aga o lo’u ola, E Ona ta’uta’uina o lo’u faamafanafanaga, E Ona le faalatalata mai o lo’u manaoga, E ona le faatasi mai o lo’u moomooga silisili ona pele ma la’u manavaga silisili ona maualuga. Ou te ole atu ia te Oe ia le taofia mai ia te a’u mea ua tofia e Lau Afio mo tagata filifilia i Au auauna. Ia faaoloaina a’u i mea lelei o lenei lalolagi ma le olaga atalii.

E moni o Oe le Tupu o tagata uma. E leai se tasi Atua na o Lau Afio, o le Faamagalo Faavavau, o le Agalelei Silisili.

 

Pe i ai se i si Puluvaga o mea faigata vagana le Atua? Fai atu: Ia viia le Atua. O Ia o le Atua! O tagata uma lava o Ana auauna, ma ua fusia uma e Lau Afioga!

 

Fai atu: Ua faaatoatoaina e le Atua mea uma i luga o mea uma lava, ma e leai se mea i le lagi po o le lalolagi vagana le atoatoa o le Atua. E moni, o Ia ia te Ia lava o le Silafia, o le Lagolago, o le Malosi uma lava.

 

Lo’u Alii e, o a’u lava le tagata ua ta’utinoina atu nei ia te Oe le anoano o ana amioleaga, ua mafai ona iloaina le mea e le i mafai lava e se tasi tagata ona iloaina. Ua faia a’u ina ia faataalise atu i le vasa o Lau faamagaloga, ma saili lafitaga atu ai i lalo ifo o le ata o Lou finagalo alofa tunoa silisili. Ou te ole atu i Lau Afio, o Oe lava o Le o le Tupu Faavavau ma o le Malu Silisili o tagata uma lava ina ia foa’i mai e mafai ai ona lagaina loto ma agaga o tagata ina ia felelei a’e i le vanimonimo e le gata mai o Lou alofa, ma felafolafoa’i ai ma Lou Agaga. Ia faamalosia a’u ona o le mana o Lou mamalu, ina ia mafai ona ou faaliliuina atu mea uma lava na faia aga’i le Puna Aso o Lau Faifaaaliga ma le Pogai o Lau Faaaliga. Lo’u Alii e, lagolagoina a’u ina ia matua tu’uina atu atoatoa a’u lava i Lou Finagalo, ma ia tula’i a’e ma auauna atu ia te Oe, ona ua ou filifilia lenei olaga faale lalolagi e le mo se tasi lava mea a o le fia faataamilo i le Tapeneko o Lau Faaaliga ma le Nofoa o Lou Mamalu. Lo’u Atua e, ua silafia e Lau Afio a’u ua matua vavae’eseina mai mea uma lava vagana ai Oe, ma ua matua lotomaualalo ma o se auauna i Lou Finagalo, Faia ia te au e pei ona finagalo ai Lau Afio, ma ia talafeagai ai ma Lou silisili ma le mamalu tele.

 

O lo matou fesoasoani o le fesoasoani a Ia o le Faaatoatoaga Faamanuiaina. Afai e faapotopoto faatasi le lalolagi e faasaga tau mai ia te i matou, a o avea lenei fesoasoani ma i matou, e lē mafai lava e le lalolagi uma ona aveesea lenei faaatoatoaga famanuiaina mai ia te i matou. O le a’upega e manumalo pea lava. O le pelu e le mafai ona matatupa, ma le a’upega e tumu pea e lē mafai ona uma.

 

Le Ta’ita’iga e Faaleatua! Fafaguina a’u ma faia a’u ia ou mataala. Faia a’u ia ou vavae’esea mai i mea uma vagana Lau Afio, ma faia a’u ia tosina atu i le alofa i Lou matagofie Auina mai i o’u luga le manavaga a le Agaga Paia, ma ūna’ia a’u e faalogo atu i le valaau a le Malo o Abhá. Foa’i mai ia te a’u malosi faalelagi, ma tutuina le lamepa o le agaga i le ta’ele o lo’u fatu. Faasa’oloto a’u mai noanoataga uma, ma ave’ese mai a’u mai i pi’itaga uma, ina ia ‘ou lē faanaunau ai i se isi ae tau lava o Lou finagalo lelei. Ia ‘ou lē saili atu i se tasi mea ae tau o Ou Fofoga, ma ‘ou lē uia se isi lava ala vagana Lou ala. Foa’i mai e mafai ai ona ‘ou fesoasoani ia i latou e faatalalē ia ola māgafagafa ma fafaguina ē ‘o lo’o momoe, ina ia mafai ona ‘ou ofoina atu le vai o le ola ia i latou o lo’o galala i le fia feinu, ma avatu le faamalologa faapaiaina ia i latou e mama’i ma augavale.

E ui lava o a’u ua na’o se tagata faatauvaa, e maualalo ma mativa, ae o Lau Afio o lo’u Malu ma lo’u Sulufa’iga, o lo’u Lagolago ma lo’u Fesoasoani. Faamaligi mai Lau fesoasoani i se va’aiga e maofa ai tagata uma. Le Atua e! E moni, o Lau Afio o le Malosi Uma, o le Mamana Silisili, o le Foa’i Agalelei, o le Foa’i, ma o le Silafia Uma.

 

O Lau Afio o le Alii Mamana Uma lava! Ua fusia i matou uma i aao malosi o Lou Mana. O Lau Afio o lo matou Lagolago ma le Fesoasoani. Foa’i mai Lou alofa mutimutivale agamalu. Foa’i mai mo i matou Lau foa’i alofa, tatala faitoto’a o Lou alofa tunoa, ma taula’i mai i o matou luga se vaaiga o Au faamanuiaga. Ia agi mai i ō matou luga se savili faaola ma faataalise ai o matou loto faanaunau. Faapupulaina o matou mata, ma le malutiaga o o matou agaga ma moomooga o faapaologa lauusiusi uma. Faaolioli loto uma ma faafiafiaina agaga uma. Faaalia lou Mana anamua ma faailoa Lou malosi silisili. Faia le manulele o le loto o le tagata e lele atu i tumutumu fou, ma avea Ou tagata faatuatuaina i lenei lalolagi maulalo e faamalamalama mealilo o Lou Malo. Ia faamautu la matou savaliga ma foa’i mai ia i matou le lotomau e le maluelue. O i matou o tagata agasala a o Lau Afio o le faamagalo faavavau. O i matou o Au auauna a o Lau Afio o le Alii Silisili. O i matou e feoa’i solo ua leai ni nofoaga mau, a o Lau Afio o le matou malu ma le sulufa’iga. E ala i Lou alofa tunoa, lagolago ma fesoasoani mai ia i matou e faasalalau atu Au faamanuiaga suamalie ma ia faaneeneeina Lau Upu. Siitia i luga le tulaga o le tagata le amana’ia, ma foa’i Lau teuga’oa e lē muta iā i latou e le tagolima. Foa’i Lou malosi i ē e vaivai, ma faamautuina le mana faalelagi i ē e augavale. O Lau Afio o le Faasoa talimana’o, o Lau Afio o le Alofa Tunoa, o Lau Afio o Le e Pule i luga o mea uma lava.

 

O Lau Afio o le Atua Lēfaatusalia! O i matou o Au auauna faatauvaa, a o Lau Afio o le Mamalu Uma. O i matou o tagata agasala, a o Lau Afio o le Faamagalo faavavau. Ua saisaitia, matitiva ma faatauvaaina i matou, ma o Lau Afio o le matou malu ma lo matou lagolago. O i matou ua faapei o ni loi nini’i, a o Lau Afio o le Ali’i o le silisili ese, e afio i Lona Nofoalii i le lagi aupito maualuga. Puipui mai i matou, e fai ma faailoga o Lou Alofa Tunoa, ma ia lē taofia mai ia i matou Lau tausiga ma le fesoasoani. Le Alii e! O Au tofotofoga e faigata naua. O Au luitau e lepetia ai faavae u’amea malolosi. Malutia ma faamalosia i matou; faafiafia ma faaolioliina o matou loto. Fesoasoani alofa mai ina ia matou auauna, faapei o ‘Abdu’l-Bahá i Lou Faitoto’a Pa’ia,

 

Le Alii e, lo’u Atua ma lo’u faamalumaluga i o’u puapuaga! O lo’u Talita ma lo’u Malu i a’u auega! O lo’u sulufaiga ma le Lafitaga i le taimi o le tuulafoaiina ma i lo’u toatasi o lo’u Soatau! I o’u tiga o la’u Faamatalaloto, ma i lo’u toatasi o se Uo alofa! O le Puluvaga i tiga o o’u faanoanoaga ma o le Faamagalo i a’u agasala!

Ou te matua liliu atu atoatoa ia te Oe, i le aioi faatauanau ia te Oe i lo’u loto atoa, lo’u mafaufau ma lo’u laulaufaiva, ina ia malutia a’u mai mea uma e faasaga tau i Lou finagalo, ae maise le taaviliga o Lau aufaatasiga faaleagaga, ma ia faamamaina a’u mai mea leaga uma e taofia ai a’u mai le saili atu, le le pona, ma le le eleelea i le ata o laau o Lou Alofa Tunoa.

Le Alii e, ia i ai Lou Alofa Mutimutivale i e vaivai, faamaloloina tagata mamai, ma faamalieina le fia inu o tagata galala.

Faaolioliina le loto na tutuina e le afi o Lou alofa ma faasasaoina tele e le mumu o Lou alofa ma le agaga faalelagi.

Faaofuina tapeneko o le aufaatasiga faaleagaga i laei o le faapaiaina, ma ia tuuina i luga o lo’u ulu le palealii o Lou finagalo lelei.

Faapupulaina o’u mata i le malamalama o le li’o o Lau foaialofa ma lagolagoina alofa a’u i le auauna atu i Lou faitotoa paia.

Faia lo’u loto ia taumasuasua i le alofa i Ou tagata ma foai mai ia avea a’u ma faailoga o Lou alofa mutimutivale, o se fua o Lou alofa tunoa, se faalautelega o le fealofani i le va o Au pele, ua faatoina atoatoa ia te Oe, folafolaina atu Lou faamanatuina, ma ua galo nimo le manatu faapito ae manatua pea lava pea tau Lau Afio.

Le Atua e, lo’u Atua! Ia le taofia mai ia te a’u matagi malu o Lau faamagalo ma le alofa tunoa, ma ia le vavae’esea a’u mai vaipuna lelei o Lau fesoasoani ma le finagalo lelei.

Ia ou lafi i lalo o le paolo o Ou apaau malu, ma sisila mai i o’u luga le silafaga a lou fofoga o le puipuiga uma.

Tatalaina lo’u laulaufaiva e viia ai Lou Suafa i totonu o Ou tagata, ina ia mafaia e lo’u leo ona fa’atuina ni faapotopotoga tetele ma mafai e o’u laugutu ona tafe atu ai lologa tetele o Lou Viiga.

O Lau Afio i le mea moni o le Alofa Tunoa, o le Faaneetaga, o le Malosi, o le Malosi uma lava.

 

Fono Faaleagaga

Afai ua tou ulufale atu i le potu fono faitauina loa lenei tatalo i le loto faageetia i le alofa o le Atua ma se laulaufaiva ua faamamaina mai mea uma lava vagana Lona manatuaina, ina ia mafai e le Mamana—Uma ona lagolagoina i le alofa outou ia maua ai le manumalo silisili.

Le Atua e! Lo’u Atua! O i matou o Au auauna ua liliu atu ma le faanaunau i Ou Fofoga Paia, ua matua faatoina i matou mai mea uma vagana Oe i lenei Aso mamalu. Ua matou potopoto mai i lenei Fono Faaleagaga i le aufaatasi i o matou mafaufauga ma manatu, ma ua autasi a matou fuafuaga e faasilisili Lau Afioga i totonu o tagata. Le Alii e, lo matou Atua! Faia i matou ma faailoga o Lau Taitaiga Faaleagaga, tagavai o Lau Faatuatuaga faasilisiliina i tagata ola, auauna o Lau Feagaiga matautia, faifa’aaliga o Lau Aufaatasiga Faaleagaga i Lou Malo Abha, ma fetu pupula e susulu atu i luga o malo uma, o Lau Afio o lo matou Alii Silisili Ese. Le Alii e! Fesoasoani ia te i matou ia avea ma sami fafati i galu o Lou alofa tunoa Matagofie, vaitafe e tafe mai i Ou tumutumu Mamalu Uma, fuala’au lelei i luga o le Laau o Lau Fuataiga faalelagi, laau agiagi ona o matagi o Lau Foaialofa i Lou tovine Faalelagi. Le Atua e! Faia o matou agaga ina ia faalagolago i Fuaitau o Lau Aufaatasiga Faaleagaga, faafiafiaina o matou loto i uaga o Lou Alofa Tunoa, ina ia matou aufaatasi e pei o galu o le sami e tasi, ma mou faatasi atu e pei o ave o Lou malamalama Pupula; e mafai ai e o matou manatu, o matou mafaufauga ma o matou lagona ona avea e pei o se mea moni e tasi, e faaalia ai le agaga o le faatasia i le lalolagi atoa. O Oe le Alofa Tunoa, le Foaialofa, le Foa’i, le Malosi uma, le Alofa Mutimutivale, le Mutimutialofa.

 

Ina o maia faatasi outou i se fiafia le ‘alu’alua, ma ia outou taulotoina lenei tatalo i le amataga o le fonotaga.

Le Alii e, o le Malo! E ui ina faatasia i matou i le tino, peita’i, ua faafiafiaina lava o matou loto fefevavale e Lou alofa ma ua faapea ai ona aveina atu i matou e ‘ave pupula silisili’ese o Ou Fofoga. E vaivai i matou, ae matou te faatalitali pea i fa’aaliga o Lou Malosi ma le Mana. E matitiva i matou, e le tagolima ma le tua, ae o loo matou maua pea le tamaoaiga mai tuuga’oa o Lou Malo. O i matou ua na o ni mataua, peita’i o loo matou feinu pea mai Ou vasa loloto. E ui ina pefua i matou, ae o loo suluia pea i le malamalama o Lou La pupula.

Le Ali’i lo matou foa’i! Auina ifo Lau fesoasoani ina ia mafai e i matou uma ua faatasia nei, ona avea ma lamepa mumu; ia taitoatasi ona avea ma totonugalemu e faatosina mai ai le toatele; ia taitoatasi ona avea ma tagata tau’alaga i Ou malo faalelagi, se’ia mulimuli ane, ona matou faia ai lea o lenei lalolagi to’ilaopopo ma faata manino e atagia ai Lou Parataiso.

 

Tatalo e faia pe a o’o ina faai’uina tauaofiaga o Fono Fa’aleagaga.

Le Atua e! Le Atua e! Mai le malo vaaia o Lou toatasi, silasila maia ia i matou a’o matou potopoto faatasi ai i totonu o lenei fonotaga faaleagaga, i le matua talitonu atu i Lau Afio, talisapaia Au faailoga, lotomau i Lau Feagaiga ma le Tautinoga, tosina atu i Lau Afio, faamumuina mai le afi o Lou alofa ma le faamaoni i Lau Fuata’iga. O i matou o auauna i totonu o Lou tovine, o tagata o loo faasalalauina atu Lau Tapuaiga, o tagata tapua’i finafinau i luma o Ou fofoga, faamaualalo i luma o i latou ta’ito’atasi o e ua alofagia e Lau Afio, gaua’i ma le aioi faatauanau atu i luma o Lou faitoto’a atoa ma le augani faamaualalo atu i Lau Afio ina ia faamausaliina ma faamautuina i matou i totonu o auaunaga o Au tagata filifilia, ma lagolagoina i matou mai Au vaega’au le mavaaia, ma faamalosia o matou itutino uma ona o Ou noataga ma faia ina ia matou gaua’i e faamaualalo i mataupu uma o ifoga ma mafutaga ma Lau Afio.

Lo matou Alii e! E vaivai i matou, a’o Lau Afio o le Malosi, o le Mamana Uma. O i matou o tagata ua leai se ola, a’o Lau Afio o le Agaga silisili e foa’i mai ai le ola. O tagata mana’ona’o, a’o Lau Afio o le Pogai o foa’ialofa uma, o le Mamana Uma lava.

Lo matou Alii e! liliuina atu o matou mata i le alofa mutimutivale o Ou laufofoga, fafagaina i matou mai i Lou laoai faalelagi atoa ma Lou alofa tunoa faula’i, fesoasoani mai ia i matou faatasi ma vaegaau o Au agelu silisili’ese ma ia faamausaliina i matou e ala atu lea i tagata paia taitasi o le Malo o ABHA.

E moni, o Lau Afio o le Agaalofa, o le Alofa Mutimutivale. O Lau Afio o le Poagi o foaifua silisili, ma e moni, o Lau Afio o le Pogai o Foaifua Silsili, ma e moni o Lau Afio lava o le Muti- mutialofa uma ma le Mamalu.

 

Fonotaga

O Oe o le Alii alofa! O Au auauna nei ua faapotopoto faatasi mai i lenei fonotaga, ua liliu atu i Lou Malo ma o loo manaomia Lau faaoloaga ma le faamanuiaga. O Oe o le Atua! Faaalia ma faia ia manino faailoga o Lou tafatasi e pei ona i ai i luga moni uma o le ola. Fa’aalia ma tatalaina mai uiga lelei e pei ona faaliloina ma natia e Lau Afio i nei tagata moni.

Le Atua e! O i matou e pei o la’au toto, a o Lau foa’ialofa e pei o uaga; faafouina ma faia nei la’au toto ia ola a’e ona o Lau faamaligi mai. O i matou o Au auauna; faasaolotoina i matou mai noataga o mea faalelalolagi. E valea i matou; faia i matou ma atamamai. Ua oti i matou; ia faaolaina. E tuinanau i matou; faaoloaina i matou i le agaga. Ua tuulafoaina i matou; faia i matou ia masani i Au mealilo. Ua matou mana’ona’o; faatamaoaigaina ma faamanuiaina i matou mai Lou tuuga’oa e le faatusalia. Le Atua e! Fanaufouina i matou le faalogo; faamasaniina i matou i mealilo o le ola, ina ia mafai ona fa’aalia mai ia te i matou mealilo o Lou Malo i lenei lalolagi o tagata ma mafai ai ona matou tautino atu Lou tafatasi. O faaoloaga taitasi uma e tafe mai lea ia te Oe; o faamanuiaga uma e Ou lava lea, O Lau Afio o le malosi. O Lau Afio e mamana.O Oe o le Foai, ma o Oe o le Foaialofa Faavavau.

 

O Lau Afio o le Atua faamagalo! O au auauna nei ua liliu atu i Lou malo ma saili atu i Lou alofa tunoa ma le foa’i. Le Atu e! Faia o latou loto ia lelei ma mama ina ia taua ia i latou Lou alofa. Faamama ma faapaiaina agaga ina ia mafai e le malamalama o le La o Mea Moni ona susulu atu ia te i latou. Faamama ma faapaiaina mata ina ia mafai ona latou vaaia Lou malamalama. Faamama ma faapaia taliga ina ia mafai ona latou lagonaina le valaau o Lou malo.

Le Alii e! e moni, o i matou o tagata vaivai, ao Lau Afio o le malosi. E moni, o i matou o tagata matitiva ao Lau Afio o le tamaoaiga. O i matou o tagata saili ma o Lau Afio lava o Le o loo sailia. Le Alii e! Ia i ai Lou mutimtuialofa i luga o i matou ma faamagalo mai i matou; liligi ifo i o matou luga se malosi ma le saunia lelei e mafai ai ona matou faia e tusa ma Lou finagalo malie ma tosina atu ai i Lou malo, ina ia mafai ona matou feinu malosi i vai o le ola, e pei ona tutuina mai e le afi o Lou alofa, ma toe faaolaolaina mai i manavaga a le Agaga Paia i lenei Seneturi pupula.

Le Atua e, lou Atua! Liligi ifo i luga o lenei faapotopotoga le silafaga o Lou alofa agalelei. Leoleo ma faasaogalemuina taitoatasi i latou uma lava i lalo ifo o Lau tasuiga ma le puipuiga. Auina ifo i luga o nei agaga Lau faamanuiaga faalelagi. Faatotofuina i latou i le vasa o Lou alofa mutimutivale, ma faaolaina vave mai i latou i manavaga a le Agaga Paia.

Le Alii e! Foai mai Lau Fesoasoani mutimutialofa ma le faamautuuga i luga o lenei malo tonu. O loo taoto lenei atunuu i lalo ifo o le ata o Lau faamalumaluga ma Lau puipuiga, ma o nei tagata o loo i totonu o Lau galuega. Le Alii e, ia tuuina i luga o i latou Lau foaifua faalelagi atoa ma le foaialofa o Lou alofa tunoa ma le agalelei tele atoa ma le tamaoaiga. Faapologaina feutagaina a lenei malo ina ia taofi mau atu i le faamamaluina, ma mafai ona sao atu ma taliaina i totonu o Lou malo.

O Lau Afio o le Mamana Uma, o le Malosi, o le Alofa Mutimutivale, ma o Lau Afio lava o le Foaifua, o le Agaleleli, o le Alii o le Alofa Tunoa Agalelei.

 

Le Taitaiga e Fa’ale Atua! O lenei faatasiga o se aofiaga o Au uo o e ua tosina atu i Lou matagofie ma ua faamumuina mai i le afi o Lou alofa. Liua nei agaga e avea ma agelu faalelagi ma faaolaina i latou mai le manavaga a Lou Agaga Paia, foaiina ia i latou ni laulaufaiva matala mani loto tinou finafinau, auina ifo i o latou luga le malosi faalelagi ma le mutimutivale uma i mafaufauga ma uiga lelei, faia i latou e avea ma pogai e folafolaina faalautele atu ai le aufaatasi o tagata ola atoa ma pogai o le alofa ma le to’afilemu i le lalolagi o tagata ola, ina ia mafai ai e le mata’utia o le pouliuli o le valea ma upuesega ona mou malie atu i le malamalama o le La o le Mea Moni, ina ia suia lenei lalolagi faanoanoa i le malamlama, ma lenei malo faaletino ia mafai ona miti’ia e ‘ave o le malo faaleagaga, ia mafai ona tuufaatasi lanu eseese i se lanu e tasu ma mafai ai e fatuga leomalie o viiga ona tutu ae i le malo o Lou faapaiaina.

E moni, O Lau lava Afio o le Malosi ma o le Malosi Uma lava.

 

Lotomau

O Lau Afio e Ona le faalatalata mai o lo’u moomooga, e Ona le faatasi mai o lo’u faamoemoega, e Ona le manatuaina o lo’u manaoga, e Ona le lotoa o le mamalu o lo’u sini, E Ona le afioaga o la’u fuafuaga, e Ona le Suafa o lo’u faamalologa, e Ona le alofa o le pupula o lo’u loto, e Ona le tautuaina o lo’u manaoga silisili ona maualuga! Ou te ole atu i Lau Afio ona o Lou Suafa, lea na lagaina ai i latou sa taliaina Oe e felelei a’e i tumutumu maualuluga o le poto o Lau Afio ma faamalolosia ai i latou o loo tapua’i faamaoni ia te Oe ina ia o a’e i lotoa o le maota o Lou finagalo paia, e lagolagoina a’u e liliu atu o’u mata agai i Ou fofoga, e taulai atu o’u mata ia te Oe, ma ia tauatalatala i Lou Viiga.

Lo’u Alii e, o a’u le tagata ua fa’agaloina mea uma vagana Oe, ma liliu atu i le Puma Aso o Lou alofa tunoa, ma ua faatoina mea uma vagana Oe lava i le faamoemoe e fia faalatalata atu i Lou lotoa. Silasila mai ia te a’u, ao pupula a’e o’u mata i le Nofoali’i o loo susulu i pupula o le malamalama o Ou Fofoga. La’u Pele e! auina mai i o’u luga le mea o le a faamalosia ai a’u e lotomau i Lau Fuataiga, ina ia le mafai ai e masalosaloga a tagata amioleaga ona taofia o a’u mai le liliu atu ia te Oe.

E moni, o Lau Afio o le Atua o le Mana, le Fesoasoani i Puapuaga, le Mamalu Uma, o le Malosiuma.

 

Le Alii e, lo’u Atua! Fesoasoani i Au pele ina ia mausali i Lau Faatuatuaga, ia savavali i Ou ala, ma ia lotomau i Lau Fuataiga. Avatu ia te i latou Lou alofa tunoa e tete’e atu ai i osofaiga a le manatu faapito ma le lotoa, ma mulimuli atu ai i le malamalama o le taitaiga faaleagaga. O Lau Afio o le Mamana, o le Alofa tunoa, o le Puna o le Ola, o le Foai, o le Mutimutialofa, le Malosi Uma o le Foaialofa Uma.

 

Le Atua e, lo’u Atua! Malutia Au auauna faatuatuaina mai le leaga o le manatu faapito ma le tuinananau, puipuia i latou i le Fofoga Mataala o Lou Alofa agalelei mai faalotoloto uma, inoino ma le matau’a, leoleoina i latou i totonu o le olo le saofia o Lau fuataiga ma faasaogalemuina mai u o le masalosalo, faia i latou ma faifaaliga o Au Faailoga mamalu, faapupulaina o latou mata i ave pupula na faasusuluina mai le Puna aso o Lau Aufaatasiga Faaleagaga, faafiafiaina o latou loto i fuaitau na fa’aalia mai Lou Malo Paia, faamalosia o latou itutino i Lou mana aoao uma mai Lou Malo o le Mamalu. O Oe o le Foaialofa Uma, o le Leoleo, o le Malosiuma, o le Alofa Tunoa!

 

O Ia o le Mamalu Uma, o le Pupula Silisili.

Le Taitaiga e Faaleatua, o Lau Afio o le Alii faamagalo! E mafai ea faapefea ona ’ou usuiina Ou viiga, pe atoatoa foi le ta’uta’uina ma le faaneeneeina o Lau Afio? E leai lava se isi mea ua na o sese lava pe a faamatalaina Lau Afio e so’o se laulaufaiva, ma o se ata o Lau Afio e tusia e so’o se peni, ua na o se faamaoniga o se taumafaiga valea i lena galuega fitâ. O le laulaufaiva ua na o se meafaigaluega e fausia i elemeni; o leo ma fetalaiga ua na o ni uiga fa’aalia o mea e tutupu faafuase’i. E faapefea la ona ou faamanatuina le viiga o Ia o Lē e leai se tusa po o se faatusa e faaaoga ai lenei meafaigaluega o se leo faalelalolagi? O mea uma e mafai ona ou tautala i ai pe sailia e gata mai i mea e mafai e le mafaufau o le tagata ona magafagafaina ma si’omia e tuaoi o le lalolagi o tagata soifua. E faapefea ona mafai e le mafaufau o le tagata ona aea tumutumu maualuluga o le mamalu faapa’iaina, ma e faapefea ona mafai e le apogaleveleve o le faapalapala ona lalagaina se upega mā`ale`ale o mafaufauga lē aogā i laufanua lafulemū o le faapaiaina? E leai se mea e mafai ona ‘ou faia ae ua na o le molimau atu i lo’u augavale ma tautino atu lo’u vaivai. E moni, o Lau Afio, o Ia o Lē o le Puleaoao-uma, o le Lē-vaaia, o Ia o Lē e lē-mafuatiaina le faaeaina i luga a’e o tomai o i latou ua faauuina i le malamalama.

 

Lotomau i le Feagaiga

Le Tupu o le faavavau e, ma le Mataisau o malo, le Tufuga o ponaivi paia uma e, ia i Lau Afio le viiga! Ou te ole atu ia te Oe i Lou Suafa na valaauina ai e Oe tagata ola uma i le tafailagi o Lau pule ma le mamalu, ma sa taitaia ai Au auauna i le maota o Lou alofa tunoa ma le finagalo lelei, ina ia faitauina faatasi a’u ma i latou ua vavaeesea mai mea uma vagana Oe lava, ma faatumauina i latou ia te Oe, ma sa le mafai ona taofia e uiga faaletonu e pei ona faatulafonoina e Oe, mai le liliu atu i le ala o Au mealaofa.

Lo’u Alii e, o loo o’u taofi mau i le ‘au o Lau foaialofa, ma pipi’i mau atu i le tuupao o le ofu talaloa o Lou finagalo lelei. O lea, ia auina mai i lo’u luga mai aso o Lou agalelei le mea e ave’esea ai mai ia te a’u le manatu fua i so o se tasi mea vagana Oe, ma faia ai a’u ia mafai ona liliu atu ia te Ia lea o le Sini o tapuaiga a tagata uma, e tete’e atu i Le na faatonuina tagata faatupu fouvale, o e na lepetia Lau feagaiga, ma ua le talitonu ia te Oe ma Au faailoga.

Lo’u Alii e, ia le faafitia ia te ‘au manogi O Lou ofu i Ou aso, ma ia le vavae’esea a’u mai manavaga o Lau Fa’aaliga i le fa’aalia mai o pupula o le malamalama o Ou Fofoga. E mamana Oe e faia ai le mea e faingalo i ai Lau Afio. E leai se tasi se tasi e mafai ona teteeina Lou finagalo, po le faaluafesasi’ina le mea sa fuafuaina e Lau Afio i Lou lava mana.

E leai se tasi Atua iina na o Oe, o le Malosi Uma, o le Poto Uma.

 

Le Uō lēva’aia e! O Lau Afio o le Faanaunauta’iga o tagata uma o lenei lalolagi ma le lalolagi atalī! O Lau Afio o le mutimutialofa Peleina! O nei agaga augavale ua tosina atu i Lou alofa, ma o nei tagata vaivai ua saili atu i le faapaologa o Lou Faitotoa Paia. O po uma lava e mapuea ma oi ona o lō latou taumamao mai Lau Afio, ma o taeao uma e lauē ma fetagisi ona o sauaga a tagata saua. E mafatia i so’o se taimi i puapuaga fou, ma faatigā i so’o se manavaga e le pule sauā a so’o se tagata leaga. Ia viia Lau Afio, auā e ui i nei puapuaga, ae o lo’o mumū saesae pea i latou e pei o le malumalu o le afi, ma susulu malamalama e pei o le lā ma le masina. Ua latou tula’i a’e e pei o ni tagāvai ua sisiina maualuga i le Fuata’iga a le Atua, ma faataalise atu e pei o ni toa ti’eti’e solofanua i le malae o faalagamaea. Ua ola lausiusi e pei o ni fugalā’au manogi matala ma fa’atumulia i le olioli e pei o se rosa mata’alia. O le mea lea, o Lau Afio o le Foa’ialofa, fesoasoani i nei agaga pa’ia e ala i Lou alofa tunoa faalelagi ua foa’iina mai i Lou Malo, ma avea nei agaga faapaiaina e fa’aalia mai ai faailoga o Lou Silisiliese. O Lau Afio o le Foa’ialofa Uma, o le Agalelei, o le Alofa Mutimutivale Uma, o le Mutimutialofa.

 

Le Alii e, e ‘oa i tamāo’āiga, e matuā tumu i le alofa tunoa. E ona le poto ‘o lo’o opoia i le loloto i lo’u fatu ma lo’u loto! I le taeao, e na o Lau Afio le faamafanafanaga o lo’u agaga; E leai sē tasi e silafia lo’u naunauta’iga vagana Lau Afio. O le fatu na fa’ato’a iloa le ta’uta’uina o Lou suafa. O le a lē sailia se vaifofo vagana le naunauta’i mo nā o Lau Afio lava. E mamae le fatu e lē mo’omo’o mo Lau Afio, ma e sili ona faatauaso le mata e lē tagi mo Lau Afio! i itulā uma o o’u lagona matuā pogisa loloto, le Alii e, o le malosi silisili! E avea le manatuaina o Lau Afio ma malamalama susulu i lo’u fatu. Faia, e ala mai i Au faamanuiaga, le manavaina mai o Lou Agaga i totonu iā te a’u. O mea uma sa lē iai, ia faatumauina e faavavau.

Ia lē amana’ia ni o matou lelei ma ni ō matou aogā, le Ali’i e o le tamaoaiga, ae tau o Lou Alofa Tunoa na sasaa mai. O nei manulele apaau gau, ua felelei lēmu ‘ae. Foa’i mai e Lou Alofa Mutimutivale ni apa’au fou mo i latou.

 

Manumalo o le Fuataiga

Le Ali’i e, Foa’i mai le ola talaulau i le Laau o Lau Aufaatasiga faaleagaga. Le Alii e, ia faasusuina i vaitafe o Lou fnagalo malie ma ia faapea ona fua mai i ni fua lelei e te finagalo i ai mo Lou viiga ma le faaneetaga i le fa’aaliga o Lou mautinoa faleagaga. Ia vivii ma faafetai ma ia alagaina Lou Suafa ina ia viia ai le aufaatasiga o Lou Aano moni ma ofoina atu le faaneetaga i Lau Afio i soo se mea o loo umia i Ou a’ao ae le o se tasi lava.

E matua uiga ese le tele o faamanuiaga o i latou o e ona toto na e filifilia, e faasusuina ai le Laau o Lou Faamautuuga ma ua faapea ai ona faasilisiliina Au Afioga Paia ma le le mavae.

 

Le Alii e, Foaiina le manumalo i Au auauna o e o loo i ai le onosa’i ma le faapalepale i Ou aso mai i le tuuina atu lea ia te i latou o le manumalo e onomea ma tatau ai, e faapei ona latou saili atu ai i le maliu faamaturo i Ou lava ala. Auina mai i lalo nei, i luga o i latou le mea o le a mafai ai ona aumaia le faamafanafanaga ma le faamatalaloto i o latou mafaufau, ma o le a faafiafiaina ai o latou tagata lilo ma o le a faalauteleina ai atili le mautinoa lelei i o latou loto atoa ma le le gaoia i o latou tino ma o le a mafai ai e o latou agaga ona o a’e i luma o le Atua, o le Faaneetaga Faasilisiliina ma maua ai le Parataiso Silisiliese ma ia faapea lava ona tuumuli atu ai i le mamalu e faapei ona faia e Lau Afio ma taunuuga mo tagata o le poto moni atoa ma uiga tonu. E moni, o Lau Afio, e silafia mea uma lava, a’o i matou o au auauna, o au pologa, o Au tagata noanoatia ma o Au tagata matitiva taitasi. E leai se Alii ua na o Lau Afio lava matou te faatoga ma valaau i ai. Le Atua lo matou Alii, e le ona ua matou aioi ma augani atu i faamanuiaga po o le alofa tunoa mai i soo se tasi a’o Lau lava Afio, O Lau Afio o Ia lava o le Atua o le alofa mutimutivale i luga o lenei lalolagi ma le lalolagi a sau. O i matou ua na o ni tagata matitiva, ma le matua valevalenoa ma ua le mafaia lava se mea ua tau au ina faaumatia i seoli, a’o Lau Afio o le Tagata atoa ma o le Faailoga o le Tamaoaiga, o le Saolotoga, o le Mamalu, o le Pule ma le Foa’ifua le faatuaoia o le Alofa Tunoa.

Liua lo matou to’ilalo, lo matou Alii e, i le mea lelei e faamalieina ai Lau Afio mo se lelei o lenei lalolagi ma le lalolagi a sau, atoa fo’i ma le atulasi o foaifua ua faalauteleina mai luga seia o’o mai i le laueleele i lalo nei.

E moni, o Lau Afio o lo matou Alii ma o le Alii o mea uma lava. I ou lava aao matou te faatoilaloina ai i matou lava, faanaunau i mea e mafai ai ona matou latalata atu i Lau Afio.

 

Le Alii e! Faia tagata uma o le lalolagi ina ia mafai ona latou ulufale atu i totonu o le Paratasio o Lau Faatuatuaga ina ia aua nei i ai se tasi e tuua i tua atu o tuaoi o Au faamanuiaga.

Mai i taimi o le manatuaina o Lau Afio lava e Ou le mana e faia ai le mea e finagalo i ai, ma faasopolia atu i luga a’e o soo se mea lava e finagalo malie i ai Lau Afio.

 

O Lau Afio o le Alii agalelei, o Lau Afio o le mana’oga o lo’u loto ma lo’u agaga! Foa’i i Au uō Lou alofa agalelei, ma auina atu i o latou luga Lou alofa mutimutivale lē motusia. Ia avea Lau Afio ma maluapapa i Au pele, o se uō, ma pogai o le faamafana- fanaga, ma se soātau alofa ia i latou o ē e faanaunau atu i Lau Afio. Ua faamumuina o latou loto i le afi o Lou alofa, ma o latou agaga ua mumu i le afi mumu saesae o le tosina atu i Lau Afio. Ua latou moomoo uma taitoatasi e faataalise atu i le fata faitaulaga o le alofa, ina ia mafai ai ona ofoina ma le malie atoatoa o latou ola.

Le Taitaiga e Faaleatua! Foai iā i latou Au faamanuiaga, taitai i latou i le ala sa’o, fesoasoani alofa ia i latou ia maua manumalo faaleagaga, ma liligi ifo mo i latou foa’ialofa faalelagi. Le Alii e, fesoasoani ia i latou e ala i Lou alofa foa’ifua ma le alofa tunoa, ma faia o latou fofoga faapupulaina ma lamepa o le ta’ita’iga i faapotopotoga ua faapitoa mo le folafolaina o Lau Afio, ma faailoga o le foa’ialofa faalelagi i faatasiga e faalauteleina ai Au Afioga. O Lau Afio, e moni, o le Alofa Mutimutivale, o le Foa’ialofa Uma, o Ia o Le o Lana feasoasoani e sailia e tagata uma lava.

 

Puipuiga

Le Alii e, lo’u Atua, Ia vi’ia Lou Suafa! Ou te ole atu i te Oe i Lou Suafa lea na ta ai Itula, ma faataunuuina ai le Toe Tu, na maua ai i le fefe ma le matatau tagata uma i le lagi ma i latou uma i luga o le lalolagi, ina ia toto ifo mai le lagi o Lou alofa mutimutivale ma ao o Lou mutimutialofa agamalu, le mea o le a faafiafiaina ai loto o Au auauna, o e ua liliu atu ia te Oe ma fesoasoani i Lau Fuataiga.

Lo’u Ali’i e, malutia Au auauna tane ma auauna fafine mai u o le manatu valea ma faufauga le aoga, ae avatu ia i latou se inumaga o vai e tafe lemu o Lou poto mai aao o Lou alofa tunoa.

E moni, o Lau Afio o le Malosi uma o le faaeaina Silisili, o le Famagalo Faavavau, o le Agalelei Silisili.

 

Le Atua e, lo’u Atu’a! Ua ou tuua nei lo’u aiga, o pipii mau atu pea i le manoa o Lou alofa, ma ou matua tuuina atu atoatoa ai a’u i Lau tausiga ma Lau puipuiga. Ou te ole atu ia te Oe ona o Lou mana na puipuia ai e Lau Afio Ou tagata peleina mai tagata ua sese ma le finauvale, ma so o se tagata fouvale faapiopio foi, ma so o se tagata amioleaga ua sese mamao mai ia te Oe, ina ia puipui malu mai ia te a’u e Lau foaialofa ma Lou alofa tunoa. Faamalosia a’u e Lou mana ma Lou malosi ou te toe fo’i atu ai i lo’u aiga. E moni, o Lau Afio o le Malosiuma, o le Fsoasoani i Puapuaga, o le Puna o le Ola.

 

Ou te ai’oi faatauanau i Lau Afio, Lo’u Ali’i e, e ala i le mapuitiga a Ou tagata faapelepeleina i le lalolagi, ma e faapea fo’i ma a latou auega ona o lo latou tau mamao mai le lotoa o Lou faatasi mai, atoa fo’i ma le toto sa faamaligi’ina ona o le alofa i Lau Afio, aemaise loto sa faaliu suavaia i le nutimomoia i Lou ala ona o le puipui’ina o Ou tagata peleina mai i sauaga a e o loo tutumau pea i le leiloa o mea lilo e tau i Lou Suafa, le Leunaia. Fesoasoani atu ia i latou, Lo’u Alii e, aua o Lou Mana e Ona taumafaiga e manumalo i luga o mea uma lava, ma fesoasoani ia i latou ina ia onosa’i i puapuaga faafualoa. O Lau Afio o le Mamama Uma, o le Malosi Uma, o Faamanuiaga uma. E leai se tasi Atua i ina na’o Lau Afio, o le Foa’ifua, le Alii o le alofa tunoa atulasi.

 

Lo’u Ali’i e, ua silafia e Lau Afio le siomia o tagata i le tiga ma puapuaga, ma ua ufitia i faigata ma faalavelave. Ua osofa’ia le tagata e tofofofoga uma, ma ua osofa’ia ai o ia e puapuaga matautia e pei o le osofaiga a se gata uogo. Ua leai lava se lafiataga po o se sulufaiga mo ia vagana ai lalo o le apaau o Lau puipuiga, malutiaga, leoleoga ma le tausiga.

Lo’u Alii e, o Oe o le Alofa Mutimutivale! Avea Lau puipuiga ma o’u talipupuni, Lau malutiaga ma o’u talita, le faamaualalo i luma o le faitotoa o Lou tafatasi ma o’u leoleo, ma Lau tausiga ma le puipuiga ma o’u olo ma o’u nofoaga. Faasaoina a’u mai fautuaga a lo’u lava tagata ma mana’o, ma leoloina a’u mai ma’i uma, faaosoosoga, faigata ma tofotofoga mamafa.

E moni, o Lau Afio o le Malu, o le faatama, o le Faasogalemuga, o le Atoatoa, ma e moni o Oe o le Alofa Mutimutivale o le Mutimutivale Silisili.

 

Le Taitaiga e Faaletaua, o Lau Afio o le Faamagalo Faavavau! O Lau Afio o le Atua Mamana Silisili, o Lau Afio o le Alofa Tunoa! Ia malutia lenei auauna alofagia faapelepeleina a Lau Afio i lalo ifo o le paolo o Lou mamalu, ma foaina ina ia mafai ai e lenei tagata mativa ma le faatauvaa ona ola ma manuia i le la’oai o Lou alofa mutimutivale. Foa’i ia te ia se inumaga mai le ipu o Lou faalatalata mai, ma ia nofo mau i lalo o le faapaologa o le Lā’au Faapa’iaina. Ia faaeaina o ia i le auai atu i Lou faatasi mai, ma foa’i mo ia le oliolisaga faavavau. Fesoasoani alofa i suli o lenei auauna tamāli’i ina ia latou mulimuli i tulagāvae o lo latou Tamā pele, e faaali atu Ona uiga ma amioga lelei i tagata uma, ma mulimuli i Lou ala, saili atu i Lou Finagalo malie, ma ta’uta’u Ou viiga. O Lau Afio o le Atua Alofa Faavavau, o le Alii o le foa’ialofa.

 

Le Taitaiga e Faaleatua! Ua tula’i mai faafitauli matuā ogaoga ma o faalavelave matuā faigatā lava ua alia’e nei. Le Alii e! Aveesea nei faafitauli ma faailoa atu ni faamaoniga o Lou malosi ma le mana. Faamama i nei puapuaga ma faalaulelei le auala ua matou uia i lenei ala faigata. Le Taitaiga e Faaleatua! E lē mafa’avaivaia nei fa’alavelave, ma o matou galuega fitā ma mafatiaga ua fa’aopopoina i luga o puapuaga lē mafaitaulia. E leai se isi fesoasoani na o Lau Afio, ma e leai se lavea’i se’i vagana Oe lava. Ua matou tu’uina atu o matou fa’amoemoega uma i Lau Afio, ma tu’uina atu a matou mataupu uma i Lau tausiga. O Lau Afio le Ta’iala ma le Puluvaga o mea faigatā uma, ma o Lau Afio o le Poto, o le Silafaga, ma o le Fa’afofoga.

 

Le Ali’i e! Foa’i mai ia te a’u se vaega o Lou alofa-tunoa ma Lou alofa-agalelei, Lau tausiga ma Lau puipuiga, Lau fa’amalumaluga ma Lau foa’ialofa, ina ia fa’asilisiliina le fa’ai’uga o o’u aso nai lo o lo latou amataga, ma tatalaina faitoto’a o Au fa’amanuiaga e tele i le i’uga o lo’u ola. Liligi ifo i o’u luga i taimi uma Lou alofa-agalelei ma Lau foa’ialofa, ma foa’i mai Lau fa’amagaloga ma Lou alofa-mutimutivale i manavaga ta’itasi, se ia o’o ina ‘ou malu i lalo ifo o le fa’amalumaluga o le ataata o Lou Tulaga fa’ane’ene’eina ma ‘ou malōlō atu ai loa i le Mālo o Le o le Vi’ia-Uma. O Lau Afio o le Foa’i, ma o le Alofa Faavavau, ma e moni, o Lau Afio, o le Ali’i o le alofa-tunoa ma le tamāo’āiga.

 

O Ia o le Atua

O Lau Afio o le Ali’i Faamagalo! O nei auauna sa avea o ni agaga tamalii, ma o nei loto faapupulaina sa faamalamalamaina ma faasusuluina i le malamalama o Lau ta’ita’iga. Sa feinu i le ipu taumasuasua o le uaina o Lou alofa, ma gaua’i o latou taliga i mealilo faavavau ‘o lo’o feavea’i mai e fātuga malie o Lou Poto. Sa pipi’i mau atu o latou loto i Lau Afio, faasa’olotoina mai i mailei o le fulitua ese, ma taofi mau atu i Lau aufaatasiga. Faia nei agaga tāua faapelepeleina ma uō o le aupaia i le Lagi, ma talia i latou i le li’o o Ou tagata filifilia. Faia i latou ia faalatalata atu i Au mealilo i apitaga o Lou Malo i lugā, ma faatofuina i latou i le sami o le malamalama. O Lau Afio o le Foa’ifua, o le Pupula, ma o le Agalelei.

 

Taeao

Lo’u Atua e, ma lo’u Matai! O a’u o Lau auauna ma o le atalii o Lau auauna. Ua ou ala mai nei i lo’u moega i lenei tai susue ina ua susulu mai le Fetuao o Lou tafatasi mai le Puna Aso o Lou finagalo, ma faluteina Lona pupula i luga o le lalolagi atoa, e tusa ma mea o loo fa’aalia mai i Tusi o Lau Poloaiga.

Ia viia Lau Afio lo’u Atua e, ina ua matou alafai mai i pupula o le malamalama o Lou poto. Le Alii e, auina mai i o matou luga le mea e faamalosia ai i matou e tuu ese atu ai so o se tasi ae tau lava o Oe, ma o le a taofia ai sootaga uma vagana lau Afio. Ia Tusia mo a’u ma i latou ua pele ia te a’u aemaise lo’u atunu’u e tutusa ai tane ma fafine, mea sili o lenei lalolagi ma le olaga atali. Puipui malu i matou i Lau tausiga manumalo, mai ia te i latou o e na faia e Lau Afio ma faifa’aaliga o Tagata Musumusu Leaga, o loo mumusu i loto o tagata, Oe na le Pele a le foafoaga ma le Manaoga o le atulaulau uma. E silisili ese Lau Afio e fai ai Lou finagalo. E moni, o Lau Afio o le Malosiuma, o le Fesoasoani i Puapuaga, o le Puna o le ola.

Le Ali’i e, lo’u Atua, faamanuia ia te Ia lea na tuuina i ai e Lau Afio Ou Suafa aupito silisili, ma le na vavae’esea ai e Lau Afio tagata amiotonu mai tagata agasala, ma ia lagolagoina i le alofa i matou e faia ai le mea e sili ona fiafia ma finagalo malie i ai Lau Afio. Lo’u Atua e, ia saga faamanuiaina i Latou o e ua ta’ua o Au Afioga ma Au Mataitusi, ma i latou ua liliu atu o latou mata ia te Oe, ma liliu atu i Ou Fofoga, ma faalogo i Lau Valaau.

E moni, o Lau Afio o le Ali’i ma le Tupu o tagata uma, ma e aoao i luga oa mea uma lava.

 

Lo’u Atua e, ua ou alafa’i mai i lou lafitaga, ma ua tatau ai lava ia te ia e saili atu i lena lafitaga ona nofo pea i totonu o le Sulufaiga o Lau puipuiga ma le Olo malosi o Lau laveaiina. Lo’u Alii e, faapupulaina lo’u tagata i totonu i malamalama le Puna Aso o Lau Fa’aaliga, e pei lava ona sa faapupulaina e Lau Afio i lo’u tagata le mlamalma o le taeao o Lou finagalo lelei.

 

Lo’u Atua e, ua ou alafa’i mai i lenei taeao ona o Lou alofa tunoa, ma tuua lo’u aiga i le faatuatua atoatoa ia te Oe, ma tuuina atu ai a’u i Lau lava tausiga. Auina mai i o’u luga mai le lagi o Lou alofa mutimutivale se faamanuiaga mai lou aao, ma faamalosiina ai a’u e toe foi atu i lo’u aiga i le saogalemu, e pei lava ona faamalosia a’u e Lau Afio ou te alu ese atu i lalo o Lau puipuiga ma o’u mafaufauga ua faamautuina atoatoa ia te Oe.

E leai lava se tasi Atua na o Oe, o le Tasi, o le Lefaatusalia, le Silafia Uma, o le Poto Uma.

 

Tagata

Lo’u Atua e, O Le ou te ifo ma tapuai i ai! Ou te molimau atu i Lou aufaatasi ma Lou tafatasi, ma fa’aalia Au meaalofa i aso ua mavae ma ona po nei. O Oe o le Foaialofa Uma, o uaga mamafa e Ona le alofa mutimutivale sa toto ifo e tutusa ai tagata maualuluga ma e faatauvaa, ma pupula e Ona le alofa tunoa na faamaligiina ifo i luga o tagata usiusitai ma tagata fouvale.

Le Atua e, o le alofa mutimutivale, e Ona le faitoto’a na ifo ai le faaaliga o le alofa mutimutivale, ma le faataamilo o le sulufaiga e Ona le Fuataiga sa siomia e le alofa agalelei i lona agaga loloto lava, matou te ole atu i Lau Afio, i le faatauanau i Lou alofa tunoa anamua, ma sailia Lou finagalo lelei i lenei taimi, ina ia i ai le alofa mutmutivale o Lau Afio i luga o faifaaaliga uma o le lalolagi o tagata ola, ma le faafitia ai ia te i latou uaga o Lou alofa tunoa i Ou aso.

E moni, o tagata uma e matitiva ma manaonao, a o Lau Afio o le Puleaoao Uma, o le Manumalo Uma, o le Mamana Uma.

 

O Lau Afio o le Alii Agalelei! Na faia e Lau Afio tagata uma mai i ulua’i matua e tasi. Sa finagalo ai Lau Afio ina ia i ai uma i latou i le aiga e tasi. O i latou o Au auauna i Ou Luma Paia, ma o loo malutia tagata uma i lalo ifo o Lou Fale fetafai; o loo faapotopoto uma i Lau La’o’ai o le Foa’ifua; ma ua pupula uma ona o le malamalama o Lau Ta’ita’iga.

Le Atua e! E agalelei Lau Afio i tagata uma, sa foa’i Lau Afio mo tagata uma, sa malutia e Lau Afio tagata uma, sa tuuina mai e Lau Afio le ola i tagata uma. Sa faaoloaina e Lau Afio tagata uma i taleni ma le atamai; ma o loo faatotofuina tagata uma i le Vasa o Lou Alofa Mutimutivale.

O Lau Afio o le Alii agalelei! Faatasia tagata uma. Ia autasi tapuaiga ma faia atunuu ina ia pei o se malo e tasi, ina ia avea i latou ma ituaiga e tasi, ma avea ai le lalolagi atoa o se aiga e tasi. Ia latou fegalegalea’i i le aufaatasi ma le fealofani.

Le Atua e! faatuina le Tagavai o el Tafatasi, o tagata ola.

Le Atua e! Faavaeina le Filemu Aupito Silisili.

Le Atua e! ia faamausaliina faatasi loto.

Le Tama Alofa e, le Atua! Faaolioli’ina o matou loto i le manogi sasala o Lou alofa. Faapupulaina o matou mata i le malmalama o Lau Ta’ita’iga. Faafiafiaina o matou taliga i le leo malie o Au Afioga, ma malutia i matou i le Ana o Lau Tausiga.

O Lau Afio o le Malosi ma le Mamana, O Lau Afio o le Faamagalo ma o Lau Afio o le To’atasi, o Le e le Silasila i tu’inanau o tagata ola uma.

 

O Ia o le Atua.

O Lau Afio o le Alii Agaalofa ma le faapelepele! O nei uo ua faagaeetia i le uaina o le Feagaiga, ma ua fesea’i solo i le vaomatua o Lou Alofa. Ua tineia o latou loto i le afi mumu saesae o le taumamao mai Lau Afio ma ua latou ‘ai’oi ma le faanaunau atu mo le fa’aaliga o Lou mamalu. Mai i Lou Malo lilo, o le Malo o le Levaaia, fa’aalia ia te i latou le mamalu matagofie o Lou alofa tunoa ma faasusulu atu ia i latou le malamalama o Lou alofa foa’ifua. Auina mai se faamanuiaga fou ma fa’aalia manuia fou i taimi uma lava. Le Ta’ita’iga e Faaleatua! E vaivai i matou a o Lau Afio o le Mamana Silisili. O matou ua na o ni loi nini’i ae o Lau Afio o le Tupu o le Malo o Mamalu. Foa’i mai Lou alofa tunoa ma auina mai Lau Foa’ialofa i o matou luga, ina ia mafai ai ona matou tutuina se afi ma faasalalau atu lona malamalama, ina ia matou faailoa atu le malosi, ma faia ni auaunaga. Foa’i mai ina ia matou faasusuluina atu le malamalama i lenei lalolagi pouliuli ma le faaleagagaina i lenei lalolagi lē tumau o le efuefu. Faia i matou ia le malolo mo sina taimi, pe faaeleeleaina i mea e mavae o lenei olaga. Ia faamalosia i matou e saunia se tausamaaga o ta’ita’iga, tusia i o matou totoola fuaiupu o le alofa, ave’ese le fefe ma le faavaivai, a ia avea e pei o laau fuatele, ma faia ia mafai e uiga silisili o le tagata ona fa’aalia i lenei lalolagi le tumau. O Lau Afio i le mea moni o le Foa’ialofa uma, o le Mutimutialofa silisili, o le Faamagalo Faavavau, o le Faamagalo.

 

Outou e o pele a ‘Abdu’l-Bahá ma outou o auauna tamaita’i o le Alofa Mutimutivale! I lenei taeao segisegi, o loo agi atu ai i luga o mea uma na faia savili faafouina o le Parataiso o Abhá, ae peitai, e na’o le loto e mama e latou te faagaioiaina, ma e na’o faalogona mama e mafai ona pu’eia lo latou sausau manogi. E na’o mata fia vaai e mafai ona iloa atu ‘ave o le la; e na’o taliga fia faalogo e mafai ona lagonaina pesega a le Aupaia i luga. E ui i le anoanoa’i o uaga o le tautotogo, o le faaoloaga mai le Lagi e faatotoina ifo i luga o mea uma, e latou te faafua fetiitii e na’o le eleele lelei; e latou te le fiafia i eleele pala ma le oona, aua e leai ni fua o meaalofa e vaaia ai.

O lenei aso, o manavaga paia ma le malu o le Malo Abhá o loo puaina atu i so o se eleele, ae na o le loto e mama e avatua faalatalata ma mauvaega mai ai. O le faanaunauga a lenei agaga ta’useseina, e ala i le agalelei o le Puna To’atasi o le Ola ma le fa’aaliga o le mana o le Upu a le Atua e mafai ai ona faamamaina mafaufau o tagata lē magafagafa, ina ia mafai ai ona o latou manavaina sausau manogi mai togarosa lilo o le agaga.

Outou e o uo a le Atua! O uo moni e faapei o ni foma’i atamamai, ma o le Aoaoga a le Atua e faapei o se suau’u fofo, o se vailaau mo le tofa fesilafa’i o le tagata. E latou te faamamaina le mafaufau ina ia mafai e le tagata ona manavaina ma maua le fiafiaga i o latou sausau manogi. E latou te fafaguina i latou o momoe. E latou te aumaia le malamalama i le tagata faapalapala, ma se vaega faatatauina mo le tagata ua faaaunuuaina ma o se faamoemoe ola mo le tagata ua tuulafoaina.

Afai e galue se agaga i lenei Aso e tusa ma ta’ita’iga ma poloa’iga a le Atua, o le a ia galue faapei o se foma’i faapaiaina mo tagata soifua, ma faapei o le taualaga a le agelu o Isaraelu, o le a ia toe faaolaina tagata oti o lenei lalolagi mavae; aua o faamautuuga o le Malo Abhá e le faalavelavea, ma o lea agaga faamaoni, o le a faauo atu ia te ia, le fesoasoani le mavae a ‘Au i luga. O lea e liua ai se iniseti faalafua ma aeto i le atoaga o lona malosi, ma o se manulele itiiti o le a avea ma manualii silisili ona malosi i le tulu’iga o le mamalu mai anamua.

O lea, ia le vaai i le tulaga o lou agavaa, ia le fesili foi pe e te aoga i se galuega: tu atu lou famoemoega i le fesoasoani ma le alofa agalelei, ma famanuiaga ma le foaialofa a Baha’u’lláh – ia ofoina a’e lo’u agaga mo Ana uo! Ia faananau i le solofanua o taumafaiga maualuluga i luga o le laueleele o le faatoina, ma aveesea mai le taui o le agalelei faalelagi mai i lenei malae lautele.

Outou e o auauna tama’ita’i o le Alii alofa mutimutivale! E fia ni tupu tama’ita’i ma masiofo o lenei lalolagi ua tuu atu o latou ulu i luga o le aluga o le pefu ma mou atu. Ua aunoa ma se mea o totoe sa o latou tuua, leai se faamaumauga, leai se pine faamau, e oo lava i o latou igoa. E mo i latou, ua le toe faauuina ni o latou mamalu; e mo i latou, ua le toe i ai se ola. Ae peitai, e lē faapea auauna tama’ita’i sa o latou galulue i le La’oai o le Atua; o i latou ua susulu faapei o fetu fepulafi i lagi o le mamalu faavavau, ma faasalalau solo lo latou pupula i le loaloa o augatupulaga lē mavae. Ua faataunuuina o latou faamoemoega i le Parataiso o Abhá; ma ua latou tofo i le meli o le faatasi atu i le potopotoga a le Alii. O nei agaga ua faamanuiaina mai lo latou i ai i lenei lalolagi; ua latou tauina le fua o le ola. Ae mo le to’atele, o le a mautinoa le o’o mai o le taimi e avea ai i latou ma mea e le toe manatuaina.

Outou e o pele a lenei tagata tauseseina! Faamamaina o outou mata, ina ia outou le faaeseaina isi tagata mai ia te outou. Ia outou le vaai atu i isi o ni tagata ese; ae vaai atu i tagata uma o a outou uo mamae, aua o le ausiaina o le alofa ma le aufaatasiga o le a faigata tele pe a taula’i la outou vaai i le faaesea o isi mai ia te outou. Ma o lenei augatupulaga fou ma le maoa’e, ua fetalai mai Tusitusiga Paia e tatau ona laugatasia i tatou ma isi; e tatau ona tatou le vaai atu i uiga sauā poo le lē amiotonu, poo uiga fia siitaua, poo feteena’iga, po’o lagona o le ita, ae ia liliu atu o outou mata i le lagi o le mamalu mai le vavau. Aua o tagata uma lava o se faailoga mai le Atua, ma ona o le alofa o le Alii ma Lona mana na mafua ai ona tatou tulaueleele i lenei lalolagi; o le mea lea o latou e lē o ni tagata ese, ae o tagata o le aiga; e lē o ni tagata ua faaesea ae o uo mamae, ma e tatau ona outou tausi i nei upu.

O le mea lea e tatau ai i le au pele a le Atua ona feoeoe’ai ma le fegalegalea’i moni e aunoa ma le faaeseaina o o latou uo ma tagata ese, ma fa’aalia i tagata uma lo latou agaalofa ma le agalelei silisili, ae le vaai atu i le tulaga o lo latou agavaa, ma e aunoa ma le fesiligia pe talafeagai lo latou alofaina. I taimi uma lava, e tatau i uo ona o latou mafaufau i isi ma faaalia lo latou agalelei e lē mavae. Ia aua nei faatoilaloina i latou e uiga taufaamata’u o tagata ma lo latou ma’ema’eā ma le ita, e tusa lava poo le a le malosi. Afai e veloina outou e nisi i tao, ia outou ave ai le susu ma le meli; afai e faaonā i o outou ola, ia outou faasuamalieina o latou agaga; afai latou te faamanu’a ia te outou, ia outou aoao ia i latou le faamafanafana loto; afai e faaoo ni manu’aga i o outou tino, ia fai outou ma vai malu i o latou manu’aga; ma afai e latou tui ia te outou, ia outou tuu atu i o latou laugutu se ipu faaolatotoga.

Le Atua e, lo’u Atua! O Au auauna vaivai ma le faatauvaa lenei; o latou o auauna tane ma auauna tama’ita’i faamaoni a lau Afio, ua ifo to’ele i luma o Lau Fetalaiga faaneeneeina ma faamaualaloina i latou i luma o Lou Faitotoa o le malamalama, ma molimauina Lou tafatasi e ala i le La sa faia e susulu i le ogātotonu o le aso pupula. Ua latou faalogo i poloa’iga na laga a’e e lau Afio mai Lou La’oai lafita’i, ma o latou loto ua faagateteina e le alofa ma le olioli, ua o latou tali atu i Lau valaau.

Lo’u Alii e, to ifo i o latou luga uaga mamafa o Lou alofa tunoa, ma faasūsūina i latou i vai o lou alofa mutimutivale. Ia faia i latou o ni laau matagofie e tutupu a’e i le togalaau o le lagi, ma mai ao ua faatumulia ma taumasuasua i Au faamanuiaga ma faatanoa loloto o Lou alofa mutimutivale lē fuatia, ia faia e lau Afio lenei togalaau ina ia totogo a’e ma faatumauina lona lanulauava ma le lafulemu, ma lona faafouina, pupula ma le matagofie.

O lau Afio o le Malosi uma, o le Faaneetaga, o le Mana, o Ia lava e to’atasi i le lagi ma lalolagi, e tumau pea e le suia. E leai se isi Atua i ina vagana lau Afio, le Alii o faailoga ma tau fa’aalia.

 

Tala’iga

Lo’u Atua e, ia faaneeneeina Lou Suafa, ona ua faaalia e Lau Afio le Aso o le Tupu o Aso, le Aso na folafolaina e Oe i Ou tagata filifilia ma Au Perofeta i Au Tapeleti silisili ona atoatoa, le Aso na faluteina ai e Lau Afio le pupula o le mamalu o Ou Suafa uma i luga o mea na faia. E uiga ese le faamanuiaga o so o se tasi ua na faamautuina o ia ia te Oe, ma ulufale atu i Lou faatasi mai, ma maua le i’uleo o Lou Siufofoga.

Lo’u Alii e, ou te ole atu ia te Oe i le suafa lea o loo siomia faataamilo i ifoga i le malo o Ou Suafa, ina ia lagolagoina alofa e Lau Afio i latou o loo pele ia te Oe ina ia faaneeneeina Lau Afioga i Au auauna, ma ia faamaligi faalauteleina mai Lou viiga i totonu o Ou tagata, ina ia mafai ai e le olioli loloto o Lau Faaaliga ona faatumulia agaga o tagata uma o loo nonofo i Lou lalolagi.

Lo’u Alii e, ona o Lau Afio sa ta’ita’iina i latou i vai ola o Lou alofa tunoa, foai mai ona o Lau foaialofa, e mafai ai ona le taofia i latou mai ia te Oe; ma ona o Lau Afio sa valaauina i latou i apitaga o Lou Nofoalii, ia le tutuli esea i latou mai Lou faatasi mai ona o Lou alofa agalelei. Liligi ifo i o latou luga le mea o le a faatoina atoatoa ai i latou mai so o se mea lava vagana Oe, ma faia ina ia mafai ona latou o a’e i le mafana o Lou faalatalata mai, o le tulaga lea o le a le mafai ai e le faasausili o tagata fouvale po o fautuaga a i latou e le talitonu i Lau Afio Silisili ese ma le matautia, ona taofia ai i latou mai Lau Afio.

 

Fai atu: Ia i ai le viiga i Lau Afio o le na lagaina Tagata paia uma e tautino atu lo latou ‘augavale i luma o faaaliga atulasi o Lou malosi, ma perofeta taitoatasi e fa’aali atu lo Latou valevalenoa i le pupula o Lou mamalu tumau. Ou te ole atu ia te Oe, ona o Lou Suafa na tatalina ai puipui o le Lagi ma faatumuina i le olioli loloto le Au Paia i luga, ina ia faamalosia a’u e anaana i le mea sa faamatalaina mai e Lau Afio le mea o i totonu ia te a’u, ae ou te le iloaina lava le mea o loo i totonu ia te oe. O Lau Afio o le Silafia Uma, o le Faailoa Uma.

 

Le Alii e, lo’u Atua, ia viia pea Oe! Ou te ole atu i Lau Afio ona o Lou Suafa e leai se tasi ua na iloa atoatoa, e ona le taua e leai se tagata e gafatia; ou te ole atu ia te Oe, ona o Ia o Le o le Vaipunaao o Lau Fa’aaliga ma le Puna’aso o Au faailoga, ina ia faia lo’u loto o se nofoaga o Lou alofa ma le manatuaina o Oe. Ia suia faatasi o ia ma ou Vasa aupito silisili, ina ia mafai ai ona tafe mai ia te ia o vai ola o Lou poto ma tafega pupula o Lou faaneetaga ma le viiga.

O loo molimau atu itutino uma o lo’u tino i Lau aufaatasiga, ma o loo folafola atu e lauulu o lo’u ulu le mana o Lou mamalu ma le malosi. Ua ou tu i faitotoa o Lou alofa tunoa i le matua gaua’i fuatiaifo ma le faatoina atoatoa, ma pipii atu i le tuupao o Lau foaialofa, ma tula’i atu o’u mata i luga o le tafailagi o Au mea’alofa.

Lo’u Atua e, totofiina e Lau Afio mo a’u le mea ua avea ma faasilisiliga o Lou mamalu, ma lagolagoina a’u, e Lou alofa tunoa malosi, e mafai ai ona talai atu Lau Fuataiga, e mafai ai ona faatutuina vave a’e tagata oti mai o latou tuugamau, ma faataalise atu i Lau Afio, faatuatua atoatoa ia te Oe, ma taulai atu le latou vaai i luga o le pogai o Lau Fuataiga, ma le nofoaga o le tafaoata o Lau Fa’aaliga.

E moni o Lau Afio o le Mamana Silisili, o le silisili Ese, o le Silafia Uma, o le Poto Uma.

 

Le Atua e, lo’u Atua e! Fesoasoani Lau Afio Au auauna fa’atuatuaina ina ia latou maua le alofa ma le loto agamalu. Fesoasoani ia i latou i lo latou salalau atu i totonu o nu’u ma ma ’a’ai o le lalolagi, ia fa’amaoaigaina i le malamlama o le ta’ita’iga e pei ona sau mai i le malo o i luga. E moni o Lau Afio lava o le Malosi, o le Mamana—Uma, o le Malosi—Uma, o le Pule Aoao uma o le Foaifua fa’avavau. E moni o Lau Afio lava o le Aga’alofa, o le Agamalu, o le Pulunauanau, o le Atulasi o Fa’amanuiaga.

 

O oe o le Atua e le faatusalia! O Oe o le Ali’i o le Malo! O nei tagata o Lau vaega’au faalelagi. Lagolagoina i latou ma ia faatasi ma vaega o le Au Paia silisili, faia i latou ia manumalo, ina ia avea ai i latou taitoatasi e faatusaina i se vaega’au atoa ma faatoilaloina ai nei atunuu i le alofa o le Atua ma le faapupulaina o aoaoga faaleagaga.

Le Atua e, avea Oe ma o latou lagolago ma fesoasoani, ia avea Lau Afio ma o latou faalagolagomaga i le vaomatua, mauga, vanu, vaomaoa, fanua laugatasi ma le sami ina ia mafai ona latou alalaga atu ona o le mana o le Malo ma le manavaga a le Agaga Paia.

E moni, o Lau Afio o le Mamana, o le Matautia ma le Malosi uma lava, ma o Oe o le Poto, o le Faafofoga ma le Silafaga.

 

O ai lava e faimalaga atu e tali i so’o se nofoaga e tatau ona ia taulotoina lenei tatalo i le ao ma le po a’o faimalaga i atunu’u ‘ese.Le Atua e, lo’u Atua e! Ua silafia e Lau Afio lo’u fiafia ma tosina atu aga’i i Lou malo mamalu, tutuina i le afi o Lou alofa i totonu o tagata, o le leo o lo’o alaga i le vao o Lou malo i totonu o nei lauele’ele tetele ma le vavamamao, vavae’esea mai mea uma lava vagana Lau Afio, fa’alagolago i Lau Afio, ua lafoa’ia le malolo ma le mapusaga malie, ua mamao mai lo’u aiga moni, o se tagata ta’ase i totonu o nei atunu’u, o se tagata ‘ese ua fa’apa’u fao i luga o le ele’ele, i le fa’amaualalo i luma o Lou Faitoto’a fa’asilisilina, gaua’i atu aga’i i le lagi o Lou malosi mamalu, ‘ai’oi fa’atauanau i Lau Afio i le vaeluaga o le po ma le tafa o ata, talosaga fa’atauanau ma le aioiga i Lau Afio i le taeao ma le tau afiafi ina ia mafai ona fesoasoani mai ia te a’u e auauna atu i Lau Fauataa’iga, ia fa’asalalauina fa’alautele Lau A’oa’oga ma ia fa’asilisilina Lau Afioga i Sasa’e atoa fa’apea fo’i ma Sisifo.

Le Ali’i e, fa’amalosia lo’u tua, ina ia mafai ai ona ou tautua atu i Lau Afio i le tulaga e sili ona gata mai ai lo’u taumafai, ma aua ne’i tu’ua na’o a’u to’atasi ma le leai o se fesoasoani i totonu o nei atunu’u.

Le Alii e, taliaina a’u e mafuta atu i Lau Afio i lo’u nei to’atasi ma tauto’aluaina a’u i totonu o nei atunu’u ‘ese.

E moni, o Lau Afio o le Fa’amautu’uga mo so’o se tasi lava e finagalo malie i ai Lau Afio e faia ai e tusa o Lou lava finagalo, ma e moni, o Lau Afio o le mamana uma lava, o le Malosi uma lava.

 

O Agaga uma lava o e faimalaga aga’i i ‘a’ai, nu’u atoa tala tu’u o nei Setete e feagai ma le faalauteleina atu fa’asalalau le manogi sasala o le Atua, ma e tatau lava ona una’i lenei mafutaga i taeao uma lava.

Lo’u Atua e! Lo’u Atua e! Ua silafia e Lau Afio a’u ma lo’u nei faatauvaa atoa ma lo’u vaivai, faatamaoaigaina mai i mea silisili o le tausinioga, lotomau e tula’i atu e sii a’e Lau Afioga i luga o le lalolagi o tagata ma faasalalau atu Lau aoaoga i luga o Ou tagata. E le mafai ona ou faataunuuina se’ia vagana ua fesoasoani Lau Afio ia te a’u faatasi ma le manavaga a le Agaga Paia, fesoasoani ia ou manumalo mai ‘au o Lou malo mamalu, ma liligi ifo i o’u luga Lau faamaoniga, ua na’o lena le auala e suia ai se meaola itiiti e avea ma aeto, ma liua ai se mataua o le vai e avea ma vaitafe ma sami e tele, ma sina iota e avea ma malamalama o le la. Lou Alii e, Fesoasoani mai ia te a’u i lo’u manumalo ma se malosi faatagaina mai, ina ia mafai ai e lo’u laulaufaiva ona tautalatala atu i Ou viiga ma uiga i tagata uma ma ua taumasuasua lo’u loto mai le uaina o Lou alofa ma le poto.

O Lau Afio e ou le malosi uma, ma o le Faito’aga o mea uma lava, e faamalie ina ai Lou Finagalo.

 

Faaavanoaina e o loo faasalalauina le manogi sasala o le Atua e taulotoina lenei tatalo i taeao uma lava.

Le Alii e, Lo’u Alii! O le viiga ma le faafetai ua i Lau Afio lea, ona o Lau lava Afio sa ta’ita’ia a’u mai i ala maualuga o Lou malo, faapologaina a’u e savali i lenei ala sa’o ma le mamao, faapupulaina o’u mata e taofi mau atu i le matagofie o Lou malamalama, faamatalaina o’u taliga e faalogo atu ai i pesega malie a manu o le faapa’iaina mai le malo o mealilo ma tosina atu ai lo’u loto i Lou alofa i luga o tagata amiotonu.

Lo’u Ali’i e! Faamausaliina a’u ma le Agaga Paia, ina ia mafai ai ona ou valaau atu i Lou Suafa i luga o nei malo ma tuuina atu i ai le talalelei o le fai faaaliga o Lou malo i le va ma tagata ola.

Lo’u Alii e! Ou te vaivai, faamalosi mai ia te a’u i Lou mana ma le pule. E lalamu lo’u laulaufaiva, faapologaina a’u e tautala atu i Lou faamanatuina ma viiga. O a’u o se tagata faatauvaa, faamamalu ia te a’u mai i le faaavanoaina o a’u i totonu o Lou malo. Ua tagata ‘esea a’u, faia ina ia ou taunuu atu i le faitoto’a o Lou Alofa Mutimutivale uma. Le Alii e! Faia a’u ma moli fe’emo’emoa’i, o se fetu susulu atoa ma se la’au ua faamanuiaina, ma faapaleina i fua, ma ona lala o loo malutia uma ai nei atunuu. E moni, o Lau afio o le Malosi uma, o le Mamana uma ma o le Leuna’ia.

 

Tamaiti ma Talavou

Le Alii e, lo’u Atua, ia viia Oe! Ou te faafetai ia te Oe e pei ona valaauina e Lau Afio a’u ia ola i Ou aso, ma manavaina mai i totonu ia te a’u Lou alofa ma Lou poto. Ou te aioi atu ia te Oe i Lou Suafa na aumaia ai i fafo penina lelei o Lou poto ma Lau folafolaga mai fale teuoa o loto o Au auauna, e pei ona latalata atu ia te Oe, ma na mafua ai ona faasusuluina ifo e le Fetu Ao o Lou suafa o le Mutimutialofa, lona pupula i luga o mea uma o loo i Lou lagi ma mea i luga o Lou lalolagi, ina ia faaoloaina a’u ona o Lou alofa tunoa ma le foaialofa, i Au foaialofa matagaofie ma le lafita’i.

Lo’u Atua e, o ulua’i aso nei o lo’u olaga, lea ua faafesootaia e Lau Afio ma Ou lava aso . Ona ua faamaligiina mai nei e Lau Afio i luga se mamalu tele faapenei, ia le taofia e Lau Afio mai ia te a’u mea ua totofiina mo Ou tagata filifilia.

Lo’u Atua e, o a’u ua na o se fatu faatauvaa sa luluina e Lau Afio i le eleele o Lou Alofa, ma faia ia totogo a’e i le aso o Lau foaialofa. O le mea lea, o loo ole atu lenei fatu i lona tagata lilo moni, i vai o Lou alofa mutimutivale ma le vaipuna ola o Lou alofa tunoa. Auina ifo i ona luga mai le lagi o Lou alofa agalelei, le mea o le a faamalosia ai o ia e totogo olaola a’e i lalo o Lou ata ma totonu o tuaoi o Lou lotoa. O Oe o Ia lea e faasusuina i vai loto o i latou uma ua iloa Oe mai Lou vaitafe tele ma le vaipuna o Au vai ola.

Ia viia Atua, le Ali’i o lalolagi.

 

Le Atua e! Aoaoina nei tamaiti. O nei tamaiti ua o ni laau o Lau faatoaga, o fugalaau o Lou fanua laugatasi, o rosa o Lou togalaau. Ia toto ifo i o latou luga Lau uaga, ma ia susulu ifo i o latou luga le La o le Upu Moni faatasi ma Lou alofa. Ia fanaufouina i latou e au matagi malu e mafai ai ona aoaoina, ola, ma atina’e, ma faaalia i le matagofie silisili i latou. O Lau Afio o le Foai, O Lau Afio o le Mutimutialofa.

 

Le Atua e! ta’ita’i a’u, puipui a’u, faapupulaina le lamepa o lo’u loto ma faia a’u ia avea ma fetu pupula. O Lau Afio o le Malosi ma le Mamana.

 

Lou Ali’i e, lo’u Ali’i e! O a’u o se tamaititi i tausaga mu’amu’a. Fafagaina a’u mai le suasusu o Lou alofa mutimutivale, aoaoina a’u mai le fatafata o Lou alofa, faaa’ogaina a’u i le a’oga o Lau ta’ita’iga ma atiina a’e a’u lalo o le ata o Lau foa’ialofa. Lavea’iina a’u mai le pouliuli ma faia a’u ma malamalama pupula; faasaolotoina a’u mai le le fiafia, ma faia a’u ma fugalaau o le togarosa; faia a’u e avea ma se auauna o Lou faitotoa ma foai mai o’u luga le amio ma le uiga o tagata amiotonu; faia a’u ma afuaga o le foaialofa i le lalolagi o tagata ola ma ia faapaleina lo’u ulu i le pale o le ola faavavau.

E moni, o Lau Afio o le Mamana, o le Malosi, o le Silafaga ati, o le Faafofoga.

 

Le Atua e! Faafaileleina lenei pepe i le fatafata o Lou alofa, ma avatu ia te ia le suasusu mai le fatafata o Lau Tausiga. Faato’aina ma totoina lenei laau fou i totonu o le togarosa o Lou alofa ma fesoasoani ia te ia ina ia tuputupu ma olaola a’e mai i uaga o Lau foaifua. Faia ia avea o ia ma tamaitiiti o le malo, ma ta’ita’i atu ai i Lou malo faalelag. O Lau Afio e Ona le mama uma ma le agalelei, ma o Lau Afio e Ona le Faamaligi mai, o le Foa’i agalelei, o le Alii o le Faataunuuga uma o foa’ifua.

 

O Lau Afio o le Alii Agalelei! O nei tamaiti o galuega lava ia a tamatama’ia’a silisili o Lau Afio, ma fai ma faailoga ofoofogia o Lou Silisiliese. Le Atua e! Puipuia nei tamaiti, taliaina i latou i Lau fesoasoani finagalo malie ina ia mafai ona a’oa’oina ma mafai ai e i latou ona tautua ma auauna atu i le lalolagi o tagata. Le Atua e! O nei tamaiti o ni penina, faia i latou ina ia ola i totonu o le li’o o Lou alofa agalelei.

O Lau Afio lava o le alofa foaifua, o le Agaalofa uma lava.

 

O Lau Afio o le Alii Le faatusalia! Tausia ma faasusuina lenei pepe mai i le fatafata o Lou alofa agalelei, leoleoina mai totonu o le moega o Lau faasaogalemuuga ma le puipuiga ma faasaoina ia mafai ona faafaileleina mai i aao o le malu o Lou Alofa.

 

Le Alii e, Totoina lenei fatu fou i totonu o le faatoaga o Lou alofa tunoa faamanuiaina, faasusuina i le vaipuna o Lou alofa agalelei ina ia tupu olaola a’e o se laau lelei, ona o le faamaligiina mai o Lau tausiga agalelei ma le Alofa tunoa.

O Lau Afioga o le Malosi ma le Mana Uma lava.

 

Le Alii e! Ia faapupulaina ma faamaligiina ifo Au faamanuiaga i luga o lenei tagata talavou augavale. Foa’iina ia te ia le poto ma le atamai, tuuina atu ia te ia le poto ma le atamai, tuuina atu ia te ia se malosi faaopoopo mai le tafa o ata o taeao uma ma ia leoleoina o ia mai totonu o malutiaga o Au puipuiga ina ia faapea ona ia maua le saolotoga mai faalavelave, ma mafai ai ona ia faatoina o ia lava e auauna atu ai i Lau Fuata’iga, ma ta’ita’iina le auiluma ta’ita’i ia i latou ua leai ni faamoemoega, faasaolotoina ia latou ua noatia e puapuaga ma fafaguina le o loo faatmala, ia faapea ona faamanuia uma ia i le manatuaina o Lau Afio ma le viiga. O Lau Afio lava o le Malosi atoa ma le Mana Uma lava.

 

Le Alii e, avea nei tamaiti faapei o ni laau toto matagofie. Ia latou ola a’e ma atina’e i le togalaau o Lau Feagaiga, ma foa’i iai le matagofie ma le faafouina mai uaga o ao o lou Malo o le mamalu. Le Alii e, o le Agalelei, o a’u ua na o se tamaitiiti, faaeaina a’u i le faaulufale atu i lou Malo. E faale-lalolagi a’u, faia a’u faalelagi; o a’u o le lalolagi i lalo, avea a’u ma se tasi o le lagi i luga, faanoanoa, faapologaina a’u ina ia ou fiafia, e faaletino, ia faaleagagaina a’u ma foa’i mai ina ia mafai ona ou faaalia Lou agalelei le faatuaoia. O Lau Afio o le Mamana, o le Alofa Uma.

 

O le Alii Oe e Lefaatusalia, malutia e Lau Afio lenei tamaitiiti faatauvaa, o le Alii alofa ma le faamagalo, o Lau Afio mo lenei agaga sese ma le faanoanoa. Le Alii e, e ui ina o matou o ni laau toto e le aoga, a’o rosa lava o Lau faatoaga. E ui o ni lala e leai ni lau ma ni fua, a’o se vaega lava o Lau faatoaga. Faatupuina lenei laau i uaga mai ao o Lou alofa, faaolaina ma faafouina o ia e le manava faaola o le taututupu faaleagaga mai Lau Afio. Faia o ia ina ia faalogo ma iloa ma faaeaina ma maua le ola e faavavau e mafuta ai i Lou Malo e le aunoa.

 

O Ia o le Mamalu Faasilisiliina!

Lo’u Alii mutimutialofa e! O le lili lenei o loo tuputupu a’e i le faatoaga o Lou finagalo malie ma o le lala sa totogo a’e i totonu o le togalaau o le poto moni. Avea o ia, le Alii e, o faamanuiaga, ina ia faafouina pea i soo se taimi ona o Au matagi malu, ma ia faia ina ia lausiusi, sasala ma matala mai ona o uaga o ao o Lou finagalo, Le Alii agaalofa e! E moni O Lau lava Afio o le Mamalu Uma.

 

O Ia o le Atua!

Le Alii alofa e! O i matou o tamaiti matitiva, e mana’ona’o ma faatauvaa, ae o matou o laau sa totogo a’e mai Lou vaitafe faalelagi ma o laau mu’amu’a sa totogo a’e ma matala i Ou tau totogo a’e faapaiaina. Faia i matou ia fou ma lausiusi ona o le faamaligi mai i ao o Lou mutimutialofa, fesoasoani mai ia i matou ina ia ola ma atina’e ona o ave o le la o Au meaalofa faasilisiliina ma faia i matou ina ia Faafouina ona o matagi agi malu mai laufanua o le mea moni. Foa’i mai ina ia avea matou ma laau lausiusi e fua mai ai ni fua o le togalaau o le poto, fetu pupula o loo sususlu mai luga o tafa’ilagi o le fiafia faavavau ma lamepa Susulu o loo faasusuluina atu ai le malamalama i luga o faapotopotoga o tagata soifua.

Le Alii e! Pe afai e faatotoina ifo i o matou luga Lau tausiga alofa, o le a mafai e i matou ta’ito’atasi ona felelei maualuluga ae faapei o ni aeto maualuluga o Lou poto, ae afai o lea tuu ai na o matou lava, o le a lafoa’iina ma o le a pa’ū atu i le leiloloa ma le nutimomoia. Poo le a lava le mea o le a matou iai, o Lau Afio o le a matou gau’ai atu iai ma o Lou la’oai fo’i matou te saili lafitaga atu iai.

O Lau Afio o le Foa’i, o le Tamaoaiga, o le Alofa uma.

 

O Ia o le Atua

O Lau Afio o le Atua e mama! Avea nei laau mu’amu’a sa totogo mai le vaitafe o Lau ta’ita’iga ina ia faafouina ma lausiusi ona o le faamaligi ifo o ao o Lou Alofa Mutimutivale; avea i latou ina ia lagaina a’e e matagi malu o loo agi mai vai inu o Lou tafatasi ma faapologaina i latou ina ia faaolaina ona o ave susulu o le La o le mea moni, ina ia mafai ai pea ona ola ma lausiusi, ma ia totogo a’e i ni fua matala ma le lelei.

Le Alii e, Foa’i ifo i o latou luga ta’ito’atasi le malamalama, avatu ia i latou le mana ma le malosi ma ia avea o ni faata e faaatagia atu ai Au fesoasoani ma faamautuuga faapaiaina, ina ia matua tulaga ese mai ai i latou mai tagata.

O Lau Afio o le Malosi ma le Mamana.

 

Le Alii e! Fesoasoani i lenei afafine o le Malo ina ia faasilisiliina lona tulaga i lalolagi uma; faia o ia ina ia liliu ese mai lenei lalolagi mavae o le pefu ma i latou ua faasaga atu iai o latou loto, ae faia o ia ina ia mafai ona mafuta ma avatua faalatalata i le lalolagi e le mavae faavavau. Avatu ia te ia le mana faalelagi ma faamalosia o ia ona o manavaga a le Agaga Paia ina ia mafai ai ona tula’i a’e o ia e auauna atu ia te oe.

O Lau lava Afio o le Malosi.

 

O Lau Afio o le Alii agalelei!

Foa’i mai ina ia mafai ai e nei laau ona avea ma vaaiga matagofie o le Parataiso o Abhá. Avea latou ina ia tutupu a’e i Lau foa’i faalelagi. Faia i latou ia faafouina ma lausiusi ma sausauina i latou e mataua faalelagi. Faaofuina i latou i ofutalaloa o le matagofie pupula ma faapaleina o latou ulu i fugalaau lalelei. Faamatagofieina i latou i fua lelei ma faasalalau atu i o latou luga Ou manogi sasala.

O Lau Afio o le Foa’ialofa, o le Alofa uma, o le Pupula Faasilisiliina, o le Susulu sautualasi.

 

O Ia o le Atua!

Le Atua e, lo’u Atua! O i matou o tamaiti o loo faasusuina i le suāsusu o le poto faapaiaina mai le fatafata o Lou alofa ma o loo taofia i totonu o Lou Malo a’o ia i tausaga mu’amu’a. Matou te faatoga atu i Lau Afio i le ao ma le po ma faapea atu: Le Alii e! Faia ia mausali o matou laasaga i totonu o Lau Faatuatuaga, puipui malu i matou i totonu o le olo o Lau puipuiga, faafaileleina i matou mai Lou la’oai faalelagi, ina ia mafai ai ona avea i matou ma faailoga o le taitaiga faapaiaina ma lamepa susulu o le amio sa’o ma fesoasoani mai iai matou ona o le mana o agelu o Lou malo, o Lau lava Afio le Alii o mamalu ma le malualii!

E moni, o Lau Afio o le Foa’i, le Mutimutialofa, o le Agaalofa.

 

Tatalo mo e ua Maliliu

(O le tatalo mo e Maliliu e faaaogaina mo tagata Bahá‘i ua sili atu i le sefululima tausaga lo latou matutua. “Ona pau lava lea o le tatalo Bahá‘i o le mafutaga e taulotoina i se faapotopotoga, ma e taulotoina lea e se tagata talitonu i se to’atasi a’o tutula’i uma i latou o auai. E le afaina pea le faasaga i Qiblih a’o faia lenei tatalo”)

Ua faatamalaina mai e ‘Abdu’l—Bahá e faapea o tamaiti, o loo i lalo lea o le paolo o le puipuiga a le Atua; ma talu ai latou te lei faia ni agasala, ma e lei faaele’eleaina foi i uiga le mama o le natura o lenei lalolagi, ua avea i latou ma ogatotonu o le Faifaaaliga a le Foaialofa, ma o lea faapea ona liliu atu i o latou luga Fofoga o le Mutimutialofa.

Lo’u Atua e, O Lau auauna lenei, ma o le atalii o Lau auauna. O le sa talitonu atu i Lau Afio ma Au faailoga, ma taula’i atu ona fofoga i Lau Afio, vavaeeseina mai mea uma vagana Lau Afio. E moni o Lau Afio o le agalelei ma e faaalia pea lava Lou agalelei.

O Lau Afio o le faamagalo o agasala ma Le e natia sese, e pei ona faailoa mai i le lagi o Lau faamanuiaga ma le vasa o Lou agalelei. Talia mai o ia i Lou malo o le agalelei silisili lea sa faaalia mai ao le’i faia faavae o le lagi ma le lalolagi. E leai se isi Atua vagana Lau Afio, o le Faamagalo e Faavavau, o le Agalelei Silisili.

*Tau faaono lea o le “Alláh’u’Abahá” ona ta’u lea faasefuluiva laina taitasi ia o le a tusia atu i lalo:

E moni tatou te tapua’i uma i le Atua.

E moni tatou te ifo uma i le Atua.

E moni tatou te faatoina mo le Atua.

E moni tatou te vivii uma atu i le Atua.

E moni tatou te tuuina atu le faafetai i le Atua.

E moni tatou te faapalepale uma lava i le Atua.

(A faapea o se tama’ita’i le ua maliu, ona faapea lea: “O Lau auauna fafine lenei ma o le Afafine o Lau auauna fafaine, etc. . .”)

 

Fai atu: Le Atua e lo’u Atua! Sa tuuina mai e Oe i o’u lima se meaalofa mai ia te Oe, ma o lenei la ua toe valaauina atu nei e Lau Afio ia te Oe e tusa ma le faamalieina lelei o Lou Finagalo. E le tatau ia te a’u, aua o a’u na o se auauna fafine a Lau Afio, ona faapea atu po o lenei mea ea ua mo a’u ae o afea foi e oo mai ai, aua e ao lava ona viia Lau Afio i Au galuega uma, ma usiusita’i i Lau poloaiga. Lo’u Alii e, ua tuuina atu nei faamoemoega a Lau auauna fafine i Lou alofa tunoa ma le foaialofa. Foa’i mai ina ia maua e ia le mea o le a avatua ai o ia ia latalata atu ia te Oe, ma o le a aoga ia te ia i lalolagi uma a Lau afio. O Oe o le Faamagalo, le Foaialofa Uma. E leai lava se tasi Atua na o Oe, o le Faitofiga, o le Vavau o Aso.

 

Ia ia te Oe pea le viiga le Alii e, lo’u Atua! Ia le faalumaina o ia lenei sa faaeaina e Lau Afio ona o le mana o Lou mamalu faavavau, ma ia le aveesea mamao mai ia te Oe le tagata na faia e Lau Afio ina ia ulufale atu i le tapeneko o Lou faavavau. Lo’u Atua e, pe tuliesea ea e Lau Afio o ia na faamalumaluina e Oe i Lou Malualii, ma pe liliu ese mai ea Lau Afio ia te ia sa avea ai Oe ma sulufaiga o lo’u Manaoga e, pe toe faalumaina ea e Lau Afio le tagata sa faaeaina e Oe, po o le faagaloina o ia sa lagaina e Lau Afio ina ia manatuaina Oe?

Ia vivii ma saga viia pea Oe! O Oe lava lea sa mai le vavau o fai ma Tupu o le foafoaga atoa ma lona Faagaoioiga Sili, ma o le a tumau pea e faavavau Oe o le Alii o mea uma na faia ma o lo latou Faitofiga. Lo’u Atua e, ia vi’ia Lau Afio! Afai e taofia Lou alofa mutimutivale i Au auauna, o ai la o le a alofa Mutimutivale ia te i latou; afai foi o le a le finagalo Lau Afio e fesoasoani i Ou tagata peleina, o ai la e mafai ona fesoasoani atu ia te i latou?

Ia viia ma saga viia pea Oe! O loo faapaleina Oe i Lau lava upu moni, e moni o Lau Afio o loo matou tapuai uma atu i ai; ma o loo faalia Oe i Lau faamasinogatonu, ma e moni lava o Lau Afio e pele i Lou alofa tunoa. E leai se tasi Atua i’ina na o Oe, o le Fesoasoani Puapuaga, o le Puna o le ola.

 

O Ia o le Atua, e Silisiliese o Ia, o le Alii o le alofa agalelei ma le foaialofa!

Ia ia te Oe pea le viiga, o Oe lava o lo’u Atua, o le Alii o le Malosi uma lava. Ou te molimau i Lou malosi ma Lou matautia, o Lou mamalu ma Lou alofa agalelei, o Lou alofa tunoa ma LOu man, le Tafatasi o Lou soifua ma le aufaatasi o Lou Uiga, o Lou Paia ma le maualuga e silisili a’e i luga o le lalolagi o le ola ma mea uma lava o i ai.

Lo’u Atua e, ua silafia e Lau Afio lo’u vavaeese mai mea uma vagana Oe, o pipi’i mau atu ia te Oe ma liliu atu i le vasa o Lau foaialofa, i le lagi o Lou finagalo lelei ma le Fetuao o Lou alofa tunoa.

Le Ali’i e! Ou te molimau atu na tuuina atu e Lau Afio i Lau auauna Lou Sui, ma o le Agaga lena na tuuina atu ai le ola i le lalolagi e Lau Afio.

Ou te aioi atu ia te Oe i le susulu o le Li’o o Lau Fa’aaliga, ina ia taliaina i le alofa mai ia te ia le mea sa mafai ona ia faia i Ou aso. Foai mai ina ia mafai ai ona faaofuina o ia i le mamalu o Lou finagalo lelei ma faapaleina ai o ia i Lau taliaina.

Lo’u Alii e! O a’u lava ia te a’u ma mea uma na faia o loo molimau atu i Lou malosi ma ou te tatalo atu ia te Oe ina ia le liliu ese mai Lau Afio lenei tagata ua alu a’e ia te Oe i Lou afio’aga faalelagi, o Lou Parataiso sili ma Ou afio’aga o le latalata mai. O Oe lava o le Ali’i o tagata uma lava!

Lo’u Atua e, foai mai ina ia mafai e Lau auauna ona

nonofo faatasi ma Ou tagata filifilia, Ou tagata paia ma Au Savali i nofoaga faalelagi, e le mafai ona tusia e se peni po o le tatalaina e le laulaufaiva.

Lo’u Ali’i e, ua faataalise atu nei lenei tagata mativa i le Malo o Lou tamaoaiga, o le tagata ese ua alu atu i lona aiga i totonu o Lou lotoa, o le tagata galala tele i le vaitafe faalelagi o Lau foaialofa. Le Ali’i e, ia le aveesea o ia mai lona vaega o le taumafataga o Lou alofa tunoa, atoa ma le foai mai Lau foaialofa. E moni, o Oe o le Malosiuma, o le Alofa Tunoa, o le Foaialofa Uma!

Lo’u Atua e, ua toe foi atu nei Lou Sui ia te Oe. Ua tuuina atu ai lava i Lou alofa tunoa ma Lau foaifua o loo tapasa ai Ou malo i le lagi ma le lalolagi, ina ia foai mai i le alofa i Lau tagata malo fou lenei Au meaalofa ma Lau faaoloaga, atoa ma fua o le laau o Lou alofa tunoa, e leai se i si Atua na o Oe, o le Alofa tunoa, o le Foaifua Silisili, o le Mutimutialofa, o le Foai, o le Faamagalo, o le Taua, o le Silafia Uma.

Lo’u Ali’i e, ou te molimau atu, na faatonuina e Lau Afio i tagata ia faaaloalo i o latou uso a malo, ma o ia lenei ua alu a’e i Lau Afio ua oo lelei atu ia te Oe ma taunuu atu i Lou Faatasi mai. Ia faia ia te ia e tusa ma Lou alofa tunoa ma le foaialofa! Ona o Lou mamalu, ua ou iloa ai ma le mautinoa o le a le taofia e Lau Afio Oe lava mai le mea na faatonuina e Oe i Au auauna, po o le aveseesea foi e Lau Afio lenei tagata o loo pipii atu i le manoa o Lau foaialofa ma ua alu a’e i le Punaaso o Lou tamaoaiga.

E leai lava se isi Atua na o Oe, o le Tasi, o le Tafatasi, o le Mamana, o le Silafaga Ati, o le Foaialofa.

 

Lo’u Atua e! O Oe le faamagalo agasala, o le Puna o Meaalofa, o le Faamafanafana i Puapuaga!

E moni, ou te ole atu i Lau Afio ina ia faamagaloina agasala a le ua tuua nei ofu faaletino ae alu a’e i le lalolagi faaleagaga.

Lo’u Alii e! faamamaina i latou mai solitulafono, faamaise i o latou faanoanoaga, ma ia liliuina lo latou pouliuli i le mala- malama. Faia i latou ina ia ulufale atu i le faatoaga o le olioli, faamamaina i latou i le vai mama siliisli, ma ia foai’ina ia te i latou ina ia latou vaai i Ou pupula i luga o le mauga silisili ese.

 

Tausamiga o le Sefuluiva Aso

Le Atua e, ave’eseina mea uma e mafua ai maseiga, a ia saunia mo i matou mea uma lava e tupu ai le aufa’atasi male fegalegalea’i. Le Atua e, puaina i ō matou luga manogi Fa’alelagi ma ia liua lenei fa’atasiga i se fa’atasiga Fa’alelagi. Foa’i mai mo i matou manuia uma ma taumafa. Laulauina mo i matou Taumafa o le Alofa. Foa’i mo i matou Taumafa o le Poto. Foa’i maia mo i matou Taumafa o le Malamalama Faalelagi.

 

Teugatupe

O Uo uma a le Atua....e ao ona foa’i i le mea e mafai, tusa lava pe faatauvaa, aua e le faapologaina e le Atua le foa’i e tusa ma le mea e te mafaia. O nei foa’i e ao ona faia e nu’u uma na tagata talitonu uma.

Uo e, a le Atua,ia e iloa o nei foa’i uma e te faia, o le a faamanuia sautualasi atu e le Atua i le faaleleia o lau faato’aga, lau pisinisi, lau galuega i ni meaalofa sili. O ai e sau ma se mea lelei e tasi, e maua e ia faasefulu lona taui. E leai se taumatega o faamanuiaga a le Alii o le Ola mo i latou e foa’i atu lo latou tamāo’āiga i Lona ala.

Le Atua e, lo’u Atua! Faapupulaina mata o i latou o e alolofa moni i Lau Afio ma lagolagoina i latou e ‘au agelu o le manumalo mautinoa. Faasagatonuina o latou vae i Lou ala sa’o, ma tatalaina mo i latou mai Lou manuia mai anamua Au faamanuiaga, aua ua latou foa’ina mo Lau galuega mea sa e foa’i ia te’i latou, ina ia puipuia ai Lau Faatuatuaga, ma tuuina lo latou talitonuga i le manatuaina o Oe, ma tuuina atu o latou agaga ona o le alolofa ia te Oe, ma ua taofia mea ua latou maua ona o le faapelepelega o Lou Matagofie, ma le sailiga o Lou Finagalo malie.

Lo’u Alii e, ia tele pea so latou manuia, ia nonofo i to’agamau, ma se taui mautinoa. E moni, o Lau Afio o le Lagolago, o le Fesoasoani, o le Alofa, o le Agalelei, o le Foa’i e le aunoa.

 

Tofotofoga ma Faigata

Fai atu: O puapuaga o se tafailagi le a i La’u Faaaliga. O loo susulu i ona luga le fetu ao o le alofa tunoa, o loo faasusuluina ifo ai se malamalama e le mafai e ao o mafaufauga sese po o fuafuaga le aoga a tagata tetee ona punitia.

Ia e mulimuli atu i tulaga aao o lou Alii, ma manatuaina ana auauna e pei ona la manatuaina oe, ia le mafai ona taofia e le pisapisao o tagata faatamala po o le pelu a le fili. Faasasala mamao atu sausau manogi o lou Ali’i, ma ia le faatuai i sina taimi itiiti lava i le auauna atu i Lana Fuataiga. Ua lata mai le aso o le a folafolaina ai le manumalo o lou Alii, le Faamagalo Faavavau, le Foaialofa Silisili.

 

Uiga Faaleagaga

Lo’u Alii e, faia Lou matagofie ma a’u meaai, ma Lou faatasi mai ma o’u vai inu, ma Lou finaglao malie ma o’u faamoemoega, ma le vivii ia te Oe ma a’u gaoioiga, ma le manatua o Oe ma a’u ‘aumea, ma le mana o Lou mamalu ma o’u fesoasoani , ma Lou afio’aga ma o’u aiga, ma lo’u nofoaga ma afio’aga ua faapaiaina mai tapulaa ua faaeeina atu i luga o i latou ua tapunia e se puao mai Lau Afio.

E moni o Oe le Malosiuma, o le Mamalu Uma, o le Mamana Silisili.

 

Lo’u Atua e, o a’u ua na o se fatu faatauvaa lava sa luluina e Lau Afio i le eleele o Lou alofa, ma sa faia ai ina ia totogo a’e e le a’ao o Lau foa’ialofa. O le mea lea, o loo ole atu lenei fatu i lona tagata i totonu lava i vai o Lou alofa mutimutivale ma vaipuna ola o Lou alofa tunoa. Auina mai i ona luga mai le lagi o Lou alofa agalelei le mea o le a mafai ai e ia ona fuga a’e i lalo ifo o Lou paolo atoa foi ma totonu o tua’oi o Lou lotoa. O Oe lava o lea faasususuina i vai, loto o i latou uma ua iloa Oe mai Lou vaitafe tele ma le vaipuna o Au vai ola. Ia viia le Atua, le Alii o lalolagi uma.

 

Le Atua e! Faafouina ma faaolioliina lo’u agaga faamamaina lo’u loto. Faapupulaina o’u malosi. Ou te tuuina atu nei a’u mataupu uma i Lou aao. O Oe o lo’u Ta’ita’i ma lo’u Malu. O le a ou le toe faanoanoa ma faavavau; o le a avea a’u ma tagata fiafia ma le olioli. Le Atua e! O le a ou le toe soona losilosi, po o le tu’uina atu foi o a’u ina ia faavaivaia e faalavelave. O le a ou le nofo i luga o mea faaletonu o le olaga.

Le Atua e! E sili atu Oe ona uo mai ia te a’u na i lo a’u lava ia te a’u. Le Alii e , ou te faatoina atoatoa atu nei a’u lava mo Oe.

 

Lo’u Alii e! Lo’u Alii e! O le lamepa lenei na tutuina e le afi o Lou alofa, ma mumu ai i se sasao o loo ola i le laau o Lou alofa mutimutivale. Lo’u Alii e, faateleina lona mumu, vevela ma le sasao, i le afi sa tutuina i le Sinai o Lau Faifa’aaliga. E moni, o Lau Afio o le Faamautuga, le Fesoasoani, le Mamana, le Agalelei o le Alofa.

 

O Ia o le Mamalu Uma

Lo’u Ali’i e, o lo’u Tupu, o lo’u Ta’ita’i, ma lo’u Ali’i Sili! Ou te valaau atu i Lau Afio i lo’u laulaufaiva, lo’u loto, ma lo’u agaga, e faapea: Faaofuina lenei auauna a Lau Afio i le ‘ofu talaloa o Lau tausiga, o le ‘ofu o Lau fesoasoani lē motusia, ma le talitā o Lau Puipuiga. Fesoasoani ia te ia i le tautauina o Lau Afio ma faaneeneeina Ou uiga faapa’iaina i luma o Ou tagata, ma faamatalaina lona laulaufaiva e tautau ai Lou mamalu ma viiga i faapotopotoga uma e faia e faamanatu ai Lau aufaatasiga ma le faapa’iaina. O Lau Afio i le mea moni, o le Malosiuma, o le Mamana Silisili, o le Mamalu Uma, o le Puna o le Ola.

 

La’u Pele faavavau e ma La’u Uō mamae! O le a ea le umi o le a tumau ai pea lo’u lē feiloa’i atu i Lau Afio, ma lo’u mafatia i tigā o le taumamao mai ia te Oe? Ta’ita’iina a’u i apitaga o Lou Malo faalelagi, ma i le va’ai atu i Lou Malo faalelagi, auina mai mo a’u se vaaiga o Lou alofa agalelei.

O Lau Afio o le Alii Malosi Uma! Faitauina faatasi a’u ma tagata o Lou Malo. O lenei lalolagi lē tumau o lo’u nofoaga lea; foa’i mai so’u nofoaga i le Malo o le Lēvaaia. I lenei nofoaga faalelalolagi ua ou aumau ai, aumai mo a’u le pupula o Lou malamalama mamalu. Ou te aumau i lenei lalolagi o le pefu, faia a’u ma tagatānuu o Lou Malo i le Lagi, ina ia mafai ai ona tuu atu lo’u ola i Lou ala ma ou oo atu ai i le faanaunautaiga o lo’u loto, faapaleina lo’u ulu i le palealii o faamanuiaga faaleagaga ma ou alagaina atu ai le valaau manumalo “O Oe o le Atua Mamalu, o le Mamalu Silisili!”

 

Vaeluaga o le Po

Tagata saili e,o le Upumoni,afai o lou mana’o ia faapupulaina e le Atua ou mata,e ao ona e augani i le Atua,tatalo ma mafuta ia te Ia i le vaeluaga o le po i lou faapea atu:

Le Alii e, ua liliu atu o’u mata i lou malo o le tafatasi ma ua faatofuina a’u i le vasa o Lou agalelei. Le Alii e, faapupulaina la’u vaaiga e Lou malamalama i lenei po pogisa ma faafiafiaina a’u e le uaina o lou alofa i lenei taimi ‘ofo’ofogia. Le Alii e faia a’u ia ou lagona Lau valaau, ma tatalaina mo la’u va’aiga faitoto’a o Lou lagi, ina ia ou iloa atu ai le pupula o Lou mamalu ma tosina atu ai i Lou matagofie.

E moni, O Lau Afio o le Foai, o le Alofa, o le Agalelei, o le Faamagalo.

 

Vavae’esea

Lo’u Atua e, faapologaina a’u ia avatua faalatalata ia te Oe, ma ia nofo mau ai i totonu o lotoa o Lou maota, aua o le taumamao ma Oe ua latalata mai ai le faaumatia o a’u. Faia ia ou malolo i lalo ifo o le paolo o apaau o Lou alofa tunoa, ona o le mamao o lo’u vavaeesea mai ia te Oe, ua liu suavai ai lo’u loto i totonu ia te a’u. Avatu ia sili ona ou latalata atu i le vaitafe o le olataga lava lea, ona ua mu lo’u agaga i le galala i lana sailiga le gata mai ia te Oe. Lo’u Atua e, o a’u õi o loo folafolaina atu ai le oona o lo’u mafatia, ma o o’u loimata maligi o loo ta’u atu ai lo’u alofa ia te Oe.

Ou te ole atu ia te Oe, ia viiga o loo viia ai Lau Afio e Oe lava, ma faaneetaga o loo faaneeneeina ai Oe e Lou lava Uiga, ina ia foai mai ia faanumeraina faatasi i matou ma i latou ua taliaina Oe ma iloa Lou mamalu i Ou aso. Lo’u Atua e, fesoasoani mai ia te i matou e feinu mai tamatamailima o le alofa mutimutivale i vai ola o Lou alofa agalelei, ina ia matou matua faagaloina ai meauma vagana Oe, ma mafuta tumau ai pea ma Lau Afio. E matautia Oe e faia ai le mea ua finagalo i ai Lau Afio. E leai se tasi Atua iina na o Oe, o le Malosi, le Fesoasoani i Puapuaga, o le Puna o le Ola.

Ia i Lou suafa le faaneetaga, o Lau Afio lava o le Tupu o Tupu uma!

 

Lo’u Atua e, e tele ni loto maalilili ua faamumuina i le afi o Lau Fuataiga, ma e toatele tagata moegagase ua fafaguina e le leomalie o Lou Siufofoga. E fia tagata ese ua saili lafitaga atu i lalo o le paolo o le la’au o Lou tafatasi, ma e matua manomano tagata galala sa faananau atu i le puna o Au Vai Ola i Ou aso!

Amuia le tagata ua faamautuina o ia ia te Oe, ma faataalise atu ia taunuu i le Puna Aso o pupula o Ou fofoga. Amuia le tagata ua liliu atu ma lona alofa atoatoa i le Nofoaga o le Tafaoata o Lau Fa’aaliga ma le Aovaipuna o Lau faaoloaga Faaleagaga. Amuia le tagata ua na faamaumauina i Lou ala le mea na foaiina atu e Lau Afio ia te ia ona o Lau foaialofa ma le finagalo lelei. Amuia le tagata ua ia lafoa’ia mea uma lava vagana Oe ona o lona faanaunau i Lau Afio. Amuia le tagata ua faafiafiaina ona o le mafutaga faauo ma Oe, ma faatoina ai o ia mai mea uma vagana Lau Afio.

Lo’u Alii e, oute ole atu ia te Oe ona o Ia lea o Lou Suafa, o Le na siitia a’e i luga o le tafailagi o Lona falepuipui e le mana o Lou mamalu ma le malosi, ina ia foaiina atu mo so o se tasi le mea e tatau ma Oe ma talafeagai ma Lou lava silisili.

E moni, o lou malosi e tutusa ma le tuufaatasiga o mea uma lava.

 

Lo’u Atua e, lo’u Alii ma lo’u Matai! Ua ou vavae’esea nei a’u lava mai i o’u ituaiga, ae saili atu i Lau Afio i le fia avea ma tagata faalagolagoina mai ia te i latou uma o e lo’o mau i luga o le foagaeleele ma ua sauniuni e taliaina soo se mea lava e tau i viiga aoga i Lau Silafaga. Faatotogo ifo i o’u luga se lelei faapea e mafai ai ona ou faalagolago atu tau lava o Lau Afio, ma aumaia ia te a’u se vaega tele mai i Au faamanuiaga le faatua’oia. E moni o Lau Afio lava o le Alii o le alofa tunoa faamaligiina mai o faamanuiaga.

 

Le Alii e! o Lau Afio ou te saili atu i ai mo se lafitaga ma o Au faailoga uma, ua faamautuina ai lo’u loto.

Le Alii e! Po’o le alu malaga po’o le aiga i a’u matafaioi po’o totonu fo’i o la’u galuega, ou te matua tuuina atu lo’u nei talitonuga atoatoa i Lau Afio.

Foa’i mai ia te a’u Lau fesoasoani atoatoa ina ia mafai ai ona avea o a’u ma tagata faamoemoeina i mea uma lava, O Lau Afio o le mutimutialofa e le siligia.

Faamaligi mai i o’u luga lou vaega, Le Alii e, pe afai e finagalo malie i ai Lau Afio, ma ia faamalieina ai a’u i soo se mea lava ua faatuatuaina e Lau Afio mo a’u.

O Lau Afioga o le pule aoao e faatonu ai.

 

Lo’u Atua e! Lo’u Atua e! O oe o lo’u Faamoemoega ma la’u Pele, o lo’u Sini faatatauina ma le Manaoga! I le faamaualalo tele ma le tapuaiga atoatoa ou te tatalo atu ai ia te Oe ina ia faia a’u ma olo o Lou alofa i Lou malo, le lamepa o le malamalama i Ou tagata, ma le tagavai o Lau meaalofa i Lou Malo.

Faia ia avea a’u o se tasi o Ou tagata tapuai ua vavaeesea mai mea uma vagana Oe, o e ua faapaiaina i latou lava mai mea e faasino i lalolagi, ma o e ua liliu ese mai i latou mai tuinanau o le masalosalo.

Ia faatumuina lo’u loto i le olioli mai le agaga o le faamanuiaga mai Lou Malo, ma ia faapupulaina la’u va’ai i le va’ai atu i ‘au o le manuia o loo faasolosolo mai ma faaifoifo mai i o’u luga mai Lou Malosi uma lava.

O Oe o le Malosiuma, o le Lefaato’ilaloina, o le Mamana.

 

O Lau Afio o le Alii Lēfaatusalia ma le alofa! E ui lava ina utiuti le ta’uaogāina ma agavaa, ma ua lē mafaitaulia le faigatā tele ona tete’e atu i puapuaga, ae peita’i o agava’a ma le ta’uaogāina o meaālofa ia e mai i Lau Afio. Le Alii e! Fa’aagavaaina i matou ma avea i matou o ni tagata ta’uaogāina, ina ia mafai ona matou fa’aali atu le tutumau aupito i silisili, ma vavae’ese mai lenei lalolagi ma ona tagata uma, tutuina le afi o Lou alofa, ma ia faapei o ni moliga’o, ia susulu pupula i se afi mumu saesae ma faasusulu atu i fafo lo matou malamalama.

Le Alii e o le Malo! Lavea’i mai i matou mai lenei lalolagi o mafaufauga faivavale e leai se aogā, ma ta’ita’iina i matou i le malo e leai sona i’uga. Avatu i matou ina ia faasaolotoina atoa mai i lenei olaga maualalo, ma faia i matou ina ia faamanuiaina i meaalofa lē fuatia o le Malo. Faasaolotoina i matou mai i lenei lalolagi o meanoa e foliga mai o se mea moni, ma faae’e mai i ō matou luga le ola e faavavau. Foa’i mai i ‘ai matou le olioli ma le fiafia, ma faamanuiaina i matou i le olioli ma le lotomalie. Faamafanafana i ō matou loto, ma auina mai le filemu ma le to’afimālie i o matou agaga, ina ia matou o a’e ai i Lou Malo ma auai i Lou faatasi mai, ma faafiafiaina i nofoaga faapaiaina o lo’o i lugā. O Lau Afio o le Foa’i o le Faaeaina, o le Malosiuma

 

O Lau Afio o le Atua Alofa Mutimutivale! O Lau Afio o le Malosi uma lava! O a’u ua na o se auauna vaivai, augavale ma e leai se faamoemoe, ae sa faafaileleina a’u i le faapaologa o Lou alofa tunoa ma le foa’ialofa, fafagaina mai i le susu o Lou alofa tunoa, ma tausia a’u i le fatafata o Lou alofa agalelei. Le Ali’i e! E ui i lo’u mativa ma lo’u mana’ona’o, a o mana’oga o tagata uma ua faa tamāo’āigaina ona o Lau foa’ialofa, ae o soo se tagata mauoa lava, pe afai e aunoa ma Lou agaalofa, e matuā mativa lava ma matelaina.

Le Taitaiga e Faaleatua! Foa’i mai ia te a’u le malosi e tau’aveina ai lenei avega mamafa, ma fesoasoani mai ia te a’u e puipuia lenei faaeaga silisili, ona o le tetele o malosi’aga o tofotofoga ma le matuiā o osofa’iga ma faaosoosoga, ua soloia ai mauga ta’itasi ma avea ma lefulefu, ma o tumutumu aupito i maualuluga ua goto ifo ma avea o se meanoa. Ua silafia lelei e Lau Afio le mea o lo’o i totonu o lo’u loto, ou te lē mana’o lava i se isi mea se’i vagana le manatuaina o Lau Afio, ma o lo’u agaga atoa ou te lē naunau i se isi mea vaganā Lou alofa. Faatula’i a’e a’u i luga e auauna atu i Au pele, ma ia ‘ou auauna i Lou Nofoalii se’ia oo i le faavavau. O Lau

Afio o le Alofa, O Lau Afio o le Ali’i o faamanuiaga e tele.

 

O Lau Afio o le Alii Agalelei! Ia faapa’iaina lo’u agaga mai i pi’itaga uma, ma faafiafiaina lo’u loto i le talalelei o le olioli. Faasa’oloto a’u mai le pipi’i atu i uō po’o tagata ese, ma opoina atu a’u e Lou alofa, ina ia ou auauna atu ai ma le atoatoa i Lau Afio, ma faatumulia a’u i le olioli lēfaatusalia; ina ia ou lē faanaunau i se tasi ‘ae na o Lau Afio, lē sailia i se tasi tau lava o Lau Afio, ma ia lē uia se isi lava ala vaganā Lou ala, ma mafuta atu tau lava o Lau Afio; ina ia avea ai a’u e faapei o se naitinikale ua faagae’etia i Lou alofa, ma i le ao ma le po, ou te tagi auē ma loimata o le tigā ma ou alaga atu, “Yá Bahá’u’l-Abhá!”

 

Viiga ma le Faafetai

Le Ali’i e, lo’u Atua e, ia fa’anene’eina pea Lou Suafa! O Lau Afio o Ia lea e tapua’i i ai mea uma a o Le e le tapua’i i se tasi, o Le o le Alii o mea uma ae le o se auauna a se tasi, o Le silafia mea uma ae e le iloa lava e se tasi. Sa finagalo Lau Afio ina ia iloa Oe lava e tagata; o le mea lea, na faaolaina ai e Lau Afio i le tuleiga a Lou lava fofoga le lalolagi ma faatinoina ai le atulaulau. E leai se tasi Atua na o Lau Afio, o le Mataisau, o le Tufuga, o le Malosiuma, o le Mamana Silisili.

Ou te ole atu i Lau Afio, i le upu lava lenei na faaalia mai i luga o le tafailagi o Lou finagalo, ina ia faamalosia a’u e inu malosi ia vai ola na avatua ai e Lau Afio le ola i loto o Ou tagata filifilia ma fanaufouina ai agaga o i latou e alolofa ia te Oe, ina ia ou mafai ai i taimi uma i lalo o so o se tulaga, ona liliu atu atoatoa o’u mata ia te Oe.

O Lau afio o le Atua, o le Mana, o le Mamalu ma le Foaialofa. E leai se tasi Atua iina na o Oe, o le Tupu Silisili, le Mamalu Uma, o le Silafaga Ati.

 

Le Alii e, lo’u Atua e, ia faaneneeina Lau Afio! Ou te tuuina atu le faafetai i Lau Afio ona o le faamalosia o a’u ina ia ou iloa le Faifaaaliga o Lau lava Afio, ae maise le vavaeesea o a’u mai Ou fili, ma ua matua faaaliatino mai ai i luma o o’u mata a latou amiosese ma galuega leaga i Ou aso, atoa foi ma le avaeesea o a’u mai sootaga uma ma i latou, ma lagaina ai a’u ia ou liliu atu atoatoa i Lou alofa tunoa ma Lau foaialofa lelei. Ou te tuuina atu fo’i le faafetai i Lau Afio, ona o le auina mai i o’u luga mai ao o Lou finagalo le mea ua matua faapaiaina ai a’u mai faufauga a tagata faapaupau, ma fuafuaga a tagata talitonu, ua matua faatumauina ai lo’u loto ia te Oe, ma sola ese mai ai i tagata latou te teena le malamalama o Ou Fofofga. Ou te toe faafetai atu fo’i ia te Oe ona o le faalaeiauina o a’u ina ia lotomau i Lou alofa, atoa ma le tautala atu i Lou viiga ma le faasilsiliina o Ou Uiga, atoa ma le tuuina mai ia te a’u ou te inu i le ipu o Lou alofa mutimutivale o loo si’omia ai mea uma e vaaia ma le le vaaia.

O Lau Afio o le Malosiuma, o le Silisili Ese, o le Faaneetaga Uma, o le Alofa Uma.

 

Fai atu: Lo’u Alii e, la’u Pele Sili, le Faagaoioiga o a’u gaoioiga, le Fetu Ta’iala o lo’u agaga, le Si’ufofoga o loo alaga mai i lo’u tagata moni i totonu, le Sini o tapua’iga a lo’u loto. Ia ia te Oe le viiga ona ua faamalosia a’u e liliu atu o’u mata aga’i ia te Oe, ona ua faamuina lo’u agaga ona o le manatuaina o Oe, ona o le lagolagoina o A’u e folafolaina atu Lou Suafa ma vivii i Ou viiga.

Lo’u Atua e, lo’u Atua e! Afai o le a leai se tasi e maua ua sese ese mai Lou ala, e faapefea la ona mafai ona faatuina le tagavai o Lou alofa mutimutivale, po o le sisiina foi o le fu’a o Lau foa’ialofa malie? Ma afai e le faia le amioleaga, o le a la se mea e mafai ona folafolaina atu Oe o le Faalafita’iina o agasala a tagata, le Faamagalo Faavavau, le Silafaga ati, le Poto Uma? Ia avea lo’u agaga ma taulaga i solitulafono a i latou ua agasala atu ia te Oe, aua o luga o na solitulafono o loo faapulouina e manogi lelei o le alofa agamalu o Lou Suafa, le Manava’alofa, le Alofa Mutimutivale Uma. Ia mafai ona ofoina atu lo’u ola mo solitulafono a i latou ua agasala atu i Lau Afio, ona o i latou ua mafai ai ona faaalia ma faasasalaina atu le manavaga a Lou alofa tunoa ma le sasala o Lou alofa agalelei i tagata. Ia mafai ona ofoina atu lo’u tagata moni lava i totonu mo agasala a i latou ua agasala atu ai ia te Oe, ona o le fua o nei agasala ua mafai ai ona faaalia e le Fetu Ao o le atulasi o Lou finagalo malie o ia i luga o le tafatafa’ilagi o Lau foa’ialofa, ma ao o Lau pule e le mafai lava ona pa’uina ia faataotoina ifo a latou mea’alofa i luga o uiga moni o mea uma lava na faia.

 

Le Alii e, lo’u Atua, faatumauina Au faamanuiaga ia te i latou ua feinu i le uaina o Lou alofa i luma o mata o tagata, ma e ui lava i Ou fili, ae sa latou iloaina lava Lau aufaatasiga, molimau atu i Lou tafatasi, ma tautino atu lo latou talitonu i le mea na faagateteina ai itutino o tagata fouvale o i totonu o Ou tagata, ma faagaluluina ai aano o tagata mitamita vale o le lalolagi. Ou te molimau atu o Lou Mamalu e le mafai ona faaumatia, po o le toe fesuia’ia foi Lou Finagalo. Foa’i atu mo i latou o faasaga atu mata ia te Oe, ma Au auauna fafine o loo pipii mau atu i Lau Manoa, ina ia fetui lelei ai ma le Vasa o Lau foaialofa ma le lagi o Lou alofa tunoa.

Le Atua e, o Lau Afio lava o Ia o Le sa folafolaina mai o Ia lava le Alii o le Tamaoaiga, ma faatulagaina ai tagata uma o tagata matitiva ma le le tagolima. Sa oo lava ina tusia e Oe: “Outou e tagata talitonu; o outou o tagata le tagolima o lo o manana’o i le Atua; ae o le Atua o le Puleaoao Uma, le Viia Uma.” Ina ua ou iloa lo’u mativa, ma malamalama i Lou tamaoaiga, ‘aua le faapologaina a’u i le vavae’esea mai le mamalu o Lou tamaoaiga. E moni, o Oe o le Malu Silisili, le Silafia Uma, le Poto Uma.

 

O Ia o le Atua

Oe na o loo faataamilo ma le faanaunau i le Nofoaga tonu o loo si’oina faataamilo e le Aupaia i luga! Sisii a’e ou lima ma le loto faafetai i luma o le Faitoto’a Paia o le Atua moni e to’atasi, ma faapea atu: O Lau Afio o le faatumutumuga o faamoemoega o tagata uma e alolofa moni ia te Oe! O Lau Afio o le Ta’iala o agaga fesesea’i uma! Ua filifilia e Lau Afio lenei auauna vaivai mo Au faamanuiaga lē mavae, ma ta’ita’iina lenei tagata lē- mautonu ma le faatauvaa i le Faitotoa Pa’ia o Lou tafatasi. Ua tuuina mai e Lau Afio i nei laugutu galala le vai ola o Lou alofa agalelei ma toe faaolaina lenei agaga vaivai ma le augavale i savili malu o le alofa mutimutivale faapaiaina. Ou te sii a’e le faafetai i Lau Afio mo faamanuiaga atoatoa ua e liligiina mai i Lou alofa tunoa silisili ma faaofuina a’u i le faaeaina e ulufale ai i Lou Faitotoa paia. Ou te ole atu mo se vaega o faamanuiaga e lē mavae o Lou Malo i luga. Auina mai Lau fesoasoani. Ma faaeeina mai Au faamanuiaga foaifua.

 

Occasional

Faaipoipoga

“O Faaipoipoga faa-Bahá’i o se tuufatasiga i le fiafia ma le alofa i le va o ni tagata se to’alua. E tatau ia i la’ua, ona faamasani atu i le tulaga silisili o le tausiga ma avea le masaniga vavalalata o le isi i le tasi i uiga ma amioga. O lenei noataga faavavau e tatau ona faia i le saogalemu lelei i luga o se feagaiga mausali ma tumau, atoa ma le mafaufau e tatau ona matua faamalosia ia maua le talafeagai tutusa lelei i soo se tulaga i amioga, uiga ma manatu, fefaauoa’i atoa ma le fegalegalea’i ma ia tausinio ia maua le ola e faavavau.” - Abdu’l—Bahá

O le tautinoga o le faaipoipo, o fuaiupu e tatau ona fofogaina taitoatasi mai e le tamaitai ma le alii faaipoipo i luma o le sili atu i molimau e to’alua ua uma ona taliaina e le Fono Faaleagaga o lo’o i ai, e pei ona tusia ma faamaumauina i totonu o le Tusi Tulafono—Kitab—i—Aqds (O le Tusi Sili Ona Paia):

“E moni o le a tatou faatasi i le Finagalo o le Atua.”

O Ia o le Agalelei, le Foaialofa Uma! Ia viia le Atua le Vavau, le Mafutaga Faavavu, le Leliliu, le Faavavau! O Ia lea na molimau i Lana lava Afio, e moni o Ia lava o le Tasi, le Toatasi, le Lenoanoatia, le Faaneetaga. Matou te molimau atu e moni e leai se tasi Atua na o Ia, i le iloa o Lona tafatasi, ma le tautino atu o Lona toatasi lava. Sa afio tumau o Ia i tumutumu e le saofia, i mea maualuluga o Lona Silisili Ese, e tapu mai le ta’uta’uina e se tasi vagana ai o Ia lava, e le mafai ona soona faamatalaina e soo se tasi na o Ia lava.

A ona ua finagalo o Ia e fa’aalia le alofa tunoa ma le agalelei i tagata, ma faatulagaina ia tonou le lalolagi; ona Ia faaalia lea o poloaiga ma faia tulafono; ma o nei tulafono na ia faaveina ai le tulafono o Faaipoipoga, faia ai e avea o se olo mo le ola lelei ma le faaolataga, ma faatonuina mai ai ia i tatou le mea sa auina mai i lalo nei mai le lagi o le faapaiaina i Lana Tusi Aupito Paia. Na fetalai mai o Ia, e silisili Lona vi’iga: “Ia faaipoipo outou tagata, ina ia maua mai ai ia te outou se tasi o le manatuaina a’u i totonu o A’u auauna; o le tasi lenei o A’u poloaiga ia te outou; ia usiusita’i i ai e avea ma fesoasoani ia te outou.”

 

Lo’u Atua e, ia ia te Oe le viiga! E moni, ua faatasia nei Lau auauna tama ma Lau auauna teine lenei i lalo o le ata o Lou alofa mutimutivale ma ua faatasia i laua ona o Lou finagalo malie ma le agalelei. Le Alii e, lagolagoina i la’ua i Lou lalolagi lenei ma Lou malo ma foai atu ia te i laua mea lelei uma ona o Lau Foaialofa ma le alofa tunoa. Le Alii e, faamauasaliina i la’ua i Lau poloaiga, a lagolagoina i la’ua i le auauna atu ia te Oe. Faia i laua ia avea ma faailoga o Lou Suafa i Lou lalolagi ma puipuia i laua i Lau faaoloaga e le mafai ona faaumatia i lenei lalolagi atali. Le Alii e, o loo o le atu i laua i le malo o Lou alofa mutimutivale ma aioi atu i le malo o Lou tafatasi. E moni, ua faaipoipoina i laua ona o le usita’i i Lau tulafono. Faia i laua ia avea ma faailoga o le felaofani ma le aufaatasiga seia oo i le iuga. E moni, o Oe le Malosi uma lava, o le Silafaga ati, o le Malosiuma.

 

O Ia o le Atua!

O le Alii e leai sona tusa! I Lou poto silisili na faatonuina ai e Oe le faaipoipoga i luga o tagata, ina ia mafai ona le motusia augatupulaga o tagata i lenei lalolagi mavae, ma ia mafai ai e faavavau i taimi uma e tumau ai lenei lalolagi ona latou faaaogaina pea lava pea i latou lava i le faitotoa o Lou tafatasi i le auauna atu ma le tapuaiga, le faamanu, ifoga ma le faanee- taga. “Ou te le i faia fua agaga ma tagata, ae ona ia latou tapuai mai ia te A’u”. O le mea lea, ia faaipoipoina e Oe i le Lagi o Lou alofa mutimutivale nei manulele e lua i le ofaga o Lou alofa, ma ia avea i laua ma ala o le faamaligiina mai o Lou alofa tunoa faavavau; e mafai ai i le faatasia o nei sami e lua o le alofa ona fati mai ai se galu o le agamalu, ma maua mai ai penina mama, ma uiga lelei i le talafatai o le olaga. “O Ia na faatagaina nei sami e lua ina ia mafai ona la feiloai: I lo la va o i ai le puipui e le mafai ona la sopoia. O le a la ni foaialofa a lo oulua Alii lua te faafitia? Aua e taitasi lava ma maua mai ai penina tetele ma penina iti”.

O Oe o le Alii alofa! Faia e Lau Afio lenei faaipoipoga ina ia fua mai ai penina ma maataua. E moni, o Oe o le Mamana Uma, o le Matautia Sili, o le Faamagalo Faavavau.

 

O le Aia-tatau a le Atua

(O le HUGUGULLAH o se tulafono lea ua sili lava; ma ua noatia tagata uma ina ia latou faia lenei foa’i, aua o le puna lea ole manuia, le faamaligi mai ma mea lelei uma lava. O se faamanuiaga lea o le a tumau i tagata ta’itasi uma i lalolagi uma o lalolagi a le Atua, Le E ona mea uma lava, Le alofa tunoa.)

Ia viia Lau Afio, O le Ali’i o le foafoaga atoa, O Le liliu atu iai mea uma lava. O lo’u laulaufaiva i fafo ma totonu ou te molimau atu ai ina ua fa’aalia ma faailoa e Lau Afio Oe lava, auina mai Au faailoga ma folafolaina Au molimau. Ou te molimau atu i le fau ma soloi o Lou tamaoaiga, ae le mai se isi a’o Lu lava Afio. Ma Lou fa’atōina mai mea uma fa’alelalolagi Ou te ole atu i Lau Afio ona ole silisiliese o le mamalu o Lau Fuata’iga male maoa’e o le malosi o Lau Afioga, ina ia avatu ia te ia o le ua mana’o e tuuina atu le mea na faatonuina e lau Afio i Lau Tusi ma maitauina ai le pua’ina atu o le manogi sasala o lou taliaina. E moni o Lau Afio o le Malosi Uma, o le Alofa Uma, o le Faamagalo Uma, o le Agalelei Uma.

 

Tatalo mo Aao o le Fuataiga

Malamalma ma le mamalu, faamanuiaga ma viiga ia faaeeina atu lea i Aao o Lana Fuata’iga, mai ia i latou o loo i ai le malosi’aga o le malamalama lea e faasusulu atu ai i luma ma faavaeina ai le amiotonu e pei o le pule e filifilia ai o loo i le Atua lea, o le Mamana uma Leuna’ia o le Malosi, o le Leuna’ia o i latou ia o loo fafati mai ai vasa o faamanuiaga atoa ma le manogi sasala o le finagalo o malie ma le mamalu o le Atua, le Ali’i o tagata ola, e pei ona faalauteleina. Matou te augani faatauanau i Lau Afio Faaneetaga ia te ia ina ia malutia i latou mai le mana o Lona taunuuga, ma puipuia i latou mai le mana malosi o Lana pule silisiliese ma fesoasoani ia i latou ia latou faamasani atu Lona malosi lea e malo ai i luga o mea uam lava sa faia. Silisiliese le Mamana o a le Atua ia, o le Faaola o lagi ma o le Alii o le Malo o Suafa.

 

Tatalo mo Aso Faaopoopo

O Aso Fa’aopo’opo, Fepuari 26 — Mati 1, e tatau ona saunia ai mo le Anapogi, aso o foai, alofa ma fai mea’alofa ai.

Lo’u Atua e, lo’u Afi ma lo’u Sulu! Ua amataina nei aso sa faaigoaina e Oe o Aso Faaopo’opo Ayyám—i—Há i totonu o Lau Tusi, o Oe o Le o le Tupu o suafa, ma o le anapogi na faatonuina mai i Lau Peni aupito silisili ia i latou uma o i le malo o Lau foafoaga ia ana’ana i ai, ua latalata mai nei. Lo’u Alii e, ou te ole atu ia te Oe i nei aso atoa ma mea uma lava e pei ona pipi’i atu i le manoa o Au tulafono i lena periota, ma taofi mau atu le ‘au o Au poloaiga, ina ia foa’i mai e mafai ai e tagata ta’ito’atasi uma ona maua se nofoaga i totonu o lotoa o Lou maota, ma se nofoaga i le fa’aaliga o pupula o le malamlama o Ou fofoga.

Lo’u Ali’i e, o Au auauna nei o e na le mafai ona taofia e le tuinanau leaga mai le mea na auina mai e Oe i Lau Tusi. Ua latou ifo atu lava latou i Lau Fautaiga, ma talaia Lau tusi i se gauai e pei lava na fanaa mai ia te Oe, ma anana i le mea na faatonuina e Lau Afio ia te i latou, ma filifilia e mulimuli atu i le mea lena na auina mai e Oe i lalo nei.

Lo’u Alii e, ua silafia e Oe le ala na latou talia ai ma tautino atu so o se mea lava sa fa’aalia mai e Lau Afio i Au Tusi Paia. Lo’u Ali’i e, avatu ia te i latou ina ia feinu i vai o Lou faavavau mai aao o Lou alofa tunoa. Tusia mo i latou le taui ua faatatauina mo le tagata ua na faatofuina o ia lava i le vasa o Lou faatasi mai, ma taunuu atu i le uaina filifilia o le feiloaiga ma Oe.

Ou te ole atu ia te Oe, o Lau Afio o le Tupu o Tupu ma le Gaualofa i tagata ua tuualofaiina, ina ia fatautauina mo i latou le lelei o lenei lalolagi ma le lalolagi atali. E le gata i lea, ia tusia mo i latou le mea e le i maua lava e se tasi o Ou tagata, ma faitauina i latou faatasi ma i latou o e o loo faatamilo faataali’oli’o ia te Oe, ma i latou o e o loo si’omia ai Lou nofoalii i lalolagi uma o Ou lalolagi.

E moni o Oe o le Malosiuma, o le Silafia Uma, o le Faailoa Uma.

 

Tatalo mo Maota Tapuai

“Amuia le tagata ua faasagatonu lana savaliga i le Mashriqu’l—Adhk’ar (Maota Tapua’i) i le itula o o le tafa o ata, ma mafuta ma Ia, naunauta’i i Lona manatuaina ma faatauanau i Lana faamagaloga. A ulufale atu o ia i totonu, ia nofo filemu ina ia mafai ona faalogoina fuaitau a le Atua, le Tupu, le Malosi uma, le Faaneetaga uma. O le Maota Tapua’i, o le mea moni, o soo se Maota lea i se taulaga po’o se nuu mo le ta’uta’uina o A’u. Ia outou iloa lelei sa faapea lava ona faasuafaina mai i Lona nofoali’i. Fai atu: e malo o le agaga, ua le mafai ona faamatalatalaina i ni upu po’o ni faatusa. Amuia i latou e uai atu i ai o latou taliga!” - Bahá’u’lláh

Le Atua e, lo’u Atua! I le agaga ootia ma loimata maligi ou te aioi faatauanau i Lau Afio ina ia lagolagoina soo se tasi ua faamaumauina lona malosi i le fauina o lenei Maota, ma le fausia o fale e ta’uta’uina ai Lou Suafa i taeao ma afiafi ta’itasi.

Le Atua e, Auina mai Lau faatelega faaleagaga i soo se tasi lava o loo taumafai e auauna atu i lenei Maota ma faasiliina lona fia galue ina ia iloa e tagata uma ma tapuaiga o le lalolagi. Faamautuina o ia i galuega lelei uma mo le faaleleia o tagata soifua. Tatalaina mo ia faitotoa o le tamaoaiga ma ia faia o ia ma suli o le oa e le mavae o Lou Malo. Faia o ia ma fa’ailoga o Lau Foaialofa i tagata ma faamalosia o ia i le sami o Lou agalelei ma Lou alofa ina ia felafoa’iina e peau o Lou alofa tunoa ma Lou finagalo malie. E moni o Lau Afio o le Agaalofa, o le Alofa Mutimutivale o le Foa’ialofa.

 

O Ia o le Atua! Le Ali’i e, o Le e faamanuia ia i latou uma o e tumau i Lau Feagaiga ona ua latou alolofa i Lou Malamalama o le Lalolagi, na faamaumauina ai mea ua latou maua e fai ma taulaga i le Maota Tapua’i, aua o le puna lea o aso o Ou ave susulu e folafolaina atu ai Au Faailoga. Fesoasoani Lau Afio i nei tagata sa’o ma le lelei i lenei lalolagi ma le ola atali, ina ia latalata atu i Lou Afioaga Paia, ma faapupulaina o latou mata i ave sesega o Lou matagofie.

E moni o Lau Afio o le Agalelei, o le Foa’ifua uma lava.

 

Le Atua Foaialofa e, Faia nei agaga na faapaiaina ma nofoaga o le tafa o ata o Lou malamalama, ma Faifa’aaliga o Au faailoga. Faia ina ia avea i latou taitasi ma maa faavae o lenei Maota Malosi, ma avea foi ma ona pou.

Le Alii e, o nei uo o ni tagata manaonao, ae o Lau lava Afio o le Faato’amalie, o le Fesoasoani, o le Puipuiga. Ua tutulai mai i latou ma le malosi e fesoasoani i Lau Afio, ma ua faatumuina i latou i Lau galuega. Talia mai ma fesoasoani ia i latou. Faaloto- teleina i latou ona o Lau folafolaga o Lou agalelei Paia, ma ia faitauina i latou faatasi ma Ou tagata filifilia.

O Lau Afio o le Malosi, O le Matautia, O le Mamana Uma ma o Lau Afio o le Foai, o le Mamalu, o le Fa’afofoga ma le Silafia Uma.

 

Le Ali’i e, lo matou Atua! E vaivai i matou; ao Lau Afio o le Alii o le malosi ma le mana. E augavale i matou, ao Lau Afio o le Mamana Uma, o le Mamalu Uma. E matitiva i matou; O Lau Afio e Ona mea uma, o le Agalelei Silisili. Fesoasoani alofa mai ia i matou i a matou auaunaga i Lou Faitoto’a Paia, ma fesoasoani mai e ala i Lou Alofa Tunoa e faamalosia i matou e tapua’i i Lau Afio i nofoaga o le tafaoata o Lou viiga. Faia i matou e faasalalau atu Lou manogi pa’ia i Ou tagata, ma faamalosia o matou itutino uma e auauna ai i Lau Afio i luma o Au auauna, ina ia matou ta’ita’ia atunuu uma i Lou Suafa Silisiliese ma ta’ita’i tagata uma i talafatai o le vasa mamalu o Lou tafatasi.

Le Ali’i e! Vavaeesea i matou mai piitaga o le lalolagi ma ona tagata, mai i agasala o le taimi ua tuana’i, ma ni puapuaga o le a tula’i mai i le lumana’i, ina ia matou tula’i e faaneeneeina Lau Upu ma le olioli tele ma le faapupulaina ma faamanatu Lou viiga i le taimi o le ao ma tau o le po, ina ia mafai ona matou valaauina tagata uma i le ala o le ta’ita’iga ma una’ia i latou e tausi i le amiotonu, ma mafai ai ona matou lagiina vi’iga o Lou tafatasi i luga o Lau foafoaga. E silisili ese Lau Afio e fai ai le mea e te finagalo iai. E moni, o Lau Afio o le Malosiuma, o le Mamana Silisili.

 

Tatalo o Asiasiga

O lenei Tatalo e faitauina i Loa o Bahá’u’lláh ma le Báb. E fa’aaogaina pea foi i le faamanatuina o La aso faamanatu.

O le viiga na tafe mai Lau lava Afio mamalu, ma le pupula sa susulu mai Lou Matagofie pupula sa i luga o Lau Afio lea, o Oe o Le o le Faifaaaliga o le Agalelei, ma le Tupu o le Faavavau, ma o le Alii o tagata uma o loo i le lagi ma luga o le lalolagi! Ou te molimau atu ona o Oe na fa’aalia ai le mamalu o le Atua ma Lana pule, le malualii o le Atua ma Lona agalelei, ma sa faluteina ai le Fetuao o le pupula anamua o latou pupula i le lagi o Lau poloaiga le alofia, atoa ma le Matagofie o le Levaaia sa fa’aalia mai luga o le tafailagi o le foafoaga. Ou te saga molimau atu pea, ona o se gaoioiga a Lau Peni, na faamalosia ai Lau fetalaiga, “Ia avea Oe”, ma fa’aalia ai Mealilo lafita’i a le Atua, ma avatua ai le ola i mea uma na faia, ma auina mai ai i lalo nei Fa’aaliga uma lava.

Ou te toe molimau atu foi ona o Lou matagofie na fa’aalia ai le matagofie o le Pele Sili, ma ona o Ou fofoga ua mafai ona fa’aalia mai ai fofoga o le Tagata Mana’omia, ona o le afioga mai ia te Oe ua mafai ai e Lau Afio ona filifili i le va o mea uma na faia ma lagaina ai i latou o e fatuatua moni ia te Oe ia o a’e i tumutumu o le mamalu, ma tagata amioleaga ia pauu atu i le to e le gata.

Ou te molimau atu o le tagata ua na iloa Oe ua iloa foi le Atua, ma o ia ua oo atu i Lou faatasi mai ua oo atu i fo’i i le faatasi mai o le Atua. O le mea lea, e uiga ese le faamanuiaga o le tagata lea sa talitonu ia te Oe, ma Au faailoga, ma sa faamaualalo o ia i luma o Lou mamalu, ma sa faamamaluina ina ua feiloa’i ma Oe, ma sa taunuu atu i le finagalo lelei o Lou finagalo, ma taamilo faataali’oli’o ia te Oe, ma sa tu i luma o Lou nofoalii. Oi talofa ia te ia sa agasala atu ia te Oe ma sa fa’afitia Oe, tete’eina Atu fa’ailoga, ma aa i tui i luma o Ou fofoga, fa’atauva i Au feagaiga ma sola ese mai Lau pule ma tagata amioleaga e ona igoa na tusia e tamatamaia’ao o Lau Afioga i Au Tapeleti paia.

Lo’u Atua e, ma la’u pele, manavaina mai le aao taumatau o Lou alofa mutimutivale ma Lou alofa agalelei manavaga paia o Lou maliega, e mafai ai ona latou ave’esea atu a’u mai ia te a’u lava atoa ma le lalolagi agai i lotoa o Lou latalata mai ma Lou fa’atasi mai. E silisili Oe e faia ai le mea e finagalo i ai Lau Afio. E moni, o Oe o le aoao i luga o mea uma lava.

O le manatua o le Atua ma Lona vi’iga, ma le mamalu o le Atua ma Lona pupula o loo i luga o Lau Afio, Oe na o Lona Matagofie! Ou te molimau e lei va’ai lava mata o le foafoaga i se tagata ta’ueseina pei o Oe. Sa faatofuina Oe i aso uma lava o Lou soifua i le vasa o puapuaga. O se tasi taimi sa i ai Oe i filifili ma

noanoataga, ao le isi taimi sa faamata’uina ai Oe i le pelu a Ou fili. Ui lava la i nei mea uma ae sa faatonuina lava e Oe tagata uma lava ina ia ana’ana i le mea na tuuina atu ia te Oe mai ia te Ia lea o le Silafia Uma, o le Poto Uma.

Ia avea lo’u agaga ma taulaga i mea sese na puapuagatia ai Oe, ma lo’u loto o se togiola i sauagas talia e Oe. Ou te ole atu i le Atua ona o Oe ma i latou e ona mata sa fa’apupulaina i pupula o le malamlama o Ou fofoga, ma i latou sa ana’ana i mea uma sa faatonuina ai i latou ona o le alolofa ia te Oe, ina ia ave’esea puao o lo’o i le va o Oe ma Ou tagata, ma ia fa’aoloaina a’u i mea lelei o lenei lalolagi ma le olaga atali. E moni o Lau Afio o le Malosi uma, o le Faaneetaga Silisili, o le Mamalu Uma, o le Faamagalo Faavavau, o le Mutimutialofa Silisili.

Le Ali’i e lo’u Atua, ia faamanuiaina e lau Afio le Laau Lote Faaleagaga ma ona lau, ona seuseu ma ona lala, ona la ma ona tatupu, i le taimi atoa e tumau ai Ou Suafa atoatoa silisili, ma le umi e tumau ai Ou ta’u taua uma. Puipuia mai le leaga o le tagata fouvale ma ‘au o sauaga. E moni, o Oe o le Malosi uma, o le Mamana Silisili. Le Ali’i e, lo’u Atua, ia faamanuia foi Aua auauna tane ma Au auauna fafine o e ua taunuu atu ia te Oe. E moni, o Oe le Foa’ialofa Uma, e Ona le alofa tunoa e le gata mai. E leai se tasi Atua i’ina na o Oe, o le Faamagalo Faavavau, o le Agalelei Silisili.

 

(O lenei tatalo sa fa’aalia e ‘Abdu’l-Baha, e faitauina i Lona Loa. E faaoga fo’i i tatalo ta’ito’atasi.)O se tasi e tataloina lenei tatalo i le faamaualalo ma le naunau moni; o le a faafiafiaina ma faaolioli’ina ai le loto o lenei Auauna; e mafai ai lava foi ona faafesagai fa’aleagaga ma la.

O Ia o le Malumalu Uma!

Le Atua e, lo’u Atua, i le faamaualalo ma loimata, ou te sisii a’e ai o’u lima augani ia te Oe ma ufitia o’u mata i le efuefu o le Faitotoa o Lau Afio, e silisili a’e i luga o le poto o tagata aoaoina, ma viiga a tagata uma o loo faaneeneeina Oe. Sisila alofa mai ia i luga o Lau auauna, e faatauvaa ma faamaualalo i Lou faitoto’a, i silafaga a le fofoga o Lou alofa mutimutivale, ma faatofuina o ia i le Vasa o Lou alofa tunoa faavavau.

Le Alii e, o ia a Lau auauna mativa ma le faatauvaa, ua augani ma ole atu ia te Oe, o se pologa i Lou aao, tatalo faatauanau atu i Lau Afio, faatuatua ia te Oe, tagi lotulotu i luma o Ou fofoga, valaau atu ia te Oe ma aioi atu i Lau Afio i le faapea atu:

Le Alii e, lo’u Atua, aumai ia te a’u Lou alofa tunoa ou te auauna ai i Au pele, faamalosia a’u i la’u tautala atu ia te Oe, faapupulaina lo’u muaulu i le malamalama o le tapuaiga i Lou lotoa o le faapaiaina, atoa ma le tatalo i Lou Malo o le agalelei. Fesoasoani mai ia te a’u ia le manatu faapito i le faitoto’a faalelagi o Lou puipui, ma lagolagoina a’u ina ia matua faatoina mai mea uma i totonu o Ou pa paia. Le Ali’i e, foai mai ia te a’u e inu i le ipu o le le manatu faapito; i lona ofu talaloa ia faaofu ai a’u, ma ia faatofuina a’u i lona vasa. Faia a’u ma efuefu i le ala o Au pele, ma foa’i mai ia mafai ona ou ofoina atu lo’u loto mo le laueleele ua faamamaluina e tulagavae o Ou tagata filifilia i Lou ala, le Alii e, o le Mamalu i mea Aupito Aluga.

O lenei tatalo e vala’au atu ai Lau auauna ia te Oe i le tai susu’e ma tau o le po. Le Alii e, faataunuuina le manao o lona loto! Faamamaina lona loto ma tutuina lona sulu, e mafai ai e ia ona auauna atu i Lau Fuataiga ma Au auauna.

O Oe o le Foai, o le Faamaisega, o le Foaialofa Silisili, o le Alofa Tunoa, o le Alofa Mutimutivale, o le Mutimutialofa.

 

Tatalo o le Anapogi

Ua tusia i le Tusi Tulafono Sili (Aqdas): “Ua Matou poloa’iina outou e tatalo ma anapogi mai le amataga o le tulaga tagata matua (15 tausga); ua faatonuina lenei mea e le Atua, lo outou Alii ma le Alii o outou tama . . . .E le ‘ai pe inu mai le oso o le la e o’o i le goto o le la, ma faaeteete i avea le mana’o e aveesea ai oe mai lenei alofa tunoa pei ona tofia i le Tusi.”

Le Alii e, lo’u Atua, ia viia pea Oe! Ou te ole atu ia te Oe i lenei Fa’aaliga na liliuina ai le pouliuli i le malamalama, ma mafai ai ona fausia le Mamalu Letuusaunoaina, ma fa’aalia ai le Tapeleti Tusia, ma maua ai le Tusi Taai, e auina mai i o’u luga ma luga o i latou o loo matou faatasi le mea o le a mafai ai ona matou felelei a’e i lagi o Lou mamalu pupula, ma faamamaina ai i matou mai le pefu o masalosaloga e pei ona punitia ai tagata faaletonu mai le ulufale atu i le tapeneko o Lau aufaatasiga.

Lo’u Alii e, o a’u le tagata o loo taofi mau atu i le manoa o Lou alofa agalelei, ma pipii atu i le tuupao o Lou alofa mutimutivale ma le finagalo lelei. Totofi mai ia e Oe mo a’u ma a’u pele le lelei o lenei lalolagi ma le lalolagi atali. Faaoloaina i latou i le Meaalofa Lafitai na filifilia e Lau Afio mo tagata silisili mai Ou tagata.

Lo’u Alii e, o aso nei na faatonuina ai e Oe Au auauna ia anaana i le anapogi. Amuia le tagata sa anaana atoatoa i le anapogi ona o Lou Suafa, ma matua faatoina atoatoa mai mea uma vagana Lau Afio. Lo’u Alii e, fesoasoani mai ia te a’u ma lagolagoina i latou ia usita’i ia te Oe ma tausia Au poloaiga. E moni, o i Lau Afio le mana e faia ai le mea e filifilia e Oe.

E leai se tasi Atua na o Lau Afio, o le Silafia Uma, o le Poto Uma. Ia vivii le Atua, le Alii o lalolagi uma.

 

Le Atua e, o le Alofa Mutimutivale, o Lau Afio lava e Ona le Mana o loo pulea ai mea uma lava na faia, ua silafia e Lau Afio Au auauna nei, o au pologa o e e pei lava ona tusa ai ma Lou Finagalo malie lelei, sa anaana i taimi o le ao i le anapogi e pei ona faatonuina mai e Lau Afio, o e na alafa’i a’e i le vaveao i le tafaoata o le aso fou e faia le ta’utau’ina o Lou Suafa, ma faamanatuina Lou viiga i le faamoemoe o le a maua mai ai lo latou vaega o mea lelei uma o loo teuina i fale teu’oa o Lou alofa tunoa ma le foa’ialofa. Ou te ole atu ia te Oe, o Lau Afio lava o looi Ou Aao faagutu o le foafoaga atoa, e Ona le ‘u’u o loo iai le malo atoatoa o Ou suafa ma Ou ta’u, ma e le o ave’esea i Lou Aso, Au auauna mai uaga o loo maligi mai ao o Lou alofa mutimutivale, po o le taofia foi o i latou mai le aveina o le latou vaega o le vasa o Lou finagalo lelei.

Lou Ali’i e, o loo molimau uma lava ia te A’u iota o le lalolagi, i le silisili ese o Lou mana atoa foi ma Lou mamalu; ma o faailoga uma lava o le atulaulau o loo molimau atu i le mamalu o Lou maualuga atoa foi ma Lou malosi. Ia i ai Lou alofa mutimutivale, o Lau Afio o le Malosi. Ia i ai Lou alofa mutimutivale o Lau Afio o Le o le Alii mamalu o tagata uma lava, o Le o le Tupu o aso aunamua, ma o le Pule o malo uma, i luga o Au auauna nei, o e ua pipi’i mau atu i le manoa o Au poloa’iga, o e ua ifo atu o latou ua i fa’aaliga o Au tulafono na auina mai i lalo nei mai le lagi o Lou Finagalo.

Lo’u Alii e, faauta foi i le ala na ea a’e ai o latou mata aga’i atu i le nofoaga o le tafaoata o Lou alofa agalelei, le tulaga na taula’i atu ai o latou loto i luga o vasa o Ou finagalo malie, le tulaga na tuutuu ifo ai i lalo o latou leo ona o si’uleo o Lou Siufofoga aupito malie, o loo valaau mai mai le tulaga aupito tupito, i Lou Suafa o le Mamalu Uma. Lo’u Alii e, ia fesoasoani Lau Afio i Au tagata peleina, i latou o e ua matua faatoina a latou mea uma lava o loo pulea e lau Afio, o e ua matua si’omiaina lava e puapuaga ma tofotofoga ona ua latou faatoina le lalolagi ae taula’i atu o latou loto i Lou malo o le Mamalu. Ou te ole atu i Lau Afio lo’u Alii e, ina ia malutia i latou mai osofa’iga o latou tu’inanau leaga ma mana’oga, ma ia lagolagoina i latou ina ia maua mea e aoga ia te i latou i lalolagi lenei ma le ola atali.

 

Tatalo o le Naw-ruz

Lo’u Atua e, viia Oe na tofia e Lau Afio le Tausaga Fou e avea ma sauniga faamanatu mo i latou sa anaana i le anapogi ona o le alolofa ia te Oe, ma aloese mai mea uma e inoino atu ia te Oe. Lo’u Ali’i e, foai mai ina ia mafai ai e le afi o Lou alofa ma le vevela na maua mai le anapogi na poloai’ina e Oe ona faamumuina ai i latou i Lau Fuataiga, ma faia ai i latou ina ia faafeagai pea ma Lou viiga ma le manatuaina o Oe.

Lo’u Ali’i e, ona ua faapaleina e Lau Afio i latou i le pale o le anapogi e pei ona faatonuina e Oe, ia faapea fo’i ona faapaleina o i latou i le pale o Lau taliaina, ona o Lou alofa tunoa ma le finagalo foaialofa. Aua o gaoioiga a tagata e faalagolago uma i luga o Lou fingalo malie, ma e faaleleia uma e Lau tulafono. Afai o le a faatatauina e Oe le tagata na solia le anapogi o se tasi sa ana’ana i ai, o lena tagata o le a faatuatuaina faatasi ma i latou o e sa tausia le anapogi mai le faavavau. Ma afai o le a faatatauina e Lau Afio le tagata sa anaana i le anapogi o se tasi na ia solia, o lena tagata o le a faitauina faatasi ma i latou na mafua ai ona eleelea i le pefu le Ofutalaloa o Lau Fa’aaliga, ma sa aveesea mamao lava mai vai pupula o lenei Vaipuna ola.

O Lau Afio lava o Ia na ala ai ona siitia i luga le tagavai “Ua tatau ona viia Oe i Au galuega” ma tatalaina ai le fu’a, “Ia usiusitai i Lau Afio i Au poloaiga”. Lo’u Atua e, faia ia iloa Lou tulaga lenei i Au auauna, ina ia mafai ai ona latou iloa o le atoatoa o mea uma e faalagolago lea i luga o Lau poloaiga ma Lau afioga, ma o le uiga lelei o se gaoioiga e faaleleia lea i Lau faatagaina ma le maliega lelei o Lou finagalo, ma mafai ai ona iloa o pulega o galuega a tagata o loo i ai lea i totonu o le taofiga e Lau taliaina ma Lau tulafono. Fai lenei mea ia iloa ia te i latou, e leai lava se mea tusa po o le a e taofia ai i latou mai Lou Matagofie, o ia lava aso na alaga mai ai le Keriso: “E Ou malo uma lava. Oe na le Tama o le Agaga (Iesu)”; na alaga atu ai Lau Uo (Moameta): “Oe na le Pele Sili, ia vi’ia pea Oe, ona ua fa’aalia e Lau Afio Lou Matagofie, ma tusia mo Ou tagata filifilia le mea o le a lagaina ai latou e taunuu atu i le nofoaga o le fa’aaliga o Lou Suafa Aupito Silisili, na mafua ai ona tagitui tagata uma, vagana ai i latou ua faatoina i latou lava mai mea uma vagana ai latou ua faatoina i latou lava mai mea uma vagana Oe, ma faasaga atu i latou agai ia te Ia lea o le Sapenapaenea o Lau Afio ma le Faifa’aaliga o Ou ta’u.”

Lo’u Alii e, o Ia lea o Lau Lala faatasi ma Lau vaega uma ua tatalaina i le aso lenei le latou anapogi, ina ua uma ona anaana i ai i totonu o lotoa o Lou maota, ma lo latou naunautai ia faamalieina Oe. Ia totofi’ina e Oe mo Ia ma i latou aemaise i latou uma sa ulufale atu i Lou faatasi mai, i aso na o mea lelei uma sa faatatauina e Oe i Lau Tusi. Faaoloaina i latou i le mea o le a aoga ia te i latou, i le olaga lenei ma le olaga atali.

E moni, o Oe o le Silafia Uma, o le Poto Uma.

 

Tablets

O le Tapeleti a Ahmad

O le Tatalo a Ahmad

O lenei tatalo e mamana tele e tataloina pe a feagai ma mea faigata.

O Ia o le Tupu, o le Silafia Uma, o le Poto! Faauta i le Naitinikale o le Parataiso o loo pese i luga o lala o le laau o le Faavavau, i pesega paia ma le malie, o loo ta’u atu i tagata faamaoni le tala lelei o le faalatalata mai o le Atua, valaau atu i tagata talitonu i le Aufaatasiga Faaleagaga i le lotoa o le Faatasi mai o le Agalelei Silisili, e faailoa atu i tagata faatoina atoatoa le feau sa fa’aalia mai e le Atua, le Tupu, le Mamalu, le Lefaatusalia, e ta’ita’i atu tagata alolofa i le nofoa o le faapaiaina ma lenei Matagofie pupula.

E moni, o lenei le Matagofie Aupito Silisili sa ta’uina mai i Tusi a Avefeau, o le o le a matua faatinoina ai le mea moni mai le mea sese, ma le poto o soo se faatonuga e tatau ona tofotofoina. E moni o Ia o le Laau o le Ola e fua mai i fua o le Atua, o le faaneetaga o le Mamana o le Sili.

E Ahmad! Molimau oe e moni o Ia o le Atua ma e leai se tasi Atua na o Ia, o le Tupu, o le Malu, o le Lefaatusalia, o le Malosi uma lava. Ma o le Tagata na Ia auina mai i le igoa o ‘Alí (O Le Báb) o le Tagata moni lava mai le Atua, e Ona faatonuga o loo tatou faataita’ita’i uma i ai.

Fai atu: Tagata ea, ia usisuita’i i poloaiga a le Atua, e pei ona faatonuina mai i le Peiana (Bayán) e le Mamalu, le Atua Poto. E moni, o Ia o le Tupu o Avefeau ma o Lana Tusi o le Tina o Tusi sa tatau ona outou iloa.

O le ala lea o le tuuina mai e le Naitinikale o Lana valaau ia te outou mai lenei falepuipuil. Sa tatau ona tala’i atu e Ia lenei feau manino. O ai lava e manao, ia liliu ese loa mai lenei lapataiga, ma o ai lava e mana’o ia filifili loa e ia le ala i lona Ali’i.

Tagata ea, afai tou te faafitia nei fuaiupu, o le a la se faamaoniga sa outou talitonu atu i le Atua? Fa’aali mai, outou o faapotopotoga o tagata pepelo.

E leai, ona o le Tagata o loo i ai lo’u agaga i Ona aao, ae le faapea i latou, ma o le a le mafai lava ona latou faia lenei mea, tusa pe latou te aufaatasi e fesoasoani le tasi i le tasi.

E Ahmad! Ia le galo A’u foaialofa a o toesea A’u. Manatua O’u aso i asoi o lou olaga, ma Lo’u puapuaga ma le faaaunuuaina i lenei falepuipui tuto’atasi. Ma ia e matua lotomau i Lo’u alofa e le fesoua’iina ai lou loto, tusa lava pe toto faaua ifo i ou luga pelu a le fili, po o lagi uma foi ma le lalolagi e tula’i a’e tetee atu ia te oe.

Ia avea oe e pei o le mumu o se afi i O’u fili, ma se vaitafe o le ola faavavau i A’u pele, ma ia le pei o latou o e masalosalo.

Ma afai ua mafatia oe i puapuaga i Lo’u ala, po o le faatau- vaaina ona o Lo’u igoa, ia le popole ai.

Faalagolago i le Atua lou Atua ma le Alii o ou tama. Aua ua fesea’i tagata i ala o manatu sese, vavaeesea mai le iloatino o le vaaia o le Atua i o latou lava mata, po o le faalogo foi i Lona Siufofoga i o latou lava taliga. E pei ona Matou maua i latou, ae avea ai oe ma molimau.

E pei ona avea a latou ifoga i tupua ma puao i le va o i latou ma o latou lava loto, ma taofia ai i latou mai le ala o le Atua, le Faaneetaga, le Sili.

Ia talitonu oe ia te oe lava, e moni o le tagata e liliu ese mai lenei Matagofie, ua liliu ese foi mai Avefeau o aso ua mavae ma fa’aalia le aaitui i le Atua mai le vavau e oo i le faavavau lava.

E Ahmad, a’oa’o lelei lenei Tatalo. Ia lagi faapese i ou aso ma ia le ave’eseina mai ai oe lava. Aua e moni, ua totofiina e le Atua mo le tagata na te lagi’ina lenei tatalo, le taui o se selau maturo ma se auaunaga i lalolagi e lua. O nei manao ua Matou liligi atu i ou luga o se foa’i alofa mutimutivale mai lo Matou faatasi mai, ia avea ai oe e pei o i latou ua faamanuiaina.

Ona o le Atua! O se tasi ua puapuagatia ma mafatia e tatau ona faitau i lenei Tatalo ma le matua mama atoatoa, e soloia e le Atua ona faanoanoaga, fo’ia ona faafitauli, ma ave’ese i ona puapuaga.

E moni, o Ia o le Alofa Mutimutivale, le Mutimutialofa. Ia i le Atua le viiga, le Alii o lalolagi uma.

 

Tapeleti a le Tagata alofa ma Lana Manamea

O Ia o le Faaneetaga, o le Mamalu, o le Faaeaina-Silisili.

Fa’asa’oloto maia o outou tagata, naitigikale ea a le Atua, mai le matuitui ma le talatala o le nutimomoia ma le faavauvau, ma ia lele ae lau malaga i le faatoaga rosa o le mamalu le mavae. Au uo e, o loo nonofo i luga o le efuefu! Fa’ata’alise atu ia i lou nofoaga faalelagi. Folafola atu ia ia te outou tala lelei faaolioliina: “Ua afio mai nei Le ua avea ma Pele Sili! Ua Ia faapaleina Ia lava i le mamalu o le Fa’aaliga a le Atua, ma ua tatalaina atu nei i mata o tagata faitotoa o Lona Parataiso mai anamua.” Ia fa’afiafiaina uma mata, ma ia faaolioliina uma taliga ta’itoatasi, ona o lenei le taimi e taula’i atu ai i Lona matagofie, ma o lenei tonu le taimi talafeagai e u’ai atu ai i Lona siufofoga. Folafola atu i soo se pele o loo fa’atalitali mai ma le faanaunau: “Fa’auta, ua afio mai nei mai tagata la outou Pele – Sili!” ma ia faasalalau atu i avefeau uma a le Malo le tala lelei lenei: “E! pele e, faauta, ua va’aia manino nei le Pele Tasi, i le atoaatoa o Lona mamalu!” E! pele e, o Lona matagofie! Liua le matamataita o lou vavaeesea mai ia te Ia i le olioli o se toe faatasia faavavau, ma ia avea le suamalie o Lona faatasi mai ina ia liusuavaia ai le o’ona o lou taumamao mai Ona lotoa.

Fa’auta i le sautualasi o le alofa tunoa o le Atua, lea ua faamaligi mai ai i ao o le mamalu faapaiaina, i lenei aso, ma faamalamalamaina ai le lalolagi. Aua sa faapea lava foi i aso ua mavae, le tuufesili ma saili atu i le Pele, ma o lenei lava ua valaau mai o Ia lava, i Ana pele ma ua ia valaaulia foi i latou ina ia faatasi ma Ia. Ia faaeteete, ina nei outou aveesea mai lenei faamanuiaga paia, faaeteete lava ina nei e ta’ufa’atauvaaina lenei faailoga silisiliese o Lona alofa tunoa. Ia e le lafoa’iina ana faamanuiaga taualoa, ma ia aua ne’i faamalieina oe i mea e mavae. Sisiina ae le ufimata o lo’o punitia ai lau vaaiga, ma aveesea le pogisa o loo maua mai ai, ina ia mafai ai ona e taula’i atu i le mama aiai o le matagofie o fofoga o le Pele, ma e vaaia se matagofie e le’i vaaia muamua e nisi mata, ma fa’alogo atu ia i le mea e le’i faalogo muamua lava iai se isi.

Fa’alogo maia ia te Au, outou e, manulele o le lalolagi! i totonu o le Faatoaga Rosa o le mamalu faavavau, o loo totogo ae ai se Fugalaau, pe a faatusa atu i isi fugalaau ua faapei o ni vaotuitui, ma i luma o le pupula malosi o Lona mamalu o loo iai le tulaga moni o le magumagu ma le mamae o le matagofie. Tulai nei loa, ma le fiafia atoaatoa o tou loto faatasi ma le pulunaunau o o outou agaga, aemaise o le taumasuasua o lo outou finau, faatasi ai ma taumafaiga faatoina a o outou tino, taumafai ina ia ausiaina le parataiso o Lona faatasi mai, ma ia naunautai e manavaina manogi sasala o le Fugalaau faasilisiliina, pua’ina le suamalie o le faapaiaina, ma ia ausia se vaega o lenei manogi sasala o le mamalu faalelagi. Soo se tasi lava e mulimulitai i lenei faatonuga, o le a faasaolotoina mai ona noataga, o le a tofo i le lafo’esea o le alofa e mavae, o le a ausia le faanaunauga sili o lona loto, ma o le a lafoa’i atu uma lona agaga i aao o lana Pele. O le saoloto ese atu ma lenei pa, o le a avea ai foi o ia o se manulele o le agaga, ma o le a lele ae i lona faamoega paia ma le faavavau.

Ua manuia le ao ona o le po, ma ua manuia le po ona o le ao, e sau ma toe alu atu itula uma ma vaega taua o lou olaga, peitai, e matua leai ma se tasi o outou i sina taimi laititi, o faamalieina i le vavaeesea mai o latou tagata mai mea e mavae. Lagaina ae o outou tagata, ina ia aua nei ma’imau ma mou atu nai toe taimi laiti o loo totoe pea mo outou. Tusa lava pe faapei o le emo o le uila le mavae atu o tou aso, ma taatitia malolo o tou tino i lalo ifo o le malu o le efuefu. O le a se mea e mafai ona e ausia? E faapefea ona e toe taui atu i lou tulaga maualalo sa iai i taimi ua alu?

E susulu pea le Lamepa faavavau mai lona tulaga mamalu aiai. Outou e, o pele faapei o ni pepe o loo tosina atu i Lona malamalama! Ia totoa i soo se faigata, ma ia matua faamuina o tou agaga i lona mumu saesae. Outou e, o loo galala atu ia te Ia! Fa’asa’oloto mai outou tagata mai soo se tuinanauga faalelalolagi, ae faataalise atu e talia lau Pele. I se naunautaiga e le mafai le mafai ona faatusatusainaina, faavave atu ia ma faatasi atu ia te Ia. Ua fa’aalia atu i ou mata le Fugalaau, lea sa faalilo mai le vaaiga a tagata. Ua tula’i atu nei i ou luma, faatasi ma le pupula sautualasi o Lona mamalu. O Lona siufofoga e poloaiina uma ai tagata paia ma le mama ina ia omai ma faatasia e Ia. E fiafia lē o le a liliu atu iai, faapea foi o ia ua ia mauaina, ma taula’i atu i le malamalama o lenei vaaiga e maeu le ofoofogia.

 

Tapeleti o Karamelu

Ia iai Mamalu uma i lenei Aso, o le Aso na puaina atu ai manogi sasala o le Alofa Tunoa i luga o mea uma na faia, o le Aso e matua faamanuiaina e leai se faamoemoe o tausaga ma seneturi ua mavae e mafai ona faatusatusa iai, o le Aso na liliu atu ai Fofoga o le Vavau o Aso i Lona Nofoali’i Paia. Sa faalogoina iinei leo o mea uma na faia. Ma i tua atu o i latou o le Aupaia i luga, sa faalogoina le valaau leotele: Ia Faavave maia, Kalamelu e, ona o lea, o le malamalama o Fofoga o le Atua o le Tupu o le Malo o Suafa ma le foafoaina o le Lagi ma ua sii a’e i Ou luga. Taofia e feoaiga o le olioli, ma sii faamaualuga lona leo, ma Ia faapea mai: Ia avea lo’u ola e fai ma ositaulaga mo Lau Afio, e faapei ona tepa taula’i mai Ou fofoga ia te a’u, liligi mai Au foa’ialofa mo a’u, ma ua ta’ita’i aga’i mai ia te a’u Lau savaliga. O le taumamao mai i Lau Afio, o Le o le afua’aga o le ola e faavavau e faaumatia ai a’u, ma o le mamao ese mai ia te Oe e matua faamuina ai lo’u loto. O viiga uma i Lau Afio i le faia o a’u ia mafai ona faalogo atu i Lau valaau, ona ua faamanuiaina a’u i Ou tulaga Aao. Ma le faapupulaina o lo’u loto i manogi taua o Lou Aso ma le leo taalili o Lau Peni, o le leo na faauuina e Lau Afio e avea o se foafoa valaau i Ou tagata. Ma ina ua taunuu mai le itula e faaalia ai Lau Fuataiga letaofia, sa manavaina atu ai e Lau Afio manavaga o Lou agaga i Lau Peni, faauta, o Lē ua gatete ai le faavae o le foafoaga atoa, ma faaalia ai i tagata soifua e iai misiterio lilo o loo natia i teugaoa o Ia lea o Lē e ona mea uma na faia!

E le’i pine ona lagonaina Lona siufofoga i lea nofoaga faapaiaina silisili ae Matou tali atu: ‘Faafo’i le faafetai i lo’u Alii, Kalamelu e, O le afi o Lou taumamao mai ia te a’u ua vave oo atu ai lo’u faaumatia, Pe a sousou le vasa o lo’u faatasi atu i luma o Ou fofoga, faafiafiaina ai o’u mata ma i latou uma o le foafoaga, ma ua tumu ai i le olioli mea uma e vaaia ma le lēvaaia. Alalaga fiafia, ua faavaeina e le Atua i lenei Aso lona nofoalii i ou luga. Avea oe ma nofoaga o le tafaoata o Ana faailoga ma Punavai Aso o faamaoniga o lau Faaaliga. Ia manuia le e faataamilo ia te Oe, ma ta’uta’u atu le faaaliga o Lou Mamalu ma faitau foa’ialofa o le Alii lou Atua sa liligi ifo ia te Oe. Ia e taofi mau atu i le ipu o le ola e faavavau i le Suafa o Lou Alii, le Mamalu Uma, ma tatalo faafetai atu ia te Ia, e faapei ona Ia, avea Lona Alofa Mutimutivale ia te Oe, e liua ai ou faanoanoaga i le olioli, ma liliu lou faavauvau i le fiafia tele. O Ia, e Valaau atu i Siona, Kalamelu e, ma ta’u atu le talalelei fiafia: O Ia lea sa natia i le vaaiga o mata ua Afio mai! O Lona Malo Pule Malosi Uma ua faaalia; O Lona Pupula Mamalu Uma ua faailoaina. Ia mataala ne’i outou faatuutuu ma musua. Faavave atu ma faataamilo i le Aai o le Atua na alu ifo mai le Lagi, o le Kaaba faalelagi e taamilo ma faataamilomilo ai i le agaga o talosaga pele a le Atua, o ē e loto mamā, ma le faatasi mai o le au agelu faapaiaina silisili.

E! tafēfē i le umi o o’u faatali e tau atu i nofoaga uma o le fogaeleele o le lalolagi, ma ave atu i aai uma ta’itasi, le talalelei o Lana Fa’aaliga – o le Faaaliga na tosina iai le loto o Sinai e ona le Suafa o loo valaau mai e le vao mu: “O le Atua, le Alii o Alii e Ou le Malo o le lalolagi ma le lagi.” E moni o lenei Aso ua faafiafia tele ai le laueleele ma le sami i lenei faasalalauga.

O le Aso sa faataatitia ai mea nei, o Ia o le Atua ma Lana foa’ialofa e sili a’e i le malamalama o mafaufau ma loto e gata mai, sa fuafuaina mo le Fa’aaliga. E lē o toe mamao ae folau le Sa o le Atua i Ou luga, ma fa’aalia ai tagata o Baha lea na ta’uina mai i le Tusi o Suafa!

E Paia le Alii o tagata uma, i le ta’uta’uina o Lona Suafa e gatete ai elemeni ola uma, ma faaosofia ai le Fofoga fetalai o le Agalelei Silisili e faailoa mea sa fusifusia i Lona Poto ma sa natia i teugāoa o Lona Malosi. O Ia, e moni, i le Mana Malosi o Lona Suafa, le Malosi Uma, le Mamana Uma, le Maualuga Silisili, o le Tupu o i latou uma i le lagi ma i latou uma i le lalolagi.

 

Tapeleti o le Afi

I le Suafa o le Atua, le Vavau Silisili, le Mata’utia Silisili.

E moni o loto o pele ua fa’agaogaoina e le afi o le taumamao: O fea o i ai le pupula o le malamalama o Ou Fofoga, le Pele e a lalolagi? O i latou uma sa latalata atu i Lau Afio ua tu’ulafoa’ina i le pogisã o le fa’avauvau: O fea o i ai le taeao susulu o le Toefa’atasia ma Oe, le Mo’omo’oga e o lalolagi? O tino o Ou tagata filifilia o lo o ta’atitia gatete mai i luga o oneone mamao: O fea le vasa o Lou fa’atasi mai, le Faipêsega e o lalolagi? O lima fa’ananau o lo o sisi’i a’e i le lagi o Lou alofa mutimutivale ma le agalelei: O fea uaga o Au foa’ialofa, le Talimana’o e o lalolagi? O tagata lê talitonu ua tutûla’i a’e ma le matamataita i so’o se itû: O fea le mana fa’agagauloto o Lau peni fa’asilisiliina, le Fa’ato’ilalo e o lalolagi?

O le uiô a uli ua malomaloã mai i so’o se itû: O fea le leona o le vaomatua o Lou malosi, le Fa’ao’osala e o lalolagi? Ua pu’eia tagata uma i le maatiati o le malulû, O fea le mafanafana o Lou alofa, le Afi e o lalolagi? O ‘au o mala ua o’o atu i ona tulu’iga: O fea fa’ailoga o Lou lavea’i, le Fa’aola e o lalolagi?

O le pogisã ua ufitia ai le to’atele o tagata: O fea le malamalama o Lou Susulu, le Fa’amumuina e o lalolagi? O ua o tagata ua fãlô a’e i le taulamalama: O fea pelu o Lou tauimasui, le Fa’ato’ilalo e o lalolagi? O le to’ilalopopo ua goto ifo i le ta’ele o lona fa’amaualaloina: O fea tagãvai o Lou pupula, le Mamalu e o lalolagi? O fa’anoanoaga uma ua pagãtia ai Lê sa fa’ailoaina Lou Suafa, le Alofamutimutivale-Uma: O fea le ‘oli’olisaga o le Fetûao o Lau Fa’aaliga, le Fiafiaga e o lalolagi? O puapuagã ua a’afia ai tagata uma lava o le lalolagi: O fea fa’ailoilo o Lou fa’afiafiaina, le Oli’olisaga e o lalolagi? Ua sisila ifo Lau Afio i le Nofoaga Amata o Au fa’ailoga ua punitia i manatu leaga: O fea tamatama’iaao o Lou malosi, le Mana e o lalolagi? O le matelãina matuitui ua i’u atu i ai tagata uma: O fea le vaitafe o Lau fa’aoloaga, le Alofamutimutivale e o lalolagi? O le matape’ape’a ua avea lava ma fa’apologa i tagata uma lava: O fea tino va’aia o le vavae’esea, le Alii e o lalolagi? Ua sisila mai Lau Afio i le fa’aaunu’uaina toatasi o lenei Tagata Ta’usesêina: O fea ‘au o le lagi o Lau Poloa’iga, le Tupu e o lalolagi? Ua tu’ulafoa’ina A’u i totonu o lau’ele’ele mamao ‘ese: O fea tagãvai o Lou fa’atuatuaina, le Faatuatuaga e o lalolagi?

O tigã ma faigatã o le oti ua fusifusia ai tagata uma: O fea galu fafati o Lou vasa o le ola e fa’avavau, le Olataga e o lalolagi? O musumusuga a Satani o lo o pua’ina atu pea i so’o se meaola: O fea le aniva o Lou afi, le Malamalama e o lalolagi? O le ônã i le tu’inanau ua liuaina le to’atele o tagata: O fea le fetûao o Lou fa’amamãina, le Mo’omo’oga e o lalolagi? Ua silasila mai Lau Afio i lenei Tagata Ta’usesêina ua punitia i faiga lê migao a tagata o Suria: O fea le fa’asusuluina e Lou puna o le malamalama, le Malamalama e o lalolagi? Ua sisila mai Lau Afio ia te A’u ua fa’asãina ona tautala atu: Ae mai fea le fa’atupuina o Ou fatugamalie, le Naitinikale e o lalolagi? O le to’atele o tagata ua pauu atu i manaoga ma tu’inanauga lê aogã: O fea le fa’atofãla’iga o Lou mautinoa, le Ta’utinoga e a lalolagi? O tagata o le Malamalama ua malelemo i le sami o mea tigã: O fea le Va’a o Lau fa’aolataga, le Fa’aola e o lalolagi? Ua silasila mai Lau Afio i le Fetûao o Lau ta’ita’iga i totonu o le pouliuli o le foafoaga: O fea le la o le lagi o Lou alofa agalelei, le Pogai e o le Malamalama o lalolagi?

Ua tineia lamepa o le upumoni ma le mamã, o le talitonuina ma le mamalu: O fea fa’ailoga o Lou ‘olo malosi ma le to’asãi, le Fa’agaioiga e o lalolagi? E lê mafai ea ona sisila ifo Lau Afio i le leai o se tasi o e na talitonu atu ia te Oe lava, po o le manatunatu foi i le mea na puapuagatia ai o Ia i le ala o Lou alofa? O lenei ua lê toe fa’agaioia La’u peni, le Pele e a lalolagi? O lãlã o le La’au Lote Fa’aleagaga ua gaui i le feagia’i mai o matagi malolosi o faamoemoega: O fea fu’a o Lau fesoasoani, le Toa e o lalolagi?

O Fofoga nei sa natia e le pefu o le fa’alumaina: O fea saumãlû o Lou alofa naunauta’i, le Alofa Mutimutivale e o lalolagi? O le ofu o le fa’amamaina, ua pisipisia i tagata molimau pepelo: O fea le ofutalaloa o Lou fa’apaiaina, le Faito’aga e o lalolagi? O le sami o le alofa agalelei ua to’a e tusa ma mea ua faia i lima o tagata: O fea galu fafati o Lau foa’ialofa, le Mo’omo’oga e o lalolagi? O le faitoto’a e tau atu i Lou Fa’atasi mai Fa’aleagaga ua tapunia e ala i faiga pi’opi’o a Ou fili: O fea le ki o Lau foa’ifua, le Ki e o faitoto’a uma o lalolagi? O laula’au ua lanu sasama mai i matagi oona o le fa’atupu vevesi: O fea uaga-mamafa o ao o Lau fa’aoloaga, le Foa’i e o lalolagi? O lenei fo’afo’aga atoa ua fa’apogisãina e le pefu o le agasala: O fea saumãlû o Lau fa’amagaloga, le Fa’amagalo agasala e o lalolagi?

O lenei talavou ua tu’ua na o ia i ‘ele’ele lafulafuã: O fea le timu o Lou agalelei fa’alelagi, le Foa’ifua e o lalolagi? Le Peni Fa’asilisiliina e, ua Matou fa’afofogaina leomalie silisili o Lau vala’au i le malo fa’avavau: Ua’i maia Ou fofoga i le mea sa folafolaina atu e Fofoga o le Susulu, le Tagata Ta’useseina e o lalolagi? Pe a na le seanoa le malûlû, po o le a fa’apefea e le vevela o Au upu ona fa’amanuiaina, le Ta’ita’iga e o lalolagi? Pe a na le seanoa le ufitia i ao pogisa o fa’anoanoaga, po o le a fa’apefea e le la o Lou onosa’i ona fa’asusuluina, le Malamalama e o lalolagi? Ia le tagitu’i ona o le ofoofogia. Na faia Oe ia onosa’ia ma talia, le Lavapapale e o lalolagi. Se mea i na suamalie o Lou amataga i luga o tafa’ilagi o le Feagaiga i a’i latou o fa’atupuina vevesi ma fevaevaea’iga, ma Lou galala atu i le Atua, le Alofa e o lalolagi. Ona o Oe, ua tutu’iina ai le fu’a o le sa’olotoga i tumutumu maualuluga, ma fegalua’i ai le sami o le fa’aoloaga, le Sapenapanea e o lalolagi. I Lou to’atasi na oso a’e ai le La o le Tafatasi, ma Lou fa’aaunu’uaina na fa’apaleina ai le ‘ele’ele o le Aufa’atasi. Ia onosa’i le Fa’aaunu’ua e o lalolagi. Ua Matou faia le fa’amaualaloina ma la’ei o le mamalu, ma tigã ma faigatã ma pale o Lou malumalu, le Mitamitaga e o lalolagi.

Ua silafia e Lau Afio loto ua fa’atumulia i le matau’a, ma ua le sisila i ai Lau Afio, le Lê Silasila e i agasala a lalolagi. Afai ua fa’aalia mai pelu, fa’aaoga loa, afai ua sasauina, fa’aauau loa ma le malosi, le Fa’atoina e o lalolagi. E aue ea Lau Afio, po o A’u? Po o le sili ai ona Ou fa’avauvau i le to’agaogao o Ou toa, le Alii e o Lê fa’atupuina le auega a lalolagi. E moni, ua Ou fa’afofogaina Lau vala’au, Le Pupula-Uma e Fa’apelepelina; ma o lenei o le fofoga o le Malamalama ua fa’amumuina i le vevela o puapuagã ma faigatã ma ole afi o Lau upu fa’asusuluina, ma Lona tula’i a’e i le fa’atuatua tele i le nofoaga o le fa’atoina, ma silasila atu i Ou fiafiaga, le Pule Aoao e o lalolagi. Ali e Akbar, fa’afetaia lou Ali’i mo lenei Tapeleti, ua mafai ai ona e manavaina sausau manogi o Lo’u agamalû, ma e iloaina le mea ua olopalaina ai i Matou i le ala o le Atua, le Pele e a lalolagi uma. Pe a faitauina e auauna uma lenei Tapeleti ma mafaufau loloto i ai, o le a tutuina i o latou alatoto se afi o le a fa’amumuina ai lalolagi uma.

 

Tusi o le Feagaiga

E ui lava e le o iai i le Malo o le Mamalu mea le aoga o le lalolagi, ae ona o teuga’oa o faamoemoega ma faatuatuaga tuu atu atoa ua matou mavae atu ai i o Matou Suli ni mavaega o mea lelei atoatoa ma le taugata silisili lēfaatuāoia. A o oa faalelalolagi, Matou te le’i tuuina atu, pe na Matou faaopoopo atu ma le faaeteete, e pei ona masani ai. Ona o le Atua! O ‘oa o le lalolagi o loo natia ai le fefe ma lona faatamaia o loo punitia. Manatunatu ma manatua i le mafaufau mea na fa’aalia mai e le Alofa Tunoa Uma i le Korana: “Ia faamalaia ia i latou uma e taufaifai ma faamaasiasi, o Ia lea e faaputu ma faitauina le ‘oa.” O ‘oa o le lalolagi e lē tumau; O mea uma e faaumatia ma suia ma e lē tatau ma sa le i faatāuaina lava vagana ai se vaega sa faatatauina e talia ma faamautinoaina.

O le faamoemoe o lenei tagata tauleagaina i le onosa’ia o faigata ma puapuaga, i le fa’aalia o Fetalaiga Paia ma le faamaninoina o faailoga moni, e le o se isi lava mea, a e o le tapeina o le afi musaesae o le inoino ma le faatautee, ma talosia o tafa’ilagi o loto o tagata o le a faapupulaina e le malamalama o le fegalegalea’i ma taunuu atu ai i le filemu ma le toafimalie moni. Mai le nofoaga o le tafaoata o tapeleti Paia, o loo susulu mai i se malamalama tele le fetuao o lenei fetalaiga, ma e tatau i tagata uma o na taula’i atu i ai le latou vaai: Matou te apoapoa’i atu ia te outou, tagata e o le lalolagi, e usitaia mea e sii ai i luga lou tulaga. Taofi mau i le mata’u i le Atua ma tutumau i le faia o le mea sa’o. E moni Oute faapea atu, o le laulaufaiva e mo le ta’uta’uina o mea lelei, aua le faaeleeleaina i talanoaga lē lelei. Ua faamagaloina e le Atua taimi tuana’i. Mai le taimi nei aga’i i luma e tatau i tagata uma o na saunoa i upu e tatau ma talafeagai, ma aloaloese mai le tau faaleaga, agaleaga ma soo se mea lava e fai ma mafuaaga o faanoanoaga i tagata. E maualuga le faaneetaga o le tulaga o le tagata soifua! E le mamao tele atu i tua, o lenei Upu faaneeneeina sili sa tafe mai i le teuga’oa o le Matou Peni o le Mamalu: E silisiliese ma faamanuiaina lenei Aso le Aso o mea uma sa natia i loto o le tagata ua faaalia ma o le a faaalia faaaliali. E maualuga le faaneetaga o le tulaga o le tagata soifua, pe a ia taofi mau i le amiotonu ma le meamoni ma tūtūmau ma mauaa i le Fuataiga. I le Silafaga a le Alofa Mutimutivale Uma o le tagata moni e faapei o le lagi; o lona la ma le masina o lana vaaiga ma lana faalogo, a o ona uiga susulu ma le pupula o fetu ia. O Ia lava o le faaneetaga sili i lona tulaga, ma o lona aafiaga ua aoaoina ai le lalolagi o tagata soifua.

O agaga talitonugōfie uma lava i aso nei, ua latou manavaina le manogi puaina sasala o Ona lae’i ma le loto mama, ma faasaga atu i le Tafa’ilagi o le Mamalu Uma ua faitauina faatasi ma tagata o le malamalama i le Tusi o le Toto Ola. Pipii mau iai, o na o Lo’u Suafa, i le ipu o Lo’u Alofa Agalelei, inu lau inumaga o Lo’u Mamalu ma Lo’u Manatuaina lelei ma le matagofie.

Outou e o loo aumau i le lalolagi! O le tapua’iga a le Atua, e mo le alofa ma le aufaatasiga; aua le faia e avea ma mafuaaga o le inoino po o le fēitaga’i. I le vaai a tagata e loloto le tofa ma iloa manino atu ai le faaneeneeina silisili, o vaaiga mamao. O a lava ni faatinoga mana’omia mo le puipuiga ma le faalauiloaina o le fiafia ma le ola maloloina o fanau a le tagata, ua ma’ea o na faaalia mai e le Peni o le Mamalu. A o i latou valelea o le lalolagi, o loo faafaileleina e lagona ma manaoga leaga faaletino ma faatumau ai i le faatalale ma le le malamalama i le atamai silisiliese o Ia o Le o le meamoni o le Poto Uma, a o latou upu ma aga e faamaite mai e manatu leaga ma mafaufauga lē aoga.

Outou e o tagata alofagia ma le faatuatuaina a le Atua! O Tupu, o foliga vaaia o le malosi, ma o le vaipunaaso o le mana ma le tamaoaiga o le Atua. Tatalo mo i latou. Ua Ia tuuina atu ia i latou le puleaina o le lalolagi ma Ia tofiaina faapitoa le agaga o le tagata o Lana matafaioi lea.

O fetauaiga ma feteenaiga e matua’i sa taputapu i Lana Tusi. O le poloaiga lenei a le Atua o lenei Fa’aaliga Silisiliese ma le malosi. O loo malu puipuia e le agaga faalelagi mai le soloia ma faaleaogaina ma ua faaee atu iai e Ia le mana faapupulaina o Lana faamautuuga. E moni, o Ia o le Silafia Uma o le Poto Uma.

E tatau i tagata uma lava o na fesoasoani atu ia i latou o punavaiaso o ta’ita’iga ma le faapogai o poloaiga ma ua faapaleina i le palealii o le aiā tutusa ma le amiotonu. Amuia e i le vaega o le Tulafono Pulea ma e i le vaega aoaoina i le faatasiga a tagata o le Malamalama. O i latou o Au auauna faatuatuaina i le faatasiga o Au auauna ma o faifaaaliga o Au poloaiga i le lotolotoi o O’u tagata. Ia oo atu ia i latou Lo’u Mamalu, La’u faamanuia ma Lo’u Alofa Tunoa lea ua faasopolia ai le lalolagi o tagata soifua. I lenei sootaga o malelega ua faaalia mai i le Kitab-i-Aqdas (Tusi Tulafono) o loo iai i se tulaga sili, faapea, e mai le tafa’ilagi o a latou saunoaga, o le lamepa o le Alofa Tunoa faalelagi o loo susulu atu i se malamalama tele ma le pupula.

Outou e o O’u lala! O se malosiaga maoa’e tele, ma o se mana silisiliese o loo natiaina i le lalolagi o tagata soifua. Ia tepa taula’i iai lau vaai, vaai ma le toto’a i Lona mana aave e ta’ita’i ai tagata i le aufaatasiga, ae le o feeseeseaiga e tula’i mai ai.

O le Mavaega a le Faimavaega Paia Silisili e faapenei: Ua faatatauina mo i latou o Aghsan (aiga o Baha’u’llah) ma Afnan (aiga o le Bab) ma A’u auauna e faasaga atu taitoatasi po o i latou uma, le latou vaai i lenei Lala Malosi ma Silisiliese. Manatunatu i tusitusiga sa Matou faaalia i la Matou Tusi e Silisili ona Paia: “Pe a ua pe le tai o le vasa o Lo’u Faatasi mai ma tapunia le Tusi o La’u Faaaliga, liliu atu le tou vaai aga’i ia te Ia o Le na Finagalo iai le Atua, o Le na tupuga mai i lenei A’a mai Anamua.” O le a’ano tonu lava o nei Upu Paia, ua le mo se isi, a o le Lala Malosi tele silisiliese (Abdul-Baha). O lea ua Matou faaalia atu ai ia te outou i le agaga Alofa Tunoa le Matou Mavaega mamana ma e moni o ‘Au o le Alofa Tunoa o le Foa’ialofa Uma. E moni ua tofia e le Atua le tulaga faaeaea o le Lala silisili (Muhammad Ali) i na ia i lalo o le Lala Malosi tele Silisiliese (Abdul-Baha). O Ia, i le mea moni o le Faauuina o le Poto Uma. Ua Matou filifiliina “o le Silisili” e mulimuli mai “i le matua’i Silisiliese Silisili “e pei o na poloaina mai e Ia o Le o le Silafia Uma, o le Iloa Uma.

Ua faatonuina mai tagata uma ina ia faaalia le alofa aga’i atu i Aghsan, a e le’i tuuina atu e le Atua ia i latou le aia i oloatotino a isi tagata.

Outou e o O’u Aghsan, o O’u Afnan ma O’u Aiga! Matou te apoapoa’i atu ia outou matata’u i le Atua, ia faatino galuega lelei, ma faia mea e talafeagai ma aoga, ma auaunaga e faaneeneeina ai lou tulaga faaeaea. E moni oute faiatu, o le mata’u i le Atua o se poloaiga silisili, e mafai o na maua ai e le Fuataiga a le Atua le manumalo, ma o gaioiga lelei e talafeagai ma fesoota’i lelei ma lenei poloaiga e tumau pea lea o uiga tausaafia ma le mama ma auaunaga lelei.

Fai atu: Auauna e! Ia lē avea le faatulagaina mai o faatonuga ma afua’aga o le feeseesea’i, ma le gaioiga o le tuufaatasi o se feiloaiga mo finauga. Matou te talosia ma faamoemoe o tagata o Baha e ta’ita’iina e le upu faapaiaina: “Fai atu: O mea uma lava e a le Atua ia.” O lenei saunoaga faaneeneeina ua faapei o ni vai e fui ai le afi o le mataita ma le inoino lea e ola malala i totonu o fatu ma loto o tagata. O na o lea saunoaga e tasi o tagata finafinau ma o latou auaiga o le a taunu’u i le malamalama o le aufaatasiga moni. E moni o Ia e fetalai i le mea moni ma ta’ita’ia le ala. O Ia o le Malosi Uma, o le Faaneetaga, o le Alofa Tunoa.

Ua fa’atatauina i tagata uma o na fa’aalia le fa’aaloalo tele i Aghsan, ma ia manatua ma tautuana i latou. O le a mamalu ma viia ai le Fuataiga a le Atua ma faaneeneeina ai Lana Upu. O lenei faatonuga aloaia i lea taimi sa ta’uta’u ma faamauina i totonu o Tusitusiga Paia. Amuia, Ia lea e mafai o na ausia le mea na faapoloaina mai mo Ia e le Faitofiga, o le Vavau o Aso. E fautuaina pea lava pea outou ia ava ma faaaloalo i sui o le Aiga Paia, o Afnan ma auaiga. Matou te toe fautuaina outou e tautua mo atunuu uma ma taumafai pea mo le lelei o le lalolagi.

O le mea sa faatatauina mo le toe afuafua ma le atina’eina o le lalolagi, ma le toe faaolatia o tagata ma ona uso a tagata o le lalolagi sa auina mai i lalo nei mai le lagi o Fanoga a Ia lea o le Mana’oga o le lalolagi. Ua’i mai tou taliga fiafa’alogo i le fautuaga a le Peni Mamalu. E sili atu lenei mea mo Oe na i lo o mea uma i le lalolagi. O mea uma nei e molimau i ai La’u Tusi Mamalu ma le Matagofie Lelei atoatoa.