(Kini nga Tabla pagabasahon sa mga Balaang Dapit ni Bahá'u'lláh ug sa Báb. Kanunay usab kining basahon sa pagsaulog sa Ilang mga kasumaran)

Ang pagdalayeg nga mibanagbanag gikan sa Imong labawng halangdong Kaugalingon, ug ang himaya nga midan-ag gikan sa Imong labawng magilakong Katahum, mahianha Kanimo, O Ikaw nga Mao ang Pagpadayag sa Kahalangdon, ug ang Hari sa Kahangturan, ug ang Ginoo sa tanan nga anaa sa langit ug yuta! Saksihan ko nga pinaagi Kanimo ang labawng kamandoan sa Diyos ug ang Iyang gingharian, ug ang kahalangdon sa Diyos ug ang Iyang pagkadungganan gipadayag ug ang mga Bitoon sa Kabuntagon sa karaang kasilak nanagsabwag sa ilang sidlak diha sa langit sa Imong walay kausabang sugo, ug ang Katahum sa Dili Makita misubang ibabaw sa kapunawpunawan sa kabinuhatan. Saksihan ko, usab, nga sa usa ka lihok sa Imong Pluma ang Imong sugo nga “Magpadayag Ka” gipatuman, ug ang tagong Linilong sa Diyos nabutyag, ug ang tanang binuhat nahatagan na ug kinaiyahan, ug ang tanang Pagpadayag napakunsad na.

Saksihan ko, usab, nga pinaagi sa Imong katahum ang katahum sa Usang Gisimba nabuksan na sa tabil, ug pinaagi sa Imong nawong ang nawong sa Usang Gitinguha napadan-ag na, ug nga pinaagi sa usa ka pulong gikan Kanimo Ikaw naghukom sa tanang linalang, mitugot kanilang maunongon Kanimo nga mosaka ngadto sa kinatumyan sa himaya, ug sa mga walay pagtuo nga mahulog ngadto sa kinaubsang bung-aw.

Saksihan ko nga siya nga nakaila Kanimo nakaila sa Diyos, ug siya nga nakadangat sa Imong atubangan nakadangat sa atubangan sa Diyos. Busa, dakong kabulahan ang maanaa kaniyang mituo Kanimo, ug sa Imong mga ilhanan, ug nga nagpaubos sa iyang kaugalingon sa atubangan sa Imong kaharian, ug napasidunggan sa pag-atubang Kanimo, ug nakakab-ot sa kahimuot sa Imong pagbuot, ug nakalibot Kanimo, ug nakabarog atubangan sa Imong trono. Pagkaalaot niyang mibatok Kanimo, ug midumili Kanimo, ug misalikway sa Imong mga timaan, ug misupak sa Imong labaw’ng kamando-an, ug mialsa batok Kanimo, ug nahimong mapagarbohon atubangan sa Imong nawong, ug mipanghimakak sa Imong mga kalig-unan, ug mibiya sa Imong lagda ug sa Imong gingharian, ug maihap uban kanilang mga mabudhion kansang mga ngalan gipatik na sa mga tudlo sa Imong pagmando diha sa Imong mga balaang Tabla.

Ihuyop, gilayon, ngari kanako, O akong Diyos ug akong Hinigugma, gikan sa toong kamot sa Imong kalooy ug Imong mahigugmaong kalolot, ang mga balaang ginhawa sa Imong mga panabang, aron makapadpad kini kanako palayo sa akong kaugalingon ug gikan niining kalibutan ngadto sa mga hawanan sa Imong pagkahaduol ug Imong atubangan. Gamhanan Ka nga mobuhat niadtong makapahimuot Kanimo. Ikaw, sa pagkamatuod, sa kaniadto pa gamhanan ibabaw sa tanang butang.

Ang paghandum sa Diyos ug ang Iyang pagdalayeg, ug ang himaya sa Diyos ug Iyang kasilak, mahianha Kanimo, O Ikaw nga Mao ang Iyang Katahum! Saksihan ko nga ang mata sa kabinuhatan wala pa makasud-ong ug usang gibutangbutangan ug kasal-anan sama Kanimo. Ikaw nagtidlum sa tanang adlaw sa Imong kinabuhi ilalom sa lawod sa mga katalagman. Sa usa ka higayon Ikaw gikadenahan ug gipusasan; sa laing higayon Ikaw gihulga sa espada sa Imong mga kaaway. Apan bisan pa niining tanan Ikaw nagmando sa tanang katawhan sa pagsunod sa mga sugo nga gihatag nganha Kanimo gikan Kaniya nga Mao ang Labing Nasayod, ang Labing-Maalam.

Hinaot unta nga ang akong espiritu mamahimong bugti sa mga kasaypanan nga Imong giantos, ug ang akong kalag mamahimong tubus sa mga kalisdanan nga Imong gisagubang. Nangamuyo ako sa Diyos, pinaagi Kanimo ug pinaagi kanila kansang mga dagway nalamdagan sa mga silaw sa kahayag sa Imong panagway, ug kinsa, tungod sa gugma alang Kanimo, nagatuman sa tanan nga gisugo ngadto kanila, sa pagkuha sa mga belo nga nanagtabil tali Kanimo ug sa Imong mga binuhat, ug sa pagsangkap kanako sa mga kaayohan niining kalibutan ug sa umaabot nga kalibutan. Ikaw,sa pagkamatuod, ang Labawng Makagagahum, ang Labing Dalayegon, ang Mahimaya-on sa Tanan, ang Tugob nga Mopasaylo, ang Labing Maloloy-on.

Panalanginan Mo, O Ginoo akong Diyos, ang Balaang Kahoy nga Lote ug ang iyang kadahonan, ug iyang mga punoan, ug iyang kasangahan, ug iyang mga lindog, ug iyang mga salingsing, samtang ang Imong labing bililhong mga ngalan magpabilin ug ang Imong labing halangdong mga hiyas molungtad. Panalipdi kini, gilayon, gikan sa pagpanamastamas sa mga mag-aasdang ug sa kasundalohan sa pagpanlupig. Ikaw, sa pagkamatuod, ang Labawng Makagagahum ang Labing Kusgan. Panalanginan Mo usab, O Ginoo akong Diyos, ang Imong mga lalaki ug babayeng alagad nga nakadangat nganha Kanimo. Ikaw, sa pagkamatuod, mao ang Labawng Mahatagon, kansang pagtuga walay kinutuban. Wala nay laing Diyos gawas Kanimo, ang kanunayng Mapasayloon, ang Labing Manggihatagon.

- Bahá'u'lláh