Unnersiutigaakkit, Guutiga-aa, sininnit itertikkamma, qimagusimaninnillu sassarteqqikkamma aanngaasimaninnillu kingumut eqeertikkamma. Ullaaq manna iterpunga kiinara Illit Saqqummernerpit Ulluata ulloriaanut akisuguttumut saatillugu, tassuunami pissaaneqarnerpit ataqqinassutsivillu qilai qaammarsimapput, Illit nalunaaqqutitit Atuagaatinnullu upperneq misiutiginagu, taamaanneranilu uanga Illit qilerutit tigulluarsimavara.

Qinnuigaakkit Piumassutsivit siunertarisannilu pissaanerup ajugaagajuttup sininninni sinnattukkut Takutitatit aallaavigalugit pilersissagitit asanninnerpit initaasa tunngavii isumannaannerpaat, asasavit uummataasa iluiniittut, Illillu saammaanninnut paaqqinninnernullu asannittumut uppernarsaatit saqqummissutissaanut sakkussat pitsaanerpaat. Uannut aalajangeruk Allaatit nersornarnerpaaq atorlugu, Naalagara-aa, nunarsuarmi maani tulliuttumilu ajunngitsoq.

Uppernarsarpara suut tamarmik Illit assanniittut. Piumasat malillugu allanngortittarpatit. Guutiusoqanngilaq Illit peqartinnak, Nakuusoq, taanna Aalajaatsoq, Illit tassaavutit Taanna, naalakkiinermigut nikanarsagaanermik ataqqinartunngortitsisoq, nukillaanganermik nakuusunngortitsisoq, pissaaneqannginnermik pissaaneqalersitsisoq, annilaanganermik eqqissisitsisoq qularnermiillu ilisimannilersitsisoq. Guuteqanngilaq, taamaallaat Illit, taanna Pissaaneqarnerpaaq, Ajunngitsuliortuusoq.

Kinaluunniit Ilinnik ujarlersoq pakatsisinngilat Ilinnillu kajungerinnittoq kinaluunniit Ilinnit ajattunngilat. Uannut aalajangeruk tukkussutsivit qilaata saammaassutsivillu imaata ileqqussarititai. Ilumoortumimmi tassaavutit tamanit Sapinnginnerpaaq, tamanit Pissaaneqarnerpaaq.

- Bahá'u'lláh