"Ullut tamaasa pinngitsoorani qinnutigisartakkat allallu immikkut ittut, soorlu Ajorunnaarnissamut Qinnut, Ahmad-imut allakkat, Bahá’u’lláh-mit immikkut pissaanermik pingaassutsimillu tunineqarsimapput, taamatullu akuerineqassallutik uppertunillu tatiginninnermik uppernermillu miserratigineqarsinnaanngitsumik pilimmik atuarneqartassallutik. Taamaalillutik taakku aqqutigalugit Guutimut qaninnerusumik atassuteqarniassagamik, inatsisai maleruaqqusaalu suussusaasigut annerusumik paasinnilluarnerussammata." – Allakkamit Shoghi Effendi sinnerlugu allatamit tigusaq

Kunngiuvoq Arajutsisimasaqanngitsoq, Ilisimasoq. Tusariarsiuk Paratiisimi Unnuariannguaq Naassaanngitsup Orpiata avalequtaanit qarlortoq. Erinnat iluartut tusarnersullu atorlugit inunnut ilumoortunut Guutip qanissusianik nalunaarutit nuannersut nassuiaatigai inuillu Guutip ataasiussusianik upperisaqartut qaaqqullugit Ajunngisaarumatungaartup najugaata silarlianukaqqullugit, inuillu taassuma silataaniittut nalunaarfigalugit nalunaarummik Guutimit saqqummiunneqarsimasumit, Kunngimit, Nuannersumit, Asseqanngitsumit, inuillu Guutimik asannittut ingerlatissallugit iluarsutsip issiavianut taassumalu Kusanangaassusianut.

Ilumut tamannaavoq Kusanassuseq Annerpaaq Oqariartortitaasimasut Atuagaataanni siulittuutigineqarsimasoq, taannalu aqqutigalugu ilumoorneq tammarsimanermit immikkoortinneqartussaasoq oqariartuutillu tamarmik ilisimassusiat misilinneqartussaalluni. Ilumut, Taannaavoq Inuunerup Orpia Guutimit pisunik paarnaqartoq, Qutsinnerpaaq, Pingaartorsuaq, Angisooq.

Ahmad-iaa! Illit uppernarsaasuugit ilumut Taanna Guutiusoq, allamillu Taannaanngitsumik Guuteqanngitsoq, Kunngiusoq, Illersuisoq, Asseqanngitsoq, Pingaartorsuaq, angullu Aallartissimasaa ’Ali-mik ateqartoq (iluartoq Báb) tassaasoq Guutimit Aallartitaq Ilumoortoq Ataasiusoq, tamatta maleruartariaqakkatsinnik nalunaaruteqartoq.

Oqarit: Inuit-aa, Guutip aalajangersagaanut naalanniaritsi, soorlumi Bayán-imi Taassuminnga Kusanartumit Ilisimasumillu taama piumasarineqartoq. Ilumut Aallartitaasarsimasunit tamanit Annerpaavoq, Atuagaalu tassa Pileqqaarnerata Atuagaa, qanortoq tamanna ilisimaannalerisiuk.

Taamatut parnaarussivimmit maanngaanniit ilinnut Nalunaarummini Unnuariannguaq nalunaaruteqarpoq. Nalunaarut erseqqissoq kisiat taanna Nalunaarutigisussaavaa. Kialluunniit piumaguni ilitsersuut taanna tunuinnarsinnaavaa, kialluunniillu piumaguni aqqut Naalakkaminut ingerlasoq qinerumaarpaa.

Inuit-aa, allassimaffiit taakku upperiumanngikkussigik, taava qanoq iliorlusi uppernarsarsinnaavisiuk Guuti upperalugu? Inuit pisuusaartusi, uppernarsaammik saqqummiussigitsi.

Naamik, Assaap tarnima qasuerserfigisaata ilisimavaa taamaanngitsut taamaasinaviaratillu imminnut ikioqatigiillutik kattussimagaluarunilluunniit.

Ahmad-iaa! Ajunngisaartarsimanikka peqartinnanga puigorniaqinagit. Inuutillutit Uannik eqqaamasatit pigiuaannarniakkit eqqaamajullu Aliasungaassusera maanngalu avinngarusimaqisumut Parnaarunneqarsimanera. Taamaattumik Uanga asanninnera iluaqutigalugu aalajaatsuuniarit, uummatikkut qulalertarnak akeqqat pannaminnik anaaleraluarpatsilluunniit, qilaallu tamarmik nunarsuarlu tamarmi ilinnut akerliullutik nikuikkaluarpataluunniit.

Akeqqannut qanortoq innertut ikumasutut ikkina inunnullu Asasannut inuunerup naassaanngitsup sarfaatut illutit, inunnullu qulartunut akulerunniaqinak.

Aqqutikkut ingerlatillutit atugarliortitaaleruit Uangaluunniit Pillunga nikanarsagaaleruit erloqissutiginiaqinagit. Guuti tatiginiaruk, illit Guutigisat siuaasavillu Naalagaat. Inuit-uku tammarsimanerup aqqutaatigut ingerlalersimasut, namminneq isiminnik Guutimik takunninnissaminnik piiaaffigineqarsimasut Guutilluunniit Nipaanik tusarnersumik namminneq siutiminnik tusarsinnaajunnaarsimasut. Taamatut itsillugit inuit Nassaarisimavagut, soorlumi illit tamanna uppernarsarsinnaagit.

Upperisapiloqassusiat taamaasilluni uummataannut assiussimavoq taamalu aqqusinermik Guutimut atanilimmik nanisinissaraluannik akornusersimallugit, Guuti taanna Akitsisitaasimasoq, Pingaartorsuaq.

Ilinni qularutiginiaqinagu inuk Kusanassutsimik tamatuminnga tunutsisoq aamma qangarsuarli Aallartitaasarsimasunik tunutsisuummat aammalu naassaanngitsumit naassaanngitsumullu Guutimut anneruniartunngorsimalluni.

Ahmad-iaa, Allakkat uku ilikkarluarniarniakkit. Inuutillutit oqaatigisarniakkit, taamaasiornissallu unitsinnaveersaariuk. Ilami ilumoorluinnarpoq Guutip aalajangersimammagu inuk tamatuminnga saqqummiussisoq upperisartik pillugu toqutaasut untritillit akissarsiassaattut angitigisumik akilerneqarumaartoq silarsuarnilu marluusuni tamani tapersersorneqarumaarluni. Ajunngequtinik tamakkuninnga Tunisimavatsigik Uagut tungitsinnit ajunngisaarutitut, Taamaasiorsimavugullu pissutigalugu qujaniartut akornanniittariaqaravit.

Guuti pillugu! Kialluunniit ajorsaateqangaartup aliasuuteqartulluunniit ilumoorluinnartumik uummateqarluni Allakkat uku atuarpagit, taava Guutip aliasuutaanik oqilisaatissavaa, ajornartorsiutaarutitillugu anniaataalu peersillugit.

Ilumut, Taanna Naakkinnittuuvoq, Misiginneqataasoq. Guuti naalannarsili, silarsuarnut tamanut Naalagaasoq.

- Bahá'u'lláh