Ullut makku, Guutiga-aa, tassaapput Illit kiffannut peqqusinikkut iisinnginniarnermik maleruaaffigeqqusatit. Taakku aqqutigalugit Illit Inatsisivit Atuagaata aallaqqaasernera pinnersarpat, Illit pinngortitannut saqqummersillugu, aammalu Illit Peqqusavit Erlinnartuusivii qulaarpatit kikkunnut tamanut Illit qilanniittunut tamanullu Illit nunanniittunut. Ulluni taakkunani nalunaaquttap akunneri tamaasa piginnaassutsinik immikkut ittunik pilersorsimavatit, tamanit paasissaanngitsunit taamaallaat Ilinnit, ilisimassutsivimmi suut tamaasa imarimmagit. Aammattaaq tarningit tamaasa nukiup taassuma ilaanik tuniorarsimavatit Illit Inatsisitit pillugit Allakkat aqqutigalugu aammalu Eqqartuussinerpit tunuartinneqarsinnaanngitsup Allagaatai tunaartaralugit. Atuakkat Allakkallu taakku qupperneri tamaasa Illit nunarsuarmi inuiannut kinguaariinnullu pigititassanngortissimavatit.

Asasatit Ilinnut tunniusimasut Inatsisit tunaartaralugu ullaanngulernerit tamaasa pisassaqartissimavatit Eqqaaneqaatissavit imertarfianik, Illit-aa naalagaasunut tamanut Naalagaasoq! Ilaqarput Illit ilisimassutsivit angissusianik ima tiguartisimatigisunik allaat Illit nersorneqarnissannik piginnaassutsinnillu unnersiutiginninnissamik kipisanermik siniffitik asiginnarsimallugit aammalu sinimmit qimaasimapput Illit najuinerit qanillattorniarlugu pilerinermit tukkussutsinnillu pissarseqataarusunnermit. Isaat tamatigut Illit asanninnerpit isumassuinerata ullaakkut qaalerneranut qaqugukkulluunniit sammiuarsimapput, kiinaallu Illit isumassarsisitsinerpit puilasuanut sammiuarsimallutik. Taamaammat uagut tamakkulu Illit nallittuissutsivit nuiaanit tukkussutsivit saammaannerpillu qilaanit pisunik naleqquttunik siallerfigitigut.

Unnersiutigisaali Aqqit, Guutiga-aa! Manna tassa nalunaaquttap akunnera Illit pinngortitavit kiinaannut Tukkussutsivit matuinik ammaaffiit aammalu Nallittuinerpit saamasup isaaffiinik Illit nunaatinni najugalinnut tamanut qiverluarlugit mappiinerit. Qinnuigaakkit Illit aqqutinni aamminnik kuisisutigut Ilinnut eriningaarnerminni pinngortitannut sumulluunniit attavimminnut qilerussaartutigut, aammalu Illit isumassarsisitsinerpit tipigissuanik naamajuminartumik ima killinneqartigisutigut allaat uinimminni avatit tamaasa atorlugit Ilinnik unnersiutiginnittutigut Illillu eqqaamaneqaatinnik sajulersutigut, Saqqummersitami matumani allanngujuitsumik aalajangersakkat tunniunnaveersaaqqunagu - Saqqummersitaq ima kimeqartigisoq allaat orpiit tamaasa Orpikkap Ikumasup Mosesimut, Ilinnik oqaloqateqartumut, oqaluuserisaanik torlulaartunngortillugit, Saqqummersitaq ujaraarannguanik sunilluunniit kingumut Ilinnik unnersiutiginnissummik akisuatitsilersoq, soorlumi ujaqqat Illit illernartikkaatsit Muhamedip, ikinngutivit, nalaani.

Makku tassaapput, Guutiga-aa, Illit saammaannikkut Ilinnik peqatiginnitsissimasatit Taassuminngalu Illit Nammineq Saqqummerninnik oqaloqatiginnitsillugit. Illit piumasavit anoraasa ungasissunut siammartissimavai, Illit ininnut kisivit oqartussaaffigisannut isertissimallugit. Maanna Illit isumassuinerpit kunngeqarfiata qilaata alannguani najugaqartunngortereerakkit, taava ikiukkit killiffimmut taama qaffasitsigisumut pinerannut naleqquttumik angusaqaqqullugit. Ima peqinatik, Naalagara-aa, Ilinnut qanillisimanerminnik nuannaaruteqartussaaniaraluarlutik naatsorsuutaanatik Illit kiinnannik ilisarsinissamut pitsaaliukkat aammalu Ilinnik naapitsigaluarlutik Illit najuininnik piiagaasimasut.

Uku tassa Illit kiffatit, Naalagara-aa, Illit peqatigalutit Parnaarussivimmut Annerpaamut uunga isersimasut, taassumalu qarmaasa iluini iisinnginniarnermik asiginnaasimanngitsut Illit inatsisit pillugu Allakkami aammalu Peqqusavit Atuagaani peqqusisimanitit najoqqutaralugit. Taamaattumik nassikkit sunut tamanut Illit iluarinngisannut sukumiisumik eqqiaatissaannik, Ilinnut tunniusimalluinnaqqullugit sunullu tamanut Illiunngitsumut qilerussaarsimaleqqullugit. Taamatuttaaq siallerfigitigut, Guutiga-aa, Illit saammaanninnut naammattumik Illillu tukkussutsinnut naleqquttumik. Ilinnik taava, Guutiga-aa, eqqaamattuinnartilluta inuutitsigut, Ilinnullu asannilluta toqutitsigut, pilersortigullu Illit najuinerpit tunissutaanik Illit silarsuanniittunik - silarsuanni allanut tamanut, taamaallaat Ilinnit, paasissaanngitsuni. Illit tassaavutit uagut Naalagarput, silarsuillu tamarmik Naalagaat, tamanullu qilammiittunut nunamiittunullu Guutiusoq.

Isigivatit, Guutiga-aa, Illit ullunni Illit asasatit qanoq nalaataqarsimasut. Naalannassutsit uppernarsaasigaara! Toqqakkavit maalaarutaasa nipaat Illit naalagaaffinnik aqqusaarisimavoq. Ilaat Illit nunanni uppiitsunit tigusaasimapput Ilinnullu qanillinissaminni akornusigaasimallutik aammalu Illit naalannassutsivit inaanut anngutinngitsoorsimallutik. Allat Ilinnut qanillisarnissaminnut periarfissaqaraluarput, kisiannili Kiinnat takunaveersaarsimavaat. Suli allat Ilinnik takunninniarnermit, Illit ininnut kisivit oqartussaaffigisannut appakaannissamut akuerineqarsimapput, kisiannili Illit pinngortitavit asuleerutaannut eqqunngitsuliuutaannullu paasiuminaatsuliuutit Illit innuttanni naqisimannittunit pigisaasut pinerluutigigamikkik taakkua Illillu akornassinnut pipput.

Manna tassa nalunaaquttap akunnera, Naalagara-aa, Illit nalunaaquttap akunnerinut allanut tamanut qaangiisissimasat Illillu pinngortitanni toqqagaalluarnerpaanut atatissimasat. Qinnuigaakkit, Guutiga-aa, Ilikkut Namminikkut taakkunatigullu, ukiunni matumani Illit asasavit ataqqinarsisitaanissaannut peqqussusioqqullutit. Aammalu ilanngullugu aalajangeruk ukiumi matumani tamanna Illit pissaanerpit Ulluata ulloriaa Illit naalannassutsivit killingusaata qulaagut ersarissumik qinngornissaa aammalu Illit kisimiivillutit pissaaneqarsutsikkut silarsuaq tamaat qaammarsaqqullugu.

Siunertat ajugaagajuttunngortiguk, Naalagara-aa, Illillu akeqqatit nikanartikkit. Taavami inuunermi maani inuunermilu aggersumi ajunngitsoq uatsinnut allaguk. Illit tassaavutit Sallusuissut, pinik isertortunik ilisimasoq. Guuteqanngilaq taamaallaalli Illit, taanna Soraajuitsumik Isumakkeerfiginnittoq, taanna Tamanik Tukkortoq.

- Bahá'u'lláh