Ataqqinartitaagit Illit, Naalagaq Guutiga-aa! Makku tassaapput ullut Illit inunnut tamanut iisinnginniarfissatut peqqusatit, taamaaliornermikkut tarnitik eqqiarniassammatigik, atassuteqarnernullu sunulluunniit Illiunngitsunut qilerussaarniassammata, aammalu taakkua uummataannit pilerniassammat Illit ataqqinassutsivit inaanut naleqquttoq aammalu Illit saqqummernerpit ataasiussusiata issiavianut iluarinartoq. Tunniuguk, Naalagara-aa iisinnginniarnerup matuma imermik inuunartumik kuulluarnissaa, aammalu ileqqorissaarutit Illit taassuminnga pisuunngortitsinerisavit saqqummersinnissaat.Taassuma ikiuutissaatigut eqqiakkit Illit kiffavit uummataat, taakku silarsuarmi ajortunit Illit Aterpit, tamanit illernarnerpaasup, alarnissaanut akornusigaanngitsoorsimasut, aammalu Illit nalunaaqqutinnik ajalusoornarnerpaanik, Illit saqqummernerpit takkunneranik malittaasunik Illit Naalagaffinnik, Pissaaninnik, Ataqqinassutsinnik Illernassutsinnillu peqatiginnilersissimasannik, upperisaqanngitsut nipiliornersuinit eqqissiviinnerinillu sunnigaanngitsoorsimasut. Makku tassa kiffatit, Illit qaaqqusinerit tusarniariarlugu Illit nallittuissutsinnut tuaviinnaq aggersut aammalu silarsuup matuma allanngornerinik nalaatsornerinillu imaluunniit inuit killilersuutigisaannit unitsitaasimanngitsut.

Uanga tassaavunga, Guutiga-aa, Illit ataasiussutsinnik uppernarsaasoq, Illit pilimaniannginninnik akuersaartoq, Illit ataqqinassutsivit saqqummernerinut nikanartilluni sikiffiginnittoq, aammalu niaqqi sikisimasoq qaamanerup akisugunneranik, Illit illernassutsinnit nunamiorpalunngitsumit pisumik, ilisarsisoq. Illit upperaakkit, Naalagaaffippit Pissaanerpillu kimittussusiagut inuit isaannut saqqummersitat, uannut ilisaritikkakkuli. Tassunga saassimavunga, sunit tamanit, Illit tunissutivit ajunngisaarutivillu allunaasaanut aalajaallunga tigumminnitsillunga, kaanngarluinnarsimavunga. Tassuma sallusuiissutaa tigusimavara, sallusuissut inatsisini maleruaqqusanilu tupinnartuni tamani Tassunga nassiunneqarsimasoq. Ilinnut asanninnikkut iisinnginniarpunga Illit peqqusat eqqortillugu, iisinnginniarnerali kipisarlugu Illit nersornaatissat siggunni ikkaangat aammalu Illit iluarisat naapertorlugu. Naatsorsuutaalerseqinanga, Naalagara-aa, ulluunerani iisinnginniarsimasutut, unnunneranili Illit kiinnavit saanut sukataarnialersutut Illillu sallusuissutsinnik tunussisutut, Nalunaaqqutinnik qulalersutut, Uppernarsaatinnik akerliuniartutut 0qaatsinnillu equtitsisutut.

Isikka uisikkit, Naalagara-aa, Ilinnillu ujarlersut isaat, Illit nammineq isinnik ilisariniassagatsigit. Tamanna tassaavoq Illit peqqussutit Atuakkami Ilinnit Tassunga nassiussami uatsinnut tunniussaq, taanna Illit peqqusakkut toqqagaasoq, taanna pinngortitanut tamanut Illit iluarisannut toqqorsimasat, taanna Illit iluarisannik Illit naalagaaffinnik pisatsersorsimagit, aammalu taanna Illit imikkut salliutippat Illillu innuttannut Nalunaarutinnik oqariartortitat. Taamaattumik unnersiutigisaagit Illit, Guutiga-aa, tassa Illit saamaannikkut Taassuminnga uatsinnik miserratiginnikkunaarsikkatsigut, aammalu Tassunga nassiussaasimasut suut tamaasa akuersaaratsigit, aammalu ataqqinaammik tunisimagatsigut Ataasituap najuineranut, Illit Atuakkanni Allakkannilu neriorsuutigisimasakkut, angusaqartilluta.

Tassami isigaarma, Guutiga-aa, kiinara Ilinnut saatissimagiga aammalu aalajaallunga Illit saammaannikkut Isumassuinerpit Tukkussutsivillu allunaasaa tigummitillugu aammalu Illit nallittuissutsivit tukkussutsivillu saammaasup annoraavata mersornera aalajangiusimallugu. Aseroqinagu, qinnuigaakkit Illit, neriuutiga angusaqarnissamut tamanna Illit kiffannut aalajangiussat, kiffatit Illit inigisavit kisivit oqartussaaffippit tungaanut saassimasut aammalu Illit qanissutsivit illernartuanut aammalu Ilinnik asanninnermikkut iisinnginniarnermik naalassimasut. Nassuerutigaara, Guutiga-aa, suut tamarmik uannit pisut Illit naalagaaffinnut qinngaqqunnartuusut aammalu Illit ataqqinangaarsutsinnut inorsarluinnarlutik. Taamaattorli Atikkut, tassuunakkut Illit Nammineq taaguutivit qinngornerisa Saqqummernermi matumani pinngortitaasunut tamanut asseqanngitsumik akisuguttukkut, tassuunalu Illit Aterpit qaamanerpaap Kusanassusiata saqqummerfiatigut qinnuigaakkit, Illit nallittuissutsivit viinnianik immiseqqullunga, Saammaannerpillu ermanik qaammaarimmik Illit piumassutsivit talerpiagut kuuttumik, taamaalillunga isiginera Ilinnut sammitittuaqqullugu aammalu sunit tamanit taamaallaat Illit kisivit pinnak qilerussaagaaqqullunga, taamaalilluni silarsuaq suullu tamarmik tassani pinngortitaasut uannut ullortut soraajasutut, Illit pinngortissallugu soqutaassuseqartinngisattut isigisinnaaqqullugu.

Aammalu iluunngarlunga qinnuigaakkit, Guutiga-aa, Illit piumassutsivit qilaanit aammalu Illit nallittuissutsivit nuiaanit uagut unioqqutitsinitta tipersuanit eqqiarneqaatissatsinnik sialleqqullugu, Illit-aa, Illit Imminut Nallittuinerup Guutianik taasimasutit! Illit ilumut tassaavutit taanna Tamanit Pissaaneqarnerpaaq, taanna Tamanit Illernarnerpaaq, taanna Ajunngitsuliorumatooq.

Qimaateqinagu, Naalagara-aa, taanna ilinnik alarsisoq, aammalu Ininnit ungasissumut peerseqinagu taanna ilinnut qanillisimasoq. Illit saammaanninnik ajunngitsuliornernillu ujarlerluni kipisaqaluni assaminik aarlorsimalluni qinusup neriuutaa aseroqinagu, aammalu Kiffatit tunniusimasut Illit nallittuissutsivit saamasup misigittarnerpillu asanningaartup tupinnartuliaanik erliguuteqinagit. Isumakkeerfiginnittuuvutit Tamanillu Tukkornersaallutit Illit, Naalagara-aa! Pissaaneqarputit Illit kissaatit malillugu iliorsinnaallutit. Kikkut tamarmik, Illit kisivit pinnak, Pissaanerpit saqqummernerinut qanoq iliorsinnaanngillat, Illit pisuussutsinnut nalunaaqqutinut tamanut sapersipput, Illit naalagaaffippit qilammiusup saqqummernerinut assersuukkaanni suunngillat, aammalu Illit pissaanerpit nalunaaqqutannut uppernarsaataanullu sanilliunnerminni nukeerutitaalluinnarsimasuullutik. Sumik qimaaffissaqarpa Illiunngitsumik, Naalagara-aa, qinersinnaasannik, sumillu taliffissaqarpa tuaviorlunga ornissinnaasannik? Naagga, Illit pissaanerpit nukittussusia uppernarsaatigaara! Illiunngitsumik illersissaqanngilaq, Illiunngitsumik qimaaffissaqarani, Illiunngitsumillu toqqorterfissamik ujarlerfissaqarani. Ooqattaarlara, Naalagara-aa, Illit eqqaaneqaatissavit ataqqinarsisitaanissavillu tunguarninnera nunamiorpalunngitsoq. Illit pissaanikkut uppernarsaavunga! Kinaluunniit taassuma tunguarninneranik ooqattaarisoq silarsuarmut matumunnga taassumalu imaanik tamanik attaveqarnerminik iperaajumaarpoq, Illiunngitsumillu eqqaasaqarnissamut eqqiarneqarluni. Tarniga isumassarsisiguk, Guutiga-aa, Ilinnik eqqaaneqaammik tupinnartumik, Aqqit illernartinniassagakku. Illit Oqaatsinnik atuartumut tunissutinnik nassaanngitsumut naatsorsuutittut naatsorsuuteqinanga, tassammi imanneqarpoq tamanna Ilinnit peqqussutaasoq, aammalu Illit pinngortitavit tarninginik Illillu kiffavit uummataannik kingumut uummartitsisoq. Naatsorsuutinngali, Naalagara-aa, Illit nalinni tipigissumik tunguarnitsumik silaannarmi issimasumik ima aalaterneqarsimatigisutut, allaat inuunertik Ilinnut tunniussimallugu aammalu toqunissartik ornillugu isiginnaariartarfimmut tuaviinnaq ornigussimasumut Illit kusanassutsinnik isiginnaarnissamut kipisanermik aammalu Illit najuinissannik angusaqarumanermik ilungersuuteqarsimasunut. Aqqutaanilu kimit oqarfigineqarunik, "Sumut ingerlavisi?" oqarumaarput, "Guutimut, taanna Tamanik Piginnittoq, Ajornartorsiornermi Ikiorti, taanna Imminut Atatittoq!"

Unioqqutitsinerit Ilinnit alarsisunit piliarineqarsimasut aammalu Ilinnut imminnut angisuutissimasut, Ilinnik asanninnertik pinngitsoortissimanngilaat aammalu kiinnaminnik Ilinnut saatitsinngitsoorsimanngillat Illillu nallittuissutsinni killormut saassimanatik. Taakku tassaapput qutsinnerusumi Katersorsimasunit pilluaqqusaasut, Illoqarfiit soraassanngitsut innuttaannit illernartinneqartut, aammalu taakku niaquisa qaavini Illit allaatit ataqqinarsisitaanerpaaq allassimavoq: "Taakku Baháp innuttai. Taakkunatigut siulersuinerup akisugunnera aallartitaavoq." Taamaalilluni tamanna peqqussuteqarfigineqarsimavoq Illit inatsisinni Illillu piumassutsinni Inatsisivit allanngujuitsup Allagaani.

Taamaattumik nalunaarutigiuk, Guutiga-aa, taakkua angissusiat, angissuserlu taakkunani inuunerminni imaluunniit toquminni taakkuninnga kaaviiaarisimasuni. Pinngortitavit akornanni tamatuminnga naapertuilluartunut Illit aalajangikkannik pilersukkit. Pissaaneqarluarputit Illit suut tamaasa iluarsarsinnaallugit. Illiunngitsumik Guuteqanngilaq, taanna Ajugaqanngitsuusoq, Ajornartorsiorfimmi Ikiorti, Ajugaqanngitsoq, taanna Tamanit Tukkornerpaaq. Iisinnginniarnerput iisinnginniarnermit matumannga taamaateqinani, Naalagara-aa, angerutsillu angerusermi maani isumaqatigiissutigisimasatit aamma naamik. Ilinnut asanninnerput tunngavigalugu iliornivut tamaasa tigukkit aammalu Illit nuannaarnissat pillugu aammalu suut tamaasa iliuuserinngitsuukkavut kissaatigisavut ajortut kanngunartullu maleruutitiinnarsimammatigut. Illillu asanninninnik alarsinngisaannarnissarput aammalu Illit Iluarisat pitsaasoq piujuaannartiguk, Illersortigullu Ilinnut alarsisimasut tungaannit Illillu nalunaaqqutinnik kusanarnerpaamik tunuartitsisimasut pilersaarutipiluinit. Ilumummi Illit tassaavutit silarsuarmi maani tulliuttumilu Naalagaq. Allamik Guuteqanngilaq Ilinnik qaangiisimasumik, taanna Ataqqinarsisitaasoq, taanna Qutsinnerpaasoq.

Illernarsisigullu Illit, Naalagaq Guutiga-aa, Taanna tassaasoq Killiffik Siulleq, taanna Tupinnartuliaq Qilammiorpaluttoq, taanna Isseq Takuneqanngitsoq, Qilammiorpalussutsip Ullaanngulernera aammalu Illit Naalagaaffippit Saqqummernera, tassuuna qanga ilisimassuseq tamarmi siunissamilu ilisimassuseq tamarmi ersarissagaapput, tassuuna Illit ilisimassutsivit isertortup sapangai qulaajagaapput Illillu aterpit erligisaangaartup tupinnartuliaa ersersinneqarluni, tassami Illit Tassunga Siuliusussaq toqqarsimavat, taassuma aqqani naqinnerit

P I L E R I T katiterneqarsimapput peqatigiilersinneqarlutillu, tassuuna Illit ataqqinangaarsutsit, Illit naalagaaffiit Illillu pissaanerit ilisimaneqalerput, tassuuna Illit oqaatsitit nassiunneqarput aammalu Illit inatsisitit paasiuminartumik saqqummiussaallutik aammalu Illit nalunaaqqutitit siammarterluagaallutik, Illillu oqaatsit tunngavilerneqarluni, tassuuna Illit toqqakkavit uummataat tamanut qilammiittunut tamanullu nunamiittunut qulaarneqarput, katersorneqarpullu Illit taasimasanni 'Ali-Muhamedimik, Illit aterpit naalagaaffiiniittumi aammalu Anersaat akornanni Anersaamik taasanni Illit inatsisit utertinneqarsinnaanngitsoq pillugu Allakkaniittumi, Illillu nammineq taaguusiussannik tunisimasat, atiatigut aqqit allat tamarmik Illit inatsinikkut Illillu pissaanerpit kimittussusiagut, utersimapput, aammalu taassumani Illit piginnaassutsitit taaguutitillu tamaasa qanoq inerneqarlutik innissaat angullugu naammassisimavat. Taassuma aamma pigai aqqit Illit illernassutsinni ippinnaateqanngitsuni toqqorsimasut, Illit silarsuanni ersinngitsumi aammalu Illit illoqarfinni illernartitaasuni.

Ilanngullugillu illernarsakkit Taassuminnga, Taassumalu nalunaaqqutaanik upperinnittut, aammalu Tassunga, Illit ataasiussutsinnik Taassuma kingullerpaamik Saqqummerneranut akuerinnissimasut akornanni, Tassunga saassimasut Saqqummerneq Taassuma allakkamini, Atuakkiamini, Allaaserisamini, taallani tupinnartuni tamani aammalu oqaatsini erlinnartuutitut ittuni Tassunga nassiussaasimasuni, eqqartorsimasaa. Tamanna tassaavoq saqqummerneq taannarpiaq Illit angerusermik pilersitseqqullugu peqqusimasat, suli Nammineq angerusermik pilersitsinngikkallarnerani. Taanna tassaavoq Bayánip nersorneqaatissaanik unnersiutigisaa. Tassani nersornarsusia ataqqiniarneqarsimavoq, Sallusuissutaa tunngaviligaalluni, Naalagaaffia nalunaarutigineqarluni Siunertaalu naammassilluarneqarluni. Pilluaqqusaali inuk Tassunga saassimasoq Taassumalu peqqusaanut naalalluni, Illit-aa silarsuit Naalagaat tamanullu Ilinnik ilisarinnittunut Kajungerfigisaq.

Unnersiutigisaagit Illit, Guutiga-aa, Taanna miserratigiunnaarsillugulu asalersissimagakku. Taamaattumik Tassuuna tamakkunatigullu Illit Qilammiuussutsinnut Ullaanngulersutigut aammalu Naalagaaffippit Saqqummernerisigut, Saqqummernerpit Erlinnartuusiviisigut aammalu IIlit isumassarsisitsinerpit Toqqorsiviisigut qinnuigaakkit uatsinnik Tassunga kiffartortunngorteqqulluta naalattunngortillutalu, nukissatsinnillu tunisigut Taassuma Siunertaanik ikiuisunngoqqulluta Taassumalu akeraanik nungusaasunngoqqulluta.

Pissaaneqarputit Illit iluarisat malillugu iliuuseqarsinnaanissamut. Allamik Guuteqanngilaq Illit kisivit, Ajugaqanngitsoq, taanna Illernartoq, inunnit tamanit ikioqqusunit ujagaajuartoq!

- Bahá'u'lláh