(Naw-Rúz, marsip 20-at imaluunniit 21-at, tassaavoq Bahá’í-t ukiuata ulluisa siullersaat)

Unnersiutigineqarit Guutiga-aa, Naw-Rúz Ilinnut asanninnertik pillugu iisinngiffimmik maleruaasimasunut tamanillu Ilinnut naleqqutinngitsunit pinaveersaarsimasunut nalliuttorsiorfissatut atuutsilersimagakku. Naalagara-aa qanortoq, iisinngiffiup peqqusavit kingunerinik Asanninnerpit innerata kissarneratalu taakku Siunertanni ikikkiligit, Ilinnik unnersiutiginnittunngortillugit eqqaamannittunngortillugillu.

Iisinngiffiup peqqusavit pinnersaataanik pinnersarsimagakkit Naalagara-aa, Naakkinninnerit Tukkussutsillu aqqutigalugit Akuerinninnerpit pinnersaataanik pinnersakkit. Inuimmi qanoq iliorneri tamarmik Iluarinninninut Peqqussutinnullu atapput. Iisinngiffimmik kipisisimasoq kipisisimanngitsutut isigissagaluarukku, inuk taama ittoq qangarsuarniilli iisinngiffimmik kipisisimanngitsutut isigineqassagaluarpoq. Illillu aalajangissagaluarukku iisinngiffimmik maleruaasimasoq, maleruaasimanngitsutut, inuk taanna Saqqummernerpit uleruaanik pujoralammik simerterisimasut akornanniittutut isigineqalissagaluarpoq, Puilasullu uumanartup massuma imaanit qillarissunit ungasillisinneqarsimasutut ilissagaluarluni.

Tassaavutit "Illit Suliakkut Unnersiutigineqarit"-mik ilisarnaatip qullarneqarfia, "Illit Peqqussutsikkut Naalanneqarputit"-ip erfalasuata siaarneqarfia. Tunngaviit tamanna Illit kiffannut ilisimaneqartileruk Guutiga-aa, taamaalillutik suut tamarmik naammalluinnassusiat Illit Peqqusininnut Oqaatsinnullu atasuusutut ilisimalerniassammassuk, iliuutsillu suulluunniit pitsaassusaat Illit akuerinninninnut Piumassutsivillu iluarinninneranut tunngassuteqartoq, aammalu nalujunnaarniassammassuk Illit akuerinninnerpit Peqqussutivillu iluaniimmata inuit iliuusaat tamarmik. Tamassuminnga ilisimatikkit sumilluunniit Kusanassutsinnit mattusimatitaaleqqunagit, ulluni makkunani Kristusip ima nalunaajaaffiini: "Naalagaaffik tamarmi Ilinniippoq, Illit-aa Anersaamik (Jesusimik) aallaaviusoq", Ikinngutivit (Muuamaap) ima torlulaffiani, "Naalannarsinneqarit, Illit-aa tamanit Asaneqarnerpaasutit, Kusanassutsit saqqummersimagakku, Toqqakkannullu peqqusimagakku Ativit tamanit Anginersaasup saqqummerfiata issiavianut annguffissaq, taanna aqqutigalugu inuit tamarmik kappialasimapput taamaallaat tamanut Illiunngitsumit tunussimasut Taassumunngalu, Illit Saqqummerfinnut, Piginnaassutsivillu Erserfianut, saassimasut kisimik pinnatik".

Taanna, tassaasoq Avalequtit Illillu ilagisatit Naalagara-aa, ullumi maani iisinngiffitsik kipisimavaat Najukkavit eqqaamiuiniissimallutik Ilinnillu nuannaartitsisinissaminnik ilungersoreersimallutik. Taamaammat Tassunga taakkununngalu, aammattaaq ulluni makkunani Ilinnut qanillisimasunut Atuakkanni aalajangeriikkatit ajunngitsut tamaasa tunniutikkit. Pilersukkillu taava inuunermi maani inuunerullu tulliani iluaqutissaannik.

Illit ilumut Tassaavutit Tamanik Ilisimannittoq, Tamanut Sianisoq.

- Bahá'u'lláh