O i Kemuni na Kalou! Na noqu Kalou! O i keimami na Nomuni tamata ka vakanamata e na vakarokoroko ki na Nomuni Serau Tabu, keimami sa kaliraki keimami tani mai e na veika kece sara ka vakavo ga O i Kemuni e na Siga taleitaki e daidai. Keimami soqoni vata mai e na Soqoni Vakayalo oqo, duavata na neimami nanuma kei na vakasama, ka lomavata e na i naki me vakacerecerei na Nomuni Vosa e na kedra maliwa na tamata. Oi Kemuni na Turaga, na neimami Kalou! Ni buli keimami me keimami i vakatakilakila ni Nomuni Veituberi Lagilagi, na i Vakatakarakara ni Nomuni Vakabauta cecere e na kedra maliwa na tamata, i talai ki na Nomuni Lawa Cecere. O i Kemuni na neimami Turaga uasivi duadua ka i vakaraitaki ni Nomuni Duavata vaKalou e na Nomuni Matanitu Vakalomalagi, ka kalokalo serau e cilava na veiyasana kece ga. Turaga! Ni vukei keimami me keimami biau yavavala e na ua ni Nomuni loloma uasivi, uciwai drodro mai na Nomuni Vu ni lagilagi cecekia, kau vuata vivinaka ni Vunikau ni Nomuni Cakacaka vakalomalagi, loganikau veisuayaki e na liwa ni cagi ni Nomuni Sautu e na Nomuni Loga ni Vaini vakalomalagi. Isa Turaga! Ni bulia na yalo i keimami me vakararavi vakatabakidua ki na Wase ni Nomuni Duavata vaKalou, me marautaka na uto i keimami na kena sovaraki yani kina na Nomuni Loloma, ka me keimami lomavata me vaka na ua ni wasawasa ni dua na waitui ka me keimami cokovata kina me vaka na rarama ni Nomuni i Serau lagilagi, ka me rawa kina e na neimami vakasama, na neimami vakanananu, kei na neimami kilaka me duabau ga e na i vakaraitaki ni veika dina, me vakavotuya na yalo ni duavata e vuravura raraba. O i Kemuni na Dauveivukei, na Dausolisoli wale, na Dauveisaututaki, na Vu ni iGu Cecekia, na Dauveivosoti, na Dauloloma.

- `Abdu'l-Bahá