नेपाली: Bahá'í Prayers: Single Prayer : Android, iPhone, iPad, Windows, Mac

हे लोकाधिपति तथा राष्ट्रहरूका आकांक्षा, तिम्रो जय होस् ! तिमी त्यो महानतम नाममा प्रकट भएका छौ जसले गर्दा तिम्रो ज्ञानको अगाध समुद्रका सीपीहरूबाट बुद्धि र वाणीका मोतीहरू निस्केका छन् र तिम्रो मुहारको ज्योतिको चमकले धर्महरूको आकाश झलमल्ल भएको छ ।

तिम्रा प्राणीहरूबीच तिम्रो प्रमाणलाई र तिम्रा सेवकहरूबीच तिम्रो तर्कलाई सिद्ध गर्ने तिम्रो वाणीद्वारा म तिमीसित याचना गर्दछु कि तिम्रा मानिसहरूलाई तिम्रो धर्ममा दीक्षित गराऊ जसले गर्दा तिम्रो साम्राज्यभरि तिम्रो धर्मको बिस्तार होओस् र तिम्रो शक्तिको मापदण्ड तथा तिम्रो मार्गदर्शनको ध्वजा तिम्रा देशहरूमा र तिम्रा सेवकहरूबीच स्थिर होओस् ।

हे मेरा प्रभु ! आफ्ना भक्तहरूलाई तिम्रो कृपाको डोरीलाई बलियोसित समातेर अनि तिम्रो उपकारी वस्त्रको छेउमा पक्डेर बसेका तिमी देखिरहेछौ । तिनको लागि यस्तो आज्ञा गर कि तिनीहरू तिमीतिर आकर्षित होऊन् र तिमीबाहेक अन्य सबैबाट अलग्ग होऊन् ।

हे अस्तित्वका सम्राट् तथा गोचर र अगोचर सबैका रक्षक ! म तिमीसित याचना गर्दछु कि तिम्रो धर्मको सेवामा अग्रसर हुने जोसुकैलाई पनि तिम्रो इच्छाले उर्लिएको समुद्र बनाइदेऊ र उसलाई तिम्रो इच्छाको स्वर्गको क्षितिजबाट चम्किरहने तिम्रो सद्रतको अग्निद्वारा प्रज्ज्वलित गराइदेऊ । साँच्चै नै, तिमी शक्तिवान् हौ जसलाई संसारको सारा शक्ति तथा राष्ट्रहरूको संयुक्त बलले पनि झुकाउन सक्त्तैन । अलौकिक, अद्वितीय, रक्षक र आत्म–परिपूर्ण ईश्वर तिमीबाहके अर्को ईश्वर छैन ।