O Bondye mwen! Jou sa yo se jou kote Ou te mande sèvitè Ou yo pou yo fè Jèn nan. Ou te fè kòmansman Liv Lwa Ou a bèl avèk lwa Jèn nan, yon Liv Ou te revele pou kreyati Ou yo, e, nan lide tout sa yo ki nan syèl la ak tout sa yo ki sou latè, Ou te dekore Trezò kòmandman Ou yo avèk lwa sa a. Ou te bay chak moman nan Jou sa yo yon bonte espesyal, yon bonte pèsonn pa kapab dekouvri, se sèl Ou menm, O Ou menm Ki gen yon konesans ki antoure tout bagay ki te kreye. Ou te mete pou chak nanm yon pòsyon nan bonte sa a daprè Epit lwa Ou a ak Pawòl jijman Ou yo ki pa kapab chanje. Anplis, Ou revele chak fèy nan Liv sa yo e chak paj nan Pawòl sa yo pou chak nan pèp ak tribi ki sou tè a.

O Ou menm Ki Dirijan dirijan yo! Ou te sere pou byeneme devwe Ou yo, daprè lòd Ou, pou yo sonje Ou chak lè solèy la leve. Nanm sa yo se yo menm ki te tèlman soule avèk bwason gran sajès Ou a, yo kite kabann yo nan dezi pou yo chante lwanj Ou ak rakonte kalite Ou yo, e yo prese kite dòmi yo poutèt tout anvi yo genyen pou avanse pi pre Ou ak pataje nan bonte Ou yo. Nan tout moman, je yo fikse sou Solèy jantiyès Ou a ki plen lanmou, e figi yo vire bò kote sous Fontèn revelasyon Ou an. O Bondye mwen! Fè mizèrikòd Ou desann tankou lapli sou nou e sou nanm sa yo, fè li soti nan nyaj mizèrikòd Ou yo daprè sa k’ap diyn pou syèl bonte ak gras Ou.

Lwanj pou non Ou, O Bondye mwen! Sa a se lè kote Ou te detake pòt bonte Ou devan figi kreyati Ou yo, e Ou te fè baryè dous mizèrikòd Ou ouvri byen laj pou tout abitan ki viv sou tè Ou a. Mwen priye Ou fò, poutèt tout moun ki te asepte san yo koule nan chemen Ou an - moun ki te tèlman anvi jwenn Ou, yo te elimine tout atachman yo te genyen pou tout kreyati Ou yo, moun ki te tèlman soule avèk dous pafen revelasyon Ou, sa te fè chak manm nan kò yo chante lwanj pou Ou epi vin jwenn lavi lè yo te sonje Ou - mwen sipliye Ou, poutèt moun sa yo, pou pa anpeche nou jwenn tout sa Ou te deside pou Revelasyon sa a - yon Revelasyon ki tèlman pisan nan Jou sa a li fè chak pyebwa fè apèl menm jan an Bwison Adan an nan tan lontan an te anonse mesaj devan Moyiz, Li menm Ki te pale avèk Ou. Pisans Revelasyon sa a tèlman fò nan Jou sa a li fè chak gravye sone ankò avèk lwanj pou Ou, menm jan an wòch yo te glorifye Ou pandan tan Mahomè yo, Zanmi Ou.

O Bondye mwen! Sila yo se moun Ou te bay sipò avèk gras Ou pou yo jwenn zanmitay Ou e kominike avèk Sila a Ki Revele Ou menm menm. Van volonte Ou yo te gaye yo toupatou nan lemonn jiskaske Ou te rasanble yo ansanm anba lonbraj Ou, e Ou te fè yo antre nan lakou twòn Ou an. Kounyeya, depi Ou te fè yo viv anba lonbraj tant mizèrikòd Ou a, mwen mande Ou pou asiste yo rive jwenn sa ki merite yon ran ki wo konsa. O Senyè mwen, pa kite yo konte pami moun ki te rive devan Ou, men ki pa t’ reyisi rekonèt figi Ou, pa kite yo konte pami moun ki te rankontre Ou, men ki pa t’ reyisi jwenn prezans Ou.

Moun sa yo se sèvitè Ou, O Senyè mwen, ki te antre avèk Ou nan Pi Gran Prizon sa a, ki te kenbe Jèn nan anndan mi li yo daprè regleman Ou te kòmande nan Epit lòd Ou yo ak nan Liv volonte Ou yo. Poutèt sa, voye desann sou yo sa ki pral konplètman pwòpte yo elimine nan yo tout sa Ou rayi, pou yo kapab konplètman devwe pou Ou, e pou pèmèt yo konplètman detache yo ak tout bagay esepte Ou menm.

Epi, voye desann sou nou, O Bondye mwen, sa ki diyn pou gras Ou, sa ki kòrèk pou bonte Ou. Epi, fè nou sonje Ou pandan n’ap viv, O Bondye mwen, e fè nou mouri nan lanmou nou pou Ou. Ban nou favè prezans Ou nan lòt mond yo - mond pèsonn moun pa kapab dekouvri yo, sof Ou menm. Ou se Senyè nou e Senyè tout mond yo, Ou se Bondye pou tout sa ki nan syèl la ak tout sa ki sou latè.

O Bondye mwen! Ou wè sa ki te rive byeneme Ou yo nan jou pa Ou yo. Glwa Ou pote mwen temwayaj! Vwa soufrans moun Ou te chwazi yo te leve toupatou nan wayòm Ou an. Kèk pami yo te tonbe nan pyèj enkredil yo nan peyi Ou, e sa te anpeche yo jwenn kontak avèk Ou e rive nan lakou glwa Ou. Genyen lòt pami yo ki te reyisi avanse pi pre Ou, men yo pa t’ gen chans gade figi Ou. Genyen lòt ankò ki te tèlman antouzyas pou wè Ou, yo te reyisi jwenn posibilite antre nan lakou twòn Ou, men yo te kite vwal ki genyen yo separe yo ak Ou menm - vwal ki se lide san valè kreyati Ou yo genyen ak enjistis opresè yo pami pèp Ou yo te fè Ou.

O Bondye mwen! Sa se epòk la Ou te fè pi bon pase tout lòt epòk yo, epi Ou te rakonte li pou kreyati Ou te chwazi yo. Mwen sipliye Ou, O Bondye mwen, poutèt Ou menm, e poutèt kreyati Ou te chwazi yo, pou kòmande sa ki pral egzalte byeneme Ou yo pandan ane sa a. Anplis, mwen mande Ou deside pandan ane sa a, O Bondye mwen, sa ki pral pèmèt Solèy pisans Ou klere fò nan syèl glwa Ou a, e pou li limen tout latè daprè pouvwa souveren Ou.

Bay Koz Ou laviktwa, O Bondye mwen, e bese enmi Ou yo. Epi, ekri pou nou tout sa k’ap bon nan lavi sa a ak nan lòt lavi a. Ou se Laverite, Sila a Ki konnen bagay ki sekrè yo. Pa gen lòt Bondye pase Ou, Sila a K’ap Toujou Padone, Ki Gen Tout Bonte a.

- Bahá'u'lláh