Thanksgiving

አምላኬ ሆይ፣ የክብርና የግርማ፣ የታላቅነትና የክቡርነት፣ የሉዓላዊነትና የገዢነት፣ የልዕልናና የፀጋ የመከበርና የስልጣን ሁሉ ምንጭ ለሆንከው ለአንተ ብቻ ምስጋና ሁሉ ይድረስህ፡፡ አንተ የምትፈቅደውን ሁሉ ወደ እጅግ በጣም ታላቁ ውቅያኖስ እንዲቀርብ ታደርገዋለህ፤ የመትወደውንም ሁሉ ዘለዓለማዊ ስምህን የማወቅን ክብር ታጎናጽፈዋለህ፡፡ በሰማያትና በምድር ካሉት ሁሉ የከፍተኛ ፈቃድህን ፍፃሜ ሊያስቀር የሚችል ከቶ አይገኝም፡፡ ከእምቅድመ ዓለም ጀምረህ ፍጥረትን ሁሉ ገዝተሃል፣ እስከ ዘለዓለምም በፍጡራን ሁሉ ላይ ገዥነትህ ከቶ አያቋርጥም፡፡ ከአንተ ከፍጹም ኃያሉ፣ ከሁሉም በላይ ከተከበረው፣ ፍጹም ኃይል ከተመላው ከፍጹም ጠቢቡ በስተቀርሌላ አምላክ የለም፡፡

ጌታ አምላኬ ሆይ፣ አገልጋዮችህ አንተን ለማየት ይችሉ ዘንድ ፎቶቻቸውን አብራላቸው፣ ወደ መንግስተ ሰማያዊ ችሮታዎችህ መንበር እንዲዞሩ፣ እርሱን የአንተ የራስህ ክስተትና የህላዌህ ጎሕ የሆነውን እንዲያውቁ ልቦቻቸውን አንፃ፡፡ በእውነቱ አንተ የዓለማት ሁሉ ጌታ ነህና ከአንተ ጨቋኝ ከሌለበትና ሁሉን ድል ከሚነሣው በስተቀር ሌላ አምላክ የለም፡፡

የተመሰገንክና የተወደስክ ነህ፣ ጌታ አምላኬ ሆይ! ምንም ያህል ጥበቡ የጠለቀ አንደበት ስምህን በተገቢ ሁኔታ ለማወደስ እንደማይችል፣ የሰው ልብ ወፍም፣ ምንም ያህል ታላቅ ናፍቆትና ፍላጎት ቢኖረውም፣ ወደ ግርማህና ወደ ዕውቀትህ ሰማይ ሊያደርግ እንደማይችል እያወቅሁ፣ እንዴት ስምህን ላነሳ እችላለሁ፡፡

አምላኬ ሆይ! ሁሉን የሚያስተውል ብዬ ብገልጽህ፣ እነዚያ ፍጹም ከፍተኞቹ የማስተዋል ክስተቶች በአንተ ትዕዛዝ መፈጠራቸውን እንድቀበል እገደዳለሁ፡፡ ፍጹም ጠቢቡ ብዬ ባወድስህም፣ እንደገና የጥበብ ምንጮች የሆኑት ራሳቸው በአንተ ፈቃድ መፍለቃቸውን እንዳውቅ እገደዳለሁ፡፡ ተወዳደሪ የሌለው ብዬ ብገልጽህም ፣ እነዚያ የአንድነት ውስጣዊ ህልውና የሆኑት በአንተ ወደዚህ የተላኩና የአንተ የእጅ ጥበብ ማረጋገጫዎች መሆናቸውን ወዲያውኑ እረዳለሁ፡፡ ሁሉን ነገሮች አዋቂው ብዬ ብጠራህም፣ እነዚያ የዕውቀት የመጨረሻ ከፍተኛ ህልውና የሆኑት የዓላማህ ፍጥረቶችና መሣሪያዎች መሆናቸውን ማመን አለብኝ፡፡

የሟች ሰው ፍጥረት ምስጢርህን ለመፍታት ክብርህን ለመግለጽ የህላዌህን ባህርይ እንኳ ለመጠቆም ከሚችለው በላይ የተከበርክ፣ ለመገመት ከሚቻል በላይ የተከበርክ ነህ፤ እነዚህ ጥረቶች በትዕዛዝህ የተንቀሳቀሱና የአንተ ፈጠራ ውጤቶች በመሆናቸው ፣ እንዲህ ያሉት ጥረቶች ምንም አይነት ውጤት ቢያስገኙም ለፍጡራንም ከወሰንከው ገደብ የማለፍ ተስፋ ሊኖራቸው ከቶ አይችሉም፡፡ እጅግ በጣም ብፁዕ የሆኑት ቅዱሳን አንተን ለማወደስ የሚያቀርቡት ከፍተኛ ስሜት፣ እጅግ በጣም የተማሩት ሰዎች የአንተን ባህርይ ለመረዳት በመሞከር ሊናገሩት የሚችሉት እጅግ በጣም ጥልቅ ጥበብ፣ በዚያ በአንተ ሉዓላዊነት ሙሉ በሙሉ በሚገዛው፣ የአንተን ውበት በሚያስጌጠው፣ በአንተ ብዕር ኃይል በሚንቀሳቀሰው ማዕከል ዙሪያ ይሽከረከራሉ፤

አምላኬ ሆይ! በተፈጠሩት ነገሮች ሁሉ ህልውናና በግልፀትህ ብዕር መካከል ቀጥተኛ ግንኙነት እንዳለ የግድ የሚያመለክቱትን አይነት ቃላት ስለመናገሬ ይቅር በለኝ፡፡ እነዚያ ከአንተ ጋር ግንኙነት ያላቸው፣ ከዚህ አይነቱ የማዛመድ ሐሳብ በላይ በጣም በጣም ከፍ ያሉ ናቸው፡፡ ማንኛውም ማወዳደርና ማመሳሰል ለግልጸትህ ዛፍ ተገቢ አይደለም፡፡ የአንተን ክስተትና የውበትህን ጎሕ የመረዳት መንገድ ሁሉ ተዘግቷል፡፡

ሟች ሰው ስለ አንተ ሊናገር ወይም አንተን ሊገልጽበት የሚችለው ባህርይ ወይም አንተን ሊያወድበት የሚችለው ምስጋና ከአንተ ክብር በጣም የራቀ ይሁን! አገልጋዮችህን ያዘዝካቸው፣ የተቻላቸውን ያህል ግርማህንና ክብርህን የማወደስ ማንኛውም ምግባር፣ ለራሳቸው እጅግ ጥልቅ ሕያውነት ወደ ተሰጠው ደረጃ፣ ራሳቸውን ወደ ማወቅ ደረጃ ለመድረስ የሚያስችላቸው የእነተ ፀጋ ምልክት ብቻ ነው፡፡

በምንም ጊዜ፣ ከአንተ በስተቀር የአንተን ምስጢር ጠልቆ ለማወቅ፣ ወይም የአንተን ታቅነት በሚገባ ለማወደስ የቻለ የለም፡፡ አንተ በምርምር የማትገኝ፣ ከሰዎችም ምስጋና በላይ ሆነህ ዘለዓለም ትኖራለህ፣ የማይደረስብህ፣ ምንም የማይሳንህ፣ ሁሉን አዋቂ የቅዱሳን ቅዱስ ከሆንከው ከአንተ በስተቀር ሌላ አምላክ የለም፡፡

አምላኬ ሆይ የክብሮች ክብርና ከሁሉ በላይ አንፀባራቂው ብርሃን በአንተ ላይ ይረፍ፡፡ ግርማህ በጣም የመጠቀ በመሆኑ ምንም የሰው ሃሳብ ሊደርስበት አይችልም፤ ፍጹም ኃይልህም በጣም ከፍተኛ በመሆኑ የሰዎች ልቦችና አዕምሮዎች አእዋፋት ከፍታዎቹ ላይ ለመድረስ ከቶ አይችሉም፡፡ ሕያዋን ሁሉ ለደረጃህ እንደሚገባ ሊያወድሱህ ኃይል አልባነታቸውን ይገልፃሉ፡፡ ለመገመት ከሚቻል በላይ የተከበርክ ነህ፡፡ አንተ በራስህ እንዳለህ የምታውቀው ራስህ ብቻ ስለሆንክ ህያውነትህን ሊያሞግስ፣ ወይም ከሁሉም በላይ ጥልቀ በሆነው ውስጣዊ ህልውናህ በሚገኘው ሁኔታ የበረከትህን ማስረጃዎች ጠልቆ ለመረዳት የሚችል ማንም የለም፡፡

ጌታ አምላካችን ሆይ፣ የፍጥረትንና የፈጠረን ዓለም ወደ መኖር ለጠራህበት በረከት፣ ከአንተ በቀር ሌላ ምንም በሚገባ ሊገምተው በማይችለው፣ በማነቃቂያህ ኃይል በድምቀቀት በሚያበራው ምስጋና ለአንተ ምስጋና አቀርባለሁ፡፡ ከዚህም በላይ፣ ለዚህ ቅዱስ ቡራኬ፣ ለዚህ በግልፀትና በፍጥረት መንግስቶችህ ለተገለፀው ድንቅ ምልክት ለአስፈሪ ቅርበትህና ለአሸናፊው ግርማህ ክብር እንደሚገባው አወድስሃለሁ፣ ምስጋናም አቀርብልሃለሁ፡፡

ክብር ሁሉ ለአንተ ይሁን፡፡ ያ ለአንተ የሚገባው ለመገመት ከሚቻል በላይ የተከበረ ነው፡፡ በእውነቱ የደረጃህን ምጥቀት ማንም በቂ በሆነ ሁኔታ ተረድቶት፣ ወይም ከአንተ በቀር ሌላ ማንም ለአንተ እንደሚገባ አውቆህ አያውቅም፡፡ ከአንተ በቀር ሌላ የግልፀትህን ፍተኝነት ለመገመት የሚችል የሌለ ሲሆን፣ አንተ በሰፊ በረከትህ ጎርፎች አማካይነት ትገለፃለህ፡፡

ስምህ የተወደሰ ይሁን፣ ከአንተ በቀር ሌላ ማንም የባህርይህን ፍንጭ እንኳ ለመናገር ይችል ዘንድ ነፃ ህልውና አለውን. ከአንተም በቀር ሌላው አንተን ላውቅበት የምችልበት የአምሳል ምልክት አለውን. የታወቀ ሁሉ መታወቁን የሚያገኘው፣ ከሁሉም በላይ ግልጹ ከሚለው ስምህ ውበት ነው፤ እያንዳንዱ ነገር ከማይሸነፈው ፈቃድህ በሚፈልቀው አርገብጋቢ ኃይል ከሥረ መሠረቱ ተንቀሳቅሷል፡፡ አንተ ከሁሉም ነገሮች ይበልጥ ለሁሉ ነገሮች ቅርብ ነህ፡፡

የተመሰገነንክና የተከበርክ ነህ፡፡ ምጥቀትህ እነዚያ የመረዳት ኃይልን የተለገሱት ሰዎች እጆች ወደ አንተ ለመዘርጋት ከሚችሉበት ከፍታ የላቀ ነው፤ መጨረሻ የሌለውም ጥልቀትህ የሰዎች አዕምሮዎችና የመገንዘብ ችሎታዎች ወንዞች ከዚያ ለመጉረፍ ከሚችሉበት ይበልጥ ጥልቅ ነው፡፡

አቤቱ አንተ ሩኅሩኅ ጌታ ሆይ! አንተ ለጋሱና መሐሪው ሆይ! እኛ የደጀሰላምህ አገልጋዮች ነን፤ በከለላ ሰጪውም የመለኮታዊ አንድነትህ ጥላ ስር ተሰብስበናል፡፡ የምህረትህ ፀሐይ በሁሉም ላይ ያበራል፤ የበረከትህም ደመናዎች በሁሉም ላይ ያዘንባሉ፤ ስጦታዎችህ ሁሉንም ይከባሉ፤ ፍቅራዊ አምላካዊ ጥበቃህ ሁሉን በህይወት ያኖራል፡፡ የአንተ ጥበቃ ሁሉን ይከልላል፤ የችሮታህ እይታዎችም በሁሉም ላይ ያርፋሉ፤ ጌታ ሆይ! የማያልቁትን ስጦታዎችህን ስጠን፣ የመርሖህም ብርሃን እንዲያበራ ፈቃድህ ይሁን፡፡ አይኖችን አብራ፣ ልቦችን በማያቋርጥ ሐሴት አስደስት፤ በሁሉም ሰዎች ላይ አዲስ መንፈስ ዝራ፣ ዘላለማዊ ሕይወትንም አጎናጽፋቸው፡፡ እውነተኛ ማስተዋልንም በሮች ክፈት፣ የእምነትም ብርሃን በድምቀት እንዲያበራ ፈቃድህ ይሁን፤ ሰዎች ሁሉ እንደ አንድ ፀሐይ ጨረሮች እንደ አንድ ውቅያኖስ ማዕበሎች፣ እንደ አንድ ዛፍም ፍሬዎች ይሆኑ ዘንድ፣ በቸርነትህ ጥላ ሥር ስብሰባቸው፤ እንዲስማሙና አንድ እንዲሆኑም አድርጋቸው፤ ከአንድ ምንጭ እንዲጠጡ ይሁን፤ በአንድ ልዝብ ነፋስም እንዲነቃቁ ፈቃድህ ይሁን፡፡ ከአንድ የብርሃን ምንጭም ብርሃን ይቀበሉ፡፡ አንተ ሰጪው መሐሪው ምንም የማይሳነው ነህና፡፡

- Bahá'u'lláh