KE FAI I ASO KATOA, ITE TAEAO, TUTONU, MOTE AFIAFI

So se tino tela e talo, ke fulu ona lima, kae i taimi e fulu iei ona lima, ke fai atu penei:

Faka-maalosi oku lima, O toku Atua, ke mafai o taofi a Tau Tusi mo te mautakitaki ko latou ite lalolagi ke seai se olotou maalosi iei. Na la, puipui a ia, mai ite kosuuga a so se tino tela e se kau i ei. A Koe, e tonu, ko te Mafi-Katoatoa, ko te Sili i te Maalosi.

Kae e fulu ona mata, kae ke fai atu penei:

Ko oti ne fuli atu oku mata kia Koe, O toku Aliki! Fakamaina a latou i te moli o Ou foliga. Na la, puipui a latou, mo aa e fuli kise isi aka foki na ko Koe.

Ke tu a ia ki luga kae fuli atu ona mata kite Qiblih (Te poini o te Fakamoemoega, tela ko Bahji, ‘Akka), kae fai atu penei:

E molimaugia e te Atua me e seai aka foki se atua na ko Ia. Ea Ia a maalo o Fakaasiiga mo te faiiteega. A Ia, i te tonuuga, ko oti ne fakaasi a Ia Tela ko te Puna-vai o te Fakaasiiga, Tela ne sautala i luga ia Siona, mai i ei a te Kiloga Tafasili i te Maluga ko oti ne sulu atu, ka kote Lakau Ola te la mai i ana tua seai se tino e mafai o fano i ei ko oti ne faipati, te la e ui atu i ei a Ia tela Tena kalaga ko oti ne fakasalalau atu kia latou katoa ko la ite lagi mo te lalolagi: “Kilo, a te Iai-Katoatoa ko vau. Te lalolagi mote lagi, te gali mo te malo sili e a te Atua, te Aliki o tagata katoa, mo te Pule o te Nofoga Aliki maluga mo te lalolagi i lalo!”

Ke ifo a ia ki lalo, mo ana lima i luga i ona tulivae, kae fai atu penei:

E maluga a Koe mai luga i aku tavaeega pela foki mo tavaeega o so se tino i oku tafa, mai luga i aku faka-matalaaga mo tavaeega a latou katoa ko la i te lagi mo latou i te lalolagi!

Ko tu a ia mo ana lima e mafola, ana alofilima e fakasaga ki ona mata kae fai atu penei:

Sa faka-fanoanoa, O te Atua, a ia tela ko oti, mo maikao e akai totuli, e piki ki luga i te kafanoa o Tou alofa-kaimalie mo Tou alofa-atafai, O ko Koe Tela e fakaasi a te alofa–kaimalie ko Toe Alofa-Kaimalie katoatoa!

Ke sagasaga a ia ki lalo kae fai atu:

Au e molimau ki Tou fakatasitasi mo Tou tafatasi, ia Koe ko te Atua, tela e seai aka foki se Atua na ko Koe. Ko oti a Koe, e tonu, ne fakaasi a Tou Talitonuuga, fakataunu a tau Feagaiiga, kae tala ke matala a te mataloa o Tou alofa-kaimalie kia latou katoa ko la i te lagi mo te lalolagi. Fakamanuiiaga mo te filemu, fakatalofaga mo te matagofie, e i luga i Au fagasele, ko la a mafulifuliiga mo avanoaaga o te lalolagi e seki mafai o fai ko latou ke mafuli keatea mai ia Koe, kae te la ko oti ne fakapalele a olotou maalosi, i olotou fakamoemoega ke maua ne latou a te mea tela ia Koe. E tonu ia Koe ko te Faka-magalo-Katoatoa, ko te Maukoloa-Katoatoa.

(Ilo a te talo loa, kafai se tino e fili ke fai ne ia a muna konei:

“Te Atua e molimau me e seai aka foki se Atua na ko Koe, te Fesoasoani i Fakalavelave, te Ola-fua-ia-Ia” ko lava li ei. E pena foki, e lei mafai a ia, koi sagasaga, kae fili ne ia o fai atu penei “Au e molimau ki Tou fakatasitasi mo Tou tafatasi, a ko Koe ko te Atua, kae e seai aka foki se Atua na ko Koe.”)

Bahá’u’lláh

- Bahá'u'lláh