KE FAI FAKA-TASI I TE SEFULU-FA ITULA

A ia te la e fai ne ia a te talo tenei, e tu a ia ki luga kae saga atu ki te Atua, ite koga te la e tu a ia, ke saga atu ona mata kite faka-matua mo te fakamaui, pela loa a ia e faitalitali ki te alofa-kaimalie o tena Aliki, te Toe Alofa-Kaimalie Katoatoa, te Alofa-Atafai. Ke fai atu ia penei:

O ko Koe Tela ko te Aliki o igoa katoa mo Ia Tela ne Faiite ne Ia a lagi! Au e akai maulalo kia Koutou Ko la Ko te Aso-Fou o Tou Uiga Tonu e se lavea, te Tafasili i te Maluga, te Matagofie-Katoatoa, ke talia a taku talo pela me se afi e ka ne ia keatea a veli e pono ne latou au mai i Tou gali, mo te mainaaga tela ka taki ne ia au ki te vasa o Tou Nofo-mai.

Ke sisi ona lima ki luga ite agaaga talosaga ki mua ote Atua – fakamanuia kae fakamaluga a ia – kae fai atu penei:

O ko Koe Tela ko te Manakoga o te lalolagi mo te Fagasele a Malo! E lavea mai ne Koe au e fuli atu kia Koe, kae ko fakaseai ne au ate piki ki so se mea na loa ko Koe, kae piki mau ki Tou kafanoa, mai i ei a lalolagi katoatoa ne gasue ona ko ia. Au ko Tau tavini, O toku Aliki, mo te tama a Tau tavini. E lavea mai au e tu kae toka o fai a Tou finagalo mo Tou manakooga, kae e seai aka foki se mea e manako au ki ei vagana ko te mea e fiafia Koe ki ei. E fakamolemole au mo te aava kia Koe mai ite Vasa of Tou alofa-kaimalie mo te Fetu-Ao o Tou alofa-atafai ke fai mai ki Tau tavini a so se mea Tela e finagalo kae fiafia Koe ki ei. I Tou mafi e maluga atu i taviliga mo tavaeega katoa! So se mea tela e fakaasi mai ne Koe ko te manakoga o toku loto mote fagasele o toku agaaga. O te Atua, toku Atua! Sa kilo mai ki oku faka-moemoega mo aku mea e fai, kae kilo ki Tou finagalo tela ko siomia i lagi mo te lalolagi. Mai i Tou Igoa Tafasili i te Taaua, O Koe ko te Aliki o fenua katoa! E manako fua au ki te mea te la e manako Koe ki ei, kae fiafia fua ki te mea te la e fiafia Koe ki ei.

Ke totuli a ia ki lalo, kae ifo tena mualae ki te one, kae fai atu penei:

E maluga a Koe i so se faka-matalaaga, mo so se faka-munaaga na loa ko Koe.

Ke tu a ia ki luga kae fai atu penei:

Fai aka a taku talo, O toku Aliki, pe la me se vai ote ola e salisali ko te mea ke mafai ne au o ola ki te leva o Tou nofoaiga, kae ke mafai ne au o faipati a Koe i lalolagi katoa o Ou lalolagi

Ke toe sisi ona lima ki luga ite agaaga talosaga, kae fai atu penei:

O ko Tou mavae atu mai i loto mo agaaga ko liua, mo Tou alofa ko fai pe la me se afi ko faka-ka ne ia ate lalolagi katoa! E akai fakamolemole ki Tou Igoa ne auala mai i te taofiiga ne Koe ate lalolagi katoatoa, ke se taofi mai ia au a mea ko la ia Koe, O ko Koe e pule i tagata katoa! E lavea ne Koe, O toku Aliki, a ia kese tenei e fakavave ki tena fale mai i lalo o te malumalu o Tou afiooga te la ei i loto o Tou alofa-kaimalie; ko ia se fakalogo tenei e saala ki te vasa o Tau fakamagalo; a ko ia tafalalo tenei e saala ki te malae o Tou silisili ese; mo ia mativa tenei e fakapilipili atu ki Tou maumea. Ko Tau pati ko te fakatonuuga o so se mea te la e finagalo ne Koe. E molimau au ia Koe e tavaeegia i Au mea e fai, kae fakalogogina ki Ou manakooga, kae e tumau a te se mafai o taofiiga i mea e loto Koe ki ei.

Ke toe sisi ona lima ki luga, kae taku ne ia fakatolu ate Toe Igoa Tafasili I te Lasi (“Allah-u-Abha”). Ke toe ifo mo ona lima i luga i ona tulivae mai mua o te Atua – fakamanuia kae fakamaluga a ia – kae fai atu penei:

E lavea ne Koe, toku Atua, me ne fakagasue pefea a toku agaaga i loto i totooga o oku lima mo toku fuaitino, i te loto finafinau o ifo ma talo kia Koe, mo te manakoga lasi o masaua a Koe kae fakamaluga a Koe; me ne molimau pefea ki te laulaufaiva o Tau Fakatonuuga tela ko oti ne molimau i te malo o Tau faipatiiga mo te lagi o Tou poto. Au e fiafia, O toku Aliki, o akai kia Koe a mea katoa ko la ia Koe, ko te mea e fakaasi i ei a toku mativa, kae fakalasi a Tou mataefa mo Tou maumea, kae e mafai foki o fakaasi a toku vaaivai, kae fakaasi i ei a Tou maalosi mo Tou mafi.

Ke tu a ia ki luga kae sisi on lima fakalua ite agaaga talosaga, kae fai atu penei:

E seai aka foki se Atua na ko Koe, te Mafi-Katoatoa, te Uke-Katoatoa. E seai aka foki se Atua na ko Koe, te Fakaeke, i te kamataga mo te fakaotiiga. O toku Atua, toku Atua! Tau faka-magalo e faka-makeke ne ia au, ko Tou alofa-kaimalie ko oti ne fakamaalosi ne ia au a ko Tau kalaga ko fakatu aka ne ia au kae taki atu au kia Koe. Me koi au ke toa katoa o tu ite faitotoa o te fakai-lasi ote pili atu ki te nofo-mai o Koe, io me fuli atu oku mata ki molii kola ko sulu mai ite lagi o Tou finagalo? E lavea ne Koe, O toku Aliki, a ia seai se aogaa tenei e potupotu atu i te mataloa o Tou alofa-kaimalie, pela foki mo te agaaga se tumau tenei e salasala ki te vaitaafe o te ola se gata mai mai i lima o Tou alofa. A Koe kote fakatonu i taimi katoa, O Koe ko te Aliki o igoa katoa, a ko au ko te talia o te fakalogo ki Tau finagalo, O Ko Ia ne Faite ne Ia a lagi!

Ke isi ona lima fakatolu, kae fai atu penei:

E tafasili atu a te takutakua o te Atua ia latou takuatakua katoa!

Ke totuli a ia, kae ifo tena mualae ki te one, kae fai atu penei:

Ko to maluga katoa a Koe mo tavaeega a latou ko la e pili atu kia Koe ke mafai ne latou o olo atu ki te lagi o Tou nofo-mai, io me ko manueva o loto o latou ko la fakatuanaki kia Koe o oko atu ki te mataloa o Tou faitotoa. Au e molimau ia Koe ko oti ne faka-mana mai i luga i uiga lei mo uiga mana mai i luga i igoa katoa. E seai aka foki se Atua na ko Koe, ko te Tafasili i te Maluga, ko te Matagofie-Katoatoa.

Ke sagasaga a ia kae fai atu a ia penei:

Au e molimau ki te mea tela e molimaugia ne mea faiite katoa, i te Lukuuga Mana mai luga, fakatasi mo latou katoa mai i te Palataiso tafasili i te maluga, mai i luga atu ite Laulaufaiva o te Matagofie mai i te Sikulafgi tafasili ite matagofie-katoatoa, ia Koe ko te Atua, e seai aka foki se Atua na ko Koe, a ko Ia Tela ko oti ne fakaasi ko te Mea Lilo kae Funa, te Fakailoaga Taaua, tela mai ia Ia a mataimanu ko te B mo te E (Be) ko oti ne soko kae sui fakatasi. Au e molimau me ko Ia Tela Tena igoa ko oti ne fakavae ki lalo ne te Pene mai i te Toe Kogaa Koga Maluga, te la ko oti ne tusi i loto i Tusi ate Atua, ko te Aliki o te Nofoaiga-a-Tupu mai luga pela foki i lalo i te lalolagi.

Ke tu tonu a ia ki luga kae fai atu penei:

O te Aliki o mea katoa mo te Pule of mea katoa e lavea mo te se lavea! E lavea ne Koe oku loimata mo te pusi a toku manava, fakatasi mo te lagona o aku musuuga, mo aku tagi, mo te fanoanoa o tou loto. Mai i Tou mafi! A toku soli tuakoi ko taofi mai au mai ite fakapili atua kia Koe; a ko aku agasala ko taofi ne latou ke mao mai au i te fale o Tou mana. Tou alofa, O toku Aliki, ko maumea au i ei, a ko te motu o au mai ia Koe ko fakamasei ne ia au, pela mo toku mao mai ia Koe ko tanumia au iei. E akai au kia Koe i Ou kalafaga i te vao matua, mai i pati konei “Au tenei. Au tenei” ko la ne muagutugia ne Ou taugasoa filifilia ite vao matua tenei, kae mai ite manavaaga o tau Fakaasiiga, mo matagi iliili malie o te Vaveao o Tau Fakaasiiga, o fakaeke aka ke mafai ne au o kilo ki Tou gali kae tautali ki so se mea ko la i Tau Tusi.

Ke fai fakatolu ne ia a te Igoa Tapu, kae ifo ki lalo mo ana lima i luga i ona tuli kae fai atu penei:

Tavaeega kia Koe, O toku Atua, me ia Koe ne fesoasoani mai ke masaua a Koe kae tavae a Koe, kae ne fakaasi mai a Koe kia au Tela Ko te Asokamata o Au fakailoga, kae fai ne Koe au ke ifo mai mua o Tou Aliki-a-Lagi, kae fakamaulalo au mai mua o Tou Atua-a-Lagi, kae masaua ia au a mea ko la ko oti ne faipatigia ne te Laulaufaiva o Tou gali kese.

Ke tu ki luga kae fai atu penei:

O toku Atua, toku Atua! Toku tua ko piko i te mafa o aku agasala, a ko toku se fakalogo ko fakamasei ne ia au. I so se taimi e mafaufau au ki aku mea se lei ne fai a ko Tou alofa, a toku fatu e liua i loto ia au, a ko toku toto ko velasia i loto i oku uaua. Ona ko Tou Gali, O ko Koe te Manakooga o te lalolagi! E mafuli a te lanu i oku mata o kilo atu kia Koe, a ko oku lima fia salasala ko ma ma fola atu ki te lagi o Tou alofa. E lavea e Koe, O toku Atua, i oku loimata ne taofi ne latou a te masaua ne au a Koe kae fakamaalosi atu o Ou uiga lei. O ko Koe te Aliki o te Nofoga-a-Tupu i luga mo te lalolagi i lalo nei! Au e akai fakamaulalo kia Koe mai i fakailoaga o Tou Maalo mo mea lilo o Tou Laufenua o fai ki luga i Au tavini fagasele a te mea tau ki Tou alofa, O te Aliki o mea katoa, kae te la e ttau ki Tou alofa kaimalie, O te Tupu o te lavea mo te se lavea!

Ke fai taku ne ia ate Toe Igoa Tapu faka tolu taimi, totuli mo tena mualae ite laukele, kae fai atu penei:

Tavaeega kia Koe, O toku Atua, me ko oti ne aumai kia matou a feitu e mafai iei o fakapilipili atu kia Koe, kae ko oti foki ne tuku mai kia matou a mea lei katoa ko la ne aumai ne Koe i Au Tusi mo Au Mataupu Silisili. Puipui mai matou, e akai atu matou fakamaulalo, O toku Aliki, mai ia latou ko la fakasupasupa mo mafaufauuga se lei. A Koe, i te tonuuga, ko te Mafi, ko te Iloa-Katoatoa.

Ke kilo aka a tena ulu ki luga, kae sagasaga a ia, kae fai atu penei:

Au e molimau, O toku Atua, ki mea ko la ko oti ne molimaugia ne Ou Tino Filifilia, kae fakatalitonu ne latou ko la ite Palataiso maluga pela foki mo te molimau a latou ko la ko oti ne tamilomilo ne latou a Tou Nofoaga-a-Tupu mafi. A malo ote lalolagi mo te lagi ea Koe, O te Aliki o lalolagi!

Bahá’u’lláh

- Bahá'u'lláh