O Koe te Aliki Alofa! A tau tavini fafine faka-alofa ne manako kia Koe, kae mai i luga i tena toe fakatau mo tena mafaufau ne manako ko ia ke oko atu ki Ou mua kae ke ulufale atu a ia ki Ou lalolagi. Mo ana mata e kanovai ne tuku tonu a tena kilo ki luga i te Maalo o Mea-Lilo. I po e fia ne tapuaki kia Koe, kae e fia aso ne nofo a ia o masausau kia Koe. I tafataeao katoa e masaua ne ia a Koe, a ko afiafi katoa ne tuku tonu ona mafaufauga ki luga ia Koe. Pe la loa mote usuusu a te nainitinikale ne fakalagi ne ia Au kupu, kae pe la mo te kilo ne manako a ia ke toe faka-foki atu a Tou mainaaga.

O Koe ko te Fakamagalo o agasala! Tala ne Koe a te auala mo te agaaga tenei ko ala aka ke ulu ki Tou Maalo, kae fakamafai ate manu-eva, akoakogina ne Tou lima, ke eva ki loto i te fatoaaga losa seai se gataaga. A ia ko ka mese afi i te fia fakapilipili atu kia Koe, faka-mafai aka ke oko atu a ia ki Ou mua. A ia ko mafatia kae fanoanoa mai i te motu mai ia Koe, fai aka ia ke fauu ki loto i Tou Fale Lasi Faka-te-Lagi.

O te Aliki! Matou ne tino agasala, a ko Koe ko te Fakamagalo. Matou ko tanumia ite vasa o mea see a matou, a ko Koe ko te Fakaseai; ko te Alofa. Fakamagalo a motou agasala kae fakamanuia matou i Tou alofa mataefa. Tuku mai kia matou a te avanoaaga o puke mmau ki Ou mata, kae tuku mai kia matou a te ipu ote fiafia mo te lotolei. Matou ne pagota foki loa i o motou mea see, a ko Koe ko te Tupu o mea-alofa. Matou ko malemu i te tai o mea se tonu, a ko Koe ko te Aliki o te alofa seai se gataaga. Ko Koe te Foai-alofa, ko te Gali, ko te Vavau, ko te Maumea a ko Koe ko te Alofa-Katoatoa, ko te Alofa-Kaimalie Katoatoa, tko e Maluga, ko Ia te la e Ave Mea-alofa mo te Fakamagalo o agasala. E tonu, a Koe ko Ia te la e saga matou ki ei ki te fakamama o motou mea e se maua ne matou o fai, ko Ia ko te Aliki o Lukuuga.

- `Abdu'l-Bahá