O te Aliki mana! O ko te Aliki o te alofa-kaimalie! Matou ko olo fakaatea mai i Tou kogaa-koga nofo, Ke nnau ke lavea a Tou gali, kae fiafia ki Ou auala katoa. Matou e malaia, pito tafalalo, kae e se-taaua. Matou ne tino mativa: kilo alofa mai, tuku mai kia matou ate mmau-koloa, sa kilo ki omotou see, funa aka ne Koe a omotou agasala e se-maua o fakagata. Me e pefea a matou, matou koi tummau loa me ia Koe, ako matou e faipati kae lagona ko tavaeega o Koe, kae ko Ou mata tela e sala matou ki ai, ko Tou auala e tautali matou. A Koe ko te Aliki o te alofa-kaimalie, matou ne tino agasala ko olo keatea kae mao mai i omotou fale. Tela la, O ko te Kaumana o te Alofa-fakamagalo, tuku ifo kia matou a motiiga o te vaiua. O ko te Fatoaaga o Pula-Lakau-ko-Matala o te alofa, faka-agiagi mai aka se manogi gali. O ko te Kogaa-Tai o mea-alofa katoa, pelu mai a se galu lasi kia matou. O te Laa-ote-Maukoloa, tuku ifo se vae o te mainaaga. Alofa mai kia matou, tuku mai ate fakamanuiaaga. Mai i Tou gali, matou e aumai aunoa mo se mea e tago lima matou kiai vagana ko omotou agasala, e seai ne uiga llei o matou o fakaasi atu, vagana ko omotou fakamoemoega. Vagana ko Tou veli e funa e kava i ei tatou, a ko Tau puipuiiga e puipui kae lago a matou, se aa a te maalosi e mafai ne agaaga ola kae seai se mea e mafai o fai atu kae tavini kia Koe, se aa a te mea e mafai ne latou seai ne aoga konei o fakaasi atu se ata loto-toa? Ko Koe Tela ko te Mafi, ko te Maalosi-Katoatoa, feasoasoani mai kia matou, alofa mai kia matou: e ui iei matou ko seai ne aogaa, fakaola aka matou mai i vaiua mai i Au kaumana ote alofa-atafai; e ui iei e maulalo matou, fakamaina aka matou i vae maina mai ite Fetu-Ao o Tou tafatasi. Avatu ne Koe a ika fia inu konei ki loto i te vasa o Tou alofa-fakamagalo, Ke tausi ne Koe a te tavale ne galo ki te malu o Tou tokotasi saogalemu, kae taaki atu ne Koe a latou ko olo keatea ki te vai-keli o takitakiiga, kae talia mai kia latou ko la ko see a olotou auala ki se lafiiga i loto i te kogaa-mea o Tou mafi. Sau aka ki luga i laugutu malo konei a te vai e tafe malielie o te lagi, fakatu aka ki luga a latou ko mate ki te ola e se-gata-mai. Talia mai ne Koe kia latou ko la e tauaso a mata ko te mea ke lavea ne latou. Fai aka ne Koe a latou ko la e se-logo ke mafai o lagona, ko latou e guugu ke maua o faipati. Fai aka ne Koe a latou kola e matemate ke ka ite afi, kae fai aka ne Koe a latou kola e se-fakalogo ke iloa ne latou, polopoloaki ne Koe a latou kola e miita, kae fago atu a latou kola e moe.

A Koe ko te Mafi, a Koe ko te Fakaeke, a Koe ko te Alofa. E tonu ia Koe ko te Fai-mealofa, ko te Tafasili i te Maluga.

- `Abdu'l-Bahá