O te Aliki toku Atua! O Koe ko te Fesoasoani ki tino vaaivai, ko te Atafai o latou mativa mo te Fakaola o latou ko la taka-seasea ko fuli atu kia Koe.

E faka-maulalo kae sisi oku lima ki luga o akai atu ki Tou maalo o te gali kae kalaga tagitagi ki luga ia Koe mo toku laulaufaiva foliki, o fai atu penei: O te Atua, toku Atua! Fesoasoani mai ke tapuaki kia Koe, faka-maalosi toku fuaitino ke tavini kia Koe; fesoasoani kia au mai i Tou alofa i toku tavini kia Koe; faka-maegia au ke tumau ate faka-tuanaki i toku fakalogo kia Koe; kae ligi ifo kia au a se tusaga lasi mai i Tou maumea-lauefa, faka-saoloto akiloga o te mata o Tou alofa-atafai ke vau ki luga ia au, kae ufi aka ki lalo i te vasa o Tau faka-magalo. Ke talia aka ko au ke faka-tumau i toku kau ki Tau Talitonuuga, kae

ligi mai kia au a se tusaga lasi o te talitonu katoatoa mo te faka-salasalauga, ko te mea ke liakina katoatoa ne au a te lalolagi, kae fuli atu oku mata mo te tapuaki ki Ou mata, kae faka-makeke ne te maalosi o te maalosi o faka-talitonuuga mo faka-patonuuga, kae, faka-maumau i loto ite maluga mo te maalosi, e mafai o fanatu mai i luga atu o so se koga koga o te lagi mo te lalolagi. E tonu a Koe ko te Kaimalie Alofa, ko te Silisiliese-Katoatoa, ko te Alofa, ko te Alofa Atafai.

O te Aliki! Mea nei ko latou ne sao mai i matulo, ko te lukuuga o agaaga ola fakamanuiagia. Ne maua ne latou o kufaki a fakalavelave kae fakaasi atu a te onosai i mata o te fai-mea-se tonu tafasili ite se lei. Ko oti ne liakina katoa ne latou a te nofo filemu mo te maumea, ke nofo fitaa latou i fakalavelave mo fili fakafeagai i te auala o Tou alofa, kae koi nofo fakapagota loa latou i lima mmau o olotou fili ko la e tumau a te fakasauanoa faka-matagaa o latou, kae tao ifo fakamatakutaku a latou ona ko latou e sasale mo te talitonu I Tou auala tonu. E seai aka se isi o feasoasoani o latou, seai e fakataugasoa kia latou. Mai i tafa o latou masei kae matagaa, e seai aka e sokotaki kae fakatasitasi mo latou.

O te Aliki! A agaaga ola konei ko oti ne tami ite kona o te fakasauanoaaga o te olaga nei kae ko oti, pela me se failoga o te olotou alofa ki te malifalifa gali o Ou mata mo te finafinau ke na oko atu latou ki Tou maalo faka-te-lagi, ne kufaki ne latou a mea masei tafalalo katoa ne fai atu ne tino kaitaua kia latou.

O te Aliki! Fakafonu olotou taliga ki kupu o te fesoasoani faka-te-lagi kae fakavave atu a te manumaalo, kae faksao mai a latou mai i te tanumia ne latou kona masei. Taofi a lima o latou masei kae sa liakina a agaaga ola konei ke saesae ne lima mo nifo o manu fekai, auaa ia latou ko nofo mot e ofo I te olotou alofa mo Koe, talitonu ki mea lilo o Tou mana, tu mote maulalo i Tou mataloa kae oko atu latou ki Tou laukele tafasili i te maluga.

O te Aliki! I te alofa faka-maalosi a latou mo te agaaga foou; faka-maina a olotou mata ke mafai ne latou o lavea Au faka-maoniiga gali i te fanoanoa o te valuapo; fakasino mo latou a mea lei katoa ko la e fonu a Tou Maalo i mea lilo seai se gataaga; fai a latou pela me ne fetu pula i luga o kogaa koga katoa, pela me ne lakau ola kae fua i fuataga kaina mo olotou kauala e gasuesue i te iliili o te matagi fakavaveao.

E tonu, a Koe ko te Maumea-Lauefa, te Mafi, te Maalosi-Katoatoa, te Saoloto katoatoa. E seai aka foki se Atua na ko Koe, ko te Atua o te alofa mo te alofa atafai, ko te Silisiliese-Katoatoa, ko te Fakamagalo-Katoatoa.

- `Abdu'l-Bahá