“A talo fakapitoa ko la e fai i aso taki tasi, fakatasi mo naai isi talo fakamatea aka, pela mo te Talo o te Fakagata Masaki, te Tapeleti a Ahmad, ko oti ne fakaeke ne Baha’u’llah a maalosi fakapitoa kae taaua, tela la e tau o talia me ko oti ne fai pena kae e tau o fai talosaga ne taugasoa mo te talitonu katoatoa mote mautinoa, me e auala mai i talosaga konei e mafai ne latou o ulu ki se tulaga fakapilipili atu kite Atua, kae lavea fakalei ne latou Ana tulafono mo Ana fakatonuuga. – From a letter written on behalf of Shoghi Effendi

A ia ko te Tupu, ko te Iloa-Katoatoa, ko te Atamai! Tenei, ate Nainitinikale o te Palataiso e usu i luga i kaula o te Lakau o te Ola se-Gatamai, mo leo tapu mo te logomalie, o faka-salalau atu kia latou ko la fakamaoni a te tala llei o te pilipili mai o te Atua, o kalaga atu kia latou ko la e talitonu i te Faka-tasiiga Tapu ki te malae o te Fakatasi atu o te Lima Mafola Tokotasi, o fakailoa kia latou, ko la ko oti ne fakaatea mai ite fekau te la ko oti ne fakaasi ne te Atua, te Tupu, te Matagofie, te Pule-Katoatoa, o takitaki a fagasele ki te nofoga mmalu mo te Gali malipolipo tenei.

E tonu tenei a te Toe Sili ite Taulekaleka, valogina i Tusi a Faifekau, e auala mai ia Latou ne fakapatino i ei a te muna tonu mai i te see mo te atamai o sose faka-tonuuga ka tofogia. E tonu ia Koe ko te Lakau o te Ola tela e fua mai i ei fuataga o te Atua, te Maualuga, te Maalosi, te Sili.

O Ahmad! Fai tau molimau me e tonu ia Ia ko te Atua kae seai se Atua na ko Ia, te Tupu, te Puipui, te Se-Fakatusagia, te Maalosi o Maalosi. Kae ko te Tasi Tela ko Ia ne uga mai i te igoa o Ali ko Ia tonu tena mai i te Atua. Ko Ana faka-tonuuga e tautali tasi katoa tatou kiei.

Fai atu: O tagata ke usiusitai koutou ki tulafono a te Atua, ko la ko oti ne fakaasi mai i te Bayan ne te Matagofie, te Atamai Tokotasi. E tonu a Ia ko te Tupu o Faifekau a ko Tena Tusi ko te Matua o Tusi kai iloa aka loa ne koe.

Pela mo te Nainitinikale e usu atu Tena kalaga kia koe mai ite fale-puipui nei Ko Ia ke fai atu tena fekau manino tenei. Sose tino e manako, fuli mai ke atea mai i te poloakiiga atamai tenei kae sose tino foki e manako tuku a ia ke filifili tena auala ki tena Aliki.

O tagata, ka fai e se talia ne koutou a muna konei, mai i faka-maoniiga fea ne talitonu i ei koutou ki te Atua? Fakaasi aka, O lukuuga o tino se.

Ikaai, mai i te Tokotasi Tela i Ona lima a toku agaaga, sei ko latou, kae e se mafai lele loa o fai a te mea tenei, me pefea foki loa e tuku-fakatasi o latou o faka-tau-feasoasoani.

O Ahmad! Sa puli Toku alofa i taimi e galo iei Au. Masaua Oku aso i tou aso, mo Toku fanoanoa mo Toku faka-aunoaaga i loto i te fale-puipui mao tenei. A ke mautakitaki koe i Toku alofa ko tou loto mo aa e sapole, me pefea loa a pelu ote fili ko to me se vaiua ki luga ia koe a ko te lagi mo te laloagi katoa ko tu o teke atu kia koe.

Ke fai koe pela me se ulaaga o te afi ki Oku fili kae pela me se vaitafe o te ola se gata mai ki Aku fagasele, kae sa fai a koe pela mo latou ko la e faka-lotolotolua.

Kae ka fai ko maua koe ne se faka-lavelave i Toku auala, io me se faka-masei ona ko Au, sa fanoanoa koe iei.

Fakanaa ki te Atua tou Atua mo te Atua o ou tuaa. Auaa i tagata ko taka tipatipa i auala o mafaufauga se, aunoa mo te lavea ne latou a te Atua ki olotou mata, io me e lagona Tena-Leo malie ki olotou taliga tonu. E pena a te mauaaga ne Matou, kae e pena foki loa mo te mea ko oti ne molimaugia ne koutou.

E pena foki mo olotou faka-tauuga faka-supasupa ko fai pela me ne veli i vasia o latou mo olotou loto te la ko taofi mai i ei latou ke atea mai i te auala o te Atua, te Maluga, te Sili.

Ke mautinoa ia koe i te tonuuga, a ia te la e fuli tua mai i te Gali tenei ko oti foki ne fuli tua atu ki Faifekau o taimi ko teka mo te faka-maualuga fia sili ki te Atua mai i te se gata mai ki te se gata mai eloa.

Tauloto fakallei a te Tapeleti tenei, O Ahmad. Lagi ne koe i ou aso kae sa-liakina a koe mai iei. Me i te tonuuga, a te Atua ko oti ne faka-mana mo ia te la e lagi ne ia a te taui o te selau matulo mo te galuega i lalolagi e lua konei. Mea-alofa faka-pitoa konei ne tuku atu ne Matou ki luga ia koe pela me se faka-manuiaaga mai ia Matou mo se alofa mai i te Motou fofoga ko koe ke mafai o fai pela mo latou e fakafetai mo te fiafia.

Mai i te Atua! So se tino tela e nofo mo se faka-lavelave io me se fanoanoa e faitau i te Tapeleti mo te tinaa faka-maoni, a te Atua ka fakaseai ne Ia ona fakanoanoa, mo ana fakalavelave kae ave keatea ona puapuaaga.

E tonu , a Ia ko te Atua, ko te Atafai. Tavaeega ki te Atua, ko te Aliki o lalolagi katoa.

- Bahá'u'lláh