I te Igoa o te Atua, ko te Tafasili i te Favavau, ko te tafasili i te Lasi. E tonu i loto o au fagasele ko velasia ne te afi o te mavae: Te fea a te mainaaga o te moli o Ou mata, O te Fakasele o lalolagi?

Latou ko la e pili atu kia Koe ko oti ne liakina i te pogisa o te fanoanoa: Te fea a te mainaaga o te taeao o Tou fakatasi mai, O te Manakooga o lalolagi?

A fuaitino o Au fagasele ko moe sapolepole i kauone mao: Te fea a te vasa o Tou Nofo-Mai, O Koe ko te Takolekole o lalolagi?

A lima e naunau atu ko sisi ki luga i te lagi o Tou alofa-kaimalie mo te alofa: Ko fea a vaiua o Au alofaaga, O te Tali o lalolagi?

A latou e se-talitonu ko kosu ne latou a fenua katoa: Te fea a te maalosi futi-mai o Tau pene faka-tonutonu, O te Manumaalo o lalolagi?

A kuli tagi ko logoaa mai i feitu katoa. Te fea a te Leona o te vao o Tou mafi, O te Fakat-onutonu o lalolagi?

A te moko ko pokotia katoa i ei a tino: Te fea a te mafana o Tou alofa, O te Afi o lalolagi?

A faka-lavelave lasi ko oko ki te kiiga: Ko fea a faka-iloga o Tou fesoasoani, O te Faka-olataaga o lalolagi?

A te pogisa ko siomia i ei a taulasiiga o tino: Te fea a te mainaaga o Tou matagofie, O te Mainaaga o lalolagi:

A ua o tagata ko fakaloa o fai a te masei: Ko fea a pelu taua o Tau fakasalaaga, O te Pogai o Faka-takavale o lalolagi?

A te faka-masei ko kii loa ite tafalalo: Ko fea a pine o Tou mana, O te Mana o lalolagi?

A te fanoanoa ko pokotia i ei a te Fakaasi o Tou Igoa, ko te Alofa-Kaimalie Katoatoa: Te fea a te fiafia o Asokamata o Tau Fakaasiiga, O te Fakafiafia o lalolagi?

A te fitaa ko i luga i tino katoa o te lalolagi: Ko fea a fuka o Tou fiafiaaga, O te Fiafia o lalolagi?

E lavea ne Koe a Malumalu o Au fakailoga e veli ne veli o faka-tauuga: Ko fea a maikao o Tou mafi, O te Maalosi o lalolagi?

A te fia inu ko i luga i tagata katoa: Te fea a te vaitaafe o Tou alofa-lauefa, O te Alofa-Kaimalie o lalolagi?

A te kaimanako ko puke salalau ne ia a tagata katoa: Ko fea a lakei o te motu keatea mai i mea katoa, O te Aliki o lalolagi?

E lavea ne Koe Te Tasi ne Faka-seegina e nofo tokotasi i te fakaaunoa: Ko fea a latou I te lagi o Tau faka-tonuuga, O te Tupu o lalolagi?

Au ko oti ne faka kese i se fenua faka atea: Ko fea a fuka o Tou faka-tuanaki, O te Fakatuanaki o lalolagi?

A te mae o te mate ko mmau pili i luga i tagata katoa: Te fea a te tafeega o Tou vasa o te ola se gata, O te Ola o lalolagi?

A musuuga a Satani ko oti ne manava atu ki mea ola katoa. Te fea a te fetu-lele o Tau afi, O te Molii o lalolagi?

A tau lasiiga o tino ko olo seke ona ko te magii takaseasea o latou i olotou manakoga loa: Ko fea a asofoou o te masinasina, O te Manakooga o lalolagi?

E lavea ne Koe a te Tasi ne Fakaseegina tenei e veli i fakasauaaga i vasia o tino Asuria: Te fea a te kavei o te mainaaga o Tou moli fakavaveao, O te Molii o lalolagi?

E lavea mai ne Koe Au e fakatapu ma faipati: Tena la mai fea ka puna mai iei Au sikuleo, O te Naitinikale o lalolagi?

A te taulasiiga o tino ko fifi i mafaufauga faka-moemiti kae se aogaa: Ko fea a latou fakamatala o Tau talitonu, O te Fakatalitonugia o lalolagi?

A Baha ko malemu i te tai o faka-lavelave: Te fea a te Vaka o Tau faolataga, O te Faolataga o lalolagi?

E lavea ne Koe a te Aso-kamata o Tau faipatiiga i te pogisa o te foafoaaga: Te fea ate la o te lagi o Tou alofa, O te Mainaaga-Alofa o lalolagi?

A molii o te mea tonu mo te masinasina, o te talitonu mo te fakaaloalo, ko oti ne fakaseai: Ko fea a fakailoga o Tau fakasalaaga kaitaua, O t Fakagasue o lalolagi?

E se lavea ne Koe a se isi tela e lago maalosi ne ia a Koe, io me e Mafaufau me se ate mea ne pakuu atu kia Ia i te auala o Tou alofa? Nei ko taofi a Tau pene, O te Fagasele o lalolagi.

A kaula o te Lakau Ola Faka-te-lagi ko fati ki lalo ona ko matagi maalosi o te fakamoemoega: Ko fea a fuka o Tou fesoasoani, O te Tieemipioni o lalolagi?

A Mata konei ko galo i loto i te pefu o te faipati fakamasei: Ko fea a matagi iliili malielie o Tou alofa, O te Alofa-Kaimalie o lalolagi?

A te gatu o te mana ko lailai ne fai ne tino fakaloiloi: Te fea a te gatu o Tou mana, O te Fakaofi-Gatu o lalolagi?

A te tai o te alofa-kaimalie ko maluu ifo ona ko mea ne fai ne lima o tagata: Ko fea a galu o Tou alofa-lauefa, O te Manakoga o lalolagi?

A te mataloa te la e fano ki te Nofo-mai Faka-te-lagi e loka ona ko te masei o Ou fili: Te fea a te kii o Au mea-alofa, O ko Ia e Taala a lalolagi?

A lau o lakau ko lanu sama ona ko matagi poisini o te teke: Te fea a te ligi ifo a kaumana o Tou alofa, O te Fakasao o lalolagi?

A te iunivesi ko pogisa mai i te pefu o te agasala: Ko fea a matagi iliili malielie o Tau fakamagalo, O te Fakamagalo o lalolagi?

A te Talavou tenei ko nofo tokotasi i te fenua kese: Te fea a te vaiua o Tou alofa faka-te-lagi, O te Alofa o lalolagi?

O Te Pene tafasili ite Maluga, Ko oti ne lagona a Tau kalaga tafasili i te suamalie i te tulaga seai se gataaga: Tuku mai Tou taliga ki te faipati a te Laulaufaiva o te Matagofie, O te Tasi ne Fakaseegina o lalolagi!

Moi fai seai ko te moko, e mafai pefea a te vela o Au pati o maanumaalo, O te Fakamataala o lalolagi?

Moi fai ke seai ne fakalavelave, e mafai pefea a te la o Tou onosai o maina atu, O te Mainaaga o lalolagi?

Sa fanoanoa ona ko tino masei: Koe ne faiite ke kufaki kae kolomaki: O te Onosai o lalolagi.

A te suamalie a Tau faka-saeega mai i te sikulagi o te Feagaiiga i vasia o latou e kosu ne latou a te masei, kae nnaunau ki te Atua, O te Alofa o lalolagi.

Ona ko Koe a te fuka o te tu tokotasi ne toki i luga i koga fakaoti i te maluga, a ko te tai o te alofa ko soko aka, O te o Fiafia o te lalolagi.

Ona ko Tou nofo tokotasi a te La o te Tasi e suku-maina, kae ona ko Tou faka-fenua kese ate fenua o te Fusitasi ne fakafoou. Ke onosai, O te Faka-fenua kese o lalolagi?

Ko oti ne fai ne Matou a te fakamasei ko te gatu o te silisiliese, a ko te masaki ko te gatu o Tou fale-tapu, O te Miita o lalolagi.

E lavea ne Koe a loto ko fonu i te ita, kae ke se saga ki ei e ia Koe, O ko Koe ko te Funa o agasala a lalolagi.

Ka fai ko maalipo a pelu tau, fano ki mua! Ka fai ko lele a matasana, solooki atu ki mua! O ko Koe ko te Ola-Mae o lalolagi.

Ko Koe e tagi, io me ko Au ka tagi? Io me ko Au ka tagi-fanoanoa i te mutana o Au tieemipioni, O ko Koe Te la ne pogai ki ei a te tagi fanoanoa o lalolagi.

E tonu, ko oti ne lagona ne Au a Tau kalaga, O te Fagasele-Katoatoa; kae nei ko mata o Baha ko ka valevale i te vela o mea tupu mo te afi o Tau muna maina, kae ko oti a Ia ne tu aka ki luga i te fakatuanaki o te koga o te nofo-mae, taumata atu ki mua i Tou fiafiaaga, O ko Koe te Fakaeke o lalolagi.

O Alí-Akbar, fakafetai ki tou Aliki e uiga mo te Tapeleti tenei te la ko mafai ne Koe o manava a te manogi gali o Toku filemu, kae ke iloa a mea ko oti ne pakuu i luga ia Tatou i te auala o te Atua, O te Fiafaiiga o lalolagi katoa.

A tavini katoa ka faitau kae mafaufau ki te mea tenei, ka maua ne kalokalo afi i olotou uaua ko la ka mafai o ula i ei a lalolagi.

- Bahá'u'lláh