O Koe ko te Aliki o te lavea mo te se-lavea, mo te Fakamaina o te foafoaaga katoatoa! Au e akai totuli kia Koe, mai i Tou nofoaigaa-Tupu tela ne lilo mai i mata o tagata, ke fakaasi ki kogaa-koga katoa a failoga o Au fakamanuiaaga mo alofaaga o Tou alofakaimalie, ko au ke tu ki luga mo te manumaalo mo te fiafia kae fakamaluga atu a Ou uiga llei gali, O ko Koe ko te Tatafasili i te Alofa-Fakamagalo, kae faka-gasue aka a mea faiite katoa ne Tou igoa, kae tena ko faka-ka i ei a te afi o Tou faka-aloaloga i vasia o Au mea ola faiite, ko te lalolagi katoa ke mafai o fakafonu ki te mainaaga o te molii o Tou matagofie, kae ko mea katoa i te olaaga ke ula i te afi o Tau Fakatokaaga.

Pelu aka ki luga, O toku Aliki, a te mea tela ko oti ne fola i Tou igoa, kae tamate atu a te lamepa tela ko te afi a Koe ne faka-ka ne ia. Sa taofigia, O toku Aliki, a te afi tela ko ola tonu loa mai i te Sali-ifo ki lalo, ko te vai tela mai i tena musumusuuga a sikuleo gali kola e tavae kae fakamaluga a Koe ke mafai o lagona-gina. Sa fakaatea, Au tavini mai i manogi gali o te manavaaga tela ko agiagi mai i Tou alofa.

E lavea mai ne Koe, O ko Koe Tela ko te Fagasele mo te MatagofieKatoatoa, a galu e se-nofo-toka kola o te tai-fanaka i loto i te vasa o toku loto, i toku alofa mo te nnau kia Koe. Au e akai totuli ki Koe, i failoga o Tou afioga mo faka-talitonuuga o Tou nofoaiga-a-tupu, ke tataofi aka ki lalo mai I Tou Igoa Tela ne fai ne Koe ke Tupu i igoa katoa i te maalo o Tau foafoaaga. E maalosi Koe o pule i te mea e fiafia Koe kiei. E seai aka foki se Atua, ko te Matagofie-Katoatoa, ko te Maukoloa-Katoatoa.

Ke fakaeke mai ne Koe, tena la, i tino taki tokotasi katoa ko la ne fuli atu kia Koe a mea kola ka mafai ne ia ke maalosi i Tau Fakatokaaga, i se auala atamai tela a mafaufauga faka-supasupa o tino masei i vasia o Au mea ola faiite, io me ko sautalaga seai ne aoga o latou i vasia o Au tavini e mafai o isi se maalosi o pono-gia a ia mai ia Koe. A Koe, e tonu, ko te Feasoasoani-i-MeaFaigata, ko te Mafi-Katoatoa, ko Tafasili i te Maalosi.

- Bahá'u'lláh