Ko tavaeega katoa e io te Atua Tela ko ne leva ne Nofo-mai-i-Anamua loa tela ne kalagia a mea faiite katoa ke tu mai, i taimi tela e seai aka foki i Ou tafa vagana ko Koe. A Ia ko te Tokotasi tela ko te Faka-Tumau-Katoatoa i taimi e seai lele loa se feitu e tasi o

Tena foafoaaga ko oti ne faiite. E tonu a agaaga ola o latou kola e iai ia latou ate malamalama e se-mafai o maina i se fakaasiiga foliki ki loa o Ana uiga llei, mo mafaufau o latou ko oti ne iloa ne latou a Tena fakatasitasi e se-mafai ne latou o atafia a alofafatauva tafasili i te foliki o alofaaga o Tena maluga.

E faka-mana a Koe, O te Aliki toku Atua. A laulaufaiva o tagata e se maua o faka-maluga Ou tugalima gali, e pefea la a te se mafai ne tagata fakatamala i te tavaeega o te afioga o Tou tafasili i te maalosi; kae ona ko te malamalama o tagata e numi o iloa tonu a te mea lilo e tasi o Tau foafoaaga, e mafai pefea ne se tino o oko atu ki te iloa o Tou-Tina-Tino loa ia Koe.

Au ko oti ne iloa ne au a Koe mai i luga i te fakailoa mai ne Koe kia au ia Koe e se-iloagina ki sose tino vagana ko Koe. Au ko oti ne fakamaina mai kia au i te foafoaaga tela ne tufuga ne Koe mai i te seai lele loa me i te auala ne maua se malamalama i Tou Uiga-Tonu e fakatapugia ki tino katoa. A Koe ko te Atua, mai itafa i ei e seai aka foki se Atua. E seai aka foki vagana ko Koe loa ia Koe e mafai o malamalama i Tou natula. A Koe e seai e pau io me se taugasoa. Mai i te vavau loa a Koe e tokotasi kae e seai aka foki i tafa o Koe kae ki te favavau ka tumau a Koe o fai pena, kae e seai lele se mea ola faiite e mafai o fanatu ki Tou tulaga tafasili i te maluga.

A tagata katoa, O toku Atua, e fakaasi tonu ki olotou vaaivaiiga o iloa a Koe pela mo te mea e iloa ne Koe; ko te musumusuga tupuola ko oti ne taala ke iloa i te foafoaaga katoatoa, a ko mea faiite katoa kola ne tufuga ne Koe ko fakaasiiga o Au failoga gali. E lauefa a Tou igoa; a Koe e tafasili i te maluga e se-mafai o fuagina mai iluga atu i taumafaiiga a sose tino mai i Au mea ola faiite ke oko atu ki te iloa o Koe pela mo te mea e ttau kia Koe.

Tavaeega e io Koe! A te auala tela ne kalagina ne Koe a Tou foafoaaga ke isi mai i te seai lele loa e fai mo mea e taofigia a mea faiite katoa mai ite iloa o Koe, a ko te faifaiiga tela ne tufuga ne Koe a mea-ola faiite katoa, mai i luga i saolotooga kola e fakanofo mo latou, e fakaasi tonu atu ki te olotou ausagi katoatoa mai I mua o fakaasiiga o Ou uiga llei.

E maluga a Koe, O toku Atua! A tino katoa e seai se maalosi o fakamanatu a Tou matagofie a ko mafaufau o tagata ko fakatamala o avatu a tavaeega kia Koe. Au e molimau i Tou nofo-mai, O toku Atua, ia Koe ko oti ne fakailoa mai ona ko Ou alofaaga gali kae ne iloagia mai i luga i fakaasiiga o Au failoga. A te mea e iloa tonu ko Koe ne aumai a matou ki mua ite olaaga tela ne ala iei au o iloa mai i Ou mua ia Koe e tafasili i te maluga atu i tavaeega a matou, kae ona ko uiga llei kola ko oti ne fakeke mai ne Koe ki luga ia matou e molimau iei au mai i Ou mua ia Koe e tafasili i te maluga atu i te iloa o matou.

Talia mai ko au ke lele ki te tumu tafalagi i luga i te fakaoko atu kia Koe, kae faka-mafai ke futi atu au ke pilipili atu kia Koe mai ite manogi gali o Tou mana. Tena la ko mea faigata katoa ke liua ne te mainaaga o te fiafia lasi, a ko te mao katoa mai ia Koe ke fakaseai mai i te maua o oko atu ki nofoga o te toe feiloai pela foki mo veli manifi kola ne ponogia iei a aku mai ite ulu atu ki Tou palesi o te matagofie ko mafai o maina kii ke mafai au o ulu atu ki Tou nofo-mai, o nofo pili atu au kia Koe, kae fai atu a tavaeega kola ko oti ne fakamatala mai ne Koe kia au e uiga mo Koe-loa-ia-Koe, e molimau iei ia Koe kote Atua, tela e seai aka foki se Atua na ko Koe, te Tokotasi, ko te SeFakatusagia, ko te Fakalogo-Katoatoa, ko te mea ke se puli ia Koe, io me e puli ia Koe, aua ia Koe e seai sau tama, e seai sou taugasoa, io me se puipui o teke atu ate fakamasei na ko Koe, a ko Koe ko te Aliki o lalolagi katoa. Au e molimau foki ia latou katoa mai tafa o Koe ko Au mea ola faiite, kae e kapu i loto i Ou lima. E seai e alofagia mo mea io me e ola i

se mea e manakogina vagana ko Tou Finagalo. A Koe ko te Tupu o aso mai I te pilitakiiga mot e Pule tafasili ite maluga. Ko Tou mafi e maalosi atu i luga i mea katoa a ko mea faiite katoa e isi ona ko Tou Finagalo. A tino katoa e iloa ne latou a te olotou tulaga faka-pologa kae e molimau ki olotou vaaivaiiga kae e seai aka e se fakamanau ne larou a Tou tavaeega.

Au e akai totuli kia Koe, O toku Atua, i te matagofie o Ou Mata alofafakamagalo mo te afioga o Tou Igoa mai loa ite favavau ke se liakina au mai i te manogi fakamaalosi fuaitino o fakamaoniiga o Ou Aso – ko Aso ko la ko Koe ia Koe ne fakatu kae faka-galue.

- The Báb