Au e avatu tavaeega kia Koe, O toku Atua, ko te manogi gali o Tou alofaatafai tela ko oti ne aofia ne ia au, a ko matagi iliili malie o Tou alofakaimalie ko oti ne lou ne ia au ki te auala o Au mea-alofa lauefa. Fai aka au ke inu, O te Aliki, mai i maikao o Tou alofa-mataefa ate vai ola tela ne mafai i ei a so se tino o fakaatea a mea katoa mai ia ia, kae lele atu kite vanimonimoo o te motu mai i Au mea ola katoa, kae tuku tonu a tena kilo ki luga i Tau takitakiiga alofa mo Au mea-alofa e see lausia.

Fakatoka aka au, i so se tulaga, O toku Aliki, o tavini a Koe kae ko au ke fakatonu toku ala ki te lafiiga gali o Tau Fakaasiiga mo Tou Gali. Kafai ko Tou finagalo, fai au ke tupu aka pe la me se lakau kaina foliki atafai i te lauelele o Tou alofa-kaimalie, ko matagi malie o Tou loto ke fakagasue ne latou au ki luga kae maofe atu o tautali ki Tou fiafiaaga, i se auala atamai tela ko aku gasueega mo toku nofo malie e tuku katoatoa kia Koe.

Koe ko Ia, Te la Tena igoa a te Mea Funa ne fakaasi, a ko te Igoa Taafasili i te Leoleogina ne folafola atu, a ko kii o Toe Ipu Kilasi ne funagina ne tala, te la ne tufatufa atu i ei a tena manogi sausau ki luga i te foafoaaga katoa me ko te taimi ko teka io me ko taimi mai mua. A ia ne fia inu, O toku ALiki, kae ne fakavave atu ia ki te vai ola o Tou alofa-kaimalie, a ko te manu masei ne taumafai ke aofia a ia mai lalo ote vasa o Au maumea.

Au e tauto ki Tou matagofie, O te Aliki o te Fagasele o te lalolagi mo te Manakooga o latou katoa ko la ne lavea ne latou a Koe! Au ko mae kii ne te fanoanoa o toku mavae mai ia Koe, i aso o te Fetu-Ao o Tou nofo-mai ko oti ne sulu mai a tena mainaaga ki luga i Au tino. Tusi ifo, na la, mo au a te tauii te la ko oti ne fakatonu mo latou ko oti ne kilo ki Ou mata kae ko oti, ma i Tau taliaaga, ne ulufale atu ki te fale o Tou nofoga-aliki, kae ko oti, mai i luga i Tau tonu, ne fetui mo Koe mata ki mata.

Au e akai totuli kia Koe, O toku Aliki, ona ko Tou igoa a matagofie ko siomia i ei ate lalolagi mo lagi, ko te mea ke mafai ne au o liakina a toku loto ki te mea ko oti ne faka-tulafono mai ne Koe i Au Tapeleti, ke mafai ne au o fakagata o maua ia au loa a so se manakoga na ko te mea e manako Koe ki ei mai i te maalosi o Tou nofoga-a-tupu, mo so se mea te la e fakasao mai i mea ko oti ne fakaiku ne Koe mo au mai i luga i Tou finagalo.

I so se ala e fuli au ki ei, O toku Atua, seai soku maalosi o maua se auala aka na ko te auala ko oti ne fakasino mai ne Koe mo Au fagasele filifilia? A mea likiliki katoa o te lalolagi e faipati ia Koe ko te Atua, kae molimau me seai aka foki se Atua i Ou tafa. Koe mai loa i te vavau e maalosi o fai ate mea e loto Koe i ei, kae o fakaiku a te mea te la e fiafia Koe ki ei.

Fakaiku mai ne Koe mo au, O toku Atua, a te mea te la ka mafai au, i taimi katoa, o fuli atu kia Koe, kae piki mmau i taimi katoa, ki te kafanoa o Tou alofa-kaimalie, kae faka-salalau atu a Tou igoa, kae ke saala ifo ki so se mea te la e ligi mai i Tau pene. Au e mativa kae faka-alofa, O toku Aliki, a ko Koe ko te Lava i Mea-Katoa, te Tafasili i te Maluga. Kilo alofa mai i luga o faka-ofoofogina o Tou alofa-kaimalie, kae tuku ifo kia au, i so se taimi o toku ola, a mea katoa ko la ne faiite ne Koe a loto o Au mea ola ke lavea ne latou a Tou tafatasi, mo Au tino katoa ko la e ifo tapuai kia Koe mo te tina katoatoa.

Koe, e tonu, ko te Mafi-Katoatoa, ko te Tafasili i te Maluga, ko te IloaKatoatoa, ko te Atamai-Katoatoa.

- Bahá'u'lláh