O ko Ou mata ko te pogai o te tapuakiiga o latou katoa ko la e finafinau kia Koe, ko Tou nofo-mai ko te faka-moemoega o latou ko la e mau-takitaki ki Tau finagalo, ko Tou nofo pili-mai ko te manakoga o latou katoa ko oti ne faka-pilipili atu ki Tou fale, ko Ou mata, ko te taugasoa o latou ko oti ne lavea ne latou a Tau mea-tonu, ko Tou igoa ko te faka-gasueega o agaaga ola ko la ko leva ne manako ke taofi a Ou mata, ko Tou leo ko te ola tonu o Au faka-pelepele, a muna mai i Tou mua-gutu ko te vai o te ola kia latou katoa ko la i te lagi mo te lalolagi!

Au e akai totuli kia Koe, mai i mea see ko oti ne puapuaga Koe i ei mo fakalavelave ne fakaoko atu ki luga ia Koe ne lukuuga o latou amio se lei, ke tuku mai ki lalo ia au mai i kaumana o Tou alofa-kaimalie a mea ko la e fakama au mai i mea katoa ko la seki aumai ia Koe, ko te mea ke aoga au o tavaegia a Koe kae e ttau o alofa kia Koe.

Sa taofi mai ia au, O toku Aliki, a mea ko la ko oti ne faka-eke ne Koe mo latou ko Au tavini fafine ko la e tamilomilo ia Koe, kae i luga ia latou e soko loa a te maligi ifo a te matagofie o te la o Tou gali mo te vae maina o te malifalifa o Ou mata. Ko Koe Te la ko Ia mai ite favavau ne fai mo lafiiga o latou ko la e saala kia Koe, kae ne alofagina fonufonu ne Koe a ia tela ne akai faka-molemole atu kia Koe.

E seai aka se Atua mai i Ou tafa, te Mafi, ko te Faka-tunakigia-Tumau, ko te Maukoloa-Katoatoa, ko te Tafasili i te Kaimalie.

- Bahá'u'lláh