O ko Koe, Tela ko Tau afioga faka-mataku a mea katoa ne polepole i te mataku, Tela e pule i Ou lima a faiga mea a tagata katoa, te la Ko Tena alofa mo te kaimalie e saga katoa atu ki ei a mata o Au mea faiite! Au e akai totuli kia Koe, mai i Tou Igoa tela ko oti ne fakaeke me ko te agaaga o igoa katoa ko la i te maalo o igoa, ke puipui a matou mai i musumusuga o latou ko la ko oti ne fuli keatea mai ia Koe, kae fakase a te mea-tonu e uiiga mo te tafasili ite malu mo te maluga o Koe, i te Faka-asiiga tenei tela ko fai a te maalo o igoa ne gasuesue ite mataku.

Au se tasi o Au tavini fafine, O toku Aliki! Ko oti ne fuli oku mata ki te malumalu o Au alofaaga kaimalie mo te tapaneki fakamoemoegia o Tou matagofie. Fakama au i mea katoa seai mai ia Koe, kae faka-maalosi au ke alofa kia Koe kae ke fakataunu a Tou fiafiaaga, ko te mea ke fiafia au i te faka-talitali ki Tou gali, kae motu keatea mai ia Au a mea faiite katoa, kae ke mafai, i

taimi katoa, o fai atu penei: “Fakamaluga a te Atua, te Aliki o lalolagi!”

Fai aku meakai, O toku Aliki, mo fai a Tou gali, a ko aku mea inu ko te molii o Tou nofo-mai, a ko toku faka-moemoega ko Tou fiafiaaga, a ko taku galuega ko Tou tavaeega, a ko toku taugasoa ko Tou masausauaga, a ko toku feasoasoani ko Tou nofoaiga-atupu, a ko mu mea e nofo ai au ko Tou koga nofo, a ko toku fale ko te nofoga tela ko oti ne faka-maluga ne Koe mai i tuakoi a latou ko oti ne pono pela me se veli mai ia Koe.

A Koe, i te tonuuga, ko te Atua o te maalosi, o te kaumalolo mo matagofie.

- Bahá'u'lláh