Бурхан минь! Бурхан минь! Энэхүү шадар зарц нар чухамдаа Таны зүг хандаж, Таны энэрлийн хаант улсад залбирч байна. Үнэнхүү тэд Таны ариун гэгээн чанарт татагдан, Таны хайрын гал дөлөөр гийж, Таны гайхамшигт хаант улсын ивээл баталгааг хүсэмжлэн Таны хурмастын оронд хүрч очихыг эрэлхийлэн хүсч байна. Үнэнхүү тэд Таны буян хишгийг горьдон мөрөөдөж, Бодит үнэний Нарны туяанд гэрэлтэн гэгээрэхийг хүсэн тэмүүлж байна. Эзэн тэнгэр минь ээ! Тэднийг гэрэлт дэнлүү, энэрлийн бэлэг тэмдэг, үр жимстэй модод, гялалзан цацарсан од мичид болгож хайрлана уу. Тэд Таны замналд үйлчлэхээр зориг шулуудаж, Таны ивээл хайрын гэрэл гэгээг хүсэн мөрөөдөхдөө Таны хайрын уяа холбоосоор Тантай бат холбогдох болтугай. Эзэн тэнгэр минь! Тэднийг удирдамжийн шинж тэмдэг, Өөрийн үхэшгүй мөнх хаант улсын туг далбаа, Өөрийн энэрэл нигүүлслийн далайн давалгаа, Өөрийн сүр жавхлангийн гэрлийг тусгах толь болгож хайрлана уу.
Та бол чухамхүү Өгөөмөр хишигт билээ. Та бол чухамхүү Энэрэнгүй билээ. Та бол чухамхүү хамгаас Нандин, хамгаас Хайрт билээ.
- `Abdu'l-Bahá
Аяа, эелдэг уян Эзэн тэнгэр минь! Энэ бол Таны хаант улсын зүг хандан, Таны ивээл хишиг, адис буяныг хүсэмжлэн энэхүү цуглаанд хуран цугларсан Таны шадар зарц нар билээ. Аяа, Бурхан Та минь ээ! Бүхий л амьд бодгаль зүйлст шингээстэй Өөрийн нэг нэгдмэл чанарын шинж тэмдгээ илэрхий болгон тодруулж хайрлана уу. Эдгээр хүмүүсийн бодь чанарт нь далд нуугдаастай буянт чанаруудыг илрүүлэн нээж хайрлана уу.
Бурхан минь! Бид өвс ургамал мэт билээ. Харин Таны буян хишиг бол хур бороо мэт билээ. Өөрийн хишиг ивээлээр эдгээр ургамлыг сэргээн ундаалж, ургаж өсөхөд нь тусална уу. Би Таны шадар зарц нар билээ. Материаллаг оршихуйн хүлээснээс биднийг чөлөөлж хайрлана уу. Бид харанхуй мунхаг, бидний мэргэн цэцэн болгож хайрлана уу. Бид үхсэн мэт, биднийг амьдруулж хайрлана уу. Бид махан бодитой, биднийг оюун санаанлаг болгоно уу. Бид мөхөс хоосон, биднийг Таны нууц оньсогыг хадгалах дотнын итгэлтэй шавь нараа болгоно уу. Бид ядуу зүдүү, Өөрийн хэмжээлшгүй их эрдэнэсийн сангаасаа биднийг баяжуулан адислана уу. Бурхан минь! Биднийг сэргээн амьдруулж, бидэнд харах мэлмий, сонсох сонор хайрлаж, амьдралын нуугдмал оньсогыг бидэнд тайлж хайрлана уу. Чингэвээс оршихуйн энэ ертөнцөд Таны хаант улсын нууцас бидний өмнө нээгдэж, улмаар бид Таны нэг нэгдмэл чанарыг гэрчлэн өчиж чадах билээ. Ивээл буян бүхэн чухамхүү Танаас гаралтай, хайр хишиг бүхэн Таных билээ.
Та бол чадалтай, Та бол хүчирхэг. Та бол Хишигтэн, Та бол Хэзээд Буянтан.
- `Abdu'l-Bahá
Тэнгэрлэг Зөн билигтэн минь! Таны гоо үзэсгэлэнд татагдан, Таны хайрын гал дөлөөр гийсэн Таны анд нөхдөөс энэ цуглаан бүрджээ. Энэ хүмүүсийг хурмастын сахиулсан элч нар болгож, Өөрийн Ариун Сүнсний амьсгалаар тэднийг сэргээн амьдруулна уу. Хэл яриаг нь цэцэн цэлмэг, зүрх сэтгэлийг нь шийдэмгий зоримог болгож, тэдэнд тэнгэрийн хүч чадал, энэрэн нигүүлсэх мэдрэмж хайрлаж, хүн төрөлхтний нэг нэгдмэлийг тунхаглагч, хүний энэ ертөнцөд хайр ивээл, эв эеийг дэлгэрүүлэгч болгож хайрлана уу. Тэгвэл мунхаг атгаг үзлийн харанхуй нь Үнэний Нарнаас цацрах туяагаар замхран гэгээрч, энэ гунигт ертөнц гийгэн гэрэлтэж, энэ биет орчлон сүнсний ертөнцийн цацрагийг шингээн авч, улмаар олон янзын өнгө нэг болж, дуу магтууны уянга Таны ариун гэгээн Хаант улс хүртэл цуурайтах болно.
Үнэнхүү Та Бүхнээс хүчтэй, Хамгаас чадалтай билээ!
- `Abdu'l-Bahá
Нигүүлсэнгүй, хамгаас хүчит Бурхан минь! Энд хуран цугларагсад Таны зүг нүүр царайгаа хандуулж, залбиран гуйж байна. Тэд нар туйлын даруу хүлцэнгүй байдлаар Таны Хаант улсын зүг ширтэж, Таны өршөөн уучлах сэтгэлийг сөгдөн гуйж байна. Бурхан минь! Энэ хуран цугларагсдыг өрөвдөн хайрла. Тэдний сэтгэлийг ариутган, Өөрийн удирдамжийн гэрэл гэгээг тэдэнд хүртээ. Өөрийн баярт мэдээгээр тэдний зүрх сэтгэлийг гийгүүлэн, тэдний сүнс сүлдийг баясга. Тэд бүхнийг ариун гэгээн Хаант улсдаа хүлээн авч, тэдэнд шавхагдашгүй их буян хишгээсээ хайрлан, тэднийг энэ ба ирээдүйн ертөнцөд жаргалтай болгоно уу.
Бурхан минь! Бид дорой, бидэнд хүч тэнхээ хайрлана уу. Бид ядуу, бидэнд Өөрийн дундаршгүй эрдэнэсээс хишиг хайрлана уу. Бид өвчин эмгэгтэй, биднийг тэнгэрлэг эмээрээ анагаана уу. Бид арчаагүй, бидэнд хурмастын хүч чадлаасаа өгөөч. Эзэн тэнгэр минь! Биднийг энэ ертөнцөд хэрэгцээтэй болгож, хувиа хичээх, шунах хүслээс ангижруулаач. Эзэн тэнгэр минь! Биднийг Өөрийн хайрын замналд ахан дүүс болгож, Таны бүхий л үр садыг хайрладаг болгоно уу. Биднийг хүн төрөлхтний тусын төлөө үйлчлэхэд маань батжуул. Үүний ачаар бид Таны шадар зарц нарын шадар зарц болж, хамаг амьтныг хайрлаж, Таны бүх хүн ардад нигүүлсэнгүй ханддаг болно. Эзэн тэнгэр минь! Та болбоос Хамгаас хүчирхэг билээ! Та бол Энэрэнгүй билээ! Та бол Өршөөнгүй билээ! Та бол Хязгааргүй хүчит билээ.
- `Abdu'l-Bahá