Mfumwa koye ove Karunga kulimonikito lyashihoro shoye kumbunga! Oh, Ove ghuLiparu naUkenu wetu, pititira vapikoye mundjira yoye, tu renke tu ragopare mumoye nakutushutura kunavintje kwandi Koye.
Hi, Karunga, tu shonge Umwe ghoye, tu pe nka lidimbururo lyaUmwe ghoye, ashi naumweshi tu kenga kwandi Ove. Ove Mufenkenda naMutapinkenda!
Hi, Karunga, vankeda mumushima davaholi voye mundiro washihoro, ashi ghu veveke maghano ghakunavintje kwandi Koye.
Monikita ghunaruntje ghoye wakupitakanena kukwetu ove Karunga - ashi Ove wa kara po naruntje nga u kara po nka naruntje, kudere ko Karunga wayenaye kwandi Ove. Vyashiri mumoye mo ngatu wana lisheumuno nankondo detu.
- Bahá'u'lláh
Hi, Karunga wande! Hi, Karunga wande! Kwatakanita dimushima davapikoye nakumonikita lighano lyoye lyalinene. Va renke va kwame dimuragho doye nakuyendaura muveta doye. Va vatere, ove Karunga, muvitokomena vyavo ntani nka u va pe nkondo mukukukarera. Oh, Karunga! Wa sha va kengerera, nani yendita mpadi davo naukenu wamayiviro ghoye ntani nka hafita dimushima davo nashihoro shoye. Vyashiri, Ove Muvateli naHompa wavo.
- Bahá'u'lláh
Hi Hompa wande. Ogho nahora, Muvhuruki wande! Kara muholi wande muliyana omo nakara. Tunditapo ruguvo rwande. Ndenke ni pure Kughuwa Ghoye. Nture muigwanekero lyaUhompa Ghoye nava vaghara navyopeke vakukarere Ove, navantje ava vakukarero vakuruwaneneve. Ndenke ni kare mupika Ghoye. Vyaghushili ove Ghumufenkenda wanavantje.
Hi, Karunga wande! Ame kuna kuromba koye muLidina lyoye lyakufumana mukumbatera navyo vina kuyendito nawa virughana vyavapikoye mulivango lyoye vi yende po nawa. Ove, vyashiri, wa kara nankondo kuvininke navintje.
- Bahá'u'lláh
Karunga, renka ukenu waumwe u fuke livhu nalintje, ntani nka shitamba shino “Untungi, waKarunga”, ashi u ramame pavipara vyadimuhoko.
- Bahá'u'lláh
Ghamb: Ove Karunga, Karunga wande! Ntura mutwe wande nashipangura sha ghushili, ntani ntembeli yande na ghurenka waghuwa. Ove ghushili, wawaparo, ove mutapi wanavintje vyaviwa.
Oh, Hompa, Karunga wande! Kwafa vaholi voye ovo wa hora va sha dengauka mumapuliro ghoye, va yendaure mundjira doye, va yimane ndjikiti muShirughana shoye. Va pe nkenda doye mukukandana po mahomokero ghakukughayara naumoye, nakukwama shite shaliyendito lyaukarunga. Ove Munankondo, Munankenda, Mukalipo panaumoye, Mutapi, Mudidimiki.
- `Abdu'l-Bahá
Hompa! Ghushuntu atwe, tu pe ko ufenkenda ghoye, ghepwe, tu pe ko ruha rwaungaro walikukukuro lyoye; vahepwe, tu hafite; twa didipitwa, tu pe shikoda shoye. Vidira vyamuwiru navikorama vyamuwiya kwa wananga kehe liyuva ndya davyo Koye, vishitwa navintje kwa hamena kulirero lyoye nkuunongo ghoye wakutekura.
Wa sha mu ghupa uno wakupira nkondo nkenda doye dakutetukita, tapa nkondo doye muunogo ghoye kushishitwa shino shakupira mbatero.
Tu pe ko ndya detu dakehe liyuva, weda ko kutapa kuvihepwa vyaliparu, ashi twa sha koramena wayenaye hanashi Ove, naruntje tu vhure kukara kumwe nove, tu yendaure mundjira doye nakuyuvhita mahorameno ghoye. Ove Munankondo, na Munashihoro naMureli waudjuni nauntje.
- `Abdu'l-Bahá
Oho, Hompa! Atwe kudere ko nkondo; tu pameke. Oh, Karunga! Atwe vantuta; tu pukurure. Oh, Hompa! Atwe vahutu; tu ngavopite Atwe twa fa; tu rambwite. Oh, Hompa! Atwe vene kwa tu didipita, tu nkoyimite mughuntungi ghoye. Ntjeneshi ku u tu vatera, oh Hompa, ndi ngatu fana yira ntungwedi dakuvembera. Ano ntjeneshi kapi u tu vatera, ngatu kara kunda ya livhu. Oh, Hompa! Tu pameke. Oh Karunga! Tapa liketo kukwetu. Oh Karunga! Tu renke tu kete likukengo ghumwande nakuketa lidovo. Oh Hompa! Ndjovore kughupika waghudjuni wapalivhu. Oh Hompa! Tu yumipite namumunku waMpepo yaKupongoka ashi tu rambuke mukukurughanena, tu karere mukukufumadeka, nakukurughanena mughuntungi ghoye namfumwa yayinene. Oh Hompa! Ove nkondo ngudu! Oh Karunga, Ove Mughupili po! Oh Hompa, Ove Mufenkenda!
- `Abdu'l-Bahá
Oh Karunga wande, Karunga wande! Tjayira vapikoye vakulimburukwa kumaghudona gha ame navidovauka vyadumushima va popere nalintjo lyoye lyakuvangara kushihoro naunongo kughunkore, nyengo namfudu, va kunge mulitakamito lyoye lyakudira kushakana, nandjewandjewa ku ndamba damatamayi, va renke va kare viyivito vyalihoramo lyauntungi ghoye, twedera vipara vyavo nalinkoyimo lyaumwe waukarunga ghoye olyo lina kutundo mushite shaliyuva, hafita dimushima dava namarumbembera ghamuuntungi ghoye ogho va yuvhita, pameka mbunda davo nankondo dakupangera navintje odo dina kutundo muuntungi ghoye washikoda. Ove Mughomoki, Mupoperi, Munankondonadintje, Munongo.
- `Abdu'l-Bahá
Oh Karunga! Shino shidira shalivava lyakuremana, ano kutuka kwasho maranga ngudu - shi vatere ashi shi vhure kutuka nange ka tika kundagha-ndagha yauwa naliyovoro, mavava mukutuka kwasho naruhafo nalirago muliterembo lyasho muwiru yakupira uhura, yeyura ngoghera yasho muLidina lyoye lyakundagha-ndagha mu virongo navintje, hafita matwi naliywi lino, kenita mantjo mukukukeya viyivito vyalipititiro!
Oh Hompa! Ame pentjande, mukuma naliguvo. Kwande kundereko mayeghameno kutunda poye, kundereko muwateli kwandi Ove, kundereko likwafo lyakushetakana nalyoye. Ntambure mushirughana shoye, mbatere nambunga yavaengeli voye, nketite mulitwarokumeho lyaNkango yoye ntani ndenke niyiyire mpandamboyera ukonentu ghoye mukatji kavishitwa vyoye. Vyashiri, ove muvateli wavapirankondo, namukungi wavanuke, nka vyashiri Ove Mpumbe, Munankondo, naMudirikutininika.
- `Abdu'l-Bahá