Kia Koe ko tavaeega, O te Aliki toku Atua! Au e akai totuli kia Koe, mai i Au failoga ko la ko oti ne siomia i ei a te foafoaaga katoatoa, kae mai i te mainaaga o Ou mata kola ko oti ne faka-maina a mea katoa kola i te lagi mo i luga i te lalolagi, mo te Tou alofa-fakamagalo tela e aofia iei katoa a te univesi, ke tuku ifo ki lao a veli kola e ponogia au mai ia Koe, ko te mea ke fakavave atu au ki te Ulu-Vai o Tau faka-maalosiiga mafi, mo te Aso-Malulu o Tau Fakaasiiga mo alofaaga mau-koloa, kae ke mafai o ufi ifo i lalo o te vasa o Tou nofo-pili-mai mo te fiafia.
Sa faka-pokotiagia au, O toku Aliki, ke seai se poto o Koe i Ou aso, kae sa ave keatea ate gatu o Tau takitakiiga. Aumai ke inu au i
te vaitafe tela ko te ola tonu, ko la ona vai ne tafe mai ite Palataiso (Ridvan) tela a te kalauna-atupu o Tou Igoa, ko te AlofaFakamagalo, ne fakatu, ko oku mata ke mafai o maatala, mo oku mata ke faka-maina, mo toku loto ke faka-filemu, ka ko toku agaaga ola ke faka-mainagia, mo toku kalafaga ke faka-makeke.
Ko Koe ko Ia Tela mai i te vavau loa, mai i luga i te maalosi o Tena mafi, maluga atu i mea katoa, kae, mai i luga i te fakagaluegaga o Tena finagalo, ne mafai o fakaeke a mea katoa. E seai lele se mea, me i luga i Tou lagi io me i luga i Tou lalolagi e mafai o fakalavelave ki Tau galuega. Ke iai ate alofa-fakamagalo, tena, ki luga ia au, O toku Aliki, mai i luga i Tou atamaiatafai mo te kaimalie, kae tuku atu a toku taliga ki sikuleo gali o manu kola e fakalagi a olotou tavaeega mo Koe, i loto i kaula ote lakau ola o Tou fakatasitasi.
Ko Koe ko te Foai Takutakua, ko te Fakamagalo-Katoatoa, ko te Atafai Tafasili i te Maluga.
- Bahá'u'lláh
Ko matafi nei ko mea katoa ko oti ne ola llei kii anamua i te Palataiso o Tou tafatasi maalosi, O toku Atua! Ko fea a kaumana vaiua o Tou alofafakamagalo? Ko oti ne kati a kaula o te Lakau Ola o Tou fakatasitasi o te gatu o Tou afioga mo te atamai; tefea a te taimi-malulu o Au mea-alofa mo maukoloa? E takato a te Ake o Tau Fakatokaaga aunoa se gasuesue i luga i te tai o Tau foafoaaga; ko fea a matagi o Tou alofa kaimalie mo alofa tauanoa? E ufi mai i feitu katoa ko Tau Lamepa mai i kaumatagi o te sefealofani e agi mai i fenua taki tasi, e tefea a te lalolagi o Tou alofa-kaimalie mo te puipuiiga?
E lavea ne Koe, O toku Atua, me e pefea a mata o latou mativa ko fakasaga tonu ki luga i te sikulagi o Au maumea, me e pefea a loto o latou faka-alofa ko fakamau i te auala o Tou mafi. Au e akai kia Koe, O ko Koe Tela ko te Manakoga tokotasi faeloa o latou ko la ko oti ne lavea ne latou a Koe, mo te Pogai o te fakaofoofogia o te foafoaaga katoatoa, ke se-fakapokotiagina a latou, nei aua ia Koe ko oti ne fakalata mai a latou ki Tau Muna tafasili i te maluga, ke mao mai i te Tapaneki tela ne fakatu ne Koe i Tou igoa, ko te Matagofie-Katoatoa.
Ko oko loa a te olotou fakalavelave, O toku Aliki, kae ko siomia latou ne te masei. Tuku ifo ki lalo, tena, mai i te lagi o Tau pule Au lukuuga e se-lavea, ko te mea, ke taofi ki luga a fakailoga o Tou manumaalo, e mafai ne latou o feasoasoani a latou i Tou fenua, kae ke mafai ne latou o puipui a latou mai i Ou fili.
Au e akai kia Koe, O toku Atua, mai i Tou igoa tela ne vaiua ifo ki lalo mai i kaumana, kae e tafe mai i ei a vai, mo te afi o Tou alofa ko oti ne faka-ka salalai i Tou maalo, ke fesoasoani a Tau tavini tela ko oti ne fuli atu kia Koe, kae ko oti foki ne faipati ki Ou tavaeega. Kae e tonu ia ia o fesoasoani kia Koe. Fakamaalosi, tena, a tena loto, O toku Atua, i Tou alofa mo Tau Talitonuuga. E llei atu mo ia ilo a mea katoa ko la ko oti ne faiite i Tou lalolagi, mo te lalolagi me i sose mea i loto e ttau o tanumia ifo ki lalo, ka ko mea ko la e ia Koe e tumau pena me e pefea a te tumau o Ou igoa tafasili i te maluga. I Tou Matagaofie! Kafai a te lalolagi e tumau ki te leva o te tumau o Tou maalo, ke fakamau a olotou alofaaga ki luga i ei e se mata-ttau mo latou ko la ne inu, mai i lima o Tou alofa-fakamagalo, a te uaina o Tou nofo-mai, e pefea a te lasi atu manafai ko iloa ne latou a tena mausolosolo kae ko talia ne tena se-tumau. A avanoaaga kola e maua ne ia, mo mafulifuliga kola a mea katoa e sokotaki ki ei e tumau o pokotia, molimau foki ki tena se-tumau.
So se tino ko oti ne lavea a Koe ka fuli ki te seai aka foki na ko Koe, kae ka sala mai ia Koe e seai aka foki na ko Koe. Ko Koe ko te Manakoga tokotasi faeloa o te loto o ia ko la ona mafaufauga e piki mau ki luga ia Koe, pela foki mo te Fakamoemoega maluga o
sose tino tela e fakatuanaki kia Koe.
E seai aka se Atua na ko Koe, ko te Mafi-Katoatoa, ko te Feasoasoani-iMea-Faigata, ko te Matagofie-Katoatoa, ko te Tafasili i te Maalosi.
- Bahá'u'lláh
E faka-aloalogia a Koe, O te Aliki toku Atua! Ko oti a Koe, i Tou Palataiso tafasili i te maluga, ne fakasino ki Au tavini a tulaga kola kafai se tino ia latou e tala atu a tena veli ki mata o tagata a latou katoa i te lagi mo latou katoa i te lalolagi ka se-maua o faipati. Mai i Tou mafi! Mo fai a tupu e molimau se faka-aloalogia tagasili ite takutakua penei a latou, e tonu, kae ave keatea a latou mai i olotou maalo kae piki mmau ki mea ko la ko oti ne ulu mai ki lalo o te malu o Tou alofa-faka-magalo e se-fuafuagina kae saala atu ki te malu o Tou igoa faka-aloalogia katoatoa.
Au e akai kia Koe, O ko Koe Tela ko te Fagasele o muna mo te Manakoga o latou katoa kola ko oti ne iloa ne latou a Koe, mai i
Tou igoa, e auala atu ia Koe ne faka-gasuesue a ia tela e tonu mo Koe kae fakapilipili atu kia Koe a ia tela e fiafia Koe ki ei, ke pula a mata o latou katoa ko la e fagasele kia Koe, ke fiafia ia latou e se ponogia ne veli mai ia Koe pela mo tino o te lalolagi e ufi ne te vli, kae mai i te kiloga mai i tua e mafai ne latou o atafia a failoga mo masauaga ko Tou maalosi, kae mai i loto e maua a mea ko oti ne fakaeke ne Koe mo latou i lalolagi o Tou matagofie.
E maalosi a Koe o fai a Tou fiafiaaga. A Koe ko te tasi tokotasi Fagasele i te lalolafgi nei mo sua lalolagi. E seai se Atua na ko Koe, ko te Tafasili ite Maluga, ko te Matagofdie-Katoatoa.
- Bahá'u'lláh
Te matagofie e i luga ia Koe, O te Aliki toku Atua! E seai se mea e tasi e seke mai i Tou poto, io me e isi foki se mea e mafai o seke mai i Ou lima, io me se isi mea e mafai o fakalavelave ki Tau Galuega, me i loto i lagi io me i te lalolagi, i taimi ko teka io me mai mua nei.
E lavea ne Koe a te Palataiso mo latou foki kola i loto; ko Koe e taofi a te lalolagi mai i lalo mo latou foki kola i ei. A latou katoa ko Au tavini kae e taofi i loto i te kapu o Tou lima.
O te Aliki! Talia aka ke manumaalo Au tavini onosai i Ou aso mai i te talia a latou ki se manumaalo e ttau, pela loam o latou ne sala atu ki mate fakamatulo i Tou auala. Tuku ifo ki lalo i luga ia latou a mea kola e aumai ne latou a te tokaaga ki olotou mafaufau, kae fiafia i olotou uiga tonu, kae ka tuku atu a te fakatalitonuga ki olotou loto kae nofo toka ki olotou fuaitino kae ke mafai a olotou agaaga ola ko olo atu ki luga ite nofo-mai o te Atua, ko te Tafasili i te Maluga, kae ke maua a te Palataiso maluga mo malologa o te matagofie pela mot e mea ko oti ne fakasino ne Koe mo tagata o te poto tonu mo uiga llei. E tonu me e iloa ne Koe a mea katoa, a ko matou ko Au tavini, ko Au pologa, ko Au tino lago mo Au tino mativa. E seai se Aliki na ko Koe e kalaga matou kiei, O te Atua toku Aliki, io me e akai matou ki ne faka-manuiaaga io me ko alofa-fakamagalo mai i sose tino na ko Koe, O ko Koe tela kote Atua o te alofa-fakamagalo i te lalolafi nei mo sua lalolagi. A matou e seai ka ko fakatusa o te mativa, o te seai lele loa, ote faka-alofa mo mone, a ko Koe katoatoa ko te fakatusa o te maumea, o te tu tokotasi, o te matagofie, afioga mo te alofa e aunoa mo se tuakoi.
Fuli aka a te omotou taui, O te Aliki, ki mea kola e ttau kia Koe mo te llei o te lalolagi tenei mo te sua lalolagi, pela foki mo maukoloa e uke ko la e aumai i luga ki lalo ite lalolagi mai i lalo.
E tonu a Koe ko te omotou Aliki mo te Aliki o mea katoa. I Ou lima e nofo i ei a te omotou takavale, kae e nnau atmatou ki mea ko la e ia Koe.
- The Báb