Kamanomano (#10425)

Te Atua ae Atuau!  I a tia n teirake ao ni kitana mweengau, ao n teimatoa n taua roobun Am tangira ao I a tia n anga ngai ni kabanea nakon Am tararua ao Am kakaawakin.  I butiiko ni Mwaakam are Ko a tia iai ni kaawakiniia ake Ko tangiriia man tibanakoia man kawaiia ao te katei nakon te raoiroi, ao man kakiriwean te tua, ao ni kabane taan karaoi aaro akanne aika a aki tau are a bon tia ni kararoaiia Mairoum, kaawakinai ao kamaurai n Am atataiaomata ao Am nanoanga.
Karikai bwa Nna manga oki nakon mweengau ni Korakoram ao Mwaakam.  Boni Ngkoe ni koaua moan te Mwaaka, te Buoka n te kangaanga, ao te Maiu i bon Irouna.

-Bahá'u'lláh
-----------------------

Kamanomano (#16152)

E na kamoamoaaki Aram, O te Uea, Atuau! I bubutiko n Aram are rinanona e a roko te Aoa, ao te Manga kamaiuaki e a tia n roko taina, ao te maaku ao te ruru e buritiia nikabane ake i karawa ao nikabane ake iaon te aonnaba, ni kabwaroa te karau, man karawan Am nanoanga ao nangin Am akoi ae e mwamwannano, te bwai are e na kakukureia nanoia Am toro, ake a tia n rairaki Nakoim a ni buoka Am Waaki.
Kawakiniia Am toro ao Am tabonibaiaine, O au Uea, man kainikateben iango ni katautau ao iango aika akea nanoia, ao anganiia man bain Am karaoiroi te ninima man aa maraun waanakon ranin Am atatai.
Ngkoe, ni koaua, bon te Kabanea ni Mwaaka, te Kabanea ni Karietaaki, te Kabanea n Nanoanga, te Kabanea n Tituaraoi.

-Bahá'u'lláh
-----------------------

Kamanomano (#16153)

Inanon Arana, te Karietaaki, te Katoki n Rietaata, te Kabanea n te Tamaroa!
Ko na kamimitongaaki Ngkoe, O te Uea Atuau! O Ngkoe are Atuau, ao au Mwatita, ao au Uea, ao au Boutoka, ao au Kantaninga, ao au Tabo ni Katantan, ao au Ota. I Butiko, n Aram ae e Karabaaki ao ni Kaubwai, ae akea ae e ataia ma bon Ti Ngkoe i bon Iroum, ni kamanoa te tia uouota te Tabureti aio man taian kabuanibwai ao aoraki nako, ao mai irouia nikabane mwaane ao aine aika a buakaka; mai irouia katokin riaboro ibuakoia taan karaoi mwakuri aika a riaboro, ao mai irouia taan aki kakoaua ake a mwamwantiaka. Kamanoa, iaon riki, O Atuau, man kamaraki ao tabeaianga, O Ngkoe are Ko taua inanon Baim embwaean bwaai nako. Ngkoe, ni koaua, Ko mwaaka iaon bwaai nako. Ko karaoa are Ko bon taku, ao Ko anga te kaetieti n aron are Ko bon kukurei iai.
O Ngkoe Ueaia Ueea! O Ngkoe te Uea ae Ko akoi! O Ngkoe Boton te akoi Mangkoangkoa, te karaoiroi, te tituaraoi ao te angaanga! O Ngkoe te Tia Katoki aoraki nako! O Ngkoe te Tia Kataubobonga ni kainnano nako! O Ngkoe Otan te Ota! O Ngkoe te Otan iaon Ota nako! O Ngkoe te Tia Kaoti Taan Kaotioti nikabane! O Ngkoe te Tia Mwamwannano! O Ngkoe te Tia Nanoanga! Ko na anga Am nanoanga nako aon te tia uouota te Tabureti aio, rinanon te kabanea ni korakora n nanoanga ao Am karaoiroi ae e riao, O Ngkoe te Tia Karaoiroi, Ngkoe te Akoi. Tararuaia, iaon riki aio, rinanon Am kamanomano, man bwaai nikabane ake a na ribaia nanona ao ana iango. Mai ibuakoia ake iai irouia te mwaaka, Ngkoe, ni koaua, bon te katoki ni mwaaka. Mimitongin te Atua e mena iaom, O ngkoe taai ae ko tabe n otirake! Ko na kakoauaa te bwai are e a tia te Atua ni Kakouaa bon Ibukina, bwa akea riki te Atua Irarikina, te Kabanea ni Korakora, te Moan Tangiraki.

-Bahá'u'lláh
-----------------------

Kamanomano (#16150)

N aran te Atua, Uean te kakannato ni uea ae e riao, te Katokin te Katikinano.
E na katabuaki te Uea are inanon Baina boton te tautaeka. E kariki bwaainako ake E bon taku n Ana Taeka ni kaetieti “Riiki” ao e riki. Ana bwai te mwaaka n tautaeka ngkai ao rimwi, ao e na tiku bwa Ana bwai n aki toki. E karikiia bwa a na tokanikai naake E bon taku, rinanon mwaakan Ana kaetieti. Ngaia ni koaua te Kabanea ni Korakora, te Kabanea ni Mwaaka. Nakoina a kaineti mimitong ao kakannato ni uea nikabane inanon abanuean te Kaotioti ao te Karikibwai ao bwaai nikabane ake a wene imarenaia. Ni koaua, Ngaia te Mwaaka, te Kabanea ni Mimitong. Man te aki totoki E a tia n riki bwa Boton te korakora ae e aki kona n riaoaki ao e na tiku n arona anne n aki tootoki. Ngaia ni koaua Uean te korakora ao te mwaaka. Nikabane abanuean karawa ao aonteaba ao bwaai nikabane ake imarenaia bon Ana bwai te Atua, ao Korakorana e riaoi bwaai nikabane. Nikabane kaubwain aonteaba ao karawa ao bwaai nikabane ake imarenaia bon Ana bwai, ao Ana kamanomano e riaon tian bwaai nako. Ngaia te tia Karika karawa ao aonteaba ao bwaai nikabane ake a wene imarenaia, ao Ngaia ni koaua bon te tia kakoaua iaon bwaai nako. Ngaia Uean te Motikitaeka ibukiia nikabane ake a maeka i karawa ao i aonteaba ao bwaai nikabane ake imarenaia, ao ni koaua te Atua e waekoa ni motikitaeka. E katea te tia ni uakora are e baireaki nakoia nikabane ake i karawa ao i aonteaba ao bwaai nikabane ake imarenaia. Ni koaua, Ngaia te Katoki n Rietaata n Tia Kamanomano. E taua inanon baimatoan Baina kiingin karawa ao aonteaba ao bwaai nikabane ake imarenaia. Ni bon Kukureina are E anganako te bwaintangira, rinanon mwaakan Ana kaetieti. Ni koaua Ana karaoiroi e rabwatiia nikabane ao Ngaia te Tia Ataibwaai Nako.
Atonga: Te Atua e tau ibukiu; Ngaia are E bon taua inanon baimatoan Baina te abanuea ibukin bwaai nako. Rinanon mwaakan Ana runga ni karawa ao aonteaba ao bwaai nikabane ake imarenaia, E kamanoia naake E bon rineia ibuakoia Ana toro ake E bon taku i Nanona. Te Atua, ni koaua, e teimatoa n tantanii iaoia nikabane.
E aki kona ni uakoraaki aron Karietataakim, O te Uea! Kamanoira man bwai ake a wene i moara ao i akuura, i etan atuura, n angataira, n angamaingira, iaan waera ao n iterara nako ake a tangaina. Ni koaua, Am kamanomano iaon bwaai nako e bon aki kona ni kabwaka.

-The Báb
-----------------------

Kamanomano (#10426)

Au Uea!  Ko bon ataia bwa aomata a bane n otabwaniniaki n taian kammaraki ao n taian tekebuaka ao ni katomimiaki ma kangaanga ao kakumekume.  Ni katoa nako te kataitai ao e bon eweka te aomata, ao ni katoa nako te kangaanga aika a kakamaaku aikai n ai aron ana ewaewa te naeta.  Bon akea te tabo ni kamanomano ao ni kaawakin ma ti i aan bain Am kakaawakin, Am kamanomano, Am kairiiri ao Am tararua.
Bon Ngkoe are Ko nanoanga! Ae Atuau!  Am kamanomano bwa nanoangaeakiu!  Atuau!  Karika Am kakaawakin bwa au bwai ni katantan, Am kamanomano bwa otangau, karinanoau i matan mataroan Am katiteuana, ao Am tararua ma Am kakaawakin bwa au nono ao nneu.  Kaawakinai man au iango nako ao nanou ao kairiirai man aeka n aoraki nako, kataitai, kangaanga ma aeka ni kataitai aika a korakora.
Ni koaua, bon Ngkoe te Tia Kakaawakin, te Tia kairiiri, te Tia Kateimatoa, te Tia Karauaki, ao ni koaua boni Ngkoe nanoangaia nanoanga.

-`Abdu'l-Bahá
-----------------------

Kamanomano (#16151)

O te Atua, Atuau! Kamanoia Am toro aika a kakaonimaki man riaboron oin nanoia ao aia kaibwabwaru, kamanoia n te mata n taratara ae e tantanii n Am tangira n akoi man nikabane taian kairiribai ake a wene ni maan, te kairiribai ao te bakantang, kataniia inanon te nono ae e aki kona n niniaki n Am tararua ao, ni kamanoaki man kainikateben te nanououa, karikiia bwa taan kaotii Am kanikinaa aika a mimitong, kaotai moaia ma buraenimata aika a otanako ake a waanako man Bonginaumarin Am katiteuana n tamnei, kakukurei nanoia n taian kibu ake a kaotaki man Am abaniuea ae e tabu, kamatoai nanoia ni Mwaakam ae e rorooti are e roko man Am aonnaba ni mimitong. Ngkoe te Kabanea n Akoi, te Tia Kamanomano, te Kabanea ni Mwaaka, te Tia te Karaoiroi nako.

-`Abdu'l-Bahá
-----------------------

