Roronrikirake (#13719)

O te Uea! Karika te roronrikirake aei bwa e na raneanea, ao anga Am bwaintituaraoi nako aon te karikibwai ae e kananoanga aio. Anganna te atatai, kariaia karakaan korakorana ni katoaa tabwenan te ingabong ao tararuaia inanoan kamanomanon Am kakaawakin bwa e aonga ni mwaawa man te kaairua, bwa e na kona ni kabanea nanona nakon te beku ibukin Am Aro, ni kona ni kairiia naake a tiotionako, ni kairiia ake a aki konabwai, ni kainaomataia ake a tauaki ni kabureaki ao ni kautiia ake a aki mwemweuti, bwa a na bane ni kakabwaiaaki ma Uringakim ao Neboam. Bon Ngkoe te Mwaaka ao te Korakora.

-`Abdu'l-Bahá
-----------------------

Roronrikirake (#16123)

O Ngkoe te Atua ae Ko Akoi! Man oraitanin te kamwawaaki Ko a tia ni kaotii tamnei ake, n ai aron raneanean otan namwakaina, a kaotaanako otaia iaon abanuean te nano ao te tamnei, ni kaakeaia man anuan te aonnaba ni maiu ao ni kawaekoaia nakon abanuean te aki maamate. Ma te timna man marawan Am tangira-n-akoi Ko a tia n taainako ni kamwaimwaa onarokan nanoia ni karokoa ae a karekeaki te kaboouaki ao te tamaroa ae akea kabotauana. Boiararan tabun Am katiteuana n tamnei e kakianakoaki nakon taabo aika a raroa man raababa nako, ni kamrarai karewen katomamina ni kabutaa nako te aonnaba, ni kariki mwakoron nako te aonnaba bwa a na tuturu boia ma te boiarara.
Kateirakea ngkanne, O tamnein te Itiaki, takanoi ake, n ai aroia aomata ake a katabuaki, a na riki n inaomata ao n itiaki, a na katamaroa te aonnaba n aomata ma te kunnikai ae e boou ao te kamwarai ae e kamimi, n ukera akea riki bwa ti Ngkoe, n toua akea riki te kawai ma ti kawain kukurein Nanom ao n taekina akea ma ti miterion Am Waaki.
O Ngkoe te Atua ae Ko Akoi! Kariaia bwa te roronrikirake aio e na karekea are aia kantaninga ae te kabanea n rietaata naake a tabu. Anganna baina ni kiba man Am tituaraoi ae e kakorakora – bwaina ni kiba ibukin te kamwawaaki ao te buoka n tamnei – bwa e aonga ni kibarake ngkanne inanon karawan Am nanoanga ae e akoi, ni kona ni karekea tibwana man Am bwaintituaraoi ae e tabu, n riki bwa kanikinaean te kairiiri n tamnei ao te karinan ibukin te Runga are i eta. Ngkoe te Korakora, te Mwaaka, te Noraba, te Tia Ongo.

-`Abdu'l-Bahá
-----------------------

Roronrikirake (#16124)

O Ngkoe te Atua ae Ko akoi! Man Am tituaraoi anga baai ni kiba ni karawa aika uoua nako aoia rikirake aikai, ao anganiia te korakora n tamnei bwa a na kona ni kibarake inanon te tibeiti ae akea tokina aio ao ni kibarake nakon rietan te Abanuea n Abha. 
O te Uea! Kakorakorai taian ati aika a maraurau aikai bwa a na kona ngaia nikabane n riki bwa kaai aika a karikiuaa, ni maiureirei ao ni maiuraoi. Karikii tamnei aikai bwa a na tokanikai rinanon mwaakan Am runga ae e tabu, bwa a na kona n urui korakoran te kaairua ao te nanoroo ao ni kabwaranakoa te karinan n itamwaomwao ao ni kairiiri ibuakoia aomata; bwa a na kona, n ai aron ikeiken ni kakamaiu te aumarin, ni kabooua ao ni kamaiui kain tamneia aomata ao n ai aron karaun te aumarin ni kariki tawaana n te aba anne bwa a na mawaawaa ao ni maiureirei.
Ngkoe te Mwaaka ao te Korakora; Ngkoe te Tia Angaanga ao te Kabanea n Tatangira.

-`Abdu'l-Bahá
-----------------------

Roronrikirake (#16125)

O Ngkoe te Atua ae Ko akoi! Anga te kamatoa n tamnei nakon te nati te aine n te Abanuea, ao man Am tituaraoi buoka neiei bwa e na kona n tiku ni matoa ao n teimatoa inanon te Waaki ao bwa e na kona neiei, n ai aron te naitengkare n te onaroka n rooti ae e miterio, n anenei kuuna inanon te Abanuea n Abha inanon eenikuuna aika a rangin tangiraoi, ni uota te kukurei nakoia aomata nikabane. Karika neiei bwa e na karietaaki ibuakoia naati aine n te Abanuea ao kariaia bwa e na karekea irouna te maiu ae akea tokina. 
Ngkoe te Tia Angaanga, te Kabanea n Tatangira.

-`Abdu'l-Bahá
-----------------------

Roronrikirake (#16126)

Nebonebo ao mimitong Nakoim, O te Uea Atuau! Aio te kabanea n tamaroa ni kabwebwe are Ko a tia n unikia inanon tawaanan Am tangira ao n tia n tobwaia ma tabonibain Ueam. Ko a tia n tebotebokia man koburaken ranin te maiu ae akea tokina are e waawaanako man onarokan Am katiteuana ao Ko a tia ni kariki nangin Am nanoanga ae e tatangira bwa e na kabwaka karaun Am akoi nako aona. E a ikawai ngkai ao n rikirake iaan katantanin Am kakabwaia ake a kaotaki man Bonginaumarin oioin Tamneim. E a tia n otinako bwa banikai ao uee aika a tibwa bwebwerake, e taonako n taian uanikai rinanon tituaraoin Am bwaintangira ao bwaintituaraoi aika a kamimi ao ni kakamwakuraki man boiararan angina ae e aabebete are e ukaki man nnen Am tangira n akoi.
O te Uea! Karika te aroka ae e a tibwa bwebwerake aio bwa e na maiureirei, e na kaboouaki ao n bwebwerake n bwaronakon Am bwaintituaraoi ao Nanom ae e okoro, are mai iai Ko a tia n bwaintangiraia ma umwanriannan te katabuaki n Am Abanuea ae akea tokina ao n tia ni katamaroaa ma oioin te katiteuanaaki ni maraen te manga kaitiboaki.
O te Uea! Buokia rinanom Am tituaraoi ae e kakorakora are e roko man Am Abanuea ae e aki noraki, buokia ma taian runga ake a karabaaki mai mataia Am toro ao kariaia bwa e na kona ni matoa waena inanon Kaaniam. Kabwaranakoa newena bwa e na Tataekiniko, kaubwaia inanon te aonnaba are i eta ao kamatoaa rinanon Am tituaraoi bwa e na beku ibukin Am Waaki.
Bon Ngkoe te Kabanea ni Korakora, te Kabanea ni Mimitong, te Kabanea n Rietaata.

-`Abdu'l-Bahá
-----------------------

