Teimatoa (#10431)

Kaanim Ngkoe i rarikiu, bon nanou ao Kaotim bon katokan botuu, Nnem ae mimitong bon au toki, Aram bon katokan aorakiu, Am tangira bon kaotaakin nanou, Am beku bon kakukureiau are i eta, i eta!  I butiiko n Aram, are Ko a tia n anga iai nakoia aika a Kinako te konaa n roota Am iango ae moan te rietaata; ao ni kariaia ake a Neboiko n rierake nakon Am tabo are e tabu ae katauraoaki i bukiia aika Ko akoiia; ni buokai ni kaaitara Moam, ni kareke matau Iroum, ao n taekina Mimitongim.
Au Uea, bon ngai temanna are e a tia n mwanuokin bwaai nako ma ti Ngkoe, ao ni kaitaraa moan kaotin Am tangira, ao are e a tia ni mwaawa man bwaai nako, ma bon ti Ngkoe, n te aro ae Nna konaa ni kaania Matam.  Taraai ngkai I tabeki matau nakon Am kaintoka ae raneanea n ootan Matam.  Karuoa, ngkanne nako aou, Ngkoe ae tangiraki irou, n te aro ae Nna teimatoa iai i nanon Am Waaki, n te aro ae a aonga n aki tuukai nanokokorakiia aika a aki kakoauaa rairakiia Nakoim.
Boni Ngkoe ni koaua Atuan te Mwaaka, te buoka n taiani kangaanga, Moan te Mimitong ao te Korakora.

-Bahá'u'lláh
-----------------------

Teimatoa (#10430)

O Ngkoe are Kaaniam bon nanou, are Ngkoe kaaniu Nakoim bon au kantaninga, Ngkoe are Uringam bon nanou ae I tangiria, are Am oo ae e mimitong bon au kouru, are Am tabo ni maeka bon au toko, are Aram bon katokan aorakiu, are Am tangira bon kaotaan nanou, are te beku Ibukim bon katokin rietan ingaingan nanou ae I tangiria! I Bubutiko n Aram, are rinanona Ko a tia ni karekea angaia naake a Kinako ni kibarake nakon rietaatan taubukin Ataakim ao ni kakorakoraia naake a Taromauriiko ma te kakaonimaki bwa e na waerake nakon nanoaan oon Am bwaintituaraoi aika a tabu, ni buokai n raira moau nakon Moam, ni katuka au taratara nako Aom, ao n tataekina Mimitongim. 
Bon ngai, O au Uea, are I a tia ni mwaninga bwaai nikabane ma ti Ngkoe, ao n rairaki nakon Bongin Aumarin Am tituaraoi, are e a tia ni kaaki bwai nikabane ma ti Ngkoe n te kantaninga bwa nna kaaniaki nakon Am oo ae e tabu. Taraai, ngkanne ma matau ae e tararake nakon te Kaintekateka are e otanako ma raneanean otan Moam. Karuoa, ngkanne, nako aou, O au Tangira te baere e na karekea angaraoiu bwa nna teimatoa inanon Am Waaki, bwa e aonga aia nanououa taan aki kakoaua n aki tuukai man rairakiu Nakoim. 
Ngkoe, ni koaua, Atuan te Korakora, te Tia Ibuobuoki n tain te  kangaanga, te Kabanea ni Mimitong, te Kabanea ni Korakora.

-Bahá'u'lláh
-----------------------

Teimatoa (#16141)

E na neboaki Aram, au Uea ae Atuau.  I Bubutiiko ni Mwaakam are e rabwati bwaai nikabane ake a karikaki, ao ni Kakannatom are e a tia ni karikirakei bwaai nako, ao n Am Taeka ake a raba i nanon Am wanawana are Ko a tia ni karika iai karawa ma aonaaba, ake a na karekei arora n teimatoa n ara tangira i Bukim ao n ara ongeaaba nakon Nanom, ao ni kateimatoaiira bwa ti na taraa Matam, ao ni karaoa Neboam.  Kakorakoraiira, Atuau, ni kataorababaa Am kanikina i buakon baike Ko kariki, ao ni kaawakina Am Onimaki i nanon Ueam.  Ko a tia ni maiu i bon Iroum n aki kaantaninga man teuana are Ko karikia ao Ko na bon ti tiku n Arom anne n aki tootoki.
I anganiko nanou nikabane, ao I raira matau Nakoim, ao I kareke baiu ni mwiokon Am nanoanga ao n ingainga nakon nuun Am atataiaomata.  Tai kakioai nako man Am mataroa, Atuau, n ai aron teuare e nanobuaka, ao tai taua Am tangira mairou, bwa ti Ngkoe ae I Ukoukoriko.  Akea Te Atua riki i Rarikim, te Tia Kabwarabure ao Moan te Mwaaka.
Am bwai te neboaki, Ngkoe are Moan te Tangiraki irouia naake a Ataiko.

-Bahá'u'lláh
-----------------------

Teimatoa (#10432)

Te neboaki ao te kamimitongaki Ngkoe, Te Atua!  Kataua bwa e na konaa ni waekoa n ria te bong are rootan Nanoaam ae tabu.  Kakukurei nanora man kakain Am tangira ma kukurein Nanom ao anganiira te teimatoa bwa ti na konaa n nano n tauraoi n ongeaaba n Nanom ma Am Moti.  Ni koaua Am atatai e rabwati ni kabane bwaai ake Ko a tia ni karikii ke Ko na karikii ao Korakoram ni karawa e ririaon te bwai teuana ke teuana are Ko a tia n taneweia ke Ko na taneweia bwa e na riki.  Akea ae e na taromauriaki bwa tii Ngkoe, akea ae e na neboneboaki i Rarikim ao akea ae e na tangiraki bwa tii kukurein Nanom.
N te koaua boni Ngkoe te Tia Tautaeka ae e moamoa, te Koaua ae riao, te Buoka n te Nibwa ni mate, te Maiu i bon Irouna.

-The Báb
-----------------------

Teimatoa (#10433)

Te Uea ae Atuau!  Buokiia aika a tangiraki Iroum bwa a na teimatoa n Am Aro, n nakonako ni Kawaim, ma n nene n Am Waaki.  Anganiia Am tangira bwa a na tangira tuukan bwain te rabwata, bwa a na ira ootan te Kairiiri ae Tabu.  Boni Ngkoe te Korakora, te Tangira, te Maiu i bon Irouna, te Tituaraoi, te Nanoanga ao Moan te Mwaaka ao Moan te Atataiaomata.

-`Abdu'l-Bahá
-----------------------

