Tavaeega kae matagofie a Koe, O te Aliki, toku Atua! E mafai pefea ne aku o takutaku a Koe, kae e iloa fakalei ia au me e seai se laulaufaiva, e mafai o fakalauefa fakalei loa a Tou igoa, io me se manu eva ote loto o tagata, faitalia me e pefea a tena naunau, e mafai o fakamoemoe o fanaka ki luga i te lagi o Tau afioga mo te poto.

A te kamataga o mea katoa ko te poto ite Atua, ka kote fakaotiga o mea katoa kote fakalogo fakamaoni ki so se mea ko oti ne tuku ifo mai ite lagi tapu ote Finagalo Faka-te-Lagi tela e siomia i mea katoa kola i lagi mo mea katoa kola i luga ite lalolagi.

A te Fakaasiiga te la, mai i te favavau, ko oti ne tavaegina fakapatino me ko te Pogai mo te Feagaiiga a Pelofeta katoa a te Atua, mo te toe Manakoga taaua o Ona Faifekau, ko oti nei, auala atu i te Finagalo o te Mafi Katoatoa salalau pe la foki mai i Tena fakatonuuga e se-mafai o taofigia, ko oti ne fakaasi ki tagata. A te oko mai o se Fakaasiiga pena ko oti ne valogia i Tusitusiiga tapu katoa. Ke molimau me e pefea, e uiloa se fakapulaaga pena, a tagata ko olo seke kii loa mai i tena auala kae pono atu a latou mai i tena matagofie.

Fai atu: O koutou tino alofa kite Atua tonu Tokotasi! Taumafai, ko koutou ke lavea kae iloa tonu a Ia, kae fakalogo kite mea e tau ki Ana Fakatonuuga. Mea nei se Fakaasiiga, tela i ei, kafai se tagata e fakamaligi e pefea ate foliki p la me se motiga a toto mo ia, a tena taui ka lau i vasa mo vasa. Ke masaua, O taugasoa, ia koutou mana liakina a se taui tafasili i te lasi penei, io me e fakapuli a tena tulaga malifalifa. Mafaufau ki te uke o ola ko oti, kae koi fai loa pena, ne fasioti i se lalolagi e fakaloi ne se ata faka-se-tonu ko la ne faiite mai ne mafaufauga seai ne aoga o tino. Avatu a fakafetai kite Atua, pela eiloa me ko oti ne fakataunu ate Manakoga o tou loto, kae ko sokotaki kia Ia Tela kote Feagaiiga o malo katoa. Puipui a koutou, mote fesoasoani o te Atua tonu tokotasi – ke maluga a Tena matagofie – a te fakaaloalo o te tulaga o koutou ko oti ne fakataunu, kae piki mau ki mea ko la ka fakamasiki aka i ei a Tena Fakatokaaga. A Ia, e tonu, e fakatonu atu kia koe a te mea tonu pela foki mote faka-malugaaga o te tulaga o te tagata. Ke matagfoie a te Alofa-Fakamagalo, kote Folafola mai ote Tapeleti tafasili i te gali tenei.

Mea nei ko te Aso tela a alofaaga tafasili i te lei o te Atua ko oti ne ligi ifo ki luga i tagata, kote Aso tela a Tena alofa tafasili i te mafi ko oti ne faulu ki loto i mea faiite katoa. E fakapitoa ki luga i tino katoa ote lalolagi ke teuteu fakalei a olotou kesekeseega, kae, mo te tinaa fealofani mote filemu, o nofo mai lalo ote maluuga ote Lakau Ola o Tena atafai-puipui mote alofa-kaimalie. E ttau mo latou o piki mau ki so se mea tela, ite Aso tenei, ka lei kite fakamaluuga o olotou tulaga, mote avaka ki luga a mea kola e tafasili te lei kia latou. Fiafia a latou kola ate Pene matagofie-katoatoa ne gasue o masaua, kae fakamanuia a tagata kola olotou igoa, ona kote fakatonuuga a Matou e se-mafai o fuafuagina, Matou ne manako ke funa.

Akai fakamolemole koutou kite Atua tonu tokotasi ke talia ko tagata katoa ke mafai o feasoasoani gia fakalei ke fakataunu a mea e talia i Omotou mata. Ko pilimai ate oota ote aso nei ka pelu atu, kae ka fola atu se oota fou. E tonu, a tou Atua e faipati kite mea tonu, ka ko Ia ate Iloa o mea e se-lavea.

Mea nei kote Aso tela ate Vasa ote alofa fakamagalo ote Atua ko oti ne fakaasi ki tagata, kote Aso tela ate Fetu Ao o Tena alofa-kaimalie ko sulu maina a tena malifalifa ki luga ia latou, kote Aso tela a kaumana o Ana alofaga mataefa kooti ne pulougina i luga i tagata katoa. Mea nei kote taimi o fakafiafia kae fakafoou a latou kola fanoanoa auala atu i laumatagi malielie fakamaalosi ote alofa mote faka taugasoa, pela foki mo vai ola ote fakataugasoa mote fai meaalofa feasoasoani.

Latou kola ko fagasele ate Atua, i so se koga e nofo iei a latou mo so se tino e fetaui latou, e ttau o fakaasi atu, i olotou taumataga kite Atua, kae i se faifaiiga ote olotou vikiiga o Ona tavaeega mote agalelei, a se loto maulalo pena mote fakalogo ko atomu taki tasi katoa ote pefu mai i lalo o olotou alofivae mafi e fakatalitonu ate pooko o te olotou fakatuanaki. A sautalaaga e fai ne agaaga ola mana konei e ttau o fakailoagina mo se paoa tela ka fai iei a atomu foki loa kona ote pefu ka tumu ite fiafia mai i tena pokotia. E ttau mo latou o fai a olotou amioga i se auala tela ate laueleele tela e sasale ne latou ke se-mafai lele loa o faipati atu a muna konei: “Au e manako o fakasilisilia atu i luga ia koe. Auaa e molimaugina, au ite onosai o kave ate amoga tela ne tuku mai ne te tino fai fatoaaga ki luga ia au. Au kote mea fai galueega e avatu saale loa ki tino katoa a fakamanuiaaga a Ia Tela kote Kamataaga ote agalelei katoa ko oti ne tuku mai kia au, e uiloa ate fakaaloalo ne tuku mai kia au, mo fakatalitonuuga e se-lausia o toku maukoloa – se maukoloa e fakalave a manakooga ote foafoaaga kaatoa – onoono kite pooko o tou lotomaulalo, molimau kite tinaa fakalogo ne talia ke lakalakagina mai i lalo o vae o tagata. …”

Fakaasi atu ate onosai mote alofa fakapelepele mote alofa ki sua tino. Kafai a so se tino mai ia koutou e se-maua o puke ne ia ate meatonu, io me e taumafai o iloa, fakaasi atu, manafai e sautala mo ia, ise agaaga ote tafasili ite kaimalie mote agallelei. Feasoasoani kia ia ke lavea kae ke iloa ate meatonu, aunoa mo se fakataaua a koe kiei, maluga atu ia ia, io me iai ia koe a mea e uke atu.

Ate tiute katoatoa ote tagata ite Aso tenei kote mea ke maua ate tusaga ote tafeega mai ote agalelei tela ate Atua ne ligi atu kia ia. Ke mo aa se tino, e mafaufau kite lasi io me kote foliki o tena tusaga. Ate vaega o naai tino e mafai o takato i te alofilima o tagata, kote vaega o niisi e mafai o fakafonu a se ipu, ka ko niisi aka foki e se kalone loa ate olotou tusaga.

So se mata, ite Aso tenei, e ttau o salasala kite mea tela e silisili ite avaka ki luga ate Talitonuuga ate Atua. A Ia, Tela kote Meatonu Favavau, e fai mo Aku molimau! E seai so se mea e mafai, ite Aso nei, o fakapokotia se mae e lasi atu kite Tallitonuuga iloo ate faka-kinau mote fai-taua, kinauuga, fakamavevae mote paiee, i vasia o fagasele ate Atua, Fakasaoloto a latou, auala atu ite paoa ote Atua mo Tena feasoasoani mana, kae kausaki a koutou o fusi tasi a loto o tagata, i Tena Igoa, kote Fusitasi-ote-Filemu, kote Iloa-Katoatoa, kote Atamai-Katoatoa.

Akai fakamolemole koutou kite Tokotasi ke talia ko koutou ke mafai o tami ite manogi gali o amioga pena kola e fai i Tena auala, kae kautasi ite suamalie o se loto maulalo mote fakalogo kola e fakaasi atu ona ko Tena suafa. Fakapuli a koutou, kae fuli a outou mata ki mua i outou tuakoi. Tuku atu outou maalosi ki so se mea tela e fakalei atu iei akoga a tagata. E seai se mea, io me e mafai lele loa, o funa mai ite Atua, kafai koutou e tautali i Tena auala, ko Ana fakamanuiaaga e see-mafai o fuafuagina kae e see-mafai o tanumia ka ligii ifo ki lalo ia koe. Mea nei kote Tapeleti mainaina, kola ko ana kupu ko oti ne taafe mai ite Pene gasuesue a Ia Tela kote Aliki o lalolagi katoa. Manatunatu i outou loto, kae fai a koutou kola e fakalogo ki ana akoakoga.

Kilo atu, ite ala i tino mo itu-kaaiga kesekese ote lalolagi ne faitalitali kite vau ote Tokotasi ne Faifeagaiiga mai. Ne seki leva a ko Ia, Tela kote Laa ote Meatonu, ne fai ke fakaasi gina, iloo, katoa loa ko fuli keatea mai ia Ia, vagana ko latou e fiafia ate Atua o takitaki. Matou e see-mafai, ite Aso tenei, ne apai aka ate veli telaa e funa ate tulaga maluga o so se tino talitonu e mafai o fakataunu, kite kifu o se faaliiga pena e ttau o fakagasuke aka e mafai o mafua ko naai tino o matapo kae mate.

A Ia Tela kote Loto mote Senta ote Bayán ko oti ne tusi mai: “Ate tega tela e taofi i loto iei a maalosiiga ote Faaliiga tela ko fai nei me ko fakaekegina mote maallosi e silia atu i maalosiiga tapaani o latou katoa kola e tautali atu ia Au.” Kae, e toe mai mai a Ia: “Mai i fakataaua katoa ko oti ne tuku ne au kia Ia Tela ka vau mai i Oku tua, ate molimau tafasili loa ite takutakua e tenei, ko Taku fakatinoga tusia, e seai ne Aku pati e mafai o fakamatala fakalei loa a Ia, io mese faitau kia Ia i Taku Tusi, kote Bayán, e mafai o fai se fakamasinooga tonu ki Tena Talitonuuga.

So se tino tela e sala ki pookoga o vasa kola e moe funa i loto i muna maluga konei, kae e fuafua ate taaua o latou, e mafai o fai pela me ko maua ne ia se matemateega foliki ote matagofie e see-mafai o faipatigia ite mafi, tafasili ite maluga, mote Faaliiga tafasili ite mana ko oti ne fakaekegina. Mai ite sili ite malu o se Faaliiga e sillisili ite fakaaloalo gina a taugasoa fakamaoni e ttau o fakamaumau kiei. Ite amiotonu ote Atua tonu tokotasi! A manavaaga tonu o agaaga ola konei e maumea atu iloo koloa taaua katoa ote lalolagi. Fiafia ate tagata tela ko oti ne oko atu kiei, kae fanoanoa kia latou kola e se-fakalogo.

E tonu Au e fai atu, mea nei kote Aso tela a tagata ko mafai ne latou o kilo ki Mata, kae lagona ate Leo, o Tokotasi ne Faifeagaiiga mai. Ate Kalaga ate Atua ko oti ne avaka, ka kote mainaaga o Ona mata ko oti ne avaka ki luga i tagata. Se mea e ttau ko so se tagata ke solo keatea se maaka o so se muna e se lei mai ite tapeleti o tena loto, kae ke kilo atu, mote mafaufau e matala kae e se fapito, ki luga i failoga o Tena Fakaasiiga, ko fakatalitonuuga a Tena Misiona, mo mea alofa o Tena matagofie.

E takutakua kii ate Aso tenei! Ko manatunatu ne fai kiei i Mataupu Silisili katoa pela loa mote Aso ote Atua ko fakaaasi ki tena takutakua. A agaaga ola (soul) o so se Pelofeta ate Atua, o so se Mesenitia Faka-te-Lagi, e umiti kite Aso fakaofoofogia tenei. Ko itu-kaaiga kese kese ote lalolagi, e pena foki, ko naunau ke maua ne latou. Kae ne seki leva, tena laa, ko oti ne fakaasi mai ate Fetuao o Tena Fakaasiiga ite lagi ote Finagalo ote Atua, kae katoa, vagana ko latou ate Mafi-Katoatoa ne fiafia o takitaki, ne maua atu e seiloa o faipati kae galo a mafaufau.

Kooti Auu ne masaua ne koe! Ate veli tafasili ite see ko oti ne pono ne ia a tino ote lalolagi mai i Tena matagofie, kae fakatuai a latou mai ite lagona o Tena kalaga. Te Atua ke talia mai ate mainaaga ote fakatasitasi ke ufi ne ate lalolagi katoa, ka kote maaka “ate Maaloo io te Atua,” ke mafai o sitampa i luga i mualae o ona tino.

Mai i te amio tonu o te Atua! Mea nei ko aso ko oti ne fakatalitonu ne te Atua a loto o te saofiaga katoatoa o Ana Mesenitia mo Pelofeta, kae mai i tua atu o latou ko latou ko la e tu o puipui a Tena Koga-Nofo mana kae e seemafai o mafulifuli, ko tino nofo i te Fale mana faka-te-lagi mo latou ko la ite Fale Tapuaki Mana o te Matagofie. E pefea ate mafa, telaa la, ate tofooga mo latou kola e fakatasi mote Atua e ttau o fakaaogaa kia latou!

O Husayn! Mafaufau aka kite loto lei a niisi tino mo fenua kola ne faitalitali kite toe foki mai o Imám Husayn, tena vau, mai i tua ote sae mai ote Qá’im, ko oti ne fai-feagaiiga, i aso ko teka, ne tino filifilia ate Atua, ke fakamaluga a Tena matagofie. A tino mana konei, ko oti ne fakasalalau me kafai a Ia Tela kote Punaa Vai ote agalelei tuafia ote Atua e fakaasi a Ia, a Pelofeta katoa mo Mesenitia, e aofia iei ate Qá’im, ka fakatasi mai i lalo ote maluuga o te Tulaga mana tela ate Tokotasi ne Fai Feagaiiga mai ka avaka ki lluga. Ko oko mai ate itula. Ate lalolagi ko fakamainagia ite matagofie malifalifa o Ona mata. Kae e uiloa, killo aka mene pefea ate mao o ona tino ne olo fakaatea mai i Tena auala! E seai ko oti ne talitonu ia Ia vagana ko latou kola mai ite paoa ote Aliki o Igoa, ko oti ne ofa a tupua o olotou manatu seai ne aogaa mo manakooga masei kae ulufale atu kite fakai lasi ote mautinoa tonu. Ate ponooga o te Uaina filifilia ote Faaliiga ko oti, ite Aso tenei mo i loto i Tena Igoa, kote Ola-loa-ia-Ia, ko oti ne maofa, a tena agalelei ko ligi atu ki luga i tagata. Fakafonu a tau ipu, kae inu mai iei, i Tena Igoa, kote Tafasili ite Mana, kote Tavaegina-Katoatoa.

Ate taimi ne valogina ki tino mo itu-kaaiga ote lalolagi ko vau nei. A feagaiiga ate Atua, e tusi ite Tusitusiiga Tapu mana, ko oti katoa ne fakataunu. Mai i Siona ne fanatu iei ate Tulafono ate Atua, ka ko Ielusalema, mo mauga foliki mote laufenua iei, e fonufonu ite matagofie o Tena Faaliiga. Fiafia ate tagata tela e illoilo i tena loto ki mea kola ko oti ne fakaasi i Tusi ate Atua, kote Feasoasoani i Mea Faigaa, kote Ola-loa-ia-Ia. Mafaufau fakapooko ki luga ite mea tenei, O koutou ko fagasele ate Atua, kae tuku a outou taliga ke fakalogologo fakalei ki Tena Muna, kote mea ko koutou ke mafai, mai i Tena agalelei mote alofa fakamagalo tumau, ke mautakitaki kae se-gasuesue pela mote mauana i Tena Talitonuuga.

Ite Tusi a Isaia e tusi mai: “Ulu ki loto ite kaupapa, kae muni a koe ite pefu, ona kote mataku ite Aliki, kote matagofie o Tena afioga.” E seai se tagata tela e mafaufau fakapooko ki luga ite kupu tenei e se-mafai ne ia o lavea ate lasi ote Talitonuuga tenei, io me o tuku taumate ate tulaga maluga ote Aso tenei – kote Aso o te Atua. Kote kupu foki loa tenei e tautali i ana tua a muna konei: “Ka kote Aliki tokotasi ka fakamaluga gina ite Aso tena.” Kote Aso tenei ate Pene ote Tafasili ite Maluga ko oti ne fakamaluga gina i Tusitusiiga Tapu mana katoa loa. E seai se kupu ia latou e see-folafola iei ate matagofie o Tena Igoa mana, kae e seai se Tusi e see-fakamonia kite mauluga silisili ote ulutala tafasili ite maluga tenei. Moi fai a Matou ne takutaku a mea katoa kola ne fakaasi i Tusi faka-te-lagi konei mo Tusitusiiga Tapu mana e uiga mo Tena Faaliiga, ate Tapeleti tenei ko fakaasigina a feitu e faigata kii. E ttau ite Aso tenei, ki luga i tagata taki toko tasi katoa o tuku a tena talitonu katoatoa ki fakamanuiaaga tuafia ate Atua, kae tu ki luga o tufatufa atu, ise aualla tafasili ite atamai, a meatonu o Tena Talitonuuga. Kae e tena, kae e tena fua, ka mafai ate lalolagi katoa o puluogina nete mainaaga tafataeao o Tena Faaliiga.

Kote vikiiga katoa kite Aso tenei, kote Aso tela a manogi ote alofa fakamagalo ko oti ne agi agi mai i luga i mea faiite katoa, se Aso e sili ite fakamanuia gina ko tausaga ko teka mo senetenali e se mafai lele o fakamoemoe o fakatusa kiei, se Aso a mata ote Favavau o Aso ko oti ne fuli atu ki mua i Tena nofoaga mana. Mai iei a leo o mea faiite katoa, pelaa foki mai i tua atu ite Lukuuga mana mai i luga, ne lagona atu e pakalaga ki luga penei: “Fakavave a koe, O Kalamelu, auaa, ite mainaaga o mata ote Atua, kote Pule o Maaloo o Igoa mote Fakafoliiga o lagi, ko oti ne sau atu ki luga ia koe.”

Ulufia gina fakaoti ne te lifu, kae avaka ki luga a tena leo, e fai atu a ia penei: “Ke mafai a toku ola o fai pela me se taulaga kia Koe, pela foki ki luga mo Koe ko oti ne fakammau a Tau kilo ki luga i au, ko oti ne fakaeke ki luga i au a Tou alofa mataefa, kae ko oti ne fakasino au ki Ou kalafaga. Ate mavae mai ia Koe, O ko Koe kote Kamataga ote ola se gata mai, ko pilipili o pukegina au, ka ko toku mao mai i Tou nofomai ko oti ne faka kaa gina a toku agaaga ola. Ko vikiiga katoa kia Koe auaa ne fakamafai ne Koe au ke mafai o lagona a Tau kalaga, ke fakaaloalogina au ki Ou alagaa vae, mote fakavaveega a toku agaaga ola mai ite manogi pusaki gali o Tou Aso mote leo polepole o Tau Pene, se leo ne fakaeke ne Koe ite taimi foki tena ko Tau kamiiga maluga i vasia o Au tino. Kae kafai ate itula o Tau Talitonuuga tafasili ite maalosi kae e see-maua o taofi gina ko fai ke fakaasi mai ko oko kiei, a Koe ko manava i se manavaaga o Tou agaaga ki Tau Pene, ate foafoaaga kaatoa ka galulu ki ona fakavae, ko sae aka iei ki tagata a mea lilo kola e nofo funa i loto i kope taaua a Ia Tela kote Pule Aoao o mea mea faiite katoa.”

Ne seki leva kae oko atu a tena leo ki te Kogaa-koga tafasili i te fakamaalu ne fai atu a te Omotou tali penei: “Tuku atu a fakafetai ki tou Aliki, O Kalamelu. A te afi o tou mavae mai ia Au ko vave o fologina a koe, kafai a te vasa o Tou nofo-mai ko soko i ou mua, fakafiafia i ou mata mo mata o latou katoa i te foafoaaga, kae fakafonu mo te fiafia a mea katoa e lavea mo te se-lavea. Fiafia, aua i te Atua i te Aso nei ko oti ne fakatu i luga ia koe a Tena kalauna-faka-tupu, ko oti ne fai a koe me ko te aso-maalumaalu o Ana failoga mo te aso kamata o molimau o Tena Faliiga. E gali mo ia te la e tamilomilo fakapukupuku ia koe, te la e fakailoa atu a te fakaasiiga o tou matagofie, kae e toe-lau i ei a alofaaga mataefa o te Aliki tou Atua ko oti ne vaiua atu ki luga ia koe. Puke aka a koe ki te Ipu o te Ola-e-Favavau i te igoa o tou Aliki, ko te Matagofie-Katoatoa, kae fakafetai kia Ia, pe la mo Ia, i alofaaga o Tena alofa-fakamagalo mo koe, ko oti ne fuli a te fanoanoa ki te fiafia, kae fuli a tou fanoanoa ki te fiafia gali, kae mai i ei a Ia ne maligi Ona loimata.

“Kalaga atu kia Siona, O Kalamelu, kae fakapula atu a tala faka-fiafia: A Ia tela ne funa mai i mata o tagata ko vau! Ko Tena nofoaiga-faka-aliki manumaalo katoatoa ko lavea atu; ko Tena matagofie manumaalo-katoatoa ko fakaasi. Faetete ia koe mana fakatuai io me e lave. Fakavave ki mua kae faka tamilomilo i te Fakai Lasi o te Atua te la ko oti ne tuku ifo mai i te lagi, kote Fatu (Kaaba) mana i luga tela e siomio i ei i te faka-aloalo ne fagasele a te Atua, ko te piua olotou loto, mo te lukuuga o agelu. O, e pefea a toku loto naunau o fakailoa atu ki so se koga-koga o te lalolagi, kae avatu ki feitu takitasi katoa o fakai, a tala faka fiafia o te Faaliiga tenei – se Faaliiga i te loto o Sinai ko oti ne fakapilipili mai, tela i tena igoa a te Vaofoliki Ka e kalaga atu penei: “Kia Koe te Atua, te Aliki o Aliki, e ia koe a maalo o te lalolagi mo te lagi.” E tonu ko te Aso tenei tela a te laukele mo te tai ne fiafia o fakatasi i te fakapulaaga tenei, ko te Aso ko oti ne fakaasi ki luga i mea ko la a te Atua, mai i te alofa i tua atu o te mafaufau o tagata, io me ko te loto, ko oti ne fakasino mo te fakaasiiga. Ko pili kae malaga mai a te Atua i Tena Vaka i luga ia koe, kae fakaasi ki tino o Bahá ko la ko oti ne tusi i loto i te Tusi o Igoa.”

Fakamana gina ate Aliki o tino katoa, ite takuuga o Tena igoa ko atomu katoa ote laollagi ko galulu, ka kote Laulaufaiva ote Matagofie Gali Kese ko oti ne fai ke fakaasi a mea kola ne ufi i Tena poto kae foola atu a mea ne funa i loto i kope taaua o Tena mafi. A Ia, e tonu, mai ite maalosi o Tena igoa, kote Mafi, kote Maalosi-Katoatoa, kote Tafasii ite Maluga, kote pule o mea katoa i lagi mo mea katoa ite lalolagi.

Taumafai a koutou, O tino, ite fakatalitali ki aso ote fakamasinooga tonu Faka-te-Lagi, auaa ite itula ne fai feagaiiga mai ko oko mai. Faeteete ia koutou mana fakatamala o iloa fakalei a tena taaua kae e laugina ia latou kola e olo see.

Mafaufau ki taimi ko teka. E fia a taimi, maluga mote malalo, i taimi katoa, ne nofo fakatalitali kite oko mai o Faifekau ate Atua i foitino o latou tapu kola ko Ana Fagasele filifilia. E fakafia taimi ne nofo fakatali a latou ki Tena vau, e fakafia taimi ne talosaga kote laumatagi malielie ote alofa fakamagalo Faka-te-lagi e mafai o agi mai, ka kote Gali ne fai feagaiiga mai ko laka mai ki mua mai i tua o veli ote funaaga, kae fakaasi mai kite lalolagi. Ka ko so se taimi a faitotoa ote agalelei ne matala, ka ko kaumana ote alofa mataefa faka-te-lagi ne vaiua ifo ki luga i tino, ka kote mainaaga ote See-Laveagina ne maina mai i luga ite sikulagi ote mafi mai i luga, kae ne fakafiti katoa a latou kia Ia, kae fuli keatea mai i Ona mata – ko mata o te Atua ia Ia loa. ….

Toe iloilo aka, se aa ate pogai mo amioga pena? Se aa ate mea ne fakaoso a amioga pena ki Fai Fakaasiiga ote gali ote Matagofie-Katoatoa? So se mea i aso ko teka ne pogai kiei ate see-talia mo te teke o tino kona ne ala iei kite see-fakalogo o tino ite vaasia taimi tenei. O tausiusi i fakamaoniiga ote Sauniiga Alofa e se-katoatoa, tela ne fai iei mo pogai ote se-talia a tino, e seai aka foki na se fapaupau ko tuku aliali mai. E pefea ate mao mai ite agalelei ote Alofa Mataefa-Katoatoa mo Tena puipuiiga atafai mote alofaaga fakamagalo atafai o fakamatea a se agaaga ola mai i vasia o tagata katoa mote takitakiiga o Ana meaola, kae i sua feitu, o taofi mai ia Ia a fuafuaaga katoatoa o Tena fakamaoniiga faka-te-lagi, kae i sua feitu, o fakapokotia pa mafa se fakasalaaga tauii ki Ana tino ona kote olotou fuli keatea mai i Tena Tokotasi filifilia! E tonu, a fakamanuiaaga ate Aliki o tino katoa ko oti, i taimi katoa, auala atu i Faifekau o Tena Uiga Tonu Fakaasigia Faka-te-Lagi, e aofia iei ate lalolagi mo mea katoa kola e nofo iei. E seai se minute ne taofigia a Tena agalelei, io me ko matulutuluuga o Tena alofa-kaimalie e gata o vaiua ifo ki luga i tagata. Telaa lai i amioga pena e mafai iei o pogai mai ite seai aka foki na loa kote foliki ote fakatauuga o agaaga ola pena kola e sasale ite vanu ote faka-maualuga mote fakamatamata, kae galo atu i loto i vao ote mao, sasale i auala o manatu fakasupasupa, kae tautali ki manakooga o takitaki a olotou Talitonuuga. Ate olotou aiaa fakapitoa kote teke; kote olotou manakooga kote mea ke se-saga kite mea tonu. Ki so se tino matakite e iloa tonu kae laveagina me moi fai a tino konei i aso konei o Faifekau taki tokotasi ote Laa ote Meatonu e fakatapugia i olotou mata, olotou taliga mo olotou loto mai i so se mea ko oti ne lavea ne latou, lagona, kae puke kiei, e tonu loa ka maua ia latou o lavea ate gali ote Atua, io me e olo seke mao mai i koga nofo ote matagofie. Kae oti aka ne fuafua ate fakamaoniiga ate Atua ne te tulaga ote poto o latou, e maua mai i akoakoga o takitaki o olotou Talitonuuga, kae maua e kese mai mote malamalama foliki o latou, ne tu aka latou ki luga o fakatumau a amioga se-lei pena….

Mafaufau kia Mose! E fakauta kite tokotoko ote maaloo faka-te-lagi, fakalakeigia kite lima kena ote poto Faka-te-Lagi, kae fanatu mai ia ‘Párán’ (Toafa ite fakaosooga o Sinai) ote alofa ote Atua, kae fakaasi-asi ate gata mai ote paoa mote afioga ote favavau, ne sulu atu mai ite mainaaga o Sinai kite lalolagi. Ne kalaga atu ne Ia a tino katoa mo itu-kaaiga ote lalolagi kite maloo ote seai se gataaga, kae kami atu latou ke tami fakatasi ite fuaga ote lakau ote fakatuanaki. E tonu e iloa ne koutou ate teke maalosi o Falaoa mo ana tino, pela foki mo fuafatu o mafaufauga faka supasupa kola a lima ote kau fapaupau ne lafo ki luga ite Lakau Ola fakamanuiagia. Ne lasi kii ate teke ke oko ki taimi a Falaoa mo ana tino ite fakaotiiga ne tu ki luga kae taumafai kite mea e mafai ne latou o fakagata kite vai ate see tonu mote fakafiti ate afi ote Lakau Ola mana, aunoa mo se iloa ite meatonu me e seai se vai faka-te-lalolagi e ana maua o tamate a ulaaga ote atamai Faka-te-Lagi, io me ko fakamatakutaku faletino e mafai o tamate ate molii ote maaloo e tumau kite favavau. E tonu, a vai pena e see mafai na loa kote fakamaalosi ate ulaaga ote afi, mo fakamatakutaku pena e see mafai na kote fakapatonu ate puipiuiiga ote molii, mafai a koe e kilokilo mo mata ote lavea, kae e sasale ite auala ote finagalo mna mote fiafiaaga ote Atua..…

Kae kafai a aso o Mose ko fakaoti, ka kote mainagaa o Iesu, e sulu maina mai ite Punaa Aso ote Agaaga, ne siomia iei ate lalolagi, a tino katoa o Isalaelu ne tu ki luga o teke atu a Ia. Ne pa kalaga ia Ia Tela kote fakasae mai ne valo mai ne te Tusi Paia e ttau o folafola atu kae fakataunu a tulafono a Mose ka kote talavou tenei mai i Nazarene, tela ne fai a Ia kite tulaga ote Mesia faka-te-lagi, ko oti ne faka-seai a tulafono ote maavae avaga pela foki mote aso sapati – kote tulafono tafasili ite mafa a Mose. E se gata iei, ne aa a failoga ote Faifekau koi tuai o oko mai? A tino konei o Isalaelu ke oko ki taimi nei koi fakatalitali loa ite Faifekau tela e valo mai ne te Tusi Paia! E tokofia a Faifekau ote Mana, e tokofia a Fai Fakaasiiga ote mainaaga e se gata mai, ko oti ne sae mai talu mai i taimi o Mose, kae e uiloa a Isalaelu, ufigina i veli tafasili ite matolu o mafaufauga faka satani mo manatu fakasupasupa, koi nofo fakatalitali loa ite tupua o ona tugalima ka sae mai mo failoga pela mo mea ne mafaufaugina ne ia. Tena laa ate Atua ko oti ne tuku kia latou a olotou agasala, kae ko oti ne fakaseai ia latou, ate agaaga ote fakamaoni, kae fakafitaa latou ki ulaaga ote kanoloto ote afi. E tenei e seai aka foki se pogai na ko Isalaelu e see-talia ne latou o puke ate uiga o pati pena pela mote fakaasiiga mai ite Tusi Paia. E se maua lele loa ne Isalaelu o taofi tonu ate taaua o latou, ka kote kilo mai i tua, a mea tupu pena e see-mafai lele o aumai o pasia, a ia telaa la, e tumau pena aunoa mote lavea ne ia ate gali o Iesu mote matea o Mata ote Atua. Kae ko faitali loa ki Tena oko mai! Mai ite taimi favavau ke oko kite aso nei, a itu-kaaiga mo tino ote lalolagi ne piki mau ki mafaufauuga fakamoemiti kae e se-ttau, telaa la e fakaseai mai ia latou a vai manino e taafe mai i punaa vaitafe folikifiki ote piua mote mana…..

Kia latou kola e iai ia latou ate malamalama, e maina kae e iloa tonu me, kafai ate afi ote alofa o Iesu e fakaseai ne ia a veli ote gataaga o tino Iutaia, ka ko Tena puleega ne fakalaveagina kae fakamaalosiigia maalie, a Ia, kote Fai Fakaasiiga ote Gali e se-laveagina, e faipati ki se tasi o Ana soko, e uiga mo Tena galo atu, kae o fakamafanafana a olotou loto ite afi ote fanoanoa, ne fai atu kia latou: “Au e fano kae e toe foki mai kia koe.” Kae i sua koga Ana muna: “Au e fano kae vau a sua tino, Tela ka fai atu kia koe a mea katoa kola e seki fai atu ne Au, kae ka fakataunu ne Ia a mea katoa kola ne fai atu ne Au.”” A fuaiupu e lua konei e tasi ate laa uiga, mafai e mafaufau koe ki luga i Faifekau ote Aofatasi ote Atua ise kiloga poko Faka-te-Lagi

So se tino kilokilo e matakite ka lavea ite Tamillosaga ote Qur’án te Tusi mote Talitonuuga a Iesu ne faka patonugia. E uiga mote mataupu o igoa, Muhammad, ia Ia, ne folafola atu: “Au ko Iesu.” E lavea ne Ia ate tonu o failoga, valoaaga, mo pati a Iesu, kae fakamaoniia ia latou katoa ia te Atua. Ite uiga tenei, ate foitino o Iesu io me ko Ana tusitusiiga ko kese mai i tusitusiiga a Muhammad mo Tena Tusi mana, ko laua ko oti ne tiemiponi ate Talitonuuga ate Atua, ne faipatigia a Ona tavaeega, kae fakaasi atu Ana tulafono. Telaa la ko Iesu foki loa ia Ia, ne folafola atu: “Au ka fano keatea kae toe foki mai kia koe.” Mafaufau kite laa. Moi fai mai nei, “Au kote laa ite aso Anafi,” e faipati a ia kite meatonu. Kae kafai e se faipati kite mea tonu, ke masaua ite fakasolooga o taimi, e fai ia se isi mea aka mai tafa ote laa, a ia e faipati foki loa kite mea tonu. I se auala penei, kafai e fai mai i aso katoa e tasi kae e pau, e sako kae tonu. Kae kafai e fai, mote aava ki olotou igoa fakapitoa mo olotou tofiiga, me ia latou e kese, tena e tonu foki. Auaa e uiloa a latou e pau, e uiloa e tokotasi e lavea ate kese o tofiiga i mea taki tasi, se uiga lei fakapitoa, se amioga fakapitoa. Mafaufau e tusa mote kese fakapitoa, kote kesekeseega, mote uiga fakatasitasi o Faifekau kesekese ote mana, kote mea ke mafai ne koe o maina i fakatauuga ne fai ne te Tufuuga o igoa katoa mo uiga lei ki mea lilo ote kesekese mote fakatasitasi, ke maua ate tali ki tau fesili me kaiaa ate Gali favavau e ttau i taimi valevale e fakaigoa a Ia ki igoa mo tofiiga kesekese….

Kafai ate Se-Lavea, kote Favavau, kote Uiga Tonu Faka-te-Lagi, ne pogai kiei ate Fetu Ao o Muhammad ke fanaka mai i luga atu ote sikulagi ote poto, i vasia o mea e se-loto kiei kola a tiakono matuatua o Iutaia ne avaka o teke kia Ia me mai i tua o Mose e seai se Pelofeta e ttau o aumai mai ite Atua. Ao, se faipatiiga ne fai i Tusitusiiga Tapu ite Agaaga Ola Tela e ttau o fakaasi kae Telaa ka ave ki mua ate Talitonuuga, kae avaka ki luga a feitu lei o tino o Mose, kote mea ko Tulafono ote Tamilosaga “Mossaic” ke mafai o siomia iei ate laolagi kaatoa. Telaa la ko oti ate Tupu ote matagofie favavau ne fakasino i Tena Tusi ki muna ne faipatigia ne latou e olo saale ite vanu ote mao mote see: “’Ate lima ote Atua,’ muna a Iutaia,’e saigina i filifili.’ E saigina i olotou lima; Kae tena ne fai atu a latou, a latou malamalagia. E tonu, e fola atu Ona lima e lua! ““Ate lima ote Atua e mai i luga atu i olotou lima.” E uiloa a tino fai tala ote Qur’án ko oti ne sokotaki i auala kese kese a faiiga mo nofonofooga kite faaliiga ote kupu tenei, e ui iai a koe e ttau o taumafai ke iloa ate pogai iei. Ana muna: E se-tonu kote mea a Iutaia ne mafaufau kiei! E mafai pefea ne te lima o Ia Tela kote Tupu ote meatonu, Tela ne pogai kiei a mata o Mose ke fakaasi mai, kae fakaeke atu ki luga ia Ia ate gatu ote Tofi Pelofeta – e mafai pefea ate lima o te Tokotasi ke saisaigia ki filifili kae fakagata ke gasuesue? E mafai pefea a Ia o mafaufau me e seai sena maalosi o fakatu aka ki luga a se isi Mesenitia aka mai i tua o Mose? Onoono kite fakavalevale o olotou pati: e pefea ate mao ne fano seke mote auala ote poto mote malamalama! Onoono ite Aso tenei foki, a tino katoa konei ko saga aka loa a latou ki mea fakavalevale pena. E silia atu ite afe o tausaga ite lagiiga ne latou ate kupu tenei, kae fakasalalau mote lotomaa a olotou faitioga teke ki Iutaia, aunoa mo se iloa ia latou, matala kae e se iloa, ate fakaleooga o lagona mo talitonu o tino Iutaia! A koe e iloa tonu a olotou faka kinauga vaaivai, i Faaliiga katoa ko oti, i mataloa o te alofa fakamagalo Faka-te-Lagi ko pono, mai ite punaa o aso ote mana favavau e seai se Laa e toe fanaka ki luga, ite Vasa o te alofa mataefa favavau ko taofi ke se gasuesue, kae mai ite Tapanekolo ote matagofie anamua loa o Mesenitia ate Atua ko gata o fakaasi mai. Pena ate fuafuaaga ote malamalama o tino e foliki a olotou mafaufau kae matagaa. A tino konei ne mafaufau ite tafe mai ote agalelei aofia saukatoa mote alofa fakamagalo uke, ko fakagataaga tela e seai se mafaufau me mafai o fakamoemoe kiei, ko oti ne fakagata, Mai i feitu katoa a latou ko oti ne tu aka ki luga kae fai aka ka kanofi ote pule sauaa, kae taumafai kite mea e mafai o tamate ki vai kona o olotou manatu seai ne aogaa kite afi ote Vaofoliki e Kaa ate Atua, aunoe mo se iloa ite lalolagi ote paoa, i loto i olotau tafasilli ite maalosi,o puipui ate Lamepa ate Atua….

Onoono kite nofoaiga-a-tupu o Muhammad, te Mesentia ate Atua, i aso nei ko malamalama kae iloagina i vasia o tino. E iloa fakalei ne koe me se aa ate mea ne oko ki Tena Talitonuuga i aso kamata o Tena Tamilosaga. Ne aa a puapuagaa faka fanonoa ne fai ne te lima o latou masalosalo kae e se-talitonu, ko tiakono ote vaasi tausaga tena mo olotou taugasoa, ne fakamae ki luga ite Uiga Tonu faka-te-agaaga, kote Tino tela e tafasili ite piua mote mana! E pefea ate uke o mea makaikai mo mea talatala ko oti ne fakatatelatela ne latou i Tena auala! E fakamaonia ite tupulaga matagaa, i olotou fakatauuga faitogafiti kae faka satani, e manatu pela i so se fakamaeega kite Tino mana kae taaua se auala kite fakataunuuga ote fiafia tumau favavau; pela loa mo amioga a tiakono maluga ote vaasi taimi tena, pela mo ‘Abdu’lláh Ubayy, ‘Abú ‘Ámir, kote nofo tokotasi, Ka’b-ibn-i-Ashraf, mo Nadr-ibn-i-Hárith, ne fakaigoa ne latou a Ia me se tino pelo, kae fakasalalau ia Ia se tino fakavalevale kae takuvalea. A faitioga fakamasei pena ne avaka ne latou o teke kia Ia ite toe laulauuga o latou ate Atua ne fakatapu ne Ia kote vaitusi ke tafe, kote Motou pene ke gasuesue, io me kote itulau pepa ke mafai o kolomakigia a latou. A faitioga faka ita konei e fakaoso ne latou a tino ke tu kae fakaitaita kia Ia. Ate maalosi ote fakaitaita tena, kafai ko a tiakono maluga ote vaasi taimi tena ko takitaki e fakaoso ne latou, kafai e fakapelo ne latou a Ia ki olotou taugasoa, pei a Ia ki tua mai ite vaasia o latou, kae folafola atu ia Ia se tino fakatupu taua! E se-pau ate mea , kae ne molimaugina ne tino katoa?

Kote pogai tenei ne tagi atu a Muhammad ki luga: “E seai se Pelofeta ate Atua ko oti ne tigaina i se mae penei mo Au ne tigaina iei.” Kae ite Qur’án e tusi iei a fakamaseiiga mo fatufatuuga ne faipatigia o teke kia Ia, pela foki mo faitioga ne puapuagaa a Ia iei. Onoono koutou kiei, kote mea ke fiafia a koutou o iloa i mea kola ne oko ki luga i Tena Faaliiga. Ne fakamataku kii a Tena tulaga, tela i se taimi a mea katoa ne gata o fesokotaki mo Ia mo Ana taugasoa. So se tino e sokotaki mo Ia e fai mo se tasi eoko kiei ate sauaa e se gata o Ona fili….

Mafaufau ki mafulifuliiga i aso nei! Kilo kite fia o Tupu ne ifo a olotou tulivae mai i mua o Tena igoa! E fia ate uke o fenua mo maaloo kola ne sala kise afiiga mai i lalo o Tena ata, kola e molimau ate talitonu ki Tena Talitonuuga, kae miita a latou iei! Mai ite tulaga fai lotu e olo aka ki luga ite aso nei a pati tavae kola, ite tafaasili ite malalo, e vikia a Tena igoa fakaamanuiagina; kae mai ite tumu o fale maluga ate tagi ote kalaga e kami atu kite lukuuga o Ana tino e tapuaki kia Ia. Ke oko loa ki Tupu ote lalolagi ko se-talia ne latou o kau atu i Tena Talitonuuga ke tapale ate gatu ote se-talitonu, e uiloa e fakaasi kae fakataaua ate takutakua mote silia ite maalosi ote afioga ote Fetu Ao ote alofa-kaimalie. E pena a Tena nofoaiga-a-tupu, ko fakamaoniiga e lavea ne koe i feitu taki tasi katoa. Ate nofoaiga-a-tupu tenei e ttau o fakaasi kae fakatu i taimi ote olaaga o so se Faifekau ate Atua io me mai i tua o Tena galo ki Tena koga nofo tonu i lalolagi mai i luga….

E iloa gina i mafulifuliiga e aumai i taimi taki tasi katoa o Tamilosaga e aofia iei a kaumana pouli kola e fakalavelave ite vaa o mata ote malamalama o tagata mote Mainaaga Faka-te-Lagi tela e sulu maina atu mai ite punaa aso ote Uiga Tonu Faka-te-Lagi. Mafaufau mene tautali pouiiuli pefea a tagata ite fia o tupulaga o fakaatautau ki olotou tamana, kae ko oti ne akoako e tusa mo auala mo faifaiiga ko oti ne fakatoka ne manakooga o olotou Talitonuuga. Moi fai a tagata konei, o maua fakavave loa ne llatou ite Tagata, Tela ko oti ne nofo ite vaa o latou, Tela, ite avaa ki so se gataaga faka-te-tagata e pau mo latou, kae ko oti ne tu ki uga o fakaseai a so se akoga fakavae ne fakatu ne ootou Talitaonuuga – akoakoga kola ite fia o senetenali ne fakatonutonu a latou kiei, ka ko so se tino see-talitonu kae e fakafiti ko oti ne fai ne latou me ne tino fatauvaa, fakamaumau mea kae matagaa – a latou e tonu loa ka veli kae fakalavelavegina mai ite iloa ne latou a Tena meatonu. A mea pena e pela mo “kaumana” e veli ne latou a mata o latou kola a olotou kanoloto e seki tami ite motuuga keatea ote Vaipuna ote Palataiso (Salsabíl), io me e inu mai ite Vaitafe ote Paataiso (Kawthar) ote poto ote Atua. A tagata pena, mafai ko tai masani mo nofonofooga penei, ko fai a latou mene veligina, aunoa mo se fakafesiliiga, ne fakasalalau ate Faifekau ate Atua me se tino fatauvaa, kae fakasala ne a Ia kite mate. Kaati kooti ne lagona ne koe a mea pena e tupu i vasia o tausaga katoa, kae nei ko lavea ne koutou i aso konei.

E ttau kia matou, telaa la, o fai ate mea e mafai, mai ite feasoasoani e se-lavea ote Atua, a veli pouli konei, a tofotofooga ne aumai i kaumana mai ite lagi konei, ke se-fakalavelavegia kia matou mai ite lavea ate gali o Ona mata maina, kae ke lavea ne matou a Ia loa ia Ia.

Ate Tauolaola Faka-te-Lagi ko vau, O te Pene Tafasili ite Maluga, mote Festivolo ote Alofa Fakamagalo-Katoatoa ko pili mai fakavave. Fakagasue aka a koe, kae fakalasi, i mua ote foafoaaga kaatoa, ate igoa ote Atua, kae fakamasaua a Ona tavaeega, ise auala atamai ko mea faiite katoa ke mafai o toe ola aka kae fakafou. Faipati, kae sa taofigia a tou filemu. Ate fetuao ote fiafia e sulu maina mai i luga atu ote sikulagi ote Motou igoa, kote Fiafia, pela mote maaloo ote igoa ote Atua ko oti ne lakeigina kite fakagaligali ote igsa o tou Aliki, kote Tufuuga o lagi. Tuu ki luga mai i mua o fenua ote lalolagi, kae fakauta a koe mote paoa ote Igoa Tafasili ite Takutakua, kae sa fai pela mo latou e fakatalave.

Au e mafaufau ia koe ko oti ne taofi kae e se-fakagasuesue a Taku Tapeleti. E mafai ate maina o Mata Faka-te-Lagi ne fakaofofo kia koe, io me ko faipatiiga seai ne aogaa a latou fakakinau e fakafonu a koe mote fanoanoa kae e fakalavelave ki tau gasuesue? Fakalogo me mana isi se mea e fakalavelave atu kia koe mai ite vikiia ote takutakua ote Aso tenei – kote Aso tela ate Maikao ote afioga mote paoa ko oti ne tala ate pono ote Uaina ote Toefeiloai, kae kalaga atu kia latou katoa kola ite lagi mo latou katoa kola ite lalolagi. Filifili a koe ke fakatalave manafai ate laumatagi malielie e folafola ate Aso ote Atua ko oti ne manava i luga ia koe, io me ko koe to ia latou kola e ponogia ne se veli mai ia Ia?

E seai se veli i so se mea ne fakasaoloto ne au, O te Aliki o igoa katoa mote Tufuuga o lagi, ke ponogia au mai ite lavea a matagofie o Tou Aso – kote Aso tela ate lamepa ote takitakiiga kite lalolagi kaatoa, mote failoga o Aso Favavau kia latou katoa kola e nofo iei. A toku se fakalogoaa kote pogai a veli kola ne pono iei a mata o Au meaola kia Koe, mo toku se-faipati ona ko mea e fakalavelave a Ou tino mai ite lavea o Tau meatonu. E iloa ne Koe me se aa ate mea i loto ia au, ka ko au e seiloa ne au ate mea i loto ia Koe. A Koe kote Iloa-o-Mea-Katoatoa, kote Fakailoa-Katoatoa. Ite igoa tela e silia atu i igoa katoa! Kafai a Tau ikuuga tela e maluga atu kae maalosi-katoatoa e oko atu kia au, ka fakamaalosi ne ia au ke toe fakaola aka a agaaga ola o tagata katoa, mai i Tau Muna tafasili ite maluga, tela ko oti ne lagona ne au e faipatigia ne te Laulaufaiva ote paoa i Tou Maaloo ote matagofie. Kafai nei ia au ke mafai o fakasalalau ate faaliiga o Ou mata malifalifa kola ne nofo funa mai i mata o tagata nei ko fakaasigia i Tou igoa, kote Tafasili ite Maina kae Laveagia, kote tupu o Puipui, kote Ola-loa-ia-Ia.

E mafai o maua ne koe a so se tino na ko Au, O Pene, ite Aso tenei! Se aa ate mea ko oko kite foafoaaga mo fakaasiiga mai iei? Ka ko igoa mo olotou maaloo? Ko olo ki fea a mea faiite katoa, me e lavea io me e se-lavea? Ne aa a mea funa ote iunivesi ko ana faaliiga? O, ate foafoaaga kaatoa ko ogti ne pasia atu keatea! E seai se mea e toe mai vagana ko Oku Mata, kote Mafuta Favavau, kote Malifalifa, kote Matagofie-Katoatoa.

Mea nei kote Aso tela e seai se mea e mafai o lavea vagana ko agalelei gali ote Mainaaga, kote Matagofie, kote Alofa Mataefa Takutakua. E tonu, Matou ko oti ne fai ko so se agaaga ola taki tasi ke oti ona kote nofoaiga-a-tupu e se-mafai o taofigia kae manumaaloo katoatoa. Matou ko oti, ne kaalaga atu ke fakafoliga mai a se foafoaaga fou, pela me se fakaasiiga ote Motou agalelei ki tagata. Au, e tonu, kote Alofa Mataefa-Katoatoa, kote Favavau o Aso.

Mea nei kote Aso tela ate lalolagi e se-lavea ne tagi atu ki luga: “Takutakua ko tau fakamanuiaaga, O te lalolagi, auaa ia koe ko oti ne fai pela me se lago o tou Atua, ko oti ne filifilia me kote nofoaga o Tena nofoaga kalauna mafi.” Ate lalolagi ote matagofie e kalaga atu: “E mafai a toku ola o tuku fakataulaga mo koe, auaa a Ia Tela kote Fagasele ote Alofa Fakamagalo Katoatoa ko oti ne fakatu a Tena nofoaiga-a-Tupu i luga ia koe, auala atu ite paoa o Tena igoa tela ko oti ne faifeagaiiga atu ki mea katoa, i taimi ko teka io me i taimi mai mua.” Mea nei kote Aso tela a so se manogi suamalie ne maua mai a tena manogi mai ite manogi o Toku gatu - se gatu ko oti ne sulu atu a tena sinu manogi sausau ki luga ite foafoaaga kaatoa. Mea nei kote Aso tela a vai tafe makini ote ola e se-gata ko puna mai ki tua mai ite Finagalo ote Alofa Fakamagalo-Katoatoa. Fakavave a koutou, mo outou loto mo agaaga ola, kae inu outou tusaga, O Lukuuga mana o lalolagi mai i luga!

Fai atu: A Ia Tela kote Faifekau a Ia Tela kote Se-Mafai o Iloa, kote Se-Mafai o Lavea, e se atafia ne koe. A Ia Tela ko oti ne fola atu fakalavea i ou mua ate Fatu Taaua e funa kae taaua, mafai a koe e salasala kiei. A Ia Tela kote Fagasele tokotasi o mea katoa, i taimi ko teka io me ko taimi mai i mua. E mafai ne koutou o tuku a outou loto ki luga ia Ia!

Ne lagona ne Matou ate leo o Tau fakamolemole, O Pene, kae fakamagalo a tou se fakalogoaa. Se aa telaa ko oko loa ate fakaofoofogina kia koe?

Ate faka takamiomio o Tou nofomai, O te Fagasele Sili o lalolagi katoa, ko pukegina kae pule ia au.

Tuu ki luga, kae folafola atu kite foafoaaga kaatoa, a tala lei ia Ia Tela kote Alofa Fakamagalo-Katoatoa ko oti ne fakasaga atu Ona alagaa vae kite Ridvan kae ko oti ne ulufale atu iei. Takitaki atu, tena laa, a tino kite fatoaaga ote fiafia tela ate Atua ko oti ne fai me kote Nofoaga-a-Tupu o Tena Palataiso. Matou ko oti a koe me kote omotou Pu matautia, tela a tena tagi e fakalavea iei ate fakasaooga o tino katoa.

Fai atu: Mea nei kote Palataiso i luga iei ko ana lau ne maua mai iei ate uaina ote faipatiiga ko oti ne sitamapa ate fakamaoniiga: A Ia tela ne funa mai i mata o tagata o fakaasi mai, fusigia kite nofoaiga-faka-tupu mote paoa!” Mea nei kote Palataiso, kote gaseseega o ona lau ne folafola mai: “O koutou kola e nofo i lagi mote lalolagi! Ko oti ne fakasae mai tela e seki fakasae mai aka loa mai i mua atu, a Ia Tela, mai ite favavau, ne nofo funa a Ona mata mai i mata ote foafoaaga ko sae mai.” Mai i musumusuuga ote laumatagi ili malielie tela e agiagi i vasia o kaula e vaiu iei ate tagi: “A Ia Tela kote Aliki tupu o tino katoa ko fakaasigia. Ate Maaloo io te Atua,” kae e ui iai mai i vai tafe e mafai o lagona atu a musumusuuga: “A mata katoa ko faka fiafia, mo Ia Tela e seai ko oti ne laveagia, tela a Tena mea funa e seai se tino kai maua aka ne ia, ko oti ne avaka ate veli ote matagofie, kae suke matala a mata ote Gali.”

I loto ite Palataiso, kae mai ite tumu maluga o potu tafasili ite malu, a Agelu Fafine ote Lagi ne tagi aka ki luga kae pa kalaga atu: “Fiafia, koutou ko tino e nofo i lalolagi mai luga, auaa i maikao o Ia Tela kote Favavau o Aso ko tagi, ite igoa ote Matagofie-Katoatoa, kote Peele Tafasili ite Takutakua, ite kogaloto ote kano loto o lagi. A lima ote alofa mataefa ko oti ne siomia faka takakakai ite ipu ote ola e se gata mai. Fakapili atu kiei, kae inu a tou tusaga. Inu ise fiafia ola lei, O koutou kola kote fakafoliiga mai ote naunau, koutou kola ko fakafoliiga o manakooga e faifitoi!”

Mea nei kote Aso a Ia Tela kote Fakaasi o igoa ote Atua ko oti ne laka atu ki tua ote Tapanekolo ote matagofie, kae folafola atu kia latou katoa kola i lagi mo latou katoa ite lalolagi: “ Tuku keatea a ipu ote Palataiso mo vai katoa e maua iei ate ola e iai ia latou, auaa, i tino Bahá ko oti ne ulufale atu ite nofoaga manuia ote Nofomai Faka-te-Lagi, kae inu ite uaina ote toe feiloai, mai ite ipu ote gali ote olotou Aliki, kote Pule Aoao-Katoatoa, kote Tafasili ite Maluga.”

Fakapuli ate lalolagi ote foafoaaga, O Pene, kae fuli koutou ki mua i mata o tou Aliki, kote Aliki o igoa katoa. Fakafou, na la, ate lalolagi ki lakei o alofaaga o Tou Aliki, kote Tupu o aso favavau. Auaa a Matou e atafia ate manogi gali ote Aso a Ia Tela kote Manakooga o fenua katoa ko oti ne sulu maina atu ki luga i maaloo ote se-lavea mote lavea ate gali matagofie ote mainaaga o Ona igoa tafasili ite silisili, kae pulougina a latou kite malifalifa o mainaaga o Ana alofaaga agalelei – alofaaga e seai e ana maua o fakatau vagana ko Ia, Tela kote Puipui maalosi sili ote foafoaaga katoatoa.

Sa kilo ki luga i meaola faiite ate Atua sei vagana mote mata alofa mote alofa fakamagalo, auaa ite Motou atamai alofa ko oti ne ulu i loto i mea faiite katoa, mote Omotou agalelei ko aofia siomia iei ate lalolagi mo lagi. Mea nei kote Aso tela a tavini tonu ate Atua ko kautasi i vai ola ote toe feiloai, kote Aso tela a latou kola e pili kia Ia e mafai o inu ite vaitafe tafe malielie ote ola e seai se gata mai, ka ko latou kola e talitonu i Tena fakatasitasi, ate uaina o Tena Nofomai, auala atu ite iloa ne latou a Ia Tela kote Tafasili ite Maluga mote Fakaotiiga Fakaoti o tino katoa, ia Ia ate Laulaufaiva ote Afioga mote Matagofie e fakaleo atu ate kalaga: “Ate Maaloo e Aku. Au, ia Au loa, ko au, e Oku ate saolotooga, ko tena Tupu.”

Fakalata mai a loto o tagata, auala atu ite kalaga a Ia, kote Fagasele tokotasi. Fai atu: Mea nei kote Leo ote Agaaga, e seki iloa ne koutou. Mea nei kote Punaa Kogaa-Koga ote Talitonuuga ate Atua, mafai e lavea ne koe. Mea nei kote kamataaga ote tulafono ate Atua, manafai e fakamasinio ne koe fakalei. Mea nei e lavea atu kote Mea Funa; e maafai o iloa ne koutou. O tino ote lalolagi! Pei keatea, i Toku igoa tela e silia atu i igoa aka katoa, a mea kola e nofo mo koutou, kae ufi aka ki lalo a koutou ite Vasa i ona pookoga e takato funa iei a penina ote atamai mote faipati, se vasa tela e sooko i Toku igoa, kote Alofa Fakamagalo-Katoatoa. E tena e fakatonu atu kia koe ne Ia Tela kote Matua o Tusi.

Ate Fagasele Sili ko vau. I Tena lima fakaata mai kote Uaina ne ponogia a Tena igoa. Fiafia ate tagata tela e fuli kia Ia, kae inu a tena tusaga, kae pa kalaga atu: “Tavaeega ke iluga ia Koe, O kote Fakaasi o failoga ate Atua!” Ite amiotonu ote Mafi Katoatoa!” A so se mea funa ko oti ne fakaasi auala atu ite paoa ote meatonu. Ko alofaaga katoa ate Atua ko oti ne tuku ifo ki lalo, pela me se failoga o Tena agalelei. A vai ote ola se gata ko oti, ite taimi o latou, ne tuku atu ki tagata. So se ipu ko oti ne puke ne te lima ote Fagasele-Lei. Fakapilipili atu, kae sa fakatuai, e uiloa ite toetoe ote taimi.

Fakamanuiagia a latou kola e lele I olotou kapakau ote motu keatea kae fakataunu ate tulaga tela, e fakaeke mai ne te Atua e pulougina ate foafoaaga kaatoa, tela e se gata fua i mafaufauga seai ne aogaa o tino poto, io me kote taulasiiga o tino ite lalolagi ko manumaaloo o fakaseke mai i Tena Talitonuuga. Ko ai ia koutou, O tino, e liakina keatea ate lalolagi, kae fakapilipili atu kite Atua, kote Aliki o igoa katoa? Tefea a ia e maua mai tela, mai ite paoa o Toku igoa tela e fanaka ki luga i mea faiite katoa kola e nofo mo tagata, kae piki, mo tena maalosi kaatoa, ki mea ne fakatonu mai ne te Atua, kote iloa o mea se lavea mote lavea? Tena ne tuku ifo ki lalo i tagata ne Tena alofa mataefa, ko fakataunu iei a Tena fakamaoniiga, mo Tena fakatalitonuuga e sulu atu mai i luga ite Sikulagi ote alofa fakamagalo. Maukoloa kote failoga tela ka maua ne ia tela e talitonu kae pa kalaga atu: “Ke tavaegia a Koe, O ate Fagasele o lalolagi katoa! Fakalasi a Tou igoa, O ko Koe kote Manakooga o so se loto malamalama!”

Fiafia i se fiafiaaga tafasili, O tino o Bahá, kae kalaga koutou o fakamasaua ate Aso ote tafasili ite fiafia, kote Aso ote Laulaufaiva ote Favavau o Aso ko oti ne faipati, a ko Ia ka liakina mai i Tena Fale, o fanatu kite Laukele mai iei ka sulu atu kite foafoaaga kaatoa o agelelei taulekaleka o Tena igoa, kote Alofa Fakamagalo-Katoatoa. Ate Atua kote Omotou molimau. Moi fai a Matou e fakaasi a mea funa ote Aso tena, a latou katoa kola e nofo ite lalolagi mo i lagi ka matapo kae mate, vagana ko latou kola e tausigia ne te Atua, kote Mafi-Katoatoa, kote Iloa-Katoatoa, kote Atamai-Katoatoa.

E pena ate pokotia takamiomio o muna ate Atua ki luga ia Ia Tela kote Fakaasi o Ana fakamaoniiga mautinoa tonu, tela a Tena pene ko se mafai ne ia o toe gasuesue. Ko muna konei aa Ia ne fakaoti mai i Tena Tapeleti: “E seai se Atua na ko Au, kote Tafasili ite Maluga, kote Tafasili ite Maalosi, kote Tafasili ite Silisili, kote Iloa-Katoatoa.”

Ate Pene ote Faaliiga e kalaga atu: “Ite Aso tenei ate Maaloo io te Atua!” Ate Laulaufaiva ote Maalosi ko kalaga: “Ite Aso tenei a nofoaiga-faka tupu katoa, e tonu, ei ite Atua!” Ate Manulele (Phoenix) o lalolagi mai i luga ko tagi atu mai ite Kaula ote favavau: “Ate matagofie o takutakua katoa e io te Atua, kote Se-Fakatusagia, kote Silisili o Maalosi Katoatoa!” Ate Lupe Fakaa-te-Agaaga e folafola atu mai i tena koga nofo, ite Palataiso ote se gata mai: “Ate kamataaga ote foai alofa katoa e vau, ite Aso tenei, mai ite Atua, te Tokotasi, kote Fakamagalo!” Ate Manueva ote Nofoaga-a-Tupu e fakaleo mai a tena pese i tena ofaaga mana: Silisili ite maluga e tuku atu, ite Aso tenei, kite seai aka foki na kote Atua, a Ia Tela e seai e tusa io me e pau mo Ia, Tela kote Tafasili ite Maalosi, kote Manumaaloo-Katoatoa!” Ate uiga loto o mea katoa e fakaleogia i mea katoa ate fakamaoniiga: “A fakamagalo katoa e tafe, ite Aso tenei, mai ite Atua, a Ia Tela e seai e mafai o fakatusa, kia Ia e seai e kautasi e mafai o soko, kote Tupu Puipui o tagata katoa, mote Funa o olotou agasala!” Ate Uiga Tonu Tafasili ote Matagofie ne avaka a tena leo mai i luga atu o Toku ulu, kae tagi atu mai i koga maluga tela e seai se laulaufaiva e mafai o fakamatala” “Ate Atua ko taku molimau! A Ia, kote Pilitakiiga o aso e tumau kite se gata mai ka oko mai, saigia ite afioga mote paoa. E seai aka se Atua na ko Ia, kote Matagofie-Katoatoa, kote Mafi-Katoatoa, kote Tumu sili ite Maluga, kote Atamai-Katoatoa, kote Siomia-Katoatoa, kote Lavea-Katoatoa, kote Fakailoa-Katoatoa, kote Nofoaiga-a-Tupu Puipui, kote Kamataaga ote Mainaaga favavau!”

O Taku tavini, tela ko oti ne sala kite fiafia-lei ote Atua kae piki ki Tena alofa ite Aso a tino katoa na fua ko naai tino kola ko oti ne nofoakigia mote lavea ko oti ne motu atu keatea mai ia Ia! Ke mafai ate Atua, mai i Tena agalelei, o taui atu a koe kise taui e kaimalie, fakamaoni kae tumau kite se gata, pela mo koe ne sala atu kia Ia ite Aso a olotou mata ko tauaso. Ke iloa ne koe me kafai a Matou e fakaasi kia koe pela fua me se motimotiiga fua o vai tela, mai ite tonu ate Atua, kola a lima o latou lotomasei kae kaitaaua, ko vaiua ifo ki luga ia Matou, a koe ka tagi fanoanoa ise tagi tafasili, kae ka tagi koe ite ao mote po ite Motou tulaga puapuagaa. O, e mafai o maua se agaaga ola e lavea ne ia ate Faaliiga tenei mo ana mea fakaofoofo – ne fakaofoofooga kola e folafola kite nofoaiga-faka Tupu ote Atua mote takutakua o tena paoa. E mafai a se tagata pena o tu aka ki luga mote katoatoa ona kote Atua, poloaki, funa kae matala, a tino, ke fiafia a latou e mafai o gaasue a latou o feasoasoani kite Tokotasi ne fakasee-gina Tela a tino galue faka puapuagaa ko pokotiagia ite amioga se-lei.

Au e mafaufau e lagona ne au ate Leo ote Agaaga Tapu e kalaga mai i Oku tua o fai atu penei: Fakamafuli a Tau ulutala, kae fuli a Tou leo, ite loto o ia tela ko oti ne fakamau a tena kilo ki luga i Ona mata ka faka fanoanoagia. Fai atu: Ko oti au ite agalelei ote Atua mo Tena mafi ne sala kite feasoasoani kite seai aka foki i taimi ko teka, io me ka sala au ki se feasoasoani o se isi tino i taimi mai mua. A Ia Tela ne feasoaosani kia Au, mai ite paoa ote meatonu, i taimi o aso o Toku faka fenua kese i ‘Iráq. A Ia Tela ne pulougia a Au ki Tena puipuiiga i se taimi a itu-kaaiga ote lalolagi ko nofo o fai fili mo Au. A Ia Tela ne faka mafai Au ke liakina ate fakai lasi, e pei kite gatu ote malu tela e seai aka foki, vagana ko latou fakafiti kae amio leaga, e mafai o fakatamala o fakaasi.

Fai atu: A taku potukau taua ko Toku fakamoemoe ite Atua; Aku tino, kote maalosi o Toku nofo talitonu ia Ia. Toku alofa ko Taku fuafuaaga, mo Toku taugasoa kote masaua ote Atua, kote Aliki tupu o tino katoa, kote Tafasili ite Maalosi, kote Matagofie-Katoatoa, kote Se-fakanafagia.

Tu ki luga, O tino fai malaga ite auala ote Alofa ote Atua, kae feasoasoani a koe ki Tena Talitonuuga. Fai atu: Sa selagina a keatea ate Talavou tenei, O tino, ona ko mitamitaaga ote lalolagi tenei io me ko fakafiafiaaga ote lagi. Ite amiotonu ote Atua tonu tokotasi! E tasi ate laulu o Ia e silia atu i mea katoa i lagi mo mea katoa ite lalolagi. Faetete, O tagata, ia koutou mana fakaosooso ke mavae mo Ia o fesuiaki mo aulo mo siliva kona e nofo mo koutou. Ke fai a Tena alofa pela me se fale tausi o koloa taaua mo outou agaaga ola ite Aso tenei i taimi e seai aka foki na ko ia ka aogaa kia koe, kote Aso a so se pou ka polepole, kafai a pakili o tagata ka mafolefole, kafai a mata o tino katoa ka kilo atu ki luga ite mataku. Fai atu: O tino! Mataku koutou kite Atua, kae sa fuli keatea fakamatamata mai i Tena Faaliiga. Ifo katoatoa i luga i outou mata mai i mua ote Atua, kae fakamasaua Ona tavaega i ao pela foki mo po.

Ke fai a tou agaaga ola ke maina ite ulaaga ote Afi tenei e se-maua o mate tela e kaa ite kanoloto ote lalolagi, i se auala atamai a vai ote iunivesi ka seai se maalosi o fakamoko aka ki lalo a tena lotolei fiafia. Takutaku a tou Aliki, kote mea ke fiafia a latou se fakalogo i vasia o Motou taugasoa kae ke mafai o poloaki gia mai i au muna, mo loto o latou amiotonu ke fakafiafia.

Fai atu: O tagata! Mea nei se Aso e se-fakatusagia. E se-fakatusagia e ttau, pena foki, kote laulaufaiva tela e fakamasaua a tavaeega ote Manakooga o fenua katoa, kae e se-fakatusagia ate galueega tela e kausaki ke taliagia i Ona mata, ke mafai o fakataunu ate mea tela e ttau ki tena tulaga, kae e taaua ki tena fakaotiiga. Fakamanuia kite tagata tela a faigaa mea ote lalolagi ne seki kafi o fai a ke se-lavea a Ia Tela kote Aliki o mea katoa.

Ate loto o tagata ko oko loa ite tauaso kola a mea e tupu te fakai lasi, io me kote tuku ifooga ate mauga kite pefu, io me kote matofitofiiga ote laukele, e mafai o lue a tena se-gasuesue. A fakaasiiga ne fai ite Tusitusiiga Tapu ko oti ne fola ke matala, ka ko failoga ne tusi iei ko oti ne fakaasi, ka ko tagi faka pelofeta ko soko loa ate avaka. Kae e ui iai, vagana ko mea e fiafia ate Atua o takitaki, e numi ite fakavalevale ite olotou se-fakalogo!

Molimau ite lalolagi ko pokotia ne fakalavelave lasi i aso katoa. Ona puapuagaa ko soko loa ite fakamataku. Mai i taimi ate Súriy-i-Ra’ís (Tapeleti kia Ra’ís) ne fakaasi ke oko mai ki aso nei, ate lalolagi e seki faka filemugina aka loa, io me ko loto o ona tino kai manava ifo aka loa. Ite taimi e tasi ne faka kaitaua a ia mai i faka kinauuga mo faka kesekeseega, i sua taimi ko maataku valevale faigia ne taua, kae pokotia aka ne famai masei. A tena masaaki ko pilipili mai kite tulaga ote maatua seai se fakamoemoe, pela mote Tokita tonu e fakatapu manafai se mea e foo kiei a masaki, ka ko tokita e seai se iloa e fiafia kiei, kae tuku kia latou ate saoloto katoatoa o fai a olotou mea… Ate pefu ote fakalavelave ko faka kaumanaa i loto o tagata, kae faka tauaso a olotou mata. Ko pili mai, ka lavea ne latou ate ikuuga o mea a olotou lima ne fai ite Aso ote Atua. Tena e polopoloaki kia koe a Ia Tela kote Fakailoa-Katoatoa, pela mote fakatonuuga a Tokotasi Tela kote Tafasili ite Maalosi, kote Mafi-Katoatoa.

Ona ko Ia Tela kote Folafolaaga Tafasili ite Takuakua! Kote Alofa Fakamagalo-Katoatoa ko vau o fakafonu mote nofoaiga-faka-tupu e seai se fakalotolotolua. Ate Paaleni ko oti ne tofigia, a ko latou katoa kola e nofo ite lalolagai ko oti ne maopoopo fakatasi. Ate Pu Ili ko fakatagi, ao, a mata katoa ko pula ki luga ite maataku, ka ko loto o tino katoa kola i lagi mote lalolagi ko gasuesue mataku, vagana ko latou kola ko fakaolagia ne te manavaaga o kupu ate Atua, kae kola ko motu keatea a latou mai i mea katoa.

Mea nei kote Aso tela ate lalolagi ka folafola atu ana tala lei. A tino galue ote amioga leaga ko ana amoga, e seiloa ne koutou. Ate masina o mafaufauga e seai ne aogaa ko oti ne maofa, ka kote lagi ko oti ne tuku atu a se afusaga tafasili ite matolu. Matou e lavea a tino ko nofonofo fua, mataku ite faka puapuagaa o tou Aliki, kote Mafi-Katoatoa, kote Tafasili ite Maalosi. Ate Tino Valo ko oti ne valo atu, ka ko tagata ko oti ne motu atu keatea, e takutakua ate kaitaua o Tena ita. A tino o te lima sema e pusi a olotou manava kae fanoanoa. A tino ote fakaata e nofo i koga nofo o tino maluga: a latou e inu ite Uaina tela kote ola, mai i lima ote Alofa-Fakamagalo Katoatoa, ko la e tonu, kote fakaofoofogina.

Ate lalolagi ko oti ne fakagasue, ka ko mauga ko teka atu keatea, ka ko agelu ko sae mai, i tulaga o latou, mai i mua o Matou. Ate taulasiiga o tino ko numi ite olotou fakavalevale kae e lavea atu i olotou mata a fakamaoniiga ote kaitaua. Telaa la ko oti Matou ne akutu fakatasi a tino galue o amioga leaga. Matou e lavea a latou ko fakatau tele ki mua ite olotou tupua. Fai atu: E seai e nofo toka ite Aso tenei mai ite pule ate Atua. Tenei e tonu se Aso fakamataku. Matou e fai atu kia latou kola a latou kola ne seegina a latou. E lavea ne latou, kae e uiloa se iloa ne latou. A olotou mata ko magii; a latou e tonu ne tino ko tauaso. A fakamaoniiga a latou ko fakatauemu ne faipati ne latou, a latou ko liakina ko fakatauemu nete Atua, kote Feasoasoani i Mea Faigataa, kote Ola-loa-ia-Ia. Kote Tokotasi Amio Leaga ko fakatupu a faitogafiti i olotou loto, kae ko pokotia a latou nete puapuagaa e seai e ana maua o fakagata. A latou ne fakavave atu kite tino amio leaga o igoa o tino galue amio leaga. E pena a olotou faiga.

Fai atu: A lagi kooti ne pelu fakatasi, ka kote lalolagi ko taofi i Ona lima, ka ko tino faitogafiti ko oti ne taofigia ne olotou laaulu, kae e se malamalama foki loa iei. E inu a latou i vai lailai, kae e seiloa ne latou. Fai atu: Ate pa kalaga ko oti ne avaka, ka ko tino ko oti ne aumai ki mua mai i olotou tanu mate, kae e tu aka, ko nofo kilokilo fua pela i tafa o latou. Ko niisi ko oti ne fakavave atu ke maua ate koga nofo ote Atua ote Alofa Fakamagalo, ka ko niisi aka ko oti ne siga ki lalo ki olotou mata ite afi o Seoli, ka ko niisi aka foki ko galo atu ite numi. A kupu ate Atua ko oti ne fakaasi, kae e ui iai a latou ko oti ne fuli keatea mai iei. A Ona fakamaoniiga ko oti ne fakaali mai, kae e ui iai a latou e seiloa iei. Kae mafai e lavea ne latou a mata ote Alofa Fakamagallo-Katoatoa, ko faka fanoanoa a olotou mata,

Ka ko latou ko fai ate mea e loto a latou kiei. E fakavave atu a latou ki mua ite Afi o Seoli e fakatau see me kote mainaaga. E mao mai ite Atua ite mea e masaua lei ia latou! Fai atu: Me ko latou e fiafia io me ko latou ko pusa ki tua ite manko kite kaitaua, a lagi ko malepe mai i lalo ka kote Atua ko oti ne fanoifo ki lalo, e fonufonu ite tulaga faka tupu malifalifa. A mea faiite katoa ko oti ne lagona atu e pa kalaga: “Io te Atua ate Maaloo, kote Mafi-Katoatoa, kote Atamai-Katoatoa.”

Ke iloa ne koe, ia Mtou ko oti ne tuku atu keatea kite Falepuipui faka puapuagaa, kae ko aofiagia iei ne tino pule sauaa, ona ko mea a lima a tino fapaupau ne fai. E pena ate fiafia, tela ate Talavou ko oti ne tami kiei tela e seai se fiafiaaga faka-te-lalolagi e mafai o fakatusa kiei. Mai ite Atua! Ate mmae ne tigaina a Ia iei i lima ote pule sauaa e see mafai lele o faka fanoanoa ki Tena loto, io me e mafai a Ia o fanoanoa ite olo atu ki luga a latou kola ne fakapelo a Tena Meatonu.

Fai atu: A puapuagaa se sikulagi ki Taku Faaliiga. Ate fetuao ote agalelei e sulu maina mai i luga atu o ia, kae sulu atu se mainaaga tela e seai ne kaumana o manatu fakasupasupa o tagata io me ko mafaufauga seai ne aogaa ote tino taka fiatoa e mafai o pono.

Tautali i alagaa vae o Tou Aliki, kae masaua Ana tavini pela mo Ia e masaua ne ia a koe, aunoa mo se gasuesue ite logoaa o latou se fakalogo io me kote pelu ate fili….Folafola ki tua atu a manogi suamalie ote outou Aliki, kae sa talave, me e mutana ifo i se taimi toetoe, ite galue tavini i Tena Talitonuuga. Ate aso ko pilipili mai ite manumaloo ote Aliki, kote Tumau-Fakamagalo, kote Tafasili ite Foai, ka folafola atu.

Fai atu: Ko oti ne fai ne Matou a vaitafe o folafolaaga Faka-te-Lagi ke vau mai ite Omotou nofoaga-a-tupu, ko vao atafai ote atamai mote malamalama ke maai o puna atu mai ite laueleele o outou loto. Koutou e se fakafetai? Latou kola e inoino o tapuaki kite olotou Aliki ko latou kola ko pei keatea. Kote fai soko a Omotou kupu kia latou, e tumau loa o inoino fakamatamata, kae i olotou se-fakalogo ki Tena tulafono, kae e se-iloa foki ne latou. Kae mo latou kola e se talitonu ia Ia, a latou ka nofo ite ata ote afusaga uli. “Ate Itulaa” ko oti ne oko ki luga ia latou, kae e nofo loa latou o fai a olotou fakafiafiaaga.. Ko maua latou ne olotou laulu, e seki iloa ne koutou.

Te mea tela e ttau o vau ko oti ne vau fakavave loa; e lavea ne koutou ate faka tauteleega a latou mai iei! Ate mea e ttau o fakataunu ko oti ne vau ko pasia; molimau me ne pei ne latou pefea i olotou tua! Mea nei kote Aso tela a so se tagata taki tokotasi ka lele mai ia ia; kae tafaga atu la mai i tena itu-kaaiga, e se kafi o atafia ne koe. Fai atu: Ite Atua! Ate pa kalaga ko oti ne ili mai ite pu ili, kae e tonu, a tino ko matapo mai i omotou mua! Ate Mesenitia ko oti ne tagi atu, ka kote Tino Kami ko avaka a Tena leo o fai atu: “Io te Atua ate Maaloo, kote Tafasili ite Malosi, kote Feasoasoani i Mea Faigata, kote Ola-loa-ia-Ia.”

Mea nei kote Aso a mata katoa ko pulapula atu ite mataku, kote Aso a loto o latou kola e nofo ite lalolagi ko polepole ite mataku, vagana ko latou kola a tou Aliki ote Alofa Fakamagalo-Katoatoa, kote Atamai-Katoatoa, e fiafia o fakaoko mai. A mata katoa ko oti ne fuli kite uli vagana ko latou kola ate Atua ote Alofa Fakamagalo ko oti ne fakaeke atu kise loto malifalifa. A mata o tagata ko magii kola ne teke aliali ne latou o kilo ki mata ote Atua, kote Matagofie-Katoatoa, kote Tavaegia-Katotoa.

Fai atu: E see faitau ne koutou ate Qur’án? Faitau kiei, kote mea ke maua fiafia ne koutou ate Meatonu, auaa ite Tusi tenei e tonu kote Auala tonu. Mea ni kote Auala ote Atua ki tino katoa kola i lagi mo latou kola ite lalolagi. Kafai a koutou ne fakatamala ite Qur’án, ate Bayán e see-kafi o fai pela me e mao mai ia koe. Tautali iei e matala i mua o outou mata. Faitau koutou i ona kupu, ko koutou ke vaosia mai ite fai ne koutou a mea kola e fai ne latou a Mesenitia ate Atua ke fanoanoa kae tagi.

Fakavave ki tua koutou mai i outou tugamau. E pefea ate leva e moe iei a koutou? Ate pa kalaga ite lua ko oti ne ili ite pu ili. Ko ai e kilokilo koutou kiei? Mea nei kote outou Aliki, kote Atua ote Alofa Fakamagalo. Molimau ate teke ne koutou Ana failoga? Ate lalolagi ko galulu ise galulu tafasili ite lasi, kae pei atu ki mua ana amoga. E se talia ne koutou? Fai atu: E se lavea ne koutou me ko mauga ne fai pela mo fakaputuuga o fulufulu manu, me e pefea a tino o kaitaua ite se-lei ite afioga ote Talitonuuga ate Atua? Molimau me ne pefea a fale ko liakina mai ite fakamaseiiga, ka ko latou e fai mene tino malemu.

Mea nei kote Aso tela ate Alofa Fakamagalo-Katoatoa ko oti ne vau ki lalo i kaumana ote poto, e pei ki gatu fakalavea ote nofoaiga-a-tupu. E iloa fakalei loa ne Ia a amioga a tagata. A Ia ko Tena matagofie e seai e mafai o faletonu iei, e mafai ne koutou o malamalama iei. Ate lagi o so se tapuaiiga kooti ne faka-aogaa gia, ka kote lalolagi o te malamalama o tagata ko malepelepe mai i lalo, ka ko agelu ate Atua ko lavea atu ko olo ifo ki lalo. Fai atu: Mea nei kote Aso ote see-fakamaoni; e teke koutou ki fea? A mauga ko pasia keatea, ka ko lagi ko oti ne pelu fakatasi, ka kote lalolagi kaatoa ko taofi i Ona lima, e se maua ne koutou o maina iei. Ko ai e ana o puipuigia a koutou? E seai, ia Ia Tela kote Alofa Fakamagalo-Katoatoa! E seai, vagana kote Atua, kote Mafi-Katoatoa, kote Matagofie-Katoatoa, kote Manava Alofa. So se fafine tela ko oti ne isi sena amoga i tena tinae ko oti ne pei keatea a tena amoga. E lavea ne Matou a tagata e magii ite Aso tenei, kote Aso tela e tagata mo agelu ko oti ne maopoopo fakatasi.

Fai atu: E isi se faolotolotolua e uiga mote Atua? E lavea a Ia ne fanoifo ki lalo mai ite lagi o Tena agalelei, saigia mote paoa e fakafonu ite nofoaiga-a-tupu. E isi se fakalotolotolua e uiga mo Ana failoga? Tala a outou mata, kae mafaufau ki Ana fakamaoniiga maina. Palataiso e tu i tou lima fakaata, kae ko oti ne aumai ke pili mai kia koe, ka ko Seoli ko oti ne fai ke kaa ulaula. Molimau a tena ulaaga kaitaua. Fakavave a koutou ke ulufale ki loto ite Palataiso, pela me se fakatusa ote Omotou alofa fakamagalo kia koe, kae inu a koutou mai i lima ote Alofa Fakamagalo-Katoatoa ate Uaina tela kote ola tonu.

Inu ite ola lei fiafia. O tino o Bahá. Koutou e tonu ko latou kola e ttau o lei. Tenei ko latou kola ne maua ate pili kite Atua, Mea nei kote vai e tafe manafai koutou ne fakafeagaiiga ite Qur’án, kae fakamuli ifo ite Bayán, pela me se taui mai ite outou Aliki, te Atua ote Alofa Fakamagalo. Fakamanuia latou kola e inu iei.

O Taku tavini tela ne fuli ona mata kia Au! Avatu a fakafetai kite Atua auaa ne tuku ifo kia koe ate Tapeleti tenei ite Falepuipui tenei, ko koe ke mafai o fakamasaua ki tino aso o tou Aliki, kote Matagofie-Katoatoa, kote Iloa-Katoatoa. Tena laa ne fakatu ne Matou mo koe, auala atu i vai ote Omotou atamai mote faipatiiga, a fakavae o tou talitonuuga. Tenei, e tonu, kote vai tela ate Kalauna-a-Tupu o tou Aliki ko oti ne avaka ki luga. “A Tena Kalauna-a-Tupu ne tu i luga i vai.” Mafaufau kite mea tenei i tou loto, kote mea ke mafai ne koe o maina i tena uiga, Fai atu: Tavaeega kite Atua, kote Aliki o lalolagi katoa.

Ki so se loto matakite kae fakamainagia e mautinoa ite Atua, kote Uiga Tonu e se-iloa, kote Tino Faka-te-Lagi, e tafasili ite maluga kae e mai i luga atu i so se uiga lei faka-tagata, pela mote ola faka-te-foitino, fanaaka fanoifo, afio atu mote afio mai. E mao mai i Tena matagofie kote laulaufaiva o tagata e ttau o toe laulau fakalei Ona tavaeega, io me kote loto o tagata e iloa fakalei a Tena feitu funa e seai see-mafai lele loa o fua ate pooko. A Ia, kae e pena loa, e veli ite se gata mai ote favavau o Te Uiga Tonu, kae ka tumau i Tena Fakaasiiga Tonu tela e nofo funa kite se gata mai mai i mata o tagata. “E seai se kiloga e puke ia Ia, ka ko Ia e puke i kiloga katoa; a Ia kote Aliki Lilo, kote Silafaga-Katoatoa.”…

Ate mataloa ote poto o Aso Favavau ko pono i mata o tino katoa, kote Kamataaga ote agalelei seai se gata, e tusa mote faigaamuna penei: “A Tena agalelei ko silia atu i mea katoa; a Toku agalelei ko siomia ia latou katoa,” ne fai ne latou a Fatu maina ote Mana ke sae aka mai ite lalolagi ote agaaga, i se tulaga maluga ote mafaufau faka-tagata, kae ke fakaasi ki tagata katoa, kote mea ke mafai ne latou o avatu kite lalolagi a mea funa ote Tino Tela e se-mafai lele o mafulifuli, kae fai atu a feitu e see-lavea gofie a Tena UIga Tonu e se-mafai lele loa o tanumia.

A Kilo fakamana konei, ko Punaa Aso favavau ote matagofie, tasi kae katoa loa, ko Tiemipioni ite lalolagi a Ia Tela kote tuloto ote taka-kakai ote iunivesi, ko Tena Uiga Tonu mote Pogai fakaotioti. Mai ia Ia ne vau iei ate poto mote paoa; mai ia Ia ne vau iei ate olotou laina-a-tupu. Ate gali o olotou mata e seai aka foki na kote ata o Tena foliga, mote olotou fakaasiiga o se failoga o Tena matagofie e seai se mate. A latou mo Fale Tausi o kope taaua ote poto Faka-te-Lagi, mo Fale Tausi ote atamai faka-te-agaaga. Mai ia latou ne kave iei ate agalelei e seai se gata, kae mai ia latou ne fakaasi ate Mainaaga tela e se-kafi lele loa o galo…. A Tapanekolo ote Mana konei, ko Kilo Muamua konei kola e toe fakafoki mai ate mainaaga ote matagofie e se-matafitafi, ne fakaasiiga o Ia Tela kote Se-Lavea ote Se-Lavea. Mai ite faaliiga o Fatu taaua Faka-te-Lagi konei kae uiga lei a igoa katoa mo uiga lei ote Atua, pela mote poto mote paoa, nofoaiga-a-tupu mote maaloo, alofa fakamagalo mote atamai, matagofie, alofa mataefa, mote agalelei, ko fakaasiigia.

A uiga lei konei ote Atua e seki tuku lele loa ma ise loa ki naai Pelofeta fakapitoa, kae ne taofi mai i niisi. E tonu, a Pelofeta katoa ate Atua, ko Ana fapelepele, ko Ana Mesenitia mana kae filifilia, aunoa mo se tino e liakina, ko latou e amo Ana igoa, mote fakafoitino o Ona uiga lei. E kese fua a latou ite o olotou faaliiga, mote maalosi fakapaupau o olotou mainaaga. Pela foki loa mote fakaasiiga a Ia: “Ko niisi Aposotolo ne fai ne Matou ke sili aka i niisi.”

Ko oti, tena laa, ne iloa aka kae maina me i loto i tapanekolo o Pelofeta konei mo Latou filifilia ate Atua ate mainaaga o Ona igoa seai e see gata mo uiga fakamalugagia ko oti ne toe fakafokifoki mai, e uiloa ate mainaaga o niisi uiga lei e mafai io me e see mafai o fakaasi faka-te-foitino mai i Tempolo mainaina ki mata o tagata. Ka ko se uiga lei ote Atua ko oti ne fakaasigia faka-te-foitino ne Latou ko Tinaa Mea tonu ote Motu-mai-keatea e see fai pelaa e fakauiga me ko Punaa Aso o uiga ote Atua mo Koga Tausi o Kope taaua o Ana igoa mana ite tonuuga e see nofo mo ia. Telaa, Agaaga ola konei, ko Mata pu matagali ko oti, taki tasi kae katoa loa o latou, ne fakaekegia ki uiga lei katoa ote Atua, pela mo nofoaiga-a-tupu, maloo, mo pena, e uiloa kite kilo mai i tua a latou ko kati mai i afioga faka-te-lalolagi katoa. …

Ke iloa ne koe ite tonuuga ate See-Lavea e se-mafai o toe fakafoliga mai a Tena Uiga Tonu kae fakaasi atu ki tagata. A Ia, ko leva ne se fuafuagina ite fakamaluga gina mai i luga i mea katoa tela e seai e ana maua o lavea io me o toe laulau mai. Mai i Tena kogaa koga tenei ote matagofie a Tena leo e soko loa ite folafola atu: “E tonu, Au kote Atua; e seai aka se Atua na ko Au, kote Iloa-Katoatoa, kote Atamai-Katoatoa. Ko oti Au ne fakaasi atu Au ki tagata kae ne kave ifo ki lalo a Ia Tela kote Punaa Aso o failoga o Taku Faaliiga. Mai ia Ia ne fai ne Au kote foafoaaga kaatoa ke fakamaoni me e seai aka foki se Atua na ko Ia, kote Se-Fakatusagia, kote Fakailoa-Katoatoa, kote Atamai-Katoatoa.” A Ia Tela mai ite favavau ne funa mai i mata o tagata e see-mafai o iloa lele loa vagana e auala atu i Faifekau, ka ko Ana Faifekau e see-mafai o tuku mai se fakamaoniiga e lasi atu ite meatonu o Tena Misiona iloo a fakamaoniiga o Tena Foitino ia Ia loa.

O Salmán! Ate mataloa ote poto ote Tino Favavau ko leva loa, kae ka tumau kite favavau, o pono i mata o tagata. E seai se malamalama o tagata e mafai lele o isi se taliaaga ki Tena fale fono mana. Pela me se failoga o Tena alofa fakamagalo, ka pelaa me se fakamaoniiga o Tena alofa-kaimalie, ko oti a Ia ne fakaasi atu ki tagata a Fetu Ao o Tena takitakiiga faka-te-lagi, ko Failoga o Tena fakatasitasi faka-te-lagi, me ko oti ne fakaeke ate poto o Tino faka managia kite poto o Tena Foitino loa ia Ia. Ko ai tela e iloa a latou ko oti ne iloa ate Atua. Ko ai tela e fakalogo kite olotou kalaga, ko oti ne fakalogo kite Leo ote Atua, kae ko ai e fakamaoni kite meatonu ate Atua. Ko ai e fuli keatea mai ia latou, ko oti ne fuli keatea mai ite Atua, kae ko ai e see talitonu ia latou, ko oti ne see talitonu ite Atua. So se tino taki tokotasi ia latou kote Auala ote Atua tela e soko ate lalolagi mo lalolagi mai i luga, ka kote Tulaga o Tena Meatonu ki so se tino taki tokotasi i maaloo ote lalolagi mote lagi. A latou ko Faifekau ate Atua i vasia o tagata, ko fakatalitonuuga o Tena Meatonu, mo failoga o Tena matagofie.

Ko latou e amo ate Fakamaoni ate Atua ko fakaasiigia ki tino ote lalolagi pela me ne Tiemipioni o se Talitonuuga fou mo Fai Fakaasiiga o se Meseti fou. Pela eiloa mo Manu eva konei ote Kalauna-a-Tupu mana ko tuku ifo katoa ki lalo mai ite lagi ote Fingalo ote Atua, ka ko latou katoa ko tu ki luga o folafola atu a Tena Talitonuuga e see mafai o taofigia, a latou, telaa la, e fakatau pela me e tasi ate agaaga ola kae kote tino foki loa tena. Auaa a latou katoa e inu mai ite Ipu e tasi ote alofa ote Atua, kae kau tasi ite fuaga lakau kaina ote Lakau ola tena foki loa ote Tafatasi.

A Faifekau konei ate Atua e taki lua a olotou tulaga. E tasi kote tulaga fai a mafaufauuga piua mote taaua ote fakatasitasi. Ite fetiu tenei, kafai e kalagagia a latou katoa kise igoa e tasi, kae ave foki ia latou a uiga lei e pau, a koe e seki fano seke mai ite meatonu. Pela foki mote mea ne fakaasi mai ne Ia: “E seai se fakakese e fai ne Matou ite vaa o so se isi o Ana Faifekau.” Auaa ia latou, tokotasi kae katoa loa, e kami atu a tino ote lalolagi ke talia ne latou ate tafatasi ote Atua, kae folafola atu kia latou ate Vaitafe ote Palataiso (Kawthar) ote alofa agalelei mote foai alofa e se gata mai. A latou e fakaekegia kia latou ate gatu ote tofi faka pelofeta, kae fakaaloalogina kite gatu ote matagofie. Tenaa a Muhammad, kote Poini ote Qur’án, e fakaasi mai: “Au ko Pelofeta katoa.” E pena foki, e fai mai a Ia: “Au kote Atamu muamua, Noa, Mose, mo Iesu.” A faipatiiga e olo pena ko oti ne fai ne Imám ‘Alí. A faipatiiga pena, e fakaasi mai ate taaua ote fakatasitasi o latou ko Tiemipioni ote Tafatasi ote Atua, ko oti foki ne vau iei mai i Auala o folafolaaga takutakua mo Fale Koloa Taaua o fatu taaua ote poto Faka-te-Lagi, ko oti ne tusi i Tusitusiiga Tapu. A Fakaasiiga o Mata konei ko latou e maua ne latou ate Tulafono Faka-te-Lagi, mote Punaa Aso o Tena Faaliiga. Ate Faaliiga tenei e maluga atu i veli ote taulasiiga pela foki mo manakooga o tokoukeega. Telaa a Ia ne fai atu: “Ate Omotou Talitonuuga e Tasi.” Pela loa mote Talitonuuga e tasi kae e pau, koTiemiponi iei e ttau o tasi kae pau. E pena foki, a Imáms ote Talitonuuga Muhammadan, ko lamepa ote mautinoa, ko oti ne fai atu: “Muhammad ko Ia muamua a matou, Muhammad kote omotou fakaotiiga, Muhammad ko matou katoa.”

E maina kae iloagia kia koe i Pelofeta katoa ko Fale Tapuaki ote Talitonuuga ate Atua, Kolaa ne fakasae mai e pei ki gatu kesekese. Kafai a koe e tautali mo mata e see fakakesekese, ka lavea ne koe ia Latou e nofo tapuaki katoa ite tapanekolo foki loa tena, ke lele atu kite lagi foki loa tena, nofo i luga ite nofoaga-a-tupu e pau, folafola atu ite faipati e pau, kae fakasalalau atu ate Talitonuuga foki loa e pau. E pena ate fakatasitasi o latou ko Uiga Tonu ote Tino, latou ko Mainaaaga e se gata mai kae e see mafai o fuafuagina ite gali kese! Telaa la, kafai se tasi o Faifekau konei ote Mana e folafola atu penei: “Au kote foki mai o Pelofeta katoa,” A Ia e tonu, e faipati ite meatonu. I se auala foki pena, i Faaliiga katoa takitasi mai i tua, ate toe foki mai ote Faaliiga mai i mua atu se meatonu, kote meatonu tela ko fakatu fakamautakitaki….

Ate sua tulaga kote tulaga ote fakamatea, tela e tau atu kote lalolagi ote foafoaaga, mo fakataputapuuga kola iei. Ite feitu tenei, a Faifekau taki toko tasi ate Atua e iai ate tinaa tino loa ia ia fakapitoa, se misiona e tusi fakalei mai, se faaliiga ko leva ne fakanofogia, mo fakataputapuuga kioa ko leva ne fakapatino. A latou taki tokotasi e iloa ise igoa e kese, e iloa ise uiga lei fakapitoa, fakataunu se misiona fakapatino, kae e fakaeke atu se Faaliiga fakapitoa. Pela foki loa mo Ana muna: “A niisi o Aposotolo ne fai ne Matou ke sili aka i niisi. Ki niisi ate Atua ko oti ne faipati, ko niisi a Ia ko oti ne avaka ki luga kae fakamaluga. Kae kia Iesu, ate Tama a Malia (Mary), Matou kooti ne tuku atu a failoga, ka ko Matou ne fakamaalosigia nete Agaaga Tapu.”

Ona kote keseega tenei i olotou tulaga mote misiona ko pati mo folafolaaga e tafe mai i Uluvaitafe lei ote poto Faka-te-Lagi e pela me e olo fakatea kae kese. Tenaa la, i mata o latou kola ne kamata o iloilo ki feitu funa ote atamai Faka-te-Lagi, a folafolaaga katoa, ite tonuuga, ne fakaasiiga o te Meatonu e tasi. Kae pela mote taulasiiga o tino ne fakatamala o fakataaua ia latou a tulaga kona kola ne fai atu Matou kiei, a latou, e lagona ate numi mote fanoanoa i folafolaaga kesekese ne fai mai ne Faifekau kola ite tonuuga e tasi kae pau.

Ko leva ne iloa fakalei i kesekeseega katoa konei o folafolaaga e pogai mai ite kesekese o tulaga. Telaa la, mana kilogi mai ite tulaga o te olotou tafatasi mote maluga ote motu mai keatea, a uiga lei ote Faka-Ulu Atua, Siufofoga o Mataupu Tau Faka Atua, kote Tafasili ite Maluga Tokotasi, kote Uiga Tonu i Loto-loa, ko oti , kae e tau tonu ki Uigaa Tonu o Ia pela eloa mo latou e nofo katoa i luga ite nofoaga ote Faaliiga Faka-te-Lagi, kae e fakatu i luga ite nofoaga ote Funa Faka-te-Lagi. Mai ite fakasae mai ote Faaliiga ate Atua ko fakaasi mai, pela foki ko olotou kilo ite Gali ote Atua ko fakaasigia. Tenaa la ko fakaleooga ate Atua ko oti ne lagona folafola atu ne Faifekau konei a Ia Faka-te-Lagi.

Taumataaga ite mainaaga ote tulaga ite lua – kote tulaga ote fakamatea, faka kesekese, faka tuakoigina faka-te-lalolagi, uiga mo tulaga – e fakaasi mai ia latou ate tavini fakaotioti, kote ola faigata katoatoa, mote aunoa lele loa se mafaufau kia ia.

Pela loa mo Ana muna: “Au kote tavini ate Atua, Au se tagata pena mo koe.” ….

Moi fai a Faifekau ate Atua siomia aoao katoatoa o fai atu: “Au kote Atua,” A Ia, e tonu, e faipati atu kite meatonu, kae e setaumate e fakapiki atu kiei. Auaa ko oti ne fakaasi fakafia taimi me mai iluga ite olotou Faaliiga, olotou uiga lei mo igoa, ate Faaliiga ate Atua, ko Ona igoa mo Ona uiga lei, ko oti ne fai ke fakaasi ite lalolagi. Tenaa la, a Ia ko oti ne fakaasi: “Ate Atua e o Ia a pou kona, e see o Koe.” Kae e toe fai mai a Ia: “ite tonuuga, a latou kola ne faifeagaiiga kite meatonu kia Koe, ite tonuuga ne faifegaiiga ate tonuuga tena kite Atua.” Kae kafai a se isi ia latou ne fakalei atu ate faipatiiga, “Au kote Mesentia ate Atua,” A Ia, e faipati kite meatonu, kote meatonu mautinoa tonu. Pela foki mo Ana muna: “Muhammad e seai ko tamana o so se tagata i outou vasia, ka ko Ia kote Mesentia ate Atua.“ Ite kiloga ite mainaaga tenei, a latou ne Mesentia katoa ote Tupu tonu, kote Uiga Tonu e se-mafulifuli. Kae ko latou katoa ka folafola atu, “Au kote Ponooga o Pelofeta,” latou, e tonu, e faipati seai aka foki na kote meatonu, mai i luga atu ite ata foliki kii loa ote falotolotolua. Auaa ia latou katoa e seai aka na kote tino e tasi, e tasi ate agaaga ola, e tasi ate agaaga, e tasi ate tino, e tasi ate faaliiga. A latou katoa ko fakaasiiga ote “Kamataga” mote “Fakaotiiga,” kote “Muamua” mote “Fakaoti”, kote “Lavea” mote “Funa” – katoa e tau atu kia Ia Tela kote Agaaga tafa loa ki loto o Agaaga ote Uiga tonu Favavau o Uiga tonu katoa. Kae moi fai a latou e fai atu, “ Matou ko Tavini ate Atua,” e tenei foki se mea tonu ne fakaasigia kae e see mafai o fakase. Auaa a latou ko oti ne fakaasi ite tulaga tafasili ote galue tavini, se galue tavini tela e seai aka loa se tagata e ana maua o oko kiei. Telaa la i taimi pena e Uiga Tonu ote Tino e galo ifo mai i lalo o vasa ote mana ite pilitakiiga favavau, io me kafai a latou e lele kite tumu tafasili ite maluga o mea funa Faka-te-Lagi, a latou e fai i olotou folafolaaga me kote Leo ote Siufofoga o Mataupu Tau kite Atua, kote Kalaga ate Atua ia Ia loa.

Moi fai ate mata ote mataile e fakamatala, a ia ka lavea ite tulaga penei, ko oti ne fuafua a latou me e seai lele loa kae e seai foki i mata o Ia Tela kote Pule Aoao-Katoatoa, kote Seai se-Faitogafiti. Au e mafaufau, a latou e fakatau ia latou e seai lele ne aogaa, kae e fakatau mafai ko taku a latou ite Falefono se uiga fakapelo. Auaa i se musumusuuga foliki kii loa o tino i loto ise Falefono pela se fakamaoniiga ote olaaga tavae loa tino kia ia mote tu saoloto. A mata o latou kola ko oko atu kite Falefono tena, a se faipatiiga pena se agasala tafasili ite se-lei. E pefea ate masei atu manafai, e seai aka foki se faipatiiga i tena Nofomai, ei i loto o tagata, tena laulaufaiva, tena mafaufau, io me ko tena agaaga ola, ke fakalavelavegia mo so se tino na kote Fagasele SIli, manafai ona mata e lavea oku mata i tafa o Tena gali, moi fai a tena taliga e fakalogo ki so se pese na kote Leo, kae mo fai ana vae e sasale i so se auala na ko Tena auala….

Ite uiga ote tulaga tenei a latou ne folafola atu mo latou ate Leo ote Siufofoga o Mataupu Tau kite Atua mo mea pena, ka ko uiga pena o olotou tulaga faka Faifekau, ko oti a latou ne folafola ia latou ko Mesentia ate Atua. I so se taimi ko oti ne fakaleo atu se faipatiiga ka fakapatonu ki manakooga ote taimi, kae ko oti ne tusi a folafolaaga katoa konei kia Latou, a folafolaaga e salalau mai ite lalolagi ote Faaliiga Faka-te-Lagi kite lalolagi ote foafoaaga, kae mai ite maaloo ote Faka-Atua ke oko foki loa kite maaloo ote olaaga faka-te-lalolagi. Tenaa la a so se mea kote faipatiiga a latou, me e soko kite lalolagi Faka-Atua, Nofoaiga Faka-Aliki, kote Tofi Faka Pelofeta, kote Faifekau, kote Tofi Fatamaa, kote Tofi Aposotolo, io me ko Galue Tavini, katoa e tonu, aunoa se ata o se falotolotolua. Telaa la a fakamunamunaaga konei kola ko oti ne fai atu ne Matou o sapoti ate Omotou fakamatalaga e ttau o maaufaugina fakalei loa, ko folafolaaga kesekese ote Faifekau ote See Lavea mo Punaa Aso ote Mana ke mafai o fakagata kote mea ke fakagasue ate agaaga ola kae fakanumi ate mafaufau.

Mafaufau ki tupulaga ko teka atu. Molimau i taimi taki tasi katoa ate Fetu Ao ote foai alofa Faka-te-Lagi ne sulu ate mainaaga o Tena Faaliiga ki luga ite lalolagi, ko tino o Tena Aso ko oti ne tu o teke atu kia Ia, kae fakapelo a tena meatonu. Latou kola ne takitaki o tagata ko taumafai maalosi loa o fakalavelavegia a olotou taugasoa mai ite fuli atu kia Ia Tena kote Vasa o alofa foai se gata ote Atua.

Molimau i tino, ona kote ikuuga ne fakasalalau ne tiakona matuatua o Tena vaasia taimi, ko oti ne pei ne latou a Apelamo, kote Taugasoa ote Atua, kite afi; ko Mose, Tela a Ia ne sautala mote Mafi-Katoatoa, ne fakatauemu me se tino pelo kae gutu fatufatu. Mafaufau ia Iesu, kote Agaaga, e uiloa ate loto maulalo mote tinaa loto atafai, ne seki fai fakalei ne Ona fili. Ne lasi kii ate teke kia Ia, ate Uiga Tonu o Ia mote Aliki ote lavea mote see lavea, ne agai, a Ia e seai se koga mo tuku ifo a Tena ulu. A ia ne takaseasea mai ite koga e tasi ki sua koga, aunoa mo se koga nofo tumau. Mafaufau kote mea ne oko kia Muhammad, kote Ponooga o Pelofeta, ke mafai ate ola o tino katoa ne fai mo taulaga e ofo mo Ia. E manatua ate tigaina o pokotiaaga kola a takitaki o tino Iutaia mo tino tapuaki ki tupua ne vaiua ifo kia Ia, Ko ai ate tupu o Aliki o tino katoa, ona kote folafolaaga ote fakatasitasi ote Atua mote meatonu o Tena Meseti ! Ite amiotonu o Taku Talitonuuga! A Taku Pene e galulu, ka ko mea faiite katoa e tagi ise tagi fanoanoa tafasili ite lasi ona ko tigaina ne pokotia kia Ia i lima o latou kola ko oti ne ofa ne latou ate Feagaiiga ate Atua, kae fakamasei ne latou a Tena Molimau, se talia Ana fakamaoniiga, kae fakapelo Ana failoga. Telaa la e toe fai ne Matou ate tala ne sae aka i aso ko teka, ke fiafia a koe ke mafai o maina.

Ko oti ne iloa ne koe mene fakapokotia fakamasei pefea a Pelofeta ate Atua, ko Ana Mesentia mo Tino Filifilia. Talosaga fakapooko malie aka ki fakamoemoeega mo pogai kola ne pogai kiei ate fakasauaanoaaga pena. E seai se taimi, i se Tamilosaga, ne sao a Pelofeta mai ite muna fakamasei a olotou fili, kote fakamae a olotou fili sauaa, kote fakatauemu o tino poto ote taimi o latou, kola ne fakasae aka kae muni mai i tua ote fai pela me amiotonu kae faka-atua. I ao mo po ne pasia ne latou a maeega e seai aka foki e ana maua o fuafua, vagana kote poto ote Atua tonu tokotasi, ke fakamalugagina a Tena matagofie.

Mafaufau kite Tokotasi tenei ne fakasee-gina. E uiloa a fakamaoniiga tafasili ite maina e molimau kite meatonu o Tena Talitonuuga; e uiloa a feagaiiga ia Ia, ise gana tafasili e seai se faletonu, ko oti ne fakataunu; e uiloa, a Ia e seki lau ia latou poto, a Tena seki akoga i faka kinauga i tami nei i vasia o tiakono matuatua, ko oti a Ia ne vaiua ifo ki luga i tagata a motimotiiga o Tena poto e tuafia kae ne maua mai Faka-te-Lagi; kae se gata iei, e lavea ate teke o tupulaga nei a Tena puleega, kae teke atu foki kia Ia! A Ia ko oti, ite lasiiga ote Tena olaga, ne tofotofogia i lima o Ona fili. Ko Ona puapuagaa ko oti ne oko nei ite olotou akukuuga iloto ite Falepuipui faka puapuagaa, kise mea tela a tino sauaa kia Ia ko oti ne pei a Ia kiei. Ke talia nete Atua, ise kilooga pooko i loto mo se loto malifalifa, me mafai a koe o tautali ki mea kola ko oti ne aumai o pasia atu kae nei ko tuputupu, kae mafaufau ia latou i tou loto, ke mafai o iloa i taulasiiga o tagata ko oti, ite Aso tenei, ne seki mafai ne latou o lavea. Fakamolemole ate Atua, a Ia ke fakamafai a koe o manava ate manogi suamallie o Tena Aso, o kautasi ite ea se gata oTena agalele, o inu a tou tusaga, mai i Tena alofa agalelei, mai ite Vasa tafasili ite takutakua tela e soko fonufonu aka ite Aso tenei ite igoa ote Tupu Favavau, kae ke tumau mautakitaki kae e se-gasuesue pela mote mauga i Tena Talitonuuga.

Fai atu: Matagofie kia Koe Tela ko oti ne fai ko Tino mana katoa ke fakaasi ate olotou seai se aogaa i mua o fakaasiiga tuafia o Tena mafi, mo so se Pelofeta o fakataaua a Tena seai lele loa se maalosi ite maalifalifa o Tou matagofie mautakitaki. Au e akai totuli kia Koe, i Tou igoa tela ne matala iei a loka ote Lagi kae fakafonu kite tafasili ite fiafia ote Lukuuga Mana mai i luga, ke fakamafai au o tavini kia Koe, ite Aso tenei, kae o fakamaalosi au o tautali ki mea kola ne tusi mai ne Koe i Tau Tusi. E iloa ne Koe, O toku Aliki, ate mea i loto ia au; ako au e se-iloa ne au me sea ate mea i loto ia Koe. A Koe kote Iloa-Katoatoa, kote Fakailoa-Katoatoa.

Faeteete, O taugasoa ite Tafatasi ote Aatua, auaa ia koutou mana fakaosooso ke fai se faka keseega ite vaa o so se Faifekau o Tena Talitonuuga, io me o fakakese mai i failoga kola ko oti ne olo tasi kae folafola atu ate olotou Faaliiga. E tenei e tonu loa kote uiga tonu ote Tafatasi Faka-te-Lagi. kafai a koutou ko latou kola e iloa kae talitonu ite meatonu tenei. Ke mautinoa ia koutou, i galueega mo faiga o so se tino taki tokotasi o Faifekau konei ate Atua, e tonu, so se mea tela e tau atu kia latou, kae so se mea tela e fakaasi mai i taimi mai i mua, ne fakaekegina katoa ne te Atua, kae ne fakaasiiga o Tena Finagalo mote Pogai. So se tino tela e fai ne ia se faka keseega foliki kii loa ite vaa o tino konei, ko olotou muna, ko olotou Meseti, ko olotou faiga mo uiga, ko oti ne see talitonu ite Atua, ko oti ne fakapelo Ana failoga, kae fakaloiloi ate Talitonuuga o Ana Mesentia.

E iloa fakalei i so se vasia taimi tela ko oti ne ola iei a se Faifekau ate Atua e fakaekegina faka-te-lagi, kae e mafai, i se auala, o fakamunaaga gia me kote Aso tofigia ote Atua. Ate Aso tenei, e faka taaua, kae e ttau o fakamatea mai mo latou kola ko oti ne olo atu mai i mua. Ate fakamunaaga “Te Ponooga o Pelofeta” e fakaasigia katoatoa i tena tulaga maluga. Ate Tamilooga faka-Pelofeta, e tonu, ko oti. Ate Meatonu Favavau ko vau nei. A Ia ko oti ne apai aka ki luga ate Fuka ote Paoa, kae nei ko peipei atu ki luga ite lalolagi a te agalelei taulekaleka o Tena Faaliiga.

Ke tavaegina ate Atua, kote Pule Aoao-Katoatoa, kote Tupu ote matagofie e se-fakatusagina, se tavaeega tela e se fuafuagina mai i luga atu ite malamalama o mea faiite katoa, kae e fakamaluga atu ite iloa o mafaufau o tagata. E seai aka foki i Ana tafa kai mafai aka loa o usu fakalei Ana tavaeega, io me e mafai ne so se tagata o manumaaloo i so se taimi o fakamatala ate fuafuaaga katoatoa o Tena matagofie. Ko ai e mafai o fai me ko oti ne oko atu ki koga maluga o Tena Uiga Tonu maluga, kae se aa ate mafaufau e mafai o fuafua a pookoga o Tena feitu funa tela e se kafi o fuafuagia? Mai i so se fakaasiiga taki tasi e sae mai ite Kamataaga o Tena matagofie, mana kae e see maua o oti a fakamaoniiga o te agalelei taulekaleka e se mafai o moemitigina, kae mai i so se fakaasiiga o Tena paoa e see mafai o fakatakavalegia ko ligi mai a vasa ote mainaaga favavau. E pefea ate tafasili ite maluga ko fakamaoniiga fakaofoofogina o Tena nofoaiga-a-tupu mafi-katoatoa, se malapuuga tela, kafai e patele kia latou, ka kaigia katoatoa loa a mea ite lagi mote laolagi! E fakamatala pefea ate maluga o failoga o Tena paoa fakaoti, se agasala e tasi tela, e uiloa ite foliki, e ttau o sopoia atu ite malamalama o so se tino tela mai ite kamataaga tela e seai se kamataaga, ne aumai ke fakafoliga mai, io me ka faiitegia i taimi mai mua kite fakaotiiga tela e seai se na fakaotiiga. A Faka-te-foitinooga o Ana Igoa e takaseasea atu ite togaavao ote salasala, e fia inu o maua a Tena Uiga Tonu, ka ko Faifekau katoa o Ona Uiga Lei e akai talosaga kia Ia, mai ite Sinai ote Mana, o tala a Tena mea funa.

A se motiiga ote vasa e fonu maligiligi o Tena alofa fakamagalo e seai se gata ko oti ne fakagaligali ate foafoaaga katoa ki lakei ote olaaga, ka ko manavaaga mai i Tena Palataiso e se fuafuagina ko oti ne fakaekegina ki tino katoa mote gatu o Tena mana mote matagofie. A se faka siusiuga mai ite pookoga e se fuafuagina o Tena nofoaiga-a-tupu mote Finagalo salalau ko oti, mai ite seai lele loa, ne kalagagia ke foliga mai a se foafoaaga tela e seai se gataaga o tena salalau kae e seai se gataaga o tena leva. A fakaofoofooga o Tena foai alofa e se mafai o gata, ka kote tafe mai o Tena agalelei alofa fakamagalo e se mafai lele o fakagata. Ate faifaiiga o Tena foafoaaga e seai sena kamataaga, kae e se mafai o isi sena fakaogtiiga.

I vasia taimi mo tamilooga katoa a Ia, auala mai ite mainaaga agalelei taulekaleka e sulugina ne Faifekau o Tena Uiga Tonu fakaofoofogina, ne toe faiite a mea katoa, ko so se mea e toe fakaata i lagi mote lalolagi a failoga o Tena matagofie ko maligiiga o Tena alofa fakamagalo ke se mafai o seai, io me mana seai i vaiua o Tena alofa. E pefea ate siomia aoao ate fakaofoofooga o Tena agelelei e seai ne tuakoi! Kilo aka ia latou ko ulu iloto ite foafoaaga katoatoa. E pena ate olotou uiga tela e seai se atomu e tasi ite Iunivesi katoatoa e mafai o maua tela e se fakaasi atu a fakamaaoniiga o Tena mafi, tela e se fakamaluga iei a Tena Igoa mana, io me e se fakaasigia ate mainaaga malifalifa i Tena fakatasitasi. A Tena foafoaaga e sao katoatoa kae mataefa tela e seai se mafaufau io me se loto, me e pefea ate maalosi io me kote piua, e mafai lele loa o maina ite natula o toe meaola faiite a Ia tafasili loa ite se aogaa; kae e mutana atu la o fuafua ate mea funa a Ia Tela kote Fetu Ao ote Meatonu, Tela kote Uiga Tonu e se-lavea kae e se-iloa. Ate mafuaaga kamata o tino maalosi kii kola e nofo loa ia latou o salasala ate Atua, a mea a toe tagata tafasili ite poto ne oko kiei, ko taveega tafasili ite maluga ne mafai o tuku atu se laulaufaiva o tagata io me se pene e mafai o tuku atu ko fuaga ote mafaufau e gata mai ote tagata kae e fakanofogina ne ona tapulaa. Sefulu afe o Pelofeta, taki tasi se Mose, ne poi kii loa i luga i Sinai ate olotou salasala i Tena leo fakatapugina, “A Koe e see mafai lele loa o kilo kia Au!”; ka ko Mesentia tafasili ite tokouke, taki tokotasi e takutakua pela mo Iesu, e tu fanoanoa i luga ite olotou nofoaga kalauna ne fakataputapuuga, “A Toku Uiga Tonu e see mafai lele loa o iloagina!” Mai ite favavau a Ia ko oti ne funa i muna e se fakamatalagina o Tena Foitino maluga, kae ka tumau o uifi kite se gata mai ite mea funa e se-mafai o pasia o Tena Uiga Tonu e see iloa. So se taumafaiiga o maua se malamalama i Tena Tinaa Uiga Tonu e see mafai o okogina ko oti i se numiiga katoatoa, kae so se taumafaiiga o fakapilipili atu kia Ia kae fakamoemoe ki Tena Uiga Tonu ne pogai mai iei ate lagona e seai se aogaa mote fakatamala.

E pefea ate fakaofoofogina kia au, ate see taaua o au, se taumafaiiga o fuafua ate pooko mana o Tou poto! E pefea ate seai-se-aogaa o aku taumafaiiga o fakalavea ate lasi ote paoa e nofo loto i Au galuega – kote fakaasiiga o Tou paoa faiite! E mafai pefea a toku mata, tela e seai se mafaufau o lavea a ia, e mafai o fai pela mene lavea a Tou Uiga Tonu, mafai ate foafoaaga katoatoa e numi i Tau mea funa, kae e pefea e mafai ne au o fakaasi tonu atu ia Koe ne iloagina pefea, mafai, ate Iunivesi kaatoa e folafola a Tou Nofomai kae molimai ki Tau meatonu? A mataloa o Tou agalelei ko oti ite salalau mai ite favavau ko oti ne matala, ka ko auala ote mafai o oko atu ki Tou Nofomai ko oti ne fakaavanoagina, ki mea faiite katoa, ka ko faaliiga o Tou Gali e see fakatusagina i taimi katoa ko oti ne tusi fakalei i luga i uiga tonu o tino katoa, lavea mote se-lavea. Kae e uiloa ate alofaaga tenei e tafasili ite agalelei, ate fakaekeega tonu kae fakaoti tenei, au e gasue o molimau i Ou kogaafale o te mana mote matagofie e se-fuafuagina ite maluga mai i luga atu ite poto o tino katoa vagana ko Koe, ka kote mea funa o Tou Nofomai e se-iloagina ki so se mafaufau vagana o Koe. E seai aka vagana ko Koe e mafai o suke ate funa o Tou natula, kae e seai aka na ko Tou Uiga Tonu e silisili atu e mafai o puke a Tou tinaa tino e se-mafai o salagina. E pefea ate lasi ote aofai o tino o latou faka-te-lagi mo tino matagofie katoatoa kola, ite togaa vao ote olotou mavae mai ia Koe! E takutakua ate taulasiiga o agaaga ola mana kae takutakua kola ne galo kae numi ite salasalaaga ite toafa ote salasala kite lavea o Ou mata! Tokofia katoa Ou taugasoa maalosi kola a ulaaga ote mavae mai ia Koe ko oti ne apulu kae galo ifo, kae e seai se napa ko agaaga ola fakamaoni kola ko oti ne tuku ifo olotou ola ote lotomalie ite fakamoemoe o pula tilo kite mainaaga o Ou mata. A manavaaga ote pusiiga o manava o loto naunau kola e pusi mai i tua o Koe e se-mafai o oko ki Tou kogaa-fale mana, me e mafai a fanoanoaaga o tino fai malaga kola e fia inu o sae mai i mua o Ou mata e mafai o oko atu ki Tou nofoaga ote matagofie.

A taveega katoa ote tafatasi ote Atua, mo fakaaloalo katoa kia Ia, kote Aliki silisili, kote see fakatusagina mote Takitaki matagofie katoatoa ote iunivesi, Tela, mai ite seai lele loa, ne faiite ate tinaa uiga tonu o mea katoa, Tela, mai ite seai lele loa, ko oti ne fakafoliga mai ki mua a toe vaega kesekese tafasili ite maea kae e fui lavea o Tena fuafuaaga, kae Tela, fakasao mai i Ana meaola faiite mai ite masei ote mao mote faigata ote seai fakaotioti loa, ko oti ne maua a latou i loto i Tena maaloo ote matagofie e tafasili ite malu. E se malalo ifo i Tena agalelei siomia aoao katoatoa, i Tena alofa fakamagalo aofia katoatoa, e mafai o oko atu kiei. E mafai pefea, ne mafai ote seai lele loa se mea e tasi ko oti ne maua ne ia ate aogaa mote iloa mote mafai o fai a mea ke sae aka mai ite tulaga ote seai kite seai lele loa se ola kite lalolagi ote ola?

Ko oti ne faiite ate lalolagi mo mea katoa kola e ola iei, a Ia, auala atu tonu ite faka galue o Tena Finagalo e se-mafai o taofigia kae malu, o filifili o fakaeke atu ki tagata ate lauiloa fakapitoa mote mafai o fai a mea mote iloa a Ia kae ke alofa kia Ia – ate mafai o fai a mea mote iloa tela e ttau o fakatau pela me se fakamaalosiiga ola kae gasuesue mote pogai fakapitoa e fakavae kiei ate foafoaaga katoatoa… I luga iei kote kanoloto ote mea tonu o takitasi mo so se mea faiite ko oti ne sulu te mainaga kise tasi o Ana igoa, kae fai a ia me se mea e maua ne ia ate gali o se tasi o Ana uiga. I luga ite tonuuga o uiga o tagata, e uiloa, a Ia ne fakapitoa kite malifalifa o Ana igoa katoa mo uiga, kae fai a ia pela me se kilo o Ia loa ia Ia. Tokotasi mai i mea faiite katoa ko tagata ko oti ne fakaatea aka ise alofaaga tafasili ite takutakua, se fakamanuiaaga e tumau kite favavau.

A enetii konei kola kote Fetu Ao o fakamanuiaaga Faka-te-Lagi mote Kamataaga o takitakiiga faka-te-lagi ko oti ne fakaeke kite uiga tonu ote tagata e nofo iei, e uiloa, e matea i loto ia ia, pela mote ulaaga e nofo funa i loto ite molii gako mo vae ote mainaaga e nofo i loto ite lamepa. Ate maalifalifa o enetii konei e mafai o ponogia ne manakooga faka-te-lalolagi o tagata pela loa mote mainaaga ote laa e mafai o ponogia mai i lalo ote pefu mo lailaiiga kola e kava ite kilo. E se-mafai ate molii gako io me kote lamepa o faka kaa ia latou loa aunoa se feasoasoani, io me e mafai o saoloto mai a ia mai i ona lailaiiga loa. E maina kae fakatalitonugia me vagana ate afi e faka kaa ate lamepa e se-mafai lele loa o kaa, kae vagana kote lailaiiga e solo keatea mai i mata ote kilo e se-mafai lele ne ia o fakaasi mai ate ata ote laa io me e toe fakafoki a tena mainaaga mote matagofie.

Kae ona e seai lele loa se sokooga tonu o fusi ate Atua tonu tokotasi mo Tena foafoaaga, kae seai se fakatusaaga i so se mea e mafai o iai ite vaa ote mausolosolo mote Favavau, kote see tumau mote Katoatoa, a Ia ko oti ne fakaeke i vasia tausaga katoa mo tamilosaga ate Agaaga ola piua mote seai se lailaiiga e mafai o fakaasi ite maaloo ote lalolagi mote lagi. Kite fui iloa, a Ia fakaofoofogia kae tafasili ite fui faeteetegia ko oti a Ia ne tuku mai ise natula e tualua; kote faka-te-foitino tela kote lalolagi o mea, mote fakaa-te-agaaga tela kote tinaa mea e ttau atu kite Atua. A Ia ko oti ne fakaeke ki luga ia Ia a tulaga e lua. Kote tulaga muamua, tela e soko ki Tena uiga kanoloto tonu, e sui atu a Ia pela me kote Tokotasi Tela a Tena leo kote leo ote Atua. Kite mea tenei e fakamaoni ate aganu: “Tuafia kae fakaofoofogina a Toku sokotakiiga mote Atua. Au ko Ia, a Ia, ka ko Ia ko Au, ko Au, vagana ko Au tela ko Au, ka ko Ia tela ko Ia.” Ise feitu foki loa pena, a muna: “Tu ki luga, O Muhammad, aua ite Alofagia mote Fagasele ko fusi fakatasi kae fai pela me se tasi ia Koe.” A Ia ne fai atu foki penei: E seai se fakakeseega lele loa I vaa o Koe mo Latou, vagana ko Latou ko Au Tavini.” Ate lua o tulaga kote tulaga faka-te-tagata, e fakaasigia mai i muna konei: “Au se tagata pena mo koe,” “Fai atu, tavaeega ki toku Aliki! Au se tagata, io mese aposotolo?” A Uiga Tonu konei ote Motu Mai Keatea, a Fakatinooga Tonu malifalifa penei ko auala ote agalelei ote Atua. Takigina ne te mainaaga ote takitakiiga se fakatamala, ke nofo iei ate nofoaiga-a-tupu tafasili ite maluga, a Latou ko oti ne fakapatino ke faka-aogaa ate fakamalosi o Olotou muna, ko maligi ifo a Olotou agalelei e se mafai o se mote laumatagi fakamana o te Olotou faaliiga mote fulu fakamaa o so se loto naunau mo se agaaga talia mai ite lailai mote pefu o atafaiiga faka-te-lalolagi mo faka tapulaaga. Ko fatoaa, kae fatoa maua ate Tausi Meataaua ote Atua, e laveagia ite fakatinooga tonu o tagata, o fakasae aka, pela me se malifalifa ote Paneta ote Faaliiga Faka-te-Lagi, mai i tua ote veli ote funaaga, kae toki iei a fuka e fakaasigia o tena matagofie i luga i tumu maluga o loto o tagata.

Mai i fuaiupu ko olo atu mo fakatautauuga ko oti ne fai fakalei mai loa i maaloo ote lalolagi mo lagi e ttau o fakaasi a se Tagata, se Uiga Tonu Tela ka galue pela me se Faifekau mote Tavale mote ave-aveega ote agalelei ote Faka-Atua loa ia Ia, kote Nofoaiga Aliki o tino katoa. Mai i Akoakoga o te Fetu Ao ote Meatonu tenei so se tagata ka fano ki mua kae atiake ke oko kite taimi ko maua ne ia ate tulaga tela ko mafai ne ia o fakaasi a maalosi katoa tela ate kanoloto o ia ko oti ne fakaekegina. Kote mea tenei mo so se pogai I loto i vaasia o taimi katoa mo tamilosaga a Pelofeta ate Atua mo Ana Tino filifilia ko oti ne fakasae mai i vaasia o tagata, kae ko oti ne fakaasi aka se paoa tela ne fanau mai ite Atua mo se mafi tela e Favavau e mafai o fakaasi.

E mafai se mafaufau matala o mafaufau aka fakalei me, ona ko naai muna a uiga o latou e se maua ne ia o maina iei, ate faitotoa ote poloakiiga e se-gata ate Atua e se mafai o pono i mata o tagata? E mafai ne ia o atafia i Mainaaga Faka-te-Lagi konei, i Mainaaga malifalifa konei se kamataga io me se fakaotiiga? Ne aa a maligi ifooga e mafai o fakatusa mote tafe mai o Tena agalelei aofia katoatoa, kae se aa ate fakamanuiaaga e mafai o silia atu i fakatalitonuuga o se alofa fakamagalo tafasili ite takutakua kae salalau? E seai se fakalotolotolua e tasi me kafai ise minute e tasi ate tai o Tena alofa fakamagalo mote agelelei e taofi mai ite lalolagi, ka tanumia katoatoa a ia. Ite pogai tenei, mai ite kamataga tela e seai sena kamataga a faitotoa ote alofa fakamagalo Faka-te-Lagi ko tala ke matala i mata o mea faiite katoa, ka ko kaumana ote Meatonu ka tumau kite fakaotiiga tela e seai se fakaotiiga o vaiua ifo ki luga ite laueleele ote iloa mote mafai o fai a mea a tagata, ite uiga tonu mo uiga faka tino a olotou fakamanuiaaga mo alofaaga. E pena ate auala ote Atua mai ite vavau ke oko atu kite favavau.

Fiafia ate tagata tela e tu ki luga o tavini a Taku Talitonuuga, kae faka maluga a Toku Igoa taulekaleka. Puke ke mau ki Taku Tusi mote paoa o Toku mafai, kae piki mau maalosi ki so se tulafono a tou Aliki, kote Fakaeke, kote Atamai-Katoatoa, ko oti ne tusi mai iei. Kilo aka, O Muhammad, ki munamunaaga mo faiga a taugasooa ote Shí‘ih Islám ko oti ne tamate ifo ate lifu mote loto maalosi o ona aso muamua, kae fakalailai ate pula masinasina o tena mainaaga. I ona aso muamua, ka ko latou koi fakapiki loa ki akoakoga mote igoa ote olotou Pelofeta, ate Aliki o tino, ko olotou galueega e maaka ne se filfili e se motu o manumaaloo mo taumafaiiga. Kae ko kamata a latou o olo keatea mote auala ote olotu Takitaki tonu mote Matai, ko fuli keatea mai ite Mainaaga ote Atua kae fakamasei ne latou ate akoakoga fakavae o Tena fakatasitasi Faka-te-Lagi, kae ko latou ko gasolosolo aka loa o saga tonu kia latou kola ko fiafia lasi kite maalosi o Tena Muna, ate olotou paoa ko fuli kite vaaitaimi kote olotou maluga kite taema, kote olotou loto toa kite maataku. E molimau ne koe ite pokotia o latou. Kilo aka, ia latou ko fusi tasi mo Ia Tela kote Poini Fakapitoa ote fakatasitasi Faka-te-Lagi. Kilo aka ki olotou amioga leaga ko fakalavelave a latou mai ite iloa, ite Aso ote Toe Tu, kote Muna Tonu, ke fakamaluga a Tena matagofie. Matou e fakataaua ate fakamoemoe ko tino konei mai i taimi tenei ka puipui a latou mai i fakamoemoeega e seai ne aogaa mo manatu valea, kae ke maua ne latou a se malamalama tonu ite uiga ote fakatasitasi Faka-te-Lagi.

Ate Foitino ote Faifekau ko leva ne fai mo sui mote muagutu ote Atu. A Ia, ite tonuuga, kote Punaa Aso o Tofi tafasili ite lei ote Atua, pela foki mote Nofoaga ote Tafaoata o Ona Uiga tafasili ite maluga. Kafai se isi e fakatu aka i Ona tafa pela me e pau mo Ia, kafai a latou e fakatau aka ia latou e foliga pela mo Tena Foitino, e mafai pefea, o tausiusi ite Fotino Faka-te-Lagi kote Tokotasi mote Se Fakatusagina, tela i Tena Uiga Tonu e se-mafai o vaevaegina kae e seai sena nafa? Talosaga faka pooko ki mea kola, mai ite paoa ote meatonu, ko oti ne fakaasi atu kia koe, ko koe ke fai pela mo latou e iloa a tena uiga.

Ate pogai ne faiite iei ate tagata ne te Atua, ko leva loa kae ke tumau o pena, kote mea ke mafai ne ia o iloa a tena Tufuuga kae ke oko atu ki Tena Nofomai. Kite fakamoemmoega tafasiili tenei, kote pogai tafasili ite maluga tenei, a Tusi katoa faka-te-lagi mo Tusitusiiga Tapu katoa pa mafa ne fakaasi mai faka-te-lagi e fai mo molimau matakalekale. So se tino tela e lavea ate Punaa Aso ote takitakiiga Faka-te-Lagi kae ulufale ki loto i Tena koga nofo mana kae fakapilipili atu kite Atua kae maua a Tena Nofomai, se Nofomai tela kote tina Palataiso, tela a fale tafasili ite gali kae maluga ote lagi e seai kae ne failoga fua. A se tagata pena ko oti ne maua ne ia ate poto ote tulaga o Ia Tela “ite vaa o mea futi matasana e lua, ”Tela e tu mai i luga atu ote Sadratu’l-Muntahá. So se tino ko se kafi o matea a Ia ko leva ne fakamasinogia a ia kite puapuaga ote mao keatea, se mao keatea tela e aunoa vagana kote seai lele loa mote uiga tonu ote kanoloto ote afi. E pena a tena fakaotiiga, ui iai kite kiloga mai i tua e mafai a ia o nofo i nofoaga tafasili ite maluga ote lalolagi kae fakatu i luga ite kalauna-a-tupu tafasili ite fakamalugagia.

A Ia Tela kote Punaa Aso ote Meatonu, e seai se faka lotolotolua, e kafi kii o fakasao mai ite mao keatea o agaaga ola pena kae e fai a latou ke fakapilipili atu ki Tena kogaa-koga nofo ke maua a Tena Nofomai. “Kafai ate Atua ko oti ne fiafia e tonu ko oti ne fai ne Ia a tagata katoa pela me ne tino e tasi.” A Tena pogai, e uiloa, ke fakamafai kote agaaga piua mote loto e motu mai keatea o fanaka ki luga, ona ko olotou paoa e nofo mo latou, ki matafaga ote Vasa Tafasili ite Takutakua, kote mea ko latou kola e salasala kite Gali ote Matagofie-Katoatoa ke mafai o fakamatea kae mavae mai keatea mo latou se fakalogo kae finaau valea. E tena ko oti ne fakaeke aka ne te Pene matagofie-katoatoa kae malifalifa….

Ona ko Faifekau ote Fakamasinooga Tonu Faka-te-Lagi, kote Punaa Aso ote agalelei faka-te-lagi, ko oti ne fakasae mai i vaasia o tagata e masani saale loa o mativa fakaalofa i mea katoa faka-te-lalolagi kae masolo keatea mai i kope faka-te-lalolagi ote fanaka ki luga, e ttau o fakauiga kite fakavae foki loa tena ote mavae keatea mote fakamatea tela e galue iei ate Pogai Faka-te-Lagi. Moi fai ate Uiga Tonu Favavau e fakaasi a mea katoa kola e lavea atu i loto ia Ia, moi fai a Ia e sulu maina ite katoatoaaga o Tena matagofie, e seai e mafai o maua o faka fesili a Tena paoa io me e fakapelo a Tena meatonu. E tonu, a mea faiite katoa ka takamiomio kae matapo ite po ne fakamaoniiga o Tena mainaaga kae tuku ifo kite seai lele loa. E mafai pefea i tulaga pena o fakakese a latou amio atua mai ia latou kola e fui fai kii loa?

Ate akoakoga fakavae tenei ko oti ne fakagalue i Tamilosaga taki tasi mai i mua kae ko oti ne folafola atu fakalei loa…. Kote pogai tenei, i vaasia taimi katoa, mafai a se Faifekau fou e fakasae mai a kote faaliiga fou ote paoa maualuga i te Atua ko oti ne tuku atu ki tagata, ko latou kola e se talitonu ia Ia, fakaseagia nete fakasae mai ote Gali favavau kae e seai sena fakapau ite gatu o tagata, ne se kafi ne latou o lavea a Ia. Latou ne olo see mai i Tena auala kae fakaseke mai o fakatasi mo Ia- se fakatasiiga mo Ia Tela kote Failoga ote pili kite Atua. A latou ne tu foki loa ki luga o ofa a tulaga o tagata fakamaoni kae fakaoti a ola o latou kola e talitonu ia Ia.

Kilo aka me ite Tamilosaga tenei a tino seai ne aogaa kae valea ne mafaufau aka loa ite mea fai galueega pela mote fakata-taa-o-tino, kaisoa kae fakaaunoa e mafai ne latou o tamate ate Lamepa tela ate Lima ote malaosi Faka-te-Lagi ko oti ne faka ka, io me o faka foliki ate Fetu Ao ote gali taulekaleka favavau. E pefea ate seiloa lele loa ne latou ate mea tonu ise fakalavelave kote oela tela e fagai ne ia ate ulaaga ote Lamepa tenei!. E pena ate paoa o faka mafuli ote Atua. A Ia e fuli a so se mea e loto a Ia kiei; e tonu a Ia e isi Sena paoa i luga i mea katoa….

Mafaufau i taimi katoa ite nofoaiga-a-tupu e fakaaogaa nete Tinaa Tupu, kae kilo aka ki fakamaoniiga o Tena paoa mote pokotiaaga tafasili ite maluga. Fakamana outou taliga mai sautalaaga fakavalevale o latou kola ko failoga ote se talitonu mo latou e fakamalosi ote sauaa mote ita. Ate itula ko pilipili mai ko koutou ka molimau ate paoa ote Atua tonu tokotasi e manumaalo i luga atu o mea faiite katoa mo failoga o Tena nofoaiga-a-tupu e aofia katoa iei ate foafoaaga. Ite aso tena ka maua ne koutou me ko niisi mea katoa aka mai i tafa o Ia ko oti ne fakapuli kae ko fakatau pela mene atigi mea katoa.

E ttau o masaua ite mafaufau ite Atua mo Tena Faifekau e se mafai, i so se fakanofonofooga, o motu mai ite maualuga mote silisiliese o tofiiga kola e nofo mo Latou. E tonu, ate maualuga mote silisiliese ne foafoaaga o Tena Muna, mafai a koutou ne filifili o lavea mo Oku mata kae seai kote outou kiloga.

Te Atua e molimau me seai aka foki se Atua na ko Ia, kote Agalelei, kote Fagasele-Sili. Ko agalelei katoa mote alofa foai alofa ea Ia. Ki so se tino e manako a Ia e tuku atu ne Ia a so se mea ko Tena manakooga. A Ia, e tonu, kote Maalosi-Katoatoa, kote Mafi-Katoatoa, kote Feasoasoani i Faigata, kote Ola-loa-ia-Ia. A Matou, e tonu, e talitonu ia Ia Tela, ite foitino ote Báb, ko oti ne tuku ifo ki lalo nete Finagalo ote Atua tonu tokotasi, kote Tupu o Tupu, kote Tavaeegia-Katoatoa. Matou, e tauto ate fakamaoni kite Tokotasi Tela, ite taimi o Mustagháth, e fakamoemoe ke fakaasi, pela foki mo latou Kola e aumai mai i tua o Ia ke oko kite fakaotiiga tela e seai se fakaotiiga. Matou e atafia i fakaasiiga o latou taki tokotasi, me kote kiloga mai i tua io me mai iloto, e seai aka se fakaasiiga na kote Atua, mafai a koe ia latou kola e mafai o maina. So se tino taki tokotasi o latou se kilo ate Atua, e fakaasi mai iei e seai aka foki na ko Ia, Tena Gali, Tena Mafi mote Agalelei, kafai a koe se tino e malamalama. A mea aka katoa e mafai o toe fakaata iei ate matagofie o Faifekau konei Kola a latou ko Kilo fakapitoa Muamua o Ia Faka-te-Lagi, mafai a koe e see ko latou kola e se malamalama. E seai se tino e mafai o sao mai iei, o me ko latou e tau o fakalavelavegina mai ite fakataunu ate olotou pogai. A Kilo konei ka tumau o suiaki a sua mea, kae ka tumau o toe fakaata ate mainaaga o Aso Favavau. Latou kola e toe fakaata mai ate olotou matagofie, ka pena, o tumau o nofo pena kite se gata mai, auaa kote Agalelei ote Atua e se mafai o gata mai ite sofisofi atu. Mea nei se meatonu tela e seai e ana maua o fakaloi.

Fakatalitali mo ou mata faka-te-agaaga ate filifili seni o Faaliiga tukufaasolo kola e soko kite Faifekau o Atamu mote Báb. Au e tauto i mua ote Atua me a latou taki tokotasi o Faifekau konei ko oti ne tuku ifo ki lalo mai ite fakagalueega ote Finagalo Faka-te-Lagi mote Pogai, tela a Latou taki toko tasi ko savali o se Meseti fakapitoa, ko Latou taki tokotasi ko oti ne fakamaonia mo se Tusi fakaasigia faka-te-agaaga kae ko oti ne tofia ke fakamatala a meafuna o se Tapeleti tafasili ite mafi. Ate fakatautau ote Faaliiga tela so se tino ia Latou ko oti ne fakamailoga ka ko leva ne fakaekegina fakapatonu. Tenei, e tonu, se failoga ote Omotou alofaaga kia latou, mafai a koutou ko latou kola e maina ite meatonu tenei …. Kae kafai ate faifaiiga tenei ote Faaliiga tu solosolo e fakaoti ise tulaga tela ko Ana mata maualuga, a Ia e se fakapaugia, A Ia e tafasili te mana mo fakaasi atu ki mata o tagata. A Ia ne filifili ke funa a Ia mai i tua o se afe o veli, auaa i mata faka-te-lalolagi seai se aava e maua ne latou a Tena matagofie. Ne fai ne Ia tenei ite taimi a failoga mo fakaasiiga o se Faaliiga tofia faka-te-lagi ko ligi ifo ne Ia – failoga mo fakasiiga kola e seai e ana maua o atafia vagana kote Aliki, te oulua Atua, kote Aliki o lalolagi katoa. Kae kafai ate taimi ne tusia ote funaaga ko fakataunu, e avatu ne Matou, kae koi ufiufi loa i veli e se maua o lau, se matemateega foliki kii ote Matagofie malapulapu e pulou i Mata ote Talavou, kae ite lukuuga kaatoa o tino e nofo mai i luga atu o Lalolagi ko pukegina nete uateega sauaa ka ko tino alofagia ate Atua ko siga ki lalo o ifo kia Ia. A Ia ko oti, e tonu, ne fakaaasi se silisiliese tela e seai ite foafoaaga kaatoa ne molimau, pela mo Tena tu mai ki luga o folafola ia Ia loa a Tena Talitonuuga ki tino katoa kola i lagi mo katoa kola ite lalolagi.

Kote mea ne lagona ne koe e uiga mo Apelamo, kote Taugasoa ote Alofa Fakamagalo-Katoatoa, kote meatonu, kae e seai se fakotolotolua iei. Ate Leo ote Atua e fakatonu atu kia Ia ke ofo atu a Isamaeli pela me se taulaga, ko Tena fakatuanaki ite Talitonuuga ate Atua mo Tena motu keatea mai i mea katoa na loa ko Ia ke mafai o fakaasi atu ki tagata. Ate pogai ote Atua, kote fai taulaga atu a ia pela mese suiakiiga mo agasala mo amio leaga a tino katoa ote lalolagi. Ate fakaaloalo foki tena, Iesu, te Tama a Malia, ne filifili nete Atua tonu tokotasi, ke maluga a Tena igoa mote matagofie, o fakaeke atu kia Ia. Ite pogai foki tena ne ofo atu foki a Husayn pela me se taulaga ne Muhammad, kote Aposotolo ate Atua.

E seai se tagata e mafai lele o fai mai ia ia ko maina ite natula ote agalelei tuafia kae funa ote Atua; e seai e mafai o fuafua a Tena alofa fakamagalo aofia katoatoa. E pena ate amio matamua o tagata mo olotou soli tuakoi, e tafasili ite mafa o tofooga ko oti ne pokotia iei a Pelofeta ate Atua mo olotou tino filifilia, ko tino katoa e ttau o fakapuapuagaa kae ke tanumia. Ate kilooga funa kae tafasili ite alofa ote Atua, mai foitino e lavea mote se lavea, puipuigia kae ka tumau o puipui iei mai ite fakasala a tena amio leaga. Ke tuku i tou loto, ite mea tonu ke mafai o fakaasigia kia koe, ka ko koe ke mautakitaki i Tena auala.

Ko oti ne fakatonu ne Matou ite Muna ate Atua mo uiga maalosi katoa iei e ttau o fakaasi ki tagata ise auala e tusa mo fakanofonofooga kola ko leva ne fakasino mai ne Ia Tela kote Iloa-Katoatoa, kote Atamau-Katoatoa. Matou ko oti Foki ne fakaeke atu a tena veli ote funaaga ke seai aka foki na ko Ia foki loa. E tena e tonu kote Paoa o Matou o maua ate Pogai o Matou. Kafai ate Muna e fakasaoloto ke fakalele fakavave loa a enetii katoa kola e iai iei, e seai se tagata e maafai o fakatumau ate mafa o se faaliiga tafasili ite takutakua penei. E tonu, a mea katoa ite lagi mote lalolagi e tele ite mataku i ona mua.

Manatunatu kite mea tela ko oti ne tuku ifo kia Muhammad, kote Aposotolo ate Atua. Ate fuafuaaga ote Faaliiga tela ko Ia kote e kave ne Ia ko leva loa ne fakasino mai ne Ia Tela kote Mafi-Katoatoa, kote Maalosi-Katoatoa. Latou kola ne lagona a Ia, e mafai o iloa a Tena pogai kite lauefa ote olotou tulaga mote mafai o iloa mote mafai o fai a mea faka-te-agaaga. A Ia, i se auala foki pena, e se pono a Mata ote Atamai fakatusa kite olotou mafai o fakatumau ate amoga o Tena Meseti. Ko pili ko ate saofiaaga o tino ka maua ne latou ate tulaga ote matua, ite Muna tela ne fakaasi ki mata o tagata a enetii e laveagia kola ne fakaeke kiei – enetii kola e fakaasigia Ia latou ite katoatoa ote olotou matagofie manafai ate Gali Favavau ko oti ne fakasae mai, ite tausaga onosefulu, ite foitino o ‘Alí-Muhammad, kote Báb.

Ko tavaeega mote matagofie ke i luga ite Atua Tela, mai ite paoa o Tena mafi, ko oti ne tuku mai a Tena foafoaaga mai ite seai ose lavalava ote seai se ola, kae fakapei a ia kite gatu ote ola. Mai i vasia o mea faiite katoa, ko oti ne fakaatea aka mo Tena alofaga fakapitoa ate piua, ote fatu taaua ote tonuuga o tagata, kae fakafonu a ia kite mafai o fai a mea mote iloa o Ia pela foki mote fakaata mai ote takutakua o Tena matagofie. Ate fakakeseega tenei e sautualua e tuku atu ki luga ia ia ko oti ne fulu keatea mai i tena loto a lailaiiga o so se manakoooga e seai se aogaa, kae e fai a ia e ttau mo se gatu tela a tena Tufuuga ko oti ne talia ke fakapei kia ia. Ne fai ate mea tenei mo fakasao a tena agaaga ola mai ite fakafanoanoa ote valea.

Ate gatu tela ne kafu iei ate foitino mote agaaga ola o tagata kote fakavae o tena ola lei mote atiakeega. O, ate fakamanuiaaga ote aso manafai, e feasoasoani gia ne te agalelei mote mafi ote Atua tonu tokotasi, ate tagata ka saosao a ia mai ite pologa mote faitogafiti ote lalolagi mo mea katoa kola iei, kae ka maua ne ia ate malolooga tonu kae tumau mai i lalo ote Lakau Ola ote Poto!

A pese kola ate manu eva o tou loto ko oti ne usu ne ia i tena alofa lasi mo ana taugasoa ko oti ne oko atu ki olotou taliga, kae ne fakagasue ne ia Au o tali a oulua fesili, kae fakaasi atu kia koe a mea funa kola e talia Au o fakaasi atu. I tau tusi malu tenei a koe ne silisili mai me e tefea i Pelofeta ate Atua e ttau o fakatau pela me e maluga atu ki niisi aka. Ke iloa tonu ne koe ite uiga tonu o Pelofeta katoa ate Atua e tasi kae e pau. Ate tafatasi o Latou e katoatoa. Ate Atua kote Tufuuga, e fai mai: E seai se faka keseega lele loa i vaasia o Avefekau o Taku Meseti. A Latou katoa e tasi ate olotou pogai; ate olotou mea funa kote mea funa e tasi. O fakataaua se tasi mai i luga atu o sua isi aka, o fakamaluga a naai tino mai i luga atu ite toega, e se tonu kae e se talia. So se Pelofeta tonu ko oti ne fakatau aka i Tena Meseti e pau loa ate Faalliiga mo so se isi Pelofeta aka mai mua o Ia. Kafai se tagata, e fakatamala o iloa ate meatonu tenei, kae mai i tua e fakamaumau a tena taimi o faipati se-ttau kae seai se aogaa, e seai se tino tela e matakite kae fakamaina a tena malamalamna e fai lele loa o faipati seai se aogaa ko ia ke fala lotolotolua i tena talitonu.

Kae e uiloa, ate fuafuaaga ote faaliiga a Pelofeta ate Atua ite lalolagi tenei, e ttau o kese kese. Taki tasi mo so se tino ia latou ne Avefekau o se Meseti fakapitoa, kae ko oti ne fakatonugia ke fakaasi a Ia mai i luga i gasuesueega fakapitoa. Kote pogai tenei ne fakasae mai e kesekese a olotou tulaga. A Olotou Faaliiga e mafai o fakatusa kite mainaaga ote masina tela e sulu a tena malifalifaaga ki luga ite lalolagi. E uiloa i so se taimi e fakasae mai, e fakaasi mai ne ia se fuafuaaga fou o tena mainaaga, e ui iai a tena taulekaleka nofo loto e se-mafai lele o galo, io me ko tena mainaaga e mafai o galo kite se-gatamai.

E manino kae malamalama, me i so se kesekeseega o te maalosi ote olotou mainaaga e se nofo loto ite mainaaga foki loa tena, kae ona kote amanaia kesekese ote lalolagi e tumau ite mafulifuli. So se Pelofeta Tela ate Mafi-Katoatoa mote Tufuuga e Seai Sena Fakatusa ko oti ne fakatonu ke tuku ifo ki tino ote lalolagi ko oti ne fakatonu atu fakatasi mo se Meseti, kae tuku atu ke galue ise auala tela e tafasili ite lei mo manakooga ote tupulaga i taimi ne fakasae mai a Ia. Ate pogai ote Atua o aumai Ana Pelofeta ki tagata e sautualua. Muamua o fakasao a tama a tagata mai ite pogisa ote valea, kae takitaki a latou kite mainaaga ote malamalama tonu. Ate lua kote mea ke fakapatonu ate filemu mote nofo toka ote saofiaaga o tino, mote sala o auala katoa e mafai iei o fakatu a mea konei.

A Pelofeta ate Atua e ttau o fakatau pela mene tokita fakalei masaki kola a olotou galuega kote fakamaalosi ote ola lei ote lalolagi mo ana tino, kote mea, mai ite agaaga ote tafatasi, e mafai ne latou o fakalei a masaki o tagata nofo mavaevae. E seai ne ave kiei se saolotooga o fakafesili a olotou muna io me o fakatauemu a olotou amioga, auaa ko latou fua e mafai o maina fakalei ite tino masaki kae iloilo tonu ate masaki. E seai se tagata, me e pefea ate poto o tena iloa, e mafai lele o oko ki koga maluga tela ate atamai mote malamalama o se Tokita Faka-te-Lagi ko oti ne maua ne ia. E seai se mea e fakapoi, manafai ate talavai e tusi mai nete tokita i aso nei e ttau o maua ke tusa mote mea ko oti ne tusi mai mua ne ia. E mafai pefea o se kese mafai a masakiiga e pokotia iei a tino e manakomia i so se tulaga o tena masaki e manakogina a fakaleiiga o masaki fakapitoa? Ite feitu foki pena, so se taimi a Pelofeta ate Atua ne fakamaina ate lalolagi mote mainaaga tafasili ite maliflifa ote Fetu Ao ote poto Faka-te-Lagi, a latou ko oti ne kalaga atu ki tino ke tallia ate mainaaga ote Atua mai i auala e tau tonu ki gasolosolooga o tupulaga i taimi ne fakasae mai iei. Telaa la ne mafai a latou o tufatufa atu ate pogisa ote valea, kae sulu atu ki luga ite lalolagi ate matagofie ote olotou poto. Kite kanoloto ote uiga tonu o Pelofeta konei, telaa la, ate mata o so se tagata e laveagia ne ia e ttau o taaki atu, pela mote mea loa e tasi kae kote pogai fua tena o latou tumau kote takitaki a tino ko olo seke, kae avatu ate filemu kia latou mafatia… A mea nei seai ko aso ote manuia mote taugamalie. Ate sofiaaga o tagata katoatoa ko i lima o masakiiga sautuafia. Taumafai telaa laa, o fakasao a tena ola mai ite vailakau foo masaki teka ate lima mafi katoatoa ote Tokita e se mafai o se ko oti ne fakatoka.

Kae nei e uiga mo tau fesili e uiga kite natula ote tapuakiiga. Ke iloa ne koe me ia latou kola e atamai tonu ko oti ne fakatusa ne latou ate lalolagi kite mafaufau o tagata. Pela mote foitino o tagata e manako ki se gatu mo ana kafu, e pena foki ate foitino ote saofiaaga o tino e ttau o fakalakei kite gatu ote fakamasinooga tonu mote atamai. A tena gatu kote Faaliiga ne aumaigia ne te Atua kiei. I so se taimi ate gatu tenei ko oti ne fakataunu a tena aogaa, ate Mafi-Katoatoa fakafou a ia. I vaasia tupulaga taki tasi katoa e manakomia a se fuafuaaga fou ote mainaaga ote Atua. So se Faaliiga Faka-te-Lagi ko oti ne tuku ifo ki lalo i se auala e ttau mote nofonofooga ote vaasia taimi tena ne fakasae mai iei. Kae pela mo tau fesili e uiga mo faipatiiga a takitaki o tapuakiiga ko mavae atu. So se tagata atamai kae tavaegia e setaumate ka se kau atu i faipatiiga seai ne aogaa kae seai ne mafuaaga o latou. Ate Tufuuga e seai se fakatusa ko oti ne faiite a tagata katoa mai ite lefulefu e tasi, kae ko oti ne faka maluga ate tonuuga o latou mai i luga atu o Ana mea faiite katoa. Ate manumaalo io me kote se manumaalo, polofiti io me luusi, e ttau, tena laa, o fakana ki luga i taumafaiiga loa a tagata. Kote lasi o tena taumafaiiga, kote lasi o tena fano ki mua. Matou e fiafia o fakamoemoe ko maligiiga fou ote alofa ote Atua ka mafai o fai a pula ote malamalama tonu o sae aka mai ite lauekele o loto o tagata, kae ke mafai o fulu a latou mai i lailaiiga katoa faka-te-lalolagi.

Mafaufau malie aka. Sea aa ate mea e fakagasue iei , i so se Tamilosaga, a tino ote lalolagi e se fakalogo kite Faifekau ate Alofa Fakamagalo-Katoatoa? Sea aa ate mea ne fakaoso iei a latou ke fuli keatea mai ia Ia kae fai taua atu ki Tena pule? Kafai a tagata e talosaga faka pooko ki muna konei kola ne tafe mai ite Pene ote Fakaeke Faka-te-Lagi, ka maua ne latou, tasi kae katoa loa, o fakavave o talia ate meatonu ote Faaliiga favavau ne tuku mai ne te Atua, kae ka fakamaoni ki mea kola a Ia ko oti ne fakapatonu mai. Kote veli o mafaufauga fakasupasupa kola, i aso o Faifekau ote Tafatasi ote Atua mo Punaa Aso o Tena mana favavau, ne fai mo fakalavelave, kae ka tumau o fai mo fakalavelave ite vaa o latou mote saofiaaga o tino. Auaa i aso kona, a Ia Tela kote Meatonu Favavau ne fakaasigia a Ia e tusa mote mea tela a Ia ko oti ne fakamoemoegia, kae e se tusa mo manakooga mo fakamoemoeega o tagata. Pela foki mo Tena fakaasiiga: “E masani pela me se Aposotolo e vau kia koe mo mea kola a outou agaaga ola e se manako kiei, kae nofo koutou mote miita, kae fai ne koutou a niisi mene tino ppelo, a ko niisi e taa tino.”

E seai lele se faka lotolotolua i so se mea ne fakasae mai iei a Aposotolo, i tausaga ko teka atu mo tamilosaga, e tusa mo mafaufauuga seai ne aogaa o loto o tagata ko oti ne faiite ne latou, moi fai penei e seai se tino e fakaloi ne ia ate meatonu o Foitino mana konei. E ui iai a tagata pena, ko oti ite po mote ao, masauaaga ote Atua tonu tokotasi, ko oti a latou ne fai a olotou talosaga, e ui iai ne seki fakataunu ite fakaoti o lavea, kae kautasi ite agalelei ote Punaa o Aso o failoga ote Atua mo Faifekau o Ana fakatalitonuuga e se fakafesiligina. Ko Tusitusiiga Tapu e fai mo molimau. A koe se taumate ko oti ne logo ite mea tenei.

Mafaufau aka kite Tamilosaga a Iesu Keliso. Kilo aka, i tagata poto katoa ote tupulaga tena, e ui iai ne nofo fakatalitali kite vau ote Tokotasi ne Valogina mai, e uiloa, ne fakafiti ne latou. Ko Ana, kote tino taafasili ite poto i Ona aso, ko Kalifa, kote faifeau maluga, ne teke a Ia kae folafola atu a tena sala kite tamate o Ia.

I se feitu pena, mafai a Muhammad, kote Pelofeta ate Atua – ke mafai a tagata katoa o fai taulaga atu kia Ia – ne fakasae mai, a tagata poto o Mecca mo Medina ne olo aka ki luga, i aso muamua o Tena Faaliiga, teke atu kia Ia kae se talia a Tena Meseti, ka ko latou kola mativa i taulotooga katoa ne lavea kae talia a Tena Talitonuuga. Mafaufau aka malie. Manatua ia Balál, se tino Ethiopian, e seki akoga kae e ui iai a ia ne fanaka ki luga ite lagi o tena talitonu mote mautinoa tonu, ka ko ‘Abdu’lláh Ubayy, se takitaki i vasia o tino poto, e taumafai maalosi loa mote kaitaua o teke a Ia. Kilo aka, ise takitaki mamoe ne kavegia nete lifu o muna ate Atua ne mafai iei a ia o ulufale kite maaloo o tena Fagasele Sili, kae fusi tasi kia Ia Tela kote Aliki o Tagata, kae ko latou kola e fakamatamata i olotou poto mote atamai ne takatipatipa seke mao loa mai i Tena auala kae e tumau o se maua ne latou a Tena agalelei. Ite pogai tenei Ia ne tusi atu penei: “A Ia e fakamaluga i vasia o koutou ka fakamalalogia, ka ko ia tela e malalo ka fakamaluga gia.” Tusitusiiga kite mataupu tenei e mafai o maua i taulasiiga o Tusi faka-te-lagi, pela foki mo faipatiiga a Pelofeta mo Mesentia ate Atua.

E tonu Au e fai atu ite takutakua ote Talitonuuga tenei tela ate tamana e fakalele a tena tama, ka kote tama e fakalele a tena tamana. Toe mafaufau aka ite tala o Noa mo Kanana. Ate Atua ne talia, i aso konei ote fiafia faka-te-lagi, ke se mafai a koutou o fakaaunoa mai i manogi suamalie ote Atua Matagofie–Katoatoa, kae ke mafai koutou o kautasi, ite Taimi Ola faka-te-agaaga tenei, ko vaiua ifo a tena agalelei. Tu ki luga ite igoa o Ia Tela kote Pogai o poto katoa, mote tinaa motu lele mai keatea mai i taulotooga a tagata, avaka aka ki luga a oulua leo kae folafola atu a Tena Talitonuuga. Au e tauto ite Fetu Ao ote Faaliiga Faka-te-Lagi! Ite taimi loa tela e tu koutou ki luga, ka molimau ne koutou a se lolo ote poto Faka-te-Lagi ka sofi mai i oulua loto, kae ka kilo ki mea fakaofoofogia ote Tena atamai faka-te-lagi ka fakaasigia ite matagofie katoatoa o latou i ou mua. Moi fai a koutou e tami ite suamalie o muna ate Matagofie-Katoatoa, ko mafai iei a koutou aunoa mo se talave o liakina a koutou, kae tuku ifo ki lalo a outou ola mote Fagasele Sili.

Ko ai e mafai o talitonu ite Tavini ate Atua ko oti i so se taimi ne fakataaua i Tena loto se manakooga mo so se fakaaloalo io me se penefiti faka-te-lalolagi? Ate Talitonuuga e sokotaki ki Tena Igoa e mao atu mai i luga atu i mea se tumau ote lalolagi tenei. Kilo aka kia Ia, se tino ne fakaaunoa, se tino ne oko kiei ate pule sauaa, i loto ite Falepuipui Tafasili ite Takutakua. Ona fili ko oti ne taa ne latou a Ia mai i so se feitu, kae e tumau o fai pena ke oko kite fakaotiiga o Tena ola. So se mea, telaa la, a Ia e fai mai kia koe e mote Atua katoatoa, kote mea ko tino ote lalolagi ke fiafia ke mafai ne latou o fulu ke maa a olotou loto mai i pisipisiiga o manakoga leaga, ke mafai o motu mai ki lalo a veli, kae oko atu kite poto ote Atua tonu tokotasi – kote tulaga tafasili ite maluga tela e seai se tagata e ana maua gia o kausaki kiei. Ate olotou talitonu io me kote se talitonu i Taku taloitonuuga e se mafai lele o polofiti io me e fakamae mai ki Au. Matou e kalaga atu kia latou katoatoa ona kote Atua. A Ia, e tonu, e mafai o fakaseai a mea ola katoa.

Ke iloa ne koe me kafai ate Tama ate Tagata ko tuku atu a Tena manavaga kite Atua, ate foafoaaga katoa ka tagi ise tagi tafasili ite lasi. Ne tuku taulaga atu a Ia, e ui iai a se mafai fou o iloa mote mafai o fai a mea e suki ki loto i me se faiite katoa. Ko ana fakamaoniiga, pela mote molimau a tino katoa ote lalolagi, nei ko fakaasigia i mua o koe. Ate atamai tafasili ite pooko kola ne faipatiigia ne tino poto, kote tauloto tafasili ite pooko tela a so se mafaufau ko oti ne folafola atu, ko mataupu kola a lima tafasili ite apo ne fai, kote pokotiaaga ne taumafai kiei a takitaki tafasili ite maalosi, ko fakaasiiga fua ote paoa fakavave ne fakalele atu ne Tena fakasilisili e se fakapau gia, ko Tena maalosi aofia katoatoa, pela foki mo Tena Agaaga malifalifa.

Matou e fakatalitonu me kafai a Ia e vau kite lalolagi, a Ia e sulu maina ite taulekaleka o Tena matagofie ki luga i mea faiite kaatoa. Mai ia Ia ne maalosi ate tino masaki ite lepela ote faitonu mote valea. Mai ia Ia, a latou e se piua kae fui fakalogo ne fakalei a olotou masaki. Mai i Tena paoa, ne fanau mai ite Atua kote Mafi-Katoatoa, a mata o te tauaso ne mataala, ka kote agaaga ola o te tino agasala ne fakamana.

Ate lepela e mafai o fakamatala pela me se veli e tu ite vaa ote tagata mote lavea neia ate Aliki, tena Atua. So se tino e talia a ia ke pono mai ia Ia e tonu a ia se tino masaki ite lepela, tela e masaua a ia ite Maaloo ote Atua, kote Mafi, kote Tavaegia-Katoatoa. Matou e fai mo molimau e auala atu ite paoa ote Muna ate Atua a so se tino e masaki ite lepela ka fakamaagina, so se masakiiga ka fakalei, so se tino e vaaivai ite foitino mote mafaufau ka fakaseaigina. A Ia Tela e fakapiua ate lalolagi. Fakamanuia ate tagata tela, mo mata e fonufonu ite mainaaga, ko oti ne fuli atu kia Ia.

Fakamanuia kite tagata tela e fakataaua a tena talitonu ite Atua i Ana failoga, kae atafia ia ia. “A Ia e see ttau o fakafesiligina i Ana galueega.” A se atafiaaga pena ne fai ne te Atua kote pale o so se talitonuuga, mo tena fakavae. I luga iei e fakana ate talia o so se amioga lei. Fusi a oulua mata kiei, ko musumusuuga a latou teke ke se fai ne ia koe ke tato ifo.

Kafai a Ia e fakatulafonogia me e olo tonu mote tulafono ate mea tela mai ite pilitakiiga o taimi ko oti ne fakatapu, kae ne fakatapu a ia ko oti, i taimi katoa, ne fakattau pela me olo tonu mote tulafono, e seai aka ko oti ne fakasaoloto o fakafesili a Tena puleega. So se tino e fakatalave, e ui iai e foliki ifo ite minute, e ttau o fai pela mese tino soli tuakoi.

So se tino e seki lavea ate meatonu maualuga kae fakavae, ko oti ne se kafi o oko atu kite tulaga tafasili ite maluga tenei, a matagi ote faka lotolotolua ka fakaosooso a ia, mo faipatiiga a latou fapaupau ka fakalavelave atu ki tena agaaga ola. A ia tela e atafiagia ate mau fakavae tenei ka fakaekegina mote talitonu mautinoa tonu. A fakaaloalo katoa ote tulaga matagofie-katoatoa tenei, kote masausauaaga tela e fakalei kiei a so se Tapeleti maluga. E tena ate akoakoga tela ne tuku atu kia koe ne te Atua, se akoakoga tela ka fakasao a koe mai i so se faka lotolotolua mote numi, kae fakamafai a koe o maua se faka olataga ite lalolagi nei mo sua lalolagi. A Ia, e tonu, kote Fakamagalo Favavau, kote Tafasili ite Foai Alofa.

Ke iloa mote mautinoa tonu i so se Tamilosaga ate mainaaga ote Faaliiga Faka-te-Lagi ko oti ne tuku atu ki tagata e tusa mote iloa mote mafai o fai a mea faka-te-agaaga. Mafaufau kite laa. Ate vaaivai o ona kavei ite taimi loa tela e fakasae mai i luga ite sikulagi. Kae fano fano a tena vela mote maalosi ko fanaka i taimi ko tu tonu iei, ko mafai foki iei a mea faiite katoa o mafuli a latou kite gasolo o maalosi o tena mainaaga. Ko fano ifo malie iei ke oko kite poini tela ko to ki lalo. Kae kafai e fakavave loa o fakaasi mai a enetii kola ei loto iei, e se taumate ka mafua iei ate paakia o mea faiite katoa…. Ise feitu foki pena, kafai ate Laa ote Meatonu e fakaasi fakavave, ite tulaga kamata o te fakaasiiga, ate fuafuaaga katoatoa o maalosi tela ate atamai ote Mafi-Katoatoa ko oti ne fakasafe aka ki luga iei, ate lalolagi ote malamalama o tagata ka malepelepe atu kite seai kae oti atu foki loa iei; auaa i loto o tagata e se maua o taofi ate maalosi o tena faaliiga, io me e mafai o fakaasi atu a malifalifaaga o tena mainaaga. Fanoanoa kae tanumia, ko gata a olotou o ola.

Tavaeega kia Koe, O te Aliki Toku Atua, auaa ko faaliiga fakaofoofogia o Tau fakatonuuga e see-fuafuagina mo fakalavelave mo tofooga e sautuafia ne auala mai ne Koe mo au. Ise taimi e tasi a Koe ne fakasao mai au i lima o Nimarota; i sua taimi a Koe ne fakasaoloto ate tokotoko o Falao o fakasauaa mai au. A Koe, tokotasi, e maua, mai i Tou poto aofia katoatoa mote fakagalueega o Tou Finagalo, a pokotiaaga e se maua o lau ko oti ne puapuagaa Au i olotou lima. Kae ne toe pei au ne Koe kite falepuipui ote tafalalo, e aunoa se pogai vagana ko au ne gasue o musumusu ki taliga o au tino alofagia o Tou Maaloo se fakaasiiga foliki ote kiloga tela a Koe ko oti, mai i Tou poto, ne fakamaalosi mai au, kae fakaasi ki au a tena uiga mai ite maalosi o Tou mafi. Kae e toe fakatonu mai ne Koe ko au ke fasiotigia a toku ulu nete pelu ate tino fapaupau. Kae ne toe fakasataulo au ona ne tala ne au a mata o tagata ki fatu taaua e funa i Tou tafatasi matagofie, auaa ne fakaasi kia latou a failoga fakaofoofogia o Tou nofoaiga a tupu mote paoa favavau. E koona ate fakamaseiiga ne peipei mai ki luga ia au, ise tausaga mai i tua atu, i luga ite laugatasi o Karbilá! Ne lagona ne au ate masausau ote nofo tokotasi i vasia o Ou tino! Tela ne tuku ifo au ki lalo ise tulaga e seai lele se aogaa ite fenua tena! E se lotomalie i fakamaseiiga pena, oku pule sauaa ne tamate ne latou au, mote kaveega ki luga a toku ulu mai ise laufenua ki sua laufenua kae faka foleni i mua o te kilo ate tokukeega e se talitonu, kae tuku atu ki luga i nofoaga o latou fai tonu mote seai ne fatuatua. I tausaga mai tua, au ne fakamalolo, ka ko oku fatafata ko fai pela mene taketi o matasana ote kaitaua masei o oku fili. Ko tootooga o toku foitono ne fonufonu i polofana, ka ko toku foitino ke masaesae. Fakaoti, kilo aka, ite Aso tenei, oku fili faitogafiti ko oti ne kau tasi a latou o teke mai kia au, kae e tumau ite salasala auala e mafai iei o faulu mai ate poisini ote ita mote kaitaua ki loto o agaaga ola o Au tavini. Mote maalaosi katoatoa o latou ne faitogafiti ne fakataunu ate olotou fakamoemoeega…. Fakamataku a taku malaga, O te Atua, toku Fagasele Sili, Au e avatu a fakafetai mo so se mea tela e pakuu mai kia au ite auala o Tou fiafia-lei. Au e fiafia ki mea kola a Koe ko oti ne fakaeke mai mo au, kae ulufale atu, faitalia ite faigata, a tigaiina mo fanoanoa ne pokotia Au iei.

O Taku Fagasele Sili! Ko oti a Koe ne manava a Tou manavaaga ki loto ia Au, kae motu mai Au keatea mai i Toku foitino. Ko oti a Koe, mai i tua ifo, ne fakatonu ise taimi toetoe fua ke se toe iai se atafiaaga, o se fuka o Tou Uiga Tonu i loto ia Au e toe i vaasia o latou faitonu mote loto masei, a latou ne tu aka o teke Au, kae peipei mai kia Au a olotou fakafitiiga! Sa ponogia a Tou Tino, telaa la, O Toku Fagasele Sili, fakasao mai Au mai i Taku malaga.

Mai iei ko tali mai ate Leo: “Au e alofa, e fakataaua kii ia Au ate fuka tenei. E mafai pefea o talia ko Oku mata, ke kilo ki luga ite fuka tenei, kae e seai se loto vagana ko Toku loto e lavea a ia? Mai i Toku Gali, tela e pau mo Tou Gali! Ko Toku manakooga ke funa a Koe mai i Oku mata: kae silia atu mai i mata o tagata!”

Au ne fakatokatoka o fai atu se tali, kae e poi aka, ate Tapeleti ko gata fakavave, liakina mai iei a Taku mataupu e seki oti, mote penina o Taku folafolaaga e seki saisai.

Ate Atua ko Taku molimau, O tino! Au ne moe i Toku moega, kae poi aka, ate Matagi Ili malielie ote Atua e agiagi i luga ia Au kae fago aka Au mai i Toku moegase, ko Tena Agaaga fakavave ne fakaola aka Au, mo ko Toku laulaufaiva ne fakatoka o fakaleo a Tena Kalaga. Sa tii mai kia Au ate se ite soli tulafono kite Atua. Kilo mai aka kia Au, seai mo mata o koutou kae mo mata o Au. E tena e polopoloaki atu a koe ne Ia Tela kote Matagofie, kote Iloa-Katoatoa. Mafaufau aka koutou, O tino, ia Au e puke i Oku lima ate pule kite Finagalo fakaoti ate Atua mo Tena Pogai? E mao mai iei mo Au o fai atu se faifaiiga pena. Kite mea tenei Au e fakamaoni i mua ote Atua, kote Mafi-Katoatoa, kote Tafasili ite Maluga, kote Iloa-Katoatoa, kote Atamai-Katoatoa. Moi fai ate fakaotiiga tonu ote Talitonuuga ate Atua ei Oku lima, e se talia lele ne Au, kise minute fua e tasi, o fakaasi atu Au kia koe, io me ko Au e fakasaoloto a se muna fua e tasi ke vau mai i Oku laugutu. Ite mea tenei a te Atua, e tonu, kote molimua.

O Tama ate Fakamasinooga Tonu! Ite po ate gali ote matagofie o Tagata ite vavau ko oti ne toe fakafou mai ite tumutumu lanulanu moana ote fakamaoni atu kite Sadratu’l-Muntahá, kae tagi lotulotu i se tagi a Lukuuga mana mai i luga mo latou kola e nofo i lalolagi mai i luga ko pakalaga fanoanoa ona ko Ia e fanoanoa. Mai iei ne isi se fesili, Kaiaa ate pakalaga mote fanoanoa? A Ia ne tali: Pela mote fakatonuuga Au ne fakatalitali i luga ite mauga foliki ote fakamaoni, kae e ui iai Au ne seki manava mai ia latou kola e nofo ite lalolagi ate manogi ote fakamaoni. Tena ne kami mai ke foki atu tela e poi aka! a naai lupe ote mana ko tofotofogia ne lima fekai o kuli ote lalolagi. Mai iei ate Agelu Fafine ote Lagi ne fakavave mai e seai sena veli kae masinasina mai i Tena palesi fakaofoofogia, kae sili atu ki olotou igoa, kae tali atu katoa, na loa kote tokotasi. Kae i taimi ne fakamaalosi atu a latou, ate tusi muamua ne faipatiga, mai i kona a tino e nofo i potumana mai i luga ne tele mai ki tua o olotou koga nofo ote matagofie. Kae e ui iai a te lua o tusi i taimi ne fakapula mai a latou ne siga ki lalo, taki tokotasi kae katoa loa, ki luga ite pefu. Ite taimi tena ne lagona atu ate leo mai ite kanoloto ote tugamau: “Ke oko mai ki taimi nei kae e se mu mea atu.” E tonu, Matou e fai mo molimau ki mea a latou ne fai, kae konei loa koi fai.

O Afnán, O ko koe tela ne kaula mai ia Taku Tupuga mai ite favavau! A Toku matagofie mo Toku alofa-kaimalie e nofo i luga ia koe. E pefes ate lauefa ote tapanekolo ote Talitonuuga ate Atua! Ko malusia mai ia ia a tino katoa mo itu kaaiga ote lalolagi, kae ko pili mai, o maopoopo fakatasi ate saofiaaga katoa o tagata mai i lalo o tena maluuga. Ate aso ote galue tavini ko oti ne vau. E se maua o lau ate Tapeleti e fakasino iei a fakamaoniiga o fakamanuiaaga ne tuku atu kia koe. Tu ki luga kite manumaaloo o Taku Talitonuuga, kae mai ite paoa o tau faipatiiga, ne tao ifo ki lalo a loto o tagata. A Koe e ttau o fakaasi atu ate mea tela ka fakapatonu iei ate filemu mote nofo lei o latou se fiafia mote mativa. Fakamau aka a feitu o tau taumafaiiga, kote mea ke mafai o tala atu ate pagota mai i ona filifili seni, kae fakamafai a ia ke maua ate salotooga tonu.

Ate fakamasinooga tonu, ite aso tenei, e fakafanoanoa i tena tulaga mote Seai-se-Fapito e tagi tigaina mai i lalo ote aamoga pologa. Ko kaumana matolu ote pule sauaa ko fakapouli iei a mata ote lalolagi, kae pulougia iei a tino. Mai ite gasuesue ote Omotou Pene ote Matagofie Matou ko oti, mai ite fakatonuuga ate Fakaeke maalosi, manava atu se ola fou ki so se tino, kae suki atu ki loto so se muna fou maalosi. A mea faiite katoa e folafola atu a fakamaoniiga ote toe fakaolaaga ote lalolagi salalau. E tenei ate toe mea tafasili ite takutakua, a toe tala tafasili ite fakafiafia ne tuku mai ne te Pene ate Tokotasi ne Fakaseegina kite saofiaaga o tagata. Kaiaa e mataku a koutou, O aku fakagasele sili? Ko ai e mafai o fakafanoanoa a koe? Se siuuga foliki ko lava loa o fakamakeke ate fatu telaa mai iei ate tupulaga finau valea ne fakafoliga mai iei. Kote gasuesueega foliki ote fakatasiiga koulua ko lava loa o tufatufa atu a maalosi o tino fai kae seai ne aogaa….

So se tagata kilo mao, ite aso tenei, ka talia fakavave loa ne ia i poloakiiga ate Pene ote Tokotasi ne fakaseegia tenei kooit ne fakaasi e aofia iei ate paoa galue sili mnote fano ki mua ote lalolagi mote fakamalugaaga o ona tino. Tu ki luga, O tino, auala mai ite paoa ote mafi ote Atua, fakaiku ke maua ate manumaaloo i luga ia koutou loa, kote mea ke fiafia ite lalolagi kaatoa e mafai o saoloto kae fakamana mai ite tapuaki ki atua mo ona manatu valea – atua kola ko oti ne fakapokotia ate luusi ki luga, kae e pogai kiei ate puapuagaa o olotou tino tapuaki sei ne aogaa. A tupua e fai mo fakalavelave e fakatuai iei ate tagata mai i ana taumfaiiga o fano ki mua ite auala e fakatonutonuiei a ia. Matou de fakataaua ate fakamoemoe kote Lima ote paoa Faka-te-Lagi ke mafai o feasoasoani ki tagata, kae fakasao mai a latou mai ite tulaga tafasil ite tafalalo.

I se tasi o Tapeleti a muna konei ko oti ne fakaasi: O tino ote Atua! Sa fakalavelavegia koutou ki mea kola e fakasino fua mo koutou; tuku a outou mafaufau ke fakapiki ki mea kola ka toe fakaola mai a maumea koloa o tagata kae fakamana a loto mo agaaga ola o tagata. Kote auala tafasili e mafai o fakataunu ite ite piua mote mana o uiga fai, auala atu ise olaaga lei mo amioga lei. Ko gasuesueega seai se mataku ka mafai o fakapatonu ate sili ote Talitonuuga tenei, mo se natula masinasina ka fakamaalosi iei a tena paoa. Piki mau koutou kite amiotonu, O tino o Bahá! Tenei, e tonu, kote tulafono ate Tokotasi ne fakaseegina tenei ko oti nee tuku atu kia koe, mote filifiliiga muamua o Tena Finagalo e se taofigina mo so se tasi o koutou.

O taugasoa! E ttau mo koe o toe fakafou kae fakaola a oulua agaaga ola mai iluga i alofaaga agalelei tela ate Atua maluga, kote Vaitau Ola tenei e salasala o ligi atu kia luga ia koe. Ate Fetu Ao o Tena matagofie takutakua ko oti ne sulu atu a gali ki luga ia koe, ka ko kaumana o Tena agalelei e seai ne ana tuakoi ko pulougia ia koe. E pefea ate maluga ote tauii o ia tela e seki amanaia ne ia a se fakamanuiaaga o tena Fagasele Sili ite mea tenei, ko Tena gatu fou. Onoono ki luga ia koutou, auaa ite Tokotasi Tiapolo e faitalitali mai, ko toka o fakapelo a koe. Fakatokatoka a koutou ki ana uiga amio leaga, kae takigia ne te mainaaga ote Atua Lavea-Katoatoa, taumafai o fakasao a koe mai ite pogisa tela e siomia ia koe. Ke fai a tau kiloga ke aofia iei ate lalolagi kaatoa, iloo ate kilo fua a koe kia koe loa. Ate Tokotasi Tiapolo ko ia tela e fai mo fakalavelave ate fanaka ki luga mote taofi ote fano ki mua faka-te-agaaga o tama a tagata.

E ttau mo so se tagata, ite Aso tenei, o puke mau ki so se mea tela e fakamasiki aka iei a feitu lei, kae fakamaluga ate tulaga, o fenua katoa mo maaloo fai meatonu. Mai i loto i takitasi mo so se tasi o fuaiupu ko oti ne fakaasigia ne te Pene ate Tafasili ite Maluga, a mataloa ote alofa mote fakatasitasi ko oti ne tala kae tala loa ke matala ki mua i mata o tagata. Matou ko oti ne fakapula atu – ka kote Muna a Matou kote meatonu -:”Fesokotaki mo taugasoa o tapuakiiga katoa ite agaaga ote fealofani mote fakataugasoa.” So se mea tela ne taaki iei a tama a tagata o pono atu a sua tino mo sua tino, kae pogai kiei a faka kinauuga mo mavaevaeega ite vaa o latou, kooti mai ite faaliiga o muna konei, ne tina keatea kae fakaseai. Mai ite lagi ote Finagalo ote Atua, kae mote pogai o fakamafai ate lalolagi o tino mote avakaaga o mafaufau mo agaaga ola o tagata, ko oti ne tuku ifo ki lalo a toe mea fai galuega tafasili ite lei mote Akoakoga ote lanu o tagata kaatoa. Ate uiga tonu tafasili ite maluga mote tafasili ite lei ite fakaasiiga o so se mea a tino anamua ko oti ne faipati io me e tusi ko oti mai ite Faaliiga tafasili ite maalosi tenei ne tuku ifo ki lalo mai ite lagi ote Finagalo ote Pule Aoao-Katoatoa, kote Atua Fakatuanaki-Favavau. Mai i anamua ko oti ne fakaasi: “Alofa ote tino ki tena fenua se feitu ote Talitonuuga ate Atua.” Ate Laulaufaiva ote Taulekaleka ko oti, ite aso o Tena avefekau ne folafola atu: “E see mo ia ke miita ia ia e alofa ki tena fenua, kae mo ia tela e alofa kite lalolagi kaatoa.” E ui iai ate paoa ke liakina mai ne muna tafasili ite maluga konei a Ia ko oti ne tuku atu se fakamalosiiga fou, kae fakamau se saelega fou, ki manu eva o loto o tagata, kae ko oti ne fakaseai lele loa so se fakataputapuga io me se fakatapula mai ite Tusi mana ate Atua.

O tino ote Fakamasinooga Tonu! Ke pula maina koutou pela mote mainaaga, ke gali pela mote afi tela e ula ite Vao Kaa foliki. Ate pula ote afi o tou alofa ka setaumate e fusi tasi kae fakasoko ate tino fakakinau mo itu kaaiga ote lalolagi, ka kote kaitaua ote ulaga ote fili mote ita e se mafai na kote pogai ote fai taua mote fakamasei. Matou e akai fakamolemole kite Atua ke mafai ne Ia o puipui Ana meaola mai i palane fakamasei o Ona fili. A Ia e tonu e isi ate paoa i luga i mea katoa.

Tavaeega katoa kite Atua tonu tokotasi – ke fakamaluga a Tena matagofie – e pela loa mo Ia ko oti mai ite Pene ate Tafasili te Maluga, ne tala a mataloa o loto o tagata. So se fuaiupu ko oti ne fakaasi mai ne te Pene tenei se mataloa maina kae malapulapu tela e fakaasi mai iei a matagofie o se olaga masinasina kae faka-atua, ne amioga e piua kae seai se lailaiiga iei. A kalaga mote Meseti a Matou ne tuku atu e seki fakamoemoe pela ke oko atu io me e penefiti a se laufenua io me se itukaaiga o tino e tasi. A tino itena katoatoaaga e ttau o pikimau ki so se mea ko oti ne fakaasi atu kae tuku atu foki. Vagana e fai pena fatoa maua se saolotooga tonu. Ate lalolagi saukatoa e fakamaina kite matagofie malifalifa ote Faaliiga ate Atua. I tausaga e onosefulu a Ia Tela ne vau muamua mote mainaaga ote Takitakiiga Faka-te-Lagi – ke mafai a foafoaaga katoa o ofo atu faka taulaga ki Ia – tu ki luga kae fakasalalau atu a se faaliiga fou ote Agaaga Faka-te-Lagi, kae ne tautaligia, luasefulu tausaga mai i tua ifo, ne Ia auala mai i Tena vau kite laolagi o fai me kote tino e maua ne ia ate matagofie ne faifeagaiiga mai kote aofaga fakaofoofogia tenei. Kilo aka kite saofiaaga o tagata ko oti ne tuku atu kiei ate mafai o iloa mote mafai o fai a mea ke fakavave kite Muna maluga ate Atua – ate Muna tela e fakana kiei a fakatasitasiiga fakatasi mo toe faka olataga faka-te-agaaga o tagata katoa….

Tuku a outou loto, O tino ote Atua, ki apoapoaiga ote oulua Taugasoa tonu, e se-fakatusagia. Ate Muna ate Atua e mafai o fakatusa kite lakau koi foliki, kola ona aka ko oti ne toki i loto o tagata. E ttau mo koutou o fakamaalosi a tena ola mai ite vaai ola ote atamai, o muna tapu kae mana, ko ana aka ke mautakitaki ka ko ona kaula ke mafai o ola salalau atu kae maluga pela mo lagi kae ki tua atu foki.

O koutou kola e nofo ite lalolagi! A feitu fakamatea kola e maaka iei ate uiga tafaloa ki mua ote Faaliiga Tafasili ite Maluga tenei e aofia iei ko Matou ko oti, i sua lima, ne solo keatea mai i laupepa ote Tusi mana ate Atua so se mea tela e pogaii kiei ate fai taua, te loto masei mote faitogafiti i vaasia o tama a tagata, kae ko oti, i sua lima, ne tuku ifo ki lalo a mea tafasili ite taaua kola e tau o fai muamua kite fealofani, kite malamalama, kite tafatasi katoatoa kae tumau. E lei mo latou kola e tausi Aku tulafono.

Taimi mo taimi a Matou ne polopoloaki atu a Omotou fagasele ke taofi, e tonu o tele keatea mai, i so se mea tela ate manogi ote faitogafiti e mafai o lavea iloa atu. Ate lalolagi ke maua ne se numi masei loa, ka ko mafaufau o ona tagata ko tu ise tulaga tafasili ite fai valevale. Matou e akai fakamolemole kite Mafi-Katoatoa ke mafai ne Ia o fakamaina mote agalelei mote matagofie o Tena fakamasinooga tonu, kae fakamafai a latou ke maua a mea kola e polofiti kia latou i taimi katoa i lalo o so se fakanofonofooga. A Ia, e tonu kote Pule Aoao-Katoatoa, kote Tafasili ite Maluga.

Sa tukugina fakaatea ate mataku kite Atua, O koutou a tino poto ote lalolagi, kae fakamasino fakalei ate Talitonuuga ate Tokotasi e seki akoga tenei Tela a Tusi katoa ate Atua, kote Puipui, kote Ola-loa-ia-Ia, ko oti ne fakamaoniia…. E se mafai ate mataku ote se fiafia Faka-te-Lagi, ate mataku o Ia Tela e seai sena fakatusa io me e pau, o pokotia a koe iei? A Ia Tela ate lalolagi ko oti ne seegina, ko oti ite seai o se taimi, ne sokotaki mo koe, e seki tauloto aka loa a outou tusitusiiga, io me e kau atu i outou faka kinauuga. Ate gatu e pei a Ia kiei, ko Ona laulu, ko Tena teuuga i Tena ulu, e fakatalitonu kite meatonu o Ana muna. E pefea ate leva e fai mai loa ate outou fakamasinooga se tonu? Molimau ate koga nofo o Ia, Tela kote fakafoliga mai ote fakamasinooga tonu, ko oti ne faimaaloo ke nofo iei. Tala oulua mata, kae kilo ki Tena ikuuga, talosaga fakapooko i luga i mea a outou lima ne fai, kote mea ke fiafia a koutou ke mafai o fakaseai se mainaaga o Tena folafolaaga Faka-te-Lagi, io me e nofo tumau pena e seai se tusaga o koutou ite vasa o Tena poto.

Naai tino mai i lafu tino mo tino malu ko oti ne se talia ne latou ate Tokotasi tenei ne faka seegina tela e seai se sui ose fakapotopotooga lotu io me ne vau i se teleega o se Pelofeta. Fai atu: O koutou kola e fai ia koutou e fakamasino tonu! Mafaufau malie aka, ka lavea iei ne koutou ate tafasili ite maluga seai se gataaga o Tena tulaga mai i luga atu o tulaga e fai koutou me e ttau o nofo iei. Ate Finagalo ote Mafi-katoatoa ko oti ne fakatonu mai me mai ite fale e seai lele loa se takitaki o lotu iei, tokita, tagata poto, mo tino sukesuke poto e masani o nofo mo Tena Talitonuuga e ttau o olo ki mua kae ke fakaasigia.

A manavaaga ote Agaaga Faka-te-Lagi e fago aka a Ia, kae kalaga atu ia Ia ke tu ki luga o folafola atu a Tena Faaliiga. Seki leva kae ala aka a Ia mai i Tena moegase kae siki aka a Tena leo kae kalaga atu kite lalolagi a tino katoa kite Atua, te Aliki o lalolagi katoa. Matou ne gasue o fakaasi atu a muna konei ite fakatau ite vaaivai mote se-maalosi o tagata; auaa, ate Talitonuuga a Matou ko oti ne fakasalalau atu e seai se pene e mafai lele o fakamatala, io me se mafaufau e mafai o iloa atena takutakua. Kite mea tenei e fai mo molimau a Ia mote Maatua o Tusi.

Ate Gali Favavau ne talia ke saisai ki filifili seni ko tino ke mafai o fakasao mai i tena fakapologa, kae talia ke fakapagota a ia i loto ite olo maalosi takutakua tenei tela ate lalolagi ke mafai o oko atu kite tinaa saolotooga. Ko oti ne inu ate ipu ote fanoanoa, ko tino katoa ote lalolagi ke mafai o maua ne latou ate fiafia se gata mai, kae fonufonu ite lifu. Mea nei kote alofa fakamagalo ote outou Aliki, kote Alofa Atafai, kote Tafasili ite Alofa Fakamagalo. Matou ko oti ne talia ke fakamaseigia, O taugasoa ite Tafatasi ote Atua, kote mea ko koutou ke fakamaluga gia, kae ke pokotia i puapuagaa e tuafia, kote mea ke ola kae salalau koutou. A Ia Tela ko oti ne vau o fakatu se lalolagi fou katoatoa, kilo aka, mene kautasi a latou pefea i fakai lasi tafasili ite liakina!

Au e se fanoanoa ite mafa o Toku falepuipuiiga. Io me ko Au e fanoanoa i Toku fakalumaina, io me ko puapuagaa ne pokotia Au iei i lima o Oku fili. I Toku Ola! A latou ko Toku matagofie, se matagofie ate Atu ko oti ne fakafou mo Ia loa ia Ia. E seiloa ne koutou!

Ate fakalumaina ne fai ke tauave ne au ne matala iei ate matagofie telaa ate foafoaaga kaatoa ne fakamaumau kiei, kae auala atu ite sauaa ne kolomaki ne Au, ate Fetu Ao ote Fakamasinooga Tonu ko oti ne fakaasiigia, kae sulu atu a tena taulekaleka ki luga i tagata.

A Oku fanoanoa e mo latou kola e saga ifo i olotou fiafiaaga ki amioga faitogafiti, kae fai aka ia latou e sokotaki mote Talitonuuga ate Atua, kote Agalelei, kote Tavaegia-Katoatoa.

E ttau mo tino o Bahá o mate kite lalolagi mo mea katoa i loto iei, ke motu keatea mai i mea faka-te-lalolagi katoa kote mea ko tagata ote Palataiso ke mafai o manava mai i olotou gatu manogi suiti e fakapaiagia, ko tino katoa ote lalolagi ke mafai o lavea i olotou mata ate malapulapu ote Alofa Fakamagalo-Katoatoa, kae mai ia latou e mafai o fola ki tua atu a failoga mo fakamaoniiga ote Atua, kote Mafi-Katoatoa, kote Atamai-Katoatoa. Latou kola ne fakalailai ate igoa lei ote Talitonuuga ate Atua, ite tautali ki mea ote foitino – latou kona e nofo ise matua see!

O tino Iutaia! Kafai e taumafai loa o toe fakasataulo a Iesu, te Agaaga ote Atua, tamate gina Au, auaa a Ia tenei ko toe, i Toku foitino, ne toe fakaasi mai kia koutou. Fai mai kia Au a outou mea e manako kiei, auaa ia Au ko oti ne tauto o tuku ifo ki lalo a Toku ola ite auala ote Atua. Au e se mataku ki se tino, e ui iai a paoa ote lalolagi mote lagi e tapani o fakasaga mai kia Au. Taugasoa ote Tala Lei! Kafai e fakataaua ate manakooga o fasioti a Muhammad, kote Aposotolo ate Atua, pukegina Au kae fakaoti a Toku ola, auaa Au ko Ia, ka koToku foitino ko Tena Foitino. Fai mai kia Au ate mea e loto koutou kiei, auaa ite naunauuga pooko o Toku loto kote mea ke oko atu kite nofomai o Toku Fagasele Sili i Tena Maaloo ote Matagofie. E pena ate fakatonuuga ate Faka-te-Lagi, mafai e se iloa ne koutou. Taugasoa o Muhammad! Kafai kote manakooga o koutou o fakauta a outou auala ki fatafata o Ia Tela ne pogai kiei a Tena Tusi kote Bayán ke tuku ifo ki lalo ia koe, puke mai outou lima kia Au kae fakasauanoagia Au, auaa ia Au ko Tena Fagasele Sili, kote fakaasiiga o Tena tinaa Foitino, ui iai a Toku igoa e se ko Tena igoa. Au ko oti ne vau i kaumana ote matagofie, kae ne fakafonugia ne te Atua kote nofoaiga a tupu e se-lavea. A Ia, e tonu kote Meatonu, kote Iloa o mea e see lavea. Au, e tonu, ka fakatali mai ia koe ki se faifaiiga ne fai ne koutou kia Ia Tela ne vau mai i Oku mua. Kite mea tenei a mea katoa, e tonu, e molimau, mafai a koutou ko latou kola e fakalogo. O tino ote Bayán! Kafai a koutou ko iku ke fakamaligi ate toto o Ia, a Tena vau ate Báb ne folafola mai, Tela ate oko mai a Muhammad ne faifeagaiiga mai, kae Tela a Tena Faaliiga ne fakasalalau mai ne Iesu Keliso, kilo mai aka kia Au e tu, e toka kae e seai se mea e puipui iei, i mua o koutou. Fesokotaki mai kia Au mana oti a outou manakooga.

Ate Atua ko tau molimau! Moi fai e se feseketaki mo mea kola a Tapeleti ate Atua ko oti ne fakatonu mai, au ko leva ne fiafia o sogi a lima o so se tino tela e taumafai o fakamaligi a toku toto ite auala ote Fagasele Sili. E se gata iei, ne fakaeke atu ne au ki luga ia ia se tusaga mai i koloa faka-te-lalolagi, pela mote mea ne talia mai ne te Atua ke nofo mo au, e uiloa a ia e solisoli ne ia ate uiga tenei kae ka fakaita ne ia ate kaitaua ote Mafi-Katoatoa, ne fakafetaui ki Tena faka fanoanoaaga, kae e ttau ke fakapuapuagatia salalau ite favavau ote Atua, kote Pule Aoao-Katoatoa, kote Amiotonu, kote Atamai-Katoatoa.

Ke iloa fakalei me i so se taimi ate Talavou tenei e fuli atu Ona mata ki mua ia Ia, e maua ne ia ate foafoaaga tafasili ite se taaua i foafoaaga katoa. Kafai a Ia e manatunatu, ate malamalama pupula ko oti a Ia ne fakaekegia ke fakaasi, io, kote tino ia ia loa, e fakaliu mai i Ona mua kise tupu Maalosi e salalau i loto ite uiga tonu o mea katoa, lavea mote se-lavea. Matagofie kia Ia Tela, mai ite paoa ote meatonu, ko oti ne tuku ifo ki lalo ite Faifekau o Tena foitino loa ia Ia mote fakamaoniia a Ia mote Tena Meseti ki tagata katoa.

Lue gina keatea, O tino se fakalogo, ate moegase ote fakatamala, ko koutou ke mafai o kilo kite pulaaga tela a Tena matagofie ko oti ne fola slalau ite lalolagi. E pefea ate vaalea o latou kola e musmusu teke kite fanau tomua mai o Tena mainaaga. O koutou kola e tauaso faka-te-agaaga! Me ko to vave io me ko talimuli, a fakamaoniiga o Tena matagofie malifalifa ko fakaasi fakapatonu. E ttau mo koe o fakapatonu me ko oti ne sae mai a se mainaaga pena io me ikaai. I seai i tou paoa io me ko au o fakatonu ate taimi e ttau iei o fakaasi. Ate Atamai faka ofoofogia ote Atua ko oti ne tusia a tena itula mai i mua. Ke lotomalie koutou, O tino, mote mea ko oti ate Atua ne manako mo koutou kae ko afea loa ne fakatoka mo koe…. O tagata olioli kite masei! Ate Fetu Ao ote Takitakiiga favaavau e fai mo aku molimau: Moi fai ke iloto i toku paoa, ko oti au, i so se fakanofonofooga o talia ke fakamatea loa au ite vaa o tagata, auaa kote Igoa e tauave ne au e matuaa inoino o mafuta a ia mo se tupulaga ko olotou laulaufaiva e lailai ka ko olotou loto e pelo. Kae i so se taimi e filifili au ke taofi toku filemu kae e se gasuesue, io, ate leo ote Agaaga Tapu, e tu i toku lima faka atamai, o fai mai ke ala au, mote Agaaga Tafasili ite Maluga e fakasae mai mua o oku mata, ka ko Kapilielu e anapulougina au, mote Agaaga ote Matagofie e vau pili mai kia au, o fakatonu au ke tu ki luga o faipati atu. Kafai a tou fakalogologo e tapale keatea ka ko ou taliga e logo, a ia ka tonu loa e atafia i so se totooga o toku foitino, e tonu ko atomu katoa o toku foitino, ko folafola atu kae fai mo molimau kite kalaga tenei: “Ate Atua, mai i tafa o Ia e seai aka foki se Atua, ka ko Ia, Tela Tena gali ko iloagia nei, kote ata o Tena matagofie ki tino katoa kola ite lagi mote lalolagi.”

O Tino! Au e tauto kite Atua tonu tokotasi! Mea ioa loa ite fakaotiiga o fakatasi. Mai ia Ia a Laa katoa ko oti ne fakagalue, kae kia Ia e foki atu katoa a latou. Mai i Tena maalosi a Lakau Ola ote Faaliiga Faka-te-Lagi ko oti ne fua mai a olotou fuaga kaina, so se tasi tela ko oti ne tuku ifo ki lalo ite foliga o se Pelofeta, e tauave iei a se Meseti ki meaola ate Atua i lalolagi taki tasi o lalolagi a tena aofaki kote Atua fua , i Tena Poto aofia-katoatoa, e mafai o iloa. Tenei ko oti a Ia ne fakataunu mai ite lukuuga o se tasi o Mataimanu o Tena Muna, folafola atu ne Tena Pene – se Pene e fakagasuegia ne Tena Maikao fakasinosino – Tena Maikao tela e fakatumau iei ate paoa ote Meatonu ate Atua.

Fai atu: O tino! Sa taofi koutou mai ite agalelei ote Atua moTena alofa fakamagalo. So se tino tela e taofia a ia mai iei e tonu e tafasili ite masei a tena luusi. Sea aa, O tino! e tapuaki a koutou kite pefu, kae fuli keatea mai ite outou Aliki, kote Agalelei, kote Foai Alofa-Katoatoa? Mataku koutou kite Atua, kae sa fai pela mo latou kola e olo o tanumia. Fai atu: Ate Tusi ate Atua ko oti ne tuku ifo ki lalo ite foliga ote Talavou tenei. Fakapaiagia, telaa la, kite Atua, kote tafasili ite lei o tufuuga! Fakalogo fakalei, O tino ote lalolagi, auaa ia koutou mana tele mai i Ona mata. E tonu, fakavave ke maua a Tena nofomai, kae fai pela mo latou kola ko oti ne foki mai kia Ia. Talo ke fakamagalogia, O tino, auaa ite fakatamala o koe i tou tiute kite Atua, aua ne soli tuakoi a koe o teke ki Tena Talitonuuga, kae sa fai pela mo latou e valea. A Ia tela ne faiite a koe: A Ia Tela ne fagai a outou agaaga ola mai i Tena Talitonuuga, kae fakamafai a koe ke lavea a Ia Tela kote Mafi-Katoatoa, kote Tafasili ite maluga, kote Iloa-Katoatoa. Ko Ia tela ne tue keatea ate veli ki oulua mata a koloa o Tena poto, kae fai a koe ke fanaka ki luga ite lagi ote mautinoa tonu – kote mautinoa tonu o Tena Talitonuuga tafasili ite maluga, e se-mafai o taofigia, e se-fakafesiligia. Faeteete ia koutou mana fakaseai mai ia koutou ate agalelei ote Atua, ia koutou mana aumai kite seai a outou galuega, kae sa fakapelo ate meatonu ote Faaliiga tafasili ite fakamateagia, maluga malifalifa kae matagofie. Fakamasino ne koutou fakalei ate Talitonuuga ate Atua, kote outou Tufuuga, kae kilo kite mea ko oti ne tuku ki lalo mai ite Nofoaga a Tupu mai i luga, kae talosaga fakapooko mo latou kola e se agasala kae fakatapu a olotou loto. Kote meatonu ote Talitonuuga tenei ko fatoa fakasae mai kia koe kae maina pela mote laa ote tutonu matagofie. Tena ko fai iei koutou mo latou kola e talitonu ia Ia.

Fai atu: Ate fakamaoniiga muamua kae tafa loa ki mua e fakatalitonu iei a Tena mea tonu ko Ia foki loa. Tafa atu kite fakamaoniiga tenei ko Tena Faaaliiga. Auaa a ia tela e fakatamala o lavea se tasi io me se isi aka ko oti ne fakatu ne Ia a muna ko oti ne folafola mai mo fai a fakamaoniiga o Tena tinaa uiga tonu mote meatonu. E tenei, e tonu se fakamaoniiga o Tena alofa fakamagalo atafai ki tagata. Ko oti ne fakaeke atu ne Ia ki so se agaaga ola ate mafai o iloa mote mafai o fai a mea ke laveagia a failoga ate Atua. E mafai pefea a Ia, ne fakataunu a Tena fakamaoniiga ki tagata, mafai a koutou ko latou kola e mafaufau ki Tena Taitonuuga i outou loto. E se mafai lele a Ia o sona fakamasino see a so se tino, io me e avatu ne Ia se galuega ki se agaaga ola mai luga atu i tena paoa. A Ia, e tonu kote Atafai, kote Alofa Fakamagalo-Katoatoa.

Fai atu: Ko tafaga ite takutakua ate matagofie ote Talitonuuga ate Atua tela ko tino tauaso e mafai foki o lavea ne latou, kae e tafaga atu mo ia tela e tafasili ite matakite, kola a tena kiloga e piua. Ate tauaso, e ui iai e se kafi ne ia o lavea ate mainaaga ote laa, e uiloa, e kafi o lagona ne ia a tena velasia. Ate tauaso ite loto, e ui iai, ite vaasia o tino ote Bayán – kite Atua ko Taku molimau – e se kafi, faitalia mene pefea ate leva ote kasa ote Laa ki luga ia latou, me o lavea a tena malifalifa o tena matagofie, io me o fakataaua ate velavela o ona kavei.

Fai atu: O tino ote Bayán! Matou ko oti ne filifili a koe mai ite lalolagi ke iloa kae ke lavea a Matou. Matou ko oti ne fai a koe ke fakapilipili mai kite feitu fakaata mai ote Palataiso – kote Laumanafa mai iei ate Afi e se mate e tagi mai i gauga leo e tuafia: “E seai aka foki se Atua i tafa o Au, kote Maalosi-Katoatoa, kote Tafasili ite Maluga!” Fakalogo mai ia koutou mana fakasaoloto a koutou e ponogia nete veli mai ite Punaa Aso tela e sulu maina mai i luga atu ote aso olaola ote Finagalo ote outou Aliki, kote Alofa Fakamagalo-Katoatoa, tela a tena mainaaga e siomia a mea foliki mo mea lasi. Pulapula fakalei a outou mata, kote mea ke mafai koutou o lavea ate mana ki outou mata, kae se fakana ki mata o niisi tino aka vagana ko koe, auaa ite Atua e seki tofotofo aka so se agaaga ola mai i luga atu o tena maalosi. Tena ne tuku ifo ki lalo ki Pelofeta mo Mesentia o taimi mua, kae ko oti ne fakamau i Tusitusiiga Tapu katoa.

Taumafai, O tino, ke ulufale atu koutou ki loto ite kogaa-koga e se fuafuagia ite lasi tela ate Atua ne fakaekegia mai ite seai se kamataga pela foki e seai se fakaotiiga, ne avaka iei a Tena leo, kae mai i luga iei ne agiaagi malie a manogi suamalie ote mana mote matagofie. Sa liakina ne koutou ate Gatu ote agalelei, io me fakapologagia a outou loto ke fakaseai mai ite masauaaga ote outou Aliki, seai ko oulua taliga ke fakavave atu ki leo suamalie o Tena fakaofoofogia, Tena maluga, ko Tena aofia-katoatoa, ko Tena leo maina kae tafasili ite fakaotia loto.

O Nasír! O Taku tavini! Ate Atua, kote Meatonu Favavau, e fai mo Aku molimau. Ate Talavou Taulekaleka Faka-te-Lagi, ite Aso tenei, ne avaka mai i luga atu i ulu o tagata ate Ipu matagofie ote Ola Favavau, kae e tu fakatalitali i luga i Tena nofoaga, mafaufau me se aa ate mata ka lavea ne ia a Tena matagofie, me se aa ate lima, e aunoa mo se talave o fakaloa atu o puke ate Ipu mai i Tena Lima kena pela me se kiona kae inu ne ia. Ne naai tino fua ne inu mai ite agalelei tafetafe malie se fakatusagia ote Tupu Favavau. A Latou konei e nofo i palesi tafasili ite maluga ite Palataiso, kae fakatu mautakitaki i luga i nofoaga o puleega. Ona kote amiotonu ote Atua! E seai ne kilo o Tena matagofie, io me ko tino fakaasi o Ona igoa, io me so se mea faiite, tela ko oti kae ka tumau pena, e mafai o silia atu ia latou, mafai a koutou ko latou kola e malamalama ite meatonu tenei.

O Nasír! Ate tafasili ite lei ote Aso tenei kote se fuafuagina ite maluga mai i luga atu ite iloa o tagata, me e pefea ate lauefa ote olotou poto, me e pefea ate pooko ate olotou malamalama. E pefea foki ite tafasili atu o silia a fakatauuga o latou kola ko olo seke mai i tena mainaaga, kooti ne pono mai i tena matagofie! Kafai ko pei ki lalo ate veli matagaa tela ne pono iei a tau kiloga, a koe e se kilo ki se foai alofa pela me seai, mai ite kamataga tela e seai se kamataga kite fakaotiiga tela e seai se fakaotiiga, e mafai o fakatusa io me e pau. Sea aa ate gana e ttau mo Ia tela kote Muagutu ote Atua e filifili o faipati, kote mea ko latou kola e ponogia ne se veli mai ia Ia e mafai o lavea a Tena matagofie? Ate amiotonu, pagota ote Maaloo i luga, kai inu mai ite Uaina ote Mana. I Toku igoa, kote matagofie-katoatoa. E seai mai i tafa o latou e kau tasi i penefiti penei

Mai ite amiotonu ote Atua, toku Fagasele Sili ! Au ne seki manakogia kite pule faka-te-lalolagi. A toku pogai tonu loa ko oti ne tuku ifo ki lalo ki tagata ate mea tela ko oti au ne fakatonu ke avatu ne te Atua, kote Agalelei, kote Se-Fakatusagia, me e mafai o motu mai keatea mai ia latou a mea katoa kola e tau atu kite lalolagi tenei, kae pogai a latou o oko atu ki koga maluga e seki mafaufaugia aka loa ne tino seai se faka-atua iei, io me ko latou fai tonu.

Fakamasaua a koe, O te Fenua o Ta (Tihrán), i aso mua ne fai ne Tou Aliki mo koe ate nofoaga o tena nofoaiga a tupu, kae pulougia a koe ki Tena matagofie malipolipo. E pefea ate tokouke ote aofai o latou ne fakatapugia, ko failoga kona ote mautinoa tonu, kola, ite olotou alofa lasi mo koe, ne tuku ifo a olotou ola kae fakamana a latou katoa ona ko koe! Fiafia kia koe, mote fiafia lasi kia latou kola e nofo ia koe. Au e fakamaoni me mai ia koe, pela mote iloa ne so se loto mataile, e vau mai ite manava ola o Ia Tela kote Manakooga ote lalolagi. Ia koe ate Se-Lavea ko oti ne fakaasi, kae mai ia koe, ne fanatu ki mua ate mea tela e nofo funa mai i mata o tagata. Ko ai ate tokotasi ote lafu tino o au fagasele alofa fakamaoni e ttau o masaua ia Matou, kola ana toto ko oti ne ligi mai i loto i ou mataloa, kae tela ko ana pefu ko funa nei mai i lalo o tou laueleele? A manogi gali ote Atua ko se gata loa ite agiagi malielie, kae ka tumau pena o agiagi malielie i luga ia koe. Ate Pene a Matou ko gasue o fakamasaua a koe, kae e fakamaluga a latou kola ne pokotia mai ite fakasauaa, latou tagata mo fafine kola e moe mai i lalo ote pefu.

Mai ite vasia o latou kote tuagane o Matou, tela a Matou ne kalaga nei kiei pela me se alofaaga ote fakamaoni o Motou, mote fakatalitonuuga ote alofa- kaimalie o Motou, kia ia. E fakaalofa kii a tena tulaga! I se tulaga pefea ne foki mai iei a ia ki tena Atua! Matou aka loa ite Omotou poto aofia katoatoa, ko leva ne iloa ate mea tenei.

Ote Fenua ko Ta! A Koe e tumau loa, ite agaleleli ote Atua, se senta e maopopo iei Ana fagasele. Fiafia a latou; fiafia a so se tino e seai se koga mo ana nofo tela e salasala ki sou koga nofo, i tena puapuagaa ite auala ote Atua, kote Aliki o Aso fakaofoofogia tenei! Fakamanuia a latou kola e masaua ate Atua tonu tokotasi, tela e fakalasi a Tena Igoa, kae salasala mote fakamaoni o tavini ki Tena Talitonuuga. Ko tagata penei kola a Tusi tapu mai i anamua loa ne fakatino kiei. I luga ia latou ko oti ate Komanta ote Fakamaoni fakaoko atu ana tavaeega, o fai atu: “Ate fakamanuiaga e faitalikia latou e silia ite fakamanuiaaga e oko mai kia tatou nei.” A Ia, e tonu, ko oti ne faipati ate meatonu, kae kite mea tenei a Matou e molimau. Ate matagofie ote olotou tulaga, e uiloa e seki fakaasigia. Ate Lima ote Paoa Faka-te-Lagi ka fakapatonu o apai aka ki luga ate veli, ke fakaasi ki mata o tagata ate mea tela ka fakafiafia kae fakamama ki mata ote lalolagi.

Avatu a fakafetai kite Atua, kote Meatonu Favavau, ke maluga a Tena matagofie, tela e iloa me ko koe ko oti ne maua se alofaga faka ofoofogia, kae fakalakei ki mea fakagaligali o Tena tavaeega. Ke taaua ate aogaa o aso konei, kae piki mau ki so se mea e ttau kite Faaliiga tenei. A Ia, e tonu, kote Kaunisela, kote Alofa Atafai, kote Iloa-Katoatoa.

LVI.O te Fenua o Ta (Tihrán), sa faigia se mea ke fakafanoanoa kia koe, auaa ite Atua ko oti ne filifili a koe me kote kamataaga ote lifu o tino katoa. A Ia ka fai, mafai ko Tena Finagalo, fakamanuia a tou nofoaga a tupu mo tokotasi tela ka pulepule mote fakamasinooga tonu, tela ka aumai fakatasi ne ia ate lafu mamoe ate Atua kola ne fakamaofaofagia ne uolosa. A se tino pulepule pena mote lifu mote fiafia, ka fuli ona mata ki mua, kae fakaoko atu ana alofaaga ki tino o Bahá. A Ia e tonu e lau i mata ote Atua pela me se fatu taaua i vaasia o tagata. Ki luga ia ia e nofo iei kite favavau ate matagofie ote Atua, mote matagofie o latou katoa kola e nofo ite maaloo o Tena faaliiga.

Fiafia mo se fiafiaaga lasi, auaa ite Atua ko oti ne faiite mo koe “ate Punaa Aso o Tena mainaaga,” pela mo iloto ia koe ko oti ne fanau ate Faifekau o Tena Matagofie. Ke fiafia a koe mote igoa tenei ne tuku atu ki luga ia koe – se igoa tela e auala iei ate Fetu Ao ote agelelei ke pei atu a tena taulekaleka, auala atu ite lalolagi mote lagi ko oti ne fakamainagia.

Ne leva ko faifaiiga a maaloo i loto ia koe ka mafuli, ka kote puleega ote paoa ka pakuu ki lima o tino. E tonu, a tou Aliki kote Iloa-Katoatoa. A Tena pule e aofia iei a mea katoa. Nofo mote mautinoa ite agalelei alofa o tou Aliki. Ate mata o Tena alofa-kaimalie ka tumau kite favavau o fakasino kia koe. Ate aso ko pilipili mai ko fuli iei a tou kaitaua kite filemu mote nofo toka. E pena ko oti ne fakatonu mai ite Tusi fakaofoofogia.

Kafai a koe ko liakina ate fale o Toku nofomai, O Muhammad, fakasino a ou alagaavae ki mua i Toku Fale (Baghdád House), kae asiasi atu kiei ona ko tou Aliki. Kafai e oko atu koe ki tena mataloa, tu a koe mai i mua kae fai atu: Ne fano ki fea ate Gali Favavau, O kote Fale ote Atua tafasili ite takutakua. A Ia mai ia Ia ate Atua, ko oti ne fai a koe kote fakaikumata ote lalolagi e ofo, kae folafola atu kia koe ke fai a koe mo failoga o Tena masaua ki tino katoa kola i lagi mo tino katoa kola ite lalolagi? O! mo aso taumua mafai a koe, O te Fale ote Atua, ne fai a koe mo Tena mea manava iei a vae, ko aso mafai ite faigata tumau ote leo ote Alofa Fakamagalo-Katoatoa e ligi atu mai ia koe! Se aa ate mea ko tupu ki tau fatu taaua tela a tena matagofie ko oti ne fakamaina kiei ate foafoaga katoatoa? Ko olo aso a Ia, kote Tupu ote Favavau, ko oti ne fai a koe mo nofoaaga-a-tupu o Tena matagofie, aso kola a koe tokotasi ko oti ne fili ne Ia mo fai ate lamepa ote fakaolataga ite vaa ote lalolagi mote lagi, kae fai a koe ke faipati salalau atu, ite fakavaveao mote afiafi, a manogi suamalie ote Matagofie-Katoatoa?

Tefea, O te Fale ote Atuaa, ate Laa ote afioga malu mote paoa Kola ne pulougia ia koe mote malipolipo o Tena nofomai? Tefea a Ia, ate Punaa Aso o alofa fakamagalo atafai o tou Aliki, kote Se-Kafi o Taofigia, Tela ko oti ne fakatu a Tena nofoaga i loto i pui? Sea aa ate mea, O te nofoaga a tupu ote Atua, tela ko oti ne fuli a ou mata, kae fai ou pou ke gasuesue polepole? Sea aa ate pogai ne pono iei a tou mataloa i mata o latou kola e finafinau o sala kia koe? Sea aa ate mea ne fai iei a koe ke nofo tokotasi? E seki fakailoa ite Fagasele ote lalolagi e atuligia ne pelu tau a Ona fili? Ate Aliki e fakamanuia kia koe, kae fakamanuia ki tou fakamaoni kia Ia, ia koe ne nofo tumau pela me se taugasoa o Ia auala katoa atu i Ana fanoanoa mo Ana puapuagaa.

Au e tauto ia koe kote ata o Tena matagofie malipolipo, ko Tena koga nofo tumau tafasili ite mana. Mai ia koe ko oti ne fanatu ate Manava ote Matagofie-Katoatoa, se Manavaaga tela ko oti ne manava i luga i mea faiite katoa, kae fakafonu kite fiafia a fatafata o latou maalosi kola e nofo i fale lasi ote Palataiso. Ate lukuuga malu mai i luga, mo latou kola e nofo i Fakai Lasi ote Igoa ote Atua, e tagi i luga ia koe, kae tagi lotulotu ki mea kola ne oko atu ki luga ia koe.

A koe koi fai loa mo failoga o igoa mo uiga lei ote Mafi-Katoatoa, kote Poini ki mua a mata ote Aliki ote lalolagi mote lagi e fakasaga kiei. Ne pakuu atu ki luga ia koe a mea kola ne pkuu ki luga ite Vaka tela ne iei ate ofo ote Atua kite nofo toka ko oti ne fai ke nofo i kona. E lei mo ia tela e maina lei ite uiga o muna konei, ke lavea ate pofai o Ia Tela kote Aiki o foafoaaga katoatoa.

Fiafia a latou kola e manava mai ia koe a manogi suamalie ote Alofa Fakamagalo, kola e faka taaua ia latou a tou fakamaluga, kote mea ke puipui a tou mana, ke fakamalu, i taimi katoa, a tou tulaga. E akai fakamolemole a Matou kite Mafi-Katoatoa ke talia ko mata o latou kola ne fuli keatea mai ia koe, kae fakatamala o fakataaua a tou aogaa, ke mafai o matala, ko latou ke fakapatonu loa o lavea a koe, mo Ia Tela, mai ite paoa ote meatonu, ko oti ne avaka ki luga. Kivi, e tonu ko latou e uiga mo koe, ke seiloa lele loa ne latou ia koe ite aso nei. A tou Aliki e tonu, kote Agalelei, kote Fakamagalo.

Au e molimau e auala mai ia koe ate Atua ko oti ne fakatalitonu a loto o Ana tavini. Fakamanuia kite tagata tela e fakasino ona vae ki mua ia koe, kae asiasi atu kia koe. Faka fanoanoa kia ia tela e fakapelo tou fakaata mai kae fuli atu keatea mai ia koe, tela e se fakaaloalo a tou igoa, kae e se-aava ki tou mana.

Sa fanoanoa, O te Fale ote Atua, kafai ate veli o tou fakapaiagia ko to ki lalo ne fai ne tino fui fakalogo. Ate Atua ko oti ite lalolagi ote foafoaaga, ne fakafou a koe mote fatu taaua o Tena masaua. A se fakalakeiiga pena e seai se tagata i so se taimi e ana maua o se-fakaaloalo. Ki mua ia koe ko mata o tou Aliki i nofonofooga katoa ka tumau o fakasaga. A Ia, e tonu, ka tuku atu a Tena taliga kite talosaga a so se tino e asiasi atu kia koe, tela ka tamilo fakapukupuku ia koe, kae kalaga atu ki luga ia Ia i tou igoa. A Ia ite tonuuga kote Fakamagalo, kote Alofa Fakamagalo-Katoatoa.

Au e akai totuli kia Koe, O toku Atua, mai ite Fale tenei tela ko oti ne puapuaga ite mafuliiga ona kote mavae mai mo Koe, tela e tagi lotulotu i tena mao mai i Tou nofomai, kae fanoanoa ki Ou puapuagaa, ke fakamagalo mai au, mo oku matua, mo oku kaaiga, pela foki mo latou kola e talitonu ia Koe. Talia mai ko oku manakooga katoa ke fakalava, mai i Tou alofa foai, O Koe Tela kote Tupu o Igoa. A Koe kote tafasili ite Alofa Foai o alofa foai, kote Aliki o lalolagi katoa.

Toe mafaufau aka kite mea tela ko oti ne fakaasi atu kia Mihdí, ate tavini a Matou, ite tausaga muamua ote fakaaunoaaga o Matou kite Fenua ote Mealilo (Adrianople). Kia ia a Matou ne vaalo atu ite mea tela ka pakuu ite Fale o Matou (Baghdád House), i aso ka aumai, ia koe mana fanoanoa i uiga kaisoa mote sauaa kola ko leva foki ne oko mai kiei. E tonu, ate Aliki, tou Atua, e iloa a mea katoa kola i lagi mo mea katoa kola ite lalolagi.

Kia ia Matou ko oti ne tusi atu: Mea nei seai kote fakatauemu muamua ne oko mai ki luga i Toku fale. I aso ko teka mai ite lima ote tino sauaa ne oko mai a fakatauemuuga ki luga iei. E tonu, e tafasili ite masei i aso mana aumai ko ala iei a loimata o tafe ifo ki lalo mai i so se mata e lavea. Tena a Matou ne fakaasi atu a mea kia koe kola e funa mai i tua atu ote veli, fakaofoofogia ki tino katoa vagana kote Atua, kote Mafi-Katoatoa, kote Tavaegia-Katoatoa. Ite katoatoaga o taimi, ate Aliki mai ite paoa ote meatonu, ka fakamaluga a ia i mata o tagata katoa. A ia ka fai ke fai mo Fuafuaaga o Tena Maaloo, kote Shrine e tamilomilo iei ate lukuuga mana o tino fakamaoni. Tena ne faipati a tou Aliki, tou Atua, ko pili ate aso ote fanoanoa o oko mai. Ate faaliiga tenei ne tuku atu ne Matou kia koe ite Tapeleti malu a Matou, ia koe mana fanoanoa i mea ko oti ne pakuu ki luga ite Fale o Matou auala atu i fakamaseiiga ate fili. Tavaeega katoa kite Atua, kote Iloa-Katoatoa, kote Atamai-Katoatoa.

So se tino e seai se fapito iei ka se lave loa o fakaasi mai me talu mai ite fakavaveao o Tena Faaliiga, ate Tokotasi ne fakasee gia tenei ko oti ne kami atu a tino katoa ke fuli a olotou mata ki mua ite Punaa Aso ote Matagofie, ko oti ne fakatapu ate faitogafiti. Ita, sauaa, mote amio leaga. Kae e uiloa, kilo aka ki mea ate lima ote tino sauaa ko oti ne fai! E seai se pene e mafai o fakamatala a tena sauaa kaitaua. E uiloa ate pogai o Ia Tela kote Meatonu Favavau ko oti ne tuku atu ate ola e se gata mai ki tagata katoa, kae fakapaton ate olotou nofo toka mote filemu, e ui iai e molimau a latou ne tu ki luga o fakamaligi a toto o Ona fagasele, kae folafola atu kia Ia ate ikuuga kote mate.

A latou kola ne sukesuke ate fakasauaa tenei ko latou foki loa kola, e uiloa e valea, kae e fai pela me ko tino sili ite atamai. E pena ate tauaso o latou kola mote sauaa fakapatonu, ne pei keatea ne latou a Ia kite Falepuipui pui maalosi kae fakapokotiagia, mo tavini a Ia Tela a Tena Faitotoa ne faiite iei ate lalolagi. Ate Mafi-Katoatoa, e uiloa a latou mo latou kola ne fakapelo ate meatonu ote “Fakapulaaga Tafasili ite Takutakua” tenei, ko oti ne fuli ate Faalepuipui kite Palataiso Tafasili ite Maluga, kote Lagi o Lagi.

Matou e seki teke atu ki koloa pena e penefiti mai ke mafai o fakalei aka a Matou mai i Motou puapuagaa So se tino i Omotou taugasoa, e fai mo molimau ite Motou koga nofo tapu e fakapaiagia mao mai i luga atu i koloa e penefiti iei a matou pena. Kae e uiloa ne talia, kae sai loa matou i loto ite Falepuipui tenei, a mea kola a tino fui fakalogo ne taumafai o fakaseai mai ia Matou. Kafai se tagata e lotomalie o tautali mai, ite Motou igoa, se fale aulo piua io mene siliva, io mese fale e fakalakei ki fatu taaua e se maua o fuafuagia ate taaua o latou, a se manakooga pena e se taumate ka taliagia. A Ia e tonu e fai ate mea e manako a Ia kiei, kae e fakaeke ate mea tela e fiafia a Ia kiei. Ate taliaaga ko oti ne tuku atu ki so se tino tela e manako o fakatu ki luga, ite kauloaloa mote lauefa ote fenua a fakatutuuga, fakapitoa mo laumanafa maumea kae tapu o Iolitana pela foki mo koga pili mai kite tapuakiiga mote tavini atu kite Atua tonu tokotasi, e fakalasi a Tena matagofie, ko valoaga ne tusi ne te Pene ate tafasili ite Maluga i Tusitusiiga Tapu ke mafai o fakataunu ka ko mea kola ate Atua, te Aliki o lalolagi katoa, ko oti ne pogai mai ite Faaliiga tafasili ite maluga tenei, tafasili ite mana tenei, tafasili ite mafi tenei, ke mafai o folafola mai.

Matou ko oti ne folafola atu a muna konei mai i anamua: O Ielusalema, Tatala atu a tou titi! Mafaufau ate mea tenei i oulua loto, O tino o Bahá, kae tuku atu a fakafetai kite oulua Aliki, kote Fakamatala Upu, kote Tafasili ite Fakaasi Silisili.

Kafai a mea lilo kola e iloa kite seai aka foki na fua kote Atua, e fakaasigia, a tino katoa ka molimau a fakamaoniiga ote fai fakamasinooga tonu tafasili ite sao mote katoatoa. Mote mautinoa tonu me e seai aka foki e ana maua o fakafesili, a tagata katoa ka piki ki Ana tulafono, kae tautali kia latou fakapatonu loa. A Matou, e tonu, ko oti ne fakatonu atu ite Omotou Tusi ate tauii lei mote foai alofa ki so se tino tela e fuli keatea mai ite masei kae tautali ise olaaga piua kae faka-atua. A Ia, ite tonuuga, kote Foai SIli, kote Foai Alofa-Katoatoa.

A Toku fakapagota e se mafai lele o aumai kia Au se fakamaa. E tonu, i Toku olaga, e aumai ne ia ki luga i Toku matagofie, ate mea tela e mafai o taemaa iei Au ko amioga o latou kola e fai pela me ko Oku taugasoa kae fakaasi ia latou e alofa mai kia Au. Kae ui iai ite tonuuga e tautali loa ite Tokotasi Tiapolo. A latou, e tonu, kola ko galo lele atu loa.

Kafai ate taimi ko fakatonu mote Faaliiga tenei ko fakataunu, a Ia Tela kote Fetu Ao ote lalolagi ko fakasae mai i ‘Iráq, a ia ne fai ki Ana taugasoa ke ite mea tela ka fakamana iei a latou mai i lailaiiga katoa faka-te-lalolagi. Ko niisi ne manako loa o tautali i olotou manakooga amio leaga, ka ko niisi aka e sasale ite auala ote amiotonu mote meatonu, kae ne takitakigia kite mea lei.

Fai atu: A Ia e se-aofai mo latou o Bahá tela ne tautali i ana manakooga e se-lei, io me e tuku loa a tena loto ki mea ote lalolagi. A Ia ko Toku taugasoa tonu tela, kafai a ia ne vau ki se vanu o aulo piua, e fakaseke tonu mao loa a ia pela me se kaumana, kae e se-fuli mai foki ki tua, io me e fakatalave. Ate tagata pena ei ia Au. Mai i tena gatu ate Lukuuga mana mai i luga e mafai o manava ate manogi gali ote fakapaiagia…. Kae kafai a ia e fetaui mo se tamafine tafasili ite tino gali kae taulekaleka ite kilo, e se taitai o lagona i tena loto se manakoga ki tena gali. A se tino pena, e tonu kote foafoaaga tafasili ite matakalekaale. E tena e fakatonu mai kia koe ate Pene o Aso Favavau, pela mote fakatonuuga a tou Aliki, kote Mafi-Katoatoa, kote Foai Alofa Katoatoa.

Ate lalolagi ko nofo ise tulaga puapuagatia, ka ko tena numiiga kaitaua ko makeke. Ona mata ko fuli atu kite se-fakalogo mo se-talitonu. E pena a tena nofooga, kae ke fakaasi se mea e se ttau kae e se nofo tonu. Ko tena faitonu ka tumau kise taimi leva. Kae kafai ate itula ne tusia ko vau, ka sae fakavave ate mea tela e fai ne ia a tootooga o tagata ke polepole. E tena, kae e tena fua, ko mafai iei ate Fuafuaaga Faka-te-Lagi o tala mai, ka kote Nainitigikale ote Palataio ko usu ana pese.

Fakamasaua aka a tou mafaufau ki Oku fanoanoaaga, Oku atafaiiga mo oku sapole, Oku tigaiina mo tofotofooga, kote tulaga o Toku fakapagota, ko Oku loimata ne maligi, kote kona o Toku mae, kae nei ko Toku falepuipui ite fenua mao tenei. Te Atua, O Mustafá, e fai mo Aku molimau. Moi fai e fai atu kia koe a mea kola ne oko mai ki luga ite Gali Favavau, a koe ko tele kite togaavao, ke tagi ise tagi lotulotu. I tou fanoanoa, e mafai o pago a tou ulu ne koe, kae tagi atu ki luga pela me ko koe e uu ne se gata poisini. Ke fakafetai a koe kite Atua, ia Matou ne seki fakaasi atu kia koe a mea funa o fakatonuuga kola e se-maua o salagia kola ne tuku ifo ki lalo kia Tatou mai ite lagi ote Finagalo o tou Aliki, kote Tafasili ite Maalosi, kote Mafi-Katoatoa.

Mai ite amiotonu ote Atua! I tafataeao katoa Au e ala mai i Toku moega, e maua ne Au a puapuaga e se maua o lau e fakatali mai i Toku mataloa, kae ko po katoa mafai ko takato ifo au ki lalo, io! A Toku loto e masaesae ite tigaiina ki mea ne pokotia iei mai i fakamaseiiga sauaa a ona fili. Mo se tama potu falaoa ate Gali Favavau e vaevae kae e fakatasi atu kiei a fakasauaaga o puapuagaa fou, kae mo se motiiga taki tasi a Ia e inu e aofia iei ate kona ote tofotofooga tafasili ite masei. I so se sitepu e laka ne Ia kae olo i Ana mua se vaegau o mala e se-laveagina, kae mai i Ona tua e tautali mai iei a tino e se lausia mo olotou fanoanoaaga tafasili ite fakatigaiina.

E pena a Toku tulaga, mafai a koe e mafaufau kiei i tou loto. Sa-faigia, e uiloa, ko tou agaaga ola ke fanoanoa i mea ate Atua ko oti ne vaiua ifo ki lalo ia Tatou. Fili tasi a tou finagalo i Tena fiafiaaga, auaa ia Maou ko oti e seai aka foki se taimi ne se manako ki se isi aka vagana ko Tena Finagalo, kae talia Ona fakatonuuga takitasi e se-mafai o fulifuligia. Ke onosai a tou loto kae fai a koe ke se-fanoanoa. Sa tautali i auala o latou kola e lasi ate kaitaua.

O ko ou mata kola e fuli mai kia Au ! I taimi loa tela a ou mata e kilo mao ki Toku fakai lasi totino i (Tihrán), tu a koe kae fai atu: Au ko vau kia koe mai ite Falepuipui, O te Fenua o Ta, mo tala lei mai ite Atua, kote Feasoasoani i Faigata, kote Ola-loa-ia-Ia. Au e fakapula atu kia koe, O matua ote lalolagi mote puna ote mainaaga ki ona tino katoa, a alofaaga fakamagalo atafai o tou Aliki, kae fakafetaui kia koe ite igoa o Ia Tela kote Meatonu Favavau, kote Iloa o mea e se-lavea. Au e tauto me i loto ia koe a Ia Tela kote Igoa Funa ko oti ne suke aka. Mai ia koe a mea funa o mea katoa, me ko latou ne mea i taimi ko teka io me ko taimi mai mua, ko oti katoa ne fakaasigia.

O te Fenua o Ta! A Ia Tela kote Aliki o Igoa e masaua a koe i Tena tulaga matagofie. Koe kote Punaa Aso ote Talitonuuga ate Atua, kote puna o Tena Faaliiga, ko fakaasiiga o Tena Igoa Tafasili ite Takutakua – se Igoa tela ko oti ne pogai kiei ate sapolepole o loto mo agaaga ola o tagata. E pefea ate tokouke ote aofai o tagata mo fafine, latou kola ne maua nete fakasauanoaga, kola ko oti, i loto i pui, ne tuku ifo a olotou ola ite auala ote Atua, kae ko oti ne tanu ite pefu ise auala tafaasii ite faka kaitaua ne ala iei a so se tavini malu ate Atua o fanoanoa ite olotou tulaga.

Kote manakooga o Matou ke masaua ate Koga Nofo tafasili ite manuia silisili (Tihrán), kote fakai lasi tapu kae maainaina – kote fakai lasi tela ate manogi gali ote Fagasele Sili ko oti ne sulu atu, ko Ana failoga ko oti ne fakasalalaau atu, tela ko fakamaoniiga o Tena matagofie ko oti ne fakaasi, kola ko Ana fuafuaaga ko oti ne sisi aka ki luga, tela a Tena tapanekolo ko oti ne toki, tela taki tasi o Ana fakatonuuga atamai ko oti ne fola atu.

Kote fakai lasi tela a manogi suamalie ote toe fetaui ne manavagia, ne fai iei a tagata alofa ote Atua ke fakapilipili atu kia Ia, kae maua se ulufale kite Koga Nofo tapu kae gali. Fia ate tino fai malaga tela e tau atu ana vae kite fakai lasi tenei, tela e maua o ulu atu ki loto iei, kae inu ite uaina ote toe fetaui, mai i maligiiga ote alofa tauanoa o tena Aliki, kote Agalelei, kote Tavaegia-Katoatoa.

Au ko vau kia koe, O te fenua o te manakooga ote loto, mo tala lei mai ite Atua, kae fakasalalau kia koe a Tena alofa agalelei mote alofa fakamagalo, kae fakafetaui ke fakalasi a koe i Tena igoa. A Ia, e tonu, e tumu ite foai alofa mote lei. Fakamanuia kite tagata tela e fuli ana mata kia koe, kote mea ke lavea mai ia koe a manogi gali ote Nofomai ote Atua, kote Aliki o lalolagi katoa. Tena matagofie ke i luga ia koe, mote malifalifa o Tena mainaaga ke pulougia ia koe, pela mote Atua ko oti ne fai a koe me se palataiso ki Ana tavini, kae folafola atu kia koe ke fakamanuiagia ate fenua tapu tela a Ia, ia Ia, ko oti ne faipati i loto i Tusi kola Ana Pelofeta mo Mesentia ko oti ne fakaasi.

Mai ia koe, O te fenua ote matagofie malifalifa, kote fuka, “E seai aka foki se Atua na ko Ia,” ko oti ne agiagi atu, ka kote fuafuaaga, “E tonu Au kote Meatonu, kote Iloa o mea e se-lavea,” ko oti ne sisi ki luga. E ttau mo so se tino telaa e asiasi kia koe o tapuaki ia koe kae ia latou kola e nofo ia koe, ia Latou ko oti ne kaula mai i Toku Lakau Ola, ko latou ko lau o ia, kola ko failoga o Toku matagofie, kola e tautali mai ia Au mo latou kola e alofa kia Au, kae kola, ite taumafai sili, ko oti ne fuli atu a olotou mata kite ala o Toku tulaga malu.

Toe fakamasaua aka ne koe a Tou oko mai kite Fakai Lasi (Constantinople), mene mafaufau pefea a Minisita ote Sultán ia koe e se masani mo olotou tulafono mo tulafono foliki, kae talitonu ia Koe se tasi o valea. Fai atu: Ao, mai i Toku Aliki! Au e valea i mea katoa vagana ko mea ate Atua, auala mai i Tena foai alofa, ne fiafia o akoako mai Au. Kite mea tenei Matou e fakamaoni e tauto, kae e fakaasi tonu atu e seai se talave.

Fai atu: Kafai a tulafono mo tulafono foliki kola e piki koutou kiei ko mafuaaga foki loa a koutou, Matou ka tautali kiei. Tena laa Au ko oti ne fakatonu mai ne Ia Tela kote Atamai-Katoatoa, kote Fakailoa-Katoatoa, E pena a Toku auala i taimi ko teka, kae ka tumau pena i taimi mai i mua, auala atu ite paoa ote Atua mo Tena mafi. E tenei, e tonu, kote meatonu mote auala tonu. Kafai a latou ne fakaekegia ne te Atua, aumai ki mua a oulua fakamaoniiga. Fai atu: Matou ko oti ne tusi ki lalo ite Tusi tela ne seki ai lele se mea ne liakina mai iei ate galueega a so se tagata, e uiloa ate se taaua, a mea katoa a latou ko oti ne fakatagi atu kia Koe, mo mea katoa a latou ko oti ne fai atu kia Koe.

Fai atu: E ttau mo koutou, O Minisita ote Maaloo, o tausi a tulafono ate Atua, kae fai mo latou kola e takitakigia ite sao. E lei atu tenei mo koutou i mea katoa e nofo mo koutou, e seiloa ne koutou. Kafai a koutou e soli tuakoi i tulafono ate Atua, e se tasi io me se tofiiga e tasi o galueega katoa a koutou e mafai o talia i Ona mata. Koutou ko ttau o pili o maua ne koutou a mafuaaga o mea kola a koutou ne fai ite olaaga seai se aogaa tenei, kae ka tauii atu kia koutou. E tenei e tonu kote meatonu, e se pupu ia koutou ate meatonu.

E pefea ate takutakua ote aofai o latou kola, i aso taumua, ne fai ne latou a mea ne fai ne koutou, kola, e ui iai e maluga atu i outou tulaga, ko oti, ite fakaotiiga, ne fakafoki kite pefu, kae liakina atu kite otiiga. E mafai tena ate mea ne mafaufaugia ne koutou mote Talitonuuga ate Atua i oulua loto? Ka tautali koutou i taimi e ala iei a latou, ka fai ko latou ke ulufale ki loto ise koga nofo tela e seai se tino e maua o fakataugasoa atu kia koe. Ite tonuuga, ka fakafesiligina a koe ki au mea ne fai, ka fai atu ke laulau mai au mea ne fakatamala koe iei e uiga mote Talitonuuga ate Atua, pela foki mote liakina fakatauemu ne koe Ana fagasele kola e fakaasi ne latou ate tinaa fakamaoni ko olo atu kia koe.

Ko koutou kola ne pule pule fakatasi e uiga mo latou, e uiloa a koutou ne manako o tautali ite musumusuuga a outou manakooga, kae liakina ate tulafono ate Atua, kote Feasoasoani i mea Faigata, kote Mafi Katoatoa.

Fai atu: Sea aa! Piki a koutou ki outou aofaga, kae pei keatea mai oulua tua a akoakoga ate Atua? A koutou, e tonu ko oti ne faakaseegina ia koutou loa mo niisi aka. E mafai o seiloa ne koutou? Fai atu: Kafai a oulua tulafono mo akoakoaga e fakavae mai ite fakamasinooga tonu, kaiaa la, a koutou e tautali ia latou kola mafai o tusa mo olotou uiga lega kae e se talia a latou kola e kese mo olotou manakooga. Sea aa ate saolotooga o koutou o fakamasino tonu ite vaa o tagata? A oulua tulafono mo akoakoga e ttau kite fakasauanoaaga o Ia Tela, ite fakatonuuaga a koutou, ne tuku atu a Ia i oulua mua, ate teke o koulua kia Ia, mai ite outou fakamae o Ia i aso taki tasi katoa ate pakiaaga tafasili ite masei? A Ia ne se fakalogo aka loa kia koutou, ise minute fua e tasi? A tino katoa o ‘Iráq, kae mai i tua atu foki so se tino matakite, e fai mo molimau kite meatonu o Aku muna.

Ke tautonu a tau fakamasinooga, O koutou ko Minisita ote Maaloo! Sea aa ate mea a Matou ko oti ne fai e ala iei ate fakaaunoa o Matou? Sea aa ate mea ne soli tulafono iei a Matou ne ala iei ate fakateka keatea o Matou? Ko Matou Kola ne sala atu kia koutou, kae e ui iai, kilo mai ia koutou ne se talia o puke a Matou! Ite Atua! Mea nei se matuaa fakamasinooga tonu e seai se amiotonu iei ko oti ne solisoli ne koutou – se fakamasinooga se tonu tela e seai se fakamasinooga e seai se amiotonu iei e mafai o fuafuagia. Kite feitu tenei ate Mafi-Katoatoa ko Ia ate molimau….

Ke iloa ne koutou ite lalolagi mo ana fakamatamata mo ana fakagaligaliiga e aumai o pasia keatea. E seai se mea e tumau vagana kote Maaloo ote Atua tela e seai e fakapiki kiei vagana ko Ia, kote Aliki Tupu o tino katoa, kote Feasoasoani i mea Faigata, kote Matagofie-Katoatoa, kote Mafi-Katoatoa. A aso o tou olaaga ko tekateka o olo keatea, ka ko mea katoa kona e sagatonu koutou kiei kae fakamatamata koutou iei e olo o tanumia, kae fakapatonu loa, ko kalagina ne se lukuuga o Ana agelu ke fakasae ite laufenua tela a tootooga ote foitino ote foafoaaga katoatoa ka fai ke sapolepole, ka ko kano o so se tino sauaa ka kutu ki loto. A koutou ka fakafesiligia ki mea a outou lima ne fai ite olaaga seai se aogaa tenei, kae ka tauii a outou mea ne fai. Mea nei kote aso tela e ttau loa o oko mai ki luga ia koe, ate itulaa ko se maua o toe fakafoki. Kite mea tenei ate Laulaufaiva o Ia tela e faipati ate meatonu kote iloa o mea katoa ko oti ne fakamaonia.

Mataku kite Atua, koutou ko tino e nofo ite Fakai Lasi (Constantinople) kae mo aa e toki ne koutou a tega ote fai taua i vaa o tagata. Sa sasale i auala ote Tokotasi Tiapolo. Sasale i aso koi toega o tou olaaga, i auala ote Atua tonu tokotasi. Ou aso ka aumai o olo pela loa mo aso o latou mai i ou mua. Kite pefu ka foki koutou kiei, pela foki loa mo oulua tamana mai i mua ne foki atu.

Ke iloa ne koutou ia Au e se mataku ki se tino vagana kote Atua. E seai aka foki na ko Ia ne tuku a Toku talitonu kiei; e seai aka foki e piki Au kiei vagana ko Ia, kae e manako au kite seai aka foki na loa ko mea e manako a Ia mo Au. E tenei tonu ate manaakooga o Toku loto, e seki iloa ne koutou. Ko oti ne ofo atu a Toku agaaga ola mo Toku fuaitino a me se taulaga mote Atua, ko Aliki o lalolagi katoa. So se tino tela ne iloa ne ia ate Atua ka seiloa ne ia se isi aka na ko Ia, ka ko ia tela e mataku kite Atua kae se mataku kise isi aka vagana ko Ia, e ui iai ate paoa ote lalolagi katoa e tu ki luga o fakasagai atu kia Ia. Au e faipati kite seai vagana ko Tena fakatonuuga, kae e tautali kite seai, auala atu ite paoa ote Atua mo Tena mafi, vagana ko Tena meatonu. A Ia, e tonu, ka tauii a latou fakamaoni.

Fakamatala aka, O Tavini, a mea ne lavea ne Koe ite taimi ote oko mai o Koe kite Fakai Lasi, ko Tau fakamaoniiga ke mafai o tumau ite vaa o tagata, kae fai me se uonigi kia latou kola e talitonu. Matou e oko atu kite Fakai Lasi, e maua i ona kovana mo tino matuatua pela mene tamaliki e maopoopo o fai a olotou fakafiafiaaga ki pefu. Ne lavea aka ne Matou me e seai se tino matua a tena mafaufau o puke atu ia Matou a meatonu kola ne akoako mai ne te Atua, io me e toka mo muna atamai fakaofoofogia a Matou. A Motou mata faka-te-agaaga ne konaa ite tagi ia latou, kae i luga foki i olotou soli tulafono mote seai lele loa se saga o latou ki mea ne pogai kiei ate olotou faiitega. E tenei ate mea e matea ne Matou ite Faka Lasi tena, kae ko oti ne filifili ia Matou ke fakamau ki loto ite Motou Tusi, kote mea ke fai mo uonigi kia latou, pela foki mote saofiaaga o tagata.

Fai atu: Kafai a koutou ne tino salasala kite olaaga tenei mo mea seai ne aogaa iei, a koutou ne ttau o sala kiei kae koi nofo koutou i tinae o outou matua, auaa ite taimi tena a koutou e soko loa ate fakapilipili atu kiei, e se laveagia ne koutou. I sua feitu, a koutou ko oti mai i taimi loa ne fanau iei ke oko atu kite tausaga matua, ko oti katoa ne kamata o soloki ki tua mai ite lalolagi kae fakapilipili atu loa kite pefu. Kaiaa la, e fakaasi iei se kaimanako lasi o fakatupu a koloa ote lalolagi, manafai ou aso ko fakanapagia ako tou avanoaaga ko galo? Ea e se ttau mo koe, O tino se fakalogo, o lue keatea a tou moegase?

Tuku mai a outou taliga ki apoapoaiga ate Tavini tenei e tuku atu auaa kote Atua. A Ia, e tonu, e se manako kise tauii maai ia koe ke lotomalie kite mea ate Atua ko oti ne tuku atu mo Ia, kae e tuku atu katoatoa mote fakalogo kite Finagalo ote Atua.

A aso o tou ola ko oti, O tino, ka kote fakaotiiga o koe ko vave o pili mai. Tuku keatea, telaa la, a mea ne gaosi ne koutou kae kola e piki koutou kiei, kae puke mau ki fakatonuuga ate Atua, kote mea ke fiafia a koutou ko mafai o oko atu kite mea tela ate Atua ko oti ne faakatonu mai mo koe, kae fai mo latou kola e sasale ite auala tonu. Sa fakafiafia a koutou i mea ote lalolagi mo ona fakagaligaliiga e seai ne aogaa, io me e tuku outou fakamoemoeega kiei. Ke fai a tou fakanaaga kote masausauaga ote Atua, kote Tafasili ite Maluga, kote Tafasili ite Takutakua. A Ia, ko pili, o fakaseai a mea katoa e nofo mo koe. Ke fai a Ia mo tou mataku, kae sa fakapuli a Tena feagaiiga mo koe, kae sa fai pela mo latou kola e pono pela me se veli mai ia Ia.

Faeteete ia koutou mana fete ite fakamatamata i mua ote Atua, kae teke mote fakatauemu Ana fagasele. Fesilisili kia latou kola e maulaalo kite fakamaoni, latou kola e talitonu ite Atua mo Ana failoga, kola a olotou loto e molimau ki Tena fakatasitasi, kola a olotou laulaufaiva e folafola atu a Tena tafatasi, kae e se-faipati vagana ko talia ne Ia. Tela la e fakatonu atu a koutou ne Matou kite fai fakamasinooga tonu, kae poloaki atu koutou kite mea tonu, kote mea ke mafai koutou o ala aka.

Sa tuku gia ki so se agaaga ola se amoga tela a koutou foki e se manako o tuku atu kiluga ia koutou, kae fai gia ki so se tino aka a mea kola a koutou e se manako foki mo koutou. Mea nei ko Taku apoapoaiga tafasili mo koutou, kai tautali koutou kiei.

Fakaaloalo ki tino lotu mo tino poto ite vaa o koutou, latou kola a olotou amioga e tusa mo olotou galuega, kola e se soli a tuakoi ko oti ne fai mai ne te Atua, kola a fakamasinooga tonu e tusa mo Ana fakatonuuga e fakaasi mai i Tena Tusi. Ke iloa ne koutou ia latou ko lamepa ote takitakiiga kia latou kola i lagi mote lalolagi. Latou kola e se fakalogo kae liakina a tino lotu mo tino poto e nofo i vasia o latou – ate mea tenei ko fai mo mea e mafuli iei a alofaaga ne mafaufaugia ne te Atua mo latou.

Fai atu: Faitali koutou ke oko ki taimi ko fuli ne Atua a Tena alofa mo koutou. E seai so se mea e sao mai ia Ia. A Ia e iloa a mea funa i lagi mote lalolagi. A Tena poto e aofia iei a mea katoa. Sa fiafia i mea a koutou ne fai, io me e fai mai i mua nei, io me e fiafia i fakalavelave ko oti ne fakapokotia mai kia Matou, auaa ia koutou e se kafi o fakamaluga a outou tulaga, io me ko koutou o iloilo fakalei loa a outou galuega. E se kafi ne koutou o pale mai keatea mai ite maluga sili ote Motou tulaga. E tonu, ate Atua ka faopoopo kite tauii ate mea ne tauii ne Ia kia Matou, auaa ne fakatumau ise onosai mautakitaki a puapuagaa ne oko mai kia Mtou. A Ia, e tonu, ka mu mea aka ki luga ate tauii kia latou kola e tumau ite onosai.

Ke iloa ne koutou i tofooga mo tofotofooga mai ite taimi loa ote favavau mo latou fua ko Tino filifilia ate Atua mo Ana fagasele, mo Ana Tavini kola e motu ketea mai i mea katoa loa na ko Ia, latou kola e seai ne mea fakatau koloa io mene aveaveega o mea e fakapelo aka pela mai ite masausauaga ote Mafi-Katoatoa, latou kola e faipati fua manafai ko oti a Ia ne faipati, kae gasue o fai a mea e tusa mo Tena tulafono. E pena ate auala ote Atua mai i mua loa, kae e pena ka tumau ki taimi mai i mua. Fakamanuia a latou kola e tumau mautakitaki, latou kola e onosai kae e masaki io me e nofo puapuagaa, kola e se fanoanoa i so se mea ne oko atu kia latou, kola e sasale ite auala ote lotomalie katoatoa….

Ate aso ko pilipili mai ate Atua ka oti ne fakatu aka ki luga a tino kola ka kalaga atu kite masauaaga o aso o Matou, kola ka folafola atu a tofooga o Matou, kola ka fakakinau mai kite fakafoki mai o saolotooga o Matou mai ia latou kola e aunoa mo se tamaa fakatalitonuuga, ne fai mai kia Matou se fakamasinooga e se fakatau mai loa ite amio setonu, ne nofoaki maalosi a olaaga o latou kola ne see mai kia Matou, kae e iloa fakalei loa i olotou mea e fai. A Ia, e fakapatonu loa, ka se taofigia a latou ki olotou agasala. A Ia, e tonu, kote tauii mo sui tafasili ite kaitaua.

Tena ne toe lau ne Matou kia koe a folafolaaga ate Atua tonu tokotasi, kae tuku ifo ki lalo ia koe a mea kola a Ia ko leva loa ne fakatoka mai, kote mea ko koutou ke fiafia kae akai mai ki se fakamagalo mai ia Ia, ke mafai o foki mai kia Ia, ke mafai o salamo patonu, kae atafia ia koutou a outou amio see lei. Ke mafai o lue keatea mai i outou moegase, ke mafai o fakamaalosi a koutou mai ite se fakalogo, ke mafai o toe fai fakalei mo mea kola ne liakina ne koe, kae fai mo latou kolaa e fai mea lei. Fai a ia tela e fakataaua ia ia ate meatonu o Aku muna; kae mo ia tela e se fakataaua ne ia, fai a ia ke fuli keatea. A Toku tiute tonu kote fakamasaua a koe i tou fakatamala i tou tiute kite Talitonuuga ate Atua, mafai a koe ko latou kola e fakalogo ki Aku uonigi. Telaa la, fakavave a koutou ki Taku faipatiiga, kae foki a koutou kite Atua o salamo, ko Ia, mai Tena agalelei e mafai o alofa fakamagalo atu kia koe, e mafai o fulu keatea au agasala, kae fakamagalo au soli tuakoi. Ate takutakua o Tena alofa fakamagalo e silia atu ite kaitaua o Tena toasa, ka ko Tena agalelei e siomia a latou katoa ko oti ne kalagagia ke foliga mai kae fakapei kite gatu ote ola, faitalia me ko latou mai i anamua loa io me ko taimi mai i mua.

Ne fakasae ite Faaliiga tenei ate mea tela e seki fakasae mai aka loa muamua. Pela mo tino fui fakalogo kola ne molimau a mea kola ko oti ne fakaasigia, a latou e musumusu kae fai atu: “E tonu, mea nei se tino taulaitu tela ko oti ne faiite ne ia se pelo kite Atua.” A latou e tonu loa ne tino ko olo fakaatea.

Fai atu ki fenua, O ate Pene ote Favavau o Aso, a mea kola ne tuputupu i ‘Iráq. Fai atu kia latou ate mesentia mai ite maopoopoga a tino ote lotu ote fenua tena ne uga mai ke fetaui mo Matou, tela, ite oko mai kite nofomai o Matou, e fesili mai kia Matou e uiga mo naai saienisi, kae Tela Matou ne tali atu mai ite poto e nofo loto ia Matou. A Tou Aliki e tonu, kote Iloa o mea e see lavea. “Matou e fakamaoni,” fai atu a ia, “ite poto e nofo mo Koe e seai e ana maua o fakasagai. E pena ate poto, e uiloa, e se-lava o fakasao ate tulaga maluga tela e fai atu ne tino kia Koe. Fakaasi mai, mafai a Koe e faipati kite meatonu, mene aa a maalosi tuku fakatasi o tino ote lalolagi e seai e maalosi o fakaasi.” Tena ate fakatonuuga e tumau ne fai ite fale o tou Aliki, kote Matagofie-Katoatoa, kote Alofa.

“Molimau! Sea aa tau mea e lavea?” A ia e gugu. Kae i taimi ne lei aka a ia, ana muna: “Au e talitonu fakamaoni kite Atua, kote Matagofie-Katoatoa, kote Tavaega-Katoatoa.” “Fano koe ki tino, kae fai atu kia latou: ‘Sili ki so se mea e fiafia a koutou kiei. E maalosi a Ia o fai ate mea e loto a Ia kiei. E seai so se mea, me ite taimi ko teka atu io me mai i mua, e mafai o fakalavelave aa Tena Finagalo.’ Fai atu: “O koutou kote lukuuga o tino ote lotu! Filifili a so se mataupu e manako koutou kiei, kae sili ki tou Aliki, kote Atua ote Alofa Fakamagalo, ke fakaasi atu kia koutou. Kafai e fakataunu ate oulua manakooga, mai i Tena nofoaiga-a-tupu, talitonu koutou ia Ia. kae sa fai pela mo latou e teke ki Tena meatonu.” “Ate fakavaveao ote malamalama ko oti ne mapaa,” ana muna, “ka kote fakatalitonuuga ote Alofa Fakamagalo Katoatoa ko oti ne fakataunu.” A ia ne tu aka ki luga kae foki atu a ia kia latou kola ne uga mai a ia, kae mai ite fakatonuuga ate Atua, kote Matagofie-Katoatoa, kote Fagasele Sili.

Aso ko teka kae ko ia ne fakatamala o toe foki mai kia Matou. Fakamuli ifo loa, ne vau a sua mesentia tela ne fakailoa mai kia Matou i tino ko fiu kite mea tela e manako kiei muamua loa. A latou e tonu ne tino matamua. Tenei ate mea ne tupu tupu i ‘Iráq, ka ko Au kote molimau i mea konei ne tupu. Ne fano ate tala tenei ki tua atu i mea tuputupu konei, kae e ui iai e seai se tino e malamalama i tena uiga. Tena la ne fakaeke aka ne Matou. E mata e seiloa ne koe ate mea tenei!

Ona ko Au loa ia Au! So se tino i tausaga ko teka ne sili mai kia Matou ke fakaasi atu a failoga ote Atua, i mu mea loa kona ne fakaasi atu ne Matou kia ia, e se fakaseke foki ate meatonu ate Atua. A tino, e ui iai, ite taulasiiga o taimi, ne nofo tumau ite se-fakalogo. Latou kola a olotou mata e fakamainagia kite mainaaga ote malamalama ka lavea ne latou a manogi lei ote Alofa Fakamagalo-Katoatoa, kae ka talia ne ia a Tena meatonu. Mea nei ko latou kola e fakamaoni tonu loa.

O koe ko taku fuaga kaina o Taku Lakau Ola mote lau o ia! I luga ia koe ko Toku matagofie mo Toku alofa fakamagalo. Sa faigia a tou loto ke fanoanoa ona ko mea ne oko atu kia koe. Moi fai a koe e iloilo a laupepa ote Tusi ote Ola, ka maua ne koe, mote fakapatonu, ate mea tela ka fakafoliki iei a tou fanoanoaaga kae fakaseai ou puapuagaa.

Ke iloa ne koe, O fuaga kaina o Taku Lakau Ola, tela a fakatonuuga ote Nofoaiga a Tupu Fakaekegia, tela e soko kite fakaotiiga mote fakataunuuga ote fakaotiiga, e lua ona vaega. A laua e ttau o fakalogo kiei kae talia a laua. Te tasi e tumau e se maua o toe fuli, kote sua mea, e fakaigoa ne tagata, koi faitalitali. Kite mea muamua e ttau katoa o fakalogo kiei aunoa se talave, auaa ko oti ne fakamau kae fakatokagia. Ate Atua, e mafai o fuli io me e fakaseai a ia. Pela mote mae tela e ttau o maua mai iei a se mafuliiga pena e lasi atu iloo manafai ate fakatonuuga e tumau e se fuligia, katoa loa a tino, telaa la, e ttau o fakamasani kiei mote lotomalie kite mea ate Atua ko oti ne loto kiei kae tautali kiei mote mautinoa.

Tau fakatonuuga tenei koi faitali, kote talosaga mote fakamolemole fua e mafai o fuligia.

Te Atua talia mai ia koe tela kote fuaga kaina o Taku Lakau Ola, kae ko latou kola e fesokotaki mo koe, ke mafai o puipuigia mai ona pokotiaaga masei.

Fai atu: O te Atua, toku Atua! A Koe ko oti ne tuku mai ki oku lima a se fakatalitonuuga mai ia Koe, kae ko oti e tusa mote fiafia-lei o Tou Finagalo ne toe kalaga atu kia Koe. E seai mo au, tela se tavini fafine a Koe, o faipati atu penei, ate mea tenei mo au ne vau mai i fea io me se aa ate mea ne tupu, pela mo Koe kote matagofie i galuega katoa a Koe e fai, kae e ttau o fakalogogia a Tau fakatonuuga. A Tau tavini fafine, O toku Aliki, ko oti ne tuku atu ana fakamoemoeega ki Tou agalelei mote foai alofa. Talia mai kote mea ko Tau tavini fafine ke maafai o fakapilipili atu kia Koe, kae ka polofiti kia ia oi lalolagi katoa o Koe. A Koe kote Fakamagalo, kote Foai Alofa Katoatoa. E seai aka foki se Atua na ko Ia, kote Fakaekega, kote Favavau o Aso.

Tuku mai Au fakamanuiaaga, O te Aliki, toku Atua, kia latou kola ko oti ne inu ite uaina o Tou alofa mai i mua o mata o tagata, kae e uiloa Ou fili, ko oti ne molimau ki Tou fakatasitasi, fakamaoni ki Tou tafatasi, kae fakaasi tonu ite olotou talitonu ki mea kola ne fai iei a totooga o foitino o tino sauaa i vasia o Au meaola ka polepole, ka ko kano o latou fakamatamata ote lalolagi ka tafasili ite mataku. Au e molimau i Tou Nofoaiga-a-Tupu e se mafai lele loa o galo ifo ki lalo, io me ko Tou Finagalo e mafai o fakamafuli. Tuku atu mo latou kola ko oti ne fakamau a olotou mata ki mua ia Koe, auaa i Au tavini fafine kola ko oti ne piki mau ki Tou Kafaanoa, kola e ttau kite Vasa o Tou alofa foai mote Lagi o Tou agalelei.

A Koe ko Ia, O te Atua, Tela ko oti ne folafola atu a Ia me kote Aliki ote Maumea kae fakatulaga a tino katoa kola e tavini kia Ia me e mativa kae e se-lava. “O koutou kola e talitonu! Koutou ko tino kola e se tago lima kise isi mea kae e manako kite Atua; ka kote Atua kote Pule Aoao, kote Tavaegia-Katoatoa.” Ko iloa ne au a toku mativa, kae lavea a Tou maumea, sa liakina gia au mai ite matagofie o Ou koloa. A Koe, e tonu, kote Puipui Tafasili ite Maluga, kote Iloa-Katoatoa, kote Atamai-Katoatoa.

Toe manatu aka ki amioga ate matua o Ashraf, tela a tena tama tagata ne tuku ifo a tena ola ite Fenua ko Zá (Zanján). A ia e tonu loa kote nofoaga ote meatonu, ite nofomai Tokotasi Tela kote Tafasili ite Maalosi, kote Mafi-Katoatoa.

Kafai a tino amio leaga, ne seki fakamasino fakalei, ne iku ia latou ke tamate a ia, ne kave ne latou ke aumai a tena matua, kote matua ke mafai o polopoloaki a ia, kae takolekole a ia ke fakafoki a tena talitonuuga, kae tautali i alagaavae o latou kola ko oti ne fakapelo ate meatonu ate Atua, kote Aliki o lalolagi katoa.

Ne seki leva kae ne kilo mai ki mata o tena tama tagata mo ana pati e fai ne ia a loto o latou e alofa ite Atua, kae mai i tua atu o latou ite Lukuuga mai i luga o tagi ki luga kae tigaiina ite fanoanoa. E tonu, a tou Aliki e iloa me ne aa a Mea a Toku laulaufaiva ka faipatigia, A Ia e fai mo Aku molimau ki Aku muna.

Kae i taimi e faipati atu ate matua kia ia, a muna ate matua: “Taku tama, ko taku tama tagata! Sa fakatamala o tuku atu o tou ola ite auala o tou Aliki. Faeteete ia koe mana fakapelo a tou talitonuuga ia Ia i mua o Ana mata ko oti ne ifo aka ki lalo o ofo kia latou katoa kola i lagi mo latou katoa kola ite lalolagi. Fano tonu ki mua, O taku tama, kae kolomaki ite auala ote Aliki, tou Atua. Fakavave a koe ke maua a te nofomai o Ia Tela kote Fagasele Sili o lalolagi katoa.”

Ki luga ite matua ko Aku fakamanuiaaga, mo Toku alofa fakamagalo, mo Taku tavaeega, mo Taku matagofie. Au loa ia Au e tokotasi ite galo o tena tama tagata – se tama tagata tenei ko nofo iloto ite tapanekolo o Toku afioga mote matagofie, kae kola ona mata ko fonufonu ite mainaaga tela e pulougia ite malipolipo o Agelu Fafine ote Lagi i olotou potu fakatelagi, kae mai i tua atu o latou ko pagota o Toku palataiso, mo tino nofo o Fakai Lasi ote Mana. Moi fai se mata e kilo ki ona mata, ka fai mai ne ia: “Io, mea nei e seai aka foki na se agelu malu.”

Ate paleni ote lalolagi ko oti ne fakaseegia auala mai ite pokotiaaga gasuesue ote tafasili ite takutakua ate Oota fou ote Lalolagi. Ate olaaga tokaaga o tagata ko oti ne fakamafuligia auala atu ite lukuuga ote Faifaiiga fakaofoofogia tenei – se tulaga e seai se mata o se tino ko oti ne molimau ne ia.

Ufi aka ki lalo a koutou ite vasa o Aku muna, kote mea ko koutou ke mafai o maua ona mea funa, kae maua a penina katoa ote atamai kola e moe funa i ona pookoga. Fakalogo ko koutou ke seai se falotolotolua ite outou taumafai o fakaakoi ate meatonu ote Talitonuuga tenei – se Talitonuuga e auala mai i maalosi ote mafi ote Atua ko oti ne fakaasiigia, ka ko Tena nofoaiga-a-tupu ko oti ne fakatu. Mo mata e fonufonu ite fiafia, fakavave atu kia Ia. Mea nei ko Talitonuuga ate Atua e seai se mafulifuliiga, favavau i taimi ko teka, favavau ki taimi mai i mua. Ko ia tela e salasala, ke maua ate mea tena; kae kia ia tela e ita mana sala kiei – e tonu, ate Atua e Ola-loa-ia-Ia, mai i luga atu i so se manakooga o Ana meaola.

Fai atu: Kote Paleni Fakatautau e se mafai o see tela e puke ite Lima ote Atua, tela katoa kola i lagi mo latou katoa kola ite lalolagi e fakatusa kiei, pela foki mote ikuuga o latou, mafai a koutou kola e talitonu kae lavea ate meatonu tenei. Fai atu: Auala mai iei a tino mativa ko oti ne fakamaumea, ko tino poto ne fakamainagia, ka ko latou e salasala ne fakamafai o olo aka ki luga kite nofomai ote Atua. Faeteete, ia koutou mana fai me se pogai o faka kinau ite vaa o koutou. Fai ke mautakitaki a koutou pela mene mauga e se mafai o gasuesue ite Talitonuuga a oulua Aliki, kote Mafi, kote Alofa.

Sa fanoanoa, O tino ote lalolagi, mafai ate fetu ao o Toku gali ko to, ka kote lagi o Toku tapanekolo ko funa mai i oulua mata. Tu ki luga o fakalauefa atu a Taku Talitonuuga, kae fakamaluga a Taku Muna i vaasia o tagata. A Matou e fakatasi mo koe i taimi katoa, kae ka fakamaalosi a koe mai ite paoa ote meatonu. Matou e tonu e tafasili ite mafi-katoatoa. So se tino tela e lavea ne ia Au, ka tu ki luga o tavini Au ise taumafaiiga tela a paoa ote lalolagi mote lagi e se kafi o fakatakavale a tena taumafaiiga.

A tino ote lalolagi ko to aka loa a olotou moe. Moi ni fai ke ala mai a latou mai i olotou moegase, a latou ko fakavave mote fiafia kite Atua, kote Iloa-Katoatoa, kote Atamai-Katoatoa, Latou ka pei keatea a mea katoa e nofo mo latou, me ne koloa taaua ote lalolagi, kote olotou Aliki ke masaua a latou ka ala iei o faipati atu kia latou ise muna e tasi. A se fakatonuuga pena e tuku atu kia koe ne Ia Tela e taofigia ate poto o mea funa, ise Tapeleti tela ate mata o te foafoaaga e seki lavea ne ia, kae tela e seki fakaasi kise tino vagana ko Ia loa ia Ia, kote tafasili ite maalosi puipui o lalolagi katoa. E fakanumi kii kia latou e nofo konaa i olotou manakooga leaga, ko ala iei o seai lele se malosi ia latou o lavea ate Aliki o tino katoa. E oi ate leo tena e kalaga ki luga mai i feitu katoa: “E seai aka foki se Atua na ko Au, kote Mafi, kote Atamai-Katoatoa.”

Fai atu: Sa fiafia i mea e nofo mo koutou; ite po nei ia koutou; a taeao ko niisi tino ko nofo mo latou. Tena ate poloakiiga kia koe ne Ia Tela kote Iloa-Katoatoa, kote Fakailoa-Katoatoa. Fai atu: E mafai ne koutou o fai pela i mea kona ea koe kite se gata mai kae e puipuigia? E tonu! Ia Au fua, kote Alofa Fakamagalo Katoatoa. A aso o tou olaaga ko tele keatea pela mote manava ote matagi, ka ko outou mitamitaaga mo outou vikiiga ka pelu atu ki luga pela eiloa mo mitamitaaga mo vikiiga o latou ne olo atu mai i mua o koe. Toe onoono aka, O tino! Sea aa ate mea ne tupu i aso ko teka atu, mo senetenali ko teka atu? Fiafia a aso kola ne fakamaumau fakapitoa kite fakatapu mote masauaaga ote Atua, kae fakamanuia a itula kola ne fakamaumau kite tavaeega o Ia Tela kote Atamai-Katoatoa. Mai i Toku ola! E seai foki kote mitamitaaga ote mafi, io me kote maukoloa ote tino maumea, io me kote fanaka ki luga ote tino e se faka-atua, e mafai o tumau. Katoa ka galo ifo ki lalo, i se muna e tasi mai ia Ia. A Ia, e tonu, kote Maalosi-Katoatoa, kote Aofia-Katoatoa, kote Mafi-Katoatoa. Sea aa ate lei e maua i mea faka-te-lalolagi e nofo mo tagata? A mea kola ka polofiti kia latou, a latou e se saga lele kiei. Ko pili mai, a latou ka ala aka mai ite olotou moegase, kae ka maua ia latou e se kafi o maua a mea kola ne sao iei a latou i aso ote olotou Aliki, kote Mafi-Katoatoa, kote Tavaegia-Katoatoa. E se iloa ne latou, a latou ka liakina a mea katoa a latou, ko olotou igoa e mafai o takutakugia i mua o Tena nofoaga-a-tupu. E tonu, a latou e lau fakatasi m tino mate.

E se faigia a oulua loto ke manavase, O tagata, manafai ate matagofie o Toku Nofomai ko tapale keatea, ka kote vasa o Aku faipatiiga ko se gasue. I Toku nofomai i vaasia o koutou e isi se atamai, kae i Toku se nofo atu e isi aka foki ne isi atamai, e se fuafuagina ki tino katoa vagana kote Atua, kote Se-Fakatusagia, kote Iloa-Katoatoa. E tonu, Matou e kilo kia koe mai ite lalolagi o Matou ote matagofie, kae ka feasoasoani ki so se tino tela e tu ki luga mote sili ote Talitonuuga o Matou fakatasi mo lukuuga tapu mai i luga pela foki mo se fakatasiiga a agelu fakapitoa a Matou.

O tino ote lalolagi! Ate Atua, kote Meatonu Favavau, ko Taku molimau i taafeega o vai fou e puna mai i kaupapa, auala atu ite suamalie o muna ne faipatigia ne tou Aliki, kote Se-Taofigia; kae koi moegase loa. Pei keatea a mea kola koi nofo mo koutou, kae i kapakau ote motu keatea, lele ki luga i mea faiite katoa. Tena e fakatomua atu kia koe ate Aliki ote foafoaaga, kote gasuesue a Tena Pene ne fakamafuli iei a agaaga ola o tagata.

Ke iloa ne koutou mene aa a tumutumu maluga ne kalaga mai iei ate oulua Aliki, kote Matagofie-Katoatoa? Sa mafaufau aka ia koutou ko oti ne lavea ne koutou ate Pene tela ate oulua Aliki, ate Aliki o igoa katoa, ne fakatonu mai kia koe? E tonu, mai i Toku ola! E mata e seiloa ne koutou, moi fai penei ko oti ne liakina ne koutou ate lalolagi, kae fakavave atu mo outou loto katoatoa kite nofomai ote Fagasele Sili. A oulua agaaga ka tafasili ite fiafia mai i Tena Muna ka ala iei o tupu se mea lasi ite Lalolagi Lasi Atu –kae e pefea ate lasi atu ate lalolagi foliki kae se aogaa! E tena a vaiua o Toku foai alofa ko ligi ifo ki lalo mai ite lagi o Toku alofa-kaimalie, pela me se alofaga o Toku agalelei, kote mea ke fakafetai a koutou….

Faetete i manakooga o te tino mo te faitogafiti e fakaoso iei a vaevaeega ia koutou. Ke fai koutou pela mo maikao o te lima e tasi, ko tootooga ote foitino e tasi. E tena ate poloakiiga kia koe ate Pene ote Faaliiga, mafai a koutou ko latou kola e talitonu.

Iloilo aka ate alofa fakamagalo ote Atua mo Ana meaalofa. E foai mai kia koutou a mea kola e aogaa kia koutou, e ui iai a Ia e mafai fua o fakaseai a meaola katoa. Ko amio leaga a koutou e se mafai lele o fakamae mai a Matou, io me e mafai a galuega lei a koutou o polofiti mai kia Matou. E kalaga atu Matou kia koutou ona loa kote Atua. Ki so se tagata ote malamalama mote matakite e fai mo molimau.

E manino kae maina me kafai a veli kola e funa iei a tinaa mea tonu o fakaasiiga o Igoa mo Uiga Lei ote Atua, e tonu a mea faiite katoa e lavea mote se-lavea, ko maofa ki lalo, e seai vagana kote Failoga ate Atua e toe mai – se failoga tela a Ia, ia Ia loa, ko oti ne tuku ki luga i tinaa mea tonu konei. Ate failoga tenei ka tumau kite leva ote finagalo ote Aliki tou Atua, kote Aliki o lagi mote lalolagi. Kafai e tena ate fakamanuiaaga e tuku ki luga i mea faiite katoa, e pefea ate maluga atu ote fakaotiiga o taugasoa talitonu tonu, tela a tena olaga mo tena ola e fakatau pela me kote pogai ne kamata iei ate foafoaaga katoatoa. Pela loa mote kamataga ote Talitonuuga ne isi mai ite kamataga e seai sena kamataga, kae ka tumau kite fakaotiiga tela e seai sena fakaotiiga, e pena foki ate taugasoa talitonu tonu ka ola kae tumau a ia kite favavau. A tena agaaga ka tamilomilo kite favavau ite Finagalo ate Atua. A ia ka leva tena tumau kite leva foki loa ote Atua, ia Ia loa. A ia ka fakaasi mai i Faaliiga ate Atua, kae funagia i Tena fakatonuuga. E maina i falelasi taulekaleka ite Lalolagi ote Ola e Se Gata mai ko oti ne fakaeke me ko koga nofo o latou kola e talitonu fakamaoni ite Atua mo Ana failoga. Ate mate e se-kafi lele o solisoli ate nofoaga tapu tena. Matou e tena ko oti ne fakasafe atu kia koe a failoga o Tou Aliki, kote mea ke mafai ne koe o tumau a tou alofa mo Ia, kae fai pela mo latou kola e malamalama ite meatonu tenei.

So se pati e vau mai ite muagutu ote Atua e fakafonu ite maalosi tela e mafai o fakamaalosigia se ola fou kise foitino o tagata, kafai a koutou ei ia latou kola e maina ite meatonu tenei. A galuega fakaofoofogia a koutou ne fai ite lalolagi nei ko oti ne fakaali auala atu ite faka galueega o Tena Finagalo tafasili ite silisili mote maluga, ko Tena Pogai fakaofoofogia kae e se-mafulifuli. Auala atu ite faaliiga ote muna “Tufuuga.” E vau mai i laugutu o Ia kae folafola atu a Tena folafolaaga ki tagata, se paoa pena e fakalele mai iei auaa e mafai o fakagalue, auala atu i tausaga fakasolosolo, ko galuega tuafia e mafai ne lima o tagata o fai. Tenei, e tonu, se meatonu fakapatonu loa. Ne leva kote muna malifalifa tenei ko faipatigia, ko ana enetii fakagalue, e palu i loto i mea faiite katoa, ko fanau mai ki auala mo mea fai galuega kola a galuega pena e mafai o faiite mai kae fakatonutonu mai iei. Ko mea fakaofoofogia ne mauagia ne matou ko molimaugia auaa ko mafuaaga tonu ote Faaliiga ote Igoa tenei. I aso koi aumai, e tonu, ka lavea ne koutou a mea e seki lagona aka lloa ne koutou muamua. E tena kae moi fai ne fakatonu i loto i Tapeleti ate Atua, e seai e ana maua o maina iei vagana ko latou kola e matakite. I se faifaiiga foki pena, ite taimi loa tela ate pati e fakaasi iei a Toku uiga “Kote Lava mote Iloa” e fanatu mai i Toku muagutu, so se mea faiite, e tusa mo tena iloa mote mafai o fai a mea mo faka tapulaaga, ka fakasafegia mote paoa o tala atu ate poto o saienisi pito sili ite fakaofoofogia, kae faka fakamaalosigia ke fakaasi kia latou ite taimi ttau mai ite fakatonuuga a Ia Tela kote Mafi-Katoatoa, kote Iloa-Katoatoa. Ke iloa ne koe fakapatonu me ite Faaliiga o so se Igoa aka e olo tasi mo se fakaasiiga e tai pau mote paoa Faka-te-Lagi.

Ofagia ki lalo, i Toku Igoa, a veli kola ne fakakivi masei loa a tau kiloga, kae, mai ite paoa e fanau mai ite fakatasitasi ote Atua, peipei atu a tupua o faiga e seai ne aogaa. Ulufale atu, kite palataiso mana ote fiafia-lei ote Alofa Fakamagalo-Katoatoa. Fakapaiagia a oulua agaaga ola mai i so se mea tela e seai io te Atua, kae tami atu a koutou kite suamalie ote malolo iloto ite mainaaga o Tena Faaliiga lauefa kae mafi, kae mai i lalo ote ata o Tena pule pito sili mote seai se see. Sa fakapologagia koutou ke ufiufi i veli matolu o oulua manakooga kaimanako, e pela mo au ko oti ne fai fakalei aka a so se tino ia koutou i Taku foafoaaga ke mafai o fakaasigia ki tagata. Tena laa, so se tagata ko oti kae ka tumau ke mafai a ia o fakataaua ate Gali ote Atua, kote Matagofie. Moi fai a ia e seki fakaeke kiei ise iloa mote mafai o fai a mea, e mafai pefea a ia o fakamasako a tena fakatamala? Kafai, ite Aso a tino katoa ote lalolagi ka luku fakatasi, so se tagata e ttau, i taimi e tu i mua ote Atua, o fakafesiligia: “Kaiaa a koe ne seki talitonu i Toku Gali ke fuli keatea mai i Toku Foitino,” kae kafai a se tagata pena e ttau o tali kae fai atu penei: “Pela mo tagata katoa ko oti ne see, kae e seai ko oti ne lotomalie o fuli ona mata kite Meatonu, Au foki, e tautali ite olotou fakatusa, ko oti ne fakatamala kii loa o laveagia ate Gali ote Favavau,” a se fakatagi pena ka mai, e tonu loa ka tekegia. Mote talitonuuga o so se tagata e se mafai o fakana ki luga i so se tino vagana ko ia loa.

E tenei a se tasi o fakavae kola e fakataaua gia i Taku Faaliiga – se fakavae tela ne fakaasi atu i Tusi tapu katoa faka-te-lagi, tela ko oti ne fai ne au ate Laulaufaiva ote Agalelei o faipati, ka kote Pene ote Paoa o tusi. Mafaufau malie aka kiei, mo tou mata faka te foitino mote faka te agaaga, ke mafai ne koutou o lavea a taatooga ote atamai Faka-te-Lagi kae maua a fatu taaua ote poto faka-te-agaaga tela, ise gana manino kae mafa ko oti ne maua ne au ise Tapeleti tafasili ite maluga kae e seai se faitogafiti, ko koutou ke se olo seke mai ite Nofoaga a Tupu Pito Sili Katoatoa, mai ite Lakau Ola mai i tua atu e seai e mafai o pasia iei, mai ite Kogaa-Koga Nofo ote mafi mote matagofie favavau.

A failoga ote Atua e sulu atu pela mote malifalifa ote laa i vasia o galuega o Ana meaola. So se mea tela e vau mai ia Ia, se vaega kae ka tumau faeloa pena o fakamatea, mai i faiitega a tagata. Mai ite Kamataga o Tena poto e se laugia ate Mainaaga ote poto mote atamai ko oti ne tu aka ki luga, ke mai ite Palataiso o Tena Pene ate manavaaga e agiagi ki loto mo agaaga ola o tagata. Fiafia a latou kola e laveagia ate meatonu tenei.

Tuku atu tou taliga, O Taku tavini, kite mea tela ko tuku ifo ki lalo kia koe mai ite Nofoaga-a-Tupu o tou Aliki, kote Se-kafi o Okogina, kote Tafasili ite Takutakua. E seai aka se Atua na ko Ia. Ko oti a Ia ne kalaga ke faka foliga mai Ana meaola, kote mea ke mafai o iloa a Ia, Tela kote Alofa Atafai, kote Alofa Fakamagalo Katoatoa. Ki fakai lasi o fenua katoa a Ia ko oti ne uga mai Ana Mesentia. Tela ko oti a Ia ne tofi ke fakasalalau ki tagata a tala lei ote Palataiso o Tena fiafia-lei, kae ke futi mai a latou ke pili mai kite Koga Malu ote nofo toka favavau, kote Nofoga ote mana favavau mote matagofie tafasili ite lei.

A naai tino ne takitakigia ne te Mainaaga ote Atua, ulufale atu kite fale nofo o Tena nofomai, kae inu, mai ite lima ote taliaga, ate vai ote ola se gata mai, kae e lau iei a latou kola e lavea kae e talitonu fakamaoni ia Ia. Ko niisi ne teke kia Ia, kae teke a failoga ote Atua, kote Tafasili ite Maalosi, kote Mafi-Katoatoa, kote Atamai-Katoatoa.

A tupulaga ko teka atu, ke oko kite taimi ko maua ne latou ate olotou fakaotiiga, ate Aliki o aso, kote Aso tela ate Fetu Ao ote Bayán ko fakaasigia a ia mai i luga atu ote sikulagi ote alofa fakamagalo, kote Aso tela ate Gali ote Matagofie-Katoatoa e sulu maina atu ite foitino maluga o ‘Alí-Muhammad, te Báb. Se leva ko fakaasi mai a Ia, ko tino katoa loa ko tu ki luga o teke atu a Ia. Ki niisi tino, a Ia ne fakatauemugia me se tasi tela e fai muna o teke ate Atua, kote Mafi-Katoatoa, kote Favavau o Aso. Ko niisi e fakatau ia Ia se tagata e ulufia ne te fakavalevale, se fakatauuga tela Au foki loa ia Au ko oti ne lagona mai i laugutu o se tasi o fai taulaga. Ka ko niisi aka foki e teke ki Tena fakatauuga kote Tino Faipati ate Atua kae fakamasei a Ia me se tasi ko oti ne kaisoa kae faka-aogaa me ia Ia a muna ate Mafi-Katoatoa, tela ko oti ne faitogafiti a ootou uiga, kae tapani fakatasi mo latou pela loa me ia ia loa. Ate Mata ote Agalelei e tagi mae ki mea kola ne faipati mai ne olotou muagutu, kae e tumau a latou o fiafia i luga i olotou nofoaga.

“Ate Atua,” a muna a Ia, “ko Taku molimau, O tino ! Au ko vau kia koe mote Faaliiga mai ite Aliki, tou Atua, kote Aliki o ou tamana mai i anamua. Sa kilo, O tino, ki mea e nofo mo koutou. Kae kilo ki mea ate Atua ko oti ne tuku ifo ki lalo ia koe. E tenei e tonu e lei fakafia atu mo koe iloo ate foafoaaga katoa, a koutou e se lavea ne koutou. Toe fakafoki a tau kilo, O tino, kae mafaufau kite fakamaoniiga ate Atua mo Ana fakatalitonuuga kola ei ia koutou, kae fakatusa a latou kite Faaliiga tena ne tuku ifo ki lalo ia koe ite Aso tenei, kote meatonu, kote meatonu e se-mafai o see ke mafai o fakaasi aunoa mo se fakafesili kia koe. Sa tautali, O tino, i auala ote Tokotasi Tiapolo; tautali a koutou kite Talitonuuga ate Alofa Fakamagalo-Katoatoa, ko koutou ke fai pela mo latou e talitonu mote fakamaoni. Sea aa ate mea e polofiti ki tagata, mafai a ia e fakatamala o lavea ate Faaliiga ate Atua? Seai lele loa. Kia Au loa, kote Malu Katoatoa, kote Lavea mote Iloa Katoatoa, kote Atamai-Katoatoa, ka fai mo molimau.”

Kote lasi a Ia e polopoloaki atu a latou, kote lasi ote kaitaua i olotou fili, ke oko kite fakaotiiga, ne ta ne latou a Ia ke mate ise kaitaua tafasili ite fakamaa. Kote fakamalaia ate Atua ke i luga i latou sauaa!

Ne naai tino ne talitonu ia Ia; naai tino o Motou tavini ne fakafetai. A latou konei ne polopoloaki ne ia i Ana Tapeleti katoa – e tonu, i fuaiupu takitasi katoa o Ana tusitusiiga fakaofoofogia – ke mo aa e fakatamala a latou ite Aso ne valo mai ate Faaliiga ki so se mea, me ite lagi io me kote lalolagi. “O tino!” e fai atu a Ia, “Au ko oti ne fakaasi Au mo Ana Faifekau, kae ko oti ne fai a Taku Tusi, kote Bayán, ke fano ifo ki luga ia koe e seai se pogai aka na ke fakatu ate meatonu o Tena Taliitonuuga. Mataku kite Atua, kae sa fakakinau mo Ia pela mo tino ote Qur’án ne fakakinau mo Ia. I so se taimi e lagona ne koutou a Ia, fakavave koutou ki mua ia Ia, kae piki mau koutou ki so se mea e fakaasi atu ne Ia kia koutou. E seai aka foki i tafa o Ia e mafai o polofiti a koe iei, ikaai, e seai e uiloa a koutou e aumai ne koutou mai ite kamataga kite fakaotiiga o fakamaoniiga pela foki mo mea katoa a latou mai i mua o koutou.”

Kae kafai mai i tua ote fia o tausaga ate lagi ote fakatonuuga Faka-te-Lagi ne malepe ki lalo, ka kote Gali ote Báb ko fakasae mai i kaumana o igoa ote Atua, fakatokagia i ne gatu fou, a tino foki loa konei ne tu ki luga o teke fakamasei kia Ia. Tena mainaaga e aofia iei a mea faiite katoa. Ne ofa ne latou a Tena Feagaiiga, teke ne latou a Tena meatonu, kinau mo Ia, kinau ki mea seai ne aogaa ki Ana failoga, faka pelo ne latou a Tena fakamaoniiga, kae kau tasi aka mo tino fui fakalogo. Fakamuli ifo, a latou ne taumafai maalosi o ave keatea a Tena ola. E pen aate tulaga o latou kola ko olo see kii loa!

Kae e iloa aka ne latou ate olotou vaaivai o fakataunu ate olotou pogai, ne tu latou ki luga o palane ate teke kia Ia. Molimau i so se minute ne faiite ne latou se auala fou o fakamae kia I, kote mea ke pakia kae fakamalalo ate Talitonuuga ate Atua. Fai atu: Fakafanoanoa kia koe! Ite Atua! A oulua fakatokatokaaga masei e pulou gia a koutou ite fakamaa. Ate oulua Aliki, ate Atua ote alofa fakamagalo, e mafai fua o fakaseai a mea ola katoa. E seai i so se mea e mafai o fakalasi aka io me o fakafoliki ifo a mea. A Ia e nofo mo Ia. Kafai a koutou e talitonu, kite outou lei ka talitonu koutou, kae kafai a koutou e se-talitonu, ka tigaina a koutou. E seai se taimi e mafai ate lima ote tino fui fakalogo o fakamasei ate kapa o Tena Gatu Tao.

O Taku tavini tela e talitonu ite Atua! Mai ite amiotonu ote Mafi Katoatoa! Moi fai e lau ne Au kia koe ate tala o mea e lua kola ne oko mai kia Au, agaaga ola mo mafaufau o tagata e se-kafi o tauave a tena mafa. Ate Atua ia Ia e fai mo Aku molimau. Onoono ki luga ia koe, kae sa tautali i alagaavae o tino konei. Talosaga fakapooko mote fakamaoni kite Talitonuuga a tou Aliki. Taumafai ke iloa a Ia mai ia Ia loa kae seai mai i niisi tino. Auaa e seai aka foki i tafa o Ia e mafai o polofiti kia koe. Kite mea tenei a mea faiite katoa e molimau, e kafi ne koe o lavea.

Fakasae mai i tua ite veli, mai ite taliaaga a tou Aliki, kote Matagofie-Katoatoa, kote Tafasili ite Maalosi, kae pukegia, mai i mua o mata o latou kola i lagi mo latou kola ite lalolagi, ate Ipu ote Se-Mafai o Mate, ite igoa o tou Aliki, kote Se-Mafai o Okogia, kote Tafasili ite Maluga kae inu a tou tusaga, kae sa fai pela mo latou e fakatuai. Au e tauto ite Atua! Ite taimi loa tela e puke a koe kite Ipu mo ou laugutu, ate Lukuuga mana mai i luga ka tavaegia a koe kae fai atu, “Inu i se fiafia ola lei, O tagata tela e talitonu fakamaoni ite Atua!” ka ko tino nofo i Fakai Lasi ote Se-Mafai o Mate ka tagi atu ki luga, “Fiafia kia koe, O ko koe tela ko oti ne fakamasa ate Ipu o Tena alofa!” mote Laulaufaiva ote Agalelei ka olioli atu kia koe, “E takutakua ate fakamanuiaaga tela e faitali kia koe, O Taku tavini, auaa a koe ko oti ne oko atu kite mea tela e seai aka foki ko oti ne fakataunu ne ia, vagana ko latou kola ko oti ne motu mai keatea mai i mea katoa i lagi mo mea katoa ite lalolagi, mo latou foki kola ko fuka ote motu tonu mai keatea.”

Kae nei, e uiga mo tau fesili kite faiiteega o tagata. Ke iloa ne koe i tagata katoa ko oti ne faiite ite natula ne fai ne te Atua, kote Fatama, kote Ola–ia-Ia loa. Ki tino taki tokotasi ko oti ne fakaiku se fakanofooga ko leva loa ne fakatoka, pela mote mea ne fakatonu mai i Tapeleti mafi kae e puipui gia ate Atua. A mea katoa kola ea koutou, e ui iai, e fakaasigia fua mafai e loto koutou kiei. Ko amioga a koutou e fai mo molimau kite meatonu tenei. Mafaufau, e ui iai,ki mea kola ko oti ne fakatapugia, ite Bayán, ki tagata. Ate Atua ite Tusi tena, kae mai i Tena fakatonuuga, ne iku me e sao ite tulafono a so se mea tela e fiafia a Ia o fakaiku, me ko oti, mai ite paoa o Tena nofoaiga-a-tupu mafi, ne fakatapu ate tusitusiiga ote Tusi tena. E se fai koutou mo molimau? Tagata, e uiloa, e iloa loa ne latou ko oti ne ofa ne latou a Tena tulafono. A se amioga pena e ttau o tii kite Atua, io me kia latou loa? Fai ke amiotonu koutou i outou fakamasinooga. So se mea lei io te Atua, ka ko so se mea leaaga e mai ia koutou. E se maua ne koutou o malamalama iei? Kote mea tonu foki tena ko oti ne fakaasi i Tusitusiiga Tapu katoa, mafai a koutou ko latou kola e malamalama. So se galuega e talosaga fakapooko a koutou kiei e maina kia Ia pela mo so se galuega ko leva ne fakataunu. E seai aka foki se Atua i tafa o Ia. Ea Ia ate foafoaaga katoatoa mo ona maaloo. Katoa e tu fakaali i Ona mua; katoa e fakamau i Ana Tapeleti mana kae funa. Ate poto kilo mao ote Atua, e uiloa, e se ttau o fakatau pela me pogai kiei amioga a tagata, pela foki loa mote poto mua atu o koe o iloa a se mea ka tupu, io me ko tou manakooga me e ttau o tupu, e seai kae e se-mafai lele loa o fai me kote pogai e tupu iei ate mea tena.

Pela mo tau fesili e uiga mote kamataga ote foafoaaga. Ke iloa fakalei ite foafoaaga ate Atua ko oti ne iai mai ite favavau, kae ka tumau o isi kite se gata mai. Ate kamataga o ia e seai sena kamataga, ka ko tena fakotiiga eiloa e seai sena fakaotiiga. A Tena igoa, kote Tufuuga, e fakatino mai i mua iei se foafoaaga, pela foki loa mo Tena toofiiga, kote Aliki o Tagata, e ttau o aofia iei ate isi o se tavini.

Pela mo fakamunamunaga kona, e fakatautau ki Pelofeta mai i anamua, pela mo, “Ite kamataaga ne iai ate Atua; e seai se meaola o iloa a Ia,” ka “Kote Aliki e tokotasi; e seai aka foki e tapuaki kia Ia,” a uiga o fakamunamunaaga konei mo nisi mea aka foki e tai pau e maina kae manino kae e ttau i so se taimi o se fakaseegia. Kite mea foki tenei ate meatonu e fai mo molimau ki muna konei kola a Ia ko oti ne fakaasi mai: “Ate Atua ne tokotasi; e seai aka foki i tafa o Ia. A ia ka tumau pena pela eiloa mo Ia mai mua loa.” So se mataile e lavea vave ite Aliki ko fakaasiigia nei, kae e ui iai e seai ke lavegia a Tena matagofie. Ite mea tenei e uiga ite koga nofo tela e nofo iei a Ia Faka-te-Lagi e mao mao mai i luga atu ite oko kiei mote poto o so se tino i tafa o Ia. So se mea ite lalolagi se tumau tenei e mafai o fakamatalagia io me o iloa, kae e se mafai lele loa o sopoia atu i tapula kola, i tena natula, ko oti ne fakaekegia kiei. Kote Atua fua tokotasi, e sopoia atu i fakatapulaaga kona. A Ia, e tonu, mai loa ite favavau. E seai aka foki se tasi io me se tausoa ko oti, io me e mafai lele loa o fusi tasi mo Ia. E seai se igoa e mafai o fakatusa mo Tena Igoa. E seai se Pene e mafai o fakaasi a Tena natula, io me se laulaufaiva e mafai o fakaata a Tena matagofie. A Ia ka tumau kite se gata mai o se fuafuagia ite maluga atu mai i luga atu o so se tino vagana ko Ia loa ia Ia.

Mafaufau kite itula ne fakaasi iei ate Faifekau ate Atua tafasili ite maluga ki tagata. Ko pili mai ate itula, ko Ia Favavau Tela e seki iloa loa ne tagata e seki faipatigia kite Muna ate Atua, a Ia kote Iloa-Katoatoa i se lalolagi e seai ne tagata ko oti ne iloagia a Ia. A Ia e tonu kote Tufuuga kae e seai se foafoaaga. Ite taimi loa tela mai mua o Tena Faaliiga, mea faiite katoa taki tasi ka fai ke tuku atu a olotou agaaga ola kite Atua. E tenei e tonu kote Aso tela ko oti ne tusia: “Ko ai tela kote Maloo ite Aso tenei?” Kae e seai e toka o tali!

Kae pela mo tau fesili ki lalolagi ote Atua, ke iloa ne koe ite meatonu ki lalolagi ote Atua e se maua o laugia ate aofai o latou, kae e se gata mai ate lauefa ote olotou itukaaiga. E seai e ana maua o atafia io me o maina ia latou vagana kote Atua, kote Iloa-Katoatoa, kote Atamai-Katoatoa. Mafufau ki tou tulaga mana moe koe. E tonu, e fai atu Au, ate tulaga tenei ko failoga tafasili ite fakaofoofogia o tulaga ate Atua i vaasia o tagata, mafai a koutou e iloilo kiei i outou loto. Kilo aka ki mea ne lavea ne koe i tau moemiti, mai i tua o se taimi ko leva, ne toe iloa aka fakalei ne koe. Moi fai ate lalolagi tela e nofo koe iei i tau moemiti e pau mote lalolagi tenei e nofo koe iei, ne ttau mo mea kola e tupu i tau moemiti o fakasae mai foki loa ite taimi foki loa tena e tupu iei ite lalolagi tenei. Moi fai e pena, a koe e fai mo molimau kiei. Kae e se tenei ate keisi, e uiloa, e ttau o iloa ite lalolagi tenei e nofo koe iei e kese kae mao foki mai i mea kola ne tupu i tau moemiti. Ate lalolagi tenei ite moemiti e seai sena kamataaga io me se fakaotiiga. E tonu manafai a koe mana kinau ite lalolagi foki loa tenei, tela ne faigia ne te Matagofie-Katoatoa mote Mafi-Katoatoa, i tou foitino tonu kae e pelu i loto ia koe. Kae e pau loa ite tonu o tau-usiusi i tou agaaga, mana sopoia atu i tapula ote moe kae ko lipi keatea mai iei a kopikopiaga faka-te-lalolagi katoa, ko oti, mai ite Atua, ne fai ke fano iloto ise lalolagi tela e takato funa ite kanoloto ote tonuuga ote lalolagi tenei. E tonu Au e fai atu, ate foafoaaga ate Atua e aofia iei a lalolagi mai i tafa ote lalolagi tenei, ka ko meaola mai i tafa o meaola konei. I loto i lalolagi taki tasi konei ko oti ne fakaeke aka ne Ia e seai aka e ana maua o salasala vagana ko Ia, kote Salasala-Katoatoa, kote Atamai-Katoatoa. A koe e fai talosaga fakapooko ki mea a Matou ko oti ne fakaasi kia koe, kote mea ke mafai o maua ne koe ate pogai ote Atua, tou Aliki, mote Aliki o lalolagi katoa. I muna konei a mealilo ate Atamai Faka-te-Lagi ko oti ne fakataaua. Matou ko oti ne faeeteete mai ite fai soko ote mataupu tenei ona kote fanoanoa tela ne aofia iei a Matou mai i faiga a latou kola ne faiite mai i muna a Matou, mafai a koutou ko fai pela mo latou e ita ma fakalogo kite Leo o Matou.

A koe ne fesili mai kia Au me ko tagata, mai i tafa o Pelofeta ate Atua mo Ana tino filifilia, e tumau, mai i tua o tena mate, o tumau a tena tino ia ia loa, ko ona uiga, ko tena malamalama e fakamatea iei a te olaaga ite lalolagi tenei. Kafai e tenei ate keisi, e pefea, a koe ne lavea ne koe, me kafai e isi se pakiaaga foititi kii loa ki tena maalosi faka-te-mafaufau pela mote matapo mote masaki maalosi ko ala iei o fakaseai mai ia ia ate malamalama mote iloa, ko tena mate, tela e aofia iei ate malepelepe o tena foitino mote fakaseai o vaega kese kese o tena foitono, e seai lele se maalosi o lepegia ate malamalama tena kae tamate ate iloa tena? E mafai pefea ne se tino o manatu ite iloa o tagata mo tena tino loa ia ia ka tumau, mafai a mea fakagalue kola e manakomia kite ola o latou mote olotou faka-galueega ka maofaofa katoatoa?

Ke iloa ne koe ite agaaga ola (soul) o tagata e maualuga atu, kae e tusaoloto mai i vaaivaiiga ote foitino io me kote mafaufau. Ite tino masaki e fakaasi mai ne ia a failoga ote vaaivai e pogai mai i fakalavelave kola e aumai a latou ite vaa o tena agaaga ola (soul) mo tena foitino, auaa ite agaaga ola ia ia e tumau o se pokotia ne so se masaki ote foitino. Manatua ate mainaaga ote molii. E uiloa se mea mai i tua e mafai o fakalavelave ki tena mainaaga, ka kote mainaaga o ia e tumau o maina atu aunoa mo se fano o foliki a tena paoa. Ite feitu foki pena, so se tulaga masakisaki e pokotia kite foitino o tagata se fakalavelave e taofi ne ia ate agaaga ola o fakaasi atu a tena mafi mote paoa tonu loa. Kafai ko liakina ne ia ate foitino, tena laa, ka fakamaatea mai ne ia a se tulaga maalosi, kae fakaasi i pokotiaaga pena e seai se paoa ite lalolagi e mafai o pau mo ia. So se agaaga ola piua, kae maa kae mmalu ka fakaeke kiei ate paoa tafasili ite maalosi, kae ka fiafia a ia ise fiafiaaga tafasili.

Manatua ate molii tela e funa mai i lalo ose fakatuuga o mea. E uiloa ate mainaaga e maina, ka ko tena mainaaga e funa mai i tagata. E pena foki, manatua ate laa tela e sae aka kae e ponogia, ka kote tonuuga loa ate koga e puna mai iei ate mainaaga tena e tumau e seki mafuli. Ate agaaga ola o tagata e ttau o fakapau kite laa, ko mea katoa i luga ite lalolagi e ttau o fai pela me ko tena foitino. Me e pefea loa e sai se mea mai i tua e fai mo fakalavelave o tu ite vaa o latou, ate foitino e mafai, i tena katoatoaaga, o tumau o sulu mai ate mainaaga ote agaaga ola, kae ke tumau ne tena paoa. Kae ite taimi loa tela, na la, ate veli e fakalavelave a ia ite vaa o latou, kote maalosi loa ote pula ote mainaaga tena ka kamata o fano o foliki a tena pula.

Toe manatua ate laa manafai e galo katoatoa mai i tua o kaumana. E uiloa ate lalolagi koi maina loa i tena mainaaga, ka kote isi ote mainaaga tela e maua ne ia ko foliki kii loa. Vagana ko kaumana ko teka atu keatea, ko mafai ne te laa o toe maina mai ite katoatoa o tena matagofie. E seai kote nofo mai o kaumana io me kote seai o latou, i so se auala, e pokotia kite taulekaleka ote laa. Ate agaaga ola o tagata kote laa tela e fakamaina a tena foitino, mai iei e maua ne ia a tena ola, kae e ttau foki loa o kilogia pena.

Toe manatua atili atu, mene pefea ate fuaga-lakau kaina, maise manafai ko faka foliga mai, e takato fakalei loa i loto ite lakau ola tena. Kafai a te lakau ola ko katikati ki potu mea, e seai se failoga io me se vaega ote fuaga lakau kaina, me e pefea ate foliki, e mafai o laveagia. Kafai ko fakasae mai, na la, e fakaasi mai a ia, pela mote mea a koe e lavea, ite fakaofoofogia o tena gali mote tonu o tena matagofie. Ko niisi fuaga lakau kaina fakapitoa, e tonu, e maua fua ate olotou atiakeega katoatoa manafai ko motu mai keatea mote lakau ola.

Kae nei e uiga mo tau fesili ki luga ite agaaga ola o tagata mo tena tumau mai i tua ote mate. Ke iloa ne koe ate mea tonu ite agaaga ola o tagata, mai i tua o tena mavae mai ite foitino, ka tumau o gasolo ki mua ke oko ki taimi e maua ne ia ate nofo-mai o te Atua, i se tulaga mo se uiga tela e seai fua kote gasolooga o tausaga mo senetenali, io me ko mafulifuliiga mo fakatauuga ote lalolagi, ne mafai o fuli. Ka tumau pena me e pefea ate leva ote Maaloo ote Atua, Tena nofoaiga-a-tupu, Tena pule mote paoa ka tumau pena. Ka fakaasi ne ia a failoga ote Atua mo Ona uiga, kae ka fakaasi mai ne ia Tena alofa-kaimalie mote maumea. A Taku Pene e seai se gasuesue o ia manafai e taumafai o fakamatala fakalei ate maualuga mote matagofie o se tulaga tafasili ite maluga pena. Ate fakaaloalo tela ne fakaeke aka ne te Lima ote Alofa-Kaimalie kite agaaga ola e seai se laulaufaiva e ana mafai o fakaasi fakalei mai, io me se potooga ite lalolagi nei e ana mafai o fakamatala. Fakamanuia kote agaaga ola tela, ite itula o tena mavae mai keatea mote foitino, e fakamana mai i manatu fakasupasupa o tino ote lalolagi. Tena ate agaaga ola e ola kae gasue e tusa mote Finagalo o tena Tufuuga, kae e ulu atu kite Palataiso tafasili loa ite maluga katoatoa. A Agelu Fafine ote Lagi, latou e nofo i palesi tafasili ite gali, ka tamilomilo i ana tafa, ka ko Pelofeta ate Atua mo Ana tino filifilia ka sokotaki kiei. Fakatasi mo latou ate agaaga ola ka saoloto o sautala, kae ka toe faipati atu kia latou a mea kola ne kolomaki ne ia ite auala ote Atua, kote Aliki o lalolagi katoa. Kafai e fai atu kise tagata a mea kola ko oti ne fakaeke mo se agaaga ola pena i lalolagi ote Atua, kote Aliki ote nofoaga-a-tupu i luga pela foki mote lalolagi i lalo, a tena foitino katoa loa i taimi loa tena ka ula valevale mai ite tulaga o tena manako maalosi o maua ate tulaga tafasili ite maualuga, fakamana kae malifalifa…. Ate natula ote agaaga ola mai i tua ote mate e se mafai lele loa o fakamatalagina, io me e ttau kae talia o fakaasi a tena uiga katoatoa ki mata o tagata. A Pelofeta mo Mesentia ate Atua ko oti ne tuku mai ki lalo mote pogai loa tena o takitaki a tagata kite Auala ote Mea Tonu e see pikopiko. Ate pogai e faka-autu kiei Olotou fakaasiiga kote akoako o tagata katoa, kote mea ke mafai ne latou, ite itula ote mate, o olo aka ki luga, ite tafasili ite piua mote mana mote motu lele keatea, kite nofoaga-a-tupu Tafasili ite Maluga. Ate mainaaga tela e sulu mai ne agaaga ola konei e pogai kiei ate gasolo ki mua ote lalolagi mote fano ki mua o tino ote lalolagi. A latou e fakatusa pela mene falaoa fakafete kola e fete iei ate lalolagi o tino, kae aofia iei ate malosi fakagasuesue e auala atu iei ate iloa i galuega taulima pela foki mo fakaofoofogia ote lalolagi ko fakaasiigina. Mai ia latou a kaumana e vaiua ifo olotou foai alofa ki luga i tagata, ka kote lalolagi e aumai ne ia ona fuataga kaina. A mea katoa e ttau o isi ne pogai o latou, se paoa e pogai kiei, se fakavae e gasuesue iei. Agaaga ola konei mo failoga ote motu mai keatea e aumai, kae e tumau o aumai, ate manakooga o gasue tafasili ite maluga ite lalolagi o tino. Ate lalolagi tela mai i tua atu e kese mao kii mai ite lalolagi tenei pela mote lalolagi tenei e kese mao kii mote lalolagi ote pepe kae koi nofo ite tinae o tena matua. Kafai ate agaaga ola e maua ne ia ate Nofo-mai ote Atua, ka puke ne ia a mea kola e ttau tonu ki tena ola kite se-gata mai kae e aogaa ki tena koga nofo ite lalolagi i luga. Ate olaaga pena e se tumau kae e seai kote olaaga tu saoloto mai i so se mea, pela loa mote olaaga muamua e sae mai ona ko se pogai, ka kote olaaga ite lua e tusaloto mai i so se mea. Ate olaaga tusaoloto e ote Atua fua, ke maaluga a Tena matagofie. E lei mo latou kola e maina ite mea tonu tenei. Kafai e mafaufau aka koe i tou loto ki uiga o Pelofeta ate Atua ka iloa fakalei loa ne koe kae molimau vave foki ne koe me e ttau o isi aka ne isi lalolagi i tafa ote lalolagi tenei. Ate tokoukeega o latou kola poto ko oti, ite lafu tausaga ko tele atu, pela mote mea ko oti ne fakamau ne te Pene ote Matagofie ite Tapeleti ote Atamai, ne fai mo molimau kite meatonu tela ko oti ne fakaasi aka mai ite Tulafono ate Atua. Pena foki loa mo latou fina ki mea ote lalolagi ko oti ne molimau i olotou tusitusiiga kite atamai o Mesentia konei kola ko oti ne tofi mai faka-te-lagi, kae fakauiga ne latou pati a Pelofeta kite Palataiso, kia seoli mote afi, kite taui mote fakasalaga i taimi mai i mua, me ne kamata mai ne te manakooga o akoako kae avaka ki luga a agaaga o tagata. Manatua, telaa la, me ne pefea a tino, faitalia me ne aa olotou Talitonuuga io me ko mmau a latou, ko oti ne atafia ate lei katoatoa, kae ko oti ne talia ne latou ate tafasili ite maluga, o Pelofeta ate Atua konei. A Fatu Taaua ote Motu-mai-keatea e tavaegia ne niisi tino me ko faka-te-foitinooga ote atamai, ka ko niisi e talitonu a latou ko muagutu ote Atua ia Ia loa. Ne mafai pefea Agaaga ola pena ko oti ne talia a latou ko takavale ki olotou fili mafai a latou e talitonu i lalolagi katoa ote Atua ko oti ne tuku ifo ki lalo kite olaaga ite lalolagi tenei? Ne mafai o talia ne latou ke oko atu a se puapuagaa o fakalavelave pena mo fakaosoosooga e seai se tagata kai pokotia aka loa iei io me kai molimau ne ia?

Ko oti ne sili mai koe e uiga mote natula ote agaaga ola. Ke iloa, ite tonuuga, ate agaaga ola se failoga ate Atua, se fatu taaua faka-te-lagi tela ate tinaa tonuuga e uiga mo ia a tagata tafasili ite poto ne seki maua ne latou o iloa, e seai foki se mafaufau e ana iloa ate funa o ia, e uiloa ate maina ote mafaufau, e mafai o fakamoemoe ke fakamatala mai ne ia. Ko ia e tomua i mea faiite katoa o fakaasi ate tafasili lei katoatoa o tena Tufuuga, ko ia muamua loa o atafia a Tena matagofie, o piki ki Tena muna tonu, kae ifo ki lalo ite ofo mai i Ana mua. Kafai e fakamaoni kite Atua, ka fakafoki mai a Tena mainaaga, kae ka mafai, ite fakaotiiga, o foki atu kia Ia. Kafai e se kafi, tena la, i tena tiute ki tena Tufuuga, ka fai a ia me se talitali-uli ki manakooga o te tino mo ana finafinauuga, kae, ite fakaotiiga, ka apulu ki lalo ite olotou pokooga.

So se tino ko oti, ite Aso tenei, ne se talia ne ia ko fakalotoloto-lua mo manakooga o tagata ke fai mo mea e fuli mai a ia keatea mai ia Ia Tela kote Mea Tonu mai ite Favavau, e seki puapuagaa ite uateega ne fakaosogia ne latou e pulepule i lotu mo mai i tua o lotu o kave a ia keatea mai ite atafia ne ia a Tena Meseti, ate tagata pena ka atafia-gina ne te Atua, te Aliki o tagata katoa, me kote tasi o Ana failoga mafi, kae ka lau a ia i loto i igoa kola ka tusi ne te Pene ote Tafasili ite Maluga i Tena Tusi. Fakamanuia a ia tela ne atafia-gia ne ia ate tinaa tulaga o se agaaga ola pena, ne molimau-gia a tena tulaga kae maua ne ia ana uiga lei.

E uke ko oti ne tusi i tusi mua e uiga mo tulaga kese kese ite atiake ote agaaga ola, pela mote finafinau kaiuu ki so se mea, te kaitaua vave, fakamaalosi, alofa kaimalie, lotomalie fiafia lei Faka-te-lagi mo feitu pena; ate Pene ote Tafasili ite Maluga, tela la, e se manako o toe saga kia latou. So se agaaga ola tela e sasale mote maulalo mote Atua, ite Aso tenei, kae piki mau kia Ia, ka maua ne ia e fakasafe mote fakaaloalo mote malu o igoa mo tulaga mo igoa lei katoa.

Kafai a tagata e to ate moe, a tena agaaga ola e se ttau o pokotia i se mea mai i tua atu. E se pokotia i mafulifuliiga i tulaga ne faiite muamua a ia io me ko tena natula. A so se keseega i ana galueega e mafai o pogai mai i mea mai i tua atu. Ko pokotiaaga konei mai i tua atu e pogai kiei a keseega o tena enviromene, a tena malamalama mo tena kilooga.

Mafaufau kite mata o tino. E uiloa e ia ia ate mafai o lavea a mea faiite, ka kote faigata foliki loa e mafai o fakalavelave ki tena kilo ko seai iei sena paoa o lavea a so se mea. E lauefa a te igoa o Ia Tela ne faiite, kae kote Pogai o pogai katoa konei, Tela ko oti ne fakaeke ko so se mafuliiga mo so se kese kese-ega ite lalolagi o tino ka fakana ki luga ia latou. So se mea faiite ite Iunivesi katoatoa se mataloa e tau atu ki Tena poto, se failoga o Tena nofoaiga-a-tupu, se fakaasiiga o Ona igoa, se maaka o Tena afioga, se fuka o Tena paoa, se auala ote ulufale ki loto i Tena Auala tonu…

E tonu Au e fai atu, ate agaaga ola o tino, ite tonuuga, kote tasi o maaka ote Atua, se mea lilo i vasia o Ana mea lilo. Se failoga tafasili ite mafi ote Mafi-Katoatoa, kote takitaki-ala tela e fakapula mai ate mea tonu i lalolagi katoa ote Atua. I loto iei e moe funa a kote lalolagi ko se kafi lele ne ia o maina iei. Mafaufau i loto loa o tou loto ate fakaasiiga ate Agaaga Ola ote Atua tela e nofo salalau i Ana Tulafono katoa, kae fakatusa a ia kite natula masei mote manakooga faka-te-foitino o latou kola ne teke kia Ia, kola ne fakatapu ne latou a tagata ma fuli atu kite Aliki o Igoa, kae faifitoi a latou ke sasale i olotou manakooga mo maseiiga. A se agaaga ola pena ko oti, ite tonuuga, ne takaseasea mai ite auaala ote se tonu….

A koe ko oti, ne sili mai kia Au e uiga mote tulaga ote agaaga ola mafai ko mavae mai ite foitino. Ke iloa ne koe, ite mea tonu, ite agaaga ola o tagata ko oti ne sasale i auala ote Atua, kae tonu loa, e toe foki atu kae fakatasi atu kite matagofie ote Fagasele. Mai ite amiotonu ote Atua! Ka maua ne ia ate tulaga tela e seai se pene e ana maua o fakaasi, io me se laulaufaiva e ana maua o fakamatala. Ate agaaga ola tela ne tumau ite fakamaoni kite Talitonuuga ate Atua, kae tumau aunoa se gasuesue i Tena auala ka mafai, mai i tua o tena fanaka ki luga, ka ulufia ne te paoa tela a lalolagi katoa kola ne faiite ne te Mafi-Katoatoa e mafai o penefiti mai ia ia. A se agaaga ola pena e aumai ne ia, ite kalaga ate Tina Tupu mote Faiakoga Faka-te-Lagi, ate falaoa fakafete piua tela ko oti ne fete iei ate lalolagi o tino, kae fakafonu kite paoa tela ate iloa mo mea fakaofoofogia ote lalolagi e mafai o fakaasi mai. Manatua ite mafai pefea ate meakai tela e manakomia kite fakafete o fete atu ia ia loa. A agaaga ola kola ko failoga ote motu mai keatea ko falaoa fakafete ote lalolagi. Talosaga fakapooko kiei, kae ke fai a koe mo latou e fakafetai.

Ite ukeega o omotou Tapeleti a Matou ne fakasino kite ulutala tenei, kae ko oti ne tuku atu ki vaega kese kese ote atiakeega ote agaaga ola. E tonu Au e fai atu, ate agaaga ola (soul) o tagata e maluga atu ite foki ki tua mote fano ki mua (egress and regress). E tumau, kae e ui iai e lele i luga; e gasue, kae e ui iai e tumau. A ia loa, se fakamaoniiga tela e fai mo molimau kite isi o se lalolagi tela e se tumau, pela foki kite tonuuga o se lalolagi tela e seai sena kamataga io me se fakaotiiga. Kilo kite moemiti tela ne miti ne koe, mai i tua ote uke o tausaga, ne toe fakafokifoki i mua o ou mata. Mafaufau ite fai-faka-atea ote lalolagi tela ne sae mai kia koe i tau moemiti. Kilo ki tou loto ki luga ite atamai ote Atua tela e se mafai o salagia, kae talosaga pooko ki fakaasiiga e se mafai o laugia

Molimau ki fakatalitonuuga fakaofoofogia o tugalima ote Atua, kae iloilo ki luga i tena kesekese mo ona uiga. A Ia Tela kote Ponooga o Pelofeta ne fai mai: “Fakauke aka a toku ofo mo toku poi ia Koe, O te Atua!”

Pela mo tau fesili me kote lalolagi faka-te-foitino e isi ne mea e gata mai iei (limitations), ke iloa ne koe me ite maina ote feitu tenei e fakanaa loa ki luga ite tino tela e lavea ne ia. I se feitu e tasi, e isi ne gata-aga o ia; i sua feitu, e maluga atu i gata-aaga katoa. Kote Atua tonu tokotasi ne isi mai loa ite se gata mai, kae ka tumau o isi kite favavau. A Tena foafoaaga, e pena foki, e seai se na kamataaga, kae e seai foki se na fakaotiiga. Katoa kola ne faiite, tena la, ne mafua mai i se pogai. Ate mea tonu tenei, ia ia loa ia ia, ne fakatu, mai i luga atu o se ata o te fakalotolotolua, kote tafatasi ote Tufuuga.

Ko oti foki a koe ne sili mai kia Au e uiga mote natula o lalolagi ite vanimonimo. Ke maina i olotou natula, e ttau o salasala kite uiga o fakatauuga kola ko oti ne faiite mai i Tusi taumua ki lalolagi ite vanimonimo mo lagi, pela foki kote mea ke maua ate natula ote olotou sokooga kite lalolagi faletino tenei, mote pokotia e mafai ne latou o fai kiei. So se loto e fonu ite ofo i se tala faka numi pena, ka ko so se mafaufau e numi ne tena fakaofoofogia. Kote Atua fua, e Ana maua o fuafua a tena taaua. A tagata poto, kola ko afe tausaga ne taofi ne latou ate olaaga ite lalolagi tenei, ne kafi, i loto i te fia o tausaga ite leva ote olotou onoonooga, o galue ate aofai io me kote fia o tausaga o niisi paneta. Toe maufaufau, kite keleega o mau kesekese kola ne pogai kiei a fakamasakooga ne fakaasi mai ne tagata konei. Ke iloa ne koe me i so se fetu tumau e isi loa ne ana paneta, ka ko so se paneta e isi foki loa ne mea ola iei, tela e seai se tagata e ana mafai o galue mai ate aofai.

O ko koe tela ko oti ne fakamau ou mata ki luga i Oku mata! Ate Aso Tau-Malulu ote Matagofie ko oti, ite Aso tenei, ne fakaasi mai a tena mainaaga, ka kote Leo ote Tafasili ite Maluga ko kalaga. Mai imua atu ko oti Matou ne fai atu a pati penei: “Mea nei seai kote aso mo so se tagata o fakafesili a tena Aliki. E ttau mo so se tino tela ko oti ne fakalogo kite Kalaga ate Atua, tela ne faipati mai ne Ia Tela kote Punaa Aso ote Matagofie, o tu kiluga kae tagi atu penei: ‘Au tenei, Au tenei, O te Aliki o Igoa katoa; Au tenei, Au tenei, O te Tufuuga o lagi! Au e molimau, auala atu i Tau Fakaasiiga, a mea ne funa i loto i Tusi ate Atua ko oti ne fakaasi, kae so se mea tela ne fakamau ne Au Mesentia i Tusitusiiga Tapu mana ko oti ne fakataunu.’ “

Mafaufau aka kite mafai mote iloa o tagata o fakavasega tela ne aumai ne te Atua kite uiga tonu o tagata. Iloilo a koe loa ia koe, kae taumata i tou gasuesue mote se-gasuesue, i tou finagalo mo tou fakamoemoeega, tau kiloga mo tau fakalogologo, ko tou lagona ite sogi mote paoa ote faipati, pela foki mo so se mea aka tela e sokotaki io me e sopoia atu i tou lagona faletino io me faka-te-agaaga, katoa e aumai kae e nofo kaitalafu ate olotou ola kite mafai mote iloa o tagata. E pili kii a latou mo ia, tela ite mutana ifo ote kemo ote mata a tena sokooga kite foitino o tagata e mafai loa o motu keatea, takitasi kae tokotasi a lagona konei ko gata fakavave loa o fai a olotou galueega, kae ka seai se paoa o latou o fakaasi a fakamaoniiga o olotou mea e fai. E mainaina aunoa mo se fakalotolotolua kae manino i mea faigalueega takitasi kona ne laulau atu e fakanaa kae ka tumau o fakanaa, kite galue fakalei, ki luga ite mafai mote iloa o tagata, tela e fakatau pela me ko failoga ote faaliiga a Ia Tela kote Aliki malu o tino katoa. Mai i luga i tena fakaasiiga o igoa katoa konei mo uiga ko oti ne fakaasi atu, mai ite taofiiga ko se fakagalue a latou ko maofa kae tanumia.

Se mea e se tonu o tausiusi ite mafai mote iloa o tagata tenei e pau mote paoa ote kiloga, pela mote paoa ote kiloga e maua mai iei kae galue foki fakanaa ki iei. Tela la, e pena se mea valea o kinau ite mafai mote iloa tenei o tagata e mafai o fakasino kite lagona ote fakalogologo, auaa ite lagona ote fakalogologo e maua mai ate mafai mote iloa ite enetii taaua mote fakagalueega ona tiute.

Ate sokooga foki tenei e fusigia iei ate mafai mote iloa tenei ki so se mea tela ko maua ia ia a igoa katoa konei mo uiga iloto ite mafaufau ote taagta. A igoa kesekese konei mo uiga fakaasi ko oti ne galue auala mai ite failoga tenei ate Atua. E se fuafuagia ate maluga ote failoga tenei, i tena uiga tonu mote tinaa mea, mai i luga atu i igoa mo uiga katoa. E tonu, a mea katoa i tafa o ia, mafai e fakatusa ki tena matagofie, e liua kite seai lele loa, kae fai pela me se mea ko puli atu.

Kafai a koe e mafaufau i tou loto, mai i taimi nei ke oko kite fakaotiiiga tela e seai se fakaotiiga, mote poto akutu fakatasi mo malamalama tela ko oti ne oko kiei a mafaufau tafasili ite takutakua i taimi ko teka io me ko taimi mai i mua, ote Mea Tonu fakaekegia faka-te-lagi kae fui iloa, kote failoga tenei ote faaliiga ate Mafutaaga-Katoatoa, kote Matagofie-Katoatoa, a koe ka se kafi o malamalama i tena feitu lilo io me o fakamasino a tena aogaa. Ko laveagia a tou seai se maalosi o oko atu kise malamalama e lava ote Mea Tonu tena tela e nofo iloto ia koe, ka vave a koe o talia ite seai se aogaa o se taumafaiiga pena e taumafai koe kiei, io me so se isi aka o mea faiite, o fuafua ate mealilo ate Atua Ola, kote Fetu Ao ote matagofie e se matafitafi, kote Favavau o aso kite se gata mai. Ate fakaasiiga tenei ote seai se maalosi tela se fakatauuga matua e ttau o fakamaalosia so se mafaufau ia ia loa kote tumu o malamalama faka tagata, kae maaka foki ei ate tumutumu o atiakeega a tagata.

E fakatautau ne koe ate Atua tonu Tokotasi Tela mai i tafa, kote maualuga e se fuafuagina mai i luga atu, o mea faiite katoa. Kote iunivesi katoa e fakaasi mai iei a Tena matagofie, ka ko Ia loa ia Ia e tusaoloto, kae sopoia atu i Ana mea ola faiite. E tenei ate uiga tonu ote fakatasitasi Faka-te-Lagi. A Ia Tela kote Meatonu Favavau kote tasi o Paoa Tela e pule katoatoa ite lalolagi o tino, Tela a Ona foliga e sae aka ite kilo ote foafoaaga katoatoa. Ate olaaga katoa e fakanaa ki luga ia Ia, kae mai ia Ia e maua mai iei ate tausiiga o mea katoa. E tenei ate mea tela e uiga kiei kite fakatasitasi Faka-te-Lagi; mea nei ko tena akoakoga fakavae.

Ko niisi, fakaseegia ne manatu fakasupasupa, ko oti ne mafaufau ki mea faiite katoa pela me ne kau galue fakatasi mo sooko ote Atua, kae manatu ia latou ke fai mo tiemipioni o Tena fakatasitasi. Mai ia Ia Tela kote Atua tonu tokotasi! A tagata pena ko oti, kae ka tumau pena, ko fai me ne tino e tauaso, kae e aofia a latou mo latou kola e fakatapulagia ka fakatuakoigia ate olotou iloa ite Atua.

A ia kote tino talitonu tonu ite fakatasitasi Faka-te-Lagi tela, mai ite numiiga fakakese ote tafatasi, e se talia o fakasaoloto a so se manatu valevale o fakapouli a tena iloa ite tasi ote Atua, tela ka iloa ne ia ate Atua Tokotasi Tela, mai i Tena natula, e sopoia atu i tuakoi o aofaki.

Ate tonuuga ote talitonu ite tafatasi Faka-te-Lagi e aofia iei ate iloa ia Ia Tela kote Faifekau ate Atua mo Ia Tela e se-lavea, kote se-mafai o oko kiei, ko Meatonu tokotasi e se-iloa. Mai iei ko tena uiga a so se mea tela e fakauiga kia ia tela muamua, ko Ana galuega katoa mo faiga, i so se mea e fakaeke ne Ia io me e fakatapu, e ttau o iloilogia, i olotou feitu katoa, pela foki mo nofonofooga katoa, kae aunoa mo se fakalave, e tusa mote Finagalo ote Atua. Mea nei kote tumutumu ote tulaga e mafai ate taugasoa talitonu fakamaoni ite fakatasitasi ote Atua o fakamoemoe o oko kiei. Fakamanuia kite tagata tela e oko kite tulaga tenei, kae fai pela mo latou e mautakitaki ite olotou talitonu.

O Aku Tavini! E ttau mo koe o fakafou kae toe fakaola a oulua agaaga ola auala atu i alofaga agalelei kola, ite Vaitau Olaola Faka-te-agaaga tenei, ko ligi ifo ki luga ia koe. Ate Fetu Ao o Tena matagofie takutakua ko oti ne sulu atu a tena malifalifa ki luga ia koe, ka ko kaumana o Tena agalelei e seai ne tuakoi ko pulougia ia koe. E maluga ate tauii o ia tela e se fakaseai a ia mai ise alofa foai takutakua penei, io me e se fakatamala o lavea ate gali o tena Fagasele Sili i Ona teuga fou.

Fai atu: O tino! Ate Lamepa ote Atua ko kaa; fakalogo, i matagi kaitaua o tou se fakalogo e tamate iei a tena mainaaga. Nei kote taimi o tu ki luga kae fakalauefa atu ate Aliki, te Atua o koe. Sa taumafai ki mea e lei iei a tou foitino, kae tausi a tou loto ke piua kae matakalekale. Ate Tokotasi Tiapolo ko takatokato fua o faitali, fakatoka o sele a koe. Fusi a koutou mai i faiga masei a ia, kae taakigia nete mainaaga ote igoa ote Atua tonu tokotasi, fakasao a koutou mai ite pogisa tela siomia ia koutou. Fakaputu a oulua mafaufauuga ite Fagasele Sili, iloo ia koutou loa.

Fai atu: O koutou kola ko olo seke keatea kae galo i outou auala! Ate Mesentia Faka-te-Agaaga, Tela e faipati kite seai aka foki na kote meatonu, ko oti ne fakasalalau atu kia kkoutou ate vau ote Fagasele Sili. Onoono, a Ia ko vau nei. Sea aa ate mea e mata fanoanoa kae mata se fiafia a koutou? Kaiaa e tumau ate mata seai se fakamoemoega mafai ate Piua mote Tokotasi Lilo ko fakasae mai e seai sena veli i vasia o koutou? A Ia Tela kote Kamataaga mote Fakaotiiga, a Ia Tela kote seai se Gasuesue mote Gasusue, ko fakasae mai i mua i oulua mata. Taumata aka mene pefea, ite Aso tenei, ate Kamataaga e fakaasi mai ite Fakaotiiga, e pefea mai ite Seai se Gasuesue ne faiite iei ate Gasuesue. Ate gasuesue tenei ko oti ne galue ne enetii maalosi kola a muna ate Mafi Katoatoa ko oti ne tatelatela atu salalau kite foafoaaga katoatoa. So se tino tela ko oti ne fakavavegia ne tena paoa fakaola, ka maua ne ia ate fakamaalosi ke oko atu kite koga nofo ote Fagasele; kae so se tino tela e fakaseai a ia mai iei, ka apulu ki lalo ite fanoanoa e se kafi o toe fakafoki. A Ia kote atamai tonu tela ate lalolagi mo mea katoa iei e seki saga fakaatea mai ite iloa ote mainaaga ote Aso tenei, tela a ia ka se fakasaoloto a faipatiiga e seai ne aogaa a tino o fai a ia ke fakapiko mai ite auala ote amiotonu. A ia e tonu pela mote tokotasi ko mate tela, ite fakavaveao fakaofoofogia ote Faaliiga tenei, ne fakatamala o fakavave atu nete matagi ili malielie ote agaaga ola. A ia e tonu se tino e nofo saitia pela me se pagota tela e seki lavea ne ia ate Fakaola Tafasili ite Silisili, kae ko tigaina a tena agaaga ola ke saisai, faka fanoanoa kae aunoa ne mea e mafai o fai, i kopikopiaga o ona manakooga.

O Aku tavini! So se tino tela ne tami ite Vaipuna ko oti ne oko atu kite Ola e se gata mai, ka ko ia tela ne seki talia ne ia o inu mai iei e pela me se tino mate. Fai atu: O koutou tino galue amio se tonu! Ate matapeapea ko fakatuai a koe mai ite tuku atu o se taliga fakalogologo kite leo suamalie o Ia Tela kote Lava-loa-ia Ia-Katoatoa. Fulugiaa ke maa mai outou loto, ko Tena mea funa Faka-te-Lagi ke mafai o fakailoa atu kia koutou. Taumata kia Ia e laveagia kae malifalifa pelaa mote laa i tena matagofie katoatoa.

Fai atu: O koutou kola e seai ia koutou ate malamalama! A se tofooga mafa e tulituli atu kia koutou, kae pukegia a koutou fakavave. Fakagasue aka a koutou, ke fiafia koutou mafai ko pasia kae e seai se fakalavelave e oko atu ki luga ia koutou. Ke talia ate uiga silisili ote igoa ote Aliki, te outou Atua, Tela ne vau kia koutou ote takutakua o Tena matagofie. A Ia, e tonu, kote Iloa-Katoatoa, kote Pule Aoao-Katoatoa, kote Puipui Malu Silisili.

Kae nei e uiga mo tau fesili me ko agaaga ola o tagata e tumau o iloa ne latou a sua isi mai i tua ote mavae mai ite foitino. Ke iloa ne koe i agaaga ola o tino o Bahá, kola ko oti ne ulufale atu kae ko oti ne fakatu iloto ite Vaka Lanu Ulaula (Crimson Ark), ka fesokotaki kae sautala fakapili loa mote sua isi, kae ka sokotaki pili loa i olotou olaaga, mo olotou finafinauuga, olotou lima pela foki mo taumafaiiga ke pela loa me se agaaga ola e tasi. A latou e tonu e matuaa malamalama, ko latou e tafasili ite matakite, ko latou e nofo mote malamalama. Tena la ko oti ne fakatonu ne Ia Tela kote Iloa-Katoatoa, kote Atamai-Katoatoa.

A tino o Bahá, kola ko tino e nofo ite Vaka ote Atua, taki tokotasi kae katoa loa, e iloa fakalei loa ate tulaga o sua isi mo tena nofonofooga, kae e fusitasi ite fusiiga ite kafaanoa ote iloa pili mote fakataugasoa. A se tulaga pena, e ui iai, e ttau o fakanaa ki luga ite fatuatua mo amioga a latou. A latou kola ite vasega mote tulaga e pau e iloa kii loa ne latou ate iloa mote mafai o sua isi, amio, mea ne mafai o fakataunu pela foki mo ona uiga lei. Latou kola ite vasega e malalo ifo, e ui iai, e se kafi o iloa faka katoatoa ate tulaga, io me o fakatautau a uiga lei, o latou kola ite vasega mai i luga atu ia latou. Taki tokotasi ka maua a tena tusaga mai i tou Aliki. Fakamanuia kite tagata tela ko oti ne fuli ona mata ki mua ite Atua, kae sasale mautakitaki i Tena alofa, ke oko kite taimi a tena agaaga ola ko oti ne kapaeva atu kite Atua, kote Aliki malu o tino katoa, kote Tafasili ite Maalosi, kote Fakamagalo Favavau, kote Alofa Fakamagalo-Katoatoa.

Agaaga ola o tino fapaupau, e uilea, kae e molimau au kiei, mafai ite toe manavaaga o latou e fai ke iloa ne latou a mea lei kola ne sao mai ia latou, kae ka tagi fanoanoa ite olotou ikuuga, kae ka loto maulalo a latou i mua ote Atua. A latou ka tumau o fai pena manafai ko mavae a olotou agaaga ola mo olotou foitino.

E maina kae manino i tagata katoa mai i tua ote olotou mate faletino, o fakatautau ate aogaa o olotou faiga, kae e iloa aka ne latou a mea katoa a olotou lima ne fai. Au e tauto ite Fetu Ao tela e sulu mai i luga atu ote sikulagi ote paoa Faka-te-Lagi! A latou kola ko tino e tautali ite Atua tonu tokotasi ite taimi loa tena ko liakina atu ite olaaga tenei, ne lagona se lifu mote fiafiaga tela e se kafi o fakamatala, ka ko latou kola e ola i mea see ka pukegia ne te mataku mote sapolepole, kae ka fakafonu a ia ite manavase mote mataku, tela e seai e silia atu iei. E lei mo ia tela ko oti ne inu ite uaina filifilia kae fakamaoni ote fatuatua auala atu i alofaaga agalelei mo alofa foai tuafia o Ia Tela kote Aliki o Tapuakiiga katoa…

Mea nei kote Aso manafai a fagasele ote Atua e ttau o tausi a olotou mata ki mua i Tena Faifekau, kae fakamau a latou ki luga i so se mea tela ate Faifekau e mafai o fakaasi. A naai tu mo aganu o taimi ko teka e seai lele loa ne fakavae e fakanaa kiei, ka ko mafaufauga e fiafia kiei a tupulaga ko teka atu, kae kola ko oti ne fakamau ne latou i olotou tusi, ite taulasiiga o latou, ko oti ne fakapokotiagia ne manakooga faitogafiti. E molimau ne koutou ite taulasiiga o fakamataalaaga mo fakapulaga o muna ate Atua, nei ko faka-aogaa i vasia o tagata, e seai lele se mea tonu iei. Ate see palakii o latou, i naai keisi, ko fai pela mene fakamasakooga manafai a veli fakalavelave ko masae ki lalo. Ko latou foki loa ko oti ne fakapatino mai ate olotou fakatamala o na iloa ate uiga o so se muna ate Atua.

Ate pogai o Matou ke fakaasi atu me kafai a fagasele ate Atua e fakapaia a olotou loto mo olotou taliga mai i muna seai ne aogaa kola ne faipatigia i taimi mai mua, ke fuli mo outou agaaga ola kia Ia Tela kote Punaa Aso o Tena Faaliiga, kae ki so se mea a Ia ko oti ne fakaasi mai, ate uiga pena e tafasili ite tavaegia i mata ote Atua….

Fakalauefa a Tena Igoa, ko koe ke fai pela mo latou e fakafetai. Moli atu Aku fakatalofaaga ki Aku fagasele, kola ate Atua ko oti ne fakaatea keatea ona ko Tena alofa, kae fai a latou ke fakataunu a olotou fakamoemoeega. Kote matagofie katoa kite Atua, te Aliki o lalolagi katoa.

Kae nei e uiga mo tau fesili, “E pefea o seai ne tusi e maua atu e uiga mo Pelofeta kola ne aumai mai mua atu o Atamu, kote Tamana ote Tagata, io me ko tupu kola ne ola i aso o Pelofeta kona?” Ke iloa ne koe ite seai o ne tusitusiiga kia latou e seai se fakamaoniiga me ia latou ne seki ola i taimi tena. Nei ko isi ne tusi e uiga mo latou, e pogai mai ite tafasili ite olotu mao, pela foki mo te lasi o mafulifuliiga ne fano iei ate lalolagi talu mai taimi tena.

Se gata iei a vaega mo auala o tusitusiiga konei ko fakaaogaa i vasia o tagata i aso nei e seiloa ki tupulaga kola mai i mua atu o Atamu. E isi foki se taimi a tagata e valea katoatoa loa ite atamai o tusitusi, kae ne fakaaogaa ne latou se faifaiiga tela e kese kii loa mote faifaiiga e tenei e fakaaogaa i aso nei. Ki se fakamatalaaga lei ote mea tenei e manakomia se fakamatalaaga katoatoa.

Mafaufau ki kesekeseega kola ne sae aka talu mai aso o Atamu. Ko gana kesekese kae e iloa lei i konei ko faipatigia ne tino ote lalolagi ne seki iloa muamua loa, pela foki mote kesekese o tulafono mo tu mo agaanu e fakaaogaa nei i vasia o latou. A tino ote vaaitaimi tena e faipati ki se gana e kese mai mote mea tenei e iloa i aso nei. Ate kesekese o vaega gana ne mafua aka fua i tausaga fakamuli, i se fenua e igoa kia Papelu, Ne tuku iei ate igoa Papelu, auaa ate uiga ote pati tena “kote koga tela e sae aka iei ate numiiga o laulaufaiva.”

Fakamuli ifo ate gana Syriac ko fai mo se tasi o gana taaua. A Tusitusiiga Tapu o taimi mua e fakaasi mai ite gana tena. Mai i tua ifo, Apelamao, kote Taugasoa ote Atua, ne fakasae mai kae sulu atu ki luga ite lalolagi ate mainaaga ote Faaliiga Faka-te-Lagi. E malaga a Ia ki Iolitana ate gana e faipati a Ia kiei kote faka Epelu (Hebrew - ‘Ibrání) tela a tena uiga “kote gana ote fano Malaga ki sua feitu.” A Tusi ate Atua mo Tusitusiiga Tapu ne fakaasi mai ite gana tena, kae mai i tua ifo ise leva kii loa ne faka-aogaa iei ate gana faka Alapiki (Arabic) me kote gana ote Faaliiga….

Molimau, telaa la, ite uke mote lasi o mafuliiga i gana, faipati, mote tusitusi talu mai aso o Atamu. E pefea la ate lasi o mafulifuliiga ne tupu i taimi mai mua atu o Ia!

Ate pogai o Matou o fakaasi atu a muna konei kote mea ke fakaasi atu ite Atua tonu tokotasi ko oti i Tena tulaga tafasili ite maluga mote se-fakapaugia, ne fai ne Ia, kae ka tumau pena kite favavau o tumau, o maluga atu i luga o fakatauuga a tino katoa na ko Ia. A Tena foafoaaga ko leva ne isi, mo Faifekau o Tena matagofie Faka-te-Lagi mote Punaa Aso ote mana favavau ko oti ne tuku ifo ki lalo mai ite pilitakiiga loa, kae ko oti ne fakasino ke kalaga ki tino kite Atua tonu tokotasi. Ko igoa o niisi o latou ko puli atu pela foki mo tusi fakamau o olotou olaaga ko galo atu e pogai mai i fakalavelave mo mafulifuliiga kola ne pokotia iei ate lalolagi.

E isi se fakamatalaaga i niisi tusi fakapitoa o se lolo lasi tela ne pogai kiei a meaola katoa ite lalolagi, fakatasi mo tusi fakamau o tala fakasolopito mo niisi mea aka foki, ne fakamasei katoa. E se gata iei, e uke a matuaa fakalavelave lasi ne tupu kola ne lepegia iei ate ukeega o tala o mea ne fai. Kae e se gata atu foki, mai i tusi fakamau iei a tala fakasolopito e maua aka a kesekeseega, e kesekese foki loa a mau a itu-vaegaa valevale a tino ote lalolagi o taimi kona mo olotou tala fakasolopito. Niisi mau o olotoi tala fakasolopito e olo ki tua atu ki se valu afe tausaga, ko niisi aka ki se sefulu lua afe o tausaga. Ki so se tino taki tokotasi tela ko oti ne faitau ite tusi a Júk. E maina kae manino ite uke o fakamatalaaga ne maua e maua i tusi valevale me e kesekese.

Fakamolemole kite Atua ko koe ke fuli atu ou mata ki mua ite Faaliiga Tafasili ite Takutakua, kae se saga lele loa ki tala mo aganuu e se fealofani konei.

Ke iloa tonu ite uiga tonu ote fakamasinooaga tonu mote kamataaga o ia e aofia i loto i tulafono ko oti ne tusi mai ne Ia Tela kote Faifekau ote Foitino ote Atua i vasia o tagata, mafai a koutou ko latou kola e lavea ate meatonu tenei. A ia e tonu e toe fakafoliga mai ite foafoaaga katoa tafasili ite maluga e se mafai o see. Moi ne fai a Tena fakamasinooga tonu e fakamataku ki loto o latou katoa kola ite lagi mote lalolagi, e seai se tulafono kae se fakaasiiga ote tinaa fakamasinooga tonu. A mataku mote se nofo toka tela a te faaliiga ote tulafono e fakaoso i loto o tagata e ttau o fakatusa ki tagitagi ate pepe koi fauu mai ite susu o tena matua, mafai a koutou ko latou kola e laveagia. Moi fai a tagaata e maua ne latou ate pogai fakamaalosi ote Faaliiga aate Atua, a latou ka tonu loa ka pei keatea mai ite mataku o latou, kae mo loto o latou e fonufonu ite fakafetai, fiafia mote silisili ite lifu.

Ke iloa fakalei loa pela loa mo koe e talitonu maalosi kite Muna ate Atua, e maluga a Tena matagofie, e tumau kite favavau, a koe e ttau, o pena foki, o talitonu i tou fatuatua aunoa mo se fakalotolotolua i tena uiga e se mafai o oti. Latou kola ko fakamatala upu tofia, ko olotou loto ko koga tausi o ona mealilo, ko latou fua ko tino e mafai o malamalama i ona atamai tuafia. So se tino e faitau ite Tusitusiiga Tapu, e fakaosooso atu ke filifili mai iei a so se mea tela e pagatonu kia ia ke mafai ne ia o fakafesagai ate pule o te Sui ote Atua i vasia o tagata, e tonu, se tino ko mate, e uiloa ite kiloga faka faletino a ia e sasale kae sautala mo ana tuakoi, kae kautasi mo latou i olotou meakai mo olotou mea inu.

O, e mafai ate lalolagi o talitonu ia Au! Mafai a mea katoa e tausi i loto o tino Bahá, kola ate Aliki, Tena Atua, kote Aliki o igoa katoa, ko oti ne akoako kia Ia, e mafai o fakaasiigia ki tagata, so se tagata ite lalolagi e maua ne te guguu.

E pefea ate takutakua o meatonu se lausia kola a gatu o muna e se mafai lele loa o tausi! E pefea ate lasi ote aofai o akoakoga fakavae kola e seai ne faakamatalaaga e mafai tonu o fakamatala, kola a olotou taaua e se mafai lele o folafola mai, kae kola e seai foki ne fakaalaalaga mao e mafai lele o fai! E pefea ate lausa o meatonu kola e ttau o tausi e se-faipatigia ke oko kite taimi e tusia mai! Pela foki loa mote mea ko oti ne fai atu: “E seai ko mea katoa kola e iloa ne tagata e mafai o fakaasiigia, io me e mafai ne so se mea tela e mafai ne ia o fakaasi e fakatau pela ko oko ki taimi o latou, io me ko so se faipatiiga e tau tonu a tena taimi e mafai o fakatau pela me e ttau tonu kite iloa mote mafai o latou kola e fakalogologo kiei.”

Mai i meatonu konei ko niisi e mafai o fakapula atu kite lasi fakatau kite lasi ote iloa mote mafai o fai a mea o fale tausi ote mainaaga ote poto o Matou, mo latou kola e maua ne latou ate agalelei funa o Matou. Matou ko oti ne akai totuli kite Atua ke fakamaalosi a koe ki Tena paoa, kae fakamafai a koe ke lavea a Ia Tela kote Kamataaga o poto katoa, kote mea ke mafai ne koe o motu keatea a koe mai i poto o tagata katoa, auaa, “ate mea tela e polofiti ki so se tagata kote taumafai kite tauloto mafai a ia ko leva ne maua ne ia kae laveagia a Ia Tela kote Pogai o poto katoa?” Piki kite Aka ote Poto, mo Ia Tela kote punaa vai o ia, kote mea ke mafai ne koe o maua ia koe ate saolotooga o mea katoa kae ke fakatau ia koe e apo i taulotooga a tagata, kae kote fakatauuga tena e seai se fakamaoniiga tonu iei, io me se molimau o se tusi fakamaina mai iei, e mafai o lago kiei.

So se mea tela i lagi mo so se mea tela ite lalolagi ne fakatalitonuuga tonu ote faaliiga iloto iei ko uiga mo igoa ote Atua. Pela foki iloto i so se atomu e takato iei a failoga kola a fakamaoniiga tafasili ite lei kite faliiga ate Mainaaga Tafasili ite Takutakua. Au e mafaufau, kae ona kote maalosi ote faaliiga tena, e seai se tino e mafai lele o ola. E pefea ate malifalifa o mainaaga ote poto kola e sulu maina iloto i se atomu, kae e pefea foki ate lauefa o vasa ote atamai kola e soko aka ise motiga! Kise tulaga maluga ate mea nei se mea tonu i te tagata, tela i vasia o mea faiite katoa, ko oti ne fakasafegia kite gatu o mea alofa pena, ko oti ne fakaatea mai mote matagofie o se fakakeseega pena. Auaa ia ia e fakaasigia i uiga katoa mo igoa ote Atua kise tulaga tela e seai aka foki se mea faiite ko oti ne silia atu io me ne sopoia atu. A igoa katoa mo uiga konei e ttau mo ia. Pela loa mo Ana pati: “Ate tagata ko Taku mealilo, ka ko Au ko tena mealilo.” Tuafia a kupu kola ko oti ne fakaasi fakafokifoki mai i Tusi Faka-te-Lagi katoa mo Tusitusiiga Tapu, e fakamatala fakalei mai iei ate mataupu tafasili ite maluga tenei kae tafasili ite fui fai. Pela foki loa mo Ia ko oti ne fakaali mai: “Matou ka tonu loa ka fakaasi atu kia latou a failoga a Matou ite lalolagi kae iloto ia latou foki loa.” Kae e toe fai mai a Ia: “Kae iloto foki loa ia koutou: a koutou e se kilo ki failoga ate Atua?” Kae e toe fai mai foki loa a Ia: “Ke sa fai a koutou pela mo latou e puli ate Atua, kae kola a Ia ko oti ne fai a latou ke puli foki a latou ia latou.” Ite feitu tenei, a Ia Tela kote Tupu favavau – ke mafai a agaaga ola o latou katoa kola e nofo ite Tapanekolo faka-te-agaaga o fakataulaga atu mo Ia – ko oti ne faipati: “A Ia ko oti ne iloa kite Atua tela ko oti ne iloa a ia loa ia ia.”

….Mai ite mea tela ko oti ne faipatigia e vau o manino a mea katoa, ite olotou tulaga kanoloto loa iloto, e molimau kite faaliiga o igoa mo uiga ote Atua i loto ia latou. Taki tasi e tusa mo tena mafai o iloa mote mafai o fai a mea, e fakaasi mai iei, ate poto ote Atua. E maalosi kae siomia ite iunivesi ate faaliiga tenei, te la ko oti ne siomia iei a mea katoa e lavea ote se-lavea. Tena a Ia ko oti ne fakaasi mai: “Moi fai e seai aka foki na ko Koe se paoa ote faaliiga tela e se nofo mo Koe, e mafai o fakaasigia kia Koe? Tauaso ate mata tela e se lavea ne ia a Koe.” E pena foki ne faipati ate Tupu favavau: “E seai se ma ko oti ne lavea ne au, vagana e lavea ne au ate Atua iloto iei. “Kote Atua mai mua o ia, io me kote Atua mai i tua o ia.” Kae ite aganu a Kumayl e tusi mai iei: Kilo aka, se mainaaga ko sulu mai ite tafataeo ote favavau, kae poi atu, ona uagalu ko oti ne uku iloto i uiga loto o tagata katoa.” A tagata, tela kote mea mai i mea faiite katoa tafasili ite malu kae tafasili ite katoatoa, e silia atu ia latou katoa ite pooko ote faaliiga tenei, kae se fakaasiiga e tai maluga atu o tena matagofie. Ka ko tagata katoa konei, ko tino tafasili ite takutakua, kote tafasili ite fakamatea, mote Tafasili ite lei ko Faifekau ote Laa ote Meatonu. E tonu, a mea katoa mai i tafa o Faifekau konei, e ola ite galue o Olotou Finagalo, kae gasuesue kae ko oti a olotou foitino ne auala atu i maligiiga o Olotou agalelei.

Se tasi o fakamaoniiga e fakaasi mai ate meatonu kite Faaliiga tenei e tenei, i so se vaasia taimi mo Tamilosaga, i so se taimi ate Fai Faliiga ote Uiga tonu e se-lavea ne fakaasi ite foitino ote Faifekau, a niisi agaaga ola fakapatino, e pono kae motu keatea mai i kopikopiaga katoa faka-te-lalolagi, ka sala ki se fakamainaaga mai ite Laa ote Tofi Pelofeta mote Masina o takitakiga Faka-te-Lagi, kae ka oko atu kite Nofo mai Faka-te-Agaaga. Ona kote pogai tenei, agelu ote vaasi-tausaga mo latou kola e maumea, ka fakatauemu kae fatufatu ki tino konei. E tusa foki mo Ia ne fakaasi atu kia latou kola e se: “Kae fai mai a matai o Ana tino ko la e se-talitonu, “Matou e lavea ia Koe se tagata penei loa mo matou; ka e se-lavea ne matou a se tino tela ne tautali ia Koe vagana ko toe tino kaiuu ia matou kola e fai fakamasinooga fakava-vave, io me e lavea ne matou ia koe e siliia atu i luga ia matou: e tonu, matou e taku ne matou a koe me ne loi.” A koutou e lago a Faifekau mana kona, kae teke o fai atu: “E seai kai tautali atu ia koe vagana ko tino kola seai ne aogaa ia matou, latou kola e se ttau o saga kiei. “Ate fakamoemoeega o latou kote fakaasi me e seai mai ia latou poto, tino maumea, mo tino e lauiloa e talitonu ia latou. Ona kote mea tenei mo fakatalitonuuga pena ne saala a latou o fakaasi atu ate se-tonu o Ia tela e faipati kite seai vagana kote meatonu.

Ite Tamilosaga tafasili ite maalifalifa tenei, kote Nofoaiga-a-Tupu tafasili ite mafi tenei, se aofaki o tino maluga maina, tagata tafasili ite poto, tokita ko matua ate atamai, ko oti ne oko atu ki Tena Nofomai faka-te-lagi, kae ko oti ne fakaeke kia latou ate fakaaloalo o Tena alofaaga tafasili ite lei. A latou ko oti ne liakina, ona kote Fagasele, ate lalolagi mo mea katoa kola iei. …

Katoa ne takitakigia ne te mainaaga ote Laa ote Faaliiga Faka-te-Lagi, tauto kae talia a Tena meatonu! E pena ate olotou fakatuanaki, ko taulasiiga o latou ne liakina a olotou kope mo itu-kaaiga, kae piki mau kite fiafia-lei ote Matagofie-Katoatoa. Ne tuku ki lalo a olotou ola mote olotou Fagasele-Sili, kae liakina katoa a olotou mea i Tena auala. Ko olotou fatafata ne fai mo taketi o matasana ate fili, ko olotou ulu ne fakafou ki tao velo a latou fapaupau. E seai se laueleele ne tumau e seki inu ite toto o foitino konei ne motu mai keatea, kae e seai se pelu taua ne seki fakapakia ki olotou ua. Ko olotou amioga, ia latou loa, e fakamaoni kite meatonu a olotou pati. A fakamaoniiga a agaaga ola mana konei, kola ne tu ki luga mote matagofie o tuku atu a olotou ola mote olotou Fagasele kote lalolagi katoa ke mafai o ofo ite olotou mate faka taulaga, e seki lava loa mo tino ote aso tenei? E seki lava o molimau teke kite aunoa ki se- fakamaoni o latou kola fakapelo a olotou fakatuanaki, ko la ne fakatau atu ate ola favavau ki mea fua kola e tanumia, kola ne tuku atu ate Kawthar (Vaitafe ote Ola) ote Nofomai Faka-te-Lagi ki vaipuna masimaa, ko olotou fakamoemoeega ite olaaga kote puke faifitoi a kope o niisi? E pena foki loa mote molimau ne koutou ate saga tonu o latou katoa loa ki mea seai ne aogaa ote lalolagi, kae olo mao kii loa mai ia Ia Tela kote Aliki, kote Tafasili ite Maluga.

Ke fuafua ttau: Mea nei kote fakamaoniiga a latou kola e talia kae aogaa o saga kiei kola a olotou amioga e olo tasi mo olotou pati, ko olotou amioga mai ite kilo mai i tua e pau mote kilo mai i loto? Ate mafaufau ko numi valevale i olotou amioga, ka ko agaaga ola ko ofo ite olotou maalosi mote kolomaki a olotou foitino. Io me kote fakamaoniiga a agaaga ola konei e seai ne olotou fakatuanaki e manava ne latou e seai aka foki na kote manava ote manakooga kaimanako, kae nofo takato i falepuipui i loto ite puipui o olotou manatu fakasupasupa, e talia? Pela mo pate ote pogisa, a latou e se-sau aka a olotou ulu mai i olotou moega vagana ke afuli ne latou a mea e se-tumau ote lalolagi, kae e seai se nofo toka vagana e galue latou o kave ki mua a fakmoemoeega ote olaaga fatauaa o latou. Faka goto ifo ki lalo i olotou faiga kaimanako, a latou e se-atafia ia latou fakatonuuga Faka-te-Lagi. I taimi ote ao, a latou e taumafai maalosi mo olotou agaaga ola ki mea e aogaa faka-te-lalolagi, kae i taimi ote po ate olotou galueega totino kote fakafiafiaaga olotou manakooga leaga. Se aa ate tulafono io me kote fuafuaaga e mafai ne tagata o fakafetaui kite piki mau me e se-talia a agaaga ola penei e foliki ate fakatau kae e se-saga mai kite talitonuuga o latou kola ko oti ne liakina, ona kote fiafia lei ote Atua, a olotou ola mo kope, ko olotou lauiloa mote takutakua, kote olotou taku lei mote fakaaloalo?...

Sea aa foki ate alofa, se aa ate tapuakiiga, se aa ate maluga ote lifu mote fakafiafia mana, ne ofo-taulaga a olotou ola ite auala ote Matagofie-Katoatoa! Kite meatonu ote mea tenei e molimau katoa. Kae e ui iai e mafai pefea ne latou o fakafoliki ate Faaliiga? Kai isi aka loa se vaasia-tausaga ne molimau aka loa ne ia ne mea e tupu faka ofoofogina penei? Kafai a taugasoa konei e seai ne tino salasala tonu kite Atua, koi aka foki ne ttau o kalagina kite igoa tenei? Latou taugasoa konei ne tino salasala kite paoa io me kote matagofie? Kai umiti aka latou kite maukoloa? Kai fakataaua aka loa ia latou a so se manakooga vagana kote fiafia lei ote Atua? Kafai a taugasoa konei, mo olotou fakamaoniiga katoa mo olotou galueega fakaofoofogina, e pelo, ko ai la na e ttau mo ia ate meatonu? Au e tauto kite Atua! A olotou amioga totino ko lava loa mo fai a fakamaoniiga, se fakatalitonuuga e se-mafai o fakafesiligina ki tino katoa ote lalolagi, mafai a tagata e mafaufau i olotou loto a mea funa ote Faaliiga Faka-te-Lagi. “Ka ko latou kola e amio se-tonu ko pili o iloa ate fakasalaaga e faitali mo latou! …

Mafaufau ki matulo konei ote fakamaoni e se-mafai o fakafesiligina, ko olotou faipati tonu e fakamaonia a kupu maina ote Tusi, kae katoa loa, pela mote mea ne fakamaonia ne koutou, ko oti ne tuku fakataulaga a olotou ola, olotou kope, ko olotou avaga, olotou tamaliki, olotou mea katoa loa, ke olo atu ki luga i potu tafasil ite maluga ote Palataiso. E ttau o tekegina ate fakamaoniiga a latou ko motu mai keatea kae ne tino maluga kite meatonu ote Faaliiga Matagofie tafasili ite lauiloa, kae talia a faka maseiiga kola ne folafola teke mai kite Mainaaga malifalifa tenei ne tino e seai ne olotou talitonuuga, kola moi fai se aulo ko oti ne liakina a olotou talitonu, kae ona kote pule pule ko oti ne teke atu kia Ia Tela kote Takitaki Muamua o tino katoa? Tenei, e uiloa a olotou natula ko fakaasi gina nei ki tino katoa kola ne lavea ne latou me ko latou kola e se-liakina a se mea foiitiiti loa io me se tofiga e tasi o olotou puleega se-tumau ona kote Talitonuuga mana ate Atua, e pefea ate faigata atu ote liakina ne latou a olotou ola, ko olotou kope, pela foki mo niisi mea aka pena.

Ate Tusi ate Atua e matala, ka ko Tena Muna e valo atu ki tino kia Ia. E se uke atu ite lau ote lima, ne maua e lotomalie o piki mau ki Tena Talitonuuga, io me o fai pela mene mea faigalueega mo fakamasiki aka a ia. A latou toko fia konei ne fakaekegia kite Faigalueega Faka-te-Agaaga tela e mafai, ia ia tokotasi, o fakafoliga ate aulo ki lapisi ote lalolagi, kae ko oti ne fakamaalosi o atafai ote fooga o masaki e se-mafai o see kola e pokotia ki tamaliki a tagata. E seai se tagata e mafai o maua ate ola e se-gata, sei vagana ko talia ne ia ate meatonu ote Faaliga tafasili e se-mafai o fuafuagina, e fakaofoofogina kae tafasili ite maluga.

Tuku mai a outou taliga, O taugasoa ote Atua, kite leo o Ia Tela ko oti ne fakaa-see gia ne te lalolagi, kae piki mau ki so se ma tela ka fakamaluga iei a Tena Talitonuuga. A Ia, e tonu, ka takitaki atu a so se tino tela e fiafia a Ia kiei ki Tena Auala tonu. Mea nei kote Faaliiga tela ne faulu ate maalaosi ki loto i tino seai se-maalosi, kae faka kalauna kite maumea a tino mativa.

Ise tafasili ite fakatasitasi mote agaaga tafasili ite fakataugasoa faipati fakatasi a koutou, kae fakasino a aso taaua ki outou olaaga kite atili fakaleiiga o te lalolagi mote avakaaga ote Talitonuuga a Ia Tela kote Favavau mote Nofoaiga-a-Tupu o Aliki katoa. A Ia, etonu, e fakatonu atu kia koutou tagata katoa ate mea e sao, kae fakatapu so se mea tela e fakafoliki iei ate olotou tulaga.

Ke iloa ne koe me i so se mea faiite se failoga ote faaliiga ate Atua. Taki tasi, e tusa mo tena iloa mote mafai o fai a mea, e, tumau pena, se maaka ate Mafi-Katoatoa. E pena foki mo Ia, kote Aliki tupu o tino katoa, ko oti ne finagalo ke fakaasi a Tena nofoaiga-a-tupu ite maaloo o igoa mo uiga, taki tasi kae i so se mea faiite, ko oti, mai ite galueega ate Finagalo Faka-te-Lagi, ne fai mo failoga o Tena matagofie. E salalau kae iunivesi ate faaliiga tenei tela e seai a so se mea ite iunivesi katoatoa e mafai o salagina ke maua tela e se-fakaasi mai iei a Tena matagofie taulekaleka. Mai i lalo i fakanofonofooga pena, a so se fakatauuga ote pili mai mote mao e fakaseai. … Moi fai ate paoa ote Lima Faka-te-Lagi e fakamavae mai keatea mote meaalofa tafasili ite maluga tenei ki mea faiite katoa, ate iunivesi saukatoa e seai ne mea iei kae ko masa foki.

Kilo, ite se-fuafuagina ote maluga ote Aliki tou Atua mai i luga atu o mea faiite katoa! Molimau ate afioga o Tena nofoaiga-a-tupu, ko Tena silisili, kote tafasili ite maluga a te paoa. Moi fai a mea kola ne faiite ne Ia – ke lauefa a Tena matagofie – kae fakaeke me ko fakaasiiga o Ona igoa mo uiga lei, e tu, ona kote agalelei tela e fakaekegina kia latou, e maliuga atu ite pili mai mote mao, e pefea ate maualuga atu e ttau mote Faaliiga ote Uiga Tonu Faka-te-Lagi ko oti ne fakafoliga mai? …

Talosaga faka pooko ki mea ate tino tusi tala ne tusi: “Sa ofo, manafai ate Fagasele Sili e pili mai kia au ilo au kia au loa; sa ofo ite mea tenei, ia au, e uiloa ate pili, e mao foki loa mai ia Ia.” … Mafaufau aka ki mea ate Atua ko oti ne fakaasi mai, “Matou e pili atu ki tagata iloo ate ua-ua ola o ia,” ate tino tusi tala ko oti, i ana faitioga kite kupu tenei ne fai mai, me e uiloa ate faaliiga o Taku Fagasele Sili ko ufitia i loto i toku foitino ia Ia e pili atu kia au iloo a toku ua-ua ola, kae e uiloa a toku mautinoa i te tonuuga o ia mo taku lavea i toku tulaga, au koi mao kii loa mai ia Ia. Ate uiga ote mea tenei ko tena loto, tela ko te nofoaga ote Alofa Fakamagalo-Katoatoa mote nofoaiga-faka-tupu tela e nofo iei ate taulekaleka o Tena faaliiga, e puli i tena Tufuuga, ko oti ne fano seke mai i Tena auala, ko oti ne pono a ia mai i Tena matagofie, kae ko lailai i lailaiiga o manakooga faka-te-lalolagi.

E ttau o masaua ite feitu tenei ite Atua tonu tokotasi ia Ia e fakamaluga mai i luga atu ite pili mai mote mao. Ate tonuuga e sopoia atu i fakatuakoiga pena. A Tena sokooga mo Ana meaola faiite e seai ne ana tuakoi. Ko niisi e pili mai ka ko niisi e mao e fano loa a olotou fakaasiiga ia latou loa.

Ate fatu kote nofoaga-a-tupu, tela ate Faaliiga ate Atua kote Alofa Fakamagalo-Katoatoa e nofo iei, e fai mo fakatalitonuuga ki faipatiiga a Matou kola ne fakaasi atu mai i mua. Mai iei kote kupu penei: “Ate lalolagi mote lagi e se-mafai o maua a Au; ate mea tela e ana maua Au kote fatu o ia tela e talitonu ia Au, kae fakamaoni ki Taku Talitonuuga.” E pefea ate uke o taimi ate fatu o tagata, tela kote fale nofo ote mainaaga ote Atua mote nofoaga ote faaliiga ate Alofa Fakamagalo-Katoatoa, ne fano see mai ia Ia Tela kote Kamataaga ote mainaaga mote Punaa Vai ote faaliiga tena, kote se fakalogo ote loto tela e ave keatea a ia ke mao mai ite Atua, kae atuli a ia kise koga mao mai ia Ia. A loto pena, kola e iloa ne latou a Tena Nofomai, e pili kia Ia, kae e fai pela me ko fakapilipili atu ki Tena nofoaga-a-tupu.

Mafaufau aka, ite fakafia o taimi e puli ite tagata a ia loa ia ia, ka kote Atua e tumau, mai i Tena poto aofia-katoatoa, e iloa Ana meaola faiite, kae e tumau o sulu ki luga ia ia ate mainaaga fakaasi o Tena matagofie. E iloa tonu, i feitu pena, a Ia e pili atu kia ia iloo a ia kia ia loa. A ia ka tumau pena kite se gata mai, ka kote Atua tonu e iloa a mea katoa, kae kilokilo ki mea katoa, kae malamalama foki i mea katoa, ka ko tagata e mafai o see, kae valea i mea funa kola e takato i loto ia ia. ….

Ke seai se tokotasi e mafaufau i Motou faipatiiga i mea faiite katoa ne failoga ate faaliiga ate Atua e faka uiga ite – e tapu ite Atua – tagata katoa, me ko latou ne tino lei io mene tino masei, maluga io me fatauvaa, e pau i mata ote Atua, io me e fakauiga ite Tino Faka-te-Lagi – ke fakalauefa a Tena igoa kae fakamaluga a Tena matagofie – e, i so se nofonofooga, e fakatusa ki tagata, io me e mafai, i so se auala, e sokotaki mo Ana meaola faiite. Ase mea see pena ko oti ne fai ne naai tino valea kola, ko oti ne olo atu ki lagi o olotou fakatauuga fakasupasupa, ne fakamatala ne latou ite Tafatasi Faka-te-Lagi ke uiga ki mea faiite katoa ko failoga ate Atua, kae tena la, e seai se keseega lele loa ite vaa o latou. Ko niisi tino ne mu mea atu foki a olotou fakamasakooga i failoga konei ko tino maluga kae pau ite kau fakatasi mote Atua. Ite Agalelei ote Atua! A Ia, e tonu, e tokotasi kae e Se-mafai-o-Vaevaegina; tokotasi i Tena faaliiga o uiga tonu, tokotasi i Ona uiga lei. So se mea mai i Ana tafa e seai lele manafai ko aumai mata ki mata mote malifalifa o se tasi o Ana igoa, kae e seai foki na loa se matemateega tafasili ite vaaivai o Tena matagofie – e pefea la ate faigata atu manafai ko fakafesagai mo Ia loa ia Ia!

Mai ite amiotonu o Toku Igoa, kote Alofa Fakamagalo-Katoatoa! Ate Pene ote Tafasili ite Maluga ko lu polepole ise gasuesueega tafasili ite lasi kae ko mae kii ite fakaasiiga o pati konei. E pefea ate vaaivai mote seai se taaua o se motiiga se-tumau manafai e fakatusa mo galu mo afusaga ote Vasa e se gata mai kae favavau, kae e pefea ate matagaa o so se mea e fakanaa kae galo ifo ki lalo mana aumai mata ki mata mote mea e seki faiite, kote matagofie e se-faipatigia ote Favavau! Matou e akai totuli atu kite fakamagalo agasala ate Atua, kote Maalosi-Katoatoa, mo latou ke isi ia latou ase mafaufauuga pena, kae faipati ki pati pena. Fai atu: O tino! E mafai pefea ne se manatu se- tumau fakasupasupa o fakatusa mote Ola-loa-ia-Ia, kae e mafai pefea ate Tufuuga o fakapau ki Ana meaola faiite, kola e seai aka foki na ko mataimanu o Tena Pene? E tonu, a Tena tusitusi e silia atu i mea katoa, kae fakamana mai, e se-fuafuagina mai i luga atu, i meaola faiite katoa.

E se gata iei, mafaufau ki failoga ote faaliiga ate Atua i te olotou sokotaki ite mea e tasi mo sua mea. E mafai ne te laa, tela se tasi o failoga konei, o fai pela me e pau i tulaga mote pouliga? Ate Atua tonu tokotasi e fai mo Aku molimau! E seai se tagata e mafai o talitonu, vagana a ia kola a olotou loto puapuagaa, ka ko olotou mata ko olo o fakatau-se. Fai atu: Mafaufau kia koutou loa. Aoutou mania mo mata ne vaega o outou foitino. E fai ne koutou me e pau mote taaua o latou? Kafai e fai mai koutou, me, e aoo: fai atu, na la koutou ko iloa mene tino fakaloiloi, ate Aliki, toku Atua, kote Matagofie-Katoatoa, pela manafai a koutou e kati keatea ate mea e tasi, kae fakataaua ate sua mea auaa e fakapelepele ki tou ola.

O sopoia atu i tuakoi ote tofi mote tulaga o tino loa ia ia loa, e se-saoloto. Ate malu o so se tofi mote tulaga e ttau o puipui gina. E uiga penei i so se mea faiite e ttau o kilogia ite mainaaga ote tulaga ko oti ne fakaeke atu kia koe ke nofo a koe i iei.

E ttau o masaua ite mafaufau, me kafai ate mainaaga o Toku Igoa, kote Salalau-Katoatoa, ko oti ne sulu a tena mainaaga ki luga ite iunivesi, taki tasi mo so se mea faiite ko oti, e tusa o tonu ko leva ne fai, ne fakaeke kite mafai mote iloa o exsasaisi se pokotiaaga fakapitoa, kae ne fai ke isi ia ia se uiga lei fakapitoa. Mafaufau kite pokotia ote poisini. Fakamataku kii a ia, e nofo iei ate paoa o fakagalue, mai i lalo i fakanofonofooga fakapitoa, se pokotiaaga e aogaa. Ate maalosi tela e ulu ki loto i mea faiite katoa ne pogai tonu mai ite faaliiga ote Igoa tafasili ite fakamanuiagina. Ke tapuakigina a Ia Tela kote Tufuuga o igoa katoa o uiga lei! Pei atu ki loto ite afi ate lakau ola tela ko pala kae ko maloo, kae nofo atu mai i lalo ote maluuga ote Lakau Ola lei kae lanu launiu, kae kautasi atu i fuaga lakau kaina mai iei.

A tino e nofo i aso o Faifekau ate Atua, ko oti ite taulasiiga o taimi, ne faipati ki muna e se ttau. Ko pati konei e tuku ifo ki lalo faka tafatafa i mea kola ne fakaasi i Tusi mo Tusitusiiga Tapu.

A ia se tino talitonu tonu loa ite Tafatasi ote Atua tela e laveagina ite tasi mo so se mea faiite a failoga ote faaliiga a Ia Tela kote Meatonu Favavau, kae e seai ko ia tela e taofi mai loa ite mea faiite e se kese mo Tufuuga.

Fakatau aka, ite faaliiga ote mainaaga o te Igoa ote Atua, kote Faiakoga. Kilo, i mea katoa loa a fakamaoniiga o se faaliiga pena e fakaasi mai iei, me e pefea ate lei atu o mea katoa loa e fakana kiei. Kote akoga e lua ona vaega. E tasi e iunivesi. Ko tena pokotiaaga e salalau i mea katoa kae fakatumau foki a latou. Kote pogai tenei ne puke iei ne te Atua ate fakaaloalo tenei, “Te Aliki o lalolagi katoa.” Kote sua akoga e fakasino fua kia latou kola e aumai i lalo ote maluuga ote Igoa tenei, ke salasala kite maluuga ote Faaliiga tafasili ite mafi tenei. A latou kola ne seki maua ne latou o sala kite maluuga tenei, ko fakaseai ia latou ate avanoaaga taaua tenei, kae e seai se maalosi o maua e aogaa mai i meakai faka-te-agaaga kola ne tuku ifo ki lalo mai ite agalelei faka-te-lagi o te Igoa Tafasili ite takutakua tenei. E tafasili ite lasi ote vaa tela ko oti ne vase ite tokotasi mo sua tino manafai ate veli ko sau aka ki luga, ka kote matagofie katoatoa ote itula o latou kola ko oti ne fuli atu kite Atua, kae ko oti, ite olotou alofa mo Ia, ne liakina ate lalolagi, kae ne fakaasiigina, kote foafoaaga katoatoa ko seiloa o faipati. Ate tino e talitonu mote fakamaoni ite Tafatasi ote Atua, pela mote fakamatalaga mai i mua, e lavea, ite tino talitonu mote fakamaoni mote tino e se-talitonu, a fakatalitonuuga ote faaliiga o Igoa e lua konei. Moi fai ate faaliiga tenei e tapale keatea, a mea katoa ka galo ifo ki lalo.

Fakatau aka, ise faifaiiga foki loa pena, ate faaliiga ote mainaaga ote Igoa ote Atua. Kote Se-Mafai-o-Fakatusa. Kilo, ite mainaaga tenei ne pulou ne ia ate foafoaaga kaatoa, me ne pefea a mea taki tasi konei e fakaasi mai a failoga o Tena Tafatasi, e molimau kite tina mea tonu o Ia Tela kote Meatonu Favavau, e folafola atu a Tena nofoaiga-a-tupu, Tena tafatasi, mo Tena paoa. Ate faaliiga tenei se fakaasiiga o Tena alofa-fakamagalo ko oti ne siomia i mea faiite katoa. Latou kola ko oti ne kau fakatasi mo Ia, e seiloa ne latou a se faaliiga penei, kae e seiloa ne latou ate Talitonuuga tela e mafai ne latou o fakapilipili atu kiei, kae fusi tasi mo Ia. Molimau a tino kese kese mo itukaaiga ote lalolagi e fai mo molimau ki Tena fakatasitasi, kae e lavea ne latou a Tena tafatasi. Kae mo failoga ote Tafatasi ote Atua i loto ia latou, e see mafai lele ne latou o fakataaua ate meatonu o fai:: “E seai aka foki se Atua na kote Atua.” Kae uiloa, fakatau aka me pefea ate tafasili ote see o latou, kae olo seke mai i Tena auala. Pela loa mote fakatamala o latou o lavea ate Tupu Fakaasiigina, ko gata ia latou o lau i vasia o latou kola e mafai o fai pela me ko tino talitonu tonu ite Tafatasi ote Atua.

Ate fakasiiga tenei ote faaliiga ote Tino Faka-te-Lagi ia latou kola ne kautasi mo Ia e mafai, o fakatau pela me ne fakafokiiga mai ote matagofie tela ko latou fakamaoni ne fakamainagina. E seai, e ana maua o maina ite meatonu tenei vagana ko tagata ne fakafonu kite iloa. Latou kola ko oti ne lavea tonu ate Tafatasi ote Atua e ttau mo latou o taku me ko fakaasiiga muamua loa ote Igoa tenei. Ko latou ne inu ite uaina ote Tafatasi Faka-te-Lagi mai ite ipu tela ate lima ote Atua ko oti ne tuku atu kia latou, ko latou kola ko oti ne fuli a olotou mata kia Ia. E pefea ate lauefa ote mao ote mavaeega mai i tino mana konei mai i tagata kola ko oko loa ate mao keatea mai ite Atua! …

Talia mai te Atua, i se kilo tafasili ite matakite, ko koe ke mafai o lavea, i mea katoa, ko failoga ote faaliiga a Ia Tela kote Tupu ote Favavau, kae ke lavea ate maluga mote mana mai ite foafoaaga kaatoa kote tafasili ite mana mote malu ate Tino. Tenei, ite tonuuga, kote aka fakavae mote kanoloto ote talitonu ite fakatasitasi mote tokotasi ote Atua. “Ate Atua e tokotasi; ne seai aka foki i tafa o Ia.” A Ia, nei, ko Ia loa mai i ana mua. E seai aka foki se Atua na ko Ia, kote Tokotasi, kote Se-Mafai-o-Fakatusagina, kote Mafi-Katoatoa, kote Tafasili ite Maluga, kote Tafasili ite Takutakua.

Kae nei e uiga mo tau mau kite isi o Atua e lua. Faeteete, faeteete, ia koe mana lou atu o kau fakatasi mo te Aliki, tou Atua. A Ia, ko oti mai loa ite favavau, e tokotasi kae seai aka foki, e seai e fakatusa io me e fakapau kia Ia, favavau mai i anamua, favavau kite taimi mai i mua, e motu keatea mai i mea katoa, e tumau favavau, e se-mafulifuli, kae e ola loa-ia-Ia. E seai ne tofi ne Ia mo fai a Tena feasoasoani i Tena Maaloo, e seai se kaunisela o akoako a Ia, e seai ke fakatusa a Ia kiei, e seai e fakataufai atu ki Tena matagofie. Ki so se atomu ote iunivesi e fai mo molimau, kae mai i tua atu o tino o lalolagi mai i luga, latou kola e nofo i nofoaga maluga, ako olotou igoa e masauagia i mua ote Nofoaga-a-Tupu ote Matagofie.

Ke fai koe mo molimau i tou kano loto kite fakamaoniiga ate Atua ko oti ia Ia kae mo Ia ne folafola atu, me e seai aka foki se Atua na ko Ia, ko mea katoa mai i Ana tafa ko oti ne faiite i Tena fakatonuuga, ko oti ne fakafoliga mai ite talia ne Ia, kae e nofo katoa i lalo o Tena tulafono, pela me se mea ko puli manafai e fakatusa ki fakamaoniiga matagofie o Tena tafatasi, pela loa mene seai manafai ko aumai mata ki mata mote faaliiga tafasili ite mafi o Tena fakatasitasi.

A Ia, ite tonuuga, ko oti, salalau ite favavau, kote tasi o Tena Faaliiga, te tokotasi i Ona uiga fai, kote tokotasi i Ana galueega. So se fakatusaaga taki tasi katoa e ttau fua ki Ana meaola faiite, ka ko mafuaaga kamata katoa ea latou fakapitoa kola ne galue tavini mo Ia. E se-fuafuagina ite maluga atu a Tena Uiga Tonu mai i luga o fakamatalaaga o Ana meaola faiite. A Ia, tokotasi, e nofo ite Nofoaga takutakua ote afioga, ote tafasili ite maluga mote matagofie e se-mafai o okogina. A manueva o loto o tagata, e ui iai, e pefea ate maluga ote olotou lele, e se-mafai lele o fakamoemoe ke maua ne latou o oko atu ki koga maluga o Tena Faaliiga Tonu e se-mafai o iloa. Ko Ia Tela ne kalaga atu kite foafoaaga kaatoa, Tela ne pogai kiei a mea faiite taki tasi katoa ke lele mai i Tena fakatonuuga. E mafai la, nete mea tela ne fanau ona kote muna tela a Tena Pene ne fakaasi ne ia, kae tela ate maikao o Tena Finagalo ne fakatonu mai, ke fakatautau me se tino e tu tasi mo Ia, io me se ata fua o Ia loa ia Ia? E mao kii mai i Tena matagofie mo se pene a se tagata io me se laulaufaiva e mafai o fakasino ki Tena mealilo, io me kotefatu o tagata e fakamafua mai iei Tena Uiga Tonu. A mea katoa mai i tafa o Ia e mativa kae fakaalofa i Tena mataloa, katoa e seai se maalosi i mua ote takutakua o Tena mafi, katoa ne pologa i Tena Maaloo. A Ia e lava ate maumea o fakasoasoa atu ki meaola faiite katoa.

Ate saiiga ote auaauna atu ne fakatuu ite vaa ote tino tapuaki mote Tokotasi e tapuakigina, ite vaa ote meaola mote Tufuuga, e ttau o fai pela me se failoga o Tena matagofie alofa ki tagata, kae e seai se failoga e tauii atu ki mea a latou e nofo mo latou. Kite mea tenei e fai mo fakamaoniiga ki so se tino talitonu tonu kae matakite.

Ke iloa ne koe me, e tusa mote mea a tou Aliki, kote Aliki o tagata katoa, ko oti ne fakatonu i Tena Tusi, a alofaaga ne tuku mai ne Ia kite saofiaaga o tino ko oti, kae ka tumau pena, o seai se gataaga ite lauefa o latou. Ate mea muamua ite vaasia o alofaaga kona, tela ate Mafi-Katoatoa ko oti ne fakaeke ki luga i tagata, kote meaalofa ote iloa. A Tena pogai ite tuku mai a se meaalofa pena e seai aka foki na kote mea ke mafai ne Ana meaola faiite o iloa kae lavea ate Atua tonu tokotasi – ke maluga a Tena matagofie. Ate meaalofa tenei ki tagata e aumai iei ate paoa o lavea ate meatonu i mea katoa, kae taaki atu a ia kite mea e tonu, tela e feasoasoani kia ia ke maua a mea funa ote foafoaaga. Kote lua i tulaga, kote paoa o lavea, kote mea faigalueega fakapitoa e mafai iei a tena iloa o galue. Kote atamai o lagona, ote loto, mo tulaga pena, e ttau foki o fakatau i vasia o mealofa kola ne fakaekegina kite foitino tagata. E se-mafai o fuafuagina ate maluga kote Mafi-Katoatoa Tela ne faiite a paoa konei, kae fakaasi atu kia latou ite foitino o tagata.

Ko meaalofa taki tasi konei se fakamaoniiga seai se falotoloto-lua ote afioga, kote paoa, mote silisili, kote poto aofia ote Atua tonu tokotasi – ke maluga a Tena matagofie. Mafaufau kite atamai ote fakalogo. Molimau a tena paoa ko oti ne salalau a ia ki luga ite foitino o tagata kaatoa. Kae e uiloa ate mafai mote iloa ote lavea mote lagona e nofo ise koga fakapitoa ite senta, ate atamai ote lagona e aofia iei ate foitono o tagata kaatoa. Ke tapuakigina a Tena paoa, kae fakalauefagina a Tena nofoaiga-a-tupu!

A meaalofa konei e nofo tumau i loto i tagata. Ate mea tela e tomua kae tafasill ite taaua mai luga i niisi meaalofa aka katoa, e fakaaloalo a tena natula, kae e soko kite Atua, kote meaalofa ote Faaliiga Faka-te-Lagi. So se alofa foai e tuku mai ki luga ite tagata ne te Tufuuga, me se koloa, io me e faka-te-agaaga, e tautua kite mea tenei. A ia, ite tonuuga, ka tumau pena, kote Falaoa tela e tuku ifo ki lalo mai ite Lagi. Kote fakamaoniiga tafasili ite maluga ate Atua, ko fakamaoniiga maina o Tena meatonu, ko failoga ote katoatoa o tena foai-alofa, ko failoga ote aofiaaga-katoatoa o Tena alofa-fakamagalo, ko fakatalitonuuga ote atamai o Tena alofa, kote maaka ote katoatoa o Tena agalelei. A Ia ko oti, e tonu, ne kautasi ite meaalofa ate Atua tafasili ite maluga tela ko oti ne lavea a Tena Faifekau ite Aso tenei.

Avatu a fakafetai ki tou Aliki auaa ne aumai kia koe a se fakamanuiiaga tafasili ite takutakua penei. Sau aka a tou leo kae fai atu: Tavaeega katoa ke ia Koe, O ko Koe, kote Manakooga o so se loto malamalama!

Ate Pene ote Tafasili ite Maluga e se-gata ate kalaaga; kae e ui iai, e toko fia kola ne tuku mai a olotou taliga ki tena leo! A latou e nofo ite maaloo o igoa ko saga ifo loa o teu fakagaligali a latou ite lalolagi, kae e ouli ia latou i so se tagata tela e iai ana mata o lavea mo taliga o lagona e se-mafai o lavea ate se-tumau o kala o ia.

A se olaaga fou, ite tupulaga nei, e gasuesue i loto i tino katoa ote lalolagi; kae e ui iai e seai se tino ko oti ne maua a te pogai io me e lavea me e kaiaa e fai pela. Mafaufau ki tino o Sisifo. Molimau ite olotou salasala kite mea e seai se aogaa kae e fatauva, ne ofomate, kae koi ofomate loa nei, a ola e se-maua o laugia ona kote fakatuuga mote avakaaga. A tino o Pelesia, i sua feitu, eui iai kote fale-tausi o se Faaliiga tafasili ite maina mote malifalifa, ate matagofie o tena maualuga mote takutakua ko oti ne siomia iei ate lalolagi kaatoa, ko loto vaaivai kae apulu ite pookooga ote paiee.

O taugasoa! Sa fakatamala i mea lelei kola ko oti ne fakaeke atu ki luga ia koutou, io me e puli ia koutou a tulaga maluga ote koga e oko koutou kiei. Sa faigia ko outou galuega ke maumau mai i mafaufauga e seai ne aogaa kola a niisi o loto kooti ne faiite ne latou. A koutou ko fetu ote lagi ote malamalama, kote matagi ili malielie tela e gasuesue i tafa o ata, kote vai tafe malielie e fakana kiei ate ola o tagata, ko mataitusi e tusi i luga i Tena tusi mana. Mote tafatasi katoatoa, kae ite agaaga o se fakataugasoa tonu, galue a koutou, ko koutou ke fakamafai o maua ate mea tela e ttau ite Aso nei ote Atua. E tonu Au e fai atu, ate fai taua mote faka kinau, mo so se me aka ate mafaufau o tagata e se-fiafia kiai tafasili ite se-taaua ki tena tulaga. Fakatonu a outou maalosi kite talaiiga ote Talitonuuga ate Atua. So se tino e ttau ise tulaga maluga pena, ke tu a ia ki luga kae avaka ki luga. A ia tela e se kafi ne ia, ko tena tiute o tofi a ia tela e mafai, o sui a ia, o fakasalalau ate Faaliiga tenei, tela a tena paoa ne fai ne ia a foitino fale tafasilo ite maalosi ke gasue polepole, so se mauga ke malepelepe kite pefu, mo so se agaaga ola ke seai se leo. Kafai ate takutaku ote Aso tenei e fakaasi atu i tena katoatoaaga, so se tagata taki toko tasi ka liakina a olotou ola e se lausia i tena naunau o kautasi, e uiloa ise taimi foliki fua, i tena matagofie takutakua – te fea la ate lalolagi tenei mo ana kope taaua faitogafiti!

Ke takitaki koutou ne te atamai i outou mea e fai, kae piki mautakitaki a koutou kiei. Fakamolemole ate Atua ko koutou ke mafai o faka maalosi o fai ate Finagalo ote Atua, kae ke mafai o feasoasoanigia a koutou o fakataaua ate tulaga ne fakaeke atu ki luga i Ana fagasele kola ne tu ki luga o galue tavini a Ia kae fakalauefa a Tena igoa. Ki luga ia latou ke iai ate matagofie ote Atua, kote matagofie o latou kola i lagi mo latou kola i luga ite lalolagi, pela foki mote matagofie o Tino ite Palataiso tafasili ite maluga, kote lagi o lagi.

Mafaufau ki manatu faletonu i o latou kola ne fusi tasi mote Atua ko oti ne suki ki loto o tagata ite fenua tenei. “ Ea e mafai loa,” e sili a latou, “mote aulo o fuli kite koppa?” Fai atu, Ao, ona ko toku Aliki, e mafai. Ko tena mea funa, e nofo funa ite Omotou poto. Matou ka fakaasi atu kia koutou kola e loto Matou kiei. So se tino tela e faletonu ne ia ate Omotou paoa, fai kiei ke sili kite Aliki tena Atua, kote mea ke fakaasi mai ne Ia kia ia ate mea funa, kae fakapatonu atu kia ia ate meatonu. Ite koppa e mafai o fuli kite aulo se fakatalitonuuga ia ia loa e lava ite aulo e mafai, o fuli kite koppa, manafai a latou e mafai o maua ate mea tonu tenei. A so se minelale e mafai o fai ke maua ne ia ate mafa, foliiga mote foitino o so se tasi aka o niisi minelale. Ate poto tena e nofo mo Matou ite Tusi Funa.

Fai atu: O takitaki o tapuakiiga! Sa fuagina ate Tusi ate Atua ki fuafuaaga mo saienisi kona e fakaaogaa ite vaasia o koutou, auaa ite Tusi kote paleni ne fakatuu ite vasia o tagata. Ite paleni tafasili ite tonu tenei so se mea a tino mo itu-kaaiga ote lalolagi e nofo mo latou e ttau o fuafua, ka kote fua o tena mafa e ttau o toofo e tusa mo tena tulaga, e mata e seiloa ne koutou.

Ate mata o Toku alofa-kaimalie e tagi fanoanoa i luga ia koe, ona ko koutou ne fakatamala o lavea ate Tokotasi i luga Tela ne kalagina ne koutou ite ao mote po, pela foki afiafi mote taeao. Olo kia mua, O tino, mo mata e lanu masinasina mo loto malifalifa, kite Laukele ulaula, i loto iei ate Sadratu’l-Muntahá e kalaga: “E tonu, e seai aka foki se Atua i Oku tafa, kote Puipui Maalosi Katoatoa, kote Ola-loa-ia-Ia!”

O koutou takitaki o tapuakiiga! Ko ai ate tagata ite vasia o koutou e mafai o fakatau mai kia Au ite fai faaliiga mote malamalama? E maua i fea a tela e toa o fai mai ia ia ko Toku fakapau ite faipati mote atamai? Ikai, ona ko Toku Aliki, kote Alofa Fakamagalo-Katoatoa! Katoa i luga ite lalolagi, e aumai o pasia; kae e tenei a mata o tou Aliki, kote Mafi-Katoatoa, kote Fagasele Sili.

Matou ko oti ne fakatonu, O tino, kote tafasili ite maluga mote toe fakaotiiga o tauloto katoa kote lavea o Ia Tela kote Fakamoemoeega o poto katoa; kae e ui iai, kilo aka me ne fakasaoloto pefea ate outou tauloto ke ponogia a koe keatea, pela me se veli, mai ia Ia Tela kote Punaa Aso ote Mainaaga tenei, auala ia Ia Tena a so se mea funa ko oti ne fakaasi. Ea e se maua ne koutou ate kamataaga ne fakapula atu ate matagofie kese o te faipatiiga, ko oti a koutou ne liakina a tino ote lalolagi mo mea katoa e nofo mo latou, kae fakapilipili mai kite Nofoaga tafasili ite fakamanuiagina tenei.

Fai atu: Tenei, e tonu, kote lagi tela ate Matua o Tusi ne tausigia, e se malamalama a koutou iei. A Ia Tela ne pogai kiei ate Kaupapa ko pakalaga atu, ka kote Vao Foliki Kaa ke avaka a tena leo, i luga ite Mauga mai i luga atu ite Fenua Tapu, kae folafola atu: “Ate Maaloo io te Atua, kote Aliki silisili katoa, kote Maalosi-Katoatoa, kote Alofa!”

Matou e seki olo kise akoga, io mene faitau i ne tusitusiiga a koutou, Tuku mai a outou taliga ki pati ote Tokotasi tenei e seki akoga, tela ne kami atu a koutou ne Ia kite Atua, kote Fakatuanaki Favavau, E lei atu mo koe tenei iloo a koloa taaua katoa ote lalolagi, e se malamalama a koutou iei.

Ate maalosi ote talitonu o tagata ite Atua ko gasolosolo o mate i so se fenua; e seai se mea e foliki ifo i Tena vailakau fakalei masaki e ana maua o fakafoki mai. Ate palaaga ote seai se-faka-atua ko kai ki loto i feitu taaua ote sosaieti o tagata; se aa aka foki na kote Vailakau Maalosi fakalei masaki (Elixir) o Tena Faaliiga maalosi e mafai o fulu ke maa kae toe fakaola iei. Ei loto ite paoa o tagata, O Hakím, o fai a vaega kesekese o so se mea tafasili ite foitiiti kae e se-mafai o vaevaegia kote mea ke katoatoa ate fuliiga ke mafai o fuligia ite aulo tafasili ite piua? E fakanumi kae faigata e lavea atu, ka kote galuega e tafaga atu ite faigata kote fuliiga ote maalosi faka-satani kite paoa faka-te-lagi se tasi tela a Matou ko oti ne fakamalosi mai ke fakataunu. Ate Maalosi e mafai ise fakamafuliiga e silia atu ite mafi ote Vailakau Maalosi Fakalei masaki. Ate Muna ate Atua, ia ia loa, e mafai o fai ate tafasili ite fakamatea ote fakeekegina ite iloa mote mafai o fai a mea tela e manakogina ise mafuliiga tafaisili ite takutakua kae faigata penei.

Ate leo ote Mesentia Faka-te-Lagi, e fanatu mai ite nofoga-a-tupu ote Atua, e folafola atu: O koutou Aku tino fagasele! Sa faigia ate kapa o Toku gatu muna ke pisia pikigia ne mea ote lalolagi tenei, kae se-tautali i musumusuuga o ou manakooga leaga kae inosia. Ate Fetu Ao o te Faaliiga Faka-te-Lagi, tela e sulu maina ite katoatoa o tena matagofie ite lagi o te Falepuipui tenei, e fai mo Aku molimau. Latou ko olotou loto e fuli ki mua ia Ia Tela kote Pogai ote ifooga ote foaofoaaga saukatoa e ttau, ite Aso tenei, o pasia mai i tua atu kae ke fakamana mai i mea faiite katoa, lavea mote se-lavea. Kafai latou e tu ki luga o talai a Taku Talitonuuga, a latou e ttau o fakasaoloto ate manavaaga o Ia Tela kote Se-Mafai-o-Taofigia, o fakagasue a latou kae e ttau o tufatufa ki tua atu ite lalolagi mo taumafaiiga maluga, mo mafaufau kola e tuku katoatoa loa kia Ia, mo loto kola e motu lele loa keatea kae tu-saoloto mai i mea katoa, pela foki mo agaaga ola kola e fakamana mai ite lalolagi mo olotou mitamitaaga. E ttau mo latou o filifili me kote toe uta tafasili ite lei mote olotou malaga kote fakanaa ki luga ite Atua, kae ke fakakafu a latou kite alofa ote olotou Aliki, kote Tafasili ite Maluga, kote Matagofie-Katoatoa. Kafai a latou e fai pena, a olotou pati ka pokotia iei a olotou tino fakalogologo.

E uiga kese, kae e takutakua ate uiga kese, ate vaa tela e motu a Matou mai ia latou kola, ite Aso tenei, e saga ki olotou finafinauga leaga, kae ko oti ne fakatonu a olotou fakamoemoeega ki mea ote lalolagi mo ona matagofie e se-tumau! E uke a taimi ate koga-nofo ote Alofa Fakamagalo-Katoatoa kite kilo mai i tua e seai lele loa ne maukoloa ote lalolagi nei i latou kola e nofo pili kia Ia ne pokotia mai i fakalavelave. E uiloa a tigaina o latou, ate Pene ate Tafasili ite Maluga ko oti, e seai aka se taimi, ne lotomalie o fakasino, io mese fakasinooga foliki kii loa, ki mea ote lalolagi nei mo ana kope taaua. Kae kafai, i sose taimi, a so se mealofa e tuku atu kia Ia, ate meaalofa tena ne talia pela me se failoga o Tena agalelei kia ia tela ne tuku ne ia ate meaalofa. Kafai e fakafiafia kia Matou o faka-aogaa a Omotou kope taaua katoa ote lalolagi, e seai se saolotooga o se tino o fakafesiligina ate Omotou pule, io me o fakafesiligina ate Motou saolotooga. E faigata o mafaufaugina se uiga e silia atu ite fakamaa kote akai, ite igoa ote Atua tonu tokotasi, a maumea kola e nofo mo tagata.

E ttau mo koe, pela foki mo taugasoa o Ia Tela kote Meatonu Favavau, o kami atu a tagata katoa ki so se mea e fakamana iei a latou mai i kopikopiaaga katoa o mea ote lalolagi, kae fakaseai mai ia latou mai i ona lailaiiga, kote manogi suamalie ote gatu ote Matagofie-Katoatoa ke mafai o sogigina ne latou kola e alofa kia Ia.

Latou kola e iai ia latou a maukoloa, e ttau o isi ia latou ate atafai ki tino mativa, auaa e maluga ate fakaaloalo e fakasino ne te Atua mo latou kona mativa kola e mautakitaki ite onosai. I Toku Ola! E seai se fakaaloalogina, vagana kote mea e fiafia ate Atua o fakaeke, tela e mafai o fakatusa kite fakaaloalo tenei. E takutakua ate fakamanuiaaga e faitali ki tino mativa kola e kolomaki mote onosai kae funa a olotou puapuagaa, kae e lei mo ia maumea tela ne fakaeke a olotou maumea ki luga i tino fatauvaa kae fakasilisili gina a latou mai ia latou loa.

Fakamaolemole kite Atua, a tino mativa e mafai o galue kae taumafai o ola loa ia latou. Mea nei se tiute, tela ite Faaliiga tafasili ite takutakua tenei, ko oti ne tusi ki so se tino, kae e lau i mua ote Atua me se amioga lei. So se tino tela e tautali ite tiute tenei, ate feasoasoani ote Tokotasi e se-lavea ka iloa tonu loa e feasoasoani atu kia ia. E mafai ne Ia o fakamaumea a ia, auala mai i Tena agalelei, so se tino tela a Ia e fiafia kiei. A Ia, e tonu, e isi ate paoa i luga i mea katoa….

Fai atu, O ‘Alí, a fagasele ate Atua ate fakapau kote fakavae tafasili ite takutakua i vasia o uiga lei o tagata. Ate iloiloaga o mea katoa e ttau o fakana ki luga iei. Mafaufau kise taimi i puapuagaa mo pokotiaaga konei ne feagai mote Pagota tenei. A ko oti, i aso o Toku olaaga, ne i lima ote alofa tauanoa o Oku fili, kae ne tigaina i aso taki tasi, ite auala ote alofa ote Atua, se fakalavelave fou. Au ne kolomaki mote onosai ke oko kite taimi ate lauiloa ote Talitonuuuga ate Atua ko oti ne folafola i tua atu ote lalolagi. Kafai se tino e tu aka nei ki luga, e fakamaalosigina ne mafaufauuga o tena loto e seai ne aogaa, e taumafai io me e funa, o toki a tega ote faka kinau i vasia o tagata – e mafai a se tagata pena o fai aka ia ia ne fai mote fakapau? Ikaai, mai ia Ia a Tena mafi e fakaloa atu i luga i mea katoa! I Toku ola! A Toku loto e gologolo a ko oku mata e tagi fanoanoa ona kote Talitonuuga ate Atua pela foki mo latou kola e se-malamalama i pati a latou e fai kae mafaufau a la ki mea e se-maua ne latou o maina iei.

E ttau mo tagata katoa, ite Aso tenei, o puke mau kite Igoa Tafasili ite Takutakua, o fakatu ate kau fakatasitasi o tino katoa. E seai se koga e tele kiei, e seai se lafiiga mo so se tino o sala kiei vagana ko Ia. Kafai se tagata e fai ne ia ne pati penei ka ala iei o fuli keatea a tino mai i matafaga ote vasa e seai ne tuakoi ote Atua, kae fai a latou ke piki olotou loto ki so se mea vagana kote Tino matagofie kae laveagina tenei, tela ko oti ne fakafoliiga ki se foitino tagata e fakatapulagina - a se tino pena, me e pefea ate maluga o te tulaga e nofo a ia iei, ka fakatauemugina nete foafoaaga katoatoa me se tasi e galo ia ia ate manogi suamalie ote Alofa Fakamagalo-Katoatoa.

Fai atu: tautali kite fakapau i outou fakamasinooga, koutou tagata ote loto malamalama! A ia tela e se fai meatonu tena fakamasinooga e seai lele loa ia ia a uiga kola e fakamatea fakaatea a tulaga ote tagata. A Ia Tela kote Meatonu Favavau e iloa fakalei mea e funa i fatafata o tagata. Ko Tena onosai ne fakamaalosi Ana meaola faiite, auaa vagana ate taimi ne tusia ko oko mai ka ofa ne Ia ki lalo a veli. Ate alofa fakamagalo fakapoi ko oti ne taofi ate makini o Tena sauaa, kae fai ate taulasiiga o tino ke mafaufau ite Atua tonu tokotasi e seiloa a mea ko oti ne fai ne latou. Mai ia Ia Tela kote Iloa-Katoatoa, kote Fakailoa-Katoatoa! Ate kilo o Tena poto e pei fakafoki mai iei, mote fakapitoa katoatoa, ate tonugisi mote fakamaoni, a mea fai a tagata. Fai atu: Tavaeega kia Koe, O Koe kote Funa o agasala o latou vaaivai mo latou fatauvaa! Ke fakalasi a Tou igoa, O Koe tela e fakamagalo a latou e se-fakalogo kola e sopoia o teke atu kia Koe!

Matou ko oti ne fakatapu a tagata ke sasale i mafaufauuga o olotou loto, kote mea ke fakamafai ke lavea a Ia Tela kote Kamataaga silisili mote Fakamoemoeega o poto katoa, kae e mafai o fakataaua a so se mea a Ia e fiafia o fakaasi. Molimau ate faka-fiifi ne latou a latou ki manatu fakasupasupa ko mafaufauuga e seai ne aogaa. Mai i Toku ola! A latou ko tino e taia ona ko mea foki a olotou loto ne faiite, ake e ui iai e se-lavea ne latou. E seai se aogaa kae e seai foki se mea e maua mai iei ko faipatiiga a olotou laugutu, kae e ui iai e se-malamalama a latou iei.

E akai totuli Matou kite Atua ke mafai ne Ia o talia mai mote agalelei a Tena alofa ki tagata katoa, kae ke faka-mafai a latou o maua ate poto o Ia mo latou foki. Mai i Toku ola! So se tino tela e iloa a Ia ka lele iloto ite pookoga o Tena alofa, kae ka motu a ia keatea mai ite lalolagi mo mea katoa kola iei. E seai se mea i luga ite lalolagi e mafai o fai ke seke a ia mai i tena auala, kae e pefea atu ate faigata o se tino tela, fakamalosigina ne ona mafaufauuga seai se aogaa, o faipati ki mea kola ko oti ne fakatapu ne te Atua.

Fai atu: Tenei ate Aso e ttau mo taliga taki tasi katoa o fakalogo fakalei ki Tena leo. Tuku a outou taliga kite Kalaga ate Tokotasi ne fakase-gina, kae fakalasi ne koutou ate igoa ote Atua tonu tokotasi, kae fakalakei a koutou ki mea fakagaligali o Tena masaua, kae fakamaina a outou loto kite molii o Tena alofa. Mea nei kote kii tela e tala a loto o tagata, ate polisi tela e fulumaa a agaaga ola o tino katoa. A ia tela e fakatamala i mea ko oti ne ligi ifo mai ite maikao ote Finagalo ote Atua e ola ite see e fakaasigina. Kote fealofani mote amio fakamaoni, iloo ate faka kinau mote amio fai togafiti, ko maaka ote fatuatua tonu.

Folafola atu ki tagata ate mea a Ia, Tela e faipati kite meatonu kae kote Tino Kave ote Fakatalitonuuga ate Atua, ko oti ne fakatonu atu kia koe ke tautali kiei. A Toku matagofie ke ia koe, O ko koe tela ne kalaga mai ki Toku igoa, kola ana mata e fuli ki mua i Toku koga nofo, kae ko tena laulaufaiva e tavili a tavaeega o tou Aliki, kote Agalelei.

Ate pogai e fakavae kiei a faaliiga o so se tusi faka-te-lagi, e tonu, so se kupu ne fakaasi mai faka-te-lagi, kote mea ke fakauta a tagata katoa kite amio tonu mote malamalama, kote filemu mote nofo toka ke mafai o fakamau maalosi loa i vasia o tagata. So se mea tela e faulu ate fakapatonu ki loto o tagata, so se mea tela e fakamaluga iei ate olotou tulaga io me e avaka iei ate olotou fiafia, e talia i mata ote Atua. E uiga kese ate maualuga ote tulaga ote tagata, manafai e filifili a ia o fakataunu a te koga e oko a ia kiei, e mafai o maua! E pefea ate pooko ote fakamasei e mafai ne ia o apulu ki lalo, pooko kola ko meaola faiite tafasili ite kaiuu e seki oko aka loa kiei! Pukegina, O taugasoa, ate avanoaaga e tuku atu ne te Aso tenei, kae sa fakaseaigina a koutou mai ite maligi ifo kaimalie o Tena agalelei. Au e akai totuli kite Atua ke mafai ne Ia mote kaimalie o fakamafai aka ko so se tino ia koutou ke lakeigina a ia, ite Aso fakamanuiagina tenei, ki amioga piua kae mana. A Ia, e tonu, e fai a so se mea e finagalo a Ia kiei.

Fakalogo a tou taliga, O tino, ki mea kola, Au, ite tonuuga, e fai atu kia koe. Kote Atua tonu tokotasi, e maluga a Tena matagofie, ko leva ne fakatau pena, kae ka tumau o fakatau pena, i loto o tagata ko Ana mea loa ia Ia. Ko Ana kope totino. Mea katoa, faitalia me ite laufenua io me kote tai, faitalia me e maukola io me e matagofie, ko oti ne tuku ne Ia ki Tupu mo takitaki ote lalolagi. Mai ite kamataga a fuka e folafola atu a pati konei “A ia e fai so se mea e finagalo a Ia kiei” ko agiagi mai i tena gali katoatoa i mua o Tena Faifekau. Ate mea e manakomia ne tino ite aso tenei kote fakalogo kia latou kola e pule pule, kae tautali mote fakamaoni ki kafaanoa ote atamai. A mea fai galueega kola e taaua kite puipuiiga fakavave, kote nofo toka mote fakapatonu ote lanu o tagata ko oti ne fakaeke ki lima kae e puke, o kovana ote sosaieti o tagata. Mea na kote manakooga ote Atua mo Tena fakatonuuga… E fakataaua ia Matou ite fakamoemoe me ka isi se tasi o tupu ote lalolagi, ona kote suafa ote Atua, ka tu ki luga kite manumaaloo ote faka-see-gina konei, ko tino puapuagaa konei. Se tupu pena aka sisi ki luga kite favavau kae tavaegina. Ate Atua ko oti ne tusi mai ki tino konei ate tiute o feasoasoani mai i sose mea e mafai o feasoasoani kia latou, o galue tavini ki manakooga taaua o ia, kae fakaasi atiu kia ia ate olotou fakatuanaki favavau. Latou kola e tautali mai kia Au e ttau o taumafai, i taimi katoa, o avaka ki luga ate nofo lei o so se tino tela e tu ki luga kite manumaaloo o Taku Talitonuuga, kae i taimi katoa e ttau o fakatalitonu ate olotou fakatuanaki mote fakamaoni kia ia. Fiafia ate tagata tela e fakalogo kae tautali ki Aku apoapoaiiiga. Faka fanoanoa kia ia tela e fakatamala o fakataunu a Toku manakooga.

Ate Atua ko oti, auala mai i Tena laulaufaiva ne folafola atu ate meatonu, fakamaoni i Ana Tapeleti katoa ki pati konei: “Au ko Ia tela e ola ite Maaloo o Abhá Mamaalu.”

Ona kote amiotonu ote Atua! A Ia, mai ite tulaga ite tumu ote tafasili ite maluga, mana, mafi kae se-fakatusagina, e saala ki mea katoa, lagona a mea katoa, kae ite itula tenei, e folafola atu penei: Fakamanuia a koe, O Javád, ona a koe ko oti ne taunu atu kite koga e seai aka foki se tagata ko oti ne taunu kiei mai i ou mua. Au e tauto ia Ia Tela kote Meatonu Favavau! Mai tino e nofo ite Palataiso Maluga ko mata o latou ko faka fiafiagina. Kae e ui iai, a tino, ko seai lele loa se fakalogo. Moi fai ne fakaasi ne Matou a tou tulaga, a loto o tagata ko polepole, a olotou lagaavae ka mole, ko fakagaligaliiga ote fakamatamata ko seiloa of faipati, ka siga ki lalo ite laukele, kae ka velo a maikao ote se-fakalogo ki olotou taliga, ona kote mataku ia latou mana lagonagina.

Sa fanoanoa a koe ia latou kola ne saga ki mea ote lalolagi nei, kae ko puli o masaua ia latou ate Atua, kote Tafasili ite Takutakua. Ona ko Ia Tela kote Meatonu Favavau! Ate aso ko pilipili mai kote toasa ote Mafi-Katoatoa ka oko kia latou. A Ia, e tonu, kote Maalosi-Silisili, kote Manumaaloo-Katoatoa, kote Maalosi-Katoatoa, A Ia ka fulu maa ate lalolagi mai i lailaiiga o olotou faitogafiti, kae ka tuku atu pela me se kope tausi taaua ki Ana tavini kola e pili kia Ia.

Fai atu: O tino! A pefu e fakafonu iei a outou gutu, ka ko lefu e fakakivi iei a outou mata, ona ne fakatau atu ne koutou a Iosefa Faka-te-Agaaga ki se togi tafasili ite malalo. Oi, kote puapuagaa tela e nofo i luga ia koutou, koutou ko galo mao atu! Kai fuafua aka i outou loto ia koutou e nofo mote paoa o faka-takavale a Ia mo Tena Talitonuuga? Mao mai iei! Kite mea tenei a Ia, ia Ia loa, kote Maalosi-Katoatoa, kote Tafasili ite Maluga, kote Tafasili ite Takutakua, e fai mo fakamaoniiga.

Ko pili mai ko fakalogaa aTena aoaoaiiga ka tukituki atu ki luga ia koutou, ka kote pefu o seoli ka siomia ia koutou. Ko tagata kona kola, ko oti ne fakaputu ne latou a mitamitaaga mo mea valevale ote lalolagi, ko fuli keatea fakatauemu mai ite Atua – a latou konei ko galo ite lalolagi tenei mote sua lalolagi. Ko pilipili mai, ate Atua, mote Lima ote Maalosi, ka ave keatea mai ia latou a olotou kope, kae fakapei a latou kite gatu o Tena maukoloa. Kite mea tenei ko latou foki loa ka molimau ise taimi pili mai. A koutou foki ka fai mo molimau.

Fai atu: O tino! Sa faigia ate olaaga nei mo ona mea pelo o fakaloiloi a koutou, auaa ite lalolagi mo mea katoa iei e puke mau i lima o Tena finagalo. E tuku mai a Ana alofaaga ki so se tino e loto a Ia kiei, kae mai i so se tino e loto a Ia kiei e tapale foki ne Ia keatea. E fai ne Ia a so se mea e loto a Ia kiei. Moi fai ate lalolagi e isi se na aogaa i Ona mata, e se taitai o fakasaoloto ne Ia ko Ona fili ke pule ne latou, me e pefea ate foliki pela me se tega ote masitati. Ko oti, ne fai ne Ia a koutou ke fifi i loto i ana faigaa-mea, ona ko mea a outou lima ne fai ki Tena Talitonuuga. Tenei, e tonu, se polopoloakiga ko koutou, i oulua loto loa, ko oti ne fakamae a koutou, e se lavea ne koutou. A koutou e fiafia i mea kola, ite fakatautau ate Atua, e faka-takalialia kae e seai ne aogaa o latou, a mea kola e tofotofo ne latou a loto o tagata me e fakalotolotolua?

O tino ote lalolagi! Ke iloa, e tonu, me ka isi se puapuagaa e se lavea ka tautali atu ia koutou, ka kote fakasalaaga tafasili ite mafa e faitali atu kia koutou. Sa mafaufau aka i amioga a koutou ko oti ne solo keatea mai i Oku mata. Mai i Toku gali! Amioga a koutou katoa ko oti ne tusi ne Taku Pene i mataimanu maina i luga i tapeleti o maa soama.

O tupu ote lalolagi! A Ia Tela kote Aliki-o-tupu o tino katoa ko vau. Ate Maaloo io te Atua, kote Puipui Tafasili ite Maalosi, kote Ola-loa-ia-Ia. Tapuaki kite seai aka na kote Atua, mo, loto e malifalifa, sau aka oulua mata kite outou Aliki, kote Aliki o igoa katoa. Mea nei kote Faaliiga tela e faitalia me ne aa a outou kope e nofo mo koutou e se-mafai lele loa o fakatusagia. Ea e seiloa ne koutou.

E lavea ne Matou a koe e fiafia i mea a koutou ne fakatupu mo niisi kae pono atu koutou mai i lalolagi kola e seai aka foki na ko Taku Tapeleti e leoleogina e mafai o iloa. A kope taaua ko oti ne fakatoka ne koutou ko fai mo mea e olo mao koutou keatea mai ite outou pogai taaua. Ate masaki tenei e ttau mo koutou, ea e se maina koutou iei. Fulu a outou loto mai i lailaiiga katoa faka-te-lalolagi, kae fakavave o ulu ki loto ite Maaloo ote outou Aliki, kote Tufuuga ote lalolagi mote lagi, Tela ne fai ne Ia ate lalolagi ke polepole ka ko ona tino ke tagi fanoanoa, vagana ko latou kola ko oti ne liakina a mea katoa kae piki mau ki mea ko oti ne fakaeke mai ne te Tapeleti Funa.

Mea nei kote Aso tela a Ia Tela ne sautala mote Atua ko oti ne maua ate mainaaga o Aso ote Favavau, kae inu ite vai piua ote toe fakatasi mai ite ipu tenei tela ne pogai kiei a kogaa-tai ke sou. Fai atu: Ona kote Atua tonu tokotasi! Sinai ko tamilomilo ite Punaa Aso ote Faaliiga, kae mai ite tumu maluga ote Maaloo ate Leo ote Agaaga ote Atua e lagona atu e folafola mai: “Taumafai koutou, koutou tino mitamita ote lalolagi, kae fakavave atu kia Ia.” Kalamelu ko oti, ite Aso tenei, ne fakavave atu i te naunau o oko atu ki Tena koga nofo, kae mai ite loto o Siona e vau iei ate tagi penei: “Ate feagaiiga ko fakataunu. Ate mea tela ne fakasalalau ite Tusitusiiga paia ate Atua, kote tafasili ite Maluga, kote Mafi-Katoatoa, kote Fagasele Sili, ko fakaasigia.

O tupu ote lalolagi! Ate Tulafono Tafasili ite Takutakua ko oti ne fakaasi ite Laukele tenei, tenei ate koga ote tafasili ite gali taulekaleka. So se mea funa ko oti ne aumai kite mainaaga, ona kote Finagalo ote Fakaeke Tafasili ite Maluga, a Ia Tela ko oti ne vau ki mua ite Itula Fakaoti, auala ia Ia ate Masina ko oti ne vaelua, ka ko so se fakatonuuga e se-mafai o mafuli ko oti ne fakamatalagia.

A koutou e seai aka foki na ko tino galue, O tupu ote lalolagi! A Ia Tela kote Tupu o Tupu ko oti ne fakasae mai, ka fonufonu i Tena tafasili ite matagofie fakaofoofogina, kae kalaga atu a koe kia Ia, te Feasoasoani i Mea Faigataa, kote Ola-loa-ia-Ia. Fakalogo ite miita mana pono a koe mai ite lavea ote Kamataaga ote Faaliiga, auaa i mea ote lalolagi nei mana pono a koe keatea pela mote veli mai ia Ia Tela kote Tufuuga o lagi. Tu ki luga, kae tavini atu mo Ia Tela kote Manakooga o atufenua katoa, Telaa ne faiite a koutou mai ite muna mai ia Ia, kae fakaeke ki luga ia koutou ke fai, mo taimi katoa, ko fuka o Tena nofoaiga-a-tupu.

Ite amiotonu ote Atua! E seai kote manakooga o Matou o tuku atu Omotou lima ki luga i outou maaloo. Ate misiona a Matou kote puke kae taofi a loto o tagata. Ki luga ia latou ko mata o Bahá e fakamaau iei. Kite mea tenei e fakamaoni iei a Maaloo o Igoa, ea e maina koulua iei. A ia tela e tautali i tena Aliki, ka fakaseai ate lalolagi mo mea katoa kola iei; kae e pefea ate takutakua atu, kote motu keatea lele loa o Ia Tela e puke ki se tulaga tafasili ite maluga! Liakina a outou palesi, kae fakavave a koutou ke maua o ulufale atu koutou ki Tena Maaloo. Tenei, e tonu, ka aogaa kia koe ite lalolagi tenei mote sua lalolagi. Kite mea tenei e fakamaonigina ne te Aliki o te maaloo i luga, e seiloa ne koutou.

E uiga kese ate takutakua ote fakamanuiaaga tela e faitali kite tupu tela e tu ki luga o feasoasoani ki Taku Talitonuuga in Tou Maaloo, tela ke motu keatea a ia mai i mea katoa na ko Au! A se tupu pena e lau i loto me ko taugasoa ote Vaka Lanu Ulaula – se Vaka ko oti ne fakatoka ne te Atua mo tino o Bahá. Katoa e ttau o vikia a tena igoa, kae e ttau o fakaaloalo a tena tulaga, kae feasoasoani a ia o tala a fakai lasi mo kii o Toku Igoa, kote Puipui Maalosi-Katoatoa o tino katoa kola e nofo i maaloo lavea mote se-lavea. A se tupu pena kote tinaa mata ote saofiaaga o tino, kote lakei pula-maina i luga ite fulumata ote foafoaaga, mote ulu punaa-vai o fakamanuiaaga kite lalolagi kaatoa. Tuku atu, O tino o Bahá, a outou maukoloa, e tonu a outou ola mo tena feasoasoani.

Kote Tokita Iloa-Katoatoa e tuku a Tena maikao i luga ite manava ola o tagata. E lavea ne Ia a masaki, kae tusi atu, i Tena atamai e se-mafai o se, ate vai foo masaki. I vaasia taimi taki tasi katoa e isi loa ne ana fakalavelave, ka ko agaaga ola taki tasi e isi foki ne olotou fakamoemoeega fakapitoa. Ate fakaleiiga e manakomia ne te lalolagi i pokotiaaga o aso nei e se-mafai o pau mo manakooga o vaasia-taimi e aumai i tua. Kae nofo koutou fakatalitali o saga ki manakooga ote vaasia taimi e nofo nei a koutou iei, kae fakasaga a outou faipatiiga ki luga i ona fuafuaaga favavae mo manakooga.

E mafai ne Matou o atafia me e pefea ate lanu o tagata saukatoa e siomia ne puapuagaa tafasili ite lasi mote uke. E lavea ne Matou e tigaina i luga i tena moega masaki, logomae kae fanoanoa. Latou kola e konaa ite miita miita kia ia loa ko oti ne kosugina a latou ite vaa ote miita mote Tokita Faka-te-Lagi kae e seai lele se mafai o see. Molimau mene faka fifi ne latou a taagata katoa pefea, latou foki loa e too iei, ite kupega o olotou faiga leaga, io me e isi se iloa o latou ite vai fakalei masaki. Ko oti ne faiite ne latou ate mea tonu ke pikopiko, kae mafaufau ite olotou taugasoa me se fili.

Tuku mai outou taliga kite leo suamalie ote Pagota tenei. Tu ki luga, kae sau aka a outou leo, kote mea ke fiafia a latou kola e too kii a olotou moe kote mea ke ala aka. Fai atu: O koutou kola ko mate! Ate Lima alofa mataefa Faka-te-Lagi e fakaoko atu kia koe ate Vai ote Ola. Fakavave kae inu a tou tusaga. So se tino tela ko oti ne toe fanau mai ite Aso tenei, e se-mafai lele o mate; so se tino tela e tumau e mate, e se-mafai o ola.

A Ia Tela kote outou Aliki, kote Alofa-Fakamagalo Katoatoa, e fakataaua i Tena loto ate manakooga o kilo kite lanu o tagata katoa pela me se agaaga ola e tasi mote foitono e tasi. Fakavave a koutou o maua a outou tusaga ote alofa agalelei ote Atua mote alofa fakamagalo ite Aso tenei tela e sili atu i niisi Aso katoa kola ne faiite. E uiga kese loa ate takutakua ote fiafia tela e faitali kite tagata tela e liakina a mea katoa kola a ia kote mea ke maua ne ia a mea ate Atua! Ate tagata pena, Matou e molimau, e to i loto ia latou e fakamanuiagina ne te Atua.

Ko oti ne fakatonu ne Matou ate taimi mo koe, O tino. Kafai a koe e fakatamala, ite itula ne tusia, o fuli mai kite Atua, a Ia, e tonu, ka fakaoko atu ne ia se fakasalaaga kia koutou, kae ka fai ne ia a puapuaga taafasili ite masei ke kini atu kia koutou mai i so se koga. E matuaa mafa, e tonu, kote fakasalaaga kote outou Aliki ka fakasala atu kia koutou!

O Kamál! A koga maluga, kola ate alofa agalelei tafasili ote Atua, e mafai o maua ne tagata, ite Aso tenei, e seki fakaasigina aka loa ki ona mata. Ate lalolagi o tino e se mafai lele loa, io me kai isi aka loa se iloa mote mafai ki se faaliiga penei. Ate aso, ko pilipili mai ko maalosi o se alofaaga takutakua ona ko Tena manakooga ka fakalavea iei ki tagata. E ui iai a maalosi o fenua ka fakatupu o teke kia Ia, e uiloa tupu ote lalolagi ka kautasi o fakamalalo a Tena Talitonuuga, ate paoa o Tena mafi ka tu aunoa mo se gasuesue. A Ia, e tonu, e faipati kite meatonu, kae kami atu kite saofiaaga o tino katoa kite ala o Ia Tela kote Se-Fakatusagia, kote Iloa-Katoatoa.

A tagata katoa ne faiite o kave ki mua se malamalama tumau fano ki mua. Ate Mafi-Katoatoa e fai mo Aku molimau: O amoga pela mo manu fekai o te malae e se ttau mo tagata. A uiga kola e ttau ki tena malu kote onosai, alofa-fakamagalo, alofa atafai mote alofa kaimalie ki tino katoa mo itu-kaaiga ote lalolagi. Fai atu: O taugasoa! Inu koutou mai ite vaitafe foliki tela e tafe auala mai ite agalelei faka-te-lagi o Ia Tela kote Aliki o Igoa. Ke fai a nisi tino ke inu i ona vai i Tena igoa, ko takitaki o tagata i so se atufenua ke mafai o lavea katoatoa ate pogai ne fakaasi mai iei ate Meatonu Favavau, mote pogai ne faiite iei a latou.

Ate Tino Tafasili ite Takutakua e fai mai: O koutou tamaliki a tagata! Ate pogai fakavae e fakaolaola ne ia ate Talitonuuga ate Atua mo Tena Tapuakiiga kote leoleo o manakooga kae avaka ate fakatasitasi fealofani ite lanu o tagata, kae fakamaalosi ate agaaga ote alofa mote faka taugasoa i vasia o tagata. Sa faigina mo pogai e kamata iei ate faka kinau mote se-fealofani, ote ita mote fai fili. Mea nei kote Auala tonu, kote fakavae e mautakitaki kae e se-mafai o fakagasuegina. So se mea tela e avaka mai ite fakavae tenei, a mafulifuliiga mo avanoaaga ote lalolagi e se-mafai lele o fakavaaivai a tena maalosi, io me kote tamilosaga ote lausa o senetenali e mafai o fakapakia a tena faiiteega. Kote Omotou fakamoemoeega ko takitaki o lotu ote lalolagi mo pule ke mafai o fusi tasi kae tu ki luga mote fakaleiiga ote vaasia taimi mote toe fakaleiiga o ana koloa. Ke fai latou, mai ite fai talosaga fakapooko ki ona manakooga, o faipati fakatasi kae, mai ise sautalaaga katoatoa, aofaga kise lalolagi e masaki kae pokotia masei a se foo-oga fakaalei masaki e manakomia…. E ttau mo latou kola e pulepule o faka-aogaa ate fuafuatau i mea katoa. So se mea tela e pasia mai i tua atu o tuakoi ote fuafuatau ko gata o isi sena pokotia aogaa. Mafaufau ki feitu pela mote saolotooga, malamalama o niisi mea aka pena. Me e pefea a tagata ote malamalama e mafaufau kia latou loa, e mafai a latou, manafai ko silia ate mea a latou e fai, o faka pokotia masei kii loa ki luga i tagata…. Fakamolemole te Atua, a tino ote lalolagi e mafai o taaki, ona ko galueega mafa a olotou takitaki ne fai kia latou mo tino atamai kae poto i vasia o tagata, o lavea olotou manakooga e lei iei a latou. E pefea ate leva ote tumau ote se-fakalogo o tino? E pefea ate leva ote numi mote fai valevale o pule i luga i tagata? E pefea ate leva ote seai se fealofani e gasuesue i mata ote sosaieti?... A matagi ote fakavaaivai loto, o agi mai i so se koga, ka kote fai taua tela mavaevae kae pokotia kite lanu o tagata e solooki aka loa i aso taki tasi. A failoga o fakalavelave mote numi ko faitali o tupu e mafai fua o lavea nei, pela loa mote oota o taimi nei e sae mai ise auala tafasili ite se-lava kae faka fanoanoa. Au e akai totuli kite Atua, ke maluga a Tena matagofie, ke mafai ne Ia o fago aka mote agalelei a tino ote lalolagi, ke mafai o talia ite gataaga o olotou amioga ke mafai o aogaa kia latou, kae feasoasoani kia latou o fakataunu a mea kola e ttau mote olotou tulaga.

CXI.O tino finau valea mo itukaaiga ote lalolagi! Tuku a outou mata kite fakatasitasi, kae fai ate malifalifa oe mainaaga ke sulu ki luga ia koe. Luku mai koutou fakatasi, kae ona kote Atua taumafai o tapale keatea ate pogai ote se-loto tasi ia koutou. Ko mafai iei ate matakalekale o Mata takutakua o pulougina ate lalolagi, ka ko ona tino e nofo iei ke fai pela mene tino ote fakai lasi e tasi, ka ko tino e nofo iei ke tasi kae kote kalauna-a-tupu e tasi. A Ia Tokotasi tenei ne faka-se-gina ko oti, mai i taimi loa muamua o Tena olaaga, ne faka-taaua e seai aka foki na kote manako kite mea tenei, kae ke tumau o fakataaua a se isi manakooga aka na loa kote manakooga tenei. E seai se isi fakalotolotolua aka i tino ote lalolagi, me se lotu io me se lanu pefea, e maua ate olotou fakamaalosiiga mai ite Kamataaga e tasi faka-te-lagi, kae ko tino ote Atua tokotasi. Ate kese ite vaa o tulafono e nofo a latou mai i lalo e ttau o pogai ki manakooga kese kese mo avanoaaga ote vasia tausaga kola ne fakaasi mai iei. Ko latou katoa, vagana ko naai mea fua kola ne pogai mai ite se-fakalogo o tino, ne fakaekegina ne te Atua, kae ne fakaasiiga o Tena Finagalo mo Tena Pogai. Tu ki luga, kae fakatoka a tou oso kite paoa ote Talitonuuga, lepegina ke malipilipi atua o outou mafaufauga seai ne aogaa, ko latou kola e kosu ate fai taua ite vasia o koutou. Piki mmau ki mea kola e fusi tasi koutou fakatasi iei. Mea nei, e tonu, kote Muna tafasili ite maluga tela ate Matua o Tusi ne tuku ifo kae fakaasi atu kia koutou. Kite mea tenei e fai mo molimau ate Laulaufaiva ote Agalelei mai i Tena koga nofo mote matagofie.

Kilo ki puapugaa konei ite fia o tausaga, ne pokotia kite lalolagi, mote mataku ke oko ki ona tino. Ne fakamaumaugina ne taua, io me mai i fakalaveave lasi ne poko fakavave io me e seiloa. E uiloa ate lalolagi e siomiagina ne te tigaina mote fanoanoa, kae e seai se tagata ne tu o toe mafaufau me se aa ate pogai io me kote kamataaga o mea tupu. I so se taimi e faipati a se muna ne te Kaunisela Tonu o polopoloaki, a latou katoa e fai muna kia Ia me se tino fakatupu taua kae se talia ne latou a Tena faipatiiga. Ite fakaofoofogina, ite fakanumi amioga pena! E seai se avaa tagata e mafai o maua e fusi tasi laua ite kilo mai i tua pela foki mai i loto. A fakamaoniiga ote se-fealofani mote matagaa e lavea gina i so se koga, e uiloa a tino katoa ne faiite kite fealofani mote fakatasitasi. Kae fai mai ate Tino Sili Takutakua: O fagasele sili ite lei! Ate tapanekolo ote fakatasitasi ko oti ne avaka ki luga; sa kilo ki se isi tino aka me ne tino kese. A koutou ko fuaga kaina ote lakau ola e tasi, mo lau ote kaula e tasi. E fakataaua ia Matou ate fakamoemoeega kote mainaaga kote fakamasinooga tonu ke sulu maina ki luga ite laolagi kae fakamana a ia mai ite pule sauaa. Kafai a takitaki mo tupu ote lalolagi, a failoga ote paoa ote Atua, e maluga a Tena matagofie, e tu ki luga kae fakaiku ke fakamaumau a latou ko so se mea tela e avaka iei kite tafasili ite maluga a mea e lei iei ate saofiaaga o tino katoa, ate puleega ote fakamasinooga tonu ke tonu loa ka fakatu i vasia o tama a tagata, mote malifalifa o tena mainaaga ka pulou gina ite lalolagi katoa. Ate Tino Sili Takutakua e fai mai: Ate nofo toka mote oota ote lalolagi ko oti ne putiputi aka, kae ka tumau o tausigina ne masaga pou ote tauii mote fakasala… i se isi fuaiupu aka ne tusi mai ne Ia: Fakalogo, O lukuuga o takitaki ote lalolagi! E seai se maalosi ite lalolagi e fakapau i tena paoa o faka takavale kite paoa ote fakamasinooga tonu mote atamai… Fakamanuia kite tupu tela e maati mote failoga ote atamai e fola i ona mua, mo kautau ote fakamasinooga tonu e tautali mai i tua. A ia e tonu kote lakei e safe i luga ite mualae ote filemu mo mata ote nofo toka. E seai lele se fakalotolotolua me kafai ate fetuao ote fakamasinooga tonu, tela a kaumana ote pule sauaa ko oti ne ponogia, e sulu a tena mainaaga ki luga i tagata, a mata ote lalolagi ka faka-mafuligina katoatoa.

Koe e mafaufau, O Minisita ote Shah ite Fakai Lasi (Constantinople), tela e taofi ne Au i oku lima ate fakaotiiga ote Talitonuuga ate Atua? E mafaufau koe me i Toku falepuipui, io me kote taema ne oko mai kia Au, io me ko Toku mate mote fakaseai lele loa, e mafai o fakasekegina a tena auala? Matagaa ate mea e mafaufau ne koe i tou loto! Koe e tonu e fai pela mo latou e sasale i olotou mafaufauga fakasupasupa kola ne faiite ne olotou loto. E seai se Atua na ko Ia. E maalosi a Ia o fakaasi a Tena Talitonuuga, o fakamaluga a Tena molimau, kae o fakatu so se mea i Tena Finagalo, kae fakamaluga a ia kise tulaga tafasili ite takutakua tela e se mafai ne ou lima, io me ko lima o latou kola ne fuli keatea, e mafai lele o piki io me o fakamae kiei.

Koe e talitonu ia koe e isi se paoa o fakafiufiu a Tena Finagalo, o fakalavelave a Ia mai ite fakataunuuga o Tena fakamasinooga, io me o fakatuai ate faka galueega o Tena nofoaiga-a-tupu? Koe e fai aka pela me e seai i lagi io me kote lalolagi e mafai o taofi a Tena Talitonuuga? Ikaai, ia Ia Tela kote Meatonu Favavau! E seai lele loa ite foafoaaga katoatoa e mafai o fakalavelave ki Tena Pogai. Pei keatea, telaa la, ate fiasili fatauva tena e tautali koe iei, auaa ite fiasili fatauva e se mafai lele loa o sui ne ia ate meatonu. Ke fai a koe mo latou kola e salamo fakamaoni kae foki atu kite Atua, kote Atua Tela ne faiite a koe, Tela ne fagai ne Ia a koe, kae fai a koe pela me se minisita mai ite vasia o latou kola e talia ne latou a tau talitonuuga.

Ke iloa, me ko Ia Tela ko oti, mai i Tena fakatonuuga, ne faiite a mea katoa i lagi mo mea katoa ite lalolagi. E mafai pefea, ate mea tela ko oti e faiite mai i Tena fakatonuuga e tumau o silia atu kia Ia? E maluga atu ate Atua mai i mea e mafaufaugina ne koutou kite Atua, koutou ko tino leaga! Kafai ate Talitonuuga tenei e io te Atua, e seai se tagata e mafai o silia atu kiei; kae kafai e seai io te Atua, a tino lotu ia koutou, pela foki mo latou e tautali i olotou manakoga leaga mo latou kola ko oti ne teke atu kia Ia ka mautinoa o mafai o fakatakavale a ia.

E seki logo a koe ise tagata ote kaaiga o Falao, se tino talitonu, ko oti ne fai atu mai i mua, kae ne toe fai atu ne te Atua ki Tena Aposotolo, Tela ne fili ne Ia mai i luga atu o tino katoa, kae tuku atu a Tena Meseti, kae fai ote kamataaga o Tena alofa-fakamagalo kia latou katoa kola e nofo ite lalolagi? Ana muna, ako Ia, e tonu, e faipati kite meatonu: “Ka taa ne koe a tagata me a ia ne fai atu i toku Aliki kote Atua, mafai a ia ko leva loa ne vau kia koe mo fakatalitonuuga o tena misiona? Kae kafai a ia se tino pelo, kia ia ko tena pelo, kae kafai a ia se tagata ote meatonu, se vaega o tena fakamatakutaku ka to atu ki luga ia koe.” E tenei ate mea ne fakaasi mai ne te Atua ki Tena Tokotasi Fagasele Sili, i Tena Tusi e se-mafai o se.

Kae e ui iai, a koe ne fakatamala o tuku a ou taliga ki Tena kalaga, se faka-se-aogaa a Tena tulafono, ko oti ne liakina keatea a Tena apoapoaiga pela mote mea e tusi i Tena Tusi, kae ko oti ne fano mao fakaatea mai ia Ia. E tokofia a latou kola, i tausaga taki tasi katoa, mo masina taki tasi katoa, ne fai pena auaa ia koe ne tamate! E tuafia katoa ate mea se ne fai ne koe – mea se kola ate mata ote foafoaaga e seki lavea aka loa, kola e seai aka foki se tino tusi tala ne tusi aka loa ne ia! E faka fia katoa a taimi a pepe mo pepe fatoa fanau ne faka seai a olotou matua, mo tamana kola ne galo a olotou tama tagata, ona ko tou sauaa, O koutou fai fakamasinooga se tonu! E fakafia taimi ate tuagane ne naunau kae fanoanoa i tena tuagane, kae fakafia taimi ate avaga fafine ne tagi fanoanoa ki tena avaga tagata mote tino tausi fua tokotasi!

A tou fai mea se-tonu e gasolosolo aka loa o lasi ke oko kite taimi ne fasioti ne koutou a Ia Tela ne seki tapale aka loa keatea Ona mata mai i mata ote Atua, kote Tafasili ite Maluga, kote Tafasili ite Takutakua. A koe tela ne tamate a Ia mai i faifaiiga a tagata kola e manako o tamate a sua tino! Ne ta ne koutou a Ia, ise faifaiiga tela e seai se tagata kai molimau aka loa ne ia. Ne tagi lotulotu a lagi i luga ia Ia, ka ko agaaga ola o latou kola e pili atu kite Atua ne tagi loa ki luga ona ko Tena tulaga. A Ia seai kote Kaaiga ote Fale anamua ote outou Pelofeta? Moi fai e seai ko Tena takutakua mene vau tonu mai ite Aposotolo ko oti ne foola ki tua atu ia koutou? Kaiaa la, ne fakamae ne koe kia Ia tela e seai se tagata, me e pefea ate mao o tau kilo ki tua atu, ko oti ne fakamaegina ne sua isi tino? Ite Atua! A mata ote foafoaaga e seki kilo aka loa kise tino pena mo koe. Koutou ne taa a Ia Tela kote Kaaiga ote Fale ote outou Pelofeta, kae fakamsaua fiafia kae fakafiafia kae nofo i oulua nofoaga ote fakaaloalo! E faipati ne koutou a outou pati masei kia latou kola mai i mua o koe, kae kola ko oti ne fakataunu a mea a koutou ne fakataunu, kae tumau loa koutou i taimi katoa e seiloa i outou amio matagaa!

Ke tonu ate oulua fakamasinooga. Ne fai ne latou kona e loosi ne koutou, kona a koutou ne avaka ate masei, kae fai a outou taaga kese mai ia koutou? Ko latou e seki tamate ne latou ate kaaiga ote olotou Pelofeta pela mote tamate o se kaaiga foki o koutou? E se-pau amioga a koutou mo olotou amioga? Kaiaa la, e fai koutou me e kese mai mo latou, O koutou ko tino e fakatupu ate se-lei i vasia o tagata?

Ite taimi ne puke ne koutou a Tena ola, se tokotasi o Ona taugasoa ne tu o fai taua e uiga mo Tena mate. A ia se tagata e seiloa, ka ko ana mea ne mafaufau a ia o fai e se-lavea ne se tino. Fakamuli ifo loa a ia ne fai ne ia ate mea ko leva ne fakaekegina. A ia ne manako ko koe, telaa la, ke tii ate se kia koutou, auaa ko mea a koutou ko oti ne fai, mafai a koutou e fakamasino fakalei loa. Ko ai i kona ite lalolagi kaatoa ne fai ne ia ate mea tela ne fai ne ia? E seai, mai ia Ia Tela kote Aliki o lalolagi katoa!

A takitaki mo tupu katoa ote lalolagi e fakaaloalo kae fakamalu a solooga o olotou Pelofeta mo tagata mana, e mata e se lavea ne koutou. A koutou, i sua feitu, e pogai kiei a amioga pena kola e seai aka loa se tagata ko oti, i so se taimi, ne fai ne ia. A outou mea se ne pogai kiei a so se loto malamalama o mae ite fanoanoa. Kae e ui iai, a koutou e nofo mai loa pena, pulu ki lalo ite outou se-fakalogo, kae e se kafi o lavea ate matagaa o outou mea ne fai.

Koutou ne tumau ite outou amio leaga ke oko loa kite taimi ne tu mai koutou o teke kia Matou, e uiloa a Matou e seai ne Omotou mea ne fai kote mea ke fai mo fakamasakooga ite fai fili mai o koutou. Se mataku koutou kite Atua Tela ne faiite a koutou, ne fakafoliga mai a koutou, kae ka fai koutou ke maua se maalosi, kae kau koutou mo latou kola ko oti ne liakina mai ia Ia (Muslims)? E fia ate loa ote taimi e tumau koutou i outou uiga matagaa? E pefea ate leva o taimi e ita koutou mana to mafaufau aka? E pefea ate leva e liakina ne koutou a outou moega kae tu ki luga mai ite se fakalogo? E pefea ate leva ka tumau koutou pena e seiloa ate mea tonu?

Manatunatu i tou loto. Ne fai ne koe, e uiloa au amioga mo mea ne fai ne ou lima, ne manumaaloo o tamate ate afi ote Atua io me o fakaseai a Tena faaliiga - se mainaaga tela ko oti ne pulougina mo tena malapulapu a latou kola ko ufi i lalo ite vasa soko kii ote ola kite favavau, kae ko oti ne fakalata mai a agaaga ola o latou kola e talitonu fakamaoni kae tausi ne latou a Tena fakatasitasi? Ke iloa ite Lima ote Atua ei luga i ou lima, ka ko Tena Fakapulaaga e se-mafai o fuligia ka sopoia i luga atu o fakanofonofooga katoa, ka ko Ia e sili atu i Ana tavini, ka ko Ia e pau ki Tena Pogai, kae ko Ia e fai ate mea e manako a Ia kiei, kae e se-mafai a Ia o fakafesiligina ki so se mea e finagalo a Ia kiei, kae e fakaeke ne Ia ate mea e fiafia a Ia kiei, ka ko Ia kote Tafasili ite Maalosi, kote Mafi-Katoatoa? Kafai a koe e talitonu me kote mea tonu tenei, ma fea laa, e fakagata iei a koe o fai mo fakalavelve kae fai mo filemu ia koutou loa?

E fai ne koutou i aso taki tasi katoa a fakamasinooga se tonu kae fai mai kia Au a faifaiiga a koutou kia Au i taimi ko teka, e uiloa Au e seki taumafai aka loa o faka fiifi i loto i outou mea fai. E seki ai aka loa se taimi ne teke ne au a koe, io me ne se fakalogo ki outou tulafono. Kilo aka me ko koutou ne uiga pefea, ne fai ne koutou a Aku me se pagota ite fenua mao tenei! Ke iloa fakapatonu loa, tenaa la, i so se mea ne fai ne outou lima io me ko lima o tino se-talitonu e se-mafai lele loa, me e se-mafai loa mai anamua loa o mafuli ate Talitonuuga ate Atua io me o fuli Ona auala.

Fakalogo kia Aku uonigi, koutou tino o Pelesia! Kafai au e mate i outou lima, ate Atua e tonu loa ka fakatu aka se isi tino tela ka nofo ite nofoaga ko seai se tino iei ona ko Toku mate, auaa e tena ate auala ote Atua e fakagalue mai i anamua loa, kae e seai se mafuliiga e mafai ne koutou o maua i auala ote Atua. Salasala a koutou o tuku ate mainaaga ote Atua tela e sulu maina i luga ite lalolagi? E fuli faka kotua atu ate Atua ki mea e manako a koutou kiei. A ia ka fakatonu a Tena mainaaga, faitalia me e ita koutou ite funaaga o outou loto.

Manava malie kae toe mafaufau, O Minisita, ke tonu a tau fakamasinooga. Sea aa ate mea a Matou ne fai e fai mo fakamsakooga a koe o fakamasei a Matou ki Minisita ate Tupu, ite tautali ki naunauuga o outou loto, ite fulifuliga ate mea tonu, kae faipati a fakamaseiiga kia Matou? A Matou e seki fetaui aka mo koutou vagana ma fetaui tatou ite fale o tou tamana, i aso ate mate faka-matulo o Imám Husayn ko fakamasauagina. I taimi kona e seai se tino e isi se avanoaaga o fai ke iloa ona manatu mo talitonuuga i sautalaaga io me ko faipatiiga. Ka molimau ne koe ate meatonu i Aku pati, mafai a koe ko ia tela faipati tonu. Au e seki fano saale kise isi fakatasitasiiga tela e mafai o se tauloto ne koe a Toku mafaufau io me se isi e mafai o lagona ne ia. E mafai la pefea ne koe o fakaiku a tau fakamasinooga kia Au, mafai a koe e seki lagona ne koe a Taku molimau mai i Oku laugutu? E seki lagona ne koe ate Atua, ke maluga a Tena matagofie, ko oti ne fai atu penei: “Sa fai ki tino taki tokotasi e fetaui mo koe ise faka talofaga penei, ‘A koe seai se tino talitonu’.” Sa pei gina keatea a latou kola e tagi kite olotou Aliki i taeao pela foki mote naunau o kilo ki Ona mata.” A koe e tonu ko oti ne liakina ate mea ite Tusi ate Atua ko oti ne tusi mai, kae e uiloa a koe e fai pela me se tino talitonu!

E uiloa a mea a koe ne fai e talia ne Au - kae kite Atua ko Taku molimau – e seai se lagona masei kia koe, io me ki se isi tino aka, e uiloa mai ia koe mo niisi aka ne maua ne Matou ate mae e seai aka se tino talitonu ite fakatasitasi ote Atua e mafai o kolomaki. A Taku talitonuuga ei i lima ote seai aka foki na kote Atua, ka ko Toku talitonu ei ite seai aka foki na ko Ia. Ko pili mai ou aso ko teka atu, kae ka teka atu foki a aso o latou kola nei, i se miita tukualiali mai, ko palau valevale a latou ki olotou tuakoi. Ko pili a koutou ka fakatasi ki loto ite nofo-mai ote Atua, kae ka fakafesili gina a outou mea ne fai, kae ka taui atu a mea a outou lima ne fai, kae fakamasei ate koga nofo o latou agasala.

Ite Atua! Moi fai a koe e iloa au mea ko oti ne fai, a koe e tonu ko tagi fanoanoa, kae tele koe o lafi kite Atua, kae moi fai a koe e manako o fano keatea kae fanoanoa i aso katoa o tou olaaga, ke oko ki taimi ate Atua ko fakamagalo a koe, auaa a Ia, e tonu, kote Tafasili ite Alofa-Kaimalie, kote Alofa-Mataefa- Katoatoa. A koe ka tumau, kite itula o tou mate, i tou se-fakalogo, pela mote mea ko oti, i tou loto katoa, a tou agaaga ola mote kanoloto o koe, ne saga malaosi mo mea faka supasupa ote laolagi. A koe, mai i tua o tou galo atu, e maua a mea a Matou ko oti ne fakaasi atu kia koe, kae ka maua i au mea katoa e fai e tusi i te Tusi tela a galueega katoa a latou e nofo ite lalolagi, faitalia me e takutakua atu io me e mutana ifo ite mafa ote atomu, e fakamau ki lalo. Fakalogo, telaa la, ki Taku apoapoaiga, kae saga tonu mai, mote lagona o tou loto, ki Taku lauga, kae sa sonafaigina Aku pati, io me e fai koe pela mo latou e teke ki Taku meatonu. Matagofie seai ki mea kola ko oti ne tuku atu kia koe. Kae tuku i oulua mata a mea kola ko oti ne folafola atu ite Tusi ate Atua, kote Feasoasoani i taimi Faigataa, kote Agalelei-Katoatoa: “Kae kafai ko puli ia latou a olotou uonigi, Matou ko oti ne taala atu a mataloa o mea katoa,” pela loa mo Matou ko oti ne taala atu kia koe pela foki tino pena mo koe a mataloa ote lalolagi tenei pela foki mo mea fakagaligali iei. Tena laa faitali a koe, me i mea kola ne fai feagaiiga atu ite faotiiga o kupu mana, auaa e tenei ate feagaiiga mai ia Ia Tela kote Mafi-Katoatoa, kote Atamai-Katoatoa – se feagaiiga tela ka fakatalitonugina me e tonu.

E seiloa ne au ate auala ne filifili ne koe kae ne sasale mai a koe iei, O lukuuga o tino e olioli ne latou a Toku masei! Ke kami atu ne Matou a koe kite Atua. Matou e fakamasaua kia koe a Tena Aso, Matou e fakapula atu kia koe a tala lei o tou toe fetaui mo Ia, Matou e futi mai ke pili koe ki Tena koga nofo, kae tuku ifo ki lalo ki luga ia koe a failoga o Tena atamai fakaofoofogina, kae uiloa, mene teke mai kia Matou koutou pefea, mai i mea kola mai oulua gutu pelo ne faipati, pela me ne tino fapaupau, ne galue ne koulua a auala o teke kia Matou! Kae i taimi a Matou ne fakaasi atu a koe kite Atua, auala atu i Tena alofa mataefa, ne fakaeke mai ki luga ia Matou, a koutou ne faipati: “E tonu kae e maina e fakaofoofogina.” A pati foki kona ne taviligina ne tupulaga kola mai mua o koutou koi pena mo koutou, e seiloa ne koutou. Telaa la a koutou ne fakaseai foki loa koutou mai ite alofa mataefa ote Atua mo Tena agalelei, kae e se mafai lele loa o maua a latou ne koutou ke oko kite aso ko fakamasino ne te Atua ite vaa o Matou mo koutou, ka ko Ia, e tonu, kote toe Famasino Sili.

Naai tino ia koutou ne fai a olotou pati: “A ia Tela ne fai ia Ia kote Atua.” Ite Atua! Mea nei se matuaa pelo lasi loa. Au seai aka foki na loa se tavini ate Atua Tela ko oti ne talitonu ia Ia mo Ana failoga pela foki Ana Pelofeta mo Ana agelu. A Toku laulaufaiva, a Toku loto mo Toku foitino mai i tua e molimau me e seai aka foki se Atua na ko Ia, ko tino katoa ko oti ne faiite mai i Tena ikuuga kae fakafoliiga mai ite faka galueegaga o Tena Finagalo. E seai aka foki se Atua na ko Ia, kote Tufuuga, kote Avaka-ki-Luga, kote Fakavave, kote Fakaoti-Ola. Au ko Ia tela e faipati i fenua i tua atu ki alofaaga mai ite Atua, ona ko Tena alofa-mataefa, ne alofa mai kia Au. Kafai e tenei ko Taku soli tulafono, mea nei e tonu, kote soli tulafono muamua loa. Au mo Toku kau-kaaiga e nofo ite oulua alofa fakamagalo. Fai ne koe te mea tela e fiafia koe kiei, kae sa fai pela mo latou e fakalave, ia Au mana foki kite Atua Toku Aliki, kae oko kite koga tela ko se toe mafai o lavea a outou mata. Mea nei, e tonu, ko Toku manakooga fagasele, ko Toku manakooga maalosi. Mai i Toku maaloo ate Atua, e tonu, kote lava ote malamalama, kote mataiile.

Mafaufau ia koe ei lalo ote mata ote Atua, O Minisita! Kafai e se lavea ne koe a Ia, a Ia, ite tonuuga, e lavea fakalei loa a koe. Sea ate mea tela ko oti ne fai ne Matou e mafai iei a koutou o tu ki luga o teke mai ia Matou, kae fai muna e uiga mo Matou ki tino, mafai a koe e pela mo latou e fai mea tonu? Matou ne liakina a Tihrán, ite tonu ate Tupu, kae mai i tena taliaaga ne liakina ate Omotou koga nofo ki ‘Iráq. Kafai au ne soli tuakoi kia ia, kaiaa, ne taala ne ia Au? Kae kafai Au e se agasala, kaiaa la ne fakamaegina iei a Matou i se masei e seai aka ia latou tela e fai ia ia e talitonu ite outou lotu ne tigaina kii iei? E isi ne Aku amioga, mai i tua i Toku oko ki ‘Iráq, i se tulaga ne fakafoliki ne Au ate puleega ate maaloo? Ko ai tena ne fai ana pati me ne lavea ne ia se mea e masei ite Omotou amio? Sukesuke ne koe mai i tino, kote mea ke mafai koe o fai pela mo latou e lavea ate meatonu.

E sefulu ma le tasi o tausaga o Matou ne nofo ite laufenua tena, ke oko ki taimi ate Minisita e sui i tou maaloo ko oko mai, tela a tena igoa ate Omotou pene e se fiafia o fai atu, tela se tagata ko tosina ne te uaina, tela e tautali i mea e naunau kiei a tena loto, kae fai ne ia amioga leaga, kae faitogafiti kae fakaleaga foki ne ia a ‘Iráq. Kite mea tenei e molimau a tokoukeega o tino i Baghdád, moi fai e silisili a koe kia latou, ke pela mo latou e sala kite meatonu. Ko ia tela ne puke se ne ia a mea a tagata o tena itu-kaaiga, kola ne liakina a tulafono katoa ate Atua, kae soli tulafono i so se mea kola ne fakatapu ne te Atua. Kae fakaoti loa, a ia ona ko ana naunauuga o tena loto, ne tu aka ki luga o teke mai a Matou, kae sasale i aualaa ote se-faimeatonu. Ne loosi mai a Matou, i tena tusi kia koe, ka ko koe ne se talitonu ia ia kae tautali i ona auala, aunoa mo se salasala ki ne fakatalitonuuga io me molimau fakanaagina mai ia ia. A koe ne seki sili mai kise fakamatalaaga, io mene taumafai o sukesuke io me o fakapatonu ate mataupu, ite mea tonu e mafai o fakamatea kese mai ite mea pelo i ou mata, ka ko koe fai mo tino e tafasili ite maina i tau fuafuaaga. Sala aka mo koe me se vaegaa tagata pefea o silisili atu ki Minisita ko la, ite taimi tena, i ‘Iráq, pela foki mo te Kovana ote Fakai Lasi (Baghdád) mo tena Kaunisela maluga, kote meatonu ke fakaasi kia koe, kae ke fai koe mo latou kola e malamalama lei.

Te Atua kote Omotou molimau! Matou ko oti, i so se taimi, ne teke atu kia ia, io me ko niisi aka. Matou e taumata, i so se taimi, a akoakoga ate Atua, e seki fai aka loa me ne mafua iei ate fai valevale. Kite mea tenei ko koe loa e fakamaoni. A tena fakamoemoeega kote mea ke tii atu kia Latou, kae fakafoki a Latou ki Pelesia, mai iei ka fakamaluga a tena taaua mo tena tulaga. Ko oti foki a koe ne fai ate agasala tena, kae mote pogai foki loa tena. Kae tusa loa koulua i mua ote Atua, kote tupu o Aliki katoa, kote Iloa-Katoatoa.

E seai kote Omotou pogai o lauga atu kia koe a muna konei o fakamama ate amoga ote fanoanoa o Matou, io me o takolekole a koe mo se isi aka ke oso mai ia Matou. Ikaai, a Ia Tela kote Aliki o lalolagi katoa! A Matou ko oti ne tuku atu ki mua ate mataupu tenei i ou mua, eiloa laa e mafai o atafia ia koe au mea ko oti ne fai, e mafai o fakagata ne koe ate fakamae ki niisi ate mae tela e fai mai ne koe kia Matou, kae e mafai koe o fai pela mo latou ko salamo patonu loa kite Atua, Tela ne faiite a koe mo mea faiite katoa, kae e mafai foki a koe o fakapoto atu i taimi mai i mua. E lei atu tenei mo koe iloo a meakatoa e nofo mo koe, iloo a tau minisituli kola ona aso e gata.

Faeteete ia koe mana fakataaki atu o palane se mea e se-tonu. Tuku a tou loto ke mu mea aka ki luga ite fai mea tonu, kae sa fuligina ate Talitonuuga ate Atua, kae fai mo latou ko olotou mata e fakasaga tonu ki mea ko oti ne fakaasi mai i Tena Tusi. Sa tautali, i se taimi, a musmusuuga o tou manako leaga. Tausi ne koe ate tulafono ate Atua, tou Aliki, kote Agalelei, kote Favavau o Aso. A koe e tonu e toe foki atu kite pefu, kae tanumia pela mo mea katoa kola e fiafia koe kiei. E tenei ate mea ate Laulaufaiva ote meatonu mote matagofie ko oti ne faipati.

E se masaua ia koe a uoniigi ate Atua ne fai atu i taimi ko teka, ia koe e mafai mo latou kola e fakalogo ki Tena uoniigi? Ana muna, ka ko Ia, e tonu, e faipati kite mea tonu: “Mai iei (ate lalolagi) ne faiite a koe ne Matou, e toe fakafoki a koe kiei ne Matou, kae mai iei ka aumai a koe mai iei ne Matou ite fakalua o taimi.” E tenei ate mea ne fakaeke ne te Atua kia latou katoa kola e nofo ite lalolagi, me e maluga io me e malalo. E se ttau, telaa la, mo ia tela ne faiite mai ite pefu, kae e foki atu kiei, kae toe aumai foki mai iei, ke fete a ia ite miita i mua ote Atua, kae mai i mua o Ana fagasele, o faka-se-aava mote fakamaualuga i mua o latou, kae fakafonu a latou mote fiasili fakatauemu. Ikaai, kae e ttau atu mo koe pela foki latou pena mo koe o tuku a koutou kia latou kola ko Faifekau ote fakatasitasi ote Atua, kae avatu mote loto maulalo ki latou fakamaoni, kola ko oti ne liakina a latou katoa kite Atua, kae motu mai keatea a latou mai i mea kola e fakasaga a mafaufau o tagata kiei, kae taaki atu latou keatea mai ite auala ote Atua, kote Matagofie-Katoatoa, kote Tavaegina-Katoatoa. Tena a Matou ne avatu ifo kia koe ate mea tela e lei mo koe kae e lei foki mo latou kola ko oti ne tuku ate olotou talitonu katoatoa mote mautinoa tonu ite olotou Aliki.

Fakalogo fakalei, O Tupu (Sultán ‘Abdu’l-‘Azíz), kite lauga a Ia tela e faipati kite mea tonu, a Ia tela e seki fai atu ke taui atu a Ia ki mea ate Atua ko oti ne filifili o fakaeke ki luga ia koe, a Ia Tela e sasale fakalei loa ite Auala tonu. A Ia tela e kalaga atu kia koe kite Atua, tou Aliki, Tela e fakaasi atu kia koe ate koosi sao, ate auala tela e oko atu kiei kite tinaa fiafia tonu, kote mea ke fiafia a koe mo latou kola e ttau o lei.

Faeteete, O Tupu, ia koe ke se aumaigina a minisita o fakatasi mai i ou tafa kae tautali i naunauuga faitogafiti, kola ne pei mai i olotou tua a mea kola ko oti ne fai ne olotou lima kae fakaasi fakalei mai loa ate faitogafiti ote olotou fakamaoni. Ke kaimalie koe ki niisi pela mote Atua ne kaimalie kia koe, kae sa liakina a mea e lei ki ou tino kite alofa-fakamagalo ki minisita penei. Sa tuku fakaatea ate mataku kite Atua, kae fai pela mo latou e uiga tonu. Luku mai i ou tafa a minisita kola e mafai ne latou o lavea ate manogi gali ote talitonu mote fakamasinooga tonu, kae puke ne koe a apoapoaiga kona mo latou, kae filifili so se mea tela e sili i ou mata, kae fai pela mo latou e uiga kaimalie.

Ke iloa tonu ne koe me i so se tino tela e se-talitonu ite Atua e se-fakatuanakigia io me e faipati tonu. Tenei, e tonu, kote mea tonu, kote meatonu e seai se fakalotolotolua iei. A ia tela e uiga mote se-fakamaoni kite Atua ka uiga foki mote se-fakamaoni ki tena tupu. E seai se mea e mafai o fuli a se tagata pena mai ite masei, e seai e ana mafai o taofi a ia mai ite faitogafiti ki tena tuakoi, e seai e mafai o takolekole a ia ke sasale ite auala tonu.

Fakalogo ko koe ke se-lisaina mai i faigaa-mea o tou maaloo ki lima o niisi tino, kae sa manava ite talitonu o minisita e se-taaua i tau talitonu, kae sa fai pela mo latou e ola ite se-fakalogo. Teke keatea a latou kola e olo a olotou loto ko fuli keatea mai ia Koe, kae sa tuku a tou talitonu kia latou, kae sa-fakaeke kia latou au faigaa mea mo faigaa mea a latou kola e fai pela ia latou e lavea a tau talitonu. Faeteete ia koe mana talia ate losa ke fai pela me se takitaki mamoe ote lafu mamoe ate Atua, kae sa liakinagina ate manuia o Ona fagasele kite alofa fakamagalo o latou matagaa. Sa fakamoemoe ia latou kola e ofa a tulafono ate Atua e fakanaagina io me e fakamaoni i olotou talitonu. Fakaseke mai ia latou, kae tausi leoleo fakalei ia koe, auaa i olotou faifaiiga mo faitogafiti ma fakamae atu kia koe. Fuli keatea mai ia latou, kae tuku tonu a tau kilo kite Atua, ko tou Aliki, kote Matagofie-Katoatoa, kote Tafasili ite Alofa-Mataefa. A ia tela e tuku katoatoa a ia kite Atua, ate Atua, e tonu ka fakatasi mo ia; kae ko ia tela e tuku a tena talitonu fakamaoni kite Atua, ate Atua ka fakatasi mo ia; a ia tela e tuku a tena fakatuanaki katoatoa kite Atua, ate Atua, e tonu, ka puipui a ia mai i so se mea tela e mafai o pakia a ia iei, kae puipui a ia mai ite masei o so se tino e fakatoka ne ia ate masei.

Moi fai a koe e tuku mai a tou taliiga ki Aku faipatiiga kae tautali ki Aku apoapoaiga, ate Atua ka fakamaluga a koe kise tulaga tafasili ite maluga tela e seai se faitiooga a se tagata ite lalolagi kaatoa e mafai o puke atu io me o fakamae a koe. Molimau, O Tupu, mo tou kano loto pela foki mo tou foitino kaatoa, a akoakoga ate Atua, kae sa-sasale i auala o latou pule sauaa. Puke ne koe, kae puke loa ke mau ou lima ki tou mafi, ate puleega o faigaa-mea a ou tino, kae iloilo a mea kola e tau kia latou. Sa faigia se mea ke sao mai ia koe, auaa ei i loto e takato ate mea tafasili ite lei.

Avatu a fakafetai kite Atua auaa ne filigina a koe mai ite lalolagi, kae fai a koe me se tupu i luga ia latou kola e talitonu pela mo koe. E ttau mo koe o atafia a alofaaga fakaofoofogia kola ne alofagia a koe ne te Atua, ke tumau o fakalasi a Tena igoa. E mafai ne koe o tavae a Ia mafai a koe e alofa ki Ana fagasele, kae leoleo kae puipui Ana tavini mai ite faitogafiti o latou se-fakamaoni, kote mea ke seai lele e pule sauaa kia latou. E ttau mo koe, tena laa, o tu ki luga o fakamaalosi ate tulafono ate Atua ia latou, kote mea ke mafai koe o fai pela mo latou kola e mautakitaki i Tena tulafono.

Kafai a koe e fai ne koe a vaitafe ote fakamasinooga tonu ke salalau a olotou vai i vasia o au tino, ate Atua e tonu ka feasoasoani ki agelu ote se-lavea mote lavea, kae ka fakamaalosi a koe i olotou meafai. Seai se Atua na ko Ia. Ate foafoaaga kaatoa mo ona maaloo ea Ia. Kia Ia e foki atu a galueega ate fakamaoni.

Sa tuku gina a tou talitotnu ki luga i ou kope taaua. Tuku a tou talitonu kaatoa ite agalelei ote Atua, tou Aliki. Ke fai a Ia me ko tou talitonu i so se mea a koe e fai, ke pela mo latou ko oti ne tuku a latou ki Tena Finagalo. Ke fai a Ia mo tou feasoasoani kae fai a koe ke maumea i Ana koloa taaua, auaa ia Ia ko koloa taaua o lagi mote lalolagi. E fakaeke ki luga ia latou i so se tino e loto a Ia kiei, kae mai i so se tino e loto a Ia kiei e taofi foki mai ia latou. E seai aka foki se Atua na ko Ia, kote Pule-Kaatoatoa, kote Tavaegina-Katoatoa. Katoa ne tino mativa ite mataloa o Tena alofa fakamagalo; katoa ne fatauvaa i mua ote faaliga o Tena nofoaiga-a-tupu, kae akai fakamolemole ki Ana alofaga.

Sa sopoia atu i tuakoi ote fuafua-tau, kae galue ite faimea tonu mo latou kola e tavini atu kia koe. Tuku atu ki luga ia latou e tusa mo olotou manakooga, kae seai kote mea ke mafai ne latou o fakatupu a olotou koloa moo latou, o fakalakei a olotou foitino, o fakagaligali a olotou fale, o faka-maua a mea kola e seai se aogaa kia latou, kae ke lau a latou mo tino e faka-maumau valevale a mea. Galue mo latou i se fai mea tonu e mautakitaki, kote mea ke seai ia latou e puapugaa io me e fakapelepelegina ki mea fakafiafia. E tenei ate tinaa fai meatonu.

Sa taliagina ko tino masei ke pulepule i luga kae fakatonutonu a latou kola e fakaaliki kae taaua o faka-aloalogina, kae sa faka puapuaga gina a latou maluga kei i loto ite alofa fakamagalo o latou e faka taema kae seai ne aogaa, auaa e tenei ate mea e lavea ne Matou ite taimi ne oko atu Matou ite Fakai Lasi (Constantinople), kae kiei a Matou e molimau. Ne maua ne Matou i loto i vasia o tino nofo i kona a niisi o latou e tafasili ite maumea kae e ola i kona mo koloa ko silia ka ko niisi e nofo fiakai kae mativa. E se mata lei ate mea tenei ki tou nofoaiga-a-tupu, kae e se ttau ki tou tulaga.

Ke mafai a Taku apoapoaiga o lei kia koe, kae taumafai a koe o pule mote fakapau o tagata, kote Atua ke mafai o fakamaluga a tou igoa kae fakalasi atu ki tua atu ate takutakua o tou fai meatonu ite lalolagi katoatoa. Faeteete ia koe mana to-tavae au minisita kae liakina au tino. Mataku ki musumusuuga a tino mativa mo latou amiotonu i olotou loto, kola i mapaaga o aso taki tasi, e tagi fanoanoa ite olotou tulaga faka-alofa, kae fai a koe kia latou pela me se tupu lei. E ttau mo koe, telaa la, o leoleo ou kope taaua mai ite puke ne latou kola e manako o kaisoa au mea. Sukesuke ki loto i olotou meafai, kae fakapatonu, i tausaga taki tasi katoa, ikaai i masina taki tasi katoa, ate tulaga o latou, kae sa fai pela mo latou e se-fai fakalei ate olotou tiute.

Tuku i ou mua ate Paaleni (Balance) ate Atua e se-mafai o see, pela me se tino e tu i Ona mua, fuafua ne koe ite Paaleni tena i au mea ne fai i aso taki tasi katoa, i so se minute o tou olaaga. Aumai a koe ke laulau ia koe ka manakomia fakavave ki se fuafuaaga, ite Aso tela e seai se tagata ka isi sena maalosi o tu ona kote mataku kite Atua, kote Aso tela a loto o latou se-fakalogo ka fai ke polepole.

E ttau mo so se tupu ke lima mafola pela mote laa, tela e fakamaalosi ate ola o tino katoa, kae avatu ki tino taki tokotasi a tena tusaga, kola ona penefiti e se-nofo i loto ia latou, kae e fakaekegina mai ne Ia Tela kote Tafasili ite Maalosi, kote Mafi-Katoatoa. Ate Tupu e tau o kaimalie, kae salalau silia i tena alofa fakamagalo pela mo kaumana, kote maligiiga o tena alofa-lauefa e maligi ifo ki luga i fenua taki tasi katoa, mai ite fakatonuuga a Ia Tela kote Tafasili ite Fakaeke, kote Iloa-Katoatoa.

Ke faeteete mo aa e tuku au meafai ote maloo ki lima o niisi tino. E seai aka foki e ana maua o fai fakalei au galueega iloo a koe loa ia koe. Telaa la e fakamaina atu ne Matou kia koe a Omotou pati ote atamai, kae tuku ifo ki lalo ia koe ke mafai iei ne koe o ave mai i tou sema ite lima ote pule sauaa kite faka-ata-mai o koe kote lima ote fai meatonu, kae fakapilipili atu kite vasa malifalifa o Ana alofaaga. E pena ate auala ne sasalegina ne tupu mai i ou mua, a latou ne fai ne latou ate mea e tonu ki olotou tino, kae sasale mautakitaki i auala ote fai meatonu.

A koe kote ata ote Atua i luga ite lalolagi. Taumafai, telaa la, o galue i se auala e tusa mo tulaga tafasili ite maluga kae taaua. Kafai a koe e fakaseke mai ite tautali ki mea a Matou ko oti ne fai ke olo ifo ki luga ia koe kae akoako atu kia koe, a koe tonu eiloa, ko faka foliki ne koe ate fakaaloalo takutakua mote tafasili ite taaua. Foki mai, tena laa, kae piki mau katoa kite Atua, kae fulu ke maa a tou loto mai ite lalolagi mo ona mea fakamatamata e fai, ke se faka-aogaa a te alofa o so se tino kese e ulu atu o nofo i loto. Vagana ko oti ne faka piua a tou loto mai i so se lailaiiga o se alofa pena ko mafai iei ate ata malipolipo ote mainaaga ote Atua o sulu maina ki luga iei, auaa e seai aka foki se isi ne tuku ne te Atua ke uke atu ana fatu. Tenei, e tonu, ko oti ne fakatonu mai kae tusi i lalo i Tena Tusi mai anamua loa. Kae pela mote fatu o tagata, ne fakafoliga mai ne te Atua, e tasi kae e se-mavaevae. E ttau mo koe o fakalogo ko ona alofaaga ke tasi foki kae e se-mavaevae. Piki mai a koe, telaa la, mote alofaga o tou loto katoatoa, ki Tena alofa, kae tapale mai keatea mai ite alofa o so se isi tino aka na loa ko Ia, kote mea ke mafai a Ia o feasoasoani a koe ke apulu ifo kite vasa o Tena fakatasitasi, kae fakamafai a koe ke fai mo tino sapooti tonu o Tena tafatasi. Ate Atua ko Taku molimau. Ko Toku pogai kaatoa o fakaasi atu kia koe a pati konei kote mea ke fakamana a koe mai i mea se-tumau ote lalolagi, kae feasoasoani a koe ke ulu kite lalolagi ote matagofie favavau. Kote mea ke mafai, ite taliaaga ate Atua, o fai pela mo latou e mautakitaki kae pule i loto….

Au e tauto ite Atua, O Tupu! E seai ko Toku manakooga o fai se fameo Aku kia koe mo latou kona e fakasauanoa ne latou Aku. Au e akai ki Toku fanoanoa mo Toku se-fiafia kite Atua Tela ne faiite ne Ia a Aku mo latou, Tela e iloa fakalei a tou maaloo kae Tela e taumata i luga i mea katoa. A Toku manakooga kena fai se uonigi kia latou ki mea ka tupu mai ona ko olotou amioga, eiloa la e teke ne latou ate mea a latou e fai ki niisi tino pela mo olotou mea ne fai kia Au, kae a latou ke falaogo ki Aku uonigi.

A puapuagaa kola ne oko mai kia Matou, ne lagona ne Matou ate mativa mote tigaina, ko vaegaa fakalavelave ne feagai mo Matou, ka olo katoa o galo atu, pela loa mo fiafiaaga ka olo katoa o galo atu kola e lifu a latou mote maumea e fina latou kiei. Tenei ate mea tonu tela e seai se tagata ite lalolagi e mafai o teke atu keatea. A aso ko oti Matou ne faifitoi ke nofo ite pefu ko pili o oti, pela mo aso kola e nofo latou i nofoaga ote fakaaloalo. Kote Atua, e tonu, ka fakamasino mote meatonu ite vaa o Matou mo latou, ko Ia, e tonu, kote fakamasino sili i famasino katoa.

A Matou e tuku atu a fakafetai kite Atua i so se mea ne tupu kia Matou, kae ko Matou e kolomaki mote onosai a mea ko oti ne fakaeke mai ne Ia i taimi ko teka kae ka fakaeke mai i taimi mai mua. A Toku talitonu ne tuku kia Ia; kae ki Ona lima ne fakamau ne Au a Taku Talitonuuga. A Ia e tonu loa, ka taui kia latou katoa kola ne kolomaki mote onosai kae tuku ate olotou talitonu ia Ia. A Ia kote foafoaaga mo tena maaloo. E fakamaluga a ia tela e manako a Ia kiei, mo ia tela e manako a Ia o fakamalalo. A Ia e se faka-fesiligina kia Ana mea ne fai. A Ia, e tonu, kote Matagofie-Katoatoa, kote Mafi-Katoatoa.

A tou taliga ke fakalogo fakalei, O Tupu, ki pati a Matou ne fai atu kia koe. Ke fai ate tino pule faifitoi ke fakagata a tena pule sauaa, kae kati keatea a tino e solisoli ne latou ate faimea se-tonu mai i vasia o latou kola e fai pela ia latou e talitonu. Mai ite amiotonu ote Atua! A puapuagaa ne maua ne Matou tela a so se pene e laulau a latou e se-mafai na fua kote ofo ite tigaina. E seai ia latou tela e talitonu tonu kae puke ne ia ate fakatasitasi ote Atua e mafai o kolomaki ate mafa e toe lau ne latou. E tafasili ite takutakua ate puapuagaa o Matou i mata foki loa Omotou fili ne tagi lotu lotu i luga ia Matou, kae mai i tua atu ko so se tino matakite. Ki tofooga katoa konei, a Matou e uiloa a Omotou faiga o fakapilipili atu kia koe, kae akai fakamolemole ki tino ke ulu mai i lalo o tou ata, ko tou olo-puipui tafasili ite maalosi kia latou kola e talitonu ite fakatasitasi ote Atua.

O Tupu, Au kai se-fakalogo aka loa kia koe? Kai isi aka loa se taimi, ne soli tulafono Au i se isi o au tulafono? E mafai ne so se minisita kola e sui ia koe i ‘Iráq o aumai ne fakamaoniiga e iloa iei a Toku se-fakamaoni kia koe? Ikaai, ia Ia Tela kote Aliki o lalolagi katoa! E seai se tasi o taimi toetoe a Matou ne teke atu kia koe, io me ko se isi o au minisita. E se mafai, te Atua e loto kiei, e tu Matou o teke atu kia koe, e uiloa a Matou ne mafai o matea a tofotofooga e tafaga atu ite masei iloo Ate Motou puapuagaa i taimi ko teka.

Ite ao mote po, pela foki mote taeao, Matou e talosaga kite Atua mo koe, kote mea ke mafai a Ia o feasoasoani atu kia koe mote agalelei kae fakalogo kia Ia kae e tautali ki Ana tulafono, kote mea ke mafai a Ia o puipui a koe mai i lukuuga o tino masei. Telaa la, fai ate mea e fakafiafia kia koe, kae fai mai a mea kia Matou kola e ttau mo tou tulaga kae lei foki ki tou nofoaiga-a-tupu. Sa puli a tulafono ate Atua i so se mea e manako koe o fakataunu, nei io me ko aso ka aumai. Fai atu: Tavaegina ate Atua, kote Aliki o lalolagi katoa!

Ate Pene ote Faaliiga, O Dhabíh, ko oti, ite lasiiga o Tapeleti ne fakaasi mai faka-te-lagi, ne fakamau a muna konei: Matou ko oti ne polopoloaki a tino fagasele katoa ate Atua ke fakalogo auaa ite kapa temu ote gatu mana o Matou mana pisipisiia ite pela o amioga se-tonu, io me e lailai ite pefu o uiga tafasili ite faka taema. Matou ko oti, ne fakamaalosi kia latou ke fakapiki ate olotou kilo ki luga i so se mea ko oti ne fakaasi mai i Tapeleti a Matou. Moi fai a olotou taliga faka-te-agaaga ne fakalogo fakalei ki apoapoaiga Faka-te-Lagi kola ne sulu maina mai ite Punaa Aso ote Pene ote Alofa-Fakamagalo Katoatoa, kae fakalogo ki Tena Leo, ate taulasiiga o tino ote lalolagi ko leva ne fakagaligali ki lakei o Tena takitakiiga. Ate mea tela ko afea loa ne fakasino mai, ko oti ne mai kae ko teka atu.

E toe fai foki ate Laulaufaiva ote Favavau o Aso ne fakaasi, mai iloto ite Falepuipui Tafasili ite Takutakua, a muna konei, kola e tusi ite Kofuuga-a-Pepa lanu kena pela me se kiona: O koe kote fagasele ate Atua tonu tokotasi! Olo mai i tua atu o outou nofoaga lauliki i outou manakoga masei kae faitogafiti, kae olo ki mua ite matuaa kogaa koga lasi kae tafasili ite luefa ote maaloo ote Atua, o nofo mafuta koutou iei ite vai inu fakamanagina mote motu mai keatea, kote manogi gali o outou galueega ke mafai o taaki atu ate saofiaaga o tagata kite vasa ote matagofie se matafitafi ote Atua. Fakaseke mai keatea mai ite saga fua o koutou mo meafai ote lalolagi tenei mo mea katoa kola e tau atu kiei, io me kote fia kaukau i loto i meafai o latou kola ko takitaki mai i tua atu.

Ate Atua tonu tokotasi, ke fakamaluga a Tena matagofie, ko oti ne tuku atu ate maaloo ote lalolagi ki tupu. E seai aka foki ne tuku kiei se saolotooga o fai sena mea i so se auala tela e fano faka-ko-tua ki manatu filifilia o latou kola e pule pule. Ate mea tela ko oti ne taofi ne Ia mo Ia loa ko fakai lasi i loto o tagata; kae ia latou kona ko fagasele a Ia Tela kote Tupu ote Meatonu, ite Aso tenei, pela mene kii. Fakamolemole te Atua ko latou ke mafai, tasi kae katoa loa, o fakamafai o tala, mai ite paoa ote Igoa Tafasili ite Takutakua, a mataloa o fakai lasi kona. E tenei ate uiga kote feasoasoani ate Atua tonu tokotasi – se mataupu tela ate Pene a Ia Tela ne fai ne Ia kote ata-ao ke mapaa ko oti ne fakaasi i Ana Tusi mo Tapeleti katoa.

Se tiute, telaa la, ko fagasele ate Atua ke onosai ki olotou tino foki loa, kae ke malu kae motu keatea mai i mea katoa, kae ke fakaasi atu a se fakamaoni mote fai meatonu, kote mea ko tino katoa ote lalolagi ke mafai o lavea a latou me ko sui taaua fakatuanaki gina ate Atua i vasia o tagata. Manatua kite tumutumu maluga a poloakiiga ate Mafi-Katoatoa ne lele mai iei, kae e pefea ate malalo ote koga nofo e nofo iei a agaaga ola se maalosi. Fakamanuia a latou kolaa, i kapakau ote mautinoa tonu, ko oti ne lele atu i lagi ate Pene a Tou Aliki, kote Alofa-Fakamagalo Katoatoa, ko oti ne salalau.

Molimau, O Dhabíh, ki gaalueega ate Atua, kote Tupu ote Meatonu, ko oti ne faiite. Fai atu a koe: E pefea ate takutakua, e pefea ate sili ite takutakua, ate paoa o Tena mafi tela e siomia iei a lalolagi katoa! E maluga tafasili ite maluga, a Tena motu mai keatea i luga atu ite oko atu mote poto ote foafoaaga kaatoa! Matagofie, matagofie ki Tena agamaluu – se agamaluu tela ko oti ne liua a loto o tagata kola ko oti ne aumai fakapilipili kite Atua!

E uiloa e puapuagaa i puapuagaa e se maua o laugina, kola a Matou ne pokotia iei i lima o Omotou fili, Matou ko oti ne fakasalalau atu ki takitaki ote lalolagi ate finagalo ote Atua ke folafola atu, ko maaloo ke mafai o iloa ne latou me e seai se vaegaa puapuagaa e mafai o fakagasue ate Pene o Aso ote Favavau mai ite fakataunu a tena pogai. Tena Pene e gasue mai ite taliaaga ate Atua, Tela a Ia ne fakafoliga a ivi pala kae malepelepe.

E mafaufaugina ate taumafaiiga tafasili ite mafi tenei, e manakomia ko latou kola e alofa kia Ia ke sai faka itia a feitu o te olotou taumafaiiga, kae ke tuku ke mau a olotou mafaufauuga ki so se mea tela e fakapatonu iei ate manumaaloo ote Talitonuuga ate Atua, iloo ate saga ki galueega e seai se aogaa kae fatauvaa. Moi fai a koe e mafaufau, kise taimi foitiiti, a galueega mai i tua mo faiga a Ia Tela ko Ia kote Meatonu Favavau, ka to ifo ki lalo ite laukele, kae kalaga atu: O ko Koe Tela kote Aliki o Aliki! Au e molimau ia Koe kote Aliki ote foafoaaga kaatoa, mote Faiakoga o tino katoa, lavea mote se-lavea. Au e molimau me i Tou paoa ko oti ne siomia iei ate iunivesi katoatoa, ka ko lukuuga ote lalolagi e se-mafai lele o faka fanoanoa a Koe, io me e mafai ate paoa o tino o taofi a Koe mai ite fakataunuuga o Ou fakamoemoeega. Au e fai tonu atu ia Koe me e seai Sou manakooga vagana kote toe fakafouuga o te laolagi sau kaatoa, mote fakatuuga ote fakatasitasi o ona tino, mote fakaolataga o latou kola e nofo iei.

Toe mafaufau aka, kae iloilo me ne pefea a latou kola ko fagasele ate Atua e amioga pefea, kae ne aa foki a tumutumu maluga e ttau mo latou o lele kiei. Akai fakamolemole, i taimi katoa, ki Tou Aliki, kote Atua ote Alofa-Fakamagalo, ke feasoasoani a latou ke fai ate mea Tela e manakomia a Ia kiei. A Ia, e tonu, kote Tafasili ite Maalosi, kote Matagofie-Katoatoa, kote Iloa-Katoatoa.

Ate faka pagota ite falepuipui ne fakamae kite Tokotasi ne faka-seegina tenei, O Dhabíh, e seai se mae ne oko kia Ia io me e mafai o fakamae lele loa a Ia; io me kote galo o Ana kope faka-te-lalolagi katoa, i Tena faka-fenua kese, io me ko Tena mate faka-matulo mote fakalumaluma, e se-mafai o mae kia Ia. Ate mea tela e mafai o mae kia Ia ko galuega leaga kola a fagasele ate Atua e fai, kae e loosi kia Ia Tela kote Tupu ote Meatonu. E tenei ate puapuagaa e mae iei Au, kae kite mea tenei a Ia, Tela e maalosi i luga i mea katoa, e fai mo Aku molimau. Ate mea tela e fakamae kii kia Au ko fakatagi a tino ote Bayán e fakamaalosi ne latou i aso taki tasi. Ko niisi e folafola ate olotou olo tasi mote tokotasi o Aku Kaula (Tama taagata), ka ko niisi e fai loa ia latou a olotou fakatagi, kae olo loa o fai a manakooga o latou.

O Dhabíh! Ate Laulaufaiva ote Fofoga ote Agalelei e fai mai: Ona ko Au tela e faipati kite meatonu! Ite Faaliiga tafasili ite takutakua tenei i Vaasia-Taimi katoa ko teka ko oti ne oko atu kite maluuga mote fakaotiiga o latou. So se tino tela e fai sena fakapulaaga ki se Faaliiga mai i tua o Ia, a se tagata pena e tonu loa se tino pelo. Matou e talosaga kite Atua ke mafai ne Ia o feasoasoani mote agalelei kia ia ke toe fakafoki kae liakina a se fakatagi pena. Kafai a ia e salamoo, ate Atua ka se taumate ka fakamgalo a ia. Kae kafai, a ia e tumau loa itena mea see, ate Atua e tonu ka tuku ifo ki lalo ia ia se faiga e tafasili ite logomae. A Ia, e tonu, kote Mafi-Katoatoa, kote Tafasili ite Maalosi.

E lavea ne koutou i tino ote Bayán ne fakatamala kii loa o lavea ite fakamoemoeega fakapitoa o so se mea a Taku Faifekau Taluai mote Teuteuala o Toku Gali ko oti ne fakaasi ko Taku Faaliiga mote folafolaaga o Taku Talitonuuga. E see-mafai lele – kae kite mea tenei a Ia Tela kote Tupu ote Meatonu e fai mo Aku molimau – ko Ia ko oti, kae mo Au, e fakasalalau atu ate mea tela ne fakasalalau ne Ia. Molimau me e pefea a tino valea konei ne fai a olotou mea kite Talitonuuga a Ia Tela kote Pule-Aoao katoatoa, kote Se-Mafai o Okogina, pela me se tafaoga mo se fakafiafiaaga! A olotou loto e faka-maua se mea faigalueega fou i aso taki tasi katoa, ka ko olotou fiafaiiga e taaki atu a latou o salasala se kogaa koga fakafiafia fou. Kafai ate mea e fai mai ne latou e tonu, e mafai pefea ate mautakitaki ote Talitonuuga o Tou Alliki o fakapatonu? Mafaufau kite mea tenei i tou loto, kae fai a koe pela mo latou kola e matakite, kola e mafai o savea mote faeteete, kola e mautakitaki i olotou fakamoemoeega kae mautinoa ite olotou talitonu. A se mea pena e ttau ko tau mautinoa tonu me kafai ate saofiaaga katoa o tino e fai ne olotou fakatauuga pena e seai aka loa se tagata ne isi sena fakatagi pena, io me se mafaufau ne moemiti gina ne ia, a koe ka se puli lele loa ia latou, ka se liakina keatea mai ia koe, kae ka tuku mau a ou mata kia Ia Tela kote Pogai o tapuakiiga o lalolagi kaatoa.

Mai ite amiotonu o Au ia Au loa! Takutakua, e see fuafuagina ite takutakua kote Talitonuuga tenei! E tafasili ite Mafi, e see mafaufaugia ite mafi ate Aso tenei! Fakamanuiaaga e tonu kote tagata tela ko oti ne liakina a mea katoa, kae fakatoka ona mata ki luga ia Ia Tela Ona mata ko oti ne sulu atu ate mainaaga ki luga ia latou katoa i lagi mo latou katoa kola ite lalolagi.

Ke makaikai e ttau ko tau kilo, O Dhabíh, kae mo aa e gasuesue a tou agaaga ola, ka ko ou vae ke makeke pela ne fiti, mafai e manako ko koe ke see luegina ne fai taua o manakooga kaimanako kola e musmusu i fatafata o tagata. Mea nei kote poloakiiga mautakitaki ate Pene ote Igoa Tafasili ite Takutakua, ona kote Finagalo ote Tupu Favavau, ko oti ne gasue o fakaasi mai. Tausi a ia me se apolo o tou mata, kae fai a koe mo latou kola e fakafetai. Taumafai a koe ite ao mote po o galue tavini ate Fakatokaaga a Ia Tela kote Meatonu e See Gatamai, kae fai a koe ke motu mai keatea mai i mea katoa loa vagna ko Ia. Mai ia Au! So se mea e lavea ne koe ite Aso tenei ka tanumia ki lalo. E silisili ite maluga ko tou tulaga, mafai a koe e tumau ite mautakitaki ite Fakatokaaga a tou Aliki. Ki mua ia Ia ko ou taimi fakalavelave e gasuesue kiei, kae ia Ia ko tou kogaa koga malolo fakaoti.

O tupu ote lalolagi Kelisiano! E seki lagona ne koutou a muna a Iesu, te Agaaga ote Atua, “Au e fano, kae e toe vau kia koe”? Kaiaa la ne fakatamala iei a koutou, ite taimi ne toe foki ma a Ia kia koutou i kaumana ote lagi, o fakapilipili mai kia Ia, ko koutou ke mafai o lavea Ona mata, kae fai pela mo latou ne oko mai ki Tena Nofo-mai? I sua fuaiupu Ana muna: “Kafai a Ia, ate Agaaga ote Meatonu, e vau, a Ia ka takitaki a koutou ki meatonu katoa.” Kae e ui iai, kilo aka, ite taimi ne vau loa a Ia mote meatonu, a koutou ne ita ma fuli a outou mata kia Ia, kae tumau mai loa a koutou o fai a outou mitamitaaga i outou faka-fiafiaaga mo moemitiiga. E seki fakafetaui ne koutou, io mene salasala ne koutou a Tena Nofomai, kote mea ke lagona ne koutou a kupu ate Atua mai i Tena gutu, kae kautasi koutou ite atamai tuafia ote Mafi-Katoatoa, kote Matagofie-Katoatoa, kote Atamai-Katoatoa. Ona kote oulua fakatamala, ne pogai iei o fakalave ate manavaaga ote Atua mai ite agiagi iluga ia koutou, kae taofi mai i outou agaaga ola ate magalogalo ote suamalie o tena manogi. Ne tumau koutou o olo saale i fiafiaaga ote vanu o outou manakoga leaga. Koutou, mo mea katoa a koutou, e olo o seai. Ka ko koutou, e iloa tonu, ka foki kite Atua, kae ka manakogina ke laulau atu a mea a koutou ne fai i Ona mua Tela ka fakapotopoto mai ne Ia ate foafoaaga kaatoa….

Luasefulu tausagaa ko teka, O tupu, ite taimi tena, Matou ko oti i aso taki tasi, ne tami kite logomae o puapuagaa fou. E seai se tino ia latou kola i Omotou mua ko oti ne kolomakigia a mea ne kolomaki ne Matou. E mafai o atafiagia ne koe! Latou kola ne tu o teke mai kia Matou ne tamate ne latou a Matou, ne maligi a omotou toto, ne kaisoa a omotou kope, ke ofa ate omotou malu. E uiloa e iloa ate lasiiga o omotou puapuagaa, a koe, ne fakatamala o taofi a lima ote pule sauaa. Auaa e se-maina me ko tou tiute o taofi ate pule sauaa, kae fai ke tonu a mea mo olotou tino, kote mea ke iloa fakalei ki tino katoa ate fai meatonu o koe?

Ko oti ne tuku atu ne te Atua ki oulua lima ate pulepuleega ote maaloo o tino, kote mea ke mafai a koutou o pule mote fai meatonu i luga ia latou, leoleo a saolotooga o latou malalo, kae fakasala a tino agasala. Kafai e fakatamala a koutou ite tiute ne fakasino mai nete Atua i Tena Tusi, a oulua igoa ka lau ia latou kola fai-mea-se-tonu i Ona mata. Tafasili ite fakamataku, e tonu, a tau mea se. Piki mau a koutou ki mea ko oti ne gaosi ne tou mafaufau, kae tuku ki oulua tua a fakatonuuga ate Atua, kote Tafasili ite Maluga, kote Se-Mafai-o-Oko-gina, kote Sili ite Maalosi-Katoatoa, kote Mafi-Katoatoa? Pei keatea a mea kola ea koe, kae piki mau ki mea kola ne fai atu nete Atua ke tautaligina. Salasala ki Tena agalelei, auaa a ia tela e salasala kiei e sasale i Tena Auala tonu.

Mafaufau kite tulaga ko nofo iei a Matou, kae lavea ne koe a masaki mo fakalavelave kola ne fakasekeseke ia Matou. Sa liakinagia a Matou, faitalia me pefea me se taimi fakavave fua, kae sa fakamasino ne koe ate vaa o Matou mo Omotou fili ise kiloga fakapau. Tena, e tonu loa, se feitu e lei kia koe. Tena la, e fai atu ne Matou a Omotou tala, kae e toe fai atu a mea kola ne oko mai ki luga ia Matou, kote mea ke mafai ne koe o ave keatea a Omotou masakiiga kae fakamama ate Omotou amoga. Fai a ia tela ka fakafoliki ne ia a Omotou fakalavelave; pela foki mo ia tela e se-fai ne ia, a Toku Aliki e tonu kote tafasili ite feasoasoani.

Tavini, fakailoa kae fakamasani a tino, mo mea ne avatu ne Matou ki lalo ia Koe, kae fai ate seai se mataku ki se isi tino o fakafanoanoa kia Koe, kae sa-fai pela mo latou e mafulifuli. Ate aso ko fakapilipili mai ate Atua ko fakamaluga a Tena Talitonuuga kae fakalasi a Tena molimau i mata o tino katoa kola i lagi mo latou katoa kola ite lalolagi. Tuku, i fakanofonofooga katoa, a Tou talitonu katoatoa ite Tou Aliki, kae fakamau a Tena taumata ki luga ia Ia, kae sa fuli keatea mai ia latou katoa kola e se-talia a Tena muna tonu. Ke mafai ate Atua, Tou Aliki, mo fai a Tou fakamafanafana mote feasoasoani e lava. Ko oti ne ofo atu a Matou ke maua a Tou manumaaloo iluga ite lalolagi kae ke fakamaluga ate Talitonuuga a Matou mai i luga atu i tagata, e uiloa e seai se tupu ne maua e fuli atu ona mata kia Koe.

Ate Tagata Takutakua, e manako o fakaasi a mea e manakomia muamua kite filemu mote tokaaga malie ote lalolagi mote fano ki mua o ona tagata, ko oti ne tusi mai penei: Ate taimi ko ttau o oko mai kite manakomia tafasili ite faiiga o se lukuuga lasi kae aofia iei a tino katoa ote laolagi. A takitaki mo tupu ote lalolagi e ttau o kau kiei, kae kau fakatasi foki i ona fonotaga, e ttau o iloilo auala mo faifaiiga pena auaa e fola iei a fakavae ote Filemu Tafasili ite Takutakua i vasia o tagata. A se filemu pena e manakomia ko Fenua Maalosi Takutakua e ttau o fakaiku, ona kote filemu o tino katoa ote lalolagi, o faka fealofani ite vasia o latou. Kafai se tupu e faka-aogaa ne ia a meatau ki sua tino, katoa e ttau o tu ki luga o fakagata a ia. Kafai e fai ate mea tenei, a fenua ote lalolagi ko se toe manakogina ne latou a meatau, vagana kote pogai o tausi ate nofo lei o olotou maaloo pela foki mote tausiiga ote filemu i olotou atufenua. Ka fakapatonu iei ate filemu mote nofo toka o tino taki tokotasi katoa, maaloo mote fenua. A matou e fakamoemoe ko tupu mo takitaki ote lalolagi, ko kilo ote agalelei mote mafi katoatoa ote igoa ote Atua, ke mafai o oko atu kite tulaga tenei, kae puipui a tino katoa mai ite fai-taua ote pule sauaa…. Ate aso ko pili mai ki taimi a tino katoa ote lalolagi ka faka-aogaa ne latou se lagona ite iunivesi katoa kae tasi foki se tusitusiiga. Kafai ko oti ne fakataunu tenei, ki so se fakai lasi e fai malaga kiei se tagata, e pela loa me ko ia ne ulufale atu ki tena fale totino. A mea konei e fakatulafonogina kae tafasili ite taaua. E ttau mo so se tagata e matakite kae lamalama o taumafai o fulifuli a mea kola ko oti ne tusi mai kite tinaa mea tonu mote faiga e fai…. A ia tena se tagata tonu loa tela, ite aso nei, e fakamaumau a ia kite tavini galue kite saofiaaga ote lanu o tagata. Ate Tino Tafasili ite Takutakua e fai mai: Fakamanuia kae fiafia ki ia tela e tu ki luga o avaka a feitu tafasili ite sili mo tino mo itu-kaaiga ote lalolagi. I se isi aka o fuaiupu e folafola mai ne Ia: E seai mo ia tela e fakamatamata ia ia e alofa ki tena fenua, kae mo ia tela e alofa kite lalolagi kaatoa. Ate lalolagi se fenua fua e tasi, ka ko tino ko ana sitisini.

Sa liakina fakaatea ate mataku kite Atua, O tupu ote lalolagi, kae faeteete mo aa e solisoli ne koutou a tuakoi ko oti ne fakamau. Tautali ki fakatonuuga ne tuku atu ki luga ia koe i Tena Tusi, kae fakalogo fakalei mo aa e laka atu koe mai i luga atu o tuakoi. Ke matakite a koe, ko koe ke mafai o se faigia se amio se tonu ki so se tino, faitalia me e pela mote foitiiti ote tega masitati. Sasale a koe ite auala ote fai meatonu, ite mea tenei, e tonu, kote auala tonu.

Fakatoka a oiutou kesekeseega, ka fakafoliki ifo a outou meatau, ko amoga o outou fakamau ke tai mama, ka ko oulua mafaufau mo oulua loto ke mafai o fakafilemu. Foo ke lei a faka kinauga kola e mavaevae iei a koutou, ko se manakogia maalosi ne koutou a meatau vagana kote puipui o oulua fakai lasi mo kogaa-fenua. Mataku kite Atua, kae fakalogo mo aa e sopoia atu koutou i tuakoi ote fuafuatau, ke lau koutou mo latou kola e sona fakamaumau mea.

Ko oti ne iloa ne matou ia koutou ko siki aka ki luga a outou mea fakamaumau i tausaga taki tasi, kae tuku atu ate mafaaga ki oulua tino. E tenei, e tonu, e silia atu ite mea e mafai ne latou o amo, kae se amio tafasili ite se-lei. Iloilo fakalei i vaa o tagata, kae fai a koutou pela me ne fuka ote fai meatonu i vasia o latou. Kafai e fakamasino fakalei a koutou, kote mea tela e manakomia kae ttau mo tou tulaga.

Faeteete ia koutou mana fai se mea e se tonu ki so se tino tela e loto koutou kiei, kae ulufale atu ki lalo ite outou malu. Sasale a koutou ite mataku kite Atua, kae fai a koutou pela mo latou e ola i se olaaga faka-atua. Sa fakalagolago ki outou paoa, ko kautau a koutou, mo kope taaua. Tuku a te oulua fakatuanaki katoatoa mote mautinoa tonu kite Atua, Tela ne faiite ne Ia a koe, kae salasala ki Tena feasoasoani ite fakateletelega a oulua mea katoa. Ko Ia fua e maua mai sou feasoasoani. A Ia e feasoasoani ki so se tino e finagalo a Ia kiei fakatasi mo lukuuga mana o lagi mote lalolagi.

Ke iloa ia latou mativa ko latou fakamaoni ate Atua i outou vasia. Faeteete ia koutou mana faitogafiti Ana tino fakanaagia, kote mea ke se sonafai gia a latou kae ke se sasale koutou i auala o latou se-fakamaoni. A koutou ka tonu loa ka kalagagina ke fakamasako mo Ana tino fakamaoni manafai ate Paleni ote Fakamasinooga Tonu ko iku, kote aso tela a tino taki tokotasi katoa ka fakaasi a tena molimau, manafai a fuataga o amioga a tagata kaatoa, me e maumea io me e mativa, ko fuagia.

Kafai a koe e se fakalogo ki apoapoaiga kola, i se gana tafasili ite seai se fakatusa kae e aunoa se see iei, Matou ko oti ne fakaasi ite Tapeleti tenei, ate fakasalaaga Faka-te-Lagi ka kini atu kia koe mai i so se koga, ka kote sala o Tena fakamasinooga tonu ka folafola atu kia koe. Ite aso tena a koutou ko seai lele se paoa o taofi mai a Ia, kae ka iloa foki koutou ate outou seva. Ke iai ate alofa-fakamagalo i luga ia koutou mo latou foki kola mai lalo ia koutou. Fakamasino a koutou ite vaa mo latou e tusa ko akoakoga ne tusi mai ne te Atua i Tena Tapeleti tafasili ite mana kae maluga, se Tapeleti tela ko oti ne vaevae ne Ia ki tino taki tokotasi katoa mo so se mea ko nofo tonu, tela ko oti ne tuku mai ne Ia, ise auala fakamatea, se fakamasakooga o mea katoa, tela ia ia se uonigi kia latou kola e talitonu ia Ia.

Sukesuke a te Omotou Talitonuuga, faka feisiligia ki mea kola ne pakuu ki luga ia Matou, kae fakamasino tonu ite vaa o Matou mo Motou fili, kae fai pela mo latou kola e amio fakapatonu ki olotou tuakoi. Kafai a koe e se taofi a te lima ote tino pule faifitoi, kafai e fakatamala a koe o leoleo a saolotooga o latou malalo, se aa ate saolotooga o koutou o fakamatamata i vasia o tagata? Mata ko meakai mo outou mea inu e miita iei a koutou i luga i koloa e tuku ne koutou i fale koloa a koutou, i luga ite kesekese mote togi o mea fakagaligali e fakalei a koutou iei? Kafai ate matagofie tonu e aofia ite pule o mea kola e olo fua o tanumia, ko tena uiga ate lalolagi tena e sasale a koulua iei e ttau o miita i luga ia koe, auaa e avatu kia koe, kae fakaeke ki luga ia koe, a mea kona, mai ite tonu ate Mafi-Katoatoa. I loto i ona pupuuga e aofia iei, e tusa mote mea ko oti ne fakaeke ne te Atua, a mea katoa kola e iai ia koutou. Mai iei, pela me se failoga o Tena alofa-fakamagalo, e maua mai iei a outou maumea. Kilo kite oulua tulaga, ate mea tela a tou matagofie! E mata e mafai ne koe o lavea!

Ikaai! Ite Ia Tela e puke mau i Tena lima ate maaloo ote foafoaaga kaatoa. E seai aka foki se koga a tou matagofie tonu kae fakatuanaki e nofo iei vagana ite piki mau o koe ki akoakoaga ate Atua, mo tou fakalogo katoatoa i Ana tulafono, ko tau ikuuga o lavea ia latou e see nofo fua aunoa mote fakamaalosiiga, kae tautaligina mote fakamaoni ite koosi tonu.

O koutou ko takitaki ote lalolagi! Kaiaa a koutou ne ponogia ate malifalifa ote Laa, kae fai a ia ke se maina? Fakalogo fakalei ki apoapoaiga ne tuku atu kia koutou ne te Pene ote Tafasili ite Maluga, ke fiafia a koutou pela foki mo tino mativa ke mafai o maua ia koutou ate tokaaga malie mote filemu i luga ite lalolagi. A Ia, e tonu, e fai ate me tela e loto a Ia kiei.

O tupu ote lalolagi! A Matou e lavea faeloa a koutou i tausaga taki tasi katoa e mu mea aka ki luga a outou fakamaumau, kae tii ne koutou ate amoga ki outou tino. Tenei, e tonu, e katoatoa kae tafasili ite se-tonu. Mataku ki musumusuuga mo loimata o Tokotasi ne faka-see-gina, kae sa kavegia ne amoga ki luga i outou tino. Sa kaisoagina a latou mai olotou palesi mai i tua mo koutou; ikaai kae filifili mo latou a mea kola e filifili ne koutou mo koutou. Tena Matou ko oti ne folafola atu ki ou mata a mea kola e polofiti kia koe, mafai a koe e lavea ne koe. A ou tino ko au koloa taaua. Faeteete auaa i au fakatonuuga mana ofa ne latou a tulafono ate Atua, kae fakaoko atu ki ou fakai ki lima ote tino kaisoa. Ia latou a koe e pule pule, mai i olotou koloa e ola a koutou, mai ite olotou feasoasoani e faka takavale ne koe. Kae e ui iai, e kilo koe kia latou mote faka tauemu! E pefea ate kese, e pefea ate kese kii loa!

Kae nei ko se talia ne koe ate Filemu Tafasili ite Takutakua, puke mau kite mea tenei, kote Filemu Foliki, kote mea ke mafai koe o fiafia ki se tulaga e atili lei atu ou nofonofooga pela foki mo latou kola e fakalagolago kia koe.

O takitaki ote lalolagi! Ke fakalei ate vaa o koutou, kote mea ke se toe manako koutou ki meatau vagana kote leoleooga o outou fenua mo maaloo. Faeteete ia koe mana se-fakalogo kite poloakiiga ate Iloa-Katoatoa, kote Fakamaoni.

Ke fusi fakatasi a koutou, O tupu ote lalolagi, auaa i kaumatagi maalosi ote se-fealofani e tumau ite vasia o koutou, kae maua se malolo o outou tino, manafai a koe ko latou kola e maina. Kafai a se tino mai ia koutou e faka-aogaa a mea tau ki sua tino, tu koutou katoa ki luga o teke a ia, auaa tenei e seai aka foki na kote fakaasiiga ote faimeatonu.

O koutou ko sui filifillia o tino i fenua katoa! Faipati a koutou fakatasi, kae tuku a oulua fakatauuga ki mea fua kola e aogaa mote saofiaaga o tino katoa, mote fakalei atu o nofonofooga iei, mafai a koutou ko latou kola e iloilo mote faeteete. Kilo kite lalolagi pela mote foitino o tino tela, e ui iai i tena foafoaaga kaatoa kae sako, ko oti ne pokotia, mai i pogai kese kese, mo te faimasei loa ate numi mo masakiiga. E seai se isi ne maua se lei, ikaai ko tena masaki ne olo loa tai masei atu, ite talavaiiga ne tokita valea, kola ne saga loa ki manakooga leaga o latou, kae ne see kii loa, Kae kafai, i so se taimi, mai i luga ite tausi ase tokita e apo, a se vaega o te foitino tena e lei, ate toeega ote foitino e tumau e se pokotia pela loa mai i mua. Tena ko iloa ne koe ate Iloa-Katoatoa, kote Atamai-Katoatoa.

Matou e lavea, ite aso tenei, ite alofa fakamagalo o takitaki e magii ite miita ko se-maua ne latou o atafia fakalei a mea lei kia latou, kae mutana ifo ite atafia ne latou ate Faaliiga ite fakaofoofogina mote numi. Kae kafai a se isi o tino ia latou ko oti ne taumafai o fakalei aka a tena tulaga, ko ona fakamoemoega ko fai mo ana mea ne maua, e ui iei e iloagina me ikaai; kae kote seai se-taaua o te fakamoemoega tena e faka tapula ana paoa o fakalei io me o faitogafiti kiei.

Ate mea tela ko oti ne fakaeke mai ne te Aliki me kote tupu o fakaleiiga kote mea faigalueega tafasili ite mafi mote fakaleiiga o masaki ote lalolagi kaatoa kote fusitasi o ona tino katoa ite Talitonuuga e tasi katoa ite iunivesi, se Talitonuuga aoao e tasi. E se-mafai o fakataunu ate mea tenei vagana kote paoa o se Tokita apo, maalosi katoatoa kae fakamaalosigina. Tenei, e tonu, kote mea tonu, kae katoa e seai kae e see.

Fai atu: O ko koutou kola e ita kia Au kae salasala o fakamae mai Au! Ate maalosi o tou kaitaua kia Au e fakanumi kia koutou! O, ate Fetu Ao ko oti ne sae aka mai i luga ite sikulagi o Taku Faaliiga, kae e kafu i tena malifalifa ate saofiaaga o tino katoa. Ka e ui iai, kilo me e pefea a koutou o pono keatea mai i tena gali kese kae ko apulu ki lalo ite seai se fakalogo lele loa. Ke isi se alofa fakamagalo ki luga ia koutou, kae se fai pela ke se talia ne koutou ate fakatagi a Ia Ko Tena meatonu ko oti ne lavea ne koutou, kae ke se fai koutou mo latou kola ko soli tuakoi.

Mai ite amiotonu ote Atua tonu tokotasi! Kafai e se talia ne koutou ate Faaliiga tenei, ka katagina a koutou ne fenua katoa ote lalolagi kae faka tauemu atu kia koutou, auaa ko koutou kola ko oti ne faiite, mai i mua o outou mata, mote pogai ke fakasao ate mea tonu ate outou Talitonuuga, a molimau ate Atua, kote Nofoaiga-a-Tupu Puipui, kote Tafasili ite Maalosi, kote Matagofie-Katoatoa, kote Iloa-Katoatoa. Kae e ui iai, seki leva kote sua Faaliiga a Ia, e kafugina ite matagofie ote nofoaiga-a-tupu saofiaaga katoatoa, ne tuku ifo ki lalo ia koutou, kae telaa la e tuku fua ne koutou mai outou tua, O koutou kola e aofia ia latou seai se fakalogo.

Ea! Talitonu koutou ki outou loto kola e nofo mote paoa o fakaseai ate malifalifa ote Laa, io me o funa a tena gali kese? Ikaai, mai i Toku ola! E se mafai lele ne koutou o maua a fakamoemoega o koutou, e ui iai e kalaga gina koutou ki se feasoasoani i mea katoa i lagi mo mea katoa ite lalolagi. Sasale a koutou ite mataku kite Atua,

A mata o koutou e kivi! E se lavea ne koutou ate takutakua ote paoa ote Atua mo Tena nofoaiga-a-tupu? E se lavea ne koutou a Tena afioga mote matagofie! Faka fanoanoa kia koutou, o koutou kote lukuuga ote loto masei mote loto masalosalo! Fakavave ki Taku faipati, kae sa fakalave ki se taimi toetoe. Tenaa e fakatonu atu a koutou ne Ia Tela kote Gali ote Alofa-Falamagalo Katoatoa, kote mea ke fiafia koutou o motu mai keatea mai i mea e nofo mo koutou, kae olo aka ki luga ki koga maluga mai iei ka maua ne koutou ate foafoaaga katoatoa e nofo mai i lalo ote ata o Tena Faaliiga.

Fai atu: E seai se koga e lafi iei mo koutou, e seai se malu e mafai koutou o tele kiei, e seai se tino e ana mafai o tu mo koutou io me o puipui a koutou ite Aso tenei mai ite ita ote kaitau ote Atua mo Tena paoa fakamataku, vagana kae e seiloga a koe ko salasala kite malu o Tena Faaliiga. Tenei, e tonu, ko Tena Faaliiga tela ko oti ne fakaasi kia koutou ite foitino ote Talavou tenei. Matagofie, kite Atua mo Tena kiloga malifalifa, taaua kae tafasili ite fakaofoofogina.

Motu mai keatea a koutou mai i mea katoa vagana ko Au, kae fuli a outou mata ki Oku mata, auaa e lei atu tenei mo koutou iloo a mea kola e nofo mo koutou. Ate laulaufaiva ote Atua e fakamaoni kite tonu o Aku muna, auala atu i Aku muna tonu loa kola e faipatigina ate matonu, kae aofia kae iloa a mea katoa.

Fai atu: Mafaufau a koutou kite oulua piki fakamaoni ki Tena Talitonuuga e mafai lele loa o lei mo Ia, io me kote oulua teke ki Tena mea tonu e maafai o seai ne Ana mea e maua? Ikaai, mai I Toku Foitino, kote Se-mafai-o-Faka-takavale-gina-Katoatoa, kote Se-mafai-o-Sala-gina, kote Tafasili ite Maluga! Ofa gina ki lalo a veli o igoa kae piki mau a koutou ki olotou maaloo. Mai i Toku Gali! A Ia Tela kote Tupu o igoa katoa ko oti, mai ite kamataga tela e seai sena kamataaga, ne faiitegia, a Ia Tela ka tumau o faiite a latou pela mote mea e fiafia a Ia kiei. A Ia, e tonu, kote Maalosi-Katoatoa, kote Atamai-Katoatoa.

Faeteete ia koutou mana taala keatea ate gatu ote takitakiiga Faka-te-Lagi. Inu ate oulua tusaga mai ite Ipu tela a Talavou ote Lagi ko oti ne avaka mai i luga i oulua fogaaulu. Tena e fakatonu atu kia koutou ne Ia Tela e lasi atu ate alofa fakamagalo ki luga ia koutou iloo a koutou kia koutou loa, ko Ia Tela e se akai atu kise taui io me se fakafetai mai ia koutou. A tena taui e aumai ia Ia Tela ko oti, mai ite paoa ote mea tonu, ne uga mai a Ia ki lalo ia koutou, kae fakapitoa aka loa a Ia kae folafola atu a Ia me ko Tena Molimau kite foafoaaga kaatoa. A Ia Tela ne fakamaalosi a Ia ke fakaasi atu Ana failoga katoa. Toe fakafoki ate kilo, kote mea ko koutou ke mafai o lavea a mea kola ko oti ne kalagina a koutou kiei ne te Laulaufaiva ote Favavau o Aso, kote mea ke fiafia koutou mo latou kola ko iloa ate mea tonu. Kai lagona aka loa ne koutou e lipoti ne oulua tamana i aso mua, io me ne tupulaga kola ne olo atu i olotou mua, io me kote Atamu muamua, me e isi se tino e vau mai i kaumana ote faaliiga, ko oti ne fakaekegina ite nofoaiga-a-tupu maluga kae fakaasi, ei iai i tena lima faka-ata-mai ate Maaloo ote Atua kae i tena sema kote paoa mote matagofie o Tena maaloo e favavau, se tino ne fakatomuamuagina ne agelu ate Atua, kote Mafi-Katoatoa, kote Se-mafai o Tekegina-Katoatoa, kote Tafasili ite Maalosi kae soko loa ite faipati a kupu ko olotou taaua a mafaufau o toe tino poto loa mote toe tino atamai e seai se maalosi o fakatau, mafai a koutou e seai ko tino e kave ate Meseti tela e seai ia te Atua? Ke pula a oulua mata, kae faipati koutou kite mea tonu, kote tinaa mea tonu, mafai a koutou e fai ia koutou e fakamaoni kae maluga a outou fakavae.

Fai atu: E uke a kupu ne fakaasi atu ne Maatou pela mo latou ite Faaliiga mai i mua atu, ne tuku ki luga ite Báb. Tuku a ia tela e fakalotolotolua i pati ate Agaaga ote Atua ko oti ne tavili ite malae ote Omotou nofo-mai kae lagona a Omotou kupu faka-te-lagi e fakaasi, kae fai me se molimau ne lavea ki mata a fakamaoniiga maina ote fakatagi a Matou.

Fai atu: Mai ite amio tonu ote Mafi-Katoatoa! Ate fuafuaaga o alofaaga ote Atua ko oti ne fakafonu, ko Tena Muna ko oti ne fakatonutonu, kote mainaaga o Ona mata ko oti ne fakaasi, ko Tena nofoaiga-a-tupu ko oti ne siomia iei ate foafoaaga kaatoa, kote matagofie o Tena Faaliiga ko oti ne fakaasi, ka ko Ona alofa mataefa ko oti ne vaiua ifo ki luga i tagata katoa.

Tagata kote Fakamanuiaaga tafasili ite maluga. Kote seai se akoga lei ko oti, tenaa, ne fakaseai mai ia ia a mea kola e nofo totino mo ia. Mai ite pati e vau mai ite gutu ote Atua ne faka foliga mai a ia; mai ite muna e tasi ne takitaki atu ke lavea ne ia ate Kamataaga o tena akoakoga: kae e ui iai i sua isi muna a tena tulaga mo tena fakaotiiga ne leoleogina. Ate Iai Sili Takutakua ne fai atu: Kilo kite tagata pela me se ana o fatu taaua e se maua o fakatusa ate taaua o latou. Te akoakoga e mafai, ia ia eiloa, o pogai kiei ate fakaasi mai o ona kope taaua, ke fakamafai a tino ke penefit mai iei. Moi fai e isi se tagata e talosaga fakapooko ki mea kola e fakaasi mai i Tusitusiiga Tapu, ko oti ne tuku ifo mai ite lagi ote Finagalo mana ate Atua, ka iloa fakavave loa ne ia ite pogai o latou kote mea ko tagata katoa ke fai pela me se agaaga ola e tasi, kae e tusi iei ate fakamailoga “Kote Maaloo io te Atua” ke sitampa ki luga i loto o tino taki tasi katoa, ka kote mainaaga ote alofa mataefa Faka-te-Lagi, ote agalelei, mote alofa fakamagalo ke mafai o pulougina i tino katoa. Kote Atua tonu tokotasi ke maluga a Tena matagofie, e se manako ki se mea ma Ia. Ate usiusitai o tino e se penefit kia Ia. Ate Manu eva ote Lalolagi o Faipatiiga e soko loa ate fakaleo mai ate kalaga tenei: “A mea katoa ko oti ne finagalo ne Au mo koe, kae kia koe foki, mo fai a tou lei.” Kafai a tagata poto kae atamai i mea faka-te-lalolagi ote vaaitaimi nei e fakasaoloto a tino ke manava ki olotou manogi gali ote faka taugasoa mote alofa, so se loto malamalama ka iloa ote uiga ote tinaa saoloto, kae maua ne ia ate mea funa ote filemu e se mafai o lepegina kae fifilemu katoatoa. Moi fai ate lalolagi e maua ate tulaga tenei kae fakamainagia ki tena mainaaga ko mafai iei o fai atu fakapatonu penei: “A koe ka lavea i loto iei e seai ne puuga io mene mauga foliki e olo aka ki luga.”

A tupulaga kola ko oti ne olo atu mai i mua o koe – ne sola ki fea? Ka ko latou kola ne siomia ne latou ate olaaga fakagaligali mote pu matagali ote lauekele, ko fea nei a latou? Ke isi ne outou mea e maua mai i fakatusa a latou kona, O tino, ke sa fai pela mo latou kona ko galo atu.

Ko niisi ko pili o puke a olotou lima ki mea kola e nofo mo koutou, kae ulufale atu i koga nofo o koutou. Tuku a oulua taliga ki Aku muna, kae sa lau a koe i loto ia latou kona valea.

So se tino taki toko tasi ia latou a tena tiute maluga kote filifili mo ia ate mea tela e seai aka foki e soli tuakoi kae e seai foki e sopoia atu mai ia ia. A se mea pena – ka kote Mafi-Katoatoa e fai mo Aku molimau – kote alofa ote Atua, e se kafi ne koe o lavea.

Atiake mo koutou a fale kola e se mafai lele ne vaiua mo lolo o ofa ne latou, kola ka puipui a koutou mai i mafulifuliiga mo avanoaaga ote olaaga nei. Mea nei se fakatonuuga a Ia Tela ate lalolagi ko oti ne fakaseegia kae liakina.

E fakaofoofogina ate fakatasitasi o Latou kola e Ola, kote Atua Fakatuanaki-kite-Favavau – se fakatasitasi tela e maluga atu i tapulaa katoa, tela e sopoia atu ite iloa o mea faiite katoa! Ko oti a Ia, mai ite favavau ne nofo i Tena koga nofo mana mote matagofie e se-mafai o oko-gina, kae ka favavau o tumau o fakakalauna i luga i malugaaga o Tena nofoaiga-a-tupu tu-saoloto mote tafasili ite taulekaleka. Ne pefea ate maluga o Tena Uiga loto faka-aloalogina, ne pefea o tu-saoloto lele eiloa ite poto o mea faiite katoa, kae ne tafasili ite maluga pefea ka nofo pena i luga atu i tavaeega o tino katoa kola ite lagi mote lalolagi!

Mai ite kamataaga maluga, kae iloto ite tinaa mea o Tena alofaaga mote alofa mataefa ne fakatalitonu atu ne Ia ki so se mea faiite taki tasi, kote mea ke seai e se maua ne ia a tena tusaga o fakaasi atu, e tusa mo tena mafai o fai mote tulaga, ite poto tenei. Kote failoga tenei kote kilo o Tena gali ite lalolagi ote foafoaaga. Kote lasi ote taumafaiiga e fai mote toe fakalei ate kilo maluga kae faka-aliki tenei, kote lasi e mafai o faiite iei mote fakamaoni kote mea ke lavea atu iei ate matagofie o igoa mo uiga lei ote Atua, kae e fakaasi atu a feitu fakaofoofogina o Ana failoga mote poto. So se mea faiite ka fakamafai (e tafasili ite takutakua ate paoa tenei o toe iloilo) o fakaasi atu a maalosiiga ote mafai o tuu ne mea o tena tulaga ko afea loa ne fakanofogina, kae ka iloa foki a tena mafai o fai a mea mo tapulaa, kae ka molimau kite mea tonu ia “Ia, e tonu, kote Atua; e seai aka foki se Atua mai i Ana tafa.” …

E mafai o seai se maasalosalo me ite mea e maua mai iI taumafaiiga kola a so se tagata e taumafai fakapatonu kiei kae ne mafua mai ona ko ana taumafaiiga o tena iloa loa ia ite feitu faka-te-agaaga, ate kilo tenei e mafai o maa kii loa mai ite pefu o lailai faka-te-lalolagi kae galo mai i manatu fakasupasupa faka satani ko maaga iei o futi ke pili atu ki laukele ote mana favavau kae ke oko atu ki fale ote faka taugasoa favavau. Ite manakooga tenei, telaa la, ote akoakoga fakavae i mea katoa ate taimi ko oti ne iku, kae mo so se fuaga lakau kaina ate tau o ia ko oti ne fakaiku, ko enetii funa o se fakamanuiaaga pena e lei atu manafai e tala ki tua, ka kote matagofie lau olaola o se mea-alofa pena e mafai fua o fakaasi, i Aso ote Atua. Fakagalue e ui iai i aso taki tasi e mafau mo tena tufaaga ko leva ne iku ite matagofie agalelei fakaofoofogina ote Atua, a Aso kola e soko pili loa mote Faifekau ate Atua e isi ia latou a se uiga tafasili ite fakamatea kae e nofo ise tulaga e seai se mafaufau kai maua aka loa ne ia o maina iei. E pena ate uiga lei e suki ki loto ia latou tela moi ne fai a loto e nofo i lagi mote lalolagi, i aso kona ote fiafia favavau, ke aumai mata ki mata mote Fetu Ao ote matagofie e se matafitafi ke olo tasi mo Tena Finagalo a latou taki tokotasi e mai i luga i mea faka-te-lalolagi katoa, maina i Tena mainaaga, kae fakamana mai i Tena matagofie. Katoa e ifo kite alofa agalelei tenei tela e seai se fakamanuiaaga, me e pefea ate takutakua, e mafai o sopoia atu iei, ka ko fakaaloalo katoa kise alofa-kaimalie pena e seai aka se mata ote foafoaaga ko oti ne lavea! E maluga sili a Ia mai i luga tela e fai ne latou kia Ia io me e toe lau ne latou e uiga mo Ia!

Kote pogai tenei tela, i aso kona, e seki ai aka loa se tagata e fakalagolago ki tena tuakoi. Ko leva ne fakaasi mai ite Aso ko oti ne tofigina faka-te-lagi ate taulasiiga o latou ne manako ke maua ne latou a Tena koga nofo mana kae ko oti ne fakaasi atu se poto mote atamai, se motiiga tela e seai mai i tafa o agaaga ola mana kae tapu me e pefea loa ate leva ne akoako io me ne tauloto, ko oti ne puke io me e mafai o iloa. Auala atu ite paoa tenei kote fagasele ate Atua ko oti, i aso ote Faifekau ote Fetu Ao ote Meatonu, ko oti ne oti ne fakamaluga atu, kae fai ke tu saoloto mai, i taulotooga katoa a tagata. Ikaai, mai i olotou loto mo siusiuuga o olotou paoa kola ne sofi mai ki tua e se fakagata kote tinaa uiga tonu ote tauloto mote atamai o tagata.

O Toku taina! Kafai ate tino salasala tonu e taumafai maalosi loa o puke ate sitepu salasala ite auala e tau atu kite poto ote Favavau o Aso, e ttau mo ia, mai i tafa o mea katoa, o mulu a tena loto tela kote nofoaga ote fakaasiiga o mea funa ate Atua, mai ite fakalavelave o pefu mai i poto katoa ne maua, mo moemitiiga o manatu faka satani. E ttau o liakina ona fatafata, kola kote koga nofo ote alofa aofia ote Fagasele, mai i so se lailai, kae fakamana a tena agaaga ola mai i mea katoa kola e tau atu kite vai mote fatu, mai i kopikopiaga katoa kola e tuku taumate kae e se aogaa malosi. E ttau mo ia o mulu a tena loto ke seai se toega ote alofa io me kote ita e nofo iei, auaa ite alofa tena e pogai ki ei a tena see, io me kote ita e kosu ne ia a koe keatea mai ite mea tonu. E pena foki mote molimau ne koe ite Aso tenei mene fai pefea a tino tokouke, ona kote alofa mote ita o latou pena, e seai ia latou a Mata o Ia Tela kote takuakua, ko galo mao mai Fakaasiiga o mea Funa Faka-te-Lagi, kae, aunoa mo se takitaki mamoe, ko folifoli fua ite toga-vao ote se iloa mote see.

Ate tino salasala e ttau, i taimi katoa, o tuku a tena talitonu ite Atua, e ttau o fakaseai a tino ote lalolagi, kae motu mai keatea a ia mai ite lalolagi ote pefu, kae piki mau kia Ia Tela kote Aliki o Aliki. E se ttau mo ia o salasala ke fakamaluga a ia i luga i so se tino, e ttau o mulu keatea mai ite tapeleti o tena loto so se lailaiiga ote miita mote fakamaualuga, e ttau o piki kite onosai mote loto maulalo, tautali ite gutu se faipati kae fakamao mai ite sona faipati valevale. Auaa ite laulaufaiva kote afi ula valevale, ka kote siliga ote faipati se poisini fakamataku. Kote afi faka-te-foitino e kai foki ne ia ate foitino, ka kote afi ote laulaufaiva e folo ne ia ate fatu mote agaaga ola. Ate maalosi ote mea mua e leva fua ki se taimi foliki, ka ko pokotiaaga ote mea tena fakamuli e tumau ki se senetenli.

Ate tino salasala foki tena, e ttau o masaua foki, ite fatufatu se agasala masei kii, kae e ttau a ia o fakamao mai iei, auaa ite fatufatu e tamate ne ia ate mainaaga ote loto, kae e fakaseai ne ia ate olaaga ote agaaga ola. E ttau mo ia o lotomalie mo mu mea mutana, kae saoloto mai i manakoga se lei katoa. E ttau mo ia o fakataaua ate fakataugasoa mo latou kola ko oti ne liakina a mea faka-te-lalolagi, kae masaua ite fakaseai ote tavae mo tino ote lalolagi se feitu taaua tena. Ite faka vaveao o aso taki tasi e ttau mo ia o sokotaki mote Atua, kae mo tena agaaga ola, kolomaki ite salasalaaga o tena Fagasele. E ttau mo ia o faka-aogaa a manatu seai ne aogaa taki tasi katoa mote ulaaga o Tena taku tonu atu mote alofa, kae mote makini ote uila o avatu a mea katoa na loa ko Ia. E ttau mo ia o fakamafanafana a latou kola ko seai ne olotou mea, kae se taofigina a tena alofa mai ia latou mativa. E ttau o fakaasi atu ate kaimalie ki manu, kae maise la ko tino, kia ia tela e nofo ia ia ate paoa ote faipati. E se ttau mo ia o talave o tuku a tena ola mo tena Fagasele, io me e fakasaoloto ate fakatauemu a tino mo fai a mea e fuli a ia keatea mai ite Meatonu. E se ttau mo ia o manako ki niisi mea kola a ia e se manako mo ia, io me o faifeagaiiga kola e se maua ne ia o fakataunu. Mo tena loto katoatoa e ttau mo ia o fakamao mai ite fai taugasoa mo latou amio leaga, kae talo ke fakamagalo a olotou agasala. E ttau mo ia o fakamagalo a tino agasala, kae e se ttau lele mo ia o inosia a ia tela e malalo a tena tulaga, auaa e seai se tino e iloa a tena fakaotiiga. E pefea ate uke o taimi ne oko atu ate tino agasala, ite itula ote mate, kite kano loto tonu o tena talitonu, ne inu a ia ite motiiga favavau, ne lele atu a ia i tena malaga kite Lukuuga mana i luga! Kae e pefea foki ate uke o taimi ne fai ne te taugasoa talitonu, ite itula ne fanaka ki luga a tena agaaga ola, ne mafuli kii loa a ia kae to ifo ki loto ite pogisa pooko ote afi!

Ate pogai o Matou ko fakaasiiga o foafolaaga mautinoa kae pamafa ke fakalavea ki luga ite tino salasala me ia ia e ttau o puke ki mea katoa na fua kote Atua me e mausolosolo, kae lau a mea katoa na fua ko Ia, Tela kote Fakamoemoe o tavaeega katoa, mene atigi mea katoa loa.

Mea nei mai i vasia o uiga ote fakamaluga, kae aofia iei ate maaka fakalavea o ia e iai ate mafaufau faka-te-agaaga. Ko leva a latou ne taku mo manakooga o tino Malaga kola e sasale ite auala ote Poto Mautino Tonu. Kafai ate tino malaga ne motu mai keatea mote tino salasala fakamaoni ko fakataunu a fakanofooga taaua konei, tena ko fatoa fakaigoa kite tino salasla tonu. I so se taimi ko oti ne fakataunu ne ia a fakanofonofooga e fakaali atu ite kupu tenei: So se isi e fai se taumafaiiga mo Matou,” ka fiafia a ia i fakamanuiaaga e fakaoko atu i muna konei “I Omotou Auala a Matou ka takitaki atu a ia fakapatonu loa.”

Manafai fua ate molii ote salasala, ote taumafai maalosi, ote manako naunau, ote fakatuanaki maalosi, ote alofa tonu, ote fiafia, mote lifu, e faka ka i loto ote tino salasala, ka kote laumatagi o Tena alofa-kaimalie e agiagi i luga i tena agaaga ola, ka mafai ate pouliga ote mea see o fakaseai, ko nefuuga ote maasalosalo mote fakatau see ka toli ifo ki lalo, ka ko mainaaga ote poto mote mautinoa tonu ka pulougina ia ia. Ite itula tena ate Takitaki Ala Mesentia Fakaofoofogina, e vau mo tala faka fiafia ote Agaaga, ka sulu maina mai ite Fakai Lasi ote Atua malifalifa pela mote taeao, kae mai ite fakaasi fakasalalau ote poto, ka faka ala iei a loto, kote agaaga ola (soul) mote agaaga (spirit) mai ite moega ote se-fakalogo. Tena ko alofaaga tuafia mote ligi mai ote agalelei o te Agaaga mana mote favavau o tuku atu se ola foou kite tino salasala kote mea ke maua a ia e fakaekegina mo se mata foou, se taliga foou, se loto foou, mo se mafaufau foou. Ka fakatalitali kite fakaasi mai o failoga ote Iunivesi, kola ke ulu i loto i mea lilo ote agaaga ola. Kilo mo mata ote Atua, ka lavea ne ia i loto i so se atomu taki tasi ate mataloa tela e taaki atu a ia ki tulaga ote tinaa mautinoa tonu. Ka maua ne ia i mea katoa a mea lilo ote Faaliiga Faka-te-Lagi, mo fakamaoniiga o se Faifekau e favavau.

Au e tauto ite Atua! Moi fai a ia e sasale ite auala ote takitakiiga kae salasala o fuafua ate maluga ote amio tonu ke maua kite matagofie tenei mote tulaga maluga, ke manava ne ia, mai i se afe ite mao, ate manogi gali ote Atua, kae ka lavea ate malifalifa ote taeao o se takitakiiga Faka-te-Lagi e fanaka mai i luga ote Punaa Aso o mea katoa. Ko mea taki tasi mo so se mea, faitalia ite foliki, kia ia se faaliiga, e tau atu a ia ki tena Fagasele, kote Pogai o tena salasala. Ka takutakua ate fakakese ite vaa ote mea tonu mote mea see, pela mote fakakese ne ia ate laa mai ite ata. Kafai i tulimanu mao o Sasae ate manogi suamalie ote Atua e agiagi mai, a ia ka tonu loa o lavea kae manava ki olotou manogi gali, e ui iai a ia e nofo i tulimanu mao o Sisifo. A ia ka pena, e fakamatea fakalei loa a failoga katoa ate Atua – ko Ana faipatiiga fakaofoofogina, ko Ana galueega takutakua, mo ana uiga fai tafasili ite mafi – mai i Ana mea e fai, pela loa mote tino fai malele tela e iloa ne ia ate fatu taaua mai ite fatu, io me kote tagata tela e fakamatea ne ia ate tau mafanafana mote tau malulu, ate vela mai ite moko. Kafai ate auala ote agaaga ola e fulu fakamaa mai i fakalavelave o kopikopiaga katoa faka-te-lalolagi, a ia, ka takigina ne tena sausau, ka oko atu kae ulufale atu kite Fakai Lasi ote Mautinoa.

I loto ka mafai ne ia o lavea a mea fakaofoofogina o Tena Atamai mai ite vavau, kae ka lavea ne ia a akoakoga lilo katoa mai i gaseseega o lau ote Lakau Ola tela e ola lei ite Fakai Lasi tena. Fakatasi mo tena taliga i loto pela foki mo i tua, ka lagona ne ia mai i tena pefu a pese ote matagofie o tavaeega kite Aliki o Aliki, kae mo tena mata i loto ka maua ne ia a mea lilo ote “toe foki mai” mote “toe fakaola mai.”

E pefea ate se-mafai o fakamatalagina ate matagofie o failoga, mo fakatusa, fakaasiiga, pela foki mo mea gali a Ia, Tela kote Tupu o Igoa mo Uiga Lei, ko oti ne fakaiku mote Fakai Lasi tena! Ate oko atu kite Fakai Lasi tenei kote fakanogaaga ote fia inu kae seai ne vai, kae faka ka ate alofa ote Atua kae e seai se afi. I loto i so se lau ote mouuku e fakamaina iei a mea funa ose Atamai e se-mafai o talatalagina, kae i luga i so se vaolosa e se-mafai o lau ate naitigikale e lele mai iei, i se fiafiaaga gali, a olotou pesepeseega. Ko ona tulipi (tulips) fakaofoofogina e fakamaina mai iei ate ea funa o te Afi e se mate ite Vao Ka Foliki, ko tena manogi suamalie ote mana e manava kite sausau ote Agaaga Faka-Mesia. E avatu kiei ate maumea e aunoa mene aulo, kae tuku atu kiei ate ola favavau e seai se mate. I lau taki tasi o ia a fiafiaaga e se-mafai o faipatigina e tausi fakalei iei, kae i loto i potu taki tasi a mea lilo e se mafai o lau ate aofai e nofo funa i loto.

Latou kola e galue mote loto toa ite misiona ate Atua, kafai ite taimi loa tela e fakaseai ia latou a mea katoa na loa ko Ia, ka piki mau kae fai-avaga kite Fakai Lasi tena, tela i se taimi toetoe kii loa e mavae mai iei e se-mafai o mafaufaugina kia latou. Kae ka tele a latou o fakalogo ki fakamaoniiga e se-mafai o se mai ite Hyacinth (fugalau) ote fakapotopotooga tena, kae ka maua a fakamaoniiga patonu loa mai ite gali o tena Losa, fakatasi mo pese gali a tena Naitigikale. Fakatasi fakatautau ise afe o tausaga ka mafai ate Fakai Lasi tenei o toe fakafou kae toe faka lakei gina. …

Ate Fakai Lasi tena e seai aka foki na kote Muna ate Atua e fakaasi mai i vaasia tupulaaga mo taimi. i aso o Mose ko Pentateuch (Penetaiuka); i aso o Iesu, kote Tala Lei; i aso o Muhammad, kote Mesentia ate Atua, kote Qur’án; ite aso tenei, kote Bayán; kae ite Taimi o Ia Tela ka fakaasi mai ne te Atua, ko Tena Tusi – kote Tusi tela a Tusi katoa o Taimi ko teka e ttau o fakasino kiei, kote Tusi tela e tu i vasia o latou katoa e se faka-pau gina kae maluga tafasili.

Ki so se koga a Matou e mafai o fakafenua kese kiei, me e pefea ate lasi ote puapuagaa o Matou e pokotia iei, a latou kola ko tino ote Atua e ttau, mo mata e mautakitaki mote talitonu fakamaoni, o tausi a olotou mata fakasaga kite Matagofie ote Punaa Aso, kae saga o fai a so se mea tela e feasoasoani kite lei atu ote lalolagi pela foki mo akoakoga o ona tino. A mea katoa kola ne oko mai kia Matou i taimi ko teka ne kave ne latou a mea e lei iei ate Omotou Faaliiga ki mua ka kaa valevale a tena takutakua; ka ko mea katoa kola e mafai o oko mai kia Matou i taimi mai i mua e pena foki a mea ka sae mai iei. Piki mau koutou, mo outou kano loto i loto, kite Talitonuuuga ate Atua, se Talitonuuga tela ko oti ne tuku ifo ki lalo ne Ia Tela kote Fakaeke, kote Atamai-Katoatoa, Matou ko oti ne avatu, mote tafasili ite atafai mote alofa fakamagalo, kalaga atu kae fakatonu atu ki tino katoa mo fenua katoa ki mea kola e matuaa lei mo latou.

Ate Fetu Ao ote Mea tonu tela e malifalifa i tena poini maluga taulekaleka e fai mo molimau a Matou! A latou kola ko tino ate Atua e seai ne olotou loto fakataufai vagana ke fakaola ate lalolagi, o fakamaumea a tena ola, kae o toe fakaola ona tino. Ate faipati tonu mote loto lei, i taimi katoa, e maaka iei ate olotou sokooga mo tagata katoa. Ko olotou amio ite kilo atu mai i tua e fakafoki ote olotou olaaga ite kilo ki loto, ka kote olaaga o latou i loto e fakaasi mai iei a olotou amio mai ite kilo atu i tua. E seai se veli e funa io me e lilo a fakavae tonu kola e fakatu iei ate olotou Talitonuuga. I mua o mata o tagata katoa a fakavae tonu ko oti ne folafola mai ke lavea, kae e mafai o laveagina e seai se fakatau see iei. A olotou galueega e molimau ate mea tonu o pati konei.

So se mata-kite e mafai, ite Aso tenei, o atafia ate mainaaga fakavaveao ote Faaliiga ate Atua, kae so se taliga logo e mafai o iloa ate Leo tela ne lagona mai ite Vao Ka Foliki. E pena ate tele mai o vai ote alofa-fakamagalo Faka-te-Lagi, kote mea ko Ia Tela kote Punaa Aso o failoga ate Atua mote Fakaasi o fakamaoniiga o Tena matagofie e seai se veli io me se mea e pono iei e tau atu kite sautalaaga mo tino ote lalolagi mo ona itu-kaaiga. E pefea ate uke o latou kola, mo loto e fakamoemoe kite masei, ko oti ne sala ki Omotou Nofo-mai, kae liakina mai iei a taugasoa fakanaa-gina kae alofa! A mataloa ote agalelei e matala lauefa mai i mua o tagata katoa. Ite Omotou faiiga mo latou Matou ko oti ne fai katoa latou me e pau a ia amiotonu mo ia agasala, kote mea e seiloa ko ia tela agasala e mafai o oko atu kite vasa ote fakamagalo Faka-te-Lagi e seai se gataaga. Ate Omotou igoa “kote Funa” ko oti ne sulu atu ate mainaaga ki tagata kola loto pakeke kote mea ke mafaufau ia ia e aofia mo latou kola e talitonu. E seai se tagata tela e salasala kia Matou e se fakataunu ne Matou, pela foki mo ia tela ka tuku ona mata kia Matou e se fakasaoloto ne Matou kite koga nofo o Maatou.

O taugasoa! Feasoasoani a koutou kite Atua tonu tokotasi, e maluga a Tena matagofie, mai i outou amio lei, a uiga mo natula pena e talia i Tena kilo. A ia tela e salasala o fai pela me se feasoasoani ote Atua ite Aso tenei, ke fai a ia ke pono ona mata ki so se mea ea ia, kae tala a olotou mata ki mea ate Atua. Ke filifili a ia o se-saga ki mea kola e aogaa mo ia, kae saga fua a ia ki mea kola ka fakamaluga ate igoa maalosi katoatoa ote Mafi-Katoatoa. E ttau o fulu a tena loto mai i manakooga leaga katoa mo manakooga faitogafiti, auaa ite mataku kite Atua kote meatau tela e ana mafai o fai a ia ke manumaaloo, kote mea fai galueega muamua loa e mafai ne ia o fakataunu a tena pogai. Ate mataku kite Atua kote talitaa tela e puipui iei a Tena Talitonuuga, kote maa puipui e faka mafai iei Ana tino o maua ate manumaaloo. Kote tulaga e seai se tagata e mafai o ana fakamaseigina, se maalosi e seai se paoa e teke fakaataufai kiei. Mai i tena feasoasoani, kae mai ite taliaaga a Ia Tela kote Aliki o Agelu Mana mai i luga, ko latou ko oti ne fakapilipili atu kite Atua ko oti ne fakamafai ke taofi ki lalo kae pukegina fakatakavalegia a olo maalosi o loto o tagata.

Kafai ko tou manakooga, O tino, o iloa ate Atua kae maua ate takutakua o Tena mafi, kilo, tena, ki luga ia Au mo Oku mata, kae seai ko mata o se isi tino aka vagana ko Au. Ka mafai se isi mea aka, ka se-mafai lele loa o lavea Au, e ui iai a koe e mafaufau ki Taku Talitonuuga kite leva o Toku Maaloo, kae talosaga faka pooko ki luga i mea faiite katoa salalau ite favavau ote Atua, kote Tupu o Aliki o me katoa, kote Ulu Atua, kote Fakatuanaki Katoatoa kite Favavau, kote Atamai-Katoatoa. Tena ko oti Matou ne fakaasi atu ate meatonu ote Faaliiga a Matou, ko tino ke fiafia o tu mai ite olotou se-fakalogo, kae ke fai mo latou kola e malamalama.

E lavea ate malalo ote fakatauuga a tagata konei kola e iloa ne latou fakalei mene tuku atu ne Aku pefea a Aku loa ia Au mo Toku itu-kaaiga ite auala ote Atua pela foki mote fakatumau o te olotou talitonu ia Ia, kola e iloa fakalei mene pefea Oku fili ne siomia ia Au, i aso a loto o tagata e mataku kae polepole, a aso kola e muni a latou mai i mata o fagasele ate Atua mo Ona fili, kae e tosina ite fakpatonuuga ate olotou saogalemu mote filemu.

Matou fakamuli ifo loa ne manumaaloo ite fakaasiiga ote Talitonuuga ate Atua, kae fakamaluga kise tulaga tafasili ite lauiloa ko tino katoa, vagana ko latou kola e olioli ate loto leaga i olotou loto o teke atu ate Talavou tenei kae kau tasi mote Mafi-Katoatoa, fakatalitonu kite nofoaiga-a-tupu ote Atua mo Tena maaloo mafi. Kae e ui iai, e uiloa ate Faaliiga tenei mo te mafai o pokotia ko oti ne ulu i loto i mea faiite katoa, kae uiloa ate maina ote Mainaaga tenei, tela e seai lele mai ia latou ko oti ne kilo kiei, ne molimau mene pefea a tino ote Bayán ko oti ne fakapelo kae teke atu kia Aku. Ko niisi ko oti ne fuli keatea mai ite Auala ote Atua, teke keatea ate puleega a Ia Tela a latou ko oti ne talitonu, kae fai a olotou uiga seai se aava kite Atua, ko Tafasili ite Maalosi, kote Tafasili ite Puipui, kote Tafasili ite Maluga, kote Tafasili ite Takutakua. Ko niisi ne fakatalave kae fakagata i Tena Auala, kae fai ne latou ate Talitonuuga ate Tufuuga, i tena kogaloto tonu loa, e se-tonu vagana ke fakatalitonugina nete taliaaga a ia tela ne faiite mai ite faka galueega o Toku Finagalo. Tena iei ko olotou galueega ne iku kite seai, kae e ui iai a latou ne maua ne latou o atafia. Mai ite vaasia o latou ko ia tela ne salasala kite fuafuaaga ate Atua mote fuafuaaga loa a ia, ka ne lasi ite fano seke ona ko igoa ote Atua ko ala iei o tu o teke atu kia Au, tela ne fakatauemu mai kia Au me se tasi e ttau o tamate, tela ne loosi mai foki kia Au a agasala kola ne fai foki loa ne ia.

Telaa la, e tuku atu a Toku fanoanoa mo Toku puapuagaa kia Ia Tela ne faiitegia Au kae aumai ne Ia kia Au a Tena Meseti. Kia Ia e tuku atu ne Au a fakafetai mo tavaeega mo mea ko oti ne fakaeke mai ne Ia, auaa i Toku nofo tokotasi, mo Toku logomae mai i lima o tagata konei kola ko oti ne tele keatea fakamao mai ia Ia. Ko oti ne onosai ate nofo fakamau, kae ka nofo loa o tumau pena, i puapuagaa ne oko mai kia Au, kae fai ne ia a Toku fakamaoni mo te talitonu ite Atua. Kia Ia ka fakatagi au o fai atu penei: Takitaki Au tavini, O Toku Aliki, kite koga nofo o Au alofaaga mote alofa mataefa, kae sa faka seaigina a latou mai ite mea fakaofoofo o Tou agalelei mo Au fakamanuiaaga e tuafia katoa. Auaa e seiloa ne latou mene ne aa a mea ne fakaeke ne Koe mo latou ona ko Tou alofa fakamagalo tela e siomia ite foafoaaga katoatoa. Ite kilo mai i tua, O te Aliki, a latou e vaaivai kae ko takaseasea; ite kilo mai i loto latou ne pepe koi foliki. A koe kote Alofa-Mataefa Katoatoa, kote Lima-Mafola, kote Tafasilii ite Maluga, kote Tafasili ite Takutakua. Sa pei gina keatea, O Toku Atua, ate ita o Tou kaitaua ki luga ia latou, kae fai latou ke faitali ke oko kite taimi mafai a fakaofoofogina o Tou alofa-fakamagalo ko oti ne fakaasi, kae akai atu kise fakamagalo mai ia Koe mo mea ko oti ne fai ne latou o teke a Koe. E tonu, a Koe kote Fakamagalo, kote Alofa-Fakamagalo Katoatoa.

Fai atu: E mata e ttau mo se tagata e tagi ia ia e tautali i tena Aliki, kote Alofa-Fakamagalo Katoatoa, kae i tena loto e fai ne ia a uiga ote Tokotasi Leaga? Ikaai, e se ttau lele loa, kae kite feitu tenei a Ia Tela kote Gali ote Matagofie-Katoatoa kafai mo Aku molimau. E pena e se mafai o iloa ne koutou?

Fulu a oulua loto mai ite alofa o mea faka-te-lalolagi, mai i oulua laulaufaiva so se masauaaga vagana kote masauaaga o Ia, mai i oulua foitino katoatoa so se mea e mafai o pale keatea koutou mai ite lavea o Ona mata, io me e fakaoso ne ia koutou ke tautali i musumusuuga tiapolo mo fakaosoosooga faitogafiti. Ke fai ate Atua ke maataku koutou kiei, O tino, kae fai koutou ke pela mo latou e sasale ite auala ote amio tonu.

Fai atu: Kafai ate amio a koulua, O tino, e fano seke mo oulua fakaasiiga, e mafaufau koutou, o mafai o fakakese a koutou mai ia latou kola, e ui iai e fakaasi ate olotou talitonu ite Aliki ate olotou Atua, ko oti, i taimi loa tela e vau a Ia kia latou i kaumana ote mana, ne teke o iloa a Ia, kae fakafiti a Tena mea tonu? Fakasaoloto a koutou mai i kopikopiaaga katoa kite lalolagi tenei mo mea seai ne aogaa iei. Faeteete ia koutou mana fakapilipili kiei, pela mo latou e fakaosooso a koutou ke sasale mai i tua o outou naunauuga mo manakooga leaga, kae e taofi iei a koutou mai ite ulu atu kite Auala tonu kae matagofie.

Ke iloa ne koutou “ate lalolagi” e fakauiga kite seiloa o Ia Tela kote Tufuuga o koutou, ka kote oulua kau fakatasi e seai aka na ko Ia. Ate “ola ka vau,” i sua feitu, e fakauiga ki mea kola e tuku atu ne latou ate fakapilipili saogalemu kite Atua, kote Matagofie-Katoatoa, kote Se-Fakatusagina. So se mea tela e fakalavelave atu kia koutou, ite Aso tenei, mai ite Atua alofa e seai aka vagana kote lalolagi. Tele keatea mai iei, kote mea ke mafai koutou o aofia mo latou sili. Kafai se tagata e manako o fakagaligali a ia ki lakei ote lalolagi, o pei ki ona gatu, io me o kau fakatasi i penefit e mafai o tuku mai ne ia, e seai se mea e afaina iei, mafai e fakasaoloto ne ia e seai lele loa se mea e fakalavelave ite vaa o ia mote Atua, auaa ite Atua ko oti ne aumai ne Ia a mea lei katoa, faitalia me ne faiite i lagi io me kote lalolagi, aua i Ana tavini e talitonu mote fakamaoni ia Ia. O tagata, faka-aogaa ne koutou a mea lei ko oti ne fakasaoloto kia koutou ne te Atua, kae sa fakaseai mai ia koutou mai i Ana alofaaga mataefa kae fakaofoofogina. Avatu a fakafetai mo tavaeega kia Ia, kae fai pela mo latou e fakafetai mote fakamaoni.

O koe tela ko oti ne sola keatea mai i tou fale ke salasala kite nofo-mai ote Atua! Folafola atu ki tagata ate Meseti a tou Aliki, kote mea ke mafai o futi mai latou keatea mai i musmusuuga leaga o olotou manakoga faitogafiti, kae aumai a latou kite masauaaga ote Atua, mote Tafasili ite Maluga, kote Tafasili ite Takutakua. Fai atu: Mataku kite Atua, O tino, kae sa faka maligi ate toto o so se tino. Sa lotomalie koe mo tou tuakoi, kae fai pela mo latou e fai mea lei. Faeteete mo aa e kosu ne koutou ate nofo se toka ite lalolagi, kae sa tautali i alagaavae o latou ko olo loa fakaatea.

So se tino e tu ki luga mai ia koutou o talai ate Talitonuuga o tena Aliki, ke fai a ia, mai i mua o mea katoa, o talai mua loa a ia, ko tena faipati ke mafai o fuli mai a loto o latou kola e lagona ne latou. Vagana ke talai muamua a ia loa, a pati o tena gutu e seai semafai o pokotia iei a loto o latou kola e fia iloa. Fakalogo, O tino, ia koutou mafai pela mo latou e ave se apoapoaiga lei ki niisi kae puli o tautali kiei. A pati pena, ei i luga atu i pati kite uiga tonu o mea katoa, ei i luga atu i uiga tonu a agelu kola e pili atu kite Atua, e aumai o fakafesagai kia latou kola e fai pati pelo.

Kafai se tagata pena e manumaaloo ite fakapokotiaaga o so se tino, ate manumaaloo tenei e ttau o se-fai pela me ona ko ia, kae ona kote pokotia o muna ate Atua, pela mote fakatonuuga a Ia Tela kote Mafi-Katoatoa, kote Atamai-Katoatoa. I mata ote Atua a ia e fai pela me kote molii tela e ave a tena mainaaga, kae ui iai kote foitino kaatoa e fakamau foki loa ia ia loa.

Fai atu: Sa faigia, O tino, ate mea tela ka aumai ne ia ate faka taemaa ki luga ia koe io me kote seai se faka aloalo kite Talitonuuga ate Atua i mata o tagata, kae se fai pela mo latou ko tino faitogafiti. Sa faka pilipili ki mea kola a outou mafaufau e se-talia ne latou. Ave keatea a uiga matagaa, auaa i uiga pena e tapu ia koe ite Tusi tela e seai e ana pukegina vagana ko oti ne fulu ne te Atua mai i so se lailai ote see, kae aofia ia latou kola ko oti ne fakapiuagina.

Koutou ke amio fakapau ia koutou mo niisi tino, kote fakatalitonuuga ote fakamasinooga tonu ke mafai o fakaasi, mai i luga i oulua faiga i vasia o Omotou tavini fakamaoni. Faeteete ia koutou mana sopoia atu ki luga i mea totino ate oulua tuakoi. Fakatalitonu ia koutou e ttau ki tena talitonu mote mautinoa ia koe, kae sa taofi mai ia latou mativa a mea alofa kola ate matagofie ote Atua ko oti ne fakaeke aka ki luga ia koe. A Ia, e tonu, ka taui fakafia, kae toe togi atu faka tapolo kia latou ki mea kola ko oti ne fakaekegina ne latou. E seai se Atua na ko Ia. Kote foafoaaga mo tena maaloo e o Ia. E tuku atu Ana mea alofa kia ia tela e manako a Ia kiei, kae mai foki ia ia e mafai o taofi mai ia latou. A Ia kote Foai Takutakua, kote Lima Mafola Katoatoa, kote Manava Alofa.

Fai atu: Talai a koutou ate Talitonuuga ate Atua, O tino o Bahá, auaa ate Atua ko oti ne tusi mai ki so se tino taki toko tasi ate tiute o fakasalalau a Tena Meseti, kae kilo kiei me kote tiute tafasili ite tavaegina i tiute katoa loa. Se tiute pena e talia fua mafai a ia tela e talai ne ia ate Talitonuga ko leva se taugasoa talitonu mautakitaki ite Atua, kote Puipui Tafasili ite Maluga, kote Matagofie, kote Mafi-Katoatoa. Se gata iei, a Ia ko oti ne fakaeke ko Tena Talitonuuga ke talaigina mai ite paoa o faipatiiga a tagata, kae e seai e auala atu ite faka tupu o fakalavelave. Tena la ko oti a Tena tulafono ne tuku ifo mai ite Maaloo o Ia Tela kote Tafasili ite Maluga, kote Atamai-Katoatoa. Faeteete ia koe mana lotomalie ki so se tino, ikaai, taumafai o fai a ia ke iloa ne ia ate meatonu mo amioga alofa mote fakamaalosi mautinoa. Kafai a tino fakalogologo e tali mai, a ia e tali mai loa kite mea telaa e lei kia ia, kae kafai e seai tena, fuli a koe keatea mai ia ia, kae tuku oulua mata kite Fale mana ote Atua, kote nofoaga ote mana malifalifa.

Sa fakakinau mo so se tino e uiga mo mea ote lalolagi nei mo ana faigaa-mea, auaa ite Atua ko oti ne liakina a latou kola ko oti ne saga a olotou alofaaga kia latou. Mai ite lalolagi kaatoa ko oti ne filifili ne Ia mo Ia a loto o tagata – loto kola a agelu ote faaliiga mo faipatiiga ko oti ne tao ifo ki lalo. Tena, ko oti ne fakaekegina mai ne Maikao o Baha, i luga ite Tapeleti ote fakatonuuga e se-mafai o fuligia ate Atua, mai ite ikuuga a Ia Tela kote Fakaeke Tafasili ite Maluga, kote Iloa-Katoatoa.

O tino fai malaga ite auala ote Atua! Puke a tou vaega ote vasa o Tena alofa agalelei, kae sa liakina a koe mai i mea e nofo funa i loto i ona koga pooko. Ke fai a koutou mo latou ko oti ne kautasi i ona kope taaua. Se motiiga mai ite vasa tenei, kafai ko moti ki luga i tino katoa kola i lagi mote lalolagi, e lava loa o fai latou ke maumea ite alofa-mataefa ote Atua, kote Mafi-Katoatoa, kote Iloa-Katoatoa, kote Atamai-Katoatoa. I lima ote faka seai aumai mai i tena vai ola, kae fakasiusiu atu ki mea faiite katoa, kote mea ke mafai o fulu a latou mai i faka taputapuga katoa kae ke mafai o fakapilipili atu kite nofoga ote Atua, kote laueleele tapu kae malifalifa tenei.

Sa fanoanoa mafai a koe e fai se mea ia koe loa. Tuku kite Atua ke lava-i-mea-katoa mo koe. Ke mafuta piili mo Tena Agaaga (Spirit), kae fai a koe pela mo latou e fakafetai. Folafola atu ate Talitonuuga o Tou Aliki ki tino katoa kola i lagi mo i luga ite lalolagi. Kafai se tagata e tali mai ki tau kalaga, fola atu i ona mua a penina ote atamai ote Aliki, tou Atua, tela a Tena Agaaga (Spirit) ko oti ne tuku ifo ki lalo ia koe, kae fai pela mo latou e talitonu tonu. Kae kafai se tino e se talia ne ia a tau mea e tuku kia ia, fuli a koe keatea mai iei, kae tuku a tou talitonu mote mautinoa i tou Aliki, tou Atua, kote Aliki o lalolagi katoa.

Mai ite amio tonu ote Atua! So se tino tela e tala ona laugutu ite Aso tenei kae taku ne ia ate igoa o tena Aliki, ko agelu ote fakamaalosi Faka-te-Lagi ka olo ifo ki lalo i luga ia ia mai ite lagi o Toku igoa, kote Iloa-Katoatoa, kote Atamai-Katoatoa. I luga ia ia ka olo ifo foki ate Lukuuga mana mai i luga, taki tasi e amo ne latou ate ipu ote mainaaga piua. E tena ko leva ne fakaekegina i lalolagi o Faaliiga ate Atua, mai ite fakatonuuga a Ia Tela kote Matgofie-Katoatoa, kote Tafasili ite Maalosi.

E takato funa i loto ite Veli Mana, kae fakatoka mote galueega ate Atua, se lukuuga o Ana tino filifilia kola ka fakaasi atu ki tagata, kola ka feasoasoani ki Tena Talitonuuga, ka seai se tino e mataku kiei latou, e uiloa ate lanu o tagata katoa e tu ki luga kae faitaua atu kia latou. A latou konei kola, mai i mua o mata o latou e nofo ite lalolagi mo tino ote lagi, ka tu ki luga, kae pa-kalaga, o tavae ate igoa ote Mafi-Katoatoa, kae kami atu a tama a taagata kite auala ote Atua, kote Matagofie-Katoatoa, kote Tavaegina-Katoatoa. Sasale a koe ite auala o latou, kae se faigia so se tino ke fanoanoa koe iei. Ke fai a koe mo latou kola ite tumu ote lalolagi, me e pefea ate fakaitaita o latou ite auala ote olotou Tufuuga, e se mafai lele o fakafanoanoa, tela ate pogai ote loosi see o tino loosi e se mafai o fakatakavale.

Fanatu ki mua mote Tapeleti ate Atua mo Ana failoga, kae toe kau atu kia latou kola ko oti ne talitonu ia Au, kae fakapula atu kia latou a tala lei ote Omotou Palataiso tafasili ite mana. Fakailoa atu kia latou kola ko kautasi mo Ia. Fai atu: Au ko vau kia koe, O tino, mai ite Nofoaga-a-Tupu ote matagofie, kae o kave atu a te fakapulaaga mai ite Atua, kote Tafasili ite Maalosi, kote Tafasili ite Maluga, kote Tafasili ite Takutakua. I toku lima e kave atu ne au ate fakamaoniiga ate Atua, tou Aliki mote Aliki o ou tuaa mai i anamua. Fuafua ne koe kite Paleni ttau tena e nofo mo koe, kote Paleni ote fakamaoni o Pelofeta mo Mesentia ate Atua. Kafai e maua ne koe mene fakatu ite meatonu, kafai a koe e talitonu mene aumai ite Atua, faeteete ia koe mana se fiafia kiei, kae oko au galueega kite seai se aogaa, kae lau a koe i loto ia latou e see talitonu. E tonu kote failoga ate Atua tela ko oti ne tuku ifo ki lalo ona kote paoa ote mea tonu, auala mai ite maalosi o Tena Talitonuuga tela ko oti ne fakaasi atu ki Ana meaola faiite, mo failoga ote piua ne sau aka ki luga ite vaa ite lalolagi mote lagi.

Fai atu: Mea nei kote Tusitusiiga (Scroll) e pono kae faka-te-agaaga, kote faleteu ote Fakatonuuga e se mafai o ofagina ate Atua, e tusi iei a pati ne tusigina ne Maikao ote Mana, kola e ufiufi i loto ite veli ote mea funa e se mafai o ofagina, kae tenei ko oti ne tuku ifo ki lalo pela me se alofaaga ote agalelei ote Atua Tela kote Mafi-Katoatoa, kote Favavau o Aso. I loto iei ko oti ne fakatonu atu ne Matou ate faka ikuuga o latou katoa e nofo ite lalolagi mo latou ite lagi, kae tusi ki lalo ate poto o mea katoa ki toe mea fakaoti loa. E seai so se mea e ana mafai o tele keatea io me e fai mo fakalavelave kia Ia, faitalia me ne faiite ite taimi ko teka io me ka faiite ise taimi mai mua, e tonu e se kafi ne koe o atafia.

Fai atu: Ate Faaliiga ne tuku ifo ki lalo ne te Atua e tonu loa ko oti foki ne toe fai, ka kote Lima mafola ote Omotou paoa ko pulou gina i tino katoa kola i lagi mo latou katoa kola ite lalolagi. Ko oti Matou, mai ite paoa ote meatonu, kote tinaa mea tonu, ne fakaasi atu se malapuuga foliki kii loa ote Omotou Mea Funa e se mafai o maofa, ka ko latou kola ne lavea ne latou ate malifalifa ote gali kese faka-Sinai ko palele a tena maalosi, ite taimi ko atafia ia latou ate mapulaaga fakavae ote Mainaaga Lanu Kulimisoni e pulougina ite Sinai ote Omotou Faliiga. E tena ko oti a Ia Tela kote Gali ote Alofa-Falamagalo Katoatoa ne vau ki lalo i kaumana o Tena molimau, mote fakatonuuga ko oti ne fakataunu ne te Finagalo ote Atua, kote Matagofie-Katoatoa, kote Atamai-Katoatoa.

Fai atu: Tu mai ki tua o Tou potu mana, O kote Tavini fafine ote Lagi, tino nofo ite Palataiso Maluga! Pei a tou gatu I se auaa e fakafiafia kia Ia ite Gatu silika ote Seai-se-Mate, kae pei ki ei, ite igoa ote Matagofie-Katoatoa, kote Gatu ote Mainaaga e fakagaligali. Fakalogo, kite suamalie, kote gaugaleo ote Leo tela e vau mai ite Nofoaga-a-Tupu o Tou Aliki, kote Se-mafai-o-Okogina, kote Tafasili ite Maluga. Fakaali mai Ou mata, kae fakaasi ate gali ote Tamafine mata uli, kae sa faigia ko tavini ate Atua ke fakaseai mai ia latou ate mainaaga o Ou mata e sulu maina. Sa fanoanoa mafai a Koe e lagona ne koe a musumusuuga a tino e nofo ite lalolagi, io me ko leo ote fanoanoa o latou ite lagi. Liakina ko latou ke tanumia i luga ite pefu ote galo lele atu loa. Ke galo ifo a latou kite seai lele loa, pela mote ulaaga ote ita ko oti ne faka ka i loto i fatafata o tagata. Fakalagi, tena la, i mata o tino ote lalolagi mote lagi, i se leo e tafasili ite gali, a pese o tavaeega, mote masausauaaga o Ia Tela kote Tupu o igoa mo uiga lei ote Atua. Tena la ko oti Matou ne iku ko Matou a Tou fakaotiiga. E lei mo Matou ke maua ate pogai o Matou.

Faeteete mo aa a Koe e tapale a Tou gatu, a Koe Tela kote Kogaaloto tonu ote Matakalekale, o Tou gatu ote matagofie taulekaleka. Ikaai, atili fakamaumea a Koe, ite maaloo ote foafoaaga, mote gatu fakaaloalo ote Atua, kote ata gali ote Mafi-Katoatoa ke mafai o matea ia Koe I mea faiite katoa mote agalelei o Tou Aliki ke ulu salalau ite paoa e se lausia ote foafoaaga katoa.

Kafai e sogi ne Koe mai i so se tino ate manogi ote alofa o Tou Aliki, tuku atu a Koe mo ia, auaa a Matou ko oti ne faiite a Koe mote pogai tenei, kae ko oti ne feagaiiga mo Koe, mai ite favavau, i mata ote fakapotopotooga o taugasoa sili ite fakapelepele a Matou, mote pogai foki loa tenei. Sa fai ke seai sou onosai mafai ate tauaso i tou loto e pei ifo ki lalo i pokooga o manatu fakasupasupa o latou ki luga ia Koe. Liakina a latou kia latou loa, auaa ia latou e tautali i musumusuuga a latou kola tiapolo.

Tagi atu ote taumata o tino ite lagi moi luga ite lalolagi: Au kote Tavini fafine ote Lagi, kote Tama ne vau mai ite Agaaga o Bahá. Toku koga nofo kote Fale lasi malu o Tena igoa, kote Matagofie-Katoatoa. Mai i mua ote Lukuuga mana mai i luga Au ne fakaekegia ki lakei o Ona igoa. Au ne ulufia i loto i veli o se koga tausi e se-mafai o ofa gina, kae takato funa mai i mata o tagata. Au e mafaufau me ko oti ne lagona ne au ate Leo faka-te-lagi mote suamalie e se-fakatusa-gia, e vau mai ite lima faka-ata-mai ote Atua ote Alofa-Fakamagalo, kae fai aka nei, ate Palataiso kaatoa ne gasuke kae polepole mai i Oku mua, i tena naunau o lagona a tena gaugaleo, kae kilo ki luga ite gali o Ia Tela ne faipati ne latou. E tena ko oti a Matou ne fakaasi atu ite Tapeleti tafasili ite maina, kae ite suamalie o gana, a kupu kola ate Laulaufaiva ote Favavau ne gasue o faipati ite Qayyúmu’l-Asmá’.

Fai atu: E fakaeke ne Ia pela mote mea e finagalo a Ia kiei, kae e fai ne Ia so se mea tela e manako a Ia kiei i Tena finagalo. A ia ka se sili ki mea e fiafia a Ia o fakaeke. A Ia ite tonuuga, kote Se-Mafai o Taofigina, kote Maalosi-Katoatoa, kote Atamai-Katoatoa.

Latou kola ne se talitonu ite Atua kae fai taua ki Tena nofoaiga-a-Tupu ko latou ko tino seai ne aogaa o olotou manakooga faitogfiti mo manatu leaga. A latou konei ka foki ki olotou koga nofo ite afi o seoli: matagaa kote koga nofo o latou kola e fakafiti!

Ke lima mafola koe i taimi ote maumea, kae fakafetai i taimi ote faigata. Ke taaua koe ite talitonu o tou tuakoi, kae kilo ki luga i tou tuakoi mo mata maina kae fiafia. Ke fai a koe mo kope taaua ki latou mativa, se tino akoako kia latou maumea, e tali ki tagi o latou e se-lava, se tino tausi kite mana ki tau mea ofo. Ke amio tonu koe i tau fakamasinooga, kae leoleo a tau faipati. Sa fai fapito au mea ki so se tino, kae fakaasi atu ate loto maulalo ki tagata katoa. Ke fai koe me se molii kia latou kola e sasale ite pouliiga, se fakafiafia kite fanoanoa, se kogaa-tai mo latou e fia inu, se lafiiga mo latou e tigaina, se tino sapooti kae puipui o latou ne maua ne te faka maseiiga. Ke fai ate fakamaoni mote amio tonu mo fakalavea au faiga katoa. Ke fai a koe me se fale ki tino kese, se sinu fakamafanafana kia ia e puapuagaa, se olo maalosi ki tino kese. Ke fai koe mo mata kia ia tauaso, mo se molii fakasino auala ki vae o latou ko see valevale. Ke fai koe me se pale ki mata ote mea tonu, se kalauna ki mualae ote fakatuanaki, se pou ote tempolo ote amio tonu, se manavaaga ote ola kite foitino o tagata, se fuka o agelu ote fakamasinooga tonu, se mainaaga mai i luga ite sikulagi ote lei, se pefu kite laueleele ote loto o tagata, se vaka i luga ite vasa ote poto, se laa ite lagi ote alofa-mataefa, se fatu taaua i luga ite kalauna ote atamai, se mainaaga e sulu kite lagi o outou tupulaga, se fuaga lakau kaina iluga ite lakau ola ote loto maulalo.

Ate Pene o te Tupu Favavau e se-mafai o gata ate masaua o fagasele ate Atua. Ite taimi e tasi, a vaitafe ote alofa fakamagalo ko tafe mai i Tena Pene, kae i sua taimi, mai ite gasuesue, ote Tusi maina ko oti ne fakaasigia. A Ia kote Tokotasi Tela e seai e mafai o fakatusa kiei, Tela a Tena faipati e seai se tagata ola e ana maua o fakafeagai kiei. Ko Ia Tela mai ite favavau ko oti loa ne fakatu i luga ite nofoga ote fakasilisili mote mafi, ko Ia mai i Ona laugutu ne olo atu iei a poloakiiga e taugaa tonu ki manakooga ote saofiaaga o tino katoa, pela foki mo uonigi e aogaa mo latou.

A te Atua tonu Tokotasi e fai mo Aku molimau, mo ana mea faiite ka fai mo molimau, me e seai se taimi toetoe e fakasaoloto ne Au ke funa mai i mata o tagata, io me ne talia ne Au ke puipui a Toku foitino mai ite pakia. Mai i mua o mata o tagata katoa ne tu aka Au ki luga, kae fai atu kia latou ke fakataunu a Toku fiafiaaga. A Toku fakamoemoeega e seai aka foki na kote atili fakalei ote lalolagi mote filemu o ana tino. A te nofo lei o tino, tena filemu mote nofo saogalemu, e se-mafai lele o maua vagana kae seiloga fua ko tena fakatasitasi fealofani ke fakatu mautakitaki. A te fakatasitasi fealofani tenei e se-mafai lele o maua manafai a poloakiiga kola ate Pene ote Tafasili ite Maluga ko oti ne fakaasi mai e pokotia o olo o galo kae e se tautaligia.

Mai ite paoa o muna ne faipatigia mai ne Ia ate lanu kaatoa o tagata e mafai o fakamainagina kite mainaaga ote fakatasitasi fealofani, mote masauaaga o Tena Igoa e mafai o faka ka i loto o tagata katoa, kae kaagia keatea a veli kola e pono ite vaa o latou mo Tena matagofie. E mafai o sae keatea a so se fusiiga ki lalo, kae e isi ate paoa o fakafoki mai ate maalosi tela e fakamaaumau kia ia kae fakagalo….

Ke piua, O tino ote Atua, ke piua; ke amio tonu, ke amio tonu. … Fai atu: O tino ote Atua! Ate mea tela e fakamauntinoa iei ate manumaaloo o Ia Tela kote Mea Tonu Favavau, ko Ana Agelu mo tino feasoasoani i luga ite lalolagi, ko oti ne vase ki lalo i Tusi mana mo Tusitusiiga tapu, kae e maina kae lavea gina pela mote laa. A lukuuga konei o amioga tonu pena, ko amioga mo uiga, kola e taliagia i Ona mata. So se tino tela e tu ki luga, ite Aso tenei, o feasoasoani ate Omotou Talitonuuga, kae manakomia ki tena feasoasoani a lukuuga o uiga e tavaegina kae amio tonu, ate pokotia e maua mai i faiga pena, ka tonu eiloa, o tufatufa atu salalau ite lalolagi kaatoa.

Ate Pogai ote Atua tonu tokotasi, ke maluga a Tena matagofie, ite fakaasi a Ia ki tagata kote mea ke fola mai a fatu taaua kola e nofo funa i loto ite ana o olotou kano loto tonu. Ko sokooga kese kese ote lalolagi, mo fakanofooga tuafia o talitonuuga faka lotu, ke se-ttau lele loa o fakasaoloto o fakamaalosi ne latou a lagona ote kaitaua i vasia o tagata, ite Aso tenei, kote fakaasiiga tonu ote Fatuatuaaga ate Atua mo Tena Talitonuuga. A akoakoga fakavae mo tulafono konei, ko fakanofooga mautakitaki kae mafi konei, ko ooti ne olo atu mai ise Kamataga e tasi, ka ko kavei ote Mainaaga e tasi loa. Ate keseega o latou mai i sua mea e pogai kite kese kese o manakooga ote vasi-taimi ne folafola mai iei.

Fusi aka a totooga ote oulua taumafaiiga, O tino o Bahá, mote fiafia e mafai ate kiiiga ote teke mote fai taua faka lotu tela ko kosu ne latou a tino ote lalolagi ke mafai o fakagata, kote mea ko so se maaka o ia ke mafai o solo lele loa keatea. Aua ite alofa moo te Atua, pela foki mo latou kola e tavini mo Ia, e tu o feasoasoani kite Faaliiga tafasili ite maluga kae fakaofoofogina. Ate faifitoi valea faka tapuakiiga mote ita pela me se afi e kai ne ia ate lalolagi, tela a tena kaitaua e seai e ana maua o tamate. Ate Lima ote paoa Faka-te-Lagi e mafai, tokotasi o fakasao mai a tino mai i pokotiaaga masei konei….

A folafolaga ate Atua se lamepa, tela ko tena minaaga ko pati konei: Koutou ko fuaga kaina ote lakau e tasi, ka ko ona lau mai e mai ite kaula e tasi. Galue koutou mo sua tino ite agaaga tafasili ote alofa mote filemu, fealofani mote faka taugasoa. A Ia Tela kote Fetu Ao ote Mea Tonu e fai mo Aku molimau! E maalosi kii ate mainaaga ote fakatasitasi fealofani e mafai ne ia o fakamaina ate lalolagi kaatoa. Ate Atua tonu tokotasi, ko Ia Tela e iloa a mea katoa, a Ia e molimau kite meatonu i pati konei.

Taumafai maalosi koutou ke mafai ne koutou o maua ate tulaga tafasili ite maluga tenei, ate tulaga tela e mafai o fakpatonu ate puipuiga mote nofo toka o tino katoa. Ate koulu tenei e silia atu i niisi koulu aka fakaatea, ka kote fakamoemoega tenei kote tupu o fakamoemoega katoa. Sei vagana, ko kaumana lasi ote teke, kola e pono iei ate fetuao ote fakamasinooga tonu, e tumau e se-galo, ko faigata mote matagofie ote tulaga tenei o fola atu ki mata o tagata....

Fesokotaki mo tagata katoa, O tino o Bahá, ite agaaga ote fealofani mote fakatasitasi. Kafai a koutou e iloa a se mea tonu, kafai e isi ia koutou se fatu taaua, tela e seai i niisi, tufa atu kia latou i se gana tafasili ite alofa mote agalelei. Kafai e talia, kafai ko fakataunu a tena pogai, ate outou fakamoemoega ko taunuu. Kafai se isi e se-talia ne ia, liakina a ia kia ia, kae akai fakamolemole kite Atua ke takitaki atu a ia. Faeteete ia koutou mana fakaasi ate se-alofa mo ia. Ate laulaufaiva alofa kote maneta o loto o tagata. Kote falaoa ote agaaga, e fakagatu ne ia a pati mo olotou uiga, kote punaa vai ote mainaaga ote atamai mote malamalama…..

Ko tulafono ate Atua ko oti ne tuku ifo ki lalo mai ite lagi o tena Faaliiga pito silisili. Katoa e ttau o tautali kiei mote fakamaoni. Ate tulaga silisili ote tagata, ko tena tinaa gasolo ki mua, ko tena manumaaloo fakaoti, e tumau ite fakalagolago, kae ka tumau pena, ki luga ia latou. So se tino tela e tausi a tulafono ate Atua ka maua ate fiafia kite favavau.

E sautualua ate tiute ei iluga ia ia tela e iloa ate Punaa Aso ote Kaufakatasiiga ate Atua, kae talia ate meatonu a Ia Tela kote Faifekau o Tena tafatasi. Ate mea muamua kote mautakitaki i Tena alofa, se mautakitaki pena tela e se gata fua ite uatee ote fili io me ko faaitiooga ate loi pelo e mafai o taofi a ia mai ite piki mau kia Ia Tela kote Meatonu Favavau, se mautakitaki tela e se-amanaia iei a latou i so se mea. Kote lua ote tautali fakamaoni ki tulafono ne tusia mai ne Ia – tulafono kola ke aumai ne Ia, kae ka tumau o aumai ne Ia, ki tagata, kae mai iei kote meatonu ka mafai o iloga e mavae mai ite se-tonu.

Ate tiute muamua kae fakatomua ne tusia mo tagata, i tafa ote iloa o Ia Tela kote Meatonu Favavau, kote tiute kite mautakitaki i Tena Talitonuuga. Piki mau a koe kiei, kae fai pela mo latou a olotou mafaufau e pikimau kae fakavae ite Atua. E seai se galueega, me e pefea ate tavaegina, e mafai o fakatusa kiei. A ia kote tupu o galueega katoa, kae kite mea tenei a tou Aliki, kote Tafasili ite Maluga-Katoatoa, kote Tafasili ite Maalosi, ka fai mo molimau….

A uiga lei mote natula lei o tino e tau atu kite Atua kae katoa e iloagina kae lavea, kae ko oti ne tusi mai kae fakamatala i Tusi katoa faka-te-lagi. Mai ia latou kote fakatalitonuuga, kote faipati tonu, piua ote loto kae e mafuta mote Atua, kolomaki, fakamasani ki so se mea ate Mafi-Katoatoa ko oti ne fakatonu mai, lotomalie mo mea a Tena Finagalo ko oti ne tuku mai, onosai, pela foki mote fakafetai i taimi o fakalavelave, mote fakana katoatoa, i fakanofooga katoa, ki luga ia Ia. A mea konei e fakavasega, e tusa mote fakatautau ate Atua, ki galuega tafasili ite maluga mote tafasili ite tavaegina. A galueega aka katoa e, tumau pena, ite tulaga lua kae lagolago kia latou….

Ate agaaga tela e ola i loto ite loto o tagata kote poto ote Atua, ka ko tena lakei tonu loa kote iloa ote mea tonu tela “A Ia e fai a so se mea e finagalo a Ia kiei, kae e fakaeke a so se mea tela e fiafia a Ia kiei.” A tena gatu kote mataku kite Atua. Ka ko tena katoatoaaga kote mautakitaki i Tena Talitonuuga. Telaa la ate Atua e fakatonu ki so se tino tela e salasala kia Ia. A Ia, e tonu, e alofa ki se tasi tela e fuli atu kia Ia. E seai aka foki se Atua, na ko Ia, kote Fakamgalo, kote Tafasili ite Alofa-Lauefa. Ko tavaeega katoa e ote Atua, te Aliki o lalolagi katoa.

O Mataitusi ote Olaaga! Ate taliga ote Atua ko oti ne lagona a tau tagi, ka ko Ana mata ko oti ne kilo ki tau akai ne tusilima. A Ia e kalaga atu kia koe mai i Tena nofoaga ote matagofie, kae fakaasi atu kia koe a kupu kola ko oti ne tuku ifo ki lalo ne Ia Tela kote Feasoasoani i mea Faigata, kote Ola-Loa-ia-Ia.

Fakamanuia a koe aua ne fakaseai lele loa ne koe a tupua o mafaufauuga e seai ne aogaa, mote liakina keatea ate veli o manatu valea, mai ite paoa ote mafi o tou Aliki, kote Puipui Tafasili ite Maluga, kote Mafi-Katoatoa, kote Fagasele tokotasi. A koe e tonu e lau mo Mataitusi kola ko silia atu i so se isi Mataitusi aka. Kaiaa la a koe ne fakaatea aka ne te Atua mai ite laulaufaiva o tou Aliki, te Báb, kote maina o Ona mata e pulougina, kae ka tumau o pulougina, ate foafoaaga kaatoa. Avatu a fakafetai kite Mafi-Katoatoa, kae fakalasi a Tena igoa, pela eiloa mo Tena feasoasoani kia koe ke lavea ate Talitonuuga tela ne fai iei a loto o tino nofo i lagi mote lalolagi ke sapolepole, tela ne fai ne ia a tino o Maaloo ote foafoaaga mote Faaliiga ke tagi ki luga, kae auala mai i mea funa i fatafata o tagata ko oti ne sala atu kae iloilogia.

A Tou Aiki, kote Tafasili ite Maluga (kote Báb), e faipati atu kia koe, mai i Tena Lalolagi ote matagofie, a pati konei: E takutakua ate fakamanuiaaga tela e faitali kia koe, O Mataitusi ote Olaaga, auaa ia koe ko talitonu fakamaoni ia Au, ne seki talia ne koe o fakamaa Au i mua ote Lukuuga mana mai i luga, ko oti ne fakataunu a tau ofo, ko oti ne liakina keatea ate veli o manatu seai ne aogaa, kae fakatonu a tau kilo ki luga ite Aliki, tou Atua, kote Aliki ote se-lavea mote lavea, kote Aliki ote Maalumalu e Oko-saale gina. Au ne fiafia kii mo koe, pela eiloa mo Au ne maua atu a ou mata e sulumaina ite mainaaga ite Aso a mata o latou fanoanoa ko oti ne fuli ke uliuli.

Fai atu: O tino ote Bayán! A Matou e seki polopoloaki atu kia koutou, i Omotou Tapeleti katoa pela foki mo Omotou Tusitusiiga Tapu kae funa, ke se-tautali a koutou i outou manatu leaga kae seai ne aogaa mo outou naunauuga faitogafiti, kae tausi a outou mata ki mua ite Ata ote matagofie silisili, ite Aso ate Paaleni Tafasili ite Mafi ka fakatonu, ate Aso ko gaugaa leo suamalie ote Agaaga ote Atua ka ligi ifo mai ite lima taumatau ote nofoaga-a-tupu o tou Aliki, kote Puipui Tafasili ite Maalosi, kote Maalosi-Katoatoa, kote Mana o Mana? E seki fakatapu ne Matou a koutou ke piki ki mea kola ka ponotia iei a koutou mai ite Faifekau ote omotou Gali, i tena Faaliiga fakamuli ifo, me ko latou ne fakagaligaliiga o igoa ote Atua i olotou matagofie katoa, io me ko tino fakaasi o Ona uiga lei mo olotou maaloo? Molimau mai la ite taimi loa tela ne fakaasi iei Au, ne seki talia ne koutou a Taku munatonu kae fuli keatea mai ia Au, kae fai a koutou pela mo latou e fakaasi ia latou ko failoga ate Atua pela me ne mea tafao kae fakamaumau taimi!

I Toku Gali! E seai a so se mea, ite Aso tenei, e taliagia mai ia koe, e ui iai a koutou e tumau o tapuaki kae totuli a koutou mai i mua ote Atua kite se-gata mai o Tena maaloo. I mea katoa e falagolago ki luga i Tena Finagalo, ka kote taaua o galueega katoa e fakana ki luga i Tena taliaaga mo Tena fiafia. Ate iunivesi saukatoa e seai na ko se lima e fonu i kaupapa i Tena puke. Vagana e lavea ne se tasi ate Atua kae alofa kia Ia, a tena tagi e se lagona ne te Atua ite Aso tenei. Ate mea nei kote fakaasiiga tonu o Tena Talitonuuga, e seki iloa aka loa ne koe.

E mata e lotomlie koe ki mea pela mo afusaga ise lau fenua laugatasi, kae ke lotomalie o fakaseai ate Vasa Ko Ana vai e fakafou, mai ite Finagalo ote Atua, ko agaaga ola o tagata? Fakafanoanoa kia koe, aua ne taui mai ate alofa ote Atua mo se mea tafasili ite seai se-aogaa mote faka takalialia. Koutou, e tonu, ko latou kola ne se-talia Au i Taku Faaliiga mai i mua atu. E mafai a oulua loto o maina iei!

Tu ki luga, mai lalo o mata ote Atua, tautua atu mo oulua tatooga i tiute kia Ia. Mea nei ko Taku tulafono kia koe, mafai a koe e tuku mai ou taliga ki Taku tulafono. Ona ko Au ko Toku Foitino loa! E se gata ko tino ote Qur’án, io me ko tino tautali ite Torah io me kote Evagelia, io me ko latou i se isi Tusi aka, ko oti ne fai ne latou a mea a outou lima ko oti ne faiite. Au, ia Au, ko oti ne fakamaumau a Toku ola katoatoa kite fakasaooga ote meatonu ote Talitonuuga tenei. Au, ia Au, ko oti ne fakasalalau, i Aku Tapeleti katoa, ate sae mai o Tena Faaliiga, kae e ui iai, ko fatoa fakaasi mai a Ia, i Tena Faaliiga mai i tua atu, ne pei mai kite gatu ote matagofie o Bahá kae teuteu mai ite peleuee o Tena Agalelei, ke tuu a koutou o teke kia Ia Tela kote Puipui tafasili, kote Ola-Loa-ia-Ia. Faeteete, O tino! E faka lumaluma ia koutou kola ne siga ki lalo mai i Oku mua mai i lima Ite auala ote Atua. Fakalogo ko koutou ke se fai pela mo latou ne se-talia a mea kola ko oti ne tuku ifo ki lalo kia latou mai ite Lagi ote matagofie maluga atu ote Atua.

E pena, O Mataitusi ote Olaaga, ko pati a tou Aliki ko oti ne faipati, kae fai atu kia koe mai i lalolagi mai i luga. Folafola atu a pati a tou Aliki ki Ana tavini, kote mea ke mafai ne latou o luelue mai ite olotou moe, kae akai atu kise fakamagalo mai ite Atua, Tela ko oti ne faiite kae faka foliga a latou, kae tuku ifo ki lalo kia latou ate Faaliiga tenei e tafasili ite maina, tafasili ite mana mote laveagina.

Fai atu: Aumai a outou agaaga ola (souls), O tino, mai ite falepuipui ote foitino, kae faka piua a latou mai i kopikopiaga katoa ki so se mea na ko Au. Ate masauaaga o Au e fulu ne ia a mea katoa mai ite masei, e se lavea ne koe. Fai atu: Moi fai a mea faiite katoa e fakaseai lele loa ate veli o mea mo manakooga faka-te-lalolagi e seai ne aogaa, ate Lima ote Atua ite Aso tenei ka puipui a latou, taki toko tasi kae katoa loa, kite peleuee “A Ia e fai a so se mea e finagalo a Ia kiei ite maaloo ote foafoaaga,” iei ka mafai o fakaasi atu a failoga o Tena nofoaiga-a-tupu i mea katoa. Ke fakamaluga a Ia, kote Tupu Aliki o tino katoa, kote Mafi-Katoatoa, kote Puipui Tafasili ite Maluga, kote Matagofie-Katoatoa, kote Tafasili ite Maalosi.

Fakalagi, O Taku tavini, a kupu ate Atua kola ko oti ne maua ne koe, pela mote fakalagi a latou ko oti ne fakapilipili atu kia Ia, kote suamalie o tou sikugaleo ke mafai o faka ka ne ia a tou agaaga ola, kae futi mai ne ia a loto o tagata katoa. So se tino tela e fakalagi, ite filemu o tena potu, a kupu ne fakaasi mai ne te Atua, a agelu ka fakasalalau ki tua atu ate manogi o muna ne faipati ne ia, kae ka fai ne ia a loto o tino amiotonu katoa ke polepole. E uiloa a ia, i taimi muamua, e seiloa ne ia ate pokotia ote uiga lei ote alofa ne faka mealofa kia ia e ttau loa i se taimi pili io me mai tua o pokotia ki luga i tena agaaga ola. Tena laa a mea lilo ote Faaliiga ate Atua ko oti ne fakaiku mai i luga ite Finagalo o Ia Tela kote Kamataga ote maalosi ote atamai.

O Khalíl! Ate Atua ko Taku molimau. E ui iai a Taku Pene koi gauesue i luga i Taku Tapeleti, kae, i tena loto tonu, e tagi fanoanoa kae mae ite mafatia. Ate lamepa e kaa mai i mua o te Nofoaiga-a-Tupu, e pena foki, e tagi fanoanoa kae tagi tagi ona ko mea ne mae iei ate Gali Favavau mai i lima foki loa o latou kola kote foafoaaga o Tena Finagalo. A te Atua, a Ia, e iloa kae fakatalitonu kite meatonu o Aku pati. E seai se tagata ne seki lagona ne ia ate pakalaga a tino fapaupau, kae tuku ate fakalogo ki mea faiite katoa, e mafai o se lagona ne ia ate leo o olotou tagi tigaina mote tagi fanoanoa ona ko fakalavelave koi i luga ia Latou mai i lima o Omotou tavini kola ko se-talitonu kae ko teke mai kia Matou. Tena ko oti Matou ne fakaasi atu a se tamaa lavea malie ote fanoanoa ko feagai mo Matou kote mea ko koe ke iloa a Omotou puapuagaa, kae kolomaki mote onosai a ou fanoanoaaga.

Tu ki luga o feasoasoani ki tou Aliki i taimi katoa kae i nofonofooga katoa, kae fai a koe me se tasi o Ana tino feasoasoani. Polopoloaki atu a tino ke tuku mai a olotou taliga ki pati e faipatigina mai ne te Agaaga ote Atua ite Tapeleti e tafasili ite maina kae malifalifa tenei. Sa toki gina, O tino, a tega ote faka kinau i vasia o tagata, kae sa faka kinau mo tou tuakoi. Onosai i taimi katoa kae tuku a tou talitonu katoatoa mo tou mautinoa tonu ite Atua. Feasoasoani ki tou Aliki mote pelu tau ote atamai mote faipati. E ttau tenei mote tulaga o tagata. O liakina mai iei e seai se aogaa mote Atua, kote Aliki Mamalu o tagata katoa, kote Matagofie. A tino ko oti ne takitaki see kae e fai mo latou se fakalogo.

Tala mai, O tino, a mataloa o loto o tagata ki kii ote masausau o Ia Tela kote Masausauaga ote Atua mote Kamataga ote atamai ite vasia o koutou. Ko oti ne fili ne Ia mai i lalolagi o loto katoa o Ana tavini, kae fai a latou taki tasi me ko nofoaga mote fakaasiiga o Tena matagofie. Kaiaa la e fakamana iei a latou ki mea masei katoa, ko mea kolaa ne faiite iei ke mafai o tusi i luga ia latou. E tenei e tonu se alofaaga ote alofa maumea ote Atua.

Fagaligali a outou laulaufaiva, O tino, kite faipati tonu, kae teu outou agaaga ola ki lakei ote fakamaoni. Faeteete, O tino, ia koutou mana amio faitogafiti mo so se tino. Faitalia me ko koutou ko tino tausi fakanagina ate Atua i vasia o Ana meaola faiite, mo fuka o Tena lima-mafola i vasia o Ana tino. Latou kola e tautali i olotou manakooga leaga mo naunauuga faitogafiti, ko oti ne se kae ko se maalosi a olotou taumafaiiga. A latou, e tonu, ko galo. Taumafai, O tino, ko outou mata ke mafai o taaki atu kite alofa fakamagalo ote Atua, ko outou loto ke mafai o tiuni ki Tena masausauaaga fakaofoofogina, ko outou agaaga ola ke moe mote mautinoa tonu i luga i Tena agalelei mote lima mafola, ko outou vae ke mafai o sasale ite auala o Tena fiafiaaga-lei. A apoapoaiga pena ne tuku atu ne Au ki luga a koe. Mata a koe e tautali ki Aku poloakiiga!

A niisi e fakatau pela me e lei i lalo ite tulafono o sopoia atu ate fakamaoni mo kope o olotou tuakoi, kae manatu mama ki poloakiiga ate Atua pela mo mea e tusi i Tena Tusi. Ate masei ke i luga ia latou, ka kote fakasaalaga ate Atua, kote Maalosi Katoatoa, kote Mafi-Katoatoa, ke pokotia ia latou! A Ia Tela e sulu maina i luga atu ote Punaa Aso ote mana! Kafai ate lalolagi saukatoa e fuli kite siliva mote aulo, e seai se tagata tela e fai ia ia ko oti ne fanaka tonu ki luga ite lagi ote talitonu mote mautinoa tonu e toe fano ifo o atafia ate mea tena, kae e faigata atu loa o puke kae tausi ate mea tena. Matou ko oti mai i mua atu ne fakasino kite mataupu tenei i fuaiupu ne fakaasi ite gana Alapi, i se gana tafasili ite gali. Ate Atua kote Omotou molimau! So se tino ko oti ne tami ite suamalie o muna konei e se-mafai lele loa o talia ke sopoia atu i tuakoi ko oti ne fakatu ne te Atua, io me ko ia ka mafai o fuli a tena kilo ki se isi mea aka na loa ko tena Fagasele Sili. So se tagata pena, mo tena mata i loto, ka lavea aunoa se fakalavelave ate seai se aogaa mote se-tumau o mea ote lalolagi tenei, kae ka tuku ana alofaaga ki mea mai iluga atu.

Fai atu: Kafai a koutou e fakalumaluma, O koutou kola e fakaigoa me ko tino alofa kite Gali Favavau! Ke ttau koutou o polopoloaki ki puapuagaa ne oko ki luga ia Ia, mai ite amoga ote mafaatia ne tauave ne Ia ona kote suafa ote Atua. Ke fakamatala a outou mata. Sea a ate pogai ne galue iei a koutou, kafai a tofooga tuafia ne kolomaki ne Ia, ite fakaotiiga, e mafua mai iei a tofiiga matagaa, mo amioga tafasili ite masei? So se tino kaisoa, so se tino galue fakapelo, ko oti, i aso mai i mua o Taku Faaliiga, ne muagutu atu a muna konei, kae e fai ne latou amioga foki loa konei.

E tonu, Au e fai atu, tuku mai ou taliga ki Toku leo suamalie, kae fakamana a koutou mai i lailaiiga o fiafiaaga leaga mo manakooga faitogafiti. Latou kola e nofo i loto ite tapanekolo ote Atua, kae fakatu i luga i nofoaga ote matagofie favavau, ka se talia, e uiloa a latou ka mate ite fiakai, ko fakaloa atu olotou lima o kaisoa aunoa mo se tulafono a kope a olotou tuakoi, e uiloa ate masei mote seai se aogaa o ia.

Ate pogai ote Atua tonu tokotasi ite fakaasi mai o Ia ke kalaga atu ki tino katoa kite faipati tonu mote fakamaoni, kite fakatuanaki mote fakatalitonugia, kite talia mote loto malie katoatoa kite Finagalo ote Atua, kite onosai mote alofa, kite amitonu mote atamai. Tena pogai ke fakatoka i so se tagata a se gatu o amioga masinasina, kae ke fakapei a ia ki lakei o amioga mana kae lei.

Fai atu: Ke iai ate alofa-fakamagalo ia koutou mo outou taina faka fenua, kae sa falamaegina ate Talitonuuga ate Atua – se Talitonuuga tela e tafasili ite maluga atu ite kano loto mana – ke pisia i lailaiiga o manatu fakasupasupa, ko outou mafaufauuga se-lei kae faitogafiti.

E lavea ne koe, O te Atua ote Alofa Fakamagalo, a Koe a Tena paoa e ulu i loto i mea faiite katoa, a tavini konei a Koe, Au tavini tautali, kola, e tusa mote fiafia-lei o Tou Finagalo, e tautali ite ao ate anapogi ne fakatonu atu ne Koe, o tu ki luga, ite mafaaga ote aso, o takutaku a Tou Igoa, kae fakamasaua a Ou tavaeega, ite fakamoemoe ke maua se tusaga o mea lei kola e tausi i loto i fale koloa o Tou agalelei mote lima mafola. Au e akai kia Koe, O ko Koe e puke i Ou lima ate puleega ote foafoaaga kaatoa, i Tou lima e puke iei ate maaloo kaatoa o Ou igoa mo Ou uiga lei, ke se fakaseai, i Tou Aso, Au tavini mai i motimotiiga e maligi ifo mai i kaumana o Tou alofa faka magalo, io me e fakalavelave a latou mai ite puke a olotou vaega ote vasa o Tou fiafiaaga lei.

A atomu katoa ote lalolagi e fai mo molimau, O toku Aliki, kite takutakua o Tou paoa mo Tau puleega faka-tupu; pela foki mo failoga katoa ote iunivesi e molimau kite agalelei o Tou afioga mo Tou mafi. Ke iai ate alofa-fakamagalo, O Koe Tela kote tupu Aliki o tino katoa, Tela kote Tupu o aso kite favavau, mote Pule o maaloo katoa, ki luga ia Au tavini, kola ne piki mau kite kafaanoa o Au tulafono, kola ne ifo ki lalo a olotou ua ki faaliiga o Au tulafono kola ko oti ne tuku ifo ki lalo mai ite lagi o Tou Finagalo.

Molimau, O toku Aliki, mene pefea a olotou mata o avaka ki luga ite tafaoata o Tou alofa-kaimalie, mene pefea a olotou loto o tuku i luga i vasa o Ou alofaga, mene pefea a olotou leo ne tuku ifo ki lalo i gaugaa-leo o Tou Leo tafasili ite suamalie, e kalaga, mai ite tumu o Tulaga, i Tou igoa kote Matagofie-Katoatoa. Feasoasoani a Koe ki Au fagasele, O toku Aliki, latou ko la ne liakina a mea katoa, kote mea ke mafai ne latou o maua a mea e nofo mo Koe, kola a tofooga mo puapuagaa ko siomia ona kote fakaseai ote lalolagi kae tuku a olotou alofaga ki luga i Tou lalolagi ote matagofie. Puipui a latou, Au e akai kia Koe, o toku Aliki, mai ite faitaua o olotou fiafiaaga leaga mo manakooga, kae feasoasoani a latou ke maua a mea kola e aogaa kia latou ite lalolagi nei mote sua lalolagi.

Au e talo kia Koe, O toku Aliki, i Tou nofo Funa, ko Tou Igoa fakapelepelegina, tela e kalaga i luga mai ite maaloo ote foafoaaga, o kami atu a tino katoa kite Lakau Ola mai mua atu tela e seai e toe pasia, ate nofoaga ote matagofie tafasili ite gali, ke vaiua ifo ki luga ia matou, pela foki ki luga i Au tavini, ate vaiua fonu maligiligi o Tou alofa fakamagalo, ke mafai o fulu ke maa a matou mai ite masaua o mea katoa na loa ko Koe, kae fakapilipili atu a matou ki matafaga ote vasa o Tou agalelei. Fakaiku mai, O te Aliki, auala atu i Tau Pene tafasili ite maluga, ate mea tela ka fai ne ia a motou agaaga ola ite Lalolgi ote matagofie ke tumau kite favavau, kae fakatumau a motou igoa i Tou Maaloo, kae leoleo a motou olaaga i kope taaua o Tau puipuiiga pela foki mo motou foitino ite olo maalosi o Tou tumau e se-mafai o solisoligina. E maalosi a Koe i luga i mea katoa, me ko latou i taimi ko teka atu io me mai i mua. E seai se Atua na ko Koe, kote Puipui malosi katoatoa, kote Ola-loa-ia-Ia.

E lavea ne Koe, O te Aliki, a motou lima akai e sisi ki luga kite lagi o Ou alofaaga mote maukoloa. Talia mai ke mafai a latou o fakafonu ki kope taaua o Tou kaimalie lausa ko alofaaga mataefa. Fakamagalo mai matou, a motou tamana, pela foki a motou matua, kae fakataunu a so se mea e manako a matou kiei mai ite vasa o Tou agalelei mote kaimalie Faka-te-Lagi. Talia mai, O te Fagasele o motou loto, mo galueega katoa a matou i Tou auala. A Koe, e tonu, kote Tafasili ite Maalosi, kote Tafasili ite Maluga, kote Se-Mafai o Fakatusagia, kote Tokotasi, kote Fakamagalo, kote Alofa Atafai.

Fakalogo fakalei a tou taliga, O Nabíl-i-A‘zam, kite Leo o Aso ote Favavau, e tagi kia koe mai ite Maaloo o Tena Igoa matagofie-katoatoa. Ko Ia Tela e folafola atu nei mai i lalolagi mai i luga, kae i loto ite kano loto tonu o mea faiite katoa: Au e tonu kote Atua, e seai aka foki se Atua na ko Au. Au ko Ia Tela, mai ite favavau, kote Kamataaga ote nofoaiga-aliki katoa mote paoa, ko Ia Tela ka tumau, salalau ite favavau, o faka galue a Tena nofoaiga-a-tupu kae fakalasi atu a Tena puipuiiga ki mea faiite katoa. Aku fakatalitonuuga kote takutakua o Tou Mafi mo Toku nofoaiga-a-aliki tela e aofia iei ate foafoaaga kaatoa.” ….

Fakamanuia a koe, O Toku igoa, pela mo koe ko ulufale mai ki Toku Vaka, ka ko faka makini a koe, mai ite paoa o Taku pule mote mafi maluga, ite vasa ote agalelei, kae e lau mo Aku fagasele ko olotou igoa ate Maikao ote Atua ko oti ne tusi mai. A koe ko oti ne inu mai ite ipu ote ola mai i lima ote Talavou tenei, Tela e tamilomilo iei ko Faifekau ate Matagofie-Katoatoa, mote puula o Tena nofomai a latou Kola ko Punaa Aso ote Alofa-Fakamagalo e tavaegina ite ao mote po.

Tena matagofie ke ia koe, pela mo koe e fai malaga mai ite Atua kite Atua, kae ulufale atu i loto i tuakoi ote Koga Nofo ko tena gali e se-mafai o matafi – kote Laueleele tela e seai se tagata e ana maua o fakamatala. I loto iei ate laumatagi malielie ote mana, e fonu ite alofa o tou Aliki, ne fago iei a tou agaaga i loto ia koe, mote vai ote malamalama ko fulu mai ia koe a lailaiiga ote mao mote seai se faka-atua. A koe ko maua o ulufale atu ki loto ite Palataiso ote Masausauaga ote Atua, mai ite iloa o Ia Tela kote Fakafoitinooga ote Masauaaga i vasia o tagata.

Sea a ate mea, e fakafetai iei kite Atua, ona ko koe ne faka malosigia ke feasoasoani ki Tena Talitonuuga, ona ko koe ne fai mo pula lakau ote poto mote malamalama ke lele mai ite fatoaaga o tou loto. Tena iei a Tena agalelei ne siomia ia koe, kae siomia foki iei ate foafoaaga kaatoa. Faeteete, ia koe mana fakasaoloto a so se mea e faka fanoanoa kia koe. Fakaseai mai ia koe a kopikopiaga katoa ki fakaosoosoga o tagata e seai ne aogaa, kae pei atu ki ou tua a faka kinauga valea kae faitogafiti kola e veli a koutou mai ite Atua. Folafola atu, ite Agaaga Tafasili ite Takutakua ka fakamaalosi a koe ke faipati ite tavini ite Talitonuuga a tou Aliki, kote mea ke mafai ne koe o faka gasue aka a agaaga ola o tagata katoa kae tuku atu a olotou loto ki fakamanuiaaga tafasili ite takutakua mote Koga Nofo matagofie-katoatoa….

Ke iloa ne koe ia Matou ko oti ne fakaseai ate pule ote pelu taua, pela me se feasoasoani kite Omotou Talitonuuga, kae sui kite paoa e fanau mai i faipatiiga a tagata. Telaa ko oti Matou ne iku e se-mafai o fuligia, ona kote Omotou agalelei. Fai atu: O tino! Sa fakasalalau gina a tega ote se-fealofani i vasia o tagata, kae fakaseai ate faitaua mo tou tuakoi, aua i tou Aliki ko oti ne fakaeke kite lalolagi mo fakai lasi kite tausiiga a tupu ote lalolagi, kae fai a latou me ko fuka o Tena paoa, ona kote puleega-a-tupu ko oti ne filifili o fakaeke ne Ia ki luga ia latou. A Ia ko oti ne se-talia ne Ia ke isi se vaega mo Ia mai i so se mea i puleega ote lalolagi. Kite mea tenei a Ia Tela kote Meatonu Favavau ka fai mo molimau. A mea ko oti ne tuku aka fakaatea mo Ia ko fakai lasi o loto o tagata, kote mea ke mafai ne Ia o fulu mai i pefuuga o mea faka-te-lalolagi katoa, kae faka mafai a latou o fakapilipili atu kite Laueleele mana tela a lima o latou e se talitonu e mafai o solisoli valevale. O tagata, tala aka a fakai lasi ote loto o tagata kite kii o tau faipatiiga. Telaa a Matou, e tusa mote mea ko leva loa ne iku, ne fakasino atu kia koe a tou tiute.

Mai ite amio tonu ote Atua! Ate lalolagi mo ana manakooga fakamatamata, mo ana agalelei, mo so se fiafiaaga e mafai o maua mai iei, katoa loa, i mata ote Atua, e seai ne aogaa o latou, kae e tafaga atu ite faufau iloo, i pefu mo lefulefu. Mata e mafai ne loto o tagata o maina iei! Fulu ke maa fakalei a koutou, O tino o Bahá, mai i lailaiiga ote lalolagi, mo mea katoa kola e tau kiei. Ate Atua loa ia Ia e fai mo Aku molimau. A mea ote lalolagi e se-ttau mo koe. Peigia keatea kia latou kola e manako kiei, kae fakapiki a oulua mata ki luga ite Kiloga tafasili ite mana kae malifalifa.

Ate mea tela e ttau mo koe kote alofa ote Atua, mote alofa o Ia Tela kote Faifekau o Tena Fai Faaliiga o Tena Uiga, mote tautali ki so se mea tela e filigia ne Ia o fai atu kia koe, e seiloa ne koe.

Fai atu: Ke fai ate faipati tonu mote aava mo ou lakei fakagaligali. Sa faigina a koutou ke seai ate gatu ote onosai mote fakamasinooga tonu, kote manogi suamalie ote mana ke mafai o agi malielie mai i oulua loto ki luga i mea faiite katoa. Fai atu: Faeteete, O tino o Bahá, ia koe mana sasale i auala o latou kola a olotou pati e kese mai i olotou amioga. Taumafai ko koe ke mafai o fakamafai o fakaasi ki tino ote lalolagi a failoga ote Atua, kae ke folafola atu Ana tulafono. Ke fai a outou faiga mo takitakiiga ki tino katoa, auaa i tofiga ote taulasiiga o tagata, me e maluga io me e malalo, e kese mai mo olotou amioga. E mai i luga i outou faiga e mafai iei ne koe o faka kese a koutou mai i niisi tino. Mai ia latou ate maina ote outou mainaaga ko mafai o sulu atu kite lalolagi kaatoa. Fiafia ate tagata tela e fakalogo kia Aku poloakiiga, ke tausi ki akoakoga ne fai mai ne Ia Tela kote Iloa-Katoatoa, kote Atamai-Katoatoa.

O Muhammad-‘Ali! Lasi lasi ate fakamanuiaaga e faitali atu kia koe, e pela foki mo koe ko oti ne fakalakei a tou loto ki mea fakagaligali ote alofa o tou Aliki, kote Matagofie-Katoatoa, kote Tavaegina-Katoatoa. A ia tela ne oko atu kite tulaga tenei ite aso nei, ko mea lei katoa ea ia.

Sa saga ki faka tauemu a fagasele ate Atua e pokotia iei ite Aso tenei. A faka tauemu konei ko mitamitaaga mo mamalu o fakaaloalo katoa e se-tumau mo faka-maluga faka-te-lalolagi. Se aa aka foki se fakaaloalo e mafai o mafaufaugina na kote fakaaloalo e tuku mai ne te Laulaufaiva o te Favavau o Aso i taimi ne kalaga mai a Ia ke masaua Ana fagasele i Tena Falepuipui Tafasii ite Takutakua? Ate aso ko pilipili mai ako kaumana fakalavelave ko ttau o galo lele atu loa, mafai ate mainaaga o muna, “Ate fakaaloalo e io te Atua kae kia latou kola e alofa kai Ia,” ka fakasae mai, e maina loa pela mote laa, mai i luga atu ite sikulagi ote Finagalo ote Mafi-Katoatoa.

A tagata katoa, me ko latou e maluga io me e malalo, ko oti ne sala mai kae koi salasala loa kise fakaaloalo takutakua. Katoa, na la, ko oti, i taimi loa tela ate Laa ote Meatonu ne sulu a tena mainaaga malifalifa kite lalolagi, ko oti foki ne fakaseai ana feitu aogaa, kae ko ponotia ne te veli mai i tena matagofie, vagana ko latou kola ne piki mau kite kafaanoa ote atamai se-fakatamala ote Atua tonu tokotasi, kae ko oti mote motu keatea mai i mea katoa na ko Ia ne fuli atu olotou mata kite Tena koga nofo tapu.

Avatu a fakafetai kia Ia Tela kote Manakooga o lalolagi katoa ona ko latou ne mautakitaki ia Ia ise fakaaloaloga tafasili ite maluga. Ko pili mai ate lalolagi mo mea katoa kola iei ka fakapuli atu, ka ko malu katoa ko tuku ki fagasele a tou Aliki, kote Matagofie-Katoatoa, kote Tafasili ite Foai-Katoatoa.

Se Tusi ne tuku ifo ki lalo ite tonuuga ki tagata ote lavea! E fakatonu atu ki tino ke tautali ite fakamasinooga tonu kae ke galue kite amiotonu, kae fakatapu a latou mana tautali i olotou manakooga se-lei mo manakooga faka-te-lalolagi, ma fai a tamaliki a tagata e fago mai i olotou moega.

Fai atu: Tautali, O tagata, i mea kola ko oti ne tusi mai mo koutou i Tapeleti a Matou, kae ke se sasale i mafaufauuga o latou kola e fakamafua ne latou ate masei, latou kola e fai ne latou ate amio leaga kae tii ne latou kite Atua, kote Tafasili ite Mana, kote Matagofie-Katoatoa, kote Tafasili ite Maluga. Fai atu: Ko oti ne talia ne Matou ke fakamasino ne maseiiga mo fakalavelave, kote mea ke faka-piua koutou mai i maseiiga katoa ote lalolagi. Kaiaa la, e se talia ne koutou ate pogai o Matou i outou loto? Mai ite amiotonu ote Atua! So se tino tela e mafaufau fakalei ki fakalavelave ne puapuagaa a Matou iei, a tena agaaga ola e tonu loa me ka liua keatea ite fanoanoa. Kote oulua Aliki foki loa ia Ia e fai mo molimau kite tonu o Aku pati. A Matou ko oti ne puapuagaa ite mafa o fakalavelave kote mea ke fai a koutou ke piua mai i faitogafiti katoa ote lalolagi, kae e uiloa a koutou e se saga mai.

Fai atu: E ttau mo so se tino o puke mmau kite kapa ote Omotou Gatu kote mea ke se lailai a ia i so se mea tela e teke gina ne te Lukuuga Mana mai i luga. E tena ne fakatonu mai nete outou Aliki, kote Matagofie-Katoatoa, i Tena Tapeleti tafasili ite maina. Fai atu: Fakaseke aka ne koe a Toku alofa, kae saga tonu kite mea tela e fakafanoanoa ki Toku loto? Sea ate mea e pono iei a koe mai ite malamalama i mea kola ko oti ne fakaasi atu kia koe ne Ia Tela kote Iloa-Katoatoa, kote Atamai-Katoatoa?

A Matou e tonu ko kilo ki au faiga. Kafai e lavea ne Matou mai iei ate manogi gali suiti ote piua mote mana, e seai se falotolotolua me ka fakamanuia a koe ne Matou. I kona foki loa a laulaufaiva o latou e nofo ite Palataiso kae usu ne latou a ou tavaeega kae fakalauefa ou igoa ite vasia o latou kola ko fakapilipili atu kite Atua.

Piki mau a koe kite kapa ote Gatu ote Atua, kae puke mmau ki Tena Kafaanoa, se Kafaanoa tela e seai e mafai o motu. Faeteete ite makosu o latou kola ko oti ne teke kite Fakapulaaga Tafasili ite Takutakua tenei e se fai mo mea e fakalavelave atu kite fakataunuuga o tou fakamoemoega. Fakasalalau atu ate mea tela ko oti ne tusi kia koe ite Tapeleti tenei, e uiloa a tino ko tu ki luga o teke atu kia koe. A tou Aliki, e tonu, kote Maalosi-i-mea-Katoa, kote Puipui e seai se fakatamala.

A Toku matagofie ke i luga ia koe pela foki mo latou ko Aku fagasele kola e sokotaki mo koe. E tonu a latou konei ko latou e tau o fakamanuiagina.

Au e tauto ite gali o te Fagasele Sili! Mea nei kote Alofa Fakamagalo tela ko oti ne aofia iei ate foafoaaga katoa, kote Aso tela ate alofa kaimalie ote Atua ko oti ne ulu salalau i loto i mea katoa. Ate vai ola o Toku alofa fakamagalo, O ‘Alí, ko oko loa ate makini o maligi ifo ki lalo, ka ko Toku loto ko liua ite vela o Tou atafai mote alofa. E seai se taimi ne mafai ne Au o faka-taugaatonu Aku mo puapuagaa e to i luga i Aku fagasele, io me ko fakalavelave kola e mafai o pulougia ate fiafia i olotou loto.

I so se taimi a Toku igoa “kote Alofa Fakamagalo Katoatoa” ne logo ise tokotasi o Aku fagasele ne faipati ne ia se muna e tasi tela e se fetaui mo Toku manakooga, e toe fakalei aka, tafasili ite fanoanoa kae se fiafia ki tena koga nofo; kae i sose taimi a Toku igoa “kote Funa” e maua aka ne ia i se tasi o Aku taugasoa ne pogai kiei se fakamaa io me se fakatauemu ki luga i tena tuakoi, e pena foki, ne fuli atu keatea ite se fiafia kae tafasili ite fanoanoa ki ana koga nofo ote matagofie, kae i kona ne tagi maalosi kae tigaina ite fanoanoa. Kae i so se taimi a Toku igoa “kote Fakamagalo-Katoatoa” e laveagia ne ia a se isi o Oku taugasoa e agasala, ne tagi ki luga ite lasi o tena fanoanoa, kae, silia atu ite tigaina, ne siga ki lalo ite pefu, kae ne kave atu a ia keatea ne lukuuga o agelu e se lavea ki tena koga nofo i lalolagi i luga.

Mai ia Au, kote Tonu Tokotasi, O ‘Alí! Ate afi tela ne faka kaa ne ia ate loto o Baha e kaitaua atu ite afi tela e ula i tou loto, ka ko Tena tagi fanoanoa e maluga atu i tou tagi fanoanoa. I so se taimi ate agasala e fai ne so se tino mai ia latou e manavagia i te Lotoa o Tena Nofo-mai, kote Gali Favavau ka fonufonu ite taema tela ko manako ko Ia ke mafai o muni ate matagofie mai i Ona mata mai i mata o tagata katoa, auaa ko oti a Ia, i taimi katoa, ne fakamau a Tena taumata ki luga ite olotou fakamaoni kae kilo ki ona manakooga tafasili ite taaua.

A pati ko oti ne tusia ko oti, i taimi loa tela ne faitaugia i Toku Nofo-mai, ne pogai kiei ate vasa o Toku fakamaoni ke soko aka i loto ia Au, ka kote laumatagi ili malielie o Taku fakamagalo ko agiagi mai i luga i tou agaaga ola, ka kote lakau ola o Toku alofa-kaimalie ko pulou i luga ia koe, a ko kaumana o Toku alofa-lauefa ko vaiua ifo ki luga ia koe a olotou mea-alofa. Au e tauto mai ite Fetu Ao tela e sulu mai i luga ite sikulagi ote favavau, Au e alofa mo koe i tou fanoanoa, kae tagi mo koe i tou puapuagaa. … Au e molimau kite galueega tavini a koe ko oti ne tuku mai kia Au, kae fakamaoni ki puapuagaa valevale ne oko atu kia koe ona ko Au. Ko atomu katoa ote lalolagi e taku tonu atu a Toku alofa mo koe.

Ate kalaga tela ne avaka ne koe, O ‘Alí, e tafasili ite taliagia i Oku mata. Fakasalalau atu ki tau pene mo tou laulaufaiva a Taku Talitonuuga.. Valo atu kae kami atu a tino kia Ia Tela kote Nofoaiga-a-Tupu o Aliki o lalolagi katoa, i se fiafia mote lotomau ko tagata katoa ke mafai o kaa ite afi a koe.

Fai atu: O toku Aliki, ko toku Fagasele Sili, kote Fakagsue o aku faiiga, kote Fetu Fakasino Ala o toku agaaga ola, kote Leo tela e tagi i toku foitino, kote Pogai ote ofo o toku loto! Tavaeega ki luga ia Koe mene fakamafai ke fuli atu oku mata kia Koe, mene fuli atu a toku agaaga ola e ka mai ite masausauaga o Koe, me ne feasoasoani Aku ke valo atu a Toku Igoa kae usu a Oku taveega.

Toku Atua, toku Atua! Kafai e seai ne maua e fano seke mai i Tou auala, e mafai pefea, ke fola atu, io me kote fuka o Tou alofa lauefa ke sisi ki luga? Kae kafai e seai se agasala ne fai, sea ate me e mafaigia o folafola atu a Koe me kote Funa o agasala a tagata, kote Fakamagalo-Favavau, kote Matakalekale Katoatoa, kote Atamai-Katoatoa? Ke mafai a toku agaaga ola o fai me se taulaga soli tulafono a latou kola e teke atu kia Koe, auaa me mai i luga i soli tulafono pena e agiagi mai ate manogi gali o alofa fakamagalo o Tou Igoa, kote Alofa Atafai, kote Alofa-Fakamagalo Katoatoa. Ke mafai a toku ola o tuku ifo ki lalo ona ko soli tulafono a latou kola e soli tulafono atu kia Koe, auaa e mai iei ate manavaaga o Tou alofa mote manogi gali o Tou alofa-kaimalie ko iloagia iei kae tufa tufa atu i vasia o tagata. Ke mafai o toku tinaa foitino o tuku atu mo agasala a latou kola ne agasala atu kia Koe, auaa me ona ko agasala pena ne fai iei ate Fetu Ao o Au alofaaga tuafia o fakaasi mai i luga ite sikulagi o Tou alofa mataefa, ka ko kaumana o Tou alofa e se fakapaugina ko vaiua ifo mo olotou mea-alofa ki luga i mea faiite katoa.

Au ko ia, O toku Aliki, tela ko oti ne fakaasi tonu atu kia Koe ate ukeega o aku agasala, tela ne fakailoa atu e seai se tagata ko oti ne fakailoa atu. Au ne tele fakavave atu ke oko atu kite vasa o Tau fakamagalo, kae sala atu kite malu mai i lalo ote ata o Tou alofa tafasili ite matagofie. Talia mai, au e akai totuli atu kia Koe, O ko Koe Tela kote Tupu Favavau mote Aliki Puipui o tagata katoa, ko au ke mafai o fakaasi atu a mea kola ka pogai kiei a loto mo agaaga ola o tagata ke lele ki luga i Tou alofa e seai ne ana tuakoi kae tafasili ite lasi, kae ke sautala mo Tou Agaaga. Fakamaalosi mai au auala atu ite paoa o Tou nofoaiga-a-tupu, ko au ke fuli ne au a mea ola faiite katoa kite Punaa Aso o Tau Faifekau mote Kamataga o Tau Fakaasiiga. Feasoasoani mai au, O toku Aliki, ke liakina katoatoa loa au ki Tou Finagalo, kae ke tu ki luga o tavini galue mo Koe, auaa e fakataaua ne au ate olaaga ite lalolagi nei e seai aka foki na loa kote fakaoko atu kite Fale Malu Tapuaki o Tau Fakaasiiga mote Nofoaga o Tou Matagofie. E lavea mai au ne Koe, o toku Atua, e motu keatea mai i mea katoa na ko Koe, kae maulalo kae fakalogo ki Tou Finagalo. Fai mai ne koe kia au ate mea tela e ttau kia Koe, pela mote mea e ttau ki Tou mana mote matagofie takutakua.

O ‘Alí! Ate alofa mataefa o Ia Tela kote Aliki o lalolagi katoa ko oti, kae koi fai loa pena, ne talia kia koe. Faka uta a koe ki Tena maalosi mote paaoa, kae tu ki luga o feasoasoani ki Tena Talitonuuga kae fakalauefa a Tena igoa mana. Sa faigia a tou se iloa ite tauloto faka-te-foitono mo tou se mafai o faitau io me o tusitusi mo fai a mea e fanoanoa iei a tou loto. A mataloa o Tena alofa tuafia ei loto i ou lima mafi ite paoa ote Atua tonu tokotasi. Ko oti a Ia ne matala, kae ka tumau pena o matala, a latou i mata o latou katoa kola e galue tavini mo Ia. Au e fiafia o fakamoemoe ite matagi e agi malielie tenei ote suamalie Faka-te-Lagi ka mafai, i taimi katoa, o tumau o agiagi mai ite laueleele o tou loto ki luga ite lalolagi katoa, i se auala kola ana maalosi e mafai o fakaasi ki fenua katoa. A Ia, e tonu, kote Tafasili ite Paoa, kote Matagofie Katoatoa, kote Mafi Katoatoa.

Fakamanuia a koe, o Taku tavini, pela foki mo koe ko oti ne lavea ate Meatonu, kae liakina keatea mai ia ia tela ne seki talia ne ia ate Alofa-Fakamagalo Katoatoa, kae ne tusia me ne tino amio leaga ite Matua o Tapeleti. Sasale a koe mautakitaki ite alofa ote Atua, kae tausi ke mautinoa i Tena Talitonuuga, kae feasoasoani kia Ia auala atu ite paoa o tau tavili. Tena e fakatonu atu kia koe ne te Alofa-Fakamagalo Katoatoa Tela e puapuagaa ite falepuipui i lima o Ona fili.

Kafai ko pokotia koe i puapuagaa ona ko Au, manatua ne koe Oku masaki mo oku puapuagaa, kae masaua a Toku fakaaunoa ki fenua kese mo Toku falepuipui. E pena ne fakaeke ifo ne Matou ki luga ia koe a mea ko oti ne tuku ifo kia Matou mai ia Ia Tela kote Matagofie-Katoatoa, kote Atamai Katoatoa.

Ona ko Au! Ate aso ko pilipili mai ko pelu atu iei ne Matou ate lalolagi mo mea katoa kola iei, kae fola atu ate oota fou iei. A Ia, e tonu, e paoa i luga i mea katoa.

Fakamana a tou loto, ko koe ke mafai o masaua a Aku; kae kave a tou taliga, ko koe ke mafai o lagona Aku muna. Tuku mai tena la a ou mata ki luga ite Koga tela ate nofoaga o tou Aliki, kote Atua ote Alofa Fakamagalo, ko oti ne fakatu, kae fai atu: Tavaeega kia Koe, O toku Aliki, ia au ne fakamafai ke lavea ne au ate Faifekau o Tou Tinaa Tino, kae feasoasoani mai au ke fakapiki a toku loto ite fale o Tou nofo-mai, kote pogai ote ofo o toku agaaga ola. Au e akai totuli ki Koe, mai i Tou igoa tela e fai ne ia a lagi ke gasue ka kote lalolagi ke mavaevae ki potu mea, o tuku mai mo au a mea kola ne fakaeke ne Koe mo latou kola ne fuli tua atu ki mea katoa na ko Koe, kae tuku fakamau a olotou loto ki luga ia Koe. Talia mai ko au ke sagasaga atu i Tou nofo mai ite nofoga ote meatonu, i loto ite Fale Malu Tapuaki ote Matagofie. E maalosi a Koe o fai ate mea e loto Koe kiei. E seai aka foki se Atua, kote Matagofie-Katoatoa, kote Atamai-Katoatoa.

Ate Pene ate Tafasili ite Maluga ko oti ne fakatonu mai kae fakasino mai ki tino taki tokotasi ate tiute o talai ate Talitonuuga… Ate Atua, e seai se fakalotolotolua, ka fakamaalosi a so se tino o motu mai keatea a ia mai i mea katoa vagana ko Ia, kae fai ne Ia a vai piua ote atamai mote faipati e se laugia ke lele mai ki tua mai i tena loto. E tonu, tou Aliki, kote Alofa-Fakamagalo Katoatoa, e maalosi o fai a te mea e finagalo a Ia kiei, kae fakaeke atu ki so se tino e fiafia a Ia kiei.

Kafai e manatunatu koe kite lalolagi tenei, kae iloa aka me e pefea ate se tumau o mea iei, e se manako koe ke sasale ite auala vagana kote auala ote galue tavini kite Fakatokaaga o tou Aliki. E seai e ana maua o taaofi a koe mai ite fakamasaua a Ona tavaeega, e uiloa a tagata katoa e tu ki luga o teke atu a koe.

Fano tonu koe ite auala kae kolomaki i Tena galueega tavini. Fai atu: O tino! Ate Aso, ne faifegaiiga atu kia koe i Tusitusiiga Tapu katoa, ko oko mai. Mataku a koe kite Atua, kae sa fakatalave a koutou o lavea ate Tokotasi Tela kote Pogai ote outou foafoaaga. Fakavave atu koutou kia Ia. E lei tenei mo koutou pela foki mo mea i loto iei. E se mafai ne koutou o iloa!

Ka fetaui a koe mote tino fatauvaa io me kote tafa lalo, sa fuli keatea fakatauemu mai ia latou, auaa ite Tupu ote Matagofie e onoono ki luga ia latou kae tamilomilo ia latou mote alofa atafai tela e seai e ana mafai o fuafua vagana ko latou kola ne pokotia a olotou manakooga mo fiafiaaga ke faulu tasi mote Finagaolo o tou Aliki, kote Matagofie, kote Atamai-Katoatoa. O koutou maumea ote lalolagi! Sa tele keatea mai mata o tino mativa kola e moe ite pefu, kae faka taugasoa mo ia kae fai ko ia ke toe lau a tala o ona puapuagaa ite Fakamasinooga e se fuafuagina ate Atua ne pogai iei ona pokotiaaga. Mai ite amio tonu ote Atua! Koi sokotaki a koe mo ia, ate Lukuuga i luga ka taumata atu ki luga ia koe, kae saga atu mo koe, ka tavaegia ou igoa kae faka maluga au mea e fai. Fakamanuia a latou e poto kola e se miita ia latou i olotou mea ne maua; kae e lei mo latou e amio tonu kae e se fakatauemu a latou agasala, kae e faka galo a olotou mea see, kote mea ko olotou vaaivaiiga e tumau o veli mai i mata o tagata.

Kote Omotou finagalo mote manakooga ko so se tino taki tokotasi ke fai pela me se kamataaga ote mea lei katoa ki tagata, kae se ata fakatusa ote amio tonu ki tagata. Faeteete ia koutou mana manako ko koutou mai i luga i outou tuakoi. Fakamau a outou kilo ki luga ia Ia Tela kote Tempolo ate Atua i vasia o tagata. A Ia, ite tonuuga, ko oti ne tuku atu a Tena ola pela me se taulaga kite fakaolaaga ote lalolagi. A Ia, e tonu, kote Alofa-Mataefa Katoatoa, kote Matagofie, kote Tafasili ite Maluga. Kafai e isi ne kesekeseega ia koutou, kilo kia Au e tu i mua o mata o koutou, kae sa saga ki mea see a sua tino ona ko Toku igoa kae pela me se failoga o tou alofa mo Taku Talitonuuga malifalifa. A Matou e fiafia o lavea a koutou i taimi katoa e fakatasitasi ite filemu mote fealofani i loto ite palataiso o Toku fiafiaaga lei, kae manava ki loto mai i oulua faiga ate manogi gali e fealofani mote fakatasitasi, ote alofa-kaimalie mote faka taugasoa. E tena ate polopoloakiiga kia koutou mai ite Iloa-Katoatoa, kote Fakamaoni. A Matou ka fakatasi mo koutou i taimi katoa; kafai e manava ne Matou ate sausau ote faka taugasoa, a Motou loto ka fiafia, auaa e seai aka foki e mafai o loto malie a Matou iei. Kite feitu tenei e molimaugina ne so se tagata e iai ate malamalama tonu iei.

Ate Igoa Tafasili ite Takutakua e fai mo molimau kia Au! E fanoanoa kii mafai a so se tagata, ite Aso tenei, e tuku a tena loto ki luga i mea e se tumau ote lalolagi tenei! Tu ki luga, kae piki mau kite Talitonuuga ate Atua. Ke tafasili a tou alofa mo sua tino. Sunu gina keatea, katoa ona mo Ia kote Fagasele-Lei, ate veli o te foitino kite ulaaga ote Afi e se mate, kae mo mata e faka fiafia kae fonu fonu ite mainaaga, sokotaki mo oulua tuakoi. Koutou ko oti ne iloa fakalei, i ona feitu katoa a uiga o Ia Tela kote Muna ote Meatonu i vasia o koutou. E iloa fakalei ne koutou ate faigataa mote talavou tenei o fakasaoloto, e uiloa se po fua e tasi, ate loto o so se tino o fagasele ate Atua ke faka fanoanoa ne Ia.

Ate Muna ate Atua ko oti ne faka ka ne ia ate loto ote lalolagi; e pefea a tou salamo mafai ne fakatamala a koe ke ula koe i tena ulaaga! Fakamolemole te Atua, ke fai ne koutou ate po fakamanuiagia tenei me kote po ote fakatasitasi, ka suui iei a outou agaaga ola fakatasi, kae iku ke fakafougina a koutou kite lakei o uiga lei kae tavaegia. Ke fai ate mea e saga maalosi koulua kiei me kote fakasaooga o latou ne siga ki lalo mai ite numi ote galo lele atu loa, kae feasoasoani a ia o ulufale atu kite Talitonuuga mai ite favavau ate Atua. Ate oulua amio kite oulua tuakoi e ttau o fakaasi fakalei atu a failoga ote Atua tonu tokotasi, auaa ia koutou ko tino muamua loa i tagata o toe faiite ne Tena Agaaga, ko latou muamua loa o ifo kae totuli ate tulivae i Ona mua. Ko latou muamua loa o faka-taka-kai i Tena nofoaga-a-tupu ote matagofie. Au e tauto ia Ia Tela ne fai ne Ia ke fakaasi mai a so se mea tela e fiafia kiei a Ia! A koutou e iloa atu ki tino nofo ite Maloo i luga ilo a koutou ia koutou loa. Sa fai aka pela i pati konei ne pati seai se aogaa kae masa? Moi ni fai ne isi se paoa ia koutou o lavea a mea ate outou Aliki, kote Alofa-Fakamagalo Katoatoa, e lavea – a mea e molimau kite lei katoatoa ote outou tulaga, kae molimau kite lasi ote aogaa o koutou, tela e fakasalalau ate tafasili ite maluga ote oulua tulaga. Te Atua ke talia a oulua manakooga mo fiafiaaga e se faka taema ke se fai mo fakalavelave kia koutou mai i mea ko oti ne fakaeke atu mo koutou.

O Salmán! A mea katoa ne faipati io me ne tusigia ne tino poto mo tino lotu e se mafai lele o sopoia atu, i tuakoi kola kote gataaga ote mafaufau o tagata ko oti ne faka tuakoi kiei. Ki so se koga maluga ite mafaufau o toe tagata maluga e mafai o lele kiei, me e pefea ate lasi ote pooko tela ate loto malamalama e mafai o ulu ki loto, a se mafaufau pena mote loto e se mafai lele o fanatu mai i luga atu ite mea ola i manatu loa o latou mo olotou mafaufauga. A talosaga pooko ote tino tafasili ite mafaufau loto, ko talosaga a agelu tafasili ite mana, ko fakaasiiga tafasili ite maluga o tavaeega mai ite pene io me kote laulaufaiva, ne fakaasiiga a latou kola ne faiite i loto ia latou, auala atu ite faaliiga ate Aliki, te olotou Atua. So se tino e mafaufau kite mea tonu tenei tena loto ka toka o talia fakavave ne ia me e isi ne tapula kola e seai se tagata e ana mafaigia o sopoia atu iei. So se taumfaiiga tela, mai ite kamataaga tela e seai sena kamataaga, ko oti ne fai o faka foliga kae o iloa ate Atua e gata ona ko manakooga o Tena foafoaaga – se foafoaaga a Ia, auala atu ite faka galueegaaga o Tena Finagalo mote pogai e seai aka foki na mo Ia, ko oti ne kalaga atu ke foliga mai. E se fuafuagina ite maluga a Ia i luga atu i taumafaiiga o mafaufau o tino o puke a Tena Uiga Tonu, io me se laulaufaiva o tino e fakamatala a Tena tulaga lilo. E seai se fesokotakiiga tonu e ana mafai o fusi tasi a Ia ki mea ne faiite ne Ia, io me e mafai a toe mea tafasili ite faigataa kae tafasili ite mao ote fakatauuga o Ana meaola faiite e mafai o fai faka katoatoa ate fakamatalaga sako mo Ia. Auala atu i Tena Finagalo salalau ite lalolagi ne faka foliga mai ne Ia a mea faiite katoa. Ko oti a Ia ne ufi ite veli ote favavau o Tena Uiga Tonu tafasili ite maluga kae e se mafai o vaevaegia, ka tumau pena kite favavau o funa a Tena afioga mote matagofie e se mafai o okogina. A mea katoa kola ite lagi mo mea katoa kola ite lalolagi ne mafua mai i Tena fakatonuuga, kae mai i Tena Finagalo katoa ko oti ne tu atu ki tua mai ite seai lele loa kite lalolagi o tino. E mafai pefea, tena la, ate mea ola tela ate Muna ate Atua ko oti ne faka foliga mai e maina ite natula o Ia Tela kote Favavau o Aso?

Kafai so se tagata, ite Aso tenei, e tu ki luga, mote motu lele mai keatea mai i mea katoa kola i lagi mo katoa kola ite lalolagi, o tuku ana alofaaga ki luga ia Ia Tela kote Punaa Aso ote Fakaasiiga mana ate Atua, ka mafai ne ia, e tonu, o faka fonu a ia ite maalosi o tao ifo ki lalo a mea faiite katoa, auala mai ite paoa ote tasi o Igoa o te Aliki, tena Atua, kote Iloa-Katoatoa, kote Atamai-Katoatoa. Ke iloa ne koe mote tonugisi ite Fetu Ao o te Meatonu ko oti, ite Aso tenei, ne sulu atu ki luga ite lalolagi se mainaaga, pela mo aso taumua e seki molimaugina aka loa. Ke mafai ate mainaaga o Tena matagofie, o tagata, o sulu atu ki luga ia koe, kae ke se faigia a koe pela mo latou e fakatamala.

Kafai ko oko mai ate manumaloo, tagata taki toko tasi katoa ka fakaasi atu ia ia se tino talitonu kae ka fakavave atu kite puipui ote Talitonuuga ate Atua. Fiafia a latou kola i aso o tofooga siomia ite lalolagi katoa ne tu makeke a latou ite Fakatokaaga aunoa se kalo o latou keatea mai ite mea tonu.

Fakasaoloto a koutou, O naitigikale ate Atua, mai i mea talatala mo lakau ola foliki makaikai ote masei mote puapuagaa, kae eva atu i tau Malaga kite fatoaaga losa ote gali kese e se matafi. O Oku taugasoa kola e nofo i luga ite pefu! Fakavave atu ki tou koga nofo ite vanimonimo. Fakasalalau atu kia koutou a tala faka fiafia: “A Ia kote Faagasele-Sili ko vau! Ko oti a Ia ne kalauna a Ia kite matagofie ote Faaliiga ate Atua, kae ko oti ne tala atu ki mata o tagata a mataloa o Tena Palataiso Favavau.” Ke mafai a mata katoa o lifu, ko taliga katoa ke fiafia, kae nei kote taimi o kilo ki luga i Tena gali, nei kote taimi e ttau tonu o fakavave ki Tena leo. Fakapula atu ki so se tino tela e naunau: “Kilo, ate outou Fagasele-Sili ko oti ne vau i tafa o tagata!” kae ki mesentia ote Tupu ote alofa o tuku atu a tala faka fiafia: “O, ate Tasi e Tapuaki-gina kooti ne sae mai fonu fonu ite katoatoa o Tena matagofie!” O latou e alofa ki Tena gali! Fuli atu a outou mae ite mavae mai ia Ia kite lifu i se fakatasiiga e favavau, kae fai ate suamalie o Tena nofo-mai e liua iei ate kona ote mao o koutou mai i Tena koga nofo.

Kilo me e pefea ate alofa tuafia ote Atua, tela e ligi ifo mai i kaumana o te matagofie Faka-te-Lagi, ko oti, ite aso tenei, ne aofia iei ate lalolagi. E uiloa i aso ko teka so se tino alofa ne fakamolemole kae sala atu ki tena Fagasele, kote Fagasele loa ia Ia tenei ko kalaga atu ki Ana tino alofa o kami atu a latou ke oko atu ki Tena nofo-mai. Masaua ia koutou mana galo ia koutou a se mea-alofa tafasili ite taaua; faeteete ite mea mana fakafoliki ne koutou a se maaka o Tena alofa. Sa liakina a penefiti fakamaoni konei, kae sa lotomalie ki mea kola e olo fua o tanumia. Sau aka ate veli tela e pono ite taumata a koutou, kae fakaseai ate pouliiga tela e pulou iei, ke mafai ne koutou o kilo kite tinaa gali kese o mata ote Fagasele, e mafai o taumata e seai aka foki se mata ne kilo kiei, io me o logo atu e seai aka loa se taliga ne lagona ne ia.

Fakalogo mai Kia Au, koutou ko manu eva ote lalolagi! Ite Fatoaaga Losa o Pula Lakau e se mafulifuli a olotou gali ko oti ne kamata o pula, fakatusa ki so se isi pula lakau aka e pela mese mea talatala, kae mai i mua ote mainaaga o Tena matagofie kote uiga tonu ote gali e matafi kae fano o seai. Tu ki luga, telaa la, mote tinaa naunau o oulua loto, mote naunau kaatoa o oulua agaaga ola, ate maalosi o tou finagalo, mo taumfaiiga fakapatino o tou foitino katoatoa, kausaki ke maua ate palataiso o Tena nofo-mai, kae taumafai o manava ki loto ate manogi gali ote Pula Lakau fakaaloalo, o manava ate manogi suamalie o te mana kae ke maua se vaega o te sausau tenei ote matagofie mai ite lagi. So se tino e tautali ite poloakiiga tenei ka ofa ne ia ona filifili keatea, ka tami kite alofa fakalaumatagi ko liakina, kae ka liakina a tena agaaga ola ki lima o tena Fagasele. E puna mai i loto i tena pui, pela mote manu eva ote agaaga, e lele atu ia ki tena ofaaga mana kae favavau.

A te po ne tautali atu ite ao, ka kote ao ne tautali atu ite po, ka ko itula mo minute o outou olaaga ko oti ne aumai ko galo atu foki, kae e seai ia koutou ko oti, i se taimi foliki, ne talia ne ia o motu ketea a ia mai i mea e olo o tanumia. Fakagasue a koutou, kote taimi toetoe koi nofo loa mo koutou ke se matafitafi kae galo atu. Pela loa mote makini ote uila ou aso ka teka atu, ka ko outou foitino ka takato ki lalo o manava mai i lalo ote malu ote pefu. E mafai pefea ne koutou o fakatoese ki oulua vaaivaiiga i taimi ko teka?

A te Molii-gako favavau e sulu maina i tena matagofie. Taumata me ne pefea ko kai ne ia a so se veli faka-te-lalolagi. O koutou pela mo pepe foliki e fiafia kite mainaaga! Toa ki so se fakalavelave, kae fakamanuia a outou agaaga ola ke ka ne tena ulaaga. O koutou kola e fia inu mai i Ana tua! Liakina keatea mai ia koutou so se masausauaga faka-te-lalolagi, kae fakavave atu o fetaui mote outou Fagasele. Mo se manakooga e seai e fakapau kiei fakavave ke maua atu a Ia. Ate Pula Lakau, tela ne funa mai i mata o tagata, ko fakaasi atu ki oulua mata. Ite malifalifa o Tena matagofie e tu a Ia i mua o koutou. Tena leo e kalaga atu ki tino mana kae malu ke aumai o fusi tasi mo Ia. Fiafia a ia tela e fuli kiei; lei mo ia tela e maua ne ia, kae kilo ki luga ite mainaaga o mata e sili ite fakaofoofo gina.

A ou mata ko Taku faka lagolago, sa faigina ko pefu o manakooga seai ne aogaa ke pono a tena maina. A ou taliga se failoga o Toku alofa mataefa, sa faigina ate makosuuga o fakamoemoeega se lei mo mea e fuli keatea mai i Taku Muna tela e aofia siomia iei ate foafoaaga katoatoa. A tou loto ko Taku fale teu tupe, sa faigina kote lima se fakamaoni ote foitino ke puke a penina kola ne tausi ne Au i loto. A tou lima kote failoga o Toku alofa-kaimalie, sa fakalavelavegina mai ite puke mau ki Aku Tapeleti e leoleo kae funa… E seki sili mai, Au ko oti ne ligi ifo ki luga ia koe a Toku alofa. E seki fakatagi mai, ko oti ne fakataunu ne Au ou manakoga. E uiloa e se ttau o maua ne koe, ko oti ne fakamatea aka a koe i Aku tino maumea, ko Oku alofaaga e se maua o laugia… O Aku tavini! Ke talia kae fakalogo pela mote lalolagi, kote mea mai ite laukele o tou foitino e mafai o pula mai a manogi, mana kae lanu kese kese a pula lakau o Toku poto. Ke ula koe ite afi, ke mafai ne koe o ka keatea a veli o te se fakalogo kae faka ka, auala atu ite enetii fakavave ote alofa ote Atua, ate loto ko mokotia kae makeke. Ke pula koe kae se fakatapugia pela mote matagi ili malielie, kote mea ke mafai ne koe o maua o ulu ki loto i Toku koga nofo, ko Toku Maalumalu e se mafai o solisoli gina.

O taugasoa ne fakafenua kese mote fakamaoni! Fakagata ate fia inu ote se fakalogo kite vai mana o Toku agalelei, kae atuli atu keatea ate fanoanoa ote mao mai ite mainaaga ote tafataeao o Toku nofo-mai Faka-te-Lagi. Se fakamaegina ate koga e nofo iei a Toku alofa e se mate mo koe ke fakamasei mai ite kaitaua o manakooga masei, kae sa pulougina ate gali ote Talavou faka-te-lagi kite pefu faka-te-foitino mote loto leaga. Fai a gatu o koe kite agaaga ote amio tonu, kae fai a tou loto ke mataku ite seai aka foki na kote Atua. Sa fakalavelavegina ate maina o tou agaaga ola ki mea talatala mo mea makaikai o alofaaga e seai ne aogaa kae e se manakogina, kae sa fakalavelavegina ate tafe ote vai ola ote vaitaafe foliki mai i tou loto. Tuku katoa a ou fakamoemoeega kite Atua, kae puke ke mautakitaki ki Tena alofa fakamagalo tumau. Kooi aka foki na ko Ia e ana maua o faka maumea a se faka-alofa, kae aumai a latou ko oti ne siga mai ite masei o latou?

O Aku tavini! Moi fai a koe e maua a mea kola e funa, ate vasa e seai sena matafaga o Toku maumea fakamaoni, a koe ko oti, ite tonuuga, ne talia mea e seai ite lalolagi, ikaai, kote foafoaaga katoatoa. Ke fai ate ulaaga ote salasala o ka ise kaitaua i loto i oulua loto ke mafai a koulua o maua ate koulu tafasili ite maluga – kote tulaga tela e mafai ne koutou o fakapilipili atu, kae fusitasi mote oulua Fagasele-Sili…

O Aku tavini! Sa faigia a fakamoemoeega e se aogaa mo manatu fakasupasupa o fakasiusiu a fakavae o ou talitonu ite Atua Matagofie-Katoatoa, pela mo mafaufauuga ne seai ne aogaa katoatoa mo tagata, kae ne se kafi o sasale ite Auala tonu. Mafaufau a koutou, O Aku tavini, ite Lima o Toku aofia-katoatoa, ko Toku nofoaiga-a-tupu fakamalumalu kae tafasili ite maluga ko saisaigia ki filifili, kote tafe mai o Toku favavau, Toku alofa fakamagalo tumau, kae e aofia salalau e aasiigia, io me ko kaumana o Oku alofaaga tafasili ite maluga kae e se fakatusagia ko gata o vaiua ifo a olotou mea-alofa ki luga i tagata? E mafai ne koe o fakatau aka a galueega fakaofoofogina ko oti ne folafola atu a Toku paoa e se mafai o taofigina ko tapale mai keatea, io me kote maalosi o Toku finagalo mote pogai ko oti ne fakaseke mai i fakamoemoeega o tagata? Kafai e se tena, se aa foki la ate mea e taumafai iei a koe o fakalavelavegina ate Gali o Oku Mata e mana kae matagofie o fakasae atu ki mata o tagata? Kaiaa ne fitaa koe o fai mo fakalavelave kite Faifekau ote Mafi-Katoatoa mote Matagofie-Katoatoa mai ite sulu atu ate malifalifa o Tena Faaliiga ki luga ite lalolagi? Moi fai a koe ne fakamasino tonu i tau fuafuaaga, ke lavea fakavave ne koe mene pefea a mea tonu o mea faiite katoa o ulufia ite lifu kite Faaliiga fou kae fakaofoofogina tenei, kae mene pefea foki a atomu katoa ote lalolagi o fakamainagina mai ite malifalifa o tena matagofie. Kote seai lele loa se aogaa mote matagaa ote mea tela e mafaufaugina ne koe kae koi mafaufau loa kiei!

Toe sasale i oulua kalafaga, O Aku tavini, kae tuku a oulua loto kia Ia Tela kote Kamataaga o tou foafoaaga. Fakasao a koulua mai ite tiapolo mote faitogafiti o ou manakooga, kae fakavave o fakafetaui kite mainaaga ote Afi e se maua o mate tela e kaa i luga ite Sinai ote Faaliiga fakaofoofogina kae malifalifa. Sa faitogafitigina ate mana, kote aofiaaga katoatoa, mote Muna mai ite kamataga ate Atua, kae se salasala o see aava ki tena mana io me o fakamasei a tena uiga maluga. O koutou se fakalogo! E uiloa ate mea fakaofoofogina o Tou alofa fakamagalo e siomia i mea faiite katoa, mea e lavea mo mea e se lavea, kae ei iai a fakaasiiga o Toku alofa agalelei mote mataefa e ulu iloto i so se atomu ote Iunivesi, ka kote sasa tela e mafai iei ne Au o fakatonu a latou matagaa e fakamataku, ka kote kaitaua o Toku ita kia latou e masei kii. Mo taliga ne fakamana mai i manakooga fakamaualuga mote faka-te-lalolagi fakalogo ki poloakiiga kola Aku, i Toku alofa fakamagalo, ko oti ne fakaasi atu kia koe, mo ou mata i loto pela foki i tua nofo fakatalitali ki fakamaoniiga o Taku Faaliiga fakafofoofogina….

O Aku tavini! Sa liakina a koutou mai ite Mainaaga e se matafitafi kae e malifalifa tela e sulu maina i loto ite Molii ote matagofie Faka-te-Lagi. Ke fai ate ulaaga ote alofa ote Atua ke mainaina i loto i oulua loto. Fagai a ia kite sinu o te takitakiiga Faka-te-lagi, kae puipui a ia i loto ite malu o te oulua fakatuanaki. Leoleo a ia i loto ite lalolagi ote fakanaagina mote motu keatea mai i mea katoa na kote Atua, kote musumusuuga masei ate tiapolo ke se mafai o tamate iei a tena mainaaga. O aku tavini! A Toku mana, a Taku Faaliiga tela ne aumai faka-te-lagi e mafai o fakatusa kite vasa ko ona pookooga e funa iei e se mafai o laugia a penina e maluga kii ate togi, kae silia atu ite malifalifa. Kote tiute o so se tino salasla o fakagasue a ia kae kausaki ke maua ne ia a matafaga o te vasa tenei, kote mea ko ia ke mafai, fakatusa kite loto maalosi o tena salasala mo ana taumafaiiga ko oti ne fakamaumau, ko kautasi i penefiti, kola ko leva loa ne fakaekegina ne Tapeleti funa ate Atua e se mafai o fulifuligia. Kafai se tino e fiafia o taaki atu ana alagaa-vae ki ona matafaga, kafai a tino taki tokotasi katoa e fakatamala o tu ki luga o sala a Ia, e mafa a se fakatamala pena o kaisoa ate paoa ote vasa tenei io me ko fakamutana, ki so se lasi, ona mea taaua? E pefea ate seai se aogaa, e pefea ate taema, a mafaufauuga o oulua loto ko oti ne galue, kae konei loa koi galuelue! O Aku tavini! Ate Atua tonu tokotasi ko Taku molimau! Ate vasa tenei e se mafai o gafagina a tena pooko kae ko soko aka ko pili mai, se fuafuagina ite pili mai, kia koe. Kiloke e pili atu kia koe iloo a tou uaua ola. Makini pela mote kemo o se mata e mafai ne koe, manafai e manako koe kiei, o oko atu kiei kae kaufakatasi i alofaaga e se mafai o tanumia, kote agalelei ote Atua, kote mea-alofa fakaaloalo tenei, kote mataefa maalosi kae matagofie e se mafai o faipatigina.

O Aku Tavini! E mafai ne koutou o taofi me ne aa a mea fakaofoofogina o Toku kaimalie mote foai alofa ko oti ne finagalo ne Au ke fakeke atu ki luga i outou agaaga ola, ko koutou, ite tonuuga, ke fakaseai mai ia koutou ate piki ki mea faiite katoa, kae maua se poto tonu o koutou ia koutou loa -- se poto tela e pau mote malamalama o Au ia Au loa. Ka maua ne koutou o tusaoloto mai i mea katoa na ko Au, kae ka lavea, mo outou mata i loto mo i tua, kae e maina pela mote faaliiga o Toku Igoa maina malifalifa, a kogaa-tai o Toku alofa-kaimalie mote foai alofa e olo tasi iloto ia koutou. Sa faigia a outou manatu fakasupasupa, a outou manakooga leaga, a outou se-fakamaoni mote kivi ote loto o muu mea ifo ki lalo ate mainaaga, io me o fakalailai ate mana, o se tulaga tafasili ite maluga pena. A koutou pele se manu eva tela e lele, mote maalosi katoatoa o ona kapakau mafi kae mote talitonu katoatoa mote fiafia lasi, i loto ite tafsili ite lauefa-mao o lagi, ke oko kite taimi, ko manakogina o fakalei a tena fiakai, ko fuli atu a ia o naunau kite vai mote kupapa ite lalolagi mai i lalo, kae, oti aka ne saitia a ia ite upega o ona manakooga, e poi aka a ia ko se kafi o toe faksoko a tena malaga ki kogaa-mea kola ne vau iei a ia. Ko seai se maalosi o lue keatea ate amoga mafa e apai ne ana kapakau ko pakia, ate manu eva tena, mai ite taimi tena setino agasala o lagi, ko faka kinau o sala sena koga nofo i luga ite pefu. Telaa la, O Aku Tavini, sa fakamaseigina a outou kapakau kite kaupapa ote se-fakalogo mo manakooga e seai ne aogaa, kae sa faigia a latou ke lailai ite pefu ote loto leaga mote ita, ko koutou ke se fakatuaigina mai ite lele i luga ite lagi o Toku poto faka-te-lagi

O Aku Tavini! Mai ite mafi ote Atua mo Tena paoa, kae mai ite fale tausi o kope taaua o Tena poto mote atamai, ko oti Au ne aumai ki mua kae fakaasi ki luga ia koutou a penina kola e takato funa ite pookooga o Tena vasa e see gata mai kite favavau. Au ko oti ne kalaga ki Agelu Fafine ote Lagi ke fakasae mai i tua o veli ote funaaga, kae ko oti ne fakakafu a latou ki muna a Aku konei – muna ote paoa mote atamai fakaotioti. Au ko oti foki, mote lima ote paoa faka-te-lagi, ne tala at uaina filifilia o Taku Faaliiga, kae ko oti ne agiagi atu a tena manogi maasi mana, e funa, ki luga i mea faiite katoa. Koai aka foki ka ko koutou loa e tuku kiei ate see mafai o koutou kola e filifili ke tumau e see-fakaekegina kise ligi ifooga ote agalelei tafasili ite maluga kae aofia katoatoa, ite tafasili ite maina ote faaliiga o Tena alofa fakamagalo malifalifa taulekaleka?…

O Aku tavini! E seai e sulu i loto i Toku loto na loa kote mainaaga e se matafi ote Taeao ote takitakiiga Faka-te-Lagi, kae mai i Toku gutu e fanatu iei e seai aka foki na loa kote agaaga ote mea tonu, tela ate Aliki te outou Atua ko oti ne fakaasi. Sa tautali, tena la, a oulua manakooga faka-te-lalolagi, kae sa ofagia ate Feagaiiga ate Atua, io me e ofa gia a tau tautoo kia Ia. I se taumafaiiga maalosi, mote alofaaga katoa o tou loto, mote maalosi katoatoa o au pati, fuli a koe kia Ia, kae sa sasale i auala ote valea. Ate lalolagi se ata, seai se aogaa kae masa, se atigi-mea-fua, e fakaasi mai iei ate mea tonu. Sa tuku a oulua alofaaga kiei. Sa ofagina ate fusi tela e sai koe ki tou Tufuuga, kae sa fai pela mo latou ko oti ne see kae ko takatipatipa keatea mai i Ona auala. E tonu Au e fai atu, ate lalolagi pela me se afusaga ite toafa, tela ate tino fia inu e moemiti me ne vaiua kae taumafai kiei mo tena mafi katoatoa, ke oko ki taimi e oko a ia kiei, ko maua aka ne ia me se ata fua. E mafai, o fakatusa kite ata seai se ola ote fagasele tela ate tino e fia fai kiei ne sala kiei kae maua aka ite otiiga, mai i tua ise taimi leva ote salaaga kae ki tena fanoanoa lasi, e seai se mea e mafai o “fakalasi io me o fakafiafia a tena fiafaiiga.”

O Aku tavini! Sa fanoanoa, i aso konei pela foki i luga ite lalolagi tenei, a mea e se fetaui tonu mo ou manakooga ko oti ne fakaeke kae fakaasi ne te Atua, auaa i aso gali ote lifu, ote fiafia faka-te-lagi, e mautinoa ko nofo i loto ia koe. Lalolagi, mana kae matagofie faka-te-agaaga, ka folafola atu ki ou mata. A koutou ne faiite ne Ia, ite lalolagi tenei pela foki mo tela mai i tua, o kautasi i olotou penefiti, ko kautasi i olotou fiafiaaga, kae ke maua a se vaega ote olotou agalelei tumau. Ki tino taki tokotasi ia latou ka mafai, seai se fakalotolotolua, o maua.

Na fakailoa atu, O Salmán, kote fagasele ate Atua tonu tokotasi, ke se kilo mo mata ko too fakatonu ki faipatiiga mo tuitusiiga a tagata. Kae ko latou ke akutu mai a faipatiiga mo tusitusiiga pena ise agaaga ote matala ote mafaufau mote maina atafai. Ko tagata kona, tena la, kola, ite Aso nei, ko oti ne taaki atu ke faitaua atu ki olotou tusitusiiga faka kinau, ko talitonu ate Fakatokaaga ate Atua, e ttau o fai fakaatea. E ttau mo tagata katoa, taki tokotasi e tusa mo tena mafai o fai a mea, o teke atu a faka kinauuga a latou kola e taua kite Talitonouuga ate Atua. E tena ko oti ne folafola mai ne Ia Tela kote Maalosi-Katoatoa, kote Mafi-Katoatoa. A ia tela e manako o avaka ate Talitonuuga ote Atua tonu tokotasi, ke saoloto a ia o avaka mai i tena pene mo tena laulaufaiva, iloo ate faka-aogaa ne ia a te pelu io me e kaitaua. Matou ko oti, i taimi mai mua atu, ne fakaasi atu ate faka tapuuga tenei, kae nei ko toe faka patonu atu ne Matou, mafai a koe e lau ia latou kola e malamalama. Mai ite amio tonu o Ia Tela, ite Aso tenei, e tagi i loto ite kano loto o mea faiite katoa: “Ate Atua, e seai aka foki se Atua na ko Aku!” Kafai se tagata e tu ki luga o teke atu, i ana tusitusiiga, ate Fakatokaaga ate Atua mai ia latou kola e taua mai, ate tagata pena, me e pefea ate foliki ote tusaga, ka fakaloalogina kii loa ite lalolagi ma vau ko ala iei ate Lukuuga mana mai i luga o lotomasei i tena matagofie. E seai se pene e ana maua o folafola atu ate maluga o tena tulaga, io me e mafai ne se laulaufaiva o fakamatala a tena gali kese. Me so se tino tela e tumau kae mautakitaki ite Faaliiga maluga, mana, kae matagofie tenei, ate paoa ka tuku atu kia ia ke faka feasagai kae teke atu a mea katoa ite lagi mote lalolagi. Ite mea tenei ate Atua ia Ia kote molimau.

O koe kote fagasele ate Atua! Sa malolo a koutou i luga i outou nofoaga, kae gasuesue i taimi loa tela e lavea ate outou Aliki, kote Tufuuga, kae lagona ne koutou a mea kola ne oko ki luga ia Ia, kae fakavave atu ki Tena feasoasoani. Faka-aogaa a outou laulaufaiva kae folafola atu seai se gata a Tena Talitonuuga. E lei atu tenei mo koe iloo a kope taaua katoa o taimi ko teka mo taimi ma vau, manafai a koutou e maina ite me tonu tenei.

Ate tiute muamua loa ne fakatonu mai ne te Atua ki Ona tavini kote iloa o Ia Tela kote Punaa Aso o Tena Faaliiga mote Vaipuna o Ana tulafono, Tela e sui atu ate Uluatua mote lalolagi ote foafoaaga. So se tino e maua ne ia ate tiute tenei ko oti ne maua ne ia a mea lei katoa; ka ko ia tela e seai ia ia, ko oti ne fano keatea, faitalia me ko ia kote tusitala o amio tonu katoa. E ttau ki tino taki tokotasi katoa kola e oko kite tulaga tafasili ite maluga tenei, te tumu ote matagofie e se fakapaugina, o onoono ki tulafono taki tasi katoa a Ia Tela kote Manakooga ote lalolagi. A tiute masaga konei e se mafai o mavaevae. Io me e talia ate mea e tasi kae e seai foki a sua mea. Telaa la ko oti ne fakatonu mai ne Ia kote Kamataaga o fakamaalosi Faka-te-Lagi.

Ko latou kola ate Atua ko oti ne tuku atu ate iloa ka faigofie o lavea akoakoga ne fola mai ne te Atua e aofia iei auala tafasili ite lei mote tausiiga ote nofo toka pela ite lalolagi pela foki mote tausiiga filemu o ona tino. A ia tela e fuli tua mai ia latou, e lau ia latou kola fakamaualuga kae valea. A Matou, e tonu ko oti ne fakatonu atu ke se taliagia a musumusuuga a outou manakooga leaga mo maanakooga faitogafiti, kae ke se soli tuakoi kola ate Pene ote Tafasili ite Maluga ko oti ne fakamau, auaa a mea konei ko manavaaga ote ola ki luga i mea faiite katoa. A kogaa-tai ote atamai Faka-te-Lagi mote faipati faka-te-lagi ko oti ne olo aka ki luga mai i lalo ote manavaaga ote matagi ili malielie ote Alofa-Fakamagalo Katoatoa. Fakavave o inu a tou tusaga, O tagata ote malamalama! A latou kola ko oti ne ofa ne latou ate Feagaiiga ate Atua mai ite ofa ne latou a tulafono, kae fuli tua mai a olotou vae, latou konei ko oti ne see kii loa ite mata ote Atua, kote Aofia-Katoatoa, kote Tafasili ite Maluga.

O koutou tino ote lalolagi! Ke iloa tonu i Aku tulafono ko molii o Toku alofaaga pule i vasia o Aku tavini, ko kii o Toku alofa-kaimalie mo Aku meaola faiite. Kona ko oti ne tuku ifo ki lalo mai ite lagi ote Finagalo o te outou Aliki, kote Aliki ote Faaliiga. Moi fai se tagata e tami kite suamalie o muna kola ne vau mai i laugutu ote Alofa-Fakamagalo Katoatoa ko oti ne finagalo gina ke faipati, a ia, e uiloa a kope taaua ote lalolagi e nofo mo ia, e liakina katoa ne ia, tasi kae katoa loa, kote mea ke mafai a ia o fakasao mai ite mea tonu o se tasi o Ana tulafono, e mainaina i luga o punaa aso o Tena atafai mataefa mote alofa-kaimalie.

Fai atu: Mai i Aku tulafono ate manogi suamalie o Toku gatu e mafai o sogigina, kae mai ite olotou feasoasoani a tulaga ote manumaaloo ka toki i tumu tafasili ite maluga. Ate Laulaufaiva o Toku paoa ko oti, mai ite lagi o Toku matagofie tafasili ite maluga, e faipati atu ki Taku foafoaaga i muna konei: “Tautali ki Aku tulafono, ona kote alofa ki Toku gali.” Fiafia kia ia tela e alofa ko oti ne manava ki loto ate manogi gali faka-te-lagi o Tena Fagasele-Sili mai i muna konei, fakauta kite sausau ote agalelei tela e seai se laulaufaiva e ana maua o fakamatala. Mai i Toku ola! A ia tela ko oti ne inu ite uaina filifilia ote fai mea-tonu mai i lima o Oku alofaaga mataefa, ka tamilomilo i Aku tulafono kola e sulu maina mai i luga atu ote Punaa Aso o Taku foafoaaga.

Sa mafaufau ia Matou ko oti ne fakaasi kia koutou se polokalame o tulafono fua. Ikaai, Matou ko oti ne tala ate Uaina filifilia ki maikao ote mafi mote paoa. Kite mea tenei e molimau ate Pene ote Faaliiga ko oti ne fakaasi. Talosaga faka pooko kiei, O tagata ote iloa! …

Kafai Aku tulafono ko sae mai pela mote laa ite lagi o Aku faipatiiga, a tulafono kona e ttau katoa o fakalogo kiei mote fakamaoni, e uiloa a Taku fakatonuuga e pogai kiei ate lagi o so se talitonuuga o maofaofa mai i lalo. E fai ne Ia ate mea e fiafia a Ia kiei. E filifili, kae e seai e ana maua o fakafesili a Tena filifiliiga. So se mea ate Fagasele-Sili, e fakeke aka, ate mea foki loa tena, e tonu, e fagasele. Kite mea tenei a Ia Tela kote Aliki ote foafoaaga katoa e fai mo Aku molimau. So se tino e manava ne ia ki loto a manogi gali ote Alofa-Fakamagalo Katoatoa, kae lavea ne ia ate Kamataaga o faipatiiga konei, kae talia kimo ona mata tonu loa a maikao ote fili, kote mea ke mafai ne ia o fakatu ate meatonu i tulafono ate Atua i vasia o tagata. E lei mo ia tela e fuli atu kiei, kae maua a uiga o Ana fakatonuuga taaua.

A Ia Tela kote Meatonu Favavau ko oti, mai ite Punaa Aso ote Matagofie, ne fakasaga atu ona mata ki tino o Baha, kae faipati atu kia latou penei: “Saga koutou kite avakaaga ote lei mote filemu o tama a tagata. Ofe a oulua mafaufau mo manakooga kite akoakooga o tino mo itu-kaaiga ote lalolagi, ko mavaevaeega ia latou e mafai, auala atu ite paoa ote Igoa Tafasili ite Takutakua, o solo keatea mai ia latou, ka ko tino katoa ke lago ne latou ate Oota e tasi, mo tino nofo ite Fakai Lasi e tasi. Faakamaina kae fakamana a outou loto; ke fai a latou ke galo ate aava mai i mea talatala ote ita io meko mea matakaikai ote masei. Koutou e nofo ite lalolagi e tasi, kae ko oti ne faiite mai ite faka galueega o te Finagalo e tasi. Fakamanuia kia ia tela e sokotaki mo tagata katoa i se agaaga ote tafasili ite kaimalie mote alofa.”

Latou kola ko oti ne liakina a olotou fenua o talai ate Omotou Talitonuuga – a latou konei ka fakamaalosi gina nete paoa ote Agaaga Fakamaoni. Ate lukuuga o Omotou agelu filifilia ka olo ki mua mo latou, pela mote fakatonuuga ne Ia ko Ia kote Mafi-Katoatoa, kote Atamai-Katoatoa. E pefea ate lasi ote fakamanuiaaga tela e faitali kia ia ko oti ne maua ne ia ate fakaaloalo o tavini kite Mafi-Katoatoa! Mai i Toku ola! E seai se mea e fai, me e pefea ate lasi, e mafai o fakapau mo ia, vagana ko uiga kola ko oti ne aumaigia ne te Atua, kote Maalosi-Katoatoa, kote Tafasili ite Mafi. Ate taavini galue pena, e tonu, kote pelenise o uiga lei katoa, kae kote lakei o faiga lei katoa. Tena ko oti ne fakaeke mai ne Ia Tela kote Tupu Fakaasi, kote Favavau o Aso.

So se tino tela e tu ki luga o talai ate Omotou Talitonuuga e ttau o motu mai keatea a ia mai i mea faka-te-lalolagi, kae masaua, i taimi katoa, ate manumaaloo ote Omotou Talitonuuga ko tena koulu tafasili ite maluga. Tenei ko oti, e tonu, ne fakatulafono mai ne te Tapeleti Leoleogina. Kae kafai a ia e manako maalaosi loa o liakina a tena fale, ona kote Talitonuuga o tena Aliki, fai a ia ke tuku katoatoa a tena talitonu ite Atua, me kote uta tafasili ite lei mo tena malaga, kae filifili a ia kite gatu o uiga lei. E tena ko oti ne fakaiku ne te Atua, kote Mafi-Katoatoa, kote Tavaegia- Katoatoa.

Kafai a ia e manako o faka ka kite afi o Tena alofa, mafai e fakaseai ne ia a mea faiite katoa, a pati e faipati ne ia ka faka ka ne ia a latou kola e lagona ne latou a ia. E tonu, a tou Aliki kote Laveagia-Katoatoa, kote Iloagina-Katoatoa. Fiafia a tagata ko oti ne lagona ne ia ate Omotou Leo, kae talia ate Omotou kalaga. A ia, e tonu, ei ia latou kola e ttau o fakapilipili mai kia Matou.

Te Atua ko oti ne talia mai mo tino taki tokotasi katoa ate tiute o talai a Tena Fakatokaaga. So se tino tela e tu ki luga o fai ate tiute tenei, e ttau, o fakavave o folafola atu a Tena Meseti, fakaeke a ia ki lakei o uiga mautakitaki kae tavaegina, ko ana muna ke mafai o futi mai a loto kola e talia a tena kalaga. Ka seai ate feitu tenei, e se mafai lele o mafai ne ia o faka pokotia a loto o ana tino fakalogologo.

Manatunatu kite foliki o mafaufau o tagata. E sili mai ki mea kola e pakia iei a latou, kae pei keatea ate mea tela e lei mo latou. A latou, e tonu, ko olo seke kii loa. E maua ne mtou a niisi tagata e manako kite saolotooga, kae miita a latou iei. A tagata pena ei loto ite pogisa ote valea.

Ate saolotooga tonu, ite fakaotiiga, e soko atu kite fai taua, kola ana ulaaga e seai e ana maua o tamate. E tena ate poloakiiga a Ia Tela kote Feasoasoani, kote Iloa-Katoatoa. Ke iloa ne koe ite faka-te-foitino ote saolotooga mo ana failoga kote manu. Ate mea e ttau ki tagata kote tuku atu a ia ki faka taputapuga kola e puipui a ia mai i tena valea kae leoleo a ia mai ite mae e oko kia ia mai ite tino amio masei. Ate saolotooga e fai ne ia a tagata ke silia atu i tuakoi ote aava, kae e soli tuakoi atu kite maalu o tena tulaga. E fakamasei kia ia kite levolo tafasili ite masei mote faitogafiti.

Manatunatu i taagata pela me ne lafu mamoe e manakogina se takitaki mamoe mo olotou puipui. Tenei, e tonu, kote mea tonu, kote tina mea tonu. E talia ne Matou ate saolotooga i niisi taimi, kae e se talia ne Matou i niisi taimi. Matou, e tonu, kote Iloa-Katoatoa.

Fai atu: Ate saolotooga tonu e aofia iei ko tagata ke fakalogo katoatoa ki Aku fakatonuuga, e pefea ate foliki ote iloa ne koe. Moi fai a tagata e fakalogo ki mea kola ne avatu ne Matou ki luga ia latou mai ite Lagi ote Faaliiga, ko leva a latou mote talitonu ne maua ate tinaa saolotooga tonu. Fiafia ate tagata tela ko oti ne maina ite Pogai ote Atua i so se mea ko oti ne fakaasi mai ne Ia mai ite Lagi o Tena Finagalo, tela e salalau i mea faiite katoa. Fai atu: Ate saolotooga tela e lei kia koe e maua fua ite tavini katoatoa kite Atua, kote Meatonu Favavau. So se tino kooti ne tami i tena magalogalo ka se talia ne ia o suiaki ki mea katoa ite maaloo ote lalolagi mote lagi.

A ia se tino talitonu fakamaoni ite fakatasitasi fealofani ote Atua tela, ite Aso tenei, ka kilo kia Ia me kote Tokotasi e se fuafuagina ite maualuga atu i fakatusaaga katoa mo faka paupauuga kola a tagata ne faka paupau a Ia kiei. A ia ne see kii loa tela ne fakatau see a fakatusaaga mo paupauuga konei kite Atua. Fuafua aka ne koulua ate vaa ote tufuuga mo ana galueega, ite vaa ote tino lomi ata mo ana ata ne lomi. Ea e mafai o tausiusi i galueega a olotou lima ne fai e tusa mo latou? A Ia Tela kote Aliki ote Nofoaga-Aliki i luga mo i lalo ote lalolagi! E se mafai o atafiagina ise isi mainaaga aka vagana pela me ne molimau me folafola atu ne latou ate silisili-ite-lei mote tonu ote olotou tino tusi tala

O Shaykh, O koe tela kooti ne tuku katoatoa a tou finagalo kite Atua! Kote tuku katoa mote fusi tasi mote Atua ko tona uiga ko tagata e ttau o tuku a olotou finagalo katoatoa kite Finagalo ote Atua, kae kilo ki olotou manakooga me ne seai lele loa mai i tafa o Tena Pogai. So se mea tela e fakatonu mai ne te Tufuuga ki ana meaola faiite ke tautali kiei, e tena foki ate mea e ttau o fai ne latou, mote tafasili ite lifu mote fiafia, o tu ki luga. E se ttau mo latou o fakasaoloto a olotou manatu faka moemiti o pono a olotou fakatauuga, io me e ttau latou o fai a olotou mafaufauuga me kote leo ote Favavau. Ite Talo mote Anapogi Matou ne fakaasi atu: “Kafai a Tou Finagalo e fakatonu mai i Tou muagutu a pati konei e aumai ki mua kae e ttau o fakatua tusi kia latou, ‘Tautali, ona ko Toku Gali, ate anapogi, O tino, kae sa faka tapula gina se taimi gata a ia, ‘Ai e tauto ite afioga o Tou matagofie, me i tino katoa taki tokotasi ka tautali mote fakamaoni iei, kae ka se fai ne latou a so se mea tela e solisoli ne latou ate tulafono, kae ka tumau a latou o fai pena ke oko kite taimi ka tuku atu a olotou agaaga ola kia Koe.” Ite mea tenei e aofia iei ate tinaa tuku katoatoa ate finagalo o se tasi kite Finagalo ote Atua. Mafaufau talosaga ki luga ite mea tenei, kote mea ke mafai ne koe o inu i vai ote ola se-gata-mai tela e tafe mai i muna ate Aliki mo tino katoa, ke mafai o molimau ite Atua tonu tokotasi mai loa ite favavau e maluga atu i Ana meaola faiite. A Ia, e tonu, kote Se-Fakatusagia, kote Fakatunaki Favavau, kote Lavea mote Iloa-Katoatoa, kote Atamai-Katoatoa. Ate tulaga ote tinaa

tuku-atu katoatoa e maluga atu, kae ka tumau o maluga atu, i tulaga taki tasi katoa.

E ttau atu mo koe o fakamaumau a koe kite Finagalo ote Atua. So se mea ko oti ne fakaasi mai i Ana Tapeleti se ata o Tena Finagalo. E ttau o katoatoa a tou fakatuanaki, ko so se maaka o manakooga faka-te-lalolagi ke fulu keatea mai i tou loto. E tenei ate uiga ote fakatasitasi tonu.

Ke akai koe kite Atua ke faka mafai a koe o tumau ite mautakitaki ite auala tenei, kae ke feasoasoani kia koe ke takitaki a tino ote lalolagi kia Ia Tela kote fakaasiiga mote Takitaki tupu, Tela ne fakaasi a Ia ise gatu fakapatino, Tela e faipati ki muna Faka-te-Lagi mo se Meseti fakapitoa. Mea nei kote kano loto tonu ote fakamaoni mote mautinoa tonu. Latou kola e tapuaki ki tupua kola ne faiite ne olotou mafaufauuga, kae fakaigoa ne latou me kote tinaa Meatonu, a tagata pena ite tonuuga e lau ia latou e fapaupau. Kite mea tenei ate Alofa-Fakamagalo Katoatoa e fai mo molimau i Ana Tapeleti. A Ia, e tonu, kote Iloa-Katoatoa, kote Atamai-Katoatoa.

Fusi fakatoka aka a tou foitino ki tau galueega, ke fiafia koe o akoako a tou tuakoi kite tulafono ate Atua, kote Tafasili ite Alofa-Fakamagalo. Ate galueega pena, e tonu, e sili atu i galueega katoa i mata ote Atua, kote Aofia-Katoatoa, kote Tafasili ite Maluga. E pena ate mautakitaki ite Talitonuuga ate Atua, ke seai se mea ite lalolagi e ttau o isi sena paoa o pale a koe keatea mai i tou tiute. E uiloa a paoa ote lalolagi e mafai o taua atu ki luga ia koe, faitalia me ko tagata katoa e fakakinau mo koe, a koe e ttau o tumau aunoa se gasuesue.

Ke mafai koe o se-maua o taofigina pela mo te matagi, i taimi e kave ne koe a te Fekau a Ia Tela ko oti ne fai ne Ia a te Vaveao o te Takitakiiga Faka-te-Lagi ke maofa. Fakatau mai la, me e pefea a te matagi, fakamaoni kite mea tela ko oti ne fakaeke mai ne te Atua, e agi ki kogaa-koga katoa o te lalolagi, me e isi ne tino e nofo iei io me e seai. E seai kote lavea atu ote seai ne mea iei, io me ko fakatalitonuuga ote maumea, e mae io me e fiafia iei. E agi mai i so se feitu, pela mote finagalo a tena Tufuuga. Ke pena foki a sose tino taki tokotasi tela e fai pela ia ia e alofa kite Atua tonu tokotasi. E ttau mo ia o fakasaga a tena kilooga ki luga i akoakoga fakavae o Tena Fakatokaaga, kae galue fakamaoni ki tena fakamaalosiiga. Katoatoa ona ko te Atua e ttau mo ia o fakasalalau atu a Tena Fekau, kae ite agaaga foki loa tena ke talia so se tali e maua mai i ana muna ma fai kia ia e fakalogologo. A ia tela e talia kae talitonu, ka maua ne ia a te taui; ka ko ia tela e fuli keatea ka seai sena mea e maua na ko tena fakasalaaga.

I te afiafi ote aso ne liakina ne Matou a ‘Iráq, Matou ne poloaki ki taugasoa fakamaoni ke nofo fakatalitali latou kite sae mai o Manu ote Pouliga. E aunoa mo se fakalotolotolua ite tagi ate Manu Fekai ka lagona i nisi fenua, pela mote mea ne lagona, kae ne lagona foki i tausaga pili ko teka atu. Kafai e tupu se mea penei, sala ki se lafiiga ite Atua tonu tokotasi, kote mea ke mafai ne Ia o puipui a koe mai i faitogfiti a tino loi.

E tonu Au e fai atu, ite Faka-asiiga tafasili ite mafi tenei, a Fakatokaaga katoa ko teka ko oti ne oko atu kite tumu maluga, o te fakaotiiga o latou. E tena a te poloakiiga kia koe a tou Aliki, ko te Iloa Katoatoa, kote Atamai Katoatoa. Tavaeega e io te Atua, kote Aliki o lalolagi katoa.

Ko te Alofa-Fakamagalo-Katoatoa ko oti ne fakaeke ki luga i tagata ate mafai o lavea, kae fakaeke ki luga ia ia ate mafai o logo. Ko nisi ne fakamatala ne latou a ia me kote “lalolagi malalo,” kae, ite tonuuga, a ia ne ttau o fai pela me ko te “lalolagi lasi.” A maalosiiga e nofo i loto ite tulaga o tagata, ko te tinaa-pooko tonu o tena fakaotiiga i luga ite lalolagi, kote tafasili ite tulaga llei kae lilo o tena uiga tonu, e ttau o fakaasi katoa ite Aso ote Atua ko oti ne faifeagaiiga mai.

Ate Pene ote Tafasili ite Maluga ko oti, i taimi katoa mo faka-nofonofooga katoa, e masaua, mote fiafia mote atafai, Ona tino fagasele, ko oti ne akoakogina latou ke tautali i Tena auala. E llei mo ia kola a mafulifuliiga mo avanoaaga ote lalolagi tenei e seki-mafai o fai a ia mai i te lavea ne ia ate Aso-malulu o te Fakatasitasi o te Atua, tela ne inu, mo se talitonu katoatoa, kae ite igoa ote Ola-ia-Ia, ate uaina o Tena Faka-asiiga ko oti ne pono. A te tagata pena ka llau a ia mo pagota ote Palataiso, ite Tusi ate Atua, kote Aliki o lalolagi katoa.

Ko tavaeega katoa ki te Atua Tela ne faka-lakei ne Ia ate lalolagi mo se mea faka-galigali, kae fakatoka a se gatu, tela e se-mafai lele o fakamasei ne se maalosi ite lalolagi, me e pefea ate mafi o tena kautau, me e pefea a te lauefa o tena maumea, me e pefea ate pooko o tena iloa o faka-pokotia a nisi tino. Fai atu: A te tinaa-mea tonu ko maalosi katoa io te Atua, ko te tafasili ite maluga mote Fakaotiiga o te foafoaaga katoatoa. Kote kamataga o afioga katoa io te Atua, ko te Pogai ote faka-aloaloga o latou katoa kola i luga i lagi mo latou katoa kola i luga ite lalolagi. A maalosi kola olotou kamataga ne maua i loto ite lalolagi ote pefu, ona kote natula o latou, e se taulia o onoono kiei.

Fai atu: A ttau-malulu tela e fakaolaola ne ia ate olaaga o manu konei e se-aumai mai ite lalolagi tenei. Ko te kamataga o latou e mao mai i luga ite oko mo te iloa ote maina o tagata. Koi i kona e mafai o tamate ate mainaaga tela ate Lima kena pela me se kiona o te Atua ko oti ne faka-ka ne ia? E maua a ia i fea tela e isi sena maalosi o tamate a tea afi tela ne faka-ka auala atu ite mafi o te Aliki, kote Maalosi-Katoatoa, kote Luku-fakatasi Katoatoa, kote Mafi-Katoatoa? Ko te Lima o mafi Faka-te-Lagi ne tamate a afusaga ote fai-taua. E maalosi a Ia o fai ate mea e fiafia a Ia kiei. Ana muna: Ke taunu, kote mea ke fai pena. Fai atu: A kaupeau lasi mo kaumatagi ote lalolagi mo ona tino e se-mafai lele o faka-gasue ate fakavae makeke pela me se kaupapa e nofo iei Aku tino filifilia. Kote Atua alofa! Sea a te mea ne mafua i ei a tino konei o faka-pagota kae pei kite fale-puipiui a fagasele a Ia Tela kote Mea-tonu e Se-gata mai?...A te aso, tena la, ko pilipili mai ko latou fakamaoni ka lavea ne latou a te Fetu Ao ote faimea-tonu e maina i tena malifalifa katoatoa mai ite Aso-malulu o te matagofie. E tena ate fakatonuuga kia koe ate Aliki o mea katoa i loto i konei, ko Tena Fale-puipui faka-mataku.

A sui o te lanu o tagata! Puke mmau koulua kite Kafaanoa tela e seai se tagata e mafai o motu. A te mea tenei, e tonu, ka lei koulua i aso katoa o tou olaaga, aua i tena maalosi e maua mai ite Atua, kote Aliki o lalolagi katoa. Piki mau a koe kite fai-mea-tonu mote se-fapito, kae fuli keatea mai i musumusuuga a vale, ko latou kola ko mavae mai ite Atua, kola ko oti ne teuteu aka a olotou ulu ki lakeiiga o tino poto, kae ko oti ne liakina kite mate o Ia Tela kote Ulu o te atamai. Toku igoa ko oti ne sapai aka a latou ki luga i lasaga maluga, kae, i mu taimi loa kola koi fakaasi atu Au ki olotou mata a ko latou, aunoa mo seai se fai-mea-tonu, ne fakaiku ne latou a Toku mate. E tena ate mea tonu ne fakaasi mai nete Pene a Matou, kae e ui iei a tino koi malemu ifo loa ite se-fakalogo.

So se tino tela e piki mmau kite fai-mea-tonu, e se-mafai, i sose faka-nofonofoga, o soli-tuakoi ne ia ate gataaga ote fuafua-tau. E atafia ne ia ate mea-tonu i loto i mea katoa, mai i luga ite takitakiiga a Ia Tela kote Lavea-Katoatoa. A te malamalama, e masani o faka-salalau ne tino poto o mataupu kese kese mote saienisi, e mafai, manafai e taliagia ke sopoia atu i tuakoi ote fuafua-tau, e aumai ate masei kii loa ki luga i tagata. E tena ate poloakiiga kia koe mai ia Ia Tela kote Iloa-Katoatoa. Ka fai ko silia ate faiiga, ate malamalama ka fakatalitonu me kote pogai ote masei pela loa me kote pogai ote lei manafai e tausi mai iloto i puipuiiga ote fuafua-tau. Talosaga ki luga ite mea tenei, O tino, kae sa-fai pela mo latou kola e oloolo saale se-fiafia ite togaa-vao o te mea-see. A te aso ko pilipili mai tela a tena ulaaga ka kai ne ia a fakai lasi, tela ate Laulaufaiva ote Matagofie ka ko fakasalalau atu: “Ate Maalo e ote Atua, kote Mafi-Katoatoa, kote Tavaegia-Katoatoa!”

A nisi mea katoa e aofia i te akoakoga faka-pitoa tenei o te fuafua-tau. Tuku atu a te fakafetai ki tou Aliki Tela ko oti ne masaua a koe i te Tapeleti gali tenei. Ko tavaeega katoa io te Atua, ko te Aliki o te kalauna-a-tupu matagofie.

Kafai so se tagata e mafaufau i tena loto a te mea tenei a te Pene o te Tafasili ite Maluga ne fakaasi kae ke tami ki tena suamalie, a ia e mafai, i te tonuuga, o iloa ia ia e masa pakupaku loa kae fakasao mai i ona manakoga, kae fakalogo katoatoa kite Finagalo o te Mafi-Katoatoa. Fiafia a te tagata ko oti ne maua se tulaga maluga, kae ko oti ne fakaseai a ia mai i se alofaga maukoloa pena.

I te Aso tenei, e se-talia ne Matou amioga a latou ko la e faka-mataku kola e salasala ke ofa a tena talitonuuga, io me e talia amioga o latou talitonu kola e fai pela mote logoaa ate olotou talitonu ki Tena Fakatokaaga. A laua e ttau o tautali ki te lagona o te atamai, kae taumafai maalosi o tavini ki te tafasili i te lei o te Talitonuuga.

Ke talia a so se tagata o tautali kae nofo talosaga ki amioga a Ia Tokotasi tenei ne faka-see-gia. Ko Matou, talu mai taimi ne kamata iei ate Faka-asiiga tenei ke oko mai ki taimi nei, ne seki talia ne Matou o muni mai i Omotou fili, io me liakina atu ate fakatasitasi mo Omotou taugasoa. E uiloa e siomia nete fanoanoa e uke mo fakalavelave, ko oti a Matou, mote talitonu katoatoa, ne kalaga atu ki tino ote lalolagi kite Aso-Malulu ote Matagofie. A te Pene ote Tafasili i te Maluga e se fiafia maalosi o toe laulau atu, ite mea tenei, a fanoanoaaga ko oti ne pokotia iei. Ke fakaasi atu a mea konei, e se taumate, ka pokotia nete fanoanoa a latou kola e pele i vasia o tino fakamaoni, ko latou kola e apai tonu ne latou ate fakatasitasi ote Atua kae e tapuaki kaatoatoa ki Tena Fakatokaaga. A Ia, e tonu, ka faipati ate mea-tonu, ka ko Ia kote Lagona-Katoatoa, kote Iloa-Katoatoa. A te Omotou olaaga ko oti, ite lasiiga o taimi, ne fakamaumau i loto i vasia o Omotou fili. Molimau me e pefea a Matou, ite vaaitaimi tenei, o ola i loto i ofaaga o gata.

A te Fenua Tapu tenei ko oti ne faipatigia kae fakamaluga i Tusitusiiga Tapu katoa. I ei ko oti ne talia a Pelofeta ate Atua mo Ana tino filifilia. Mea nei ko te togaa-vao tela a Faifekau katoa ate Atua ko oti ne taka-seasea, tela mai iei a te olotou tagi, “ Au tenei, Au tenei, O toku Atua” ne kalaga atu ki luga. Mea nei kote Fenua ne faifeagaiiga mai koIa Tela kote Fakaasiiga ate Atua ne tonu me ka fakaasi mai. Mea nei ko te Vanu ote ikuuga ate Atua e se-mafai o salagia, kote Koga kena pela me se kiona, kote Fenua ote matagofie e se-mafai o matafitafi. Ko Tusitusiiga Tapu foki loa konei, tena, ne lototasi o faka-masei a tino kola e nofo i te fenua tenei. A latou, i sua taimi, ne fatatau faka-masei pela me kote “tupulaga o manu poisini.” Kilo aka me ne pefea a Ia Tokotasi tenei ne faka-see-gia, e uiloa ite siomia ne “tupulaga o manu poisini,” ne pa-kalaga atu kae kami mai a tagata katoa kia Ia Tela kote Toe Manakoga ote lalolagi, kote Tumu mote Aso malulu ote Matagofie. Fiafia a te tagata tela ne fakavave ki te leo o Ia Tela kote Aliki ote Maalo o te Faipatiiga, kae faka-fanoanoa kia ia e se-fakalogo, latou ko olo seke kii mai i Tena mea-tonu.

Ke iloa i so se taliga tela e logo, ka fai e tausi ke piua kae e se-fakalailai, e ttau, i taimi katoa kae mai i sose feitu, o fakavave kite leo tela e faipati mai a muna e mana: “E tonu, a matou ea ate Atua, kae kia Ia e foki matou kiai.” A mea lilo ote mate faka-te-fuaitino o tagata mo tena foki atu e seki fakamatala atu, kae koi tummau e seki faitaugina. E auala atu ite fakamaoni mote amio lei o te Atua! Moi fai ke fakaasi atu, ka mafua mai iei ate mataku mote fanoanoa ko ala iei o tanumia a niisi, a ko niisi ka fonu ite fiafia ko manako iei kite mate, kae akai fakamolemole, mo se loto nnau, kite Atua tonu tokotai – ke maluga a Tena matagofie – ke fakavave ate olotou faka-otiiga.

E aumai nete mate ki so se taugasoa mautinoa tonu ate ipu tela kote ola. E fakaeke ifo ne ia ate fiafia, a ko ia kote mesentia ote mata-fiafia. E tuku mai ne ia a te mea-alofa kote ola e se-gata-mai.

Kae mo latou kola ko oti ne tami ite fuaga-lakau ote olaga ote tagata ite lalolagi, tela kote lavea ote Atua tonu tokotasi, ke maluga a Tena matagofie, a tena olaga mai i tua e se-mafai ne Matou o fakamatala. Ate poto iei e nofo mote Atua, tokotasi, kote Aliki o lalolagi katoa.

So se tino e fai sena mau kise Faaliiga ne aumai tonu mai ite Atua, kae koi tuai o katoa ate afe o tausaga, ate tino tena e mautinoa tonu me se tino faka-loiloi. E talo Matou kite Atua ke mafai ne Ia o talosaga alofa atu kia ia ke fakafoki kae tapale keatea a se mau pena. Kafai a ia e salamo, ate Atua, ka se taumate, e fakamagalo a ia. Kae, kafai, a ia e tumau i tena mea see tena, ate Atua ka, tonu loa, e ave ifo ki lalo a se tasi tela ka fakamasino a ia e aunoa mo se alofa. E tonu, e masei kii ate fakasala ate Atua! So se tino tela e faka-matala ne ia ate kupu tenei mai i tafa ote uiga tonu o ia e fakaseai mai ia ia ate Agaaga ote Atua mo Tena alofa-fakamagalo tela e siomia iei a mea faiite katoa. Mataku kite Atua, kae sa-tautali ki manatu faka-supasupa o koe. Ikaai, tautali ki fakatonuuga a tou Aliki, kote Mafi-Katoatoa, kote Atamai-Katoatoa.