‘E FOHA ‘O E LAUMÄLIE!
Ko ‘eku ‘uluaki akonaki ‘eni: Keke ma’u ha loto ma’a mänava’ofa mo fiefia, ke ‘iate koe ‘a e pule tuputupu’a, ta’efa’a’auha pea ta’engata.
‘E FOHA ‘O E LAUMÄLIE!
Ko e ‘ofeina taha ‘o e ngaahi me’a kotoa pe ‘i He’eku vakai ko e Totonu, ‘oua ‘e tafoki mei ai kapau ‘oku ke fiema’u au, pea ‘oua ‘e li’aki ia koe’uhi ke U falala ai kiate koe. ‘I he’ene tokoni teke mamata’aki ho mata tonu ka e ‘ikai ‘i he mata ‘o e ni’ihi kehe, pea teke ‘ilo ‘iate koe tonu ka e ‘ikai ‘i he ‘ilo ‘a ho kaungä’api. Fifili ‘eni ‘i ho loto, ‘a ‘ene fiema’u koe keke hoko ‘o pehë. Ko e mo’oni ko e totonu ko ‘Eku me’a’ofa kiate koe pea mo e faka’ilonga ‘o ‘Eku ofa-angalelei. Fokotu’u leva ia ‘i mu’a ‘i ho mata.
‘E FOHA ‘O E TANGATA!
Puipui’i ‘i He’eku mo’ui talu mei mu’a mo ‘itäniti tuputupu’a
‘o Hoku uho, na’a Ku ‘ilo ‘a ‘Eku ‘ofa ‘iate koe; ko ia ai na’a Ku ngaohi koe, mo tohi tongi ‘iate koe Hoku ‘imisi pea fakahaa’i kiate koe ‘a Hoku hoihoifua.
‘E FOHA ‘O E TANGATA!
Ko ‘eku ‘ofa ho fakatupu, ko e ‘uhinga ia na’a Ku fakatupu ai koe. Ko ia, ke ke ‘ofa ‘iate Au, pea teu ui ai ho hingoa mo fakafonu’aki ho laumälie ‘a e laumälie ‘o e mo’ui.
‘E FOHA ‘O E MO’UI!
‘Ofa ‘iate Au, ke U ‘ofa ‘iate koe. Ka ‘ikai teke ‘ofa ‘iate Au, he’ikai a’u atu ‘a ‘Eku ‘ofa kiate koe. Ke ke ilo ‘eni, ‘e tamaiö’eiki.
‘E FOHA ‘O E MO’UI!
Ko ho palataisi ‘a ‘Eku ‘ofa, ko ho ‘api fakahëvani ‘a e to e fakataha mo Au. Hü ki ai pea ‘oua ‘e to e tatali.Ko ‘eni ‘a ia kuo polo’i ma’au ‘i Homau pule’anga ‘i ‘olunga pea mo Homau ‘Afio’anga langilangi’ia.
‘E FOHA ‘O E TANGATA!
Kapau ‘oku ke ‘ofa ‘iate Au, situ’a meiate koe; pea kapau ‘oku ke kumi ki He’eku fiemälie, ‘oua na’a tokanga’i ha’au; koe’uhi keke mate ai ‘iate Au pea Te U mo’ui ai ‘o ta’engata ‘iate koe.
‘E FOHA ‘O E LAUMÄLIE!
‘Oku ‘ikai ha to e nonga ma’au ka ko ho’o li’aki koe pea tafoki mai kiate Au; he ‘oku fiema’u koe keke tuku kolölia ‘i Hoku huafa, ka e ‘ikai ‘i ho hingoa; pea ke tuku ho’o falala ‘iate Au ka e ‘ikai ‘iate koe, koe’uhi ko Hoku finangalo keke ‘ofa taha pë ‘iate Au ‘o hulu hake ‘i ha to e me’a.
‘ E FOHA ‘O E MO’UI!
Ko ‘Eku ‘ofa ko Hoku kolo mälohi; ko ia ‘e hü ki ai ‘e hao mo malu, pea ko ia ‘e tafoki mei ai kuo pau ke hë mo ‘auha.
‘E FOHA ‘O E FOLOFOLA!
Ko koe Hoku kolo malohi, hü ki ai keke malu.Ko ‘Eku ‘ofa ‘oku ‘iate koe, keke ‘ilo ia, pea te ke ‘ilo’i ai Au ‘oku Ou ofi atu kiate koe.
‘E FOHA ‘O E MO’UI!
Ko koe ‘a ‘Eku maama mo Hono ulo ‘oku ‘iate koe. Ke ke ma’u mei ai ‘a ho’o maama pea ‘oua na’a ke to e kumi ki ha taha kehe meiate Au. He na’a Ku ngaohi koe ‘i he koloa’ia mo foaki tau’atäina atu ‘a ‘Eku täpuaki.
‘E FOHA ‘O E MO’UI!
Na’a Ku ngaohi koe ‘aki ‘a e nima ‘o e ivi pea na’a Ku fakatupu koe ‘aki ‘a e louhi’inima ‘o e mälohi; pea kuo U tuku ‘iate koe ‘a e ‘elito ‘o ‘Eku maama. Ke ke fiemälie ai pea ‘oua na’a ke to e kumi ki ha to e me’a, he ko ‘Eku ngäue ‘oku haohaoa pea ko ‘Eku fekau ke tauhi; ‘oua na’a fehu’ia ia, pe tätäla’a ai.
‘ E FOHA ‘O E LAUMÄLIE!
Na’a ku ngaohi koe ‘i he tu’umälie, ka koe hä kuo ke tuku hifo ai koe ki he masiva? Na’a Ku ngaohi koe ‘i he ma’olunga ka ko e hä kuo ke fakama’ulalo’i ai koe? Mei he ‘elito ‘o e ‘ilo kuo U ‘oatu ‘a e mo’ui kiate koe, ko e hä ‘a e ‘uhinga ‘oku ke to e kumi ai ki ha fakamaama ‘a ha taha kehe tukuhehe Au? Kuo U fakafotunga’i koe mei he ‘umea ‘o e ‘ofa, ‘e fakafëfë ai ha’o fakafemo’uekina’i koe ki ha to e taha? Fakafoki ‘a ho’o vakai kiate koe, pea teke ‘ilo Au ‘oku Ou tu’u ‘i loto ‘iate koe, ‘i he mälohi, ivi mo e mo’ui ‘iate Au pë.
‘E FOHA ‘O E TANGATA!
Ko koe ‘a Hoku pule’anga pea ko Hoku pule’anga ‘e ‘ikai
‘auha ka ko e hä ‘oku ke manavahë ai ho faka’auha? Ko koe ‘a ‘Eku maama pea ko ‘Eku maama he’ikai lava ke tämate’i, ka ko e hä ‘oku ke ilifia ai ho tämate’i? ko koe Hoku näunau pea ko Hoku näunau he’ikai mole; ko koe Hoku pulupulu pea ko Hoku pulupulu ‘e ‘ikai ‘auha. Ke ke nofo ‘i he ‘ofa kiate Au, koe’uhi ke ke ‘ilo Au ‘i he pule’anga ‘o e näunau.
‘E FOHA ‘O E FOLOFOLA!
Fakatafoki ho fofonga kiate Au pea tukuange ‘a e me’a kotoa tukuhehe Au; he ‘oku tu’uloa ‘a ‘Eku pule pea ko Hoku pule’anga ‘e ‘ikai ‘auha. Kapau teke fekumi ki ha taha kehe meiate Au, ‘io, pea ka ta’engata ho’o fekumi ki he univeesi, ko ho’o fekumi ‘e hoko pë ko e muna.
‘E FOHA ‘O E MAAMA!
Fakangaloki ‘a e me’a kotoa pë tukukehe Au pea ke fetu’utaki mo Hoku laumälie. Ko ‘eni ‘a e ‘elito ‘o ‘Eku fekau, ko ia tafoki ki ai.
‘E FOHA ‘O E TANGATA!
Ke ke fiemälie ‘iate Au pea ‘oua na’a ke to e kumi ki hatokoni kehe. He ‘oku ‘ikai mo ha to e taha ka ko Au te U lava ‘o fakafiemälie’i koe.
‘E FOHA ‘O E LAUMÄLIE!
‘Oua na’a kole kiate Au ‘a ia ‘oku ‘ikai te Mau finangalo keke ma’u, pea ke fiemälie ‘i he me’a kuo Mau teu’i ma’a Ho’o lelei, he ko ‘eni ia ‘a ia ‘oku lelei kiate koe, ‘o kapau teke fiemälie ai.
‘E FOHA ‘O E VISONE FAKAOFO!
Kuo U hö kiate koe ‘a e mänava mei Hoku laumälie, koe’uhi keke hoko ai ko Hoku ‘ofa’anga. Ko e hä ‘a e ‘uhinga kuo ke si’aki ai Au ka ke fekumi ki ha to e ‘ofa’anga kehe meiate Au?
‘E FOHA ‘O E LAUMÄLIE!
Ko ‘Eku totonu kiate koe ‘oku lahi, pea he’ikai ngalo. Ko ‘Eku anga’ofa kiate koe ‘oku fu’u hulu pea he’ikai ‘ufikaua. Ko ‘eku ‘ofa kuo ne ngaohi ‘iate koe ‘a hono ‘api, pea he’ikai lava ‘o fufuu’i. Ko ‘Eku maama kuo fakahaa’i kiate koe, pea he’ikai lava ‘o fakapuliki.
‘E FOHA ‘O E TANGATA!
‘I he fu’u ‘akau ‘o e näunau’ia kuo U tuku ai ma’au ‘a e ngaahi fua manakoa taha, ka ko e hä kuo ke situ’a ai mei ai, pea ke fiemälie ‘i he ngaahi fua ‘oku ‘ikai lelei? Foki leva ki he ngaahi me’a ‘oku lelei ange ma’au ‘i he pule’anga ‘o e ma’olunga.
‘E FOHA ‘O E LAUMÄLIE!
Na’a Ku ngaohi koe ‘i he ma’olunga, ka kuo ke fakama’ulalo’i koe.Tu’u hake ki he me’a na’e fakatupu ai koe.
‘E FOHA ‘O E MA’OLUNGA TAUPOTU!
‘Oku Ou ui koe ki he ta’engata, ka ‘oku ke fekumi pe ki he me’a ‘oku ‘auha.Ko e hä ‘a e me’a kuo ne ngaohi koe keke situ’a mei he ‘Emau fiema’u ‘o kumi pe ha’au?
‘E FOHA ‘O E TANGATA!
‘Oua na’a ke fakalaka mei ho ngaahi ngata’anga, pe fokotu’u ‘a e me’a ‘oku Ta’efe’unga mo koe. Ke ke fakatömape’e ‘i he fofonga’o ho ‘Otua, ko e ‘Eiki ‘o e mäfimafi mo e mälohi.
‘E FOHA ‘O E LAUMÄLIE!
‘Oua na’a ke polepole ‘iate koe ki he masiva, he ‘oku Ou tataki ia ‘i hono hala mo fakatokanga’i koe ‘i ho’o angakovi pea teke puputu’u ai ‘o ta’engata.
‘E FOHA ‘O E MO’UI!
‘E lava fëfë ke ngalo ‘iate koe ho’o ngaahi fehalaaki ka ke femo’uekina he tokanga ki he ngaahi fehalaaki ‘a e ni’ihi kehe? Ko ia ‘oku fai pehë ‘oku mala’ia ia ‘iate Au.
‘E FOHA ‘O E TANGATA!
‘Oua na’a ke mänava’aki ‘a e angahala ‘a e ni’ihi kehe he ko e angahala koe. Ka ke maumau’i ‘a e fekau ni, teke mala’ia ai, pea ‘oku Ou fakamo’oni ki ai.
‘E FOHA ‘O E LAUMÄLIE!
Ke ke ‘ilo ‘a e mo’oni: ko ia ‘oku ne tu’utu’uni ki he kakai ke nau faitotonu ka e faihala pë ia, ‘oku ‘ikai ‘a ‘Aku ia, neongo ‘a ‘ene fakamo’oni ki Hoku Huafa.
‘E FOHA ‘O E MO’UI!
‘Oua na’a ke ‘oange ki ha laumälie ‘a ia ‘oku ‘ikai teke loto ke ma’u ma’au, pea ‘oua na’a ke lea’aki ha me’a ‘oku ‘ikai te ke fai. Ko ‘eni ‘Eku fekau kiate koe, ke ke tauhi.
‘E FOHA ‘O E TANGATA!
‘Oua na’a fakafisinga’i ‘a ‘Eku tamaiö’eiki ‘o ka’oku ne kole ha me’a meiate koe, he ko hono fofonga ko Hoku fofonga; ko ia keke fakatokilalo kiate Au.
‘E FOHA ‘O E MO’UI!
Ke ke fakatonutonu koe ‘i he ‘aho taki taha kimu’a he kuo fekau’i koe ki hao fakamaau; pea ko mate ‘e hoko mai kiate koe, ‘o ‘ikai to e fakamolemole, pea ‘e ui koe keke fakamatala ki ho’o ngaahi ngäue.
‘E FOHA ‘O E MA’OLUNGA TAUPOTU!
Kuo u ngaohi ‘a e mate ko e talafekau ‘o e fiefia kiate koe. Ka koe ha ‘oku ke mamahi ai? Kuo U ngaohi ‘a e maama ke huhulu kiate koe ‘a hono näunau. Ko e ha e ‘uhinga kuo ke puipui’i ai koe mei ai?
‘E FOHA ‘O E LAUMÄLIE!
‘Aki ‘a e tala fungani fiefia ‘o e maama ‘oku Ou fakafe’iloaki kiate koe: ke ke fiefia. ‘Oku Ou fekau’i koe ki he loto’ä ‘o e ma’oni’oni; nofo ai koe’uhi keke nofo ‘I he melino ‘o ta’engata.
LAUMÄLIE!
Ko e laumälie ‘o e ma’oni’oni ‘oku ne fakamo’oni’i kiate koe
‘a e ngaahi tala fungani fiefia ‘o e to e fakatahataha; ka koe hä ‘oku ke mamahi ai? Ko e laumälie ‘o e ivi ‘oku ne fakapapau’i koe ‘I He’ene tui; ka ko e hä ‘oku ke puipui’i ai koe mei ai? Ko e maama ‘o Hono fofonga ‘oku ne tataki koe; ‘e lava fëfë ke ke to e hë?
‘E FOHA ‘O E TANGATA!
He’ikai teke mamahi tukukehe ‘o ka ke ka mama’o meiate Kimautolu. He’ikai teke fiefia tukukehe ka ke takaofi mo foki mai kiate Kimautolu.
‘E FOHA ‘O E TANGATA!
Fiefia ‘I he hakailangitau ho loto, koe’uhiä keke taau ke fe’iloaki mo Au pea mo fakatapa atu Hoku hoihoifua.
‘E FOHA ‘O E TANGATA!
Ke ‘oua ‘e hu’i meiate koe ‘a Hoku pulupulu faka’ofo’ofa, pea ‘oua te ke si’aki ho ‘inasi ‘i He’eku fauniteni fakaofo, na’a ke fieinua ‘o ta’engata.
‘E FOHA ‘O E MO’UI!
‘A’eva ‘i He’eku ngaahi tu’utu’uni koe’uhi ko ho’o ‘ofa ‘iate Au pea ke tukuange ‘a ia ‘oku ke fiema’u kapau teke kumi ki He’eku fiefia.
‘E FOHA ‘O E TANGATA!
‘Oua ‘e ta’etokanga’i ‘Eku ngaahi fekau kapau ‘oku ke ‘ofa ‘i Hoku hoihoifua, pea ‘oua ‘e fakangaloki ‘a ‘Eku ngaahi fale’i, ‘o kapau ‘oku ke fie a’usia ‘Eku fiefia.
‘E FOHA ‘O E TANGATA!
Kapau teke siutaka holo ‘I he kafakafa ‘o e ‘atä, mo fononga’ia ‘a e tapa kotoa pe ‘o e hëvani, he’ikai teke ma’u ha nonga kae ‘oua kuo ke talangofua ki He’emau fekau mo fakatökilalo ‘I homau fofonga.
‘E FOHA ‘O E TANGATA!
Hakeaki’i ‘Eku tui koe’uhi ke u vete kiate koe ‘a e ngaahi misiteli ‘o Hoku langilangi mo fakatapa atu ‘a e maama ‘o‘itäniti.
‘E FOHA ‘O E TANGATA!
Fakatökilalo kiate Au, koe’uhi ke U ‘ahia ai koe. Tu’u hake ki he ikuna ‘o ‘Eku tui, ke ke ma’u ‘a e ikuna lolotonga ho’o kei ‘I mämani.
‘E FOHA ‘O E MO’UI!
Lea’aki Au ‘i Hoku mämani; ke U manatu’I koe ‘I Hoku hëvani, pea ‘e fakanonga ia ki Hoku fofonga mo ho mata foki.
‘E FOHA ‘O E TALONI!
Ko ho’o fanongo ko ‘Eku fanongo, ko ia fanongo ‘aki ia. Ko ho’o vakai ko ‘eku vakai, ko ia vakai’i ‘aki ia, pea ‘I ho laumälie ‘i loto ‘e lava ke ke fakamo’oni ki he haohaoa ‘o hoku ma’oni’oni, pea te U fakamo’oni ‘iate Au ki ha tu’unga ma’olunga ma’au.
‘E FOHA ‘O E MO’UI!
Fekumi ki he mate ma’ata ‘I Hoku hala, ‘o fiemälie ‘I he’eku fiefia mo fakamälö’ia ‘a e ngaahi me’a kuo U fekau, koe’uhi ke ke mälölö mo Au ‘I he palepale ‘o e langilangi he ta’u tapanekale ‘o e kolölia.
‘E FOHA ‘O E TANGATA!
Fifili mo fakalaulauloto. Ko ho’o faka’amu nai ke ke mate ‘I ho mohenga, peke lilingi ho toto ‘I he efu pe ko ha mate ma’ata ‘I hoku hala, pea ke hokoai ko e fakahoko’anga ‘o ‘Eku fekau mo e fakaha’anga ‘o ‘Eku maama ‘I he palataisi ma’olunga taha? Ke ke fakamaau’i lelei ‘eni, ‘e tamaiö’eiki.
‘E FOHA ‘O E TANGATA!
‘I Hoku hoihoifua!Ka fakalanu ‘aki ho toto ho lou’ulu ‘oku lahi ange ia ki He’eku vakai ‘I he fakatupu ‘o e ‘univeesi pea mo e maama ‘o e ongo mämani fakatou’osi.Feinga ke ke a’usia ‘eni, ‘e tamaiö’eiki.
TANGATA!
Ko e me’a kotoa pe ‘oku ‘I ai hono faka’ilonga. Ko e faka’ilonga ‘o e ‘ofa ko e to’a ‘I He’eku tu’utu’uni mo kätaki ‘I he’eku ngaahi ‘ahi’ahi.
‘E FOHA ‘O E TANGATA!
Ko e toko taha ‘ofa mo’oni ‘oku ne faka’amua ‘a e faingata’a ‘o tatau pe mo e faka’amu ‘a e toko taha angatu’u ki he fakamolemole, pea mo e toko taha angahala ki he meesi.
‘E FOHA ‘O E TANGATA!
Kapau he’ikai ‘ahia koe ‘e he faingata’a ‘I Hoku hala, ‘e lava fëfë ke ke fononga ‘I he ngaahi ‘alunga ‘o kinautolu ‘oku fiemälie ‘I He’eku fiefia? Kapau he’ikai ‘ohofia koe ‘e he ngaahi ‘ahi’ahi ‘I ho’o faka’amu ke fe’iloaki mo Au ‘e lava fëfë keke a’usia ‘a e maama ‘I ho’o ‘ofa ki Hoku hoihoifua?
‘E FOHA ‘O E TANGATA!
Ko ‘Eku fakatu’utamaki ko ‘Eku ‘ofa tokanga ia, ‘I tu’a ko e afi mo e tautea, ka ‘I loto ko e maama mo e meesi. Fakato’oto’o leva ki ai koe’uhi keke hoko ko ha maama ta’engata mo ha laumälie ta’emate. Ko ‘eni ‘Eku fekau kiate koe, ke ke tauhi.
‘E FOHA ‘O E TANGATA!
Ka ke a’usia ‘a e tu’umälie, ‘oua na’a ke fiefia, pea ka ‘ahia koe ‘e he tölalo, ‘oua na’a ke mamahi, he te na fakatou mole meiate koe.
‘E FOHA ‘O E MO’UI!
Kapau ‘e ‘akilotoa koe ‘e he masiva, ‘oua teke mamahi, he ‘e toki ‘a’ahi atu kiate koe ‘a e ‘Eiki ‘o e koloa’ia. ‘Oua ‘e manavahe ‘I he tölalo, he ko e kolölia ‘e ‘iate koe ‘I ha ‘aho.
‘E FOHA ‘O E MO’UI!
Kapau ‘e fokotu’u ho loto ‘I he pule’anga ‘auhangata’a mo ta’engata, mo e mo’ui ta’engata mo tuputupu’a, si’aki ‘a e pule’anga mole vave mo ‘auha ko’eni.
MO’UI!
‘Oua ‘e fakafemo’uekina’I koe ‘I he maama ko’eni, he ko e afi ‘oku mau sivi ‘aki ‘a e koula pea ko e koula ‘oku mau sivi ‘aki ‘emau kau tamaiö’eiki.
‘E FOHA ‘O E TANGATA!
‘Oku ke faka’amu ki he koula ka ‘oku Ou faka’amu ke ke tau’atäina mei ai. Ko ho’o fakakaukau ‘oku ke koloa’ia ‘I ho’o ma’u ia ka ‘oku Ou ‘afio’I ko ho’o koloa’ia ‘a ho’o mavahe mei ai. ‘I he ‘eku mo’ui! Ko ‘eni ‘a ‘Eku ‘ilo. Pea ko ‘ena ‘a ho’o manako; ‘e lava fëfë ke taha ‘Eku founga mo ha’au na?
‘E FOHA ‘O E TANGATA!
Foaki atu ‘eku koloa ki he’eku masiva; ‘I hëvani teke taufetuku mei he ngaahi koloa ‘o e langilangi ta’engata mo e ngaahi tuku’anga koloa ‘o e kolölia ta’e’auha. Ka ‘I he ‘eku mo’ui! Ko e foaki ho laumälie ‘oku mohu kolölia ange ia, ‘o kapau teke lava ‘o mamata ‘aki Hoku fofonga.
‘E FOHA ‘O E TANGATA!
Ko e temipale ‘o e mo’ui ko Hoku taloni; fakama’a ia mei he ngaahi me’a kotoa pë, koe’uhi ke fokotu’u ai Au mo U ‘afio ma’u ai.
‘E FOHA ‘O E MO’UI!
Ko ho loto ko Hoku ‘api; fakatapui ia ke u ‘afio ai. Ko ho laumälie ko Hoku fakaha’anga; fakama’a ia ke U fakahä ai.
‘E FOHA ‘O E TANGATA!
Ala mai ho nima ki Hoku fatafata, ke U lava ai ‘o mavahe hake, ‘o ha ngingila mo maama ‘iate koe.
‘E FOHA ‘O E TANGATA!
‘Alu hake ki Hoku hëvani, ke kema’u ‘a e fiefia ‘o e to e fakataha, pea mei he ipu ‘o e kololia ta’e’auha ke ke inu ‘a e uaine laulotaha.
TANGATA!
Kuo lahi ho ngaahi ‘aho kuo ‘alu atu mo ho’o fakafemo’uekina’i koe ‘aki ho’o ngaahi fakakaukau noa mo muna.Ko e hä ‘a e fuoloa ho’o mohe ‘i ho mohenga? Tu’u hake mei he mohe he kuo tu’utonu ‘a e la’ä, pea tauange ke ne hulungia koe ‘aki ‘a e maama ‘o e hoihoifua.
‘E FOHA ‘O E TANGATA!
Kuo hulungia koe ‘e he maama mei he tafa’akilangi ‘o e Mo’unga toputapu pea ko e laumälie ‘o e fakamaama kuo mänava ‘i he Sainai ‘o ho loto. Ko ia ai, fakatau’atäina’i koe mei he ngaahi veili ‘o e muna mo ke hü ki Hoku loto’ä, koe’uhiä keke tuha mo e mo’ui ta’engata taau ke fe’iloaki mo Au. He ‘ikai ‘ahia ai koe ‘e mate, pe ko fakatu’utämaki pe faingata’a.
‘E FOHA ‘O E TANGATA!
Ko hoku ‘itäniti ‘a ‘Eku fakatupu, kou U fakatupu ia ma’au. Ngaohi ia ko e teunga ho temipale. Ko ‘Eku uouongataha ‘a e ngäue ‘a Hoku nima, kuo U ngaohi ia ma’au; fakateunga’aki koe ia, ke ke hoko atu ki he ‘itäniti kotoa, ko e fakahä’anga ‘o ‘eku mo’ui ta’engata.
‘E FOHA ‘O E TANGATA!
Ko Hoku ngeia ko ‘Eku me’a’ofa kiate koe, pea ko Hoku näunau ko e faka’ilonga ‘o ‘Eku meesi kiate koe. Ko e me’a ‘oku fe’unga mo Au he’ikai mahino pe lava ke to e lau ‘e ha taha. Ko e mo’oni, kuo U tauhi ia ‘i Hoku ngaahi tuku’anga koloa fakapulipuli pea mo e ngaahi tauhi’anga koloa ‘o ‘Eku tu’utu’uni, ko e faka’ilonga ‘o ‘Eku ‘ofa angalelei ki He’eku kau tamaiö’eiki mo ‘Eku meesi ki Hoku kakai.
‘E FANAU ‘O E ‘ELITO FAKALANGI MO TA’EHAMAI!
‘E fakafe’atungia’i kimoutolu ‘i ho’omou ‘ofa ‘iate Au pea ‘e hoha’a ‘a e ngaahi laumälie ‘i he’enau lea ‘aki Au. He’ikai makupusi Au ‘e he ngaahi ‘atamai pe kapui Au ‘e he ngaahi loto.
‘E FOHA ‘O E HOIHOIFUA!
‘Aki Hoku laumälie pea ‘aki Hoku finangalo lelei: ‘Aki ‘Eku meesi pea ‘aki Hoku hoihoifua; ko e ngahi me’a kotoa kuo U fakahaa’i kiate koe ‘aki ‘a e ‘elelo ‘o e ivi, mo tohi ma’au ‘aki ‘a e peni ‘o e mälohi, ‘oku fakatatau pë ia ki ho’o ‘ilo mo ho’o mahino, ‘o ‘ikai ki Hoku tu’unga mo e ongomälie ‘o Hoku le’o.
‘E FANAU ‘A E TANGATA!
‘Oku mou ‘ilo’i ‘a e ‘uhinga na’a Mau fakatupu ai kimoutolu kotoa mei he efu tatau? Koe’uhi ke ‘oua ‘e hiki hake ‘e ha taha ia ke ma’olunga’i ha tokotaha kehe. Fifili ‘i homou loto he taimi kotoa pë ki he anga homou fakatupu. Koe’uhi na’a Mau fakatupu kimoutolu mei he me’a tatau kou pau ai ke mou hangë ha laumälie pë ‘e taha, ke fononga’aki ‘a e va’e tatau, kai ‘i he ngutu tatau pea nofo ‘i he fonua tatau, koe’uhiä ke hä mei ho’omou mo’ui ‘i loto ‘aki ho’o mou ngaahi ngäue mo ho’o mou ngaahi to’onga, ‘a e ngaahi faka’ilonga ‘o e taha mo e ‘elito ‘o e fakatalatala. ‘Oku pehë ‘a ‘Eku fale’i kiate kimoutolu, ‘e täkanga ‘o e maama! Tokanga ki he fale’i ko ‘eni koe’uhiä ke mou ma’u ‘a e fua ‘o e mä’oni’oni mei he fu’u ‘akau ‘o e kolölia fakaofo.
‘E NGAAHI FOHA ‘O E LAUMÄLIE!
Ko kimoutolu ‘a ‘Eku tuku’angakoloa, he kuo U’osi tuku ‘iate kimoutolu ‘a e ngaahi mata’itofe ‘o ‘Eku ngaahi misiteli pea mo e ngaahi makakoloa ‘o ‘Eku ‘ilo. Malu’i kinautolu mei he kau sola ‘i he lotolotonga ‘o ‘Eku kau tamaiö’eiki pea mo e kau faka’ikai ‘Otua ‘i he ha’oha’onga ‘o Hoku kakai.
‘E FOHA ‘O E TOKOTAHA ‘OKU TU’U ‘I HONO MO’ONI ‘O’ONA ‘I HE PULE’ANGA ‘O HONO KITA!
Ke ke ‘ilo, kuo U fakamafola atu kiate koe ‘a e ngaahi ngangatu kotoa ‘o e mä’oni’oni, fakahaa’i kakato kiate koe ‘Eku folofola, fakahaohaoa’i ‘aki ‘Eku foaki ‘ofa ‘iate koe mo fiema’u ke ‘a’au ‘a e ngaahi me’a ko ia kuo U fiema’u Ma’aku.
Ke ke fiemälie ‘i He’eku fiefia mo fakafeta’i kiate Au.
‘E FOHA ‘O E TANGATA!
Hiki ‘a ia kotoa pë kuo Mau fakahaa’i atu kiate koe ‘aki e vaitohi ‘o e maama ‘i he tohi o ho laumälie. Ka ‘oku ‘ikai ke ‘i ho ivi ‘eni pea ngaohi ho’o vaitohi mei he ‘elito ‘o ho loto. Kapau he’ikai teke lava ‘o fai ‘eni, pea ke tohi ‘aki ‘a e vaitohi kula’aho’aho kuo lilingi ‘i Hoku hala. Ko e mo’oni ‘oku mëlieange ‘eni kiate Au ‘i ha to e me’a, koe’uhiä ke tu’uloa ‘a Hoku maama ‘o ta’engata.
‘A KIMOUTOLU ‘A E KAKAI ‘OKU ‘I AI HOMOU ‘ATAMAI KE ‘ILO PEA MO E TELINGA KE
FANONGO!
Ko e ‘uluaki fekau ‘a e Tokotaha‘ofeina ‘a ‘eni: ‘E naitingikeili fakaofo! ‘Oua na’a ke nofo ‘i ha feitu’u kehe tukukehe ‘a e ngoue lose ‘o e laumälie. ‘E, ‘a e Talafekau ‘o e Solomone ‘o e ‘Ofa! ‘Oua na’a ke to e fekumi ki he hüfanga’anga, tukukehe pë ‘a e Sipa ‘o e ‘ofa’anga mo’oni. ‘E ‘a e fonike ta’efa’a’auha! ‘Oua teke lata ha feitu’u tukukehe pë ‘i he mo’unga ‘o e angatonu.Ko ia ia ‘a ho nofo’anga, kapau te ke puna ‘aki ‘a e ongo kapakau o ho laumälie ki he ‘ata ta’efakangatangata mo fekumi ke a’usia ho’o taumu’a.
‘E FOHA ‘O E LAUMÄLIE!
‘Oku fekumi ‘a e manupuna ki hono pununga; pea mo e naitingikeili ki he faka’ofo’ofa ‘o e lose; lolotonga ia ko e fanga manupuna ‘o e loto ‘o e tangata, kou nau hë mama’o mei honau pununga ta’engata, ‘o fiemälie ke nofo ‘i he efu, pea tafoki honau mata ki he ‘uli ‘o e ta’etoka’i pea ‘ikai ke nau a’usia ai ‘a e naunau ‘o e ‘afio’anga fakahëvani. ‘Oiauë! Me’a ngalikehe mo fakamamahi ‘a ‘enau li’aki ‘a e ngaahi peau ‘o e Ma’olunga Taupotu, ka nau tafoki ki he kihi’i ipu, ‘o nau mama’o ai mei he tafa’akilangi maamangia.
‘E KAUME’A!
‘Oua na’a tö ha ‘akau kehe ‘i he ngoue ‘o ho loto, ka ko e lose pe ‘o e ‘ofa, pea ‘oua na’a ke mavahe mei he naitingikeili ‘o e fie’aonga mo e anga’ofa. Fakamahu’inga’i ‘a e takanga mo e faitotonu pea li’aki ‘a e feohi mo e ta’e tui ‘Otua.
‘E FOHA ‘O E FAKAMAAU TOTONU!
‘E to e ‘alu ki fë ‘a e ‘Ofa’anga ka ki hefonua pë ‘o e toko taha ‘ofeina? Pea ko hai ha toko taha fekumi te ne ma’u ha nonga he’ene mama’o mei he faka’amu ‘o hono loto? Ki he ‘ofa’anga mo’oni, ‘oku hoko ‘a e fakataha ko e mo’ui, pea ko e mävae ko e mate. ‘Oku ‘ikai ha fiemälie ‘i hono loto, pea ‘ikai ha nonga te ne ma’u. Te ne si’aki ‘a e mo’ui fiemälie ‘i he’ene fekumi ke a’u ki hono ‘ofa’anga.
‘E FOHA ‘O E EFU!
Ko e mo’oni eni ‘oku ou lea ‘aki kiate koe: Ko e tangata ta’etokanga taha ‘a ia ‘oku fakafekiki noa pea feinga ke laka hake ‘i hono tokoua. Pehë, ‘e ngaahi tokoua!Ngaohi ‘a ho’omou ngaahi ngäue, ka e ‘ikai ko ho’omou lea, ko homou teunga.
‘E FOHA ‘O E MÄMANI!
Ke ke ‘ilo fakapapau, ko e loto ‘oku ‘i ai ‘a e meheka, he’ikai ‘aupito te ne a’usia Hoku pule’anga ta’efa’a’auha, pe te ne nämu’i ‘a e ngaahi taufa kakala ‘o e mä’oni’oni kuo mänava ‘aki mei Hoku pule’anga fakatu’i ‘o e haohaoa.
‘E FOHA ‘O E ‘OFA!
‘Oku to e pë ha’o laka ‘e taha pea ke a’u ki he ngaahi ma’olnga teunga’ia ‘i ‘olunga pea mo e fu’u ‘akau fakalangi ‘o e ‘ofa. ‘Ai ha’o fo’i laka ‘e taha pea ‘i hono hoko te ke a’u ai ki he tofi’a ta’efa’a’auha mo hü ki he loto’ä ‘o ‘itäniti. Ke ke fanongo ki he me’a kuo fakahä ‘e he peni ‘o e kolölia.
‘E FOHA ‘O E NAUNAU!
Ke ke fakavave atu ‘i he hala ‘o e mä’oni’oni pea hü ki he hëvani ‘o e fakataha mo Au.Fakama’a ho loto ‘aki ‘a e ivi fakahaohaoa ‘o e laumälie, pea fakavave ‘o hü atu ki he loto’ä ‘o e Ma’olunga Taupotu.
‘E ‘ATA MA’ALIFEKINA!
Keke fakalaka atu ‘i he ngaahi hala ‘o e tätäla’a pea kaka atu ki he ngaahi ma’olunga ‘o e fakapapau’i. Faka’ä ‘a e mata ‘o e totonu, ka e malava keke mamata ki he Hoihoifua ‘oku ta’e’ufikaua pea ke ofo ai ‘o pehë: ke tapuhä ai pe ‘a e ‘Otua, ko e taupotu taha ‘o e kau Fakatupu.
‘E FOHA ‘O E FAKA’ÄNAU!
Ke ke fanongo mai: he’ikai ‘aupito lava ‘e he mata matelie ‘o mätä’ia ‘a e hoihoifua ta’engata, pe ko e laumälie mate ‘o mo’ui ‘i ha me’a tukukehe ‘a e matala’i’akau kuo mae. He ‘oku taki taha fekumi ki hono manako, pea fiefia ‘i he feohi mo hono fa’ahinga.
‘E FOHA ‘O E EFU!
Tapuni’i ho mata ka e lava keke ‘iloa ai Hoku hoihoifua, ta’ofi ho’o fanongo ka e lava keke ongona ‘a e ongomälie ‘o Hoku le’o; fakama’a koe mei he ‘ilo kotoa pë, ka e lava keke ma’u ‘a Hoku poto; faka’ata’atä koe mei he ngaahi koloa kotoa pë, ka e lava ke ke taufetuku mei he ‘oseni ‘o ‘Eku koloa ta’e’osi. Fakatafoki mama’o ho mata, mei he me’a kotoa pë tukukehe Hoku hoihoifua; ‘oua te ke to e fanongo ki ha me’a kehe tukukehe ‘a e ‘ilo’i ‘o ‘Oku; koe’uhiä ‘i he mata haohaoa, loto ‘oku ma’a, mo e telinga ‘oku ongo, te ke lava ai ‘o hü ki he loto’ä ‘o ‘Eku mä’oni’oni.
‘E TANGATA ‘O E ONGO VISONE!
Tapuni ho mata ‘e taha ka e faka’ä ‘a e taha. Tapuni ‘a e taha ki mämani mo ia kotoa pë ‘oku ‘i ai, ka e faka’ä ‘a e taha keke mamata ‘aki ia ki he hoihoifua ‘o e Tokotaha ‘ofeina.
‘A ‘EKU FÄNAU!
‘Oku ou manavasi’i telia ‘i ho’o ta’e fanongoa ‘a e ongomälie ‘o e hiva ‘a e lupe ‘o hëvani te ke to e tö hifo ai ki he ngaahi fakapo’uli ‘o e ‘auha, pea ‘i he ‘ikai keke mamata ki he faka’ofo’ofa ‘o e lose, te ke to e foki ai pë ki he vai mo e pelepela.
‘E NGAAHI KAUME’A!
‘Oua ‘e situ’a ki he hoihoifua ta’engata ka e hanga ki he faka’ofo’ofa ‘e mole, pea ‘oua ‘e fakatoka ho’o ngaahi manako ‘i he mämani matelie ‘o e efu.
‘E FOHA ‘O E LAUMÄLIE!
‘E hokosia ‘a e taimi, he’ikai to e tatala ‘e he naitingikeili ‘o e mä’oni’oni ‘a e ngaahi misiteli pea ‘e fakamasiva’i koe ‘i he ngaahi ongomälie fakalangi pea mo e le’o mei ‘olunga.
‘E KAKANO ‘O E TA’ETOKANGA!
‘Oku ta’efa’alaua ‘a e ngaahi ‘elelo ‘oku nau lea’aki ‘a e lea pe’e taha, pea ‘oku ta’efa’alaua ‘a e ngaahi misiteli kuo fakahä ‘i ha le’o ongomälie pe ‘e taha; ka e ‘oiauë! ‘Oku ‘ikai ha telinga ke fanongo, pea ‘ikai ha loto te ne makupusi.
‘E NGAAHI TÄKANGA!
Kuo matangaki ‘a e ngaahi matapä ‘o e Loto’ä tapu pea kuo teu’i ‘aki ‘a e ‘ofa’anga ‘o e toko taha ‘ofeina ‘a e toto ‘o e ngaahi ‘ofa’anga, ka neongo ia, ko ha ki’i tokosi’i pë kuo nau ‘ilo ‘a e kolo fakahëvani ko eni pea na’a mo e ki’i tokosi’i ni, ko honau ni’ihi pë kuo nau ma’u ‘a e lotoma’a mo e laumälie haohaoa.
‘A E KAU FAKAFE’AO ‘I HE PALATAISI MA’OLUNGA TAHA!
Talaki ki he fänau ‘o e fakapapau kuo tupu ha ngoue fo’ou ‘i he loto’ä ‘o e mä’oni’oni, ‘io ‘i he palataisi fakahëvani, pea ‘oku ne takatakai ‘a e matatau ‘o e pule’anga ‘i ‘olunga mo e kau fakafe’ao ta’efa’a’auha ‘o e palataisi ma’olunga. Kikitaki atu, kae’oua kuo mou a’usia ‘a e tofi’a ko ia, pea ke mou tatala ‘a e ngaahi misiteli ‘o e ‘ofa mei he ngaahi matala’i’akau ‘oku ‘avea hono ‘alaha ‘e he matangi, pea ke mou ma’u ai ‘a e fakapulipuli ‘o e poto fakalangi mo ta’engata mei hono ngaahi fua faka’itäniti. Ko e fakanonga eni ki he mata ‘o kinautolu kuo nau hü ‘o nofo ‘i ai.
‘E HOKU NGAAHI KAUME’A!
Kuo ngalo koä ‘iate kimoutolu ‘a e pongipongi tupu’a mo masani ko ia, ‘i he lotolotonga ‘o e ngaahi ‘ätakai tapuekina ne mou ha’oha’o kiate Au ‘i he malumalu ‘o e fu’u ‘akau’o e mo’ui, ‘a ia ‘oku tu’u ‘i he palataisi naunau’ia taha? Ne ‘ikai lava ke mou to e lea, ka mou fakafanongo pë ki he ‘Eku ngaahi folofola mä’oni’oni ko eni: ‘E ngaahi kaume’a! ‘Oua na’a mou fili ki ho’omou faka’amu ka e tuku Ha’aku, pea ‘oua ‘aupito na’a mou faka’amua ‘a ia ‘oku ‘ikai te U fie foaki ma’a kimoutolu pea ‘oua te mou omi kiate Au mo e ngaahi loto kuo mate, ‘i hono haveki ‘e he ngaahi holi mo e ngaahi faka’amu fakaemämani. Kapau te mou fakama’a homou laumälie ‘e lava ke mou manatua ‘i he houa ni ‘a e feitu’u pea mo e ngaahi ha’oha’onga ko ia, pea mo e mo’oni ‘o ‘Eku folofola ne fakahä kakato ia kiate kimoutolu hono kotoa.
‘I he laine hono valu ‘o e ngaahi laine ma’oni’oni taha, ‘i he nima ‘o e Taipaleti ‘o Palataisi, ‘oku Ne pehe:
‘A KIMOUTOLU ‘OKU TÄKOTO HANGË HA KAU MATE ‘I HE MOHE’ANGA ‘O E TA’ETOKA’I!
Kuo ‘osi atu ha ngaahi kuonga pea kuo vave ngata ‘a ho’omou ngaahi mo’ui mahu’inga, mo e ‘ikai pe ha a’u mai ki Homau loto’ä mä’oni’oni ha kihi’i mänava ‘oku haohaoa ‘e taha meiate kimotolu. Neongo ho’omou fakangalo hifo ‘i he ‘oseni ‘o e ta’etui, ka ‘oku nou ngaue’aki homou loungutu ke fakamatala’i ‘a e Tui pe taha ‘a e ‘Otua. Ko ia ‘oku ou fakalili’a ki ai ‘oku mou ‘ofa ai pea kuo mou ngaohi Hoku fili ko homou kaume’a. Lolotonga ia ‘oku mou ‘a’eva holo ‘i he funga ‘o e mämani ‘i he vekeveke mo e fiemälie, ‘o ‘ikai ‘aupito te mou tokanga’i kuo pähia Hoku mämani ‘iate kimoutolu pea ko e me’a kotoa pë ‘i ai ‘oku nau fakalili’a ‘iate kimoutolu. Kapau na’e ‘ä homou mata, ko e mo’oni te mou fiema’u ange ke ta’efa’alaua ho’omou mamahi ‘i ho’omou fiefia, pea lau ‘a e mate ‘oku lelei ange ‘i he mo’ui.
‘E SINO NGAOHI MEI HE EFU!
‘Oku Ou fie fakataha mo koe ka ‘oku ‘ikai teke falala mai kiate Au. Kuo hanga ‘e he heletä ‘o ho’o angatu’u ‘o tu’usi ‘a e fu’u ‘akau ‘o ho ‘amanaki’anga. ‘I he taimi kotoa pë ‘oku Ou ofi ‘iate koe ‘oku ke fakamama’o atu meiate Au. Kuo U fili ‘a e naunau ta’efa’a’auha ma’au, ka kuo ke fili koe ki he fakamä ta’e fakangatangata. Tafoki mai lolotonga ‘oku kei taimi, telia na’a mole ho faingamälie.
‘E FOHA ‘O E FAKA’ANAU!
Kuo lauita’u mo e fiu feinga ‘a e kau ako mo e kau poto ke a’usia ‘a e ‘afio’anga ‘o e Mohu Kolölia mo e ‘ikai pe, kuo ‘osi ‘enau mo’ui ‘i he fekumi kiate ia mo e ‘ikai pe malava ke nau sio ki Hono fofonga, ka ko koe na’e ‘ikai ha’o momo’i feinga kuo ke a’usia ho’o taumu’a, pea ma’u ngofua ‘a ho’o faka’amu. Ka neongo ia, na’a ke mo’unofoa ‘i he tu’apuipui ‘o ho kita, pea ‘ikai malava ‘e ho mata ke sio ki he hoihoifua ‘o e Toko taha ‘Ofeina, pe ala ki he kapa ‘o Hono kofu. Ko ia ‘oku mata, ke mamata mo fifili.
‘A E KAU FAKAFE’AO ‘I HE KOLO ‘O E ‘OFA!
Kuo tamate’i ‘a e te’elango ta’engata ‘e he ngaahi matangi matelie, pea kuo fakapulou’i ‘e he fakapo’uli ‘o e efu ‘a e tangata Talavou fakalangi. Ko e taki ‘i he ha’a Tu’i ‘o e ‘ofa kuo fakahala’i ‘e he kakai anga fita’a pea kuo puke pöpula ‘a e lupe ‘o e ma’oni’oni ‘i he pesipesi ‘o e fangalulu. ‘Oku tangi lau’aitu ‘a e kau ‘alofi ‘o e loto’ä naunau’ia mo e matatau fakalangi, lolotonga ia ‘oku mou täkoto pe kimoutolu he mohe’anga ‘o e ta’etokanga, pea lau pë kimoutolu ko e ngaahi kaume’a mo’oni. Ko ho’omou ngaahi fakakaukau ko e koto launoa!
‘A KIMOUTOLU KO E KAU VALE, LOLOTONGA IA ‘OKU TOTONU KE MOU POTO!
Ko e hä kuo mou fakapuli ai ko e kau tauhisipi, lolotonga ia ‘i loto kuo mou hoko ko e fanga ulofi, ke faka’auha ‘a ‘Eku täkanga? Ko kimoutolu ko e ngaahi fetu’u ‘oku hopo hake ‘i he mafoa’aeata, pea neongo ‘oku hä ngingila mo maama, ka kuo mou takihala’i ‘a Hoku kakai mei Hoku kolo ki he ngaahi hala ‘o e ‘auha.
‘A KIMOUTOLU ‘OKU HÄ NGALI LELEI LOLOTONGA IA ‘I LOTO KO E KOTO PALAKÜ!
‘Oku mou hangë ha vai kona ka e tasilo, ‘oku hä ‘asinisini kitu’a, ka ‘i hono ‘ahi’ahi’i ‘e he Toko taha fakahëvani, ‘oku ‘ikai taau ha tulutä ‘e taha ai. ‘Io, ‘oku huhulu ‘a e huelo ‘o e la’ä ‘i he efu pea pehë ki he sio’ata, neongo ia ‘oku na kehekehe ‘i he’ena fakatapa atu hona maama hangë ko e kehe ‘a e fetu’u mei mämani, ‘ikai, ‘oku ta’efakatataua ‘a hona kehekehe!
‘E HOKU KAUME’A ‘I HE FOLOFOLA!
Ke ke fifili: Kuo ke fanongo koä ‘e lava ke nonofo fakataha ‘a e kaume’a mo e fili ‘i ha loto pë ‘e taha? Tuli leva kitu’a ‘a e sola, ka e hü atu ‘a e kaume’a ki Hono ‘apitonu.
‘E FOHA ‘O E EFU!
Kuo U fakatäpui ‘a e me’a kotoa pë ‘i hëvani mo mämani ma’au, tukukehe pë ‘a e loto ‘o e tangata ‘a ia kuo U ngaohi ko e nofo’anga ‘o Hoku hoihoifua mo naunau, ka kuo ke foaki Hoku ‘api mo Hoku nofo’anga ki ha taha kehe; pea ‘i he taimi kotoa pë kuo fekumi ai ‘a e fakahä’anga ‘o Hoku mä’oni’oni ki Hono nofo’anga, kuo Ne ‘ilo ha sola ai, pea ‘i he ‘ikai hano nofo’anga, ‘oku ne fononga ‘i he kolomalu ‘o e Tokotaha ‘ofeina. Ka neongo ia kuo U fufü ho’o fakapulipuli pea ‘ikai ke U fakamaa’i koe.
‘E KAKANO ‘O E FAKA’AMU!
Kuo tu’o lahi ‘a e ngaahi hengihengi ‘a ‘Eku tafoki mei he ngaahi loto’ä ‘o e Tofi’a fkahëvani ‘o hanga kiate koe, ‘ou ‘ilo koe ‘i he mohe’anga ‘oe fiemälie ‘oku ke femo’uekina ai ‘i ha taha kehe meiate Au. Ko ia ai, hangë ko e ma’alifekina ‘a e laumälie, na’a Ku foki fakavave ki he ngaahi loto’ä ‘o e naunau fakalangi pea ‘ikai te U fakahä ho’o to’onga ki he ngaahi hositë ‘o e mä’oni’oni.
‘E FOHA ‘O E TAPUAKI!
Mei he fuofuonoa ‘o e hala’atä, pea mei he ‘umea ‘o ‘Eku tu’utu’uni na’a Ku ngaohi koe, pea U fakatapui ‘a e ngaahi ‘atomi kotoa pë ‘o e fakatupu mo e ‘esenisi ‘o e me’a mo’ui kotoa pë ke ako’i ‘aki koe. Ko ia ‘i ho’o ha’u mei he manava ‘o ho’o fa’ë kuo U tokonaki ha ongo fauniteni hu’ahuhu ‘asinisini ma’au, ha ongo fofonga ke le’ohi koe, mo ha ngaahi loto ke‘ofa’i koe. Tu’unga ‘i he ‘Eku ‘ofa angalelei, ‘i he malumalu ‘o ‘Eku meesi, ne U namoa koe, mo tokanga’i koe ‘aki ‘a e mo’oni ‘o ‘Eku kelesi mo ‘Eku manako. Pea ko ‘Eku taumu’a keke a’usia ‘a Hoku pule’anga ta’engata pea ke taau mo ‘Eku ngaahi foaki ta’ehämai. Ka neongo ia, na’a ke kei ta’etoka’i kotoa ia, pea ‘i ho’o fu’u tangata, kuo ke li’aki kotoa ‘a ‘Eku ngahi me’a’ofa ka ke fakafemo’uekina’i koe ‘aki ho’o ngaahi holi ta’e’aonga, pea ngalo ai ‘a e ngaahi lelei ni kotoa pë ‘iate koe,‘o ke tafoki mama’o ai mei he ngaahi tapuaki ‘a ho Kaume’a ‘o nofo ‘i he ngaahi loto’ä ‘o Hoku fili.
‘E POPULA HA’ISIA ‘O MÄMANI!
Kuo tu’o fiha nai ‘a e hengihengi kuo havilivili atu ai ‘a e matangi angi iiki ‘o ‘Eku ‘ofa tokanga kiate koe ka kuo ke mo’umohea pë ‘i he mohe’anga ‘o e ta’etoka’i, ‘I he mamahi fu’u koe’uhi ko ho’o ta’etokanga, ne to e foki mai ai pë ia ki hono toka’anga.
‘E FOHA ‘O MÄMANI!
Ka ‘oku ke fiema’u Au, ‘oua ‘e to e fekumi ki ha taha kehe tukukehe Au; pea ka ‘oku ke fie mamata ki Hoku hoihoifua, tapuni’i ho mata mei mämani pea mo ia kotoa pë ‘oku ‘i ai; he ko Hoku finangalo pea mo e loto ‘o e toko taha kehe, hangë ko e afi mo e vai, he’ikai lava ke na nofo fakataha ‘i ha loto pë ‘e taha.
‘E SOLA KUO FAKATAUKEI’I!
Kuo fakaola ‘a e maama ‘o ho loto ‘aki ‘a e nima ‘o Hoku mafai, ‘oua na’a tamate’i ia ‘e he ngaahi matangi fakafepaki ‘o e kita mo e holi. Ko e faito’o ‘o ho ngaahi mahaki ko hono manatu’i Au, ‘oua na’a ngalo ia. Ngaohi ‘a ‘Eku ‘ofa ko ho’o koloa pea ke tauhi malu ia ‘o hangë ko ho’o tauhi ho’o vakai mo ho’o mo’ui.
‘E HOKU TOKOUA!
Fakaongo ki he ngaahi lea fakafiefia kuo ‘oatu ‘e Hoku ‘elelo melie, pea ke inu mei he matavai melie ‘o e mä’oni’oni taupotu kuo tafe atu mei Hoku loungutu. Tö ‘a e ngaahi tenga ‘o ‘Eku poto fakalangi ‘i he kelekele lelei ‘o ho loto, pea fu’ifu’i ‘aki ia ‘a e vai ‘o e fakapapau, koe’uhi ka e tupu hake ‘a e haiasini ‘o ‘Eku ‘ilo mo e poto ‘o ma’ui’ui mo lanumata ‘i he kolo tapu ‘o ho loto.
‘E KAU ‘ALOFI ‘O HOKU PALATAISI!
Kuo U tö ‘i he ngoue tapu ‘o Palataisi ‘a e fu’u ‘akau ‘o ho’o ‘ofa mo e fakakaume’a ‘aki ‘a e ongo nima ‘o e ‘ofa angalelei, pea U afuhi ‘aki ia ‘a e ngaahi tauafu ‘o ‘Eku kelesi haohaoa, pea kuo hokosia ‘a e taimi ke fua ai, ka ke kïkïtaki hono tokanga’i, telia na’a faka’auha ia ‘e he afi ‘o e havala mo e holi.
‘E HOKU NGAAHI KAUME’A!
Tamate’i ‘a e maama ‘o e faihala, pea fakaola ‘i homou loto ‘a e tühulu ta’efa’a’auha ‘o e takiekina fakalangi. He ‘ikai fuoloa mei heni kuo ui ‘e he kau failelei ‘o e fa’ahinga ‘o e tangata, ‘i he lotolotonga ‘o e Toko taha Hakeaki’i, ‘a kinautolu ‘oku angama’a haohaoa mo fai ‘a e ngaahi ngäue ma’oni’oni.
‘E FOHA ‘O E EFU!
Ko e poto ‘a ia ‘oku ‘ikai lea kae ‘oua kuo fanongo, ‘o hangë ko e toko taha ‘oku ne to’o ‘a e ipu, ‘o ‘ikai te ne foaki atu ia kae ‘oua kuo fiema’u, pea mo e ‘ofa’anga he ‘ikai te ne kaila ‘aki ‘a e kotoa ‘o hono loto kae ‘oua kuo ne siofia ‘a e hoihoifua ‘o hono ‘ofa’anga. Ko ia, to ‘a e ngaahi pulopula ‘o e poto mo e ‘ilo ‘i he kelekele lelei ‘o ho loto pea tauhi kinautolu kae’oua kuo tupulaki hake mei ai ‘a e haiasini ‘o e poto fakalangi ka e ‘ikai mei he ‘uli mo e ‘umea.
‘Oku lekooti mo hiki ‘i he ‘uluaki laine ‘o e Tohi, pea ‘i loto ‘i he hufanga’anga ‘o e tapanekale ‘o e ‘Otua ‘oku füfü ai:
‘A ‘EKU SEVÄNITI!
‘Oua na’a li’aki ‘a e tofi’a ta’efa’a’auha ka ke hanga ki ai ‘oku ‘auha, pea ‘oua na’a tukuange ‘a e pule’anga fakalangi koe’uhi ko ho’o holi fakaemämani. Ko eni ia ‘a e vaitafe ‘o e mo’ui ta’engata kuo tafe atu mei he matavai mapunopuna ‘o e peni ‘o e mohu meesi, Monü’ia ka ko ia ‘oku inu mei ai.
‘E FOHA ‘O E LAUMÄLIE!
Tukuange ‘a e ‘ä ‘oku tuku pöpula ai koe, he ‘oku ma’ulalo ia, ka e hangë ko e fonike ‘o e ‘ofa keke puna hake ki he femamenite ‘o e mä’oni’oni. Si’aki koe, pea fakafonu ho laumälie ‘aki ‘a e meesi, pea ke nofo ‘i he tofi’a haohaoa faka-‘Otua.
‘E FÄNAU ‘A E EFU!
‘Oua na’a ke fiemälie ‘i he ‘aho taki taha, pea ‘oua na’a fakamasiva’i koe ‘i he fiemälie ta’engata. ‘Oua na’a ke fetongi ‘a e ngoue ‘o e fiefia ta’engata ‘aki ‘a e fokotu’unga efu ‘o e mämani matelie. Tu’u hake mei ho pilisone ‘o kaka atu ki he ngaahi nofo’anga ‘i ‘olunga pea faikapakau ‘o puna hake mei he ‘ä kuo tukupöpula ai koe ‘e he matelie ki he palataisi ta’efakangatangata.
‘A ‘EKU SEVÄNITI!
Fakatau’atäina’i koe mei he ngaahi ha’i ‘o e mämani pea veteange koe mei he pilïsone ‘o e kita. Fakato’oto’o leva ki ai, koe’uhi he’ikai to e hoko mai ia ‘amui.
‘E FOHA ‘O ‘EKU KAUNANGA!
Kapau na’a ke vakai ki he pule’anga ta’e fa’a’auha, te ke tukuingata ke mavahe leva mei he mämani ‘auha ni. Ka ko hono fufü ‘a e mämani ko eni pea fakahä ‘a e maama kaha’u ko e misiteli ia he’ikai malava ‘e taha ke ne makupusi, tukukehe pë ‘a kinautolu ‘oku lotoma’a.
‘A ‘EKU SEVÄNITI!
Fakatalatala ho loto mei he lotokovi pea fakahaohaoa ia mei he meheka, pea hü atu ki he loto’ä fakalangi ‘o e mä’oni’oni.
‘A HOKU NGAAHI KAUME’A!
‘A’eva ‘i he ngaahi hala ‘o e finangalo lelei ‘o e Kaume’a, pea ke ‘ilo ko Hono loto ia ke fiefia ‘a ‘Ene kau seväniti. Ke pehë: ‘Oua na’a ke hü ki he fale ‘o ho kaume’a kae’oua kuo ne loto ki ai, pea ‘oua na’a ke ala ki ha’ane koloa pe fai ho loto pë ‘o’ou pe ‘i ha tu’unga ke ke käkaa’i ai ia. Fakakaukau ki ai ‘a kimoutolu ‘oku mohu fakakaukau.
‘A E TAKANGA ‘O HOKU TALONI!
‘Oua na’a ke fanongo ki ha kovi, mo sio ki ha kovi, ‘oua na’a fakama’ulalo’i koe, pea ‘oua te ke mapuhoi pe tangi. ‘Oua na’a ke lea ‘aki ha kovi koe’uhi ke ‘oua ‘e lea’aki ha kovi kiate koe, ‘oua ‘e faka’atalahi ‘a e ngahi vaivai ‘a e ni’ihi kehe ka e lava ke puli ‘a ho’o ngaahi vaivai; pea ‘oua ‘e fakama’ulalo’i ha taha telia na’a fakama’ulalo’i koe. Ke ke ngaue’i ‘a e ngaahi ‘aho ‘o ho’o mo’ui, ‘a ia ‘oku fuonounou, mo ha ‘atamai haohaoa, ha loto ma’a, ha ngaahi fakakaukau lelei, pea mo ha natula tau’atäina koe’uhi ‘i ho’o tau’atäina mo fiemälie, te ke lava ai ke tukuange atu ‘a e sino matelie ni pea fakavave ki he palataisi masani mo nofo ‘i he pule’anga fakatu’i ‘o ta’engata.
‘OIAUË! ‘OIAUË!‘A KIMOUTOLU ‘OKU ‘OFA HE NGAAHI MÄLIE ‘O MÄMANI!
Kuo mou fakavave atu hangë ko e tapa ‘a e ‘uhila ‘o fakalaka ‘i he Toko taha ‘Ofeina, pea kuo fakafonu homou loto ‘i he ngaahi manako faksëtane. ‘Oku mou pehë ko ho’omou fakakaukau muna koe mo’oni ia. Kuo tafoki homou mata ki he ‘akau talatala ‘o lau ia ko e matala’i’akau. Kuo te’eki ai ke mou mänava ‘aki ha mänava ‘oku ma’a pea te’eki ke angiangi mai ha ki’i havilivili ‘o e fakatalatala me he ngaahi manafa ‘o homou loto. Kuo mou fakapuna ‘i he matangi ‘a e ngaahi fale’i ‘ofa ‘a e Toko taha ‘Ofeina pea tamate’i faka’aufuli ia mei he taipaleti ‘o homou loto, pea hangë ko e manu ‘o e manafa, ‘oku mou fekumi mo holi ki he ngaahi tele’a ‘o e havala mo e holi.
‘A E NGAAHI TOKOUA ‘I HE HALA!
Ko e hä kuo mou ta’etoka’i ai ‘a e le’o ‘o e Toko taha ‘Ofeina, pea fakamama’o mei Hono ‘afio’anga mä’oni’oni? ‘Oku ‘i he ‘afio’anga ta’efakatataua ‘a e hoihoifua taukakapa, kuo fokotu’u ‘i he taloni ‘o e naunau, lolotonga ia ‘oku mou femo’uekina ‘i he ngaahi fakakikihi ta’e’aonga. ‘Oku lolotonga hö kiate kimoutolu ‘a e ngaahi tauafu kakala ‘o e mä’oni’oni pea ma’alifekina mo e manava ‘o e foaki ‘ofa ka kuo mou fakamasiva’i kimoutolu mei ai pea kuo mou faingata’a’ia. Faka’ofa ä ka ko kimoutolu pea mo kinautolu ‘oku fou ‘i homou ngaahi hala pea molomolomuiva’e ‘iate kimoutolu.
‘E FÄNAU ‘A E HOLI!
Hu’i ‘a e kofu ‘o e kumi langilangi, pea vete ‘a e teunga ‘o e hikisia.
‘I he laine hono tolu ‘o e tohi toputapu taha kuo tohi pea hiki ‘i he Taipaleti kuo ngaohi ‘aki ‘a e Lupi ‘e he peni ‘o e ta’ehämai ‘a ia kuo fakahä ‘o pehë:
‘E NGAAHI TOKOUA!
Ke mou fekätaki’aki ‘iate kimoutolu pea ‘oua ‘e mo’unofoa ‘i he ngaahi me’a ma’ulalo.‘Oua na’a polepole ‘i ho ngeia ‘o’ou, pea ‘oua te ke mä ‘i ho’o tölalo.‘I Hoku hoihoifua! Kuo U ngaohi ‘a e me’a kotoa pë mei he efu pea te U to e fakafoki kinautolu ki ai.
‘A E FÄNAU ‘A E EFU!
Tala ke ‘ilo ‘e he koloa’ia ‘a e to’e ‘a e masiva, telia na’a hanga ‘e he’enau ta’etoka’i ‘o taki kinautolu ki he hala ‘o e faka’auha, pea nau ta’e a’usia ai ‘a e fu’u ‘akau ‘o e koloa’ia. Ko e foaki mo e nimahomo ko Hoku ‘ulungaanga; monu’ia ka ko ia ‘oku ne teunga’aki ‘a Hoku ‘ulungaanga.
‘E KAKANO ‘O E HAVALA!
Tukuange ‘a e ngaahi havala kotoa pë pea ke fiemälie; he kuo fakamasiva’i ‘a e havala, pea ko ia ‘oku fiemälie ‘oku ‘ofa’i pea fakahikihiki’i ma’u ai pë.
‘E FOHA ‘O ‘EKU KAUNANGA!
‘Oua na’a ke faingata’a’ia ‘i ho’o masiva pe fiemälie ‘i ho’o koloa’ia, he ‘oku muimui mai ‘a e masiva ‘i he koloa’ia pea muimui ‘a e koloa’ia ‘i he masiva. Ka neongo ia, ka ‘oku ke masiva ‘i he me’a kotoa pë tukukehe ‘a e ‘Otua, ko e me’a’ofa fakaofo ia, pea ‘oua teke ta’etoka’i hono mahu’inga, he ‘i he iku’anga te ne ngaohi koe ke ke koloa’ia ‘i he ‘Otua pea ke ‘ilo ai ‘a e ‘uhinga ‘o e folofola ‘oku pehë, “Ko e mo’oni ko e masiva koe” pea mo e ngaahi folofola ma’oni’oni ‘oku pehë,
“Ko e ‘Otua ‘oku aoniu ‘i h me’a kotoa pë,” pea hangë ko e mafoa mo’oni ‘a e ata ‘o e pongipongi ‘i he tafa’akilangi ‘o e loto ‘o e toko taha ‘ofa’anga, ‘o hä ngingila ai ‘a e maama ‘o e ‘aho, ‘e pehë ‘a ho’o nofo malu ‘i he taloni ‘o e koloa’ia.
‘A E FÄNAU TA’ETOKANGA MO HOLI!
Kuo ke ngaohi Hoku fili ke hü ‘o nofo ‘i Hoku fale pea tuli kitu’a ‘a Hoku kaume’a, he kuo ke mahu’inga’ia ange ‘i he ‘ofa ‘a e taha kehe ‘i he ‘Eku ‘ofa. Fakafanongoa ki he ngaahi lea ‘a e Kaume’a pea tafoki ki hono palataisi. Ko e ngaahi kaume’a fakaemämani, ‘oku nau fe’ofa’aki ‘iate kinautolu, ka ko e kaume’a mo’oni, na’e ‘ofa pea ‘oku lolotonga ‘ofa tu’unga’a pë ‘iate koe koe’uhi pë ko koe; ko e mo’oni kuo Ne mamahi mo faingata’a’ia ta tu’o lahi koe’uhi pe ke tokoni’i koe. ‘Oua na’a ke ta’e’ofa ‘i he Kaume’a pehë, ka ke fakavave atu ki Ai.Ko ia ‘a e fetu’u’aho ‘o e lea ‘o e mo’oni mo e totonu, ‘a ia kuo hopo hake ‘i he mafoa ‘a e ata ‘i he tafa’akilangi ‘o e peni ‘o e ‘Eiki ‘o e ngaahi huafa. Fakaava homou telinga ke mou ongo’i ‘a e folofola ‘a e ‘Otua, ko ia ko e Tokoni ‘i he Tu’utamaki, ko e Mo’ui ‘iate Ia pë.
‘A KIMOUTOLU ‘OKU MOU POLEPOLE ‘I HE NGAAHI KOLOA FAKAMATELIE!
Ke mou ‘ilo ‘a e mo’oni ko eni ko e koloa ko e fakangatangata mälohi fau ia ‘oku ne ta’ofitu’u ‘a e toko taha fekumi me he me’a ‘oku ne faka’amua, pea mo e toko taha ‘ofeina mei hono ‘ofa’anga. Ko e tokosi’i pë ‘o kinautolu ‘a e kau koloa’ia te nau lava a’usia ‘a e loto’ä ‘o Hono ‘afio’anga, pea he’ikai te nau lava ‘o hü ki he kolo ‘o e nonga mo e fakatalatala. Monu’ia ka ko ia ‘oku koloa’ia ka e ‘ikai te ne tuku ‘a e koloa ke ta’ofi ai ia mei he pule’anga fakatu’i ta’engata, pe fakamasiva’i ia mei he tofi’a ta’efa’a’auha. ‘I he Huafa Lahi taha!Ko e tangata koloa’ia pehë, ‘e hanga ‘e hono ngingila ‘o fakamaama’i ‘a kinautolu ‘oku ‘i hëvani ‘o hangë ko e fakamaama’i ‘e he la’ä ‘a e kakai ‘o mämani!
‘A E KAU TU’UMÄLIE ‘O MÄMANI!
Ko e kau masiva ‘i homou lolotonga ko ‘eku koloa; le’ohi ‘a ‘Eku koloa, pea ‘oua te mou tokanga pe ki ho’omou fiemälie ‘a kimoutolu.
‘E FOHA ‘O E HOLI!
Fakama’a koe mei he ‘uli ‘o e koloa’ia pea ‘i he nonga haohaoa hü atu ki he pule’anga ‘o e masiva; koe’uhi ‘i he matavai mapunopuna ‘o e fakatalatala, teke lava ‘o inu ai mei he uaine ‘o e mo’ui ta’engata.
‘E HOKU FOHA!
Koe takanga mo e ta’etui ‘Otua ‘oku ne fakalahi ho’o mamahi, pea ko e feohi mo e faitotonu ‘oku ne fakama’a ‘a e ‘ume’umea mei ho loto. Ko ia ‘oku ne fekumi ke fe’ao mo e ‘Otua, tuku ia ke feohi mo e kakai ‘ofeina ‘a e ‘Otua; pea ko ia ‘oku fie fanongo ki he folofola ‘a e ‘Otua, ke ne fakafanongo foki ki he ngaahi lea ‘a e kakai fili ‘a e ‘Otua.
‘E FOHA ‘O E EFU!
Tokanga! ‘Oua te ke ‘alu mo e ta’etui ‘Otua pea ‘oua na’a feohi mo ia, he ko e feohi pehë ‘oku ne liliu ‘a e maama ngingila ‘o e loto ko ha afi faka’auha.
‘E FOHA ‘O ‘EKU KAUNANGA!
Kapau ‘oku ke fekumi ki he kelesi ‘a e Laumälie Mä’oni’oni, pea ke feohi mo e fai lelei, he kuo ne inu ‘a e ipu ‘o e mo’ui ta’engata ‘a ia ‘oku pukepuke ‘e he Toko taha ta’emate pea hangë ko e pongipongi faka’ofo’ofa ‘oku ne fakamo’ui pea fakamaama’i ‘a e loto ‘o e kau mate.
‘A E KAU TA’ETOKA’I!
‘Oua na’a mou pehë kuo fufü ‘a e ngaahi fakapulipuli ‘o e loto, ‘ikai, keke ‘ilo fakapapau kuo tohi mata’ä’ä ia pea tekeutua ‘i he ‘Ao ‘o e Toko taha Mä’oni’oni.
‘E NGAAHI KAUME’A!
Ko e mo’oni ‘oku Ou talaatu, ko e hä pë ha me’a ‘oku fufuu’i ‘i homou loto ‘oku Mau tatala pea hä ‘asinisini ‘o hangë tofu ko e maama ‘o e ‘aho, ka ko ia ‘oku lava ke fufü ‘oku mei he ‘Emau kelesi mo e ‘ofa angalelei, pea ‘oku ‘ikai taau ke mou siofia.
‘E FOHA ‘O E TANGATA!
Ko ia Kuo U afuhi’aki ‘a e ngaahi kakai ‘o mämani ko ha kihi’i tulutä pe ia mei he ‘oseni ta’e hano takele ‘o ‘Eku meesi; ka koloto ha taha ke tafoki ki ai, kakuo tafoki ‘a e toko taha kotoa pë mei he uaine fakalangi ‘o e fa’utaha ke inu mei he ngaahi taele ‘o e kinoha’a, pea, nau li’aki ‘a e ipu ‘o e hoihoifua ta’efa’a’auha, ka nau tali ‘a e ipu ‘o e ‘auha. Ko e koto palakü ‘a e me’a ‘oku ne fiemälie ai.
‘E FOHA ‘O E EFU!
‘Oua ‘e hangakehe ho mata mei he uaine ta’efakatataua ‘a e ‘Ofeina Ta’engata, pea ‘oua teke hanga ki he ngaahi taele ‘o e ‘uli mo e ‘auha. To’o mei he nima ‘o e Toko taha kuo ne foaki ‘a e Ipu ko ia ‘o e mo’ui ta’engata, ka e lava ke ke ma’u ‘a e poto kotoa pë, ke mo fakafanongo ki he le’o fakaofo ‘oku ui mei he pule’anga ‘o e ta’ehämai. Tangi le’o lahi, ‘a koe ‘oku ma’ulalo ho’o taumu’a. Ko e hä kuo ke tafoki mama’o ai mei he ‘Eku uaine toputapu mo ta’efa’a’auha ‘o inu ‘i he vai ‘uli?
‘A E KAKAI ‘O E MÄMANI!
Ke ke ‘ilo fakapapau ‘oku ‘i ai ha faingata’a ta’e’iloa ‘oku tulimui atu ‘iate koe, pea mo ha fakamamahi lahi ‘oku tali mei mu’a kiate koe. ‘Oua na’a ke fakakaukau kuo ngalo ‘iate Au ‘a ho’o ngaahi ngäue kotoa pë.‘I Hoku hoihoifua!Ko ho’o ngaahi ngäue kotoa pë kuo tohitongi matalalahi ‘e he ‘Eku peni ‘i he ngaahi taipaleti kasolaite.
‘A E KAU FAKAMAMAHI ‘O MÄMANI!
Fakamama’o ho nima mei he fakaaoao, he kuo U fakapapau ke ‘oua te U fakamolemole’i ha ta’e faitotonu ‘a ha taha. Ko eni ia ‘a ‘eku kovinänite ‘a ia kuo U tu’utu’uni aofangatuku ‘i he taipaleti ta’engata pea sila’i ‘aki ‘a ‘Eku sila ‘o e naunau.
‘A E KAU ANGATU’U!
Kuo fakafefeka’i homou loto ‘e he ‘Eku fakamolemole pea ko ‘Eku kätaki kuo ne ngaohi kimoutolu ke mou ta’etokanga, ‘o mou heka ‘i he ngaahi ‘alunga oma ‘o e havala ‘o fou atu ki he ‘auha. Kuo ke pehë ‘oku Ou ta’etokanga’i ho’o to’onga pea ‘ikai ke U ‘ilo ki ai?
‘A E KAU FETUKUTUKU!
‘Oua ‘e ngaohi ‘a e ‘elelo kuo u fakatapui ke fakahikihiki’i Au ke ‘uli ‘aki ‘a e ngaahi lea ta’etaau. Kapau ‘e iku’i koe ‘e he afi ‘o e kita, ke ke manatua ho’o ngaahi kovi ‘a’au ka e ‘ikai ko e kovi ‘a ‘Eku kau tamaio’eiki, pea pehë foki keke ‘ilo lelei ange pë koe ka e ‘ikai ko e ni’ihi kehe.
‘E FÄNAU ‘O E MUNA!
Ke ke ‘ilo’i fakapapau ko e taimi ‘e mafoa ai ‘a e ata ‘asinisini ‘i he tafa’akilangi ‘o e mä’oni’oni ta’engata, ‘e tekeutua ‘a e ngaahi fakapulipuli faksëtane mo e ngaahi ngäue kotoa pë na’e fai ‘i he fakapo’uli ‘o e pö, pea mamata ki ai ‘a e kakai kotoa pë ‘o mämani.
‘A E ‘AKAU VAO TUPU ‘I HE EFU!
Ko e hä ‘oku ‘ikai teke fuofua ala ‘aki ai ho ongo nima ‘uli ki ho kofu ‘o’ou, pea ko e hä ‘i he lolotonga ‘o e ‘uli’i ‘e he holi mo e havala ho loto kuo ke feinga mai leva ke fakataha mo Au pea hü i Hoku tofi’a toputapu? ‘Oku taumama’o fau ‘a ho’o faka’amu ko ia.
‘A E FÄNAU ‘A ‘ATAMA!
‘Oku mavahe hake ‘a e ngaahi lea mä’oni’oni pea mo e ngäue lelei mo haohaoa ki he hëvani ‘o e kolölia fakalangi. Ke mou kïkïtaki koe’uhi ka e lava ‘o fakama’a ho’omou ngaahi ngäue mei he ‘uli ‘o e kita mo e malualoi pea tali ia ‘e he loto’ä ‘o e naunau; he koe’uhi he ‘ikai fuoloa mei heni ko e kau mä’oni’oni ‘o e mämani, ‘i he lotolotonga ‘o e Toko taha ‘Ofeina, te nau tali lelei ‘a kinautolu pë ‘o e taau mo’oni pea no ‘enau ngaahi ngäue matu’aki haohaoa. Ko eni ia ‘a e fetu’u’aho ‘o e poto pea mo e misiteli fakalangi kuo huhulu ‘i ‘olunga ‘i he tafa’akilangi ‘o e finangalo ‘o e ‘Otua. Monu’ia ka ko kinautolu ‘oku tafoki ki ai.
‘E FOHA ‘O E FAKAEMÄMANI!
‘Oku lelei ‘a e pule’anga ‘o e kakano kapau ‘i ho’o ‘i ai; ‘oku naunau’ia ‘a e pule’anga ‘o e ‘itäniti kapau teke fakalaka atu ‘i he mämani ‘o e matelie; pea ‘oku melie mo’oni ‘a e ipu te ke inu mei he Talavou fakalangi. Kapau te ke a’usia ‘a e tu’unga ni, te ke tau’atäina mo’oni ai mei he mate mo e ‘auha, pea mei he ongosia mo e angahala.
‘E HOKU NGAAHI KAUME’A!
Ke ke manatua ‘a ho’o kovinanite mo Au na’e fakahoko ‘i he mo’unga Pelana (Paran), ‘a ia ‘oku tu’u ‘i he feitu’u ‘o Samani(Zaman). Ko ‘Eku kau fakamo’oni ‘a e ngaahi matatau‘i ‘olunga pea mo e kau ‘alofi ‘o e kolo ta’engata, ka neongo ia ‘oku ‘ikai ha taha ‘e talangofua ki he kovinanite. ‘I hono mo’oni, kuo ta’akifu’u ia ‘e laukau mo angatu’u mei he ngaahi loto, pea kuo puli ‘aupito. Ka neongo ia, na’a ku kei tatali pë pea ‘ikai te U fakahä ia.
‘A ‘EKU SEVÄNITI!
‘Oku ke hangë tofu ko ha heletä matamatalelei ‘oku fufü ‘i he po’uli hono tauhi’anga, pea puli mo hono mahu’inga mei he toko taha ‘oku fekumi ki ai. Ke ke tu’u hake mei he fufü’anga ‘o e kita mo e holi koe’uhiä ke hä ho mahu’inga pea huhulu atu ho faka’ofo’ofa ki he kakai kotoa pë ‘o mämani.
‘E HOKU KAUME’A!
Ko koe ‘a e fetu’u’aho ‘o e ngaahi hëvani ‘o Hoku mä’oni’oni, ‘oua ‘e tuku ‘a e ‘uli ‘o e mämani ke ne ‘u’ufi ho ngingila. Tatala ‘a e puipuitu’a ‘o e ta’etokanga, koe’uhi ka ke hä ngingila mo masani mai mei he ngaahi ‘ao ‘o fakateunga ‘a e me’a kotoa pë ‘aki ‘a e masani ‘o e mo’ui.
‘A E FÄNAU ‘A E KUMI LANGILANGI!
Kuo ke li’aki Hoku pule’anga ta’efa’a’auha ki he pule’anga fakataimi, pea ke ngaohi ‘a e ngaahi fiefia fakaemämani ko ho teunga ‘o ke laukau ai. ‘I Hoku hoihoifua! Te U tänaki fakataha kinautolu ‘i he malumalu ‘o e lanu pe ‘e taha ‘a ia te ne ‘ufi’ufi ‘a e efu mo to’o ‘a e kehekehe ‘i honau lanu tukukehe pe ‘a kinautolu te nau fili Hoku Finangalo, ‘a ia ko e fakama’a mei he lau lanu kotoa pë.
‘E FÄNAU ‘A E TA’ETOKANGA!
‘Oua ‘e tuku ho’o manako ‘i he pule’anga ‘auha, pea ‘oua teke fiefia ‘i he ngaahi me’a ‘i ai, He ‘oku ke hangë ko e manupuna ‘oku ‘ikai te ne ‘ilo ‘a ‘ene nofo münoa ‘i he va’a, ka e fakafokifä kuo lolofi hifo ‘a Mate ‘o li ia ki he efu, pea mole ai’a e ongomälie ‘o ‘ene hiva, hono sino pea mo hono lanu, ‘o ‘ikai to e hä. Ko ia ai, ke mou tokanga, ‘a e kau popula ha’isia ‘e he holi!
‘E FOHA ‘O ‘EKU KAUNANGA!
Na’e fai homou tataki ‘e he lea, ka ‘i he taimi ni ‘oku fai ‘aki ia‘a e ngäue. Kuo pau ke fakahä ‘e he toko taha kotoa ‘a e ngäue ‘oku haohaoa mo ma’oni’oni, he ko e lea ko e koloa ia ‘a e toko taha kotoa, ka koe ngäue ‘oku fai ia ‘e Homau ngaahi ‘ofa’anga. Kïkïtaki ‘i he loto mo e laumälie ke mou makehe ‘i ho’omou ngaahi ngäue.‘I he fakapotopoto ‘oku mau fale’i koe ‘i he taipaleti mä’oni’oni mo haohaoa.
‘E FOHA ‘O E FAKAMAAU TOTONU!
‘I he kaupo’uli ‘o e pö na’e hifo mai ‘a e hoihoifua ‘o e Sino ta’engata mei he tumu’aki ‘emalata ‘o e angatonu ki he Satalatulu-Munitaha (Sadratu’I-Muntaha) ‘o ne tangi’auloto, pea tupu ai ha kaungä tengihia mo ia ‘a e kau ‘alofi ‘o e ngaahi pule’anga ‘i ‘olunga. Na’e fehu’ia pe ko e hä ‘a e ‘uhinga’o e lau’aitu mo e tengihia ni? Na’a Ne tali; ‘O hangë ko e tu’utu’uni, na’a ku tali mo e ‘amanaki lelei ‘i he tafungofugna ‘o e faitotonu, ka na’e ‘ikai teu nämu’i mei he kakai ‘o mämani ha momo’i tauafu kakala ‘o e faitotonu. Ka ‘i Hoku fekau’i ke u foki, uoke! Na’e ‘i ai ha ki’i pupunga lupe ‘o e mä’oni’oni kuo nau hao mei he ngaahi pesipesi ‘o e fanga kulï ‘o mämani. ‘I he taimi ko ia, kuo fakavave mai ‘a e Ta’ahine ‘o hëvani kuo tatala hono pülou pea ‘oku ne hä faka’ofo’ofa, mei Hono palasi fakalangi, ‘o ‘eke honau hingoa, pea na’a nau tala kotoa tukukehe pë ha toko taha. Pea ‘i hono faka’eke, na’e pu’aki ai ‘a e ‘uluaki mata’itohi, pea fepunakaki mai ai ‘a e kau ‘alofi ‘o e ngaahi taloni fakalangi mei honau nofo’anga naunau’ia. Pea ‘i hono lea’aki ‘a e mata’itohi hono ua na’a nau fakatömape’e kotoa ki he kelekele, ‘a e toko taha kotoa pë. Pea ‘i he mömeniti ko ia na’e ongo mai ha le’o mei he ‘afio’anga ‘i loto ‘o pehë: “Kuo fe’unga hono mama’o, pea ‘oua ‘e to e mama’o ange.” Ko e mo’oni ‘oku Mau fakamo’oni ki he ngaahi ngäue kuo nau fai peako ia ‘a ia ‘oku mau lolotonga fai.
‘E FOHA ‘O E HOLI!
Ke ke inu mei he vaitafe ‘o e mohu meesi ‘oku tafe mei he ‘elelo ‘o e misiteli fakalangi, pea ke mamata ‘I he maama faka’ofo’ofa ‘o e fetu’u’aho ‘o e ‘ilo mei he folofola fakahëvani. Ke tö ‘a e ngaahi tenga ‘o Hoku poto fakalangi ‘I he kelekele haohaoa ‘o ho loto, pea fu’ifu’I ia ‘aki ‘a e haiasini ‘o e ‘ilo moe poto, ‘o ma’ui’ui mo lanumata i he kolo ma’oni’oni ‘o ho loto.
‘E FOHA ‘O E HOLI!
‘E ngata ‘afë ho’o ‘auhë ‘i he ngaahi hala ‘o e holi! Kuo U ‘oatu ha kapakau ke ke puna’aki ki he ngaahi ma’olunga’o e mä’oni’oni faka-‘Otua, ka e ‘ikai ko ngaahi faka’amu fakasëtane. Kuo U ‘oatu mo ha helu, ke teuteu’I ‘aki Hoku lou’ulu, ka e ‘oua teke hae’aki ia ‘a Hoku kia.
‘A ‘EKU SEVÄNITI!
Ko kimoutolu ko e ngaahi ‘akau ‘o ‘Eku ngoue; pea ‘oku taau ke mou ‘omai ha ngaahi fua lelei mo fakaofo, koe’uhi ke ma’u mei ai ho’omou lelei pea mo e lelei ‘a e ni’ihi kehe. Ko ia ai kuo tu’utu’unia kimoutolu ke fai ha’amou ngäue ‘I he ngaahi ngäue fakamea’a mo fakapalofesinale, he ko ia ‘oku tokafufü ai ‘a e fakapulipuli ‘o e tu’umalie, ‘E kakai ‘o e mahino! ‘Oku ma’u ‘a e ola mei he founga, pea ‘oku fe’unga ‘änoa pe ‘a e kelesi ‘a e ‘Otua mo kimoutolu. Ko e ‘akau ‘oku ‘ikai ke fua, na’e, pea ‘e kei tuha pe ia mo e afi.
‘A ‘EKU SEVÄNITI!
Ko e ma’ulalo taha ‘o e fa’ahinga ‘o e tangata ‘a kinautolu ‘oku ‘ikai ke ‘I ai hanau fua. ‘Oku lau ‘a e ni’ihi pehë kuo nau mate, ‘ikai, ‘oku lelei ange ‘a e kau mate ‘I he ‘ao ‘o e ‘Otua ‘iate kinautolu ‘oku nau fakapikopiko mo ta’e’aonga.
‘A ‘EKU SEVÄNITI!
Ko e tu’ukimu’a taha ‘o e fa’ahinga ‘o e tangata ‘a kinautolu ‘oku nau ma’u mo’ui mei he’enau ngäue pea nau faka’aonga’I honau ivi ma’a ‘enau lelei pea pehë ki honau käinga ‘I he ‘ofa ki he ‘Otua, ko e ‘Eiki ‘o e ngaahi mämani.
Ko e ta’ahine ta’ane fakalangi mo fakaofo, ‘a ia na’e fufü ‘I he tu’apuipui ‘o e folofola, kuo hä atu, tu’unga ‘I he kelesi ‘a e ‘otua pea mo Hono finangalo ‘ofa, ‘o hangë ko e huhulu ‘a e maama ‘o e hoihoifua ‘o e Toko taha ‘Ofeina. Ko e fakamo’oni au, ‘e Hoku ngaahi kaume’a, kuo fakakakato ‘a e finangalo ‘ofa, kuo fakafiemälie’I ‘a e veiveiua, kuo hä ‘a e mo’oni pea kuo fokotu’u ‘a e totonu. Tuku ke ‘iloa ‘a ho’o ngaahi ngäue ‘I he hala ‘o e fakatalatala. Kuo foaki kakato heni ‘a e ‘alo’ofa fakalangi kiate koe pea mo kinautolu pë ‘oku nofo ‘i mämani mo hëvani.Fakafeta’I ki he ‘Otua, ko e ‘Eiki ‘o e ngaahi mämani.