O TAMA TAGATA A TE AGAAGA!
Taku apoapoaiga muamua tenei, ke maua te loto maa, kae alofa kae maina, ko te mea ke fai mo malo favavau, se mafai o maofa kae favavau.
O TAMA TAGATA A TE AGAAGA!
Te mea tafasili fakapelepele o mea katoa i Oku mata ko te Fai-meatonu, safulitua mai i ei mafai e manako koe kia Au, kae sa faka-tamala mai i ei me fai atu ne au kia koe. Mai i te fesoasoani o ia ka matea ne koe ki ou mata kae se ko mata o nisi tino kae ka iloa foki loa ne koe i tou poto kae se ko te atamai o ou tuakoi, kafai koe pefea. E fakamaoni atu ate fai-meatonu ko Taku mealofa kia koe kae ko te failoga o Toku alofa, ke fakatu io ou mata.
O TAMA TAGATA A TAGATA!
E ufi i Toku foitino mai i te vavau kae i loto i te pilitakiiga o te kalevaleva o toku uiga tonu tonu, Ne iloa ne Au Toku alofa mo koe, tela i ei ne faiite koe ne Au kae ne tusi i luga ia koe Toku foliga kae fakaasi atu kia koe toku taulekaleka.
O TAMA TAGATA A TAGATA!
Au e alofa ki tou faitega, tela i ei ne faite ei a koe ne Au. Tela la ke alofa mai koe koe ki Au, ko te mea ke faka-igoa tou igoa kae faka fonu tou agaaga ki te agaga ote ola.
O TAMA TAGATA A TE MEAOLA!
Alofa mai kia Au, ko te mea ke alofa atu Au kia koe. Kafai e se alofa mai koe kia Au, a Toku alofa e se mafai o oko atu ki te koe. Ke iloa ne koe te mea nei, Oi tavini.
O TAMA TAGATA A TE MEAOLA!
Tou Palataiso ko Toku alofa, tou fakai faka-te-lagi, ko te fakatasi mo Au. Ulufale mai ki ei kae sa faitali. Te mea nei ko te mea tela ne tusia mai mo koe, Tou maloo i luga mo Tou Maloo maluga.
O TAMA TAGATA A TAGATA!
Kafai e alofa mai koe ki Au, fulitua ki tou foitino, kae kafai koe e sasaale ki Toku fiafiaga, sa saga ki tou fiafiaaga, ko te mea ke mate a koe i Au ako au ke ola ki te favavau ia koe.
O TAMA TAGATA A TE AGAAGA!
E seai sou filemu vagana ke fakaseai a koe kae saga mai kia Aku, me e tau ko koe ke fiafia i Toku igoa, kae se ko tou igoa, ke tuku tou fakatuanakiiga i Au kae se ko koe, ona loa ko Au e manako ke alofagina Au tokotasi i luga i mea katoa.
O TAMA TAGATA A TE MEAOLA!
Toku alofa ko Toku fakavae maalosi, a ia tela e ulufale ki ei e sao kae puipui, ako ia tela e fulitua mai i ei ka se a tena auala kae galo ifo ki lalo.
O TAMA TAGATA O TE MUNA!
A koe ko Toku fakavae malosi, ulufale ki ei ko te mea ke nofo saogalemu koe, Toku alofa ei iloto ia koe, ke ilia ne koe, ko te mea ke maua Au ne koe o nofo pili kia koe.
O TAMA TAGATA A TE MEAOLA!
A koe ko Toku moli ka ko Toku mainaaga e nofo ia koe. Ke maua mai i ei a tou mainaaga kae sa sala ki se tino aka i loo o Au. Me ia koe ne faite ne Au ke maumea kae ne tuku atu Oku Alofaaga e uke ki luga ia koe.
O TAMA TAGATA A TE MEAOLA!
Mai lima o te paoa ne faka-foliga i ei a koe kae mai i maikao mafi ne faite ei koe; kae i loto ia koe ne tuku atu ne au a te pogai tonu o toku mainaaga. Ke loto malie koe ki ei kae sa sala se tino aka me i Taku galueega e tonu gisi ka ko Taku fakatonuuga e tumau. Sa faka--fesiligia, io me e falotoloto lua ki ei.
O TAMA TAGATA A TE AGAAGA!
Ne faite koe ne Au ke maumea, aia la e tuku ifo a tou tulaga ki lalo kite? E fakaaliki a tou faitega ne Au, aia la e fakafoliki iei a koe? Mai te pogai tonu o te poto, ne avatu kia koe ke ola, aia e sala ei ne koe se fakamainaga aka mai i se tino i Oku tafa? Mai i te one o te alofa ne faka-foliga koe ne Au, kae aia e saga fua koe ki sua tino? Kilo ou mata kia koe ko te mea ke iloa ne koe Au e tu i loto ia koe e mafi, malosi, kae ola fua ia ia eloa.
O TAMA TAGATA A TAGATA!
Koe ko Toku maloo a ko toku malo e se mafai o galo; aia la e koe mataku ki tou galo ifo? A koe ko toku mainaaga a ko Toku mainaaga se mafai o galo; aia la koe e mataku i tou fakasai lele loa? Koe ko toku matagofie ka ko Toku matagofie e se mafai o matafi; a koe ko Toku gatu a ko Toku gatu se mafai o mago. Nofo mmau mo tou alofa mo Au, ko te mea ke maua Au ne koe i loto i maaloo o te matagofie.
O TAMA TAGATA A TE MUNA!
Fuli mai ou mata ki Oku mata kae ave keatea mea katoa na ko Au; me i Toku nofoaiga-a-tupu e tumau kite favavau a ko Taku puleega e se mafai o tanumia. Kafai e sala koe ki se tino i Oku tafa, ao, kafai e sala ne koe i te iunivesi ki te se gata mai, a te salaga tena e seai se aoga.
O TAMA TAGATA A TE MAINAGA!
Fakapuli katoa a mea na fua ko Au kae munamuna mo Toku agaaga. Tenei a te pogai tonu o Taku fakatonuga, tela la fuli atu ki ei.
O TAMA TAGATA A TAGATA!
Ke loto malie koe ia Au kae se sala ki se isi fesoasoani aka. E seai lele aka foki na ko Au e mafai o faka lotomalie a koe.
O TAMA TAGATA A TE AGAGA!
Sa fesili mai ki Au a te mea tela e see mafaufaugina ne Matou mo koe, kae ke lotomalie koe ki te mea tela ne fakapatino ne Matou mo koe, aua e tena e manuia ei koe, mafai e loto malie a koe ki ei.
O TAMA TAGATA O TE KILOGA FAKA-OFOOFOGINA!
Koa oti ne manava kia koe ne Au Toku agaaga, ko koe ke alofa mai ki Au. Aia ko liagina ei Au ne koe kae sala koe ki se isi tino aka e alofa koe ki ei i lo ia Au?
O TAMA TAGATA A TE AGAAGA!
Taku fakatagi kia koe e lasi, e se mafai o fakapuli. Toku alofa-kaimalie mo koe e
luasia, e se mafai o funa mai? Toku alofa mo koe ne fai ne ia koe mo fai tena fale, e se mafai o funa mai. Toku mainaga e maina kia koe, e se maua o fakagalogia.
O TAMA TAGATA A TAGATA!
I luga i te lakau malapulapu matagofie e safe ne Au fuataga tafasili i te manakogia, aia la e fulitua mai koe kae lotomalie fua koe ki mea ko la e sena loko lei? Fuli mai ki te mea tela e lei atu mo koe i te maaloo i luga.
O TAMA TAGATA A TE AGAGA!
E faka-aliki ne Au a tou faitega, kae fakamalalo ne koe a tou tulaga. Fakamaluga aka a tou tulaga kite tulaga tela ne faiite koe ki ei.
O TE TAMA TAGATA A TE SILI!
Mai i te favavau ne kalaga i ei a koe ne Au, a ko koe e sala loa ki mea ko la e galo ifo. Se aa ate pogai ko fulitua koe mai manakoga o Matou kae sala koe ki te mea e manako koe ki ou manakoga?
O TAMA TAGATA A TAGATA!
Sa sopoia atu koe i tou gataaga, io me manako koe ki mea ko la e see lei mo koe. Ifo ki lalo i mua o mata o tou Atua, te Aliki o te mafi mo te malosi.
O TAMA TAGATA A TE MEAOLA!
Sa tavae a koe o fakamaluga aka i tino mativa, me ia Au e takitaki loa ne Au a ia i tena auala kae e matea ne ia koe i tou malaia kae fakanumi ne ia koe kite se gata mai.
TAMA TAGATA A TE MEAOLA!
E mafai pefea ne koe o fakapuli au mea see kae nofo koe o munamuna a mea see a nisi tino? Sose tino e fai ne ia te mea tena e fakamasei ne ia Au.
O TAMA TAGATA A TAGATA!
Sa faipatiigina a agasala a niisi tino mafai koe se tino agasala. Kafai e soli ne koe a te tulafono tenei, ka fakamasei, kae i te mea nei e molimau Au i ei.
O TAMA TAGATA A TE AGAGA!
Ke iloa ne koe a te mea tonu: A Ia tela e fakatonu a tagata ke amio tonu ako ia e fai ne ia amioga masei e se vau mai ia Au, e tiga loa a ia e fai ia ia e vau i Toku igoa.
O TAMA TAGATA A TE MEAOLA!
Sa fai ki se tino a te mea tela e se maua ne koe o fai kia koe, kae sa faipati a te mea tela e se ttau o faipati ne koe. Te mea nei ko Taku fakatonuga kia koe, ke fai ne koe.
O TAMA A TAGATA A TAGATA!
Sa fulitua mai i Taku tavini mafai e akai atu, me i ana mata ko Oku mata; kae fakamaulalo koe I Oku mua.
TAMA TAGATA A TE MEA OLA!
Faka-masaua au mea ne fai i aso takitasi ia koe ma kami mai ki taimi e fakamasino i ei a koe: me i te mate, e seai se faka-iloaaga, ka oko atu ki luga ia koe ka ko koe ka manakogia ke fakamatala au mea ne fai.
O TAMA TAGATA A TE SILI!
Ko oti ne fai ne Au a te mate mo fai te fekau faka-fiafia kia koe. Sea la a te mea e fanoanoa koe kiei? Ne faite ne Au a te mainaaga ke iluga a tena matagofieia koe. Aia e funa mai koe mai i ei?
O TAMA TAGATA A TE AGAAGA!
Mai i tala fakafiafia o te mainaaga e fakamaluga i ei a koe ne Au: fiafia! Ki te koga malu ne kami koe ne au; nofo la i ei ko te mea ke ola koe i te filemu ki te se gata mai.
O TAMA TAGATA A TE AGAAGA!
Te agaaga o te malu e fakamaoni atu kia koe tala fiafai o toe fakatasi; aia la e fanoanoa koe i ei? Te agaaga o te malosi e fakatumau ne Ia koe i Tena fakatokaga; aia la e pono mai a koe mai i ei. A te mainaaga o te fetaui mo ia e takitaki ne ia koe; e mafai pefea a koe o fano keatea?
O TAMA TAGATA A TAGATA!
Sa fanoanoa vagana fua koe ko mao mai mo Matou. Sa fiafia vagana fua ko pilipuli kae ko foki mai koe kia Matou.
TAMA TAGATA A TAGATA!
Fiafia i te agalelei o tou loto, ko te mea ke taaua koe o faka-fetaui mo Au kae ke
fakaasi atu foki ne koe a Toku gali.
O TAMA TAGATA A TAGATA!
Sa fakafiti mai koe i Toku gatu matogafie, kae sa fakaseai tou vaega mai i Toku punavai faka-ofofogina, ia koe mana fia inu ki ei ki te se gata mai.
O TAMA TAGATA A TE MEAOLA!
Sasale iloto i Aku tulafono ona ko tou alofa mo Au kae fakapuli a manakoga o koe mafai koe e sala mai ki Toku fiafiaaga.
O TAMA TAGATA A TAGATA!
Sa fakatamala koe i aku tulafono mafai e alofa koe ki Toku gali kae sa puli ia Koe Taku apoapoaga mafai ke maua ne koe Toku fiafiaga lei.
O TAMA TAGATA A TAGATA!
Kafai e eva koe i te lauefa o te ea kae tele koe i te lasi o te lagi, e aunoa se nofotoka o koe vagana ko te fakalogo ki Motou faka-tonuuga mote ifo-maulalo mai mua o Motou Mata.
Fakalasi atu a Taku talitonuga ko te mea ke fakaasi atu ne Au a mea lilo o Toku lauiloa kae faka-maina atu kia koe a te mainaga o te favavau.
O TAMA TAGATA A TAGATA!
Fakamaulalo ifo a koe mai mua ia Au, ko te mea ke fiafia lasi Au o asiasi atu kia koe. Tu ki luga o talai Taku talitonuga, a koi nofo koe i te lalolagi ko te mea ke maua ne koe a te manumalo.
O TAMA TAGATA A TE MEAOLA!
Taku taku ne koe Au i Toku lalolagi, kote mea i Toku lagi ka masaua i ei a koe, ko Oku mata mo ou mata ke feolofani.
O TAMA TAGATA A TE NOFOAIGA TUPU!
Tou lagona ko Toku lagona tena e lagona ei koe. Tau kiloga ko Toku kiloga tena e kilo ei koe, kae i loto i te kanoloto o tou agaaga ola ke fakatalitonu ne koe Toku nofoaga tapu, kae i Au ka fakamaoni Au ki se tulaga maluga mo koe.
O TAMA TAGATA A TE MEAOLA!
Salasala ki te mate fakamaatulo i Toku auala, ke fealofani mo Toku fiafiaga kae fakafetai ki te mea tela ne fakaeke atu ne Au ki te mea ke malolo ifo mai lalo i te gali mai tua o te fale matagofie.
Manatu kae fakamasausau. Ko tou manakoga ke mate koe iluga i tou moega, io me ke fakamaligi tou toto ki luga i te pefu, te matulo koe i Toku auala, ke fai koe mo fakaasiga o Taku fakatonuuga mo te fakaasi a Toku mainaga i te pelataiso tafasili ite maluga? Fakavasega fakalei Oi tavini!
O TAMA TAGATA A TAGATA!
Mai i Toku taulekaleka! Ko te vali tou laulu ki ou toto e naluga atu i Taku kiloga i te faitega o te iunivesi mo te mainaaga o lalolagi e lua. Umeke, ke maua ne koe te tulaga tenei, Oi tavini!
O TAMA TAGATA A TAGATA!
I sose mea e isi se failoga. Te failoga o te alofa ko te loto toa mai lalo o Taku fakatonuuga mo te onosai mai lalo o Aku tofotofooga.
O TAMA TAGATA A TAGATA!
A ia tela e alofa tonu e manako faeloa ki ne tofotofooga e uiloa e pela mo latou se fakalogo e manako ki se faka-magalooga ka ko latou agasala e manako ki se alofa.
O TAMA TAGATA A TAGATA!
Kafai a te malaia e oko atu kia koe se ko Toku auala e mafai pefea o sale koe i auala o latou ko la e loto malie ki Toku fiafiaga? Kafai a tofotofooga e pokotia koe i ei kae se ko tou manakoga o fetaui mo Au, ka maua pefea ne koe a te mainaga i tou alofa mo Toku mataogofie?
Toku fakamataku ko Toku manuia, ka taumata mai tua ko tea fi mot e fakasalaaga, ka mai iloto ko te mainaaga mote alofa. Fakavave ki ei ko te mea ke fai koe mo mainaaga se gata mai mo se agaaga e favavau. Tenei Taku fakatonuga kia koe, ke tautali koe ki ei.
O TAMA TAGATA A TAGATA!
Kafai e oko atu kia koe a te manuia sa fiafia kae kafai e oko atu se malaia kia koe sa fanoanoa, aua i mea kona e olo o seai.
O TAMA TAGATA A TE MEAOLA!
Kafai ko oko atu te mativa, sa fanoanoa; me ka oko mai taimi a te Aliki o te maumea ka asiasi atu kia koe. Sa mataku ki tulaga malalo, me i te matagofie o te fiafia ka isi se aso ka nofo iluga ia koe.
O TAMA TAGATA A TE MEAOLA!
Kafai tou loto e fakatoka ki te maaloo favavau tenei tela e se mafai o tanumia, kae ola i te olaaga favavau tenei, lepe keatea a te maalo se tumau kae vave fua tenei.
O TAMA TAGATA A TE MEAOLA!
Sa fakalavelave tou olaaga mo te lalolagi tenei, me i te afi e tofo ne Matou a te aulo, a ko te aulo e tofo ne Matou a tavini o Matou.
O TAMA TAGATA A TAGATA!
A koe ne manako ki aulo ako Aku e manako ko tou saolotooga mai i ei. Ko koe e mafaufau ke maumea koe mafai e maua ne koe, a ko tou maumea e matea fua ne Au mafai e matakalekale koe mai aulo. I Toku olaaga! Tena Toku poto, kae e tena a tou manakooga; e mafai la pefea a Toku ala o fetaui tonu mo tou ala?
O TAMA TAGATA A TAGATA!
Avatu Toku maumea ki Oku tino mativa, me i te lagi ka puke mai ne koe i sitoa se mafai o matifi olotou matagofie mo maumea e se mafai o tanumia o olotou gali. Ako Toku ola! Ke aumai tou agaaga e silia atu a te matagofie moi fai ke matea ne koe pelaa mo te kilooga o Oku mata.
O TAMA TAGATA A TAGATA!
Te fale tapuaki (temple of being) o tino ola ko Toku nofoaiiga tupu; fulu ke maa mai i mea katoa, ko te mea ke fakatu Au iei kae ke nofo foki Au i ei.
O TAMA TAGATA A TE MEAOLA!
Tou loto ko Toku fale; fakammalu mo Oku fanatu. Tou agaaga ko Toku koga o fakaasiiga; fakamaagia mo Taku fakaasiiga.
O TAMA TAGATA A TAGATA!
Tuku tou lima ki Oku fatafata, ko te mea ke tuu aka Au mai luga ia koe, maina kae malapulapu.
O TAMA TAGATA A TAGATA!
Fanatu ki Toku lagi, ko te mea ke maua ne koe a te fiafiaaga o te toe fakatasi, kae mai i te ipu o te matagofie e see mafai o tanumia ke inu ne koe a te uaina seai sena fakapauuga.
TAMA TAGATA A TAGATA!
E uke aso ko teka mai i ou tafa kae ne fakalavelave ei koe ki ou manatu fakavalevale mo mafaufauuga seai ne aogaa. Ka pefea te leva o tou moe i tou moega? Apai aka a tou ulu mai i te moe, auaa i te La ko tutonu, fiafia ke kasa atu ki luga ia koe mo te maingaaga ote gali.
O TAMA TAGATA A TAGATA!
Te mainaaga ko oti ne maina atu kia koe mai i te sikulagi ote Mauga tapu ako te agaaga fakamaina ko oti ne manava atu ite Sinai o tou loto. Tela la, fakasao mao koe mai i veli o mafaufauga faka-supasupa kae ulu mai ki loto i Oku kogaa koga, ko koe ke mafai o maua ne koe a te olaga seai se gataga kae ke fetaui foki mo Au. Tena kote mate ke se mafai o oko atu kia koe, pela foki mo fanoanoa mo fakalavelave.
O TAMA TAGATA A TAGATA!
Toku favavau ko Toku tugalima, ne faite ne Au mo koe. Pei kiei pela mese gatu o tou foitino. Toku fusi fakatasi ko Toku tugalima; ne faite ne Au mo koe, pei kiei, ko koe ki te favavau ko te fakaasiga o Toku tino tela e seai sena gata maiga.
O TAMA TAGATA A TAGATA!
Toku afioga ko Taku mealofa kia koe, a ko Toku malifalifa ko te masausau o Toku alofa kia koe. Toku nofo atu e se mafai o iloagina e se mafai foki o talatala atu ne se tino. E tonu, ne lavea ne Au i Aku falekoloa funa kae i loto foki i maumea-funa o Aku fakatonuuga, pela mese fakailoga o Toku alofa kaimalie ki
Aku tavini mo Toku alofa ki Aku tino.
TAMALIKI O TE POGAI FAKATELAGI SEMATEA!
A koutou ka fakalavelavegina te outou alofa kia Au a ko agaaga ka manavase mafai ko takutaku Au. Me i mafaufau ka se mafai o iloa Au pela foki mo loto ka se mafai o taofi Au.
O TAMA TAGATA A TAULEKALEKA!
Mai Toku agaga mo Toku alofa fakapitoa! Mai Toku alofa mo Toku taulekaleka! A mea katoa ko la ne fakaasi ne Au kia koe i te laulaufaiva o te malosi, kae ko oti ne tusigina mo koe i te pene o te malosi, ne fakatoka ke fetaui mo tou mafai mo tou malamalama, kae se ko Toku tulaga mo te sikugaleo o Toku leo.
O TAMALIKI A TAGATA
E seiloa ne koe me kaia e faiite ei koutou ne Matou mai te pefu e tasi? Ko te mea ke seai se tino e sili kiluga i niisi. Mafaufau fakalei i taimi katoa i tou loto mene faiite koe pefea. Ona la ne faiite koutou ne Matou mai i te mea e tasi se tulaga tau iluga ia koutou ke fai pela mese agaaga e tasi, sasale ki vae e tasi, kai ki te gutu e tasi kae nofo tasi i te laukele e tasi, ko te mea ke mafai o fakaasi mai outou tino, outou faiga mo gasuesuega i fakailoga o te tasi mo te kano-tonu o te se fakapiki ki sose mea. E tenei Toku apoapoaiga kia koutou, O lukuuga o mainaaga? Fakalogo ki te apoapoaiga tenei ke mafai o maua ne koutou a te fuataga mmalu mai te lakau o te matagofie fakafiafia.
KOUTOU TAMA-TAAGATA O AGAAGA!
Koutou ko Aku koloa, me iloto ia koutou ne funa ne Au a penina o Aku mea-funa mo fatu-taaua o Toku iloa. Tausi ki ei mai tino-fakaalofa i Aku tavini pela foki mai tino fapaupau i Aku tino.
O TAGATA O IA TELA E TU IA IA ILOTO I TE MAALOO O IA ELOA!
Ke iloa ne koe, me ko oti ne pusi atu kia koe manogi mana gali katoa, ko oti ne fakaasi atu katoatoa kia koe a Taku muna, ko oti ne faka-katoatoa iloto ia koe Oku alofaga kae ko oti ne manako mo koe ko te mea tela ne manako Au ki ei.
Tela la malie koe i Oku fiafiaga kae fakafetai mai kia Au.
O TAMA TAGATA A TAGATA!
Tusi a mea katoa ko la ko oti ne fakaasi kia koe i te iniki o mainaaga kiluga i te tapeleti o tou agaaga. Kafai a te mea nei ko se oko ki ei tou malosi, fai la tau iniki ko te uiga- tonu o tou loto. Kafai la ko se mafai o fai ne koe, fai la ke tusi ki te toto iniki te la ko oti ne fakamaligi i Toku ala. E sua-malie atu te mea nei ki Au i lo o mea katoa, ko tena mainaaga ke mafai o oko atu ki te se gata mai.
O TAAGATA KOLAA E ISI NE MAFAUFAU MO TALIGA O FAKALOGO!
Te kalaga muamua a te Fakapelepele e penei: O a te naitigikale o te lagi! Sa nofo ise koga aka na ko te fatoaaga losa o te agaaga. O a te faifekau o te alofa o Solomona! Sa salasala sou lafiiga vagana fua ko te Shepa o te fakapelepele, mo te O te finikisi o te lagi! sa nofo ise koga mea aka na ko te mauga o te fakatuanaki. Me i loto i konaa ko tou nofoaga , me iluga i pakau eva o te agaaga ko fanake koe ki te nofooga faka-te-agaaga kae salasla ke maua a te fakamoemoega maluga.
O TAMA TAGATA A TE AGAAGA!
A te manu eva e sala ki tena ofaga; te naitigikale ko te gali o te losa; ako manueva konei, e sala ki loto o tagata, e loto malie i te on, ko olo mao mai i te ofaga tonu o latou, mo olotou mata e fakasaga tonu ki te se fakalogo ko se maua ne latou a te matagofie o te fakalasi mai faka-te-lagi. Tapa! E fakaofoofogina kae maumau me ko fulitua mai i te tai lasi o te Silisiliese kae nofo mao mai i te sikulagi malapulapu.
O TAUGASOA!
I te fatoaga o tou loto sa tokigina se mea na ko te losa o tou alofa, kae mai i te naitigikale o tou alofa mo tou manakooga sa fakamatalgina tau pulega.
Fakamalugagina te faitaugasoa mo tino amiotonu kae fakaseaigina a te faitaugasoa mo latou kolaa e amio masei.
O TAMA TAGATA A TE FAKAMASINO TONU!
E mafai ne ia telaa e alofa o fano ki se isi koga aka na ki te laufenua o ia telaa e alofa a ia ki ei? Kae sea a te mea telaa e maua ne tino salasala e malolo mai a ia i te manakooga o tena loto? Ki tino alofa tonu a te fakatasi ko te ola tena a ko te maavae ko te mate. Tena fatafata e seai se onosai a ko tena fatu e seai se filemu i ei! E uke a tino ka mafai o fakagasue ke fakavave ki te nofoaga o tena fakapelepele.
O TAMA TAGATA A TE PEFU!
E tonu Au e fai atu kia koe: Me i tagata katoa te toe tagata fakatamala ko ia telaa e finau valea kae salasala o fakamaluga aka ia ona taina. Fai atu, O taina! Ke fai a faiga, kae se ko muna, mo ou lakeiiga.
O TAMA TAGATA O TE ONE!
Ke iloa, fakamaoni, me i te loto o tagata kafai e isi ne momea faifili i ei e se mafai ke maua ne ia a Toku mmalo segata mai, io me manava ki te gali o te mmalu o te manavaga o Toku maalo mmalu.
O TAMA TAGATA A TE ALOFA!
A koe e toe tasi kalofaga mai i te maluga matagofie kae mai i te lakau faka-te-lagi o te alofa. Ke fai tou kalafaga e tasi ko sua kalafaga ko nofo koe i te nofoaga faka-te-lagi ke ulufale ki te faleie o te favavau. Fakalogo ki te mea telaa ne fakaasi mai ne te pene tusitusi matagofie.
O TAMA TAGATA O TE MATAGOFIE!
Fakavave i te auala o te mmalu kae ulufale ki te lagi, kae uufale kit e lagi o munamunaga mo Au. Fakamaa a tou loto ki te kaaga o te agaaga, kae fakavave ki te alaalafaga o te Silisiliese.
O TE ATA MATAFI VAVE!
Ne vau mai tu o tulaga se iloa tonu kae ne fanaka ki tulaga maluga o te mautinoa. Fakamatala a te mata o te meatonu, ko te mea ke matea a te Gali Matagofie seai sena veli kae fai mai penei: e maluga a te Aliki, te silisiliese katoa o tagata faite mea!
O TAMA O TE MANAKOOGA!
Fakalogo ki te mea tenei: E se mafai ne mata o tagata o matemate ne latou a te Galie matagofie favavau, io me ko te loto mae ke fiafia i se mea aka na ko te teu mate. Me i te manakooga e salasala ki te manakooga, kae maua a te fiafiaga i te fakatasiiga a tino e pau mo ia.
O TAMLIKI TAGATA A TE PEFU!
Pono ou mata, ko te mea ke matea ne koe Tok taulekaleka; pono ou taliga, ko te mea ke lagona ne koe a te gali o Toku leo; fakamasa tou foitino mai i te tauloto; ko te mea ke kau-atu koe i Toku poto; kae fakamaalu tou foitino mai i maumea, ko te mea ke maua ne ke a tou vaega mai i te vasa o Toku maumea e-se-gatamai. Faka kivi ou mata, ten, ki mea katoaa na ko Toku gali; pono ou taliga ki mea katoa na ko Taku muna; faka-masa a tou loto mai i te tauloto o mea katoa na ko te o poto mai ia Au; kae mai i te kiloga maina, ko te loto maa mo te taliga fakalogo ke ulufale atu koe ki Toku nofoaiga.
O TAGATA E LUA ANA KILOGA!
Pono a mata e tasi kae pula a te sua mata. Pono a te mata e tasi ki te lalolagi mo mea katoa i ei, kae pula a te sua mata ki te matagofie mmalu o te Fakapelepele.
O AKU TAMA!
Au e mataku, mafai e se maua a te tagi a te lupe o te lagi, me ka apulu ifo koe ki te ata o te galo ifo katoatoa, kae, ka se toe matea a te gali o te losa, ko foki koe ki te vai mo te fatu.
O TAUGASOA!
Sa liakigina a te matagofie favavau ki se matagofie telaa e mate, kae se fakatokagina a tou alofa ki te lalolagi tenei o pefu.
O TAMA TAGATA A TE AGAAGA!
Ka vau taimi, ma fai a te naitigikale o te mmalu ka se toe tala mai a mea funa fakaofoofogina ko koe ka se maua ne koe a te leo faka-te-lagi mo te leo mai luga.
O TE POGAI TONU O TE FAKATAMALA!
E uke a laulaufaiva e faipati i te lauga e tasi, kae uke a mea fakaofoofogina funa e fakaasi i te leo e tasi;kae fakaofoofogina me seai se taliga ke fakalogo, io me se loto ke maina.
O TAUGASOA!
A faitotoa ko matala i luga i te Koga-e-seai-sena-koga tu matala mo te kogamea o ia tela e alofagina e laku ki luga i toto o tino alofa, se ko tino katoa me mo tino fua e maua ne latou a te fakai faka-te-lagi, penei mo tino konei, kae mutana ifo ne maua e matakalekale kau paia o loto o latou.
O LATOU KOLA I TE PALATAISO TAFASILI I TE MALUGA!
Kalaga atu ki tamaliki o fakamautinoa tonu me i loto o te mmalu, e pili atu ki te palataiso faka-te-lagi, a te fatoaaga fou ko sae mai, siomiagina kae fakapukupukugina ne tino o te nofoaga maluga pela foki mo latou i te palataiso maluga. Taumafai, ko te mea ke maua ne koe a te tulaga tena ko te mea ke iloa ne koe mea funa o te alofa mai i te pula-matagi kae tauloto a te mea funa fakate-lagi a te atamai mai i fuataga favavau. E filemu a mata o latou kola e ulufale atu kae e nofo i loto!
O OKU TAUGASOA!
Ko puli ia koe me i te taeao tonu mo te malapulapu, me i kogamea tapu fakamanuiaaga koutou i Oku mua mailalo o te mmalu o te lakau o te ola, telaa e toki i te palataiso matagofie katoatoa? E ofo koe o fakalogo ki Aku muna konei tafasili i te mmalu e tolu: O taugasoa! Sa manako ki tou loto i lo o Toku finagalo, sa manako ki te mea telaa e se mafaufau Au ki ei mo koe kae sa fakasae mai kia Au mo te loto mate fakamaseigina ki mafaufauga faka-te-lalolagi mo naunauga. E mata koe fakammalu ne koe otou agaaga o koe i te itula tenei ke masaua a te koga mo kogamea kolaa o te meatonu o Taku Muna mafai e fakamaoni atu kia koutou katoa.
I te valu o te laina tafasili i te malu, ite lima o te Tapeleti o Palataiso, Ana muna;
O LATOU KOLA E MOE PELA MENE TINO MATE I TE MOEGA O TE SE FAKALOGO!
Tausaga ko teka ako tou olaga aogaa ko pili o oti kae seai aka loa se manava matakalekale e tasi kai maua ne te nofoaga mmalu mai ia koe. Koe e galo i lalo o te vasa o te se talitonu, a ko ou laugutu e takutaku mai ne koe a te talitonuuga e tasi a te Atua. A Ia telaa e takalialia Au i ei e alofa koe i ei, a ko Toku fili ko fai ne koe mo fai tou taugasoa. Kae e se iloa ne koe i tou sasale i Toku lalolagi mo te loto se manava se kae loto malie, kae taga la i ei i Toku lalolagi ko fiu i te koe mo mo mea katoa i ei e se talia ne latou koe. Moi fai ke pula ou mata, ka manakogina ne koe se fia o fakafanoanoa i lo i te mate telaa e sili i te ola.
O TE PEFU MASASAGIA!
Au e manako o sautala mo koe, a ko koe e se mafai o fakatuanaki mai kia Au. Te pelu o tou teke ne fakasiiga ne ia a te lakau o tou fakamoemoega. I taimi katoa Au e pili kia koe, ka ko koe e mao atu mo Au. Te faifaiiga se mafai o galo ne fakatoka ne Au mo koe, kae ne fai ne koe a masiasiiga se lausia mo koe. Nei koi isi se taimi, foki mai, kae sa fakamaumau gina a tou taimi.
O TAMA TAGATA A TE MANATUNATU!
A tino poto kae atamai e fia tausaga ne taumafai kae seki maua ne latou ke oko atu ki te Matagofie Katoatoa; ne fakaaogaa a te olotou taimi o salasala a Ia kae siki matea ne latou te matagofie o Tena mata. A koe ne taumafai malie fua kae ne maua ne koe a tou fakamoemoega kae ne seki salasala kae ne maua ne koe a tou fakamoemoega. Kae se iloa ne koe ia koe ne pulou i loto i te veli o tou feitu faka-te-foitino, ko ou mata ne seki taumata ki te taulekaleka o te Fakapelepelegina, ne seki patele foki toku lima ki Tena gatu. A latou kolaa e isi ne mata, ke onoono kae ofo.
O A LATOU KOLA E NOFO I TE FAKAI O TE ALOFA!
Ko malaia faka-te-foitino e fakatosala ne ia a te moli-gako favavau, mo te gali o te Talavou faka-te-lagi e galo ifo i te veli o te pouliga o te pefu. Te Pule o te tupu o te alofa ko see ne fai ne taagata sauaa mo te lupe o te mmalu e nofo fakapagota i mania o lulu. A latou kolaa i te faleieo te matagofie mo latou kolaa i te lagi e tagi fanoanoa, kae nofo mai i te nofoaga o te fakatamala kae fai koutou pelaa mene tausoa tonu. Te seai se aogaa o ou mafaufauga se aogaa.
O KOUTOU KOLAA VALEA, KAE IISI SE IGOA KE ATAMAI!
Ne i fea koe o pei ne koe a gatu o takitaki mamoe, kae iloto ia koe, ko fai koe me ne ulosa, e alamati ne ia Taku lafu mamoe? A koe e pela mese fetu, tela e fanaka i te vaveao, kae maina malapulapu, e takitaki a tino masei ki Toku fakai ko to i tua o te auala amio masei.
O KOE E FOLIGA MAI ME LEI, KAE I TOU KANO LOTO E LAILAI!
A koe pelaa mese vai maa kae kona, telaa i te kioga mai tua e matakalekale kae kafai e tami ne te Tino Tofotofo faka-te-lagi, e seai se motiga e taliagina. Ao, pelaa mo te vae o te la kafai e kasa ki luga i te pefu mo te kilaasi, e kese a te mainaaga pelaa mo te fetu mai i te lalolagi e se maua o fua a te kese!
O TAUGASOA I TE LALOLAGI!
Faitali malie. Kai lagona aka loa ne koe me i te taugasoa mo te fili e tau o nofo i te loto e tasi? Avatu ke atea a te tino faimalaga, ko te mea ko te Taugasoa ke ulufale ki Tena fale.
O TAMA TAGATA A TE PEFU!
A mea katoa i te lagi mo te lalolagi ne fakammalu katoa mo koe, na fua ko te loto telaa ne faiite ne Au mo te fale o Toku taulekaleka mo te matagofie; kae e ui iai ne ave loa ne koe Toku fale ki sua tino kae se ko Au; kae kafai ko fakaasi Toku mmalu ko sala ki Tena koga ne maua ne Ia a te tino kese, seai sena fale, fakavave ki te kogamea o te Fakapelepele. Kae seiloa me funa ne Au tau mea funa ko te mea ke se taema a koe.
O TE POGAI TONU O TE MANAKOGA!
I te ukega o vaveao ne fuli mai Au i te koga seai ki tou nofoaga, kae ne maua ne Au a koe i te moega o te logotonu e fakalavelave mo nisi tino i lo a Aku. Kae pela mo te mainaaga o te agaaga, Au ne foki ki te nofoaiga matagofie kae ne seki manavagina i Toku koga ne Au ki tino mmalu.
O TAMA TAGATA O MANUIA!
Mai i lapaisi o te seai lele loa, falatasi ki ei a te fatu o Taku fakatonuuga ne faite koe ne Au ke foliga, kae fakammalu ne Au sose mea foliki mo tau akoakoga pela foki mo te pogai tonu o meaola katoa. Nei kae mai konei ne aumai i te manava o tou matua, ne avatu ne Au e lua a koga e maua i ei a susu, ko mata mo ou tausi, mo loto ke alofa atu kia koe. Mai i Toku alofa-kaimalie ‘mai lalo o te ata o Toku alofa ne puti aka koe ne Au, kae leoleo koe ne Au ki te uiga tonu o te alofa mo te gali. Ko toku fakamoemoega i mea katoa konei ko koe ke maua ne koe Toku maalo favavau kae ke aogaa foki koe ki Toku fakamanuiaga se matea ki mata, kae nofo mai loa koe i te se fakaloga, kae i te matuaga a koe ne fakatamala katoa koe ki Aku fakamanuiaaga, kae fakaaogaa ne koe tou ola seai se aogaa, kise tulaga ko puli lele loa iia koe a te Taugasoa, kae nofo koe i loto i te nofoaga o Toku fili.
O TAVINI A TE LALOLAGI!
E uke a vaveao ne agiagi atu a te matagi o Toku alofa-kaimalie ne maua ne ia a koe i tou moega-paiee e to tau moe. Fanoanoa i tou malaia e foki atu ki te koga ne vau i ei.
O TAMA TAGATA A TE ONE!
Kafai ko lafi mai koe ki Au, se toe sala aka se tino i Oku tafa, sa toe fakaikumata ki Toku taulekaleka, pono ou mata ki te lalolagi mo mea katoa i ei, me i Toku finagalo mo te finagalo o sua tino i Oku tafa, pela mote afi mo te vai e se mafai o nofo tasi i te loto e tasi.
O FAI TAUGASOA KI TE TAGATA KESE!
Te moligako o tou loto e fakaagina ki te lima o Toku malosi, sa tamategina ki te matagi faka-ko-tua o te foitino mo te manakoga. Te tino fakagata masaki ko te masaua mai o Au ne koe, sa puli ia koe. Fai Toku alofa mo fai tou manuia mo tou fiafia ki tau kiloga mo tou ola.
O TOKU TAINA!
Fakalogo ki muna gali o Toku laulaufaiva magalo pela mo te ani, kae inu a te suavai o te mmalu faka-te-lagi mai i Oku laugutu magalo. Toki a te tega o Toku atamai faka-te-lagi i te kauone matakalekale o tou loto, kae fakasuusuu ki te vai o te mautinoa tonu, tela ko te akanisi(hyacinths) o Toku poto ke tafuke ola lanulauniu i te fakai tapu o tou loto.
O LATOU KOLA E NOFO I TOKU PALATAISO!
Mai i lima o te alofa-kaimalie ne toki ne Au i te fatoaaga mmalu o te palataiso a te lakau foliki o tou alofa mo te fai-taugasoa, kae ne fakasuusuu ki matulutulu-uga lei o Toku gali, nei te itula ka fua tena fuaga ko oko mai taumafaiga ko te mea ke leoleogina, kae moa e kaigina ne manakoga mo te alofa fakavale.
O OKU TAUGASOA!
Fakagata te moli o te fai mea see, fakaka i tou loto a te moli o outou loto favavau o te takitakiga faka-te-lagi. Me e se leva a latou kola e tofo ne latou a tino, i mua o te Fakapelepele, ka se talia ne latou se mea aka na ko uiga lei kae matakalekale mo faiga mmalu kae matakalekale.
O TAMA TAGATA A TE PEFU!
A latou kola atamai se mafai o faipati seiloga fua ko oti ne lagona ne latou te mataupu pela mo ia tela faifekau, se manako ki tena ipu vagana ko maua ne ia te tino salasala, ako ia tela e alofa se mafai ne ia o tagi mai i poko o tena loto seiloga fua ke matea ne ia te taulekaleka o tena fakapelepele. Tela la toki a tega o te atamai mo te poto i te one matakalekale o te loto kae funa ke galo, ke oko ki te akanisi(hyacinths) o te atamai faka-te-lagi ko puna mai i te loto o tagata kae se vau mai peela mo one.
Ite laina muamua a te Tapeleti e tusia penei kae mailoto i te koga tapu o te Atua e funa i ei.
O TAKU TAVINI!
Sa liakinagina a te mea tela se maalo e favavau, kae sa peigina ke atea te maaloo faka-te-lagi ona ko manakoga faka te lalolagi. Tenei a te vaitafe o te ola favavau tela ne tafe mai i te vaipuna o te pene tusitusi o te alofa, manuia a laotu kola e inu!
O TAMA TAGATA A TE AGAAGA!
Ofa tou puipui ke maofa, pela mote manuafi tela e eva ki luga i te lagi mmalu.
Faka-avanoa tou loto kae fakafonu ki te agaaga o te alofa, kae nofo i te nofoaiga malu faka-te-lagi.
O TAMALIKI A TE PEFU!
Ke se loto malie koe ki te gali o aso taki tasi, kae moa koe e fakaseai mai koe i te malolo favavau. Sa fakataugina a te fatoaaga o te fiafia ki luga i te fakatuuga o pefu o te lalolagi nei. Kae mai i tou falepuipui fanaka ki luga i te koga laseasea, kae mai tou foitino tagata vau o eva tau evaga ki te palataiso o te Seaisekoga.
O TAKU TAVINI!
Fakasao mai koe i fifiiga o te lalolagi tenei, kae fakasao a tou agaaga mai i te falepuipui o tou foitino. Fakaogaa a tou avanoaaga, me e se toe vau kia koe.
O TAMA TAGATA A TAKU TAVINI FAFINE!
Kafai e matea ne koe a te malo seai se gataga, ka taumafai ke liakina ne koe a te lalolagi se tumau tenei. O funa a te sua lalolagi kae fakaasi atu a te sua lalolagi se mea fakaofoofogina tela ko latou fua e matakalekale olotou loto e
mafai o malamalama.
O TAKU TAVINI!
Ave ke atea tou loto mai mea se lei, kae ke se pokotia i te faifili, ke ulu atu koe ki
te nofooga malu faka-te-lagi.
O TOKU TAUGASOA!
Ke sasale koe i auala o te fiafia o te Taugasoa, kae ke iloa i te Tena fiafiaga e iloto i te fiafiaga o Ana meaola. Tela: e seai se tagata e tau o ulufale ki loto ite fale o tena taugasoa se iloga ke fiafia ki ei a tena taugasoa ko te mea moa e puke ne ia a mea taaua a tena taugasoa io ko te mea ke fai a te mea e loto a ia ki ei i lo i a te loto o tena taugasoa kae moa foki e salasala ne ia tena lei i lo tena taugasoa. Mafaufau ki ei, a koe tela e isi sena mainaaga.
O TAUGASOA O TOKU NOFOAIGA TUPU!
Sa fakalogo ki se mea masei, sa kilokilo ki se mea maseai, sa fakamalalogina tou foitino, sa fanoanoa kae tagi foki. Sa faipati se mea masei, ko te mea moa e lagona ne koe ke faipati atu kia koe, kae sa fakalasilasi a mea see a nisi tino ko te mea moa e fakalasilasi au mea see; kae sa manatu koe ke fakamalalo tulaga o sose tino ke se fakaasi a te tulaga faletau o koe. Tela la ola fakalei aso o tou olaaga me e toetoe fua ko tou mafaufau ke moa e lailai i mafuafauga, ko loto ke matakalekale, ko tou uiga ke fakamalugina, ko te mea, ke saoloto kae lotomalie, ke ave ke atea tou foitino tonu, kae ko fakafoou ki te palataiso faka-te-lagi ke nofo i maalo favavau ki te se gata mai.
O! O! KOUTOU KO LA E ALOFA KI TE LALOLAGI MO ANA MEA GALI!
E pela mo te makini o te uila a koe ne fakaseke i tafa te Fakapelepele Toko Tasi, kae ko tuku tou loto ki mea fakavalevale a satani. Ne ifo koe i mua o ou mafaufauga seai se aogaa, kae fakaigoa ne koe ki te meatonu. Ne fuli ou mata ki mua o te mea makaikai, kae ne fakigoa ne koe ki te pula lakau Ne seai se manavaga matakalekale e manava ne koe, ne seki ai foki se matagi o te se fakapiki ki te lalolagi ne agiagi mai i te taulotooga o tou loto. Ko oti ne pei koe ke atea te munamuna-aga lei a te Fakapelepele kae ne solo ne koe ke atea mai i te tapeleti o tou loto, kae pela mo manu o te tavateoga, ne gasue tou foitino kiloto i laukele toki ki ou manakoga mo alofaga.
O TAINA I TE AUALA
Kaiaa ne fakatamala koe o takutaku te Fakapelepele Toko Tasi, kae tausi mai a koe ke mao mai i Tena nofoaga malu. A te uiga tonu o te taulekaleka ko te nofo i loto o te faleieseai ne pou, ne fakatu i te nofoaiga tupu matagofie, kae fakalavelave koe i ou maliega paiee. A te manaogi gali ote maluga ko manava kae agiagi mai te manavaga fakamanuia ako koutou la e se pokotia kae se maua ne koutou. Mea nei mo koe mo latou kola e sasale i otou auala kae tautali i outou kalofaga.
O TAMALIKI O MANAKOGA FAKA-TE-LALOLAGI
Ave keatea te gatu o mafaufauga seai ne aogaa, kae vau ke atea mai gatu o te fakamaualuga.
I te tolu o laina tafasili ite mmalu ne tusia kae tausi ite Ruby Tapeleti ne te pene tusitusi e se matea kae fakaasi mai penei:
O TAINA!
Ke onosai koe ki sua tino kae ke se fiafia koe ki mea se lei. Ke se faka-matamata koe ki aumea, moa koe e maa mafai e faka-maseigina i Toku matagofie! Ne faiite katoa ne Au a mea mai i te one, kae toe fakafoki ne Au ki te one.
O TAMALIKI A TE PEFU!
Fai atu ki tino maumea e uiga ki te manavaaga a tino mativa i valuapo, me i te takitaki o latou ki te auala o te malaia kae ka se maua ne latou a te Lakau ote Maumea. O tuku atu kae kaimalie e Oku, e fakamanuia a ia e puke ne ia Oku uiga llei kona.
O TOE MEA TAFASILI ITE AOGA O TE ALOFA!
Ave ke atea katoa manakoga o puke a mea a tino kae ke loto malie, me ia latou kola e puke ne latou a mea a tino e fakamanatua, a ko latou kola e taumafai o loto malie e alofagia kae tavaegina
O TAMA TAGATA A TAKU TAVINI FAFINE!
Sa fanoanoa ona ko te mativa io meko te iloa tonu ona ko tou mamea, me i te mativa e tautaligina ne te maumea ako te maumea, e tautaligina ne te mativa. Ke mativa i mea katoa kae maumea i te Atua se mealofa fakaofofogina, sa fakafolikigina a te mea tenei me i te fakaotiga e fai ne Ia koe ke maumea koe i te Atua, kae ko iloa ne koe a te uiga ote muna tenei. “I te mea tonu a koe e mativa,” i te muna tapu a te Atua, “a te Atua ea Ia a mea katoa,” pela mo te mafaa mai o te ata tonu o te taeao kae maina malapulapu mai ki luga ite sikulagi ote loto o ia tela e alofa, kae nofo tonu ite nofoaga tupu o te maumea.
O TAMALIKI A TINO FAKATAMALA MO TE FINA LALOLAGI!
Ne fai ne koe Toku fili ke ulufale ki Toku fale kae atuli ne koe ke atea a Toku taugasoa aua ne fai ne koe ke alofa ki sua tino i lo o Aku i otou loto. Fakalogo ou taliga ki muna a Taugasoa kae fuli ou mata ki Tena palataiso. Taugasoa fina lalolagi, e salsala mo te lei o latou loa, kae alofa foki eloa latou ia latou eiloa, a ko Taugasoa tonu e alofa tonu kia koe mo te lei o koe; e tonu, ne pokotia a Ia ona ko au takitakiiga e uke. Sa fulitua ki se Taugasoa pena, fakavave kia Ia. E pena mo te fetu ao ote muna tonu mo te fak-tuanaki tela ko oti ne fakaasi mai luga ote sikulagi o te pene a te Aliki o igoa katoa. Fakalogo ou taliga ke lagona ne koe muna a te Atua, te Fesoasoani i mea faigata ko te Ola-fua.
O KOE TELA E FAKAMATAMATA I MAUMEA O TE LALOLAGI NEI!
Ke iloa ne koe a te mea tonu i te maumea se tuakoi malosi i te vasia o tino salasala mo tena mea e fakamoemoe ki ei, pela foki mo te vasia o tino alofa mo ia tela e alofa kiei. Mo tino maumea, kae ne naai tino fua, e mafai o maua ne latou te alaalafaga o Tena mmalu se mafai foki ne latou o ulufale atu ki te fakai o te lotomalie. E llei la na mo ia, tela, e maumea, ka se mafai o fakatuai ne tena maumea mai i te maalo faka-te-lagi, e se mafai foki ne latou ki luga i maalo se mafai o galo. Mai i te Igoa Tafasili i te Maluga! Te mainaaga mo te mmalu o tagata maumea e fakamaina ne ia latou kola ite lagi pela loa mo te fakamainaaga o tagata ote lalolagi ne te La!
O TINO MAUMEA OTE LALOLAGI!
A tino mativa i otou vasia ko Oku fakatuanaki, leoleo fakalei Aku fakatuanaki kae sa saga fua koe ki tou faigofiega.
O TAMA TAGATA A TE ALOFA FAKA-TE-LALOLAGI!
Fakamaa tou foitino mai ite lailaiga o maumea kae ite filemu katoatoa fano ki mua i te nofoaiga o te mativa, kae mai ite vaipuna o te se fakapiki ki se mea ka inu ne koe a te uaina o te ola se gata mai.
O TAKU TAMA TAGATA!
Te fakatasi ki luga i te potukau amio masei e fakalasi ne ia te fanoanoa, ako te fai-taugasoa ki tino amiotonu e fakama ne ia a lailaiga ote loto. A ia tela e salasala o fai-talosaga mo te Atua, tuku ke fai-taugasoa mo Ana fakapelepele, ako ia tela e manako o fakalogo ki te muna a te Atua, ka fakalogo ana taliga ki muna a Ana tavini filifilia.
.
O TAMALIKI TAGATA A TE PEFU!
Faeteete! Sa sasale mo tino amio masei kae moa e fai taugasoa mo ia aua ite fai taugasoa e fuli ne ia a te mainaga ote loto ki te afi.
O TAMLIKI TAGATA A TAKU TAVINI!
Kafai e sala koe kite gali o te Agaga Tapu, ke fai-taugasoa koe mo tino amiotonu, me ia ia ko oti ne inu ki te ipu o te ola se gata mai i lima o latou ko la e tauave ne latou a ipu o te ola se gata mai pela mo te tafataeao tonu tela e fakamaina ne ia loto o tino mate.
O LATOU SE FAKALOGO!
Se mafaufau me i mea funa ote loto e funa ke iloa ne koe mo te fakamaoni me i mea kona e fakamau fakalei eloa kae maina ite mmalu o Ia.
O TAUGASOA!
E fakamaoni Au o fai atu, me i sose mea e funa i tou loto kia Matou e matala kae maina pela mo te aso, ako te mea tela e funa, ko te gali o Matou kae se mo koutou.
O TAMA TAGATA A TAGATA!
A te motiga vai mai ite vasa e se fuafuagina o Toku alofa ne avatu ne Au ki tagata ote lalolagi, kae maua aka e seai se tino ne aogaa ki ei kae ko tino katoa ne fuli mai ite uaina faka-te-lagi o te fealofani ki luga ite se maa o amioga kae ko loto malie ki te ipu, o te olaga kae liakina a te mea gali ote olaga se gata mai. Te masei ko te koga tela e loto malie a ia ki ei.
O TAMA TAGATA A TE PEFU!
Sa fuli mai ou mata mai i te uaina e se fuafuagina a te Faka-pelepele ola ki te se gata mai, kae moa e faka-matalagina ki luga i mea se mo faiga seai ne uiga. Puke mai ou lima kia Ia Puke-Ipu faka-te-agaaga a te ipu o te olaga se gata mai, ko te atamai kaatoa ke mafai eo koe, ko te mea ke lagona ne koe te leo fakaofoofogina e kalaga mai i te koga se matea ki mata. Tagi kiluga a koe tela e malalo ou faka-moemoega! Aia la ne fulitua ai koe ke atea mai i Taku uaina mana kae e se gata mai ki vai kola e galo vave?
O TINO OTE LALOLAGI!
Ke iloa, mo te mautinoa, me ite malaia e se matea tenei e tautali atu ia koe, mo te taui fakamataku e faitali kia koe. Sa mafaufau aka pela me i Au mea ne fai – ko oti ne solo mai i Oku mata. Mai i Toku gali! Au mea katoa ko oti ne lomi fakalei ki luga i tapeleti o
fatu fakavae taaua.
O TINO PULE SAUAA O TE LALOLAGI!
Au mai ke atea ou lima mo amioga fakasauaa, me te Au ko oti ne fai feagaiiga ke se fakamagalo sose amio se tonu a sose tagata. Tenei Taku feagaiga tela ne faka tulafono ne Au se toe maua o fuli i te tapeleti tausi ne fakamau failoga ki
Taku sainaaga o te malogofie.
O TINO PULE SAUAA!
Toku loto maulalo ko fakaloto-toa ne ia koe ako Toku faka-puapuagagina ne au ne ia koe ke fakatamala i se tulaga tela ka maua ne koe te manakoga o fai ou auala fakamataku tela ka oko atu kise fakamasei. Kai mafaufau koe i Au e se fakalogo io me se iloa ne Au.
O TINO FAIMALAGA
Te laulaufaiva ne faka-foliga ne Au mo Oku takutaku sa faka-maseigina. Kafai a te afi o tou fuaitino ko oko atu; masaua ne koe ou vaivaiiga kae se ko mea see o Aku meaola, auaa me ia koutou takitoko tasi e iloa loa ne koe a tou olaga i lo i tou iloa ne koe a nisi tino.
O TAMALIKI FAKAVALEVALE
Ke iloa, mo te fakamaoni, me koi mafaa mai a te ata o te vaveao i luga i te sukilagi o te mmalu favavau au faiga faka-tiapolo mo mea taaua kola ne fai i te pouliga o te po, ka fakaasi atu ke maina kae faasi ki mua o taagata ote lalolagi.
O TE MOUKU TELA E OLA MAI I TE PEFU!
Kaia ou lima lailai ne puke ne koe ki tou gatu kae aia tou loto e fakalailai ki tou manatu mo tou alofa faka-te-lalolagi ne salasala ei koe o faipati mo Aku kae ke ulufale mai ki Toku nofoaga tapu? E mao, e mao mai a koe mai ite mea tela e mafaufau ko ki ei.
O TAMALIKI A ATAMU!
A Muna tapu kae maa mo faiga lei e oko atu ki luga i te lagi o te lagi o te matagofie. Taumafai ko au faiga ke fakamaa mai i te pefu o tou masei kae salasala ki se manuia mai i te nofoaga o te matagofie; auaa e se leva a latou kolaa e fakamautu ki ei a tagata ka, i mua o Ia Tela ko te Fakailisili, ka se talia ne latou se mea na fua ko amioga lei mo faiga tafasili ite matakalekale. Te mea nei ko te fetu-ao o te atamai mo mea fakaofoofo-gina faka-te-lagi ko la e maina i luga ite sikulagi o te finagalo faka-te-lagi. Ke fakamanuia a latou kola e fakalogo ki ei.
O TAMA TAGATA FINA LALOLAGI!
E gali te lalolagi e nofo koe i ei, kae moi fai ke oko atu koe ki te lalolagi matagofie, kafai ko fanatu a koe ki te sua lalolagi; e sua-magalo a te olaga mmalu mafai e inu i te ipu faka-ofoofogina mai i lima o te tulafono o te lagi. Kafai e maua a te tulaga tenei; ko fakasaoloto mai koe i fakamaseiga mo mate, mo galuega mo te agasala.
O TOKU TAUGASOA!
Ke masaua ne koe me i te feagaiga ne fai ne Au mo koe i luga i te Mauga o Paran, tela e tu I te puuga kae i tafatafaga o Zaman. Ko oti Au ne molimau i te lukuuga manuia i luga mo latou kolaa e nofo i te fakai o te favavau, kae seai se tino e fakamaoni ki te feagaiga. E iloa tonu mo te fakamatamata kae teke ne fai ne latou te loto, se tulaga tela ne seai se mea ne toe mai i ei. Kae i te iloaga ne
Au, Au ne faitali o se fakailoa.
O TAKU TAVINI!
A koe pela mese pelu loto maulalo e funa i te pouliga o tena kafu ko tena aoga e lilo mai i te iloa o tino fai matasana. Tenei ko vau mai i te talita o te manakoga ote foitino ko te fuafuaga o tou aogaa ke maina kae ke fakaasi ki te lalolagi katoa.
O TOKU TAUGASOA!
A koe ko te fetu-ao o te lagi i Toku mmalu, sa faigina te lailaiga o te lalolagi ke fakapuli ne ia tou mainaga. Lepe keatea a te ufi o te paie mote se fakalogo, kae mai tua o kaumana kae sae mai koe fepulofi kae fakatasi mo mea katoa i gatu ote olaga.
O TAMALIKI O UIGA SE AOGA!
Mo se taimi vave o tou maloo, ko liakina Toku maloo se maua o malepe, kae ko lakei mai koe ki te fiafiaga ote lotolagi telaa ne fai ne koe mo ou fakamatamata. Me i Toku matagofie! Tino katoa ka fakatasi ne au mai lalo o te lanu e tasi o te pefu kae ka loto maulalo katoa lanu kesekese e fakasao fua mo latou kola e fuli ne latou Toku lanu, mo te lanu tela e vau mai lanu taki tasi.
O TAMALIKI O TE FAKATAMALA!
Sa fakataka a tou fiafiaga ki te maalo o te lalolagi kae sa fiafia ki ei. Me ia koe e pelaa mo te manu eva se ti fita kae mautinoa o tagitagi i luga i kaula o lakau ke oko ki te oko mai o tena mate fakavave ko te Mate ka peei ne ia a ia ki te one, ko te leo gali, mo lanu o te manu ko galo atu, e seai se mea e iloa atu. Telaa faeteete, koe ko te tavini pologa!
O TAMA TAGATA A TOKU TAVINI FAFINE!
Te takitakiga ko oti ne tuku atu ki muna, kae nei ko tuku atu ki faiga. Tino taki toko tasi katoa o fai a faiga kolaa e matakalekale kae maluu, auaa i muna ko kope a tino katoa, a ko faiga e pogai fua ki o Motou tino fakapelepele-gina. Taumafai malosi i tou loto mo tou agaaga ola ke iloaga koe i au faiga. I te faiga atamai tenei a Matou e polopoloaki atu i loto i te tapeleti maina tenei kae maalu.
O TAMA TAGATA O TE FAKAMASINO TONU!
I te vaaitaimi o te po a te gali o Ia e se mafai o mate ko oti ne foki ifo mai te tumu tafasili i te taulekaleka o te fakanaa-gina ki luga i te Sadratu’l Mantahá (Kote lakau tela e tu ite fakaotiga o te auala se toe mafai o paasia), ne tagi kise tulaga maluga o te fanoanoa tela a lukuuga mai i luga mo latou ko la e nofo i te nofoaga i luga e tagi katoa ia Ia e tagi. Telaa ne fesiligina, Me sea a te tagi lotu lotu tenei? A Ia ne fai mai tali penei: Ne fakatonu atu Au ne faitalitali atu i te mauga o te fakatuanaki, kae ne seki manava mai ia latou e nofo i te lalolagi a te manogi gali o te amiotonu. Ne fakatonu mai ke foki atu ne matea ne Au naai lupe o te mmaluu faka-te-lagi e fakasauagina i loto i mania o kuli o te lalolagi. I ko na foki loa a te Tamafine o te Lagi ne fakavave o tala atu e se funa kae malifalifa mai i Tena fale, kae ne fesili atu ki olotou igoa, ne fakailoa atu katoa na loa ko tino e toko tasi. Kae i toe fakamalosiga, ne faipati ko te mataitusi muamua ne faipatigina, telaa ko latou e nofo i te nofoaga faka-te- lagi ne fakavave mai ki olotou nofoaga matagofie. Kae i te faipatiga o te lua o mataitusi ne siga katoa latou ki lalo, tasi kae katoa, ki luga i te pefu. I te taimi tena te leo ne lagona mai i
loto o te tugamau: “E mao kae se fanatu atu.” E tonu e fakamaoni ne Matou a te mea tela ne fai ne latou kae tenei loa koi fai ne latou.
O TAMA TAGATA A TAKU TAVINI FAFINE!
Ke inu mai i te laulaufaiva a te vai o te lagi faka-ofoofogina kae ke matea mai i te takitakiga e se funa faka-te-lagi a te matagofie o te fetu-ao o te atamai. Toki a tega o Toku atamai faka-te-lagi i te one matakalekale o toku fatu, kae fakasuusuu ki te vai o te talitonu ko te pula o te poto mo te atamai ke tafuke ola kae lanu launiu mai i te fakai mana o te loto.
O TAMA TAGATA O TE MANATUNATUGA!
E pefea a te leva e eva koe i te nofoaga o te manatunatu? Pakau ne tuku atu ne Au kia koe, ko te mea ke mafai ne koe o eva i te nofoaga faka-te-lagi mmalu kae se ko te nofoaga o mea valea a satani. Te selu foki, ne avatu ne Au ko te mea ke mafai ne koe o fili Oku kaufiliga lau usiusi, kae se mo sai a Toku gatiua.
O TAKU TAVINI!
Koutou ko lakau o Toku fatoaaga; e tau mo koutou o avatu a fuataga lei kae faka-ofoofogina, ko koe mo latou ke maumea mai iai. Telaa la e tau ko tino taki tokotasi ke galue i galuega o mea fai ki lima pela foki mo nisi galuega aka (crafts and professions), me i galuega kona e maua i ei a te mea funa o te maumea, O tagata malamalama! Me i fuataga e fakana ki luga i faifaiiga, a ko te alofa o te Atua e lava mo koe. A lakau kolaa e seai ne olotou fuataga e tau faeloa mo te afi.
O TAKU TAVINI!
Toe taagata tafa ki lalo ko latou ko la e seai ne olotou fuataga. A tino kona e fakamaoni atu me e lau ki tino mate, kae lei atu i tino mate i mata o te Atua i loo i tino paiee kae seai ne aogaa o lotou agaaga.
O TAKU TAVINI!
Toe tino manakogina ko latou kolaa e ola i olotou galuega kae fakaaogaa kia latou mo olotou kaaiga ona ko te alofa o te Atua, Te Aliki o lalolagi katoa.