The Universal House of Justice

Ridván 2026

To the Bahá’ís of the World

Dearly loved Friends,

Karon mosugod na ang ikaduha, ang mas dakong yugto sa Nine Year Plan. Nakita namo ang pangkalibotang komunidad nga Bahá’í nga nagkahiusang nag-uswag, ug makatarunganon nga masaligon sa dalan nga iyang gipili nga padulngan. Ang iyang pagkatataw ug puno sa pagtuo dili ikalimod. Wala mahadlok sa nagkadakong kagubot sa kalibotan, kini nakatutok sa iyang sagradong misyon. Nalipay kami labi na sa pagtan-aw sa mga bag-ong napamatuod-an nga mga tumotuo nga madasigong midawat sa ilang tahas sa natad sa pag-alagad ug pagbuhat uban niadtong dugay nang mga maunongon diha sa Tinuhoan. Ang mga third milestone cluster nagpakita sa tabunok nga yuta diin ang mga mabulokong kasinatian maani ug masabwag. Nalipay usab kaming nakita nga ang mga kahigalaan sa tanang dapit namalandong sa mensahe nga gihatag namo sa mga Counsellors nga nagtigom dinhi niadtong miaging Disyembre ug mikuha sa mga nahasulat niini alang sa ilang pagplano ug pagbuhat.

Ang adunay katuyoang espiritu mas nakita diha sa mga institutional meetings nga gihimo sa tibuok kalibotan. Sa makadaghang higayon, ang mga asoy niini nga mga tigom naghisgot og sama nga panghitabo: usang halalom ug mapuslanong panag-inistoryahanay nga nagagikan sa direkta nga kasinatian sa pagtukod og madasigong mga komunidad ug dili sa mga pangagpas o teyoriya. Kini nga panag-inistoryahanay napabuhi pinaagi sa nagpadayong proseso sa pagkat-on nga nahitabo diha sa matag dapit. Kini nahatagan og mas halalom pa nga pag-ila sa kamahinungdanon sa mga paninguha sa Bahá’í nga komunidad ug sa mga implikasyon nga ilang gikuptan alang sa nagkagubot nga kalibotan nga desperadong nanginahanglan og tumong. Ang pagbati sa responsibilidad ug pagtinguha kaylap nga mabati, ug anaa usab ang halalom nga pag-amgo sa gidak-on sa bulohaton nga naghulat. Sa makadaghan, kini nga panag-istoryahanay mohatag og dugang pa, ug mga katimbang usab nga panglantaw nga miila sa mga paninguha sa mga komunidad ug indibidwal nga dili lamang ang pagpatuman sa mga programa ug mga proyekto, apan ang pag-ugmad og usa ka pamaagi sa kinabuhi nga gipahaom sumala sa mga Diyosnong pagtulon-an—ang pag-umol sa mga pagbuhat, sa mga interaksiyon ug sa mga pangandoy.

Kining samang sinsero nga panag-istoryahanay, nga mipakita og tinguha sa pagkat-on, mao ang gipalambo sa tanang komunidad gikan sa national ug regional nga ang-ang ug hangtod na sa ang-ang sa barangay ug kasilinganan, ug sa mga lain-laing tigom, apil na ang mga tigom nga gipahiluna sa mga institusyon ug ubang mga luna nga mopatim-aw pa. Walay pagduha-duha nga kini mahitabo usab diha sa mga National Convention. Gilaoman namo nga makita ang mga sumbanan sa indibidwal ug hiniusang pagbuhat nga mapalig-on ug mapadako samtang kini nga panag-istoryahanay magpadayon. Sama sa kanunay, ang panag-istoryahanay gikinahanglang makadangat ngadto sa nagkadakong pundok sa mga kahigalaan, sa kasilinganan ug ubang adunay susamang panghunahuna nga mga kalag nga uyon sa mga paninguha sa pagkab-ot og espirituhanon ug materyal nga kauswagan nga nanukad sa kahiusahan sa katawhan. Ang mga luna nga gipahimutang alang sa pagpahalapad niini nga mga panag-istoryahanay—kalit man o naplano og dugay—usa ka timailhan sa nagkalalom nga pakiglambigit sa katilingban, ug kami naglaom nga kini modaghan ug mas mokaylap.

Daghan diha sa dakong katilingban nga nakasugat sa kasarangang mga kalihokan sa mga Bahá’í ang mahingangha sa iyang talagsaong mga kinaiyahan: kini nagagikan sa usa ka kinasingkasing nga pagpakabana alang sa kaayohan sa tanan, kini nahipunting padulong sa kahiusahan ug pag-alagad, ug kini nagsunod sa mga tin-aw nga prinsipyo, apan kini wala maghunahuna nga adunay siyay diha-dihang tubag sa matag usang suliran. Diha sa espiritu sa hiniusang paningkamot, ang mga Bahá’í nagtinguha nga makigtinabangay sa uban ug mokat-on uban kanila; ug sa ilang mga panagdugtong nga nahimo ngadto kanilang nagkupot og mga posisyon sa awtoridad ug katungdanan diha sa katilingban, sila sinsero ug tin-aw og panglantaw. Sila motinguha sa kausaban sa katilingban apan wala silay mga ambisyon sa politika o sa kaayohan sa kaugalingon, ug sila miila nga, sa pagsaka sa kabantog sa Tinuohan, mahinungdanong masiguro nga ang tinuod niyang kinaiyahan ug mga tumong masabtan og maayo. Sa daghang dapit, ang nagkalalom nga panagdugtong sa komunidad ngadto sa katilingban nagkahulogan nga, dili kalikayan, adunay mga bag-ong kahimtang nga kinahanglan atubangon ug mga bag-ong pangutana nga pagatubagon, ug kini makaaghat sa komunidad sa dugang pa nga pagpalambo sa iyang kaugalingong mga katakos.

Sumala sa amo nang gipatin-aw diha sa mensahe alang sa dili pa dugay nga Komperensiya sa mga Counsellors, ang usa ka mahinungdanong kalamboan nga nahitabo sulod sa miaging upat ka tuig mao ang paggula sa komunidad isip usa ka mas tataw nga tigpasiugda sa Plano, nga naghan-ay sa iyang kaugalingon aron pagtubag sa mga pihong panginahanglanon ug sa pagpauswag sa mga pihong natad sa paninguha, aron sa pagpatunhay sa pagbinuligay sa usag-usa pinaagi sa pagtinabangay nga mga kahikayan, ug aron sa pagkat-on nga mahimong mas epektibo pa diha sa nagtubo nga gambalay sa pagbuhat. Usa ka tataw nga ehemplo niini mao ang mga grupo sa kabatan-onan, nga nagtinabangay diha sa ilang lokalidad ug midasig aron moapil ang ilang mga ka-edad. Natural lamang nga ang ilang mga paninguha natabangan pagmaayo sa mahigugmaong pagdasig ug paggiya sa mga institusyon, apan ang mga batan-on nagpakita usab sa ilang katakos sa pagpasiugda ug sa pag-ila sa mga mabungahong dalan sa pag-alagad. Kasagaran, ang ilang mga paninguha nahitabo taliwala sa kagubot ug kasamok, sa walay kaangayan sa ekonomiya, ug sa halalom nga mga katilingbanong panagbulag-bulag. Nasayod kami sa mga hagit nga giatubang sa mga batan-on diha niana nga mga kahimtang, ug kami midalayeg kanila sa ilang pagpugong batok sa pangagda sa pagpanaway ug pagpasipala, apan hinuon sila nangita og mapuslanong mga paagi sa paglikay niana nga mga dagkong babag ug sa pagpaningkamot padulong niadtong sa kaulahian makabuntog kanila.

Hinigugmang mga higala, bisan unsa kagubot sa mga panahon, kami moaghat kaninyo nga dili mabalaka o mawad-an og paglaom. Si ‘Abdu’l-Bahá mitambag kanatong tanan sa pagsalig sa mga paghatag sa Diyos, ug sa “pagkanunay nga malaomon”, nga “magmalig-on” sa atong paglaom, ug nga mahimong “hinungdan sa paglaom sa kalag nga nawad-an og paglaom”. Kon ang kapunawpunawan sa kalibotan mongiob, ang paglaom mamahimong usa ka nihit ug bililhon nga bahandi—apan kini mao ang usa diin ang komunidad sa Labing Halangdong Ngalan buhong nga nahatagan tungod sa iyang pagtuo kalabot sa kaugmaon sa katawhan ug tungod usab sa iyang nakat-onan gikan sa iyang kaugalingong kasinatian. Ang panon sa katawhan nangandoy sa paglaom nga inyong madala ngadto sa ilang mga kasingkasing.

Alang sa bulawanong ehemplo kalabot sa komunidad nga sa dugayng panahon mipasilong sa dilaab sa paglaom, kami molingi sa gidaugdaug apan kanunayng mapailobon, kanunayng makusganon nga mga sumosunod ni Bahá’u’lláh diha sa Duyan sa Iyang Tinuhoan. Tan-awa unsa ka disiplinado sila nga nagpabilin, unsa ka lig-on sa pagsunod sa prinsipyo sulod sa pipila ka mga dekada sa walay hunong nga pagdaugdaug—ug unsa kalig-on sila sa pagkat-on gikan sa mga pag-uswag nga nahimo sa ilang mga kaubang tumotuo diha sa ubang mga dapit, unsa kahugot ang ilang pag-alagad ug paghupay sa ilang kaubang mga lumolupyo diha sa ilang kaugalingong yuta. Alang sa daghan nilang mga kauban sa nasod, sila mao, ug nagpadayon nga banwag sa paglaom, ang tuboran sa kalooy ug panabot, ug ang mga sinaligang kauban diha sa dalan sa pag-alagad. Sulod sa miaging mga semana ug mga bulan, silang mga kahigalaan nga among gihigugma pag-ayo kanunay nga kauban sa among mga hunahuna ug walay hunong nga gipahinungdan sa among mga pag-ampo, sama nga nakasiguro kami nga sila usab anaa sa inyong mga pag-ampo, ug nangaliyupo ngadto sa Kanunayng Mahigugmaong Ginoo sa pagkupot kanila diha sa gakos sa Iyang malumong pagpangga.

Ang inyong kaugalingong mga paninguha sa pag-uswag sa Kawsa sa Diyos mao usab ang gitutokan sa mga pagpangaliyupo nga among gihalad diha sa Sagradong Tugkaran—labi na karon, sa pagsugod sa bag-ong yugto sa Nine Year Plan. Sa matag higayon nga kami moadto sa Balaang Dapit, kami nangaliyupo sa diyosnong tabang ug pagbulig alang sa inyong mga pagpaningkamot, ug kami nangamuyo og kalig-on ug kusog alang kaninyo diha sa inyong panlimbasog. Hinaot nga kamo walay paglangan nga molihok ug madasigon nga mokat-on, ug hinaot nga ang tanang mga panalangin sa langitnong gingharian mahianha diha kaninyo.

- The Universal House of Justice