The Universal House of Justice
Ridván 2023
To the Bahá’ís of the World
Dearly loved Friends,
Inooqatigiit pinngitsooratik suliassaqarfimminnut annertuumut naapertuuttumik isumaliortaatsimikkut qaffasissumik aalajangiusimassuseqartuusut matumuuna saaffigigatsigit nuannaangaarpugut. Annertoqaaq, ila annertungaarpoq ilissinnut asanninnerput, tarnivullu pavunga aarsaarput qanoq inuunersi Bahá’u’lláhp Ilinniutaannik sunnerneqarsimasoq, tunniusimallusi ilumoorlusilu ilusilersorniarissi isigileratsigu, Saqqummerneratalu erngi uumassuseqalersitsisut nunarsuarmioqatigiinnut qilangaartunut neqeroorutiginiarlugit ilungersortusi takugatsigu. Siunertaqartumik piumassuseqangaarnersi tamanut ersarippoq. Amerliartornissaq siunertaralugu annertusaalluni siuariartornissamut piorsaanerit aalajaallisaanerillu, inuiaqatigiit iluanni inuuneq pitsanngorsaaviginiarlugu iliuuseqarniarlusi akuunersi, inuiaqatigiillu akornanni oqallisaasunut oqalliseqataanersi ingerlaavarsinnarpoq, taamatullu aallutaqarnersi sumiiffinni anguniagaqarfissinni allaat pissusissamisoortumik naapertuuttuusoq ersarissiartuinnarpoq. Tamanna malunnarnerpaavoq ilaasortat amerliartuinnartut akornanni suliniutinut assigiinngitsunut akuujartuinnarneranni, suliniutillu taakku ataasiakkaarlutik tamarmik Upperisap nukinganik inuiannik nappartitsisinnaassusilimmik pilersitsisinnaassuseqarput.
Ukiunut Qulingiluanut Pilersaarusiap pilersinneqarneraniilli qaammatit aqqaneq marluk ingerlareersullu, nuannaarutigeqalugu takusimavarput nunarsuaq tamakkerlugu anersaakkut suliniuteqarnerup tamatuma ikinngutit qanoq kajumissuseqalersillugillu uummarissarsimatigigai, immikkullu iliuuseqarnissamut qanoq sukasarneqarsimatigisut. Immikkut eqqumaffigisassat siullerpaat ilagisimavaat pilersaarusiat atuutilerneqassasut qulakkeerneqarlutillu, nunat nunallu immikkoortortaqarfiisa iluanni sumiiffinni anguniagaqarfiusussat iluanni pisussat allannguutaasut pingajuattut alloriarfissaq minnerpaamik ataaseq anguneqareersimappat: taava inuit sumiiffimmi amerlasoorsuakkuutaarlutik suleqatigiillutik tapersersoqatigiillutillu inooqatigiinnik uummaarissunik pilersitseqatigiissapput. Taamaattoq manna eqqumaffigalugu, ukiunut tulliuttunut 25-nut anguniagaqarfissaq tassaammat nunarsuaq tamakkerlugu sumiiffinni anguniagaqarfiusussat iluanni sumiikkaluartuniluunniit tamani pimoorussisamik ineriartornissaq anguniarlugu pilersitsisoqassasoq, sumiiffinnilu anguniagaqarfiusussani Upperisap ammarneqarnissaa uppertut sulissutigilereerpat, pimoorussisamillu ineriartornissaq anguniarlugu sumiiffinni sulissuteqarfioreersuni aamma ilungersuuteqarnertik annertusarlugu. Nunarsuaq tamakkerlugu sumiluunniit pionerit sassarlutik periarfissaat pillugit eqqumanerusoqalerpoq – tarningit tunniusimasorpassuit maanna periarfissaq manna pillugu qanoq qisuariassanerlutik isumaliutiginnittalereerput, allallu tikitassanut apuutereersimalerput, ingammik nunagisami iluanni inissiffissanut, taamaattoq aamma annertunerujartuinnartumik nunat tamalaat akornannut. Tassa tamakkuupput periarfissat assigiinngitsut iluanni, neriuutigisimasatsitut, ikinngutit sumiikkaluartulluunniit kaammattoqatigiinnerup anersaavanik peqarlutik takutitsineri. Inooqatigiit nukissaqarluartutut pilersitsivioreersimasut iluanniittut maannangaaq najugarisami allami ineriartornissaq qulakkeerniarlugu ikiuukkiartortalerput – sumiiffinni anguniagaqarfiusuni allani, nunap immikkoortortaanni, nunani nunavissuarnilu allaat – periutsitullu atortussat nutaat ungasissumiit apuuttakkat tikisaannut kajumissaataalluarsimasut malunnarput, misilittakkallu toqqaannartumik avitseqatigiissutaasareersimallutik. Massa sumiiffinni anguniagaqarfiusuni ilinniagaqarnissamut periaatsit pillugit tunngaviusumik periusiusartut ilinniarneqartartut, najugarisamut allanullu pilersaarusiat tusarliuttarniassagamikkik, tamannalu atugaaqaaq. Iluarisimaqaarput takugatsigu institutit ilinniarnikkut neqeroorutigisinnaasaat pillugit ilikkagaqarnissap annertusarneqarnissaa immikkut eqqumaffigineqarsimasoq. Institutimik ingerlatseriaaseq inooqatigiit akornanni sorlanilluarsimagaangat, tamatuma kinguneri annertungaartarput. Assersuutigalugu takusiuk, qanoq tamakkunani qitiusumik uummaarissumik sammisaqarfiusuni innuttaasa instituti sungiusarfik taanna namminneq sakkussamittut kimittuutut isigilersimagaat: sakkussallu tamatuma isumannaatsumik ineriartortinnissaa pingaarnertut akisussaaffigisutut isigilersimallugu. Ilisimalluarlugu Upperisap matui sukkulluunniit ammallutik qiveqqajuaannartuusut, uppertut inunnut iserterniarlutik piareeqqasunut qanoq kajumissaarisarnissamik ilinniarput. Tarningit taamaattut ingiaqatiginerat, alloriusarlu qarsullugu isernissaannut ikiuunneq, immikkut ataqqinaataavoq qiimasuutaallunilu pingaarutilik; kulturikkut pissutsit qanoq ikkaluarpataluunniit, taamatut ilisarinninnerup akuulersutullu misiginerup akisuanerata uummaarissup pissusia annertuumik ilikkagaqarfissaavoq. Taannaannaanngilarli. Sumiiffinni anguniagaqarfissatut siunniusimaffinni amerlasuuni inuiaqatigiit iluanni nutarsaanermut suleqataalluni allanngortitseqataaniarneq aatsaat aallarnisarneqaleruttorpoq, Nunanut Anersaakkut Isumasioqatigiiffiit, Siunnersortinit pillorissunit tapersersorneqartuarlutik, inuiaqatigiit iluanni pilersitseqataaniarluni suliniutit tamakku qanoq nassataqarumaarnersut eqeersimaartumik malinnaaffigaat. Inuit inuiaqatigiit iluanni timikkullu atugarissaarnissaat pillugu oqalliseqataanerit ilaqutariikkaartut nunaqqatigiillu akornanni siuarsarneqarput, ikinngutillu eqqaamiorisaminni qanittuni isumalinnik oqaloqatigiittarnernut pilersartunut akuunissaminnut periarfissarsiortarput.
Manna tikillugu eqqartoriikkatta akornanni inuusuttut iliuuserisartagaat qaammaarissumik
malunnaateqarluartuupput. Sunneeqataanissamut tunuarsimaanngilluinnarlutik – sunniutaat iluaqutaasimappata iluaqutaasimanngippataluunniit – Pilersaarusiamut kisittuunatik pitsaassusermillu pingaartitsisuullutik tapersersuisuusimapput. Inooqatigiit akornanni taamatut isigineqarlutik ineriartorfissaqartinneqartarsimagunik, inuusuttut taamatut tatigineqarsimanertik sipporlugu malunniuteqartarsimapput. Ikinngutiminnut Upperisamik ilinniartitsisarput kiffartuussinerlu aqqutigalugu tangilinnik suli ikinngutitaartortarlutik. Akuttunngitsumik taamatut kiffartuussitillutik imminnik nukarliunerusunik ilinniartitsisarput – ileqqussat pillugit anersaakkullu tunngasunik ilinniartiinnarnagit, aamma atuarneranni ikiortagarisarlugit. Institutip nukittorsarneqarnissaa pillugu pisussaaffimmik misiginermik illernartumik peqaqisut, Bahá’ít inuusuttaasa neriulluaativut piviusunngortippaat.
Ilungersuuteqarnerit tamakku avatangiiseraat ukiut unerisimanngiffiusorujussuit. Amerlaqi-
sunit nassuerutigineqartareerpoq inuiassuit maanna annikilliuutaasa aaqqiivigineqarnissaannut sakkussat pisariaqartut, nalitsinni inuiaqatigiit aaqqissugaanermikkut iluarsiivigissallugit piareersimaffiginagillu inorsarfigigaat. Siusinnerusukkut pissutsit qularnaatsutut nikisinneqarsinnaanngitsutullu isigisaagaluit, maanna nalitsinni apeqquserneqartalerput, tamatumalu kinguneranik aalassassimaarnerit pilersimasut pissutaallutik ataatsimut katinngatissamik isiginnittaaseqalernissamut erinisunneq pilersimavoq. Ataasiussuseq, naligiissuseq naapertuilluarnerlu tapersersorlugu oqariartuuteqartorpassuit takutippaat inuiaqatigiit iluminni aaqqissugaanermikkut amerlanerujartuinnartut qanoq pissutsit taakku atuutileqqinnissaat kissaatigitigigaat. Soorunami Kusanassutsimut Illernartumut malittaasumut tupinnarpallaanngilaq inuit uummataasa anersaakkut anguniakkanut Taassuma tikkuussimasaannut kipisattoqassappat. Taamaattoq tupigusuutigaarput, ukiumi inuiassuit ataatsimut ineriartorfissaraluat eqqarsaatigalugu aatsaat taama aarlerinartorsiorfiutigisumi, Upperisap qaamarnga tupaallannaannaqisumik akisussimammat ataatsimeersuarnerit titusintillit sinnerlugit ingerlanneqarsimasut aqqutigalugit, taakkununngalu inuit millionit aappaat avillugit amerlassusillit najuussimapput, tunaartarisassat pingaarutillit taakku qanoq siuarsarneqarsinnaanersut aqqutissiorniarlugit. Bahá’u’lláhp takorluugaa, inuiassuarnullu kaammattuutaa nunarsuarmi pissutsit pitsanngorsarnissaat pillugu ataasioqatigiillutik suleqatigeeqqullugit, tamanna qitiutillugu inuiaqatigiit iluanni assigiinngisitaartunik tunuliaqutaqartut kajumillutik katersuuffigisimavaat – tupigisassaanngeqaarlu, soorlumi ‘Abdu’lBaháp ima nassuiaatigigaa, “Nunarsuarmi inooqatigiit tamarmik Ilinniutini Guuterpaluttuni taakkunani angorusutatik qaffasinnerpaat piviusunngortut siumorumaarpaat.” Inuiassuarnik ajunngitsumik kissaateqartut ilaasa inooqatigiit Bahá’íusut qimarnguissatut kajungeralugu ussagarfigiumaarpaat, nunarsuarmit illuatungilersuullunilu avissaarfiusimasumit nukillaarsimasumillu oqquiartorfigalugu. Massa oqquiartorfiuinnarani, tarningit immisut ittut nunarsuarmik nutarteriniarlutik suleqatigiiffigigaat siumorumaarlugu.
Ataatsimeersuarsimanerit taakku nunarsuatsinni siammasissusiat pillugu annertuumik allaa-
tiginnittoqarsinnaagaluarpoq, Pilersaarusiamullu nutaamut immikkut qanoq siuariartortitsitigisimanersut, najuussimasullu najuussimanertik pillugu nuannaarnerminnik alutorsarnerminnillu oqaaserisimasaat. Taamaattoq titarnerni amerlanngitsuni makkunani Siunertap ineriartornera pillugu suna pingaartitarisimaneraat eqqartorusupparput. Inooqatigiittut Bahái’íusutut assigiinngissuseq salliutinnagu eqqarleriittut ataqatigiinnermik pingaartitsisuunerup ersersinneraat. Taamatut isiginneriaaseqarneq atorlugu Ukiunut Qulingiluanut Pilersaarusiaq qanimut qimerloorniarlugu katersuuttarput, tassanissaaq kikkut tamat tikilluaqqusaapput. Ikinngutit, inuit ataasiakkaat ilaquttatillu peqatigalugit, taamatullu najugarisaminni siuttuusut inuttullu oqartussaassuseqartut akuutillugit, Pilersaarutip inuiaqatigiit iluanni qanoq sunniuteqarumaarnissaa isumaliutigisimavaat. Inuit taama amerlatigisut sumiiffimmut ataatsimut katersuutinneqarnerat, anersaakkut inooqatigiinnikkullu ineriartorneq pillugu oqallinnermik ilukkut allanngortitsisinnaasumik pilersitsisimavoq, tamannalu nunarsuaq tamakkerlugu siammariartorpoq. Taamatut katersuuttarnerit, ataatsikkut ammasuullutillu killitsinnartuusut anguniagaqarfiusullu, immikkut tunniussinnaasaat tassaavoq inooqatigiinnut annertusisamik ineriartortunut, sumiiffinni anguniagaqarfiusunik taaneqartartunut, siunissaq eqqarsaatigalugu Bahá'ítut Aqutsisoqarfiit iluatinnaatilimmik ilinniarfigisinnaasaat.
Maanna upperlutik aalajaatsut Pilersaarusiap ukiuisa aappassaat iserterfigilerpaat, angunia-
gartik pillugu suliassamik pingaaruteqassusia nutaamik isigilersimallugu, itinerusumillu paasisaqarfigilersimallugu. Ila iliuusissat assigiinngitsut isikkussaat allaanerusaqaaq nalunngikkaanni nukik qanoq annertutigisoq pilersartoq inuiaqatigiit iluanni piorsaaniarluni suliassaq aallartinneqaraangat! Taamatut piumaartussat eqqarsaatigalugit avasinnerusumut alakkaamalernerup, suliniutit ingerlaavartut ataasiaannarluni kiffartuussinermit naleqqersornermillu annertunerusutut isigineqalernissaannik periarfissiivoq. Sumiiffinniit sumiiffinnut, pilersitsiniarluni suliniutigineqartut takutippaat innuttaasut namminneq ineriartornissaminnut aqqut ingerlaarfissartik pillugu akisussaaffimmik annertunerusumik tigusiniarlutik ilinniartut. Tamatuma kingunerisaanik anersaakkut inooqatigiinnikkullu nutarterneqarneq inuit inuuneranni assigiinngitsutigut malunniuteqartarpoq. Pilersaarusiani tapertariissuni siusinnerusuni tamanna malunniuteqarnerpaasarsimavoq anersaakkut ilinniarnerup siuarsarneqarneqarnertigut ataatsimoorlunilu qinoqatigiittarnikkut. Maanna Pilersaarusiani tapertariissuni nutaani makkunani, inooqatigiit inuunerisa pitsanngorsarneqarnissaat annertusarniarlugu periutsit allat ujartorneqalissapput – assersuutigalugu, innuttaasut peqqissutsimikkut pitsanngorsarneqarnissaat, avatangiisit innarlitsaaliorneqarnissaat, eqqumiitsuliornerullu sunniisinnaassusiata suli pitsaanerusumik atorluarneqarnerulernissaa. Tamakkulu inooqatigiit iluanni atugarissaarnissaq anguneqaqqullugu siuariartussappata, imminnullu tapertariissut tamakku piumasaqaataat assigiinngitsut piviusunngussappata, soorunami sammisani taakkunani tamani tulleriiaarluakkamik ilinniarnissamut piginnaaneqarneq pisariaqarpoq – taamatut piginnaaneqarnerup Ilinniutinit paasisimasaqarnermik inuiaallu ilisimatuussutsikkut paasisimasaannit katersanit ilisimasaqalersimanermik aallaaveqarpoq. Piginnaaneq taanna annertusiartuinnarpat, ukiuni qulikkaani aggersuni annertuumik angusaqarfiussaaq.
Taamatut inuiaqatigiit iluanni piorsaaniarluni annertusisamik takorluugaq imungarsuaq ki-
nguneqartussaavoq. Inooqatigiillu ataasiakkaarlutik namminneq tamatuma piviusunngortinnissaanut immikkut aqqutissaqarput. Taamatullu sumiiffimmi ataatsimi ineriartorneq sumiiffimmi allamiittup ineriartorneranut assigiissuteqartarpoq. Assigiissutaasut ilaat tassaavoq piginnaanerit annertusiartuinnartillugit najugarisami nunamilu piginnaatsit aamma annertusisarmata, piffissallu ingerlanerani, Mashriqu’l-Adhkárip toqqammavissaanut piumasaqaatit, soorlu ukioq 2012-imi Riḍvánimi nalunaarutitsinni eqqaagipput, naggataatigut piviusunngortinneqassapput. Soorlu Riḍvánimi kingullermi nalunaarutitsinni eqqaagipput, sukkut tamaana nalunaarutigisarumaarparput sumi Bahá’ítut Naalaffissuassaq napparneqassanersoq. Maannangaaq nuannaarutigeqalutigu nalunaarutigissavarput kaammattuutigigatsigu najugarisami Naalaffissuassat Kanchanpur, Nepalimi aamma Mwinilunga, Zambiami pilersinneqassasut. Tamatuma saniatigut kaammattuutigaarput nuna tamakkerlugu Naalaffissuassaq Canadami napparneqassasoq, Torontomi nuna tamakkerlugu Ḥazíratu’l-Qudsip qangali pilersinneqarsimasup qanigisaani. Suliniutit tamakku, allallu siunissami aallartinneqarumaartussat, Naalaffissuassanut Aningaasaateqarfimmit iluaquserneqarlutik tapersersorneqartarumaarput.
Naammangaarput Naalakkap saammaasup Asasaminut pilluaqqusaanerit tunniutissallugit
aalajangiussimasai. Qaaqqusineq qaffasingaarpoq, piumaartussallu alutornangaarput. Tamatta kiffartuusseqqusaalluta kajumissaarneqarnitta nalaani pissutsit nukinginnarluinnarput. Ilississaaq iliuutsisilu qasusuitsut sinnerlugit qinnutivut ilungersungaarput Bahá’u’lláhp Alloriusaata saavani taasavut.
- The Universal House of Justice