The Universal House of Justice
Ridván 2024
To the Bahá’ís of the World
Dearly loved Friends,
Ukiunut qulingiluanut suliniutip imaannaanngingaartup ukiui marluk pilertoqisumik tassa ingerlareerput. Anguniakkatut suliassartaanni Guutip ikinngutaasa aalajaatsumik isummersimallutik
angusaqarfiginiarlugit pimoorussisimapput. Inooqatigiit iluanni ineriartortitsinissap annertusarneqarnissaanut piumasaqaatit iternga tikillugu nutarterisussat suussusii Bahá’ít silarsuaanni tamani tamaani itinerujartuinnartumik paasisaqarfiuleriartuinnarput. Taamaattoq ullut makku taarseraattut ingerlanerini, uaguttaaq takusinnaavarput nunarsuarmi pissutsit tamaviaarnarsiartuinnartut, avissaartuunnerillu sakkortusiartuinnartut. Inuiaqatigiit nunallu akornanni pissutsit aarlerinarsiartuinnartut inunnik najugaqarfinnillu assigiinngitsorpassuartigut eqquinerluttarput.
Tamanna tarnimikkut nalunngissuseqartut kikkulluunniit qisuariarfigisariaqarpaat.
Ilisimaarilluarparput Aqqit Annersaata ataani inooqatigiissut inuiaqatigiit iluanni atugarliuutaasunit eqqornerlunneqanngitsoorunnanngitsut. Taamaattoq, naak atugarliuutinik tamakkuninnga eqqorneqarsimagaluarlutik, tamakku uisakajaarutiginngilaat; inuiassuit naalliuutaat pillugit aliatsaqqapput, taamaattoq nukillaarutiginagu. Qamannga pisumik aarleqquteqartuuneq taamaattoq kimitsisuuvoq pilertortumik ingerlaavartumillu inooqatigiit iluanni ikorfartuinissap pisariaqartup pilersinneqarnissaanut sakkussanik pilersitsinissamut, tassanimi inuiaqatigiit iluanni isumatsanneq neriunnermik taarserneqassaaq, akerleriinnerlu ataasioqatigiinnermik malitseqassallutik.
Shoghi Effendip ersarissumik eqqartorpaa “inuiassuarnut tunngassutillit ajorsiartuinnartut” pisumik allamik ingiaqateqartuunerarlugit, tassa akooqatigiilernermik, taannalu aqqutigalugu
“Umiarsuaq inuiassuit annaffissaat” , inuiaqatigiit “qimaaffittut ajaperfissaat pinngitsoortussaanngitsoq” pilersinneqariartortoq. Qiimmatsangaarluta nunani nunallu immikkoortoqarfiini tamani takusinnaavarput eqqissinissaq pillugu suliaqartut ilumoortut ajaperfissaq taanna pilersinniarlugu sulissutigigaat. Guutip asanninnera aqqutigalugu uummatit ikummarissarneqartut oqaluttuarisartagaanni tamani tamanna takusinnaavarput, ilaqutariit angerlarsimaffitsik ikinngutinut nutaanut ammaraat, suleqatigiit Bahá’u’lláhp ilinniutaannik sakkulerlutik isumaginninnikkut ajornartorsiutit sammigaat, inooqatigiit akornaminni tapersersoqatigiinnermik pilersitsisumik nukittorsaqatigiittarnermik kultureqalersut, eqqaamioriit nunaqarfeqatigiilluunniit namminneq anersaakkut timikkullu ineriartornissartik pillugu iliuusissat pisariaqartut aallarnisarnissaannut ataavartumillu ingerlannissaannut ilinniartut, najugarisarlu Anersaakkut Isumasioqatigiiffimmik pilersitsivigineqarluni pilluaqqusaasoq.
Pilersaarutip periusii sakkuilu ullutsinni inuiassuit pisariaqartitaannik ikorfartueqataanissamut pilersitseqataanissamullu tarnimut kimulluunniit sunneeqataanissamut periarfissiipput. Iluaalliuutinut massakkut atuuttunut utaqqiisaagallartumik aaqqiissutissaannik pilersitsiinnaratik, Pilersaarutip inuiaqatigiinni tamani inaarlugu piviusunngortinneqarnissaa sakkussaavoq ungasinnerusoq isigalugu kinguneqartussamik pilersitsivissaq, ilaatigut kinguaariit taarseraattut arlallit ingerlaneranni sunniuteqartussaq. Tamakku tamarmik
pinngitsoortussaanngitsumik nukingernartumillu pisariaqartitamut avaqqunneqarsinnaanngitsumut matumunnga tikkuussisuupput: Suliassaq tamanna iluatsittumik angusaqarluarfigineqassappat, inuit amerliartuinnartut piffissartik nukitsillu atorlugu suliap iluatsinnissaannut tamaviaarussillutik sulisussat ataavartumik sukkasuumillu amerlisinneqartariaqarput.
Sumi allami taamaallaat inuiassuit ataasiussusiat naqissuserlugu Bahá’u’lláhp tunngavissiaani nunarsuarmiut taama assigiinngiiaartigalutik ataasioqatigiinnissamut takorluukkamik taama alisitsigisumik pissaqaramik? Qanoq allatut assigiinngiiaartuugaluarluni ataasioqatigiinnermik aaqqissugaasutut takorluugaq piviusunngortissallugu timitalerneqarsinnaava nunarsuarmi inooqatigiinnikkut aseqqut avissaartuussutaasut katsorsaatissaat? Kina alla timiusamut seernarsaatitullusooq aqqutaasinnaava nunarsuarmi inuiassuarnut nutaamik inooriaaseqarnissamut nassaartitsissussaq, eqqissinermullu ataavartussamut aqqutissiuisussaq? Taamaattumik kikkunnut tamanut ikinngutinnernerup, peqatigiilluni ilungersoqatigiinnerup, kiffartuusseqatigiinnerup, peqatigiilluni ilinniarnerup assaa isaassiuk, ataatsimoorlusilu ingerlaaqatigigitsi.
Inuiaqatigiinni sumiikkaluartuniluunniit Bahá’u’lláhp takorluugaanik inuusuttut eqeersarneqarsimasut, Pilersaarusiamullu tapersersuisunngorsimallutik sunniutaannik inuummarissuseq nukittussuserlu annertooq pilersinneqarsimasoq arajutsisimanngilarput.
Taamaattumik inussiarnissuseq, sapiissuseq Guutimillu tatiginnilluinnassuseq annertooq atorlugit Bahá’ít inuusuttaat ilutiminnut saattariaqarput suliassamullu matumunnga ilutitik ilanngutsillugit! Kikkut tamarmik siammaatitissapput, kisianni inuusuttut aarsaarlutik qangatasariaqarput.
Maannakkut pisut nukinginnarluinnartuunerisa kiffartuussinerup tipaatsunnartua immikkoorutilik assersimanngilaat. Kiffartuusseqqusilluni kaammattuineq qaaqqusineruvoq qiimmaallannartoq pinngitsuugaqanngitsoq. Tarneq aalajaatsoq kinaluunniit tamatuminnga kajungilersinneqartarpoq, ernumanermik pisussaaffeqarnermillu nanertisimasoq allaat. Tarnerup aalajaatsup suliarisinnaasai qanoq ikkaluartulluunniit iluanni takuneqarsinnaasarpoq tunniusimassuseq itisooq, inuunerlu isukkarlugu inoqatit atugarissaarnissaannik soqutiginnittuussuseq. Piginnaatsit taamaattut inuunermut annertuumik piumasaqarfiusumut ataqatigiissitsilersarput. Uummammut ikualasumut kimulluunniit eqqaamasassat nuannernerpaat tassaasarput anersaakkut qatanngutinik inuiaqatigiinnut anersaakkut inuussutissameertunut isumaginnittunik peqateqartarsimanermit aallaaveqartut.
Ilerfini Illernartuni, uummatigut ulikkaangaaqqasut atorlugit, Bahá’u’lláh qutsavigaarput periutsini aqqutigalugit makitissimammasi sungiusarlusilu, qinnuigaarpullu pilluaqqusinerminik nasseqqullusi.
- The Universal House of Justice