The Universal House of Justice
Ridván 2025
To the Bahá’ís of the World
Dearly loved Friends,
Maanna Ukiunut Qulingiluanut Pilersaarutip aallartisarnerata killiffiata siulliup naanis- saanut ukioq ataasiinnanngulermat, qanoq ineriartorsimanerata nalunaarutiginissaa erinisuutigaarput - qanorlu ilungersuutit ataqqinarpaluttut takutinneqarsimasut assersuutissaalluartut aqqutigalugit, Upperisap takorluuilersitsinerata uummatit amerliartuinnartut neriuummik immersimatiginerai.
Ineriartornerup ingerlarnga suli annertusiartorpoq. Sumiiffinni assigiinngitsuni ajasoornaannartumik siumut alloriarnerujussuaq pisarsimavoq, ineriartorneq siornatigut takuneqarsimanngilaq, Upperisap inerittui nutaamik sikkertitersimapput, tarningillu amerlasuut suleqatiginissaannut piginnaaneqarneq saqqummeriartulersimavoq. Siuariartornerit tamakku amerlanertigut pisinnaasimapput pionerit tunniusimallutik, Naalakkaminnut asanninnermik uummatimikkut akisullutik, tupinnaannartumik amerlassusseqarlutik, illoqarfigisaminni nunanilu tamalaani kiffartuussillutik inissiffissaminnut kajumerlutik inissikkiartorlutik nukingertarsimammata. Sumiiffinni anguniagaqarfiusuni aaqqissuussamillu ineriartornissamut pilersaaruteqarfioreersuni, iliuusissiat timitaliinissamullu siunniussimasat aalajangeriikkat pinngorartitsinikkut isumassarsiullaqqissuseqartumillu qimerlooqqinneqarsimapput, taakku aqqutigalugit angusat aappaannut pingajuannullu ikinngutit anngussinnaaleqqullugit. Sumiiffinni anguniagaqarfiusuni nukittoreersuni, Upperisap inuiaqatigiit iluanni pilersitsisinnaassusiata kiminga takussaaleraluttuinnarpoq, Bahá’ítullu inooriaaseq nutaanngortitsisoq uummaarissorlu tarninit eqeersimaartunit amerliartuinnartunit atineqariartuinnarpoq.
Taamaanneranilu, inuiaqatigiit akornanni sunniiniarlutik suliniartunik peqateqartarneq malunnaatilimmik siuariarujussuarsimavoq. Najugaqarfinni timitaliinissamut siunniussimasat ilinniartitaanermut tunngassutillit sukkanerpaamik siuariarfiusimallutik, taamaattoq suliniutit allat aamma ineriartorsimapput, soorlu nunaateqarnermut tunngasut, peqqinnissaqarnerup iluani, avatangiisinut tunngasutillit, arnat oqartussaaqataalerneranni eqqumiitsuliornikkullu. Siuariartornerit taamaattut malunniuteqarnerpaapput sumiiffinni anguniagaqarfiusuni nukittunerpaani - nunaqarfinni eqqaamioriinnilu, allaat aqqusineqatigiittut illorsuarniluunniit inuttuujusuni - malunnartumik tassani najugaqartut Upperisap tunngaviisa tigussaasumik timitalerneqaraangata qiimmaallatsinneqartarmata. Sumiiffinni, pisortatigoortumik aqutsisut inuinnaallu akornanni meeqqat ilinniartinneqarnissaannut isumaginninnikkulluunniit ineriartortitsisut, Bahá’ínut saattalerput qanoq periuseqarnissamut ujartuiinnaratik aammattaaq suleqatiserinnittalerput aaqqiissutissanik ujaasillutik. Aammattaaq, nuannaarutigalugu takusinnaavarput nunagisami nunallu tamalaat akornanni oqallinnerup iluani Bahá’ít isiginnittaasiat isumaliuutigineqartaannalersoq nuannaartorineqariartuinnarlunilu.
Ukiunut Qulingiluanut Pilersaarutip toqqammavigaa ilinniarneq nunarsuarmut tamarmut atuuttoq isorartoqisorlu, allaat Boliviap qatsissortaani aamma Sydneyp illoqarfiata avataani atorluarsinnaasoq. Taamatut ilinniariaaseq periusissatut iliuusissatullu pilersaarusiornermik periarfissiisimavoq sumiikkaluaraanniluunniit tulluuttumik. Aaqqissuulluagaavoq; pisussanut tulluuttoq; tamanik pitarsisoq. Attaveqaqatigiinnermik pilersitsivoq, uummaarissumik susassareqatigiinnermik kinguneqartitsisoq, ilaqutariit akornanni, eqqaamioriit akornanni, inuusuttut akornanni, suliassamilu naalannartumi matumani siuarsaassallutik timitaliisut akornanni. Inooqatigiit ilippanaatinik ulikkaartut pilersittarpai. Siornatigut inuit peqatigiillutik qaffasissumik angusaqarusuttut, nunalli killingisigut, oqaatsitigut, kulturikkut atukkatigullu avissaangatinneqarsimagaluartut, Bahá’u’lláhp tamanut suaarutaanut “akornassinni ilungersoritsi pitsaanerusumik inuuneqalernissaq kipisuitsumik anguniaqqullugu” tusarsimasut qisuariarsimasullu akornanni angorusutaat naammassillugit eqquutitillugillu pisinnaatilersimavaat. Guutillu Oqaasianut nutaanngortitsillunilu tangeqaqisumut “kimittussusermut ataasiulersitsisumut”, “tarnerit aalaterneqaataannut inuiassuillu silarsuaannik ataqatigiissitsillunilu aaqqissugaanermik pilersitsisumut” attuumassuteqarluinnarpoq - taamatullu kipisuitsumik iliuuseqarnissamut isumassarsiffissatut toqqammavigisaanut.
Qilaap anorersuaruttulersup talornassusianut sanilliullugu tunniusimallusi iliuutsisi qanoq qaammaritsigalutik qillaritsiginnginnamik! Nunarsuarmi natsimanersuaqaleruttortoq, inuiassuit oqquiffissaat nunani, nunat immikkoortortaqarfiini sumiiffinnilu anguniagaqarfiusuni nappartiterneqaleruttorput. Taamaattoq suliassaqaqaaq. Pilersaarutip matuma aallartisarfiani nunat tamarmik immikkut ineriartornissaminnut isumalluaateqarput. Piffissaq ingerlavoq. Ikinngutit asasat, ilinniutinik guuterpaluttunik siammarterisut Kusanassutsillu Pilluaqqusaasup illersortai - ilungersuutisi maanna pisariaqartinneqarput. Pilersaarutip killiffiata aappaani angusariaqakkat pillugit, Riḍvánip tullissaanut qaammatit qaangiutilertortussat iluanni angusimasat suugaluartulluunniit Aqqip Annersaata malinnittaannut pitsaanerusumik sakkussaqalernissamik pilersuissapput. Angusaqarluarnermik tunineqarluarisitoq. Tamanna pillugu Naalagaq nalissaqanngitsoq qinnuigaarput Ikiuinerata kukkujuitsup najussagaasi; iluunngarlutalu Qinnuigaarput tamassi ataasiakkaarlusi Inngiliisa salliusut ikiorumaaraasi.
- The Universal House of Justice