The Universal House of Justice
Ridván 2017
To the Bahá’ís of the World
Dearly loved Friends,
Takusigit Aqqit Annersaata innuttai qanoq makerartiginersut! Pilersaarutip nutaap pileqqaarneranilli ukioq ataaseq qaangiutilersorlu, suliniuteqarluni misiliisarnerit angusarilikkallu qanoq annertutigilereersut nalunaarusiani takuneqarsinnaalerput. Sukumiisumik ineriartornissamut programmit 5.000-inik amerlassuseqartut annertusaavigineqarnerisa siusinnerusukkut takuneqarsimanngitsumik ilungersuuteqarnissaq pisariaqartippaat. Pilersaarusiap tunngavigisai suunersut paasilluarsimallugit, ikinngutit amerlasoorsuakkuutaarlutik piumasaqaatitaannut piviusunngortitsiniarlutik iliuuseqarput, qisuariarnermikkut nakimanatik pilliuteqartarlutillu. Soorlu siumut takorloorneqareersoq, sukumiisumik ineriartornissamut programmit maanna sivisuumik aallunneqalereersut ilisimasaqassutsikkut atortussatigullu aallerfissaalerput, najugarisami eqqaamiorisanut tapertaalerlutik paasisimasaqassutsip misilittagaqassutsillu sukkasuumik siammartiternissaanut aqqutissiuisumik. Qitiusumik aallussiviit uummaarissut taakku - eqqamioriinnut nunaqarfeqatigiinnullu innuttaaqataasut akornanni ineriartortitsiviusut – pikialaarfiupput tamat akornanni nutaanngulernissamut naggorissaasuulluartut. Siunnersortit ikiortaasa taakkulu tapersersortaasa toqqakkat amerlisarneqarsimasut uummaarissuseqartullu uppertut iliuuseriniagaannut qiimmassaasuupput, siuariartortitsinerup qanoq annertusarneqarnissaa pisartuni assigiinngitsuni qanoq aallunneqassanersoq takorlooruminarsarlugu, anguniagaqarfissatullu killilersugaasimasut nunap immikkoortortaani anguniagaqarfiusussallu akornanni periutsit taakkununnga tulluuttut qanoq ittuusinnaanersut nassuiaassutigisarlugit. Nuna Tamakkerlugu Anersaakkut Isumasioqatigiiffimminnit tapersersorneqarlutik Nunap Immikkoortortaanni Bahá’í-tut Siunnersuisoqatigiiffiit Pilersaarutip siumut ingerlaartuarnissaa anguniagaqarfissatut killilersugaasimasut akornanni ataatsikkut qanoq aallunneqarsinnaanersoq ilinniarpaat, nunani minnerusuni suli Siunnersuisoqatigiiffinnik peqanngitsuni, ingerlatsiviit nuna tamakkerlugu suliaqartussat aamma assingusumik suliaqalerput. Naak pisut ingerlaartut ingerlatseqqinneqartarnerini ilimagisariaqartutut allatulli siuariartarneq pilertoqisoq najukkani assigiinngitsuni malunnarsereeraluartoq, allani suli malunniutinngikkallarsimavoq, taamaattoq nunarsuarmi sukumiisumik ineriartornissamut programmit tamakkiisut amerliartorlutik ilaartortuarsinnarput. Aammattaaq nuannaarutigeqalugu malugisimavarput Pilersaarusiap aallartinneraniilli manna tikillugu immikkoortuini sisamani siullerni aallutassiaasutut aaqqissuussanut peqataasarneq malunnaqisumik annertusisimasoq.
Tamanna pillugu ukiumut aggersumut ilippanaateqalersut amerlaqaat. Tulluutissannginnerporlu Kusanassutsip Pilluaqqusaasup inunngornerata kingorna ukiut untritillit marluk qaangiuttullu Asannittaasa Upperisaata suli isorartunerusumut siammarsarneqarnissaa pimoorullugu sulissutigissappassuk? Tamakkulu pillugit Bahá’í-t silarsuaanni ukiut untritillit marlussuit nalliuttorsiutiginissaasa siulliat nalliussinerussaaq alutornaateqangaartunik imartussuseqartussaq. Qimerloorluassagutsigulumi, Bahá’u’lláhmut uummatinut attaveqartitsilernissaq ukioq manna nunarsuaq tamakkerlugu aatsaat taamak periarfissarissartigaaq. Qaammatini aggersuni kikkuttoq tamarmik periarfissaq iluatinnartoq tamanna isummaminniitittuarilissuk, Inuunera ajoqersuutaalu qaffasingaartoq allanut ilisarileqqullugu periarfissat suugaluartulluunniit atorluarnerisigut. Ilinniartitsinissamut periarfissaq maanna Bahá’í-t silarsuaanni annertunerpaamik atorluarniartussanngortoq eqqarsaatigalugu, inummik kinaagaluartumilluunniit oqaloqateqartarniaraanni tamanna isumassarsiorsinnaaneq tamatigoortoq atorluartarlugu pisariaqarpoq. Isumalimmik oqaloqatigiittarnerit taamaattut aallunneqartillugit paasinnissinnaassuseq ipinnerulertarpoq uummatillu ammanerulersarput – ilaatigut tassanngaannartumik pisinnaallutik allaat. Suliami nikagisassaanngitsumi taamaattumi kina kajumilluni aallussiumalertussaavoq, suliallu taamaattup nuannaarnartuanik kinaluunniit imminut arsaartariaqanngilaq. Asaneqartoq Taanna iluunngarluta qinnuigaarput ukioq manna ukiut untritillit marluk pillugit nalliuttorsiorfiusoq tamarmi qanortoq qiimanerup minguinnerpaap atoruminarnerpaallu pianik matuminnga pitarneqarili: Guutip Ulluata qaammalernera pillugu tarnimut allamut tusarliinermik.
Pisussaaffiit aalajaallutik uppertoqatigiit naammassisariaqagaat nukinginnarsinerupput suli nunarsuatsinni paatsiveerunneq, pasillerneq ularussinerlu atuukkiiartuinnartillugit. Ilumummi, ikinngutit periarfissaq sunaluunniit atorlugu qaamaneq aqqutissamut qaammarsaasussaq aarlerisunut oqilisaasussaq, ernumasunut neriunnermik tunisisussaq qinngortittariaqarpaat. Siunnersortip inooqatigiiusut Bahá’ít arlaannut siunnersuutigisimasaanut nalitsinni pissutsinut soorlumi naatsorsuussaasimasumut eqqaasinneqarpugut: ”Inuiaqatigiit nalitsinni aaqqissugaanerat pisut aarlerinartut ajunaarnerillu tamaviaarnartuisa artorsartitsinerisalu qulloortillugulu eqqakattaaraat, qulloornerit - naalagaaffiit, inuiaqatigiinni assigiinngitsunik inissisimaffillit, assigiinngitsunik ammimikkut qalipaatillit, uperisarsiortullu assigiinngitsut akornanni qunnertut avissaartuutsitsisut takussutissartaat ersarissisut amerliartuinnartillugit, Pilersaarusiamik piviusunngortitsisussat, anersaakkut inuunerminni aqutsisoqarfinnilu sulinerminni suli annertunerusumik ataqatigiissitsilissapput, ilungersuuteqarnerminnilu suli pitsaanerusumik tamaviaarnerunertik takutillugu, imminnut ikioqatigiinnikkut, ataqatigiillutillu suliniuteqaraangamik oqimaaqatigiissumik ineriartortitsillutik.” Upperisarput pillugu suliaqarnitta anersaakkut pingaaruteqassusia erseqqissartuarlugu, uppertullu pisussaaffimmik illernartunik aalajangiusimalluinnarlutik
naammassinninnissaat kaammattuutigalugu, aammaarluni Shoghi Effendi politikkikkut saqitsaattunut, ilattooqqasunut oqqaterujoortunullu akooqqusinani sianisaaqqusivoq ima: ”Illuinnaasiorniarnernit, (partiilersorluni) immikkoorniartuunernit tamaasa qarsutissavaat,” allatigullu aamma ima kaammattuilluni, ”assortuunnerit imaqanngitsut, nalilersuinerit paatsiveerussaarisut, tiguartisimasarnerit qarsupittut nunarsuup allanngoriartortuartup saavani aalassassaaralutik tiguaallutik uungaannaq isigilersitsisartut ningortersigit.” Tamakku tassaapput mallit qaffianerisa qapunnersui serpalinnerilu pinngitsoortussaanngitsut inuiaqatigiinnut avissaartuussimallutik sakkortuumik aalaruluttartunut mallisut qaraartuartut. Tamakkununnga tiguartisimanissamut navianarluinnarpoq. Soorlu Bahá’u’lláhmut malinnittup kialuunniit nalunngilluaraa, inuiassuit naggataatigut atugarissaarnissaat aaqqiagiinnginnerit akimorlugit ataasiussusiata qajannaatsumik tunngavilerneqarsimaneraniippoq. Bahá’íusup kialuunniit inuiaqatigiinnut najortigisami inuunerannut tapersiilluni tunniussassaraa ataasioqatigiinnermik pilersitsinissaq; nunaqqatigiissut akornanni nappaaqataaniarluni suliniut sunaluunniit tassunga aamma siunnerfeqartuuvoq. Saqitsaattunut qatsussisimasunut Aqqit Annersaata alannguani inooqatigiit siuariartortut ataasioqatigiinnerup qanoq angusaqarsinnaasusianik assersuutissatut kimittuumik sassaalliutissaqarput.
Naalakkat Naalagaat unnersiorfigaarput Asasaasa qanoq amerlatigisut assigiinngitsorpassuartigut inuiassuit ataasiussusiata erfalasuat qutsissumut qullarniarlugu imminnut tunniulluinnarsimatigissusiat isigigatsigu. Ikinngutit iluatinnangaartusi: Ukiup annertuumik iluanaarnartussap maanna aallartilernerani, tamatta minitaqarata isumaliutigissannginnerparput ileqqorissutsit qilammiorpaluttut Saammaannerata tunniukkumaagassai ikiorsiullugit angusaqarfigisinnaasavut suunersut?
- The Universal House of Justice