The Universal House of Justice

Ridván 2004

To the Bahá’ís of the World

Dearly loved Friends,

Ukiunut Tallimanut Pilersaarusiap ukiuisa pingajuat qaangiuteqqammivoq. Pisut Ukiunut

Sisamanut Pilersaarusiami aallartisarneqarsimasut, meeqqat ilinniartitaanerat immikkut pimoorullugu aallunneqalerneratigut Qaammatit Aqqaneq Marlunnut Pilersaarusiap ingerlanerani nukittorsarneqarsimasut ukiunilu kingullerni qasusuilluni pimoorussinikkut ilaartorneqarsimasut, maanna aallartinneqaqqaarmat ilimasuutit annertungaartut eqquutitillugit piviusunngortitilerput. Nunarsuarmi piffinni suniluunniit Pilersaarusiap immikkoortui pingasoqiusut tassaasut inuk, nunaqqatigiit aqutitsiviillu – tamarmik immikkooruteqartumik ingerlaaseqaraluarlutik imminnut pisuttorsaqatigiipput. Qitiusumik sammisaqarfiit tassaasut ilinniaqatigiittarnerit, meeqqanut klassit qinoqatigiittarnerillu pingaaruteqartunngorsimapput imminnut ikorfartoqatigiittut Bahá’í-tullu inooqatigiinnermut uummarissaasunngorlutik ingerlalluartitsisunngorlutillu. Nukiit inunniit pisut malunniukkiartuinnalersimapput Illoqarfinnilu Anersaakkut Isumasioqatigiiffiit uummarissusermut tamatumunnga annertusiartuinnartumut qisuariartalersimallutik.

Nunarsuaq tamakkerlugu piginnaaseq meeqqanut bahá’í-tut perorsarneqarnissaannut ineritikkiartorneqarsimasoq tupinnaannartumik ajasoornarpoq. Inuusuttuaranngulersut anersaakkut inuunerannik nukittorsaaniarneq aallarterlaaq iluatsilluartumik ingerlavoq. Eqimattakkuutaat sammisaqartarnermikkut annertunerusumut appakaakkiartortarnerat aqunneqarnerusumik ingerlalersimavoq siuariartuinnarnerallu ilutigalugu inuit Bahá’í-unngikkaluarlutik pilersaarutip sammisaqartitsinerinut qitiusunut uummaarillutik peqataasartut amerliartuinnalersimapput uppertutullu nalunaarsimasut akornannut ikaarsaartitilersimallutik. Immikkoortortaqarfinni siuarsimanerusuni aqutsinikkut annertuumik ineriartornissamut ilutsit malunniukkiartuinnarput. Naak Nuna Tamakkerlugu Anersaakkut Isumasioqatigiiffiit nunani akisussaaffigisami iluanni pisariaqartitat tamaasa isumagisaralugit ingerlatsiuaraluarlutik, immikkut pingaartitaralugit qimerloortariaqagassatik suunersut ilikkariartulersimavaat taakkulu kaammattortuarlugit ineriartortitaralugit inuttut nukiit sungiusarluni kursuseqarnikkut ineriartortissimasat imminut nammassinnaasumik pilertortumillu ineriartornissamut qitiusoqarfinngortissimavaat.

Soorlu siumut takorloorneqarsimasutut, sungiusarluni institutseqartarnerit ineriartornissamut aqqutissiuussisuusimapput. Nuna Tamakkerlugu Anersaakkut Isumasioqatigiiffiit amerlanerujussuit nunat isumagisamik pisariaqartitaat periarfissallu nalilersortarnerisigut Ruhi Institutsip kursuserutissaliai atortussamissut toqqarsimavaat pilersaarutip pisariaqartitaannut tulluunnerusutut nalilertaramikkit. Tamanna iluatsittumik nassataaqarsimavoq, tassami atortussat assigiiaarpassuit oqaatsinut amerlasoorsuarnut maanna nutserneqarsimalermata, Bahá’í-llu sumulluunniit nunarsuarmi appakaakkaluarunik ikinngumminnik siumuisaraat aqqumik assingusumik atugaqartunik atuakkallu aamma periutsit namminneq ilisimaarisatik immisulli ilisimasaqarfigineqartut siumortarlugit.

Nunat tamalaat akornanni inuiaat sammiveerussimasut isummersoriaatsinik soqutigisanillu imminnut akerleriittunik avissaartitersimasunik, qunusiarinninnikkut anguniagaqartunik saassunneqariartuinnarnermik, inatsisaatsuliorfigineqariartuinnarnermik, atorfinni ileqqorlunnermik, aningaasarsiornikkut ingerlanerup isasoorneranik mangiartorneqarlutik, piitssuussutsimik nappaatinillu saassunneqarput. Tamakku tamarmik qeqqanni inooqatigiit Bahá’í-t saqqummeraluttuinnarput, takorluukkamik guuterpaluttumik kiminneqartumik aalajaatsumik toqqammaveqartumik tunngaveqarlutik nukittoriartuinnarput, pisut maanna inissititereersimasut aqqutigalugit kinguariartutullusooq misiginartartut misigititsinerannik nikallortinneqaratik. Bahá’í-t silarsuaata pisunut siumut ilimaginngisanut qisuariarsiunnaasusia siorna takutinneqarpoq, taamani ulorianartut arlalissuit pissutigalugit Nunarsuaq Tamakkerlugu Bahá’í-t Ataatsimeersuarnerat taamaatiinnarneqartariaqarpoq; taamaattoq Silarsuarmi Naapertuilluarnerup Illua pissusissamisoortumik qinerneqarpoq Pilersaarullu quaaqqajaanngitsumik ingerlajuarsinnarpoq. Tassungalu atatillugu, naak Irak-imi paatsiveerunnersuaqarlunilu isasoorneqaraluartoq, nunami tassani Bahá’í-t attavigineqarsinnaanngorsimapput Illoqarfinnilu Anersaakkut Isumasioqatigiiffiit pilersinneqarsinnaanngorsimallutik. Maannalu nuannaaqaluta nalunaarutigissavarput Ridvánimi maani Irak-imi Nuna Tamakkerlugu Anersaakkut Isumasioqatigiiffik, ukiuni 30- ini ipisaanngunartumik naqisimaneqarsimareerluni, maanna nunat tamalaat akornanni Bahá’íeqatigiit akornanni inissisimaffissani tulluuttoq atorsinnaalermagu.

Killiffimmi matumani Pilersaarutip Guuterpaluttup pisariaqartitaa tassaavoq uagut, tatiginnilluta uummaarillutalu maanna siunnersimaffigisatsinnut ingerlaartuassasugut, inuiassuit silarsuaannut anorersuit torartuartut merserinatigit. Qularinngikkisiuk Kusanassutsip Pilluaqqusaasup alloriarnissasi aqqutissiorumaarmagit Katersaarsuillu Qutsinnerussaartumiittut Upperisaata siumukartinnissaanut ilungersuutisi tamaasa nukissamik tuniorartuarumaarmatigit.

- The Universal House of Justice