The Universal House of Justice

Ridván 2005

To the Bahá’ís of the World

Dearly loved Friends,

S

Ukiut ilusilersorfiusut tallimassaasa aallartinneranni bahá’í-t silarsuaanni saqqummerarnerit pilersimasut annertuumik uagutsinnik nuannaartitsisuusimapput. Qaammatittaaq aqqaneq marluk qaangiuttut aamma taamatut issimapput. Inooqatigiit Bahá’ít tulleriissaakkamik siuariartornerat ingerlaavarsimavoq maannalu Ukiunut Tallimanut Pilersaarusiap ukiuisa kingullersaat aallartittorlu nukittussutsimik malunnarluinnartumik peqarluni inissisimaffeqarpoq – nukittussuseq tamanna ikinngutit tamanit tamaaneersut amerlasoorsuakkuutaarluni isaasoqalernissaa aqqutissiorniarlugu pilersaarusiorluarlutik pimoorussisimanerannit pissuteqarpoq.

Naak ineriartornerup maanna atuuttup pingaaruteqassusia nassuitsumik suli qulaajarneqarsinnaanngikkaluartoq kisitsisit maanna anguneqareersimasut ilaat takussutissaqartilereerpaat. Inuttut nukiit Upperisap iluani atorneqartussat ingerlaavartumik annertusiartuinnarsimapput. Nunarsuaq tamakkerlugu 200.000-it sinnerlugit maanna Ruhi

Institutsip Atuagartaa siulleq sammisarereersimavaat aammalu tusintillit arlallit sammisaqaqatigiit nunarsuaq tamakkerlugu akulikikkiartuinnartumik ingerlanneqartartut iluanni ilitsersuisutut suliaqarsinnaalersimapput, kingullermik kisitsisoqarmat 10.000-inik sinnillit kisinneqarsimapput. Qitiusumik sammisaqarfiusuni paasiniaallutik akuusartut suli amerliartuinnarsimapput maannalu qaammatit arlalinngortut qaagiummatali 100.000- it qaangereersimavaat. Aammattaaq maanna immikkoortortaqarfiit 150-it ima ineriartorsimatigilersimapput amerliartorluni ineriartornissaq anguniarlugu suliniutit aallartereersimallutik piareersimasunngorsimallutilluunniit. Maannakkut ilimanaatit takussagaanni ilimagineqartariaqalerpoq taakku amerlassutsimikkut Pilersaarutip naalernerani suli annertuserujussuartussaasut.

Suiliniutit tamakku nersualaarutigalugit eqqartornerini aammattaaq tulluusimaarutissatut eqqaasariaqarpoq ilikkagaqassutsikkut siuarsimaneq tamakkununnga tunngaviusuusoq.

Immikkoortortaqarfinni ineriartornissap aqqutissiornissaanut sakkussaajuarsimavoq pimoorussilluni institutsini sungiusaanerup pissusissamisoortup pingaartitariuarneqarsimanera. Pissutsit pisariaqartut takkussimalernerini Upperisap siammartiterneqarnissaa nukittorsarneqarnissaalu anguniarlugit aallutat tulleriissaakkamik aaqqissuulluagaasut pisariaqartitat naapertorlugit aallartinneqartarsimapput. Pimoorussilluni sammisaqartarnerit annertusiartortarnerisa pissusianut ilisimalikkat iluatinnaatillit annertuut katersorneqarput, ilungersuuteqartarnerillu pissuserisartagaat aalajangersimasut aatsaat maanna iluamik paasineqartalerput. Sammisaqartarnerit immikkoortunut assigiinngitsunut avititerneqarsinnaasarput, taakkulu tamarmik qaammatinik arlalinnik sivisussuseqartarput, pilersaarusiornermut, siammartiternermut nukittorsaanermullu atorneqartartut. Inuttut nukiit pisariaqartitat ineriartortinneqarnerat kipisuitsumik immikkoortup aappaaniit tullianut ingerlaavartarput siammartiterineq taamaalillugu tunngavissalersortarlugu kisiannili aamma siuariartorneq annertusartarlugu. Naak tamakku pillugit ilisimasassanik suli annertuumik katersisoqartussaagaluartoq suli, misilittakkat maanna pigileriikkat naapertorlugit periuseq tamanna nunarsuarmi nunani allani immikkoortortaqarfinni suli amerliartuinnartuni assilillugu periusinngortinneqarsinnaanngussaaq.

Ilumut qiimmaallaatissaavoq ajugaanerit angusimasat pitsaassutsikkut annertussutsikkullu uuttorneqarsinnaammata. Angusat tamarmik qiterpiaanniippoq inooqatigiit Bahá’í-t inuuneranni sumiluunniit anersaakkut inuunerisa nukittorsariartorneqartuinnarnera. Anersaakkut uummarissuseq nutaaq tamanna qinoqatigiilluni naapeqatigiittarnerit, meeqqanut klasseqartitsisarnerit inuillu assigiinngitsunik tunuliaqutaqartuusaraluarlutik peqatigiillutik sammisaqaqatigiittarnerisa, amerlasuutigut Bahá’u’lláhp nalitsinni Guutip saqqummersimaneratut ilisarinninnermut

Upperisamullu ilannguttarnermik kingunertartartup, suli amerliartuinnarnerinut tunuliaqutaavoq.

Nunarsuarmi Qitiusiusoiqarfimmissaaq nutaanik ineriartortoqarpoq. Huqúqu’lláhp nunarsuaq tamakkerlugu sinniisuinik pilersitsisoqassasoq piffissanngortutut nalilersimavarput, taakkulu nunarsuaq tamakkerlugu Huqúqu’lláhp nunap iluani nunallu immikkoortortaqarfiini sinninniisuisa suliaannik siunnersuisuullutillu nakkutilliisuussapput. Taakku Huqúqu’lláhp sinniisuunerat Siunertap Assaa Alí-Muhammad Varqá, qanittumik suleqatigissavaat, taassumalu ilisimasai siunnersuisarneralu pisussaaffimminnik ingerlatsinerminni iluaqutigissavaat. Nunarsuaq tamakkerlugu sinniisussatut maanna toqqarneqarsimalersut pingasuusut tassaapput Sally Foo, Ramin Khadem aamma Grant Kvalheim. Qanoq sivisutigisumik kiffartuussissanersut kingusinnerusukkut nalunaarutigineqassaaq. Ilaasortanngortut Nunamut Iluartuutitamut nuussanngillat, kisianni Nunarsuarmi Qitiusoqarfiup Huqúqu’lláhmut allaffeqarfiata kiffartuussisarneri pisussaaffimminnik suliaqarnerminni ikiortigissavaat.

Siunertaq sammivinnut tamanut inissisimaffinnilu tamani maanna malunnartumik siumukariartorpoq – inuinnaat akornanniit aqutisivittut nunarsuaq tamakkerlugu ineriartornermi siammartiternermi nukittorsaanermilu malunnarluni. Inooqatigiit taamatut neriulluarnartigisumik ataqatigiikkiartuinnarnerat malunniuppoq nunarsuarmi inuiaqatigiit suli kinguariartuinnarnerannut takussutissat ajoraluartumik uppernasineqariartuinnarneqarnerisa nalaanni. Nunarsuaq ileqqorlussutsimit qerattartinneqarsimasup aserfallakkiartuinnarneranut takussutissat maani eqqartussallugit pisariaqanngilaq. Taamaattoq puigortariaqanngilaq pissutsit taakkorpiaat tassaammata ilinniutit malussarfigineruneqalernerannut aqqutissiuisuusut sulilu siammartiternerunissaannut periarfissiisuullutik.

Upperisap ukiuni ilusilersorfiusuni untritillit siulliit ukiuisa kingulliini suliniutissat ingerlatsisussat assigiinngitsut innersuutigaagut. Tassani pingaartillugu eqqaavarput pilersaarut suliarisaq sunaluunniit qitiusumik sammisaqassasoq, tassalu amerlasoorsuakkuutaarluni isaatitsilernissaq. Pilersaarutini taamaattuni siulliusoq tassaavoq Ukiunut Tallimanut Pilersaarusiaq, maanna qaammatit sivikitsuinnaat aqqaneq marluk qaangiuppata naasussanngortoq. Taakku qaangiuppata aamma Bahá’u’lláhp malinnittai kaammattortussaavagut nutaanik pilersaarusioqqullugit ukiunik tallimanik sivisussusilimmik. Tamanna pitinnagu Ikinngutit peqqussavagut tulleriissaakkamik aaqqissuussamik ilinniarneq, Nunarsuaq Tamakkerlugu Ilinniartitsinissamut Qitiusoqarfiup tapersersorneqaqisoq, piviusunngortinniarlugu pilersitsinissamut aalajangiusimallutik nukiit tamaasa atorlugit ilungersuuteqaqqullugit. Bahá’íp kinaagaluartulluunniit periarfissaq iluatinnartoq tamanna Pilersaautip sinneruttup pilersitaa, Ridvánip tullissaani suli anguniagaqarnerusumik aallartitsivissaq, sapangissanngilaa. Ilerfit Illernartut saavanni qinnutitta qamanngavik pisut tamassi poorumaarpaasi.

- The Universal House of Justice